੮. ਆਨਾਪਾਨਸ੍ਸਤਿਸੁਤ੍ਤਵਣ੍ਣਨਾ

੧੪੪. ਪੁਬ੍ਬੇਨਾਤਿ ਨਿਸ੍ਸਕ੍ਕੇ ਕਰਣਵਚਨਂ. ‘‘ਅਪਰਂ ਵਿਸੇਸ’’ਨ੍ਤਿ ਵੁਤ੍ਤਤ੍ਤਾ ਵਿਸੇਸਵਿਸਯੋ ਚ ਪੁਬ੍ਬਸਦ੍ਦੋਤਿ ਆਹ – ‘‘ਸੀਲਪਰਿਪੂਰਣਾਦਿਤੋ ਪੁਬ੍ਬਵਿਸੇਸਤੋ’’ਤਿ.

੧੪੫. ਆਰਦ੍ਧੋ ਯਥਾਨੁਸਿਟ੍ਠਂ ਪਟਿਪਤ੍ਤਿਯਾ ਆਰਾਧਿਤੋ. ਯਦਤ੍ਥਾਯ ਸਾਸਨੇ ਪਬ੍ਬਜ੍ਜਾ, ਵਿਸੇਸਾਪਤ੍ਤਿ ਚ, ਤਦੇਵੇਤ੍ਥ ਅਪ੍ਪਤ੍ਤਨ੍ਤਿ ਅਧਿਪ੍ਪੇਤਂ, ਤਂ ਝਾਨਵਿਪਸ੍ਸਨਾਨਿਮਿਤ੍ਤਨ੍ਤਿ ਆਹ – ‘‘ਅਪ੍ਪਤ੍ਤਸ੍ਸ ਅਰਹਤ੍ਤਸ੍ਸਾ’’ਤਿ. ਕੋਮੁਦੀਤਿ ਕੁਮੁਦਵਤੀ. ਤਦਾ ਕਿਰ ਕੁਮੁਦਾਨਿ ਸੁਪੁਪ੍ਫਿਤਾਨਿ ਹੋਨ੍ਤਿ. ਤੇਨਾਹ – ‘‘ਕੁਮੁਦਾਨਂ ਅਤ੍ਥਿਤਾਯ ਕੋਮੁਦੀ’’ਤਿ. ਕੁਮੁਦਾਨਂ ਸਮੂਹੋ, ਕੁਮੁਦਾਨਿ ਏਵ ਵਾ ਕੋਮੁਦਾ, ਤੇ ਏਤ੍ਥ ਅਤ੍ਥੀਤਿ ਕੋਮੁਦੀਤਿ. ਪਵਾਰਣਸਙ੍ਗਹਨ੍ਤਿ ਮਹਾਪਵਾਰਣਂ ਅਕਤ੍ਵਾ ਆਗਮਨੀਯਸਙ੍ਗਹਣਂ.

ਆਰਦ੍ਧਵਿਪਸ੍ਸਕਸ੍ਸਾਤਿ ਆਰਭਿਤਵਿਪਸ੍ਸਨਸ੍ਸ, ਵਿਪਸ੍ਸਨਂ ਵਡ੍ਢੇਤ੍ਵਾ ਉਸ੍ਸੁਕ੍ਕਾਪੇਤ੍ਵਾ ਵਿਪਸ੍ਸਿਸ੍ਸ. ਭਿਕ੍ਖੂ ਇਧ ਓਸਰਿਸ੍ਸਨ੍ਤਿ ਵੁਤ੍ਥਵਸ੍ਸਾ ਪਵਾਰਿਤਪਵਾਰਣਾ ‘‘ਭਗਵਨ੍ਤਂ ਵਨ੍ਦਿਸ੍ਸਾਮ, ਕਮ੍ਮਟ੍ਠਾਨਂ ਸੋਧੇਸ੍ਸਾਮ, ਯਥਾਲਦ੍ਧਂ ਵਿਸੇਸਞ੍ਚ ਪਵੇਦਿਸ੍ਸਾਮਾ’’ਤਿ ਅਜ੍ਝਾਸਯੇਨ. ਇਮੇ ਭਿਕ੍ਖੂਤਿ ਇਮੇ ਤਰੁਣਸਮਥਵਿਪਸ੍ਸਨਾ ਭਿਕ੍ਖੂ. ਵਿਸੇਸਂ ਨਿਬ੍ਬਤ੍ਤੇਤੁਂ ਨ ਸਕ੍ਖਿਸ੍ਸਨ੍ਤਿ ਸੇਨਾਸਨਸਪ੍ਪਾਯਾਦਿਅਲਾਭੇਨ. ਅਪਲਿਬੁਦ੍ਧਨ੍ਤਿ ਅਞ੍ਞੇਹਿ ਅਨੁਪਦ੍ਦੁਤਂ. ਸੇਨਾਸਨਂ ਗਹੇਤੁਂ ਨ ਲਭਨ੍ਤਿ ਅਨ੍ਤੋਵਸ੍ਸਭਾਵਤੋ. ਏਕਸ੍ਸ ਦਿਨ੍ਨੋਪਿ ਸਬ੍ਬੇਸਂ ਦਿਨ੍ਨੋਯੇਵ ਹੋਤਿ, ਤਸ੍ਮਾ ਸੁਤਸੁਤਟ੍ਠਾਨੇਯੇਵ ਏਕਮਾਸਂ ਵਸਿਤ੍ਵਾ ਓਸਰਿਂਸੁ.

੧੪੬. ਅਲਨ੍ਤਿ ਯੁਤ੍ਤਂ, ਓਪਾਯਿਕਨ੍ਤਿ ਅਤ੍ਥੋ, ‘‘ਅਲਮੇਵ ਨਿਬ੍ਬਿਨ੍ਦਿਤੁ’’ਨ੍ਤਿਆਦੀਸੁ (ਦੀ. ਨਿ. ੨.੨੭੨; ਸਂ. ਨਿ. ੨.੧੨੪, ੧੨੮, ੧੩੪, ੧੪੩) ਵਿਯ. ਪੁਟਬਦ੍ਧਂ ਪਰਿਹਰਿਤ੍ਵਾ ਅਸਿਤਂ ਪੁਟੋਸਂ ਅ-ਕਾਰਸ੍ਸ ਓ-ਕਾਰਂ ਕਤ੍ਵਾ. ਤੇਨਾਹ ‘‘ਪਾਥੇਯ੍ਯ’’ਨ੍ਤਿ.

੧੪੭. ਵਿਪਸ੍ਸਨਾ ਕਥਿਤਾਤਿ ਅਨਿਚ੍ਚਸਞ੍ਞਾਮੁਖੇਨੇਵ ਵਿਪਸ੍ਸਨਾਭਾਵਨਾ ਕਥਿਤਾ. ਨ ਹਿ ਕੇਵਲਾਯ ਅਨਿਚ੍ਚਾਨੁਪਸ੍ਸਨਾਯ ਵਿਪਸ੍ਸਨਾਕਿਚ੍ਚਂ ਸਮਿਜ੍ਝਤਿ. ਬਹੂ ਭਿਕ੍ਖੂ ਤੇ ਚ ਵਿਤ੍ਥਾਰਰੁਚਿਕਾਤਿ ਅਧਿਪ੍ਪਾਯੋ. ਤੇਨਾਹ ‘‘ਤਸ੍ਮਾ’’ਤਿਆਦਿ.

੧੪੯. ਸਬ੍ਬਤ੍ਥਾਤਿ ਸਬ੍ਬਵਾਰੇਸੁ. ‘‘ਤਸ੍ਮਾ ਤਿਹ, ਭਿਕ੍ਖਵੇ, ਵੇਦਨਾਨੁਪਸ੍ਸੀ’’ਤਿਆਦੀਸੁਪਿ ਪੀਤਿਪਟਿਸਂਵੇਦਿਤਾਦਿਵਸੇਨੇਵ ਵੇਦਨਾਨੁਪਸ੍ਸਨਾਯ ਵੁਤ੍ਤਤ੍ਤਾ, ‘‘ਸੁਖਵੇਦਨਂ ਸਨ੍ਧਾਯੇਤਂ ਵੁਤ੍ਤ’’ਨ੍ਤਿ ਆਹ. ਸਤਿਪਟ੍ਠਾਨਭਾਵਨਾਮਨਸਿਕਾਰਤਾਯ ਵੁਤ੍ਤਂ – ‘‘ਸਾਧੁਕਂ ਮਨਸਿਕਾਰ’’ਨ੍ਤਿ. ਸਞ੍ਞਾਨਾਮੇਨ ਪਞ੍ਞਾ ਵੁਤ੍ਤਾ ਤੇਸਂ ਪਯੋਗਤ੍ਤਾ. ਮਨਸਿਕਾਰਨਾਮੇਨ ਵੇਦਨਾ ਵੁਤ੍ਤਾ, ਭਾਵਨਾਯ ਪਰਿਚਿਤਤ੍ਤਾ ਆਰਮ੍ਮਣਸ੍ਸ ਮਨਸਿਕਾਰਨ੍ਤਿ ਕਤ੍ਵਾ. ਵਿਤਕ੍ਕਵਿਚਾਰੇ ਠਪੇਤ੍ਵਾਤਿ ਵੁਤ੍ਤਂ ਵਚੀਸਙ੍ਖਾਰਤ੍ਤਾ ਤੇਸਂ.

ਏਵਂ ਸਨ੍ਤੇਪੀਤਿ ਯਦਿਪਿ ਮਨਸਿਕਾਰਪਰਿਯਾਪਨ੍ਨਤਾਯ ‘‘ਮਨਸਿਕਾਰੋ’’ਤਿ ਵੁਤ੍ਤਂ, ਏਵਂ ਸਨ੍ਤੇ ਵੇਦਨਾਨੁਪਸ੍ਸਨਾਭਾਵੋ ਨ ਯੁਜ੍ਜਤਿ, ਅਸ੍ਸਾਸਪਸ੍ਸਾਸਾ ਹਿਸ੍ਸ ਆਰਮ੍ਮਣਂ. ਵਤ੍ਥੁਨ੍ਤਿ ਸੁਖਾਦੀਨਂ ਵੇਦਨਾਨਂ ਪਵਤ੍ਤਿਟ੍ਠਾਨਭੂਤਂ ਵਤ੍ਥੁਂ ਆਰਮ੍ਮਣਂ ਕਤ੍ਵਾ ਵੇਦਨਾਵ ਵੇਦਿਯਤਿ, ਵੇਦਨਾਯ ਏਕਨ੍ਤਭਾਵਦਸ੍ਸਨੇਨ ਤਸ੍ਸ ਵੇਦਨਾਨੁਪਸ੍ਸਨਾਭਾਵੋ ਯੁਜ੍ਜਤਿ ਏਵਾਤਿ ਇਮਮਤ੍ਥਂ ਦਸ੍ਸੇਤਿ. ਏਤਸ੍ਸ ਅਨੁਯੋਗਸ੍ਸ.

ਦ੍ਵੀਹਾਕਾਰੇਹੀਤਿ ਯੇ ਸਨ੍ਧਾਯ ਵੁਤ੍ਤਂ, ਤੇ ਦਸ੍ਸੇਨ੍ਤੋ ‘‘ਆਰਮ੍ਮਣਤੋ ਅਸਮ੍ਮੋਹਤੋ ਚਾ’’ਤਿ ਆਹ. ਸਪ੍ਪੀਤਿਕੇ ਦ੍ਵੇ ਝਾਨੇਤਿ ਪੀਤਿਸਹਗਤਾਨਿ ਪਠਮਦੁਤਿਯਜ੍ਝਾਨਾਨਿ ਪਟਿਪਾਟਿਯਾ ਸਮਾਪਜ੍ਜਤਿ. ਸਮਾਪਤ੍ਤਿਕ੍ਖਣੇਤਿ ਸਮਾਪਜ੍ਜਨਕ੍ਖਣੇ. ਝਾਨਪਟਿਲਾਭੇਨਾਤਿ ਝਾਨੇਨ ਸਮਙ੍ਗੀਭਾਵੇਨ. ਆਰਮ੍ਮਣਤੋ ਆਰਮ੍ਮਣਮੁਖੇਨ ਤਦਾਰਮ੍ਮਣਝਾਨਪਰਿਯਾਪਨ੍ਨਾ ਪੀਤਿ ਪਟਿਸਂਵਿਦਿਤਾ ਹੋਤਿ ਆਰਮ੍ਮਣਸ੍ਸ ਪਟਿਸਂਵਿਦਿਤਤ੍ਤਾ. ਯਥਾ ਨਾਮ ਸਪ੍ਪਪਰਿਯੇਸਨਂ ਚਰਨ੍ਤੇਨ ਤਸ੍ਸ ਆਸਯੇ ਪਟਿਸਂਵਿਦਿਤੇ ਸੋਪਿ ਪਟਿਸਂਵਿਦਿਤੋਵ ਹੋਤਿ ਮਨ੍ਤਾਗਦਬਲੇਨ ਤਸ੍ਸ ਗਹਣਸ੍ਸ ਸੁਕਰਤ੍ਤਾ; ਏਵਂ ਪੀਤਿਯਾ ਆਸਯਭੂਤੇ ਆਰਮ੍ਮਣੇ ਪਟਿਸਂਵਿਦਿਤੇ ਸਾ ਪੀਤਿ ਪਟਿਸਂਵਿਦਿਤਾ ਏਵ ਹੋਤਿ ਸਲਕ੍ਖਣਤੋ ਸਾਮਞ੍ਞਲਕ੍ਖਣਤੋ ਚ ਤਸ੍ਸਾ ਗਹਣਸ੍ਸ ਸੁਕਰਤ੍ਤਾ. ਵਿਪਸ੍ਸਨਾਕ੍ਖਣੇਤਿ ਵਿਪਸ੍ਸਨਾਪਞ੍ਞਾਪੁਬ੍ਬਙ੍ਗਮਾਯ ਮਗ੍ਗਪਞ੍ਞਾਯ ਵਿਸੇਸਤੋ ਦਸ੍ਸਨਕ੍ਖਣੇ. ਲਕ੍ਖਣਪਟਿਵੇਧਾਤਿ ਪੀਤਿਯਾ ਸਲਕ੍ਖਣਸ੍ਸ ਸਾਮਞ੍ਞਲਕ੍ਖਣਸ੍ਸ ਚ ਪਟਿਵਿਜ੍ਝਨੇਨ. ਯਞ੍ਹਿ ਪੀਤਿਯਾ ਵਿਸੇਸਤੋ ਸਾਮਞ੍ਞਤੋ ਚ ਲਕ੍ਖਣਂ, ਤਸ੍ਮਿਂ ਵਿਦਿਤੇ ਸਾ ਯਾਥਾਵਤੋ ਵਿਦਿਤਾ ਹੋਤਿ. ਤੇਨਾਹ – ‘‘ਅਸਮ੍ਮੋਹਤੋ ਪੀਤਿ ਪਟਿਸਂਵਿਦਿਤਾ ਹੋਤੀ’’ਤਿ.

ਇਦਾਨਿ ਤਮਤ੍ਥਂ ਪਾਲ਼ਿਯਾ ਵਿਭਾਵੇਤੁਂ, ‘‘ਵੁਤ੍ਤਮ੍ਪਿ ਚੇਤ’’ਨ੍ਤਿਆਦਿ ਵੁਤ੍ਤਂ. ਤਤ੍ਥ ਦੀਘਂ ਅਸ੍ਸਾਸਵਸੇਨਾਤਿ ਦੀਘਸ੍ਸ ਅਸ੍ਸਾਸਸ੍ਸ ਆਰਮ੍ਮਣਭੂਤਸ੍ਸ ਵਸੇਨ. ਚਿਤ੍ਤਸ੍ਸ ਏਕਗ੍ਗਤਂ ਅਵਿਕ੍ਖੇਪਂ ਪਜਾਨਤੋਤਿ ਝਾਨਪਰਿਯਾਪਨ੍ਨਂ ਅਵਿਕ੍ਖੇਪੋਤਿ ਲਦ੍ਧਨਾਮਂ ਚਿਤ੍ਤਸ੍ਸੇਕਗ੍ਗਤਂ ਤਂਸਮ੍ਪਯੁਤ੍ਤਾਯ ਪਞ੍ਞਾਯ ਪਜਾਨਤੋ. ਯਥੇਵ ਹਿ ਆਰਮ੍ਮਣਮੁਖੇਨ ਪੀਤਿ ਪਟਿਸਂਵਿਦਿਤਾ ਹੋਤਿ, ਏਵਂ ਤਂਸਮ੍ਪਯੁਤ੍ਤਧਮ੍ਮਾਪਿ ਆਰਮ੍ਮਣਮੁਖੇਨ ਪਟਿਸਂਵਿਦਿਤਾ ਏਵ ਹੋਨ੍ਤਿ. ਸਤਿ ਉਪਟ੍ਠਿਤਾ ਹੋਤੀਤਿ ਦੀਘਂ ਅਸ੍ਸਾਸਵਸੇਨ ਝਾਨਸਮ੍ਪਯੁਤ੍ਤਾ ਸਤਿ ਤਸ੍ਮਿਂ ਆਰਮ੍ਮਣੇ ਉਪਟ੍ਠਿਤੇ ਆਰਮ੍ਮਣਮੁਖੇਨ ਝਾਨੇਪਿ ਉਪਟ੍ਠਿਤਾ ਏਵ ਨਾਮ ਹੋਤਿ. ਤਾਯ ਸਤਿਯਾਤਿ ਏਵਂ ਉਪਟ੍ਠਿਤਾਯ ਤਾਯ ਸਤਿਯਾ ਯਥਾਵੁਤ੍ਤੇਨ ਤੇਨ ਞਾਣੇਨ ਸੁਪ੍ਪਟਿਵਿਦਿਤਤ੍ਤਾ ਆਰਮ੍ਮਣਸ੍ਸ ਤਸ੍ਸ ਵਸੇਨ ਤਦਾਰਮ੍ਮਣਾ ਸਾ ਪੀਤਿ ਪਟਿਸਂਵਿਦਿਤਾ ਹੋਤਿ. ਅਵਸੇਸਪਦਾਨਿਪੀਤਿ ‘‘ਦੀਘਂ ਪਸ੍ਸਾਸਵਸੇਨਾ’’ਤਿਆਦਿਪਦਾਨਿਪਿ.

ਏਵਂ ਪਟਿਸਮ੍ਭਿਦਾਮਗ੍ਗੇ ਵੁਤ੍ਤਮਤ੍ਥਂ ਇਮਸ੍ਮਿਂ ਸੁਤ੍ਤੇ ਯੋਜੇਤ੍ਵਾ ਦਸ੍ਸੇਤੁਂ, ‘‘ਇਤੀ’’ਤਿਆਦਿ ਵੁਤ੍ਤਂ. ਇਮਿਨਾਪਿ ਯੋਗਿਨਾ ਮਨਸਿਕਾਰੇਨ ਪਟਿਲਭਿਤਬ੍ਬਤੋ ਪਟਿਲਾਭੋਤਿ ਵੁਤ੍ਤਂ – ‘‘ਝਾਨਸਮ੍ਪਯੁਤ੍ਤੇ ਵੇਦਨਾਸਙ੍ਖਾਤਮਨਸਿਕਾਰਪਟਿਲਾਭੇਨਾ’’ਤਿ.

ਅਸ੍ਸਾਸਪਸ੍ਸਾਸਨਿਮਿਤ੍ਤਨ੍ਤਿ ਅਸ੍ਸਾਸਪਸ੍ਸਾਸੇ ਨਿਸ੍ਸਾਯ ਪਟਿਲਦ੍ਧਪਟਿਭਾਗਨਿਮਿਤ੍ਤਂ ਆਰਮ੍ਮਣਂ ਕਿਞ੍ਚਾਪਿ ਕਰੋਤਿ; ਸਤਿਞ੍ਚ ਸਮ੍ਪਜਞ੍ਞਞ੍ਚ ਉਪਟ੍ਠਪੇਤ੍ਵਾ ਪਵਤ੍ਤਨਤੋ ਆਰਮ੍ਮਣਮੁਖੇਨ ਤਦਾਰਮ੍ਮਣਸ੍ਸ ਪਟਿਸਂਵਿਦਿਤਤ੍ਤਾ ਚਿਤ੍ਤੇ ਚਿਤ੍ਤਾਨੁਪਸ੍ਸੀਯੇਵ ਨਾਮੇਸ ਹੋਤਿ. ਏਵਂ ਚਿਤ੍ਤਾਨੁਪਸ੍ਸਨਾਪਿ ਸਤਿਸਮ੍ਪਜਞ੍ਞਬਲੇਨੇਵ ਹੋਤੀਤਿ ਆਹ ‘‘ਨ ਹੀ’’ਤਿਆਦਿ. ਪਜਹਤਿ ਏਤੇਨ, ਸਯਂ ਵਾ ਪਜਹਤੀਤਿ ਪਹਾਨਂ, ਞਾਣਂ. ਦੋਮਨਸ੍ਸਵਸੇਨ ਬ੍ਯਾਪਾਦਨੀਵਰਣਂ ਦਸ੍ਸਿਤਂ ਤਦੇਕਟ੍ਠਭਾਵਤੋ. ਤਸ੍ਸਾਤਿ ਨੀਵਰਣਪਬ੍ਬਸ੍ਸ. ਪਹਾਨਕਰਞਾਣਨ੍ਤਿ ਪਜਹਨਞਾਣਂ. ਵਿਪਸ੍ਸਨਾਪਰਮ੍ਪਰਨ੍ਤਿ ਪਟਿਪਾਟਿਯਾ ਵਿਪਸ੍ਸਨਮਾਹ. ਸਮਥਪਟਿਪਨ੍ਨਨ੍ਤਿ ਮਜ੍ਝਿਮਸਮਥਨਿਮਿਤ੍ਤਂ ਪਟਿਪਨ੍ਨਚਿਤ੍ਤਂ ਅਜ੍ਝੁਪੇਕ੍ਖਤਿ. ਏਕਤੋ ਉਪਟ੍ਠਾਨਨ੍ਤਿ ਪਟਿਪਕ੍ਖਵਿਗਮੇਨ ਏਕਭਾਵੇਨ ਉਪਟ੍ਠਾਨਂ. ਸਹਜਾਤਾਨਂ ਅਜ੍ਝੁਪੇਕ੍ਖਨਾ ਹੋਤੀਤਿ ਪਗ੍ਗਹਨਿਗ੍ਗਹਸਮ੍ਪਹਂਸਨੇਸੁ ਬ੍ਯਾਪਾਰਸ੍ਸ ਅਨਾਪਜ੍ਜਿਤਤ੍ਤਾ ਆਰਮ੍ਮਣਾਨਂ ਅਜ੍ਝੁਪੇਕ੍ਖਨਾ, ‘‘ਯਦਤ੍ਥਿ ਯਂ ਭੂਤਂ ਤਂ ਪਜਹਤਿ ਉਪੇਕ੍ਖਂ ਪਟਿਲਭਤੀ’’ਤਿ, ਏਵਂ ਵੁਤ੍ਤਅਜ੍ਝੁਪੇਕ੍ਖਨਾ ਪਵਤ੍ਤਾਤਿ ਪਟਿਪਨ੍ਨਾ. ਕੇਵਲਂ ਨੀਵਰਣਾਦਿਧਮ੍ਮੇਤਿ ਨੀਵਰਣਾਦਿਧਮ੍ਮੇ ਏਵ ਪਹੀਨੇ ਦਿਸ੍ਵਾ, ਅਥ ਖੋ ਤੇਸਂ ਪਜਹਨਞਾਣਮ੍ਪਿ ਯਾਥਾਵਤੋ ਪਞ੍ਞਾਯ ਦਿਸ੍ਵਾ ਅਜ੍ਝੁਪੇਕ੍ਖਿਤਾ ਹੋਤਿ. ਵੁਤ੍ਤਞ੍ਹੇਤਂ ਭਗਵਤਾ ‘‘ਧਮ੍ਮਾਪਿ ਖੋ, ਭਿਕ੍ਖਵੇ, ਪਹਾਤਬ੍ਬਾ, ਪਗੇਵ ਅਧਮ੍ਮਾ’’ਤਿ (ਮ. ਨਿ. ੧.੨੪੦).

੧੫੦. ਅਨਿਚ੍ਚਾਦਿਵਸੇਨ ਪਵਿਚਿਨਤੀਤਿ ਅਨਿਚ੍ਚਾਦਿਪ੍ਪਕਾਰੇਹਿ ਵਿਚਿਨਤਿ ਪਸ੍ਸਤਿ. ਨਿਰਾਮਿਸਾਤਿ ਕਿਲੇਸਾਮਿਸਰਹਿਤਾ. ਕਾਯਿਕਚੇਤਸਿਕਦਰਥਪਟਿਪ੍ਪਸ੍ਸਦ੍ਧਿਯਾਤਿ ਕਾਯਚਿਤ੍ਤਾਨਂ ਸਾਧੁਭਾਵੂਪਗਮਨੇਨ ਵਿਕ੍ਖਮ੍ਭਿਤਤ੍ਤਾ. ਸਹਜਾਤਧਮ੍ਮਾਨਂ ਏਕਸਭਾਵੇਨ ਪਵਤ੍ਤਿਯਾ ਸਹਜਾਤਅਜ੍ਝੁਪੇਕ੍ਖਨਾਯ ਅਜ੍ਝੁਪੇਕ੍ਖਿਤਾ ਹੋਤਿ.

ਤਸ੍ਮਿਂ ਕਾਯੇ ਪਵਤ੍ਤਾ ਕਾਯਾਰਮ੍ਮਣਾ ਸਤਿ, ਪੁਬ੍ਬਭਾਗਿਯੋ ਸਤਿਸਮ੍ਬੋਜ੍ਝਙ੍ਗੋ. ਏਸ ਨਯੋ ਸੇਸੇਸੁਪਿ. ਸੋਮਨਸ੍ਸਸਹਗਤਚਿਤ੍ਤੁਪ੍ਪਾਦਵਸੇਨ ਚੇਤਂ ਓਕ੍ਕਮਨਂ ਓਲਿਯਨਂ ਕੋਸਜ੍ਜਂ, ਤਤੋ ਅਤਿਵਤ੍ਤਨਂ ਅਤਿਧਾਵਨਂ ਉਦ੍ਧਚ੍ਚਂ, ਤਦੁਭਯਵਿਧੁਰਾ ਬੋਜ੍ਝਙ੍ਗੁਪੇਕ੍ਖਾਭੂਤਾ ਅਨੋਸਕ੍ਕਨਅਨਤਿਵਤ੍ਤਨਸਙ੍ਖਾਤਾ ਮਜ੍ਝਤ੍ਤਾਕਾਰਤਾ. ਇਦਾਨਿ ਯਥੇਵ ਹੀਤਿਆਦਿਨਾ ਤਮੇਵ ਮਜ੍ਝਤ੍ਤਾਕਾਰਂ ਉਪਮਾਯ ਵਿਭਾਵੇਤਿ. ਤੁਦਨਂ ਵਾ ਪਤੋਦੇਨ. ਆਕਡ੍ਢਨਂ ਵਾ ਰਸ੍ਮਿਨਾ. ਨਤ੍ਥਿ ਨ ਕਾਤਬ੍ਬਂ ਅਤ੍ਥਿ. ਏਕਚਿਤ੍ਤਕ੍ਖਣਿਕਾਤਿ ਏਕੇਕਸ੍ਮਿਂ ਚਿਤ੍ਤੇ ਵਿਪਸ੍ਸਨਾਵਸੇਨ ਸਹ ਉਪ੍ਪਜ੍ਜਨਕਾ. ਨਾਨਾਰਸਲਕ੍ਖਣਾਤਿ ਨਾਨਾਕਿਚ੍ਚਾ ਚੇਵ ਨਾਨਾਸਭਾਵਾ ਚ.

੧੫੨. ਵੁਤ੍ਤਤ੍ਥਾਨੇਵ ਸਬ੍ਬਾਸਵਸੁਤ੍ਤਵਣ੍ਣਨਾਯਂ (ਮ. ਨਿ. ਅਟ੍ਠ. ੨੭) ਆਨਾਪਾਨਾਰਮ੍ਮਣਾ ਅਪਰਾਪਰਂ ਪਵਤ੍ਤਸਤਿਯੋ ਆਰਮ੍ਮਣਸੀਸੇਨ ਤਦਾਰਮ੍ਮਣਾ ਧਮ੍ਮਾ ਗਹਿਤਾ, ਤਾ ਪਨੇਕਸਨ੍ਤਾਨੇ ਲੋਕਿਯਚਿਤ੍ਤਸਮ੍ਪਯੁਤ੍ਤਾਤਿ ਲੋਕਿਯਾ, ਤਾ ਵਡ੍ਢਮਾਨਾ ਲੋਕਿਯਂ ਚਤੁਬ੍ਬਿਧਮ੍ਪਿ ਸਤਿਪਟ੍ਠਾਨਂ ਪਰਿਪੂਰੇਨ੍ਤਿ. ਵਿਜ੍ਜਾਵਿਮੁਤ੍ਤਿਫਲਨਿਬ੍ਬਾਨਨ੍ਤਿ ਵਿਮੁਤ੍ਤੀਨਂ ਫਲਭੂਤਂ ਤੇਹਿਯੇਵ ਵੇਦਿਤਬ੍ਬਂ ਕਿਲੇਸਨਿਬ੍ਬਾਨਂ, ਅਮਤਮਹਾਨਿਬ੍ਬਾਨਮੇਵ ਵਿਜ੍ਜਾਵਿਮੁਤ੍ਤੀਨਂ ਅਧਿਗਮੇਨ ਅਧਿਗਨ੍ਤਬ੍ਬਤਾਯ ਤਥਾ ਵੁਤ੍ਤਂ. ਪਰਿਪੂਰਣਞ੍ਚਸ੍ਸ ਆਰਮ੍ਮਣਂ ਕਤ੍ਵਾ ਅਮਤਸ੍ਸਾਨੁਭਵਨਮੇਵ. ਇਧ ਸੁਤ੍ਤੇ ਲੋਕਿਯਾਪਿ ਬੋਜ੍ਝਙ੍ਗਾ ਕਥਿਤਾ ਲੋਕੁਤ੍ਤਰਾਪੀਤਿ ਏਤ੍ਤਕਂ ਗਹੇਤ੍ਵਾ, ‘‘ਇਤਿ ਲੋਕਿਯਸ੍ਸ ਆਗਤਟ੍ਠਾਨੇ ਲੋਕਿਯਂ ਕਥਿਤ’’ਨ੍ਤਿ ਚ ਅਤ੍ਥਵਣ੍ਣਨਾਵਸੇਨ ਅਟ੍ਠਕਥਾਯਂ ਕਥਿਤਂ. ਥੇਰੋਤਿ ਮਹਾਧਮ੍ਮਰਕ੍ਖਿਤਤ੍ਥੇਰੋ. ਅਞ੍ਞਤ੍ਥ ਏਵਂ ਹੋਤੀਤਿ ਅਞ੍ਞਸ੍ਮਿਂ ਲੋਕਿਯਲੋਕੁਤ੍ਤਰਧਮ੍ਮਾਨਂ ਤਤ੍ਥ ਤਤ੍ਥ ਵੋਮਿਸ੍ਸਕਨਯੇਨ ਆਗਤਸੁਤ੍ਤੇ ਏਵਂ ਲੋਕਿਯਂ ਆਗਤਂ, ਇਧ ਲੋਕੁਤ੍ਤਰਂ ਆਗਤਨ੍ਤਿ ਕਥੇਤਬ੍ਬਂ ਹੋਤਿ. ਲੋਕੁਤ੍ਤਰਂ ਉਪਰਿ ਆਗਤਨ੍ਤਿ ਵਿਜ੍ਜਾਵਿਮੁਤ੍ਤਿਂ ਪਰਿਪੂਰੇਨ੍ਤੀਤਿ ਏਵਂ ਲੋਕੁਤ੍ਤਰਂ ਉਪਰਿ ਦੇਸਨਾਯਂ ਆਗਤਂ; ਤਸ੍ਮਾ ਲੋਕਿਯਾ ਏਵ ਬੋਜ੍ਝਙ੍ਗਾ ਵਿਜ੍ਜਾਵਿਮੁਤ੍ਤਿ ਪਰਿਪੂਰਿਕਾ ਕਥੇਤਬ੍ਬਾ ਲੋਕੁਤ੍ਤਰਾਨਂ ਬੋਜ੍ਝਙ੍ਗਾਨਂ ਵਿਜ੍ਜਾਗਹਣੇਨ ਗਹਿਤਤ੍ਤਾ, ਤਸ੍ਮਾ ਥੇਰੇਨ ਵੁਤ੍ਤੋਯੇਵੇਤ੍ਥ ਅਤ੍ਥੋ ਗਹੇਤਬ੍ਬੋ. ਸੇਸਂ ਵੁਤ੍ਤਨਯਤ੍ਤਾ ਸੁਵਿਞ੍ਞੇਯ੍ਯਮੇਵ.

ਆਨਾਪਾਨਸ੍ਸਤਿਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.