੯. ਸੁਭਸੁਤ੍ਤਵਣ੍ਣਨਾ

੪੬੨. ਤੁਦਿਸਞ੍ਞਾਤੋ ਗਾਮੋ ਨਿਗਮੋ ਏਤਸ੍ਸਾਤਿ ਤੋਦੇਯ੍ਯੋ, ਤਸ੍ਸ ਅਤ੍ਤਜੋ ਤੋਦੇਯ੍ਯਪੁਤ੍ਤੋਤਿ ਆਹ ‘‘ਤੁਦਿਗਾਮਾ’’ਤਿਆਦਿ. ਆਰਾਧਕੋਤਿ ਸਂਰਾਧਕੋ. ਧਮ੍ਮਨਿਸਨ੍ਤਿ ਯਸ੍ਮਾ ਸਮ੍ਪਾਦਨੇਨ ਪਰਿਪੂਰਣੇਨ ਇਚ੍ਛਿਤਾ, ਤਸ੍ਮਾ ਵੁਤ੍ਤਂ ‘‘ਸਮ੍ਪਾਦਕੋ ਪਰਿਪੂਰਕੋ’’ਤਿ. ਞਾਯਤਿ ਨਿਚ੍ਛਯੇਨ ਗਮੇਤਿ ਨਿਬ੍ਬਾਨਂ, ਤਂ ਵਾ ਞਾਯਤਿ ਪਟਿਵਿਜ੍ਝੀਯਤਿ ਏਤੇਨਾਤਿ ਞਾਯੋ, ਤਤੋ ਏਤਸ੍ਸ ਸਮ੍ਪਾਦਕਹੇਤੁਭਾਵਤੋ ਞਾਯੋ ਧਮ੍ਮੋ ਅਰਿਯਮਗ੍ਗੋ ਤਂ ਞਾਯਂ ਧਮ੍ਮਂ. ਤੇਨਾਹ ‘‘ਕਾਰਣਧਮ੍ਮ’’ਨ੍ਤਿ. ਅਨਵਜ੍ਜਨ੍ਤਿ ਅਵਜ੍ਜਪਟਿਪਕ੍ਖਂ.

੪੬੩. ਵਟ੍ਟਚਾਰਕਤੋ ਨਿਯ੍ਯਾਤੀਤਿ ਨਿਯ੍ਯਾਨਿਕਂ ਈਕਾਰਸ੍ਸ ਰਸ੍ਸਤ੍ਤਂ ਯ-ਕਾਰਸ੍ਸ ਚ ਕ-ਕਾਰਂ ਕਤ੍ਵਾ. ਨਿਯ੍ਯਾਨੇ ਵਾ ਨਿਯੁਤ੍ਤਂ, ਨਿਯ੍ਯਾਨਂ ਸੀਲਨ੍ਤਿ ਵਾ ਨਿਯ੍ਯਾਨਿਕਂ, ਤਪ੍ਪਟਿਪਕ੍ਖਤੋ ਅਨਿਯ੍ਯਾਨਿਕਂ. ਸਾ ਪਨ ਅਤ੍ਥਤੋ ਅਕੁਸਲਕਿਰਿਯਾਤਿ ਆਹ ‘‘ਅਕੁਸਲਪਟਿਪਦ’’ਨ੍ਤਿ.

ਬਹੁਭਾਵਵਾਚਕੋ ਇਧ ਮਹਾਸਦ੍ਦੋ ‘‘ਮਹਾਜਨੋ’’ਤਿਆਦੀਸੁਵਿਯਾਤਿ ਆਹ ‘‘ਮਹਨ੍ਤੇਹਿ ਬਹੂਹੀ’’ਤਿ. ਅਤ੍ਥੋਤਿ ਪਯੋਜਨਂ. ਮਹਨ੍ਤਾਨੀਤਿ ਬਹੁਲਾਨਿ. ਕਿਚ੍ਚਾਨੀਤਿ ਕਾਤਬ੍ਬਾਨਿ. ਅਧਿਕਰਣਾਨੀਤਿ ਅਧਿਕਾਰਜੀਵਿਕਾਰੂਪਾਨਿ. ਘਰਾਵਾਸਕਮ੍ਮਮੇਵ ਪਞ੍ਚਬਲਿਕਰਣਦਸਅਤ੍ਥਟ੍ਠਾਨਭਾਵਤੋ ਲੋਕਯਾਤ੍ਰਾਯ ਚ ਸਮ੍ਪਵਤ੍ਤਿਟ੍ਠਾਨਭਾਵਤੋ ਜੀਵਿਤਵੁਤ੍ਤਿਯਾ ਵਾ ਹੇਤੁਭਾਵਤੋ ਘਰਾਵਾਸਕਮ੍ਮਟ੍ਠਾਨਂ.

‘‘ਅਪ੍ਪਕੇਨਪਿ ਮੇਧਾਵੀ, ਪਾਭਤੇਨ ਵਿਚਕ੍ਖਣੋ;

ਸਮੁਟ੍ਠਾਪੇਤਿ ਅਤ੍ਤਾਨਂ, ਅਣੁਂ ਅਗ੍ਗਿਂਵ ਸਨ੍ਧਮ’’ਨ੍ਤਿ. (ਜਾ. ੧.੧.੪);

ਗਾਥਾਯ ਵੁਤ੍ਤਨਯੇਨ ਚੂਲ਼ਨ੍ਤੇਵਾਸਿਕਸ੍ਸ ਵਿਯ.

੪੬੪. ਅਯੋਨਿਸੋ ਪਵਤ੍ਤਿਤਂ ਵਾਣਿਜ੍ਜਕਮ੍ਮਂ ਵਿਯ ਅਪਾਯਭੂਤਂ ਕਸਿਕਮ੍ਮਂ ਨਿਦਸ੍ਸਨਭਾਵੇ ਠਪੇਤ੍ਵਾ ਅਯੋਨਿਸੋਮਨਸਿਕਰਣਵਸੇਨ ਪਵਤ੍ਤਂ ਘਰਾਵਾਸਕਿਚ੍ਚਂ ਸਨ੍ਧਾਯਾਹ – ‘‘ਯਥਾ ਕਸਿ…ਪੇ… ਏਵਂ ਘਰਾਵਾਸਕਮ੍ਮਟ੍ਠਾਨਮ੍ਪੀ’’ਤਿ. ਬ੍ਰਾਹ੍ਮਣਭਤ੍ਤੋ ਅਹੋਸੀਤਿ ਸੋ ਕਿਰ ਬਹੂ ਬ੍ਰਾਹ੍ਮਣੇ ਧਨਂ ਦਤ੍ਵਾ ਯਞ੍ਞਂ ਕਾਰੇਸਿ. ਉਪਰੀਤਿ ‘‘ਉਪਰਿ ਉਪਟ੍ਠਾਤੀਤਿ ਵਦੇਹੀ’’ਤਿ ਬ੍ਰਾਹ੍ਮਣੇਹਿ ਅਤ੍ਤਨੋ ਸਮਯੇਨ ਆਚਿਕ੍ਖਾਪਿਤੋਪਿ ਯਥਾ ਉਪਟ੍ਠਿਤਮੇਵ ਕਥੇਤ੍ਵਾ ਕਾਲਂ ਕਤ੍ਵਾ ਨਿਰਯੇ ਨਿਬ੍ਬਤ੍ਤੋ, ਅਥ ਬ੍ਰਾਹ੍ਮਣਾ – ‘‘ਇਮਿਨਾ ਅਮ੍ਹਾਕਂ ਯਞ੍ਞੇ ਦੋਸੋ ਦਿਨ੍ਨੋ’’ਤਿ ਕੁਜ੍ਝਿਤ੍ਵਾ ਤਸ੍ਸ ਕਲ਼ੇਵਰਂ ਸੁਸਾਨਂ ਨੇਤੁਂ ਨਾਦਂਸੁ. ਅਥਸ੍ਸ ਞਾਤਕੇਹਿ ਸਹਸ੍ਸੇ ਦਿਨ੍ਨੇ ਤਂ ਸਹਸ੍ਸਂ ਗਹੇਤ੍ਵਾ ਗੇਹਤੋ ਨੀਹਰਿਤੁਂ ਅਦਂਸੁ. ਕਸ੍ਸਪਸਮ੍ਮਾਸਮ੍ਬੁਦ੍ਧਕਾਲੇ ਛਤ੍ਤਿਂਸ ਇਤ੍ਥਿਯੋ ‘‘ਏਕਾ ਵਤ੍ਥਂ ਅਦਾਸਿ, ਏਕਾ ਗਨ੍ਧਂ, ਏਕਾ ਸੁਮਨਮਾਲ’’ਨ੍ਤਿਆਦਿਨਾ ਤਂ ਤਂ ਦਾਨਮਯਂ ਪੁਞ੍ਞਂ ਕਤ੍ਵਾ ਆਯੁਪਰਿਯੋਸਾਨੇ ਤਾਵਤਿਂਸਭਵਨੇ ਸਕ੍ਕਸ੍ਸ ਦੇਵਰਞ੍ਞੋ ਪਰਿਚਾਰਿਕਾ ਹੁਤ੍ਵਾ ਨਿਬ੍ਬਤ੍ਤਿਂਸੁ ਸਹਸ੍ਸਅਚ੍ਛਰਾਪਰਿਵਾਰਿਕਾ, ਸਕ੍ਕਸ੍ਸ ਦੇਵਰਞ੍ਞੋ ਵੇਜਯਨ੍ਤਰਥਂ ਪੇਸੇਤ੍ਵਾ ਪਕ੍ਕੋਸਾਪਿਤੇਨ ਗੁਤ੍ਤਿਲਾਚਰਿਯਭੂਤੇਨ ਮਹਾਬੋਧਿਸਤ੍ਤੇਨ ਪੁਚ੍ਛਿਤਾ ਤਂ ਤਂ ਅਤ੍ਤਨਾ ਕਤਂ ਪੁਞ੍ਞਂ ਬ੍ਯਾਕਰਿਂਸੁ. ਤਂ ਸਨ੍ਧਾਯ ਵੁਤ੍ਤਂ ‘‘ਸਕਲਾਯ ਗੁਤ੍ਤਿਲਵਿਮਾਨਕਥਾਯ ਦੀਪੇਤਬ੍ਬ’’ਨ੍ਤਿ. ਵਣਿਜ੍ਜਕਮ੍ਮਟ੍ਠਾਨਂ ਵਿਪਜ੍ਜਮਾਨਨ੍ਤਿ ਏਤ੍ਥ ਤਸ੍ਸ ਵਿਪਜ੍ਜਮਾਨਾਕਾਰੋ ਹੇਟ੍ਠਾ ਵੁਤ੍ਤੋ. ਏਵਂ ਪਬ੍ਬਜ੍ਜਕਮ੍ਮਟ੍ਠਾਨਮ੍ਪਿ ਵਿਪਜ੍ਜਮਾਨਂ ਅਪ੍ਪਫਲਂ ਹੋਤੀਤਿ ਆਨੇਤ੍ਵਾ ਸਮ੍ਬਨ੍ਧੋ. ਸੀਲੇਸੁ ਅਪਰਿਪੂਰਕਾਰਿਨੋਤਿਆਦਿ ਤਸ੍ਸ ਵਿਪਜ੍ਜਨਾਕਾਰਦਸ੍ਸਨਂ. ਝਾਨਾਦਿਸੁਖਨ੍ਤਿ ਏਤ੍ਥ ਆਦਿ-ਸਦ੍ਦੇਨ ਅਭਿਞ੍ਞਾਵਿਪਸ੍ਸਨਾਦਿਸੁਖਸ੍ਸ ਵਿਯ ਸਬ੍ਰਹ੍ਮਚਾਰੀਹਿ ਸਦ੍ਧਿਂ ਸੀਲਸਮ੍ਪਦਾਦਿਸੁਖਸ੍ਸ ਸਙ੍ਗਹੋ ਦਟ੍ਠਬ੍ਬੋ. ਅਰਹਤ੍ਤਮ੍ਪਿ ਪਾਪੁਣਾਤਿ ਪਗੇਵ ਸੇਕ੍ਖਪੁਥੁਜ੍ਜਨਸਮ੍ਪਤ੍ਤਿਯੋਤਿ ਅਧਿਪ੍ਪਾਯੋ.

ਚਾਗਸੀਸੇਨਾਤਿ ਪਧਾਨਭੂਤੇਨ ਚਾਗੇਨ ਦਾਨੇਨ ਤਂ ਅਵਸ੍ਸਯਂ ਕਤ੍ਵਾ. ਏਤ੍ਥ ਤੇ ਨ ਕੋਚਿ ਅਫਾਸੁਕਭਾਵੋਤਿ. ਉਜੁਕਂ ਕਤ੍ਵਾ ਅਵਿਰੁਦ੍ਧਂ ਕਤ੍ਵਾ, ਸਮ੍ਪਯੋਜੇਤ੍ਵਾਤਿ ਅਤ੍ਥੋ. ਤਪਚਰਿਯਨ੍ਤਿ ਅਗ੍ਗਿਪਰਿਚਰਣਂ, ਤਪਚਰਿਯਞ੍ਚ ਬ੍ਰਹ੍ਮਚਰਿਯਗ੍ਗਹਣਾ ਦੁਟ੍ਠੁਲ੍ਲਭਾਵਤੋ.

੪੬੬. ਅਜਾਨਨਭਾਵਨ੍ਤਿ ਅਸਬ੍ਬਞ੍ਞੁਭਾਵਂ. ਭਗਵਤੋ ਪਨ ਸਬ੍ਬਞ੍ਞੁਭਾਵੋ ਸਦੇਵਕੇ ਲੋਕੇ ਜਲਤਲੇ ਪਕ੍ਖਿਤ੍ਤਤੇਲਂ ਵਿਯ ਪਤ੍ਥਰਿਤ੍ਵਾ ਠਿਤੋ, ਨ ਮੇ ਇਦਂ ਪਤਿਰੂਪਂ, ਤਤੋ ਪਰਿਵਤ੍ਤਿਸ੍ਸਾਮੀਤਿ ‘‘ਬ੍ਰਾਹ੍ਮਣੋ, ਭੋ, ਗੋਤਮਾ’’ਤਿਆਦਿਮਾਹ. ਪਚ੍ਚਾਹਰਿਤੁਂ ਪਟਿਪਕ੍ਖੇਨ ਅਪਹਰਿਤੁਂ. ਸੇਤਪੋਕ੍ਖਰਸਦਿਸੋਤਿ ਪੁਣ੍ਡਰੀਕਪਤ੍ਤਸਦਿਸਵਣ੍ਣੋ. ਸੁਵਟ੍ਟਿਤਾਤਿ ਵਟ੍ਟਭਾਵਯੁਤ੍ਤਟ੍ਠਾਨੇ ਸੁਵਟ੍ਟਾ. ਨਾਮਕਂਯੇਵਾਤਿ ਨਾਮਮਤ੍ਤਮੇਵ ਵਚਨਮਤ੍ਤਮੇਵ. ਤਥਾਭੂਤਾਨਂ ਭਾਵਸ੍ਸਪਿ ਅਭਾਵੇਨ ਨਿਹੀਨਂ ਨਾਮ ਹੋਤਿ, ਨਾਮ-ਸਦ੍ਦੋ ਨਿਹੀਨਪਰਿਯਾਯੋ. ਤੇਨਾਹ – ‘‘ਲਾਮਕਂਯੇਵਾ’’ਤਿ.

੪੬੭. ਕਤਮਾ ਵਾਚਾ ਤੇਸਂ ਸੇਯ੍ਯੋਤਿ ਤੇਸਂ ਚਙ੍ਕਿਯਾਦੀਨਂ ਬ੍ਰਾਹ੍ਮਣਮਹਾਸਾਲਾਨਂ ਵੁਚ੍ਚਮਾਨਵਿਭਾਗਾਸੁ ਵਾਚਾਸੁ ਕਤਮਾ ਵਾਚਾ ਸੇਯ੍ਯੋਤਿ. ‘‘ਸੇਯ੍ਯਾ’’ਤਿ ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਂ. ਸਮ੍ਮੁਤਿਯਾਤਿ ਅਵਿਲਙ੍ਘਿਤਸਾਧੁਮਰਿਯਾਦਾਯ ਲੋਕਸਮ੍ਮੁਤਿਯਾ. ਤੇਨਾਹ ‘‘ਲੋਕਵੋਹਾਰੇਨਾ’’ਤਿ. ਮਨ੍ਤਾਤਿ ਮਨ੍ਤਾਸਙ੍ਖਾਤਾਯ ਪਞ੍ਞਾਯ ਮਨ੍ਤੇਤ੍ਵਾ ਜਾਨਿਤ੍ਵਾ. ਤੇਨਾਹ ‘‘ਤੁਲਯਿਤ੍ਵਾ’’ਤਿ. ਅਤ੍ਥਸਂਹਿਤਨ੍ਤਿ ਹੇਤੁਸਞ੍ਹਿਤਂ. ਤਂ ਪਨ ਏਕਂਸਤੋ ਯੁਤ੍ਤਿਯੁਤ੍ਤਂ ਹੋਤੀਤਿ ਆਹ – ‘‘ਕਾਰਣਨਿਸ੍ਸਿਤ’’ਨ੍ਤਿ. ਆਵੁਤੋਤਿਆਦੀਸੁ ਆਦਿਤੋ ਅਭਿਮੁਖਂ ਞਾਣਗਤਿਯਾ ਵਿਬਨ੍ਧਨੇਨ ਆਵੁਤੋ, ਆਵਰਿਯੇਨ ਵਿਸੇਸਤੋ ਞਾਣਗਤਿਯਾ ਨਿਬਨ੍ਧਨੇਨ ਨਿਵੁਤੋ, ਏਵਂ ਓਫੁਟੋ ਪਲਿਗੁਣ੍ਠਿਤੋ. ਪਰਿਯੋਨਦ੍ਧੋਤਿ ਸਮਨ੍ਤਤੋ ਓਨਦ੍ਧੋ ਛਾਦਿਤੋ. ਤੇਨਾਹ ‘‘ਪਲਿਵੇਠਿਤੋ’’ਤਿ.

੪੬੮. ਸਚੇ ਏਤਂ ਕਾਰਣਮਤ੍ਥੀਤਿ ‘‘ਨਿਸ੍ਸਟ੍ਠਤਿਣਕਟ੍ਠੁਪਾਦਾਨੋ ਅਗ੍ਗਿ ਜਲਤੀ’’ਤਿ ਏਤਂ ਕਾਰਣਂ ਸਚੇ ਅਤ੍ਥਿ ਯਦਿ ਸਿਯਾ, ਸੋ ਅਪਰੋ ਤਿਣਕਟ੍ਠੁਪਾਦਾਨੋ ਅਗ੍ਗਿ ਯਦਿ ਭਵੇਯ੍ਯ. ਸਦੋਸੋ ਸਾਦੀਨਵੋ ਸਪਰਿਕ੍ਕਿਲੇਸੋ. ਪਰਿਸੁਦ੍ਧੋਤਿ ਉਪਕ੍ਕਿਲੇਸਾਭਾਵੇਨ ਸਬ੍ਬਸੋ ਸੁਦ੍ਧੋ. ਜਾਤਿ ਆਦੀਨਂ ਅਭਾਵੇਨਾਤਿ ਜਾਤਿਪਚ੍ਚਯਾਨਂ ਕਮ੍ਮਕਿਲੇਸਾਨਂ ਨਿਗ੍ਗਮੇਨ.

੪੬੯. ਨ ਨਿਚ੍ਚਲਾ ਤਿਟ੍ਠਨ੍ਤੀਤਿ ਤਤ੍ਥ ਪਕ੍ਖਿਪਿਤਬ੍ਬਸ੍ਸ ਲਬ੍ਭਮਾਨਤ੍ਤਾ ਯਥਾਪਞ੍ਞਤ੍ਤਂ ਹੁਤ੍ਵਾ ਨਿਚ੍ਚਲਾ ਅਕਮ੍ਪਿਯਾ ਨ ਤਿਟ੍ਠਨ੍ਤਿ. ਤਂ ਦੋਸਂ ਤਂ ਊਨਤਾਦੋਸਂ.

ਅਞ੍ਞਸ੍ਮਿਂ ਅਸਤੀਤਿ ਅਤ੍ਥਭਞ੍ਜਕਮੁਸਾਵਾਦੇ ਅਸਤਿ. ਸੋ ਹਿ ਅਤ੍ਤਨੋ ਸਨ੍ਤਕਸ੍ਸ ਅਦਾਤੁਕਾਮਤਾਦਿਵਸੇਨ ਪਵਤ੍ਤਸ੍ਸ ਅਕਮ੍ਮਪਥਪ੍ਪਤ੍ਤਸ੍ਸ ਮੁਸਾਵਾਦਭਾਵਸ੍ਸ ਵਿਪਰੀਤੋ ਅਞ੍ਞੋ ਇਧ ਅਧਿਪ੍ਪੇਤੋ. ਤਥਾ ਹਿ ਇਤਰੋ ਯੇਭੁਯ੍ਯੇਨ ਵਲ਼ਞ੍ਜਿਤਬ੍ਬਤੋ ਵੋਹਰਿਤਬ੍ਬਤੋ ਵਲ਼ਞ੍ਜਕਮੁਸਾਵਾਦੋਤਿ ਆਹ. ਨ ਕਦਾਚਿ ਮੁਸਾਵਾਦੀਤਿ ਦ੍ਵੇ ਕਥਾ ਨ ਕਥੇਨ੍ਤਿ. ਬਾਹਿਰਕਾਨਂ ਅਨਵਜ੍ਜਤਪਸਮ੍ਮਤਾਯਪਿ ਨਿਸ੍ਸਿਤੋਤਿ ਵਤ੍ਤੁਂ ਆਹ ‘‘ਸੀਲਵਾ ਤਪਨਿਸ੍ਸਿਤਕੋ ਹੋਤਿ’’ਤਿ. ਵਿਵਟਮੁਖਾ ਮਨ੍ਤਜ੍ਝੇਨਮਣ੍ਡਿਤਾ ਸਬ੍ਬਸੋ ਸਜ੍ਝਾਯਾ ਹੋਨ੍ਤਿ, ਨ ਇਤਰੇਤਿ ਆਹ ‘‘ਪਬ੍ਬਜਿਤਾ ਨਿਚ੍ਚਂ ਸਜ੍ਝਾਯਨ੍ਤੀ’’ਤਿ.

੪੭੦. ਚਿਰਂ ਨਿਕ੍ਖਨ੍ਤੋਤਿ ਨਿਗ੍ਗਤੋ ਹੁਤ੍ਵਾ ਚਿਰਕਾਲੇ. ਨ ਸਬ੍ਬਸੋ ਪਚ੍ਚਕ੍ਖਾ ਹੋਨ੍ਤਿ ਸਤਿਸਮ੍ਮੋਹਤੋ ਮਗ੍ਗਾਨਞ੍ਚ ਅਞ੍ਞਥਾ ਕਰਣਤੋ. ਚਿਰਾਯਿਤਤ੍ਤਨ੍ਤਿ ‘‘ਅਯਂ ਮਗ੍ਗੋ’’ਤਿ ਕਥਨਸ੍ਸ ਚਿਰਾਯਨਂ. ਵਿਤ੍ਥਾਯਿਤਤ੍ਤਨ੍ਤਿ ਅਸਪ੍ਪਟਿਭਾਨਂ. ਤਂ ਪਨ ਸਉਪਮਾਹ ਦਸ੍ਸੇਤੁਂ ‘‘ਯਥਾ’’ਤਿਆਦਿ ਵੁਤ੍ਤਂ.

ਬਲਸਮ੍ਪਨ੍ਨੋਤਿ ਕਾਯਬਲੇਨ ਸਮਨ੍ਨਾਗਤੋ. ਪਮਾਣਕਤਂ ਕਮ੍ਮਂ ਨਾਮ ਪਮਾਣਕਰਾਨਂ ਰਾਗਾਦਿਕਿਲੇਸਾਨਂ ਅਵਿਕ੍ਖਮ੍ਭਿਤਤ੍ਤਾ ‘‘ਪਮਾਣਕਤਂ ਕਮ੍ਮਂ ਨਾਮ ਕਾਮਾਵਚਰ’’ਨ੍ਤਿ ਆਹ, ਤੇਸਂ ਪਨ ਵਿਕ੍ਖਮ੍ਭਿਤਤ੍ਤਾ ਵੁਤ੍ਤਂ ‘‘ਅਪ੍ਪਮਾਣਕਤਂ ਕਮ੍ਮਂ ਨਾਮ ਰੂਪਾਰੂਪਾਵਚਰ’’ਨ੍ਤਿ. ਤਤ੍ਥਾਪਿ ਵਿਸੇਸਤੋ ਅਪ੍ਪਮਞ੍ਞਾਭਾਵਨਾ ਸਮ੍ਭਵਤੀਤਿ ਆਹ ‘‘ਤੇਸੁਪੀ’’ਤਿਆਦਿ. ਨਿਰੀਹਕਤ੍ਤਾ ਯਥਾ ਅਪ੍ਪਮਾਣਸਮਞ੍ਞਾ ਲਬ੍ਭਤਿ, ਤਂ ਦਸ੍ਸੇਤੁਂ ‘‘ਪਮਾਣਂ…ਪੇ… ਵੁਚ੍ਚਤੀ’’ਤਿ ਆਹ. ਨ ਓਹੀਯਤਿ ਨ ਤਿਟ੍ਠਤੀਤਿ ਕਤੂਪਚਿਤਮ੍ਪਿ ਕਾਮਾਵਚਰਕਮ੍ਮਂ ਯਥਾਧਿਗਤੇ ਮਹਗ੍ਗਤਜ੍ਝਾਨੇ ਅਪਰਿਹੀਨੇ ਤਂ ਅਭਿਭਵਿਤ੍ਵਾ ਆਸੀਦੇਤ੍ਵਾ ਪਸ੍ਸੇ ਓਹੀਯਕਂ ਕਤ੍ਵਾ ਪਟਿਸਨ੍ਧਿਂ ਦਾਤੁਂ ਸਮਤ੍ਥਭਾਵੇਨ ਨ ਤਿਟ੍ਠਤਿ. ਲਗ੍ਗਿਤੁਨ੍ਤਿ ਆਵਰਿਤੁਂ. ਠਾਤੁਨ੍ਤਿ ਪਤਿਟ੍ਠਾਤੁਂ. ਫਰਿਤ੍ਵਾਤਿ ਪਟਿਪ੍ਫਰਿਤ੍ਵਾ. ਪਰਿਯਾਦਿਯਿਤ੍ਵਾਤਿ ਤਸ੍ਸ ਸਾਮਤ੍ਥਿਯਂ ਖੇਪੇਤ੍ਵਾ. ਕਮ੍ਮਸ੍ਸ ਪਰਿਯਾਦਿਯਨਂ ਨਾਮ ਵਿਪਾਕੁਪ੍ਪਾਦਬਨ੍ਧਨਮੇਵਾਤਿ ਆਹ – ‘‘ਤਸ੍ਸ ਵਿਪਾਕਂ ਪਟਿਬਾਹਿਤ੍ਵਾ’’ਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਸੁਭਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.