੫. ਬ੍ਰਾਹ੍ਮਣਵਗ੍ਗੋ

੧. ਬ੍ਰਹ੍ਮਾਯੁਸੁਤ੍ਤਵਣ੍ਣਨਾ

੩੮੩. ‘‘ਮਹਾਸਤ੍ਤੋ ਮਹਿਦ੍ਧਿਕੋ ਮਹਾਨੁਭਾਵੋ’’ਤਿਆਦੀਸੁ (ਮਹਾਵ. ੩੮) ਉਲ਼ਾਰਤਾ ਵਿਸਯੋ, ‘‘ਮਹਾਜਨਕਾਯੋ ਸਨ੍ਨਿਪਤੀ’’ਤਿਆਦੀਸੁ ਸਮ੍ਬਹੁਲਭਾਵਵਿਸਯੋ, ਇਧ ਪਨ ਤਦੁਭਯਮ੍ਪਿਸ੍ਸ ਅਤ੍ਥੋਤਿ ‘‘ਮਹਤਾਤਿ ਗੁਣਮਹਤ੍ਤੇਨਪਿ ਮਹਤਾ’’ਤਿਆਦਿ ਵੁਤ੍ਤਂ. ਅਪ੍ਪਿਚ੍ਛਤਾਦੀਤਿ ਆਦਿ-ਸਦ੍ਦੇਨ ਸਨ੍ਤੁਟ੍ਠਿਸਲ੍ਲੇਖਪਵਿਵੇਕਅਸਂਸਗ੍ਗਵੀਰਿਯਾਰਮ੍ਭਾਦੀਨਂ ਸਙ੍ਗਹੋ. ਦਿਟ੍ਠਿਸੀਲਸਾਮਞ੍ਞਸਙ੍ਘਾਤਸਙ੍ਖਾਤੇਨਾਤਿ ਏਤ੍ਥ ‘‘ਨਿਯਤੋ ਸਮ੍ਬੋਧਿਪਰਾਯਣੋ’’ (ਸਂ. ਨਿ. ੨.੪੧; ੩.੯੯੮, ੧੦੦੪) – ‘‘ਅਟ੍ਠਾਨਮੇਤਂ, ਭਿਕ੍ਖਵੇ, ਅਨਵਕਾਸੋ, ਯਂ ਦਿਟ੍ਠਿਸਮ੍ਪਨ੍ਨੋ ਪੁਗ੍ਗਲੋ ਸਞ੍ਚਿਚ੍ਚ ਪਾਣਂ ਜੀਵਿਤਾ ਵੋਰੋਪੇਯ੍ਯਾਤਿ ਨੇਤਂ ਠਾਨਂ ਵਿਜ੍ਜਤੀ’’ਤਿਆਦਿਵਚਨਤੋ ਦਿਟ੍ਠਿਸੀਲਾਨਂ ਨਿਯਤਸਭਾਵਤ੍ਤਾ ਸੋਤਾਪਨ੍ਨਾਪਿ ਅਞ੍ਞਮਞ੍ਞਂ ਦਿਟ੍ਠਿਸੀਲਸਾਮਞ੍ਞੇਨ ਸਂਹਤਾ, ਪਗੇਵ ਸਕਦਾਗਾਮਿਆਦਯੋ. ‘‘ਤਥਾਰੂਪਾਯ ਦਿਟ੍ਠਿਯਾ ਦਿਟ੍ਠਿਸਾਮਞ੍ਞਗਤੋ ਵਿਹਰਤਿ (ਦੀ. ਨਿ. ੩.੩੨੪, ੩੫੬; ਮ. ਨਿ. ੧.੪੯੨; ੩.੫੪; ਅ. ਨਿ. ੬.੧੧; ਪਰਿ. ੨੭੪) ਤਥਾਰੂਪੇਹਿ ਸੀਲੇਹਿ ਸੀਲਸਾਮਞ੍ਞਗਤੋ ਵਿਹਰਤੀ’’ਤਿ (ਦੀ. ਨਿ. ੩.੩੨੪; ਮ. ਨਿ. ੧.੪੯੨; ੩.੫੪; ਅ. ਨਿ. ੬.੧੨; ਪਰਿ. ੨੭੪) ਵਚਨਤੋ ਪੁਥੁਜ੍ਜਨਾਨਮ੍ਪਿ ਦਿਟ੍ਠਿਸੀਲਸਾਮਞ੍ਞੇਨ ਸਂਹਤਭਾਵੋ ਲਬ੍ਭਤਿਯੇਵ.

ਓਟ੍ਠਪਹਤਕਰਣਵਸੇਨ ਅਤ੍ਥਵਿਭਾਗਵਸੇਨ. ਸਨਿਘਣ੍ਡੁਕੇਟੁਭਾਨਨ੍ਤਿ ਏਤ੍ਥ ਨਿਘਣ੍ਡੂਤਿ ਵਚਨੀਯਵਾਚਕਭਾਵੇਨ ਅਤ੍ਥਂ ਸਦ੍ਦਞ੍ਚ ਖਣ੍ਡਤਿ ਵਿਭਜ੍ਜ ਦਸ੍ਸੇਤੀਤਿ ਨਿਖਣ੍ਡੁ. ਸੋ ਏਵ ਇਧ ਖ-ਕਾਰਸ੍ਸ ਘ-ਕਾਰਂ ਕਤ੍ਵਾ ‘‘ਨਿਘਣ੍ਡੂ’’ਤਿ ਵੁਤ੍ਤੋ. ਕਿਟਤਿ ਗਮੇਤਿ ਕਿਰਿਯਾਦਿਵਿਭਾਗਂ, ਤਂ ਵਾ ਅਨਵਸੇਸਪਰਿਯਾਦਾਨਤੋ ਗਮੇਨ੍ਤੋ ਪੂਰੇਤੀਤਿ ਕੇਟੁਭਂ. ਵੇਵਚਨਪ੍ਪਕਾਸਕਨ੍ਤਿ ਪਰਿਯਾਯਸਦ੍ਦਦੀਪਕਂ, ਏਕੇਕਸ੍ਸ ਅਤ੍ਥਸ੍ਸ ਅਨੇਕਪਰਿਯਾਯਵਚਨਵਿਭਾਵਕਨ੍ਤਿ ਅਤ੍ਥੋ. ਨਿਦਸ੍ਸਨਮਤ੍ਤਞ੍ਚੇਤਂ ਅਨੇਕੇਸਮ੍ਪਿ ਅਤ੍ਥਾਨਂ ਏਕਸਦ੍ਦਵਚਨੀਯਤਾਵਿਭਾਵਨਵਸੇਨਪਿ ਤਸ੍ਸ ਗਨ੍ਥਸ੍ਸ ਪਵਤ੍ਤਤ੍ਤਾ. ਵਚੀਭੇਦਾਦਿਲਕ੍ਖਣਾ ਕਿਰਿਯਾ ਕਪ੍ਪੀਯਤਿ ਏਤੇਨਾਤਿ ਕਿਰਿਯਾਕਪ੍ਪੋ, ਸੋ ਪਨ ਵਣ੍ਣਪਦਸਮ੍ਬਨ੍ਧਪਦਤ੍ਥਵਿਭਾਗਤੋ ਬਹੁਵਿਕਪ੍ਪੋਤਿ ਆਹ ‘‘ਕਿਰਿਯਾਕਪ੍ਪਵਿਕਪ੍ਪੋ’’ਤਿ. ਇਦਞ੍ਚ ਮੂਲਕਿਰਿਯਾਕਪ੍ਪਗਨ੍ਥਂ ਸਨ੍ਧਾਯ ਵੁਤ੍ਤਂ. ਸੋ ਹਿ ਸਤਸਹਸ੍ਸਪਰਿਮਾਣੋ ਨਲਚਰਿਯਾਦਿਪਕਰਣਂ. ਠਾਨਕਰਣਾਦਿਵਿਭਾਗਤੋ ਨਿਬ੍ਬਚਨਵਿਭਾਗਤੋ ਚ ਅਕ੍ਖਰਾ ਪਭੇਦੀਯਨ੍ਤਿ ਏਤੇਹੀਤਿ ਅਕ੍ਖਰਪ੍ਪਭੇਦਾ, ਸਿਕ੍ਖਾਨਿਰੁਤ੍ਤਿਯੋ. ਏਤੇਸਨ੍ਤਿ ਵੇਦਾਨਂ. ਤੇ ਏਵ ਵੇਦੇ ਪਦਸੋ ਕਾਯਤੀਤਿ ਪਦਕੋ. ਤਂ ਤਂ ਸਦ੍ਦਂ ਤਦਤ੍ਥਞ੍ਚ ਬ੍ਯਾਕਰੋਤਿ ਬ੍ਯਾਚਿਕ੍ਖਤਿ ਏਤੇਨਾਤਿ ਬ੍ਯਾਕਰਣਂ, ਸਦ੍ਦਸਤ੍ਥਂ. ਆਯਤਿਂ ਹਿਤਂ ਤੇਨ ਲੋਕੋ ਨ ਯਤਤਿ ਨ ਈਹਤੀਤਿ ਲੋਕਾਯਤਂ. ਤਞ੍ਹਿ ਗਨ੍ਥਂ ਨਿਸ੍ਸਾਯ ਸਤ੍ਤਾ ਪੁਞ੍ਞਕਿਰਿਯਾਯ ਚਿਤ੍ਤਮ੍ਪਿ ਨ ਉਪ੍ਪਾਦੇਨ੍ਤਿ. ਵਯਤੀਤਿ ਵਯੋ, ਨ ਵਯੋ ਅਵਯੋ, ਨ ਅਵਯੋ ਅਨਵਯੋ, ਆਦਿਮਜ੍ਝਪਰਿਯੋਸਾਨੇਸੁ ਕਤ੍ਥਚਿ ਅਪਰਿਕਿਲਨ੍ਤੋ ਅਵਿਤ੍ਥਾਯਨ੍ਤੋ ਤੇ ਗਨ੍ਥੇ ਸਨ੍ਧਾਰੇਤਿ ਪੂਰੇਤੀਤਿ ਅਤ੍ਥੋ. ਦ੍ਵੇ ਪਟਿਸੇਧਾ ਪਕਤਿਂ ਗਮੇਨ੍ਤੀਤਿ ਦਸ੍ਸੇਨ੍ਤੋ ‘‘ਅਵਯੋ ਨ ਹੋਤੀ’’ਤਿ ਵਤ੍ਵਾ ਤਤ੍ਥ ਅਵਯਂ ਦਸ੍ਸੇਤੁਂ ‘‘ਅਵਯੋ…ਪੇ… ਨ ਸਕ੍ਕੋਤੀ’’ਤਿ ਵੁਤ੍ਤਂ.

੩੮੪. ਗਰੂਤਿ ਭਾਰਿਯਂ ਅਤ੍ਤਾਨਂ ਤਤੋ ਮੋਚੇਤ੍ਵਾ ਗਮਨਂ ਦੁਕ੍ਕਰਂ ਹੋਤਿ. ਅਨਤ੍ਥੋਪਿ ਉਪ੍ਪਜ੍ਜਤਿ ਨਿਨ੍ਦਾਬ੍ਯਾਰੋਸਉਪਾਰਮ੍ਭਾਦਿ. ਅਬ੍ਭੁਗ੍ਗਤੋਤਿ ਏਤ੍ਥ ਅਭਿਸਦ੍ਦਯੋਗੇਨ ਇਤ੍ਥਮ੍ਭੂਤਾਖ੍ਯਾਨਤ੍ਥੇ ਉਪਯੋਗਵਚਨਂ.

ਲਕ੍ਖਣਾਨੀਤਿ ਲਕ੍ਖਣਦੀਪਨਾਨਿ ਮਨ੍ਤਪਦਾਨਿ. ਅਨ੍ਤਰਧਾਯਨ੍ਤੀਤਿ ਨ ਕੇਵਲਂ ਲਕ੍ਖਣਮਨ੍ਤਾਨਿਯੇਵ, ਅਞ੍ਞਾਨਿਪਿ ਬ੍ਰਾਹ੍ਮਣਾਨਂ ਞਾਣਬਲਾਭਾਵੇਨ ਅਨੁਕ੍ਕਮੇਨ ਅਨ੍ਤਰਧਾਯਨ੍ਤਿ. ਤਥਾ ਹਿ ਵਦਨ੍ਤਿ ‘‘ਏਕਸਤਂ ਅਦ੍ਧਰਿਯਂ ਦਿਪਞ੍ਞਾਸਮਤ੍ਤਤੋ ਸਾਮਾ’’ਤਿਆਦਿ. ਪਣਿਧਿਮਹਤੋ ਸਮਾਦਾਨਮਹਤੋਤਿਆਦਿਨਾ ਪਚ੍ਚੇਕਂ ਮਹ-ਸਦ੍ਦੋ ਯੋਜੇਤਬ੍ਬੋ. ਪਣਿਧਿਮਹਨ੍ਤਤਾਦਿ ਚਸ੍ਸ ਬੁਦ੍ਧਵਂਸਚਰਿਯਾਪਿਟਕਵਣ੍ਣਨਾਦਿਵਸੇਨੇਵ ਵੇਦਿਤਬ੍ਬੋ. ਨਿਟ੍ਠਾਤਿ ਨਿਪ੍ਫਤ੍ਤਿਯੋ. ਜਾਤਿਸਾਮਞ੍ਞਤੋਤਿ ਲਕ੍ਖਣਜਾਤਿਯਾ ਲਕ੍ਖਣਭਾਵੇਨ ਸਮਾਨਭਾਵਤੋ. ਯਥਾ ਹਿ ਬੁਦ੍ਧਾਨਂ ਲਕ੍ਖਣਾਨਿ ਸੁਵਿਸੁਦ੍ਧਾਨਿ ਸੁਪਰਿਬ੍ਯਤ੍ਤਾਨਿ ਪਰਿਪੁਣ੍ਣਾਨਿ ਚ ਹੋਨ੍ਤਿ, ਨ ਏਵਂ ਚਕ੍ਕਵਤ੍ਤੀਨਂ. ਤੇਨਾਹ ‘‘ਨ ਤੇਹੇਵ ਬੁਦ੍ਧੋ ਹੋਤੀ’’ਤਿ.

ਅਭਿਰੂਪਤਾ ਦੀਘਾਯੁਕਤਾ, ਅਪ੍ਪਾਤਙ੍ਕਤਾ ਬ੍ਰਾਹ੍ਮਣਾਦੀਨਂ ਪਿਯਮਨਾਪਤਾਤਿ ਚਤੂਹਿ ਅਚ੍ਛਰਿਯਧਮ੍ਮੇਹਿ. ਦਾਨਂ ਪਿਯਵਚਨਂ ਅਤ੍ਥਚਰਿਯਾ ਸਮਾਨਤ੍ਤਤਾਤਿ ਇਮੇਹਿ ਚਤੂਹਿ ਸਙ੍ਗਹਵਤ੍ਥੂਹਿ. ਰਞ੍ਜਨਤੋਤਿ ਪੀਤਿਜਨਨਤੋ. ਚਕ੍ਕਂ ਚਕ੍ਕਰਤਨਂ ਵਤ੍ਤੇਤਿ ਪਵਤ੍ਤੇਤੀਤਿ ਚਕ੍ਕਵਤ੍ਤੀ, ਸਮ੍ਪਤ੍ਤਿਚਕ੍ਕੇਹਿ ਸਯਂ ਵਤ੍ਤੇਤਿ, ਤੇਹਿ ਚ ਪਰਂ ਸਤ੍ਤਨਿਕਾਯਂ ਵਤ੍ਤੇਤਿ ਪਵਤ੍ਤੇਤੀਤਿ ਚਕ੍ਕਵਤ੍ਤੀ, ਪਰਹਿਤਾਵਹੋ ਇਰਿਯਾਪਥਚਕ੍ਕਾਨਂ ਵਤ੍ਤੋ ਵਤ੍ਤਨਂ ਏਤਸ੍ਸ ਅਤ੍ਥੀਤਿ ਚਕ੍ਕਵਤ੍ਤੀ, ਅਪ੍ਪਟਿਹਤਂ ਵਾ ਆਣਾਸਙ੍ਖਾਤਂ ਚਕ੍ਕਂ ਵਤ੍ਤੇਤੀਤਿ ਚਕ੍ਕਵਤੀ, ਅਪ੍ਪਟਿਹਤਂ ਵਾ ਆਣਾਸਙ੍ਖਾਤਂ ਚਕ੍ਕਂ ਵਤ੍ਤੇਤੀਤਿ ਚਕ੍ਕਵਤ੍ਤੀ, ਖਤ੍ਤਿਯਮਣ੍ਡਲਾਦਿਸਞ੍ਞਿਤਂ ਚਕ੍ਕਂ ਸਮੂਹਂ ਅਤ੍ਤਨੋ ਵਸੇ ਵਤ੍ਤੇਤੀਤਿ ਚਕ੍ਕਵਤ੍ਤੀ. ਧਮ੍ਮਂ ਚਰਤੀਤਿ ਧਮ੍ਮਿਕੋ. ਧਮ੍ਮਤੋ ਅਨਪੇਤਤ੍ਤਾ ਧਮ੍ਮੋ ਰਞ੍ਜਨਤ੍ਥੇਨ ਰਾਜਾਤਿ ਧਮ੍ਮਰਾਜਾ. ਕੋਪਾਦੀਤਿ ਆਦਿ-ਸਦ੍ਦੇਨ ਕਾਮਲੋਭਮਾਨਮਦਾਦਿਕੇ ਸਙ੍ਗਣ੍ਹਾਤਿ. ਵਿਜਿਤਾਵੀਤਿ ਵਿਜਿਤਵਾ. ਕੇਨਚਿ ਅਕਮ੍ਪਿਯਟ੍ਠੇਨ ਜਨਪਦਤ੍ਥਾਵਰਿਯਪ੍ਪਤ੍ਤੋ. ਦਲ਼੍ਹਭਤ੍ਤਿਭਾਵਤੋ ਵਾ ਜਨਪਦੋ ਥਾਵਰਿਯਂ ਪਤ੍ਤੋ ਏਤ੍ਥਾਤਿ ਜਨਪਦਤ੍ਥਾਵਰਿਯਪ੍ਪਤ੍ਤੋ. ਚਿਤ੍ਤੀਕਤਭਾਵਾਦਿਨਾਪਿ (ਖੁ. ਪਾ. ਅਟ੍ਠ. ੬.੩; ਦੀ. ਨਿ. ਅਟ੍ਠ. ੨.੩੩; ਸਂ. ਨਿ. ਅਟ੍ਠ. ੩.੫.੨੨੩; ਸੁ. ਨਿ. ਅਟ੍ਠ. ੧.੨੨੬; ਮਹਾਨਿ. ਅਟ੍ਠ. ੫੦) ਚਕ੍ਕਸ੍ਸ ਰਤਨਟ੍ਠੋ ਵੇਦਿਤਬ੍ਬੋ. ਏਸ ਨਯੋ ਸੇਸੇਸੁਪਿ. ਰਤਿਨਿਮਿਤ੍ਤਤਾਯ ਵਾ ਚਿਤ੍ਤੀਕਤਾਦਿਭਾਵਸ੍ਸ ਰਤਿਜਨਨਟ੍ਠੇਨ ਏਕਸਙ੍ਗਹਤਾਯ ਵਿਸੁਂ ਅਗ੍ਗਹਣਂ.

ਇਮੇਹਿ ਪਨ ਰਤਨੇਹਿ ਰਾਜਾ ਚਕ੍ਕਵਤ੍ਤੀ ਯਂ ਯਮਤ੍ਥਂ ਪਚ੍ਚਨੁਭੋਤਿ, ਤਂ ਤਂ ਦਸ੍ਸੇਤੁਂ ‘‘ਇਮੇਸੁ ਪਨਾ’’ਤਿਆਦਿ ਵੁਤ੍ਤਂ. ਅਜਿਤਂ ਜਿਨਾਤਿ ਮਹੇਸਕ੍ਖਤਾਸਂਵਤ੍ਤਨਿਯਕਮ੍ਮਨਿਸ੍ਸਨ੍ਦਭਾਵਤੋ. ਵਿਜਿਤੇ ਯਥਾਸੁਖਂ ਅਨੁਵਿਚਰਤਿ ਹਤ੍ਥਿਰਤਨਂ ਅਸ੍ਸਰਤਨਞ੍ਚ ਅਭਿਰੁਹਿਤ੍ਵਾ ਤੇਸਂ ਆਨੁਭਾਵੇਨ ਅਨ੍ਤੋਪਾਤਰਾਸੇਯੇਵ ਸਕਲਂ ਪਥਵਿਂ ਅਨੁਸਂਯਾਯਿਤ੍ਵਾ ਰਾਜਧਾਨਿਯਂ ਪਚ੍ਚਾਗਮਨਤੋ. ਪਰਿਣਾਯਕਰਤਨੇਨ ਵਿਜਿਤਮਨੁਰਕ੍ਖਤਿ ਤੇਨ ਤਤ੍ਥ ਤਤ੍ਥ ਕਤ੍ਤਬ੍ਬਕਿਚ੍ਚਸ੍ਸ ਸਂਵਿਧਾਨਤੋ. ਸੇਸੇਹੀਤਿ ਮਣਿਰਤਨਇਤ੍ਥਿਰਤਨਗਹਪਤਿਰਤਨੇਹਿ. ਤਤ੍ਥ ਮਣਿਰਤਨੇਨ ਯੋਜਨਪ੍ਪਮਾਣੇ ਦੇਸੇ ਅਨ੍ਧਕਾਰਂ ਵਿਧਮਿਤ੍ਵਾ ਆਲੋਕਦਸ੍ਸਨਾਦਿਨਾ ਸੁਖਮਨੁਭਵਤਿ, ਇਤ੍ਥਿਰਤਨੇਨ ਅਤਿਕ੍ਕਨ੍ਤਮਾਨੁਸਰੂਪਸਮ੍ਪਤ੍ਤਿਦਸ੍ਸਨਾਦਿਵਸੇਨ, ਗਹਪਤਿਰਤਨੇਨ ਇਚ੍ਛਿਤਿਚ੍ਛਿਤਮਣਿਕਨਕਰਜਤਾਦਿਧਨਪ੍ਪਟਿਲਾਭਵਸੇਨ. ਉਸ੍ਸਾਹਸਤ੍ਤਿਯੋਗੋ ਯੇਨ ਕੇਨਚਿ ਅਪ੍ਪਟਿਹਤਾਣਾਚਕ੍ਕਭਾਵਸਿਦ੍ਧਿਤੋ. ਹਤ੍ਥਿਅਸ੍ਸਰਤਨਾਦੀਨਂ ਮਹਾਨੁਭਾਵਤ੍ਤਾ ਕੋਸਸਮ੍ਪਤ੍ਤਿਯਾਪਿ ਪਭਾਵਸਮ੍ਪਤ੍ਤਿਸਿਦ੍ਧਿਤੋ ‘‘ਹਤ੍ਥਿ…ਪੇ… ਯੋਗੋ’’ਤਿ ਵੁਤ੍ਤਂ. ਕੋਸੋ ਹਿ ਨਾਮ ਸਤਿ ਉਸ੍ਸਾਹਸਮ੍ਪਤ੍ਤਿਯਂ (ਉਗ੍ਗਤੇਜਸ੍ਸ ਸੁਕੁਮਾਰਪਰਕ੍ਕਮਸ੍ਸ ਪਸਨ੍ਨਮੁਖਸ੍ਸ ਸਮ੍ਮੁਖੇ ਪਾਪੁਣਾਤਿ). ਪਚ੍ਛਿਮੇਨਾਤਿ ਪਰਿਣਾਯਕਰਤਨੇਨ. ਤਞ੍ਹਿ ਸਬ੍ਬਰਾਜਕਿਚ੍ਚੇਸੁ ਕੁਸਲਂ ਅਵਿਰਜ੍ਝਨਪਯੋਗਂ. ਤੇਨਾਹ ‘‘ਮਨ੍ਤਸਤ੍ਤਿਯੋਗੋ’’ਤਿ. ਤਿਵਿਧਸਤ੍ਤਿਯੋਗਫਲਂ ਪਰਿਪੁਣ੍ਣਂ ਹੋਤੀਤਿ ਸਮ੍ਬਨ੍ਧੋ. ਸੇਸੇਹੀਤਿ ਸੇਸੇਹਿ ਪਞ੍ਚਹਿ ਰਤਨੇਹਿ. ਅਦੋਸਕੁਸਲਮੂਲਜਨਿਤਕਮ੍ਮਾਨੁਭਾਵੇਨਾਤਿ ਅਦੋਸਸਙ੍ਖਾਤੇਨ ਕੁਸਲਮੂਲੇਨ ਸਹਜਾਤਾਦਿਪਚ੍ਚਯਵਸੇਨ ਉਪ੍ਪਾਦਿਤਕਮ੍ਮਸ੍ਸ ਆਨੁਭਾਵੇਨ ਸਮ੍ਪਜ੍ਜਨ੍ਤਿ ਸੋਮ੍ਮਤਰਰਤਨਜਾਤਿਕਤ੍ਤਾ. ਮਜ੍ਝਿਮਾਨਿ ਮਣਿਇਤ੍ਥਿਗਹਪਤਿਰਤਨਾਨਿ. ਅਲੋਭ…ਪੇ… ਕਮ੍ਮਾਨੁਭਾਵੇਨ ਸਮ੍ਪਜ੍ਜਨ੍ਤਿ ਉਲ਼ਾਰਧਨਸ੍ਸ ਉਲ਼ਾਰਧਨਪਟਿਲਾਭਕਾਰਣਸ੍ਸ ਚ ਪਰਿਚ੍ਚਾਗਸਮ੍ਪਦਾਹੇਤੁਕਤ੍ਤਾ. ਪਚ੍ਛਿਮਨ੍ਤਿ ਪਰਿਣਾਯਕਰਤਨਂ. ਤਞ੍ਹਿ ਅਮੋਹ…ਪੇ… ਕਮ੍ਮਾਨੁਭਾਵੇਨ ਸਮ੍ਪਜ੍ਜਤਿ ਮਹਾਪਞ੍ਞੇਨੇਵ ਚਕ੍ਕਵਤ੍ਤਿਰਾਜਕਿਚ੍ਚਸ੍ਸ ਪਰਿਣੇਤਬ੍ਬਤ੍ਤਾ.

ਸਰਣਤੋ ਪਟਿਪਕ੍ਖਵਿਧਮਨਤੋ ਸੂਰਾ. ਤੇਨਾਹ ‘‘ਅਭੀਰੁਕਜਾਤਿਕਾ’’ਤਿ. ਅਸੁਰੇ ਵਿਜਿਨਿਤ੍ਵਾ ਠਿਤਤ੍ਤਾ ਵੀਰੋ, ਸਕ੍ਕੋ ਦੇਵਾਨਮਿਨ੍ਦੋ, ਤਸ੍ਸ ਅਙ੍ਗਂ ਦੇਵਪੁਤ੍ਤੋ ਸੇਨਙ੍ਗਭਾਵਤੋਤਿ ਵੁਤ੍ਤਂ ‘‘ਵੀਰਙ੍ਗਰੂਪਾਤਿ ਦੇਵਪੁਤ੍ਤਸਦਿਸਕਾਯਾ’’ਤਿ. ਸਭਾਵੋਤਿ ਸਭਾਵਭੂਤੋ ਅਤ੍ਥੋ. ਵੀਰਕਾਰਣਨ੍ਤਿ ਵੀਰਭਾਵਕਾਰਣਂ. ਵੀਰਿਯਮਯਸਰੀਰਾ ਵਿਯਾਤਿ ਸਵਿਗ੍ਗਹਵੀਰਿਯਸਦਿਸਾ ਸਵਿਗ੍ਗਹਞ੍ਚੇ ਵੀਰਿਯਂ ਸਿਯਾ, ਤਂਸਦਿਸਾਤਿ ਅਤ੍ਥੋ. ਨਨੁ ਰਞ੍ਞੋ ਚਕ੍ਕਵਤ੍ਤਿਸ੍ਸ ਪਟਿਸੇਨਾ ਨਾਮ ਨਤ੍ਥਿ, ਯਮਸ੍ਸ ਪੁਤ੍ਤਾ ਪਮਦ੍ਦੇਯ੍ਯੁਂ, ਅਥ ਕਸ੍ਮਾ ‘‘ਪਰਸੇਨਪਮਦ੍ਦਨਾ’’ਤਿ ਵੁਤ੍ਤਨ੍ਤਿ ਚੋਦਨਂ ਸਨ੍ਧਾਯਾਹ ‘‘ਸਚੇ’’ਤਿਆਦਿ. ਤੇਨ ਪਰਸੇਨਾ ਹੋਤੁ ਵਾ ਮਾ ਵਾ, ਤੇ ਪਨ ਏਵਂ ਮਹਾਨੁਭਾਵਾਤਿ ਦਸ੍ਸੇਤਿ. ਧਮ੍ਮੇਨਾਤਿ ਕਤੂਪਚਿਤੇਨ ਅਤ੍ਤਨੋ ਪੁਞ੍ਞਧਮ੍ਮੇਨ. ਤੇਨ ਹਿ ਸਞ੍ਚੋਦਿਤਾ ਪਥਵਿਯਂ ਸਬ੍ਬਰਾਜਾਨੋ ਪਚ੍ਚੁਗ੍ਗਨ੍ਤ੍ਵਾ ‘‘ਸ੍ਵਾਗਤਂ ਤੇ ਮਹਾਰਾਜਾ’’ਤਿਆਦਿਂ ਵਤ੍ਵਾ ਅਤ੍ਤਨੋ ਰਜ੍ਜਂ ਰਞ੍ਞੋ ਚਕ੍ਕਵਤ੍ਤਿਸ੍ਸ ਨਿਯ੍ਯਾਦੇਨ੍ਤਿ. ਤੇਨ ਵੁਤ੍ਤਂ ‘‘ਸੋ ਇਮਂ…ਪੇ… ਅਜ੍ਝਾਵਸਤੀ’’ਤਿ. ਅਟ੍ਠਕਥਾਯਂ ਪਨ ਤਸ੍ਸ ਯਥਾਵੁਤ੍ਤਧਮ੍ਮਸ੍ਸ ਚਿਰਤਰਂ ਵਿਪਚ੍ਚਿਤੁਂ ਪਚ੍ਚਯਭੂਤਂ ਚਕ੍ਕਵਤ੍ਤਿਵਤ੍ਤਸਮੁਦਾਗਤਂ ਪਯੋਗਸਮ੍ਪਤ੍ਤਿਸਙ੍ਖਾਤਂ ਧਮ੍ਮਂ ਦਸ੍ਸੇਤੁਂ ‘‘ਪਾਣੋ ਨ ਹਨ੍ਤਬ੍ਬੋਤਿਆਦਿਨਾ ਪਞ੍ਚਸੀਲਧਮ੍ਮੇਨਾ’’ਤਿ ਵੁਤ੍ਤਂ. ਏਵਞ੍ਹਿ ‘‘ਅਦਣ੍ਡੇਨ ਅਸਤ੍ਥੇਨਾ’’ਤਿ ਇਦਂ ਵਚਨਂ ਸੁਟ੍ਠੁਤਰਂ ਸਮਤ੍ਥਿਤਂ ਹੋਤਿ, ਯਸ੍ਮਾ ਰਾਗਾਦਯੋ ਪਾਪਧਮ੍ਮਾ ਉਪ੍ਪਜ੍ਜਮਾਨਾ ਸਤ੍ਤਸਨ੍ਤਾਨਂ ਛਾਦੇਤ੍ਵਾ ਪਰਿਯੋਨਨ੍ਧਿਤ੍ਵਾ ਤਿਟ੍ਠਨ੍ਤਿ, ਕੁਸਲਪਵਤ੍ਤਿਂ ਨਿਵਾਰੇਨ੍ਤਿ, ਤਸ੍ਮਾ ਤੇ ‘‘ਛਦਨਾ, ਛਦਾ’’ਤਿ ਚ ਵੁਤ੍ਤਾ.

ਵਿਵਟ੍ਟੇਤ੍ਵਾ ਪਰਿਵਤ੍ਤੇਤ੍ਵਾ. ਪੂਜਾਰਹਤਾ ਵੁਤ੍ਤਾ ‘‘ਅਰਹਤੀਤਿ ਅਰਹ’’ਨ੍ਤਿ. ਤਸ੍ਸਾਤਿ ਪੂਜਾਰਹਤਾਯ. ਯਸ੍ਮਾ ਸਮ੍ਮਾਸਮ੍ਬੁਦ੍ਧੋ, ਤਸ੍ਮਾ ਅਰਹਨ੍ਤਿ. ਬੁਦ੍ਧਤ੍ਤਹੇਤੁਭੂਤਾ ਵਿਵਟ੍ਟਚ੍ਛਦਤਾ ਵੁਤ੍ਤਾ ਸਵਾਸਨਸਬ੍ਬਕਿਲੇਸਪ੍ਪਹਾਨਪੁਬ੍ਬਕਤ੍ਤਾ ਬੁਦ੍ਧਭਾਵਸਿਦ੍ਧਿਯਾ. ਅਰਹਂ ਵਟ੍ਟਾਭਾਵੇਨਾਤਿ ਫਲੇਨ ਹੇਤੁਅਨੁਮਾਨਦਸ੍ਸਨਂ. ਸਮ੍ਮਾਸਮ੍ਬੁਦ੍ਧੋ ਛਦਨਾਭਾਵੇਨਾਤਿ ਹੇਤੁਨਾ ਫਲਾਨੁਮਾਨਦਸ੍ਸਨਂ. ਹੇਤੁਦ੍ਵਯਂ ਵੁਤ੍ਤਂ ‘‘ਵਿਵਟ੍ਟੋ ਵਿਚ੍ਛਦੋ ਚਾ’’ਤਿ. ਦੁਤਿਯਵੇਸਾਰਜ੍ਜੇਨਾਤਿ ‘‘ਖੀਣਾਸਵਸ੍ਸ ਤੇ ਪਟਿਜਾਨਤੋ’’ਤਿਆਦਿਨਾ (ਮ. ਨਿ. ੧.੧੫੦) ਆਗਤੇਨ ਵੇਸਾਰਜ੍ਜੇਨ. ਪੁਰਿਮਸਿਦ੍ਧੀਤਿ ਪੁਰਿਮਸ੍ਸ ਪਦਸ੍ਸ ਅਤ੍ਥਸਿਦ੍ਧਿ. ਪਠਮੇਨਾਤਿ ‘‘ਸਮ੍ਮਾਸਮ੍ਬੁਦ੍ਧਸ੍ਸ ਤੇ ਪਟਿਜਾਨਤੋ’’ਤਿਆਦਿਨਾ (ਮ. ਨਿ. ੧.੧੫੦) ਆਗਤੇਨ ਵੇਸਾਰਜ੍ਜੇਨ. ਦੁਤਿਯਸਿਦ੍ਧੀਤਿ ਬੁਦ੍ਧਤ੍ਤਸਿਦ੍ਧਿ. ਤਤਿਯਚਤੁਤ੍ਥੇਹੀਤਿ ‘‘ਯੇ ਖੋ ਪਨ ਤੇ ਅਨ੍ਤਰਾਯਿਕਾ ਧਮ੍ਮਾ’’ਤਿਆਦਿਨਾ (ਮ. ਨਿ. ੧.੧੫੦), ‘‘ਯਸ੍ਸ ਖੋ ਪਨ ਤੇ ਅਤ੍ਥਾਯਾ’’ਤਿਆਦਿਨਾ (ਮ. ਨਿ. ੧.੧੫੦) ਚ ਆਗਤੇਹਿ ਤਤਿਯਚਤੁਤ੍ਥੇਹਿ ਵੇਸਾਰਜ੍ਜੇਹਿ. ਤਤਿਯਸਿਦ੍ਧੀਤਿ ਵਿਵਟ੍ਟਚ੍ਛਦਨਤਾ ਸਿਦ੍ਧਿ. ਯਾਥਾਵਤੋ ਅਨ੍ਤਰਾਯਿਕਨਿਯ੍ਯਾਨਿਕਧਮ੍ਮਾਪਦੇਸੇਨ ਹਿ ਸਤ੍ਥੁ ਵਿਵਟ੍ਟਚ੍ਛਦਭਾਵੋ ਲੋਕੇ ਪਾਕਟੋ ਅਹੋਸਿ. ਪੁਰਿਮਂ ਧਮ੍ਮਚਕ੍ਖੁਨ੍ਤਿ ਪੁਰਿਮਪਦਂ ਭਗਵਤੋ ਧਮ੍ਮਚਕ੍ਖੁਂ ਸਾਧੇਤਿ ਕਿਲੇਸਾਰੀਨਂ ਸਂਸਾਰਚਕ੍ਕਸ੍ਸ ਚ ਅਰਾਨਂ ਹਤਭਾਵਦੀਪਨਤੋ. ਦੁਤਿਯਂ ਪਦਂ ਬੁਦ੍ਧਚਕ੍ਖੁਂ ਸਾਧੇਤਿ ਸਮ੍ਮਾਸਮ੍ਬੁਦ੍ਧਸ੍ਸੇਵ ਤਂ ਸਮ੍ਭਵਤੋ. ਤਤਿਯਂ ਪਦਂ ਸਮਨ੍ਤਚਕ੍ਖੁਂ ਸਾਧੇਤਿ ਸਵਾਸਨਸਬ੍ਬਕਿਲੇਸਪ੍ਪਹਾਨਦੀਪਨਤੋ. ‘‘ਸਮ੍ਮਾਸਮ੍ਬੁਦ੍ਧੋ’’ਤਿ ਹਿ ਵਤ੍ਵਾ ‘‘ਵਿਵਟ੍ਟਚ੍ਛਦੋ’’ਤਿ ਵਚਨਂ ਬੁਦ੍ਧਭਾਵਾਵਹਮੇਵ ਸਬ੍ਬਕਿਲੇਸਪ੍ਪਹਾਨਂ ਵਿਭਾਵੇਤੀਤਿ. ਸੂਰਭਾਵਨ੍ਤਿ ਲਕ੍ਖਣਵਿਭਾਵਨੇਨ ਵਿਸਦਞਾਣਤਂ.

੩੮੫. ਗਵੇਸੀਤਿ (ਦੀ. ਨਿ. ਟੀ. ੧.੨੮੭) ਞਾਣੇਨ ਪਰਿਯੇਸਨਂ ਅਕਾਸਿ. ਸਮਾਨਯੀਤਿ ਞਾਣੇਨ ਸਙ੍ਕਲੇਨ੍ਤੋ ਸਮਾਨਂ ਆਨਯਿ ਸਮਾਹਰਿ. ਨ ਸਕ੍ਕੋਤਿ ਸਂਕੁਚਿਤੇ ਇਰਿਯਾਪਥੇ ਯੇਭੁਯ੍ਯੇਨ ਤੇਸਂ ਦੁਬ੍ਬਿਭਾਵਨਤੋ. ਕਙ੍ਖਤੀਤਿ ਪਦਸ੍ਸ ਆਕਙ੍ਖਤੀਤਿ ਅਯਮਤ੍ਥੋਤਿ ਆਹ – ‘‘ਅਹੋ ਵਤ ਪਸ੍ਸੇਯ੍ਯਨ੍ਤਿ ਪਤ੍ਥਨਂ ਉਪ੍ਪਾਦੇਤੀ’’ਤਿ. ਕਿਚ੍ਛਤੀਤਿ ਕਿਲਮਤਿ. ‘‘ਕਙ੍ਖਤੀ’’ਤਿ ਪਦਸ੍ਸ ਪੁਬ੍ਬੇ ਆਸੀਸਨਤ੍ਥਤਂ ਵਤ੍ਵਾ ਇਦਾਨਿ ਤਸ੍ਸ ਸਂਸਯਤ੍ਥਤ੍ਤਮੇਵ ਵਿਕਪ੍ਪਨ੍ਤਰਵਸੇਨ ਦਸ੍ਸੇਨ੍ਤੋ ‘‘ਕਙ੍ਖਾਯ ਵਾ ਦੁਬ੍ਬਲਾ ਵਿਮਤਿ ਵੁਤ੍ਤਾ’’ਤਿਆਦਿ ਵੁਤ੍ਤਂ. ਤੀਹਿ ਧਮ੍ਮੇਹਿ ਤਿਪ੍ਪਕਾਰੇਹਿ ਸਂਸਯਧਮ੍ਮੇਹਿ. ਕਾਲੁਸ੍ਸਿਯਭਾਵੋਤਿ ਅਪ੍ਪਸਨ੍ਨਤਾਯ ਹੇਤੁਭੂਤੋ ਆਵਿਲਭਾਵੋ. ਯਸ੍ਮਾ ਭਗਵਤੋ ਕੋਸੋਹਿਤਂ ਸਬ੍ਬਬੁਦ੍ਧਾਵੇਣਿਕਂ ਵਤ੍ਥਗੁਯ੍ਹਂ ਸੁਵਿਸੁਦ੍ਧਕਞ੍ਚਨਮਣ੍ਡਲਸਨ੍ਨਿਕਾਸਂ ਅਤ੍ਤਨੋ ਸਣ੍ਠਾਨਸਨ੍ਨਿਵੇਸਸੁਨ੍ਦਰਤਾਯ ਆਜਾਨੇਯ੍ਯਗਨ੍ਧਹਤ੍ਥਿਨੋ ਵਰਙ੍ਗਚਾਰੁਭਾਵਂ ਵਿਕਸਮਾਨਤਪਨਿਯਾਰਵਿਨ੍ਦਸਮੁਜ੍ਜਲਕੇਸਰਾਵਤ੍ਤਵਿਲਾਸਂ ਸਞ੍ਝਾਪਭਾਨੁਰਞ੍ਜਿਤਜਲਵਨਨ੍ਤਰਾਭਿਲਕ੍ਖਿਤ-ਸਮ੍ਪੁਣ੍ਣਚਨ੍ਦਮਣ੍ਡਲਸੋਭਞ੍ਚ ਅਤ੍ਤਨੋ ਸਿਰਿਯਾ ਅਭਿਭੁਯ੍ਯ ਵਿਰਾਜਤਿ, ਯਂ ਬਾਹਿਰਬ੍ਭਨ੍ਤਰਮਲੇਹਿ ਅਨੁਪਕ੍ਕਿਲਿਟ੍ਠਤਾਯ ਚਿਰਕਾਲਂ ਸੁਪਰਿਚਿਤਬ੍ਰਹ੍ਮਚਰਿਯਾਧਿਕਾਰਤਾਯ ਸੁਸਣ੍ਠਿਤਸਣ੍ਠਾਨਸਮ੍ਪਤ੍ਤਿਯਾ ਚ ਕੋਪੀਨਮ੍ਪਿ ਸਨ੍ਤਂ ਅਕੋਪੀਨਮੇਵ, ਤਸ੍ਮਾ ਵੁਤ੍ਤਂ ‘‘ਭਗਵਤੋ ਹੀ’’ਤਿਆਦਿ. ਪਹੂਤਭਾਵਨ੍ਤਿ ਪੁਥੁਲਭਾਵਂ. ਏਤ੍ਥੇਵ ਹਿ ਤਸ੍ਸ ਸਂਸਯੋ, ਤਨੁਮੁਦੁਸੁਕੁਮਾਰਤਾਦੀਸੁ ਪਨਸ੍ਸ ਗੁਣੇਸੁ ਤਸ੍ਸ ਵਿਚਾਰਣਾ ਏਵ ਨਾਹੋਸਿ.

ਹਿਰਿਕਰਣੋਕਾਸਨ੍ਤਿ ਹਿਰਿਯਿਤਬ੍ਬਟ੍ਠਾਨਂ. ਛਾਯਨ੍ਤਿ ਪਟਿਬਿਮ੍ਬਂ. ਕੀਦਿਸਨ੍ਤਿ ਆਹ ‘‘ਇਦ੍ਧਿਯਾ’’ਤਿਆਦਿ. ਛਾਯਾਰੂਪਨ੍ਤਿ ਭਗਵਤੋ ਪਟਿਬਿਮ੍ਬਰੂਪਂ. ਤਞ੍ਚ ਖੋ ਬੁਦ੍ਧਸਨ੍ਤਾਨਤੋ ਵਿਨਿਮੁਤ੍ਤਂ ਰੂਪਕਮਤ੍ਤਂ ਭਗਵਤੋ ਸਰੀਰਵਣ੍ਣਸਣ੍ਠਾਨਾਵਯਵਂ ਇਦ੍ਧਿਮਯਂ ਬਿਮ੍ਬਕਮਤ੍ਤਂ, ਤਂ ਪਨ ਦਸ੍ਸੇਨ੍ਤੋ ਭਗਵਾ ਯਥਾ ਅਤ੍ਤਨੋ ਬੁਦ੍ਧਰੂਪਂ ਨ ਦਿਸ੍ਸਤਿ, ਤਥਾ ਕਤ੍ਵਾ ਦਸ੍ਸੇਤਿ. ਨੀਹਰਿਤ੍ਵਾਤਿ ਫਰਿਤ੍ਵਾ.

ਕਣ੍ਣਸੋਤਾਨਂ ਉਪਚਿਤਤਨੁਤਮ੍ਬਲੋਮਤਾਯ ਧੋਤਰਜਤਪਨਾਲ਼ਿਕਾਸਦਿਸਤਾ ਵੁਤ੍ਤਾ. ਮੁਖਪਰਿਯਨ੍ਤੇਤਿ ਕੇਸਨ੍ਤੇ.

ਕਿਰਿਯਾਕਰਣਨ੍ਤਿ ਕਿਰਿਯਾਯ ਕਾਯਿਕਸ੍ਸ ਵਾਚਸਿਕਸ੍ਸ ਪਟਿਪਤ੍ਤਿ. ਤਤ੍ਥਾਤਿ ਤੇਸੁ ਕਿਚ੍ਚੇਸੁ. ਧਮ੍ਮਕਥਿਕਾਨਂ ਵਤ੍ਤਂ ਦਸ੍ਸੇਤੁਂ ਬੀਜਨਿਗ੍ਗਹਣਂ ਕਤਂ. ਨ ਹਿ ਅਞ੍ਞਥਾ ਸਬ੍ਬਸ੍ਸਪਿ ਲੋਕਸ੍ਸ ਅਲਙ੍ਕਾਰਭੂਤਂ ਪਰਮੁਕ੍ਕਂਸਗਤਂ ਸਿਕ੍ਖਾਸਂਯਮਾਨਂ ਬੁਦ੍ਧਾਨਂ ਮੁਖਚਨ੍ਦਮਣ੍ਡਲਂ ਪਟਿਚ੍ਛਾਦੇਤਬ੍ਬਂ ਹੋਤਿ.

ਪਤ੍ਥਰਿਤਵਿਤਾਨਓਲਮ੍ਬਿਤਗਨ੍ਧਦਾਮਕੁਸੁਮਦਾਮਕੇ ਗਨ੍ਧਮਣ੍ਡਲਮਾਲ਼ੇ. ਪੁਬ੍ਬਭਾਗੇਨ ਪਰਿਚ੍ਛਿਨ੍ਦਿਤ੍ਵਾਤਿ ‘‘ਏਤ੍ਤਕਂ ਵੇਲਂ ਸਮਾਪਤ੍ਤਿਯਾ ਵੀਤਿਨਾਮੇਸ੍ਸਾਮੀ’’ਤਿ ਏਵਂ ਪਵਤ੍ਤੇਨ ਪੁਬ੍ਬਭਾਗੇਨ ਕਾਲਂ ਪਰਿਚ੍ਛਿਨ੍ਦਿਤ੍ਵਾ. ਪਚ੍ਚਯਦਾਯਕੇਸੁ ਅਨੁਰੋਧਵਸੇਨ ਪਰਿਸਂ ਉਸ੍ਸਾਦੇਨ੍ਤੋ ਵਾ ਪਗ੍ਗਣ੍ਹਨ੍ਤੋ, ਅਦਾਯਕੇਸੁ ਵਿਰੋਧਵਸੇਨ ਪਰਿਸਂ ਅਪਸਾਦੇਨ੍ਤੋ ਵਾ.

ਯੋਗਕ੍ਖੇਮਂ ਅਨ੍ਤਰਾਯਾਭਾਵਂ. ਸਭਾਵਗੁਣੇਨੇਵਾਤਿ ਯਥਾਵੁਤ੍ਤਗੁਣੇਨੇਵ. ਭੋਤੋ ਗੋਤਮਸ੍ਸ ਗੁਣਂ ਸਵਿਗ੍ਗਹਂ ਚਕ੍ਕਵਾਲ਼ਂ ਅਤਿਸਮ੍ਬਾਧਂ ਵਿਤ੍ਥਾਰੇਨ ਸਨ੍ਧਾਰੇਤੁਂ ਅਪ੍ਪਹੋਨ੍ਤਤੋ. ਭਵਗ੍ਗਂ ਅਤਿਨੀਚਂ ਉਪਰੂਪਰਿ ਸਨ੍ਧਾਰੇਤੁਂ ਅਪ੍ਪਹੋਨ੍ਤਤੋ.

੩੮੬. ਠਾਨਗਮਨਾਦੀਸੁ (ਦੀ. ਨਿ. ਟੀ. ੨.੩੫) ਭੂਮਿਯਂ ਸੁਟ੍ਠੁ ਸਮਂਪਤਿਟ੍ਠਿਤਾ ਪਾਦਾ ਏਤਸ੍ਸਾਤਿ ਸੁਪ੍ਪਤਿਟ੍ਠਿਤਪਾਦੋ. ਤਂ ਪਨ ਭਗਵਤੋ ਸੁਪ੍ਪਤਿਟ੍ਠਿਤਪਾਦਤਂ ਬ੍ਯਤਿਰੇਕਮੁਖੇਨ ਵਿਭਾਵੇਤੁਂ ‘‘ਯਥਾ ਹੀ’’ਤਿਆਦਿ ਵੁਤ੍ਤਂ. ਤਤ੍ਥ ਅਗ੍ਗਤਲਨ੍ਤਿ ਅਗ੍ਗਪਾਦਤਲਂ. ਪਣ੍ਹੀਤਿ ਪਣ੍ਹਿਤਲਂ. ਪਸ੍ਸਨ੍ਤਿ ਪਾਦਤਲਸ੍ਸ ਦ੍ਵੀਸੁ ਪਸ੍ਸੇਸੁ ਏਕੇਕਂ, ਉਭਯਮੇਵ ਵਾ ਪਰਿਯਨ੍ਤਂ ਪਸ੍ਸਂ. ਸੁਵਣ੍ਣਪਾਦੁਕਤਲਂ ਵਿਯ ਉਜੁਕਂ ਨਿਕ੍ਖਿਪਿਯਮਾਨਂ. ਏਕਪ੍ਪਹਾਰੇਨੇਵਾਤਿ ਏਕਕ੍ਖਣੇਯੇਵ. ਸਕਲਂ ਪਾਦਤਲਂ ਭੂਮਿਂ ਫੁਸਤਿ ਨਿਕ੍ਖਿਪਨੇ. ਏਕਪ੍ਪਹਾਰੇਨੇਵ ਸਕਲਂ ਪਾਦਤਲਂ ਭੂਮਿਤੋ ਉਟ੍ਠਹਤੀਤਿ ਯੋਜਨਾ.

ਤਤ੍ਰਾਤਿ ਤਾਯ ਸੁਪ੍ਪਤਿਟ੍ਠਿਤਪਾਦਤਾਯ ਅਨੁਪੁਬ੍ਬਨਿਨ੍ਨਾਵ ਅਚ੍ਛਰਿਯਬ੍ਭੁਤਂ ਇਦਂ ਵੁਚ੍ਚਮਾਨਂ ਨਿਸ੍ਸਨ੍ਦਫਲਂ. ਵੁਤ੍ਤਮੇਵਤ੍ਥਂ ਸਤ੍ਥੁ ਤਿਦਿਵਗਮਨੇਨ ਸੁਪਾਕਟਂ ਕਾਤੁਂ ‘‘ਤਥਾ ਹੀ’’ਤਿਆਦਿਂ ਵਤ੍ਵਾ ‘‘ਨ ਹੀ’’ਤਿਆਦਿਨਾ ਤਂ ਸਮਤ੍ਥੇਤਿ. ਤੇਨ ਪਠਮਲਕ੍ਖਣਤੋਪਿ ਦੁਤਿਯਲਕ੍ਖਣਂ ਮਹਾਨੁਭਾਵਨ੍ਤਿ ਦਸ੍ਸੇਤਿ. ਤਥਾ ਹਿ ਵਕ੍ਖਤਿ ‘‘ਅਨ੍ਤਮਸੋ ਚਕ੍ਕਵਤ੍ਤਿਰਞ੍ਞੋ ਪਰਿਸਂ ਉਪਾਦਾਯ ਸਬ੍ਬੋਪਿ ਚਕ੍ਕਲਕ੍ਖਣਸ੍ਸੇਵ ਪਰਿਵਾਰੋ’’ਤਿ. ਯੁਗਨ੍ਧਰਪਬ੍ਬਤਸ੍ਸ ਤਾਵਤਿਂਸਭਵਨਸ੍ਸ ਚ ਪਕਤਿਪਦਨਿਕ੍ਖੇਪਟ੍ਠਾਨੁਪਸਙ੍ਕਮਨੇ ਨੇਵ ਬੁਦ੍ਧਾਨਂ, ਨ ਦੇਵਤਾਨਂ ਆਨੁਭਾਵੋ, ਅਥ ਖੋ ਬੁਦ੍ਧਾਨਂ ਲਕ੍ਖਣਾਨੁਭਾਵੋਤਿ ਇਮਮਤ੍ਥਂ ਨਿਦਸ੍ਸਿਤਂ. ਸੀਲਤੇਜੇਨ…ਪੇ… ਦਸਨ੍ਨਂ ਪਾਰਮੀਨਂ ਆਨੁਭਾਵੇਨਾਤਿ ਇਦਮ੍ਪਿ ਲਕ੍ਖਣਨਿਬ੍ਬਤ੍ਤਕਮ੍ਮਵਿਸੇਸਕਿਤ੍ਤਨਮੇਵਾਤਿ ਦਟ੍ਠਬ੍ਬਂ. ਸਬ੍ਬਾਵਨ੍ਤੇਹੀਤਿ ਸਬ੍ਬਪਦੇਸਵਨ੍ਤੇਹਿ.

ਨਾਭਿਪਰਿਚ੍ਛਿਨ੍ਨਾਤਿ ਨਾਭਿਯਂ ਪਰਿਚ੍ਛਿਨ੍ਨਾ ਪਰਿਚ੍ਛੇਦਵਸੇਨ ਠਿਤਾ. ਨਾਭਿਮੁਖਪਰਿਕ੍ਖੇਪਪਟ੍ਟੋਤਿ ਪਕਤਿਚਕ੍ਕਸ੍ਸ ਅਕ੍ਖਬ੍ਭਾਹਤਪਰਿਹਰਣਤ੍ਥਂ ਨਾਭਿਮੁਖੇ ਠਪੇਤਬ੍ਬਪਰਿਕ੍ਖੇਪਪਟ੍ਟੋ. ਨੇਮਿਮਣਿਕਾਤਿ ਨੇਮਿਯਂ ਆਵਲ਼ਿਭਾਵੇਨ ਠਿਤਮਣਿਕਾਲੇਖਾ.

ਸਮ੍ਬਹੁਲਵਾਰੋਤਿ ਬਹੁਵਿਧਲੇਖਙ੍ਗਵਿਭਾਵਨਵਾਰੋ. ਸਤ੍ਤੀਤਿ ਆਵੁਧਸਤ੍ਤਿ. ਸਿਰਿਵਚ੍ਛੋਤਿ ਸਿਰਿਮੁਖਂ. ਨਨ੍ਦੀਤਿ ਦਕ੍ਖਿਣਾਵਟ੍ਟਂ. ਸੋਵਤ੍ਤਿਕੋਤਿ ਸੋਵਤ੍ਤਿਅਙ੍ਕੋ. ਵਟਂਸਕੋਤਿ ਆਵੇਲ਼ਂ. ਵਡ੍ਢਮਾਨਕਨ੍ਤਿ ਪੁਰਿਸਹਾਰਿ ਪੁਰਿਸਙ੍ਗਂ. ਮੋਰਹਤ੍ਥਕੋਤਿ ਮੋਰਪਿਞ੍ਛਕਲਾਪੋ, ਮੋਰਪਿਞ੍ਛ ਪਰਿਸਿਬ੍ਬਿਤੋ ਵਾ ਬੀਜਨਿਵਿਸੇਸੋ. ਵਾਲਬੀਜਨੀਤਿ ਚਾਮਰਿਵਾਲਂ. ਸਿਦ੍ਧਤ੍ਥਾਦਿ ਪੁਣ੍ਣਘਟਪੁਣ੍ਣਪਾਤਿਯੋ. ‘‘ਚਕ੍ਕਵਾਲ਼ੋ’’ਤਿ ਵਤ੍ਵਾ ਤਸ੍ਸ ਪਧਾਨਾਵਯਵੇ ਦਸ੍ਸੇਤੁਂ ‘‘ਹਿਮਵਾ ਸਿਨੇਰੁ…ਪੇ… ਸਹਸ੍ਸਾਨੀ’’ਤਿ ਵੁਤ੍ਤਂ.

ਆਯਤਪਣ੍ਹੀਤਿ ਇਦਂ ਅਞ੍ਞੇਸਂ ਪਣ੍ਹਿਤੋ ਦੀਘਤਂ ਸਨ੍ਧਾਯ ਵੁਤ੍ਤਂ, ਨ ਪਨ ਅਤਿਦੀਘਤਨ੍ਤਿ ਆਹ ‘‘ਪਰਿਪੁਣ੍ਣਪਣ੍ਹੀ’’ਤਿ. ਯਥਾ ਪਨ ਪਣ੍ਹਿਲਕ੍ਖਣਂ ਪਰਿਪੁਣ੍ਣਂ ਨਾਮ ਹੋਤਿ, ਤਂ ਬ੍ਯਤਿਰੇਕਮੁਖੇਨ ਦਸ੍ਸੇਤੁਂ ‘‘ਯਥਾ ਹੀ’’ਤਿਆਦਿ ਵੁਤ੍ਤਂ. ਆਰਗ੍ਗੇਨਾਤਿ ਮਣ੍ਡਲਾਯ ਸਿਖਾਯ. ਵਟ੍ਟੇਤ੍ਵਾਤਿ ਯਥਾ ਸੁਵਟ੍ਟਂ ਹੋਤਿ, ਏਵਂ ਵਟ੍ਟੇਤ੍ਵਾ. ਰਤ੍ਤਕਮ੍ਬਲਗੇਣ੍ਡੁਕਸਦਿਸਾਤਿ ਰਤ੍ਤਕਮ੍ਬਲਮਯਗੇਣ੍ਡੁਕਸਦਿਸਾ.

ਮਕ੍ਕਟਸ੍ਸੇਵਾਤਿ ਵਾਨਰਸ੍ਸ ਵਿਯ. ਦੀਘਭਾਵੇਨ ਸਮਤਂ ਸਨ੍ਧਾਯੇਤਂ ਵੁਤ੍ਤਂ. ਨਿਯ੍ਯਾਸਤੇਲੇਨਾਤਿ ਛਦਿਕਨਿਯ੍ਯਾਸਾਦਿਨਿਯ੍ਯਾਸਸਮ੍ਮਿਸ੍ਸੇਨ ਤੇਲੇਨ.

ਤਲੁਨਾਤਿ ਸੁਕੁਮਾਰਾ.

ਚਮ੍ਮੇਨਾਤਿ ਅਙ੍ਗੁਲਨ੍ਤਰਵੇਠਿਤਚਮ੍ਮੇਨ. ਪਟਿਬਦ੍ਧਅਙ੍ਗੁਲਨ੍ਤਰੋਤਿ ਏਕਤੋ ਸਮ੍ਬਦ੍ਧਅਙ੍ਗੁਲਨ੍ਤਰੋ. ਏਕਪ੍ਪਮਾਣਾਤਿ ਦੀਘਤੋ ਸਮਾਨਪ੍ਪਮਾਣਾ. ਯਵਲਕ੍ਖਣਨ੍ਤਿ ਅਬ੍ਭਨ੍ਤਰਤੋ ਅਙ੍ਗੁਲਿਪਬ੍ਬੇਠਿਤਂ ਯਵਲਕ੍ਖਣਂ. ਪਟਿਵਿਜ੍ਝਿਤ੍ਵਾਤਿ ਤਂਤਂਪਬ੍ਬਾਨਂ ਸਮਾਨਦੇਸਤਾਯ ਅਙ੍ਗੁਲੀਨਂ ਪਸਾਰਿਤਕਾਲੇ ਅਞ੍ਞਮਞ੍ਞਂ ਵਿਜ੍ਝਿਤਾਨਿ ਵਿਯ ਫੁਸਿਤ੍ਵਾ ਤਿਟ੍ਠਨ੍ਤਿ.

ਸਙ੍ਖਾ ਵੁਚ੍ਚਨ੍ਤਿ ਗੋਪ੍ਫਕਾ, ਉਦ੍ਧਂ ਸਙ੍ਖਾ ਏਤੇਸਨ੍ਤਿ ਉਸ੍ਸਙ੍ਖਾ, ਪਾਦਾ. ਪਿਟ੍ਠਿਪਾਦੇਤਿ ਪਿਟ੍ਠਿਪਾਦਸਮੀਪੇ. ਸੁਖੇਨ ਪਾਦਾ ਪਰਿਵਤ੍ਤਨ੍ਤਿ ਪਾਦਨਾਮਨਾਦੀਸੁ, ਤੇਨੇਵ ਗਚ੍ਛਨ੍ਤਾਨਂ ਤੇਸਂ ਹੇਟ੍ਠਾ ਪਾਦਤਲਾਨਿ ਦਿਸ੍ਸਨ੍ਤਿ. ਤੇਨਾਤਿ ਗੋਪ੍ਫਕਾਨਂ ਪਿਟ੍ਠਿਪਾਦਤੋ ਉਦ੍ਧਂ ਪਤਿਟ੍ਠਿਤਤ੍ਤਾ. ਚਤੁਰਙ੍ਗੁਲਮਤ੍ਤਞ੍ਹਿ ਤਾਨਿ ਉਦ੍ਧਂ ਆਰੋਹਿਤ੍ਵਾ ਪਤਿਟ੍ਠਹਨ੍ਤਿ, ਨਿਗੁਲ਼੍ਹਾਨਿ ਚ ਹੋਨ੍ਤਿ, ਨ ਅਞ੍ਞੇਸਂ ਵਿਯ ਪਞ੍ਞਾਯਮਾਨਾਨਿ. ਸਤਿਪਿ ਦੇਸਨ੍ਤਰਪ੍ਪਵਤ੍ਤਿਯਂ ਨਿਚ੍ਚਲੋਤਿ ਦਸ੍ਸਨਤ੍ਥਂ ਨਾਭਿਗ੍ਗਹਣਂ.

ਯਸ੍ਮਾ ਏਣੀਮਿਗਸ੍ਸ ਸਮਨ੍ਤਤੋ ਏਕਸਦਿਸਮਂਸਾ ਅਨੁਕ੍ਕਮੇਨ ਉਦ੍ਧਂ ਥੂਲਾ ਜਙ੍ਘਾ ਹੋਨ੍ਤਿ, ਤਸ੍ਮਾ ਵੁਤ੍ਤਂ ‘‘ਏਣੀਮਿਗਸਦਿਸਜਙ੍ਘਾ’’ਤਿ. ਪਰਿਪੁਣ੍ਣਜਙ੍ਘੋਤਿ ਸਮਨ੍ਤਤੋ ਮਂਸੂਪਚਯੇਨ ਪਰਿਪੁਣ੍ਣਜਙ੍ਘੋ. ਤੇਨਾਹ ‘‘ਨ ਏਕਤੋ’’ਤਿਆਦਿ.

ਏਤੇਨਾਤਿ ‘‘ਅਨੋਨਮਨ੍ਤੋ’’ਤਿਆਦਿਵਚਨੇਨ, ਜਾਣੁਫਾਸੁਭਾਵਦੀਪਨੇਨਾਤਿ ਅਤ੍ਥੋ. ਅਵਸੇਸਜਨਾਤਿ ਇਮਿਨਾ ਲਕ੍ਖਣੇਨ ਰਹਿਤਾ ਜਨਾ. ਖੁਜ੍ਜਾ ਵਾ ਹੋਨ੍ਤਿ ਹੇਟ੍ਠਿਮਕਾਯਤੋ ਉਪਰਿਮਕਾਯਸ੍ਸ ਰਸ੍ਸਤਾਯ. ਵਾਮਨਾ ਵਾ ਉਪਰਿਮਕਾਯਤੋ ਹੇਟ੍ਠਿਮਕਾਯਸ੍ਸ ਰਸ੍ਸਤਾਯ. ਏਤੇਨ ਠਪੇਤ੍ਵਾ ਸਮ੍ਮਾਸਮ੍ਬੁਦ੍ਧਂ ਚਕ੍ਕਵਤ੍ਤਿਨਞ੍ਚ ਇਤਰੇ ਸਤ੍ਤਾ ਖੁਜ੍ਜਾ ਵਾਮਨਾ ਚਾਤਿ ਦਸ੍ਸੇਤਿ.

ਓਹਿਤਨ੍ਤਿ ਸਮੋਹਿਤਂ ਅਨ੍ਤੋਗਧਂ. ਤਥਾਭੂਤਂ ਪਨ ਤਂ ਤੇਨ ਛਨ੍ਨਂ ਹੋਤੀਤਿ ਆਹ ‘‘ਪਟਿਚ੍ਛਨ੍ਨ’’ਨ੍ਤਿ.

ਸੁਵਣ੍ਣਵਣ੍ਣੋਤਿ ਸੁਵਣ੍ਣਵਣ੍ਣਵਣ੍ਣੋਤਿ ਅਯਮੇਤ੍ਥ ਅਤ੍ਥੋਤਿ ਆਹ ‘‘ਜਾਤਿਹਿਙ੍ਗੁਲਕੇਨਾ’’ਤਿਆਦਿ. ਸ੍ਵਾਯਮਤ੍ਥੋ ਆਵੁਤ੍ਤਿਞਾਯੇਨ ਚ ਵੇਦਿਤਬ੍ਬੋ. ਸਰੀਰਪਰਿਯਾਯੋ ਇਧ ਵਣ੍ਣਸਦ੍ਦੋਤਿ ਅਧਿਪ੍ਪਾਯੇਨ ਪਠਮਵਿਕਪ੍ਪਂ ਵਤ੍ਵਾ ਤਥਾਰੂਪਾਯ ਪਨ ਰੁਲ਼੍ਹਿਯਾ ਅਭਾਵਂ ਮਨਸਿ ਕਤ੍ਵਾ ਵਣ੍ਣਧਾਤੁਪਰਿਯਾਯਮੇਵ ਵਣ੍ਣਸਦ੍ਦਂ ਗਹੇਤ੍ਵਾ ਦੁਤਿਯਵਿਕਪ੍ਪੋ ਵੁਤ੍ਤੋ.

ਰਜੋਤਿ ਸੁਖੁਮਰਜੋ. ਜਲ੍ਲਨ੍ਤਿ ਮਲੀਨਭਾਵਾਵਹੋ ਰੇਣੁਸਞ੍ਚਯੋ. ਤੇਨਾਹ ‘‘ਮਲਂ ਵਾ’’ਤਿ. ਯਦਿ ਵਿਵਟ੍ਟਤਿ, ਕਥਂ ਨ੍ਹਾਨਾਦੀਤਿ ਆਹ ‘‘ਹਤ੍ਥਧੋਵਨਾ’’ਤਿਆਦਿ.

ਆਵਟ੍ਟਪਰਿਯੋਸਾਨੇਤਿ ਪਦਕ੍ਖਿਣਾਵਟ੍ਟਾਯ ਅਨ੍ਤੇ.

ਬ੍ਰਹ੍ਮੁਨੋ ਸਰੀਰਂ ਪੁਰਤੋ ਵਾ ਪਚ੍ਛਤੋ ਵਾ ਅਨੋਨਮਿਤ੍ਵਾ ਉਜੁਕਮੇਵ ਉਗ੍ਗਤਨ੍ਤਿ ਆਹ ‘‘ਬ੍ਰਹ੍ਮਾ ਵਿਯ ਉਜੁਗਤ੍ਤੋ’’ਤਿ. ਪਸ੍ਸਵਙ੍ਕਾਤਿ ਦਕ੍ਖਿਣਪਸ੍ਸੇਨ ਵਾ ਵਾਮਪਸ੍ਸੇਨ ਵਾ ਵਙ੍ਕਾ.

ਹਤ੍ਥਪਿਟ੍ਠਿਆਦਿਵਸੇਨ ਸਤ੍ਤ ਉਸ੍ਸਦਾ ਏਤਸ੍ਸਾਤਿ ਸਤ੍ਤੁਸ੍ਸਦੋ.

ਸੀਹਸ੍ਸ ਪੁਬ੍ਬਦ੍ਧਂ ਸੀਹਪੁਬ੍ਬਦ੍ਧਂ, ਪਰਿਪੁਣ੍ਣਾਵਯਵਤਾਯ ਸੀਹਪੁਬ੍ਬਦ੍ਧਂ ਵਿਯ ਸਕਲੋ ਕਾਯੋ ਅਸ੍ਸਾਤਿ ਸੀਹਪੁਬ੍ਬਦ੍ਧਕਾਯੋ. ਸੀਹਸ੍ਸੇਵਾਤਿ ਸੀਹਸ੍ਸ ਵਿਯ. ਸਣ੍ਠਨ੍ਤੀਤਿ ਸਣ੍ਠਹਨ੍ਤਿ. ਨਾਨਾਚਿਤ੍ਤੇਨਾਤਿ ਵਿਵਿਧਚਿਤ੍ਤੇਨ. ਪੁਞ੍ਞਚਿਤ੍ਤੇਨਾਤਿ ਪਾਰਮਿਤਾਪੁਞ੍ਞਚਿਤ੍ਤਰੂਪੇਨ. ਚਿਤ੍ਤਿਤੋਤਿ ਸਞ੍ਜਾਤਚਿਤ੍ਤਭਾਵੋ.

ਦ੍ਵਿਨ੍ਨਂ ਕੋਟ੍ਟਾਨਮਨ੍ਤਰਨ੍ਤਿ ਦ੍ਵਿਨ੍ਨਂ ਪਿਟ੍ਠਿਬਾਹਾਨਂ ਵੇਮਜ੍ਝਂ, ਪਿਟ੍ਠਿਮਜ੍ਝਸ੍ਸ ਉਪਰਿਭਾਗੋ. ਚਿਤਂ ਪਰਿਪੁਣ੍ਣਨ੍ਤਿ ਅਨਿਨ੍ਨਭਾਵੇਨ ਚਿਤਂ, ਦ੍ਵੀਹਿ ਕੋਟ੍ਟੇਹਿ ਸਮਤਲਤਾਯ ਪਰਿਪੁਣ੍ਣਂ. ਉਗ੍ਗਮ੍ਮਾਤਿ ਉਗ੍ਗਨ੍ਤ੍ਵਾ.

ਨਿਗ੍ਰੋਧਪਰਿਮਣ੍ਡਲੋ ਵਿਯ ਪਰਿਮਣ੍ਡਲੋ ਨਿਗ੍ਰੋਧਪਰਿਮਣ੍ਡਲੋ ਏਕਸ੍ਸ ਪਰਿਮਣ੍ਡਲਸਦ੍ਦਸ੍ਸ ਲੋਪਂ ਕਤ੍ਵਾ. ਨ ਹਿ ਸਬ੍ਬੋ ਨਿਗ੍ਰੋਧੋ ਮਣ੍ਡਲੋ. ਤੇਨਾਹ ‘‘ਸਮਕ੍ਖਨ੍ਧਸਾਖੋ ਨਿਗ੍ਰੋਧੋ’’ਤਿ. ਪਰਿਮਣ੍ਡਲਸਦ੍ਦਸਨ੍ਨਿਧਾਨੇਨ ਵਾ ਪਰਿਮਣ੍ਡਲੋਵ ਨਿਗ੍ਰੋਧੋ ਗਯ੍ਹਤੀਤਿ ਪਰਿਮਣ੍ਡਲਸਦ੍ਦਸ੍ਸ ਲੋਪੇਨ ਵਿਨਾਪਿ ਅਯਮਤ੍ਥੋ ਲਬ੍ਭਤੀਤਿ ਆਹ ‘‘ਨਿਗ੍ਰੋਧੋ ਵਿਯ ਪਰਿਮਣ੍ਡਲੋ’’ਤਿ. ਯਾਵਤਕ੍ਵਸ੍ਸਾਤਿ ਓ-ਕਾਰਸ੍ਸ ਵ-ਕਾਰਾਦੇਸਂ ਕਤ੍ਵਾ ਵੁਤ੍ਤਂ.

ਸਮਵਟ੍ਟਿਤਕ੍ਖਨ੍ਧੋਤਿ ਸਮਂ ਸੁਵਟ੍ਟਿਤਕ੍ਖਨ੍ਧੋ. ਕੋਞ੍ਚਾ ਵਿਯ ਦੀਘਗਲਾ, ਬਕਾ ਵਿਯ ਵਙ੍ਕਗਲਾ, ਵਰਾਹਾ ਵਿਯ ਪੁਥੁਲਗਲਾਤਿ ਯੋਜਨਾ. ਸੁਵਣ੍ਣਾਲਿਙ੍ਗਸਦਿਸੋਤਿ ਸੁਵਣ੍ਣਮਯਖੁਦ੍ਦਕਮੁਦਿਙ੍ਗਸਦਿਸੋ.

ਰਸਗ੍ਗਸਗ੍ਗੀਤਿ ਮਧੁਰਾਦਿਭੇਦਂ ਰਸਂ ਗਸਨ੍ਤਿ ਅਨ੍ਤੋ ਪਵੇਸਨ੍ਤੀਤਿ ਰਸਗ੍ਗਸਾ, ਰਸਗ੍ਗਸਾਨਂ ਅਗ੍ਗਾ ਰਸਗ੍ਗਸਗ੍ਗਾ, ਤਾ ਏਤਸ੍ਸ ਸਨ੍ਤੀਤਿ ਰਸਗ੍ਗਸਗ੍ਗੀ. ਤੇਨਾਤਿ ਓਜਾਯ ਅਫਰਣੇਨ, ਹੀਨਧਾਤੁਕਤ੍ਤਾ ਤੇ ਬਹ੍ਵਾਬਾਧਾ ਹੋਨ੍ਤਿ.

‘‘ਹਨੂ’’ਤਿ ਸਨ੍ਨਿਸ੍ਸਯਦਨ੍ਤਾਧਾਰਸ੍ਸ ਸਮਞ੍ਞਾ, ਤਂ ਭਗਵਤੋ ਸੀਹਹਨੁਸਦਿਸਂ, ਤਸ੍ਮਾ ਭਗਵਾ ਸੀਹਹਨੁ. ਤਤ੍ਥ ਯਸ੍ਮਾ ਬੁਦ੍ਧਾਨਂ ਰੂਪਕਾਯਸ੍ਸ ਧਮ੍ਮਕਾਯਸ੍ਸ ਚ ਉਪਮਾ ਨਾਮ ਨਿਹੀਨੁਪਮਾਵ, ਨਤ੍ਥਿ ਸਮਾਨੁਪਮਾ, ਕੁਤੋ ਅਧਿਕੂਪਮਾ, ਤਸ੍ਮਾ ਅਯਮ੍ਪਿ ਨਿਹੀਨੁਪਮਾਤਿ ਦਸ੍ਸੇਤੁਂ ‘‘ਤਤ੍ਥਾ’’ਤਿਆਦਿ ਵੁਤ੍ਤਂ. ਤਿਭਾਗਵਸੇਨ ਮਣ੍ਡਲਤਾਯ ਦ੍ਵਾਦਸਿਯਂ ਪਕ੍ਖਸ੍ਸ ਚਨ੍ਦਸਦਿਸਾਨਿ.

ਦਨ੍ਤਾਨਂ ਉਚ੍ਚਨੀਚਤਾ ਅਬ੍ਭਨ੍ਤਰਬਾਹਿਰਪਸ੍ਸਵਸੇਨਪਿ ਵੇਦਿਤਬ੍ਬਾ, ਨ ਅਗ੍ਗਵਸੇਨੇਵ. ਤੇਨਾਹ ‘‘ਅਯਪਟ੍ਟਛਿਨ੍ਨਸਙ੍ਖਪਟਲਂ ਵਿਯਾ’’ਤਿ. ਅਯਪਟ੍ਟਨ੍ਤਿ ਚ ਕਕਚਂ ਅਧਿਪ੍ਪੇਤਂ. ਵਿਸਮਾਤਿ ਵਿਸਮਸਣ੍ਠਾਨਾ.

ਵਿਚ੍ਛਿਨ੍ਦਿਤ੍ਵਾ ਵਿਚ੍ਛਿਨ੍ਦਿਤ੍ਵਾ ਪਵਤ੍ਤਸਰਤਾਯ ਛਿਨ੍ਨਸ੍ਸਰਾਪਿ. ਅਨੇਕਾਕਾਰਤਾਯ ਭਿਨ੍ਨਸ੍ਸਰਾਪਿ. ਕਾਕਸ੍ਸ ਵਿਯ ਅਮਨੁਞ੍ਞਸਰਤਾਯ ਕਾਕਸ੍ਸਰਾਪਿ. ਅਪਲਿਬੁਦ੍ਧਤ੍ਤਾਤਿ ਅਨੁਪਦ੍ਦੁਤਵਤ੍ਥੁਕਤ੍ਤਾ. ਵਤ੍ਥੁਨ੍ਤਿ ਚ ਅਕ੍ਖਰੁਪ੍ਪਤ੍ਤਿਟ੍ਠਾਨਮਾਹ. ਅਟ੍ਠਙ੍ਗਸਮਨ੍ਨਾਗਤੋਤਿ ਏਤ੍ਥ ਅਟ੍ਠਙ੍ਗਾਨਿ ਪਰਤੋ ਆਗਮਿਸ੍ਸਨ੍ਤਿ. ਮਞ੍ਜੁਘੋਸੋਤਿ ਮਧੁਰਸ੍ਸਰੋ.

ਕਰਵੀਕਸਦ੍ਦੋ ਯੇਸਂ ਸਤ੍ਤਾਨਂ ਸੋਤਪਥਂ ਉਪਗਚ੍ਛਤਿ, ਤੇ ਅਤ੍ਤਨੋ ਸਰਸਮ੍ਪਤ੍ਤਿਯਾ ਪਕਤਿਂ ਜਹਾਪੇਤ੍ਵਾ ਅਵਸੇ ਕਰੋਨ੍ਤੋ ਅਤ੍ਤਨੋ ਵਸੇ ਵਤ੍ਤੇਤਿ, ਏਵਂ ਮਧੁਰੋਤਿ ਦਸ੍ਸੇਨ੍ਤੋ ‘‘ਤਤ੍ਰਿਦ’’ਨ੍ਤਿਆਦਿਮਾਹ. ਤਂ ਪੀਤਿਨ੍ਤਿ ਤਂ ਬੁਦ੍ਧਗਤਂ ਪੀਤਿਂ. ਤੇਨੇਵ ਨੀਹਾਰੇਨ ਪੁਨਪ੍ਪੁਨਂ ਪਵਤ੍ਤਨ੍ਤਂ ਅਵਿਜਹਿਤ੍ਵਾ ਵਿਕ੍ਖਮ੍ਭਿਤਕਿਲੇਸਾ ਥੇਰਾਨਂ ਸਨ੍ਤਿਕੇ ਲਦ੍ਧਧਮ੍ਮਸ੍ਸਵਨਸਪ੍ਪਾਯਾ ਉਪਨਿਸ੍ਸਯਸਮ੍ਪਤ੍ਤਿਯਾ ਪਰਿਪਕ੍ਕਞਾਣਤਾਯ ‘‘ਸਤ੍ਤਹਿ…ਪੇ… ਪਤਿਟ੍ਠਾਸੀ’’ਤਿ. ਸਤ੍ਤਸਤਮਤ੍ਤੇਨ ਓਰੋਧਜਨੇਨ ਸਦ੍ਧਿਂ ਪਦਸਾਵ ਥੇਰਾਨਂ ਸਨ੍ਤਿਕਂ ਉਪਗਤਤ੍ਤਾ ‘‘ਸਤ੍ਤਹਿ ਜਙ੍ਘਾਸਤੇਹਿ ਸਦ੍ਧਿ’’ਨ੍ਤਿ ਵੁਤ੍ਤਂ.

ਅਭਿਨੀਲਨੇਤ੍ਤੋਤਿ ਅਧਿਕਨੀਲਨੇਤ੍ਤੋ. ਅਧਿਕਨੀਲਤਾ ਚ ਸਾਤਿਸਯਂ ਨੀਲਭਾਵੇਨ ਵੇਦਿਤਬ੍ਬਾ, ਨ ਨੇਤ੍ਤੇ ਨੀਲਵਣ੍ਣਸ੍ਸੇਵ ਅਧਿਕਭਾਵਤੋਤਿ ਆਹ ‘‘ਨ ਸਕਲਨੀਲਨੇਤ੍ਤੋਵਾ’’ਤਿਆਦਿ. ਪੀਤਲੋਹਿਤਵਣ੍ਣਾ ਸੇਤਮਣ੍ਡਲਗਤਰਾਜਿਵਸੇਨ, ਨੀਲਸੇਤਕਾਲ਼ਵਣ੍ਣਾ ਪਨ ਤਂਤਂਮਣ੍ਡਲਵਸੇਨੇਵ ਵੇਦਿਤਬ੍ਬਾ.

ਚਕ੍ਖੁਭਣ੍ਡਨ੍ਤਿ ਅਕ੍ਖਿਦਲਨ੍ਤਿ ਕੇਚਿ, ਅਕ੍ਖਿਦਲਪਤ੍ਤਨ੍ਤਿ ਅਞ੍ਞੇ. ਅਕ੍ਖਿਦਲੇਹਿ ਪਨ ਸਦ੍ਧਿਂ ਅਕ੍ਖਿਬਿਮ੍ਬਨ੍ਤਿ ਵੇਦਿਤਬ੍ਬਂ. ਏਵਞ੍ਹਿ ਵਿਨਿਗ੍ਗਤਗਮ੍ਭੀਰਜੋਤਨਾਪਿ ਯੁਤ੍ਤਾ ਹੋਤਿ.

ਉਣ੍ਣਾਸਦ੍ਦੋ ਲੋਕੇ ਅਵਿਸੇਸਤੋ ਲੋਮਪਰਿਯਾਯੋ, ਇਧ ਪਨ ਲੋਮਵਿਸੇਸਵਾਚਕੋਤਿ ਆਹ ‘‘ਉਣ੍ਣਲੋਮ’’ਨ੍ਤਿ. ਨਲਾਟਮਜ੍ਝਜਾਤਾਤਿ ਨਲਾਟਮਜ੍ਝਗਤਾ. ਓਦਾਤਤਾਯ ਉਪਮਾ, ਨ ਮੁਦੁਤਾਯ. ਰਜਤਪੁਬ੍ਬੁਲ਼ਕਾਤਿ ਰਜਤਮਯਤਾਰਕਾ.

ਦ੍ਵੇ ਅਤ੍ਥਵਸੇ ਪਟਿਚ੍ਚ ਵੁਤ੍ਤਨ੍ਤਿ ਯਸ੍ਮਾ ਬੁਦ੍ਧਾ ਚਕ੍ਕਵਤ੍ਤਿਨੋ ਚ ਪਰਿਪੁਣ੍ਣਨਲਾਟਤਾਯ ਪਰਿਪੁਣ੍ਣਸੀਸਬਿਮ੍ਬਤਾਯ ਚ ‘‘ਉਣ੍ਹੀਸਸੀਸਾ’’ਤਿ ਵੁਚ੍ਚਨ੍ਤਿ, ਤਸ੍ਮਾ ਤੇ ਦ੍ਵੇ ਅਤ੍ਥਵਸੇ ਪਟਿਚ੍ਚ ‘‘ਉਣ੍ਹੀਸਸੀਸੋ’’ਤਿ ਇਦਂ ਵੁਤ੍ਤਂ. ਇਦਾਨਿ ਤਂ ਅਤ੍ਥਦ੍ਵਯਂ ਭਗਵਤਿ ਸੁਪ੍ਪਤਿਟ੍ਠਿਤਨ੍ਤਿ ਦਸ੍ਸੇਤੁਂ ‘‘ਤਥਾਗਤਸ੍ਸਹੀ’’ਤਿਆਦਿ ਵੁਤ੍ਤਂ. ਸਣ੍ਹਤਮਤਾਯ ਸੁਵਣ੍ਣਵਣ੍ਣਤਾਯ ਚ ਰਞ੍ਞੋ ਬਦ੍ਧਉਣ੍ਹੀਸਪਟ੍ਟੋ ਵਿਯ ਵਿਰੋਚਤਿ. ਕਪ੍ਪਸੀਸਾਤਿ ਦ੍ਵਿਧਾਭੂਤਸੀਸਾ. ਫਲਸੀਸਾਤਿ ਫਲਸਦਿਸਸੀਸਾ. ਅਟ੍ਠਿਸੀਸਾਤਿ ਮਂਸਸ੍ਸ ਅਭਾਵਤੋ ਤਚੋਪਰਿਯੋਨਦ੍ਧਅਟ੍ਠਿਮਤ੍ਤਸੀਸਾ. ਤੁਮ੍ਬਸੀਸਾਤਿ ਲਾਬੁਸਦਿਸਸੀਸਾ. ਪਬ੍ਭਾਰਸੀਸਾਤਿ ਪਿਟ੍ਠਿਭਾਗੇਨ ਓਲਮ੍ਬਮਾਨਸੀਸਾ. ਪੁਰਿਮਨਯੇਨਾਤਿ ਪਰਿਪੁਣ੍ਣਨਲਾਟਤਾਪਕ੍ਖੇਨ. ਉਣ੍ਹੀਸਵੇਠਿਤਸੀਸੋ ਵਿਯਾਤਿ ਉਣ੍ਹੀਸਪਟ੍ਟੇਨ ਵੇਠਿਤਸੀਸਪਦੇਸੋ ਵਿਯ. ਉਣ੍ਹੀਸਂ ਵਿਯਾਤਿ ਛੇਕੇਨ ਸਿਪ੍ਪਿਨਾ ਵਿਰਚਿਤਉਣ੍ਹੀਸਮਣ੍ਡਲਂ ਵਿਯ.

ਕਮ੍ਮਨ੍ਤਿ ਯੇਨ ਯੇਨ ਕਮ੍ਮੇਨ ਯਂ ਯਂ ਲਕ੍ਖਣਂ ਨਿਬ੍ਬਤ੍ਤਂ, ਤਂ ਤਂ ਕਮ੍ਮਂ. ਕਮ੍ਮਸਰਿਕ੍ਖਕਨ੍ਤਿ ਤਸ੍ਸ ਤਸ੍ਸ ਲਕ੍ਖਣਸ੍ਸ ਤਂਕਮ੍ਮਾਨੁਰੂਪਤਾ. ਲਕ੍ਖਣਨ੍ਤਿ ਤਸ੍ਸ ਮਹਾਪੁਰਿਸਲਕ੍ਖਣਸ੍ਸ ਅਵਿਪਰੀਤਸਭਾਵੋ. ਲਕ੍ਖਣਾਨਿਸਂਸਨ੍ਤਿ ਤਂ ਲਕ੍ਖਣਪਟਿਲਾਭੇਨ ਲਦ੍ਧਬ੍ਬਗੁਣੋ. ਇਮਾਨਿ ਕਮ੍ਮਾਦੀਨੀਤਿ ਇਮਾਨਿ ਅਨਨ੍ਤਰਂ ਵੁਤ੍ਤਾਨਿ ਕਮ੍ਮਕਮ੍ਮਸਰਿਕ੍ਖਕਾਦੀਨਿ ਦਸ੍ਸੇਤ੍ਵਾ ਤਂ ਸਰੂਪਤੋ ਵਿਭਾਵੇਤ੍ਵਾ ਕਥੇਤਬ੍ਬਾਨਿ ਸਂਵਣ੍ਣਕੇਨ.

ਰਤਨਵਿਚਿਤ੍ਤਸੁਵਣ੍ਣਤੋਰਣਂ ਤਸ੍ਮਿਂ ਕਾਲੇ ਮਨੁਸ੍ਸਲੋਕੇ ਨਤ੍ਥੀਤਿ ਵੁਤ੍ਤਂ ‘‘ਦੇਵਨਗਰੇ’’ਤਿ. ਸਬ੍ਬਸੋ ਸੁਪੁਪ੍ਫਿਤਸਾਲਰੁਕ੍ਖੋ ਅਸਾਧਾਰਣਸੋਭੋ ਮਨੁਸ੍ਸੂਪਚਾਰੇ ਨ ਲਬ੍ਭਤੀਤਿ ਆਹ ‘‘ਸੇਲਨ੍ਤਰਮ੍ਹੀ’’ਤਿ. ਕਿਰਿਯਾਚਾਰਨ੍ਤਿ ਕਾਯਿਕਵਾਚਸਿਕਕਿਰਿਯਾਪਵਤ੍ਤਿਂ.

੩੮੭. ਸਤਤਪਾਟਿਹਾਰਿਯਨ੍ਤਿ ਸਤਤਂ ਚਰਿਮਭਵੇ ਸਬ੍ਬਕਾਲਂ ਲਕ੍ਖਣਨਿਬ੍ਬਤ੍ਤਕਕਮ੍ਮਾਨੁਭਾਵਹੇਤੁਕਂ ਬੁਦ੍ਧਾਵੇਣਿਕਂ ਪਾਟਿਹਾਰਿਯਂ. ਬੁਦ੍ਧਾਨਂ ਅਤਿਦੂਰੇ ਪਾਦਂ ਨਿਕ੍ਖਿਪਿਤੁਕਾਮਾਨਮ੍ਪਿ ਨਾਤਿਦੂਰੇ ਏਵ ਨਿਕ੍ਖਿਪਨਂ ਹੋਤੀਤਿ ‘‘ਨ ਅਤਿਦੂਰੇ ਠਪੇਸ੍ਸਾਮੀਤਿ ਉਦ੍ਧਰਤੀ’’ਤਿ ਵੁਤ੍ਤਂ. ਪਕਤਿਸਞ੍ਚਰਣਵਸੇਨੇਤਂ ਵੁਤ੍ਤਂ, ਤਾਦਿਸੇਨ ਪਾਦੇਨ ਅਨੇਕਯੋਜਨੇ ਠਪੇਸ੍ਸਾਮੀਤਿ ਉਦ੍ਧਰਣਮ੍ਪਿ ਹੋਤਿਯੇਵ. ਅਤਿਦੂਰਂ ਹੀਤਿਆਦਿ ਪਮਾਣਾਤਿਕ੍ਕਮੇ ਦੋਸਦਸ੍ਸਨਂ. ਏਵਂ ਸਤੀਤਿ ਏਵਂ ਦਕ੍ਖਿਣਪਾਦਵਾਮਪਾਦਾਨਂ ਯਥਾਧਿਪ੍ਪੇਤਪਤਿਟ੍ਠਿਤਟ੍ਠਾਨੇ ਸਤਿ. ਪਦਵਿਚ੍ਛੇਦੋਤਿ ਪਦਵਾਰਵਿਚ੍ਛੇਦੋ. ਯਾਦਿਸਂ ਪਸਾਰੇਨ੍ਤੋ ਵਾਮਪਾਦਸ੍ਸ ਉਦ੍ਧਰਣਂ ਪਤਿਟ੍ਠਾਨਞ੍ਚ, ਦਕ੍ਖਿਣਪਾਦਸ੍ਸ ਤਾਦਿਸਮੇਵ, ਇਤਿ ਨੇਸਂ ਉਦ੍ਧਰਣਪਤਿਟ੍ਠਾਨਾਨਂ ਸਮਾਨਤੋ ਅਞ੍ਞਮਞ੍ਞਭਾਵੇਨ ਅਨੂਨਾਨਧਿਕਤਾਯ ਵੁਤ੍ਤਂ ‘‘ਦਕ੍ਖਿਣਪਾਦਕਿਚ੍ਚਂ ਵਾਮਪਾਦੇਨ ਨਿਯਮਿਤਂ, ਵਾਮਪਾਦਕਿਚ੍ਚਂ ਦਕ੍ਖਿਣਪਾਦੇਨ ਨਿਯਮਿਤ’’ਨ੍ਤਿ.

ਦਿਵਾਤਿ ਉਪਕਟ੍ਠਾਯ ਵੇਲਾਯ. ਵਿਹਾਰਭਤ੍ਤਤ੍ਥਾਯਾਤਿ ਵਿਹਾਰੇ ਯਥਾਵੁਦ੍ਧਂ ਗਹੇਤਬ੍ਬਭਤ੍ਤਤ੍ਥਾਯ. ਪਚ੍ਛਤੋ ਆਗਚ੍ਛਨ੍ਤੋਤਿ ਪਕਤਿਗਮਨੇਨ ਪਚ੍ਛਤੋ ਆਗਚ੍ਛਨ੍ਤੋ. ਓਕਾਸਂ ਨ ਲਭਤੀਤਿ ਪਦਨਿਕ੍ਖੇਪਟ੍ਠਾਨਂ ਨ ਲਭਤਿ. ਊਰੁਪਰਿਯਾਯੋ ਇਧ ਸਤ੍ਥਿ-ਸਦ੍ਦੋਤਿ ਆਹ ‘‘ਨ ਊਰੁਂ ਉਨ੍ਨਾਮੇਤੀ’’ਤਿ. ਦਣ੍ਡਙ੍ਕੁਸਂ ਵੁਚ੍ਚਤਿ ਦੀਘਦਣ੍ਡੋ ਅਙ੍ਕੁਸੋ, ਤੇਨ ਰੁਕ੍ਖਸਾਖਂ ਛਿਨ੍ਦਤੋ ਪੁਰਿਸਸ੍ਸ ਯਥਾ ਪਚ੍ਛਾਭਾਗੇਨ ਪਾਦਾਨਂ ਓਸਕ੍ਕਨਂ ਹੋਤਿ, ਏਵਂ ਭਗਵਤੋ ਪਾਦਾ ਨ ਓਸਕ੍ਕਨ੍ਤੀਤਿ ਆਹ ‘‘ਰੁਕ੍ਖਸਾਖਾਛੇਦਨ…ਪੇ… ਓਸਕ੍ਕਾਪੇਤੀ’’ਤਿ. ਓਬਦ੍ਧਾਨਾਬਦ੍ਧਟ੍ਠਾਨੇਹਿ ਪਾਦਂ ਕੋਟ੍ਟੇਨ੍ਤੋ ਵਿਯਾਤਿ ਆਬਦ੍ਧਟ੍ਠਾਨੇਨ ਅਨਾਬਦ੍ਧਟ੍ਠਾਨੇਨ ਚ ਪਾਦਖਣ੍ਡਂ ਕੋਟ੍ਟੇਤ੍ਵਾ ਥਦ੍ਧਂ ਕਰੋਨ੍ਤੋ ਵਿਯ. ਨ ਇਤੋ ਚਿਤੋ ਚ ਚਾਲੇਤੀਤਿ ਅਪਰਾਪਰਂ ਨ ਚਾਲੇਤਿ. ਉਸ੍ਸਙ੍ਖਪਾਦਤਾਯ ਸੁਖੇਨੇਵ ਪਾਦਾਨਂ ਪਰਿਵਤ੍ਤਨਤੋ ਨਾਭਿਤੋ ਪਟ੍ਠਾਯ ਉਪਰਿਮਕਾਯੋ ਨ ਇਞ੍ਜਤੀਤਿ ਹੇਟ੍ਠਿਮਕਾਯੋਵ ਇਞ੍ਜਤਿ. ਤੇਨਾਹ ‘‘ਉਪਰਿਮ…ਪੇ… ਨਿਚ੍ਚਲੋ ਹੋਤੀ’’ਤਿ. ਨ ਜਾਨਾਤਿ ਅਨਿਞ੍ਜਨਤੋ. ਕਾਯਬਲੇਨਾਤਿ ਗਮਨਪਯੋਗਸਙ੍ਖਾਤੇਨ ਕਾਯਗਤੇਨ ਵਿਸੇਸਬਲੇਨ. ਜਵਗਮਨਹੇਤੁਭੂਤੇਨ ਵਾ ਕਾਯਬਲੇਨ. ਤੇਨਾਹ ‘‘ਬਾਹਾ ਖਿਪਨ੍ਤੋ’’ਤਿਆਦਿ. ਜਵੇਨ ਗਚ੍ਛਨ੍ਤੋ ਹਿ ਬਾਹਾ ਖਿਪਤਿ, ਸਰੀਰਤੋ ਸੇਦਾ ਮੁਚ੍ਚਨ੍ਤਿ. ਨਾਗਾਪਲੋਕਿਤਵਸੇਨਾਤਿ ਨਾਗਸ੍ਸ ਅਪਲੋਕਨਮਿਵ ਸਕਲਕਾਯੇਨੇਵ ਪਰਿਵਤ੍ਤੇਤ੍ਵਾ ਅਪਲੋਕਨਵਸੇਨ.

ਅਨਾਵਰਣਞਾਣਸ੍ਸਾਤਿ ਅਨਾਵਰਣਞਾਣਬਲੇਨ ਦਸ੍ਸਨਸ੍ਸ. ਅਨਾਵਰਣਵਾਰੋ ਪਨ ਕਾਯੇ ਪਤਿਟ੍ਠਿਤਰੂਪਦਸ੍ਸਨਮ੍ਪਿ ਅਨਾਵਰਣਮੇਵਾਤਿ ਦਸ੍ਸਨਤ੍ਥਂ ਵੁਤ੍ਤੋ. ਇਨ੍ਦਖੀਲਤੋ ਪਟ੍ਠਾਯਾਤਿ ਨਗਰਦ੍ਵਾਰੇ ਇਨ੍ਦਖੀਲਤੋ ਪਟ੍ਠਾਯ. ਪਕਤਿਇਰਿਯਾਪਥੇਨੇਵਾਤਿ ਓਨਮਨਾਦਿਂ ਅਕਤ੍ਵਾ ਉਜੁਕਗਮਨਾਦਿਨਾ ਏਵ. ਯਦਿ ਏਵਂ ਕੋਟ੍ਠਕਦ੍ਵਾਰਗੇਹਪ੍ਪਵੇਸੇ ਕਥਨ੍ਤਿ ਆਹ ‘‘ਦਲਿਦ੍ਦਮਨੁਸ੍ਸਾਨ’’ਨ੍ਤਿਆਦਿ. ਪਰਿਵਤ੍ਤੇਨ੍ਤੇਨਾਤਿ ਨਿਪਜ੍ਜਨਤ੍ਥਂ ਕਾਯਂ ਪਰਿਵਤ੍ਤੇਨ੍ਤੇਨ.

ਹਤ੍ਥੇਹਿ ਗਹੇਤ੍ਵਾਤਿ ਉਭੋਹਿ ਹਤ੍ਥੇਹਿ ਉਭੋਸੁ ਕਟਿਪ੍ਪਦੇਸੇਸੁ ਪਰਿਗ੍ਗਹੇਤ੍ਵਾ. ਪਤਤਿ ਨਿਸੀਦਨਟ੍ਠਾਨੇ ਨਿਪਜ੍ਜਨਵਸੇਨ ਪਤਤਿ. ਓਰਿਮਂ ਅਙ੍ਗਂ ਨਿਸ੍ਸਾਯ ਨਿਸਿਨ੍ਨੋਤਿ ਪਲ੍ਲਙ੍ਕਮਾਭੁਜਿਤ੍ਵਾ ਉਕ੍ਕੁਟਿਕਨਿਸਜ੍ਜਾਯ ਉਪਰਿਮਕਾਯਂ ਹੇਟ੍ਠਿਮਕਾਯੇ ਪਤਿਟ੍ਠਪੇਨ੍ਤੋਯੇਵ ਭਾਰੀਕਰਣਵਸੇਨ ਓਰਿਮਙ੍ਗਂ ਨਿਸ੍ਸਾਯ ਨਿਸਿਨ੍ਨੋ. ਘਂਸਨ੍ਤੋਤਿ ਆਨਿਸਦਦੇਸੇਨ ਆਸਨਟ੍ਠਾਨਂ ਘਂਸਨ੍ਤੋ. ਪਾਰਿਮਙ੍ਗਨ੍ਤਿ ਸਤ੍ਥਿਭਾਗਸਮ੍ਮਦ੍ਦਂ ਆਨਿਸਦਪਦੇਸਂ. ਤਥੇਵਾਤਿ ਘਂਸਨ੍ਤੋ ਏਵ. ਓਲਮ੍ਬਕਂ ਧਾਰੇਨ੍ਤੋ ਵਿਯਾਤਿ ਓਲਮ੍ਬਕਸੁਤ੍ਤਂ ਓਤਾਰੇਨ੍ਤੋ ਵਿਯ. ਤੇਨ ਉਜੁਕਮੇਵ ਨਿਸੀਦਨਮਾਹ. ਸਰੀਰਸ੍ਸ ਗਰੁਕਭਾਵਹੇਤੂਨਂ ਦੂਰਤੋ ਸਮੁਪਾਯਿਤਭਾਵੇਨ ਸਲ੍ਲਹੁਕਭਾਵਤੋ ਤੂਲਪਿਚੁਂ ਠਪੇਨ੍ਤੋ ਵਿਯ.

ਅਪ੍ਪੇਸਕ੍ਖਾਨਂ ਮਹਾਨੁਭਾਵਗੇਹਪ੍ਪਵੇਸੇ ਸਿਯਾ ਛਮ੍ਭਿਤਤ੍ਤਂ, ਚਿਤ੍ਤਕ੍ਖੋਭੋ, ਦਰਥਵਸੇਨ ਨਾਨਪ੍ਪਕਾਰਕਪ੍ਪਨਂ, ਭਯਵਸੇਨ ਤਣ੍ਹਾਵਸੇਨ ਪਰਿਤਸ੍ਸਨਂ, ਤਂ ਸਬ੍ਬਂ ਭਗਵਤੋ ਨਤ੍ਥੀਤਿ ਦਸ੍ਸੇਤੁਂ ਪਾਲ਼ਿਯਂ ‘‘ਨ ਛਮ੍ਭਤੀ’’ਤਿਆਦਿ (ਮ. ਨਿ. ੨.੩੮੭) ਵੁਤ੍ਤਨ੍ਤਿ ਆਹ ‘‘ਨ ਛਮ੍ਭਤੀ’’ਤਿਆਦਿ.

ਉਦਕਂ ਦੀਯਤਿ ਏਤੇਨਾਤਿ ਉਦਕਦਾਨਂ, ਭਿਙ੍ਕਾਰਾਦਿ ਉਦਕਭਾਜਨਂ. ਬਦ੍ਧਂ ਕਤ੍ਵਾਤਿ ਹਤ੍ਥਗਤਮਤ੍ਤਿਕਂ ਵਿਯ ਅਤ੍ਤਨੋ ਵਸੇ ਅਵਤ੍ਤਨ੍ਤਂ ਕਤ੍ਵਾ. ਪਰਿਵਤ੍ਤੇਤ੍ਵਾਤਿ ਕੁਜ੍ਜਿਤ੍ਵਾ. ਵਿਛਡ੍ਡਯਮਾਨੋ ਉਦਕਸ੍ਸ ਵਿਕ੍ਖਿਪਨਵਸੇਨ ਛਡ੍ਡਯਮਾਨੋ.

ਤਥਾ ਨ ਗਣ੍ਹਾਤਿ, ਬ੍ਯਞ੍ਜਨਮਤ੍ਤਾਯ ਏਵ ਗਣ੍ਹਨ੍ਤੋ. ਭਤ੍ਤਂ ਵਾ ਅਮਨਾਪਨ੍ਤਿ ਆਨੇਤ੍ਵਾ ਯੋਜਨਾ. ਬ੍ਯਞ੍ਜਨੇਨ ਆਲੋਪਅਤਿਨਾਮਨਂ, ਆਲੋਪੇਨ ਬ੍ਯਞ੍ਜਨਅਤਿਨਾਮਨਨ੍ਤਿ ਇਮੇਸੁ ਪਨ ਦ੍ਵੀਸੁ ਪਠਮਮੇਵ ਅਸਾਰੁਪ੍ਪਤਾਯ ਅਨਿਟ੍ਠਂ ਵਜ੍ਜੇਤਬ੍ਬਨ੍ਤਿ ਪਾਲ਼ਿਯਂ ਪਟਿਕ੍ਖਿਤ੍ਤਨ੍ਤਿ ਦਟ੍ਠਬ੍ਬਂ. ਸਬ੍ਬਤ੍ਥੇਵਾਤਿ ਸਬ੍ਬਸ੍ਮਿਂ ਆਹਰਿਤਬ੍ਬਵਤ੍ਥੁਸ੍ਮਿਂ ਸੁਪਣੀਤਭਾਵੇਨ ਰਸੋ ਪਾਕਟੋ ਹੋਤਿ ਞਾਣੇਨ ਪਰਿਞ੍ਞਾਤਤ੍ਤਾ. ਰਸਗੇਧੋ ਪਨ ਨਤ੍ਥਿ ਸੇਤੁਘਾਤਤ੍ਤਾ.

ਅਸ੍ਸਾਤਿ ‘‘ਨੇਵ ਦਵਾਯਾ’’ਤਿਆਦਿਪਦਸ੍ਸ. ਵੁਤ੍ਤਮੇਤਨ੍ਤਿ ‘‘ਵਿਸੁਦ੍ਧਿਮਗ੍ਗੇ ਵਿਨਿਚ੍ਛਯੋ ਆਗਤੋ’’ਤਿ ਸਬ੍ਬਾਸਵਸੁਤ੍ਤੇ (ਮ. ਨਿ. ੧.੨੩) ਸਂਵਣ੍ਣਯਨ੍ਤੇਨ ਵੁਤ੍ਤਮੇਤਂ, ਤਸ੍ਮਾ ਨ ਏਤ੍ਥ ਤਂ ਵਤ੍ਤਬ੍ਬਨ੍ਤਿ ਅਧਿਪ੍ਪਾਯੋ, ਤਸ੍ਮਾ ਯੋ ਤਸ੍ਮਿਂ ਤਸ੍ਮਿਂ ਵਿਨਿਚ੍ਛਯੇ ਵਿਸੇਸਵਾਦੋ ਇਚ੍ਛਿਤਬ੍ਬੋ. ਸੋ ਪਰਮਤ੍ਥਮਞ੍ਜੂਸਾਯ ਵਿਸੁਦ੍ਧਿਮਗ੍ਗਵਣ੍ਣਨਾਯ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਪਤ੍ਤਸ੍ਸ ਗਹਣਟ੍ਠਾਨਨ੍ਤਿ ਹਤ੍ਥੇਨ ਪਤ੍ਤਸ੍ਸ ਗਹਣਪਦੇਸਂ. ਵਿਨਿਵਤ੍ਤਿਤ੍ਵਾਤਿ ਪਤ੍ਤੇ ਸਬ੍ਬਂ ਆਮਿਸਗਤਂ ਸਦ੍ਧਿਂ ਭਤ੍ਤੇਨ ਵਿਨਿਵਤ੍ਤਿਤ੍ਵਾ ਗਚ੍ਛਤਿ. ਪਮਾਣਾਤਿਕ੍ਕਨ੍ਤਨ੍ਤਿ ਕੇਲਾਯਨਵਸੇਨ ਅਤਿਕ੍ਕਨ੍ਤਪਮਾਣਂ ਆਰਕ੍ਖਂ ਠਪੇਤਿ. ਚੀਵਰਭੋਗਨ੍ਤਰਨ੍ਤਿ ਚੀਵਰਪਟਲਨ੍ਤਰਂ. ਉਦਰੇਨ ਅਕ੍ਕਮਿਤ੍ਵਾਤਿ ਉਦਰੇਨੇਵ ਸਨ੍ਨਿਰੁਮ੍ਭਿਤ੍ਵਾ.

ਅਪ੍ਪਤ੍ਤਕਾਲਂ ਅਭਿਮੁਖਂ ਨਾਮੇਤਿ ਉਪਨਾਮੇਤੀਤਿ ਅਤਿਨਾਮੇਤਿ, ਪਤ੍ਤਕਾਲਂ ਅਤਿਕ੍ਕਾਮੇਨ੍ਤੋ ਨਾਮੇਤਿ ਅਪਨੇਤੀਤਿ ਅਤਿਨਾਮੇਤਿ. ਉਭਯਮ੍ਪਿ ਏਕਜ੍ਝਂ ਗਹੇਤ੍ਵਾ ਪਾਲ਼ਿਯਂ ‘‘ਨ ਚ ਅਨੁਮੋਦਨਸ੍ਸ ਕਾਲਮਤਿਨਾਮੇਤੀ’’ਤਿ ਵੁਤ੍ਤਨ੍ਤਿ ਦਸ੍ਸੇਨ੍ਤੋ ‘‘ਯੋ ਹੀ’’ਤਿਆਦਿਮਾਹ.

ਵੇਗਗਮਨੇਨ ਪਟਿਸਂਮੁਞ੍ਚਿਤ੍ਵਾ ਧਾਵਿਤ੍ਵਾ ਗਚ੍ਛਤਿ. ਅਚ੍ਚੁਕ੍ਕਟ੍ਠਨ੍ਤਿ ਅਤਿਵਿਯ ਉਦ੍ਧਂ ਕਤ੍ਵਾ ਕਡ੍ਢਿਤਪਾਰੁਤਂ. ਤੇਨਾਹ ‘‘ਯੋ ਹਿ ਯਾਵ ਹਨੁਕਟ੍ਠਿਤੋ…ਪੇ… ਹੋਤੀ’’ਤਿ. ਅਚ੍ਚੋਕ੍ਕਟ੍ਠਨ੍ਤਿ ਅਤਿਵਿਯ ਹੇਟ੍ਠਾ ਕਤ੍ਵਾ ਕਡ੍ਢਿਤਪਾਰੁਤਂ. ਤੇਨਾਹ ‘‘ਯਾਵ ਗੋਪ੍ਫਕਾ ਓਤਾਰੇਤ੍ਵਾ’’ਤਿ. ਉਭਤੋ ਉਕ੍ਖਿਪਿਤ੍ਵਾਤਿ ਦਕ੍ਖਿਣਤੋ ਵਾਮਤੋਤਿ ਉਭੋਸੁ ਪਸ੍ਸੇਸੁ ਉਤ੍ਤਰਾਸਙ੍ਗਂ ਉਕ੍ਖਿਪਿਤ੍ਵਾ. ਥਨਨ੍ਤਿ ਦਕ੍ਖਿਣਥਨਂ.

ਵਿਸ੍ਸਟ੍ਠੋਤਿ ਵਿਮੁਤ੍ਤੋ. ਤੇਨਾਹ ‘‘ਵਿਸ੍ਸਟ੍ਠਤ੍ਤਾਯੇਵ ਚੇਸ ਵਿਞ੍ਞੇਯ੍ਯੋ’’ਤਿ. ਯਸ੍ਮਾ ਅਮੁਤ੍ਤਵਾਦਿਨੋ ਵਚਨਂ ਅਵਿਸ੍ਸਟ੍ਠਤਾਯ ਨ ਸਿਨਿਯ੍ਹਤਿ, ਨ ਏਵਂ ਮੁਤ੍ਤਵਾਦਿਨੋਤਿ ਆਹ ‘‘ਸਿਨਿਦ੍ਧੋ’’ਤਿ. ਵਿਞ੍ਞੇਯ੍ਯੋਤਿ ਸੁਪਰਿਬ੍ਯਤ੍ਤਤਾਯ ਅਕ੍ਖਰਤੋ ਚ ਬ੍ਯਞ੍ਜਨਤੋ ਚ ਵਿਞ੍ਞਾਤੁਂ ਸਕ੍ਕੁਣੇਯ੍ਯੋ. ਤੇਨਾਹ ‘‘ਪਾਕਟੋ’’ਤਿ. ਵਿਞ੍ਞਾਪਨਿਯੋਤਿ ਵਿਜਾਨਿਤਬ੍ਬੋ. ਬ੍ਯਞ੍ਜਨਵਸੇਨੇਵ ਚੇਤ੍ਥ ਵਿਞ੍ਞੇਯ੍ਯਤਾ ਵੇਦਿਤਬ੍ਬਾ ਘੋਸਸ੍ਸ ਅਧਿਪ੍ਪੇਤਤ੍ਤਾ. ਮਧੁਰੋਤਿ ਪਿਯੋ ਪੇਮਨੀਯੋ ਅਪਲਿਬੁਦ੍ਧੋ. ਸਵਨਮਰਹਤਿ, ਸਵਨਸ੍ਸ ਸੋਤਸ੍ਸ ਹਿਤੋਤਿ ਵਾ ਸਵਨੀਯੋ. ਸਮ੍ਪਿਣ੍ਡਿਤੋਤਿ ਸਹਿਤੋ. ਭਗਵਤੋ ਹਿ ਸਦ੍ਦੋ ਉਪ੍ਪਤ੍ਤਿਟ੍ਠਾਨਕਤਾਸਞ੍ਚਿਤਤ੍ਤਾ ਸਹਿਤਾਕਾਰੇਨੇਵ ਆਪਾਥਮਾਗਚ੍ਛਤਿ, ਨ ਅਯੋਸਲਾਕਾਯ ਪਹਟਕਂਸਥਾਲਂ ਵਿਯ ਵਿਪ੍ਪਕਿਣ੍ਣੋ. ਤੇਨਾਹ ‘‘ਅਵਿਸਾਰੀ’’ਤਿ. ਗਮ੍ਭੀਰੋਤਿ ਯਥਾ ਗਮ੍ਭੀਰਵਤ੍ਥੁਪਰਿਚ੍ਛਿਨ੍ਦਨੇਨ ਞਾਣਸ੍ਸ ਗਮ੍ਭੀਰਸਮਞ੍ਞਾ, ਏਵਂ ਗਮ੍ਭੀਰਟ੍ਠਾਨਸਮ੍ਭਵਤੋ ਸਦ੍ਦਸ੍ਸ ਗਮ੍ਭੀਰਸਮਞ੍ਞਾਤਿ ਆਹ ‘‘ਗਮ੍ਭੀਰੋਤਿ ਗਮ੍ਭੀਰਸਮੁਟ੍ਠਿਤੋ’’ਤਿ. ਨਿਨ੍ਨਾਦਵਾਤਿ ਸਵਿਸੇਸਂ ਨਿਨ੍ਨਾਦਵਾ. ਸ੍ਵਾਯਂ ਵਿਸੇਸੋ ਗਮ੍ਭੀਰਭਾਵਸਿਦ੍ਧੋਤਿ ਆਹ ‘‘ਗਮ੍ਭੀਰਤ੍ਤਾਯੇਵ ਚੇਸ ਨਿਨ੍ਨਾਦੀ’’ਤਿ. ਏਵਮੇਤ੍ਥ ਚਤ੍ਤਾਰਿ ਅਙ੍ਗਾਨਿ ਚਤੁਰਙ੍ਗਨਿਪ੍ਫਾਦੀਨਿ ਵੇਦਿਤਬ੍ਬਾਨਿ. ਅਕਾਰਣਾ ਮਾ ਨਸ੍ਸੀਤਿ ਬੁਦ੍ਧਾਨੁਭਾਵੇਨ ਵਿਯ ਸਰਸ੍ਸ ਪਰਿਸਪਰਿਯਨ੍ਤਤਾ ਵੁਤ੍ਤਾ, ਧਮ੍ਮਤਾਵਸੇਨੇਵ ਪਨ ਸਾ ਵੇਦਿਤਬ੍ਬਾ ਤਸ੍ਸ ਮੂਲਕਾਰਣਸ੍ਸ ਤਥਾ ਅਵਟ੍ਠਿਤਤ੍ਤਾ.

ਪਚ੍ਚੋਸਕ੍ਕਿਤ੍ਵਾਤਿ ਪਟਿਨਿਵਤ੍ਤਿਤ੍ਵਾ. ਸਮੁਸ੍ਸਿਤਕਞ੍ਚਨਪਬ੍ਬਤਂ ਵਿਯ ਉਪਰਿ ਇਨ੍ਦਨੀਲਰਤਨਵਿਤਤਸਿਖਂ ਵਿਜ੍ਜੁਲ੍ਲਤਾਭੂਸਿਤਂ. ਮਹਾਪਥਵੀਆਦਯੋ ਸਤ੍ਥੁਗੁਣਪਟਿਭਾਗਤਾਯ ਨਿਦਸ੍ਸਨਂ, ਕੇਵਲਂ ਮਹਨ੍ਤਤਾਮਤ੍ਤਂ ਉਪਾਦਾਯ ਨਿਦਸ੍ਸਿਤਾ.

੩੯੦. ਅਪ੍ਪਟਿਸਂਵਿਦਿਤੋਤਿ ਅਨਾਰੋਚਿਤੋ. ਆਗਮਨਵਸੇਨ ਚੇਤ੍ਥ ਪਟਿਸਂਵੇਦਿਤਨ੍ਤਿ ਆਹ ‘‘ਅਵਿਞ੍ਞਾਤਆਗਮਨੋ’’ਤਿ. ਉਗ੍ਗਤਭਾਵਨ੍ਤਿ ਕੁਲਭੋਗਵਿਜ੍ਜਾਦੀਹਿ ਉਲ਼ਾਰਭਾਵਂ. ਅਨੁਦ੍ਦਯਸਮ੍ਪਨ੍ਨਾਤਿ ਕਾਰੁਣਿਕਾ.

੩੯੧. ਸਹਸਾਵ ਓਕਾਸਕਰਣੇਨ ਉਚ੍ਚਕੁਲੀਨਤਾ ਦੀਪਿਤਾ ਹੋਤੀਤਿ ਆਹ ‘‘ਵੇਗੇਨ ਉਟ੍ਠਾਯ ਦ੍ਵਿਧਾ ਭਿਜ੍ਜਿਤ੍ਵਾ’’ਤਿਆਦਿ.

ਨਾਰਿਸਮਾਨਨਾਮਨ੍ਤਿ ਇਤ੍ਥਿਅਤ੍ਥਜੋਤਕਨਾਮਂ. ਤੇਨਾਹ ‘‘ਇਤ੍ਥਿਲਿਙ੍ਗ’’ਨ੍ਤਿ. ਅਵ੍ਹਾਤਬ੍ਬਾਤਿ ਕਥੇਤਬ੍ਬਾ.

੩੯੪. ਏਕਨੀਹਾਰੇਨੇਵ ਅਟ੍ਠ ਪਞ੍ਹੇ ਬ੍ਯਾਕਰੋਨ੍ਤੋ. ‘‘ਪੁਬ੍ਬੇਨਿਵਾਸਂ…ਪੇ… ਪਵੁਚ੍ਚਤੀ’’ਤਿ ਇਮਿਨਾ ਪੁਬ੍ਬੇਨਿਵਾਸਸ੍ਸ ਵਿਦਿਤਕਾਰਣਂ ਵੁਤ੍ਤਨ੍ਤਿ ਆਹ ‘‘ਤਸ੍ਸ ਪੁਬ੍ਬੇਨਿਵਾਸੋ ਪਾਕਟੋ’’ਤਿ. ਦਿਬ੍ਬਚਕ੍ਖੁਞਾਣਂ ਕਥਿਤਂ ਤਸ੍ਸ ਪਰਿਭਣ੍ਡਞਾਣਭਾਵਤੋ ਯਥਾਕਮ੍ਮੂਪਗਞਾਣਸ੍ਸ. ‘‘ਜਾਤਿਕ੍ਖਯਂ ਪਤ੍ਤੋ, ਅਭਿਞ੍ਞਾ ਵੋਸਿਤੋ’’ਤਿ ਚ ਵੁਤ੍ਤਤ੍ਤਾ ਮੁਨੀਤਿ ਅਸੇਕ੍ਖਮੁਨਿ ਇਧਾਧਿਪ੍ਪੇਤੋਤਿ ਆਹ ‘‘ਅਰਹਤ੍ਤਞਾਣਮੋਨੇਯ੍ਯੇਨ ਸਮਨ੍ਨਾਗਤੋ’’ਤਿ.

ਕਿਲੇਸਰਾਗੇਹਿ ਕਿਲੇਸਵਿਵਣ੍ਣਤਾਹਿ. ਜਾਤਿਕ੍ਖਯਪ੍ਪਤ੍ਤਤ੍ਤਾ ‘‘ਅਥੋ ਜਾਤਿਕ੍ਖਯਂ ਪਤ੍ਤੋ’’ਤਿ ਵੁਤ੍ਤਤ੍ਤਾ. ਅਭਿਜਾਨਿਤ੍ਵਾਤਿ ਅਭਿਵਿਸਿਟ੍ਠਤਾਯ ਅਗ੍ਗਮਗ੍ਗਪਞ੍ਞਾਯ ਞਤ੍ਵਾ. ਇਦਾਨਿ ਪਟਿਸਮ੍ਭਿਦਾਯਂ ਆਗਤਨਯੇਨ ਪਰਿਞ੍ਞਾਪਹਾਨਭਾਵਨਾਸਚ੍ਛਿਕਿਰਿਯਾਸਮਾਪਤ੍ਤੀਨਂ ਪਾਰਗਮਨੇਨ ਪਾਰਗੂਤਿ ਅਯਮੇਤ੍ਥ ਅਤ੍ਥੋਤਿ ਦਸ੍ਸੇਤੁਂ ‘‘ਪਾਰਗੂਤਿ ਵਾ’’ਤਿਆਦਿ ਵੁਤ੍ਤਂ. ਅਭਿਞ੍ਞੇਯ੍ਯਧਮ੍ਮਾਨਂ ਜਾਨਨਵਸੇਨ ਅਭਿਞ੍ਞਾਪਾਰਗੂ. ਤਾਦਿਸੋਤਿ ਯਾਦਿਸੋ ‘‘ਪਾਰਗੂ ਸਬ੍ਬਧਮ੍ਮਾਨ’’ਨ੍ਤਿ ਪਦਦ੍ਵਯੇਨ ਵੁਤ੍ਤੋ, ਤਾਦਿਸੋ. ਛਹਿ ਆਕਾਰੇਹੀਤਿ ਪਜਾਨਨਾਦੀਹਿ ਯਥਾਵੁਤ੍ਤੇਹਿ ਛਹਿ ਆਕਾਰੇਹਿ.

ਕਾਮਞ੍ਚੇਤ੍ਥ ਦ੍ਵੇ ਏਵ ਪੁਚ੍ਛਾਗਾਥਾ ਦ੍ਵੇ ਚ ਵਿਸ੍ਸਜ੍ਜਨਾਗਾਥਾ, ਪੁਚ੍ਛਾਪਟਿਪਾਟਿਯਾ ਪਨ ਅਸਙ੍ਕਰਤੋ ਚ ਵਿਸ੍ਸਜ੍ਜਨਂ ਪਵਤ੍ਤਤਿ, ਤਂ ਨਿਦ੍ਧਾਰੇਤੁਂ ਕਿਂ ਪਨਾਤਿਆਦਿ ਵੁਤ੍ਤਂ. ਵੇਦੇਹਿ ਗਤਤ੍ਤਾਤਿ ਵੇਦੇਹਿ ਮਗ੍ਗਞਾਣੇਹਿ ਪਾਰਙ੍ਗਤਤ੍ਤਾ. ਪੁਬ੍ਬੇਨਿਵਾਸਨ੍ਤਿਆਦੀਹਿ ਵਿਜ੍ਜਾਨਂ ਅਤ੍ਥਿਤਾਯ ਬੋਧਿਤਤ੍ਤਾ. ਪਾਪਧਮ੍ਮਾਨਨ੍ਤਿ ਛਤ੍ਤਿਂਸਪਾਪਧਮ੍ਮਾਨਂ ਸੋਤ੍ਥਾਨਂ ਮਗ੍ਗਂ ਪਾਪਨੇਨ ਨਿਸ੍ਸੇਸਤੋ ਸੋਧਿਤਤ੍ਤਾ.

੩੯੫. ਧਮ੍ਮੋ ਨਾਮ ਅਰਹਤ੍ਤਮਗ੍ਗੋ ਕੁਸਲਧਮ੍ਮੇਸੁ ਉਕ੍ਕਂਸਪਾਰਮਿਪ੍ਪਤ੍ਤਿਯਾ ਉਕ੍ਕਟ੍ਠਨਿਦ੍ਦੇਸੇਨ. ਤਸ੍ਸ ਅਨੁਰੂਪਧਮ੍ਮਭਾਵਤੋ ਅਨੁਧਮ੍ਮੋ ਨਾਮ ਹੇਟ੍ਠਿਮਮਗ੍ਗਫਲਧਮ੍ਮਾ. ਯੋ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਯਥਾਨੁਸਿਟ੍ਠਂ ਨ ਪਟਿਪਜ੍ਜਤਿ, ਸੋ ਤਥਾਗਤਂ ਧਮ੍ਮਾਧਿਕਰਣਂ ਵਿਹੇਠੇਤਿ ਨਾਮ. ਯੋ ਪਨ ਪਟਿਪਜ੍ਜਨ੍ਤੋ ਚ ਦਨ੍ਧਾਭਿਞ੍ਞਤਾਯ ਕਮ੍ਮਟ੍ਠਾਨਸੋਧਨਤ੍ਥਂ ਅਨ੍ਤਰਨ੍ਤਰਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਅਨੇਕਵਾਰਂ ਕਥਾਪੇਤਿ, ਸੋ ਏਤ੍ਤਾਵਤਾ ਧਮ੍ਮਾਧਿਕਰਣਂ ਤਥਾਗਤਂ ਵਿਹੇਠੇਤੀਤਿ ਨ ਵਤ੍ਤਬ੍ਬੋ. ਨ ਹਿ ਭਗਵਤੋ ਧਮ੍ਮਦੇਸਨਾਯ ਪਰਿਸ੍ਸਮੋ ਅਤ੍ਥਿ, ਅਯਞ੍ਚ ਅਤ੍ਥੋ ਮਹਾਸੁਦਸ੍ਸਨਸੁਤ੍ਤਾਦੀਹਿ (ਦੀ. ਨਿ. ੨.੨੪੧ ਆਦਯੋ) ਦੀਪੇਤਬ੍ਬੋ, ਤਸ੍ਮਾ – ‘‘ਸਚ੍ਚਧਮ੍ਮਸ੍ਸ ਅਨੁਧਮ੍ਮ’’ਨ੍ਤਿ ਵਤ੍ਤਬ੍ਬੇ ਵੁਤ੍ਤਮੇਵ ਬ੍ਯਤਿਰੇਕਮੁਖੇਨ ਵਿਭਾਵੇਤੁਂ ‘‘ਨ ਚ ਮਂ ਧਮ੍ਮਾਧਿਕਰਣਂ ਵਿਹੇਸੇਸੀ’’ਤਿ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਤਤ੍ਥ ਪਰਿਨਿਬ੍ਬਾਯੀਤਿ ਪਰਕਾਲੇ ਚੇਤ੍ਥ ਪਰਿਨਿਬ੍ਬਾਨਮ੍ਪਿ ਸਙ੍ਗਯ੍ਹਤਿ, ਤਂ ਪਨ ਇਮਸ੍ਮਿਂ ਗਹਿਤਮੇਵ ਹੋਤੀਤਿ ਆਹ ‘‘ਦੇਸਨਾਯ ਅਰਹਤ੍ਤੇਨੇਵ ਕੂਟਂ ਗਹਿਤ’’ਨ੍ਤਿ.

ਬ੍ਰਹ੍ਮਾਯੁਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

੨. ਸੇਲਸੁਤ੍ਤਵਣ੍ਣਨਾ

੩੯੬. ਕੇਣਿਯੋਤਿ ਤਸ੍ਸ ਨਾਮਂ, ਪੁਬ੍ਬੇ ਕੇਣਿਯਾ ਜੀਵਿਕਾਕਪ੍ਪਨਤੋਤਿ ਵਦਨ੍ਤਿ. ਜਟਿਲੋਤਿ ਜਟਾਧਰੋ. ਬ੍ਰਾਹ੍ਮਣਜਾਤਿਕਤ੍ਤਾ ਕੋਟਿਸਾਰਤਾਯ ਚ ਬ੍ਰਾਹ੍ਮਣਮਹਾਸਾਲੋ. ਪਯੋਜੇਤ੍ਵਾ ਨਿਸ੍ਸਯੋ ਹੁਤ੍ਵਾ ਵਸਤਿ, ਰਤ੍ਤਿਂ ਕਾਮਸਮ੍ਪਤ੍ਤਿਂ ਅਨੁਭਵਤੀਤਿ ਵਾ ਯੋਜਨਾ. ਸੁਸਙ੍ਖਤਨ੍ਤਿ ਸਪ੍ਪਿਮਧੁਸਕ੍ਕਰਾਦੀਹਿ ਚੇਵ ਮਰਿਚਸਿਙ੍ਗੀਵੇਰਾਦੀਹਿ ਚ ਸੁਟ੍ਠੁ ਅਭਿਸਙ੍ਖਤਂ.

ਪਟਿਕ੍ਖੇਪਪਸਨ੍ਨਤਾਯਾਤਿ ਅਹੋਵਤਾਯਂ ਅਪ੍ਪਿਚ੍ਛੋ, ਯੋ ਨਿਮਨ੍ਤਿਯਮਾਨੋਪਿ ਨ ਸਾਦਿਯਤੀਤਿ ਉਪਨਿਮਨ੍ਤਿਯਮਾਨਸ੍ਸ ਪਟਿਕ੍ਖੇਪੇ ਤਿਤ੍ਥਿਯਾਨਂ ਪਸਨ੍ਨਭਾਵਤੋਤਿ. ਤਂ ਕਥਂ? ਵਿਰੁਦ੍ਧਮੇਤਨ੍ਤਿ ‘‘ਅਕਾਰਣਮੇਤ’’ਨ੍ਤਿ ਪਟਿਕ੍ਖਿਪਤਿ.

੩੯੮. ਕਪ੍ਪਸਹਸ੍ਸੇਹਿਪਿ…ਪੇ… ਅਹੋਸੀਤਿ ਇਦਂ ਨਾਨੁਸ੍ਸਵਸਿਦ੍ਧਂ ਅਨੁਮਾਨਗ੍ਗਹਣਂ ਸਨ੍ਧਾਯਾਹ. ਪਦੇਤਿ ਉਤ੍ਤਰਪਦਲੋਪੇਨ ਨਿਦ੍ਦੇਸੋਤਿ ਆਹ ‘‘ਪਦਪ੍ਪਮਾਣੇ’’ਤਿ. ਪਜ੍ਜਤਿ ਨਿਕ੍ਖਿਪਤਿ ਏਤ੍ਥਾਤਿ ਵਾ ਪਦਂ ਪਕਤਿਯਾ ਪਾਦਨਿਕ੍ਖਿਪਟ੍ਠਾਨਂ, ਤਸ੍ਮਿਂ ਪਦੇ. ਕੀਲ਼ਾਪਸੁਤਤਾਦਿਨਾ ਪਮਾਦਂ ਆਪਜ੍ਜਤਿ. ਬੋਧਿਸਤ੍ਤਚਾਰਿਕਨ੍ਤਿ ਦੁਕ੍ਕਰਚਰਿਯਂ ਸਨ੍ਧਾਯ ਵਦਤਿ.

੩੯੯. ਪਰਿਪੁਣ੍ਣਤਾਯਾਤਿ ਅਨੂਨਤਾਯ. ਅਹੀਨਙ੍ਗਤਾਯਾਤਿ ਅਵੇਕਲ੍ਲਭਾਵਤੋ. ਰੋਚਤੀਤਿ ਰੁਚਿ, ਦੇਹਪ੍ਪਭਾ, ਸੋਭਣਾ ਰੁਚਿ ਏਤਸ੍ਸਾਤਿ ਸੁਰੁਚਿ. ਆਰੋਹਸਮ੍ਪਤ੍ਤਿ ਕਾਯਸ੍ਸ ਪਮਾਣਯੁਤ੍ਤਉਚ੍ਚਤਾ. ਪਰਿਣਾਹਸਮ੍ਪਤ੍ਤਿ ਕਿਸਥੂਲਭਾਵਵਜ੍ਜਿਤਪਰਿਣਾਹਤਾ. ਸਣ੍ਠਾਨਸਮ੍ਪਤ੍ਤਿ ਅਵਯਵਾਨਂ ਸੁਸਣ੍ਠਿਤਤਾ. ਚਾਰੁਦਸ੍ਸਨੋਤਿ ਪਿਯਦਸ੍ਸਨੋ ਤੇਨਾਹ ‘‘ਸੁਚਿਰਮ੍ਪੀ’’ਤਿਆਦਿ. ਸੁਵਣ੍ਣਸਦਿਸਵਣ੍ਣੋਤਿ ਜਾਤਿਹਿਙ੍ਗੁਲਕੇਨ ਮਦ੍ਦਿਤ੍ਵਾ ਸਿਲਾਨਿਘਂਸੇਨੇਵ ਪਰਿਕਮ੍ਮਂ ਕਤ੍ਵਾ ਠਪਿਤਘਨਸੁਵਣ੍ਣਰੂਪਵਣ੍ਣੋ. ਮਹਾਪੁਰਿਸਭਾਵਂ ਬ੍ਯਞ੍ਜੇਨ੍ਤਿ ਪਕਾਸੇਨ੍ਤੀਤਿ ਬ੍ਯਞ੍ਜਨਾਨਿ, ਮਹਾਪੁਰਿਸਲਕ੍ਖਣਾਨੀਤਿ ਆਹ ‘‘ਪਠਮਂ ਵੁਤ੍ਤਬ੍ਯਞ੍ਜਨਾਨੇਵਾ’’ਤਿ.

ਪੁਬ੍ਬੇ ਵੁਤ੍ਤਨ੍ਤਿ ‘‘ਸੁਰੁਚੀ’’ਤਿ ਪੁਬ੍ਬੇ ਵੁਤ੍ਤਂ, ‘‘ਆਦਿਚ੍ਚੋਵ ਵਿਰੋਚਸੀ’’ਤਿ ਪੁਨ ਵੁਤ੍ਤਂ. ‘‘ਚਾਰੁਦਸ੍ਸਨੋ ਸੁਵਣ੍ਣਵਣ੍ਣੋਸੀ’’ਤਿ ਪੁਬ੍ਬੇ ਵੁਤ੍ਤਂ, ‘‘ਕਲ੍ਯਾਣਦਸ੍ਸਨੋ ਭਿਕ੍ਖੁ ਕਞ੍ਚਨਾਭਤ੍ਤਚੋ’’ਤਿ ਪੁਨ ਵੁਤ੍ਤਨ੍ਤਿ ਇਮਮਤ੍ਥਂ ਸਨ੍ਧਾਯਾਹ ‘‘ਉਤ੍ਤਰਗਾਥਾਯਪਿ ਏਸੇਵ ਨਯੋ’’ਤਿ. ਸਾਤਿਸਯਂ ਉਤ੍ਤਮਵਣ੍ਣੇ ਵਣ੍ਣੇਤ੍ਵਾ ਉਤ੍ਤਮਵਣ੍ਣਿਨੋਤਿ ਪਦੇਨ ਸਨ੍ਤਂ ਪਕਾਸੇਤੀਤਿ ਆਹ ‘‘ਉਤ੍ਤਮਵਣ੍ਣਸਮ੍ਪਨ੍ਨਸ੍ਸਾ’’ਤਿ. ਉਤ੍ਤਮਸਾਰਥੀਤਿ ਸੇਟ੍ਠਪੁਰਿਸਸਾਰਥਿ. ਤਤ੍ਥ ਤਤ੍ਥ ਜਮ੍ਬੁਵਨਸਣ੍ਡਮਣ੍ਡਿਤਤਾਯ ਜਮ੍ਬੁਦੀਪੋ ‘‘ਜਮ੍ਬੁਸਣ੍ਡੋ’’ਤਿ ਵੁਚ੍ਚਤਿ. ਇਸ੍ਸਰਿਯਨ੍ਤਿ ਚਕ੍ਕਵਤ੍ਤਿਸ੍ਸਰਿਯਂ.

ਜਾਤਿਖਤ੍ਤਿਯਾਤਿ ਜਾਤਿਮਨ੍ਤੋ ਖਤ੍ਤਿਯਾ. ਰਾਜਾਭਿਰਾਜਾਤਿ ਏਤ੍ਥ ਅਭਿ-ਸਦ੍ਦੋ ਪੂਜਤ੍ਥੋਤਿ ਆਹ ‘‘ਰਾਜੂਨਂ ਪੂਜਨੀਯੋ’’ਤਿ.

ਅਪ੍ਪਮਾਣਾਤਿ ਅਪਰਿਮਾਣਾ ਲੋਕਧਾਤੁਯੋ. ‘‘ਯਾਵਤਾ ਪਨ ਆਕਙ੍ਖੇਯ੍ਯਾ’’ਤਿ (ਅ. ਨਿ. ੩.੮੧) ਹਿ ਵੁਤ੍ਤਂ. ਧਮ੍ਮਰਾਜਾ ਅਨੁਤ੍ਤਰੋਤਿ ਏਤ੍ਥ ਵੁਤ੍ਤਅਨੁਤ੍ਤਰਭਾਵਂ ‘‘ਯਾਵਤਾ ਹੀ’’ਤਿਆਦਿਨਾ ਪਾਕਟਤਰਂ ਕਤ੍ਵਾ ਧਮ੍ਮਰਾਜਭਾਵਂ ਵਿਭਾਵੇਤੁਂ ‘‘ਸ੍ਵਾਹ’’ਨ੍ਤਿਆਦਿ ਵੁਤ੍ਤਂ. ਧਮ੍ਮੇਨਾਤਿ ਪਟਿਵੇਧਧਮ੍ਮੇਨ. ਤੇਨਾਹ ‘‘ਅਨੁਤ੍ਤਰੇਨੇਵਾ’’ਤਿ. ਅਨੁਤ੍ਤਰੇਨਾਤਿ ਵਿਸਿਟ੍ਠੇਨ ਉਤ੍ਤਮੇਨ. ਇਮਸ੍ਮਿਂ ਪਕ੍ਖੇ ਧਮ੍ਮੇਨਾਤਿ ਪਟਿਪਤ੍ਤਿਧਮ੍ਮੇਨਾਤਿਪਿ ਸਙ੍ਗਯ੍ਹਤਿ. ਪਰਿਯਤ੍ਤਿਧਮ੍ਮੇਨਾਤਿ ਦੇਸਨਾਧਮ੍ਮੇਨ ਆਣਾਚਕ੍ਕਂ ਪਵਤ੍ਤੇਮੀਤਿ ਯੋਜਨਾ. ਦੇਸਨਾਞਾਣਪਟਿਵੇਧਞਾਣਵਿਭਾਗਂ ਧਮ੍ਮਚਕ੍ਕਮੇਵ ਵਾ. ਅਪ੍ਪਟਿਵਤ੍ਤਿਯਨ੍ਤਿ ਪਟਿਵਤ੍ਤਿਤੁਂ ਅਸਕ੍ਕੁਣੇਯ੍ਯਂ.

ਤਥਾਗਤੇਨ ਜਾਤੋਤਿ ਤਥਾਗਤੇਨ ਹੇਤੁਨਾ ਅਰਿਯਾਯ ਜਾਤਿਯਾ ਜਾਤੋ. ਹੇਤੁਅਤ੍ਥੇ ਕਰਣਵਚਨਂ. ਅਨੁਜਾਤੋਤਿ ਚ ਵੁਤ੍ਤੇ ਅਨੁ-ਸਦ੍ਦਸ੍ਸ ਵਸੇਨ ਤਥਾਗਤਨ੍ਤਿ ਚ ਉਪਯੋਗਵਚਨਮੇਵ ਹੋਤਿ, ਸੋ ਚ ਅਨੁ-ਸਦ੍ਦੋ ਹੇਤੁਅਤ੍ਥਜੋਤਕੋਤਿ ਆਹ ‘‘ਤਥਾਗਤਂ ਹੇਤੁਂ ਅਨੁਜਾਤੋ’’ਤਿ. ਅਵਞ੍ਞਾਤਬ੍ਬਭਾਵੇਨ ਜਾਤੋਤਿ ਅਵਜਾਤੋ ਦੁਪ੍ਪਟਿਪਨ੍ਨਤ੍ਤਾ. ਤੇਨਾਹ ‘‘ਦੁਸ੍ਸੀਲੋ’’ਤਿ. ਤਥਾ ਹਿ ਵੁਤ੍ਤਂ ਕੋਕਾਲਿਕਂ ਆਰਬ੍ਭ ‘‘ਪੁਰਿਸਨ੍ਤਕਲਿ ਅਵਜਾਤੋ’’ਤਿ. ਪੁਤ੍ਤੋ ਨਾਮ ਨ ਹੋਤਿ ਤਸ੍ਸ ਓਵਾਦਾਨੁਸਾਸਨਿਯਂ ਅਟ੍ਠਿਤਤ੍ਤਾ. ਏਵਮਾਹਾਤਿ ‘‘ਅਨੁਜਾਤੋ ਤਥਾਗਤ’’ਨ੍ਤਿ ਏਵਮਾਹ.

ਵਿਜ੍ਜਾਤਿ ਮਗ੍ਗਵਿਜ੍ਜਾ. ਉਕ੍ਕਟ੍ਠਨਿਦ੍ਦੇਸੇਨ ਵਿਮੁਤ੍ਤੀਤਿ ਫਲਵਿਮੁਤ੍ਤਿ. ਨਨੁ ਚ ਮਗ੍ਗੋ ਭਾਵੇਤਬ੍ਬੇਨ ਗਹਿਤੋਤਿ? ਸਚ੍ਚਂ ਗਹਿਤੋ, ਸਬ੍ਬੇ ਚ ਪਨ ਸਤ੍ਤ ਧਮ੍ਮਾ ਅਭਿਞ੍ਞੇਯ੍ਯਾਤਿ ਵਿਜ੍ਜਾਯ ਅਭਿਞ੍ਞੇਯ੍ਯਭਾਵੋ ਵੁਤ੍ਤੋ. ਇਮਿਨਾ ਵਾ ਨਯੇਨ ਸਬ੍ਬੇਸਮ੍ਪਿ ਅਭਿਞ੍ਞੇਯ੍ਯਭਾਵੋ ਵੁਤ੍ਤੋ ਏਵਾਤਿ ਵੇਦਿਤਬ੍ਬੋ. ਫਲੇਨ ਵਿਨਾ ਹੇਤੁਭਾਵਸ੍ਸੇਵ ਅਭਾਵਤੋ ਹੇਤੁਵਚਨੇਨ ਫਲਸਿਦ੍ਧਿ, ਨਿਰੋਧਸ੍ਸ ਚ ਸਮ੍ਪਾਪਨੇਨ ਮਗ੍ਗਸ੍ਸ ਹੇਤੁਭਾਵੋ. ਦੁਕ੍ਖਸ੍ਸ ਨਿਬ੍ਬਤ੍ਤਨੇਨ ਤਣ੍ਹਾਯ ਸਮੁਦਯਭਾਵੋਤਿ ਇਮਮਤ੍ਥਂ ਸਙ੍ਗਹਿਤਮੇਵ ਅਤ੍ਥਤੋ ਆਪਨ੍ਨਤ੍ਤਾ. ਯੁਤ੍ਤਹੇਤੁਨਾਤਿ ਯੁਤ੍ਤਿਯੁਤ੍ਤੇਨ ਹੇਤੁਨਾ ਬੁਦ੍ਧਭਾਵਂ ਸਾਧੇਤਿ ਸਚ੍ਚਵਿਨਿਮੁਤ੍ਤਸ੍ਸ ਬੁਜ੍ਝਿਤਬ੍ਬਸ੍ਸ ਅਭਾਵਤੋ ਸਚ੍ਚਸਮ੍ਬੋਧਨੇਨੇਵ ਚ ਤਸ੍ਸ ਅਨਵਸੇਸਤੋ ਬੁਦ੍ਧਤ੍ਤਾ. ਅਤ੍ਥਵਚਨਞ੍ਚੇਤਂ, ਪਯੋਗਵਚਨਾਨਿ ਪਨ – ਬ੍ਰਾਹ੍ਮਣ, ਅਹਂ ਸਮ੍ਮਾਸਮ੍ਬੁਦ੍ਧੋ ਸਬ੍ਬਥਾ ਅਵਿਪਰੀਤਧਮ੍ਮਦੇਸਨੋ, ਸਮ੍ਮਾਸਮ੍ਬੁਦ੍ਧਤ੍ਤਾ ਸਬ੍ਬਤ੍ਥ ਅਵਿਪਰੀਤਮਾਚਿਕ੍ਖਤਿ ਯਥਾਹਂ ਸਬ੍ਬਮਗ੍ਗਦੇਸਕੋਤਿ. ਕਿਂ ਪਨ ਭਗਵਾ ਸਯਮੇਵ ਅਤ੍ਤਨੋ ਸਮ੍ਮਾਸਮ੍ਬੁਦ੍ਧਭਾਵਂ ਆਰੋਚੇਤੀਤਿ? ਮਹਾਕਰੁਣਾਯ ਅਞ੍ਞੇਸਂ ਮਹਾਵਿਸਯਤੋ. ਤਤ੍ਥ ‘‘ਏਕੋਮ੍ਹਿ ਸਮ੍ਮਾਸਮ੍ਬੁਦ੍ਧੋ, ਸਬ੍ਬਾਭਿਭੂ ਸਬ੍ਬਵਿਦੂਹਮਸ੍ਮੀ’’ਤਿਆਦੀਨਿ (ਮਹਾਵ. ੧੧; ਮ. ਨਿ. ੧.੨੮੫; ੨.੩੪੧; ਕਥਾ. ੪੦੫) ਸੁਤ੍ਤਪਦਾਨਿ ਇਦਮੇਵ ਚ ਸੁਤ੍ਤਪਦਂ ਏਤਸ੍ਸ ਅਤ੍ਥਸ੍ਸ ਸਾਧਕਂ.

ਸਲ੍ਲਕਨ੍ਤਨੋਤਿ ਸਲ੍ਲਾਨਂ ਸਮੁਚ੍ਛਿਨ੍ਨਤ੍ਤਾ. ਰੋਗਸ੍ਸਾਤਿ ਕਿਲੇਸਰੋਗਸ੍ਸ. ਤਸ੍ਮਾਤਿ ਅਪੁਨਪਵਤ੍ਤਿਪਾਦਨੇਨ ਤਿਕਿਚ੍ਛਨਤੋ. ਬ੍ਰਹ੍ਮਂ ਵਾ ਸੇਟ੍ਠਂ ਸਮ੍ਮਾਸਮ੍ਬੋਧਿਂ ਪਤ੍ਤੋਤਿ ਬ੍ਰਹ੍ਮਭੂਤੋ. ਏਵਂ ਆਗਤਾਯਾਤਿ ਇਮਿਨਾ –

‘‘ਕਾਮਾ ਤੇ ਪਠਮਾ ਸੇਨਾ, ਦੁਤਿਯਾ ਅਰਤਿ ਵੁਚ੍ਚਤਿ;

ਤਤਿਯਾ ਖੁਪ੍ਪਿਪਾਸਾ ਤੇ, ਚਤੁਤ੍ਥੀ ਤਣ੍ਹਾ ਪਵੁਚ੍ਚਤਿ.

ਥਿਨਮਿਦ੍ਧਂ ਤੇਪਞ੍ਚਮਂ ਥਿਨਮਿਦ੍ਧਂ ਤੇ, ਛਟ੍ਠਾ ਭੀਰੂ ਪਵੁਚ੍ਚਤਿ;

ਸਤ੍ਤਮੀ ਵਿਚਿਕਿਚ੍ਛਾ ਤੇ, ਮਕ੍ਖੋ ਥਮ੍ਭੋ ਤੇ ਅਟ੍ਠਮੋ.

ਲਾਭੋ ਸਿਲੋਕੋ ਸਕ੍ਕਾਰੋ, ਮਿਚ੍ਛਾਲਦ੍ਧੋ ਚ ਯੋ ਯਸੋ;

ਯੋ ਚਤ੍ਤਾਨਂ ਸਮੁਕ੍ਕਂਸੇ, ਪਰੇ ਚ ਅਵਜਾਨਤਿ;

ਏਸਾ ਨਮੁਚਿ ਤੇ ਸੇਨਾ, ਕਣ੍ਹਸ੍ਸਾਭਿਪ੍ਪਹਾਰਿਨੀ’’ਤਿ. (ਸੁ. ਨਿ. ੪੩੮-੪੪੧);

ਏਵਂ ਵੁਤ੍ਤਂ ਨਵਵਿਧਂ ਸੇਨਂ ਸਙ੍ਗਯ੍ਹਤਿ. ਵਸੇ ਵਤ੍ਤੇਤ੍ਵਾਤਿ ਸਮੁਚ੍ਛਿਨ੍ਦਨੇਨ ਅਨੁਪ੍ਪਾਦਤਾਪਾਦਨੇਨ ਵਸੇ ਵਤ੍ਤੇਤ੍ਵਾ. ਕੁਤੋਚਿ ਅਭਯੋ ਨਿਬ੍ਭਯੋ.

ਸਯਮੇਵ ਦਟ੍ਠਬ੍ਬਨ੍ਤਿ ਯੇਨ ਯੇਨ ਅਧਿਗਤੋ, ਤੇਨ ਤੇਨ ਪਰਸਦ੍ਧਾਯ ਗਨ੍ਤਬ੍ਬਂ ਹਿਤ੍ਵਾ ਅਸਮ੍ਮੋਹਤੋ ਪਚ੍ਚਵੇਕ੍ਖਣਾਞਾਣੇਨੇਵ ਸਾਮਂ ਦਟ੍ਠਬ੍ਬਂ. ਤੇਨਾਹ ‘‘ਪਚ੍ਚਕ੍ਖ’’ਨ੍ਤਿ. ਪਸਟ੍ਠਾ ਦਿਟ੍ਠਿ ਸਨ੍ਦਿਟ੍ਠਿ. ਯਥਾ ਰਥੇਨ ਜਯਤੀਤਿ ਰਥਿਕੋ, ਏਵਂ ਇਦਂ ਮਗ੍ਗਬ੍ਰਹ੍ਮਚਰਿਯਂ ਸਨ੍ਦਿਟ੍ਠਿਯਾ ਜਯਤੀਤਿ ਸਨ੍ਦਿਟ੍ਠਿਕਂ. ਅਥ ਵਾ ਦਿਟ੍ਠਨ੍ਤਿ ਦਸ੍ਸਨਂ ਵੁਚ੍ਚਤਿ, ਦਿਟ੍ਠਮੇਵ ਸਨ੍ਦਿਟ੍ਠਂ, ਸਨ੍ਦਸ੍ਸਨਨ੍ਤਿ ਅਤ੍ਥੋ. ਸਨ੍ਦਿਟ੍ਠਂ ਅਰਹਤੀਤਿ ਸਨ੍ਦਿਟ੍ਠਿਕੋ ਯਥਾ ਵਤ੍ਥਯੁਗਂ ਅਰਹਤੀਤਿ ਵਤ੍ਥਯੁਗਿਕੋ. ਸਨ੍ਦਿਟ੍ਠਿਕਂ ਫਲਦਾਨਂ ਸਨ੍ਧਾਯ ਨਾਸ੍ਸ ਕਾਲੋਤਿ ਅਕਾਲਂ, ਅਕਾਲਮੇਵ ਅਕਾਲਿਕਂ, ਨ ਕਾਲਨ੍ਤਰਂ ਖੇਪੇਤ੍ਵਾ ਫਲਂ ਦੇਤਿ, ਅਤ੍ਤਨੋ ਪਨ ਪਵਤ੍ਤਿਸਮਨਨ੍ਤਰਮੇਵ ਫਲਂ ਦੇਤੀਤਿ ਅਤ੍ਥੋ. ਅਥ ਵਾ ਅਤ੍ਤਨੋ ਫਲਪ੍ਪਦਾਨੇ ਪਕਟ੍ਠੋ ਕਾਲੋ ਪਤ੍ਤੋ ਅਸ੍ਸਾਤਿ ਕਾਲਿਕੋ, ਲੋਕਿਯੋ ਕੁਸਲਧਮ੍ਮੋ, ਇਦਂ ਪਨ ਸਮਨਨ੍ਤਰਫਲਤ੍ਤਾ ਨ ਕਾਲਿਕਂ.

੪੦੦. ‘‘ਮਹਾਯਞ੍ਞਂ ਪਵਤ੍ਤਯੀ’’ਤਿਆਦੀਸੁ ਕੇਵਲਂ ਦਾਨਧਮ੍ਮਾਦੀਸੁ ਯਞ੍ਞਪਰਿਯਾਯਸਮ੍ਭਵਤੋ ‘‘ਬ੍ਰਾਹ੍ਮਣਾਨਂ ਯਞ੍ਞਾਭਾਵਤੋ’’ਤਿ ਵੁਤ੍ਤਂ. ਬ੍ਰਾਹ੍ਮਣਾ ਹਿ ‘‘ਅਗ੍ਗਿਮੁਖਾ ਦੇਵਾ’’ਤਿ ਅਗ੍ਗਿਜੁਹਨਪੁਬ੍ਬਕਂ ਯਞ੍ਞਂ ਵਿਦਹਨ੍ਤਿ. ਤੇਨਾਹ ‘‘ਅਗ੍ਗਿਜੁਹਨਪ੍ਪਧਾਨਾਤਿ ਅਤ੍ਥੋ’’ਤਿ ‘‘ਭੂਰ੍ਭੁਵ? ਸ੍ਵ?’’ ਇਤਿ ਸਾਵਿਤ੍ਤੀ ਪੁਬ੍ਬਕਤ੍ਤਾ ਮੁਖਂ ਪੁਬ੍ਬਙ੍ਗਮਂ. ‘‘ਮੁਖਮਿਵ ਮੁਖ’’ਨ੍ਤਿਆਦੀਸੁ ਵਿਯ ਇਧਾਪਿ ਪਧਾਨਪਰਿਯਾਯੋ ਮੁਖਸਦ੍ਦੋਤਿ ਦਸ੍ਸੇਨ੍ਤੋ ‘‘ਮਨੁਸ੍ਸਾਨਂ ਸੇਟ੍ਠਤੋ ਰਾਜਾ ‘ਮੁਖ’ਨ੍ਤਿ ਵੁਤ੍ਤੋ’’ਤਿ ਆਹ. ਆਧਾਰਤੋਤਿ ਓਗਾਹਨ੍ਤੀਨਂ ਨਦੀਨਂ ਆਧਾਰਭਾਵਤੋ ਪਟਿਸਰਣਤੋ ਗਨ੍ਤਬ੍ਬਟ੍ਠਾਨਭਾਵਤੋ. ਸਞ੍ਞਾਣਤੋਤਿ ਚਨ੍ਦਯੋਗਵਸੇਨ ਅਜ੍ਜ ਅਸੁਕਨਕ੍ਖਤ੍ਤਨ੍ਤਿ ਪਞ੍ਞਾਯਨਤੋ. ਆਲੋਕਕਰਣਤੋਤਿ ਨਕ੍ਖਤ੍ਤਾਨਿ ਅਭਿਭਵਿਤ੍ਵਾ ਆਲੋਕਕਰਣਤੋ. ਸੋਮ੍ਮਭਾਵਤੋਤਿ ਸੀਤਹਿਮਵਾਸੀਤਵਾਤੂਪਕ੍ਖਰਭਾਵਤੋ. ਤਪਨ੍ਤਾਨਨ੍ਤਿ ਦੀਪਸਿਖਾ ਅਗ੍ਗਿਜਾਲਾ ਅਸਨਿਵਿਚਕ੍ਕਨ੍ਤਿ ਏਵਮਾਦੀਨਂ ਵਿਜ੍ਜਲਨ੍ਤਾਨਂ. ਆਯਮੁਖਂ ਅਗ੍ਗਦਕ੍ਖਿਣੇਯ੍ਯਭਾਵੇਨ.

ਦਿਬ੍ਬਚਕ੍ਖੁ ਧਮ੍ਮਚਕ੍ਖੁ ਪਞ੍ਞਾਚਕ੍ਖੁ ਬੁਦ੍ਧਚਕ੍ਖੁ ਸਮਨ੍ਤਚਕ੍ਖੂਤਿ ਇਮੇਹਿ ਪਞ੍ਚਹਿ ਚਕ੍ਖੂਹਿ. ਤੇ ਸਰਣਸ੍ਸਾਤਿ ਤੇ ਸਰਣਸ੍ਸ ਚ, ਤੇ ਸਰਣਭਾਵਮੂਲਕਤ੍ਤਾ ਇਤਰਦ੍ਵਯਸ੍ਸ ਚ, ਯਥਾਵੁਤ੍ਤ ਤੇ-ਪਦੇਨ ਵੁਤ੍ਤਤ੍ਥਤੋ ਪਰਸ੍ਸ ਚਾਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ‘‘ਤੇ ਤੁਯ੍ਹਂ, ਇਤਰਸ੍ਸ ਚ ਸਰਣਸ੍ਸ ਅਹੋ ਆਨੁਭਾਵੋ’’ਤਿ. ਆਵੁਤ੍ਤਿਵਸੇਨ ਵਾ ਤੇ ਸਰਣਸ੍ਸਾਤਿ ਏਤ੍ਥ ਅਤ੍ਥੋ ਵਿਭਾਵੇਤਬ੍ਬੋ – ਤੁਯ੍ਹਂ ਸਰਣਭੂਤਸ੍ਸ ਚ ਇਤਰਸਰਣਸ੍ਸ ਚ ਆਨੁਭਾਵੋਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਸੇਲਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

੩. ਅਸ੍ਸਲਾਯਨਸੁਤ੍ਤਵਣ੍ਣਨਾ

੪੦੧. ਅਞ੍ਞਮਞ੍ਞਵਿਸਿਟ੍ਠਤ੍ਤਾ ਵਿਸਦਿਸਂ ਰਜ੍ਜਂ ਵਿਰਜ੍ਜਂ, ਵਿਰਜ੍ਜਤੋ ਆਗਤਾ, ਤਤ੍ਥ ਜਾਤਾਤਿ ਵਾ ਵੇਰਜ੍ਜਕਾ, ਏਵਂ ਜਾਤਾ ਖੋ ਪਨ ਤੇ, ਯਸ੍ਮਾ ਵਤ੍ਥਾਭਰਣਾਦਿਵਿਭਾਗੇਨ ਨਾਨਪ੍ਪਕਾਰਾ ਹੋਨ੍ਤਿ, ਤਸ੍ਮਾ ਵੁਤ੍ਤਂ ‘‘ਨਾਨਾਵੇਰਜ੍ਜਕਾਨ’’ਨ੍ਤਿ. ਅਟ੍ਠਕਥਾਯਂ ਪਨ ਵੇਰਜ੍ਜਸ੍ਸੇਵ ਵਸੇਨ ਨਾਨਪ੍ਪਕਾਰਤਾ ਵੁਤ੍ਤਾ. ਯਞ੍ਞੁਪਾਸਨਾਦਿਨਾਤਿ ਯਞ੍ਞਾਨੁਭਵਨਮਨ੍ਤਜ੍ਝੇਨਦਕ੍ਖਿਣਪਰਿਯੇਸਨਾਦਿਨਾ. ਚਤੁਵਣ੍ਣਸਾਧਾਰਣਨ੍ਤਿ ਖਤ੍ਤਿਯਾਦੀਨਂ ਚਤੁਨ੍ਨਂ ਵਣ੍ਣਾਨਂ ਸਾਧਾਰਣਂ ਸਂਸਾਰਸੁਦ੍ਧਿਪਾਪਤਸ੍ਸਨਂ. ਨ੍ਹਾਨਸੁਦ੍ਧਿਯਾਤਿ ਤਿਤ੍ਥਸਮੁਦ੍ਦਖਾਤੇਸੁ ਮਨ੍ਤਜਪ੍ਪਨਪੁਬ੍ਬਕਂ ਸਾਯਂਤਤਿਯਉਦਕੋਰੋਹਨਾਦਿਨ੍ਹਾਨਸੁਦ੍ਧਿਯਾ. ਭਾਵਨਾਸੁਦ੍ਧਿਯਾਤਿ ਪਰਮਜੋਤਿਭੂਤਾਯ ਪੁਰਿਸਭਾਵਨਾਸਙ੍ਖਾਤਾਯ ਸੁਦ੍ਧਿਯਾ. ਵਾਪਿਤਸਿਰੋਤਿ ਓਰੋਪਿਤਕੇਸੋ. ਤਮੇਵ ਹਿ ਸਿਰੋ ਵਾਪਿਤਨ੍ਤਿ ਵੁਚ੍ਚਤਿ.

ਸਭਾਵਵਾਦੀਤਿ ਯਥਾਭੂਤਵਾਦੀ. ਪਬ੍ਬਜਨ੍ਤਾਤਿ ਬ੍ਰਾਹ੍ਮਣਪਬ੍ਬਜ੍ਜਂ ਉਪਗਚ੍ਛਨ੍ਤਾ, ਤਸ੍ਮਾ ਬ੍ਰਾਹ੍ਮਣਾਨਂ ਪਬ੍ਬਜ੍ਜਾਵਿਧਾਨਂ ਸਿਕ੍ਖਨ੍ਤੇਨ ਭੋਤਾ ‘‘ਬ੍ਰਾਹ੍ਮਣਾਵ ਸੁਜ੍ਝਨ੍ਤਿ, ਨੋ ਅਬ੍ਰਾਹ੍ਮਣਾ’’ਤਿ ਅਯਂ ਵਿਧਿ ਸਹੇਤੁਕੋ ਸਉਪਾਦਾਨੋ ਸਕ੍ਕਚ੍ਚਂ ਉਗ੍ਗਹਿਤੋ, ਤਸ੍ਮਾ ਤੁਯ੍ਹਂ ਪਰਾਜਯੋ ਨਤ੍ਥਿ…ਪੇ… ਏਵਮਾਹਂਸੁ.

੪੦੨. ਲਦ੍ਧਿਭਿਨ੍ਦਨਤ੍ਥਨ੍ਤਿ ‘‘ਬ੍ਰਾਹ੍ਮਣਾਵ ਬ੍ਰਹ੍ਮੁਨੋ ਪੁਤ੍ਤਾ ਓਰਸਾ ਮੁਖਤੋ ਜਾਤਾ ਬ੍ਰਹ੍ਮਜਾ’’ਤਿ ਏਵਂ ਪਵਤ੍ਤਲਦ੍ਧਿਯਾ ਵਿਨਿਵੇਠਨਤ੍ਥਂ. ਪੁਤ੍ਤਪਟਿਲਾਭਤ੍ਥਾਯਾਤਿ ‘‘ਏਵਂ ਮਯਂ ਪੇਤ੍ਤਿਕਂ ਇਣਧਾਰਂ ਸੋਧੇਯ੍ਯਾਮਾ’’ਤਿ ਲਦ੍ਧਿਯਂ ਠਤ੍ਵਾ ਪੁਤ੍ਤਪਟਿਲਾਭਤ੍ਥਾਯ. ਅਯਞ੍ਹੇਤ੍ਥ ਅਧਮ੍ਮਿਕਾਨਂ ਬ੍ਰਾਹ੍ਮਣਾਨਂ ਅਜ੍ਝਾਸਯੋ. ਨੇਸਨ੍ਤਿ ਬ੍ਰਾਹ੍ਮਣਾਨਂ. ਸਚ੍ਚਵਚਨਂ ਸਿਯਾਤਿ ‘‘ਬ੍ਰਹ੍ਮੁਨੋ ਪੁਤ੍ਤਾ’’ਤਿਆਦਿਵਚਨਂ ਸਚ੍ਚਂ ਯਦਿ ਸਿਯਾ ਬ੍ਰਾਹ੍ਮਣੀਨਂ…ਪੇ… ਭਵੇਯ੍ਯ, ਨ ਚੇਤਂ ਅਤ੍ਥਿ. ਮਹਾਬ੍ਰਹ੍ਮੁਨੋ ਮੁਖਤੋ ਜਾਤੋਤਿ ਵਾਦਚ੍ਛੇਦਕਵਾਦੋ ਮੁਖਤੋਜਾਤਚ੍ਛੇਕਵਾਦੋ. ਅਸ੍ਸਲਾਯਨੋਵਿਞ੍ਞੂ ਜਾਤਿਕੋ ‘‘ਨਿਰਕ੍ਖੇਪਂ ਸਮਣੇਨ ਗੋਤਮੇਨ ਵੁਤ੍ਤ’’ਨ੍ਤਿ ਜਾਨਨ੍ਤੋਪਿ ਸਹਗਤਾਨਂ ਬ੍ਰਾਹ੍ਮਣਾਨਂ ਚਿਤ੍ਤਾਨੁਰਕ੍ਖਣਤ੍ਥਂ ‘‘ਕਿਞ੍ਚਾਪਿ ਭਵਂ ਗੋਤਮੋ’’ਤਿਆਦਿਮਾਹ.

੪੦੩. ਇਦਾਨਿ ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋਤਿ ਵਾਦਂ ਭਿਨ੍ਦਿਤੁਂ ‘‘ਸੁਤਂ ਤੇ ਯੋਨਕਕਮ੍ਬੋਜੇਸੂ’’ਤਿਆਦਿ ਆਰਦ੍ਧਂ. ਯਦਿ ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ, ਸਬ੍ਬਤ੍ਥ ਬ੍ਰਾਹ੍ਮਣੋਵ ਸੇਟ੍ਠੋ ਭਵੇਯ੍ਯ, ਅਥ ਕਸ੍ਮਾ ਯੋਨਕਕਮ੍ਬੋਜਾਦਿਜਨਪਦੇਸੁ ਬ੍ਰਾਹ੍ਮਣਾਨਂ ਸੇਟ੍ਠਭਾਵੋ ਨਤ੍ਥਿ? ਏਵਞ੍ਹਿ ਤਤ੍ਥ ਵਣ੍ਣਾ, ਤਸ੍ਮਾ ‘‘ਬ੍ਰਾਹ੍ਮਣੋਵ ਸੇਟ੍ਠੋ’’ਤਿ ਲਦ੍ਧਿਮਤ੍ਤਮੇਤਂ. ਤੇਸੁ ਹਿ ਜਨਪਦੇਸੁ ਜਨਾ ਏਕਜ੍ਝਂ ਸਨ੍ਨਿਪਤਿਤ੍ਵਾ ਸਮ੍ਮਨ੍ਤਯਿਤ੍ਵਾ ਕਤਿਕਂ ਅਕਂਸੁ, ਦਾਸਂ ਸਾਮਿਕਂ ਕਤ੍ਵਾ ਇਤਰੇ ਸਬ੍ਬੇ ਤਂ ਪੂਜੇਤ੍ਵਾ ਤਸ੍ਸ ਵਸੇ ਵਤ੍ਤਨ੍ਤਿ, ਯੋ ਤੇਸਂ ਅਯ੍ਯੋ ਹੋਤਿ ਇਤਰੇ ਸਬ੍ਬੇ ਤਸ੍ਸ ਦਾਸਾ ਹੋਨ੍ਤਿ, ਤੇ ਕਤਿਪਯਸਂਵਚ੍ਛਰਾਤਿਕ੍ਕਮੇਨ ਤਸ੍ਸ ਕਿਞ੍ਚਿ ਦੋਸਂ ਦਿਸ੍ਵਾ ਤਂ ਤਤੋ ਠਾਨਤੋ ਅਪਨੇਤ੍ਵਾ ਅਞ੍ਞਂ ਠਪੇਨ੍ਤਿ, ਇਤਿ ਸੋ ਅਯ੍ਯੋ ਹੁਤ੍ਵਾ ਦਾਸੋ ਹੋਤਿ, ਇਤਰੋ ਦਾਸੋ ਹੁਤ੍ਵਾ ਅਯ੍ਯੋ ਹੋਤਿ, ਏਵਂ ਤਾਵ ਕੇਚਿ ‘‘ਅਯ੍ਯੋ ਹੁਤ੍ਵਾ ਦਾਸੋ ਹੋਤਿ, ਦਾਸੋ ਹੁਤ੍ਵਾ ਅਯ੍ਯੋ ਹੋਤੀ’’ਤਿ ਏਤ੍ਥ ਅਤ੍ਥਂ ਵਦਨ੍ਤਿ. ਅਟ੍ਠਕਥਾਯਂ ਪਨ ਪੁਰਿਮਵਸੇਨੇਵ ਤਮਤ੍ਥਂ ਦਸ੍ਸੇਤੁਂ ‘‘ਬ੍ਰਾਹ੍ਮਣੋ ਸਭਰਿਯੋ’’ਤਿਆਦਿ ਵੁਤ੍ਤਂ. ਵਯਪ੍ਪਤ੍ਤੇ ਪੁਤ੍ਤੇ ਅਸਤੀਤਿ ਇਦਂ ਵਕ੍ਖਮਾਨਸ੍ਸ ਦਾਰਕਸ੍ਸ ਦਾਯਜ੍ਜਸਾਮਿਕਭਾਵਸ੍ਸ ਤਾਵ ਦਸ੍ਸਨਂ. ਮਾਤਿਤੋ ਸੁਦ੍ਧੋਤਿ ਏਤ੍ਥ ਯੋ ਮਾਤਿਤੋ ਸੁਦ੍ਧਤ੍ਤਾ ਅਯ੍ਯੋ, ਪਿਤਿਤੋ ਅਸੁਦ੍ਧਤ੍ਤਾ ਦਾਸੋ ਹੋਤਿ, ਸੋ ਏਵ ਪਿਤਿਤੋ ਅਸੁਦ੍ਧਤ੍ਤਾ ਦਾਸੋ ਹੁਤ੍ਵਾ ਮਾਤਿਤੋ ਅਯ੍ਯੋ ਹੋਤੀਤਿ ਜਾਤਿਂ ਸਮ੍ਭੇਦੇਤਿ. ਸੋਵ ਸਬ੍ਬੇਨ ਸਬ੍ਬਂ ਹੋਤੀਤਿ ਨ ਸਕ੍ਕਾ ਵਤ੍ਤੁਨ੍ਤਿ ਅਪਰੇ. ਕੋ ਥਾਮੋਤਿ ਮਹਨ੍ਤੇ ਲੋਕਸਨ੍ਨਿਵਾਸੇ ਅਨਮਤਗ੍ਗੇ ਅਤੀਤੇ ਕਾਲੇ ਇਤ੍ਥੀਨਂ ਵਾ ਚਿਤ੍ਤੇ ਅਨਵਟ੍ਠਿਤੇ ਦਾਸਾ ਦਾਸਾ ਏਵ ਹੋਨ੍ਤਿ, ਅਯ੍ਯਾ ਅਯ੍ਯਾ ਏਵ ਹੋਨ੍ਤੀਤਿ ਏਤ੍ਥ ਕੋ ਏਕਨ੍ਤਿਕੋ ਸਹੇਤੁਕੋ ਅਵਸ੍ਸਯੋ, ਤਸ੍ਸ ਸਾਧਕੋ ਸਿਦ੍ਧਨ੍ਤੋ, ਕਿਂ ਨਿਦਸ੍ਸਨਨ੍ਤਿ ਅਤ੍ਥੋ.

੪੦੪. ਸੁਕ੍ਕਚ੍ਛੇਦਕਵਾਦੋ ਨਾਮਾਤਿ ‘‘ਬ੍ਰਾਹ੍ਮਣੋਵ ਸੁਕ੍ਕੋ ਵਣ੍ਣੋ’’ਤਿ ਏਵਂ ਵੁਤ੍ਤੋ ਸੁਕ੍ਕਚ੍ਛੇਦਕਵਾਰੋ ਨਾਮ.

੪੦੮. ਸਬ੍ਬਸ੍ਮਿਂ ਅਗ੍ਗਿਕਿਚ੍ਚਂ ਕਰੋਨ੍ਤੇਤਿ ਏਤੇਨ ਯਥਾ ਯਤੋ ਕੁਤੋਚਿ ਨਿਸ੍ਸਯਤੋ ਉਪ੍ਪਨ੍ਨੋ ਅਗ੍ਗਿਉਪਾਦਾਨਸਮ੍ਪਨ੍ਨੋ ਅਗ੍ਗਿਕਿਚ੍ਚਂ ਕਰੋਤਿ, ਏਵਂ ਯਸ੍ਮਿਂ ਕਸ੍ਮਿਞ੍ਚਿ ਦਾਸਕੁਲੇ ਜਾਤੋ ਉਪਨਿਸ੍ਸਯਸਮ੍ਪਨ੍ਨੋ ਸਮ੍ਮਾਪਟਿਪਜ੍ਜਮਾਨੋ ਸਂਸਾਰਤੋ ਸੁਜ੍ਝਤਿ ਏਵਾਤਿ ਦਸ੍ਸੇਤਿ.

੪੦੯. ਪਾਦਸਿਕਵਣ੍ਣੋਤਿ ਅਨ੍ਤਰਾਲ਼ਵਣ੍ਣੋ. ਏਤੇਸਨ੍ਤਿ ਖਤ੍ਤਿਯਕੁਮਾਰੇਨ ਬ੍ਰਾਹ੍ਮਣਕਞ੍ਞਾਯ ਉਪ੍ਪਨ੍ਨਪੁਤ੍ਤੋ, ਬ੍ਰਾਹ੍ਮਣਕੁਮਾਰੇਨ ਖਤ੍ਤਿਯਕਞ੍ਞਾਯ ਉਪ੍ਪਨ੍ਨਪੁਤ੍ਤੋਤਿ ਏਤੇਸਂ ਦ੍ਵਿਨ੍ਨਂ ਮਾਣਵਕਾਨਂ. ਮਤਕਭਤ੍ਤੇਤਿ ਮਤੇ ਉਦ੍ਦਿਸ੍ਸ ਕਤਭਤ੍ਤੇ. ਥਾਲਿਪਾਕੇਤਿ ਕਤਮਙ੍ਗਲਭਤ੍ਤੇ.

੪੧੦. ਤੁਮ੍ਹੇਤਿ ਜਾਤਿਸਾਮਞ੍ਞਤੋ ਮਾਣਵਂ ਬ੍ਰਾਹ੍ਮਣੇਹਿ ਸਦ੍ਧਿਂ ਏਕਜ੍ਝਂ ਸਙ੍ਗਣ੍ਹਨ੍ਤੋ ਆਹ. ਕੋ ਨੁ ਖੋਤਿ ਅਵਂਸਿਰੋ ਇਸਿਵਾਦੋ, ਤੇਸਂ ਬ੍ਰਾਹ੍ਮਣੀਸੀਨਂ ਅਸਾਮਤ੍ਥਿਯਦਸ੍ਸਨੇਨ ਜਾਤਿਯਾ ਅਪ੍ਪਮਾਣਤਂ ਵਿਭਾਵੇਤੁਂ ਗਾਮਦਾਰਕਵੇਸੇਨ ਉਪਗਚ੍ਛਿ. ਤੇਨ ਵੁਤ੍ਤਂ ‘‘ਗਾਮਣ੍ਡਲਰੂਪੋ ਵਿਯਾ’’ਤਿ. ਕੋਣ੍ਡਦਮਕੋਤਿ ਅਦਨ੍ਤਦਮਕੋ.

੪੧੧. ਜਨੇਤੀਤਿ ਜਨਿਕਾ ਜਨੇਤ੍ਤਿ. ਜਨਕੋ ਪਿਤਾਤਿ ਏਤ੍ਥਾਪਿ ਏਸੇਵ ਨਯੋ. ਗਨ੍ਧਬ੍ਬਪਞ੍ਹਨ੍ਤਿ ਗਨ੍ਧਬ੍ਬਸ੍ਸ ਮਾਤੁਕੁਚ੍ਛਿਯਂ ਉਪ੍ਪਜ੍ਜਨਕਸਤ੍ਤਸ੍ਸ ਖਤ੍ਤਿਯਭਾਵਾਦਿਪੁਚ੍ਛਂ. ਦਬ੍ਬਿਗਹਣਸਿਪ੍ਪਮ੍ਪਿ ਏਕਾ ਵਿਜ੍ਜਾ ਵੇਦਿਤਬ੍ਬਾ. ਤਤ੍ਥ ਕਿਰ ਕੁਸਲੋ ਯਂ ਕਿਞ੍ਚਿ ਆਹਾਰੂਪਗਪਣ੍ਣਪੁਪ੍ਫਫਲਬੀਜਂ ਅਨ੍ਤਮਸੋ ਏਲਾਲੁਕਮ੍ਪਿ ਗਹੇਤ੍ਵਾ ਭੇਸਜ੍ਜੇਹਿ ਯੋਜੇਤ੍ਵਾ ਪਚਨ੍ਤੋ ਸਪ੍ਪਿਮਧੁਫਾਣਿਤੇਹਿ ਸਮਾਨਰਸਂ ਕਤ੍ਵਾ ਸਮ੍ਪਾਦੇਤੁਂ ਸਕ੍ਕੋਤਿ, ਪੁਣ੍ਣੋਪਿ ਤਾਦਿਸੋ, ਤੇਨ ਞਾਤਂ ਤ੍ਵਂ ਦਬ੍ਬਿਗਹਣਸਿਪ੍ਪਮਤ੍ਤਮ੍ਪਿ ਨ ਜਾਨਾਸੀਤਿ ਸਮ੍ਬਨ੍ਧੋ. ਸਦ੍ਧੋਤਿ ਕਮ੍ਮਫਲਸਦ੍ਧਾਯ ਸਦ੍ਧੋ, ਪੋਥੁਜ੍ਜਨਿਕੇਨੇਵ ਰਤਨਤ੍ਤਯਪਸਾਦੇਨ ਪਸਨ੍ਨੋ. ਤੇਨੇਵਾਹ – ‘‘ਉਪਾਸਕਂ ਮਂ ਭਵਂ…ਪੇ… ਸਰਣਂ ਗਤ’’ਨ੍ਤਿ.

ਅਸ੍ਸਲਾਯਨਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

੪. ਘੋਟਮੁਖਸੁਤ੍ਤਵਣ੍ਣਨਾ

੪੧੨. ਖੇਮਿਯਾ ਨਾਮ ਰਞ੍ਞੋ ਦੇਵਿਯਾ ਰੋਪਿਤਤ੍ਤਾ ਤਂ ਅਮ੍ਬਵਨਂ ਖੇਮਿਯਮ੍ਬਵਨਨ੍ਤਿ ਵੁਚ੍ਚਤੀਤਿ ਵਦਨ੍ਤਿ. ਧਮ੍ਮਿਕੋਤਿ ਧਮ੍ਮਯੁਤ੍ਤੋ ਸਬ੍ਬਸੋਵ ਅਧਮ੍ਮਂ ਪਹਾਯ ਧਮ੍ਮੇ ਠਿਤੋ. ਪਰਿਬ੍ਬਜਤਿ ਪਬ੍ਬਜਤਿ ਏਤੇਨਾਤਿ ਪਰਿਬ੍ਬਜੋ, ਘਰਾਵਾਸਤੋ ਨਿਕ੍ਖਮਨਪੁਬ੍ਬਕਂ ਲਿਙ੍ਗਗ੍ਗਹਣਵਸੇਨ ਸੀਲਸਮਾਦਾਨਂ. ਏਤ੍ਥਾਤਿ ਏਤਸ੍ਮਿਂ ਪਰਿਬ੍ਬਜੇ. ਸਭਾਵੋਤਿ ਤਂ ਪਰਿਬ੍ਬਾਜਨਿਯਂ, ਤੇਹਿ ਤੇਹਿ ਪਰਿਬ੍ਬਾਜਕੇਹਿ ਅਨੁਟ੍ਠਾਤਬ੍ਬੋ ਪਟਿਪਤ੍ਤਿਧਮ੍ਮਸਙ੍ਖਾਤੋ ਸਭਾਵੋ. ਧਮ੍ਮੋਵ ਪਮਾਣਨ੍ਤਿ ਏਤੇਨ ਮਯਂ ਅਹਿਰਿਮਨਾ ਚਿਤ੍ਤਸ੍ਸ ਯਥਾਉਪਟ੍ਠਿਤਂ ਕਥੇਮ, ਤਸ੍ਮਾ ਤਂ ਅਪ੍ਪਮਾਣਂ, ਯੋ ਪਨੇਤ੍ਥ ਅਵਿਤਥੋ ਧਮ੍ਮੋ, ਤਦੇਵ ਪਮਾਣਂ. ਅਧਿਗਤਪਟਿਪਤ੍ਤਿਸਙ੍ਖਾਤੋ ਸਭਾਵੋ ਅਤ੍ਥਿ, ਤਸ੍ਸ ਤੁਮ੍ਹੇਹਿ ਤੁਮ੍ਹੇਹਿ ਬਹੁਨਾ ਨਾਨਾਸਨ੍ਦਸ੍ਸਨਾਦਿ ਕਮ੍ਮੇਨ ਇਧ ਭਵਿਤਬ੍ਬਂ, ਬਹੁਦੇਵੇਤ੍ਥ ਵਤ੍ਤਬ੍ਬਨ੍ਤਿ ਅਧਿਪ੍ਪਾਯੋ.

੪੧੪. ਸਾਰਤ੍ਤਰਤ੍ਤਾਤਿ ਸਾਰਜ੍ਜਨਵਸੇਨ ਰਤ੍ਤਾ, ਬਹੁਲਰਾਗਵਸੇਨ ਅਭਿਰਤ੍ਤਾਤਿ ਅਤ੍ਥੋ. ਅਤ੍ਤਨਾ ਞਾਪੇਤਬ੍ਬਮਤ੍ਥਂ ਅਨੁਗ੍ਗਹਾਪੇਤਿ ਬੋਧੇਤੀਤਿ ਅਨੁਗ੍ਗਹੋ, ਞਾਪਿਤਕਾਰਣਂ, ਸਹ ਅਨੁਗ੍ਗਹੇਨਾਤਿ ਸਾਨੁਗ੍ਗਹਾ. ਤੇਨਾਹ ‘‘ਸਕਾਰਣਾ’’ਤਿ. ਕਿਂ ਪਨ ਤਂ ਕਾਰਣਂ? ਇਮਸ੍ਸਾਧਿਪ੍ਪਾਯੋ ‘‘ਨਤ੍ਥਿ ਧਮ੍ਮਿਕੋ ਪਰਿਬ੍ਬਜੋ’’ਤਿ ਮਯਾ ਵੁਤ੍ਤੋ, ਅਦ੍ਧਾ ਪਨਾਯਸ੍ਮਾ ਉਦੇਨੋ ਯਾਥਾਵਤੋ ਧਮ੍ਮਿਕਂ ਪਰਿਬ੍ਬਜਂ ਮੇ ਆਚਿਕ੍ਖਤੀਤਿ. ਤੇਨਾਹ ‘‘ਵੁਤ੍ਤਞ੍ਹੇਤ’’ਨ੍ਤਿਆਦਿ.

੪੨੧. ਸਬ੍ਬਮਿਦਂ ਥਾਵਰਜਙ੍ਗਮਂ ਪੁਰਿਸਕਤਂ, ਤਸ੍ਮਾ ਯਂ ਕਿਞ੍ਚਿ ਕਤ੍ਵਾ ਅਤ੍ਤਾ ਪੋਸੇਤਬ੍ਬੋ ਰਕ੍ਖਿਤਬ੍ਬੋਤਿ ਲੋਕਾਯਤਨਿਸ੍ਸਿਤੋ ਨੀਤਿਮਗ੍ਗੋ ਘੋਟਮੁਖਕਨ੍ਤੋ, ਤਸ੍ਮਾ ਆਹ ‘‘ਏਤਸ੍ਸ ਕਿਰ ਜਾਨਨਸਿਪ੍ਪੇ’’ਤਿਆਦਿ. ਸਗ੍ਗੇ ਨਿਬ੍ਬਤ੍ਤੋ ਨਾਮ ਨਤ੍ਥਿ ਅਕਤ੍ਤਬ੍ਬਮੇਵ ਕਰਣਤੋ. ਦੇਵਲੋਕਪਰਿਯਾਪਨ੍ਨਧਨਂ ਮਨੁਸ੍ਸਾਨਂ ਉਪਕਪ੍ਪਪੁਞ੍ਞਾਭਾਵਤੋ ਪੁਬ੍ਬੇ ਅਤ੍ਤਨਾ ਨਿਹਿਤਧਨਂ ‘‘ਅਸੁਕੇ ਚਾ’’ਤਿ ਆਚਿਕ੍ਖਿਤ੍ਵਾ ਗਤੋ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਘੋਟਮੁਖਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

੫. ਚਙ੍ਕੀਸੁਤ੍ਤਵਣ੍ਣਨਾ

੪੨੨. ਤਸ੍ਮਿਨ੍ਤਿ ਸਾਲਵਨੇ. ਉਤ੍ਤਰੇਨ ਓਪਾਸਾਦਨ੍ਤਿ ਓਪਾਸਾਦਗਾਮਸ੍ਸ ਉਤ੍ਤਰਦਿਸਾਯਂ. ਉਤ੍ਤਰੇਨਾਤਿ ਏਨ-ਸਦ੍ਦਯੋਗੇਨ ਹਿ ਓਪਾਸਾਦਨ੍ਤਿ ਉਪਯੋਗਵਚਨਂ. ਅਜ੍ਝਾਵਸਤੀਤਿ ਏਤ੍ਥ ਅਧਿ-ਆ-ਸਦ੍ਦਾਨਂ ਅਨਤ੍ਥਨ੍ਤਰਤਂ ਹਦਯੇ ਕਤ੍ਵਾ ਆਹ ‘‘ਵਸਤੀ’’ਤਿ. ਇਦਾਨਿ ਤੇਸਂ ਅਤ੍ਥਵਿਸੇਸਭਾਵਿਤਂ ਦਸ੍ਸੇਨ੍ਤੋ ‘‘ਅਭਿਭਵਿਤ੍ਵਾ ਵਾ ਆਵਸਤੀ’’ਤਿਆਦਿਮਾਹ. ਏਤ੍ਥਾਤਿ ਓਪਾਸਾਦਪਦੇ. ਸਤ੍ਤੁਸ੍ਸਦਨ੍ਤਿਆਦੀਸੁ ਪਨ ਕਥਨ੍ਤਿ ਆਹ – ‘‘ਤਸ੍ਸ ਅਨੁਪ੍ਪਯੋਗਤ੍ਤਾਵ ਸੇਸਪਦੇਸੂ’’ਤਿ. ਉਪ-ਅਨੁ-ਅਧਿ-ਇਤਿ-ਏਵਂ-ਪੁਬ੍ਬਕੇ ਵਸਨਕਿਰਿਯਯਾਟ੍ਠਾਨੇ ਉਪਯੋਗਵਚਨਮੇਵ ਪਾਪੁਣਾਤੀਤਿ ਸਦ੍ਦਵਿਦੂ ਇਚ੍ਛਨ੍ਤੀਤਿ ਆਹ ‘‘ਲਕ੍ਖਣਂ ਸਦ੍ਦਸਤ੍ਥਤੋ ਪਰਿਯੇਸਿਤਬ੍ਬ’’ਨ੍ਤਿ. ਤਥਾ ਹਿ ਵੁਤ੍ਤਂ ‘‘ਉਪਸਗ੍ਗਵਸੇਨ ਪਨੇਤ੍ਥ ਭੁਮ੍ਮਤ੍ਥੇ ਉਪਯੋਗਵਚਨਂ ਵੇਦਿਤਬ੍ਬ’’ਨ੍ਤਿ. ਉਸ੍ਸਦਤਾ ਨਾਮੇਤ੍ਥ ਬਹੁਲਤਾਤਿ ਤਂ ਬਹੁਲਤਂ ਦਸ੍ਸੇਤੁਂ ‘‘ਬਹੁਜਨ’’ਨ੍ਤਿਆਦਿ ਵੁਤ੍ਤਂ. ਆਵਜ੍ਜਿਤ੍ਵਾਤਿ ਪਰਿਕ੍ਖਿਪਿਤ੍ਵਾ.

ਰਞ੍ਞਾ ਵਿਯ ਭੁਞ੍ਜਿਤਬ੍ਬਨ੍ਤਿ ਵਾ ਰਾਜਭੋਗ੍ਗਂ. ਰਞ੍ਞੋ ਦਾਯਭੂਤਨ੍ਤਿ ਕੁਲਪਰਮ੍ਪਰਾਯ ਭੋਗ੍ਗਭਾਵੇਨ ਰਞ੍ਞਾ ਲਦ੍ਧਦਾਯਭੂਤਂ. ਤੇਨਾਹ ‘‘ਦਾਯਜ੍ਜਨ੍ਤਿ ਅਤ੍ਥੋ’’ਤਿ. ਰਾਜਨੀਹਾਰੇਨ ਪਰਿਭੁਞ੍ਜਿਤਬ੍ਬਤੋ ਉਦ੍ਧਂ ਪਰਿਭੋਗਲਾਭਸ੍ਸ ਸੇਟ੍ਠਦੇਯ੍ਯਤਾ ਨਾਮ ਨਤ੍ਥੀਤਿ ਆਹ – ‘‘ਛਤ੍ਤਂ ਉਸ੍ਸਾਪੇਤ੍ਵਾ ਰਾਜਸਙ੍ਖੇਪੇਨ ਪਰਿਭੁਞ੍ਜਿਤਬ੍ਬ’’ਨ੍ਤਿ. ਤਿਤ੍ਥਪਬ੍ਬਤਾਦੀਸੂਤਿ ਨਦੀਤਿਤ੍ਥਪਬ੍ਬਤਪਾਦਗਾਮਦ੍ਵਾਰਅਟਵੀਮੁਖਾਦੀਸੁ. ਨਿਸ੍ਸਟ੍ਠਪਰਿਚ੍ਚਤ੍ਤਨ੍ਤਿ ਮੁਤ੍ਤਚਾਗਵਸੇਨ ਪਰਿਚ੍ਚਤ੍ਤਂ ਕਤ੍ਵਾ. ਏਤੇਸਂ ਬ੍ਰਾਹ੍ਮਣਗਹਪਤਿਕਾਨਂ.

੪੨੩. ਤਿ ਸਨ੍ਨਿਪਤਿਤਾ. ਯੋ ਕੋਚਿ ਵਿਞ੍ਞੂਨਂ ਇਚ੍ਛਿਤੋ ਪਞ੍ਹੋ, ਤਸ੍ਸ ਪੁਚ੍ਛਿਤਸ੍ਸ ਯਾਥਾਵਤੋ ਕਥਨਸਮਤ੍ਥੋ ਪੁਚ੍ਛਿਤਪਞ੍ਹਬ੍ਯਾਕਰਣਸਮਤ੍ਥੋ.ਕੁਲਾਪਦੇਸਾਦਿਨਾ ਮਹਤੀ ਮਤ੍ਤਾ ਏਤਸ੍ਸਾਤਿ ਮਹਾਮਤ੍ਤੋ.

੪੨੪. ਤੇਤਿ ‘‘ਨਾਨਾਵੇਰਜ੍ਜਕਾ’’ਤਿ ਵੁਤ੍ਤਬ੍ਰਾਹ੍ਮਣਾ. ‘‘ਉਭਤੋ ਸੁਜਾਤੋ’’ਤਿ (ਦੀ. ਨਿ. ਟੀ. ੧.੩੦੩; ਅ. ਨਿ. ਟੀ. ੩.੫.੧੩੪) ਏਤ੍ਤਕੇ ਵੁਤ੍ਤੇ ਯੇਹਿ ਕੇਹਿਚਿ ਦ੍ਵੀਹਿ ਭਾਗੇਹਿ ਸੁਜਾਤਤਾ ਵਿਞ੍ਞਾਯੇਯ੍ਯ, ਸੁਜਾਤਸਦ੍ਦੋ ਚ ‘‘ਸੁਜਾਤੋ ਚਾਰੁਦਸ੍ਸਨੋ’’ਤਿਆਦੀਸੁ (ਮ. ਨਿ. ੨.੩੯੯; ਸੁ. ਨਿ. ੫੫੩; ਥੇਰਗਾ. ੮੧੮) ਆਰੋਹਪਰਿਣਾਹਸਮ੍ਪਤ੍ਤਿਪਰਿਯਾਯੋਤਿ ਜਾਤਿਵਸੇਨੇਵ ਸੁਜਾਤਤਂ ਵਿਭਾਵੇਤੁਂ ‘‘ਮਾਤਿਤੋ ਚ ਪਿਤਿਤੋ ਚਾ’’ਤਿ ਵੁਤ੍ਤਂ. ਅਨੋਰਸਪੁਤ੍ਤਵਸੇਨਪਿ ਲੋਕੇ ਮਾਤੁਪਿਤੁਸਮਞ੍ਞਾ ਦਿਸ੍ਸਤਿ, ਇਧ ਪਨਸ੍ਸ ਓਰਸਪੁਤ੍ਤਵਸੇਨੇਵ ਇਚ੍ਛੀਯਤੀਤਿ ਦਸ੍ਸੇਤੁਂ ‘‘ਸਂਸੁਦ੍ਧਗਹਣੀਕੋ’’ਤਿ ਵੁਤ੍ਤਂ. ਪਿਤਾ ਚ ਮਾਤਾ ਚ ਪਿਤਰੋ, ਪਿਤੂਨਂ ਪਿਤਰੋ ਪਿਤਾਮਹਾ, ਤੇਸਂ ਯੁਗੋ ਪਿਤਾਮਹਯੁਗੋ, ਤਸ੍ਮਾ ਯਾਵ ਸਤ੍ਤਮਾ ਪਿਤਾਮਹਯੁਗਾਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਯੁਗਸਦ੍ਦੋ ਚੇਤ੍ਥ ਏਕਸੇਸਨਯੇਨ ਦਟ੍ਠਬ੍ਬੋ ‘‘ਯੁਗੋ ਚ ਯੁਗੋ ਚ ਯੁਗਾ’’ਤਿ. ਏਵਞ੍ਹਿ ਤਤ੍ਥ ਤਤ੍ਥ ਦ੍ਵਿਨ੍ਨਂ ਗਹਿਤਮੇਵ ਹੋਤਿ. ਤੇਨਾਹ – ‘‘ਤਤੋ ਉਦ੍ਧਂ ਸਬ੍ਬੇਪਿ ਪੁਬ੍ਬਪੁਰਿਸਾ ਪਿਤਾਮਹਗ੍ਗਹਣੇਨੇਵ ਗਹਿਤਾ’’ਤਿ. ਪੁਰਿਸਗ੍ਗਹਣਞ੍ਚੇਤ੍ਥ ਉਕ੍ਕਟ੍ਠਨਿਦ੍ਦੇਸਵਸੇਨ ਕਤਨ੍ਤਿ ਦਟ੍ਠਬ੍ਬਂ. ਏਵਞ੍ਹਿ ‘‘ਮਾਤਿਤੋ’’ਤਿ ਪਾਲ਼ਿਵਚਨਂ ਸਮਤ੍ਥਿਤਂ ਹੋਤਿ. ਅਕ੍ਖਿਤ੍ਤੋਤਿ ਅਪ੍ਪਤ੍ਤਖੇਪੋ. ਅਨਵਕ੍ਖਿਤ੍ਤੋਤਿ ਸਦ੍ਧਥਾਲਿਪਾਕਾਦੀਸੁ ਨ ਅਵਕ੍ਖਿਤ੍ਤੋ. ਜਾਤਿਵਾਦੇਨਾਤਿ ਹੇਤੁਮ੍ਹਿ ਕਰਣਵਚਨਨ੍ਤਿ ਦਸ੍ਸੇਤੁਂ ‘‘ਕੇਨ ਕਾਰਣੇਨਾ’’ਤਿਆਦਿ ਵੁਤ੍ਤਂ. ਏਤ੍ਥ ਚ ਉਭਤੋ…ਪੇ… ਪਿਤਾਮਹਯੁਗਾਤਿ ਏਤੇਨ ਬ੍ਰਾਹ੍ਮਣਸ੍ਸ ਯੋਨਿਦੋਸਾਭਾਵੋ ਦਸ੍ਸਿਤੋ ਸਂਸੁਦ੍ਧਗਹਣਿਕਭਾਵਕਿਤ੍ਤਨਤੋ. ਅਕ੍ਖਿਤ੍ਤੋਤਿ ਇਮਿਨਾ ਕਿਰਿਯਾਪਰਾਧਾਭਾਵੋ. ਕਿਰਿਯਾਪਰਾਧੇਨ ਹਿ ਸਤ੍ਤਾ ਖੇਪਂ ਪਾਪੁਣਨ੍ਤਿ. ਅਨੁਪਕੁਟ੍ਠੋਤਿ ਇਮਿਨਾ ਅਯੁਤ੍ਤਸਂਸਗ੍ਗਾਭਾਵੋ. ਅਯੁਤ੍ਤਸਂਸਗ੍ਗਮ੍ਪਿ ਹਿ ਪਟਿਚ੍ਚ ਸਤ੍ਤਾ ਅਕ੍ਕੋਸਂ ਲਭਨ੍ਤਿ.

ਇਸ੍ਸਰੋਤਿ ਅਧਿਪਤੇਯ੍ਯਸਂਵਤ੍ਤਨਿਯਕਮ੍ਮਫਲੇਨ ਈਸਨਸੀਲੋ. ਸਾ ਪਨਸ੍ਸ ਇਸ੍ਸਰਤਾ ਵਿਭਵਸਮ੍ਪਤ੍ਤਿਪਚ੍ਚਯਾ ਪਾਕਟਾ ਜਾਤਾਤਿ ਅਡ੍ਢਤਾਪਰਿਯਾਯਭਾਵੇਨ ਵਦਨ੍ਤੋ ‘‘ਅਡ੍ਢੋਤਿ ਇਸ੍ਸਰੋ’’ਤਿ ਆਹ. ਮਹਨ੍ਤਂ ਧਨਮਸ੍ਸ ਭੂਮਿਗਤਞ੍ਚੇਵ ਵੇਹਾਸਟ੍ਠਞ੍ਚਾਤਿ ਮਹਦ੍ਧਨੋ. ਤਸ੍ਸਾਤਿ ਤਸ੍ਸ ਤਸ੍ਸ. ਵਦਨ੍ਤਿ ‘‘ਅਨ੍ਵਯਤੋ ਬ੍ਯਤਿਰੇਕਤੋ ਚ ਅਨੁਪਸਙ੍ਕਮਨਕਾਰਣਂ ਕਿਤ੍ਤੇਮਾ’’ਤਿ.

ਅਧਿਕਰੂਪੋਤਿ ਵਿਸਿਟ੍ਠਰੂਪੋ ਉਤ੍ਤਮਸਰੀਰੋ. ਦਸ੍ਸਨਂ ਅਰਹਤੀਤਿ ਦਸ੍ਸਨੀਯੋ. ਤੇਨਾਹ ‘‘ਦਸ੍ਸਨਯੋਗ੍ਗੋ’’ਤਿ. ਪਸਾਦਂ ਆਵਹਤੀਤਿ ਪਾਸਾਦਿਕੋ. ਤੇਨਾਹ ‘‘ਚਿਤ੍ਤਪਸਾਦਜਨਨਤੋ’’ਤਿ. ਵਣ੍ਣਸ੍ਸਾਤਿ ਵਣ੍ਣਧਾਤੁਯਾ. ਸਰੀਰਨ੍ਤਿ ਸਨ੍ਨਿਵੇਸਵਿਸਿਟ੍ਠੋ ਕਰਚਰਣਗੀਵਾਸੀਸਾਦਿ ਅਵਯਵਸਮੁਦਾਯੋ, ਸੋ ਚ ਸਣ੍ਠਾਨਮੁਖੇਨ ਗਯ੍ਹਤੀਤਿ ‘‘ਪਰਮਾਯ ਵਣ੍ਣਪੋਕ੍ਖਰਤਾਯਾਤਿ ਪਰਮਾਯ…ਪੇ… ਸਮ੍ਪਤ੍ਤਿਯਾ ਚਾ’’ਤਿ ਵੁਤ੍ਤਂ. ਸਬ੍ਬਵਣ੍ਣੇਸੁ ਸੁਵਣ੍ਣਵਣ੍ਣੋਵ ਉਤ੍ਤਮੋਤਿ ਵੁਤ੍ਤਂ ‘‘ਸੇਟ੍ਠੇਨ ਸੁਵਣ੍ਣਵਣ੍ਣੇਨ ਸਮਨ੍ਨਾਗਤੋ’’ਤਿ. ਤਥਾ ਹਿ ਬੁਦ੍ਧਾ ਚਕ੍ਕਵਤ੍ਤਿਨੋ ਚ ਸੁਵਣ੍ਣਵਣ੍ਣਾਵ ਹੋਨ੍ਤਿ. ਬ੍ਰਹ੍ਮਵਚ੍ਛਸੀਤਿ ਉਤ੍ਤਮਸਰੀਰਾਭੋ ਸੁਵਣ੍ਣਾਭੋਤਿ ਅਤ੍ਥੋ. ਇਮਮੇਵ ਹਿ ਅਤ੍ਥਂ ਸਨ੍ਧਾਯਾਹ ‘‘ਮਹਾਬ੍ਰਹ੍ਮੁਨੋ ਸਰੀਰਸਦਿਸੇਨ ਸਰੀਰੇਨ ਸਮਨ੍ਨਾਗਤੋ’’ਤਿ. ਨ ਬ੍ਰਹ੍ਮੁਜੁਗਤ੍ਤਤਂ. ਅਖੁਦ੍ਦਾਵਕਾਸੋ ਦਸ੍ਸਨਾਯਾਤਿ ਆਰੋਹਪਰਿਣਾਹਸਮ੍ਪਤ੍ਤਿਯਾ ਅਵਯਵਪਾਰਿਪੂਰਿਯਾ ਚ ਦਸ੍ਸਨਾਯ ਓਕਾਸੋ ਨ ਖੁਦ੍ਦਕੋ. ਤੇਨਾਹ ‘‘ਸਬ੍ਬਾਨੇਵਾ’’ਤਿਆਦਿ.

ਯਮਨਿਯਮਲਕ੍ਖਣਂ ਸੀਲਮਸ੍ਸ ਅਤ੍ਥੀਤਿ ਸੀਲਵਾ, ਤਂ ਪਨਸ੍ਸ ਰਤ੍ਤਞ੍ਞੁਤਾਯ ਵੁਦ੍ਧਂ ਵਡ੍ਢਿਤਂ ਸੀਲਂ ਅਸ੍ਸ ਅਤ੍ਥੀਤਿ ਵੁਦ੍ਧਸੀਲੀ, ਤੇਨ ਚ ਸਬ੍ਬਦਾ ਸਮਾਯੋਗਤੋ ਵੁਡ੍ਢਸੀਲੇਨ ਸਮਨ੍ਨਾਗਤੋ. ਪਞ੍ਚਸੀਲਮਤ੍ਤਮੇਵ ਸਨ੍ਧਾਯ ਵਦਨ੍ਤਿ ਤਤੋ ਪਰਂ ਸੀਲਸ੍ਸ ਤਤ੍ਥ ਅਭਾਵਤੋ ਤੇਸਞ੍ਚ ਅਜਾਨਨਤੋ.

ਠਾਨਕਰਣਸਮ੍ਪਤ੍ਤਿਯਾ ਸਿਕ੍ਖਾਸਮ੍ਪਤ੍ਤਿਯਾ ਚ ਕਤ੍ਥਚਿਪਿ ਅਨੂਨਤਾਯ ਪਰਿਮਣ੍ਡਲਪਦਾਨਿ ਬ੍ਯਞ੍ਜਨਾਨਿ ਅਕ੍ਖਰਾਨਿ ਏਤਿਸ੍ਸਾਤਿ ਪਰਿਮਣ੍ਡਲਪਦਬ੍ਯਞ੍ਜਨਾ. ਅਥ ਵਾ ਪਜ੍ਜਤਿ ਅਤ੍ਥੋ ਏਤੇਨਾਤਿ ਪਦਂ, ਨਾਮਾਦਿ, ਯਥਾਧਿਪ੍ਪੇਤਮਤ੍ਥਂ ਬ੍ਯਞ੍ਜੇਤੀਤਿ ਬ੍ਯਞ੍ਜਨਂ ਵਾਕ੍ਯਂ, ਤੇਸਂ ਪਰਿਪੁਣ੍ਣਤਾਯ ਪਰਿਮਣ੍ਡਲਪਦਬ੍ਯਞ੍ਜਨਾ. ਅਤ੍ਥਞਾਪਨਸਾਧਨਤਾਯ ਵਾਚਾਵ ਕਰਣਨ੍ਤਿ ਵਾਕ੍ਕਰਣਂ, ਉਦਾਹਰਣਘੋਸੋ. ਗੁਣਪਰਿਪੁਣ੍ਣਭਾਵੇਨ ਤਸ੍ਸ ਬ੍ਰਾਹ੍ਮਣਸ੍ਸ, ਤੇਨ ਵਾ ਭਾਸਿਤਬ੍ਬਅਤ੍ਥਸ੍ਸ. ਪੂਰੇ ਪੁਣ੍ਣਭਾਵੇ. ਪੂਰੇਤਿ ਚ ਪੁਰਿਮਸ੍ਮਿਂ ਅਤ੍ਥੇ ਆਧਾਰੇ ਭੁਮ੍ਮਂ, ਦੁਤਿਯਸ੍ਮਿਂ ਵਿਸਯੇ. ਸੁਖੁਮਾਲਤ੍ਤਨੇਨਾਤਿ ਇਮਿਨਾ ਤਸ੍ਸਾ ਵਾਚਾਯ ਮੁਦੁਸਣ੍ਹਭਾਵਮਾਹ. ਅਪਲਿਬੁਦ੍ਧਾਯ ਪਿਤ੍ਤਸੇਮ੍ਹਾਦੀਹਿ. ਸਨ੍ਦਿਟ੍ਠਂ ਸਬ੍ਬਂ ਦਸ੍ਸੇਤ੍ਵਾ ਵਿਯ ਏਕਦੇਸਕਥਨਂ. ਵਿਲਮ੍ਬਿਤਂ ਸਣਿਕਂ ਚਿਰਾਯਿਤ੍ਵਾ ਕਥਨਂ. ‘‘ਸਨ੍ਦਿਦ੍ਧਵਿਲਮ੍ਬਿਤਾਦੀ’’ਤਿ ਵਾ ਪਾਠੋ. ਤਤ੍ਥ ਸਨ੍ਦਿਦ੍ਧਂ ਸਨ੍ਦੇਹਜਨਕਂ. ਆਦਿ-ਸਦ੍ਦੇਨ ਖਲਿਤਾਨੁਕਡ੍ਢਿਤਾਦਿਂ ਸਙ੍ਗਣ੍ਹਾਤਿ. ਆਦਿਮਜ੍ਝਪਰਿਯੋਸਾਨਂ ਪਾਕਟਂ ਕਤ੍ਵਾਤਿ ਇਮਿਨਾ ਚਸ੍ਸ ਵਾਚਾਯ ਅਤ੍ਥਪਾਰਿਪੂਰਿਂ ਵਦਨ੍ਤਿ.

੪੨੫. ਸਦਿਸਾਤਿ ਏਕਦੇਸੇਨ ਸਦਿਸਾ. ਨ ਹਿ ਬੁਦ੍ਧਾਨਂ ਗੁਣੇਹਿ ਸਬ੍ਬਥਾ ਸਦਿਸਾ ਕੇਚਿਪਿ ਗੁਣਾ ਅਞ੍ਞੇਸੁ ਲਬ੍ਭਨ੍ਤਿ. ਇਤਰੇਤਿ ਅਤ੍ਤਨੋ ਗੁਣੇਹਿ ਅਸਦਿਸਗੁਣੇ. ਇਦਨ੍ਤਿ ਇਦਂ ਅਤ੍ਥਜਾਤਂ. ਗੋਪਦਕਨ੍ਤਿ ਗਾਵਿਯਾ ਪਦੇ ਠਿਤਉਦਕਂ. ਕੁਲਪਰਿਯਾਯੇਨਾਤਿ ਕੁਲਾਨੁਕ੍ਕਮੇਨ.

ਤਤ੍ਥਾਤਿ ਮਞ੍ਚਕੇ. ਸੀਹਸੇਯ੍ਯਂ ਕਪ੍ਪੇਸੀਤਿ ਯਥਾ ਰਾਹੁ ਅਸੁਰਿਨ੍ਦੋ ਆਯਾਮਤੋ ਵਿਤ੍ਥਾਰਤੋ ਉਬ੍ਬੇਧਤੋ ਚ ਭਗਵਤੋ ਰੂਪਕਾਯਸ੍ਸ ਪਰਿਚ੍ਛੇਦਂ ਗਹੇਤੁਂ ਨ ਸਕ੍ਕੋਤਿ, ਤਥਾਰੂਪਂ ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਰੋਨ੍ਤੋ ਸੀਹਸੇਯ੍ਯਂ ਕਪ੍ਪੇਸਿ.

ਪਰਿਸੁਦ੍ਧਟ੍ਠੇਨ ਅਰਿਯਨ੍ਤਿ ਆਹ ‘‘ਅਰਿਯਂ ਉਤ੍ਤਮਂ ਪਰਿਸੁਦ੍ਧ’’ਨ੍ਤਿ. ਅਨਵਜ੍ਜਟ੍ਠੇਨ ਕੁਸਲਂ, ਨ ਸੁਖਵਿਪਾਕਟ੍ਠੇਨ. ਕਤ੍ਥਚਿ ਚਤੁਰਾਸੀਤਿ ਪਾਣਸਹਸ੍ਸਾਨਿ ਕਤ੍ਥਚਿ ਅਪਰਿਮਾਣਾਪਿ ਦੇਵਮਨੁਸ੍ਸਾ ਯਸ੍ਮਾ ਚਤੁਵੀਸਤਿਯਾ ਠਾਨੇਸੁ ਅਸਙ੍ਖ੍ਯੇਯ੍ਯਾ ਅਪਰਿਮੇਯ੍ਯਾ ਮਗ੍ਗਫਲਾਮਤਂ ਪਿਵਨ੍ਤਿ. ਕੋਟਿਸਤਸਹਸ੍ਸਾਦਿਪਰਿਮਾਣੇਨਪਿ ਬਹੂ ਏਵ. ਤਸ੍ਮਾ ਅਨੁਤ੍ਤਰਾਚਾਰਸਿਕ੍ਖਾਪਨਵਸੇਨੇਵ ਭਗਵਾ ਬਹੂਨਂ ਆਚਰਿਯੋ. ਤੇਤਿ ਕਾਮਰਾਗਤੋ ਅਞ੍ਞੇ ਭਗਵਤਾ ਪਹੀਨਕਿਲੇਸੇ.

ਅਪਾਪਪੁਰੇਕ੍ਖਾਰੋਤਿ ਅਪਾਪੇਹਿ ਪੁਰਕ੍ਖਰੀਯਤਿ, ਨ ਵਾ ਪਾਪਂ ਪੁਰਤੋ ਕਰੋਤੀਤਿਪਿ ਅਪਾਪਪੁਰੇਕ੍ਖਾਰੋਤਿ ਇਮਮਤ੍ਥਂ ਦਸ੍ਸੇਤੁਂ ‘‘ਅਪਾਪੇ ਨਵ ਲੋਕੁਤ੍ਤਰਧਮ੍ਮੇ’’ਤਿਆਦਿ ਵੁਤ੍ਤਂ. ਤਤ੍ਥ ਅਪਾਪੇਤਿ ਪਾਪਪਪਟਿਪਕ੍ਖੇ ਪਾਪਰਹਿਤੇ ਚ. ਬ੍ਰਹ੍ਮਨਿ ਭਵਾ, ਬ੍ਰਹ੍ਮੁਨੋ ਵਾ ਹਿਤਾ ਗਰੁਕਰਣਾਦਿਨਾ, ਬ੍ਰਹ੍ਮਾਨਂ ਵਾ ਮਗ੍ਗਂ ਜਾਨਾਤੀਤਿ ਬ੍ਰਹ੍ਮਞ੍ਞਾ, ਤਸ੍ਸਾ ਬ੍ਰਹ੍ਮਞ੍ਞਾਯ ਪਜਾਯ.

ਤਿਰੋਰਟ੍ਠਾ ਤਿਰੋਜਨਪਦਾਤਿ ਏਤ੍ਥ ਰਜ੍ਜਂ ਰਟ੍ਠਂ ਰਾਜਨ੍ਤਿ ਰਾਜਾਨੋ ਏਤੇਨਾਤਿ ਕਤ੍ਵਾ. ਤਦੇਕਦੇਸਭੂਤਾ ਪਦੇਸਾ ਪਨ ਜਨਪਦੋ ਜਨਾ ਪਜ੍ਜਨ੍ਤਿ ਏਤ੍ਥ ਸੁਖਜੀਵਿਕਂ ਪਾਪੁਣਨ੍ਤੀਤਿ ਕਤ੍ਵਾ. ਪੁਚ੍ਛਾਯ ਦੋਸਂ ਸਲ੍ਲਕ੍ਖੇਤ੍ਵਾਤਿ ਸਮ੍ਬਨ੍ਧੋ. ਭਗਵਾ ਵਿਸ੍ਸਜ੍ਜੇਤਿ ਤੇਸਂ ਉਪਨਿਸ੍ਸਯਸਮ੍ਪਤ੍ਤਿਂ ਚਿਨ੍ਤੇਤ੍ਵਾਤਿ ਅਧਿਪ੍ਪਾਯੋ. ਨਵਕਾਤਿ ਆਗਨ੍ਤੁਕਭਾਵੇਨ ਅਮ੍ਹਾਕਂ ਅਭਿਨਵਾ.

੪੨੬. ਓਪਾਤੇਤਿ ਨਿਪ੍ਪਾਤੇਤੀਤਿ ਅਤ੍ਥੋ. ਤਥਾਭੂਤੋ ਚ ਤਤ੍ਥ ਪੇਸਿਤਾ ਹੋਤੀਤਿ ਵੁਤ੍ਤਂ ‘‘ਪਵੇਸੇਤੀ’’ਤਿ. ਸਂਪੁਰਕ੍ਖਰੋਨ੍ਤੀਤਿ ਸਕ੍ਕਚ੍ਚਂ ਪੁਬ੍ਬਙ੍ਗਮਂ ਕਰੋਨ੍ਤਿ. ਤੇਨਾਹ ‘‘ਪੁਰਤੋ ਕਤ੍ਵਾ ਵਿਚਰਨ੍ਤੀ’’ਤਿ.

੪੨੭. ਸੁਦ੍ਦੇ ਬਹਿ ਕਤ੍ਵਾ ਰਹੋ ਸਾਸਿਤਬ੍ਬਟ੍ਠੇਨ ਮਨ੍ਤਾ ਏਵ ਤਂਤਂਅਤ੍ਥਪਟਿਪਤ੍ਤਿਹੇਤੁਤਾਯ ਪਦਨ੍ਤਿ ਮਨ੍ਤਪਦਂ ਵੇਦਂ. ਤੇਨਾਹ ‘‘ਵੇਦੋ’’ਤਿ. ਏਵਂ ਕਿਰਾਤਿ ਪਰਮ੍ਪਰਭਾਵੇਨ ਆਭਤਨ੍ਤਿ ਆਚਰਿਯਪਰਮ੍ਪਰਾਯ ਆਭਤਂ. ਪਾਵਚਨਸਙ੍ਖਾਤਸਮ੍ਪਤ੍ਤਿਯਾਤਿ ਪਮੁਖਵਚਨਮ੍ਹਿ ਉਦਤ੍ਤਾਦਿਸਮ੍ਪਤ੍ਤਿਯਾ. ਸਾਵਿਤ੍ਤਿਆਦੀਹਿ ਛਨ੍ਦਬਨ੍ਧੇਹਿ ਵਗ੍ਗਬਨ੍ਧੇਹਿ ਚਾਤਿ ਗਾਯਤ੍ਤੀਆਦੀਹਿ ਅਜ੍ਝਾਯਾਨੁਵਾਕਾਦੀਹਿ ਛਨ੍ਦਬਨ੍ਧੇਹਿ ਚ ਵਗ੍ਗਬਨ੍ਧੇਹਿ ਚ. ਸਮ੍ਪਾਦੇਤ੍ਵਾਤਿ ਪਦਸਮ੍ਪਤ੍ਤਿਂ ਅਹਾਪੇਤ੍ਵਾ. ਪਵਤ੍ਤਾਰੋਤਿ ਵਾ ਪਾਵਚਨਵਸੇਨ ਵਤ੍ਤਾਰੋ. ਸਜ੍ਝਾਯਿਤਨ੍ਤਿ ਗਾਯਨਵਸੇਨ ਸਜ੍ਝਾਯਿਤਂ, ਤਂ ਪਨ ਪਦੇਨੇਵ ਇਚ੍ਛਿਤਨ੍ਤਿ ਆਹ ‘‘ਪਦਸਮ੍ਪਤ੍ਤਿਵਸੇਨਾ’’ਤਿ. ਅਞ੍ਞੇਸਂ ਵੁਤ੍ਤਨ੍ਤਿ ਪਾਵਚਨਵਸੇਨ ਅਞ੍ਞੇਸਂ ਵੁਤ੍ਤਂ. ਰਾਸਿਕਤਨ੍ਤਿ ਇਰੁਵੇਦਯਜੁਵੇਦਸਾਮਵੇਦਾਦਿਵਸੇਨ, ਤਤ੍ਥਾਪਿ ਪਚ੍ਚੇਕਂ ਮਨ੍ਤਬ੍ਰਹ੍ਮਾਦਿਵਸੇਨ ਅਜ੍ਝਾਯਾਨੁਵਾਕਾਦਿਵਸੇਨ ਰਾਸਿਕਤਂ. ਦਿਬ੍ਬੇਨ ਚਕ੍ਖੁਨਾ ਓਲੋਕੇਤ੍ਵਾਤਿ ਦਿਬ੍ਬਚਕ੍ਖੁਪਰਿਭਣ੍ਡੇਨ ਯਥਾਕਮ੍ਮੂਪਗਞਾਣੇਨ ਸਤ੍ਤਾਨਂ ਕਮ੍ਮਸ੍ਸਕਤਂ, ਪਚ੍ਚਕ੍ਖਤੋ ਦਸ੍ਸਨਟ੍ਠੇਨ ਦਿਬ੍ਬਚਕ੍ਖੁਸਦਿਸੇਨ ਪੁਬ੍ਬੇਨਿਵਾਸਞਾਣੇਨ ਅਤੀਤਕਪ੍ਪੇ ਬ੍ਰਾਹ੍ਮਣਾਨਂ ਮਨ੍ਤਜ੍ਝੇਨਵਿਧਿਞ੍ਚ ਓਲੋਕੇਤ੍ਵਾ. ਪਾਵਚਨੇਨ ਸਹ ਸਂਸਨ੍ਦੇਤ੍ਵਾਤਿ ਕਸ੍ਸਪਸਮ੍ਮਾਸਮ੍ਬੁਦ੍ਧਸ੍ਸ ਯਂ ਵਚਨਂ ਵਟ੍ਟਸਨ੍ਨਿਸ੍ਸਿਤਂ, ਤੇਨ ਸਹ ਅਵਿਰੁਦ੍ਧਂ ਕਤ੍ਵਾ. ਨ ਹਿ ਤੇਸਂ ਵਿਵਟ੍ਟਸਨ੍ਨਿਸ੍ਸਿਤੋ ਅਤ੍ਥੋ ਪਚ੍ਚਕ੍ਖੋ ਹੋਤਿ. ਅਪਰਾਪਰੇਤਿ ਅਟ੍ਠਕਾਦੀਹਿ ਅਪਰਾਪਰੇ, ਪਚ੍ਛਿਮਾ ਓਕ੍ਕਾਕਰਾਜਕਾਲਾਦੀਸੁ ਉਪ੍ਪਨ੍ਨਾ. ਪਕ੍ਖਿਪਿਤ੍ਵਾਤਿ ਅਟ੍ਠਕਾਦੀਹਿ ਗਨ੍ਥਿਤਮਨ੍ਤਪਦੇਸੁ ਕਿਲੇਸਸਨ੍ਨਿਸ੍ਸਿਤਪਦਾਨਂ ਤਤ੍ਥ ਤਤ੍ਥ ਪਦੇ ਪਕ੍ਖਿਪਨਂ ਕਤ੍ਵਾ. ਵਿਰੁਦ੍ਧੇ ਅਕਂਸੂਤਿ ਬ੍ਰਾਹ੍ਮਣਧਮ੍ਮਿਕਸੁਤ੍ਤਾਦੀਸੁ (ਖੁ. ਨਿ. ਬ੍ਰਾਹ੍ਮਣਧਮ੍ਮਿਕਸੁਤ੍ਤਂ) ਆਗਤਨਯੇਨੇਵ ਸਂਕਿਲੇਸਿਕਤ੍ਥਦੀਪਨਤੋ ਪਚ੍ਚਨੀਕਭੂਤੇ ਅਕਂਸੁ.

੪੨੮. ਪਟਿਪਾਟਿਯਾ ਘਟਿਤਾਤਿ ਪਟਿਪਾਟਿਯਾ ਸਮ੍ਬਦ੍ਧਾ. ਪਰਮ੍ਪਰਸਂਸਤ੍ਤਾਤਿ ਆਦਾਨਿਯਾਯ ਯਟ੍ਠਿਯਾ ਸਂਸਤ੍ਤਾ. ਤੇਨਾਹ ‘‘ਯਟ੍ਠਿਗ੍ਗਾਹਕੇਨ ਚਕ੍ਖੁਮਤਾ’’ਤਿ. ਪੁਰਿਮਸ੍ਸਾਤਿ ਮਣ੍ਡਲਾਕਾਰੇਨ ਠਿਤਾਯ ਅਨ੍ਧਵੇਣਿਯਾ ਸਬ੍ਬਪੁਰਿਮਸ੍ਸ ਹਤ੍ਥੇਨ ਸਬ੍ਬਪਚ੍ਛਿਮਸ੍ਸ ਕਚ੍ਛਂ ਗਣ੍ਹਾਪੇਤ੍ਵਾ. ਦਿਵਸਮ੍ਪੀਤਿ ਅਨੇਕਦਿਵਸਮ੍ਪਿ. ਚਕ੍ਖੁਸ੍ਸ ਅਨਾਗਤਭਵਂ ਞਤ੍ਵਾ ਯਥਾਅਕ੍ਕਨ੍ਤਟ੍ਠਾਨੇਯੇਵ ਅਨੁਪਤਿਤ੍ਵਾ ਅਕ੍ਕਮਨਂਵ ਸਲ੍ਲਕ੍ਖੇਤ੍ਵਾ ‘‘ਕਹਂ ਚਕ੍ਖੁਮਾ ਕਹਂ ਮਗ੍ਗੋ’’ਤਿ ਪਰਿਵੇਦਿਤ੍ਵਾ.

ਪਾਲ਼ਿਆਗਤੇਸੁ ਦ੍ਵੀਸੂਤਿ ਸਦ੍ਧਾ ਅਨੁਸ੍ਸਵੋਤਿ ਇਮੇਸੁ ਦ੍ਵੀਸੁ. ਏਵਰੂਪੇਤਿ ਯਥਾ ਸਦ੍ਧਾਨੁਸ੍ਸਵਾ, ਏਵਰੂਪੇ ਏਵ ਪਚ੍ਚਕ੍ਖਗਾਹਿਨੋਤਿ ਅਤ੍ਥੋ. ਤਯੋਤਿ ਰੁਚਿਆਕਾਰਪਰਿਵਿਤਕ੍ਕਦਿਟ੍ਠਿਨਿਜ੍ਝਾਨਕ੍ਖਨ੍ਤਿਯੋ. ਭੂਤਵਿਪਾਕਾਤਿ ਭੂਤਤ੍ਥਨਿਟ੍ਠਾਯਕਾ ਅਧਿਪ੍ਪੇਤਤ੍ਥਸਾਧਕਾ, ਵੁਤ੍ਤਵਿਪਰਿਯਾਯੇਨ ਅਭੂਤਤ੍ਥਵਿਪਾਕਾ ਵੇਦਿਤਬ੍ਬਾ. ਏਤ੍ਥਾਤਿ ਏਤੇਸੁ ਸਦ੍ਧਾਯਿਤਾਦਿਵਤ੍ਥੂਸੁ. ਏਕਂਸੇਨੇਵ ਨਿਟ੍ਠਂ ਗਨ੍ਤੁਂ ਨਾਲਂ ਅਨੇਕਨ੍ਤਿਕਤ੍ਤਾ ਸਦ੍ਧਾਦਿਗ੍ਗਾਹਸ੍ਸ. ਉਪਰਿ ਪੁਚ੍ਛਾਯ ਮਗ੍ਗਂ ਵਿਵਰਿਤ੍ਵਾ ਠਪੇਸਿ ਸਚ੍ਚਾਨੁਰਕ੍ਖਾਯ ਞਾਤੁਕਾਮਤਾਯ ਉਪ੍ਪਾਦਿਤਤ੍ਤਾ. ਪਸ੍ਸਤਿ ਹਿ ਭਗਵਾ – ਮਯਾ ‘‘ਸਚ੍ਚਮਨੁਰਕ੍ਖਤਾ…ਪੇ… ਨਿਟ੍ਠਂ ਗਨ੍ਤੁ’’ਨ੍ਤਿ ਵੁਤ੍ਤੇ ਸਚ੍ਚਾਨੁਰਕ੍ਖਣਂ ਞਾਤੁਕਾਮੋ ਮਾਣਵੋ ‘‘ਕਿਤ੍ਤਾਵਤਾ’’ਤਿਆਦਿਨਾ ਪੁਚ੍ਛਿਸ੍ਸਤਿ, ਤਸ੍ਸ ਤਂ ਵਿਸ੍ਸਜ੍ਜੇਤ੍ਵਾ ਸਚ੍ਚਾਨੁਬੋਧੇ ਪੁਚ੍ਛਾਯ ਅਵਸਰਂ ਦਤ੍ਵਾ ਤਸ੍ਸ ਉਪਨਿਸ੍ਸਯੇ ਉਪਕਾਰਧਮ੍ਮੇ ਕਥੇਸ੍ਸਾਮੀਤਿ. ਤੇਨ ਵੁਤ੍ਤਂ – ‘‘ਉਪਰਿ ਪੁਚ੍ਛਾਯ ਮਗ੍ਗਂ ਵਿਵਰਿਤ੍ਵਾ ਠਪੇਸੀ’’ਤਿ.

੪੩੦. ਅਤ੍ਤਾਨਞ੍ਞੇਵ ਸਨ੍ਧਾਯ ਵਦਤਿ, ਯਤੋ ਵੁਤ੍ਤਂ ਪਾਲ਼ਿਯਂ – ‘‘ਯਂ ਖੋ ਪਨਾਯਮਾਯਸ੍ਮਾ ਧਮ੍ਮਂ ਦੇਸੇਤਿ, ਗਮ੍ਭੀਰੋ ਸੋ ਧਮ੍ਮੋ ਦੁਦ੍ਦਸੋ ਦੁਰਨੁਬੋਧੋ’’ਤਿਆਦਿ. ਲੁਬ੍ਭਨ੍ਤੀਤਿ ਲੋਭਨੀਯਾ ਯਥਾ ‘‘ਅਪਾਯਗਮਨੀਯਾ’’ਤਿ ਆਹ ‘‘ਲੋਭਨੀਯੇਸੁ ਧਮ੍ਮੇਸੂਤਿ ਲੋਭਧਮ੍ਮੇਸੂ’’ਤਿ. ਯਥਾ ਵਾ ਰੂਪਾਦਿਧਮ੍ਮਾ ਲੋਭਨੀਯਾ, ਏਵਂ ਲੋਭੋਤਿ ਆਹ ‘‘ਲੋਭਨੀਯੇਸੁ ਧਮ੍ਮੇਸੂਤਿ ਲੋਭਧਮ੍ਮੇਸੂ’’ਤਿ. ਤੇਨੇਵਾਹ – ‘‘ਯਂ ਲੋਕੇ ਪਿਯਰੂਪਂ ਸਾਤਰੂਪਂ, ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤੀ’’ਤਿ (ਦੀ. ਨਿ. ੨.੪੦੦; ਮ. ਨਿ. ੧.੧੩੩; ਵਿਭ. ੨੦੩). ਏਸੇ ਨਯੋ ਸੇਸਪਦਦ੍ਵਯੇਪਿ.

੪੩੨. ਨਿਵੇਸੇਤੀਤਿ ਠਪੇਤਿ ਪਟ੍ਠਪੇਤਿ. ਪਯਿਰੁਪਾਸਤੀਤਿ ਉਪਟ੍ਠਾਨਵਸੇਨ ਉਪਗਨ੍ਤ੍ਵਾ ਨਿਸੀਦਤਿ. ਸੁਯ੍ਯਤਿ ਏਤੇਨਾਤਿ ਸੋਤਨ੍ਤਿ ਆਹ ‘‘ਪਸਾਦਸੋਤ’’ਨ੍ਤਿ. ਤਞ੍ਹਿ ਸਵਨਾਯ ਓਦਹਿਤਬ੍ਬਨ੍ਤਿ. ਧਾਰੇਤਿ ਸਨ੍ਧਾਰੇਤਿ ਤਤ੍ਥੇਵ ਮਨਂ ਠਪੇਤਿ. ਅਤ੍ਥਤੋਤਿ ਯਥਾਵੁਤ੍ਤਸ੍ਸ ਧਮ੍ਮਸ੍ਸ ਅਤ੍ਥਤੋ. ਕਾਰਣਤੋਤਿ ਯੁਤ੍ਤਿਤੋ ਹੇਤੁਦਾਹਰਣੇਹਿ ਉਪਪਤ੍ਤਿਤੋ. ਓਲੋਕਨਨ੍ਤਿ ਏਵਮੇਤਨ੍ਤਿ ਯਥਾਸਭਾਵਤੋ ਪਞ੍ਞਾਚਕ੍ਖੁਨਾ ਦਟ੍ਠਬ੍ਬਤਂ ਖਮਨ੍ਤਿ, ਤਞ੍ਚ ਮਹਨ੍ਤਸ੍ਸ ਮਣਿਨੋ ਪਜ੍ਜਲਨ੍ਤਸ੍ਸ ਵਿਯ ਆਵਿਕਤ੍ਵਾ ਅਤ੍ਥਸ੍ਸ ਚਿਤ੍ਤੇ ਉਪਟ੍ਠਾਨਨ੍ਤਿ ਆਹ ‘‘ਇਧਾ’’ਤਿਆਦਿ. ਕਤ੍ਤੁਕਮ੍ਯਤਾਛਨ੍ਦੋਤਿ ਕਤ੍ਤੁਕਾਮਤਾਸਙ੍ਖਾਤੋ ਕੁਸਲਚ੍ਛਨ੍ਦੋ. ਵਾਯਮਤੀਤਿਆਦਿਤੋ ਚਤੁਨ੍ਨਮ੍ਪਿ ਵੀਰਿਯਾਨਂ ਵਸੇਨ ਵਾਯਾਮਂ ਪਰਕ੍ਕਮਂ ਕਰੋਤਿ. ਮਗ੍ਗਪਧਾਨਂ ਪਦਹਤੀਤਿ ਮਗ੍ਗਾਵਹਂ ਮਗ੍ਗਪਰਿਯਾਪਨ੍ਨਞ੍ਚ ਸਮ੍ਮਪ੍ਪਧਾਨਂ ਪਦਹਤਿ, ਪਦਹਨਵਸੇਨ ਤਂ ਪਰਿਪੂਰੇਤਿ. ਪਰਮਸਚ੍ਚਨ੍ਤਿ ਅਮੋਘਧਮ੍ਮਤ੍ਤਾ ਪਰਮਤ੍ਥਸਚ੍ਚਂ. ਸਹਜਾਤਨਾਮਕਾਯੇਨਾਤਿ ਮਗ੍ਗਪਞ੍ਞਾਸਹਜਾਤਨਾਮਕਾਯੇਨ. ਤਦੇਵਾਤਿ ਤਦੇਵ ਪਰਮਸਚ੍ਚਂ ਨਿਬ੍ਬਾਨਂ. ਤੇਨੇਵਾਹ – ‘‘ਸਚ੍ਛਿਕਿਰਿਯਾਭਿਸਮਯੇਨ ਵਿਭੂਤਂ ਪਾਕਟਂ ਕਰੋਨ੍ਤੋ ਪਸ੍ਸਤੀ’’ਤਿ.

੪੩੩-੪. ਮਗ੍ਗਾਨੁਬੋਧੋਤਿ ਮਗ੍ਗਪਟਿਪਾਟਿਯਾ ਬੋਧੋ ਬੁਜ੍ਝਨਂ, ਯੇਸਂ ਕਿਲੇਸਾਨਂ ਸਮੁਚ੍ਛਿਨ੍ਦਨਵਸੇਨ ਮਗ੍ਗਪ੍ਪਟਿਵੇਧੋ, ਤੇਸਂ ਪਟਿਪਸ੍ਸਮ੍ਭਨਵਸੇਨ ਪਵਤ੍ਤਮਾਨਂ ਸਾਮਞ੍ਞਫਲਂ, ਮਗ੍ਗੇਨ ਪਟਿਵਿਦ੍ਧਾਨਿ ਸਚ੍ਚਾਨਿ, ਪਰਮਤ੍ਥਸਚ੍ਚਮੇਵ ਵਾ ਅਨੁਰੂਪਬੁਜ੍ਝਨਨ੍ਤਿ ਅਧਿਪ੍ਪਾਯੋ. ‘‘ਸਚ੍ਚਾਨੁਪ੍ਪਤ੍ਤੀਤਿ ਫਲਸਚ੍ਛਿਕਿਰਿਯਾ’’ਤਿ ਵੁਤ੍ਤਂ. ਏਵਞ੍ਹਿ ਸਤਿ ਹੇਟ੍ਠਾ ਵੁਤ੍ਤਾ ਸਦ੍ਧਾਪਟਿਲਾਭਾਦਯੋ ਦ੍ਵਾਦਸ ਧਮ੍ਮਾ ਸਚ੍ਚਾਨੁਪ੍ਪਤ੍ਤਿਯਾ ਉਪਕਾਰਾ ਹੋਨ੍ਤਿ, ਤਸ੍ਮਾ ਵੁਤ੍ਤਂ ‘‘ਤੇਸਂਯੇਵਾਤਿ ਹੇਟ੍ਠਾ ਵੁਤ੍ਤਾਨਂ ਦ੍ਵਾਦਸਨ੍ਨ’’ਨ੍ਤਿ. ਨਾਯਂ ‘‘ਤੇਸਂਯੇਵਾ’’ਤਿ ਪਦਸ੍ਸ ਅਤ੍ਥੋ. ਸਤਿਪਿ ਕੁਸਲਵਿਪਾਕਾਦਿਭਾਵੇਨ ਨਾਨਤ੍ਤੇ ਵਤ੍ਥਾਰਮ੍ਮਣਭੂਮਿਕਿਚ੍ਚਾਦਿਵਸੇਨ ਪਨ ਸਦਿਸਾਤਿ ਉਪਾਯਤੋਵ ਮਗ੍ਗਧਮ੍ਮਾ ਆਸੇਵਿਤਾ ਬਹੁਲੀਕਤਾ ਫਲਭੂਤਾਤਿ ਵਤ੍ਤਬ੍ਬਤਂ ਅਰਹਤੀਤਿ ਤਂਸਦਿਸੇ ਤਬ੍ਬੋਹਾਰਂ ਕਤ੍ਵਾ ‘‘ਤੇਸਂ ਮਗ੍ਗਸਮ੍ਪਯੁਤ੍ਤਧਮ੍ਮਾਨ’’ਨ੍ਤਿ ਵੁਤ੍ਤਂ. ਏਵਞ੍ਹਿ ਆਸੇਵਨਾਗਹਣਂ ਸਮਤ੍ਥਿਤਂ, ਨ ਅਞ੍ਞਥਾ. ਨ ਹਿ ਏਕਚਿਤ੍ਤਕ੍ਖਣਿਕਾਨਂ ਮਗ੍ਗਧਮ੍ਮਾਨਂ ਆਸੇਵਨਾ, ਬਹੁਲੀਕਮ੍ਮਂ ਵਾ ਅਤ੍ਥੀਤਿ. ਤੁਲਨਾਤਿ ਵਿਪਸ੍ਸਨਾ. ਸਾ ਹਿ ਵੁਟ੍ਠਾਨਗਾਮਿਨਿਭੂਤਾ ਮਗ੍ਗਪ੍ਪਧਾਨਸ੍ਸ ਬਹੁਕਾਰਾ ਤਸ੍ਸ ਅਭਾਵੇ ਮਗ੍ਗਪ੍ਪਧਾਨਸ੍ਸੇਵ ਅਭਾਵਤੋ, ਏਵਂ ਉਸ੍ਸਾਹੋ ਤੁਲਨਾਯ ਛਨ੍ਦੋ ਉਸ੍ਸਾਹਸ੍ਸ ਬਹੁਕਾਰੋਤਿਆਦਿਨਾ ਹੇਟ੍ਠਿਮਸ੍ਸ ਉਪਰਿਮੂਪਕਾਰਤਂ ਸੁਵਿਞ੍ਞੇਯ੍ਯਮੇਵਾਤਿ ਆਹ – ‘‘ਇਮਿਨਾ ਨਯੇਨ ਸਬ੍ਬਪਦੇਸੁ ਅਤ੍ਥੋ ਵੇਦਿਤਬ੍ਬੋ’’ਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਚਙ੍ਕੀਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

੬. ਏਸੁਕਾਰੀਸੁਤ੍ਤਵਣ੍ਣਨਾ

੪੩੭. ਕੋਟ੍ਠਾਸਨ੍ਤਿ ਮਂਸਭਾਗਂ. ਲਗ੍ਗਾਪੇਯ੍ਯੁਨ੍ਤਿ ਨ੍ਹਾਰੁਨਾ ਵਾ ਵਾਕੇਨ ਵਾ ਬਨ੍ਧਿਤ੍ਵਾ ਪੁਰਿਸਸ੍ਸ ਹਤ੍ਥੇ ਵਾ ਵਸਨਗੇਹੇ ਵਾ ਓਲਮ੍ਬਨਵਸੇਨ ਬਨ੍ਧੇਯ੍ਯੁਂ. ਸਤ੍ਥਧਮ੍ਮਨ੍ਤਿ ਸਤ੍ਥਿਕੇਸੁ ਸਤ੍ਥਵਾਹੇਨ ਪਣੇਤਬ੍ਬਂ ਆਣਾਧਮ੍ਮਂ. ਤਸ੍ਸ ਨਿਕ੍ਖਮਨਤ੍ਥਨ੍ਤਿ ਤਂ ਮੂਲਂ ਸਤ੍ਥਿਕੇਹਿ ਨਿਤ੍ਥਰਣਤ੍ਥਂ. ਪਾਪਂ ਅਸ੍ਸਾਤਿ ਪਰਿਚਰਨ੍ਤਸ੍ਸ ਪਾਰਿਚਰਿਯਾਯ ਅਹਿਤਂਵ ਅਸ੍ਸ. ਤੇਨਾਹ ‘‘ਨ ਸੇਯ੍ਯੋ’’ਤਿ. ਉਚ੍ਚਕੁਲੀਨਾਦਯੋ ਦੁਤਿਯਵਾਰਾਦੀਹਿ ਵੁਚ੍ਚਨ੍ਤਿ, ਇਧ ਉਪਧਿਵਿਪਤ੍ਤਿਸਮ੍ਪਤ੍ਤਿਯੋ ਪਾਪਿਯਾਦਿਪਦੇਹਿ ਵੁਤ੍ਤਾਤਿ ਅਧਿਪ੍ਪਾਯੋ. ਤੇਨਾਹ – ‘‘ਪਾਪਿਯੋਤਿ ਪਾਪਕੋ ਲਾਮਕੋ ਅਤ੍ਤਭਾਵੋ ਅਸ੍ਸਾ’’ਤਿ. ਸੇਯ੍ਯਂਸੋਤਿ ਹਿਤਕੋਟ੍ਠਾਸੋ, ਹਿਤਸਭਾਵੋਤਿ ਅਤ੍ਥੋ. ਉਚ੍ਚਕੁਲੀਨਤਾਤਿ ਕਰਣਤ੍ਥੇ ਪਚ੍ਚਤ੍ਤਵਚਨਨ੍ਤਿ ਆਹ ‘‘ਉਚ੍ਚਾਕੁਲੀਨਤ੍ਤੇਨਾ’’ਤਿ. ‘‘ਵਣ੍ਣੋ ਨ ਖੀਯੇਥ ਤਥਾਗਤਸ੍ਸਾ’’ਤਿਆਦੀਸੁ (ਦੀ. ਨਿ. ਅਟ੍ਠ. ੧.੩੦੫; ੩.੧੪੧; ਮ. ਨਿ. ਅਟ੍ਠ. ੨.੪੨੫; ਉਦਾ. ੫੩; ਅਪ. ਅਟ੍ਠ. ੨.੭.੨੦; ਬੁ. ਵਂ. ਅਟ੍ਠ. ੪.੪; ਚਰਿਯਾ. ਅਟ੍ਠ. ੧.ਨਿਦਾਨਕਥਾ; ੨.ਪਕਿਣ੍ਣਕਕਥਾ; ਦੀ. ਨਿ. ਟੀ. ੧.ਗਨ੍ਥਾਰਮ੍ਭਕਥਾਵਣ੍ਣਨਾ; ਸਂ. ਨਿ. ਟੀ. ੧.੨.੧; ਅ. ਨਿ. ਟੀ. ੧.੧.੧; ਵਜਿਰ. ਟੀ. ਗਨ੍ਥਾਰਮ੍ਭਕਥਾਵਣ੍ਣਨਾ; ਸਾਰਤ੍ਥ. ਟੀ. ੧.ਗਨ੍ਥਾਰਮ੍ਭਕਥਾਵਣ੍ਣਨਾ; ਨੇਤ੍ਤਿ. ਟੀ. ਗਨ੍ਥਾਰਮ੍ਭਕਥਾਵਣ੍ਣਨਾ; ਮ. ਨਿ. ਟੀ. ੧.੧) ਵਿਯ ਵਣ੍ਣਸਦ੍ਦੋ ਇਧ ਪਸਂਸਾਪਰਿਯਾਯੋਤਿ ਆਹ ‘‘ਵੇਸ੍ਸੋਪਿ ਹਿ ਉਲ਼ਾਰਵਣ੍ਣੋ ਹੋਤੀ’’ਤਿ.

੪੪੦. ‘‘ਨਿਰਵੋ ਪਦਸਦ੍ਦੋ ਸੋਲ਼ਾਰਗੋਤ੍ਤਸ੍ਸ ਅਕਿਣ੍ਣਮਤ੍ਤਿਕਾਪਤ੍ਤੋ ਤਿਟ੍ਠੇਯ੍ਯ ਅਸਙ੍ਗਚਾਰੀ’’ਤਿ ਵੁਤ੍ਤਤ੍ਤਾ ਭਿਕ੍ਖਾ ਚਰਿਤਬ੍ਬਾਵ, ਅਯਂ ਤੇਸਂ ਕੁਲਧਮ੍ਮੋਤਿ ਅਧਿਪ੍ਪਾਯੋ. ਹਰਿਤ੍ਵਾਤਿ ਅਪਨੇਤ੍ਵਾ. ਸਤ੍ਤਜੀਵੋ ਸਤ੍ਤਵਾਣਿਜਕੋ. ਗੋਪੇਤਿ ਰਕ੍ਖਤੀਤਿ ਗੋਪੋ, ਆਰਕ੍ਖਾਧਿਕਾਰੇ ਨਿਯੁਤ੍ਤੋ. ਅਸਨ੍ਤਿ ਲੂਨਨ੍ਤਿ ਤੇਨਾਤਿ ਅਸਿਤਂ, ਲਵਿਤ੍ਤਂ. ਵਿਵਿਧਂ ਭਾਰਂ ਆਭਞ੍ਜਨ੍ਤਿ ਓਲਮ੍ਬਨ੍ਤਿ ਏਤ੍ਥਾਤਿ ਬ੍ਯਾਭਙ੍ਗੀ, ਕਾਜਂ.

੪੪੧. ਅਨੁਸ੍ਸਰਤੋਤਿ ਅਨੁਸ੍ਸਰਣਹੇਤੁ ਕੁਲਵਂਸਾਨੁਸ੍ਸਰਣਕ੍ਖਣੇ ਖਤ੍ਤਿਯੋਤਿਆਦਿਨਾ ਸਙ੍ਖ੍ਯਂ ਗਚ੍ਛਤਿ. ਤੇਨਾਹ ‘‘ਪੋਰਾਣੇ…ਪੇ… ਅਨੁਸ੍ਸਰਿਯਮਾਨੇ’’ਤਿ. ਉਚ੍ਚਨੀਚਤ੍ਤਜਾਨਨਤ੍ਥਞ੍ਚ ਕੁਲਵਵਤ੍ਥਾਨਂ ਕਤਂ ਹੋਤੀਤਿ ਖਤ੍ਤਿਯਾਦਿਕੁਲਕਮ੍ਮੁਨਾ ਤੇਸਂ ਚਤੁਨ੍ਨਂ ਵਣ੍ਣਾਨਂ ਸਨ੍ਧਨਂ ਜੀਵਿਕਂ ਪਞ੍ਞਪੇਨ੍ਤਿ ਬ੍ਰਾਹ੍ਮਣਾ, ਤਥਾਗਤੋ ਪਨ ਲੋਕੁਤ੍ਤਰਧਮ੍ਮਮੇਵ ਪੁਰਿਸਸ੍ਸ ਸਨ੍ਧਨਂ ਪਞ੍ਞਪੇਤਿ ਤੇਨ ਸਤ੍ਤਸ੍ਸ ਲੋਕਗ੍ਗਭਾਵਸਿਦ੍ਧਿਤੋ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਏਸੁਕਾਰੀਸੁਤ੍ਤਵਣ੍ਣਨਾ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

੭. ਧਨਞ੍ਜਾਨਿਸੁਤ੍ਤਵਣ੍ਣਨਾ

੪੪੫. ਰਾਜਗਹਂ ਪਰਿਕ੍ਖਿਪਿਤ੍ਵਾ ਠਿਤਪਬ੍ਬਤਸ੍ਸਾਤਿ ਪਣ੍ਡਵਪਬ੍ਬਤਂ ਸਨ੍ਧਾਯਾਹ. ਰਾਜਗਹਨਗਰਸ੍ਸ ਦਕ੍ਖਿਣਦਿਸਾਭਾਗੇ ਪਬ੍ਬਤਸ੍ਸ ਸਮੀਪੇ ਠਿਤੋ ਜਨਪਦੋ ਦਕ੍ਖਿਣਾਗਿਰਿ. ਤਣ੍ਡੁਲਪੁਟਕਾਨਂ ਪਾਲਿ ਏਤ੍ਥਾਤਿ ਤਣ੍ਡੁਲਪਾਲਿ. ਤਸ੍ਸ ਕਿਰ ਦ੍ਵਾਰਸਮੀਪੇ ਤਣ੍ਡੁਲਵਾਣਿਜਾ ਤਣ੍ਡੁਲਪਸਿਬ੍ਬਕੇ ਵਿਵਰਿਤ੍ਵਾ ਪਟਿਪਾਟਿਯਾ ਠਪੇਤ੍ਵਾ ਨਿਸੀਦਨ੍ਤਿ, ਤੇਨਸ੍ਸ ‘‘ਤਣ੍ਡੁਲਪਾਲਿਦ੍ਵਾਰ’’ਨ੍ਤਿ ਸਮਞ੍ਞਾ ਅਹੋਸਿ. ਸਬ੍ਬਮੇਵ ਸਸ੍ਸਂ ਗਣ੍ਹਾਤੀਤਿ ਦਲਿਦ੍ਦਕਸ੍ਸਕਾਨਂ ਦਿਵਸਪਰਿਬ੍ਬਯਮਤ੍ਤਮੇਵ ਵਿਸ੍ਸਜ੍ਜੇਤ੍ਵਾ ਸਬ੍ਬਮੇਵ ਆਯਤੋ ਨਿਪ੍ਫਨ੍ਨਂ ਧਞ੍ਞਂ ਗਣ੍ਹਾਤਿ. ਮਨ੍ਦਸਸ੍ਸਾਨੀਤਿ ਮਨ੍ਦਨਿਪ੍ਫਤ੍ਤਿਕਾਨਿ ਸਸ੍ਸਾਨਿ.

੪੪੬. ਇਮਿਨਾ ਨਯੇਨਾਤਿ ਦਾਸਕਮ੍ਮਕਰਸ੍ਸ ਨਿਵਾਸਨਭਤ੍ਤਵੇਤ੍ਤਨਾਨੁਪ੍ਪਦਾਨੇਨ ਮਙ੍ਗਲਦਿਵਸੇਸੁ ਧਨਵਤ੍ਥਾਲਙ੍ਕਾਰਾਨੁਪ੍ਪਦਾਨਾਦਿਨਾ ਚ ਪੋਸੇਤਬ੍ਬੋ. ਮਿਤ੍ਤਾਮਚ੍ਚਾਨਂ ਪਿਯਵਚਨਅਤ੍ਥਚਰਿਯਾਸਮਾਨਤ੍ਤਤਾਦਿ ਮਿਤ੍ਤਾਮਚ੍ਚਕਰਣੀਯਂ ਕਤ੍ਤਬ੍ਬਂ, ਤਥਾ ਞਾਤਿਸਾਲੋਹਿਤਾਨਂ. ਤਤ੍ਥ ਆਵਾਹਵਿਵਾਹਸਮ੍ਬਦ੍ਧੇਨ ‘‘ਅਮ੍ਹਾਕਂ ਇਮੇ’’ਤਿ ਞਾਯਨ੍ਤੀਤਿ ਞਾਤੀ, ਮਾਤਾਪਿਤਾਦਿਸਮ੍ਬਦ੍ਧਤਾਯ ਸਮਾਨਲੋਹਿਤਾਤਿ ਸਾਲੋਹਿਤਾ. ਸਮ੍ਮਾ ਦਦਨ੍ਤੇਸੁਪਿ ਅਸਜ੍ਜਨਤੋ ਨਤ੍ਥਿ ਏਤੇਸਂ ਤਿਥੀਤਿ ਅਤਿਥਿ, ਤੇਸਂ ਅਤ੍ਤਨਾ ਸਮਾਨਪਰਿਭੋਗਵਸੇਨ ਅਤਿਥਿਕਰਣੀਯਂ ਕਾਤਬ੍ਬਂ, ਅਤਿਥਿਬਲੀਤਿ ਅਤ੍ਥੋ. ਞਾਤਕਭੂਤਪੁਬ੍ਬਾ ਪੇਤ੍ਤਿਵਿਸਯਂ ਉਪਗਤਾ ਪੁਬ੍ਬਪੇਤਾ, ਦਕ੍ਖਿਣੇਯ੍ਯੇਸੁ ਕਾਲੇਨ ਕਾਲਂ ਦਾਨਂ ਦਤ੍ਵਾ ਤੇਸਂ ਉਦ੍ਦਿਸਨਂ ਪੁਬ੍ਬਪੇਤਕਰਣੀਯਂ, ਪੇਤਬਲੀਤਿ ਅਤ੍ਥੋ. ਗਨ੍ਧਪੁਪ੍ਫਵਿਲੇਪਨਜਾਲਾਭਤ੍ਤੇਹਿ ਕਾਲੇਨ ਕਾਲਂ ਦੇਵਤਾਨਂ ਪੂਜਾ ਦੇਵਤਾਕਰਣੀਯਂ, ਦੇਵਤਾਬਲੀਤਿ ਅਤ੍ਥੋ, ਰਾਜਕਿਚ੍ਚਕਰਣਂ ਉਪਟ੍ਠਾਨਂ ਰਾਜਕਰਣੀਯਂ. ਅਯਮ੍ਪਿ ਕਾਯੋਤਿ ਅਤ੍ਤਨੋ ਕਾਯਂ ਸਨ੍ਧਾਯ ਵਦਤਿ. ਇਮਮਤ੍ਥਂ ਸਨ੍ਧਾਯਾਹ ‘‘ਇਮਿਨਾ ਨਯੇਨ ਅਤ੍ਥੋ ਵੇਦਿਤਬ੍ਬੋ’’ਤਿ.

੪੪੭. ਪਞ੍ਚ ਦੁਸ੍ਸੀਲ੍ਯਕਮ੍ਮਾਨੀਤਿ ਨਿਚ੍ਚਸੀਲਪਟਿਪਕ੍ਖਧਮ੍ਮਾ. ਦਸ ਅਕੁਸਲਕਮ੍ਮਪਥਧਮ੍ਮਾ ਦਸ ਦੁਸ੍ਸੀਲ੍ਯਕਮ੍ਮਾਨਿ. ਅਧਮ੍ਮਚਾਰੀ ਏਵ ਵਿਸਮਚਾਰੀ ਕਾਯਵਿਸਮਾਦਿਚਰਣਤੋਤਿ ਵਿਸਮਚਾਰੀਪਦਸ੍ਸ ਅਤ੍ਥੋ ਵਿਸੁਂ ਨ ਵੁਤ੍ਤੋ.

੪੪੮-੪੫੩. ਓਸਰਨ੍ਤਿ ਅਪਸਕ੍ਕਨ੍ਤਿ, ਖੀਯਨ੍ਤੀਤਿ ਅਤ੍ਥੋ. ਤੇਨਾਹ ‘‘ਪਰਿਹਾਯਨ੍ਤੀ’’ਤਿ. ਅਭਿਸਰਨ੍ਤੀਤਿ ਅਭਿਵਡ੍ਢਨਵਸੇਨ ਪਵਤ੍ਤਨ੍ਤਿ. ਤੇਨਾਹ ‘‘ਵਡ੍ਢਨ੍ਤੀ’’ਤਿ. ਤਤ੍ਰਾਤਿ ਬ੍ਰਹ੍ਮਲੋਕੇ. ਅਸ੍ਸਾਤਿ ਬ੍ਰਹ੍ਮਲੋਕੇ ਉਪ੍ਪਨ੍ਨਸ੍ਸ ਧਨਞ੍ਜਾਨਿਸ੍ਸ. ਤਤੋ ਪਟ੍ਠਾਯਾਤਿ ਯਦਾ ਭਗਵਤਾ ‘‘ਏਸੋ, ਭਿਕ੍ਖਵੇ, ਸਾਰਿਪੁਤ੍ਤੋ’’ਤਿਆਦਿ ਵੁਤ੍ਤਂ, ਤਤੋ ਪਟ੍ਠਾਯ. ਚਤੁਸਚ੍ਚਵਿਨਿਮੁਤ੍ਤਨ੍ਤਿ ਨਿਦ੍ਧਾਰੇਤ੍ਵਾ ਵਿਭਜਿਤ੍ਵਾ ਵੁਚ੍ਚਮਾਨੇਹਿ ਸਚ੍ਚੇਹਿ ਵਿਮੁਤ੍ਤਂ. ਅਤ੍ਥਤੋ ਪਨ ਤਤੋ ਪੁਬ੍ਬੇਪਿ ਸਚ੍ਚਵਿਮੁਤ੍ਤਂ ਕਥਂ ਨ ਕਥੇਸਿਯੇਵ ਸਚ੍ਚਵਿਮੁਤ੍ਤਸ੍ਸ ਨਿਯ੍ਯਾਨਸ੍ਸ ਅਭਾਵਤੋ.

ਧਨਞ੍ਜਾਨਿਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

੮. ਵਾਸੇਟ੍ਠਸੁਤ੍ਤਵਣ੍ਣਨਾ

੪੫੪. ਜਾਤਿਂ ਸੋਧੇਤੁਕਾਮਾ ਹੋਨ੍ਤੀਤਿ ਸਹਵਾਸੀਨਂ ਬ੍ਰਾਹ੍ਮਣਾਨਂ ਕਿਰਿਯਾ ਪਰਾਧੇਨ ਵਾ ਅਸਾਰੁਪ੍ਪਤ੍ਤੇਨ ਵਾ ਜਾਤਿਯਾ ਉਪਕ੍ਕਿਲੇਸਂ ਆਸਙ੍ਕਾਯ ਤਂ ਸੋਧੇਤੁਕਾਮਾ ਹੋਨ੍ਤਿ. ਮਨ੍ਤੇ ਸੋਧੇਤੁਕਾਮਾ ਹੋਨ੍ਤੀਤਿ ਮਨ੍ਤਵਚਨੇ ਆਚਰਿਯਮਤਿਚੋਦਨਾਯ ਅਞ੍ਞੇਨ ਵਾਕ੍ਯੇਨ ਕੇਨਚਿ ਕਾਰਣੇਨ ਸਂਸਯੇ ਉਪ੍ਪਨ੍ਨੇ ਤਂ ਸੋਧੇਤੁਕਾਮਾ ਹੋਨ੍ਤਿ. ਅਨ੍ਤਰਾਤਿ ਵੇਮਜ੍ਝੇ, ਅਞ੍ਞਤ੍ਥੇਵਾ ਅਨ੍ਤਰਾਸਦ੍ਦੋਤਿ ਤਸ੍ਸ ਅਞ੍ਞਾ ਕਥਾਤਿ ਵਚਨਂ ਅਵਗਨ੍ਤਬ੍ਬਂ. ਖਨ੍ਤੀਮੇਤ੍ਤਾਨੁਦ੍ਦਯਾਦਿਗੁਣਸਮ੍ਪਨ੍ਨੋ ਏਵ ‘‘ਸੀਲਵਾਤਿ ਗੁਣਵਾ’’ਤਿਆਹ. ਤੇਹਿ ਸੀਲਸ੍ਸ ਵਿਸ੍ਸਜ੍ਜਨਕਾਲੇਪਿ ‘‘ਸੀਲਵਾ’’ਤਿ ਵੁਚ੍ਚਤਿ. ਸਮ੍ਪਨ੍ਨਸੀਲਤ੍ਤਾ ਵਾ ਤੇਹਿ ਸਮਨ੍ਨਾਗਤੋ ਏਵ ਹੋਤੀਤਿ ਆਹ ‘‘ਸੀਲਵਾਤਿ ਗੁਣਵਾ’’ਤਿ. ਆਚਾਰਸਮ੍ਪਨ੍ਨੋਤਿ ਸਾਧੁ ਆਚਾਰਵਤ੍ਤੋ.

੪੫੫. ਸਿਕ੍ਖਿਤਾਤਿ ਤੇਵਿਜ੍ਜਾਨਂ ਸਿਕ੍ਖਿਤਾ ਤੁਮ੍ਹੇ, ਨ ਦਾਨਿ ਤੁਮ੍ਹੇਹਿ ਕਿਞ੍ਚਿ ਕਤ੍ਤਬ੍ਬਂ ਅਤ੍ਥੀਤਿ ਅਤ੍ਥੋ. ਪਟਿਞ੍ਞਾਤਾਤਿ ਪਟਿਜਾਨਿਤ੍ਵਾ ਠਿਤਾ.

ਵੇਦਤ੍ਤਯਸਙ੍ਖਾਤਾ ਤਿਸ੍ਸੋ ਵਿਜ੍ਜਾ ਅਜ੍ਝਯਨ੍ਤੀਤਿ ਤੇਵਿਜ੍ਜਾ. ਤੇਨਾਹ ‘‘ਤਿਵੇਦਾਨ’’ਨ੍ਤਿ. ਤਯੋ ਵੇਦੇ ਅਣਨ੍ਤਿ ਅਜ੍ਝਯਨ੍ਤੀਤਿ ਬ੍ਰਾਹ੍ਮਣਾ, ਤੇਸਂ. ਯਂ ਏਕਂ ਪਦਮ੍ਪਿ ਅਕ੍ਖਾਤਂ, ਤਂ ਅਤ੍ਥਤੋ ਬ੍ਯਞ੍ਜਨਤੋ ਚ ਕੇਵਲਿਨੋ ਅਧਿਯਿਨੋ ਅਪ੍ਪਪਯੋਗੇਨ. ਨਿਟ੍ਠਾਗਤਮ੍ਹਾਤਿ ਨਿਪ੍ਫਤ੍ਤਿਂ ਗਤਾ ਅਮ੍ਹਾ ਤੇਵਿਜ੍ਜਾਯ ਸਕਸਮਯਸ੍ਸ ਕਥਨੇ.

ਮਨੋਕਮ੍ਮਤੋ ਹਿ ਵਤ੍ਤਸਮ੍ਪਦਾਤਿਕਾਰਣੂਪਚਾਰੇਨਾਯਮਤ੍ਥੋ ਵੁਤ੍ਤੋਤਿ ਆਹ – ‘‘ਤੇਨ ਸਮਨ੍ਨਾਗਤੋ ਹਿ ਆਚਾਰਸਮ੍ਪਨ੍ਨੋ ਹੋਤੀ’’ਤਿ.

ਖਯਾਤੀਤਨ੍ਤਿ ਵਡ੍ਢਿਪਕ੍ਖੇ ਠਿਤਨ੍ਤਿ ਅਤ੍ਥੋ. ਸੁਕ੍ਕਪਕ੍ਖਪਾਟਿਪਦਤੋ ਪਟ੍ਠਾਯ ਹਿ ਚਨ੍ਦੋ ਵਡ੍ਢਤੀਤਿ ਵੁਚ੍ਚਤਿ, ਨ ਖੀਯਤੀਤਿ. ਵਨ੍ਦਮਾਨਾ ਜਨਾ ਨਮਕ੍ਕਾਰਂ ਕਰੋਨ੍ਤਿ.

ਅਤ੍ਥਦਸ੍ਸਨੇਨਾਤਿ ਵਿਵਰਣੇਨ ਦਸ੍ਸਨਪਰਿਣਾਯਕਟ੍ਠੇਨ ਲੋਕਸ੍ਸ ਚਕ੍ਖੁ ਹੁਤ੍ਵਾ ਸਮੁਪ੍ਪਨ੍ਨਂ.

੪੫੬. ਤਿਟ੍ਠਤੁ ਤਾਵ ਬ੍ਰਾਹ੍ਮਣਚਿਨ੍ਤਾਤਿ – ‘‘ਕਿਂ ਜਾਤਿਯਾ ਬ੍ਰਾਹ੍ਮਣੋ ਹੋਤਿ ਉਦਾਹੁ ਭਵਤਿ ਕਮ੍ਮੁਨਾ’’ਤਿ ਅਯਂ ਬ੍ਰਾਹ੍ਮਣਵਿਚਾਰੋ ਤਾਵ ਤਿਟ੍ਠਤੁ. ਜਾਤਿਦਸ੍ਸਨਤ੍ਥਂ ਤਿਣਰੁਕ੍ਖਕੀਟਪਟਙ੍ਗਤੋ ਪਟ੍ਠਾਯ ਲੋਕੇ ਜਾਤਿਵਿਭਙ੍ਗਂ ਵਿਤ੍ਥਾਰਤੋ ਕਥੇਸ੍ਸਾਮੀਤਿ ਤੇਸਂ ਚਿਤ੍ਤਸਮ੍ਪਹਂਸਨਤ੍ਥਂ ਦੇਸੇਤਬ੍ਬਮਤ੍ਥਂ ਪਟਿਜਾਨਾਤਿ. ਤਤ੍ਥ ਅਞ੍ਞਮਞ੍ਞਾ ਹਿ ਜਾਤਿਯੋਤਿ ਇਦਂ ਕਾਰਣਵਚਨਂ, ਯਸ੍ਮਾ ਇਮਾ ਜਾਤਿਯੋ ਨਾਮ ਅਞ੍ਞਮਞ੍ਞਂ ਵਿਸਿਟ੍ਠਾ, ਤਸ੍ਮਾ ਜਾਤਿਵਿਭਙ੍ਗਂ ਬ੍ਯਾਕਰਿਸ੍ਸਾਮੀਤਿ.

ਯਸ੍ਮਾ ਇਧ ਉਪਾਦਿਨ੍ਨਕਜਾਤਿ ਬ੍ਯਾਕਾਤਬ੍ਬਭਾਵੇਨ ਆਗਤਾ, ਤਸ੍ਸਾ ਪਨ ਨਿਦਸ੍ਸਨਭਾਵੇਨ ਇਤਰਾ, ਤਸ੍ਮਾ ‘‘ਜਾਤਿਵਿਭਙ੍ਗਂ ਪਾਣਾਨ’’ਨ੍ਤਿ ਪਾਲ਼ਿਯਂ ਵੁਤ੍ਤਂ. ਤੇਸਂ ਤੇਸਂ ਪਾਣਾਨਂ ਜਾਤਿਯੋਤਿ ਅਤ੍ਥੋ. ਏਵਨ੍ਤਿ ਨਿਦਸ੍ਸਨਂ ਕਥੇਤ੍ਵਾ ਨਿਦਸ੍ਸਿਤਬ੍ਬੇ ਕਥਿਯਮਾਨੇ. ਤਸ੍ਸਾਤਿ ਵਾਸੇਟ੍ਠਸ੍ਸ. ਕਾਮਂ ‘‘ਤੇਸਂ ਵੋਹਂ ਬ੍ਯਕ੍ਖਿਸ੍ਸ’’ਨ੍ਤਿ ਉਭੋਪਿ ਮਾਣਵੇ ਨਿਸ੍ਸਾਯ ਦੇਸਨਾ ਆਗਤਾ, ਤਥਾਪਿ ਤਤ੍ਥ ਤਤ੍ਥ ‘‘ਏਵਂ, ਵਾਸੇਟ੍ਠ, ਜਾਨਾਹੀ’’ਤਿਆਦਿਨਾ ਵਾਸੇਟ੍ਠਮੇਵ ਆਲਪਨ੍ਤੋ ਭਗਵਾ ਤਮੇਵ ਇਮਿਨਾ ਨਿਯਾਮੇਨ ਪਮੁਖਂ ਅਕਾਸਿ. ਤੇਨ ਵੁਤ੍ਤਂ ‘‘ਤਸ੍ਸਾਤਿ ਵਾਸੇਟ੍ਠਸ੍ਸਾ’’ਤਿ. ਜਾਤਿਭੇਦੋ ਜਾਤਿਵਿਸੇਸੋ, ਜਾਤਿਯਾ ਭੇਦੋ ਪਾਕਟੋ ਭਵਿਸ੍ਸਤਿ ਨਿਦਸ੍ਸਨੇਨ ਵਿਭੂਤਭਾਵਂ ਆਪਾਦਿਤੇਨ ਪਟਿਞ੍ਞਾਤਸ੍ਸ ਅਤ੍ਥਸ੍ਸ ਵਿਭੂਤਭਾਵਾਪਤ੍ਤਿਤੋ. ਆਮ ਨ ਵਟ੍ਟਤੀਤਿ ਕਮ੍ਮਨਾਨਤਾਯ ਏਵ ਉਪਾਦਿਨ੍ਨਨਾਨਤਾਯ ਪਟਿਕ੍ਖੇਪਪਦਮੇਤਂ, ਨ ਬੀਜਨਾਨਤਾਯ ਅਨੁਪਾਦਿਨ੍ਨਨਾਨਤਾਯ ਪਟਿਕ੍ਖੇਪਪਦਨ੍ਤਿ ਦਸ੍ਸੇਤੁਂ ‘‘ਕਮ੍ਮਂ ਹੀ’’ਤਿਆਦਿ ਵੁਤ੍ਤਂ. ਤਸ੍ਸਤ੍ਥੋ – ਤਂਤਂਯੋਨਿਖਿਪਨਮਤ੍ਤਂ ਕਮ੍ਮਸ੍ਸ ਸਾਮਤ੍ਥਿਯਂ, ਤਂਤਂਯੋਨਿਨਿਯਤਾ ਪਨ ਯੇ ਵਣ੍ਣਵਿਸੇਸਾ, ਤੇ ਤਂਤਂਯੋਨਿਸਿਦ੍ਧਿਯਾਵ ਸਿਦ੍ਧਾ ਹੋਨ੍ਤੀਤਿ ਤਂ ਪਨ ਯੋਨਿਖਿਪਨਕਮ੍ਮਂ ਤਂਤਂਯੋਨਿਵਿਸਿਟ੍ਠ-ਵਿਸੇਸਾਭਿਭੂਤਾਯ ਪਯੋਗਨਿਪ੍ਫਤ੍ਤਿਯਾ, ਅਸਂਮੁਚ੍ਛਿਤਾਯ ਏਵ ਵਾ ਪਚ੍ਚਯਭੂਤਾਯ ਭਵਪਤ੍ਥਨਾਯ ਅਭਿਸਙ੍ਖਤਮੇਵਾਤਿ ਵਿਞ੍ਞਾਤਬ੍ਬਪਚ੍ਚਯਵਿਸੇਸੇਨ ਵਿਨਾ ਫਲਵਿਸੇਸਾਭਾਵਤੋ ਏਤਂ ਸਮੀਹਿਤਕਮ੍ਮਂ ਪਤ੍ਥਨਾਦੀਹਿ ਚ ਭਿਨ੍ਨਸਤ੍ਤਿਤਂ ਵਿਸਿਟ੍ਠਸਾਮਤ੍ਥਿਯਂ ਵਾ ਆਪਜ੍ਜਿਤ੍ਵਾ ਚਕ੍ਖੁਨ੍ਦ੍ਰਿਯਾਦਿਵਿਸਿਟ੍ਠਫਲਨਿਬ੍ਬਤ੍ਤਕਂ ਜਾਯਤਿ, ਏਵਂ ਯੋਨਿਖਿਪਨਤਂਯੋਨਿਨਿਯਤਵਿਸੇਸਾਵਹਤਾ ਹੋਤੀਤਿ. ਥੇਰੇਨ ਹਿ ਬੀਜਨਾਨਤਾ ਵਿਯ ਕਮ੍ਮਨਾਨਤਾਪਿ ਉਪਾਦਿਨ੍ਨਕਨਾਨਤਾਯ ਸਿਯਾ ਨੁ ਖੋ ਪਚ੍ਚਯੋਤਿ ਚੋਦਨਂ ਪਟਿਕ੍ਖਿਪਿਤ੍ਵਾ ਪਚ੍ਚਯਵਿਸੇਸਵਿਸਿਟ੍ਠਾ ਕਮ੍ਮਨਾਨਤਾ ਪਨ ਪਚ੍ਚਯੋਤਿ ਨਿਚ੍ਛਿਤਨ੍ਤਿ ਦਟ੍ਠਬ੍ਬਂ.

ਨਾਨਾਵਣ੍ਣਾਤਿ ਨਾਨਪ੍ਪਕਾਰਵਣ੍ਣਾ. ਤਾਲਨਾਲ਼ਿਕੇਰਾਦੀਨਂ ਲੋਕੇ ਅਭਿਞ੍ਞਾਤਤਿਣਜਾਤਿਭਾਵਤੋ ਵਿਸੇਸੇਨ ਗਯ੍ਹਤਿ ਅਭਿਞ੍ਞਾਤਸੋਤਨਯੇਨ. ਜਾਤਿਯਾ ਬ੍ਰਾਹ੍ਮਣੋਵਾਤਿ ਅਟ੍ਠਾਨਪਯੁਤ੍ਤੋ ਏਵ-ਸਦ੍ਦੋ, ਜਾਤਿਯਾਵ ਬ੍ਰਾਹ੍ਮਣੋ ਭਵੇਯ੍ਯਾਤਿ ਯੋਜਨਾ. ਨ ਚ ਗਯ੍ਹਤੀਤਿ ਤਿਣਰੁਕ੍ਖਾਦੀਸੁ ਵਿਯ ਬ੍ਰਾਹ੍ਮਣੇਸੁ ਜਾਤਿਨਿਯਤਸ੍ਸ ਲਿਙ੍ਗਸ੍ਸ ਅਨੁਪਲਬ੍ਭਨਤੋ, ਪਿਵਨਭੁਞ੍ਜਨਕਥਨਹਸਨਾਦਿਕਿਰਿਯਾਯ ਬ੍ਰਾਹ੍ਮਣਭਾਵੇਨ ਏਕਨ੍ਤਿਕਲਿਙ੍ਗਨਿਯਤਾਯ ਮਨ੍ਤਜ੍ਝੇਨਾਦਿਂ ਵਿਨਾ ਅਨੁਪਲਬ੍ਭਨਤੋ ਚ. ਵਚੀਭੇਦੇਨੇਵਾਤਿ ਆਹਚ੍ਚਵਚਨੇਨੇਵ.