੧੦. ਸਙ੍ਗਾਰਵਸੁਤ੍ਤਵਣ੍ਣਨਾ

੪੭੩. ਅਭਿਪ੍ਪਸਨ੍ਨਾਤਿ ਅਭਿਸਮੇਚ੍ਚ ਪਸਨ੍ਨਾ. ਤੇਨਾਹ – ‘‘ਅਵੇਚ੍ਚਪ੍ਪਸਾਦਵਸੇਨ ਪਸਨ੍ਨਾ’’ਤਿ. ਬ੍ਰਾਹ੍ਮਣੀ ਵਿਗਤਮਲਮਚ੍ਛੇਰਤਾਯ ‘‘ਤੁਯ੍ਹਂ ਦੇਯ੍ਯਧਮ੍ਮਂ ਰੁਚ੍ਚਨਕਟ੍ਠਾਨੇ ਦੇਹੀ’’ਤਿ ਆਹ. ਮਗ੍ਗੇਨੇਵ ਹਿਸ੍ਸਾ ਮਚ੍ਛਰਿਯਸ੍ਸ ਪਹੀਨਤ੍ਤਾ ਬੁਦ੍ਧਪਕ੍ਖਬ੍ਰਾਹ੍ਮਣਪਕ੍ਖਵਸੇਨ ਉਭਤੋਪਕ੍ਖਿਕਾ.

ਕਿਂਸੂਤਿ ਕਿਨ੍ਤਿ ਪੁਚ੍ਛਾਵਚਨਂ. ਛੇਤ੍ਵਾ ਅਨਾਦਿਯਿਤ੍ਵਾ ਵਿਨਾਸੇਤ੍ਵਾ. ਸੁਖਂ ਸੇਤੀਤਿ ਚਿਤ੍ਤਸਨ੍ਤਾਪਾਭਾਵੇਨ ਸੁਖੇਨ ਸੁਪਤਿ. ਨ ਸੋਚਤੀਤਿ ਤਤੋ ਏਵ ਸੋਕਂ ਨਾਮ ਵਿਨਾਸੇਤਿ. ਕੋਧਨ੍ਤਿ ਕੁਜ੍ਝਨਲਕ੍ਖਣਂ ਕੋਧਂ. ਛੇਤ੍ਵਾ ਸਮੁਚ੍ਛਿਨ੍ਦਿਤ੍ਵਾ. ਸੁਖਂ ਸੇਤੀਤਿ ਕੋਧਪਰਿਲ਼ਾਹੇਨ ਅਪਰਿਡਯ੍ਹਮਾਨਤ੍ਤਾ ਸੁਖਂ ਸੁਪਤਿ. ਕੋਧਵਿਨਾਸੇਨ ਵਿਨਟ੍ਠਦੋਮਨਸ੍ਸਤ੍ਤਾ ਨ ਸੋਚਤਿ. ਵਿਸਮੂਲਸ੍ਸਾਤਿ ਦੁਕ੍ਖਵਿਪਾਕਸ੍ਸ. ਮਧੁਰਗ੍ਗਸ੍ਸਾਤਿ ਅਕ੍ਕੋਸਕਸ੍ਸ ਪਚ੍ਚਕ੍ਕੋਸਨੇਨ, ਪਹਾਰਕਸ੍ਸ ਪਟਿਪ੍ਪਹਰਣੇਨ ਯਂ ਸੁਖਂ ਉਪ੍ਪਜ੍ਜਤਿ, ਤਂ ਸਨ੍ਧਾਯੇਵ ‘‘ਮਧੁਰਗ੍ਗੋ’’ਤਿ ਵੁਤ੍ਤੋ. ਇਮਸ੍ਮਿਞ੍ਹਿ ਠਾਨੇ ਪਰਿਯੋਸਾਨਂ ‘‘ਅਗ੍ਗ’’ਨ੍ਤਿ ਵੁਤ੍ਤਂ. ਅਰਿਯਾਤਿ ਬੁਦ੍ਧਾਦਯੋ ਅਰਿਯਾ.

ਪਞ੍ਹਂ ਕਥੇਸੀਤਿ ਬ੍ਰਾਹ੍ਮਣੋ ਕਿਰ ਚਿਨ੍ਤੇਸਿ – ‘‘ਸਮਣੋ ਗੋਤਮੋ ਲੋਕਪੂਜਿਤੋ, ਨ ਸਕ੍ਕਾ ਯਂ ਵਾ ਤਂ ਵਾ ਵਤ੍ਵਾ ਸਨ੍ਤਜ੍ਜੇਤੁਂ, ਏਕਂ ਸਣ੍ਹਪਞ੍ਹਂ ਪੁਚ੍ਛਿਸ੍ਸਾਮੀ’’ਤਿ. ਸੋ ਏਕਂ ਪੁਚ੍ਛਾਗਾਥਂ ਅਭਿਸਙ੍ਖਰਿਤ੍ਵਾ ‘‘ਸਚੇ ਅਸੁਕਸ੍ਸ ਨਾਮ ਵਧਂ ਰੋਚੇਮੀਤਿ ਵਕ੍ਖਤਿ, ਯੇ ਤੁਯ੍ਹਂ ਨ ਰੁਚ੍ਚਨ੍ਤਿ, ਤੇ ਮਾਰੇਤੁਕਾਮੋਸਿ, ਲੋਕਵਧਾਯ ਉਪ੍ਪਨ੍ਨੋ ਕਿਂ ਤੁਯ੍ਹਂ ਸਮਣਭਾਵੇਨਾਤਿ ਨਿਗ੍ਗਹੇਸ੍ਸਾਮਿ. ਸਚੇ ਨ ਕਸ੍ਸਚਿ ਵਧਂ ਰੋਚੇਮੀਤਿ ਵਕ੍ਖਤਿ, ਅਥ ਨਂ ਤ੍ਵਂ ਰਾਗਾਦੀਨਮ੍ਪਿ ਵਧਂ ਨ ਇਚ੍ਛਸਿ, ਤਸ੍ਮਾ ਸਮਣੋ ਹੁਤ੍ਵਾ ਆਹਿਣ੍ਡਸੀਤਿ ਨਿਗ੍ਗਣ੍ਹਿਸ੍ਸਾਮੀਤਿ ਇਮਂ ਉਭਤੋਕੋਟਿਕਂ ਪਞ੍ਹਂ ਪੁਟ੍ਠੋ ਸਮਣੋ ਗੋਤਮੋ ਨੇਵ ਗਿਲਿਤੁਂ ਨ ਉਗ੍ਗਿਲਿਤੁਂ ਸਕ੍ਖਿਸ੍ਸਤੀ’’ਤਿ ਏਵਂ ਚਿਨ੍ਤੇਤ੍ਵਾ ਇਮਂ ਪਯ੍ਹਂ ਪੁਚ੍ਛਿ. ਤਸ੍ਸ ਭਗਵਾ ਅਜ੍ਝਾਸਯਾਨੁਰੂਪਂ ਕਥੇਸਿ. ਸੋ ਪਞ੍ਹਬ੍ਯਾਕਰਣੇਨ ਆਰਾਧਿਤਚਿਤ੍ਤੋ ਪਬ੍ਬਜ੍ਜਂ ਯਾਚਿ. ਸਤ੍ਥਾ ਤਂ ਪਬ੍ਬਾਜੇਸਿ, ਸੋ ਪਬ੍ਬਜ੍ਜਾਕਿਚ੍ਚਂ ਮਤ੍ਥਕਂ ਪਾਪੇਸਿ. ਤੇਨ ਵੁਤ੍ਤਂ ‘‘ਪਬ੍ਬਜਿਤ੍ਵਾ ਅਰਹਤ੍ਤਂ ਪਤ੍ਤੋ’’ਤਿ.

ਅਵਭੂਤਾਤਿ ਅਧੋਭੂਤਾ. ਅਧੋਭਾਵੋ ਸਤ੍ਤਾਨਂ ਅਵਡ੍ਢਿ ਅਵਮਙ੍ਗਲਨ੍ਤਿ ਆਹ – ‘‘ਅਵਡ੍ਢਿਭੂਤਾ ਅਵਮਙ੍ਗਲਭੂਤਾਯੇਵਾ’’ਤਿ. ਪਰਿਭੂਤਾਤਿ ਪਰਿਭਵਪ੍ਪਤ੍ਤਾ. ਵਿਜ੍ਜਮਾਨਾਨਨ੍ਤਿ ਪਾਲ਼ਿਯਂ ਅਨਾਦਰੇ ਸਾਮਿਵਚਨਨ੍ਤਿ ਤਦਤ੍ਥਂ ਦਸ੍ਸੇਨ੍ਤੋ ‘‘ਵਿਜ੍ਜਮਾਨੇਸੂ’’ਤਿਆਹ. ਪਕਟ੍ਠਂ, ਪਵਡ੍ਢਂ ਵਾ ਞਾਣਨ੍ਤਿ ਪਞ੍ਞਾਣਨ੍ਤਿ ਭਗਵਤੋ ਞਾਣਂ ਵਿਸੇਸੇਤ੍ਵਾ ਵੁਤ੍ਤਂ.

੪੭੪. ਅਭਿਜਾਨਿਤ੍ਵਾਤਿ ਅਭਿਵਿਸਿਟ੍ਠੇਨ ਞਾਣੇਨ ਜਾਨਿਤ੍ਵਾ. ਵੋਸਿਤਵੋਸਾਨਾਤਿ ਕਤਕਰਣੀਯਤਾਯ ਸਬ੍ਬਸੋ ਪਰਿਸੋਸਿਤਨਿਟ੍ਠਾ. ਪਾਰਮਿਸਙ੍ਖਾਤਨ੍ਤਿ ਪਰਮੁਕ੍ਕਂਸਭਾਵਤੋ ਪਾਰਮੀਤਿ ਸਙ੍ਖਾਤਂ. ਤੇਨਾਹ ‘‘ਸਬ੍ਬਧਮ੍ਮਾਨਂ ਪਾਰਭੂਤ’’ਨ੍ਤਿ. ਬ੍ਰਹ੍ਮਚਰਿਯਸ੍ਸਾਤਿ ਸਾਸਨਬ੍ਰਹ੍ਮਚਰਿਯਸ੍ਸ ਆਦਿਭੂਤਂ. ਤੇਨਾਹ ‘‘ਉਪ੍ਪਾਦਕਾ ਜਨਕਾ’’ਤਿ. ‘‘ਇਦਮੇਵਂ ਭਵਿਸ੍ਸਤਿ ਇਦਮੇਵ’’ਨ੍ਤਿ ਤਕ੍ਕਨਂ ਤਕ੍ਕੋ, ਸੋ ਏਤਸ੍ਸ ਅਤ੍ਥੀਤਿ ਤਕ੍ਕੀ. ਯਸ੍ਮਾ ਸੋ ਤਂ ਤਂ ਵਤ੍ਥੁਂ ਤਥਾ ਤਥਾ ਤਕ੍ਕਿਤ੍ਵਾ ਗਣ੍ਹਤਿ, ਤਸ੍ਮਾ ਵੁਤ੍ਤਂ ‘‘ਤਕ੍ਕਗਾਹੀ’’ਤਿ. ਵੀਮਂਸਨਸੀਲੋ ਵੀਮਂਸੀ ਪਚ੍ਚਕ੍ਖਭੂਤਮਤ੍ਥਂ ਵੀਮਂਸਨਭੂਤਾਯ ਪਞ੍ਞਾਯ ਕੇਵਲਂ ਵੀਮਂਸਨਤੋ. ਤੇਨਾਹ ‘‘ਪਞ੍ਞਾਚਾਰਂ ਚਰਾਪੇਤ੍ਵਾ ਏਵਂਵਾਦੀ’’ਤਿ. ਯਥਾਵੁਤ੍ਤਤਕ੍ਕੀਵੀਮਂਸੀਭਾਵੇਨ ਤਕ੍ਕਪਰਿਯਾਹਤਂ ਵੀਮਂਸਾਨੁਚਰਿਤਂ ਸਯਂਪਟਿਭਾਨਂ ਏਵਮੇਤਨ੍ਤਿ ਵਤ੍ਵਾ.

੪੮੫. ਅਟ੍ਠਿਤਪਧਾਨਵਤਨ੍ਤਿ ਅਞ੍ਞਤ੍ਥ ਕਿਸ੍ਮਿਞ੍ਚਿ ਪੁਗ੍ਗਲੇ ਅਟ੍ਠਿਤਪਧਾਨਵਤਂ ਅਨਞ੍ਞਸਾਧਾਰਣਂ ਭੋਤੋ ਗੋਤਮਸ੍ਸ ਪਧਾਨਂ ਅਹੋਸਿ. ਸਪ੍ਪੁਰਿਸਪਧਾਨਵਤਂ ਅਹੋਸਿ ਸਪ੍ਪੁਰਿਸਪਧਾਨਵਤਾਧਿਗਤਾਨਂ ਏਤਾਦਿਸਾਨਂ ਅਰਹਤਂ ਅਚ੍ਛਰਿਯਪੁਗ੍ਗਲਾਨਂਯੇਵ ਆਵੇਣਿਕਪਧਾਨਵਤਂ ਅਹੋਸਿ. ਅਜਾਨਨ੍ਤੋਵ ਪਕਾਸੇਤੀਤਿ ਅਯਂ ਪੁਚ੍ਛਿਤਮਤ੍ਥਂ ਸਯਂ ਪਚ੍ਚਕ੍ਖਤੋ ਅਜਾਨਨ੍ਤੋ ਏਵ ਕੇਵਲਂ ਸਦ੍ਦਂ ਉਪ੍ਪਾਦੇਤ੍ਵਾਵ ਪਕਾਸੇਸੀਤਿ ਸਞ੍ਞਾਯ ਆਹ. ਅਜਾਨਨਭਾਵੇ ਸਨ੍ਤੇਤਿ ਇਮੇ ਅਧਿਦੇਵਾਤਿ ਪਚ੍ਚਕ੍ਖਤੋ ਜਾਨਨੇ ਅਸਤਿ. ਪਣ੍ਡਿਤੇਨ ਮਨੁਸ੍ਸੇਨਾਤਿ ਲੋਕਵੋਹਾਰਕੁਸਲੇਨ ਮਨੁਸ੍ਸੇਨ, ਤ੍ਵਂ ਪਨ ਲੋਕਵੋਹਾਰੇਪਿ ਅਕੁਸਲੋ. ਵਚਨਤ੍ਥਞ੍ਹਿ ਅਜਾਨਨ੍ਤੋ ਯਂ ਕਿਞ੍ਚਿ ਵਦਤਿ. ਉਚ੍ਚੇਨ ਸਮ੍ਮਤਨ੍ਤਿ ਉਚ੍ਚਂ ਸੁਪਾਕਟਂ ਸਬ੍ਬਸੋ ਤਰੁਣਦਾਰਕੇਹਿਪਿ ਸਮ੍ਮਤਂ. ਞਾਤਮੇਤਂ ਯਦਿਦਂ ਅਤ੍ਥਿ ਦੇਵਾਤਿ. ਤੇਨਾਹ ‘‘ਸੁਸੁਦਾਰਕਾਪੀ’’ਤਿਆਦਿ. ਦੇਵਾਤਿ ਉਪਪਤ੍ਤਿਦੇਵਾ. ਅਧਿਦੇਵਾ ਨਾਮ ਸਮ੍ਮੁਤਿਦੇਵੇਹਿ ਅਧਿਕਦੇਵਾਤਿ ਕਤ੍ਵਾ, ਤਦਞ੍ਞੇ ਚ ਮਨੁਸ੍ਸੇ ਅਧਿਕਭਾਵੇ ਕਿਮੇਵ ਵਤ੍ਤਬ੍ਬਂ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਸਙ੍ਗਾਰਵਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

ਨਿਟ੍ਠਿਤਾ ਚ ਬ੍ਰਾਹ੍ਮਣਵਗ੍ਗਵਣ੍ਣਨਾ.

ਮਜ੍ਝਿਮਪਣ੍ਣਾਸਟੀਕਾ ਸਮਤ੍ਤਾ.