੮. ਵਾਸੇਟ੍ਠਸੁਤ੍ਤਵਣ੍ਣਨਾ

੪੫੪. ਜਾਤਿਂ ਸੋਧੇਤੁਕਾਮਾ ਹੋਨ੍ਤੀਤਿ ਸਹਵਾਸੀਨਂ ਬ੍ਰਾਹ੍ਮਣਾਨਂ ਕਿਰਿਯਾ ਪਰਾਧੇਨ ਵਾ ਅਸਾਰੁਪ੍ਪਤ੍ਤੇਨ ਵਾ ਜਾਤਿਯਾ ਉਪਕ੍ਕਿਲੇਸਂ ਆਸਙ੍ਕਾਯ ਤਂ ਸੋਧੇਤੁਕਾਮਾ ਹੋਨ੍ਤਿ. ਮਨ੍ਤੇ ਸੋਧੇਤੁਕਾਮਾ ਹੋਨ੍ਤੀਤਿ ਮਨ੍ਤਵਚਨੇ ਆਚਰਿਯਮਤਿਚੋਦਨਾਯ ਅਞ੍ਞੇਨ ਵਾਕ੍ਯੇਨ ਕੇਨਚਿ ਕਾਰਣੇਨ ਸਂਸਯੇ ਉਪ੍ਪਨ੍ਨੇ ਤਂ ਸੋਧੇਤੁਕਾਮਾ ਹੋਨ੍ਤਿ. ਅਨ੍ਤਰਾਤਿ ਵੇਮਜ੍ਝੇ, ਅਞ੍ਞਤ੍ਥੇਵਾ ਅਨ੍ਤਰਾਸਦ੍ਦੋਤਿ ਤਸ੍ਸ ਅਞ੍ਞਾ ਕਥਾਤਿ ਵਚਨਂ ਅਵਗਨ੍ਤਬ੍ਬਂ. ਖਨ੍ਤੀਮੇਤ੍ਤਾਨੁਦ੍ਦਯਾਦਿਗੁਣਸਮ੍ਪਨ੍ਨੋ ਏਵ ‘‘ਸੀਲਵਾਤਿ ਗੁਣਵਾ’’ਤਿਆਹ. ਤੇਹਿ ਸੀਲਸ੍ਸ ਵਿਸ੍ਸਜ੍ਜਨਕਾਲੇਪਿ ‘‘ਸੀਲਵਾ’’ਤਿ ਵੁਚ੍ਚਤਿ. ਸਮ੍ਪਨ੍ਨਸੀਲਤ੍ਤਾ ਵਾ ਤੇਹਿ ਸਮਨ੍ਨਾਗਤੋ ਏਵ ਹੋਤੀਤਿ ਆਹ ‘‘ਸੀਲਵਾਤਿ ਗੁਣਵਾ’’ਤਿ. ਆਚਾਰਸਮ੍ਪਨ੍ਨੋਤਿ ਸਾਧੁ ਆਚਾਰਵਤ੍ਤੋ.

੪੫੫. ਸਿਕ੍ਖਿਤਾਤਿ ਤੇਵਿਜ੍ਜਾਨਂ ਸਿਕ੍ਖਿਤਾ ਤੁਮ੍ਹੇ, ਨ ਦਾਨਿ ਤੁਮ੍ਹੇਹਿ ਕਿਞ੍ਚਿ ਕਤ੍ਤਬ੍ਬਂ ਅਤ੍ਥੀਤਿ ਅਤ੍ਥੋ. ਪਟਿਞ੍ਞਾਤਾਤਿ ਪਟਿਜਾਨਿਤ੍ਵਾ ਠਿਤਾ.

ਵੇਦਤ੍ਤਯਸਙ੍ਖਾਤਾ ਤਿਸ੍ਸੋ ਵਿਜ੍ਜਾ ਅਜ੍ਝਯਨ੍ਤੀਤਿ ਤੇਵਿਜ੍ਜਾ. ਤੇਨਾਹ ‘‘ਤਿਵੇਦਾਨ’’ਨ੍ਤਿ. ਤਯੋ ਵੇਦੇ ਅਣਨ੍ਤਿ ਅਜ੍ਝਯਨ੍ਤੀਤਿ ਬ੍ਰਾਹ੍ਮਣਾ, ਤੇਸਂ. ਯਂ ਏਕਂ ਪਦਮ੍ਪਿ ਅਕ੍ਖਾਤਂ, ਤਂ ਅਤ੍ਥਤੋ ਬ੍ਯਞ੍ਜਨਤੋ ਚ ਕੇਵਲਿਨੋ ਅਧਿਯਿਨੋ ਅਪ੍ਪਪਯੋਗੇਨ. ਨਿਟ੍ਠਾਗਤਮ੍ਹਾਤਿ ਨਿਪ੍ਫਤ੍ਤਿਂ ਗਤਾ ਅਮ੍ਹਾ ਤੇਵਿਜ੍ਜਾਯ ਸਕਸਮਯਸ੍ਸ ਕਥਨੇ.

ਮਨੋਕਮ੍ਮਤੋ ਹਿ ਵਤ੍ਤਸਮ੍ਪਦਾਤਿਕਾਰਣੂਪਚਾਰੇਨਾਯਮਤ੍ਥੋ ਵੁਤ੍ਤੋਤਿ ਆਹ – ‘‘ਤੇਨ ਸਮਨ੍ਨਾਗਤੋ ਹਿ ਆਚਾਰਸਮ੍ਪਨ੍ਨੋ ਹੋਤੀ’’ਤਿ.

ਖਯਾਤੀਤਨ੍ਤਿ ਵਡ੍ਢਿਪਕ੍ਖੇ ਠਿਤਨ੍ਤਿ ਅਤ੍ਥੋ. ਸੁਕ੍ਕਪਕ੍ਖਪਾਟਿਪਦਤੋ ਪਟ੍ਠਾਯ ਹਿ ਚਨ੍ਦੋ ਵਡ੍ਢਤੀਤਿ ਵੁਚ੍ਚਤਿ, ਨ ਖੀਯਤੀਤਿ. ਵਨ੍ਦਮਾਨਾ ਜਨਾ ਨਮਕ੍ਕਾਰਂ ਕਰੋਨ੍ਤਿ.

ਅਤ੍ਥਦਸ੍ਸਨੇਨਾਤਿ ਵਿਵਰਣੇਨ ਦਸ੍ਸਨਪਰਿਣਾਯਕਟ੍ਠੇਨ ਲੋਕਸ੍ਸ ਚਕ੍ਖੁ ਹੁਤ੍ਵਾ ਸਮੁਪ੍ਪਨ੍ਨਂ.

੪੫੬. ਤਿਟ੍ਠਤੁ ਤਾਵ ਬ੍ਰਾਹ੍ਮਣਚਿਨ੍ਤਾਤਿ – ‘‘ਕਿਂ ਜਾਤਿਯਾ ਬ੍ਰਾਹ੍ਮਣੋ ਹੋਤਿ ਉਦਾਹੁ ਭਵਤਿ ਕਮ੍ਮੁਨਾ’’ਤਿ ਅਯਂ ਬ੍ਰਾਹ੍ਮਣਵਿਚਾਰੋ ਤਾਵ ਤਿਟ੍ਠਤੁ. ਜਾਤਿਦਸ੍ਸਨਤ੍ਥਂ ਤਿਣਰੁਕ੍ਖਕੀਟਪਟਙ੍ਗਤੋ ਪਟ੍ਠਾਯ ਲੋਕੇ ਜਾਤਿਵਿਭਙ੍ਗਂ ਵਿਤ੍ਥਾਰਤੋ ਕਥੇਸ੍ਸਾਮੀਤਿ ਤੇਸਂ ਚਿਤ੍ਤਸਮ੍ਪਹਂਸਨਤ੍ਥਂ ਦੇਸੇਤਬ੍ਬਮਤ੍ਥਂ ਪਟਿਜਾਨਾਤਿ. ਤਤ੍ਥ ਅਞ੍ਞਮਞ੍ਞਾ ਹਿ ਜਾਤਿਯੋਤਿ ਇਦਂ ਕਾਰਣਵਚਨਂ, ਯਸ੍ਮਾ ਇਮਾ ਜਾਤਿਯੋ ਨਾਮ ਅਞ੍ਞਮਞ੍ਞਂ ਵਿਸਿਟ੍ਠਾ, ਤਸ੍ਮਾ ਜਾਤਿਵਿਭਙ੍ਗਂ ਬ੍ਯਾਕਰਿਸ੍ਸਾਮੀਤਿ.

ਯਸ੍ਮਾ ਇਧ ਉਪਾਦਿਨ੍ਨਕਜਾਤਿ ਬ੍ਯਾਕਾਤਬ੍ਬਭਾਵੇਨ ਆਗਤਾ, ਤਸ੍ਸਾ ਪਨ ਨਿਦਸ੍ਸਨਭਾਵੇਨ ਇਤਰਾ, ਤਸ੍ਮਾ ‘‘ਜਾਤਿਵਿਭਙ੍ਗਂ ਪਾਣਾਨ’’ਨ੍ਤਿ ਪਾਲ਼ਿਯਂ ਵੁਤ੍ਤਂ. ਤੇਸਂ ਤੇਸਂ ਪਾਣਾਨਂ ਜਾਤਿਯੋਤਿ ਅਤ੍ਥੋ. ਏਵਨ੍ਤਿ ਨਿਦਸ੍ਸਨਂ ਕਥੇਤ੍ਵਾ ਨਿਦਸ੍ਸਿਤਬ੍ਬੇ ਕਥਿਯਮਾਨੇ. ਤਸ੍ਸਾਤਿ ਵਾਸੇਟ੍ਠਸ੍ਸ. ਕਾਮਂ ‘‘ਤੇਸਂ ਵੋਹਂ ਬ੍ਯਕ੍ਖਿਸ੍ਸ’’ਨ੍ਤਿ ਉਭੋਪਿ ਮਾਣਵੇ ਨਿਸ੍ਸਾਯ ਦੇਸਨਾ ਆਗਤਾ, ਤਥਾਪਿ ਤਤ੍ਥ ਤਤ੍ਥ ‘‘ਏਵਂ, ਵਾਸੇਟ੍ਠ, ਜਾਨਾਹੀ’’ਤਿਆਦਿਨਾ ਵਾਸੇਟ੍ਠਮੇਵ ਆਲਪਨ੍ਤੋ ਭਗਵਾ ਤਮੇਵ ਇਮਿਨਾ ਨਿਯਾਮੇਨ ਪਮੁਖਂ ਅਕਾਸਿ. ਤੇਨ ਵੁਤ੍ਤਂ ‘‘ਤਸ੍ਸਾਤਿ ਵਾਸੇਟ੍ਠਸ੍ਸਾ’’ਤਿ. ਜਾਤਿਭੇਦੋ ਜਾਤਿਵਿਸੇਸੋ, ਜਾਤਿਯਾ ਭੇਦੋ ਪਾਕਟੋ ਭਵਿਸ੍ਸਤਿ ਨਿਦਸ੍ਸਨੇਨ ਵਿਭੂਤਭਾਵਂ ਆਪਾਦਿਤੇਨ ਪਟਿਞ੍ਞਾਤਸ੍ਸ ਅਤ੍ਥਸ੍ਸ ਵਿਭੂਤਭਾਵਾਪਤ੍ਤਿਤੋ. ਆਮ ਨ ਵਟ੍ਟਤੀਤਿ ਕਮ੍ਮਨਾਨਤਾਯ ਏਵ ਉਪਾਦਿਨ੍ਨਨਾਨਤਾਯ ਪਟਿਕ੍ਖੇਪਪਦਮੇਤਂ, ਨ ਬੀਜਨਾਨਤਾਯ ਅਨੁਪਾਦਿਨ੍ਨਨਾਨਤਾਯ ਪਟਿਕ੍ਖੇਪਪਦਨ੍ਤਿ ਦਸ੍ਸੇਤੁਂ ‘‘ਕਮ੍ਮਂ ਹੀ’’ਤਿਆਦਿ ਵੁਤ੍ਤਂ. ਤਸ੍ਸਤ੍ਥੋ – ਤਂਤਂਯੋਨਿਖਿਪਨਮਤ੍ਤਂ ਕਮ੍ਮਸ੍ਸ ਸਾਮਤ੍ਥਿਯਂ, ਤਂਤਂਯੋਨਿਨਿਯਤਾ ਪਨ ਯੇ ਵਣ੍ਣਵਿਸੇਸਾ, ਤੇ ਤਂਤਂਯੋਨਿਸਿਦ੍ਧਿਯਾਵ ਸਿਦ੍ਧਾ ਹੋਨ੍ਤੀਤਿ ਤਂ ਪਨ ਯੋਨਿਖਿਪਨਕਮ੍ਮਂ ਤਂਤਂਯੋਨਿਵਿਸਿਟ੍ਠ-ਵਿਸੇਸਾਭਿਭੂਤਾਯ ਪਯੋਗਨਿਪ੍ਫਤ੍ਤਿਯਾ, ਅਸਂਮੁਚ੍ਛਿਤਾਯ ਏਵ ਵਾ ਪਚ੍ਚਯਭੂਤਾਯ ਭਵਪਤ੍ਥਨਾਯ ਅਭਿਸਙ੍ਖਤਮੇਵਾਤਿ ਵਿਞ੍ਞਾਤਬ੍ਬਪਚ੍ਚਯਵਿਸੇਸੇਨ ਵਿਨਾ ਫਲਵਿਸੇਸਾਭਾਵਤੋ ਏਤਂ ਸਮੀਹਿਤਕਮ੍ਮਂ ਪਤ੍ਥਨਾਦੀਹਿ ਚ ਭਿਨ੍ਨਸਤ੍ਤਿਤਂ ਵਿਸਿਟ੍ਠਸਾਮਤ੍ਥਿਯਂ ਵਾ ਆਪਜ੍ਜਿਤ੍ਵਾ ਚਕ੍ਖੁਨ੍ਦ੍ਰਿਯਾਦਿਵਿਸਿਟ੍ਠਫਲਨਿਬ੍ਬਤ੍ਤਕਂ ਜਾਯਤਿ, ਏਵਂ ਯੋਨਿਖਿਪਨਤਂਯੋਨਿਨਿਯਤਵਿਸੇਸਾਵਹਤਾ ਹੋਤੀਤਿ. ਥੇਰੇਨ ਹਿ ਬੀਜਨਾਨਤਾ ਵਿਯ ਕਮ੍ਮਨਾਨਤਾਪਿ ਉਪਾਦਿਨ੍ਨਕਨਾਨਤਾਯ ਸਿਯਾ ਨੁ ਖੋ ਪਚ੍ਚਯੋਤਿ ਚੋਦਨਂ ਪਟਿਕ੍ਖਿਪਿਤ੍ਵਾ ਪਚ੍ਚਯਵਿਸੇਸਵਿਸਿਟ੍ਠਾ ਕਮ੍ਮਨਾਨਤਾ ਪਨ ਪਚ੍ਚਯੋਤਿ ਨਿਚ੍ਛਿਤਨ੍ਤਿ ਦਟ੍ਠਬ੍ਬਂ.

ਨਾਨਾਵਣ੍ਣਾਤਿ ਨਾਨਪ੍ਪਕਾਰਵਣ੍ਣਾ. ਤਾਲਨਾਲ਼ਿਕੇਰਾਦੀਨਂ ਲੋਕੇ ਅਭਿਞ੍ਞਾਤਤਿਣਜਾਤਿਭਾਵਤੋ ਵਿਸੇਸੇਨ ਗਯ੍ਹਤਿ ਅਭਿਞ੍ਞਾਤਸੋਤਨਯੇਨ. ਜਾਤਿਯਾ ਬ੍ਰਾਹ੍ਮਣੋਵਾਤਿ ਅਟ੍ਠਾਨਪਯੁਤ੍ਤੋ ਏਵ-ਸਦ੍ਦੋ, ਜਾਤਿਯਾਵ ਬ੍ਰਾਹ੍ਮਣੋ ਭਵੇਯ੍ਯਾਤਿ ਯੋਜਨਾ. ਨ ਚ ਗਯ੍ਹਤੀਤਿ ਤਿਣਰੁਕ੍ਖਾਦੀਸੁ ਵਿਯ ਬ੍ਰਾਹ੍ਮਣੇਸੁ ਜਾਤਿਨਿਯਤਸ੍ਸ ਲਿਙ੍ਗਸ੍ਸ ਅਨੁਪਲਬ੍ਭਨਤੋ, ਪਿਵਨਭੁਞ੍ਜਨਕਥਨਹਸਨਾਦਿਕਿਰਿਯਾਯ ਬ੍ਰਾਹ੍ਮਣਭਾਵੇਨ ਏਕਨ੍ਤਿਕਲਿਙ੍ਗਨਿਯਤਾਯ ਮਨ੍ਤਜ੍ਝੇਨਾਦਿਂ ਵਿਨਾ ਅਨੁਪਲਬ੍ਭਨਤੋ ਚ. ਵਚੀਭੇਦੇਨੇਵਾਤਿ ਆਹਚ੍ਚਵਚਨੇਨੇਵ.

ਕੀਟੇ ਪਟਙ੍ਗੇਤਿਆਦੀਸੁ ਜਾਤਿਨਾਨਤਾ ਲਬ੍ਭਤਿ ਅਞ੍ਞਮਞ੍ਞਲਿਙ੍ਗਵਿਸਿਟ੍ਠਤਾਦਸ੍ਸਨਾ. ਕੁਨ੍ਥਾ ਕੀਟਕਾ, ਖਜ੍ਜਖਾਦਕਾ ਕਿਪਿਲ੍ਲਿਕਾ. ਉਪ੍ਪਤਿਤ੍ਵਾਤਿ ਉਡ੍ਡੇਤ੍ਵਾ ਉਡ੍ਡੇਤ੍ਵਾ. ਪਟਭਾਵਂ ਗਚ੍ਛਨ੍ਤੀਤਿ ਵਾ ਪਟਙ੍ਗਾ, ਨ ਖੁਦ੍ਦਕਪਾਣਕਾ ਕੀਟਾ ਨਾਮ. ਤੇਸਮ੍ਪਿ ਕੀਟਕਾਨਂ.

ਕਾਲ਼ਕਾਦਯੋਤਿ ਕਲਨ੍ਦਕਾਦਯੋ.

ਉਦਰਂਯੇਵ ਨੇਸਂ ਪਾਦਾ ਉਦਰੇਨੇਵ ਸਮ੍ਪਜ੍ਜਨਤੋ.

ਸਞ੍ਞਾਪੁਬ੍ਬਕੋ ਵਿਧਿ ਅਨਿਚ੍ਚੋਤਿ ਦਸ੍ਸੇਨ੍ਤੋ ‘‘ਉਦਕੇ’’ਤਿ ਆਹ ਯਥਾ ‘‘ਵੀਰਸ੍ਸ ਭਾਵੋ ਵੀਰਿਯ’’ਨ੍ਤਿ.

ਪਤ੍ਤਸਮੁਦਾਯੇ ਪਕ੍ਖਸਦ੍ਦੋਤਿ ‘‘ਪਤ੍ਤੇਹਿ ਯਨ੍ਤੀ’’ਤਿ ਵੁਤ੍ਤਂ. ਨ ਹਿ ਅਵਯਵਬ੍ਯਤਿਰੇਕੇਨ ਸਮੁਦਾਯੋ ਅਤ੍ਥਿ.

ਸਙ੍ਖੇਪੇਨ ਵੁਤ੍ਤੋ ‘‘ਜਾਤਿਵਸੇਨ ਨਾਨਾ’’ਤਿਆਦਿਨਾ. ਏਤ੍ਥ ਪਦਤ੍ਥੇ ਦੁਬ੍ਬਿਞ੍ਞੇਯ੍ਯਂ ਨਤ੍ਥੀਤਿ ਸਮ੍ਬਨ੍ਧਮਤ੍ਤਂ ਦਸ੍ਸੇਤੁਂ ‘‘ਤਤ੍ਰਾਯਂ ਯੋਜਨਾ’’ਤਿਆਦਿ ਵੁਤ੍ਤਂ. ‘‘ਨ ਹਿ ਬ੍ਰਾਹ੍ਮਣਾਨਂ ਏਦਿਸਂ ਸੀਸਂ ਹੋਤਿ, ਖਤ੍ਤਿਯਾਨਂ ਏਦਿਸਨ੍ਤਿ ਨਿਯਮੋ ਅਤ੍ਥਿ ਯਥਾ ਹਤ੍ਥਿਅਸ੍ਸਮਿਗਾਦੀਨ’’ਨ੍ਤਿ ਇਦਮੇਵ ਵਾਕ੍ਯਂ ਸਬ੍ਬਤ੍ਥ ਨੇਤਬ੍ਬਂ. ਤਂ ਸਂਙ੍ਖਿਪਿਤ੍ਵਾ ਦਸ੍ਸੇਨ੍ਤੋ ‘‘ਇਮਿਨਾ ਨਯੇਨ ਸਬ੍ਬਂ ਯੋਜੇਤਬ੍ਬ’’ਨ੍ਤਿ ਆਹ.

ਤਸ੍ਸਾਤਿ ਯਥਾਵੁਤ੍ਤਨਿਗਮਨਵਚਨਸ੍ਸ ਅਯਂ ਯੋਜਨਾ ਇਦਾਨਿ ਵੁਚ੍ਚਮਾਨਾ ਯੋਜਨਾ ਵੇਦਿਤਬ੍ਬਾ.

੪੫੭. ਵੋਕਾਰਨ੍ਤਿ ਵੋਕਰਣਂ, ਯੇਨ ਵਿਸਿਟ੍ਠਤਾਯ ਨ ਵੋਕਰੀਯਤਿ ਜਾਤਿਭੇਦੋਤਿ ਅਤ੍ਥੋ. ਤੇਨਾਹ ‘‘ਨਾਨਤ੍ਤ’’ਨ੍ਤਿ.

ਗੋਰਕ੍ਖਾਦਿਉਪਜੀਵਨੇਨ ਆਜੀਵਵਿਪਨ੍ਨੋ, ਹਿਂਸਾਦਿਨਾ ਸੀਲਵਿਪਨ੍ਨੋ, ਨਿਕ੍ਖਿਤ੍ਤਵਤ੍ਤਤਾਦਿਨਾ ਆਚਾਰਵਿਪਨ੍ਨੋਤਿ. ਸਾਮਞ੍ਞਜੋਤਨਾ ਵਿਸੇਸੇ ਨਿਵਿਟ੍ਠਾ ਹੋਤੀਤਿ ਆਹ ‘‘ਗੋਰਕ੍ਖਨ੍ਤਿ ਖੇਤ੍ਤਰਕ੍ਖ’’ਨ੍ਤਿ. ‘‘ਗੋਤਿ ਹਿ ਪਥਵਿਯਾ ਨਾਮ’’ਨ੍ਤਿ. ਤੇਹਿ ਤੇਹਿ ਉਪਾਯੇਹਿ ਸਿਕ੍ਖਿਤਬ੍ਬਟ੍ਠੇਨ ਸਿਪ੍ਪਂ, ਤਤ੍ਥ ਕੋਸਲ੍ਲਂ. ਪਰੇਸਂ ਈਸਨਟ੍ਠੇਨ ਹਿਂਸਨਟ੍ਠੇਨ ਇਸ੍ਸੋ, ਸੋ ਅਸ੍ਸ ਅਤ੍ਥੀਤਿ ਇਸ੍ਸੋ ਯੋਧਾਜੀਵਿਕੋ, ਇਸ੍ਸਸ੍ਸ ਕਮ੍ਮਂ ਪਹਰਣਂ, ਉਸੁਂ ਸਤ੍ਤਿਞ੍ਚ ਨਿਸ੍ਸਾਯ ਪਵਤ੍ਤਾ ਜੀਵਿਕਾ ਇਸ੍ਸਤ੍ਤਂ. ਤੇਨਾਹ ‘‘ਆਵੁਧਜੀਵਿਕ’’ਨ੍ਤਿ. ਯਂ ਨਿਸ੍ਸਾਯ ਅਸ੍ਸ ਜੀਵਿਕਾ, ਤਦੇਵ ਦਸ੍ਸੇਤੁਂ ‘‘ਉਸੁਞ੍ਚ ਸਤ੍ਤਿਞ੍ਚਾ’’ਤਿ ਵੁਤ੍ਤਂ.

ਬ੍ਰਹ੍ਮਂ ਵੁਚ੍ਚਤਿ ਵੇਦੋ, ਤਂ ਅਣਤਿ ਜਾਨਾਤੀਤਿ ਬ੍ਰਾਹ੍ਮਣੋ, ਜਾਨਨਞ੍ਚ ਪੋਰਾਣੇਹਿ ਬ੍ਰਾਹ੍ਮਣੇਹਿ ਵਿਹਿਤਨਿਯਾਮੇਨ ਬ੍ਰਾਹ੍ਮਣੇਹਿ ਕਤੋਪਸਮੇਨ ਅਨੁਟ੍ਠਾਨਤਪੇਨ ਯਥਾ ‘‘ਆਜੀਵਸੀਲਾਚਾਰਵਿਪਨ੍ਨੋ ਨਤ੍ਥੀ’’ਤਿ ਬ੍ਰਾਹ੍ਮਣਧਮ੍ਮਿਕੇਹਿ ਲੋਕਿਯਪਣ੍ਡਿਤੇਹਿ ਚ ਸਮ੍ਪਟਿਚ੍ਛਿਤੋ, ਤਥਾ ਪਟਿਪਜ੍ਜਨਮੇਵਾਤਿ ਆਹ ‘‘ਏਵਂ ਬ੍ਰਾਹ੍ਮਣਸਮਯੇਨ…ਪੇ… ਸਾਧੇਤ੍ਵਾ’’ਤਿ. ਏਵਂ ਸਨ੍ਤੇਤਿ ਏਵਂ ਆਜੀਵਸੀਲਾਚਾਰਵਿਪਨ੍ਨਸ੍ਸ ਅਬ੍ਰਾਹ੍ਮਣਭਾਵੇ ਸਤਿ ਨ ਜਾਤਿਯਾ ਬ੍ਰਾਹ੍ਮਣੋ ਹੋਤਿ, ਗੁਣੇਹਿ ਪਨ ਆਜੀਵਸੀਲਾਚਾਰਸਮ੍ਪਤ੍ਤਿਸਙ੍ਖਾਤੇਹਿ ਬ੍ਰਾਹ੍ਮਣੋ ਹੋਤਿ, ਤਸ੍ਮਾ ਗੁਣਾਨਂਯੇਵ ਬ੍ਰਾਹ੍ਮਣਭਾਵਕਰਣਤੋ ਚਤੁਵਣ੍ਣਵਿਭਾਗੇ ਯਤ੍ਥ ਕਤ੍ਥਚਿ ਕੁਲੇ ਜਾਤੋ ਯੋ ਸੀਲਾਦਿਗੁਣਸਮ੍ਪਨ੍ਨਤਾਯ ਗੁਣਵਾ, ਸੋ ਵੁਤ੍ਤਲਕ੍ਖਣੇਨ ਨਿਪ੍ਪਰਿਯਾਯਤੋ ਬਾਹਿਤਪਾਪਤਾਯ ਬ੍ਰਾਹ੍ਮਣੋਤਿ ਅਯਮੇਤ੍ਥ ਬ੍ਰਾਹ੍ਮਣਭਾਵੇ ਞਾਯੋਤਿ, ਏਵਂ ਞਾਯਂ ਅਤ੍ਥਤੋ ਆਪਨ੍ਨਂ ਕਤ੍ਵਾ. ਨਨ੍ਤਿ ਤਮੇਵ ਯਥਾਵੁਤ੍ਤਂ ਞਾਯਂ. ਯੋ ਬ੍ਰਾਹ੍ਮਣਸ੍ਸ ਸਂਵਣ੍ਣਿਤਾਯਾਤਿ ਮਾਤੁਯਾ ਉਭਤੋਸੁਜਾਤਤਾਦਿਕੁਲਵਣ੍ਣੇਨ ਸਂਵਣ੍ਣਿਤਾਯ ਪਸਤ੍ਥਾਯ ਯਥਾਰੂਪਾਯ ਬ੍ਰਾਹ੍ਮਣਸ੍ਸ ਮਾਤਾ ਭਵਿਤੁਂ ਯੁਤ੍ਤਾ, ਤਥਾਰੂਪਾਯ ਮਾਤਰਿਸਮ੍ਭੂਤੋ. ਏਤੇਨ ਚਤੁਨ੍ਨਂ ਯੋਨੀਨਂ ਯਤ੍ਥ ਕਤ੍ਥਚਿ ਵਿਸੇਸਨਿਟ੍ਠਾ ਕਤਾ. ਤੇਨਾਹ ‘‘ਤਤ੍ਰਾਪਿ ਵਿਸੇਸੇਨਾ’’ਤਿ. ਏਵਂ ਸਾਮਞ੍ਞਤੋ ਵਿਸੇਸਨਿਟ੍ਠਾਵਸੇਨ ‘‘ਯੋਨਿਜਂ ਮਤ੍ਤਿਸਮ੍ਭਵ’’ਨ੍ਤਿ ਪਦਸ੍ਸ ਅਤ੍ਥਂ ਵਤ੍ਵਾ ਇਦਾਨਿ ਸਾਮਞ੍ਞਜੋਤਨਂ ਅਨਾਦਿਯਿਤ੍ਵਾ ਵਿਸੇਸਜੋਤਨਾਵਸੇਨੇਵ ਅਤ੍ਥਂ ਵਤ੍ਤੁਂ ‘‘ਯਾਚਾਯ’’ਨ੍ਤਿਆਦਿ ਵੁਤ੍ਤਂ. ਪਰਿਸੁਦ੍ਧਉਪ੍ਪਤ੍ਤਿਮਗ੍ਗਸਙ੍ਖਾਤਾ ਯੋਨਿ ਵੁਤ੍ਤਾਤਿ ਅਨੁਪਕ੍ਕੁਟ੍ਠਭਾਵੇਨ ਪਰਿਸੁਦ੍ਧਉਪ੍ਪਤ੍ਤਿਮਗ੍ਗਸਙ੍ਖਾਤਾ ਯਾ ਚਾਯਂ ਯੋਨਿ ਵੁਤ੍ਤਾਤਿ ਸਮ੍ਬਨ੍ਧੋ. ਤਤੋਪਿ ਜਾਤਸਮ੍ਭੂਤਤ੍ਤਾਤਿ ਤਤੋ ਯੋਨਿਤੋ ਜਾਤਤ੍ਤਾ ਮਾਤਾਪੇਤ੍ਤਿਸਮ੍ਪਤ੍ਤਿਤੋ ਸਮ੍ਭੂਤਤ੍ਤਾ.

ਵਿਸਿਟ੍ਠਤ੍ਤਾਤਿ ਸਮੁਦਾਯਭੂਤਾ ਮਨੁਸ੍ਸਾ ਰਾਗਾਦਿਨਾ ਵਿਸਿਟ੍ਠਤ੍ਤਾ. ਰਾਗਾਦਿਨਾ ਸਹ ਕਿਞ੍ਚਨੇਨਾਤਿ ਸਕਿਞ੍ਚਨੋ. ਤਥੇਵ ਰਾਗਾਦਿਸਙ੍ਖਾਤੇਨ ਪਲਿਬੋਧਨਟ੍ਠੇਨ ਸਹ ਪਲਿਬੋਧੇਨਾਤਿ ਸਪਲਿਬੋਧੋ. ਸਬ੍ਬਗਹਣਪਟਿਨਿਸ੍ਸਗ੍ਗੇਨਾਤਿ ਉਪਾਦਾਨਸਙ੍ਖਾਤਸ੍ਸ ਸਬ੍ਬਸ੍ਸ ਗਹਣਸ੍ਸ ਪਟਿਨਿਸ੍ਸਜ੍ਜਨੇਨ. ਯਸ੍ਮਾ ਬਾਹਿਤਪਾਪੋ ਅਤ੍ਤਨੋ ਸਨ੍ਤਾਨਤੋ ਬਹਿਕਤਪਾਪੋ, ਤਸ੍ਮਾ ਤਮਹਂ ਬ੍ਰੂਮਿ ਬ੍ਰਾਹ੍ਮਣਨ੍ਤਿ ਅਤ੍ਥੋ ਵਤ੍ਤਬ੍ਬੋ. ਏਵਰੂਪੋ ਏਤਿਸ੍ਸਾ ਕਥਾਯ ਉਪਦੇਸੋ ਨਾਨਪ੍ਪਕਾਰਤੋ ਵਿਭਤ੍ਤੋ, ਤਸ੍ਮਾ ਤਤ੍ਥ ਤਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

੪੫੮. ਗਹਿਤਦਣ੍ਡੇਸੂਤਿ ਪਰੇਸਂ ਦਣ੍ਡੇਨ ਵਿਹੇਠਨਂ ਅਨਿਧਾਯ ਆਦਿਨ੍ਨਦਣ੍ਡੇਸੁ.

੪੫੯. ਕਿਞ੍ਚਿ ਗਹਣਨ੍ਤਿ ਤਣ੍ਹਾਗਾਹਾਦੀਸੁ ਕਿਞ੍ਚਿ ਗਾਹਂ.

ਯੇਨ ਕਾਮਭਵੇਨ ਮਾਨੁਸਕੇਹਿ ਪਞ੍ਚਹਿ ਕਾਮਗੁਣੇਹਿ ਯੁਞ੍ਜਤਿ, ਤਂ ਮਾਨੁਸਕਂ ਯੋਗਂ. ‘‘ਮਾਨੁਸਕਂ ਯੋਗ’’ਨ੍ਤਿ ਏਤ੍ਥ ਚ ਏਕਦੇਸਂ ਗਹੇਤ੍ਵਾ ਵੁਤ੍ਤਂ, ਏਸ ਨਯੋ ‘‘ਦਿਬ੍ਬਯੋਗ’’ਨ੍ਤਿ ਏਤ੍ਥਾਪਿ. ਸਬ੍ਬਯੋਗਵਿਸਂਯੁਤ੍ਤਨ੍ਤਿ ਪਦਦ੍ਵਯੇਨ ਵੁਤ੍ਤੇਹਿ ਸਬ੍ਬਕਿਲੇਸਯੋਗੇਹਿ ਵਿਪ੍ਪਯੁਤ੍ਤਂ.

ਰਤਿਨ੍ਤਿ ਅਭਿਰਤਿਂ ਆਸਤ੍ਤਿਂ. ਕੁਸਲਭਾਵਨਾਯਾਤਿ ਕਾਯਭਾਵਨਾਦਿ ਕੁਸਲਧਮ੍ਮਭਾਵਨਾਯ ਉਕ੍ਕਣ੍ਠਿਤਂ. ਵੀਰਿਯਵਨ੍ਤਨ੍ਤਿ ਵੀਰਿਯਸਬ੍ਭਾਵੇਨ ਵੀਰਂ ਨਿਦ੍ਦਿਸਤਿ, ਵੀਰਭਾਵੋ ਹਿ ਵੀਰਿਯਨ੍ਤਿ.

ਸੁਨ੍ਦਰਂ ਠਾਨਨ੍ਤਿ ਨਿਬ੍ਬਾਨਂ. ਸੁਨ੍ਦਰਾਯ ਪਟਿਪਤ੍ਤਿਯਾ ਅਰਿਯਪਟਿਪਤ੍ਤਿਯਾ.

ਨਿਬ੍ਬਤ੍ਤਿਨ੍ਤਿ ਪਰਿਯੋਸਾਨਂ. ਅਤੀਤੇਤਿ ਅਤੀਤਕੋਟ੍ਠਾਸੇ. ਕਿਞ੍ਚਨਕਾਰਕੋਤਿ ਪਲਿਬੋਧਹੇਤੁਭੂਤੋ.

ਅਸੇਕ੍ਖੇ ਸੀਲਕ੍ਖਨ੍ਧਾਦਿਕੇ ਮਹਨ੍ਤੇ ਗੁਣੇ. ਪਞ੍ਚਨ੍ਨਂ ਮਾਰਾਨਂ ਵਿਜਿਤਤ੍ਤਾ ਵਿਜਿਤਵਿਜਯਂ.

੪੬੦. ਇਦਂ ਅਜਾਨਨ੍ਤਾਤਿ ‘‘ਜਾਤਿਯਾ ਬ੍ਰਾਹ੍ਮਣੋ’’ਤਿ ਇਦਂ ਲੋਕਸਮਞ੍ਞਾਮਤ੍ਤਨ੍ਤਿ ਅਜਾਨਨ੍ਤਾ. ਯੇ ਬ੍ਰਾਹ੍ਮਣੇਸੁ ਨਾਮਗੋਤ੍ਤਂ ਨਾਮ ਤਤਿਯਂ ਦਿਟ੍ਠਾਭਿਨਿਵੇਸਂ ਜਨੇਨ੍ਤਿ, ਸਾਵ ਨੇਸਂ ਦਿਟ੍ਠਿ. ਕਤਂ ਅਭਿਸਙ੍ਖਤਨ੍ਤਿ ਪਰਿਕਪ੍ਪਨਵਸੇਨੇਵ ਕਤਂ ਠਪਿਤਂ ਤਦੁਪਚਿਤਂ, ਨ ਹੇਤੁਪਚ੍ਚਯਸਮਾਯੋਗੇਨ. ਸਮੁਚ੍ਚਾਤਿ ਸਮ੍ਮੁਤਿਯਾ. ਕਾ ਪਨ ਸਾ ਸਮ੍ਮੁਤੀਤਿ ਆਹ ‘‘ਸਮਞ੍ਞਾਯਾ’’ਤਿ, ਲੋਕਸਮਞ੍ਞਾਤੇਨਾਤਿ ਅਤ੍ਥੋ. ਸਮ੍ਮਾ ਪਨ ਪਰਮਤ੍ਥਤੋ ਅਜਾਨਨ੍ਤਾਨਂ ਨਾਮਗੋਤ੍ਤਂ ਏਵਂ ਕਪ੍ਪੇਤੀਤਿ ਆਹ ‘‘ਨੋ ਚੇ’’ਤਿਆਦਿ. ਤਂ ਪਨ ਅਸਨ੍ਤਮ੍ਪਿ ਪਰਮਤ੍ਥਤੋ ਸਨ੍ਤਤਾਯੇਵ ਅਭਿਨਿਵਿਸਨ੍ਤਿ, ਤੇਸਮਯਂ ਦੋਸੋਤਿ ਦਸ੍ਸੇਤੁਂ ‘‘ਏਵਂ ਪਕਪ੍ਪਿਤ’’ਨ੍ਤਿਆਦਿ ਵੁਤ੍ਤਂ. ਤੇਨਾਹ ਭਗਵਾ – ‘‘ਜਨਪਦਨਿਰੁਤ੍ਤਿਂ ਨਾਭਿਨਿਵੇਸੇਯ੍ਯਾ’’ਤਿ (ਮ. ਨਿ. ੩.੩੩੧). ਅਜਾਨਨ੍ਤਾ ਨੋਤਿ ਏਤ੍ਥ ਨੋ-ਸਦ੍ਦੋ ਅਵਧਾਰਣਤ੍ਥੋ – ‘‘ਨ ਨੋ ਸਮਂ ਅਤ੍ਥਿ ਤਥਾਗਤੇਨਾ’’ਤਿਆਦੀਸੁ (ਖੁ. ਪਾ. ੬.੩) ਵਿਯਾਤਿ ਆਹ ‘‘ਅਜਾਨਨ੍ਤਾਵ ਏਵਂ ਵਦਨ੍ਤੀ’’ਤਿ.

ਨਿਪ੍ਪਰਿਯਾਯਨ੍ਤਿ ਭਾਵਨਪੁਂਸਕਨਿਦ੍ਦੇਸੋ, ਨਿਪ੍ਪਰਿਯਾਯੇਨ ਉਜੁਕਮੇਵਾਤਿ ਅਤ੍ਥੋ, ਨ ਪੁਬ੍ਬੇ ਵਿਯ ‘‘ਯੋ ਹਿ ਕੋਚੀ’’ਤਿ ਪਰਿਯਾਯਵਸੇਨ. ‘‘ਨ ਜਚ੍ਚਾ’’ਤਿ ਗਾਥਾਯ ਪੁਬ੍ਬਦ੍ਧੇਨ ਜਾਤਿਵਾਦਂ ਪਟਿਕ੍ਖਿਪਨ੍ਤੋ ਪਚ੍ਛਿਮਦ੍ਧੇਨ ਕਮ੍ਮਵਾਦਂ ਪਤਿਟ੍ਠਪੇਨ੍ਤੋ. ਤਤ੍ਥਾਤਿ ਤਿਸ੍ਸਂ ਗਾਥਾਯਂ. ਉਪਡ੍ਢਗਾਥਾਯ ਵਿਤ੍ਥਾਰਣਤ੍ਥਨ੍ਤਿ ਉਪਡ੍ਢਗਾਥਾਯ ਅਤ੍ਥਂ ਵਿਤ੍ਥਾਰੇਤੁਂ ‘‘ਕਸ੍ਸਕੋ ਕਮ੍ਮੁਨਾ’’ਤਿ ਵੁਤ੍ਤਂ. ਤਤ੍ਥ ਪੁਰਿਮਾਯ ਚਤੂਹਿ ਪਾਦੇਹਿ, ਪਚ੍ਛਿਮੇ ਦ੍ਵੀਹਿ ਦ੍ਵਿਨ੍ਨਮ੍ਪਿ ਸਾਧਾਰਣਤੋ ਅਤ੍ਥੋ ਵਿਤ੍ਥਾਰਿਤੋ. ਤਤ੍ਥ ਕਸਿਕਮ੍ਮਾਦੀਤਿ ਆਦਿ-ਸਦ੍ਦੇਨ ਸਿਪ੍ਪਕਮ੍ਮਵਾਣਿਜਾਦਿ ਸਙ੍ਗਹੋ.

ਪਟਿਚ੍ਚਸਮੁਪ੍ਪਾਦਪਧਾਨਵਚਨਵਿਞ੍ਞੇਯ੍ਯੋ ਪਚ੍ਚਯੋ ਪਟਿਚ੍ਚਸਮੁਪ੍ਪਾਦਸਦ੍ਦਸ੍ਸ ਅਤ੍ਥੋ ਪਚ੍ਚਯੁਪ੍ਪਨ੍ਨਾਪੇਕ੍ਖਾਯ ਹੋਤੀਤਿ ਆਹ – ‘‘ਇਮਿਨਾ ਪਚ੍ਚਯੇਨ ਏਤਂ ਹੋਤੀ’’ਤਿ. ਯਂ ਪਨੇਤ੍ਥ ਵਤ੍ਤਬ੍ਬਂ, ਤਂ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੨.੫੭੦) ਤਂਸਂਵਣ੍ਣਨਾਯਞ੍ਚ (ਵਿਸੁਦ੍ਧਿ. ਮਹਾਟੀ. ੨.੫੭੦) ਵੁਤ੍ਤਨਯੇਨ ਵੇਦਿਤਬ੍ਬਂ. ਸਮ੍ਮਾਨਾਵਮਾਨਾਰਹਕੁਲੇਤਿ ਸਮ੍ਮਾਨਾਰਹੇ ਖਤ੍ਤਿਯਾਦਿਕੁਲੇ, ਅਵਮਾਨਾਰਹੇ ਚਣ੍ਡਾਲਾਦਿਕੁਲੇ ਕਮ੍ਮਵਸੇਨ ਉਪਪਤ੍ਤਿ ਹੋਤਿ ਕਮ੍ਮਸ੍ਸ ਵਿਪਚ੍ਚਮਾਨੋਕਾਸਕਰਤਾਯ ਵਿਨਾ ਤਾਦਿਸਾਯ ਉਚ੍ਚਨੀਚਕੁਲਨਿਬ੍ਬਤ੍ਤਿਯਾ ਅਭਾਵਤੋ. ਅਡ੍ਢਦਲਿਦ੍ਦਤਾਦਿ ਅਞ੍ਞਾਪਿ ਹੀਨਪਣੀਤਤਾ.

ਕਮ੍ਮੁਨਾਤਿ ਚੇਤ੍ਥ ਯਥਾ ਲੋਕਪਜਾਸਤ੍ਤਸਦ੍ਦੇਹਿ ਏਕੋ ਏਵਤ੍ਥੋ ਵੁਤ੍ਤੋ, ਏਵਂ ਸੇਸਸਦ੍ਦੇਹਿਪਿ, ਅਧਿਪ੍ਪਾਯਵਿਸੇਸੋ ਪਨ ਤਤ੍ਥ ਅਤ੍ਥੀਤਿ ਦਸ੍ਸੇਤੁਂ ‘‘ਪੁਰਿਮਪਦੇਨ ਚੇਤ੍ਥਾ’’ਤਿਆਦਿ ਵੁਤ੍ਤਂ. ਨਾਯਂ ਲੋਕੋ ਬ੍ਰਹ੍ਮਨਿਮ੍ਮਿਤੋ ਕਮ੍ਮੇਨ ਉਪ੍ਪਜ੍ਜਨਤੋ. ਨ ਹਿ ਸਨ੍ਨਿਹਿਤਕਾਰਣਾਨਂ ਫਲਾਨਂ ਅਞ੍ਞੇਨ ਉਪ੍ਪਤ੍ਤਿਦਿਟ੍ਠਿ ਯੁਜ੍ਜਤਿ. ਤੇਨਾਹ ‘‘ਦਿਟ੍ਠਿਯਾ ਪਟਿਸੇਧੋ ਵੇਦਿਤਬ੍ਬੋ’’ਤਿ. ਯਂ ਪਨੇਤ੍ਥ ਵਤ੍ਤਬ੍ਬਂ ਤਂ ਵਿਸੁਦ੍ਧਿਮਗ੍ਗਸਂਵਣ੍ਣਨਾਦੀਸੁਵੁਤ੍ਤਨਯੇਨ ਵੇਦਿਤਬ੍ਬਂ. ਤਥਾ ਲੋਕਸ੍ਸ ਪਠਮੁਪ੍ਪਤ੍ਤਿ ਨ ਬ੍ਰਹ੍ਮੁਨਾਤਿ ‘‘ਕਮ੍ਮੁਨਾ ਹਿ ਤਾਸੁ ਤਾਸੂ’’ਤਿਆਦਿ ਵੁਤ੍ਤਂ. ਤਤਿਯੇਨ ‘‘ਅਯਂ ਲੋਕੋ ਆਦਿਤੋ ਪਭੁਤਿ ਪਭਵਕਮ੍ਮੁਨਾ ਵਤ੍ਤਤੀ’’ਤਿ ਵੁਤ੍ਤਮਤ੍ਥਂ ਨਿਗਮੇਤਿ.ਵੁਤ੍ਤਸ੍ਸੇਵਤ੍ਥਸ੍ਸ ਸੂਚਨਞ੍ਹਿ ਨਿਗਮਨਂ. ਤਂ ਪਨ ਨਿਯਮਤ੍ਥਂ ਹੋਤੀਤਿ ਆਹ ‘‘ਕਮ੍ਮੇਨੇਵ ਬਦ੍ਧਾ ਹੁਤ੍ਵਾ ਪਵਤ੍ਤਨ੍ਤਿ, ਨ ਅਞ੍ਞਥਾ’’ਤਿ. ਚਤੁਤ੍ਥੇਨ ਪਦੇਨ. ਯਾਯਤੋਤਿ ਗਚ੍ਛਤੋ. ਨਿਬ੍ਬਤ੍ਤਤੋਤਿ ਨਿਬ੍ਬਤ੍ਤਨ੍ਤਸ੍ਸ. ਪਵਤ੍ਤਤੋਤਿ ਪਵਤ੍ਤਨ੍ਤਸ੍ਸ.

ਧੁਤਧਮ੍ਮਾ ਵਿਸੇਸਤੋ ਤਣ੍ਹਾਯ ਸਨ੍ਤਤ੍ਤਵਸੇਨ ਵਤ੍ਤਨ੍ਤੀਤਿ ਆਹ ‘‘ਤਪੇਨਾਤਿ ਧੁਤਙ੍ਗਤਪੇਨਾ’’ਤਿ. ਮੇਥੁਨਵਿਰਤਿ ਵਿਸੇਸਤੋ ਬ੍ਰਾਹ੍ਮਣਾਨਂ ਬ੍ਰਹ੍ਮਚਰਿਯਨ੍ਤਿ ਸਾ ਇਧ ਬ੍ਰਹ੍ਮਚਰਿਯੇਨਾਤਿ ਅਧਿਪ੍ਪੇਤਾਤਿ ਆਹ ‘‘ਬ੍ਰਹ੍ਮਚਰਿਯੇਨਾਤਿ ਮੇਥੁਨਵਿਰਤਿਯਾ’’ਤਿ. ਏਤੇਨਾਤਿ ਇਮਿਨਾ ‘‘ਤਪੇਨਾ’’ਤਿਆਦੀਹਿ ਚਤੂਹਿ ਪਦੇਹਿ ਵੁਤ੍ਤੇਨ. ਸੇਟ੍ਠੇਨਾਤਿ ਉਤ੍ਤਮੇਨ. ਸਂਕਿਲੇਸਵਿਸੁਦ੍ਧਿਯਾ ਪਰਿਸੁਦ੍ਧੇਨ. ਬ੍ਰਹ੍ਮਨ੍ਤਿ ਬ੍ਰਹ੍ਮਭਾਵਂ ਸੇਟ੍ਠਭਾਵਂ. ਸੋ ਪਨੇਤ੍ਥ ਅਤ੍ਥਤੋ ਬ੍ਰਾਹ੍ਮਣਭਾਵੋਤਿ ਆਹ ‘‘ਬ੍ਰਾਹ੍ਮਣਭਾਵਂ ਆਵਹਤੀ’’ਤਿ.

ਬ੍ਰਹ੍ਮਾ ਚ ਸਕ੍ਕੋ ਚਾਤਿ ਸਕ੍ਕਗਰੁਕਾਨਂ ਸਕ੍ਕੋ ਸਕ੍ਕੇਨਪਿ ਗਰੁਕਾਤਬ੍ਬਤੋ, ਬ੍ਰਹ੍ਮਗਰੁਕਾਨਂ ਬ੍ਰਹ੍ਮਾ ਬ੍ਰਹ੍ਮੁਨਾਪਿ ਗਰੁਕਾਤਬ੍ਬਤੋ. ਵਿਜਾਨਤਨ੍ਤਿ ਪਰਮਤ੍ਥਬ੍ਰਾਹ੍ਮਣਸ੍ਸ ਵਿਸੇਸਂ ਜਾਨਨ੍ਤਾਨਂ ਵਿਞ੍ਞੂਨਂ. ਅਵਿਞ੍ਞੁਨੋ ਹਿ ਅਪ੍ਪਮਾਣਂ. ਤੇਨਾਹ – ‘‘ਪਣ੍ਡਿਤਾਨ’’ਨ੍ਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਵਾਸੇਟ੍ਠਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.