੭. ਧਨਞ੍ਜਾਨਿਸੁਤ੍ਤਵਣ੍ਣਨਾ

੪੪੫. ਰਾਜਗਹਂ ਪਰਿਕ੍ਖਿਪਿਤ੍ਵਾ ਠਿਤਪਬ੍ਬਤਸ੍ਸਾਤਿ ਪਣ੍ਡਵਪਬ੍ਬਤਂ ਸਨ੍ਧਾਯਾਹ. ਰਾਜਗਹਨਗਰਸ੍ਸ ਦਕ੍ਖਿਣਦਿਸਾਭਾਗੇ ਪਬ੍ਬਤਸ੍ਸ ਸਮੀਪੇ ਠਿਤੋ ਜਨਪਦੋ ਦਕ੍ਖਿਣਾਗਿਰਿ. ਤਣ੍ਡੁਲਪੁਟਕਾਨਂ ਪਾਲਿ ਏਤ੍ਥਾਤਿ ਤਣ੍ਡੁਲਪਾਲਿ. ਤਸ੍ਸ ਕਿਰ ਦ੍ਵਾਰਸਮੀਪੇ ਤਣ੍ਡੁਲਵਾਣਿਜਾ ਤਣ੍ਡੁਲਪਸਿਬ੍ਬਕੇ ਵਿਵਰਿਤ੍ਵਾ ਪਟਿਪਾਟਿਯਾ ਠਪੇਤ੍ਵਾ ਨਿਸੀਦਨ੍ਤਿ, ਤੇਨਸ੍ਸ ‘‘ਤਣ੍ਡੁਲਪਾਲਿਦ੍ਵਾਰ’’ਨ੍ਤਿ ਸਮਞ੍ਞਾ ਅਹੋਸਿ. ਸਬ੍ਬਮੇਵ ਸਸ੍ਸਂ ਗਣ੍ਹਾਤੀਤਿ ਦਲਿਦ੍ਦਕਸ੍ਸਕਾਨਂ ਦਿਵਸਪਰਿਬ੍ਬਯਮਤ੍ਤਮੇਵ ਵਿਸ੍ਸਜ੍ਜੇਤ੍ਵਾ ਸਬ੍ਬਮੇਵ ਆਯਤੋ ਨਿਪ੍ਫਨ੍ਨਂ ਧਞ੍ਞਂ ਗਣ੍ਹਾਤਿ. ਮਨ੍ਦਸਸ੍ਸਾਨੀਤਿ ਮਨ੍ਦਨਿਪ੍ਫਤ੍ਤਿਕਾਨਿ ਸਸ੍ਸਾਨਿ.

੪੪੬. ਇਮਿਨਾ ਨਯੇਨਾਤਿ ਦਾਸਕਮ੍ਮਕਰਸ੍ਸ ਨਿਵਾਸਨਭਤ੍ਤਵੇਤ੍ਤਨਾਨੁਪ੍ਪਦਾਨੇਨ ਮਙ੍ਗਲਦਿਵਸੇਸੁ ਧਨਵਤ੍ਥਾਲਙ੍ਕਾਰਾਨੁਪ੍ਪਦਾਨਾਦਿਨਾ ਚ ਪੋਸੇਤਬ੍ਬੋ. ਮਿਤ੍ਤਾਮਚ੍ਚਾਨਂ ਪਿਯਵਚਨਅਤ੍ਥਚਰਿਯਾਸਮਾਨਤ੍ਤਤਾਦਿ ਮਿਤ੍ਤਾਮਚ੍ਚਕਰਣੀਯਂ ਕਤ੍ਤਬ੍ਬਂ, ਤਥਾ ਞਾਤਿਸਾਲੋਹਿਤਾਨਂ. ਤਤ੍ਥ ਆਵਾਹਵਿਵਾਹਸਮ੍ਬਦ੍ਧੇਨ ‘‘ਅਮ੍ਹਾਕਂ ਇਮੇ’’ਤਿ ਞਾਯਨ੍ਤੀਤਿ ਞਾਤੀ, ਮਾਤਾਪਿਤਾਦਿਸਮ੍ਬਦ੍ਧਤਾਯ ਸਮਾਨਲੋਹਿਤਾਤਿ ਸਾਲੋਹਿਤਾ. ਸਮ੍ਮਾ ਦਦਨ੍ਤੇਸੁਪਿ ਅਸਜ੍ਜਨਤੋ ਨਤ੍ਥਿ ਏਤੇਸਂ ਤਿਥੀਤਿ ਅਤਿਥਿ, ਤੇਸਂ ਅਤ੍ਤਨਾ ਸਮਾਨਪਰਿਭੋਗਵਸੇਨ ਅਤਿਥਿਕਰਣੀਯਂ ਕਾਤਬ੍ਬਂ, ਅਤਿਥਿਬਲੀਤਿ ਅਤ੍ਥੋ. ਞਾਤਕਭੂਤਪੁਬ੍ਬਾ ਪੇਤ੍ਤਿਵਿਸਯਂ ਉਪਗਤਾ ਪੁਬ੍ਬਪੇਤਾ, ਦਕ੍ਖਿਣੇਯ੍ਯੇਸੁ ਕਾਲੇਨ ਕਾਲਂ ਦਾਨਂ ਦਤ੍ਵਾ ਤੇਸਂ ਉਦ੍ਦਿਸਨਂ ਪੁਬ੍ਬਪੇਤਕਰਣੀਯਂ, ਪੇਤਬਲੀਤਿ ਅਤ੍ਥੋ. ਗਨ੍ਧਪੁਪ੍ਫਵਿਲੇਪਨਜਾਲਾਭਤ੍ਤੇਹਿ ਕਾਲੇਨ ਕਾਲਂ ਦੇਵਤਾਨਂ ਪੂਜਾ ਦੇਵਤਾਕਰਣੀਯਂ, ਦੇਵਤਾਬਲੀਤਿ ਅਤ੍ਥੋ, ਰਾਜਕਿਚ੍ਚਕਰਣਂ ਉਪਟ੍ਠਾਨਂ ਰਾਜਕਰਣੀਯਂ. ਅਯਮ੍ਪਿ ਕਾਯੋਤਿ ਅਤ੍ਤਨੋ ਕਾਯਂ ਸਨ੍ਧਾਯ ਵਦਤਿ. ਇਮਮਤ੍ਥਂ ਸਨ੍ਧਾਯਾਹ ‘‘ਇਮਿਨਾ ਨਯੇਨ ਅਤ੍ਥੋ ਵੇਦਿਤਬ੍ਬੋ’’ਤਿ.

੪੪੭. ਪਞ੍ਚ ਦੁਸ੍ਸੀਲ੍ਯਕਮ੍ਮਾਨੀਤਿ ਨਿਚ੍ਚਸੀਲਪਟਿਪਕ੍ਖਧਮ੍ਮਾ. ਦਸ ਅਕੁਸਲਕਮ੍ਮਪਥਧਮ੍ਮਾ ਦਸ ਦੁਸ੍ਸੀਲ੍ਯਕਮ੍ਮਾਨਿ. ਅਧਮ੍ਮਚਾਰੀ ਏਵ ਵਿਸਮਚਾਰੀ ਕਾਯਵਿਸਮਾਦਿਚਰਣਤੋਤਿ ਵਿਸਮਚਾਰੀਪਦਸ੍ਸ ਅਤ੍ਥੋ ਵਿਸੁਂ ਨ ਵੁਤ੍ਤੋ.

੪੪੮-੪੫੩. ਓਸਰਨ੍ਤਿ ਅਪਸਕ੍ਕਨ੍ਤਿ, ਖੀਯਨ੍ਤੀਤਿ ਅਤ੍ਥੋ. ਤੇਨਾਹ ‘‘ਪਰਿਹਾਯਨ੍ਤੀ’’ਤਿ. ਅਭਿਸਰਨ੍ਤੀਤਿ ਅਭਿਵਡ੍ਢਨਵਸੇਨ ਪਵਤ੍ਤਨ੍ਤਿ. ਤੇਨਾਹ ‘‘ਵਡ੍ਢਨ੍ਤੀ’’ਤਿ. ਤਤ੍ਰਾਤਿ ਬ੍ਰਹ੍ਮਲੋਕੇ. ਅਸ੍ਸਾਤਿ ਬ੍ਰਹ੍ਮਲੋਕੇ ਉਪ੍ਪਨ੍ਨਸ੍ਸ ਧਨਞ੍ਜਾਨਿਸ੍ਸ. ਤਤੋ ਪਟ੍ਠਾਯਾਤਿ ਯਦਾ ਭਗਵਤਾ ‘‘ਏਸੋ, ਭਿਕ੍ਖਵੇ, ਸਾਰਿਪੁਤ੍ਤੋ’’ਤਿਆਦਿ ਵੁਤ੍ਤਂ, ਤਤੋ ਪਟ੍ਠਾਯ. ਚਤੁਸਚ੍ਚਵਿਨਿਮੁਤ੍ਤਨ੍ਤਿ ਨਿਦ੍ਧਾਰੇਤ੍ਵਾ ਵਿਭਜਿਤ੍ਵਾ ਵੁਚ੍ਚਮਾਨੇਹਿ ਸਚ੍ਚੇਹਿ ਵਿਮੁਤ੍ਤਂ. ਅਤ੍ਥਤੋ ਪਨ ਤਤੋ ਪੁਬ੍ਬੇਪਿ ਸਚ੍ਚਵਿਮੁਤ੍ਤਂ ਕਥਂ ਨ ਕਥੇਸਿਯੇਵ ਸਚ੍ਚਵਿਮੁਤ੍ਤਸ੍ਸ ਨਿਯ੍ਯਾਨਸ੍ਸ ਅਭਾਵਤੋ.

ਧਨਞ੍ਜਾਨਿਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.