੧. ਬ੍ਰਹ੍ਮਾਯੁਸੁਤ੍ਤਵਣ੍ਣਨਾ

੩੮੩. ‘‘ਮਹਾਸਤ੍ਤੋ ਮਹਿਦ੍ਧਿਕੋ ਮਹਾਨੁਭਾਵੋ’’ਤਿਆਦੀਸੁ (ਮਹਾਵ. ੩੮) ਉਲ਼ਾਰਤਾ ਵਿਸਯੋ, ‘‘ਮਹਾਜਨਕਾਯੋ ਸਨ੍ਨਿਪਤੀ’’ਤਿਆਦੀਸੁ ਸਮ੍ਬਹੁਲਭਾਵਵਿਸਯੋ, ਇਧ ਪਨ ਤਦੁਭਯਮ੍ਪਿਸ੍ਸ ਅਤ੍ਥੋਤਿ ‘‘ਮਹਤਾਤਿ ਗੁਣਮਹਤ੍ਤੇਨਪਿ ਮਹਤਾ’’ਤਿਆਦਿ ਵੁਤ੍ਤਂ. ਅਪ੍ਪਿਚ੍ਛਤਾਦੀਤਿ ਆਦਿ-ਸਦ੍ਦੇਨ ਸਨ੍ਤੁਟ੍ਠਿਸਲ੍ਲੇਖਪਵਿਵੇਕਅਸਂਸਗ੍ਗਵੀਰਿਯਾਰਮ੍ਭਾਦੀਨਂ ਸਙ੍ਗਹੋ. ਦਿਟ੍ਠਿਸੀਲਸਾਮਞ੍ਞਸਙ੍ਘਾਤਸਙ੍ਖਾਤੇਨਾਤਿ ਏਤ੍ਥ ‘‘ਨਿਯਤੋ ਸਮ੍ਬੋਧਿਪਰਾਯਣੋ’’ (ਸਂ. ਨਿ. ੨.੪੧; ੩.੯੯੮, ੧੦੦੪) – ‘‘ਅਟ੍ਠਾਨਮੇਤਂ, ਭਿਕ੍ਖਵੇ, ਅਨਵਕਾਸੋ, ਯਂ ਦਿਟ੍ਠਿਸਮ੍ਪਨ੍ਨੋ ਪੁਗ੍ਗਲੋ ਸਞ੍ਚਿਚ੍ਚ ਪਾਣਂ ਜੀਵਿਤਾ ਵੋਰੋਪੇਯ੍ਯਾਤਿ ਨੇਤਂ ਠਾਨਂ ਵਿਜ੍ਜਤੀ’’ਤਿਆਦਿਵਚਨਤੋ ਦਿਟ੍ਠਿਸੀਲਾਨਂ ਨਿਯਤਸਭਾਵਤ੍ਤਾ ਸੋਤਾਪਨ੍ਨਾਪਿ ਅਞ੍ਞਮਞ੍ਞਂ ਦਿਟ੍ਠਿਸੀਲਸਾਮਞ੍ਞੇਨ ਸਂਹਤਾ, ਪਗੇਵ ਸਕਦਾਗਾਮਿਆਦਯੋ. ‘‘ਤਥਾਰੂਪਾਯ ਦਿਟ੍ਠਿਯਾ ਦਿਟ੍ਠਿਸਾਮਞ੍ਞਗਤੋ ਵਿਹਰਤਿ (ਦੀ. ਨਿ. ੩.੩੨੪, ੩੫੬; ਮ. ਨਿ. ੧.੪੯੨; ੩.੫੪; ਅ. ਨਿ. ੬.੧੧; ਪਰਿ. ੨੭੪) ਤਥਾਰੂਪੇਹਿ ਸੀਲੇਹਿ ਸੀਲਸਾਮਞ੍ਞਗਤੋ ਵਿਹਰਤੀ’’ਤਿ (ਦੀ. ਨਿ. ੩.੩੨੪; ਮ. ਨਿ. ੧.੪੯੨; ੩.੫੪; ਅ. ਨਿ. ੬.੧੨; ਪਰਿ. ੨੭੪) ਵਚਨਤੋ ਪੁਥੁਜ੍ਜਨਾਨਮ੍ਪਿ ਦਿਟ੍ਠਿਸੀਲਸਾਮਞ੍ਞੇਨ ਸਂਹਤਭਾਵੋ ਲਬ੍ਭਤਿਯੇਵ.

ਓਟ੍ਠਪਹਤਕਰਣਵਸੇਨ ਅਤ੍ਥਵਿਭਾਗਵਸੇਨ. ਸਨਿਘਣ੍ਡੁਕੇਟੁਭਾਨਨ੍ਤਿ ਏਤ੍ਥ ਨਿਘਣ੍ਡੂਤਿ ਵਚਨੀਯਵਾਚਕਭਾਵੇਨ ਅਤ੍ਥਂ ਸਦ੍ਦਞ੍ਚ ਖਣ੍ਡਤਿ ਵਿਭਜ੍ਜ ਦਸ੍ਸੇਤੀਤਿ ਨਿਖਣ੍ਡੁ. ਸੋ ਏਵ ਇਧ ਖ-ਕਾਰਸ੍ਸ ਘ-ਕਾਰਂ ਕਤ੍ਵਾ ‘‘ਨਿਘਣ੍ਡੂ’’ਤਿ ਵੁਤ੍ਤੋ. ਕਿਟਤਿ ਗਮੇਤਿ ਕਿਰਿਯਾਦਿਵਿਭਾਗਂ, ਤਂ ਵਾ ਅਨਵਸੇਸਪਰਿਯਾਦਾਨਤੋ ਗਮੇਨ੍ਤੋ ਪੂਰੇਤੀਤਿ ਕੇਟੁਭਂ. ਵੇਵਚਨਪ੍ਪਕਾਸਕਨ੍ਤਿ ਪਰਿਯਾਯਸਦ੍ਦਦੀਪਕਂ, ਏਕੇਕਸ੍ਸ ਅਤ੍ਥਸ੍ਸ ਅਨੇਕਪਰਿਯਾਯਵਚਨਵਿਭਾਵਕਨ੍ਤਿ ਅਤ੍ਥੋ. ਨਿਦਸ੍ਸਨਮਤ੍ਤਞ੍ਚੇਤਂ ਅਨੇਕੇਸਮ੍ਪਿ ਅਤ੍ਥਾਨਂ ਏਕਸਦ੍ਦਵਚਨੀਯਤਾਵਿਭਾਵਨਵਸੇਨਪਿ ਤਸ੍ਸ ਗਨ੍ਥਸ੍ਸ ਪਵਤ੍ਤਤ੍ਤਾ. ਵਚੀਭੇਦਾਦਿਲਕ੍ਖਣਾ ਕਿਰਿਯਾ ਕਪ੍ਪੀਯਤਿ ਏਤੇਨਾਤਿ ਕਿਰਿਯਾਕਪ੍ਪੋ, ਸੋ ਪਨ ਵਣ੍ਣਪਦਸਮ੍ਬਨ੍ਧਪਦਤ੍ਥਵਿਭਾਗਤੋ ਬਹੁਵਿਕਪ੍ਪੋਤਿ ਆਹ ‘‘ਕਿਰਿਯਾਕਪ੍ਪਵਿਕਪ੍ਪੋ’’ਤਿ. ਇਦਞ੍ਚ ਮੂਲਕਿਰਿਯਾਕਪ੍ਪਗਨ੍ਥਂ ਸਨ੍ਧਾਯ ਵੁਤ੍ਤਂ. ਸੋ ਹਿ ਸਤਸਹਸ੍ਸਪਰਿਮਾਣੋ ਨਲਚਰਿਯਾਦਿਪਕਰਣਂ. ਠਾਨਕਰਣਾਦਿਵਿਭਾਗਤੋ ਨਿਬ੍ਬਚਨਵਿਭਾਗਤੋ ਚ ਅਕ੍ਖਰਾ ਪਭੇਦੀਯਨ੍ਤਿ ਏਤੇਹੀਤਿ ਅਕ੍ਖਰਪ੍ਪਭੇਦਾ, ਸਿਕ੍ਖਾਨਿਰੁਤ੍ਤਿਯੋ. ਏਤੇਸਨ੍ਤਿ ਵੇਦਾਨਂ. ਤੇ ਏਵ ਵੇਦੇ ਪਦਸੋ ਕਾਯਤੀਤਿ ਪਦਕੋ. ਤਂ ਤਂ ਸਦ੍ਦਂ ਤਦਤ੍ਥਞ੍ਚ ਬ੍ਯਾਕਰੋਤਿ ਬ੍ਯਾਚਿਕ੍ਖਤਿ ਏਤੇਨਾਤਿ ਬ੍ਯਾਕਰਣਂ, ਸਦ੍ਦਸਤ੍ਥਂ. ਆਯਤਿਂ ਹਿਤਂ ਤੇਨ ਲੋਕੋ ਨ ਯਤਤਿ ਨ ਈਹਤੀਤਿ ਲੋਕਾਯਤਂ. ਤਞ੍ਹਿ ਗਨ੍ਥਂ ਨਿਸ੍ਸਾਯ ਸਤ੍ਤਾ ਪੁਞ੍ਞਕਿਰਿਯਾਯ ਚਿਤ੍ਤਮ੍ਪਿ ਨ ਉਪ੍ਪਾਦੇਨ੍ਤਿ. ਵਯਤੀਤਿ ਵਯੋ, ਨ ਵਯੋ ਅਵਯੋ, ਨ ਅਵਯੋ ਅਨਵਯੋ, ਆਦਿਮਜ੍ਝਪਰਿਯੋਸਾਨੇਸੁ ਕਤ੍ਥਚਿ ਅਪਰਿਕਿਲਨ੍ਤੋ ਅਵਿਤ੍ਥਾਯਨ੍ਤੋ ਤੇ ਗਨ੍ਥੇ ਸਨ੍ਧਾਰੇਤਿ ਪੂਰੇਤੀਤਿ ਅਤ੍ਥੋ. ਦ੍ਵੇ ਪਟਿਸੇਧਾ ਪਕਤਿਂ ਗਮੇਨ੍ਤੀਤਿ ਦਸ੍ਸੇਨ੍ਤੋ ‘‘ਅਵਯੋ ਨ ਹੋਤੀ’’ਤਿ ਵਤ੍ਵਾ ਤਤ੍ਥ ਅਵਯਂ ਦਸ੍ਸੇਤੁਂ ‘‘ਅਵਯੋ…ਪੇ… ਨ ਸਕ੍ਕੋਤੀ’’ਤਿ ਵੁਤ੍ਤਂ.

੩੮੪. ਗਰੂਤਿ ਭਾਰਿਯਂ ਅਤ੍ਤਾਨਂ ਤਤੋ ਮੋਚੇਤ੍ਵਾ ਗਮਨਂ ਦੁਕ੍ਕਰਂ ਹੋਤਿ. ਅਨਤ੍ਥੋਪਿ ਉਪ੍ਪਜ੍ਜਤਿ ਨਿਨ੍ਦਾਬ੍ਯਾਰੋਸਉਪਾਰਮ੍ਭਾਦਿ. ਅਬ੍ਭੁਗ੍ਗਤੋਤਿ ਏਤ੍ਥ ਅਭਿਸਦ੍ਦਯੋਗੇਨ ਇਤ੍ਥਮ੍ਭੂਤਾਖ੍ਯਾਨਤ੍ਥੇ ਉਪਯੋਗਵਚਨਂ.

ਲਕ੍ਖਣਾਨੀਤਿ ਲਕ੍ਖਣਦੀਪਨਾਨਿ ਮਨ੍ਤਪਦਾਨਿ. ਅਨ੍ਤਰਧਾਯਨ੍ਤੀਤਿ ਨ ਕੇਵਲਂ ਲਕ੍ਖਣਮਨ੍ਤਾਨਿਯੇਵ, ਅਞ੍ਞਾਨਿਪਿ ਬ੍ਰਾਹ੍ਮਣਾਨਂ ਞਾਣਬਲਾਭਾਵੇਨ ਅਨੁਕ੍ਕਮੇਨ ਅਨ੍ਤਰਧਾਯਨ੍ਤਿ. ਤਥਾ ਹਿ ਵਦਨ੍ਤਿ ‘‘ਏਕਸਤਂ ਅਦ੍ਧਰਿਯਂ ਦਿਪਞ੍ਞਾਸਮਤ੍ਤਤੋ ਸਾਮਾ’’ਤਿਆਦਿ. ਪਣਿਧਿਮਹਤੋ ਸਮਾਦਾਨਮਹਤੋਤਿਆਦਿਨਾ ਪਚ੍ਚੇਕਂ ਮਹ-ਸਦ੍ਦੋ ਯੋਜੇਤਬ੍ਬੋ. ਪਣਿਧਿਮਹਨ੍ਤਤਾਦਿ ਚਸ੍ਸ ਬੁਦ੍ਧਵਂਸਚਰਿਯਾਪਿਟਕਵਣ੍ਣਨਾਦਿਵਸੇਨੇਵ ਵੇਦਿਤਬ੍ਬੋ. ਨਿਟ੍ਠਾਤਿ ਨਿਪ੍ਫਤ੍ਤਿਯੋ. ਜਾਤਿਸਾਮਞ੍ਞਤੋਤਿ ਲਕ੍ਖਣਜਾਤਿਯਾ ਲਕ੍ਖਣਭਾਵੇਨ ਸਮਾਨਭਾਵਤੋ. ਯਥਾ ਹਿ ਬੁਦ੍ਧਾਨਂ ਲਕ੍ਖਣਾਨਿ ਸੁਵਿਸੁਦ੍ਧਾਨਿ ਸੁਪਰਿਬ੍ਯਤ੍ਤਾਨਿ ਪਰਿਪੁਣ੍ਣਾਨਿ ਚ ਹੋਨ੍ਤਿ, ਨ ਏਵਂ ਚਕ੍ਕਵਤ੍ਤੀਨਂ. ਤੇਨਾਹ ‘‘ਨ ਤੇਹੇਵ ਬੁਦ੍ਧੋ ਹੋਤੀ’’ਤਿ.

ਅਭਿਰੂਪਤਾ ਦੀਘਾਯੁਕਤਾ, ਅਪ੍ਪਾਤਙ੍ਕਤਾ ਬ੍ਰਾਹ੍ਮਣਾਦੀਨਂ ਪਿਯਮਨਾਪਤਾਤਿ ਚਤੂਹਿ ਅਚ੍ਛਰਿਯਧਮ੍ਮੇਹਿ. ਦਾਨਂ ਪਿਯਵਚਨਂ ਅਤ੍ਥਚਰਿਯਾ ਸਮਾਨਤ੍ਤਤਾਤਿ ਇਮੇਹਿ ਚਤੂਹਿ ਸਙ੍ਗਹਵਤ੍ਥੂਹਿ. ਰਞ੍ਜਨਤੋਤਿ ਪੀਤਿਜਨਨਤੋ. ਚਕ੍ਕਂ ਚਕ੍ਕਰਤਨਂ ਵਤ੍ਤੇਤਿ ਪਵਤ੍ਤੇਤੀਤਿ ਚਕ੍ਕਵਤ੍ਤੀ, ਸਮ੍ਪਤ੍ਤਿਚਕ੍ਕੇਹਿ ਸਯਂ ਵਤ੍ਤੇਤਿ, ਤੇਹਿ ਚ ਪਰਂ ਸਤ੍ਤਨਿਕਾਯਂ ਵਤ੍ਤੇਤਿ ਪਵਤ੍ਤੇਤੀਤਿ ਚਕ੍ਕਵਤ੍ਤੀ, ਪਰਹਿਤਾਵਹੋ ਇਰਿਯਾਪਥਚਕ੍ਕਾਨਂ ਵਤ੍ਤੋ ਵਤ੍ਤਨਂ ਏਤਸ੍ਸ ਅਤ੍ਥੀਤਿ ਚਕ੍ਕਵਤ੍ਤੀ, ਅਪ੍ਪਟਿਹਤਂ ਵਾ ਆਣਾਸਙ੍ਖਾਤਂ ਚਕ੍ਕਂ ਵਤ੍ਤੇਤੀਤਿ ਚਕ੍ਕਵਤੀ, ਅਪ੍ਪਟਿਹਤਂ ਵਾ ਆਣਾਸਙ੍ਖਾਤਂ ਚਕ੍ਕਂ ਵਤ੍ਤੇਤੀਤਿ ਚਕ੍ਕਵਤ੍ਤੀ, ਖਤ੍ਤਿਯਮਣ੍ਡਲਾਦਿਸਞ੍ਞਿਤਂ ਚਕ੍ਕਂ ਸਮੂਹਂ ਅਤ੍ਤਨੋ ਵਸੇ ਵਤ੍ਤੇਤੀਤਿ ਚਕ੍ਕਵਤ੍ਤੀ. ਧਮ੍ਮਂ ਚਰਤੀਤਿ ਧਮ੍ਮਿਕੋ. ਧਮ੍ਮਤੋ ਅਨਪੇਤਤ੍ਤਾ ਧਮ੍ਮੋ ਰਞ੍ਜਨਤ੍ਥੇਨ ਰਾਜਾਤਿ ਧਮ੍ਮਰਾਜਾ. ਕੋਪਾਦੀਤਿ ਆਦਿ-ਸਦ੍ਦੇਨ ਕਾਮਲੋਭਮਾਨਮਦਾਦਿਕੇ ਸਙ੍ਗਣ੍ਹਾਤਿ. ਵਿਜਿਤਾਵੀਤਿ ਵਿਜਿਤਵਾ. ਕੇਨਚਿ ਅਕਮ੍ਪਿਯਟ੍ਠੇਨ ਜਨਪਦਤ੍ਥਾਵਰਿਯਪ੍ਪਤ੍ਤੋ. ਦਲ਼੍ਹਭਤ੍ਤਿਭਾਵਤੋ ਵਾ ਜਨਪਦੋ ਥਾਵਰਿਯਂ ਪਤ੍ਤੋ ਏਤ੍ਥਾਤਿ ਜਨਪਦਤ੍ਥਾਵਰਿਯਪ੍ਪਤ੍ਤੋ. ਚਿਤ੍ਤੀਕਤਭਾਵਾਦਿਨਾਪਿ (ਖੁ. ਪਾ. ਅਟ੍ਠ. ੬.੩; ਦੀ. ਨਿ. ਅਟ੍ਠ. ੨.੩੩; ਸਂ. ਨਿ. ਅਟ੍ਠ. ੩.੫.੨੨੩; ਸੁ. ਨਿ. ਅਟ੍ਠ. ੧.੨੨੬; ਮਹਾਨਿ. ਅਟ੍ਠ. ੫੦) ਚਕ੍ਕਸ੍ਸ ਰਤਨਟ੍ਠੋ ਵੇਦਿਤਬ੍ਬੋ. ਏਸ ਨਯੋ ਸੇਸੇਸੁਪਿ. ਰਤਿਨਿਮਿਤ੍ਤਤਾਯ ਵਾ ਚਿਤ੍ਤੀਕਤਾਦਿਭਾਵਸ੍ਸ ਰਤਿਜਨਨਟ੍ਠੇਨ ਏਕਸਙ੍ਗਹਤਾਯ ਵਿਸੁਂ ਅਗ੍ਗਹਣਂ.

ਇਮੇਹਿ ਪਨ ਰਤਨੇਹਿ ਰਾਜਾ ਚਕ੍ਕਵਤ੍ਤੀ ਯਂ ਯਮਤ੍ਥਂ ਪਚ੍ਚਨੁਭੋਤਿ, ਤਂ ਤਂ ਦਸ੍ਸੇਤੁਂ ‘‘ਇਮੇਸੁ ਪਨਾ’’ਤਿਆਦਿ ਵੁਤ੍ਤਂ. ਅਜਿਤਂ ਜਿਨਾਤਿ ਮਹੇਸਕ੍ਖਤਾਸਂਵਤ੍ਤਨਿਯਕਮ੍ਮਨਿਸ੍ਸਨ੍ਦਭਾਵਤੋ. ਵਿਜਿਤੇ ਯਥਾਸੁਖਂ ਅਨੁਵਿਚਰਤਿ ਹਤ੍ਥਿਰਤਨਂ ਅਸ੍ਸਰਤਨਞ੍ਚ ਅਭਿਰੁਹਿਤ੍ਵਾ ਤੇਸਂ ਆਨੁਭਾਵੇਨ ਅਨ੍ਤੋਪਾਤਰਾਸੇਯੇਵ ਸਕਲਂ ਪਥਵਿਂ ਅਨੁਸਂਯਾਯਿਤ੍ਵਾ ਰਾਜਧਾਨਿਯਂ ਪਚ੍ਚਾਗਮਨਤੋ. ਪਰਿਣਾਯਕਰਤਨੇਨ ਵਿਜਿਤਮਨੁਰਕ੍ਖਤਿ ਤੇਨ ਤਤ੍ਥ ਤਤ੍ਥ ਕਤ੍ਤਬ੍ਬਕਿਚ੍ਚਸ੍ਸ ਸਂਵਿਧਾਨਤੋ. ਸੇਸੇਹੀਤਿ ਮਣਿਰਤਨਇਤ੍ਥਿਰਤਨਗਹਪਤਿਰਤਨੇਹਿ. ਤਤ੍ਥ ਮਣਿਰਤਨੇਨ ਯੋਜਨਪ੍ਪਮਾਣੇ ਦੇਸੇ ਅਨ੍ਧਕਾਰਂ ਵਿਧਮਿਤ੍ਵਾ ਆਲੋਕਦਸ੍ਸਨਾਦਿਨਾ ਸੁਖਮਨੁਭਵਤਿ, ਇਤ੍ਥਿਰਤਨੇਨ ਅਤਿਕ੍ਕਨ੍ਤਮਾਨੁਸਰੂਪਸਮ੍ਪਤ੍ਤਿਦਸ੍ਸਨਾਦਿਵਸੇਨ, ਗਹਪਤਿਰਤਨੇਨ ਇਚ੍ਛਿਤਿਚ੍ਛਿਤਮਣਿਕਨਕਰਜਤਾਦਿਧਨਪ੍ਪਟਿਲਾਭਵਸੇਨ. ਉਸ੍ਸਾਹਸਤ੍ਤਿਯੋਗੋ ਯੇਨ ਕੇਨਚਿ ਅਪ੍ਪਟਿਹਤਾਣਾਚਕ੍ਕਭਾਵਸਿਦ੍ਧਿਤੋ. ਹਤ੍ਥਿਅਸ੍ਸਰਤਨਾਦੀਨਂ ਮਹਾਨੁਭਾਵਤ੍ਤਾ ਕੋਸਸਮ੍ਪਤ੍ਤਿਯਾਪਿ ਪਭਾਵਸਮ੍ਪਤ੍ਤਿਸਿਦ੍ਧਿਤੋ ‘‘ਹਤ੍ਥਿ…ਪੇ… ਯੋਗੋ’’ਤਿ ਵੁਤ੍ਤਂ. ਕੋਸੋ ਹਿ ਨਾਮ ਸਤਿ ਉਸ੍ਸਾਹਸਮ੍ਪਤ੍ਤਿਯਂ (ਉਗ੍ਗਤੇਜਸ੍ਸ ਸੁਕੁਮਾਰਪਰਕ੍ਕਮਸ੍ਸ ਪਸਨ੍ਨਮੁਖਸ੍ਸ ਸਮ੍ਮੁਖੇ ਪਾਪੁਣਾਤਿ). ਪਚ੍ਛਿਮੇਨਾਤਿ ਪਰਿਣਾਯਕਰਤਨੇਨ. ਤਞ੍ਹਿ ਸਬ੍ਬਰਾਜਕਿਚ੍ਚੇਸੁ ਕੁਸਲਂ ਅਵਿਰਜ੍ਝਨਪਯੋਗਂ. ਤੇਨਾਹ ‘‘ਮਨ੍ਤਸਤ੍ਤਿਯੋਗੋ’’ਤਿ. ਤਿਵਿਧਸਤ੍ਤਿਯੋਗਫਲਂ ਪਰਿਪੁਣ੍ਣਂ ਹੋਤੀਤਿ ਸਮ੍ਬਨ੍ਧੋ. ਸੇਸੇਹੀਤਿ ਸੇਸੇਹਿ ਪਞ੍ਚਹਿ ਰਤਨੇਹਿ. ਅਦੋਸਕੁਸਲਮੂਲਜਨਿਤਕਮ੍ਮਾਨੁਭਾਵੇਨਾਤਿ ਅਦੋਸਸਙ੍ਖਾਤੇਨ ਕੁਸਲਮੂਲੇਨ ਸਹਜਾਤਾਦਿਪਚ੍ਚਯਵਸੇਨ ਉਪ੍ਪਾਦਿਤਕਮ੍ਮਸ੍ਸ ਆਨੁਭਾਵੇਨ ਸਮ੍ਪਜ੍ਜਨ੍ਤਿ ਸੋਮ੍ਮਤਰਰਤਨਜਾਤਿਕਤ੍ਤਾ. ਮਜ੍ਝਿਮਾਨਿ ਮਣਿਇਤ੍ਥਿਗਹਪਤਿਰਤਨਾਨਿ. ਅਲੋਭ…ਪੇ… ਕਮ੍ਮਾਨੁਭਾਵੇਨ ਸਮ੍ਪਜ੍ਜਨ੍ਤਿ ਉਲ਼ਾਰਧਨਸ੍ਸ ਉਲ਼ਾਰਧਨਪਟਿਲਾਭਕਾਰਣਸ੍ਸ ਚ ਪਰਿਚ੍ਚਾਗਸਮ੍ਪਦਾਹੇਤੁਕਤ੍ਤਾ. ਪਚ੍ਛਿਮਨ੍ਤਿ ਪਰਿਣਾਯਕਰਤਨਂ. ਤਞ੍ਹਿ ਅਮੋਹ…ਪੇ… ਕਮ੍ਮਾਨੁਭਾਵੇਨ ਸਮ੍ਪਜ੍ਜਤਿ ਮਹਾਪਞ੍ਞੇਨੇਵ ਚਕ੍ਕਵਤ੍ਤਿਰਾਜਕਿਚ੍ਚਸ੍ਸ ਪਰਿਣੇਤਬ੍ਬਤ੍ਤਾ.

ਸਰਣਤੋ ਪਟਿਪਕ੍ਖਵਿਧਮਨਤੋ ਸੂਰਾ. ਤੇਨਾਹ ‘‘ਅਭੀਰੁਕਜਾਤਿਕਾ’’ਤਿ. ਅਸੁਰੇ ਵਿਜਿਨਿਤ੍ਵਾ ਠਿਤਤ੍ਤਾ ਵੀਰੋ, ਸਕ੍ਕੋ ਦੇਵਾਨਮਿਨ੍ਦੋ, ਤਸ੍ਸ ਅਙ੍ਗਂ ਦੇਵਪੁਤ੍ਤੋ ਸੇਨਙ੍ਗਭਾਵਤੋਤਿ ਵੁਤ੍ਤਂ ‘‘ਵੀਰਙ੍ਗਰੂਪਾਤਿ ਦੇਵਪੁਤ੍ਤਸਦਿਸਕਾਯਾ’’ਤਿ. ਸਭਾਵੋਤਿ ਸਭਾਵਭੂਤੋ ਅਤ੍ਥੋ. ਵੀਰਕਾਰਣਨ੍ਤਿ ਵੀਰਭਾਵਕਾਰਣਂ. ਵੀਰਿਯਮਯਸਰੀਰਾ ਵਿਯਾਤਿ ਸਵਿਗ੍ਗਹਵੀਰਿਯਸਦਿਸਾ ਸਵਿਗ੍ਗਹਞ੍ਚੇ ਵੀਰਿਯਂ ਸਿਯਾ, ਤਂਸਦਿਸਾਤਿ ਅਤ੍ਥੋ. ਨਨੁ ਰਞ੍ਞੋ ਚਕ੍ਕਵਤ੍ਤਿਸ੍ਸ ਪਟਿਸੇਨਾ ਨਾਮ ਨਤ੍ਥਿ, ਯਮਸ੍ਸ ਪੁਤ੍ਤਾ ਪਮਦ੍ਦੇਯ੍ਯੁਂ, ਅਥ ਕਸ੍ਮਾ ‘‘ਪਰਸੇਨਪਮਦ੍ਦਨਾ’’ਤਿ ਵੁਤ੍ਤਨ੍ਤਿ ਚੋਦਨਂ ਸਨ੍ਧਾਯਾਹ ‘‘ਸਚੇ’’ਤਿਆਦਿ. ਤੇਨ ਪਰਸੇਨਾ ਹੋਤੁ ਵਾ ਮਾ ਵਾ, ਤੇ ਪਨ ਏਵਂ ਮਹਾਨੁਭਾਵਾਤਿ ਦਸ੍ਸੇਤਿ. ਧਮ੍ਮੇਨਾਤਿ ਕਤੂਪਚਿਤੇਨ ਅਤ੍ਤਨੋ ਪੁਞ੍ਞਧਮ੍ਮੇਨ. ਤੇਨ ਹਿ ਸਞ੍ਚੋਦਿਤਾ ਪਥਵਿਯਂ ਸਬ੍ਬਰਾਜਾਨੋ ਪਚ੍ਚੁਗ੍ਗਨ੍ਤ੍ਵਾ ‘‘ਸ੍ਵਾਗਤਂ ਤੇ ਮਹਾਰਾਜਾ’’ਤਿਆਦਿਂ ਵਤ੍ਵਾ ਅਤ੍ਤਨੋ ਰਜ੍ਜਂ ਰਞ੍ਞੋ ਚਕ੍ਕਵਤ੍ਤਿਸ੍ਸ ਨਿਯ੍ਯਾਦੇਨ੍ਤਿ. ਤੇਨ ਵੁਤ੍ਤਂ ‘‘ਸੋ ਇਮਂ…ਪੇ… ਅਜ੍ਝਾਵਸਤੀ’’ਤਿ. ਅਟ੍ਠਕਥਾਯਂ ਪਨ ਤਸ੍ਸ ਯਥਾਵੁਤ੍ਤਧਮ੍ਮਸ੍ਸ ਚਿਰਤਰਂ ਵਿਪਚ੍ਚਿਤੁਂ ਪਚ੍ਚਯਭੂਤਂ ਚਕ੍ਕਵਤ੍ਤਿਵਤ੍ਤਸਮੁਦਾਗਤਂ ਪਯੋਗਸਮ੍ਪਤ੍ਤਿਸਙ੍ਖਾਤਂ ਧਮ੍ਮਂ ਦਸ੍ਸੇਤੁਂ ‘‘ਪਾਣੋ ਨ ਹਨ੍ਤਬ੍ਬੋਤਿਆਦਿਨਾ ਪਞ੍ਚਸੀਲਧਮ੍ਮੇਨਾ’’ਤਿ ਵੁਤ੍ਤਂ. ਏਵਞ੍ਹਿ ‘‘ਅਦਣ੍ਡੇਨ ਅਸਤ੍ਥੇਨਾ’’ਤਿ ਇਦਂ ਵਚਨਂ ਸੁਟ੍ਠੁਤਰਂ ਸਮਤ੍ਥਿਤਂ ਹੋਤਿ, ਯਸ੍ਮਾ ਰਾਗਾਦਯੋ ਪਾਪਧਮ੍ਮਾ ਉਪ੍ਪਜ੍ਜਮਾਨਾ ਸਤ੍ਤਸਨ੍ਤਾਨਂ ਛਾਦੇਤ੍ਵਾ ਪਰਿਯੋਨਨ੍ਧਿਤ੍ਵਾ ਤਿਟ੍ਠਨ੍ਤਿ, ਕੁਸਲਪਵਤ੍ਤਿਂ ਨਿਵਾਰੇਨ੍ਤਿ, ਤਸ੍ਮਾ ਤੇ ‘‘ਛਦਨਾ, ਛਦਾ’’ਤਿ ਚ ਵੁਤ੍ਤਾ.

ਵਿਵਟ੍ਟੇਤ੍ਵਾ ਪਰਿਵਤ੍ਤੇਤ੍ਵਾ. ਪੂਜਾਰਹਤਾ ਵੁਤ੍ਤਾ ‘‘ਅਰਹਤੀਤਿ ਅਰਹ’’ਨ੍ਤਿ. ਤਸ੍ਸਾਤਿ ਪੂਜਾਰਹਤਾਯ. ਯਸ੍ਮਾ ਸਮ੍ਮਾਸਮ੍ਬੁਦ੍ਧੋ, ਤਸ੍ਮਾ ਅਰਹਨ੍ਤਿ. ਬੁਦ੍ਧਤ੍ਤਹੇਤੁਭੂਤਾ ਵਿਵਟ੍ਟਚ੍ਛਦਤਾ ਵੁਤ੍ਤਾ ਸਵਾਸਨਸਬ੍ਬਕਿਲੇਸਪ੍ਪਹਾਨਪੁਬ੍ਬਕਤ੍ਤਾ ਬੁਦ੍ਧਭਾਵਸਿਦ੍ਧਿਯਾ. ਅਰਹਂ ਵਟ੍ਟਾਭਾਵੇਨਾਤਿ ਫਲੇਨ ਹੇਤੁਅਨੁਮਾਨਦਸ੍ਸਨਂ. ਸਮ੍ਮਾਸਮ੍ਬੁਦ੍ਧੋ ਛਦਨਾਭਾਵੇਨਾਤਿ ਹੇਤੁਨਾ ਫਲਾਨੁਮਾਨਦਸ੍ਸਨਂ. ਹੇਤੁਦ੍ਵਯਂ ਵੁਤ੍ਤਂ ‘‘ਵਿਵਟ੍ਟੋ ਵਿਚ੍ਛਦੋ ਚਾ’’ਤਿ. ਦੁਤਿਯਵੇਸਾਰਜ੍ਜੇਨਾਤਿ ‘‘ਖੀਣਾਸਵਸ੍ਸ ਤੇ ਪਟਿਜਾਨਤੋ’’ਤਿਆਦਿਨਾ (ਮ. ਨਿ. ੧.੧੫੦) ਆਗਤੇਨ ਵੇਸਾਰਜ੍ਜੇਨ. ਪੁਰਿਮਸਿਦ੍ਧੀਤਿ ਪੁਰਿਮਸ੍ਸ ਪਦਸ੍ਸ ਅਤ੍ਥਸਿਦ੍ਧਿ. ਪਠਮੇਨਾਤਿ ‘‘ਸਮ੍ਮਾਸਮ੍ਬੁਦ੍ਧਸ੍ਸ ਤੇ ਪਟਿਜਾਨਤੋ’’ਤਿਆਦਿਨਾ (ਮ. ਨਿ. ੧.੧੫੦) ਆਗਤੇਨ ਵੇਸਾਰਜ੍ਜੇਨ. ਦੁਤਿਯਸਿਦ੍ਧੀਤਿ ਬੁਦ੍ਧਤ੍ਤਸਿਦ੍ਧਿ. ਤਤਿਯਚਤੁਤ੍ਥੇਹੀਤਿ ‘‘ਯੇ ਖੋ ਪਨ ਤੇ ਅਨ੍ਤਰਾਯਿਕਾ ਧਮ੍ਮਾ’’ਤਿਆਦਿਨਾ (ਮ. ਨਿ. ੧.੧੫੦), ‘‘ਯਸ੍ਸ ਖੋ ਪਨ ਤੇ ਅਤ੍ਥਾਯਾ’’ਤਿਆਦਿਨਾ (ਮ. ਨਿ. ੧.੧੫੦) ਚ ਆਗਤੇਹਿ ਤਤਿਯਚਤੁਤ੍ਥੇਹਿ ਵੇਸਾਰਜ੍ਜੇਹਿ. ਤਤਿਯਸਿਦ੍ਧੀਤਿ ਵਿਵਟ੍ਟਚ੍ਛਦਨਤਾ ਸਿਦ੍ਧਿ. ਯਾਥਾਵਤੋ ਅਨ੍ਤਰਾਯਿਕਨਿਯ੍ਯਾਨਿਕਧਮ੍ਮਾਪਦੇਸੇਨ ਹਿ ਸਤ੍ਥੁ ਵਿਵਟ੍ਟਚ੍ਛਦਭਾਵੋ ਲੋਕੇ ਪਾਕਟੋ ਅਹੋਸਿ. ਪੁਰਿਮਂ ਧਮ੍ਮਚਕ੍ਖੁਨ੍ਤਿ ਪੁਰਿਮਪਦਂ ਭਗਵਤੋ ਧਮ੍ਮਚਕ੍ਖੁਂ ਸਾਧੇਤਿ ਕਿਲੇਸਾਰੀਨਂ ਸਂਸਾਰਚਕ੍ਕਸ੍ਸ ਚ ਅਰਾਨਂ ਹਤਭਾਵਦੀਪਨਤੋ. ਦੁਤਿਯਂ ਪਦਂ ਬੁਦ੍ਧਚਕ੍ਖੁਂ ਸਾਧੇਤਿ ਸਮ੍ਮਾਸਮ੍ਬੁਦ੍ਧਸ੍ਸੇਵ ਤਂ ਸਮ੍ਭਵਤੋ. ਤਤਿਯਂ ਪਦਂ ਸਮਨ੍ਤਚਕ੍ਖੁਂ ਸਾਧੇਤਿ ਸਵਾਸਨਸਬ੍ਬਕਿਲੇਸਪ੍ਪਹਾਨਦੀਪਨਤੋ. ‘‘ਸਮ੍ਮਾਸਮ੍ਬੁਦ੍ਧੋ’’ਤਿ ਹਿ ਵਤ੍ਵਾ ‘‘ਵਿਵਟ੍ਟਚ੍ਛਦੋ’’ਤਿ ਵਚਨਂ ਬੁਦ੍ਧਭਾਵਾਵਹਮੇਵ ਸਬ੍ਬਕਿਲੇਸਪ੍ਪਹਾਨਂ ਵਿਭਾਵੇਤੀਤਿ. ਸੂਰਭਾਵਨ੍ਤਿ ਲਕ੍ਖਣਵਿਭਾਵਨੇਨ ਵਿਸਦਞਾਣਤਂ.

੩੮੫. ਗਵੇਸੀਤਿ (ਦੀ. ਨਿ. ਟੀ. ੧.੨੮੭) ਞਾਣੇਨ ਪਰਿਯੇਸਨਂ ਅਕਾਸਿ. ਸਮਾਨਯੀਤਿ ਞਾਣੇਨ ਸਙ੍ਕਲੇਨ੍ਤੋ ਸਮਾਨਂ ਆਨਯਿ ਸਮਾਹਰਿ. ਨ ਸਕ੍ਕੋਤਿ ਸਂਕੁਚਿਤੇ ਇਰਿਯਾਪਥੇ ਯੇਭੁਯ੍ਯੇਨ ਤੇਸਂ ਦੁਬ੍ਬਿਭਾਵਨਤੋ. ਕਙ੍ਖਤੀਤਿ ਪਦਸ੍ਸ ਆਕਙ੍ਖਤੀਤਿ ਅਯਮਤ੍ਥੋਤਿ ਆਹ – ‘‘ਅਹੋ ਵਤ ਪਸ੍ਸੇਯ੍ਯਨ੍ਤਿ ਪਤ੍ਥਨਂ ਉਪ੍ਪਾਦੇਤੀ’’ਤਿ. ਕਿਚ੍ਛਤੀਤਿ ਕਿਲਮਤਿ. ‘‘ਕਙ੍ਖਤੀ’’ਤਿ ਪਦਸ੍ਸ ਪੁਬ੍ਬੇ ਆਸੀਸਨਤ੍ਥਤਂ ਵਤ੍ਵਾ ਇਦਾਨਿ ਤਸ੍ਸ ਸਂਸਯਤ੍ਥਤ੍ਤਮੇਵ ਵਿਕਪ੍ਪਨ੍ਤਰਵਸੇਨ ਦਸ੍ਸੇਨ੍ਤੋ ‘‘ਕਙ੍ਖਾਯ ਵਾ ਦੁਬ੍ਬਲਾ ਵਿਮਤਿ ਵੁਤ੍ਤਾ’’ਤਿਆਦਿ ਵੁਤ੍ਤਂ. ਤੀਹਿ ਧਮ੍ਮੇਹਿ ਤਿਪ੍ਪਕਾਰੇਹਿ ਸਂਸਯਧਮ੍ਮੇਹਿ. ਕਾਲੁਸ੍ਸਿਯਭਾਵੋਤਿ ਅਪ੍ਪਸਨ੍ਨਤਾਯ ਹੇਤੁਭੂਤੋ ਆਵਿਲਭਾਵੋ. ਯਸ੍ਮਾ ਭਗਵਤੋ ਕੋਸੋਹਿਤਂ ਸਬ੍ਬਬੁਦ੍ਧਾਵੇਣਿਕਂ ਵਤ੍ਥਗੁਯ੍ਹਂ ਸੁਵਿਸੁਦ੍ਧਕਞ੍ਚਨਮਣ੍ਡਲਸਨ੍ਨਿਕਾਸਂ ਅਤ੍ਤਨੋ ਸਣ੍ਠਾਨਸਨ੍ਨਿਵੇਸਸੁਨ੍ਦਰਤਾਯ ਆਜਾਨੇਯ੍ਯਗਨ੍ਧਹਤ੍ਥਿਨੋ ਵਰਙ੍ਗਚਾਰੁਭਾਵਂ ਵਿਕਸਮਾਨਤਪਨਿਯਾਰਵਿਨ੍ਦਸਮੁਜ੍ਜਲਕੇਸਰਾਵਤ੍ਤਵਿਲਾਸਂ ਸਞ੍ਝਾਪਭਾਨੁਰਞ੍ਜਿਤਜਲਵਨਨ੍ਤਰਾਭਿਲਕ੍ਖਿਤ-ਸਮ੍ਪੁਣ੍ਣਚਨ੍ਦਮਣ੍ਡਲਸੋਭਞ੍ਚ ਅਤ੍ਤਨੋ ਸਿਰਿਯਾ ਅਭਿਭੁਯ੍ਯ ਵਿਰਾਜਤਿ, ਯਂ ਬਾਹਿਰਬ੍ਭਨ੍ਤਰਮਲੇਹਿ ਅਨੁਪਕ੍ਕਿਲਿਟ੍ਠਤਾਯ ਚਿਰਕਾਲਂ ਸੁਪਰਿਚਿਤਬ੍ਰਹ੍ਮਚਰਿਯਾਧਿਕਾਰਤਾਯ ਸੁਸਣ੍ਠਿਤਸਣ੍ਠਾਨਸਮ੍ਪਤ੍ਤਿਯਾ ਚ ਕੋਪੀਨਮ੍ਪਿ ਸਨ੍ਤਂ ਅਕੋਪੀਨਮੇਵ, ਤਸ੍ਮਾ ਵੁਤ੍ਤਂ ‘‘ਭਗਵਤੋ ਹੀ’’ਤਿਆਦਿ. ਪਹੂਤਭਾਵਨ੍ਤਿ ਪੁਥੁਲਭਾਵਂ. ਏਤ੍ਥੇਵ ਹਿ ਤਸ੍ਸ ਸਂਸਯੋ, ਤਨੁਮੁਦੁਸੁਕੁਮਾਰਤਾਦੀਸੁ ਪਨਸ੍ਸ ਗੁਣੇਸੁ ਤਸ੍ਸ ਵਿਚਾਰਣਾ ਏਵ ਨਾਹੋਸਿ.

ਹਿਰਿਕਰਣੋਕਾਸਨ੍ਤਿ ਹਿਰਿਯਿਤਬ੍ਬਟ੍ਠਾਨਂ. ਛਾਯਨ੍ਤਿ ਪਟਿਬਿਮ੍ਬਂ. ਕੀਦਿਸਨ੍ਤਿ ਆਹ ‘‘ਇਦ੍ਧਿਯਾ’’ਤਿਆਦਿ. ਛਾਯਾਰੂਪਨ੍ਤਿ ਭਗਵਤੋ ਪਟਿਬਿਮ੍ਬਰੂਪਂ. ਤਞ੍ਚ ਖੋ ਬੁਦ੍ਧਸਨ੍ਤਾਨਤੋ ਵਿਨਿਮੁਤ੍ਤਂ ਰੂਪਕਮਤ੍ਤਂ ਭਗਵਤੋ ਸਰੀਰਵਣ੍ਣਸਣ੍ਠਾਨਾਵਯਵਂ ਇਦ੍ਧਿਮਯਂ ਬਿਮ੍ਬਕਮਤ੍ਤਂ, ਤਂ ਪਨ ਦਸ੍ਸੇਨ੍ਤੋ ਭਗਵਾ ਯਥਾ ਅਤ੍ਤਨੋ ਬੁਦ੍ਧਰੂਪਂ ਨ ਦਿਸ੍ਸਤਿ, ਤਥਾ ਕਤ੍ਵਾ ਦਸ੍ਸੇਤਿ. ਨੀਹਰਿਤ੍ਵਾਤਿ ਫਰਿਤ੍ਵਾ.

ਕਣ੍ਣਸੋਤਾਨਂ ਉਪਚਿਤਤਨੁਤਮ੍ਬਲੋਮਤਾਯ ਧੋਤਰਜਤਪਨਾਲ਼ਿਕਾਸਦਿਸਤਾ ਵੁਤ੍ਤਾ. ਮੁਖਪਰਿਯਨ੍ਤੇਤਿ ਕੇਸਨ੍ਤੇ.

ਕਿਰਿਯਾਕਰਣਨ੍ਤਿ ਕਿਰਿਯਾਯ ਕਾਯਿਕਸ੍ਸ ਵਾਚਸਿਕਸ੍ਸ ਪਟਿਪਤ੍ਤਿ. ਤਤ੍ਥਾਤਿ ਤੇਸੁ ਕਿਚ੍ਚੇਸੁ. ਧਮ੍ਮਕਥਿਕਾਨਂ ਵਤ੍ਤਂ ਦਸ੍ਸੇਤੁਂ ਬੀਜਨਿਗ੍ਗਹਣਂ ਕਤਂ. ਨ ਹਿ ਅਞ੍ਞਥਾ ਸਬ੍ਬਸ੍ਸਪਿ ਲੋਕਸ੍ਸ ਅਲਙ੍ਕਾਰਭੂਤਂ ਪਰਮੁਕ੍ਕਂਸਗਤਂ ਸਿਕ੍ਖਾਸਂਯਮਾਨਂ ਬੁਦ੍ਧਾਨਂ ਮੁਖਚਨ੍ਦਮਣ੍ਡਲਂ ਪਟਿਚ੍ਛਾਦੇਤਬ੍ਬਂ ਹੋਤਿ.

ਪਤ੍ਥਰਿਤਵਿਤਾਨਓਲਮ੍ਬਿਤਗਨ੍ਧਦਾਮਕੁਸੁਮਦਾਮਕੇ ਗਨ੍ਧਮਣ੍ਡਲਮਾਲ਼ੇ. ਪੁਬ੍ਬਭਾਗੇਨ ਪਰਿਚ੍ਛਿਨ੍ਦਿਤ੍ਵਾਤਿ ‘‘ਏਤ੍ਤਕਂ ਵੇਲਂ ਸਮਾਪਤ੍ਤਿਯਾ ਵੀਤਿਨਾਮੇਸ੍ਸਾਮੀ’’ਤਿ ਏਵਂ ਪਵਤ੍ਤੇਨ ਪੁਬ੍ਬਭਾਗੇਨ ਕਾਲਂ ਪਰਿਚ੍ਛਿਨ੍ਦਿਤ੍ਵਾ. ਪਚ੍ਚਯਦਾਯਕੇਸੁ ਅਨੁਰੋਧਵਸੇਨ ਪਰਿਸਂ ਉਸ੍ਸਾਦੇਨ੍ਤੋ ਵਾ ਪਗ੍ਗਣ੍ਹਨ੍ਤੋ, ਅਦਾਯਕੇਸੁ ਵਿਰੋਧਵਸੇਨ ਪਰਿਸਂ ਅਪਸਾਦੇਨ੍ਤੋ ਵਾ.

ਯੋਗਕ੍ਖੇਮਂ ਅਨ੍ਤਰਾਯਾਭਾਵਂ. ਸਭਾਵਗੁਣੇਨੇਵਾਤਿ ਯਥਾਵੁਤ੍ਤਗੁਣੇਨੇਵ. ਭੋਤੋ ਗੋਤਮਸ੍ਸ ਗੁਣਂ ਸਵਿਗ੍ਗਹਂ ਚਕ੍ਕਵਾਲ਼ਂ ਅਤਿਸਮ੍ਬਾਧਂ ਵਿਤ੍ਥਾਰੇਨ ਸਨ੍ਧਾਰੇਤੁਂ ਅਪ੍ਪਹੋਨ੍ਤਤੋ. ਭਵਗ੍ਗਂ ਅਤਿਨੀਚਂ ਉਪਰੂਪਰਿ ਸਨ੍ਧਾਰੇਤੁਂ ਅਪ੍ਪਹੋਨ੍ਤਤੋ.

੩੮੬. ਠਾਨਗਮਨਾਦੀਸੁ (ਦੀ. ਨਿ. ਟੀ. ੨.੩੫) ਭੂਮਿਯਂ ਸੁਟ੍ਠੁ ਸਮਂਪਤਿਟ੍ਠਿਤਾ ਪਾਦਾ ਏਤਸ੍ਸਾਤਿ ਸੁਪ੍ਪਤਿਟ੍ਠਿਤਪਾਦੋ. ਤਂ ਪਨ ਭਗਵਤੋ ਸੁਪ੍ਪਤਿਟ੍ਠਿਤਪਾਦਤਂ ਬ੍ਯਤਿਰੇਕਮੁਖੇਨ ਵਿਭਾਵੇਤੁਂ ‘‘ਯਥਾ ਹੀ’’ਤਿਆਦਿ ਵੁਤ੍ਤਂ. ਤਤ੍ਥ ਅਗ੍ਗਤਲਨ੍ਤਿ ਅਗ੍ਗਪਾਦਤਲਂ. ਪਣ੍ਹੀਤਿ ਪਣ੍ਹਿਤਲਂ. ਪਸ੍ਸਨ੍ਤਿ ਪਾਦਤਲਸ੍ਸ ਦ੍ਵੀਸੁ ਪਸ੍ਸੇਸੁ ਏਕੇਕਂ, ਉਭਯਮੇਵ ਵਾ ਪਰਿਯਨ੍ਤਂ ਪਸ੍ਸਂ. ਸੁਵਣ੍ਣਪਾਦੁਕਤਲਂ ਵਿਯ ਉਜੁਕਂ ਨਿਕ੍ਖਿਪਿਯਮਾਨਂ. ਏਕਪ੍ਪਹਾਰੇਨੇਵਾਤਿ ਏਕਕ੍ਖਣੇਯੇਵ. ਸਕਲਂ ਪਾਦਤਲਂ ਭੂਮਿਂ ਫੁਸਤਿ ਨਿਕ੍ਖਿਪਨੇ. ਏਕਪ੍ਪਹਾਰੇਨੇਵ ਸਕਲਂ ਪਾਦਤਲਂ ਭੂਮਿਤੋ ਉਟ੍ਠਹਤੀਤਿ ਯੋਜਨਾ.

ਤਤ੍ਰਾਤਿ ਤਾਯ ਸੁਪ੍ਪਤਿਟ੍ਠਿਤਪਾਦਤਾਯ ਅਨੁਪੁਬ੍ਬਨਿਨ੍ਨਾਵ ਅਚ੍ਛਰਿਯਬ੍ਭੁਤਂ ਇਦਂ ਵੁਚ੍ਚਮਾਨਂ ਨਿਸ੍ਸਨ੍ਦਫਲਂ. ਵੁਤ੍ਤਮੇਵਤ੍ਥਂ ਸਤ੍ਥੁ ਤਿਦਿਵਗਮਨੇਨ ਸੁਪਾਕਟਂ ਕਾਤੁਂ ‘‘ਤਥਾ ਹੀ’’ਤਿਆਦਿਂ ਵਤ੍ਵਾ ‘‘ਨ ਹੀ’’ਤਿਆਦਿਨਾ ਤਂ ਸਮਤ੍ਥੇਤਿ. ਤੇਨ ਪਠਮਲਕ੍ਖਣਤੋਪਿ ਦੁਤਿਯਲਕ੍ਖਣਂ ਮਹਾਨੁਭਾਵਨ੍ਤਿ ਦਸ੍ਸੇਤਿ. ਤਥਾ ਹਿ ਵਕ੍ਖਤਿ ‘‘ਅਨ੍ਤਮਸੋ ਚਕ੍ਕਵਤ੍ਤਿਰਞ੍ਞੋ ਪਰਿਸਂ ਉਪਾਦਾਯ ਸਬ੍ਬੋਪਿ ਚਕ੍ਕਲਕ੍ਖਣਸ੍ਸੇਵ ਪਰਿਵਾਰੋ’’ਤਿ. ਯੁਗਨ੍ਧਰਪਬ੍ਬਤਸ੍ਸ ਤਾਵਤਿਂਸਭਵਨਸ੍ਸ ਚ ਪਕਤਿਪਦਨਿਕ੍ਖੇਪਟ੍ਠਾਨੁਪਸਙ੍ਕਮਨੇ ਨੇਵ ਬੁਦ੍ਧਾਨਂ, ਨ ਦੇਵਤਾਨਂ ਆਨੁਭਾਵੋ, ਅਥ ਖੋ ਬੁਦ੍ਧਾਨਂ ਲਕ੍ਖਣਾਨੁਭਾਵੋਤਿ ਇਮਮਤ੍ਥਂ ਨਿਦਸ੍ਸਿਤਂ. ਸੀਲਤੇਜੇਨ…ਪੇ… ਦਸਨ੍ਨਂ ਪਾਰਮੀਨਂ ਆਨੁਭਾਵੇਨਾਤਿ ਇਦਮ੍ਪਿ ਲਕ੍ਖਣਨਿਬ੍ਬਤ੍ਤਕਮ੍ਮਵਿਸੇਸਕਿਤ੍ਤਨਮੇਵਾਤਿ ਦਟ੍ਠਬ੍ਬਂ. ਸਬ੍ਬਾਵਨ੍ਤੇਹੀਤਿ ਸਬ੍ਬਪਦੇਸਵਨ੍ਤੇਹਿ.

ਨਾਭਿਪਰਿਚ੍ਛਿਨ੍ਨਾਤਿ ਨਾਭਿਯਂ ਪਰਿਚ੍ਛਿਨ੍ਨਾ ਪਰਿਚ੍ਛੇਦਵਸੇਨ ਠਿਤਾ. ਨਾਭਿਮੁਖਪਰਿਕ੍ਖੇਪਪਟ੍ਟੋਤਿ ਪਕਤਿਚਕ੍ਕਸ੍ਸ ਅਕ੍ਖਬ੍ਭਾਹਤਪਰਿਹਰਣਤ੍ਥਂ ਨਾਭਿਮੁਖੇ ਠਪੇਤਬ੍ਬਪਰਿਕ੍ਖੇਪਪਟ੍ਟੋ. ਨੇਮਿਮਣਿਕਾਤਿ ਨੇਮਿਯਂ ਆਵਲ਼ਿਭਾਵੇਨ ਠਿਤਮਣਿਕਾਲੇਖਾ.

ਸਮ੍ਬਹੁਲਵਾਰੋਤਿ ਬਹੁਵਿਧਲੇਖਙ੍ਗਵਿਭਾਵਨਵਾਰੋ. ਸਤ੍ਤੀਤਿ ਆਵੁਧਸਤ੍ਤਿ. ਸਿਰਿਵਚ੍ਛੋਤਿ ਸਿਰਿਮੁਖਂ. ਨਨ੍ਦੀਤਿ ਦਕ੍ਖਿਣਾਵਟ੍ਟਂ. ਸੋਵਤ੍ਤਿਕੋਤਿ ਸੋਵਤ੍ਤਿਅਙ੍ਕੋ. ਵਟਂਸਕੋਤਿ ਆਵੇਲ਼ਂ. ਵਡ੍ਢਮਾਨਕਨ੍ਤਿ ਪੁਰਿਸਹਾਰਿ ਪੁਰਿਸਙ੍ਗਂ. ਮੋਰਹਤ੍ਥਕੋਤਿ ਮੋਰਪਿਞ੍ਛਕਲਾਪੋ, ਮੋਰਪਿਞ੍ਛ ਪਰਿਸਿਬ੍ਬਿਤੋ ਵਾ ਬੀਜਨਿਵਿਸੇਸੋ. ਵਾਲਬੀਜਨੀਤਿ ਚਾਮਰਿਵਾਲਂ. ਸਿਦ੍ਧਤ੍ਥਾਦਿ ਪੁਣ੍ਣਘਟਪੁਣ੍ਣਪਾਤਿਯੋ. ‘‘ਚਕ੍ਕਵਾਲ਼ੋ’’ਤਿ ਵਤ੍ਵਾ ਤਸ੍ਸ ਪਧਾਨਾਵਯਵੇ ਦਸ੍ਸੇਤੁਂ ‘‘ਹਿਮਵਾ ਸਿਨੇਰੁ…ਪੇ… ਸਹਸ੍ਸਾਨੀ’’ਤਿ ਵੁਤ੍ਤਂ.

ਆਯਤਪਣ੍ਹੀਤਿ ਇਦਂ ਅਞ੍ਞੇਸਂ ਪਣ੍ਹਿਤੋ ਦੀਘਤਂ ਸਨ੍ਧਾਯ ਵੁਤ੍ਤਂ, ਨ ਪਨ ਅਤਿਦੀਘਤਨ੍ਤਿ ਆਹ ‘‘ਪਰਿਪੁਣ੍ਣਪਣ੍ਹੀ’’ਤਿ. ਯਥਾ ਪਨ ਪਣ੍ਹਿਲਕ੍ਖਣਂ ਪਰਿਪੁਣ੍ਣਂ ਨਾਮ ਹੋਤਿ, ਤਂ ਬ੍ਯਤਿਰੇਕਮੁਖੇਨ ਦਸ੍ਸੇਤੁਂ ‘‘ਯਥਾ ਹੀ’’ਤਿਆਦਿ ਵੁਤ੍ਤਂ. ਆਰਗ੍ਗੇਨਾਤਿ ਮਣ੍ਡਲਾਯ ਸਿਖਾਯ. ਵਟ੍ਟੇਤ੍ਵਾਤਿ ਯਥਾ ਸੁਵਟ੍ਟਂ ਹੋਤਿ, ਏਵਂ ਵਟ੍ਟੇਤ੍ਵਾ. ਰਤ੍ਤਕਮ੍ਬਲਗੇਣ੍ਡੁਕਸਦਿਸਾਤਿ ਰਤ੍ਤਕਮ੍ਬਲਮਯਗੇਣ੍ਡੁਕਸਦਿਸਾ.

ਮਕ੍ਕਟਸ੍ਸੇਵਾਤਿ ਵਾਨਰਸ੍ਸ ਵਿਯ. ਦੀਘਭਾਵੇਨ ਸਮਤਂ ਸਨ੍ਧਾਯੇਤਂ ਵੁਤ੍ਤਂ. ਨਿਯ੍ਯਾਸਤੇਲੇਨਾਤਿ ਛਦਿਕਨਿਯ੍ਯਾਸਾਦਿਨਿਯ੍ਯਾਸਸਮ੍ਮਿਸ੍ਸੇਨ ਤੇਲੇਨ.

ਤਲੁਨਾਤਿ ਸੁਕੁਮਾਰਾ.

ਚਮ੍ਮੇਨਾਤਿ ਅਙ੍ਗੁਲਨ੍ਤਰਵੇਠਿਤਚਮ੍ਮੇਨ. ਪਟਿਬਦ੍ਧਅਙ੍ਗੁਲਨ੍ਤਰੋਤਿ ਏਕਤੋ ਸਮ੍ਬਦ੍ਧਅਙ੍ਗੁਲਨ੍ਤਰੋ. ਏਕਪ੍ਪਮਾਣਾਤਿ ਦੀਘਤੋ ਸਮਾਨਪ੍ਪਮਾਣਾ. ਯਵਲਕ੍ਖਣਨ੍ਤਿ ਅਬ੍ਭਨ੍ਤਰਤੋ ਅਙ੍ਗੁਲਿਪਬ੍ਬੇਠਿਤਂ ਯਵਲਕ੍ਖਣਂ. ਪਟਿਵਿਜ੍ਝਿਤ੍ਵਾਤਿ ਤਂਤਂਪਬ੍ਬਾਨਂ ਸਮਾਨਦੇਸਤਾਯ ਅਙ੍ਗੁਲੀਨਂ ਪਸਾਰਿਤਕਾਲੇ ਅਞ੍ਞਮਞ੍ਞਂ ਵਿਜ੍ਝਿਤਾਨਿ ਵਿਯ ਫੁਸਿਤ੍ਵਾ ਤਿਟ੍ਠਨ੍ਤਿ.

ਸਙ੍ਖਾ ਵੁਚ੍ਚਨ੍ਤਿ ਗੋਪ੍ਫਕਾ, ਉਦ੍ਧਂ ਸਙ੍ਖਾ ਏਤੇਸਨ੍ਤਿ ਉਸ੍ਸਙ੍ਖਾ, ਪਾਦਾ. ਪਿਟ੍ਠਿਪਾਦੇਤਿ ਪਿਟ੍ਠਿਪਾਦਸਮੀਪੇ. ਸੁਖੇਨ ਪਾਦਾ ਪਰਿਵਤ੍ਤਨ੍ਤਿ ਪਾਦਨਾਮਨਾਦੀਸੁ, ਤੇਨੇਵ ਗਚ੍ਛਨ੍ਤਾਨਂ ਤੇਸਂ ਹੇਟ੍ਠਾ ਪਾਦਤਲਾਨਿ ਦਿਸ੍ਸਨ੍ਤਿ. ਤੇਨਾਤਿ ਗੋਪ੍ਫਕਾਨਂ ਪਿਟ੍ਠਿਪਾਦਤੋ ਉਦ੍ਧਂ ਪਤਿਟ੍ਠਿਤਤ੍ਤਾ. ਚਤੁਰਙ੍ਗੁਲਮਤ੍ਤਞ੍ਹਿ ਤਾਨਿ ਉਦ੍ਧਂ ਆਰੋਹਿਤ੍ਵਾ ਪਤਿਟ੍ਠਹਨ੍ਤਿ, ਨਿਗੁਲ਼੍ਹਾਨਿ ਚ ਹੋਨ੍ਤਿ, ਨ ਅਞ੍ਞੇਸਂ ਵਿਯ ਪਞ੍ਞਾਯਮਾਨਾਨਿ. ਸਤਿਪਿ ਦੇਸਨ੍ਤਰਪ੍ਪਵਤ੍ਤਿਯਂ ਨਿਚ੍ਚਲੋਤਿ ਦਸ੍ਸਨਤ੍ਥਂ ਨਾਭਿਗ੍ਗਹਣਂ.

ਯਸ੍ਮਾ ਏਣੀਮਿਗਸ੍ਸ ਸਮਨ੍ਤਤੋ ਏਕਸਦਿਸਮਂਸਾ ਅਨੁਕ੍ਕਮੇਨ ਉਦ੍ਧਂ ਥੂਲਾ ਜਙ੍ਘਾ ਹੋਨ੍ਤਿ, ਤਸ੍ਮਾ ਵੁਤ੍ਤਂ ‘‘ਏਣੀਮਿਗਸਦਿਸਜਙ੍ਘਾ’’ਤਿ. ਪਰਿਪੁਣ੍ਣਜਙ੍ਘੋਤਿ ਸਮਨ੍ਤਤੋ ਮਂਸੂਪਚਯੇਨ ਪਰਿਪੁਣ੍ਣਜਙ੍ਘੋ. ਤੇਨਾਹ ‘‘ਨ ਏਕਤੋ’’ਤਿਆਦਿ.

ਏਤੇਨਾਤਿ ‘‘ਅਨੋਨਮਨ੍ਤੋ’’ਤਿਆਦਿਵਚਨੇਨ, ਜਾਣੁਫਾਸੁਭਾਵਦੀਪਨੇਨਾਤਿ ਅਤ੍ਥੋ. ਅਵਸੇਸਜਨਾਤਿ ਇਮਿਨਾ ਲਕ੍ਖਣੇਨ ਰਹਿਤਾ ਜਨਾ. ਖੁਜ੍ਜਾ ਵਾ ਹੋਨ੍ਤਿ ਹੇਟ੍ਠਿਮਕਾਯਤੋ ਉਪਰਿਮਕਾਯਸ੍ਸ ਰਸ੍ਸਤਾਯ. ਵਾਮਨਾ ਵਾ ਉਪਰਿਮਕਾਯਤੋ ਹੇਟ੍ਠਿਮਕਾਯਸ੍ਸ ਰਸ੍ਸਤਾਯ. ਏਤੇਨ ਠਪੇਤ੍ਵਾ ਸਮ੍ਮਾਸਮ੍ਬੁਦ੍ਧਂ ਚਕ੍ਕਵਤ੍ਤਿਨਞ੍ਚ ਇਤਰੇ ਸਤ੍ਤਾ ਖੁਜ੍ਜਾ ਵਾਮਨਾ ਚਾਤਿ ਦਸ੍ਸੇਤਿ.

ਓਹਿਤਨ੍ਤਿ ਸਮੋਹਿਤਂ ਅਨ੍ਤੋਗਧਂ. ਤਥਾਭੂਤਂ ਪਨ ਤਂ ਤੇਨ ਛਨ੍ਨਂ ਹੋਤੀਤਿ ਆਹ ‘‘ਪਟਿਚ੍ਛਨ੍ਨ’’ਨ੍ਤਿ.

ਸੁਵਣ੍ਣਵਣ੍ਣੋਤਿ ਸੁਵਣ੍ਣਵਣ੍ਣਵਣ੍ਣੋਤਿ ਅਯਮੇਤ੍ਥ ਅਤ੍ਥੋਤਿ ਆਹ ‘‘ਜਾਤਿਹਿਙ੍ਗੁਲਕੇਨਾ’’ਤਿਆਦਿ. ਸ੍ਵਾਯਮਤ੍ਥੋ ਆਵੁਤ੍ਤਿਞਾਯੇਨ ਚ ਵੇਦਿਤਬ੍ਬੋ. ਸਰੀਰਪਰਿਯਾਯੋ ਇਧ ਵਣ੍ਣਸਦ੍ਦੋਤਿ ਅਧਿਪ੍ਪਾਯੇਨ ਪਠਮਵਿਕਪ੍ਪਂ ਵਤ੍ਵਾ ਤਥਾਰੂਪਾਯ ਪਨ ਰੁਲ਼੍ਹਿਯਾ ਅਭਾਵਂ ਮਨਸਿ ਕਤ੍ਵਾ ਵਣ੍ਣਧਾਤੁਪਰਿਯਾਯਮੇਵ ਵਣ੍ਣਸਦ੍ਦਂ ਗਹੇਤ੍ਵਾ ਦੁਤਿਯਵਿਕਪ੍ਪੋ ਵੁਤ੍ਤੋ.

ਰਜੋਤਿ ਸੁਖੁਮਰਜੋ. ਜਲ੍ਲਨ੍ਤਿ ਮਲੀਨਭਾਵਾਵਹੋ ਰੇਣੁਸਞ੍ਚਯੋ. ਤੇਨਾਹ ‘‘ਮਲਂ ਵਾ’’ਤਿ. ਯਦਿ ਵਿਵਟ੍ਟਤਿ, ਕਥਂ ਨ੍ਹਾਨਾਦੀਤਿ ਆਹ ‘‘ਹਤ੍ਥਧੋਵਨਾ’’ਤਿਆਦਿ.

ਆਵਟ੍ਟਪਰਿਯੋਸਾਨੇਤਿ ਪਦਕ੍ਖਿਣਾਵਟ੍ਟਾਯ ਅਨ੍ਤੇ.

ਬ੍ਰਹ੍ਮੁਨੋ ਸਰੀਰਂ ਪੁਰਤੋ ਵਾ ਪਚ੍ਛਤੋ ਵਾ ਅਨੋਨਮਿਤ੍ਵਾ ਉਜੁਕਮੇਵ ਉਗ੍ਗਤਨ੍ਤਿ ਆਹ ‘‘ਬ੍ਰਹ੍ਮਾ ਵਿਯ ਉਜੁਗਤ੍ਤੋ’’ਤਿ. ਪਸ੍ਸਵਙ੍ਕਾਤਿ ਦਕ੍ਖਿਣਪਸ੍ਸੇਨ ਵਾ ਵਾਮਪਸ੍ਸੇਨ ਵਾ ਵਙ੍ਕਾ.

ਹਤ੍ਥਪਿਟ੍ਠਿਆਦਿਵਸੇਨ ਸਤ੍ਤ ਉਸ੍ਸਦਾ ਏਤਸ੍ਸਾਤਿ ਸਤ੍ਤੁਸ੍ਸਦੋ.

ਸੀਹਸ੍ਸ ਪੁਬ੍ਬਦ੍ਧਂ ਸੀਹਪੁਬ੍ਬਦ੍ਧਂ, ਪਰਿਪੁਣ੍ਣਾਵਯਵਤਾਯ ਸੀਹਪੁਬ੍ਬਦ੍ਧਂ ਵਿਯ ਸਕਲੋ ਕਾਯੋ ਅਸ੍ਸਾਤਿ ਸੀਹਪੁਬ੍ਬਦ੍ਧਕਾਯੋ. ਸੀਹਸ੍ਸੇਵਾਤਿ ਸੀਹਸ੍ਸ ਵਿਯ. ਸਣ੍ਠਨ੍ਤੀਤਿ ਸਣ੍ਠਹਨ੍ਤਿ. ਨਾਨਾਚਿਤ੍ਤੇਨਾਤਿ ਵਿਵਿਧਚਿਤ੍ਤੇਨ. ਪੁਞ੍ਞਚਿਤ੍ਤੇਨਾਤਿ ਪਾਰਮਿਤਾਪੁਞ੍ਞਚਿਤ੍ਤਰੂਪੇਨ. ਚਿਤ੍ਤਿਤੋਤਿ ਸਞ੍ਜਾਤਚਿਤ੍ਤਭਾਵੋ.

ਦ੍ਵਿਨ੍ਨਂ ਕੋਟ੍ਟਾਨਮਨ੍ਤਰਨ੍ਤਿ ਦ੍ਵਿਨ੍ਨਂ ਪਿਟ੍ਠਿਬਾਹਾਨਂ ਵੇਮਜ੍ਝਂ, ਪਿਟ੍ਠਿਮਜ੍ਝਸ੍ਸ ਉਪਰਿਭਾਗੋ. ਚਿਤਂ ਪਰਿਪੁਣ੍ਣਨ੍ਤਿ ਅਨਿਨ੍ਨਭਾਵੇਨ ਚਿਤਂ, ਦ੍ਵੀਹਿ ਕੋਟ੍ਟੇਹਿ ਸਮਤਲਤਾਯ ਪਰਿਪੁਣ੍ਣਂ. ਉਗ੍ਗਮ੍ਮਾਤਿ ਉਗ੍ਗਨ੍ਤ੍ਵਾ.

ਨਿਗ੍ਰੋਧਪਰਿਮਣ੍ਡਲੋ ਵਿਯ ਪਰਿਮਣ੍ਡਲੋ ਨਿਗ੍ਰੋਧਪਰਿਮਣ੍ਡਲੋ ਏਕਸ੍ਸ ਪਰਿਮਣ੍ਡਲਸਦ੍ਦਸ੍ਸ ਲੋਪਂ ਕਤ੍ਵਾ. ਨ ਹਿ ਸਬ੍ਬੋ ਨਿਗ੍ਰੋਧੋ ਮਣ੍ਡਲੋ. ਤੇਨਾਹ ‘‘ਸਮਕ੍ਖਨ੍ਧਸਾਖੋ ਨਿਗ੍ਰੋਧੋ’’ਤਿ. ਪਰਿਮਣ੍ਡਲਸਦ੍ਦਸਨ੍ਨਿਧਾਨੇਨ ਵਾ ਪਰਿਮਣ੍ਡਲੋਵ ਨਿਗ੍ਰੋਧੋ ਗਯ੍ਹਤੀਤਿ ਪਰਿਮਣ੍ਡਲਸਦ੍ਦਸ੍ਸ ਲੋਪੇਨ ਵਿਨਾਪਿ ਅਯਮਤ੍ਥੋ ਲਬ੍ਭਤੀਤਿ ਆਹ ‘‘ਨਿਗ੍ਰੋਧੋ ਵਿਯ ਪਰਿਮਣ੍ਡਲੋ’’ਤਿ. ਯਾਵਤਕ੍ਵਸ੍ਸਾਤਿ ਓ-ਕਾਰਸ੍ਸ ਵ-ਕਾਰਾਦੇਸਂ ਕਤ੍ਵਾ ਵੁਤ੍ਤਂ.

ਸਮਵਟ੍ਟਿਤਕ੍ਖਨ੍ਧੋਤਿ ਸਮਂ ਸੁਵਟ੍ਟਿਤਕ੍ਖਨ੍ਧੋ. ਕੋਞ੍ਚਾ ਵਿਯ ਦੀਘਗਲਾ, ਬਕਾ ਵਿਯ ਵਙ੍ਕਗਲਾ, ਵਰਾਹਾ ਵਿਯ ਪੁਥੁਲਗਲਾਤਿ ਯੋਜਨਾ. ਸੁਵਣ੍ਣਾਲਿਙ੍ਗਸਦਿਸੋਤਿ ਸੁਵਣ੍ਣਮਯਖੁਦ੍ਦਕਮੁਦਿਙ੍ਗਸਦਿਸੋ.

ਰਸਗ੍ਗਸਗ੍ਗੀਤਿ ਮਧੁਰਾਦਿਭੇਦਂ ਰਸਂ ਗਸਨ੍ਤਿ ਅਨ੍ਤੋ ਪਵੇਸਨ੍ਤੀਤਿ ਰਸਗ੍ਗਸਾ, ਰਸਗ੍ਗਸਾਨਂ ਅਗ੍ਗਾ ਰਸਗ੍ਗਸਗ੍ਗਾ, ਤਾ ਏਤਸ੍ਸ ਸਨ੍ਤੀਤਿ ਰਸਗ੍ਗਸਗ੍ਗੀ. ਤੇਨਾਤਿ ਓਜਾਯ ਅਫਰਣੇਨ, ਹੀਨਧਾਤੁਕਤ੍ਤਾ ਤੇ ਬਹ੍ਵਾਬਾਧਾ ਹੋਨ੍ਤਿ.

‘‘ਹਨੂ’’ਤਿ ਸਨ੍ਨਿਸ੍ਸਯਦਨ੍ਤਾਧਾਰਸ੍ਸ ਸਮਞ੍ਞਾ, ਤਂ ਭਗਵਤੋ ਸੀਹਹਨੁਸਦਿਸਂ, ਤਸ੍ਮਾ ਭਗਵਾ ਸੀਹਹਨੁ. ਤਤ੍ਥ ਯਸ੍ਮਾ ਬੁਦ੍ਧਾਨਂ ਰੂਪਕਾਯਸ੍ਸ ਧਮ੍ਮਕਾਯਸ੍ਸ ਚ ਉਪਮਾ ਨਾਮ ਨਿਹੀਨੁਪਮਾਵ, ਨਤ੍ਥਿ ਸਮਾਨੁਪਮਾ, ਕੁਤੋ ਅਧਿਕੂਪਮਾ, ਤਸ੍ਮਾ ਅਯਮ੍ਪਿ ਨਿਹੀਨੁਪਮਾਤਿ ਦਸ੍ਸੇਤੁਂ ‘‘ਤਤ੍ਥਾ’’ਤਿਆਦਿ ਵੁਤ੍ਤਂ. ਤਿਭਾਗਵਸੇਨ ਮਣ੍ਡਲਤਾਯ ਦ੍ਵਾਦਸਿਯਂ ਪਕ੍ਖਸ੍ਸ ਚਨ੍ਦਸਦਿਸਾਨਿ.

ਦਨ੍ਤਾਨਂ ਉਚ੍ਚਨੀਚਤਾ ਅਬ੍ਭਨ੍ਤਰਬਾਹਿਰਪਸ੍ਸਵਸੇਨਪਿ ਵੇਦਿਤਬ੍ਬਾ, ਨ ਅਗ੍ਗਵਸੇਨੇਵ. ਤੇਨਾਹ ‘‘ਅਯਪਟ੍ਟਛਿਨ੍ਨਸਙ੍ਖਪਟਲਂ ਵਿਯਾ’’ਤਿ. ਅਯਪਟ੍ਟਨ੍ਤਿ ਚ ਕਕਚਂ ਅਧਿਪ੍ਪੇਤਂ. ਵਿਸਮਾਤਿ ਵਿਸਮਸਣ੍ਠਾਨਾ.

ਵਿਚ੍ਛਿਨ੍ਦਿਤ੍ਵਾ ਵਿਚ੍ਛਿਨ੍ਦਿਤ੍ਵਾ ਪਵਤ੍ਤਸਰਤਾਯ ਛਿਨ੍ਨਸ੍ਸਰਾਪਿ. ਅਨੇਕਾਕਾਰਤਾਯ ਭਿਨ੍ਨਸ੍ਸਰਾਪਿ. ਕਾਕਸ੍ਸ ਵਿਯ ਅਮਨੁਞ੍ਞਸਰਤਾਯ ਕਾਕਸ੍ਸਰਾਪਿ. ਅਪਲਿਬੁਦ੍ਧਤ੍ਤਾਤਿ ਅਨੁਪਦ੍ਦੁਤਵਤ੍ਥੁਕਤ੍ਤਾ. ਵਤ੍ਥੁਨ੍ਤਿ ਚ ਅਕ੍ਖਰੁਪ੍ਪਤ੍ਤਿਟ੍ਠਾਨਮਾਹ. ਅਟ੍ਠਙ੍ਗਸਮਨ੍ਨਾਗਤੋਤਿ ਏਤ੍ਥ ਅਟ੍ਠਙ੍ਗਾਨਿ ਪਰਤੋ ਆਗਮਿਸ੍ਸਨ੍ਤਿ. ਮਞ੍ਜੁਘੋਸੋਤਿ ਮਧੁਰਸ੍ਸਰੋ.

ਕਰਵੀਕਸਦ੍ਦੋ ਯੇਸਂ ਸਤ੍ਤਾਨਂ ਸੋਤਪਥਂ ਉਪਗਚ੍ਛਤਿ, ਤੇ ਅਤ੍ਤਨੋ ਸਰਸਮ੍ਪਤ੍ਤਿਯਾ ਪਕਤਿਂ ਜਹਾਪੇਤ੍ਵਾ ਅਵਸੇ ਕਰੋਨ੍ਤੋ ਅਤ੍ਤਨੋ ਵਸੇ ਵਤ੍ਤੇਤਿ, ਏਵਂ ਮਧੁਰੋਤਿ ਦਸ੍ਸੇਨ੍ਤੋ ‘‘ਤਤ੍ਰਿਦ’’ਨ੍ਤਿਆਦਿਮਾਹ. ਤਂ ਪੀਤਿਨ੍ਤਿ ਤਂ ਬੁਦ੍ਧਗਤਂ ਪੀਤਿਂ. ਤੇਨੇਵ ਨੀਹਾਰੇਨ ਪੁਨਪ੍ਪੁਨਂ ਪਵਤ੍ਤਨ੍ਤਂ ਅਵਿਜਹਿਤ੍ਵਾ ਵਿਕ੍ਖਮ੍ਭਿਤਕਿਲੇਸਾ ਥੇਰਾਨਂ ਸਨ੍ਤਿਕੇ ਲਦ੍ਧਧਮ੍ਮਸ੍ਸਵਨਸਪ੍ਪਾਯਾ ਉਪਨਿਸ੍ਸਯਸਮ੍ਪਤ੍ਤਿਯਾ ਪਰਿਪਕ੍ਕਞਾਣਤਾਯ ‘‘ਸਤ੍ਤਹਿ…ਪੇ… ਪਤਿਟ੍ਠਾਸੀ’’ਤਿ. ਸਤ੍ਤਸਤਮਤ੍ਤੇਨ ਓਰੋਧਜਨੇਨ ਸਦ੍ਧਿਂ ਪਦਸਾਵ ਥੇਰਾਨਂ ਸਨ੍ਤਿਕਂ ਉਪਗਤਤ੍ਤਾ ‘‘ਸਤ੍ਤਹਿ ਜਙ੍ਘਾਸਤੇਹਿ ਸਦ੍ਧਿ’’ਨ੍ਤਿ ਵੁਤ੍ਤਂ.

ਅਭਿਨੀਲਨੇਤ੍ਤੋਤਿ ਅਧਿਕਨੀਲਨੇਤ੍ਤੋ. ਅਧਿਕਨੀਲਤਾ ਚ ਸਾਤਿਸਯਂ ਨੀਲਭਾਵੇਨ ਵੇਦਿਤਬ੍ਬਾ, ਨ ਨੇਤ੍ਤੇ ਨੀਲਵਣ੍ਣਸ੍ਸੇਵ ਅਧਿਕਭਾਵਤੋਤਿ ਆਹ ‘‘ਨ ਸਕਲਨੀਲਨੇਤ੍ਤੋਵਾ’’ਤਿਆਦਿ. ਪੀਤਲੋਹਿਤਵਣ੍ਣਾ ਸੇਤਮਣ੍ਡਲਗਤਰਾਜਿਵਸੇਨ, ਨੀਲਸੇਤਕਾਲ਼ਵਣ੍ਣਾ ਪਨ ਤਂਤਂਮਣ੍ਡਲਵਸੇਨੇਵ ਵੇਦਿਤਬ੍ਬਾ.

ਚਕ੍ਖੁਭਣ੍ਡਨ੍ਤਿ ਅਕ੍ਖਿਦਲਨ੍ਤਿ ਕੇਚਿ, ਅਕ੍ਖਿਦਲਪਤ੍ਤਨ੍ਤਿ ਅਞ੍ਞੇ. ਅਕ੍ਖਿਦਲੇਹਿ ਪਨ ਸਦ੍ਧਿਂ ਅਕ੍ਖਿਬਿਮ੍ਬਨ੍ਤਿ ਵੇਦਿਤਬ੍ਬਂ. ਏਵਞ੍ਹਿ ਵਿਨਿਗ੍ਗਤਗਮ੍ਭੀਰਜੋਤਨਾਪਿ ਯੁਤ੍ਤਾ ਹੋਤਿ.

ਉਣ੍ਣਾਸਦ੍ਦੋ ਲੋਕੇ ਅਵਿਸੇਸਤੋ ਲੋਮਪਰਿਯਾਯੋ, ਇਧ ਪਨ ਲੋਮਵਿਸੇਸਵਾਚਕੋਤਿ ਆਹ ‘‘ਉਣ੍ਣਲੋਮ’’ਨ੍ਤਿ. ਨਲਾਟਮਜ੍ਝਜਾਤਾਤਿ ਨਲਾਟਮਜ੍ਝਗਤਾ. ਓਦਾਤਤਾਯ ਉਪਮਾ, ਨ ਮੁਦੁਤਾਯ. ਰਜਤਪੁਬ੍ਬੁਲ਼ਕਾਤਿ ਰਜਤਮਯਤਾਰਕਾ.

ਦ੍ਵੇ ਅਤ੍ਥਵਸੇ ਪਟਿਚ੍ਚ ਵੁਤ੍ਤਨ੍ਤਿ ਯਸ੍ਮਾ ਬੁਦ੍ਧਾ ਚਕ੍ਕਵਤ੍ਤਿਨੋ ਚ ਪਰਿਪੁਣ੍ਣਨਲਾਟਤਾਯ ਪਰਿਪੁਣ੍ਣਸੀਸਬਿਮ੍ਬਤਾਯ ਚ ‘‘ਉਣ੍ਹੀਸਸੀਸਾ’’ਤਿ ਵੁਚ੍ਚਨ੍ਤਿ, ਤਸ੍ਮਾ ਤੇ ਦ੍ਵੇ ਅਤ੍ਥਵਸੇ ਪਟਿਚ੍ਚ ‘‘ਉਣ੍ਹੀਸਸੀਸੋ’’ਤਿ ਇਦਂ ਵੁਤ੍ਤਂ. ਇਦਾਨਿ ਤਂ ਅਤ੍ਥਦ੍ਵਯਂ ਭਗਵਤਿ ਸੁਪ੍ਪਤਿਟ੍ਠਿਤਨ੍ਤਿ ਦਸ੍ਸੇਤੁਂ ‘‘ਤਥਾਗਤਸ੍ਸਹੀ’’ਤਿਆਦਿ ਵੁਤ੍ਤਂ. ਸਣ੍ਹਤਮਤਾਯ ਸੁਵਣ੍ਣਵਣ੍ਣਤਾਯ ਚ ਰਞ੍ਞੋ ਬਦ੍ਧਉਣ੍ਹੀਸਪਟ੍ਟੋ ਵਿਯ ਵਿਰੋਚਤਿ. ਕਪ੍ਪਸੀਸਾਤਿ ਦ੍ਵਿਧਾਭੂਤਸੀਸਾ. ਫਲਸੀਸਾਤਿ ਫਲਸਦਿਸਸੀਸਾ. ਅਟ੍ਠਿਸੀਸਾਤਿ ਮਂਸਸ੍ਸ ਅਭਾਵਤੋ ਤਚੋਪਰਿਯੋਨਦ੍ਧਅਟ੍ਠਿਮਤ੍ਤਸੀਸਾ. ਤੁਮ੍ਬਸੀਸਾਤਿ ਲਾਬੁਸਦਿਸਸੀਸਾ. ਪਬ੍ਭਾਰਸੀਸਾਤਿ ਪਿਟ੍ਠਿਭਾਗੇਨ ਓਲਮ੍ਬਮਾਨਸੀਸਾ. ਪੁਰਿਮਨਯੇਨਾਤਿ ਪਰਿਪੁਣ੍ਣਨਲਾਟਤਾਪਕ੍ਖੇਨ. ਉਣ੍ਹੀਸਵੇਠਿਤਸੀਸੋ ਵਿਯਾਤਿ ਉਣ੍ਹੀਸਪਟ੍ਟੇਨ ਵੇਠਿਤਸੀਸਪਦੇਸੋ ਵਿਯ. ਉਣ੍ਹੀਸਂ ਵਿਯਾਤਿ ਛੇਕੇਨ ਸਿਪ੍ਪਿਨਾ ਵਿਰਚਿਤਉਣ੍ਹੀਸਮਣ੍ਡਲਂ ਵਿਯ.

ਕਮ੍ਮਨ੍ਤਿ ਯੇਨ ਯੇਨ ਕਮ੍ਮੇਨ ਯਂ ਯਂ ਲਕ੍ਖਣਂ ਨਿਬ੍ਬਤ੍ਤਂ, ਤਂ ਤਂ ਕਮ੍ਮਂ. ਕਮ੍ਮਸਰਿਕ੍ਖਕਨ੍ਤਿ ਤਸ੍ਸ ਤਸ੍ਸ ਲਕ੍ਖਣਸ੍ਸ ਤਂਕਮ੍ਮਾਨੁਰੂਪਤਾ. ਲਕ੍ਖਣਨ੍ਤਿ ਤਸ੍ਸ ਮਹਾਪੁਰਿਸਲਕ੍ਖਣਸ੍ਸ ਅਵਿਪਰੀਤਸਭਾਵੋ. ਲਕ੍ਖਣਾਨਿਸਂਸਨ੍ਤਿ ਤਂ ਲਕ੍ਖਣਪਟਿਲਾਭੇਨ ਲਦ੍ਧਬ੍ਬਗੁਣੋ. ਇਮਾਨਿ ਕਮ੍ਮਾਦੀਨੀਤਿ ਇਮਾਨਿ ਅਨਨ੍ਤਰਂ ਵੁਤ੍ਤਾਨਿ ਕਮ੍ਮਕਮ੍ਮਸਰਿਕ੍ਖਕਾਦੀਨਿ ਦਸ੍ਸੇਤ੍ਵਾ ਤਂ ਸਰੂਪਤੋ ਵਿਭਾਵੇਤ੍ਵਾ ਕਥੇਤਬ੍ਬਾਨਿ ਸਂਵਣ੍ਣਕੇਨ.

ਰਤਨਵਿਚਿਤ੍ਤਸੁਵਣ੍ਣਤੋਰਣਂ ਤਸ੍ਮਿਂ ਕਾਲੇ ਮਨੁਸ੍ਸਲੋਕੇ ਨਤ੍ਥੀਤਿ ਵੁਤ੍ਤਂ ‘‘ਦੇਵਨਗਰੇ’’ਤਿ. ਸਬ੍ਬਸੋ ਸੁਪੁਪ੍ਫਿਤਸਾਲਰੁਕ੍ਖੋ ਅਸਾਧਾਰਣਸੋਭੋ ਮਨੁਸ੍ਸੂਪਚਾਰੇ ਨ ਲਬ੍ਭਤੀਤਿ ਆਹ ‘‘ਸੇਲਨ੍ਤਰਮ੍ਹੀ’’ਤਿ. ਕਿਰਿਯਾਚਾਰਨ੍ਤਿ ਕਾਯਿਕਵਾਚਸਿਕਕਿਰਿਯਾਪਵਤ੍ਤਿਂ.

੩੮੭. ਸਤਤਪਾਟਿਹਾਰਿਯਨ੍ਤਿ ਸਤਤਂ ਚਰਿਮਭਵੇ ਸਬ੍ਬਕਾਲਂ ਲਕ੍ਖਣਨਿਬ੍ਬਤ੍ਤਕਕਮ੍ਮਾਨੁਭਾਵਹੇਤੁਕਂ ਬੁਦ੍ਧਾਵੇਣਿਕਂ ਪਾਟਿਹਾਰਿਯਂ. ਬੁਦ੍ਧਾਨਂ ਅਤਿਦੂਰੇ ਪਾਦਂ ਨਿਕ੍ਖਿਪਿਤੁਕਾਮਾਨਮ੍ਪਿ ਨਾਤਿਦੂਰੇ ਏਵ ਨਿਕ੍ਖਿਪਨਂ ਹੋਤੀਤਿ ‘‘ਨ ਅਤਿਦੂਰੇ ਠਪੇਸ੍ਸਾਮੀਤਿ ਉਦ੍ਧਰਤੀ’’ਤਿ ਵੁਤ੍ਤਂ. ਪਕਤਿਸਞ੍ਚਰਣਵਸੇਨੇਤਂ ਵੁਤ੍ਤਂ, ਤਾਦਿਸੇਨ ਪਾਦੇਨ ਅਨੇਕਯੋਜਨੇ ਠਪੇਸ੍ਸਾਮੀਤਿ ਉਦ੍ਧਰਣਮ੍ਪਿ ਹੋਤਿਯੇਵ. ਅਤਿਦੂਰਂ ਹੀਤਿਆਦਿ ਪਮਾਣਾਤਿਕ੍ਕਮੇ ਦੋਸਦਸ੍ਸਨਂ. ਏਵਂ ਸਤੀਤਿ ਏਵਂ ਦਕ੍ਖਿਣਪਾਦਵਾਮਪਾਦਾਨਂ ਯਥਾਧਿਪ੍ਪੇਤਪਤਿਟ੍ਠਿਤਟ੍ਠਾਨੇ ਸਤਿ. ਪਦਵਿਚ੍ਛੇਦੋਤਿ ਪਦਵਾਰਵਿਚ੍ਛੇਦੋ. ਯਾਦਿਸਂ ਪਸਾਰੇਨ੍ਤੋ ਵਾਮਪਾਦਸ੍ਸ ਉਦ੍ਧਰਣਂ ਪਤਿਟ੍ਠਾਨਞ੍ਚ, ਦਕ੍ਖਿਣਪਾਦਸ੍ਸ ਤਾਦਿਸਮੇਵ, ਇਤਿ ਨੇਸਂ ਉਦ੍ਧਰਣਪਤਿਟ੍ਠਾਨਾਨਂ ਸਮਾਨਤੋ ਅਞ੍ਞਮਞ੍ਞਭਾਵੇਨ ਅਨੂਨਾਨਧਿਕਤਾਯ ਵੁਤ੍ਤਂ ‘‘ਦਕ੍ਖਿਣਪਾਦਕਿਚ੍ਚਂ ਵਾਮਪਾਦੇਨ ਨਿਯਮਿਤਂ, ਵਾਮਪਾਦਕਿਚ੍ਚਂ ਦਕ੍ਖਿਣਪਾਦੇਨ ਨਿਯਮਿਤ’’ਨ੍ਤਿ.

ਦਿਵਾਤਿ ਉਪਕਟ੍ਠਾਯ ਵੇਲਾਯ. ਵਿਹਾਰਭਤ੍ਤਤ੍ਥਾਯਾਤਿ ਵਿਹਾਰੇ ਯਥਾਵੁਦ੍ਧਂ ਗਹੇਤਬ੍ਬਭਤ੍ਤਤ੍ਥਾਯ. ਪਚ੍ਛਤੋ ਆਗਚ੍ਛਨ੍ਤੋਤਿ ਪਕਤਿਗਮਨੇਨ ਪਚ੍ਛਤੋ ਆਗਚ੍ਛਨ੍ਤੋ. ਓਕਾਸਂ ਨ ਲਭਤੀਤਿ ਪਦਨਿਕ੍ਖੇਪਟ੍ਠਾਨਂ ਨ ਲਭਤਿ. ਊਰੁਪਰਿਯਾਯੋ ਇਧ ਸਤ੍ਥਿ-ਸਦ੍ਦੋਤਿ ਆਹ ‘‘ਨ ਊਰੁਂ ਉਨ੍ਨਾਮੇਤੀ’’ਤਿ. ਦਣ੍ਡਙ੍ਕੁਸਂ ਵੁਚ੍ਚਤਿ ਦੀਘਦਣ੍ਡੋ ਅਙ੍ਕੁਸੋ, ਤੇਨ ਰੁਕ੍ਖਸਾਖਂ ਛਿਨ੍ਦਤੋ ਪੁਰਿਸਸ੍ਸ ਯਥਾ ਪਚ੍ਛਾਭਾਗੇਨ ਪਾਦਾਨਂ ਓਸਕ੍ਕਨਂ ਹੋਤਿ, ਏਵਂ ਭਗਵਤੋ ਪਾਦਾ ਨ ਓਸਕ੍ਕਨ੍ਤੀਤਿ ਆਹ ‘‘ਰੁਕ੍ਖਸਾਖਾਛੇਦਨ…ਪੇ… ਓਸਕ੍ਕਾਪੇਤੀ’’ਤਿ. ਓਬਦ੍ਧਾਨਾਬਦ੍ਧਟ੍ਠਾਨੇਹਿ ਪਾਦਂ ਕੋਟ੍ਟੇਨ੍ਤੋ ਵਿਯਾਤਿ ਆਬਦ੍ਧਟ੍ਠਾਨੇਨ ਅਨਾਬਦ੍ਧਟ੍ਠਾਨੇਨ ਚ ਪਾਦਖਣ੍ਡਂ ਕੋਟ੍ਟੇਤ੍ਵਾ ਥਦ੍ਧਂ ਕਰੋਨ੍ਤੋ ਵਿਯ. ਨ ਇਤੋ ਚਿਤੋ ਚ ਚਾਲੇਤੀਤਿ ਅਪਰਾਪਰਂ ਨ ਚਾਲੇਤਿ. ਉਸ੍ਸਙ੍ਖਪਾਦਤਾਯ ਸੁਖੇਨੇਵ ਪਾਦਾਨਂ ਪਰਿਵਤ੍ਤਨਤੋ ਨਾਭਿਤੋ ਪਟ੍ਠਾਯ ਉਪਰਿਮਕਾਯੋ ਨ ਇਞ੍ਜਤੀਤਿ ਹੇਟ੍ਠਿਮਕਾਯੋਵ ਇਞ੍ਜਤਿ. ਤੇਨਾਹ ‘‘ਉਪਰਿਮ…ਪੇ… ਨਿਚ੍ਚਲੋ ਹੋਤੀ’’ਤਿ. ਨ ਜਾਨਾਤਿ ਅਨਿਞ੍ਜਨਤੋ. ਕਾਯਬਲੇਨਾਤਿ ਗਮਨਪਯੋਗਸਙ੍ਖਾਤੇਨ ਕਾਯਗਤੇਨ ਵਿਸੇਸਬਲੇਨ. ਜਵਗਮਨਹੇਤੁਭੂਤੇਨ ਵਾ ਕਾਯਬਲੇਨ. ਤੇਨਾਹ ‘‘ਬਾਹਾ ਖਿਪਨ੍ਤੋ’’ਤਿਆਦਿ. ਜਵੇਨ ਗਚ੍ਛਨ੍ਤੋ ਹਿ ਬਾਹਾ ਖਿਪਤਿ, ਸਰੀਰਤੋ ਸੇਦਾ ਮੁਚ੍ਚਨ੍ਤਿ. ਨਾਗਾਪਲੋਕਿਤਵਸੇਨਾਤਿ ਨਾਗਸ੍ਸ ਅਪਲੋਕਨਮਿਵ ਸਕਲਕਾਯੇਨੇਵ ਪਰਿਵਤ੍ਤੇਤ੍ਵਾ ਅਪਲੋਕਨਵਸੇਨ.

ਅਨਾਵਰਣਞਾਣਸ੍ਸਾਤਿ ਅਨਾਵਰਣਞਾਣਬਲੇਨ ਦਸ੍ਸਨਸ੍ਸ. ਅਨਾਵਰਣਵਾਰੋ ਪਨ ਕਾਯੇ ਪਤਿਟ੍ਠਿਤਰੂਪਦਸ੍ਸਨਮ੍ਪਿ ਅਨਾਵਰਣਮੇਵਾਤਿ ਦਸ੍ਸਨਤ੍ਥਂ ਵੁਤ੍ਤੋ. ਇਨ੍ਦਖੀਲਤੋ ਪਟ੍ਠਾਯਾਤਿ ਨਗਰਦ੍ਵਾਰੇ ਇਨ੍ਦਖੀਲਤੋ ਪਟ੍ਠਾਯ. ਪਕਤਿਇਰਿਯਾਪਥੇਨੇਵਾਤਿ ਓਨਮਨਾਦਿਂ ਅਕਤ੍ਵਾ ਉਜੁਕਗਮਨਾਦਿਨਾ ਏਵ. ਯਦਿ ਏਵਂ ਕੋਟ੍ਠਕਦ੍ਵਾਰਗੇਹਪ੍ਪਵੇਸੇ ਕਥਨ੍ਤਿ ਆਹ ‘‘ਦਲਿਦ੍ਦਮਨੁਸ੍ਸਾਨ’’ਨ੍ਤਿਆਦਿ. ਪਰਿਵਤ੍ਤੇਨ੍ਤੇਨਾਤਿ ਨਿਪਜ੍ਜਨਤ੍ਥਂ ਕਾਯਂ ਪਰਿਵਤ੍ਤੇਨ੍ਤੇਨ.

ਹਤ੍ਥੇਹਿ ਗਹੇਤ੍ਵਾਤਿ ਉਭੋਹਿ ਹਤ੍ਥੇਹਿ ਉਭੋਸੁ ਕਟਿਪ੍ਪਦੇਸੇਸੁ ਪਰਿਗ੍ਗਹੇਤ੍ਵਾ. ਪਤਤਿ ਨਿਸੀਦਨਟ੍ਠਾਨੇ ਨਿਪਜ੍ਜਨਵਸੇਨ ਪਤਤਿ. ਓਰਿਮਂ ਅਙ੍ਗਂ ਨਿਸ੍ਸਾਯ ਨਿਸਿਨ੍ਨੋਤਿ ਪਲ੍ਲਙ੍ਕਮਾਭੁਜਿਤ੍ਵਾ ਉਕ੍ਕੁਟਿਕਨਿਸਜ੍ਜਾਯ ਉਪਰਿਮਕਾਯਂ ਹੇਟ੍ਠਿਮਕਾਯੇ ਪਤਿਟ੍ਠਪੇਨ੍ਤੋਯੇਵ ਭਾਰੀਕਰਣਵਸੇਨ ਓਰਿਮਙ੍ਗਂ ਨਿਸ੍ਸਾਯ ਨਿਸਿਨ੍ਨੋ. ਘਂਸਨ੍ਤੋਤਿ ਆਨਿਸਦਦੇਸੇਨ ਆਸਨਟ੍ਠਾਨਂ ਘਂਸਨ੍ਤੋ. ਪਾਰਿਮਙ੍ਗਨ੍ਤਿ ਸਤ੍ਥਿਭਾਗਸਮ੍ਮਦ੍ਦਂ ਆਨਿਸਦਪਦੇਸਂ. ਤਥੇਵਾਤਿ ਘਂਸਨ੍ਤੋ ਏਵ. ਓਲਮ੍ਬਕਂ ਧਾਰੇਨ੍ਤੋ ਵਿਯਾਤਿ ਓਲਮ੍ਬਕਸੁਤ੍ਤਂ ਓਤਾਰੇਨ੍ਤੋ ਵਿਯ. ਤੇਨ ਉਜੁਕਮੇਵ ਨਿਸੀਦਨਮਾਹ. ਸਰੀਰਸ੍ਸ ਗਰੁਕਭਾਵਹੇਤੂਨਂ ਦੂਰਤੋ ਸਮੁਪਾਯਿਤਭਾਵੇਨ ਸਲ੍ਲਹੁਕਭਾਵਤੋ ਤੂਲਪਿਚੁਂ ਠਪੇਨ੍ਤੋ ਵਿਯ.

ਅਪ੍ਪੇਸਕ੍ਖਾਨਂ ਮਹਾਨੁਭਾਵਗੇਹਪ੍ਪਵੇਸੇ ਸਿਯਾ ਛਮ੍ਭਿਤਤ੍ਤਂ, ਚਿਤ੍ਤਕ੍ਖੋਭੋ, ਦਰਥਵਸੇਨ ਨਾਨਪ੍ਪਕਾਰਕਪ੍ਪਨਂ, ਭਯਵਸੇਨ ਤਣ੍ਹਾਵਸੇਨ ਪਰਿਤਸ੍ਸਨਂ, ਤਂ ਸਬ੍ਬਂ ਭਗਵਤੋ ਨਤ੍ਥੀਤਿ ਦਸ੍ਸੇਤੁਂ ਪਾਲ਼ਿਯਂ ‘‘ਨ ਛਮ੍ਭਤੀ’’ਤਿਆਦਿ (ਮ. ਨਿ. ੨.੩੮੭) ਵੁਤ੍ਤਨ੍ਤਿ ਆਹ ‘‘ਨ ਛਮ੍ਭਤੀ’’ਤਿਆਦਿ.

ਉਦਕਂ ਦੀਯਤਿ ਏਤੇਨਾਤਿ ਉਦਕਦਾਨਂ, ਭਿਙ੍ਕਾਰਾਦਿ ਉਦਕਭਾਜਨਂ. ਬਦ੍ਧਂ ਕਤ੍ਵਾਤਿ ਹਤ੍ਥਗਤਮਤ੍ਤਿਕਂ ਵਿਯ ਅਤ੍ਤਨੋ ਵਸੇ ਅਵਤ੍ਤਨ੍ਤਂ ਕਤ੍ਵਾ. ਪਰਿਵਤ੍ਤੇਤ੍ਵਾਤਿ ਕੁਜ੍ਜਿਤ੍ਵਾ. ਵਿਛਡ੍ਡਯਮਾਨੋ ਉਦਕਸ੍ਸ ਵਿਕ੍ਖਿਪਨਵਸੇਨ ਛਡ੍ਡਯਮਾਨੋ.

ਤਥਾ ਨ ਗਣ੍ਹਾਤਿ, ਬ੍ਯਞ੍ਜਨਮਤ੍ਤਾਯ ਏਵ ਗਣ੍ਹਨ੍ਤੋ. ਭਤ੍ਤਂ ਵਾ ਅਮਨਾਪਨ੍ਤਿ ਆਨੇਤ੍ਵਾ ਯੋਜਨਾ. ਬ੍ਯਞ੍ਜਨੇਨ ਆਲੋਪਅਤਿਨਾਮਨਂ, ਆਲੋਪੇਨ ਬ੍ਯਞ੍ਜਨਅਤਿਨਾਮਨਨ੍ਤਿ ਇਮੇਸੁ ਪਨ ਦ੍ਵੀਸੁ ਪਠਮਮੇਵ ਅਸਾਰੁਪ੍ਪਤਾਯ ਅਨਿਟ੍ਠਂ ਵਜ੍ਜੇਤਬ੍ਬਨ੍ਤਿ ਪਾਲ਼ਿਯਂ ਪਟਿਕ੍ਖਿਤ੍ਤਨ੍ਤਿ ਦਟ੍ਠਬ੍ਬਂ. ਸਬ੍ਬਤ੍ਥੇਵਾਤਿ ਸਬ੍ਬਸ੍ਮਿਂ ਆਹਰਿਤਬ੍ਬਵਤ੍ਥੁਸ੍ਮਿਂ ਸੁਪਣੀਤਭਾਵੇਨ ਰਸੋ ਪਾਕਟੋ ਹੋਤਿ ਞਾਣੇਨ ਪਰਿਞ੍ਞਾਤਤ੍ਤਾ. ਰਸਗੇਧੋ ਪਨ ਨਤ੍ਥਿ ਸੇਤੁਘਾਤਤ੍ਤਾ.

ਅਸ੍ਸਾਤਿ ‘‘ਨੇਵ ਦਵਾਯਾ’’ਤਿਆਦਿਪਦਸ੍ਸ. ਵੁਤ੍ਤਮੇਤਨ੍ਤਿ ‘‘ਵਿਸੁਦ੍ਧਿਮਗ੍ਗੇ ਵਿਨਿਚ੍ਛਯੋ ਆਗਤੋ’’ਤਿ ਸਬ੍ਬਾਸਵਸੁਤ੍ਤੇ (ਮ. ਨਿ. ੧.੨੩) ਸਂਵਣ੍ਣਯਨ੍ਤੇਨ ਵੁਤ੍ਤਮੇਤਂ, ਤਸ੍ਮਾ ਨ ਏਤ੍ਥ ਤਂ ਵਤ੍ਤਬ੍ਬਨ੍ਤਿ ਅਧਿਪ੍ਪਾਯੋ, ਤਸ੍ਮਾ ਯੋ ਤਸ੍ਮਿਂ ਤਸ੍ਮਿਂ ਵਿਨਿਚ੍ਛਯੇ ਵਿਸੇਸਵਾਦੋ ਇਚ੍ਛਿਤਬ੍ਬੋ. ਸੋ ਪਰਮਤ੍ਥਮਞ੍ਜੂਸਾਯ ਵਿਸੁਦ੍ਧਿਮਗ੍ਗਵਣ੍ਣਨਾਯ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਪਤ੍ਤਸ੍ਸ ਗਹਣਟ੍ਠਾਨਨ੍ਤਿ ਹਤ੍ਥੇਨ ਪਤ੍ਤਸ੍ਸ ਗਹਣਪਦੇਸਂ. ਵਿਨਿਵਤ੍ਤਿਤ੍ਵਾਤਿ ਪਤ੍ਤੇ ਸਬ੍ਬਂ ਆਮਿਸਗਤਂ ਸਦ੍ਧਿਂ ਭਤ੍ਤੇਨ ਵਿਨਿਵਤ੍ਤਿਤ੍ਵਾ ਗਚ੍ਛਤਿ. ਪਮਾਣਾਤਿਕ੍ਕਨ੍ਤਨ੍ਤਿ ਕੇਲਾਯਨਵਸੇਨ ਅਤਿਕ੍ਕਨ੍ਤਪਮਾਣਂ ਆਰਕ੍ਖਂ ਠਪੇਤਿ. ਚੀਵਰਭੋਗਨ੍ਤਰਨ੍ਤਿ ਚੀਵਰਪਟਲਨ੍ਤਰਂ. ਉਦਰੇਨ ਅਕ੍ਕਮਿਤ੍ਵਾਤਿ ਉਦਰੇਨੇਵ ਸਨ੍ਨਿਰੁਮ੍ਭਿਤ੍ਵਾ.

ਅਪ੍ਪਤ੍ਤਕਾਲਂ ਅਭਿਮੁਖਂ ਨਾਮੇਤਿ ਉਪਨਾਮੇਤੀਤਿ ਅਤਿਨਾਮੇਤਿ, ਪਤ੍ਤਕਾਲਂ ਅਤਿਕ੍ਕਾਮੇਨ੍ਤੋ ਨਾਮੇਤਿ ਅਪਨੇਤੀਤਿ ਅਤਿਨਾਮੇਤਿ. ਉਭਯਮ੍ਪਿ ਏਕਜ੍ਝਂ ਗਹੇਤ੍ਵਾ ਪਾਲ਼ਿਯਂ ‘‘ਨ ਚ ਅਨੁਮੋਦਨਸ੍ਸ ਕਾਲਮਤਿਨਾਮੇਤੀ’’ਤਿ ਵੁਤ੍ਤਨ੍ਤਿ ਦਸ੍ਸੇਨ੍ਤੋ ‘‘ਯੋ ਹੀ’’ਤਿਆਦਿਮਾਹ.

ਵੇਗਗਮਨੇਨ ਪਟਿਸਂਮੁਞ੍ਚਿਤ੍ਵਾ ਧਾਵਿਤ੍ਵਾ ਗਚ੍ਛਤਿ. ਅਚ੍ਚੁਕ੍ਕਟ੍ਠਨ੍ਤਿ ਅਤਿਵਿਯ ਉਦ੍ਧਂ ਕਤ੍ਵਾ ਕਡ੍ਢਿਤਪਾਰੁਤਂ. ਤੇਨਾਹ ‘‘ਯੋ ਹਿ ਯਾਵ ਹਨੁਕਟ੍ਠਿਤੋ…ਪੇ… ਹੋਤੀ’’ਤਿ. ਅਚ੍ਚੋਕ੍ਕਟ੍ਠਨ੍ਤਿ ਅਤਿਵਿਯ ਹੇਟ੍ਠਾ ਕਤ੍ਵਾ ਕਡ੍ਢਿਤਪਾਰੁਤਂ. ਤੇਨਾਹ ‘‘ਯਾਵ ਗੋਪ੍ਫਕਾ ਓਤਾਰੇਤ੍ਵਾ’’ਤਿ. ਉਭਤੋ ਉਕ੍ਖਿਪਿਤ੍ਵਾਤਿ ਦਕ੍ਖਿਣਤੋ ਵਾਮਤੋਤਿ ਉਭੋਸੁ ਪਸ੍ਸੇਸੁ ਉਤ੍ਤਰਾਸਙ੍ਗਂ ਉਕ੍ਖਿਪਿਤ੍ਵਾ. ਥਨਨ੍ਤਿ ਦਕ੍ਖਿਣਥਨਂ.

ਵਿਸ੍ਸਟ੍ਠੋਤਿ ਵਿਮੁਤ੍ਤੋ. ਤੇਨਾਹ ‘‘ਵਿਸ੍ਸਟ੍ਠਤ੍ਤਾਯੇਵ ਚੇਸ ਵਿਞ੍ਞੇਯ੍ਯੋ’’ਤਿ. ਯਸ੍ਮਾ ਅਮੁਤ੍ਤਵਾਦਿਨੋ ਵਚਨਂ ਅਵਿਸ੍ਸਟ੍ਠਤਾਯ ਨ ਸਿਨਿਯ੍ਹਤਿ, ਨ ਏਵਂ ਮੁਤ੍ਤਵਾਦਿਨੋਤਿ ਆਹ ‘‘ਸਿਨਿਦ੍ਧੋ’’ਤਿ. ਵਿਞ੍ਞੇਯ੍ਯੋਤਿ ਸੁਪਰਿਬ੍ਯਤ੍ਤਤਾਯ ਅਕ੍ਖਰਤੋ ਚ ਬ੍ਯਞ੍ਜਨਤੋ ਚ ਵਿਞ੍ਞਾਤੁਂ ਸਕ੍ਕੁਣੇਯ੍ਯੋ. ਤੇਨਾਹ ‘‘ਪਾਕਟੋ’’ਤਿ. ਵਿਞ੍ਞਾਪਨਿਯੋਤਿ ਵਿਜਾਨਿਤਬ੍ਬੋ. ਬ੍ਯਞ੍ਜਨਵਸੇਨੇਵ ਚੇਤ੍ਥ ਵਿਞ੍ਞੇਯ੍ਯਤਾ ਵੇਦਿਤਬ੍ਬਾ ਘੋਸਸ੍ਸ ਅਧਿਪ੍ਪੇਤਤ੍ਤਾ. ਮਧੁਰੋਤਿ ਪਿਯੋ ਪੇਮਨੀਯੋ ਅਪਲਿਬੁਦ੍ਧੋ. ਸਵਨਮਰਹਤਿ, ਸਵਨਸ੍ਸ ਸੋਤਸ੍ਸ ਹਿਤੋਤਿ ਵਾ ਸਵਨੀਯੋ. ਸਮ੍ਪਿਣ੍ਡਿਤੋਤਿ ਸਹਿਤੋ. ਭਗਵਤੋ ਹਿ ਸਦ੍ਦੋ ਉਪ੍ਪਤ੍ਤਿਟ੍ਠਾਨਕਤਾਸਞ੍ਚਿਤਤ੍ਤਾ ਸਹਿਤਾਕਾਰੇਨੇਵ ਆਪਾਥਮਾਗਚ੍ਛਤਿ, ਨ ਅਯੋਸਲਾਕਾਯ ਪਹਟਕਂਸਥਾਲਂ ਵਿਯ ਵਿਪ੍ਪਕਿਣ੍ਣੋ. ਤੇਨਾਹ ‘‘ਅਵਿਸਾਰੀ’’ਤਿ. ਗਮ੍ਭੀਰੋਤਿ ਯਥਾ ਗਮ੍ਭੀਰਵਤ੍ਥੁਪਰਿਚ੍ਛਿਨ੍ਦਨੇਨ ਞਾਣਸ੍ਸ ਗਮ੍ਭੀਰਸਮਞ੍ਞਾ, ਏਵਂ ਗਮ੍ਭੀਰਟ੍ਠਾਨਸਮ੍ਭਵਤੋ ਸਦ੍ਦਸ੍ਸ ਗਮ੍ਭੀਰਸਮਞ੍ਞਾਤਿ ਆਹ ‘‘ਗਮ੍ਭੀਰੋਤਿ ਗਮ੍ਭੀਰਸਮੁਟ੍ਠਿਤੋ’’ਤਿ. ਨਿਨ੍ਨਾਦਵਾਤਿ ਸਵਿਸੇਸਂ ਨਿਨ੍ਨਾਦਵਾ. ਸ੍ਵਾਯਂ ਵਿਸੇਸੋ ਗਮ੍ਭੀਰਭਾਵਸਿਦ੍ਧੋਤਿ ਆਹ ‘‘ਗਮ੍ਭੀਰਤ੍ਤਾਯੇਵ ਚੇਸ ਨਿਨ੍ਨਾਦੀ’’ਤਿ. ਏਵਮੇਤ੍ਥ ਚਤ੍ਤਾਰਿ ਅਙ੍ਗਾਨਿ ਚਤੁਰਙ੍ਗਨਿਪ੍ਫਾਦੀਨਿ ਵੇਦਿਤਬ੍ਬਾਨਿ. ਅਕਾਰਣਾ ਮਾ ਨਸ੍ਸੀਤਿ ਬੁਦ੍ਧਾਨੁਭਾਵੇਨ ਵਿਯ ਸਰਸ੍ਸ ਪਰਿਸਪਰਿਯਨ੍ਤਤਾ ਵੁਤ੍ਤਾ, ਧਮ੍ਮਤਾਵਸੇਨੇਵ ਪਨ ਸਾ ਵੇਦਿਤਬ੍ਬਾ ਤਸ੍ਸ ਮੂਲਕਾਰਣਸ੍ਸ ਤਥਾ ਅਵਟ੍ਠਿਤਤ੍ਤਾ.

ਪਚ੍ਚੋਸਕ੍ਕਿਤ੍ਵਾਤਿ ਪਟਿਨਿਵਤ੍ਤਿਤ੍ਵਾ. ਸਮੁਸ੍ਸਿਤਕਞ੍ਚਨਪਬ੍ਬਤਂ ਵਿਯ ਉਪਰਿ ਇਨ੍ਦਨੀਲਰਤਨਵਿਤਤਸਿਖਂ ਵਿਜ੍ਜੁਲ੍ਲਤਾਭੂਸਿਤਂ. ਮਹਾਪਥਵੀਆਦਯੋ ਸਤ੍ਥੁਗੁਣਪਟਿਭਾਗਤਾਯ ਨਿਦਸ੍ਸਨਂ, ਕੇਵਲਂ ਮਹਨ੍ਤਤਾਮਤ੍ਤਂ ਉਪਾਦਾਯ ਨਿਦਸ੍ਸਿਤਾ.

੩੯੦. ਅਪ੍ਪਟਿਸਂਵਿਦਿਤੋਤਿ ਅਨਾਰੋਚਿਤੋ. ਆਗਮਨਵਸੇਨ ਚੇਤ੍ਥ ਪਟਿਸਂਵੇਦਿਤਨ੍ਤਿ ਆਹ ‘‘ਅਵਿਞ੍ਞਾਤਆਗਮਨੋ’’ਤਿ. ਉਗ੍ਗਤਭਾਵਨ੍ਤਿ ਕੁਲਭੋਗਵਿਜ੍ਜਾਦੀਹਿ ਉਲ਼ਾਰਭਾਵਂ. ਅਨੁਦ੍ਦਯਸਮ੍ਪਨ੍ਨਾਤਿ ਕਾਰੁਣਿਕਾ.

੩੯੧. ਸਹਸਾਵ ਓਕਾਸਕਰਣੇਨ ਉਚ੍ਚਕੁਲੀਨਤਾ ਦੀਪਿਤਾ ਹੋਤੀਤਿ ਆਹ ‘‘ਵੇਗੇਨ ਉਟ੍ਠਾਯ ਦ੍ਵਿਧਾ ਭਿਜ੍ਜਿਤ੍ਵਾ’’ਤਿਆਦਿ.

ਨਾਰਿਸਮਾਨਨਾਮਨ੍ਤਿ ਇਤ੍ਥਿਅਤ੍ਥਜੋਤਕਨਾਮਂ. ਤੇਨਾਹ ‘‘ਇਤ੍ਥਿਲਿਙ੍ਗ’’ਨ੍ਤਿ. ਅਵ੍ਹਾਤਬ੍ਬਾਤਿ ਕਥੇਤਬ੍ਬਾ.

੩੯੪. ਏਕਨੀਹਾਰੇਨੇਵ ਅਟ੍ਠ ਪਞ੍ਹੇ ਬ੍ਯਾਕਰੋਨ੍ਤੋ. ‘‘ਪੁਬ੍ਬੇਨਿਵਾਸਂ…ਪੇ… ਪਵੁਚ੍ਚਤੀ’’ਤਿ ਇਮਿਨਾ ਪੁਬ੍ਬੇਨਿਵਾਸਸ੍ਸ ਵਿਦਿਤਕਾਰਣਂ ਵੁਤ੍ਤਨ੍ਤਿ ਆਹ ‘‘ਤਸ੍ਸ ਪੁਬ੍ਬੇਨਿਵਾਸੋ ਪਾਕਟੋ’’ਤਿ. ਦਿਬ੍ਬਚਕ੍ਖੁਞਾਣਂ ਕਥਿਤਂ ਤਸ੍ਸ ਪਰਿਭਣ੍ਡਞਾਣਭਾਵਤੋ ਯਥਾਕਮ੍ਮੂਪਗਞਾਣਸ੍ਸ. ‘‘ਜਾਤਿਕ੍ਖਯਂ ਪਤ੍ਤੋ, ਅਭਿਞ੍ਞਾ ਵੋਸਿਤੋ’’ਤਿ ਚ ਵੁਤ੍ਤਤ੍ਤਾ ਮੁਨੀਤਿ ਅਸੇਕ੍ਖਮੁਨਿ ਇਧਾਧਿਪ੍ਪੇਤੋਤਿ ਆਹ ‘‘ਅਰਹਤ੍ਤਞਾਣਮੋਨੇਯ੍ਯੇਨ ਸਮਨ੍ਨਾਗਤੋ’’ਤਿ.

ਕਿਲੇਸਰਾਗੇਹਿ ਕਿਲੇਸਵਿਵਣ੍ਣਤਾਹਿ. ਜਾਤਿਕ੍ਖਯਪ੍ਪਤ੍ਤਤ੍ਤਾ ‘‘ਅਥੋ ਜਾਤਿਕ੍ਖਯਂ ਪਤ੍ਤੋ’’ਤਿ ਵੁਤ੍ਤਤ੍ਤਾ. ਅਭਿਜਾਨਿਤ੍ਵਾਤਿ ਅਭਿਵਿਸਿਟ੍ਠਤਾਯ ਅਗ੍ਗਮਗ੍ਗਪਞ੍ਞਾਯ ਞਤ੍ਵਾ. ਇਦਾਨਿ ਪਟਿਸਮ੍ਭਿਦਾਯਂ ਆਗਤਨਯੇਨ ਪਰਿਞ੍ਞਾਪਹਾਨਭਾਵਨਾਸਚ੍ਛਿਕਿਰਿਯਾਸਮਾਪਤ੍ਤੀਨਂ ਪਾਰਗਮਨੇਨ ਪਾਰਗੂਤਿ ਅਯਮੇਤ੍ਥ ਅਤ੍ਥੋਤਿ ਦਸ੍ਸੇਤੁਂ ‘‘ਪਾਰਗੂਤਿ ਵਾ’’ਤਿਆਦਿ ਵੁਤ੍ਤਂ. ਅਭਿਞ੍ਞੇਯ੍ਯਧਮ੍ਮਾਨਂ ਜਾਨਨਵਸੇਨ ਅਭਿਞ੍ਞਾਪਾਰਗੂ. ਤਾਦਿਸੋਤਿ ਯਾਦਿਸੋ ‘‘ਪਾਰਗੂ ਸਬ੍ਬਧਮ੍ਮਾਨ’’ਨ੍ਤਿ ਪਦਦ੍ਵਯੇਨ ਵੁਤ੍ਤੋ, ਤਾਦਿਸੋ. ਛਹਿ ਆਕਾਰੇਹੀਤਿ ਪਜਾਨਨਾਦੀਹਿ ਯਥਾਵੁਤ੍ਤੇਹਿ ਛਹਿ ਆਕਾਰੇਹਿ.

ਕਾਮਞ੍ਚੇਤ੍ਥ ਦ੍ਵੇ ਏਵ ਪੁਚ੍ਛਾਗਾਥਾ ਦ੍ਵੇ ਚ ਵਿਸ੍ਸਜ੍ਜਨਾਗਾਥਾ, ਪੁਚ੍ਛਾਪਟਿਪਾਟਿਯਾ ਪਨ ਅਸਙ੍ਕਰਤੋ ਚ ਵਿਸ੍ਸਜ੍ਜਨਂ ਪਵਤ੍ਤਤਿ, ਤਂ ਨਿਦ੍ਧਾਰੇਤੁਂ ਕਿਂ ਪਨਾਤਿਆਦਿ ਵੁਤ੍ਤਂ. ਵੇਦੇਹਿ ਗਤਤ੍ਤਾਤਿ ਵੇਦੇਹਿ ਮਗ੍ਗਞਾਣੇਹਿ ਪਾਰਙ੍ਗਤਤ੍ਤਾ. ਪੁਬ੍ਬੇਨਿਵਾਸਨ੍ਤਿਆਦੀਹਿ ਵਿਜ੍ਜਾਨਂ ਅਤ੍ਥਿਤਾਯ ਬੋਧਿਤਤ੍ਤਾ. ਪਾਪਧਮ੍ਮਾਨਨ੍ਤਿ ਛਤ੍ਤਿਂਸਪਾਪਧਮ੍ਮਾਨਂ ਸੋਤ੍ਥਾਨਂ ਮਗ੍ਗਂ ਪਾਪਨੇਨ ਨਿਸ੍ਸੇਸਤੋ ਸੋਧਿਤਤ੍ਤਾ.

੩੯੫. ਧਮ੍ਮੋ ਨਾਮ ਅਰਹਤ੍ਤਮਗ੍ਗੋ ਕੁਸਲਧਮ੍ਮੇਸੁ ਉਕ੍ਕਂਸਪਾਰਮਿਪ੍ਪਤ੍ਤਿਯਾ ਉਕ੍ਕਟ੍ਠਨਿਦ੍ਦੇਸੇਨ. ਤਸ੍ਸ ਅਨੁਰੂਪਧਮ੍ਮਭਾਵਤੋ ਅਨੁਧਮ੍ਮੋ ਨਾਮ ਹੇਟ੍ਠਿਮਮਗ੍ਗਫਲਧਮ੍ਮਾ. ਯੋ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਯਥਾਨੁਸਿਟ੍ਠਂ ਨ ਪਟਿਪਜ੍ਜਤਿ, ਸੋ ਤਥਾਗਤਂ ਧਮ੍ਮਾਧਿਕਰਣਂ ਵਿਹੇਠੇਤਿ ਨਾਮ. ਯੋ ਪਨ ਪਟਿਪਜ੍ਜਨ੍ਤੋ ਚ ਦਨ੍ਧਾਭਿਞ੍ਞਤਾਯ ਕਮ੍ਮਟ੍ਠਾਨਸੋਧਨਤ੍ਥਂ ਅਨ੍ਤਰਨ੍ਤਰਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਅਨੇਕਵਾਰਂ ਕਥਾਪੇਤਿ, ਸੋ ਏਤ੍ਤਾਵਤਾ ਧਮ੍ਮਾਧਿਕਰਣਂ ਤਥਾਗਤਂ ਵਿਹੇਠੇਤੀਤਿ ਨ ਵਤ੍ਤਬ੍ਬੋ. ਨ ਹਿ ਭਗਵਤੋ ਧਮ੍ਮਦੇਸਨਾਯ ਪਰਿਸ੍ਸਮੋ ਅਤ੍ਥਿ, ਅਯਞ੍ਚ ਅਤ੍ਥੋ ਮਹਾਸੁਦਸ੍ਸਨਸੁਤ੍ਤਾਦੀਹਿ (ਦੀ. ਨਿ. ੨.੨੪੧ ਆਦਯੋ) ਦੀਪੇਤਬ੍ਬੋ, ਤਸ੍ਮਾ – ‘‘ਸਚ੍ਚਧਮ੍ਮਸ੍ਸ ਅਨੁਧਮ੍ਮ’’ਨ੍ਤਿ ਵਤ੍ਤਬ੍ਬੇ ਵੁਤ੍ਤਮੇਵ ਬ੍ਯਤਿਰੇਕਮੁਖੇਨ ਵਿਭਾਵੇਤੁਂ ‘‘ਨ ਚ ਮਂ ਧਮ੍ਮਾਧਿਕਰਣਂ ਵਿਹੇਸੇਸੀ’’ਤਿ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਤਤ੍ਥ ਪਰਿਨਿਬ੍ਬਾਯੀਤਿ ਪਰਕਾਲੇ ਚੇਤ੍ਥ ਪਰਿਨਿਬ੍ਬਾਨਮ੍ਪਿ ਸਙ੍ਗਯ੍ਹਤਿ, ਤਂ ਪਨ ਇਮਸ੍ਮਿਂ ਗਹਿਤਮੇਵ ਹੋਤੀਤਿ ਆਹ ‘‘ਦੇਸਨਾਯ ਅਰਹਤ੍ਤੇਨੇਵ ਕੂਟਂ ਗਹਿਤ’’ਨ੍ਤਿ.

ਬ੍ਰਹ੍ਮਾਯੁਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.