੪. ਦੀਘਨਖਸੁਤ੍ਤਵਣ੍ਣਨਾ

੨੦੧. ਖਨਨਂ ਖਤਂ, ਸੂਕਰਸ੍ਸ ਖਤਂ ਏਤ੍ਥ ਅਤ੍ਥੀਤਿ ਸੂਕਰਖਤਾ, ਸੂਕਰਸ੍ਸ ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਪਠਮਂ ਖਤਂ ਉਪਾਦਾਯ ਸੂਕਰਖਤਾ, ਤਾਯ. ਏਵਂਨਾਮਕੇਤਿ ਏਵਂ ਇਤ੍ਥਿਲਿਙ੍ਗਵਸੇਨ ਲਦ੍ਧਨਾਮਕੇ. ਪਂਸੁਧੋਤੇਤਿ ਧੋਤਪਂਸੁਕੇ. ਓਤਰਿਤ੍ਵਾ ਅਭਿਰੁਹਿਤਬ੍ਬਨ੍ਤਿ ਪਕਤਿਭੂਮਿਤੋ ਅਨੇਕੇਹਿ ਸੋਪਾਨਫਲਕੇਹਿ ਓਤਰਿਤ੍ਵਾ ਪੁਨ ਲੇਣਦ੍ਵਾਰਂ ਕਤਿਪਯੇਹਿ ਅਭਿਰੁਹਿਤਬ੍ਬਂ.

ਠਿਤਕੋਵਾਤਿ ਮਾਤੁਲਸ੍ਸ ਠਿਤਤ੍ਤਾ ਤਤ੍ਥ ਸਗਾਰਵਸਪਤਿਸ੍ਸਵਸੇਨ ਠਿਤਕੋਵ. ਕਿਞ੍ਚਾਪਿ ਸਬ੍ਬ-ਸਦ੍ਦੋ ਅਵਿਸੇਸਤੋ ਅਨਵਸੇਸਪਰਿਯਾਦਾਯਕੋ, ਵਤ੍ਥੁਅਧਿਪ੍ਪਾਯਾਨੁਰੋਧੀ ਪਨ ਸਦ੍ਦਪ੍ਪਯੋਗੋਤਿ ਤਮਤ੍ਥਂ ਸਨ੍ਧਾਯ ਪਰਿਬ੍ਬਾਜਕੋ ‘‘ਸਬ੍ਬਂ ਮੇ ਨਕ੍ਖਮਤੀ’’ਤਿ ਆਹ. ਯਾ ਲੋਕੇ ਮਨੁਸ੍ਸਉਪਪਤ੍ਤਿਯੋਤਿਆਦਿਕਾ ਉਪਪਤ੍ਤਿਯੋ, ਤਾ ਅਨਤ੍ਥਸਮੁਦਾਗਤਾ ਤਤ੍ਥ ਤਤ੍ਥੇਵ ਸਤ੍ਤਾਨਂ ਉਚ੍ਛਿਜ੍ਜਨਤੋ, ਤਸ੍ਮਾ ਸਮਯਵਾਦੀਹਿ ਵੁਚ੍ਚਮਾਨਾ ਸਬ੍ਬਾ ਆਯਤਿਂ ਉਪ੍ਪਜ੍ਜਨਉਪਪਤ੍ਤਿ ਨ ਹੋਤਿ. ਜਲਬੁਬ੍ਬੁਲ਼ਕਾ ਵਿਯ ਹਿ ਇਮੇ ਸਤ੍ਤਾ ਤਤ੍ਥ ਤਤ੍ਥ ਸਮਯੇ ਉਪ੍ਪਜ੍ਜਿਤ੍ਵਾ ਭਿਜ੍ਜਨ੍ਤਿ, ਤੇਸਂ ਤਤ੍ਥ ਪਟਿਸਨ੍ਧਿ ਨਤ੍ਥੀਤਿ ਅਸ੍ਸ ਅਧਿਪ੍ਪਾਯੋ. ਤੇਨਾਹ ‘‘ਪਟਿਸਨ੍ਧਿਯੋ’’ਤਿਆਦਿ. ਅਸ੍ਸ ਅਧਿਪ੍ਪਾਯਂ ਮੁਞ੍ਚਿਤ੍ਵਾਤਿ ਯੇਨਾਧਿਪ੍ਪਾਯੇਨ ਪਰਿਬ੍ਬਾਜਕੋ ‘‘ਸਬ੍ਬਂ ਮੇ ਨਕ੍ਖਮਤੀ’’ਤਿ ਆਹ, ਤਂ ਤਸ੍ਸ ਅਧਿਪ੍ਪਾਯਂ ਜਾਨਨ੍ਤੋਪਿ ਅਜਾਨਨ੍ਤੋ ਵਿਯ ਹੁਤ੍ਵਾ ਤਸ੍ਸ ਅਕ੍ਖਰੇ ਤਾਵ ਦੋਸਂ ਦਸ੍ਸੇਨ੍ਤੋਤਿ ਪਦੇਸਸਬ੍ਬਂ ਸਨ੍ਧਾਯ ਤੇਨ ਵੁਤ੍ਤਂ, ਸਬ੍ਬਸਬ੍ਬਵਿਸਯਂ ਕਤ੍ਵਾ ਤਤ੍ਥ ਦੋਸਂ ਗਣ੍ਹਨ੍ਤੋ. ਯਥਾ ਲੋਕੇ ਕੇਨਚਿ ‘‘ਸਬ੍ਬਂ ਵੁਤ੍ਤਂ, ਤਂ ਮੁਸਾ’’ਤਿ ਵੁਤ੍ਤੇ ਤਸ੍ਸ ਵਚਨਸ੍ਸ ਸਬ੍ਬਨ੍ਤੋਗਧਤ੍ਤਾ ਮੁਸਾਭਾਵੋ ਆਪਜ੍ਜੇਯ੍ਯ, ਏਵਂ ਇਮਸ੍ਸਪਿ ‘‘ਸਬ੍ਬਂ ਮੇ ਨਕ੍ਖਮਤੀ’’ਤਿ ਵਦਤੋ ਤਥਾ ਪਵਤ੍ਤਾ ਦਿਟ੍ਠਿਪਿ ਨਕ੍ਖਮਤੀਤਿ ਅਤ੍ਥਤੋ ਆਪਨ੍ਨਮੇਵ ਹੋਤਿ. ਤੇਨਾਹ ਭਗਵਾ – ‘‘ਏਸਾਪਿ ਤੇ ਦਿਟ੍ਠਿ ਨਕ੍ਖਮਤੀ’’ਤਿ. ਯਥਾ ਪਨ ਕੇਨਚਿ ‘‘ਸਬ੍ਬਂ ਵੁਤ੍ਤਂ ਮੁਸਾ’’ਤਿ ਵੁਤ੍ਤੇ ਅਧਿਪ੍ਪਾਯਾਨੁਰੋਧਿਨੀ ਸਦ੍ਦਪ੍ਪਵਤ੍ਤਿ, ਤਸ੍ਸ ਵਚਨਂ ਮੁਞ੍ਚਿਤ੍ਵਾ ਤਦਞ੍ਞੇਸਮੇਵ ਮੁਸਾਭਾਵੋ ਞਾਯਾਗਤੋ, ਏਵਮਿਧਾਪਿ ‘‘ਸਬ੍ਬਂ ਮੇ ਨਕ੍ਖਮਤੀ’’ਤਿ ਵਚਨਤੋ ਯਸ੍ਸਾ ਦਿਟ੍ਠਿਯਾ ਵਸੇਨ ‘‘ਸਬ੍ਬਂ ਮੇ ਨਕ੍ਖਮਤੀ’’ਤਿ ਤੇਨ ਵੁਤ੍ਤਂ, ਤਂ ਦਿਟ੍ਠਿਂ ਮੁਞ੍ਚਿਤ੍ਵਾ ਤਦਞ੍ਞਮੇਵ ਯਥਾਧਿਪ੍ਪੇਤਂ ਸਬ੍ਬਂ ਨਕ੍ਖਮਤੀਤਿ ਅਯਮਤ੍ਥੋ ਞਾਯਾਗਤੋ, ਭਗਵਾ ਪਨ ਵਾਦੀਵਰੋ ਸੁਖੁਮਾਯ ਆਣਿਯਾ ਥੂਲਂ ਆਣਿਂ ਨੀਹਰਨ੍ਤੋ ਵਿਯ ਉਪਾਯੇਨ ਤਸ੍ਸ ਦਿਟ੍ਠਿਗਤਂ ਨੀਹਰਿਤੁਂ ਤਸ੍ਸ ਅਧਿਪ੍ਪਾਯੇਨ ਅਵਤ੍ਵਾ ਸਦ੍ਦਵਸੇਨ ਤਾਵ ਲਬ੍ਭਮਾਨਂ ਦੋਸਂ ਦਸ੍ਸੇਨ੍ਤੋ ‘‘ਯਾਪਿ ਖੋ ਤੇ’’ਤਿਆਦਿਮਾਹ. ਤੇਨ ਵੁਤ੍ਤਂ – ‘‘ਅਸ੍ਸ ਅਧਿਪ੍ਪਾਯਂ ਮੁਞ੍ਚਿਤ੍ਵਾ ਅਕ੍ਖਰੇ ਤਾਵ ਦੋਸਂ ਦਸ੍ਸੇਨ੍ਤੋ’’ਤਿ.

ਪਰਿਬ੍ਬਾਜਕੋ ਪਨ ਯਂ ਸਨ੍ਧਾਯ ‘‘ਸਬ੍ਬਂ ਮੇ ਨਕ੍ਖਮਤੀ’’ਤਿ ਮਯਾ ਵੁਤ੍ਤਂ, ‘‘ਅਯਂ ਸੋ’’ਤਿ ਯਥਾਵੁਤ੍ਤਦੋਸਪਰਿਹਰਣਤ੍ਥਂ ਤਸ੍ਮਿਂ ਅਤ੍ਥੇ ਵੁਚ੍ਚਮਾਨੇ ਏਸ ਦੋਸੋ ਸਬ੍ਬੋ ਨ ਹੋਤਿ, ਏਵਮ੍ਪਿ ਸਮਣੋ ਗੋਤਮੋ ਮਮ ਵਾਦੇ ਦੋਸਮੇਵ ਆਰੋਪੇਯ੍ਯਾਤਿ ਅਤ੍ਤਨੋ ਅਜ੍ਝਾਸਯਂ ਨਿਗੁਹਿਤ੍ਵਾ ਯਥਾਵੁਤ੍ਤਦੋਸਂ ਪਰਿਹਰਿਤੁਕਾਮੋ ‘‘ਏਸਾ ਮੇ’’ਤਿਆਦਿਮਾਹ. ਤਤ੍ਥ ਤਮ੍ਪਸ੍ਸ ਤਾਦਿਸਮੇਵਾਤਿ ਯਂ ‘‘ਸਬ੍ਬਂ ਮੇ ਨਕ੍ਖਮਤੀ’’ਤਿ ਗਹਿਤਂ ਵਤ੍ਥੁ, ਤਮ੍ਪਿ ਤਾਦਿਸਮੇਵ ਭਵੇਯ੍ਯਾਤਿ. ਅਯਞ੍ਚ ਸਬ੍ਬਨ੍ਤੋਗਧਦਿਟ੍ਠਿ ਮਯ੍ਹਮ੍ਪਿ ਦਿਟ੍ਠਿਵਤ੍ਥੁ, ਤਂ ਮੇ ਖਮੇਯ੍ਯਵਾਤਿ. ਯਸ੍ਮਾ ਪਨ ‘‘ਏਸਾਪਿ ਦਿਟ੍ਠਿ ਤੁਯ੍ਹਂ ਨਕ੍ਖਮਤੀ’’ਤਿ ਯਾਪਿ ਦਿਟ੍ਠਿ ਵੁਤ੍ਤਾ ਭਵਤਾ ਗੋਤਮੇਨ, ਸਾਪਿ ਮਯ੍ਹਂ ਨਕ੍ਖਮਤਿ, ਤਸ੍ਮਾ ਸਬ੍ਬਂ ਮੇ ਨਕ੍ਖਮਤੇਵਾਤਿ ਪਰਿਬ੍ਬਾਜਕਸ੍ਸ ਅਧਿਪ੍ਪਾਯੋ. ਤੇਨਾਹ – ‘‘ਤਂ ਪਰਿਹਰਾਮੀਤਿ ਸਞ੍ਞਾਯ ਵਦਤੀ’’ਤਿ. ਤਥਾ ਚ ਵਕ੍ਖਤਿ ‘‘ਤਸ੍ਮਾਪਿ ਉਚ੍ਛੇਦਦਿਟ੍ਠਿ ਮਯ੍ਹਂ ਨਕ੍ਖਮਤੀ’’ਤਿ. ‘‘ਏਸਾ ਮੇ ਦਿਟ੍ਠੀ’’ਤਿ ਯਾ ਠਿਤਿਭੂਤਾ ਦਿਟ੍ਠਿ, ਤਾਯ ‘‘ਸਬ੍ਬਂ ਮੇ ਨਕ੍ਖਮਤੀ’’ਤਿ ਪਨੇਤ੍ਥ ਸਬ੍ਬਗ੍ਗਹਣੇਨ ਗਹਿਤਤ੍ਤਾ ਆਹ – ‘‘ਅਤ੍ਥਤੋ ਪਨਸ੍ਸ ਏਸਾ ਦਿਟ੍ਠਿ ਨ ਮੇ ਖਮਤੀਤਿ ਆਪਜ੍ਜਤੀ’’ਤਿ. ਅਯਂ ਦੋਸੋਤਿ ਦਸ੍ਸੇਨ੍ਤੋ ਆਹ ‘‘ਯਸ੍ਸ ਪਨਾ’’ਤਿਆਦਿ. ਏਸਾਤਿ ਦਿਟ੍ਠਿ. ਰੁਚਿਤਨ੍ਤਿ ਦਿਟ੍ਠਿਦਸ੍ਸਨੇਨ ਅਭਿਨਿਵਿਸਿਤ੍ਵਾ ਰੋਚੇਤ੍ਵਾ ਗਹਿਤਂ. ਤੇਨ ਹਿ ਦਿਟ੍ਠਿਅਕ੍ਖਮੇਨ ਅਰੁਚਿਤੇਨ ਭਵਿਤਬ੍ਬਨ੍ਤਿ ਸਤਿ ਦਿਟ੍ਠਿਯਾ ਅਕ੍ਖਮਭਾਵੇ ਤਤੋ ਤਾਯ ਗਹਿਤਾਯ ਖਮੇਯ੍ਯ ਰੁਚ੍ਚੇਯ੍ਯ ਯਥਾ, ਏਵਂ ਸਬ੍ਬਸ੍ਸ ਅਕ੍ਖਮਭਾਵੇਤਿ ਅਪਰਭਾਗੇ ਸਬ੍ਬਂ ਖਮਤਿ ਰੁਚ੍ਚਤੀਤਿ ਆਪਜ੍ਜਤਿ. ਨ ਪਨੇਸ ਤਂ ਸਮ੍ਪਟਿਚ੍ਛਤੀਤਿ ਏਸ ‘‘ਸਬ੍ਬਂ ਮੇ ਨਕ੍ਖਮਤੀ’’ਤਿ ਏਵਂ ਵਦਨ੍ਤੋ ਉਚ੍ਛੇਦਵਾਦੀ ਤਂ ਵੁਤ੍ਤਨਯੇਨ ਸਬ੍ਬਸ੍ਸ ਖਮਨਂ ਰੁਚ੍ਚਨਂ ਨ ਸਮ੍ਪਟਿਚ੍ਛਤਿ. ਞਾਯੇਨ ਵੁਤ੍ਤਮਤ੍ਥਂ ਕਥਂ ਨ ਸਮ੍ਪਟਿਚ੍ਛਤੀਤਿ ਆਹ ‘‘ਕੇਵਲਂ ਤਸ੍ਸਾਪਿ ਉਚ੍ਛੇਦਦਿਟ੍ਠਿਯਾ ਉਚ੍ਛੇਦਮੇਵ ਗਣ੍ਹਾਤੀ’’ਤਿ. ਸਬ੍ਬੇਸਞ੍ਹਿ ਧਮ੍ਮਾਨਂ ਆਯਤਿਂ ਉਪ੍ਪਾਦਂ ਅਰੁਚ੍ਚਿਤ੍ਵਾ ਤਂ ਸਨ੍ਧਾਯ ਅਯਂ ‘‘ਸਬ੍ਬਂ ਮੇ ਨਕ੍ਖਮਤੀ’’ਤਿ ਵਦਤਿ, ਉਚ੍ਛੇਦਦਿਟ੍ਠਿਕੇਸੁ ਚ ਉਚ੍ਛਿਨ੍ਨੇਸੁ ਕੁਤੋ ਉਚ੍ਛੇਦਦਿਟ੍ਠਿਸਭਾਵੋਤਿ.

ਤੇਨਾਤਿ ਤੇਨ ਕਾਰਣੇਨ, ਯਸ੍ਮਾ ਇਧੇਕਚ੍ਚੇ ਸਤ੍ਤਾ ਈਦਿਸਂ ਦਿਟ੍ਠਿਂ ਪਗ੍ਗਯ੍ਹ ਤਿਟ੍ਠਨ੍ਤਿ, ਤਸ੍ਮਾਤਿ ਵੁਤ੍ਤਂ ਹੋਤਿ. ਪਜਹਨਕੇਨ ਵਾ ਚਿਤ੍ਤੇਨ ਏਕਜ੍ਝਂ ਗਹੇਤ੍ਵਾ ਪਜਹਨਕੇਹਿ ਅਪ੍ਪਜਹਨਕੇ ਨਿਦ੍ਧਾਰੇਤੁਂ ਭਗਵਾ ‘‘ਅਤੋ…ਪੇ… ਬਹੁਤਰਾ’’ਤਿ ਅਵੋਚਾਤਿ ਆਹ – ‘‘ਪਜਹਨਕੇਸੁ ਨਿਸ੍ਸਕ੍ਕ’’ਨ੍ਤਿ ਯਥਾ ‘‘ਪਞ੍ਚਸੀਲੇਹਿ ਪਭਾਵਨਾ ਪਞ੍ਞਵਨ੍ਤਤਰਾ’’ਤਿ. ‘‘ਬਹੂ’’ਤਿ ਵਤ੍ਵਾ ਨ ਕੇਵਲਂ ਬਹੂ, ਅਥ ਖੋ ਅਤਿਵਿਯ ਬਹੂਤਿ ਦਸ੍ਸੇਨ੍ਤੋ ‘‘ਬਹੁਤਰਾ’’ਤਿ ਆਹ. ‘‘ਬਹੂ ਹੀ’’ਤਿ ਨਯਿਦਂ ਨਿਸ੍ਸਕ੍ਕਵਚਨਂ, ਅਥ ਖੋ ਪਚ੍ਚਤ੍ਤਵਚਨਂ. ਕਥਂ ਹਿ-ਸਦ੍ਦੋਤਿ ਆਹ ‘‘ਹਿ-ਕਾਰੋ ਨਿਪਾਤਮਤ੍ਤ’’ਨ੍ਤਿ. ਅਨਿਸ੍ਸਕ੍ਕਵਚਨਂ ਤਾਵ ਤਸ੍ਸ ਪਜਹਨਕਾਨਂ ਬਹੁਭਾਵਤੋ ਤੇਪਿ ਪਰਤੋ ‘‘ਬਹੁਤਰਾ’’ਤਿ ਵੁਚ੍ਚੀਯਨ੍ਤਿ. ਮੂਲਦਸ੍ਸਨਨ੍ਤਿ ਯੇ ਤਾਦਿਸਂ ਦਸ੍ਸਨਂ ਪਠਮਂ ਉਪਾਦਿਯਨ੍ਤਿ, ਤਜ੍ਜਾਤਿਕਮੇਵ ਪਚ੍ਛਾ ਗਹਿਤਦਸ੍ਸਨਂ. ਵਿਜਾਤਿਯਞ੍ਹਿ ਪਠਮਂ ਗਹਿਤਦਸ੍ਸਨਂ ਅਪ੍ਪਹਾਯ ਵਿਜਾਤਿਯਸ੍ਸ ਗਹਣਂ ਨ ਸਮ੍ਭਵਤਿ ਵਿਰੁਦ੍ਧਸ੍ਸ ਅਭਿਨਿਵੇਸਸ੍ਸ ਸਹ ਅਨਵਟ੍ਠਾਨਤੋ. ਅਵਿਰੁਦ੍ਧਂ ਪਨ ਮੂਲਦਸ੍ਸਨਂ ਅਵਿਸ੍ਸਜ੍ਜਿਤ੍ਵਾ ਵਿਸਯਾਦਿਭੇਦਭਿਨ੍ਨਂ ਅਪਰਦਸ੍ਸਨਂ ਗਹੇਤੁਂ ਲਬ੍ਭਤਿ. ਤੇਨਾਹ ‘‘ਏਤ੍ਥ ਚਾ’’ਤਿਆਦਿ.

ਤਤ੍ਥ ਕਿਞ੍ਚਾਪਿ ਏਕਚ੍ਚਸਸ੍ਸਤਵਾਦੋ ਸਸ੍ਸਤੁਚ੍ਛੇਦਾਭਿਨਿਵੇਸਾਨਂ ਵਸੇਨ ਯਥਾਕ੍ਕਮਂ ਸਸ੍ਸਤੁਚ੍ਛੇਦਗ੍ਗਾਹਨਜਾਤਿਕੋ, ਉਚ੍ਛੇਦਗ੍ਗਾਹੇਨ ਪਨ ਸਸ੍ਸਤਾਭਿਨਿਵੇਸਸ੍ਸ ਤਂਗਾਹੇਨ ਚ ਅਸਸ੍ਸਤਾਭਿਨਿਵੇਸਸ੍ਸ ਵਿਰੁਜ੍ਝਨਤੋ ਉਭਯਤ੍ਥਪਿ ‘‘ਏਕਚ੍ਚਸਸ੍ਸਤਂ ਵਾ ਗਹੇਤੁਂ ਨ ਸਕ੍ਕਾ’’ਤਿ ਵੁਤ੍ਤਂ, ਤਥਾ ‘‘ਸਸ੍ਸਤਂ ਵਾ ਉਚ੍ਛੇਦਂ ਵਾ ਨ ਸਕ੍ਕਾ ਗਹੇਤੁ’’ਨ੍ਤਿ ਚ. ਮੂਲਸਸ੍ਸਤਞ੍ਹਿ ਪਠਮਂ ਗਹਿਤਂ. ਆਯਤਨੇਸੁਪਿ ਯੋਜੇਤਬ੍ਬਨ੍ਤਿ ਪਠਮਂ ਚਕ੍ਖਾਯਤਨਂ ਸਸ੍ਸਤਨ੍ਤਿ ਗਹੇਤ੍ਵਾ ਅਪਰਭਾਗੇ ਨ ਕੇਵਲਂ ਚਕ੍ਖਾਯਤਨਮੇਵ ਸਸ੍ਸਤਂ, ਸੋਤਾਯਤਨਮ੍ਪਿ ਸਸ੍ਸਤਂ, ਘਾਨਾਯਤਨਾਦਿਪਿ ਸਸ੍ਸਤਨ੍ਤਿ ਗਣ੍ਹਾਤੀਤਿਆਦਿਨਾ ਯੋਜੇਤਬ੍ਬਂ. ਆਯਤਨੇਸੁਪੀਤਿ ਪਿ-ਸਦ੍ਦੇਨ ਧਾਤੂਨਂ ਇਨ੍ਦ੍ਰਿਯਾਨਮ੍ਪਿ ਗਾਹੋ ਦਟ੍ਠਬ੍ਬੋ. ਇਦਂ ਸਨ੍ਧਾਯਾਤਿ ‘‘ਮੂਲੇ ਸਸ੍ਸਤ’’ਨ੍ਤਿਆਦਿਨਾ ਵੁਤ੍ਤਪਠਮਗ੍ਗਾਹਸ੍ਸ ਸਮਾਨਜਾਤਿਯਂ ਅਪਰਗ੍ਗਾਹਂ ਸਨ੍ਧਾਯ.

ਦੁਤਿਯਵਾਰੇ ਪਠਮਵਾਰੇ ਵੁਤ੍ਤਸਦਿਸਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਤਤ੍ਥ ਆਦੀਨਵਂ ਦਿਸ੍ਵਾਤਿ ‘‘ਯਦਿ ਰੂਪਂ ਸਸ੍ਸਤਂ ਸਿਯਾ, ਨਯਿਦਂ ਆਬਾਧਾਯ ਸਂਵਤ੍ਤੇਯ੍ਯ. ਯਸ੍ਮਾ ਚ ਖੋ ਇਦਂ ਰੂਪਂ ਅਸਸ੍ਸਤਂ, ਤਸ੍ਮਾ ਅਭਿਣ੍ਹਪਟਿਪੀਲ਼ਨਟ੍ਠੇਨ ਉਦਯਵਯਵਨ੍ਤਤਾਯ ਰੂਪਂ ਅਨਿਚ੍ਚਂ ਸਙ੍ਖਤਂ ਪਟਿਚ੍ਚਸਮੁਪ੍ਪਨ੍ਨਂ, ਸਸ੍ਸਤਾਭਿਨਿਵੇਸੋ ਮਿਚ੍ਛਾ’’ਤਿਆਦਿਨਾ ਤਤ੍ਥ ਸਸ੍ਸਤਵਾਦੇ ਆਦੀਨਵਂ ਦੋਸਂ ਦਿਸ੍ਵਾ. ਓਲ਼ਾਰਿਕਨ੍ਤਿ ਤਸ੍ਮਾ ਪਟਿਪੀਲ਼ਨਟ੍ਠੇਨ ਅਯਾਥਾਵਗ੍ਗਾਹਤਾਯ ਰੂਪਂ ਨ ਸਣ੍ਹਂ ਓਲ਼ਾਰਿਕਮੇਵ. ਵੇਦਨਾਦੀਨਮ੍ਪਿ ਅਨਿਚ੍ਚਾਦਿਭਾਵਦਸ੍ਸਨਂ ਰੂਪਵੇਦਨਾਆਦੀਨਂ ਸਮਾਨਯੋਗਕ੍ਖਮਤ੍ਤਾ. ਵਿਸ੍ਸਜ੍ਜੇਤੀਤਿ ਪਜਹਤਿ.

ਤਿਸ੍ਸੋ ਲਦ੍ਧਿਯੋਤਿ ਸਸ੍ਸਤੁਚ੍ਛੇਦਏਕਚ੍ਚਸਸ੍ਸਤਦਿਟ੍ਠਿਯੋ. ਯਸ੍ਮਾ ਸਸ੍ਸਤਦਿਟ੍ਠਿਕਾ ਵਟ੍ਟੇ ਰਜ੍ਜਨਸ੍ਸ ਆਸਨ੍ਨਾ. ਤਥਾ ਹਿ ਤੇ ਓਲੀਯਨ੍ਤੀਤਿ ਵੁਚ੍ਚਨ੍ਤਿ, ਭਵਾਭਵਦਿਟ੍ਠੀਨਂ ਵਸੇਨ ਇਮੇਸਂ ਸਤ੍ਤਾਨਂ ਸਂਸਾਰਤੋ ਸੀਸੁਕ੍ਖਿਪਨਂ ਨਤ੍ਥੀਤਿ ਏਤਾਵ ਤਿਸ੍ਸੋ ਵਿਸੇਸਤੋ ਗਹੇਤਬ੍ਬਾ.

ਇਧਲੋਕਂ ਪਰਲੋਕਞ੍ਚ ਅਤ੍ਥੀਤਿ ਜਾਨਾਤੀਤਿ ਏਤ੍ਤਾਵਤਾ ਸਸ੍ਸਤਦਸ੍ਸਨਸ੍ਸ ਅਪ੍ਪਸਾਵਜ੍ਜਤਾਕਾਰਣਮਾਹ, ਵਟ੍ਟਂ ਅਸ੍ਸਾਦੇਤਿ, ਅਭਿਨਨ੍ਦਤੀਤਿ ਇਮਿਨਾ ਦਨ੍ਧਵਿਰਾਗਤਾਯ. ਤੇਨਾਹ ‘‘ਤਸ੍ਮਾ’’ਤਿਆਦਿ. ਇਧਲੋਕਂ ਪਰਲੋਕਞ੍ਚ ਅਤ੍ਥੀਤਿ ਜਾਨਾਤੀਤਿ ਇਮਿਨਾ ਤਾਸੁ ਤਾਸੁ ਗਤੀਸੁ ਸਤ੍ਤਾਨਂ ਸਂਸਰਣਂ ਪਟਿਕ੍ਖਿਪਤੀਤਿ ਦਸ੍ਸੇਤਿ, ਸੁਕਤਦੁਕ੍ਕਟਾਨਂ ਕਮ੍ਮਾਨਂ ਫਲਂ ਅਤ੍ਥੀਤਿ ਜਾਨਾਤੀਤਿ ਇਮਿਨਾ ਕਮ੍ਮਫਲਂ. ਕੁਸਲਂ ਨ ਕਰੋਤੀਤਿ ਇਮਿਨਾ ਕਮ੍ਮਂ, ਅਕੁਸਲਂ ਕਰੋਨ੍ਤੋ ਨ ਭਾਯਤੀਤਿ ਇਮਿਨਾ ਪੁਞ੍ਞਾਪੁਞ੍ਞਾਨਿ ਸਭਾਵਤੋ ਜਾਯਨ੍ਤੀਤਿ ਦਸ੍ਸੇਤਿ. ਵਟ੍ਟਂ ਅਸ੍ਸਾਦੇਤਿ ਅਭਿਨਨ੍ਦਤਿ ਤਨ੍ਨਿਨ੍ਨਭਾਵਤੋ. ਸੀਘਂ ਲਦ੍ਧਿਂ ਜਹਿਤੁਂ ਨ ਸਕ੍ਕੋਤਿ ਵਟ੍ਟੁਪਚ੍ਛੇਦਸ੍ਸ ਅਰੁਚ੍ਚਨਤੋ. ਉਚ੍ਛੇਦਵਾਦੀ ਹਿ ਤਸ੍ਮਿਂ ਭਵੇ ਉਚ੍ਛੇਦਂ ਮਞ੍ਞਤਿ. ਤਤੋ ਪਰਂ ਇਧਲੋਕਂ ਪਰਲੋਕਞ੍ਚ ਅਤ੍ਥੀਤਿ ਜਾਨਾਤਿ ਸੁਕਤਦੁਕ੍ਕਟਾਨਂ ਫਲਂ ਅਤ੍ਥੀਤਿ ਜਾਨਾਤਿ ਕਮ੍ਮਫਲਵਾਦੀਭਾਵਤੋ. ਯੇਭੁਯ੍ਯੇਨ ਹਿ ਉਚ੍ਛੇਦਵਾਦੀ ਸਭਾਵਨਿਯਤਿਯਦਿਚ੍ਛਾਭਿਨਿਵੇਸੇਸੁ ਅਞ੍ਞਤ੍ਰਾਭਿਨਿਵੇਸੋ ਹੋਤਿ. ਸੀਘਂ ਦਸ੍ਸਨਂ ਪਜਹਤਿ ਵਟ੍ਟਾਭਿਰਤਿਯਾ ਅਭਾਵਤੋ. ਪਾਰਮਿਯੋ ਪੂਰੇਤੁਂ ਸਕ੍ਕੋਨ੍ਤੋ ਪਚ੍ਚੇਕਬੁਦ੍ਧੋ ਹੁਤ੍ਵਾ, ਲੋਕਵੋਹਾਰਮਤ੍ਤੇਨੇਵ ਸੋ ਸਮ੍ਮਾਸਮ੍ਬੁਦ੍ਧੋ ਹੁਤ੍ਵਾ ਪਰਿਨਿਬ੍ਬਾਯਤੀਤਿ ਯੋਜਨਾ. ਅਸਕ੍ਕੋਨ੍ਤੋਤਿ ਬੁਦ੍ਧੋ ਹੋਤੁਂ ਅਸਕ੍ਕੋਨ੍ਤੋ. ਅਭਿਨੀਹਾਰਂ ਕਤ੍ਵਾ ਅਗ੍ਗਸਾਵਕਾਦਿਭਾਵਸ੍ਸ ਅਭਿਨੀਹਾਰਂ ਸਮ੍ਪਾਦੇਤ੍ਵਾ. ਸਾਵਕੋ ਹੁਤ੍ਵਾਤਿ ਅਗ੍ਗਸਾਵਕੋ ਮਹਾਸਾਵਕੋ ਹੁਤ੍ਵਾ, ਤਤ੍ਥਾਪਿ ਤੇਵਿਜ੍ਜੋ ਛਲ਼ਭਿਞ੍ਞੋ ਪਟਿਸਮ੍ਭਿਦਾਪ੍ਪਤ੍ਤੋ ਵਾ ਸੁਕ੍ਖਵਿਪਸ੍ਸਕੋ ਏਵ ਵਾ ਬੁਦ੍ਧਸਾਵਕੋ ਹੁਤ੍ਵਾ ਪਰਿਨਿਬ੍ਬਾਯਤਿ. ਸਬ੍ਬਮਿਦਂ ਉਚ੍ਛੇਦਵਾਦਿਨੋ ਕਲ੍ਯਾਣਮਿਤ੍ਤਨਿਸ੍ਸਯੇਨ ਸਮ੍ਮਤ੍ਤਨਿਯਾਮੋਕ੍ਕਮਨੇ ਖਿਪ੍ਪਵਿਰਾਗਤਾਦਸ੍ਸਨਤ੍ਥਂ ਆਗਤਂ. ਤੇਨਾਹ ‘‘ਤਸ੍ਮਾ’’ਤਿਆਦਿ.

੨੦੨. ਕਞ੍ਜਿਯੇਨੇਵਾਤਿ ਆਰਨਾਲ਼ੇਨ. ਕਞ੍ਜਿਯਸਦਿਸੇਨ ਉਚ੍ਛੇਦਦਸ੍ਸਨੇਨ. ਪੂਰਿਤੋਤਿ ਪਰਿਪੁਣ੍ਣਜ੍ਝਾਸਯੋ. ਸੋਤਿ ਪਰਿਬ੍ਬਾਜਕੋ. ਅਪ੍ਪਹਾਯਾਤਿ ਅਭਿਨ੍ਦਿਤ੍ਵਾ. ਵਿਗ੍ਗਹੋਤਿ ਕਲਹੋ ਇਦਮੇਵ ਸਚ੍ਚਂ, ਮੋਘਮਞ੍ਞਨ੍ਤਿ ਅਞ੍ਞਮਞ੍ਞਂ ਵਿਰੁਦ੍ਧਗ੍ਗਾਹੋਤਿ ਕਤ੍ਵਾ. ਵਿਵਾਦਨ੍ਤਿ ਵਿਰੁਦ੍ਧਵਾਦਂ. ਵਿਘਾਤਨ੍ਤਿ ਵਿਰੋਧਹੇਤੁਕਂ ਚਿਤ੍ਤਵਿਘਾਤਂ. ਵਿਹੇਸਨ੍ਤਿ ਵਿਗ੍ਗਹਵਿਵਾਦਨਿਮਿਤ੍ਤਂ ਕਾਯਿਕਂ ਚੇਤਸਿਕਞ੍ਚ ਕਿਲਮਥਂ. ਆਦੀਨਵਂ ਦਿਸ੍ਵਾਤਿ ਏਤਾਸਂ ਦਿਟ੍ਠੀਨਂ ਏਵਰੂਪੋ ਆਦੀਨਵੋ, ਅਨਿਯ੍ਯਾਨਿਕਭਾਵਤਾਯ ਪਨ ਸਮ੍ਪਤਿ ਆਯਤਿਞ੍ਚ ਮਹਾਦੀਨਵੋਤਿ ਏਵਂ ਆਦੀਨਵਂ ਦਿਸ੍ਵਾ.

੨੦੫. ‘‘ਏਸੋਹਮਸ੍ਮਿ, ਏਸੋ ਮੇ ਅਤ੍ਤਾ’’ਤਿਆਦਿਨਾ (ਮ. ਨਿ. ੧.੨੪੧; ਸਂ. ਨਿ. ੩.੮) ਕਾਯਂ ਅਨ੍ਵੇਤੀਤਿ ਕਾਯਨ੍ਵਯੋ, ਸੋਯੇਵ, ਤਸ੍ਸ ਵਾ ਸਮੂਹੋ ਕਾਯਨ੍ਵਯਤਾ, ਕਾਯਪਟਿਬਦ੍ਧੋ ਕਿਲੇਸੋ. ਤੇਨਾਹ ‘‘ਕਾਯਂ…ਪੇ… ਅਤ੍ਥੋ’’ਤਿ.

ਅਸਮ੍ਮਿਸ੍ਸਭਾਵਨ੍ਤਿ ਅਸਙ੍ਕਰਤੋ ਵਵਤ੍ਥਿਤਭਾਵਂ. ਤੇਨ ਤਾਸਂ ਯਥਾਸਕਂ ਪਚ੍ਚਯਾਨਂ ਉਪ੍ਪਜ੍ਜਿਤ੍ਵਾ ਵਿਗਮਂ ਦਸ੍ਸੇਤਿ. ਏਵਞ੍ਹਿ ਤਾਸਂ ਕਦਾਚਿਪਿ ਸਙ੍ਕਰੋ ਨਤ੍ਥਿ. ਤੇਨਾਹ ‘‘ਤਤ੍ਰਾਯਂ ਸਙ੍ਖੇਪਤ੍ਥੋ’’ਤਿਆਦਿ. ਸਰੂਪਂ ਅਗ੍ਗਹੇਤ੍ਵਾ ‘‘ਅਞ੍ਞਾ ਵੇਦਨਾ’’ਤਿ ਅਨਿਯਮੇਨ ਵੁਤ੍ਤਤ੍ਤਾ ਤਮੇਵ ਵਿਗਮਂ ਦਸ੍ਸੇਨ੍ਤੋ ‘‘ਅਨੁਪ੍ਪਨ੍ਨਾਵ ਹੋਨ੍ਤਿ ਅਨ੍ਤਰਹਿਤਾ ਵਾ’’ਤਿ ਆਹ. ਸਰੂਪਤੋ ਨਿਯਮੇਤ੍ਵਾ ਵੁਚ੍ਚਮਾਨੇ ਕਾਚਿ ਅਨੁਪ੍ਪਨ੍ਨਾ ਵਾ ਹੋਤਿ, ਕਾਚਿ ਅਨ੍ਤਰਹਿਤਾ ਵਾਤਿ. ਚੁਣ੍ਣਵਿਚੁਣ੍ਣਭਾਵਦਸ੍ਸਨਤ੍ਥਨ੍ਤਿ ਖਣੇ ਖਣੇ ਭਿਜ੍ਜਮਾਨਭਾਵਦਸ੍ਸਨਤ੍ਥਂ.

ਨ ਕੇਨਚਿ ਸਂਵਦਤੀਤਿ ਕੇਨਚਿ ਪੁਗ੍ਗਲੇਨ ਸਦ੍ਧਿਂ ਦਿਟ੍ਠਿਰਾਗਵਸੇਨ ਸਂਕਿਲਿਟ੍ਠਚਿਤ੍ਤੋ ਨ ਵਦਤਿ. ਤੇਨਾਹ ‘‘ਸਸ੍ਸਤਂ ਗਹੇਤ੍ਵਾ’’ਤਿਆਦਿ. ਨ ਵਿਵਦਤੀਤਿ ਵਿਰੁਦ੍ਧਭਾਵੋ ਹੁਤ੍ਵਾ ਨ ਵਿਵਦਤਿ. ਪਰਿਵਤ੍ਤੇਤ੍ਵਾਤਿ ਉਚ੍ਛੇਦਂ ਗਹੇਤ੍ਵਾ ਏਕਚ੍ਚਸਸ੍ਸਤਂ ਗਹੇਤ੍ਵਾ ਏਵਂ ਵੁਤ੍ਤਨਯੇਨ ਤਯੋਪਿ ਵਾਦਾ ਪਰਿਵਤ੍ਤੇਤ੍ਵਾ ਯੋਜੇਤਬ੍ਬਾ. ਤੇਨ ਵੋਹਰਤੀਤਿ ਤੇਨ ਲੋਕਵੋਹਾਰੇਨ ਲੋਕਸਮਞ੍ਞਂ ਅਨਤਿਧਾਵਨ੍ਤੋ ਸਤ੍ਤੋ ਪੁਰਿਸੋ ਪੁਗ੍ਗਲੋਤਿਆਦਿਨਾ ਵੋਹਰਤਿ, ਨ ਪਨ ਇਤੋ ਬਾਹਿਰਕਾ ਵਿਯ ਅਭਿਨਿਵਿਸਤਿ. ਤੇਨਾਹ ‘‘ਅਪਰਾਮਸਨ੍ਤੋ’’ਤਿ. ਕਞ੍ਚਿ ਧਮ੍ਮਨ੍ਤਿ ਰੂਪਾਦੀਸੁ ਏਕਂ ਧਮ੍ਮਮ੍ਪਿ. ਪਰਾਮਾਸਗ੍ਗਾਹੇਨ ਅਗ੍ਗਣ੍ਹਨ੍ਤੋਤਿ ‘‘ਨਿਚ੍ਚ’’ਨ੍ਤਿਆਦਿਨਾ, ‘‘ਏਤਂ ਮਮਾ’’ਤਿਆਦਿਨਾ ਚ ਧਮ੍ਮਸਭਾਵਂ ਅਤਿਕ੍ਕਮਿਤ੍ਵਾ ਪਰਤੋ ਆਮਸਿਤ੍ਵਾ ਗਹਣੇਨ ਅਗ੍ਗਣ੍ਹਨ੍ਤੋ.

ਕਤਾਵੀਤਿ ਕਤਕਿਚ੍ਚੋ. ਸੋ ਵਦੇਯ੍ਯਾਤਿ ਖੀਣਾਸਵੋ ਭਿਕ੍ਖੁ ਅਹਙ੍ਕਾਰਮਮਙ੍ਕਾਰੇਸੁ ਸਬ੍ਬਸੋ ਸਮੁਚ੍ਛਿਨ੍ਨੇਸੁਪਿ ਅਹਂ ਵਦਾਮੀਤਿ ਵਦੇਯ੍ਯ. ਤਤ੍ਥ ਅਹਨ੍ਤਿ ਨਿਯਕਜ੍ਝਤ੍ਤਸਨ੍ਤਾਨੇ. ਮਮਨ੍ਤਿ ਤਸ੍ਸ ਸਨ੍ਤਕਭੂਤੇ ਵਤ੍ਥੁਸ੍ਮਿਂ ਲੋਕਨਿਰੁਲ਼੍ਹੇ. ਸਮਞ੍ਞਨ੍ਤਿ ਤਤ੍ਥ ਸੁਕੁਸਲਤਾਯ ਲੋਕੇ ਸਮਞ੍ਞਾ ਕੁਸਲੋ ਵਿਦਿਤ੍ਵਾ. ਵੋਹਾਰਮਤ੍ਤੇਨਾਤਿ ਕੇਵਲਂ ਪਚ੍ਚੇਕਬੁਦ੍ਧੋ ਹੁਤ੍ਵਾ ਮਹਾਬੋਧਿਪਾਰਮਿਯੋ ਪੂਰੇਤੁਂ ਅਸਕ੍ਕੋਨ੍ਤੋ ਸਾਵਕੋ ਹੁਤ੍ਵਾ ਦੇਸਵੋਹਾਰਮਤ੍ਤੇਨ ਨ ਅਪ੍ਪਹੀਨਤਣ੍ਹੋ ਵਿਯ ਅਨ੍ਧਪੁਥੁਜ੍ਜਨੋ ਅਭਿਨਿਵੇਸਨਵਸੇਨ.

੨੦੬. ਸਸ੍ਸਤਾਦੀਸੂਤਿ ਸਸ੍ਸਤਾਭਿਨਿਵੇਸਾਦੀਸੁ. ਤੇਸਂ ਤੇਸਂ ਧਮ੍ਮਾਨਨ੍ਤਿ ਨਿਦ੍ਧਾਰਣੇ ਸਾਮਿਵਚਨਂ. ਸਸ੍ਸਤਂ ਅਭਿਞ੍ਞਾਯਾਤਿ ਸਸ੍ਸਤਦਿਟ੍ਠਿਂ ਸਮੁਦਯਤੋ ਅਤ੍ਥਙ੍ਗਮਤੋ ਅਸ੍ਸਾਦਤੋ ਨਿਸ੍ਸਰਣਤੋ ਅਭਿਵਿਸਿਟ੍ਠਾਯ ਪਞ੍ਞਾਯ ਪਟਿਵਿਜ੍ਝਿਤ੍ਵਾ. ਪਹਾਨਨ੍ਤਿ ਅਚ੍ਚਨ੍ਤਪ੍ਪਹਾਨਂ ਸਮੁਚ੍ਛੇਦਂ. ਰੂਪਸ੍ਸ ਪਹਾਨਨ੍ਤਿ ਰੂਪਸ੍ਸ ਤਪ੍ਪਟਿਬਦ੍ਧਸਞ੍ਞੋਜਨਪ੍ਪਹਾਨੇਨ ਪਹਾਨਂ. ਅਨੁਪ੍ਪਾਦਨਿਰੋਧੇਨ ਨਿਰੁਦ੍ਧੇਹਿ ਆਸਵੇਹਿ ਅਗ੍ਗਹੇਤ੍ਵਾਵ ਚਿਤ੍ਤਂ ਵਿਮੁਚ੍ਚਿ. ‘‘ਆਸਵੇਹਿ ਚਿਤ੍ਤਂ ਵਿਮੁਚ੍ਚੀ’’ਤਿ ਏਤ੍ਥ ਕਿਞ੍ਚਿਪਿ ਅਗ੍ਗਹੇਤ੍ਵਾ ਅਸੇਸੇਤ੍ਵਾ. ਸੋਲ਼ਸ ਪਞ੍ਞਾਤਿ ਮਹਾਪਞ੍ਞਾਦਿਕਾ ਸੋਲ਼ਸ ਪਞ੍ਞਾ. ਚਤੁਰਙ੍ਗਸਮਨ੍ਨਾਗਤੋਤਿ ਪੁਣ੍ਣਉਪੋਸਥਦਿਵਸਤਾ, ਕੇਨਚਿ ਅਨਾਮਨ੍ਤਿਤਮੇਵ ਅਨੇਕਸਤਾਨਂਯੇਵ ਅਨੇਕਸਹਸ੍ਸਾਨਂ ਵਾ ਭਿਕ੍ਖੂਨਂ ਸਨ੍ਨਿਪਤਿਤਤਾ, ਸਬ੍ਬੇਸਂ ਏਹਿਭਿਕ੍ਖੁਭਾਵੇਨ ਉਪਸਮ੍ਪਨ੍ਨਤਾ, ਛਲ਼ਭਿਞ੍ਞਤਾ ਚਾਤਿ. ਤੇਨਾਹ ‘‘ਤਤ੍ਰਿਮਾਨਿ ਅਙ੍ਗਾਨੀ’’ਤਿਆਦਿ. ਯਂ ਪਨੇਤ੍ਥ ਅਤ੍ਥਤੋ ਅਵਿਭਤ੍ਤਂ, ਤਂ ਸੁਵਿਞ੍ਞੇਯ੍ਯਮੇਵ.

ਦੀਘਨਖਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.