੫. ਮਾਗਣ੍ਡਿਯਸੁਤ੍ਤਵਣ੍ਣਨਾ

੨੦੭. ਦ੍ਵੇ ਮਾਗਣ੍ਡਿਯਾਤਿ ਦ੍ਵੇ ਮਾਗਣ੍ਡਿਯਨਾਮਕਾ. ਦੇਵਗਬ੍ਭਸਦਿਸਨ੍ਤਿ ਦੇਵਾਨਂ ਵਸਨਓਵਰਕਸਦਿਸਂ. ਏਤਂ ਵੁਤ੍ਤਨ੍ਤਿ ‘‘ਭਾਰਦ੍ਵਾਜਗੋਤ੍ਤਸ੍ਸ ਬ੍ਰਾਹ੍ਮਣਸ੍ਸ ਅਗ੍ਯਾਗਾਰੇ ਤਿਣਸਨ੍ਥਾਰਕੇ’’ਤਿ ਏਤਂ ਵੁਤ੍ਤਂ. ਨ ਕੇਵਲਂ ਤਂ ਦਿਵਸਮੇਵਾਤਿ ਯਂ ਦਿਵਸਂ ਮਾਗਣ੍ਡਿਯੋ ਪਰਿਬ੍ਬਾਜਕੋ ਤਿਣਸਨ੍ਥਾਰਕਂ ਪਞ੍ਞਤ੍ਤਂ, ਨ ਕੇਵਲਂ ਤਂ ਦਿਵਸਮੇਵ ਭਗਵਾ ਯੇਨਞ੍ਞਤਰੋ ਵਨਸਣ੍ਡੋ, ਤੇਨੁਪਸਙ੍ਕਮੀਤਿ ਯੋਜਨਾ. ਗਾਮੂਪਚਾਰੇਤਿ ਗਾਮਸਮੀਪੇ. ਸਞ੍ਞਾਣਂ ਕਤ੍ਵਾਤਿ ਸਞ੍ਞਾਣਂ ਕਤ੍ਵਾ ਵਿਯ. ਨ ਹਿ ਭਗਵਤੋ ਤਸ੍ਸ ਸਞ੍ਞਾਣਕਰਣੇ ਪਯੋਜਨਂ ਅਤ੍ਥਿ.

ਸਮਣਸੇਯ੍ਯਾਨੁਰੂਪਨ੍ਤਿ ਸਮਣਸ੍ਸ ਅਨੁਚ੍ਛਵਿਕਾ ਸੇਯ੍ਯਾ. ਪਾਸਂਸਤ੍ਥੋ ਹਿ ਅਯਂ ਰੂਪ-ਸਦ੍ਦੋ. ਤੇਨਾਹ ‘‘ਇਮਂ ਤਿਣਸਨ੍ਥਾਰਕ’’ਨ੍ਤਿਆਦਿ. ਅਨਾਕਿਣ੍ਣੋਤਿ ਵਿਲੁਲ਼ਿਤੋ ਅਘਟ੍ਟਿਤੋ. ਹਤ੍ਥਪਾਦਸੀਸੇਹਿ ਤਤ੍ਥ ਤਤ੍ਥ ਪਹਟੇਨ ਨ ਚਲਿਤੋ ਅਭਿਨ੍ਨੋ, ਅਚਲਿਤਤ੍ਤਾ ਏਵ ਅਭਿਨ੍ਨਂ ਅਤ੍ਥਰਣਂ. ਪਰਿਚ੍ਛਿਨ੍ਦਿਤ੍ਵਾ ਪਞ੍ਞਤ੍ਤੋ ਵਿਯਾਤਿ ਅਯਂ ਛੇਕੇਨ ਚਿਤ੍ਤਕਾਰੇਨ ਚਿਨ੍ਤੇਤ੍ਵਾ ਤੁਲਿਕਾਯ ਪਰਿਚ੍ਛਿਨ੍ਨਲੇਖਾਯ ਪਰਿਚ੍ਛਿਨ੍ਦਿਤ੍ਵਾ ਲਿਖਿਤਾ ਚਿਤ੍ਤਕਤਸੇਯ੍ਯਾ ਵਿਯ. ਭੂਨਂ ਵੁਚ੍ਚਤਿ ਵਡ੍ਢਿਤਂ, ਤਂ ਹਨ੍ਤੀਤਿ ਭੂਨਹੁਨੋ. ਤੇਨਾਹ ‘‘ਹਤਵਡ੍ਢਿਨੋ’’ਤਿ. ਤਂ ਪਨਾਯਂ ਚਕ੍ਖਾਦੀਸੁ ਸਂਵਰਵਿਧਾਨਂ ਵਡ੍ਢਿਹਨਨਂ ਮਞ੍ਞਤਿ. ਤੇਨਾਹ ‘‘ਮਰਿਯਾਦਕਾਰਕਸ੍ਸਾ’’ਤਿ. ਬ੍ਰੂਹੇਤਬ੍ਬਨ੍ਤਿ ਉਲ਼ਾਰਵਿਸਯੂਪਹਾਰੇਨ ਵਡ੍ਢੇਤਬ੍ਬਂ ਪੀਣੇਤਬ੍ਬਂ. ਤਂ ਪਨ ਅਨਨੁਭੂਤਾਨੁਭਵਨੇਨ ਹੋਤੀਤਿ ਆਹ ‘‘ਅਦਿਟ੍ਠਂ ਦਕ੍ਖਿਤਬ੍ਬ’’ਨ੍ਤਿ. ਅਨੁਭੂਤਂ ਪਨ ਅਪਣੀਤਂ ਹੋਤੀਤਿ ਵੁਤ੍ਤਂ ‘‘ਦਿਟ੍ਠਂ ਸਮਤਿਕ੍ਕਮਿਤਬ੍ਬ’’ਨ੍ਤਿ. ਸੇਸਵਾਰੇਸੁਪਿ ਏਸੇਵ ਨਯੋ. ਪਰਮਦਿਟ੍ਠਧਮ੍ਮਨਿਬ੍ਬਾਨਵਾਦੀ ਕਿਰੇਸ ਪਰਿਬ੍ਬਾਜਕੋ, ਤਸ੍ਮਾ ਏਵਂ ਛਸੁ ਦ੍ਵਾਰੇਸੁ ਵਡ੍ਢਿਂ ਪਞ੍ਞਪੇਤਿ. ਯਸ੍ਮਾ ਯਂ ਛਨ੍ਨਮ੍ਪਿ ਚਕ੍ਖਾਦੀਨਂ ਯਥਾਸਕਂ ਵਿਸਯਗ੍ਗਹਣਂ ਪਟਿਕ੍ਖਿਪਨ੍ਤੋ ਲੋਕਸ੍ਸ ਅਵਡ੍ਢਿਤਂ ਵਿਨਾਸਮੇਵ ਪਞ੍ਞਪੇਤਿ, ਤਸ੍ਮਾ ਸੋ ਸਯਮ੍ਪਿ ਵਡ੍ਢਿਹਤੋ ਹਤਵਡ੍ਢਿਤੋ.

ਸਂਕਿਲੇਸਤੋ ਆਰਕਤ੍ਤਾ ਅਰਿਯੋ ਨਿਯ੍ਯਾਨਿਕਧਮ੍ਮਭਾਵਤੋ ਞਾਯੋ ਧਮ੍ਮੋ. ਵਜ੍ਜਲੇਸਸ੍ਸਪਿ ਅਭਾਵਤੋ ਕੁਸਲੋ. ਤੇਨਾਹ ‘‘ਪਰਿਸੁਦ੍ਧੇ ਕਾਰਣਧਮ੍ਮੇ ਅਨਵਜ੍ਜੇ’’ਤਿ. ਉਗ੍ਗਤਸ੍ਸਾਤਿ ਉਚ੍ਚਕੁਲੀਨਤਾਦਿਨਾ ਉਲ਼ਾਰਸ੍ਸ. ਮੁਖੇ ਆਰਕ੍ਖਂ ਠਪੇਤ੍ਵਾਤਿ ਮੁਖੇਨ ਸਂਯਤੋ ਹੁਤ੍ਵਾ. ਅਮ੍ਬਜਮ੍ਬੂਆਦੀਨਿ ਗਹੇਤ੍ਵਾ ਵਿਯ ਅਪੂਰਯਮਾਨੋਤਿ ਅਮ੍ਬਜਮ੍ਬੂਆਦੀਨਿ ਅਞ੍ਞਮਞ੍ਞਵਿਸਦਿਸਾਨਿ ਵਿਯ ਪੂਰਣਕਥਾਨਯੇਨ ਯਂ ਕਿਞ੍ਚਿ ਅਕਥੇਤ੍ਵਾ. ਤੇਨਾਹ ‘‘ਮਯਾ ਕਥਿਤਨਿਯਾਮੇਨਾ’’ਤਿ.

੨੦੮. ਫਲਸਮਾਪਤ੍ਤਿਯਾ ਵੁਟ੍ਠਿਤੋਤਿ ਦਿਵਾਵਿਹਾਰਤੋ ਵੁਟ੍ਠਿਤੋਤਿ ਅਤ੍ਥੋ. ਦਿਵਾਵਿਹਾਰੋਪਿ ਹਿ ‘‘ਪਟਿਸਲ੍ਲਾਨ’’ਨ੍ਤਿ ਵੁਚ੍ਚਤਿ ‘‘ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦੀ’’ਤਿਆਦੀਸੁ (ਪਾਰਾ. ੧੮). ਭਗਵਾ ਹਿ ਫਲਸਮਾਪਤ੍ਤਿਤੋ ਵੁਟ੍ਠਾਨੁਤ੍ਤਰਕਾਲਂ ਤੇਸਂ ਕਥਾਸਲ੍ਲਾਪਂ ਸੁਤ੍ਵਾ ਦਿਵਾਵਿਹਾਰਤੋ ਵੁਟ੍ਠਾਯ ਤਤ੍ਥ ਗਤੋ. ਸਂਵੇਗੋ ਨਾਮ ਸਹੋਤ੍ਤਪ੍ਪਞਾਣਂ, ਤਂ ਨਿਬ੍ਬਿਨ੍ਦਨਵਸੇਨਪਿ ਹੋਤਿ, ਸਂਵੇਗਨਿਸ੍ਸਿਤਂ ਸਨ੍ਧਾਯਾਹ ‘‘ਪੀਤਿਸਂਵੇਗੇਨ ਸਂਵਿਗ੍ਗੋ’’ਤਿ. ਸੋ ਪਨ ਯਸ੍ਮਾ ਪੁਰਿਮਾਵਤ੍ਥਾਯ ਚਲਨਂ ਹੋਤਿ ਚਿਤ੍ਤਸ੍ਸ, ਤਸ੍ਮਾ ਆਹ ‘‘ਚਲਿਤੋ ਕਮ੍ਪਿਤੋ’’ਤਿ. ਤਿਖਿਣਸੋਤੇਨ ਪੁਰਿਸੇਨਾਤਿ ਭਗਵਨ੍ਤਂ ਸਨ੍ਧਾਯਾਹ.

੨੦੯. ਧਮ੍ਮਦੇਸਨਂ ਆਰਭਿ ਯਥਾ ਵਿਨੇਯ੍ਯਦਮਨਕੁਸਲੋ ਵਸਨਟ੍ਠਾਨਟ੍ਠੇਨਾਤਿ ਇਦਂ ਆਰਮਿਤਬ੍ਬਭਾਵਸ੍ਸ ਭਾਵਲਕ੍ਖਣਵਚਨਂ. ਆਰਮਤਿ ਏਤ੍ਥਾਤਿ ਆਰਾਮੋ, ਰੂਪਂ ਆਰਾਮੋ ਏਤਸ੍ਸਾਤਿ ਰੂਪਾਰਾਮਂ, ਤਤੋ ਏਵ ਤਨ੍ਨਿਨ੍ਨਭਾਵੇਨ ਰੂਪੇ ਰਤਨ੍ਤਿ ਰੂਪਰਤਂ, ਤੇਨ ਸਮ੍ਮੋ ਦੁਪ੍ਪਤ੍ਤਿਯਾ ਰੂਪੇਨ ਸਮ੍ਮੁਦਿਤਨ੍ਤਿ ਰੂਪਸਮ੍ਮੁਦਿਤਂ, ਤਦੇਤਂ ਤਦਭਿਹਤਜਵਨਕਿਚ੍ਚਂ ਤਤ੍ਥ ਆਰੋਪੇਤ੍ਵਾ ਵੁਤ੍ਤਂ. ਦਨ੍ਤਨ੍ਤਿਆਦੀਸੁਪਿ ਏਸੇਵ ਨਯੋ. ਦਨ੍ਤਂ ਦਮਿਤਂ. ਨਿਬ੍ਬਿਸੇਵਨਨ੍ਤਿ ਵਿਗਤਵਿਸੁਕਾਯਿਕਂ. ਗੁਤ੍ਤਨ੍ਤਿ ਸਤਿਯਾ ਗੁਤ੍ਤਂ. ਰਕ੍ਖਿਤਨ੍ਤਿ ਤਸ੍ਸੇਵ ਵੇਵਚਨਂ. ਸਂਵੁਤਨ੍ਤਿ ਅਪਨੀਤਂ ਪਵੇਸਨਿਵਾਰਣੇਨ. ਤੇਨਾਹ ‘‘ਪਿਹਿਤ’’ਨ੍ਤਿ.

੨੧੦. ਉਪ੍ਪਜ੍ਜਨਪਰਿਲ਼ਾਹਨ੍ਤਿ ਉਪ੍ਪਜ੍ਜਨਕਿਲੇਸਪਰਿਲ਼ਾਹਂ. ਕਿਂ ਵਚਨਂ ਵਤ੍ਤਬ੍ਬਂ ਅਸ੍ਸਾਤਿ ਰੂਪਾਰਮ੍ਮਣਂ ਅਨੁਭਵਿਤ੍ਵਾ ਸਮੁਦਯਾਦਿਪਹਾਨਂ ਪਰਿਗ੍ਗਣ੍ਹਿਤ੍ਵਾ ਪਰਿਨਿਬ੍ਬਿਨ੍ਦਿਤ੍ਵਾ ਵਿਰਜ੍ਜਿਤ੍ਵਾ ਯੋ ਵਿਮੁਤ੍ਤੋ, ਤਤ੍ਥ ਕਿਂ ਵੁਦ੍ਧਿਹਤਪਰਿਯਾਯੋ ਅਵਸ੍ਸਂ ਲਭਤਿ ਨ ਲਭਤੀਤਿ ਪੁਚ੍ਛਤਿ. ਪਰਿਬ੍ਬਾਜਕੋ ਤਾਦਿਸੇ ਸਾਰਬਦ੍ਧਵਿਮੁਤ੍ਤਿਕੇ ਵੁਦ੍ਧਿਹਤੋਤਿ ਨ ਵਦੇਯ੍ਯਾਤਿ ਆਹ ‘‘ਨ ਕਿਞ੍ਚਿ, ਭੋ, ਗੋਤਮਾ’’ਤਿ.

੨੧੧. ਤੇਤਿ ਤਯਾ, ਅਯਮੇਵ ਵਾ ਪਾਠੋ. ਵਸ੍ਸਂ ਵਾਸੋ ਵਸ੍ਸਂ ਉਤ੍ਤਰਪਦਲੋਪੇਨ, ਵਸ੍ਸਿਤੁਂ ਅਰਹਤੀਤਿ ਵਸ੍ਸਿਕੋ, ਵਸ੍ਸਕਾਲੇ ਨਿਵਾਸਾਨੁਚ੍ਛਵਿਕੋਤਿ ਅਤ੍ਥੋ.

ਨਾਤਿਉਚ੍ਚੋ ਹੋਤਿ ਨਾਤਿਨੀਚੋਤਿ ਗਿਮ੍ਹਿਕੋ ਵਿਯ ਉਚ੍ਚੋ, ਹੇਮਨ੍ਤਿਕੋ ਵਿਯ ਨੀਚੋ ਨ ਹੋਤਿ, ਅਥ ਖੋ ਤਦੁਭਯਵੇਮਜ੍ਝਲਕ੍ਖਣਤਾਯ ਨਾਤਿਉਚ੍ਚੋ ਹੋਤਿ ਨਾਤਿਨੀਚੋ. ਨਾਤਿਤਨੂਨੀਤਿ ਹੇਮਨ੍ਤਿਕਸ੍ਸ ਵਿਯ ਨ ਖੁਦ੍ਦਕਾਨਿ. ਨਾਤਿਬਹੂਨੀਤਿ ਗਿਮ੍ਹਿਕਸ੍ਸ ਵਿਯ ਨ ਅਤਿਬਹੂਨਿ. ਮਿਸ੍ਸਕਾਨੇਵਾਤਿ ਹੇਮਨ੍ਤਿਕਗਿਮ੍ਹਿਕੇਸੁ ਵੁਤ੍ਤਲਕ੍ਖਣਵੋਮਿਸ੍ਸਕਾਨਿ. ਉਣ੍ਹਪਵੇਸਨਤ੍ਥਾਯਾਤਿ ਨਿਯੂਹੇਸੁ ਪੁਰੇਭਤ੍ਤਂ ਪਚ੍ਛਾਭਤ੍ਤਞ੍ਚ ਪਤਿਤਸੂਰਿਯੋਭਾਸਵਸੇਨ ਉਣ੍ਹਸ੍ਸ ਅਬ੍ਭਨ੍ਤਰਪਵੇਸਨਤ੍ਥਾਯ. ਭਿਤ੍ਤਿਨਿਯੂਹਾਨਿ ਨੀਹਰੀਯਨ੍ਤੀਤਿ ਦਕ੍ਖਿਣਪਸ੍ਸੇ ਭਿਤ੍ਤੀਸੁ ਨਿਯੂਹਾਨਿ ਨੀਹਰਿਤ੍ਵਾ ਕਰੀਯਨ੍ਤਿ. ਵਿਪੁਲਜਾਲਾਨੀਤਿ ਪੁਥੁਲਛਿਦ੍ਦਾਨਿ. ਉਦਕਯਨ੍ਤਾਨੀਤਿ ਉਦਕਵਾਹਕਯਨ੍ਤਾਨਿ.

ਨੀਲੁਪ੍ਪਲਗਚ੍ਛਕੇ ਕਤ੍ਵਾਤਿ ਵਿਕਸਿਤੇਹਿ ਨੀਲੁਪ੍ਪਲੇਹਿ ਗਚ੍ਛਕੇ ਨਲ਼ਿਨਿਕੇ ਕਤ੍ਵਾ. ਗਨ੍ਧਕਲਲਨ੍ਤਿ ਗਨ੍ਧਮਿਸ੍ਸਕਕਦ੍ਦਮਂ. ਯਮਕਭਿਤ੍ਤੀਤਿ ਯੁਗਲ਼ਭਿਤ੍ਤਿ, ਤਸ੍ਸਾ ਅਨ੍ਤਰੇ ਨਾਲ਼ਿ, ਯਤੋ ਉਦਕਂ ਅਭਿਰੁਹਤਿ. ਲੋਹਨਾਲ਼ਿਨ੍ਤਿ ਲੋਹਮਯਯਨ੍ਤਨਾਲ਼ਿਂ. ਜਾਲਨ੍ਤਿ ਤਮ੍ਬਲੋਹਮਯਂ ਜਾਲਂ. ਹੇਟ੍ਠਾ ਯਨ੍ਤਂ ਪਰਿਵਤ੍ਤੇਨ੍ਤੀਤਿ ਹੇਟ੍ਠਾਭਾਗੇ ਉਦਕਯਨ੍ਤਂ ਗਮੇਨ੍ਤਿ. ਉਦਕਫੁਸਿਤੇ ਤੇਮੇਨ੍ਤੇ ਵਿਵਣ੍ਣਤਾ ਮਾਹੋਸੀਤਿ ਨੀਲਪਟਂ ਨਿਵਾਸੇਤਿ. ਦਿਵਾਕਾਲੇਤਿ ਦਿਵਸਵੇਲਾਯ. ਅਜ੍ਝਤ੍ਤਂ ਵੂਪਸਨ੍ਤਚਿਤ੍ਤੋ ਵਿਹਰਾਮੀਤਿ ਏਤੇਨ ਅਤ੍ਤਨੋ ਫਲਸਮਾਪਤ੍ਤਿਵਿਹਾਰੋ ਭਗਵਤਾ ਦਸ੍ਸਿਤੋਤਿ ਆਹ – ‘‘ਤਾਯ ਰਤਿਯਾ ਰਮਮਾਨੋਤਿ ਇਦਂ ਚਤੁਤ੍ਥਜ੍ਝਾਨਿਕਫਲਸਮਾਪਤ੍ਤਿਰਤਿਂ ਸਨ੍ਧਾਯ ਵੁਤ੍ਤ’’ਨ੍ਤਿ.

੨੧੨. ਮਹਾਚ ਨੇਸਂ ਪਪਞ੍ਚੋਤਿ ਨੇਸਂ ਰਾਜੂਨਂ ਮਹਾਪਪਞ੍ਚੋ ਰਾਜਿਦ੍ਧਿਵਸੇਨ ਸਬ੍ਬਦਾ ਸਮ੍ਪਤ੍ਤਿਵਿਸਯੋ ਚ, ਅਨੁਭਵਿਤੁਂ ਨ ਲਭਨ੍ਤੀਤਿ ਅਧਿਪ੍ਪਾਯੋ. ਮਨ੍ਤੇ ਗਵੇਸਨ੍ਤਾ ਵਿਚਰਨ੍ਤਿ, ਨ ਭੋਗਸੁਖਂ. ਗਣਨਾ ਨਾਮ ਅਚ੍ਛਿਨ੍ਨਗਣਨਾ, ਨ ਵਿਗਣਗਣਨਾ ਨ ਪਣਗਣਨਾ. ਆਵਟ੍ਟੋਤਿ ਯਥਾਧਿਗਤੇ ਦਿਬ੍ਬੇ ਕਾਮੇ ਪਹਾਯ ਕਾਮਹੇਤੁ ਆਵਟ੍ਟੋ ਨਿਵਤ੍ਤੋ ਪਰਿਵਤ੍ਤਿਤੋ ਭਵੇਯ੍ਯ. ਏਵਂ ਮਾਨੁਸਕਾ ਕਾਮਾਤਿ ਯਥਾ ਕੋਚਿ ਕੁਸਗ੍ਗੇਨ ਉਦਕਂ ਗਹੇਤ੍ਵਾ ਮਹਾਸਮੁਦ੍ਦੇ ਉਦਕਂ ਮਿਨੇਯ੍ਯ. ਤਤ੍ਥ ਮਹਾਸਮੁਦ੍ਦੇ ਉਦਕਮੇਵ ਮਹਨ੍ਤਂ ਵਿਪੁਲਂ ਪਣੀਤਞ੍ਚ, ਏਵਂ ਦਿਬ੍ਬਾਨਂ ਕਾਮਾਨਂ ਸਮੀਪੇ ਉਪਨਿਧਾਯ ਮਾਨੁਸਕਾ ਕਾਮਾ ਅਪ੍ਪਮਤ੍ਤਕਾ ਓਰਮਤ੍ਤਕਾ ਨਿਹੀਨਾ, ਦਿਬ੍ਬਾਵ ਕਾਮਾ ਮਹਨ੍ਤਾ ਵਿਪੁਲਾ ਉਲ਼ਾਰਾ ਪਣੀਤਾ. ਸਮਧਿਗਯ੍ਹਾਤਿ ਸਮ੍ਮਾ ਅਧਿਗਮਨਵਸੇਨ ਨਿਗ੍ਗਯ੍ਹ ਦਿਬ੍ਬਮ੍ਪਿ ਸੁਖਂ ਹੀਨਂ ਕਤ੍ਵਾ ਤਿਟ੍ਠਤਿ.

੨੧੩. ਆਰੋਗ੍ਯਹੇਤੁਕਂ ਸੁਖਂ ਅਸ੍ਸ ਅਤ੍ਥੀਤਿ ਸੁਖੀ, ਤਂ ਪਨਸ੍ਸ ਰੋਗਵਿਗਮਤੋਵਾਤਿ ਆਹ ‘‘ਪਠਮਂ ਦੁਕ੍ਖਿਤੋ ਪਚ੍ਛਾ ਸੁਖਿਤੋ’’ਤਿ. ਸੇਰੀ ਨਾਮ ਅਤ੍ਤਾਧੀਨਵੁਤ੍ਤੀਤਿ ਆਹ ‘‘ਸੇਰੀ ਏਕਕੋ ਭਵੇਯ੍ਯਾ’’ਤਿ. ਅਤ੍ਤਨੋ ਵਸੋ ਸਯਂਵਸੋ, ਸੋ ਏਤਸ੍ਸ ਅਤ੍ਥੀਤਿ ਸਯਂਵਸੀ. ਅਙ੍ਗਾਰਕਪਲ੍ਲਂ ਵਿਯ ਕਾਮਵਤ੍ਥੁਪਰਿਲ਼ਾਹਹੇਤੁਤੋ. ਤਚ੍ਛੇਤ੍ਵਾਤਿ ਘਟ੍ਟੇਤ੍ਵਾ, ਕਣ੍ਡੂਯਿਤ੍ਵਾਤਿ ਅਤ੍ਥੋ.

੨੧੪. ਯੇਨ ਕਾਯੋ ਮਧੁਰਕਜਾਤੋ ਹੋਤਿ, ਤਂ ਕਿਰ ਕੁਟ੍ਠਂ ਛਵਿਂ ਵਿਨਾਸੇਤਿ, ਚਮ੍ਮਂ ਛਿਦ੍ਦਜਾਤਂ ਵਿਯ ਹੋਤਿ. ਤੇਨੇਵਾਹ ‘‘ਉਪਹਤਕਾਯਪ੍ਪਸਾਦੋ’’ਤਿ. ਪਚ੍ਚਲਤ੍ਥਾਤਿ ਪਟਿਲਭਿ. ਅਵਿਜ੍ਜਾਭਿਭੂਤਤਾਯ ਵਿਰੋਧਿਪਚ੍ਚਯਸਮਾਯੋਗੇਨ ਪਞ੍ਞਿਨ੍ਦ੍ਰਿਯਸ੍ਸ ਉਪਹਤਤ੍ਤਾ. ਆਯਤਿਂ ਦੁਕ੍ਖਫਲਤਾਯ ਏਤਰਹਿ ਚ ਕਿਲੇਸਦੁਕ੍ਖਬਹੁਲਤਾਯ ਕਾਮਾਨਂ ਦੁਕ੍ਖਸਮ੍ਫਸ੍ਸਤਾ, ਤਦੁਭਯਸਂਯੁਤ੍ਤੇਸੁ ਤੇਸੁ ਚ ਤਂ ਅਸਲ੍ਲਕ੍ਖਿਤ੍ਵਾ ਏਕਨ੍ਤਸੁਖਾਭਿਨਿਵੇਸੋ ਵਿਪਰੀਤਸਞ੍ਞਾਯ, ਨ ਕੇਵਲਾਯ ਸੁਖਵੇਦਨਾਯ ਸੁਖਾਤਿ ਪਵਤ੍ਤਸਞ੍ਞੀ.

੨੧੫. ਤਾਨੀਤਿ ਕੁਟ੍ਠਸਰੀਰੇ ਵਣਮੁਖਾਨਿ. ਅਸੁਚੀਨੀਤਿ ਅਸੁਭਾਨਿ. ਦੁਗ੍ਗਨ੍ਧਾਨੀਤਿ ਵਿਸ੍ਸਗਨ੍ਧਾਨਿ. ਪੂਤੀਨੀਤਿ ਕੁਣਪਭੂਤਾਨਿ. ਇਦਾਨੀਤਿ ਏਤਰਹਿ. ਨਖੇਹਿ ਵਿਪ੍ਪਤਚ੍ਛਨਅਗ੍ਗਿਪਰਿਤਾਪਨੇਹਿ ਅਤਿਨਿਪ੍ਪੀਲ਼ਨਕਾਲੇ ਪਾਣਕਾ…ਪੇ… ਪਗ੍ਘਰਨ੍ਤਿ, ਤੇਨ ਵੇਦਨਾ ਤਨੁਕਾ ਹੋਤਿ. ਏਵਨ੍ਤਿ ਵੁਤ੍ਤਨਯੇਨ ਵੇਦਨਾਯ ਤਨੁਕਭਾਵਤੋ.

ਆਰੋਗ੍ਯਭਾਵੇ ਧਨਲਾਭਾਦਿਲਾਭੁਪ੍ਪਤ੍ਤਿਤੋ, ਅਸਤਿ ਚ ਆਰੋਗ੍ਯੇ ਲਾਭਸ੍ਸ ਨਿਰਤ੍ਥਕਭਾਵਤੋ, ਦਿਟ੍ਠਧਮ੍ਮਿਕਾਦਿਸਬ੍ਬਸਮ੍ਪਤ੍ਤੀਨਂ ਲਾਭਸ੍ਸ ਨਿਮਿਤ੍ਤਭਾਵਤੋ ਚ ਆਰੋਗ੍ਯਪਰਮਾ ਲਾਭਾ. ਨਿਬ੍ਬਾਨੇ ਸੁਖੁਪ੍ਪਤ੍ਤਿਤੋ, ਅਸਤਿ ਚ ਨਿਬ੍ਬਾਨਾਧਿਗਮੇ ਤਾਦਿਸਸ੍ਸ ਸੁਖਸ੍ਸ ਅਨੁਪਲਬ੍ਭਨਤੋ, ਸਬ੍ਬਸਙ੍ਖਤਵਿਵਿਤ੍ਤਤ੍ਤਾ ਚ ਸਬ੍ਬਸੋ ਚ ਸਂਸਾਰਦੁਕ੍ਖਾਭਾਵਤੋ, ਅਧਿਗਤੇ ਚ ਤਸ੍ਮਿਂ ਸਕਲਵਟ੍ਟਦੁਕ੍ਖਾਭਾਵਤੋ ਚ ਨਿਬ੍ਬਾਨਂ ਪਰਮਂ ਸੁਖਂ. ਪੁਬ੍ਬਭਾਗਮਗ੍ਗਾਨਨ੍ਤਿ ਕਾਯਾਨੁਪਸ੍ਸਨਾਦਿਭੇਦਭਿਨ੍ਨਾਨਂ ਅਰਿਯਮਗ੍ਗਸ੍ਸ ਪੁਬ੍ਬਭਾਗਿਯਾਨਂ ਮਗ੍ਗਾਨਂ. ਤੇਸਞ੍ਚ ਅਮਤਗਾਮਿਤਾ ਨਾਮ ਤਨ੍ਨਿਨ੍ਨਤਾਵਸੇਨੇਵ ਸਚ੍ਛਿਕਿਰਿਯਾਵਸੇਨਾਤਿ ਆਹ ‘‘ਪੁਬ੍ਬਭਾਗਗਮਨੇਨੇਵ ਅਮਤਗਾਮਿਨ’’ਨ੍ਤਿ. ਅਟ੍ਠਙ੍ਗਿਕੋ ਅਰਿਯਮਗ੍ਗੋ ਖੇਮੋ ਸਬ੍ਬਪਰਿਸ੍ਸਯਸਮੁਗ੍ਘਾਤਨੇਨ ਅਨੁਪਦ੍ਦੁਤਤ੍ਤਾ, ਤਂਸਮਙ੍ਗੀਨਂ ਸਬ੍ਬਸੋ ਅਨੁਪਦ੍ਦੁਤਤ੍ਤਾ ਤਂਸਮਙ੍ਗੀਨਂ ਸਬ੍ਬਸੋ ਅਨੁਪਦ੍ਦਵਹੇਤੁਤੋ ਚ. ਲਦ੍ਧਿਵਸੇਨ ਗਹਿਤਾਤਿ ਸਸ੍ਸਤਵਾਦਾਦੀਹਿ ਕੇਵਲਂ ਤੇਸਂ ਲਦ੍ਧਿਵਸੇਨ ਤਥਾ ਗਹਿਤਾ. ਖੇਮਅਮਤਗਾਮਿਨਨ੍ਤਿ ਇਮਿਨਾ ਹਿ ‘‘ਖੇਮਂਅਮਤਗਾਮਿਨ’’ਨ੍ਤਿ ਵਿਭਤ੍ਤਿਅਲੋਪੇਨ ਨਿਦ੍ਦੇਸੋ, ਅਤ੍ਥੋ ਪਨ ਵਿਭਤ੍ਤਿਲੋਪੇਨ ਦਟ੍ਠਬ੍ਬੋਤਿ ਦਸ੍ਸੇਤਿ.

੨੧੬. ਅਨੋਮਜ੍ਜਤੀਤਿ ਅਨੁ ਅਨੁ ਓਮਜ੍ਜਤਿ. ਅਪਰਾਪਰਂ ਹਤ੍ਥਂ ਹੇਟ੍ਠਾ ਓਤਾਰੇਨ੍ਤੋ ਮਜ੍ਜਤਿ.

੨੧੭. ਛੇਕਨ੍ਤਿ ਘਨਭਾਵੇਨ ਵੀਤਂ. ਘਨਮਟ੍ਠਭਾਵੇਨ ਸੁਨ੍ਦਰਂ ਹੋਤੀਤਿ ਆਹ ‘‘ਸਮ੍ਪਨ੍ਨ’’ਨ੍ਤਿ. ਸਾਧੂਹਿ ਪਰਮਪ੍ਪਿਚ੍ਛਸਨ੍ਤੁਟ੍ਠੇਹਿ ਲਾਤੋ ਗਹਿਤੋਤਿ ਸਾਹੁਲ਼ਿ. ਸਙ੍ਕਾਰਚੋਲ਼ਕਂ ਨਿਚ੍ਚਕਾਲ਼ਕਂ.

੨੧੮. ਤਤ੍ਥ ਤਤ੍ਥ ਰੁਜਨਟ੍ਠੇਨ ਵਿਬਾਧਨਟ੍ਠੇਨ ਰੋਗੋਵ ਭੂਤੋ. ਵਿਪਸ੍ਸਨਾਞਾਣੇਨਪਿ ਸਿਖਾਪ੍ਪਤ੍ਤੇਨ ਆਰੋਗ੍ਯਂ ਏਕਦੇਸੇਨ ਪਸ੍ਸਤਿ, ਨਿਬ੍ਬਾਨਞ੍ਚ ਵਟ੍ਟਪਟਿਪਕ੍ਖਤੋਤਿ ਆਹ ‘‘ਵਿਪਸ੍ਸਨਾਞਾਣਞ੍ਚੇਵਾ’’ਤਿ.

੨੧੯. ਅਨ੍ਤਰਾਤਿ ਪਠਮੁਪ੍ਪਤ੍ਤਿ ਜਰਾਮਰਣਾਨਂ ਵੇਮਜ੍ਝੇ. ਉਪਹਤੋਤਿ ਪਿਤ੍ਤਸੇਮ੍ਹਾਦਿਦੋਸੇਹਿ ਦੂਸਿਤਭਾਵੇਨ ਕਥਿਤੋ. ਪਿਤ੍ਤਾਦਿਦੋਸੇ ਪਨ ਭੇਸਜ੍ਜਸੇਵਨਾਯ ਨਿਵਤ੍ਤੇਨ੍ਤੋ ਉਪਹਤਂ ਪਟਿਪਾਕਤਿਕਂ ਕਰੋਨ੍ਤੋ ਚਕ੍ਖੂਨਿ ਉਪ੍ਪਾਦੇਤਿ ਨਾਮ. ਵਿਨਟ੍ਠਾਨੀਤਿ ਅਨੁਪ੍ਪਤ੍ਤਿਧਮ੍ਮਤਂ ਆਪਨ੍ਨਾਨਿ.

੨੨੦. ਪੁਬ੍ਬੇ ਵੁਤ੍ਤੇ ਸਾਹੁਲ਼ਿਯਚੀਰੇ. ਵਟ੍ਟੇ ਅਨੁਗਤਚਿਤ੍ਤੇਨਾਤਿ ਅਨਮਤਗ੍ਗੇ ਸਂਸਾਰਵਟ੍ਟੇ ਅਨਾਦੀਨਵਦਸ੍ਸਿਤਾਯ ਅਨੁਗਾਮਿਚਿਤ੍ਤੇਨ.

੨੨੧. ਧਮ੍ਮਸ੍ਸਾਤਿ ਨਿਬ੍ਬਾਨਸ੍ਸ. ਅਨੁਧਮ੍ਮਨ੍ਤਿ ਅਨੁਰੂਪਂ ਨਿਯ੍ਯਾਨਧਮ੍ਮਂ. ਤੇਨਾਹ ‘‘ਅਨੁਚ੍ਛਵਿਕਂ ਪਟਿਪਦ’’ਨ੍ਤਿ. ਪਞ੍ਚਕ੍ਖਨ੍ਧੇਤਿ ਪਞ੍ਚੁਪਾਦਾਨਕ੍ਖਨ੍ਧੇ ਦਸ੍ਸੇਤਿ. ‘‘ਦੀਘਰਤ੍ਤਂ ਵਤ, ਭੋ’’ਤਿਆਦਿਨਾ ਪਾਲ਼ਿਯਂ ਵਿਵਟ੍ਟਂ ਦਸ੍ਸਿਤਂ. ਤੇਨਾਹ ‘‘ਉਪਾਦਾਨਨਿਰੋਧਾਤਿ ਵਿਵਟ੍ਟਂ ਦਸ੍ਸੇਨ੍ਤੋ’’ਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਮਾਗਣ੍ਡਿਯਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.