੯. ਪਰਿਵਤ੍ਤਨਹਾਰਵਿਭਙ੍ਗਵਣ੍ਣਨਾ

੩੫. ਸਮ੍ਮਾਦਿਟ੍ਠਿਸ੍ਸ…ਪੇ… ਨਿਜ੍ਜਿਣ੍ਣਾ ਭਵਤੀਤਿ ਏਤ੍ਥ ਯਥਾ ਮਗ੍ਗਸਮ੍ਮਾਦਿਟ੍ਠਿਵਸੇਨਤ੍ਥੋ ਵੁਤ੍ਤੋ, ਏਵਂ ਕਮ੍ਮਸ੍ਸਕਤਾਕਮ੍ਮਪਥਸਮ੍ਮਾਦਿਟ੍ਠੀਨਮ੍ਪਿ ਵਸੇਨ ਅਤ੍ਥੋ ਲਬ੍ਭਤੇਵ. ਕਮ੍ਮਪਥਕਥਾ ਹੇਸਾ. ਯਥਾਵੁਤ੍ਤੇਨਾਕਾਰੇਨਾਤਿ ‘‘ਅਵਿਮੁਤ੍ਤਾਵ ਸਮਾਨਾ’’ਤਿ, ‘‘ਅਵਿਮੁਤ੍ਤਿਯ’’ਨ੍ਤਿ ਚ ਵੁਤ੍ਤਪ੍ਪਕਾਰੇਨ. ਮਿਚ੍ਛਾਭਿਨਿਵੇਸਵਸੇਨਾਤਿ ਅਸਮ੍ਮਾਸਮ੍ਬੁਦ੍ਧਂ ਏਵ ਸਮ੍ਮਾਸਮ੍ਬੁਦ੍ਧੋਤਿ, ਅਨਿਯ੍ਯਾਨਿਕਂ ਏਵ ਨਿਯ੍ਯਾਨਿਕੋਤਿ, ਅਸਨ੍ਤਂ ਏਵ ਪਨ ਸਨ੍ਤਨ੍ਤਿ, ਅਨਰਿਯਂ ਏਵ ਅਰਿਯੋਤਿ ਵਿਪਰੀਤਾਭਿਨਿਵੇਸਵਸੇਨ. ਮਿਚ੍ਛਾਧਿਮੋਕ੍ਖੋਤਿ ਅਯਾਥਾਵਪਸਾਦੋ, ਅਯਾਥਾਵਸਨ੍ਨਿਟ੍ਠਾਨਂ ਵਾ. ਉਪ੍ਪਨ੍ਨਮੋਹੋ ਮਿਚ੍ਛਾਵਿਮੁਤ੍ਤਿਞਾਣਦਸ੍ਸਨਨ੍ਤਿ ਸਮ੍ਬਨ੍ਧੋ.

੩੬. ਵਾਦਾਨਂ ਵਾ ਅਨੁਵਾਦਾ ਵਾਦਾਨੁਵਾਦਾ, ਤੇਸਂ ਵਾਦਾਨਂ ਉਪਾਦਾਤਿ ਅਤ੍ਥੋ. ਵਾਦਾਨੁਪਵਤ੍ਤਿਯੋਤਿ ਵਾਦਾਨਂ ਦੋਸਾਨਂ ਅਨੁਪਵਤ੍ਤਿਯੋ.

ਅਨ੍ਤਦ੍ਵਯਪਰਿਵਤ੍ਤਨਨ੍ਤਿ ਕਾਮਸੁਖਅਤ੍ਤਕਿਲਮਥਾਨੁਯੋਗਸਙ੍ਖਾਤਸ੍ਸ ਅਨ੍ਤਦ੍ਵਯਸ੍ਸ ਪਟਿਪਕ੍ਖਵਸੇਨ ਪਰਿਵਤ੍ਤਨਂ.

ਏਤੇਸੁਪਿ ਵਾਰੇਸੂਤਿ ‘‘ਨਿਯ੍ਯਾਨਿਕੋ ਧਮ੍ਮੋ ਤੇਸਂ ਅਧਮ੍ਮੋ, ਸੁਖੋ ਤੇਸਂ ਅਧਮ੍ਮੋ’’ਤਿ ਚ ਇਮੇਸੁ ਵਾਰੇਸੁ. ਵੁਤ੍ਤਨਯੇਨਾਤਿ ਯਦਿ ਅਤ੍ਤਪਰਿਤਾਪਨਂ ਅਤ੍ਤਨੋ ਦੁਕ੍ਖਾਪਨਂ ਧਮ੍ਮੋ, ਧਮ੍ਮਸ੍ਸ ਪਟਿਵਿਰੁਦ੍ਧੋ ਅਧਮ੍ਮੋ ਸਿਯਾ, ਦੁਕ੍ਖਸ੍ਸ ਚ ਸੁਖਪਟਿਵਿਰੁਦ੍ਧਨ੍ਤਿ ਝਾਨਮਗ੍ਗਫਲਸੁਖਸ੍ਸ, ਅਨਵਜ੍ਜਪਚ੍ਚਯਪਰਿਭੋਗਸੁਖਸ੍ਸ ਚ ਤੇਸਂ ਅਧਮ੍ਮਭਾਵੋ ਆਪਜ੍ਜਤੀਤਿ ਏਵਂ ਵਤ੍ਤਬ੍ਬਾ. ‘‘ਯਂ ਯਂ ਵਾ ਪਨਾਤਿਆਦਿਨਾ’’ਤਿ ਇਦਂ ਅਵਸੇਸਪਾਠਾਮਸਨਂ. ਏਤ੍ਥ ਯਂ ਯਂ ਵਾ ਪਨ ਧਮ੍ਮਨ੍ਤਿ ਯਂ ਵਾ ਤਂ ਵਾ ਧਮ੍ਮਂ, ਕੁਸਲਂ ਵਾ ਅਕੁਸਲਂ ਵਾ ਇਟ੍ਠਂ ਵਾ ਅਨਿਟ੍ਠਂ ਵਾਤਿ ਵੁਤ੍ਤਂ ਹੋਤਿ. ਰੋਚਯਤਿ ਵਾ ਉਪਗਚ੍ਛਤਿ ਵਾਤਿ ਚਿਤ੍ਤੇਨ ਰੋਚਤਿ, ਦਿਟ੍ਠਿਯਾ ਉਪਗਚ੍ਛਤੀਤਿ. ਤਸ੍ਸ ਤਸ੍ਸ ਧਮ੍ਮਸ੍ਸ ਯੋ ਪਟਿਪਕ੍ਖੋਤਿ ਤਸ੍ਸ ਤਸ੍ਸ ਰੁਚਿਤਸ੍ਸ, ਉਪਗਤਸ੍ਸ ਵਾ ਧਮ੍ਮਸ੍ਸ ਯੋ ਪਟਿਪਕ੍ਖੋ ਨਾਮ. ਸ੍ਵਸ੍ਸ ਅਨਿਟ੍ਠਤੋ ਅਜ੍ਝਾਪਨ੍ਨੋ ਭਵਤੀਤਿ ਯੋ ਧਮ੍ਮੋ ਅਸ੍ਸ ਰੁਚਿਤਸ੍ਸ, ਉਪਗਤਸ੍ਸ ਵਾ ਧਮ੍ਮਸ੍ਸ ਅਨਿਟ੍ਠਤੋ ਪਚ੍ਚਨੀਕਤੋ ਅਬ੍ਭੁਪਗਤੋ ਹੋਤਿ, ਤੇਨ ਪਟਿਪਕ੍ਖੇਨ ਦੇਸਨਾਯ ਪਰਿਵਤ੍ਤਨਂ ਪਰਿਵਤ੍ਤਨੋ ਹਾਰੋਤਿ ਅਤ੍ਥੋ. ਤੇਨਾਹ ‘‘ਪਟਿਪਕ੍ਖਸ੍ਸ ਲਕ੍ਖਣਂ ਵਿਭਾਵੇਤੀ’’ਤਿ.

ਪਰਿਵਤ੍ਤਨਹਾਰਵਿਭਙ੍ਗਵਣ੍ਣਨਾ ਨਿਟ੍ਠਿਤਾ.