੧੦. ਵੇਵਚਨਹਾਰਵਿਭਙ੍ਗਵਣ੍ਣਨਾ

੩੭. ਅਞ੍ਞਮਞ੍ਞੇਹੀਤਿ ਅਞ੍ਞੇਹਿ ਅਞ੍ਞੇਹਿ. ਆਯਤਿਨ੍ਤਿ ਪਚ੍ਚਵੇਕ੍ਖਣਕਾਲੇ. ਕਥਞ੍ਚੀਤਿ ਯੇਨ ਕੇਨਚਿ ਪਕਾਰੇਨ, ਪਠਮਂ ਵੁਤ੍ਤੇਨ ਪਰਿਯਾਯੇਨ ਅਪ੍ਪਟਿਵਿਜ੍ਝਨ੍ਤੋ ਅਪਰੇਨ ਪਰਿਯਾਯੇਨ ਪਟਿਵਿਜ੍ਝੇਯ੍ਯਾਤਿ ਅਧਿਪ੍ਪਾਯੋ. ਪਰਿਯਾਯਵਚਨਂ ਨਿਦ੍ਦਿਸਤੀਤਿ ਸਮ੍ਬਨ੍ਧੋ. ਏਵਂ ਸਬ੍ਬਤ੍ਥ. ਤਸ੍ਮਿਂ ਖਣੇਤਿ ਪਰਿਯਾਯਵਚਨਸ੍ਸ ਵੁਤ੍ਤਕ੍ਖਣੇ. ਵਿਕ੍ਖਿਤ੍ਤਚਿਤ੍ਤਾਨਨ੍ਤਿ ਆਰਮ੍ਮਣਨ੍ਤਰੇਹਿ ਵਿਵਿਧਖਿਤ੍ਤਚਿਤ੍ਤਾਨਂ. ਅਞ੍ਞਵਿਹਿਤਾਨਨ੍ਤਿ ਅਞ੍ਞਂ ਚਿਨ੍ਤੇਨ੍ਤਾਨਂ. ਕਸ੍ਮਾ ਪਨ ਅਞ੍ਞੇਨ ਪਰਿਯਾਯੇਨ ਤਦਤ੍ਥਾਵਬੋਧਨਂ, ਨਨੁ ਤੇਨ ਵੁਤ੍ਤੇ ਦਲ਼੍ਹੀਕਰਣਂ ਹੋਤੀਤਿ ਚੋਦਨਂ ਸਨ੍ਧਾਯਾਹ ‘‘ਤੇਨੇਵਾ’’ਤਿਆਦਿ. ਤਤ੍ਥ ਤਦਞ੍ਞੇਸਨ੍ਤਿ ਤੇਹਿ ਵਿਕ੍ਖਿਤ੍ਤਚਿਤ੍ਤਾਦੀਹਿ ਅਞ੍ਞੇਸਂ, ਯੇਹਿ ਪਠਮਂ ਵਚਨਂ ਸਮ੍ਮਦੇਵ ਗਹਿਤਂ. ਤਤ੍ਥਾਤਿ ਵੁਤ੍ਤਵਚਨੇਨੇਵ ਪੁਨਪ੍ਪੁਨਂ ਵਚਨੇ. ਅਧਿਗਤਅਨ੍ਵਤ੍ਥਤਾਯ ਪੁਨਰੁਤ੍ਤਿ ਪਰਿਵਜ੍ਜਨਤ੍ਥਂ ਵਿਸੇਸਨਭਾਵੇਨ ਤਾਹਿ ਤਾਹਿ ਸਞ੍ਞਾਹਿਪਿ ਅਯਮ੍ਪਿ ਸਦ੍ਦੋ ਇਮਸ੍ਸਤ੍ਥਸ੍ਸ ਵਾਚਕੋ, ਅਯਮ੍ਪਿ ਸਦ੍ਦੋ ਇਮਸ੍ਸਤ੍ਥਸ੍ਸ ਵਾਚਕੋਤਿ ਪਞ੍ਞਾਪਨੇਹਿ. ਦੇਸੇਤਬ੍ਬਸ੍ਸ ਤਸ੍ਸ ਤਸ੍ਸ ਅਤ੍ਥਸ੍ਸ ਅਤ੍ਤਨੋ ਚਿਤ੍ਤੇ ਉਪਨਿਬਨ੍ਧਨਂ ਠਪਨਂ. ਤਤ੍ਥਾਤਿ ਧਮ੍ਮਨਿਰੁਤ੍ਤਿਪਟਿਸਮ੍ਭਿਦਾਯਂ. ਬੀਜਾਵਾਪਨਂ ਹੇਤੁਸਮ੍ਪਾਦਨਂ.

ਏਵਂ ਭਗਵਤੋ ਪਰਿਯਾਯਦੇਸਨਾਯਂ ਅਨੇਕਾਨਿ ਪਯੋਜਨਾਨਿ ਵਤ੍ਵਾ ਇਦਾਨਿ ਅਤ੍ਤਨੋ ਸਮ੍ਮਾਸਮ੍ਬੁਦ੍ਧਤਾਯ ਏਵਂ ਤਥਾਗਤਾ ਬੁਦ੍ਧਲੀਲਾਯ ਅਨੇਕੇਹਿ ਪਰਿਯਾਯੇਹਿ ਧਮ੍ਮਂ ਦੇਸੇਨ੍ਤੀਤਿ ਦਸ੍ਸੇਨ੍ਤੋ ‘‘ਕਿਂ ਬਹੁਨਾ’’ਤਿਆਦਿਮਾਹ.

ਪਾਲ਼ਿਯਂ ‘‘ਪਿਹਾ ਨਾਮ ਯਾ ਵਤ੍ਤਮਾਨਸ੍ਸ ਅਤ੍ਥਸ੍ਸ ਪਤ੍ਥਨਾ’’ਤਿ ਪਚ੍ਚੁਪ੍ਪਨ੍ਨਵਿਸਯਤਂ ਦਸ੍ਸੇਤ੍ਵਾ ਪੁਨ ਅਨਾਗਤਵਿਸਯਤਂ ਦਸ੍ਸੇਤੁਂ ‘‘ਸੇਯ੍ਯਤਰਂ ਵਾ’’ਤਿਆਦਿ ਵੁਤ੍ਤਨ੍ਤਿ ‘‘ਅਨਾਗਤਪਚ੍ਚੁਪ੍ਪਨ੍ਨਤ੍ਥਵਿਸਯਾ ਤਣ੍ਹਾ ਪਿਹਾ’’ਤਿ ਆਹ.

ਅਤ੍ਥਨਿਪ੍ਫਤ੍ਤਿਪਟਿਪਾਲਨਾਤਿ ਇਮਸ੍ਮਿਂ ਵਾ ਪਦੇ ਪਿਹਾਯ ਏਵਤ੍ਥਵਸੇਨ ਅਨਾਗਤਪਚ੍ਚੁਪ੍ਪਨ੍ਨਤ੍ਥਵਿਸਯਭਾਵਦੀਪਨਤੋ.

ਧਮ੍ਮਾਰਮ੍ਮਣੇਨੇਵ ਸਙ੍ਗਹਿਤਾ ‘‘ਧਮ੍ਮਾਰਮ੍ਮਣ’’ਨ੍ਤ੍ਵੇਵ ਗਹਣਂ ਗਤਾ. ਚਤੁਵੀਸਤਿ ਪਦਾਨੀਤਿ ਏਤ੍ਥ ਗੇਹਸਿਤਦੋਮਨਸ੍ਸੂਪਵਿਚਾਰਾਦੀਨਂ ਚਤੁਨ੍ਨਂ ਛਕ੍ਕਾਨਂ ਵਸੇਨ ਚਤੁਵੀਸ ਕੋਟ੍ਠਾਸਾ.

੩੮. ਸਾਯੇਵ ਪਤ੍ਥਨਾਕਾਰੇਨ ਧਮ੍ਮਨਨ੍ਦੀਤਿਆਦਿਮਾਹਾਤਿ ਏਤ੍ਥ ਅਯਮਤ੍ਥੋ – ਸਾ ਏਵ ਪਤ੍ਥਨਾਕਾਰੇਨ ਪਵਤ੍ਤਿਯਾ ਆਸਾਦਿਪਰਿਯਾਯੇਨ ਵੁਤ੍ਤਾ ਤਣ੍ਹਾ ਰੂਪਾਦਿਧਮ੍ਮੇਸੁ ਨਨ੍ਦਨਟ੍ਠੇਨ ਧਮ੍ਮਨਨ੍ਦੀ. ਤੇਸਂ ਏਵ ਪਿਯਾਯਨਟ੍ਠੇਨ ਧਮ੍ਮਪੇਮਂ. ਗਿਲਿਤ੍ਵਾ ਪਰਿਨਿਟ੍ਠਪੇਤ੍ਵਾ ਠਾਨਤੋ ਧਮ੍ਮਜ੍ਝੋਸਾਨਨ੍ਤਿ.

ਇਮਿਨਾਪੀਤਿ ਨ ਕੇਵਲਂ ‘‘ਪਞ੍ਞਾ ਪਜਾਨਨਾ’’ਤਿਆਦਿਆਵੇਣਿਕਪਰਿਯਾਯੇਨੇਵ ਵੇਵਚਨਂ ਵਤ੍ਤਬ੍ਬਂ, ਅਥ ਖੋ ਇਮਿਨਾ ਆਧਿਪਤੇਯ੍ਯਾਦਿਸਾਧਾਰਣਪਰਿਯਾਯੇਨਪਿ ਵੇਵਚਨਂ ਵਤ੍ਤਬ੍ਬਨ੍ਤਿ ਅਤ੍ਥੋ. ਇਮਿਨਾਵ ਨਯੇਨਾਤਿ ਏਤੇਨ ਪਰਿਯਾਯਵਚਨੇਨ. ਨ ਹਿ ਦੇਸਨਤ੍ਥਸਾਧਨਂ ‘‘ਇਤਿਪਿ ਸੋ ਭਗਵਾ’’ਤਿਆਦਿਪਾਲ਼ਿਨਯਦਸ੍ਸਨਨ੍ਤਿ ਦਸ੍ਸੇਤਿ. ਬਲਨਿਪ੍ਫਤ੍ਤਿਗਤੋਤਿਆਦੀਸੁ ਦਸਸੁ ਤਥਾਗਤਬਲੇਸੁ ਨਿਪ੍ਫਤ੍ਤਿਂ ਪਾਰਿਪੂਰਿਂ ਗਤੋ. ਸਮ੍ਬੋਧਿਪਹਾਨਨ੍ਤਰਾਯਦੇਸਨਾ ਵਿਸੇਸਚੋਦਨਾਸੁ ਵਿਸਾਰਦਭਾਵਸਙ੍ਖਾਤਾਨਿ ਚਤ੍ਤਾਰਿ ਞਾਣਾਨਿ ਪਤ੍ਤੋ ਅਧਿਗਤੋਤਿ ਵੇਸਾਰਜ੍ਜਪ੍ਪਤ੍ਤੋ.

ਲੋਭਜ੍ਝਾਸਯਾਦਿਅਜ੍ਝਾਸਯਂ ਵਿਸੇਸੇਨ ਅਤਿਵਤ੍ਤੋਤਿ ਅਜ੍ਝਾਸਯਵੀਤਿਵਤ੍ਤੋ. ਅਤੀਤਹੇਤੁਸਙ੍ਖੇਪਾਦਿਸਙ੍ਖੇਪਵਿਰਹਿਤਤਾਯ ਅਸਙ੍ਖੇਪਸਙ੍ਖਾਤਂ ਨਿਬ੍ਬਾਨਂ, ਅਕੁਪ੍ਪਧਮ੍ਮਤਾਯ ਗੁਣੇਹਿ ਵਾ ਅਸਙ੍ਖੇਪਂ ਅਸਙ੍ਖ੍ਯੇਯ੍ਯਂ ਗਤੋ ਉਪਗਤੋਤਿ ਅਸਙ੍ਖੇਪਗਤੋ. ਸੇਸਂ ਸੁਵਿਞ੍ਞੇਯ੍ਯਮੇਵ. ਉਦ੍ਧੇਯ੍ਯਨ੍ਤਿ ਉਦ੍ਧਰਿਤਬ੍ਬਂ.

ਧਮ੍ਮਾਨੁਸ੍ਸਤਿਯਂ ਏਵਂ ਅਤ੍ਥੋ ਦਟ੍ਠਬ੍ਬੋਤਿ ਸਮ੍ਬਨ੍ਧੋ. ਸਂਸਾਰਦੁਕ੍ਖਤੋ ਪਾਤਿ, ਸਨ੍ਤੇਨ ਸੁਖੇਨ ਰਮੇਤਿ ਚਾਤਿ ਵਾ ਪਾਰਂ.

ਅਭੂਤਪੁਬ੍ਬਤ੍ਤਾਤਿ ਅਨੁਪ੍ਪਨ੍ਨਪੁਬ੍ਬਤ੍ਤਾ, ਤੇਨਸ੍ਸ ਨਿਚ੍ਚਤਂਵ ਵਿਭਾਵੇਤਿ ਕੇਨਚਿ ਦੇਵਤੋਪਸਗ੍ਗਾਦਿਨਾ ਅਨੁਪਸਜ੍ਜਨੀਯਤ੍ਤਾ ਅਨੁਪਸਟ੍ਠਤ੍ਤਾ.

‘‘ਦੁਪ੍ਪਸ੍ਸ’’ਨ੍ਤਿਪਿ ਪਾਲ਼ਿ, ਦੁਰਧਿਗਮਨ੍ਤਿ ਅਤ੍ਥੋ. ਗੁਣਸੋਭਾਸੁਰਭਿਭਾਵੇਨਾਤਿ ਗੁਣੇਹਿ ਸੋਭਾਯ, ਸੁਗਨ੍ਧਿਭਾਵੇਨ ਚ.

ਯਥਾ ਅਕ੍ਖਣਵੇਧੀ ਪੁਗ੍ਗਲੋ ਸਿਪ੍ਪਨਿਪ੍ਫਤ੍ਤਿਯਾ ਰਤ੍ਤਨ੍ਧਕਾਰਤਿਮਿਸਾਯ ਅਚਿਰਕ੍ਖਣਾਲੋਕੇਨ ਅਤਿਸੁਖੁਮਮ੍ਪਿ ਦੂਰਗਤਂ ਲਕ੍ਖਂ ਵਿਜ੍ਝਤਿ, ਏਵਂ ਅਰਿਯਸਾਵਕੋ ਸੀਲਸਮ੍ਪਤ੍ਤਿਯਾ ਅਤਿਸੁਖੁਮਂ ਨਿਬ੍ਬਾਨਂ ਚਤੁਸਚ੍ਚਧਮ੍ਮਂ ਏਕਪਟਿਵੇਧੇਨੇਵ ਪਟਿਵਿਜ੍ਝਤੀਤਿ ਆਹ ‘‘ਸਿਪ੍ਪਞ੍ਚ ਸੀਲਂ ਅਕ੍ਖਣਵੇਧਿਤਾਯਾ’’ਤਿ. ਲੋਕਿਕਨ੍ਤਿ ਨਿਦਸ੍ਸਨਮਤ੍ਤਂ ਦਟ੍ਠਬ੍ਬਂ ਲੋਕੁਤ੍ਤਰਧਮ੍ਮਓਲੋਕਨਸ੍ਸਾਪਿ ਅਧਿਟ੍ਠਾਨਭਾਵਤੋ.

ਵੇਵਚਨਹਾਰਵਿਭਙ੍ਗਵਣ੍ਣਨਾ ਨਿਟ੍ਠਿਤਾ.