੩. ਯੁਤ੍ਤਿਹਾਰਸਮ੍ਪਾਤਵਣ੍ਣਨਾ

੬੫. ਪਟਿਪਕ੍ਖਪਟਿਬਾਲ਼੍ਹਾ ਕੁਸਲਾ ਧਮ੍ਮਾ ਉਪ੍ਪਜ੍ਜਿਤੁਮੇਵ ਨ ਸਕ੍ਕੋਨ੍ਤਿ, ਉਪ੍ਪਨ੍ਨਾਪਿ ਸਮ੍ਮਦੇਵ ਅਤ੍ਤਨੋ ਕਿਚ੍ਚਂ ਕਾਤੁਂ ਅਸਮਤ੍ਥਤਾਯ ਅਨੁਪ੍ਪਨ੍ਨਸਦਿਸਾਤਿ ਪਟਿਪਕ੍ਖਨਿਵਾਰਣੇਨ ਕੁਸਲਾਨਂ ਧਮ੍ਮਾਨਂ ਕਿਚ੍ਚਕਰਣਭਾਵਂ ਦਸ੍ਸੇਤੁਂ ‘‘ਮਨਚ੍ਛਟ੍ਠਾਨਿ…ਪੇ… ਭਵਿਸ੍ਸਤੀ’’ਤਿ ਵੁਤ੍ਤਂ. ਵਿਹਰਨ੍ਤਸ੍ਸਾਤਿ ਵਿਹਰਣਹੇਤੁ. ਵਿਹਰਨ੍ਤੋਤਿ ਏਤ੍ਥਾਪਿ ਏਸੇਵ ਨਯੋ, ਤੇਨ ਰਕ੍ਖਿਤਚਿਤ੍ਤਤਾ ਵੁਤ੍ਤਨਯੇਨ ਏਕਨ੍ਤਤੋ ਸਮ੍ਮਾਸਙ੍ਕਪ੍ਪਗੋਚਰਤਾਯ ਚ ਸਂਵਤ੍ਤਤੀਤਿ ਦਸ੍ਸੇਤਿ. ਵੁਤ੍ਤਨਯੇਨਾਤਿ ਮਿਚ੍ਛਾਸਙ੍ਕਪ੍ਪਾਨਂ ਅਵਸਰਂ ਅਦਤ੍ਵਾ ਵਿਸੋਧਿਤਨੇਕ੍ਖਮ੍ਮਾਦਿਵਿਤਕ੍ਕਤਾਯ. ਅਵਿਪਰੀਤਮੇਵਾਤਿ ਕਾਯਾਦਿਅਸੁਭਾਦਿਤੋ ਆਦਾਨਂ. ਵਿਨਿਪਾਤਭਯਨ੍ਤਿ ਦੁਗ੍ਗਤਿਭਯਂ. ਸਬ੍ਬੋਪਿ ਚਾਯਮਤ੍ਥੋਤਿ ‘‘ਸਮ੍ਮਾਸਙ੍ਕਪ੍ਪਗੋਚਰੋ ਸਮ੍ਮਾਦਿਟ੍ਠਿ ਭਵਿਸ੍ਸਤੀ’’ਤਿਆਦੀਸੁ ਅਤ੍ਥੋ ਯੁਤ੍ਤਿਯਾ ਯੁਤ੍ਤੋ ਏਵ ਅਨਰੂਪਕਾਰਣਭਾਵਤੋ.

ਯੁਤ੍ਤਿਹਾਰਸਮ੍ਪਾਤਵਣ੍ਣਨਾ ਨਿਟ੍ਠਿਤਾ.