੨. ਵਿਚਯਹਾਰਸਮ੍ਪਾਤਵਣ੍ਣਨਾ

੫੩. ਕੁਸਲਧਮ੍ਮਾਰਮ੍ਮਣਾਤਿ ਕੁਸਲਧਮ੍ਮੇ ਉਦ੍ਦਿਸ੍ਸ ਪਵਤ੍ਤਿਮਤ੍ਤਂ ਸਨ੍ਧਾਯ ਵੁਤ੍ਤਂ, ਨ ਤੇਸਂ ਆਰਮ੍ਮਣਪਚ੍ਚਯਤਂ ਇਧ ‘‘ਕੁਸਲਾ ਧਮ੍ਮਾ’’ਤਿ ਲੋਕੁਤ੍ਤਰਧਮ੍ਮਾਨਂ ਅਧਿਪ੍ਪੇਤਤ੍ਤਾ. ਨ ਹਿ ਕਦਾਚਿ ਅਨੁਪਾਦਾਨਿਯਾ ਧਮ੍ਮਾ ਉਪਾਦਾਨਾਰਮ੍ਮਣਾ ਹੋਨ੍ਤਿ. ਫਲਧਮ੍ਮੇ ਉਦ੍ਦਿਸ੍ਸ ਪਵਤ੍ਤਾਯ ਤਣ੍ਹਾਯ ਗਹਿਤਤ੍ਤਾ ‘‘ਕੁਸਲ…ਪੇ… ਦਟ੍ਠਬ੍ਬੋ’’ਤਿ ਵੁਤ੍ਤਂ. ਦੇਸਨਾਹਾਰੇਤਿ ਦੇਸਨਾਹਾਰਸਮ੍ਪਾਤੇ. ਕਥਂ ਪਨ ਕੁਸਲਭਾਵੋਤਿ ‘‘ਕੁਸਲਾ’’ਤਿ ਵਚਨਮਤ੍ਤਂ ਗਹੇਤ੍ਵਾ ਚੋਦੇਤਿ, ਤਞ੍ਚ ਨਿਦਸ੍ਸਨਮਤ੍ਤਂ ਦਟ੍ਠਬ੍ਬਂ, ਪਹਾਨਹੇਤੁਭਾਵੋਪਿਸ੍ਸਾ ਸਿਯਾ ਚੋਦਕੇਨ ਸਮ੍ਪਟਿਚ੍ਛਿਤੋਵ. ‘‘ਮਾਨੋਪਿ ਦੁਵਿਧੋ’’ਤਿਆਦਿਨਾ ਮਾਨਸ੍ਸ ਚ ਤਸ੍ਸਾ ਤਣ੍ਹਾਯ ਚ ਸੇਵਿਤਬ੍ਬਭਾਵੋ ਅਕੁਸਲਾਨਂ ਪਹਾਨਾਯ, ਕੁਸਲਾਨਂ ਉਪ੍ਪਤ੍ਤਿਯਾ ਚ ਪਚ੍ਚਯਭਾਵਤੋ.

ਨੇਕ੍ਖਮ੍ਮਸ੍ਸਿਤਂ ਦੋਮਨਸ੍ਸਂ ਨਾਮ ‘‘ਅਰਿਯਭੂਮਿਂ ਪਾਪੁਣਿਤੁਂ ਨਾਸਕ੍ਖਿ’’ਨ੍ਤਿ ਅਨੁਸੋਚਤੋ ਉਪ੍ਪਨ੍ਨਂ ਦੋਮਨਸ੍ਸਨ੍ਤਿ ਸਮ੍ਬਨ੍ਧੋ. ਏਵਨ੍ਤਿ ਇਮਿਨਾ ਪਾਲ਼ਿਯਂ ਵੁਤ੍ਤਪ੍ਪਕਾਰੇਨ, ਪਿਹਂ ਉਪਟ੍ਠਪੇਤ੍ਵਾ ਛਸੁ ਦ੍ਵਾਰੇਸੁ ਇਟ੍ਠਾਰਮ੍ਮਣੇ ਆਪਾਥਗਤੇ ਅਨਿਚ੍ਚਾਦਿਵਸੇਨ ਵਿਪਸ੍ਸਨਂ ਪਟ੍ਠਪੇਤ੍ਵਾਤਿ ਯੋਜਨਾ. ਇਟ੍ਠਾਰਮ੍ਮਣਞ੍ਚੇਤ੍ਥ ਯਥਾਵੁਤ੍ਤਅਨੁਸੋਚਨਦੋਮਨਸ੍ਸੁਪ੍ਪਤ੍ਤੀਨਂ ਯਥਾਭਿਨਿਵਿਟ੍ਠਸ੍ਸ ਆਰਮ੍ਮਣਸ੍ਸ ਅਨਿਟ੍ਠਤਾਯਾਤਿ ਦਸ੍ਸਨਤ੍ਥਂ. ‘‘ਕਥਂ ਨੇਕ੍ਖਮ੍ਮਵਸੇਨਾ’’ਤਿ ਪਦਸ੍ਸ ਅਤ੍ਥਂ ਵਿਵਰਿਤੁਂ ‘‘ਵਿਪਸ੍ਸਨਾਵਸੇਨਾ’’ਤਿਆਦਿ ਵੁਤ੍ਤਂ. ਵਿਪਸ੍ਸਨਾਦਿਵਿਨਿਮੁਤ੍ਤਾ ਵਾ ਪਠਮਜ੍ਝਾਨਾਦਿਵਸੇਨ ਵੁਤ੍ਤਾ ਕੁਸਲਾ ਧਮ੍ਮਾ ਇਧ ਨੇਕ੍ਖਮ੍ਮਂ. ਅਨੁਸ੍ਸਤਿਗ੍ਗਹਣੇਨ ਉਪਚਾਰਜ੍ਝਾਨਮੇਵ ਗਹਿਤਨ੍ਤਿ ‘‘ਪਠਮਜ੍ਝਾਨਾਦਿਵਸੇਨਾ’’ਤਿ ਵੁਤ੍ਤਂ. ਆਦਿਸਦ੍ਦੇਨ ਦੁਤਿਯਜ੍ਝਾਨਤੋ ਪਟ੍ਠਾਯ ਯਾਵ ਅਗ੍ਗਫਲਾ ਉਪਰਿਵਿਸੇਸਾ ਸਙ੍ਗਹਿਤਾ. ਯਾਯ ਪਞ੍ਞਾਵਿਮੁਤ੍ਤਿਯਾ.

ਉਪੇਕ੍ਖਾਸਤਿਪਾਰਿਸੁਦ੍ਧਿਭਾਵੇਨਾਤਿ ਉਪੇਕ੍ਖਾਜਨਿਤਸਤਿਪਾਰਿਸੁਦ੍ਧਿਸਬ੍ਭਾਵੇਨ. ਕਮ੍ਮਯੋਗ੍ਗਨ੍ਤਿ ਵਿਪਸ੍ਸਨਾਭਾਵਨਾਦਿਕਮ੍ਮਸ੍ਸ ਯੋਗ੍ਗਂ ਅਨੁਰੂਪਂ ਅਨੁਚ੍ਛਵਿਕਂ. ਅਸ੍ਸਦ੍ਧਿਯੇਤਿ ਅਸ੍ਸਦ੍ਧਿਯਹੇਤੁ, ‘‘ਅਸ੍ਸਦ੍ਧਿਯੇਨਾ’’ਤਿਪਿ ਪਠਨ੍ਤਿ, ਸੋ ਏਵਤ੍ਥੋ. ਓਭਾਸਗਤਨ੍ਤਿ ਞਾਣੋਭਾਸਗਤਂ. ਕਾਮਂ ਪੁਬ੍ਬੇਪਿ ਪਞ੍ਞਾ ਵੁਤ੍ਤਾ, ਅਸ੍ਸਦ੍ਧਿਯਾਦੀਹਿ ਪਨ ਅਞ੍ਞੇਸਂ ਕਿਲੇਸਾਨਂ ਵਿਧਮਨਮ੍ਪਿ ਪਞ੍ਞਾਯ ਏਵ ਹੋਤਿ, ਸਾ ਚ ਏਵਂਭੂਤਾਤਿ ਦਸ੍ਸਨਤ੍ਥਂ ‘‘ਓਭਾਸਗਤਂ ਕਿਲੇਸਨ੍ਧਕਾਰੇ ਨ ਇਞ੍ਜਤੀ’’ਤਿ ਵੁਤ੍ਤਂ.

ਕੋਪੋ ਕੋਧੋ. ਅਪ੍ਪਚ੍ਚਯੋ ਦੋਮਨਸ੍ਸਂ. ਇਦ੍ਧਿਵਿਧਞਾਣਾਦਿਕਾ ਛ ਅਭਿਞ੍ਞਾ ਪਾਕਟਾ ਏਵਾਤਿ ‘‘ਦ੍ਵੇ ਚ ਵਿਸੇਸੇ’’ਤਿ ਵੁਤ੍ਤਧਮ੍ਮੇ ਦਸ੍ਸੇਤੁਂ ‘‘ਮਨੋਮਯਿਦ੍ਧਿ, ਵਿਪਸ੍ਸਨਾਞਾਣਞ੍ਚਾ’’ਤਿ ਆਹ. ਅਙ੍ਗਣਾਨਿ ਰਾਗਾਦਯੋ. ਉਪਕ੍ਕਿਲੇਸਾ ਅਭਿਜ੍ਝਾਵਿਸਮਲੋਭਾਦਯੋ. ਅਨੁਲੋਮਨਂ ਤਦੇਕਟ੍ਠਤਾ. ਫਨ੍ਦਨਾ ਦੁਬ੍ਬਲਾ ਵਿਕ੍ਖੇਪਪ੍ਪਵਤ੍ਤਿ. ਬਲਵਤੀ ਅਨਵਟ੍ਠਾਨਂ. ਸਬ੍ਬੋ ਮਿਚ੍ਛਾਭਿਨਿਵੇਸੋ ਅਯੋਨਿਸੋਮਨਸਿਕਾਰੇਨ ਹੋਤਿ, ਮਿਚ੍ਛਾਵਿਤਕ੍ਕੇਨ ਚ. ਤਤ੍ਥ ਅਯੋਨਿਸੋਮਨਸਿਕਾਰੋ ਅਕੁਸਲਚਿਤ੍ਤੁਪ੍ਪਾਦੋ ਤਪ੍ਪਰਿਯਾਪਨ੍ਨੋ ਮਿਚ੍ਛਾਵਿਤਕ੍ਕੋ ਵਿਕ੍ਖੇਪਸਹਿਤੋ ਏਵਾਤਿ ਵੁਤ੍ਤਂ ‘‘ਮਿਚ੍ਛਾਭਿਨਿਵੇਸਹੇਤੁਤਾਯ ਦਿਟ੍ਠਿਪਕ੍ਖੋ’’ਤਿ ਵੁਤ੍ਤਞ੍ਹੇਤਂ ‘‘ਵਿਤਕ੍ਕੋਪਿ ਦਿਟ੍ਠਿਟ੍ਠਾਨਂ, ਅਯੋਨਿਸੋ ਮਨਸਿਕਾਰੋਪਿ ਦਿਟ੍ਠਿਟ੍ਠਾਨ’’ਨ੍ਤਿ (ਪਟਿ. ਮ. ੧.੧੨੪).

ਅਥ ਵਾ ਇਞ੍ਜਨਾਤਿ ਫਨ੍ਦਨਾ, ਦਿਟ੍ਠਪਰਿਤ੍ਤਾਸੋ. ਯਥਾਹ ‘‘ਤਦਪਿ ਤੇਸਂ ਭਵਤਂ ਸਮਣਬ੍ਰਾਹ੍ਮਣਾਨਂ ਅਜਾਨਤਂ ਅਪਸ੍ਸਤਂ ਵੇਦਯਿਤਂ ਤਣ੍ਹਾਗਤਾਨਂ ਪਰਿਤਸ੍ਸਿਤਵਿਪ੍ਫਨ੍ਦਿਤਮੇਵਾ’’ਤਿ (ਦੀ. ਨਿ. ੧.੧੦੫ ਆਦਯੋ). ਅਟ੍ਠਿਤੀਤਿ ਅਨਵਟ੍ਠਾਨਂ, ਦਿਟ੍ਠਿਵਿਤਕ੍ਕੋ. ਤੇਨ ਹਿ ਪੁਥੁਜ੍ਜਨੋ ਕਾਲੇ ਸਸ੍ਸਤਂ, ਕਾਲੇ ਉਚ੍ਛੇਦਨ੍ਤਿ ਤਂ ਤਂ ਦਿਟ੍ਠਿਗ੍ਗਹਣਂ ਪਕ੍ਖਨ੍ਦਨ੍ਤੋ ਸਤ੍ਤਤੋ ਪਰਿਬ੍ਭਟ੍ਠਅਨ੍ਧੋ ਵਿਯ, ਸਮੁਦ੍ਦੇ ਵਿਸ੍ਸਟ੍ਠਵਾਹਨਿਕਾ ਵਿਯ, ਯਨ੍ਤੇ ਯੁਤ੍ਤਗੋਣੋ ਵਿਯ ਚ ਤਥਾ ਤਥਾ ਪਰਿਬ੍ਭਮਤਿ. ਤੇਨਾਹ ‘‘ਦਿਟ੍ਠਿਯੋਪਿ ਦਿਟ੍ਠਿਟ੍ਠਾਨਂ, ਵਿਤਕ੍ਕੋਪਿ ਦਿਟ੍ਠਿਟ੍ਠਾਨ’’ਨ੍ਤਿ (ਪਟਿ. ਮ. ੧.੧੨੪) ਚ. ਏਤਸ੍ਮਿਞ੍ਚ ਪਕ੍ਖੇ ਮਿਚ੍ਛਾਭਿਨਿਵੇਸਤਾਯ, ਮਿਚ੍ਛਾਭਿਨਿਵੇਸਹੇਤੁਤਾਯ ਚ ਤਸ੍ਸਾ ਦ੍ਵੇ ਪਕ੍ਖਾਤਿ ਏਕਦੇਸਸਰੂਪੇਕਸੇਸੋ ਕਤੋਤਿ ਵੇਦਿਤਬ੍ਬਂ.

‘‘ਏਵ’’ਨ੍ਤਿਆਦਿਨਾ ‘‘ਸੋ ਉਪਰਿਮ’’ਨ੍ਤਿਆਦਿਪਾਲ਼ਿਯਂ ਸਮ੍ਬਨ੍ਧਂ ਦਸ੍ਸੇਤਿ. ਪਟਿਘਸਞ੍ਞਾਤਿ ਭੁਮ੍ਮਤ੍ਥੇ ਪਚ੍ਚਤ੍ਤਵਚਨਨ੍ਤਿ ਦਸ੍ਸੇਨ੍ਤੋ ‘‘ਪਟਿਘ…ਪੇ… ਸਞ੍ਞਾਸੂ’’ਤਿ ਆਹ. ਰੂਪਾਵਚਰਸਞ੍ਞਾਤਿ ਸਞ੍ਞਾਸੀਸੇਨ ਰੂਪਾਵਚਰਜ੍ਝਾਨਾਨਿ ਵਦਤਿ. ਨਾਨਤ੍ਤਸਞ੍ਞਾਤਿ ਨਾਨਾਸਭਾਵਾ, ਨਾਨਾਸਭਾਵੇ ਵਾ ਆਰਮ੍ਮਣੇ ਸਞ੍ਞਾ. ਠਪੇਤ੍ਵਾ ਪਟਿਘਸਞ੍ਞਾ ਅਵਸਿਟ੍ਠਕਾਮਾਵਚਰਸਞ੍ਞਾ ਹੇਤਾ. ਤਾ ਸਮਤਿਕ੍ਕਮਤੀਤਿ ਤਾ ਰੂਪਸਞ੍ਞਾਨਾਨਤ੍ਤਸਞ੍ਞਾਯੋ ਆਰਮ੍ਮਣੇਹਿ ਸਦ੍ਧਿਂ ਸਮ੍ਮਦੇਵ ਅਤਿਕ੍ਕਮਤਿ.

ਰੂਪਾਵਚਰਜ੍ਝਾਨੋਭਾਸੋਪਿ ਕਸਿਣਾਰਮ੍ਮਣਾ. ਕਸਿਣਨਿਸ੍ਸਨ੍ਦੋ ਹਿ ਆਰੁਪ੍ਪਜ੍ਝਾਨੁਪ੍ਪਤ੍ਤਿ. ਦਸ੍ਸਨਨ੍ਤਿ ਕਸਿਣਰੂਪਾਨਂ ਦਸ੍ਸਨਂ. ਅਭਿਜ੍ਝਾਬ੍ਯਾਪਾਦਪ੍ਪਹਾਨੇਨ ਸਦ੍ਧਿਂ ਵੀਰਿਯਾਰਮ੍ਭੋ ਉਪਕਾਰਕੋ ਸਮਥੋ ਸਤਿਪਸ੍ਸਦ੍ਧਿਯੋ ਪਰਿਕ੍ਖਾਰਙ੍ਗਤਾ ਵੁਤ੍ਤਾ ਏਵ. ਸਤਿਰਹਿਤਂ ਸਮ੍ਮਸਨਂ ਨਾਮ ਨਤ੍ਥੀਤਿ ‘‘ਯਾ ਉਪਟ੍ਠਿਤਾ ਸਤਿ ਅਸਮ੍ਮੁਟ੍ਠਾ, ਅਯਂ ਵਿਪਸ੍ਸਨਾ’’ਤਿ ਵੁਤ੍ਤਂ. ਤੇਨ ਸਤਿਸੀਸੇਨ ਵਿਪਸ੍ਸਨਾ ਗਹਿਤਾਤਿ ਦਸ੍ਸੇਤਿ. ਸਮ੍ਮੋਸਾਨਂ ਪਹਾਨਮਾਹਾਤਿ ਸਮ੍ਬਨ੍ਧੋ.

੫੪. ਪਚ੍ਚੁਪ੍ਪਨ੍ਨਸੁਖਆਯਤਿਸੁਖਵਿਪਾਕਕਿਰਿਯਨਿਰਾਮਿਸਅਕਾਪੁਰਿਸਸੇਵਿਤਭਾਵੇਹਿ ਏਵ ਸੇਸਾ ਪਾਲ਼ਿਯਂ ਏਤਸ੍ਸ ਸਮਾਧਿਸ੍ਸ ਸਨ੍ਤਪਣੀਤਤਾਦਿਵਿਸੇਸਾ ਵੁਤ੍ਤਾ, ਤੇਪਿ ਇਧ ਸਙ੍ਗਹਿਤਾਤਿ ਤੇਸਂ ਪਦਾਨਂ ਅਤ੍ਥਂ ਦਸ੍ਸੇਨ੍ਤੋ ‘‘ਅਙ੍ਗਸਨ੍ਤਤਾਯਾ’’ਤਿਆਦਿਮਾਹ. ਤਤ੍ਥ ਅਙ੍ਗਸਨ੍ਤਤਾਯਾਤਿ ਫਲਝਾਨਙ੍ਗਾਨਂ ਉਪਸਨ੍ਤਤਾਯ. ਕਿਲੇਸਦਰਥਸਨ੍ਤਤਾਯਾਤਿ ਕਿਲੇਸਦਰਥਪਟਿਪ੍ਪਸ੍ਸਦ੍ਧਿਯਾ. ਪਣੀਤੋਤਿ ਉਲ਼ਾਰੋ. ਏਕੋਦਿਭਾਵੇਨਾਤਿ ਮਗ੍ਗਸਮਾਧਿਸਙ੍ਖਾਤੇਨ ਏਕੋਦਿਭਾਵੇਨ. ਏਕੋਦਿਭਾਵਨ੍ਤਿ ਸਮਾਧਾਨਂ. ਲੋਕਿਯਸਮਾਧਿਸ੍ਸ ਪਚ੍ਚਨੀਕਨੀਵਰਣਪਠਮਜ੍ਝਾਨਨਿਕਨ੍ਤਿਆਦੀਨਿ ਨਿਗ੍ਗਹੇਤਬ੍ਬਾਨਿ, ਅਞ੍ਞੇ ਚ ਕਿਲੇਸਾ ਵਾਰੇਤਬ੍ਬਾ. ਇਮਸ੍ਸ ਪਨ ਅਰਹਤ੍ਤਸਮਾਧਿਸ੍ਸ ਪਟਿਪ੍ਪਸ੍ਸਦ੍ਧਕਿਲੇਸਤ੍ਤਾ ਨ ਨਿਗ੍ਗਹੇਤਬ੍ਬਂ, ਵਾਰੇਤਬ੍ਬਞ੍ਚ ਅਤ੍ਥੀਤਿ ਸੋ ਮਗ੍ਗਾਨਨ੍ਤਰਂ ਸਮਾਪਤ੍ਤਿਕ੍ਖਣੇਵ ਅਪ੍ਪਯੋਗੇਨੇਵ ਅਧਿਗਤਤ੍ਤਾ, ਠਿਤਤ੍ਤਾ ਚ ਅਪਰਿਹਾਨਿਵਸੇਨ ਵਾ ਅਧਿਗਤਤ੍ਤਾ ਨਸਸਙ੍ਖਾਰਨਿਗ੍ਗਯ੍ਹਵਾਰਿਤਗਤੋ.

‘‘ਸਤਿਵੇਪੁਲ੍ਲਪ੍ਪਤ੍ਤੋ’’ਤਿ ਏਤੇਨ ਅਪ੍ਪਵਤ੍ਤਮਾਨਾਯਪਿ ਸਤਿਯਾ ਸਤਿਬਹੁਲਤਾਯ ਸਤੋ ਏਵ ਨਾਮਾਤਿ ਦਸ੍ਸੇਤਿ. ‘‘ਯਥਾਪਰਿਚ੍ਛਿਨ੍ਨਕਾਲਵਸੇਨਾ’’ਤਿ ਏਤੇਨ ਪਰਿਚ੍ਛਿਨ੍ਨਸਤਿਯਾ ਸਤੋਤਿ ਦਸ੍ਸੇਤਿ.

ਵਕ੍ਖਮਾਨੇਨਾਤਿ ‘‘ਪੀਤਿਫਰਣਾ’’ਤਿਆਦਿਨਾ ਅਨਨ੍ਤਰਂ ਵਕ੍ਖਮਾਨੇਨ. ‘‘ਪੀਤਿਫਰਣਤਾ’’ਤਿ ਪਨ ਪਾਲ਼ਿ ਆਗਤਾ. ਤਂ ‘‘ਪਞ੍ਚਙ੍ਗਿਕੋ ਸਮ੍ਮਾਸਮਾਧੀ’’ਤਿ (ਦੀ. ਨਿ. ੩.੩੫੫) ਸਮਾਧਿਅਙ੍ਗਭਾਵੇਨ ਪਞ੍ਞਾ ਉਦ੍ਦਿਟ੍ਠਾਤਿ ਕਤ੍ਵਾ ਵੁਤ੍ਤਂ. ਤਤੋ ਏਵ ਅਟ੍ਠਕਥਾਯਂ ‘‘ਪੀਤਿਫਰਣਤਾ’’ਤਿਆਦੀਨਞ੍ਚ ਅਤ੍ਥਸਂਵਣ੍ਣਨਾ ਕਤਾ. ਤਤ੍ਥ ‘‘ਸੋ ਇਮਮੇਵ ਕਾਯਂ ਵਿਵੇਕਜੇਨ ਪੀਤਿਸੁਖੇਨ ਅਭਿਸਨ੍ਦੇਤੀ’’ਤਿਆਦਿਨਾ (ਦੀ. ਨਿ. ੧.੨੨੬) ਨਯੇਨ ਪੀਤਿਯਾ, ਸੁਖਸ੍ਸ ਚ ਫਰਣਂ ਵੇਦਿਤਬ੍ਬਂ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਸਮਾਧਿਵਸੇਨ ਸਮਥੋ ਉਦ੍ਧਟੋਤਿ ਸਭਾਵਵਸੇਨ ਸਮਥੋ ਉਦ੍ਧਟੋ, ਨ ਉਪਕਾਰਕਧਮ੍ਮਵਸੇਨਾਤਿ ਅਧਿਪ੍ਪਾਯੋ.

੫੫. ਰਾਗਪਟਿਪਕ੍ਖਤ੍ਤਾ ਸਮਾਧਿਸ੍ਸ ‘‘ਅਧਿਚਿਤ੍ਤਸਿਕ੍ਖਾਯ ਸਿਕ੍ਖਨ੍ਤੋ’’ਤਿ ਵੁਤ੍ਤਂ. ਵੁਤ੍ਤਨਯਾਨੁਸਾਰੇਨਾਤਿ ‘‘ਸੁਖਪਣਿਧਿਆਦਿਸਮੁਗ੍ਘਾਟਨੇਨ ਅਪ੍ਪਣਿਹਿਤੋ’’ਤਿਆਦਿਨਾ. ਏਤ੍ਥ ਚ ਸਙ੍ਖਾਰਾਨਂ ਖਣਭਙ੍ਗੁਰਤਂ ਸਮ੍ਮਦੇਵ ਪਸ੍ਸਨ੍ਤਸ੍ਸ ਨ ਰਾਗੋ ਪਤਿਟ੍ਠਂ ਲਭਤੀਤਿ ਅਨਿਚ੍ਚਾਨੁਪਸ੍ਸਨਾ ਰਾਗਚਰਿਤਸ੍ਸ ਸਪ੍ਪਾਯਾ ਵੁਤ੍ਤਾ, ਤਥਾ ਸਙ੍ਖਾਰਾਨਂ ਸਭਾਵਦੁਕ੍ਖਤਂ ਸਮ੍ਮਦੇਵ ਪਸ੍ਸਨ੍ਤਸ੍ਸ ਪਕਤਿਯਾਪਿ ਦੁਕ੍ਖਿਤੇਸੁ ਦੁਕ੍ਖੁਪ੍ਪਾਦਨਂ ਵਣੇ ਖਾਰੋਦਕਸੇਕਸਦਿਸਨ੍ਤਿ ਨ ਦੋਸੋ ਪਤਿਟ੍ਠਂ ਲਭਤੀਤਿ ਦੁਕ੍ਖਾਨੁਪਸ੍ਸਨਾ ਦੋਸਚਰਿਤਸ੍ਸ ਸਪ੍ਪਾਯਾ ਵੁਤ੍ਤਾ, ਤਥਾ ਸਙ੍ਖਾਰੇਸੁ ਸਮ੍ਮਦੇਵ ਘਨਵਿਨਿਬ੍ਭੋਗੇ ਕਤੇ ਅਤ੍ਤਸੁਞ੍ਞਤਾਯ ਉਪਟ੍ਠਹਮਾਨਾਯ ਨ ਮੋਹੋ ਪਤਿਟ੍ਠਂ ਲਭਤੀਤਿ ਅਨਤ੍ਤਾਨੁਪਸ੍ਸਨਾ ਮੋਹਚਰਿਤਸ੍ਸ ਸਪ੍ਪਾਯਾ ਵੁਤ੍ਤਾਤਿ ਵੇਦਿਤਬ੍ਬਂ. ਰਾਗਪਟਿਪਕ੍ਖਤ੍ਤਾ ਸਮਾਧਿਸ੍ਸ ‘‘ਅਧਿਚਿਤ੍ਤਸਿਕ੍ਖਾਯ ਸਿਕ੍ਖਨ੍ਤੋ’’ਤਿ ਵੁਤ੍ਤਂ. ਏਸ ਨਯੋ ਇਤਰੇਸੁ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਂ.

ਖਨ੍ਤਿਬਹੁਲੋ ਉਪ੍ਪਨ੍ਨਂ ਅਰਤਿਂ ਅਨਭਿਰਤਿਂ ਅਭਿਭੁਯ੍ਯ ਵਿਹਰਨ੍ਤੋ ਸੁਖੇਨ ਸਮਾਧਿਂ ਅਧਿਗਚ੍ਛਤੀਤਿ ਖਨ੍ਤਿਪ੍ਪਧਾਨਤਾਪਿ ਸਮਥਪਕ੍ਖਭਜਨਸ੍ਸ ਕਾਰਣਂ ਵੁਤ੍ਤਾ. ਉਟ੍ਠਾਨਂ ਸਮ੍ਪਜ੍ਜਤੀਤਿ ਸਮ੍ਪਨ੍ਨਕਾਯਿਕਵੀਰਿਯਂ. ਸਮ੍ਮਾਕਮ੍ਮਨ੍ਤਵਾਯਾਮਾਨਂ ਯੋ ਕਾਯਿਕਾਦਿਵਿਕਪ੍ਪੋ ਵੁਤ੍ਤੋ ਪਾਲ਼ਿਯਂ, ਸੋ ਨੇਸਂ ਕਾਯਿਕਸ੍ਸ ਪਯੋਗਸ੍ਸ ਸਮੁਟ੍ਠਾਨਵਸੇਨ ਵੇਦਿਤਬ੍ਬੋ.

‘‘ਖਿਪ੍ਪਾਧਿਗਮੋ’’ਤਿ ਇਮਿਨਾ ਮਗ੍ਗਾਸੇਵਨਭਾਵਂ ਦਸ੍ਸੇਤਿ. ‘‘ਵਿਪਸ੍ਸਨਾਯ ਵਿਮੁਤ੍ਤਾਧਿਗਮੋ’’ਤਿ ਇਮਿਨਾ ਵਿਪਸ੍ਸਨਾਨੁਭਾਵੇਨ ਸਮੁਚ੍ਛੇਦਵਿਮੁਤ੍ਤਿ ਵਿਕ੍ਖਮ੍ਭਨਵਿਮੁਤ੍ਤਿ ਵਿਯ ਸਮਥਾਨੁਭਾਵੇਨਾਤਿ ਦਸ੍ਸੇਤਿ. ਲੋਕਿਯੇਹੀਤਿ ਨਿਸ੍ਸਕ੍ਕਵਚਨਂ. ਮਹਨ੍ਤਾਨਨ੍ਤਿ ਉਲ਼ਾਰਾਨਂ, ਪਣੀਤਾਨਨ੍ਤਿ ਅਤ੍ਥੋ.

੫੬. ਤਨ੍ਤਿ ਵਿਚਯਹਾਰਂ. ਵਿਸਂਵਾਦਨਹੇਤੂਨਂ ਲੋਭਾਦੀਨਂ ਪਾਪਧਮ੍ਮਾਨਂ. ਸੋਧੇਨ੍ਤੋਤਿ ਯਥਾ ਸਰਣਾਦਿਵਿਸਯਾ ਅਞ੍ਞਾਣਾਦਿਸਂਕਿਲੇਸਾ ਨ ਪਵਤ੍ਤਨ੍ਤਿ, ਏਵਂ ਸੋਧੇਨ੍ਤੋ. ਪਰਿਪੂਰੇਨ੍ਤਾਤਿ ਯਥਾ ਸੀਲਂ ਅਖਣ੍ਡਾਦਿਭਾਵੇਨ ਪਰਿਪੁਣ੍ਣਂ ਹੋਤਿ ਅਨੂਨਂ, ਏਵਂ ਪਰਿਪੂਰੇਨ੍ਤਾ.

‘‘ਤਥਾ ਪਟਿਪਜ੍ਜਨ੍ਤੋ’’ਤਿ ਇਮਿਨਾ ਸਤ੍ਥੁ ਮਹਾਪਤਿਕਾਰਭਾਵੋ ਪਰਿਪੁਣ੍ਣੋ ਦਸ੍ਸਿਤੋਤਿ ਪਠਮਵਾਦੇ ‘‘ਦਸ੍ਸਨਾਭੂਮਿਞ੍ਚ ਭਾਵਨਾਭੂਮਿਞ੍ਚਾ’’ਤਿ ਵੁਤ੍ਤਂ.

ਯਸ੍ਸ ਅਤ੍ਥਾਯਾਤਿ ਯਸ੍ਸ ਯਸ੍ਸ ਪਹਾਨਤ੍ਥਾਯ. ਤਥਾ ਪਟਿਪਨ੍ਨਸ੍ਸਾਤਿ ਯਥਾ ਅਸੁਭਜ੍ਝਾਨਾਦਿਂ ਪਾਦਕਂ ਕਤ੍ਵਾ ਅਨਾਗਾਮਿਮਗ੍ਗਾਦਿਅਧਿਗਮੋ ਹੋਤਿ, ਤਥਾ ਪਟਿਪਨ੍ਨਸ੍ਸ.

ਵਧਿਤਨ੍ਤਿ ਘਾਤਿਤਂ.

‘‘ਮਨੁਸ੍ਸਭੂਤੋ’’ਤਿ ਇਦਂ ਪੁਬ੍ਬਾਪਰਾਪੇਕ੍ਖਂ ਕਤ੍ਵਾ ‘‘ਪਿਤਾ ਮਨੁਸ੍ਸਭੂਤੋ ਖੀਣਾਸਵੋ’’ਤਿ ਚ ਤਥਾ ‘‘ਮਾਤਾ ਮਨੁਸ੍ਸਭੂਤਾ’’ਤਿ ਯੋਜੇਤਬ੍ਬਂ. ਭੇਦਾਨੁਰੂਪਸ੍ਸ ਸਾਵਨਂ ਅਨੁਸ੍ਸਾਵਨਂ, ਭੇਦਾਨੁਰੂਪੇਨ ਵਾ ਵਚਨੇਨ ਵਿਞ੍ਞਾਪਨਂ.

੫੭. ਮਨੁਸ੍ਸਤ੍ਤਨ੍ਤਿ ਮਨੁਸ੍ਸਜਾਤਿਤਾ. ਲਿਙ੍ਗਸਮ੍ਪਤ੍ਤੀਤਿ ਪੁਰਿਸਭਾਵੋ. ਹੇਤੂਤਿ ਮਨੋਵਚੀਪਣਿਧਾਨਸਿਦ੍ਧਿਯਾ ਸਦ੍ਧਿਂ ਪੁਬ੍ਬਹੇਤੁਸਮ੍ਪਦਾ. ਸਤ੍ਥਾਰਦਸ੍ਸਨਨ੍ਤਿ ਸਤ੍ਥੁ ਸਮ੍ਮੁਖੀਭਾਵੋ. ਗੁਣਸਮ੍ਪਤ੍ਤੀਤਿ ਅਭਿਞ੍ਞਾਸਮਾਪਤ੍ਤਿਲਾਭੋ. ਅਧਿਕਾਰੋਤਿ ਅਤ੍ਤਨੋ ਸਰੀਰਨਿਰਪੇਕ੍ਖਂ ਸਤ੍ਥੁ ਉਪਕਾਰਕਰਣਂ. ਛਨ੍ਦਤਾਤਿ ਬੁਦ੍ਧਭਾਵਾਯ ਦਲ਼੍ਹਚ੍ਛਨ੍ਦਤਾ ਅਨਿਵਤ੍ਤਿਧਮ੍ਮਤਾ.

ਨ ਉਪ੍ਪਜ੍ਜਨ੍ਤੀਤਿ ਪਨ ਅਤ੍ਥੀਤਿ ‘‘ਨ ਮੇ ਆਚਰਿਯੋ ਅਤ੍ਥਿ, ਸਦਿਸੋ ਮੇ ਨ ਵਿਜ੍ਜਤੀ’’ਤਿਆਦਿ (ਮ. ਨਿ. ੧.੨੮੫; ੨.੩੪੧; ਕਥਾ. ੪੦੫; ਮਹਾਵ. ੧੧; ਮਿ. ਪ. ੪.੫.੧੧) ਇਮਿਸ੍ਸਾ ਲੋਕਧਾਤੁਯਾ ਠਤ੍ਵਾ ਵਦਨ੍ਤੇਨ ਭਗਵਤਾ ‘‘ਕਿਂ ਪਨਾਵੁਸੋ ਸਾਰਿਪੁਤ੍ਤ, ਅਤ੍ਥੇਤਰਹਿ ਅਞ੍ਞੋ ਸਮਣੋ ਵਾ ਬ੍ਰਾਹ੍ਮਣੋ ਵਾ ਭਗਵਤੋ ਸਮਸਮੋ ਸਮ੍ਬੋਧਿਯਨ੍ਤਿ ਏਵਂ ਪੁਟ੍ਠੋ ਅਹਂ, ਭਨ੍ਤੇ, ‘ਨੋ’ਤਿ ਵਦੇਯ੍ਯ’’ਨ੍ਤਿ (ਦੀ. ਨਿ. ੩.੧੬੧) ਵਤ੍ਵਾ ਤਸ੍ਸ ਕਾਰਣਂ ਦਸ੍ਸੇਤੁਂ ‘‘ਅਟ੍ਠਾਨਮੇਤਂ ਅਨਵਕਾਸੋ, ਯਂ ਏਕਿਸ੍ਸਾ ਲੋਕਧਾਤੁਯਾ ਦ੍ਵੇ ਅਰਹਨ੍ਤੋ ਸਮ੍ਮਾਸਮ੍ਬੁਦ੍ਧਾ’’ਤਿ (ਦੀ. ਨਿ. ੩.੧੬੧; ਅ. ਨਿ. ੧.੨੭੭) ਇਮਂ ਸੁਤ੍ਤਂ ਦਸ੍ਸੇਨ੍ਤੇਨ ਧਮ੍ਮਸੇਨਾਪਤਿਨਾਵ ਬੁਦ੍ਧਖੇਤ੍ਤਭੂਤਂ ਇਮਂ ਲੋਕਧਾਤੁਂ ਠਪੇਤ੍ਵਾ ਅਞ੍ਞਤ੍ਥ ਅਨੁਪ੍ਪਤ੍ਤਿ ਵੁਤ੍ਤਾ ਹੋਤੀਤਿ ਅਧਿਪ੍ਪਾਯੋ.

ਖੇਤ੍ਤਪਰਿਗ੍ਗਹੋ ਕਤੋ ਨਾਮ ਹੋਤਿ ‘‘ਇਦਂ ਬੁਦ੍ਧਖੇਤ੍ਤਂ ਨਾਮਾ’’ਤਿ.

ਏਵਂ ਠਾਨਾਟ੍ਠਾਨਭਾਵਂ ਗਤਾਤਿ ਵੁਤ੍ਤਪ੍ਪਕਾਰੇਨ ਠਾਨਭੂਤਾ, ਵੁਤ੍ਤਨਯੇਨ ਵਾ ਅਞ੍ਞੇਪਿ ਯਥਾਰਹਂ ਠਾਨਾਟ੍ਠਾਨਭਾਵੇਨ ਪਵਤ੍ਤਾ. ਸਤ੍ਤਪਞ੍ਞਤ੍ਤਿਯਾ ਉਪਾਦਾਨਭੂਤਾਤਿ ਇਨ੍ਦ੍ਰਿਯਬਦ੍ਧੇ ਖਨ੍ਧੇ ਸਨ੍ਧਾਯ ਵਦਤਿ.

੫੮. ਫਲਸ੍ਸ ਪਚ੍ਚਕ੍ਖਕਾਰਿਤਾਤਿ ‘‘ਇਮਸ੍ਸ ਕਮ੍ਮਸ੍ਸ ਇਦਂ ਫਲ’’ਨ੍ਤਿ ਤਂਤਂਕਮ੍ਮਫਲਾਵਬੋਧੋ. ਅਪ੍ਪਦਾਨਾਭਾਵੋਤਿ ਪਚ੍ਚਯਸਮਵਾਯੇ ਕਮ੍ਮਸ੍ਸ ਏਕਨ੍ਤਤੋ ਫਲੁਪ੍ਪਾਦਨਂ. ਤੇਨਾਹ ‘‘ਕਤੂਪਚਿਤਾਨ’’ਨ੍ਤਿ.

੫੯. ਅਜ੍ਝੋਸਿਤਵਤ੍ਥੁਨਾਤਿ ਤਣ੍ਹਾਭਿਨਿਵੇਸਵਸੇਨ ਅਭਿਨਿਵਿਟ੍ਠਵਤ੍ਥੁਨਾ. ਰੂਪਭਵਅਰੂਪਭਵਾਦਿਨਾਤਿ ਭਵਤਣ੍ਹਾ ਵਿਯ ਸਯਂ ਦਸ੍ਸੇਤਿ.

ਖਨ੍ਧਤ੍ਤਯਵਸੇਨਾਤਿ ਸੀਲਾਦਿਕ੍ਖਨ੍ਧਤ੍ਤਯਵਸੇਨ. ਪਟਿਪਦਾਵਿਭਾਗੇਨਾਤਿ ‘‘ਸਬ੍ਬਤ੍ਥਗਾਮਿਨੀ’’ਤਿ ਆਦਿਪਟਿਪਦਾਯ ਭੇਦੇਨ.

ਤਤ੍ਥਤਤ੍ਥਗਾਮਿਨੀਤਿ ਨਿਰਯਾਦਿਨਿਬ੍ਬਾਨਨ੍ਤਿ ਦ੍ਵੀਸੁ ਗਨ੍ਧਬ੍ਬਟ੍ਠਾਨੇਸੁ ਤਤ੍ਥ ਤਤ੍ਥੇਵ ਗਮਨਸੀਲਾ. ਸਬ੍ਬਤ੍ਥਗਾਮਿਨੀਤਿ ਯਥਾਵੁਤ੍ਤੇਸੁ ਸਬ੍ਬਟ੍ਠਾਨੇਸੁ ਚ ਗਮਨਸੀਲਾ.

ਸਞ੍ਜੀਵੋ ਕਾਲ਼ਸੁਤ੍ਤਂ ਸਙ੍ਘਾਤੋ ਰੋਰੁਵੋ ਮਹਾਰੋਰੁਵੋ ਤਾਪਨੋ ਮਹਾਤਾਪਨੋ ਅਵੀਚੀਤਿ ਏਤੇ ਅਟ੍ਠ ਮਹਾਨਿਰਯਾ. ਏਕੇਕਸ੍ਸ ਚਤ੍ਤਾਰਿ ਚਤ੍ਤਾਰਿ ਦ੍ਵਾਰਾਨਿ, ਏਕੇਕਸ੍ਮਿਂ ਦ੍ਵਾਰੇ ਚਤ੍ਤਾਰੋ ਚਤ੍ਤਾਰੋ ਗੂਥਨਿਰਯਾਦਯੋਤਿ ਏਵਂ ਸੋਲ਼ਸ ਉਸ੍ਸਦਨਿਰਯੇ ਵਣ੍ਣੇਨ੍ਤਿ.

ਸਕ੍ਕਸੁਯਾਮਾਦਿਕੋ ਜੇਟ੍ਠਕਦੇਵਰਾਜਾ. ਪਜਾਪਤਿਵਰੁਣਈਸਾਨਾਦਯੋ ਵਿਯ ਦੁਤਿਯਾਦਿਟ੍ਠਾਨਨ੍ਤਰਕਾਰਕੋ ਪਰਿਚਾਰਕੋ.

ਕਿਲੇਸਕਾਮਪਕ੍ਖੇਤਿ ‘‘ਸਙ੍ਕਪ੍ਪੋ ਕਾਮੋ, ਰਾਗੋ ਕਾਮੋ, ਸਙ੍ਕਪ੍ਪਰਾਗੋ ਕਾਮੋਤਿ (ਮਹਾਨਿ. ੧) ਏਤ੍ਥ ਵੁਤ੍ਤਸਙ੍ਕਪ੍ਪਵਸੇਨ ਵੁਤ੍ਤਂ. ਸੋਪਿ ਹਿ ਵਿਬਾਧਤਿ, ਉਪਤਾਪੇਤਿ ਚਾਤਿ ਕਿਲੇਸਤ੍ਤਸਮ੍ਭਵਤੋ ਕਿਲੇਸਕਾਮੋ ਵੁਤ੍ਤੋ, ਨ ਕਿਲੇਸਵਤ੍ਥੁਭਾਵਤੋ. ਕਾਮਪਟਿਸਂਯੁਤ੍ਤੋਤਿ ਕਾਮਰਾਗਸਙ੍ਖਾਤੇਨ ਕਾਮੇਨ ਸਮ੍ਪਯੁਤ੍ਤੋ, ਕਾਮਪਟਿਬਦ੍ਧੋ ਵਾ. ਅਞ੍ਞੇਸੁ ਚ ਕਾਮਪਟਿਸਂਯੁਤ੍ਤੇਸੁ ਧਮ੍ਮੇਸੁ ਵਿਜ੍ਜਮਾਨੇਸੁ ਵਿਤਕ੍ਕੇ ਏਵ ਕਾਮਸਦ੍ਦੋ ਧਾਤੁਸਦ੍ਦੋ ਨਿਰੁਲ਼੍ਹੋਤਿ ਵੇਦਿਤਬ੍ਬੋ ਵਿਤਕ੍ਕਸ੍ਸ ਕਾਮਸਙ੍ਕਪ੍ਪਵੁਤ੍ਤਿਯਾ ਸਾਤਿਸਯਤ੍ਤਾ. ਏਸ ਨਯੋ ਬ੍ਯਾਪਾਦਧਾਤੁਆਦੀਸੁ. ਪਰਸ੍ਸ, ਅਤ੍ਤਨੋ ਚ ਦੁਕ੍ਖਾਪਨਂ ਵਿਹਿਂਸਾ. ਤਂ ਤੁ ਮਿਚ੍ਛਾਹਿ ਵਿਹਿਂਸਾ.

ਬੀਜਾਦਿਧਾਤੁਨਾਨਤ੍ਤਵਸੇਨ ਖਨ੍ਧਾਦਿਨਾਨਤ੍ਤਂ ਵੇਦਿਤਬ੍ਬਂ. ਖਨ੍ਧੋਤਿ ਦ੍ਵਿਧਾਭੂਤਗ੍ਗੋ.

੬੦. ਅਜ੍ਝਾਸਯਧਾਤੂਤਿ ਅਜ੍ਝਾਸਯਸਭਾਵੋ. ਯਥਾ ਗੂਥਾਦੀਨਂ ਸਭਾਵੋ ਏਸੋ ਯਂ ਗੂਥਾਦੀਹੇਵ ਸਂਸਨ੍ਦਤਿ, ਏਵਂ ਪੁਗ੍ਗਲਾਨਂ ਅਜ੍ਝਾਸਯਸ੍ਸੇਵੇਸ ਸਭਾਵੋ, ਯਂ ਦੁਸ੍ਸੀਲਾਦਯੋ ਦੁਸ੍ਸੀਲਾਦਿਕੇਹੇਵ ਸਂਸਨ੍ਦਨ੍ਤਿ.

ਸਦ੍ਧਾਮੂਲਕਤ੍ਤਾ ਕੁਸਲਕਿਰਿਯਾਯ ਵੁਤ੍ਤਂ ‘‘ਯਂ ਸਦ੍ਧਾਵਸੇਨਾ’’ਤਿਆਦਿ. ਤਥਾ ਹਿ ਵੁਤ੍ਤਂ ‘‘ਸਦ੍ਧਾ ਬੀਜ’’ਨ੍ਤਿ (ਸੁ. ਨਿ. ੭੭). ਯਂ ਲੋਭਵਸੇਨ, ਸਦ੍ਧਾਵਸੇਨ ਚ ਦੋਸਵਸੇਨ, ਸਦ੍ਧਾਵਸੇਨ ਚ ਮੋਹਵਸੇਨ, ਸਦ੍ਧਾਵਸੇਨ ਚਾਤਿ ਯੋਜੇਤਬ੍ਬਂ. ਵੀਰਿਯਵਸੇਨਾਤਿ ਸਮ੍ਮਪ੍ਪਧਾਨਵੀਰਿਯਵਸੇਨ. ਪਞ੍ਞਾਵਸੇਨਾਤਿ ਮਗ੍ਗਸਮ੍ਮਾਦਿਟ੍ਠਿਵਸੇਨ.

ਅਕੁਸਲਸ੍ਸ ਕਮ੍ਮਸ੍ਸ ਕਤੋਕਾਸਤਾਯ ਪਾਲ਼ਿਯਂ ਵੁਤ੍ਤਤ੍ਤਾ ‘‘ਵਿਪਾਕਾਵਰਣੇਨ ਨਿਵੁਤ’’ਨ੍ਤਿ ਵੁਤ੍ਤਂ. ਤਂ ਪਨ ਨਿਦਸ੍ਸਨਮਤ੍ਤਂ ਦਟ੍ਠਬ੍ਬਂ ਕਮ੍ਮਾਵਰਣਾਦੀਹਿਪਿ ਨਿਵੁਤਤਾਯ ਇਚ੍ਛਿਤਤ੍ਤਾ. ਤਥਾ ਹਿ ਯਥਾ ਦੇਵਦਤ੍ਤਂ ਕੋਕਾਲਿਕਂ ਸੁਨਕ੍ਖਤ੍ਤਂ ਲਿਚ੍ਛਵਿਪੁਤ੍ਤਨ੍ਤਿ ਉਦਾਹਟਂ, ਯਦਿਪਿ ਭਗਵਾ ਪਟਿਵੇਧਸ੍ਸ ਅਟ੍ਠਾਨਤਂ ਦਿਸ੍ਵਾ ਨਿਬ੍ਬੇਧਭਾਗਿਯਦੇਸਨਂ ਨ ਦੇਸੇਤਿ, ਵਾਸਨਾਭਾਗਿਯਂ ਪਨ ਤਥਾਰੂਪਸ੍ਸ ਦੇਸੇਤਿ ਏਵਾਤਿ ਦਸ੍ਸੇਨ੍ਤੋ ‘‘ਸਚ੍ਚਪ੍ਪਟਿਵੇਧ’’ਨ੍ਤਿਆਦਿਮਾਹ. ਅਜਾਤਸਤ੍ਤੁਆਦੀਨਨ੍ਤਿ ਆਦਿਸਦ੍ਦੇਨ ਸਚ੍ਚਕਾਦੀਨਂ ਸਙ੍ਗਹੋ ਦਟ੍ਠਬ੍ਬੋ. ਤਸ੍ਸਾਪਿ ਭਗਵਾ ਅਨਾਗਤੇ ਵਾਸਨਤ੍ਥਾਯ ਧਮ੍ਮਂ ਦੇਸੇਸਿ. ਸਤ੍ਥਾ ਹਿ ‘‘ਅਨਾਗਤੇ ਤਮ੍ਬਪਣ੍ਣਿਦੀਪੇ ਸਾਸਨਂ ਪਤਿਟ੍ਠਹਿਸ੍ਸਤੀ’’ਤਿ ਤਤ੍ਥਾਯਂ ਕੁਲਘਰੇ ਨਿਬ੍ਬਤ੍ਤੋ ਪਬ੍ਬਜਿਤ੍ਵਾ ਕਾਲ਼ਬੁਦ੍ਧਰਕ੍ਖਿਤਤ੍ਥੇਰੋ ਨਾਮ ਪਭਿਨ੍ਨਪਟਿਸਮ੍ਭਿਦੋ ਮਹਾਖੀਣਾਸਵੋ ਭਵਿਸ੍ਸਤੀਤਿ ਇਦਂ ਦਿਸ੍ਵਾ ਧਮ੍ਮਂ ਦੇਸੇਸਿ, ਸੋ ਚ ਤਥਾ ਅਹੋਸੀਤਿ.

ਅਸਮ੍ਪੁਣ੍ਣੇਤਿ ਏਕਨ੍ਤਤੋ ਵਿਪਾਕਦਾਨਸਮਤ੍ਥਤਾਵਸੇਨ ਪਾਰਿਪੂਰਿਂ ਅਨੁਪਗਤੇ. ਦਿਟ੍ਠੁਪਨਿਸ੍ਸਯਦਿਟ੍ਠਿਸਹਗਤਸ੍ਸ ਕਮ੍ਮਂ ਸਨ੍ਧਾਯ ‘‘ਕਮ੍ਮੇ ਅਸਮ੍ਪੁਣ੍ਣੇ’’ਤਿ ਵੁਤ੍ਤਂ. ਤੇਨਾਹ ‘‘ਕਿਲੇਸਨ੍ਤਰਾਯ ਮਿਸ੍ਸਕਂ ਕਮ੍ਮਨ੍ਤਰਾਯਂ ਦਸ੍ਸੇਤ੍ਵਾ’’ਤਿ.

੬੧. ਦਿਟ੍ਠਿ ਪਨੇਤ੍ਥ ਪਧਾਨਭਾਵੇਨ ਪਾਲ਼ਿਯਂ ਗਹਿਤਾ ਸੀਲਬ੍ਬਤਪਰਾਮਾਸਸ੍ਸ ਅਧਿਪ੍ਪੇਤਤ੍ਤਾ. ਤਥਾ ਹਿ ਵੁਤ੍ਤਂ ‘‘ਯਥਾ ਪੁਣ੍ਣਞ੍ਚ ਗੋਵਤਿਕਂ, ਅਚੇਲਞ੍ਚ ਕੁਕ੍ਕੁਰਵਤਿਕ’’ਨ੍ਤਿ. ਅਸਮ੍ਪੁਣ੍ਣਤ੍ਤਾ ਏਵ ਹਿ ਤਸ੍ਸ ਮਿਚ੍ਛਾਦਿਟ੍ਠਿਕਮ੍ਮਸਮਾਦਾਨਸ੍ਸ ਤੇਸਂ ਭਗਵਾ ‘‘ਚਤ੍ਤਾਰਿਮਾਨਿ, ਪੁਣ੍ਣ, ਕਮ੍ਮਾਨੀ’’ਤਿਆਦਿਨਾ (ਮ. ਨਿ. ੨.੮੧) ਧਮ੍ਮਂ ਦੇਸੇਸਿ. ਤਾਯ ਚ ਦੇਸਨਾਯ ਤੇ ਤਂ ਦਿਟ੍ਠਿਂ ਪਟਿਨਿਸ੍ਸਜ੍ਜਿਤ੍ਵਾ ਸਮ੍ਮਤ੍ਤੇ ਪਤਿਟ੍ਠਹਿਂਸੁ.

੬੨. ਪਗੁਣਤਾਯ ਵੋਦਾਨਂ ਪਗੁਣਵੋਦਾਨਂ. ਤਦੇਵ ਪਠਮਜ੍ਝਾਨਾਦੀਹਿ ਵੁਟ੍ਠਹਿਤ੍ਵਾ ਦੁਤਿਯਜ੍ਝਾਨਾਦਿਅਧਿਗਮਸ੍ਸ ਪਚ੍ਚਯਤ੍ਤਾ ਵੁਟ੍ਠਾਨਂ ਨਾਮ ਹੋਤੀਤਿ ਆਹ ‘‘ਵੁਟ੍ਠਾਨਂ ਪਗੁਣਵੋਦਾਨ’’ਨ੍ਤਿ. ਭਵਙ੍ਗਵੁਟ੍ਠਾਨਂ ਭਵਙ੍ਗੁਪ੍ਪਤ੍ਤਿ. ਭਵਙ੍ਗਚਿਤ੍ਤੇ ਹਿ ਉਪ੍ਪਨ੍ਨੇ ਤਂਸਮਙ੍ਗਿਸਮਾਪਤ੍ਤਿਤੋ ਵੁਟ੍ਠਿਤੋ ਨਾਮ ਹੋਤਿ. ਸਞ੍ਞਾਵੇਦਯਿਤਅਪਗਮੋ ਏਵ ਅਪਗਮਵਿਮੋਕ੍ਖੋ.

ਇਦਂ ਵੁਟ੍ਠਾਨਨ੍ਤਿ ਇਦਂ ਯਥਾਵੁਤ੍ਤਂ ਕੋਸਲ੍ਲਂ ਵੁਟ੍ਠਾਨਹੇਤੁਭਾਵਤੋ ਵੁਟ੍ਠਾਨਂ. ਤਥਾ ਹਿ ਵੁਤ੍ਤਂ ‘‘ਵੋਦਾਨਮ੍ਪਿ ਤਮ੍ਹਾ ਤਮ੍ਹਾ ਸਮਾਧਿਮ੍ਹਾ ਵੁਟ੍ਠਾਨ’’ਨ੍ਤਿ (ਵਿਭ. ੮੨੮). ਇਮਾਯ ਪਨ ਵੁਟ੍ਠਾਨਪਾਲ਼ਿਯਾ ਅਸਙ੍ਗਹਿਤਤ੍ਤਾ ‘‘ਨਿਰੋਧਸਮਾਪਤ੍ਤਿਯਾ ਵੁਟ੍ਠਾਨਂ ਪਾਲ਼ਿਮੁਤ੍ਤਕਵੁਟ੍ਠਾਨਂ ਨਾਮਾ’’ਤਿ ਸਮ੍ਮੋਹਵਿਨੋਦਨਿਯਂ (ਵਿਭ. ਅਟ੍ਠ. ੮੨੮) ਵੁਤ੍ਤਂ. ਯੇ ਪਨ ‘‘ਨਿਰੋਧਤੋ ਫਲਸਮਾਪਤ੍ਤਿਯਾ ਵੁਟ੍ਠਾਨ’’ਨ੍ਤਿ ਪਾਲ਼ਿਯਂ ਨਤ੍ਥੀਤਿ ਵਦੇਯ੍ਯੁਂ, ਤੇ ‘‘ਨਿਰੋਧਾ ਵੁਟ੍ਠਹਨ੍ਤਸ੍ਸ ਨੇਵਸਞ੍ਞਾਨਾਸਞ੍ਞਾਯਤਨਂ ਫਲਸਮਾਪਤ੍ਤਿਯਾ ਅਨਨ੍ਤਰਪਚ੍ਚਯੇਨ ਪਚ੍ਚਯੋ’’ਤਿ (ਪਟ੍ਠਾ. ੧.੧.੪੧੭) ਇਮਾਯ ਪਾਲ਼ਿਯਾ ਪਟਿਸੇਧੇਤਬ੍ਬਾ.

੬੩. ਅਯਂ ਚਸ੍ਸ ਆਸਯੋਤਿ ਏਤ੍ਥ ਆਸਯਜਾਨਨਾਦਿਨਾ ਯੇਹਿ ਇਨ੍ਦ੍ਰਿਯੇਹਿ ਯੇਹਿ ਪਰੋਪਰੇਹਿ ਸਤ੍ਤਾ ਕਲ੍ਯਾਣਪਾਪਾਸਯਾਦਿਕਾ ਹੋਨ੍ਤਿ, ਤੇਸਂ ਪਜਾਨਨਂ ਵਿਭਾਵੇਤੀਤਿ ਵੇਦਿਤਬ੍ਬਂ. ਏਵਞ੍ਚ ਕਤ੍ਵਾ ਇਨ੍ਦ੍ਰਿਯਪਰੋਪਰਿਯਤ੍ਤਆਸਯਾਨੁਸਯਞਾਣਾਨਂ ਵਿਸੁਂ ਅਸਾਧਾਰਣਤਾ, ਇਨ੍ਦ੍ਰਿਯਪਰੋਪਰਿਯਤ੍ਤਨਾਨਾਧਿਮੁਤ੍ਤਿਕਤਾਞਾਣਾਨਂ ਵਿਸੁਂ ਬਲਤਾ ਚ ਸਿਦ੍ਧਾ ਹੋਤਿ.

ਥਾਮਗਤੋਤਿ ਏਤ੍ਥ ਥਾਮਗਮਨਂ ਨਾਮ ਅਞ੍ਞੇਸਂ ਅਸਾਧਾਰਣੋ ਕਾਮਰਾਗਾਦੀਨਂ ਏਵ ਆਵੇਣਿਕੋ ਸਭਾਵੋ ਵੇਦਿਤਬ੍ਬੋ, ਯਤੋ ‘‘ਥਾਮਗਤੋ ਅਨੁਸਯਂ ਪਜਹਤੀ’’ਤਿ (ਪਟਿ. ਮ. ੩.੨੧) ਵੁਤ੍ਤਂ.

ਆਵਜ੍ਜਨਮਤ੍ਤੇਨੇਵ ਸਰਤਿ ਆਕਙ੍ਖਾਯਤ੍ਤਵੁਤ੍ਤਿਕਤ੍ਤਾ. ਵੁਤ੍ਤਞ੍ਹਿ ‘‘ਆਕਙ੍ਖਪਟਿਬਦ੍ਧਂ ਬੁਦ੍ਧਸ੍ਸ ਭਗਵਤੋ ਞਾਣਂ, ਮਨਸਿਕਾਰਪਟਿਬਦ੍ਧਂ ਬੁਦ੍ਧਸ੍ਸ ਭਗਵਤੋ ਞਾਣ’’ਨ੍ਤਿਆਦਿ (ਮਹਾਨਿ. ੧੫੬; ਚੂਲ਼ਨਿ. ਮੋਘਰਾਜਮਾਣਵਪੁਚ੍ਛਾਨਿਦ੍ਦੇਸ ੮੫; ਪਟਿ. ਮ. ੩.੫). ਸਬ੍ਬਞ੍ਞੁਤਞ੍ਞਾਣਂ ਵਿਯ ਹਿ ਸਬ੍ਬਂ ਭਗਵਤੋ ਞਾਣਂ ਪਰਿਕਮ੍ਮਨਿਰਪੇਕ੍ਖਨ੍ਤਿ.

੬੪. ਉਪਕ੍ਕਿਲੇਸਵਿਮੁਤ੍ਤਤ੍ਤਾਤਿ ਏਤ੍ਥ ਚਿਤ੍ਤਾਦਿ ਏਵ ਉਪਕ੍ਕਿਲੇਸਾ, ਨਿਬ੍ਬਤ੍ਤਕਸ੍ਸ ਵਾ ਕਮ੍ਮਸ੍ਸ ਪਾਰਿਬਨ੍ਧਕਿਲੇਸਾ. ਕਸਿਣਕਮ੍ਮਪਰਿਕਮ੍ਮਝਾਨਨਿਬ੍ਬਤ੍ਤਨਕਸਿਣਭਾਵੋ ਚੁਦ੍ਦਸਵਿਧੇਨ ਚਿਤ੍ਤਪਰਿਦਮਨਂ ਅਭਿਞ੍ਞਾਭਿਨੀਹਾਰੋਤਿ ਸਬ੍ਬਤ੍ਥਾਪਿ ਵੀਰਿਯਬਲਸ੍ਸ ਬਹੂਪਕਾਰਤ੍ਤਾ ਵੁਤ੍ਤਂ ‘‘ਵੀਰਿਯਭਾਵਨਾਬਲਨਿਬ੍ਬਤ੍ਤ’’ਨ੍ਤਿ. ਦਿਬ੍ਬਸਦਿਸਤ੍ਤਾਤਿ ਦਿਬ੍ਬੇ ਭਵਨ੍ਤਿ ਦਿਬ੍ਬਂ, ਯਥਾਵੁਤ੍ਤਂ ਪਸਾਦਚਕ੍ਖੁ, ਦਿਬ੍ਬਂ ਵਿਯਾਤਿ ਦਿਬ੍ਬਂ, ਅਗ੍ਗਤਂ ਅਭਿਞ੍ਞਾਣਂ. ਦਿਬ੍ਬਵਿਹਾਰੋ ਚਤ੍ਤਾਰਿ ਰੂਪਾਵਚਰਜ੍ਝਾਨਾਨਿ. ਤੇਸਂ ਵਸੇਨ ਨਿਬ੍ਬਤ੍ਤਿਤ੍ਵਾ ਪਟਿਲਦ੍ਧਬ੍ਬਤ੍ਤਾ ਦਿਬ੍ਬਂ, ਤੇਨ ਦਿਬ੍ਬਹੇਤੁਕਤ੍ਤਾ ਦਿਬ੍ਬਨ੍ਤਿ ਵੁਤ੍ਤਨ੍ਤਿ ਦਸ੍ਸੇਤਿ. ਦਿਬ੍ਬਵਿਹਾਰਸਨ੍ਨਿਸ੍ਸਿਤਤ੍ਤਾਤਿ ਰੂਪਾਵਚਰਚਤੁਤ੍ਥਜ੍ਝਾਨੇਨ ਨਿਸ੍ਸਯਪਚ੍ਚਯੇਨ ਨਿਬ੍ਬਤ੍ਤਤ੍ਤਾ, ਤੇਨ ਦਿਬ੍ਬਨਿਸ੍ਸਿਤਂ ਦਿਬ੍ਬਨ੍ਤਿ ਦਸ੍ਸੇਤਿ. ਦਿਵੁਸਦ੍ਦਂ ਅਕ੍ਖਰਚਿਨ੍ਤਕਾ ਕੀਲ਼ਾਦੀਸੁ ਪਠਨ੍ਤੀਤਿ ਵੁਤ੍ਤਂ ‘‘ਤਂ ਸਬ੍ਬਂ ਸਦ੍ਦਸਤ੍ਥਾਨੁਸਾਰੇਨ ਵੇਦਿਤਬ੍ਬ’’ਨ੍ਤਿ. ਪੁਰਿਮਾ ਹਿ ਤਯੋ ਅਤ੍ਥਾ ਕੀਲ਼ਤ੍ਥਸ੍ਸ ਵਸੇਨ, ਇਤਰੇ ਜੁਤਿਗਤਿਅਤ੍ਥਵਸੇਨੇਵ ਦਸ੍ਸਿਤਾਤਿ.

ਮਨੁਸ੍ਸੂਪਚਾਰਨ੍ਤਿ ਮਨੁਸ੍ਸਗੋਚਰਂ. ਦਟ੍ਠੁਂ ਨ ਸਕ੍ਕਾ ਇਤ੍ਤਰਖਣਤ੍ਤਾ ਖਣਪਚ੍ਚੁਪ੍ਪਨ੍ਨਸ੍ਸ. ‘‘ਆਸਨ੍ਨਚੁਤਿਕਾ’’ਤਿਆਦਿਨਾ ਸਨ੍ਤਤਿਪਚ੍ਚੁਪ੍ਪਨ੍ਨਵਸੇਨ ‘‘ਚਵਮਾਨੇ ਉਪਪਜ੍ਜਮਾਨੇ’’ਤਿ ਵੁਤ੍ਤਨ੍ਤਿ ਦਸ੍ਸੇਤਿ. ‘‘ਮੋਹਨਿਸ੍ਸਨ੍ਦਯੁਤ੍ਤਤ੍ਤਾ’’ਤਿਆਦਿਨਾ ਸਤ੍ਤਾਨਂ ਹੀਨਪਣੀਤਤ੍ਤਾਦਿਭਾਵਸ੍ਸ ਮੋਹਾਦਿਕਮ੍ਮਨਿਦਾਨਹੇਤੁਕਤਂ, ਨਿਸ੍ਸਨ੍ਦਫਲਤਞ੍ਚ ਦਸ੍ਸੇਤਿ. ਦਿਬ੍ਬਚਕ੍ਖੁਸ੍ਸ ਪਾਦਕਂ ਏਤੇਸਨ੍ਤਿ ਦਿਬ੍ਬਚਕ੍ਖੁਪਾਦਕਾਨਿ. ਤੇਨ ਵੁਤ੍ਤਂ ‘‘ਦਿਬ੍ਬਚਕ੍ਖੁਨਾ ਸਹੇਵ ਇਜ੍ਝਨ੍ਤੀ’’ਤਿ. ਤਾਨਿ ਹਿਸ੍ਸ ਪਰਿਭਣ੍ਡਞਾਣਾਨਿ.

ਸਮਾਦੀਯਨ੍ਤੀਤਿ ਸਮਾਦਾਨਾਨਿ, ਕਮ੍ਮਾਨਿ ਸਮਾਦਾਨਾਨਿ ਏਤੇਸਨ੍ਤਿ ਕਮ੍ਮਸਮਾਦਾਨਾ. ਸਮਾਦਾਤਬ੍ਬਨਾਨਾਵਿਧਕਮ੍ਮਾਤਿ ਅਤ੍ਥੋ ਪੁਰਿਮੇ ਅਤ੍ਥੇ, ਦੁਤਿਯੇ ਪਨ ਕਮ੍ਮਾਨਿ ਸਮਾਦਾਪੇਨ੍ਤੀਤਿ ਕਮ੍ਮਸਮਾਦਾਨਾ, ਮਿਚ੍ਛਾਦਿਟ੍ਠਿਯਾ ਕਮ੍ਮਸਮਾਦਾਨਾ ਮਿਚ੍ਛਾਦਿਟ੍ਠਿਕਮ੍ਮਸਮਾਦਾਨਾ, ਹੇਤੁਅਤ੍ਥੇ ਚੇਤਂ ਕਰਣਵਚਨਂ.

ਤਂ ਵਾਚਨ੍ਤਿ ਤਂ ਅਰਿਯਾਨਂ ਉਪਵਦਨਵਾਚਂ. ਤਂ ਚਿਤ੍ਤਨ੍ਤਿ ਸਮੁਟ੍ਠਾਪਕਚਿਤ੍ਤਂ. ਤਂ ਦਿਟ੍ਠਿਨ੍ਤਿ ਯੇਨ ਮਿਚ੍ਛਾਗਾਹੇਨ ਅਰਿਯੇ ਅਨੁਦ੍ਧਂਸੇਤਿ, ਮਿਚ੍ਛਾਭਿਨਿਵੇਸਂ. ਅਯਮ੍ਪੇਤ੍ਥ ਅਤ੍ਥੋ – ਯਥਾ ਨਾਮ ਹੇਤੁਸਮ੍ਪਨ੍ਨਸ੍ਸ ਭਿਕ੍ਖੁਨੋ ਵਿਸੁਦ੍ਧਂ ਸੀਲਂ, ਸਮਾਧਿਞ੍ਚ ਸਮ੍ਪਾਦੇਤ੍ਵਾ ਠਿਤਸ੍ਸ ਦਨ੍ਧੋ ਸਤੁਪ੍ਪਾਦੋ ਖਿਪ੍ਪਾਭਿਞ੍ਞਾਯ ਦਿਟ੍ਠੇਵ ਧਮ੍ਮੇ ਅਞ੍ਞਾ, ਸਤਿ ਵਾ ਉਪਾਦਿਸੇਸੇ ਅਨਾਗਾਮਿਤਾ. ਏਵਮੇਵਂ ਯੋ ਅਰਿਯੂਪਵਾਦੀ ਯਥਾਵੁਤ੍ਤਚਿਤ੍ਤਦਿਟ੍ਠੀਹਿ ਅਪਕ੍ਕਮਿਤ੍ਵਾ ਅਪ੍ਪਤਿਰੂਪਂ ਸਭਾਵਂ ‘‘ਮਯਾ, ਭਨ੍ਤੇ, ਤੁਮ੍ਹਾਕਂ ਉਪਰਿ ਵੁਤ੍ਤ’ਨ੍ਤਿ ਅਚ੍ਚਯਦੇਸਨਾਯ ਤੇ ਨ ਖਮਾਪੇਤਿ, ਸੋ ਕਾਯਸ੍ਸ ਭੇਦਾ ਨਿਰਯੇ ਏਵਾਤਿ. ਤੇਸੁ ਪਸਨ੍ਨਚਿਤ੍ਤਸ੍ਸ ਖਮਾਪਨਞ੍ਹੇਤ੍ਥ ਤੇਸਂ ਵਾਚਾਦੀਨਂ ਪਹਾਨਂ ਪਟਿਨਿਸ੍ਸਗ੍ਗੋਵ. ਇਤੋ ਸਾਵਜ੍ਜਤਰਂ ਨਾਮ ਅਞ੍ਞਂ ਨਤ੍ਥਿ ਸਬ੍ਬਾਨਤ੍ਥਵਿਧਾਨਤੋ, ਸਬ੍ਬਹਿਤਸੁਖਪਰਿਧਂਸਨਤੋ ਚ.

ਕਾਯਸ੍ਸ ਭੇਦਾਤਿ ਇਧ ਕਾਯਸਦ੍ਦੋ ਅਤ੍ਤਭਾਵਪਰਿਯਾਯੋਤਿ ਆਹ ‘‘ਉਪਾਦਿਨ੍ਨਕ੍ਖਨ੍ਧਪਰਿਚ੍ਚਾਗਾ’’ਤਿ. ਤਦਨਨ੍ਤਰਨ੍ਤਿ ਤਸ੍ਸ ਮਰਣਸਙ੍ਖਾਤਸ੍ਸ ਖਨ੍ਧਪਰਿਚ੍ਚਾਗਸ੍ਸ ਅਨਨ੍ਤਰਂ. ਅਭਿਨਿਬ੍ਬਤ੍ਤਕ੍ਖਨ੍ਧਤ੍ਥੋ ਪਰਸਦ੍ਦੋ, ਅਨੋਰਿਮਭੂਤਵਤ੍ਥੁਵਿਸਯੋ ਵਾ ਸਿਯਾ, ਅਵਧਿਵਿਸੇਸਨਮਤ੍ਤਂ ਵਾ. ਤੇਸੁ ਪੁਰਿਮਂ ਸਨ੍ਧਾਯਾਹ ‘‘ਅਭਿਨਿਬ੍ਬਤ੍ਤਕ੍ਖਨ੍ਧਗ੍ਗਹਣੇ’’ਤਿ, ਪਚ੍ਛਿਮਸ੍ਸ ਪਨ ਵਸੇਨ ‘‘ਚੁਤਿਤੋ ਉਦ੍ਧ’’ਨ੍ਤਿ.

ਵੁਤ੍ਤਵਿਪਰਿਯਾਯੇਨਾਤਿ ‘‘ਸੁਟ੍ਠੁ ਚਰਿਤਂ, ਸੋਭਨਂ ਵਾ ਚਰਿਤ’’ਨ੍ਤਿਆਦਿਨਾ. ਹਨਨਨ੍ਤਿ ਘਾਤਨਂ.

ਕਾਰਣਾਕਾਰਣਨ੍ਤਿ ਠਾਨਾਟ੍ਠਾਨਂ. ਚੇਤਨਾਚੇਤਨਾਸਮ੍ਪਯੁਤ੍ਤਧਮ੍ਮੇ ਨਿਰਯਾਦਿਨਿਬ੍ਬਾਨਗਾਮਿਪਟਿਪਦਾਭੂਤੇ ਕਮ੍ਮਨ੍ਤਿ ਗਹੇਤ੍ਵਾ ਆਹ ‘‘ਕਮ੍ਮਪਰਿਚ੍ਛੇਦਮੇਵਾ’’ਤਿ. ਕਮ੍ਮਵਿਪਾਕਨ੍ਤਰਂ ਕਮ੍ਮਵਿਪਾਕਵਿਸੇਸੋ ਕਮ੍ਮਵਿਪਾਕਸ੍ਸ ਵਿਭਾਗੋ. ਅਪ੍ਪੇਤੁਂ ਨ ਸਕ੍ਕੋਤਿ ਅਟ੍ਠਮਨਵਮਬਲਾਨਿ ਵਿਯ, ਤਂਸਦਿਸਂ ਇਦ੍ਧਿਵਿਧਞਾਣਂ ਵਿਯ ਵਿਕੁਬ੍ਬਿਤੁਂ, ਏਤੇਨਸ੍ਸ ਬਲਸਦਿਸਤਞ੍ਚ ਨਿਵਾਰੇਤਿ. ਝਾਨਾਦਿਞਾਣਂ ਵਿਯ ਵਾ ਅਪ੍ਪੇਤੁਂ, ਵਿਕੁਬ੍ਬਿਤੁਞ੍ਚ. ਯਦਿਪਿ ਹਿ ਝਾਨਾਦਿਪਚ੍ਚਵੇਕ੍ਖਣਾਞਾਣਂ ਇਧ ਛਟ੍ਠਂ ਬਲਨ੍ਤਿ ਤਸ੍ਸ ਸਵਿਤਕ੍ਕਸਵਿਚਾਰਤਾ ਵੁਤ੍ਤਾ, ਤਥਾਪਿ ਝਾਨਾਦੀਹਿ ਵਿਨਾ ਪਚ੍ਚਵੇਕ੍ਖਣਾ ਨਤ੍ਥੀਤਿ ਝਾਨਾਦਿਸਹਗਤਂ ਞਾਣਂ ਤਦਨ੍ਤੋਗਧਂ ਕਤ੍ਵਾ ਏਵਂ ਵੁਤ੍ਤਂ. ਅਥ ਵਾ ਸਬ੍ਬਞ੍ਞੁਤਞ੍ਞਾਣਂ ਝਾਨਾਦਿਕਿਚ੍ਚਂ ਵਿਯ ਨ ਸਬ੍ਬਂ ਬਲਕਿਚ੍ਚਂ ਕਾਤੁਂ ਸਕ੍ਕੋਤੀਤਿ ਦਸ੍ਸੇਤੁਂ ‘‘ਝਾਨਂ ਹੁਤ੍ਵਾ ਅਪ੍ਪੇਤੁਂ, ਇਦ੍ਧਿ ਹੁਤ੍ਵਾ ਵਿਕੁਬ੍ਬਿਤੁਞ੍ਚ ਨ ਸਕ੍ਕੋਤੀ’’ਤਿ (ਵਿਭ. ਮੂਲਟੀ. ੮੩੧) ਵੁਤ੍ਤਂ, ਨ ਪਨ ਕਸ੍ਸਚਿ ਬਲਸ੍ਸ ਝਾਨਇਦ੍ਧਿਭਾਵੋਤਿ ਦਟ੍ਠਬ੍ਬਂ.

ਵਿਚਯਹਾਰਸਮ੍ਪਾਤਵਣ੍ਣਨਾ ਨਿਟ੍ਠਿਤਾ.