੧੬. ਸਮਾਰੋਪਨਹਾਰਵਿਭਙ੍ਗਵਣ੍ਣਨਾ

੫੦. ਸੁਤ੍ਤੇਨ ਗਹਿਤੇਤਿ ਸੁਤ੍ਤੇ ਵੁਤ੍ਤੇ. ਪਦਟ੍ਠਾਨਗ੍ਗਹਣਂ ਅਧਿਟ੍ਠਾਨਵਿਸਯਦਸ੍ਸਨਤ੍ਥਂ, ਵੇਵਚਨਗ੍ਗਹਣਂ ਅਧਿਵਚਨਵਿਭਾਗਦਸ੍ਸਨਤ੍ਥਨ੍ਤਿ ਯੋਜਨਾ. ਵਿਸਯਾਧਿਟ੍ਠਾਨਭਾਵਤੋਤਿ ਵਿਸਯਸਙ੍ਖਾਤਪਵਤ੍ਤਿਟ੍ਠਾਨਭਾਵਤੋ. ਵਨੀਯਤੀਤਿ ਭਜੀਯਤਿ. ਵਨਤੀਤਿ ਭਜਤਿ ਸੇਵਤਿ. ਵਨੁਤੇਤਿ ਯਾਚਤਿ, ਪਤ੍ਥੇਤੀਤਿ ਅਤ੍ਥੋ. ਪਞ੍ਚ ਕਾਮਗੁਣਾ ਕਾਮਤਣ੍ਹਾਯ ਕਾਰਣਂ ਹੋਤਿ ਆਰਮ੍ਮਣਪਚ੍ਚਯਤਾਯ. ਨਿਮਿਤ੍ਤਗ੍ਗਾਹੋ ਅਨੁਬ੍ਯਞ੍ਜਨਗ੍ਗਾਹਸ੍ਸ ਕਾਰਣਂ ਹੋਤਿ ਉਪਨਿਸ੍ਸਯਤਾਯਾਤਿ ਏਵਂ ਸੇਸੇਸੁਪਿ ਯਥਾਰਹਂ ਕਾਰਣਤਾ ਵਤ੍ਤਬ੍ਬਾ.

੫੧. ‘‘ਕਾਯੇ ਕਾਯਾਨੁਪਸ੍ਸੀ ਵਿਹਰਾਹੀ’’ਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਹੇਟ੍ਠਾ ਲਕ੍ਖਣਹਾਰਵਿਭਙ੍ਗਵਣ੍ਣਨਾਯਂ (ਨੇਤ੍ਤਿ. ਅਟ੍ਠ. ੨੩) ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਅਯਂ ਪਨ ਵਿਸੇਸੋ – ਰੂਪਧਮ੍ਮਪਰਿਞ੍ਞਾਯਾਤਿ ਰੂਪੂਪਿਕਵਿਞ੍ਞਾਣਟ੍ਠਿਤਿਪਰਿਞ੍ਞਾਯ.

‘‘ਦੁਕ੍ਖ’’ਨ੍ਤਿ ਪਸ੍ਸਨ੍ਤੀ ਸਾ ਵੇਦਨਾਨੁਪਸ੍ਸਨਾਤਿ ਯੋਜੇਤਬ੍ਬਂ. ਵੇਦਨਾਹੇਤੁਪਰਿਞ੍ਞਾਯਾਤਿ ਫਸ੍ਸਪਰਿਞ੍ਞਾਯ. ‘‘ਵੇਦਨਾਵਸੇਨਾ’’ਤਿ ਪਦੇਨ ਅਤ੍ਤਨਾ ਉਪ੍ਪਾਦਿਤਦੁਕ੍ਖਵਸੇਨ. ਵੇਦਨਾਪਰਿਞ੍ਞਾਯਾਤਿ ਵੇਦਨੂਪਿਕਵਿਞ੍ਞਾਣਟ੍ਠਿਤਿਪਰਿਞ੍ਞਾਯ. ਨਿਚ੍ਚਾਭਿਨਿਵੇਸਪਟਿਪਕ੍ਖਤੋ ਅਨਿਚ੍ਚਾਨੁਪਸ੍ਸਨਾਯਾਤਿ ਅਧਿਪ੍ਪਾਯੋ. ਨਿਚ੍ਚਸਞ੍ਞਾਨਿਮਿਤ੍ਤਸ੍ਸਾਤਿ ਨਿਚ੍ਚਸਞ੍ਞਾਹੇਤੁਕਸ੍ਸ. ਸਞ੍ਞਾਪਰਿਞ੍ਞਾਯਾਤਿ ਸਞ੍ਞੂਪਿਕਵਿਞ੍ਞਾਣਟ੍ਠਿਤਿਪਰਿਞ੍ਞਾਯ. ਪਠਮਮਗ੍ਗਵਜ੍ਝਤ੍ਤਾ ਅਗਤਿਗਮਨਸ੍ਸ ਵੁਤ੍ਤਂ ‘‘ਦਿਟ੍ਠਾਭਿਨਿਵੇਸਸ੍ਸ…ਪੇ… ਅਗਤਿਗਮਨਸ੍ਸ ਚਾ’’ਤਿ.

ਸਙ੍ਖਾਰਪਰਿਞ੍ਞਾਯਾਤਿ ਸਙ੍ਖਾਰੂਪਿਕਵਿਞ੍ਞਾਣਟ੍ਠਿਤਿਪਰਿਞ੍ਞਾਯ.

ਸਮਾਰੋਪਨਹਾਰਵਿਭਙ੍ਗਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤਾ ਚ ਹਾਰਵਿਭਙ੍ਗਵਣ੍ਣਨਾ.