੧. ਦੇਸਨਾਹਾਰਵਿਭਙ੍ਗਵਣ੍ਣਨਾ

੫. ਅਨ੍ਵਤ੍ਥਸਞ੍ਞਤਨ੍ਤਿ ਅਤ੍ਥਾਨੁਗਤਸਞ੍ਞਭਾਵਂ, ‘‘ਦੇਸਨਾਹਾਰੋ’’ਤਿ ਅਯਂ ਸਞ੍ਞਾ ਅਨ੍ਵਤ੍ਥਾ ਅਤ੍ਥਾਨੁਗਤਾਤਿ ਅਤ੍ਥੋ.

ਅਵੁਤ੍ਤਮੇਵਾਤਿ ਪੁਬ੍ਬੇ ਅਸਂਵਣ੍ਣਿਤਪਦਮੇਵ. ‘‘ਧਮ੍ਮਂ ਵੋ’’ਤਿਆਦਿ (ਮ. ਨਿ. ੩.੪੨੦) ਵਚਨਸ੍ਸ ਸਮ੍ਬਨ੍ਧਂ ਦਸ੍ਸੇਤੁਂ ‘‘ਕਤ੍ਥ ਪਨਾ’’ਤਿਆਦਿ ਵੁਤ੍ਤਂ. ਤੇਪਿਟਕਸ੍ਸ ਹਿ ਬੁਦ੍ਧਵਚਨਸ੍ਸ ਸਂਵਣ੍ਣਨਾਲਕ੍ਖਣਂ ਨੇਤ੍ਤਿਪ੍ਪਕਰਣਂ, ਤਞ੍ਚ ਪਰਿਯਤ੍ਤਿਧਮ੍ਮਸਙ੍ਗਾਹਕੇ ਸੁਤ੍ਤਪਦੇ ਸਂਵਣ੍ਣੇਤਬ੍ਬਭਾਵੇਨ ਗਹਿਤੇ ਗਹਿਤਮੇਵ ਹੋਤਿ. ਤੇਨਾਹ ‘‘ਦੇਸਨਾਹਾਰੇਨ…ਪੇ… ਦਸ੍ਸੇਤੀ’’ਤਿ.

ਯੇਸਂ ਅਸ੍ਸਾਦਾਦੀਨਂ ਵਿਭਜਨਲਕ੍ਖਣੋ ਦੇਸਨਾਹਾਰੋ, ਤੇ ਗਾਥਾਯ, ਇਧਾਪਿ ਚ ਆਗਤੇ ‘‘ਅਸ੍ਸਾਦਂ ਆਦੀਨਵ’’ਨ੍ਤਿਆਦਿਨਾ ਉਦਾਹਰਣਵਸੇਨ ਵਿਭਜਿਤੁਂ ‘‘ਤਤ੍ਥ ਕਤਮੋ ਅਸ੍ਸਾਦੋ’’ਤਿਆਦਿ ਆਰਦ੍ਧਂ. ਤਤ੍ਥ ਤਤ੍ਥਾਤਿ ਤਸ੍ਸਂ ‘‘ਅਸ੍ਸਾਦਾਦੀਨਵਤਾ’’ਤਿ ਗਾਥਾਯਂ ਵੁਤ੍ਤੋ ਕਤਮੋ ਅਸ੍ਸਾਦੋ. ਅਥ ਵਾ ‘‘ਅਸ੍ਸਾਦਂ ਆਦੀਨਵ’’ਨ੍ਤਿਆਦਿਨਾ ਯੋ ਇਧ ਅਸ੍ਸਾਦਾਦੀਨਂ ਉਦ੍ਦੇਸੋ, ਤਤ੍ਥ ਕਤਮੋ ਅਸ੍ਸਾਦੋਤਿ ਚੇਤਿ ਅਤ੍ਥੋ. ਏਸ ਨਯੋ ਸੇਸੇਸੁਪਿ. ਕਮ੍ਮਕਰਣਤ੍ਥਭਿਨ੍ਨਸ੍ਸ ਵਿਸਯਵਿਸਯਿਤਾਲਕ੍ਖਣਸ੍ਸ ਅਸ੍ਸਾਦਦ੍ਵਯਸ੍ਸ ਨਿਦਸ੍ਸਨਤ੍ਥਂ ਗਾਥਾਦ੍ਵਯੁਦਾਹਰਣਂ, ਤਥਾ ਕਾਮਵਿਪਰਿਣਾਮਲਕ੍ਖਣਸ੍ਸ, ਵਟ੍ਟਦੁਕ੍ਖਲਕ੍ਖਣਸ੍ਸ ਚਾਤਿ ਦੁਵਿਧਸ੍ਸਾਪਿ ਆਦੀਨਵਸ੍ਸ ਨਿਦਸ੍ਸਨਤ੍ਥਂ ‘‘ਅਰਿਯਮਗ੍ਗੋ ਨਿਬ੍ਬਾਨ’’ਨ੍ਤਿ ਦੁਵਿਧਸ੍ਸਾਪਿ ਨਿਸ੍ਸਰਣਸ੍ਸ ਨਿਦਸ੍ਸਨਨਿਦਸ੍ਸਨਤ੍ਥਞ੍ਚ ਦ੍ਵੇ ਦ੍ਵੇ ਗਾਥਾ ਉਦਾਹਟਾ.

ਧਮ੍ਮੋ ਹਵੇ ਰਕ੍ਖਤਿ ਧਮ੍ਮਚਾਰਿਨ੍ਤਿ (ਜਾ. ੧.੧੦.੧੦੨-੧੦੩; ਨੇਤ੍ਤਿ. ੫, ੨੬, ੩੧; ਪੇਟਕੋ. ੨੨) ਏਤ੍ਥ ਧਮ੍ਮਚਾਰਿਨੋ ਮਗ੍ਗਫਲਨਿਬ੍ਬਾਨੇਹਿ ਸਾਤਿਸਯਾਰਕ੍ਖਾ ਸਮ੍ਭਵਤਿ, ਸਮ੍ਪਤ੍ਤਿਭਵਸ੍ਸਾਪਿ ਵਿਪਰਿਣਾਮਸਙ੍ਖਾਰਦੁਕ੍ਖਤਾਹਿ ਦੁਗ੍ਗਤਿਭਾਵੋ ਇਚ੍ਛਿਤੋਵਾਤਿ ਅਧਿਪ੍ਪਾਯੇਨਾਹ ‘‘ਨਿਸ੍ਸਰਣਂ ਅਨਾਮਸਿਤ੍ਵਾ’’ਤਿ. ਤਥਾ ਹਿ ਵਕ੍ਖਤਿ ‘‘ਨਿਬ੍ਬਾਨਂ ਵਾ ਉਪਨਿਧਾਯ ਸਬ੍ਬਾ ਉਪਪਤ੍ਤਿਯੋ ਦੁਗ੍ਗਤੀ’’ਤਿ.

ਅਵੇਕ੍ਖਸ੍ਸੂਤਿ ਵਿਧਾਨਂ. ਤਸ੍ਸਾ ਪਨ ਅਵੇਕ੍ਖਾਯ ਪਵਤ੍ਤਿਆਕਾਰੋ, ਵਿਸਯੋ, ਕਤ੍ਤਾ ਚ ‘‘ਸੁਞ੍ਞਤੋ, ਲੋਕਂ, ਮੋਘਰਾਜਾ’’ਤਿ ਪਦਤ੍ਤਯੇਨ ਵੁਤ੍ਤਾਤਿ ਆਹ – ‘‘ਸੁਞ੍ਞਤੋ…ਪੇ… ਆਣਤ੍ਤੀ’’ਤਿ. ਤਤ੍ਥ ਸਙ੍ਖਾਰਾਨਂ ਸੁਞ੍ਞਤਾ ਅਨਤ੍ਤਸਭਾਵਤਾਯ, ਅਤ੍ਤਸੁਞ੍ਞਤਾਯ ਚ ਸਿਯਾ. ਯਤੋ ਤੇ ਨ ਵਸਵਤ੍ਤਿਨੋ, ਅਤ੍ਤਸਾਰਵਿਰਹਿਤਾ ਚ, ਯਤੋ ਤੇ ਅਨਤ੍ਤਾ, ਰਿਤ੍ਤਾ, ਤੁਚ੍ਛਾ ਚ ਅਤ੍ਤਨਾ, ਤਦੁਭਯਂ ਦਸ੍ਸੇਤਿ ‘‘ਅਵਸਵਤ੍ਤਿਤਾ’’ਤਿਆਦਿਨਾ. ਏਵਂ ਮਚ੍ਚੁਤਰੋ ਸਿਯਾਤਿ ਏਵਂ ਪਟਿਪਤ੍ਤਿਯਾ ਮਚ੍ਚੁਤਰੋ ਭਵੇਯ੍ਯਾਤਿ ਅਤ੍ਥੋ. ਪਰਿਕਪ੍ਪੇਤ੍ਵਾ ਵਿਧਿਯਮਾਨਸ੍ਸ ਮਚ੍ਚੁਤਰਣਸ੍ਸ ਪੁਬ੍ਬਭਾਗਪਟਿਪਦਾ ਦੇਸਨਾਯ ਪਚ੍ਚਕ੍ਖਤੋ ਸਿਜ੍ਝਮਾਨਂ ਸਾਤਿਸਯਂ ਫਲਨ੍ਤਿ ਆਹ ‘‘ਤਸ੍ਸ ਯਂ…ਪੇ… ਫਲ’’ਨ੍ਤਿ.

੬. ਉਦਾਹਰਣਵਸੇਨਾਤਿ ਨਿਦਸ੍ਸਨਵਸੇਨ. ਤਤ੍ਥ ‘‘ਪੁਗ੍ਗਲਵਿਭਾਗੇਨਾ’’ਤਿ ਇਮਿਨਾ ਉਗ੍ਘਟਿਤਞ੍ਞੁਆਦਿਪੁਗ੍ਗਲਪਯੋਜਿਤੋ ਅਸ੍ਸਾਦਾਦੀਸੁ ਭਗਵਤੋ ਦੇਸਨਾਵਿਸੇਸੋਤਿ ਦਸ੍ਸੇਤਿ.

ਘਟਿਤਮਤ੍ਤਨ੍ਤਿ ਸੋਤਦ੍ਵਾਰਾਨੁਸਾਰੇਨ ਮਨੋਦ੍ਵਾਰਿਕਵਿਞ੍ਞਾਣਸਨ੍ਤਾਨੇਨ ਆਲਮ੍ਬਿਤਮਤ੍ਤਂ. ਸਸ੍ਸਤਾਦਿਆਕਾਰਸ੍ਸਾਤਿ ਸਸ੍ਸਤੁਚ੍ਛੇਦਾਕਾਰਸ੍ਸ. ਇਦਞ੍ਹਿ ਦ੍ਵਯਂ ਧਮ੍ਮਦੇਸਨਾਯ ਚਾਲੇਤਬ੍ਬਂ, ਨ ਅਨੁਲੋਮਿਕਖਨ੍ਤਿ, ਯਥਾਭੂਤਞਾਣਂ ਵਾ. ਏਤਸ੍ਮਿਞ੍ਹਿ ਚਤੁਕ੍ਕੇ ਆਸਯਸਾਮਞ੍ਞਤਾ. ਵੁਤ੍ਤਞ੍ਹੇਤਂ –

‘‘ਸਸ੍ਸਤੁਚ੍ਛੇਦਦਿਟ੍ਠੀ ਚ, ਖਨ੍ਤਿ ਚੇਵਾਨੁਲੋਮਿਕਾ;

ਯਥਾਭੂਤਞ੍ਚ ਯਂ ਞਾਣਂ, ਏਤਂ ਆਸਯਸਞ੍ਞਿਤ’’ਨ੍ਤਿ. (ਵਿਸੁਦ੍ਧਿ. ਮਹਾਟੀ. ੧.੧੩੬; ਦੀ. ਨਿ. ਟੀ. ੧.ਪਠਮਮਹਾਸਙ੍ਗੀਤਿਕਥਾਵਣ੍ਣਨਾ; ਸਾਰਤ੍ਥ. ਟੀ. ੧.ਪਠਮਮਹਾਸਙ੍ਗੀਤਿਕਥਾਵਣ੍ਣਨਾ, ਵੇਰਞ੍ਜਕਣ੍ਡਵਣ੍ਣਨਾ; ਵਿ. ਵਿ. ਟੀ. ੧.ਵੇਰਞ੍ਜਕਣ੍ਡਵਣ੍ਣਨਾ);

ਚਲਨਾਯਾਤਿ ਵਿਕ੍ਖਮ੍ਭਨਾਯ. ਪਰਾਨੁਵਤ੍ਤਿਯਾਤਿ ਸਮੁਚ੍ਛੇਦਨਾਯ. ਉਗ੍ਘਟਿਤੇ ਜਾਨਾਤੀਤਿ ਉਗ੍ਘਟਿਤਞ੍ਞੂਤਿ ਮੂਲਵਿਭੁਜਾਦਿਪਕ੍ਖੇਪੇਨ ਸਦ੍ਦਸਿਦ੍ਧਿ ਵੇਦਿਤਬ੍ਬਾ. ਵਿਪਞ੍ਚਿਤਨ੍ਤਿ ‘‘ਵਿਸਮਂ ਚਨ੍ਦਿਮਸੂਰਿਯਾ ਪਰਿਵਤ੍ਤਨ੍ਤੀ’’ਤਿਆਦੀਸੁ (ਅ. ਨਿ. ੪.੭੦) ਵਿਯ ਭਾਵਨਪੁਂਸਕਨਿਦ੍ਦੇਸੋਤਿ ਆਹ ‘‘ਮਨ੍ਦਂ ਸਣਿਕ’’ਨ੍ਤਿ. ਨਿਸ੍ਸਰਣਆਦੀਨਵਨਿਸ੍ਸਰਣਅਸ੍ਸਾਦਾਦੀਨਵਨਿਸ੍ਸਰਣਾਨਂ ਵਿਭਾਵਨਾ ਵੇਨੇਯ੍ਯਤ੍ਤਯਵਿਨਯਨਸਮਤ੍ਥਾ.

ਚਤ੍ਤਾਰੋਤਿ ਅਸ੍ਸਾਦੋ ਚ ਆਦੀਨਵੋ ਚ ਅਸ੍ਸਾਦੋ ਆਦੀਨਵੋ ਚ ਅਸ੍ਸਾਦੋ ਨਿਸ੍ਸਰਣਞ੍ਚਾਤਿ ਏਤੇ ਚਤ੍ਤਾਰੋ. ਯਦਿ ਨਿਸ੍ਸਰਣਵਿਭਾਵਨਾ ਵੇਨੇਯ੍ਯਵਿਨਯਨਸਮਤ੍ਥਾ, ਕਸ੍ਮਾ ਪਞ੍ਚਮੋ ਨ ਗਹਿਤੋਤਿ ਆਹ ‘‘ਆਦੀਨਵਾਵਚਨਤੋ’’ਤਿ. ਯਦਿ ਹਿ ਉਗ੍ਘਟਿਤਞ੍ਞੁਂ ਸਨ੍ਧਾਯ ਅਯਂ ਨਯੋ ਵੁਚ੍ਚਤਿ, ਨਿਸ੍ਸਰਣਮਤ੍ਤੇਨ ਸਿਦ੍ਧਂ ਸਿਯਾ. ਅਥ ਵਿਪਞ੍ਚਿਤਞ੍ਞੁਂ, ਨੇਯ੍ਯਂ ਵਾ, ਆਦੀਨਵੋ ਚ ਨਿਸ੍ਸਰਣਞ੍ਚ ਅਸ੍ਸਾਦੋ ਚ ਆਦੀਨਵੋ ਨਿਸ੍ਸਰਣਞ੍ਚ ਵਤ੍ਤਬ੍ਬੋ ਸਿਯਾ? ਤਥਾ ਅਪ੍ਪਵਤ੍ਤਤ੍ਤਾ ਨ ਗਹਿਤੋ. ਤੇਨਾਹ ‘‘ਆਦੀਨਵਾਵਚਨਤੋ’’ਤਿਆਦਿ. ਦੇਸਨਨ੍ਤਿ ਸਾਮਞ੍ਞਤੋ ਗਹਿਤਂ ‘‘ਸੁਤ੍ਤੇਕਦੇਸਂ ਗਾਥਂ ਵਾ’’ਤਿ ਵਿਸੇਸੇਤਿ. ਪਦਪਰਮਅਗ੍ਗਹਣਞ੍ਚੇਤ੍ਥ ਸਉਪਾਯਸ੍ਸ ਨਿਸ੍ਸਰਣਸ੍ਸ ਅਨਾਮਟ੍ਠਤ੍ਤਾ.

‘‘ਕਲ੍ਯਾਣ’’ਨ੍ਤਿ ਇਮਿਨਾ ਇਟ੍ਠਵਿਪਾਕੋ, ‘‘ਪਾਪਕ’’ਨ੍ਤਿ ਅਨਿਟ੍ਠਵਿਪਾਕੋ ਅਧਿਪ੍ਪੇਤੋਤਿ ਆਹ ‘‘ਅਯਂ ਅਸ੍ਸਾਦੋ, ਅਯਂ ਆਦੀਨਵੋ’’ਤਿ. ਲਾਭਾਦੀਨਂ ਪੁਞ੍ਞਫਲਤ੍ਤਾ ਤਦਨੁਰੋਧਂ ਵਾ ਸਨ੍ਧਾਯ ‘‘ਅਯਂ ਅਸ੍ਸਾਦੋ’’ਤਿ ਵੁਤ੍ਤਂ. ਤਬ੍ਬਿਪਰਿਯਾਯੇਨ ਅਲਾਭਾਦੀਨਂ ਆਦੀਨਵਤਾ ਵੇਦਿਤਬ੍ਬਾ.

ਕਾਮਾਤਿ ਕਿਲੇਸਕਾਮਸਹਿਤਾ ਵਤ੍ਥੁਕਾਮਾ. ਵਿਰੂਪਰੂਪੇਨਾਤਿ ਅਪ੍ਪਤਿਰੂਪਾਕਾਰੇਨ. ਮਥੇਨ੍ਤੀਤਿ ਮਦ੍ਦਨ੍ਤਿ. ਪਬ੍ਬਜਿਤੋਮ੍ਹੀਤਿ ਪਬ੍ਬਜ੍ਜਂ ਉਪਗਤੋ ਅਮ੍ਹਿ. ਅਪਣ੍ਣਕਨ੍ਤਿ ਅਵਿਰਜ੍ਝਨਕਂ. ਸਾਮਞ੍ਞਨ੍ਤਿ ਸਮਣਭਾਵੋ. ਸਮਿਤਪਾਪਭਾਵੋਯੇਵ ਸੇਯ੍ਯੋ ਸੁਨ੍ਦਰਤਰੋ.

ਤਤ੍ਥ ‘‘ਕਾਮਾ ਹਿ ਚਿਤ੍ਰਾ ਮਧੁਰਾ ਮਨੋਰਮਾ’’ਤਿ ਅਯਂ ਅਸ੍ਸਾਦੋ, ‘‘ਵਿਰੂਪਰੂਪੇਨ ਮਥੇਨ੍ਤਿ ਚਿਤ੍ਤ’’ਨ੍ਤਿ ਅਯਂ ਆਦੀਨਵੋ, ‘‘ਅਪਣ੍ਣਕਂ ਸਾਮਞ੍ਞ’’ਨ੍ਤਿ ਇਦਂ ਨਿਸ੍ਸਰਣਨ੍ਤਿ ਆਹ ‘‘ਅਯਂ…ਪੇ… ਨਿਸ੍ਸਰਣਞ੍ਚਾ’’ਤਿ.

ਫਲਾਦੀਨਂ ਏਕਕਵਸੇਨ ਚ ਤਿਕਵਸੇਨ ਚ ਪਾਲ਼ਿਯਂ ਉਦਾਹਟਤ੍ਤਾ ਵੁਤ੍ਤਂ ‘‘ਦੁਕਵਸੇਨਪੀ’’ਤਿ.

ਸੁਖਾ ਪਟਿਪਦਾ, ਦੁਕ੍ਖਾ ਪਟਿਪਦਾਤਿ ਯਾ ਦ੍ਵੇ ਪਟਿਪਦਾ, ਤਾਸੁ ਏਕੇਕਾ ਦਨ੍ਧਖਿਪ੍ਪਾਭਿਞ੍ਞਤਾਯ ਦ੍ਵੇ ਦ੍ਵੇ ਹੋਨ੍ਤੀਤਿ ਆਹ ‘‘ਪਟਿਪਦਾਭਿਞ੍ਞਾਕਤੋ ਵਿਭਾਗੋ ਪਟਿਪਦਾਕਤੋ ਹੋਤੀ’’ਤਿ. ਕਤਪੁਬ੍ਬਕਿਚ੍ਚਸ੍ਸ ਪਥਵੀਕਸਿਣਾਦੀਸੁ ਸਬ੍ਬਪਠਮਂ ‘‘ਪਥਵੀ’’ਤਿਆਦਿਨਾ ਪਵਤ੍ਤਮਨਸਿਕਾਰੋ ਪਠਮਸਮਨ੍ਨਾਹਾਰੋ. ਉਪਚਾਰਨ੍ਤਿ ਉਪਚਾਰਜ੍ਝਾਨਂ. ਪਟਿਪਜ੍ਜਿਤਬ੍ਬਤਾਯ ਝਾਨਮ੍ਪਿ ‘‘ਪਟਿਪਦਾ’’ਤਿ ਵੁਚ੍ਚਤਿ. ਤਦਞ੍ਞਾ ਹੇਟ੍ਠਿਮਪਞ੍ਞਤੋ ਅਧਿਕਾ ਪਞ੍ਞਾਤਿ ਕਤ੍ਵਾ ‘‘ਅਭਿਞ੍ਞਾ’’ਤਿ ਵੁਚ੍ਚਤਿ.

ਕਿਲੇਸੇਤਿ ਨੀਵਰਣਪ੍ਪਕਾਰੇ, ਤਂਸਹਗਤਕਿਲੇਸੇ ਚ. ਅਙ੍ਗਪਾਤੁਭਾਵਨ੍ਤਿ ਵਿਤਕ੍ਕਾਦਿਝਾਨਙ੍ਗਪਟਿਲਾਭਂ.

ਅਭਿਨਿਵਿਸਨ੍ਤੋਤਿ ਪਟ੍ਠਪੇਨ੍ਤੋ. ਰੂਪਾਰੂਪਂ ਪਰਿਗ੍ਗਣ੍ਹਨ੍ਤੋਤਿ ਰੂਪਾਰੂਪਧਮ੍ਮੇ ਲਕ੍ਖਣਾਦੀਹਿ ਪਰਿਚ੍ਛਿਨ੍ਦਿਤ੍ਵਾ ਗਣ੍ਹਨ੍ਤੋ. ਪਰਿਗ੍ਗਹਿਤਰੂਪਾਰੂਪਸ੍ਸ ਮਗ੍ਗਪਾਤੁਭਾਵਦਨ੍ਧਤਾ ਚ ਨਾਮਰੂਪਵਵਤ੍ਥਾਨਾਦੀਨਂ ਕਿਚ੍ਛਸਿਦ੍ਧਿਯਾ ਸਿਯਾਤਿ ਨ ਰੂਪਾਰੂਪਪਰਿਗ੍ਗਹਕਿਚ੍ਛਤਾਯ ਏਵ ਦੁਕ੍ਖਾਪਟਿਪਦਤਾ ਵਤ੍ਤਬ੍ਬਾਤਿ ਚੇ? ਨ, ਨਾਮਰੂਪਵਵਤ੍ਥਾਪਨਾਦੀਨਂ ਪਚ੍ਚਨੀਕਕਿਲੇਸਮਨ੍ਦਤਾਯ ਸੁਖਸਿਦ੍ਧਿਯਮ੍ਪਿ ਤਥਾਸਿਦ੍ਧਵਿਪਸ੍ਸਨਾਸਹਗਤਾਨਂ ਇਨ੍ਦ੍ਰਿਯਾਨਂ ਮਨ੍ਦਤਾਯ ਮਗ੍ਗਪਾਤੁਭਾਵਤੋ. ਰੂਪਾਰੂਪਂ ਪਰਿਗ੍ਗਹੇਤ੍ਵਾਤਿ ਅਕਿਚ੍ਛੇਨਪਿ ਪਰਿਗ੍ਗਹੇਤ੍ਵਾ, ਕਿਚ੍ਛੇਨ ਪਰਿਗ੍ਗਹਿਤੇ ਵਤ੍ਤਬ੍ਬਮੇਵ ਨਤ੍ਥਿ. ਏਵਂ ਸੇਸੇਸੁਪਿ. ਨਾਮਰੂਪਂ ਵਵਤ੍ਥਾਪੇਨ੍ਤੋਤਿ ‘‘ਨਾਮਰੂਪਮਤ੍ਤਮੇਤਂ, ਨ ਅਞ੍ਞੋ ਕੋਚਿ ਸਤ੍ਤਾਦਿਕੋ’’ਤਿ ਵਵਤ੍ਥਾਪਨਂ ਕਰੋਨ੍ਤੋ. ਕਤਰੋ ਪਨੇਤ੍ਥ ਵਾਰੋ ਯੁਤ੍ਤਰੂਪੋਤਿ? ਯੋ ਕੋਚਿ ਸਕਿਂ, ਦ੍ਵਿਕ੍ਖਤ੍ਤੁਂ, ਅਨੇਕਸਤਕ੍ਖਤ੍ਤੁਨ੍ਤਿ ਏਵਮਾਦੀਸੁ ਹਿ ਵਿਕ੍ਖਮ੍ਭਨਵਾਰੇਸੁ ਸਕਿਂ, ਦ੍ਵਿਕ੍ਖਤ੍ਤੁਞ੍ਚ ਵਿਕ੍ਖਮ੍ਭਨਵਾਰੋ ਸੁਖਾ ਪਟਿਪਦਾ ਏਵ, ਨ ਤਤੋ ਉਦ੍ਧਂ ਸੁਖਾ ਪਟਿਪਦਾ ਹੋਤਿ, ਤਸ੍ਮਾ ਤਿਕ੍ਖਤ੍ਤੁਂ ਵਿਕ੍ਖਮ੍ਭਨਵਾਰਤੋ ਪਟ੍ਠਾਯ ਦੁਕ੍ਖਾ ਪਟਿਪਦਾ ਵੇਦਿਤਬ੍ਬਾ. ਅਪਿਚ ਕਲਾਪਸਮ੍ਮਸਨਾਵਸਾਨੇ ਉਦਯਬ੍ਬਯਾਨੁਪਸ੍ਸਨਾਯ ਉਪ੍ਪਨ੍ਨਸ੍ਸ ਵਿਪਸ੍ਸਨੁਪਕ੍ਕਿਲੇਸਸ੍ਸ ਤਿਕ੍ਖਤ੍ਤੁਂ ਵਿਕ੍ਖਮ੍ਭਨੇਨ ਕਿਚ੍ਛਤਾਵਾਰੋ ਦੁਕ੍ਖਾ ਪਟਿਪਦਾ ਵੇਦਿਤਬ੍ਬਾ. ਏਤ੍ਥ ਦਨ੍ਧਤ੍ਤਾ ਪਟਿਪਦਾਯ ਏਤਸ੍ਸ ਅਕਿਚ੍ਛਤ੍ਤੇਪਿ ਪੁਰਿਮਾਨਂ ਕਿਚ੍ਛਤ੍ਤੇ ਦੁਕ੍ਖਾਪਟਿਪਦਤਾ ਵੁਤ੍ਤਨਯਾਵ. ਯਸ੍ਸ ਪਨ ਸਬ੍ਬਤ੍ਥ ਅਕਿਚ੍ਛਤਾ, ਤਸ੍ਸ ਪਰਮੁਕ੍ਕਂਸਗਤਾ ਸੁਖਾ ਪਟਿਪਦਾ ਵੇਦਿਤਬ੍ਬਾ.

ਯਥਾ ਨਾਮਰੂਪਪਰਿਗ੍ਗਹਕਿਚ੍ਛਤਾਯ ਮਗ੍ਗਪਾਤੁਭਾਵਦਨ੍ਧਤਾਯ ਦੁਕ੍ਖਾ ਪਟਿਪਦਾ ਦਨ੍ਧਾਭਿਞ੍ਞਾ ਵੁਤ੍ਤਾ, ਤਥਾ ਤਬ੍ਬਿਪਰਿਯਾਯੇਨ ਚਤੁਤ੍ਥੀ, ਤਦੁਭਯਵੋਮਿਸ੍ਸਤਾਵਸੇਨ ਦੁਤਿਯਾ, ਤਤਿਯਾ ਚ ਞਾਤਬ੍ਬਾਤਿ ਦਸ੍ਸੇਨ੍ਤੋ ਆਹ ‘‘ਇਮਿਨਾ…ਪੇ… ਵੇਦਿਤਬ੍ਬਾ’’ਤਿ. ਵਟ੍ਟਦੁਕ੍ਖਤੋ ਨਿਯ੍ਯਾਨਸ੍ਸ ਅਧਿਪ੍ਪੇਤਤ੍ਤਾ ‘‘ਵਿਪਸ੍ਸਨਾਪਕ੍ਖਿਕਾ ਏਵਾ’’ਤਿ ਵੁਤ੍ਤਂ.

ਹੇਤੁਪਾਯਫਲੇਹੀਤਿ ਏਤ੍ਥ ਤਣ੍ਹਾਚਰਿਤਤਾ, ਮਨ੍ਦਪਞ੍ਞਤਾ ਚ ਪਠਮਾਯ ਪਟਿਪਦਾਯ ਹੇਤੁ, ਤਣ੍ਹਾਚਰਿਤਤਾ, ਉਦਤ੍ਥਪਞ੍ਞਤਾ ਚ ਦੁਤਿਯਾਯ, ਦਿਟ੍ਠਿਚਰਿਤਤਾ, ਮਨ੍ਦਪਞ੍ਞਤਾ ਚ ਤਤਿਯਾਯ, ਦਿਟ੍ਠਿਚਰਿਤਤਾ, ਉਦਤ੍ਥਪਞ੍ਞਤਾ ਚ ਚਤੁਤ੍ਥਿਯਾ. ਉਪਾਯੋ ਪਨ ਯਥਾਕ੍ਕਮਂ ਸਤਿਸਮਾਧਿਵੀਰਿਯਪਞ੍ਞਿਨ੍ਦ੍ਰਿਯਾਨਿ, ਸਤਿਪਟ੍ਠਾਨਝਾਨਸਮ੍ਮਪ੍ਪਧਾਨਸਚ੍ਚਾਨਿ ਚ ਉਪਨਿਸ੍ਸਯਭੂਤਾਨਿ. ਫਲਂ ਵਟ੍ਟਦੁਕ੍ਖਤੋ ਨਿਯ੍ਯਾਨਂ.

ਸਮਾਧਿਮੁਖੇਨਾਤਿ ਸਮਾਧਿਮੁਖੇਨ ਭਾਵਨਾਨੁਯੋਗੇਨ. ਤੇਨੇਵਾਹ ‘‘ਸਮਥਪੁਬ੍ਬਙ੍ਗਮਾਯ ਵਿਪਸ੍ਸਨਾਯਾ’’ਤਿ. ਇਧਾਤਿ ਇਮਸ੍ਮਿਂ ਨੇਤ੍ਤਿਪ੍ਪਕਰਣੇ. ਵਕ੍ਖਤਿ ‘‘ਰਾਗਵਿਰਾਗਾ ਚੇਤੋਵਿਮੁਤ੍ਤਿ ਸੇਕ੍ਖਫਲ’’ਨ੍ਤਿ, ‘‘ਰਾਗਵਿਰਾਗਾ ਚੇਤੋਵਿਮੁਤ੍ਤਿਕਾਮਧਾਤੁਸਮਤਿਕ੍ਕਮ’’ਨ੍ਤਿ ਚ. ਸੋਤਿ ਅਨਾਗਾਮੀ.

ਤੇਨਾਤਿ ਪਟਿਪਕ੍ਖੇਨ. ਤਤੋਤਿ ਪਟਿਪਕ੍ਖਤੋ. ਸਮਾਨਾਧਿਕਰਣਵਸੇਨ ਚ ਚੇਤੋਵਿਮੁਤ੍ਤਿਸਦ੍ਦਾਨਂ ਸਮਾਸਂ ਕਤ੍ਵਾ ਭਿਨ੍ਨਾਧਿਕਰਣਵਸੇਨ ਵਤ੍ਤੁਂ ‘‘ਅਥ ਵਾ’’ਤਿਆਦਿ ਵੁਤ੍ਤਂ. ਪੁਨ ‘‘ਚੇਤਸੋ ਵਾ’’ਤਿਆਦਿਨਾ ਅਞ੍ਞਪਦਤ੍ਥਵਸੇਨ ਚੇਤੋਵਿਮੁਤ੍ਤਿਪਦਾਨਂ ਸਮਾਸਂ ਦਸ੍ਸੇਤਿ. ਵਿਞ੍ਞਾਣਪਰਿਯਾਯੇਨ ਚੇਤੋ-ਸਦ੍ਦੇਨ ਵੁਤ੍ਤਯੋਜਨਾ ਨ ਸਮ੍ਭਵਤੀਤਿ ਆਹ ‘‘ਯਥਾਸਮ੍ਭਵ’’ਨ੍ਤਿ.

ਹਾ-ਸਦ੍ਦੋ ਗਤਿਅਤ੍ਥੋ, ਗਤਿ ਚੇਤ੍ਥ ਞਾਣਗਤਿ ਅਧਿਪ੍ਪੇਤਾਤਿ ਆਹ ‘‘ਹਾਤਬ੍ਬਾਤਿ ਗਮੇਤਬ੍ਬਾ’’ਤਿ. ਨੇਤਬ੍ਬਾਤਿ ਞਾਪੇਤਬ੍ਬਾ.

੭. ਤਨ੍ਤਿ ਪੁਗ੍ਗਲਵਿਭਾਗਂ. ਞਾਣਵਿਭਾਗੇਨਾਤਿ ਸੁਤਮਯਾਦਿਞਾਣਪ੍ਪਭੇਦੇਨ. ਨਿਬ੍ਬਤ੍ਤਨਨ੍ਤਿ ਉਪ੍ਪਾਦਨਂ. ਤਤ੍ਥਾਤਿ ਤਸ੍ਮਿਂ ਉਗ੍ਘਟਿਤਞ੍ਞੁਤਾਤਿਆਦਿਪੁਗ੍ਗਲਵਿਭਾਗਭੂਤੇ ਦੇਸਨਾਭਾਜਨੇ. ਦੇਸਨਾਯਨ੍ਤਿ ਸੁਤ੍ਤੇ. ਤਂ ਦਸ੍ਸੇਤੁਨ੍ਤਿ ਤਂ ਪੁਗ੍ਗਲਵਿਭਾਗਂ ਦਸ੍ਸੇਤੁਂ. ‘‘ਸ੍ਵਾਯਂ ਹਾਰੋ ਕਥਂ ਸਮ੍ਭਵਤੀ’’ਤਿ ਕੇਚਿ ਪਠਨ੍ਤਿ.

ਸਾਤਿ ਵੁਤ੍ਤਪ੍ਪਕਾਰਧਮ੍ਮਤ੍ਥਾਨਂ ਵੀਮਂਸਨਪਞ੍ਞਾ. ਅਧਿਕਾਰਤੋਤਿ ‘‘ਸਤ੍ਥਾ ਵਾ ਧਮ੍ਮਂ ਦੇਸਯਤੀ’’ਤਿਆਦਿਅਧਿਕਾਰਤੋ. ਸਾਮਤ੍ਥਿਯਤੋ ਉਗ੍ਘਟਿਤਞ੍ਞੁਆਦਿਵੇਨੇਯ੍ਯਵਿਨਯਨਸਮਤ੍ਥਭਾਵਤੋ. ਪਰਿਯਤ੍ਤਿਧਮ੍ਮਸ੍ਸ ਉਪਧਾਰਣਨ੍ਤਿ ਏਤ੍ਥਾਪਿ ‘‘ਅਧਿਕਾਰਤੋ ਸਾਮਤ੍ਥਿਯਤੋ ਵਾ’’ਤਿ ਆਨੇਤ੍ਵਾ ਯੋਜੇਤਬ੍ਬਂ.

‘‘ਵੀਮਂਸਾਦਿਪਰਿਯਾਯਵਤੀ ਪਠਮਵਿਕਪ੍ਪਵਸੇਨ, ਵੀਮਂਸਾਦਿਵਿਭਾਗਵਤੀ ਦੁਤਿਯਵਿਕਪ੍ਪਵਸੇਨ, ਚਿਨ੍ਤਾਯ ਹੇਤੁਭੂਤਾਯ ਨਿਬ੍ਬਤ੍ਤਾ ਚਿਨ੍ਤਾਮਯੀ’’ਤਿ ਏਵਮਾਦਿਵੁਤ੍ਤਨਯਾਨੁਸਾਰੇਨ ਸਕ੍ਕਾ ਯੋਜੇਤੁਨ੍ਤਿ ਆਹ ‘‘ਸੇਸਂ ਵੁਤ੍ਤਨਯਮੇਵਾ’’ਤਿ.

ਸੁਤਚਿਨ੍ਤਾਮਯਞਾਣੇਸੂਤਿ ਸੁਤਮਯਞਾਣੇ ਚ ਚਿਨ੍ਤਾਮਯਞਾਣੇ ਚ ਸੁਤਚਿਨ੍ਤਾਮਯਞਾਣੇਸੁ ਚ ਸੁਤਚਿਨ੍ਤਾਮਯਞਾਣੇਸੂਤਿ ਏਕਦੇਸਸਰੂਪੇਕਸੇਸੋ ਵੇਦਿਤਬ੍ਬੋ. ਚਿਨ੍ਤਾਮਯਞਾਣੇਯੇਵ ਹਿ ਪਤਿਟ੍ਠਿਤਾ ਮਹਾਬੋਧਿਸਤ੍ਤਾ ਚਰਿਮਭਵੇ ਵਿਪਸ੍ਸਨਂ ਆਰਭਨ੍ਤਿ, ਇਤਰੇ ਸੁਤਚਿਨ੍ਤਾਮਯਞਾਣੇਸੂਤਿ. ਤੇਹੀਤਿ ਤਥਾ ਪਠਨ੍ਤੇਹਿ. ਵੁਤ੍ਤਨਯੇਨਾਤਿ ‘‘ਉਪਾਦਾਰੂਪਂ ਪਰਿਗ੍ਗਣ੍ਹਾਤਿ, ਅਰੂਪਂ ਪਰਿਗ੍ਗਣ੍ਹਾਤੀ’’ਤਿਆਦਿਨਾ ਪਟਿਪਦਾਕਥਾਯਂ (ਨੇਤ੍ਤਿ. ਅਟ੍ਠ. ੫) ਵੁਤ੍ਤਨਯੇਨ.

੮. ਪਰਤੋ ਘੋਸੋ ਪਚ੍ਚਯਭੂਤੋ ਏਤਿਸ੍ਸਾਤਿ ਅਧਿਪ੍ਪਾਯੋ. ‘‘ਪਚ੍ਚਤ੍ਤਸਮੁਟ੍ਠਿਤੇਨ ਚ ਯੋਨਿਸੋਮਨਸਿਕਾਰੇਨਾ’’ਤਿ ਇਦਂ ਆਵੁਤ੍ਤਿਨਯੇਨ ਦੁਤਿਯਂ ਆਵਟ੍ਟਤੀਤਿ ਵੇਦਿਤਬ੍ਬਂ. ਤੇਨ ਸਾਵਕਾਨਂ ਭਾਵਨਾਮਯਞਾਣੁਪ੍ਪਤ੍ਤਿ ਸਙ੍ਗਹਿਤਾ ਹੋਤਿ. ਸਾਵਕਾਨਮੇਵ ਵਾ ਞਾਣੁਪ੍ਪਤ੍ਤਿ ਇਧਾਧਿਪ੍ਪੇਤਾ ਉਗ੍ਘਟਿਤਞ੍ਞੁਆਦਿਵਿਭਾਗਕਥਨਤੋ. ਏਤਸ੍ਮਿਂ ਪਕ੍ਖੇ ਪੁਬ੍ਬੇ ਵੁਤ੍ਤਏਕਸੇਸਨਯੋਪਿ ਪਟਿਕ੍ਖਿਤ੍ਤੋ ਦਟ੍ਠਬ੍ਬੋ. ‘‘ਆਸਯਪਯੋਗਪਬੋਧਸ੍ਸ ਨਿਪ੍ਫਾਦਿਤਤ੍ਤਾ’’ਤਿ ਏਤੇਨ ਪਚ੍ਛਿਮਚਕ੍ਕਦ੍ਵਯਪਰਿਯਾਪਨ੍ਨਾਨਿ ਪੁਬ੍ਬਹੇਤੁਸਙ੍ਗਹਾਨਿ ਸੁਤਚਿਨ੍ਤਾਮਯਞਾਣਾਨਿ ਸਨ੍ਧਾਯ ‘‘ਇਮਾ ਦ੍ਵੇ ਪਞ੍ਞਾ ਅਤ੍ਥੀ’’ਤਿ ਵੁਤ੍ਤਨ੍ਤਿ ਦਸ੍ਸੇਤਿ. ਅਤ੍ਥਿਭਾਵੋ ਚੇਤਾਸਂ ਪਟਿਪਕ੍ਖੇਨ ਅਨੁਪਦ੍ਦੁਤਤਾ ਵੇਦਿਤਬ੍ਬਾ. ਅਪਰਿਕ੍ਖਤਤ੍ਤਾ ਅਨਭਿਸਙ੍ਖਤਤ੍ਤਾ. ਸੁਤਮਯਞਾਣਸ੍ਸਾਪਿ ਪੁਰਿਮਸਿਦ੍ਧਸ੍ਸ.

੯. ਦੇਸਨਾਪਟਿਪਦਾਞਾਣਵਿਭਾਗੇਹੀਤਿ ਨਿਸ੍ਸਰਣਦੇਸਨਾਦਿਦੇਸਨਾਵਿਭਾਗੇਹਿ, ਦੁਕ੍ਖਾਪਟਿਪਦਾਦਿਪਟਿਪਦਾਵਿਭਾਗੇਹਿ, ਸੁਤਮਯਞਾਣਾਦਿਞਾਣਵਿਭਾਗੇਹਿ.

ਅਵਸਿਟ੍ਠਪਾਰਿਸਜ੍ਜੇਨਾਤਿ ਖਤ੍ਤਿਯਗਹਪਤਿਪਰਿਸਪਰਿਯਾਪਨ੍ਨੇਨ. ਅਟ੍ਠਨ੍ਨਨ੍ਤਿ ਖਤ੍ਤਿਯਪਰਿਸਾ ਬ੍ਰਾਹ੍ਮਣਗਹਪਤਿਸਮਣਚਾਤੁਮਹਾਰਾਜਿਕਤਾਵਤਿਂਸਮਾਰਬ੍ਰਹ੍ਮਪਰਿਸਾਤਿ ਇਮਾਸਂ ਅਟ੍ਠਨ੍ਨਂ.

ਸਮਤ੍ਥੇਤੀਤਿ ਸਮਤ੍ਥਂ ਸਮ੍ਬਨ੍ਧਤ੍ਥਂ ਕਰੋਤਿ.

ਤਮੇਵ ਦ੍ਵਾਦਸਪਦਭਾਵਂ ਦੀਪੇਤ੍ਵਾਤਿ ਸਮ੍ਬਨ੍ਧੋ. ਤਦਤ੍ਥਸ੍ਸਾਤਿ ਛਛਕ੍ਕਪਰਿਯਾਯਤ੍ਥਸ੍ਸ (ਮ. ਨਿ. ੩.੪੨੦ ਆਦਯੋ). ਸਬ੍ਬਪਰਿਯਤ੍ਤਿਧਮ੍ਮਸਙ੍ਗਾਹਕਤ੍ਤਾ ਛਛਕ੍ਕਪਰਿਯਾਯਸ੍ਸ, ਤਦਤ੍ਥਸ੍ਸ ਚ ਧਮ੍ਮਚਕ੍ਕਪ੍ਪਵਤ੍ਤੇਨ ਸੁਤ੍ਤੇਨ (ਸਂ. ਨਿ. ੫.੧੦੮੧; ਮਹਾਵ. ੧੩; ਪਟਿ. ਮ. ੨.੩੦) ਸਙ੍ਗਹਿਤਤ੍ਤਾ ਵੁਤ੍ਤਂ ‘‘ਸਬ੍ਬਸ੍ਸਾਪਿ…ਪੇ… ਵਿਭਾਵੇਨ੍ਤੋ’’ਤਿ. ਵਿਸਯਿਭਾਵੇਨ ਬ੍ਯਞ੍ਜਨਪਦਾਨਂ, ਵਿਸਯਭਾਵੇਨ ਅਤ੍ਥਪਦਾਨਂ ਸਮ੍ਬਨ੍ਧਂ ਸਨ੍ਧਾਯਾਹ ‘‘ਤੇਸਂ…ਪੇ… ਸਮ੍ਬਨ੍ਧਭਾਵ’’ਨ੍ਤਿ.

ਪਦਾਵਯਵੋ ਅਕ੍ਖਰਾਨਿ. ਪਦਤ੍ਥੋਤਿ ਪਦਤ੍ਥਾਵਯਵੋ. ਪਦਤ੍ਥਗ੍ਗਹਣਸ੍ਸਾਤਿ ਪਦਤ੍ਥਾਵਬੋਧਸ੍ਸ. ਵਿਸੇਸਾਧਾਨਂ ਵਿਸੇਸੁਪ੍ਪਤ੍ਤਿ. ਵਾਕ੍ਯਭੇਦੇਤਿ ਵਾਕ੍ਯਵਿਸੇਸੇ. ਚਿਤ੍ਤਪਰਿਤੋਸਨਂ ਚਿਤ੍ਤਾਰਾਧਨਂ. ਬੁਦ੍ਧਿਨਿਸਾਨਂ ਪਞ੍ਞਾਯ ਤੇਜਨਂ ਤਿਕ੍ਖਭਾਵਕਰਣਂ. ਨਾਨਾਵਾਕ੍ਯਵਿਸਯਤਾਪਿ ਸਿਦ੍ਧਾ ਹੋਤਿ ਪਦਾਦੀਹਿਪਿ ਸਙ੍ਕਾਸਨਸ੍ਸ ਸਿਦ੍ਧਤ੍ਤਾ. ਏਕਵਾਕ੍ਯਵਿਸਯਤਾਯ ਹਿ ਅਤ੍ਥਪਦਾਨਂ ਸਙ੍ਕਾਸਨਾਦਯੋ ਯਥਾਕ੍ਕਮਂ ਅਕ੍ਖਰਾਦਿਵਿਸਯਾ ਏਵਾਤਿ ਨਿਯਮੋ ਸਿਯਾ. ਏਤੇਨਾਤਿ ਅਤ੍ਥਪਦਾਨਂ ਨਾਨਾਵਾਕ੍ਯਵਿਸਯਤ੍ਥੇਨ.

ਉਗ੍ਘਟਨਾਦਿਅਤ੍ਥਾਨੀਤਿ ਉਗ੍ਘਟਨਵਿਪਞ੍ਚਨਨਯਨਪ੍ਪਯੋਜਨਾਨਿ.

੧੦. ਉਪਤਿਟ੍ਠਤਿ ਏਤ੍ਥਾਤਿ ਉਪਟ੍ਠਿਤਨ੍ਤਿ ਉਪਟ੍ਠਿਤਸਦ੍ਦਸ੍ਸ ਅਧਿਕਰਣਤ੍ਥਤਂ ਦਸ੍ਸੇਤੁਂ ‘‘ਉਪਤਿਟ੍ਠਨਟ੍ਠਾਨ’’ਨ੍ਤਿ ਵੁਤ੍ਤਂ ਯਥਾ ‘‘ਪਦਕ੍ਕਨ੍ਤ’’ਨ੍ਤਿ. ਤੇਨਾਹ ‘‘ਇਦਂ ਨੇਸ’’ਨ੍ਤਿਆਦਿ. ਪਟਿਪਤ੍ਤਿਦੇਸਨਾਗਮਨੇਹੀਤਿ ਪਟਿਪਤ੍ਤਿਗਮਨਦੇਸਨਾਗਮਨੇਹਿ. ‘‘ਕਿਚ੍ਛਂ ਵਤਾਯਂ ਲੋਕੋ ਆਪਨ੍ਨੋ ਜਾਯਤਿ ਚ…ਪੇ… ਜਰਾਮਰਣਸ੍ਸਾ’’ਤਿਆਦਿਨਾ ਜਰਾਮਰਣਤੋ ਪਟ੍ਠਾਯ ਪਟਿਚ੍ਚਸਮੁਪ੍ਪਾਦਮੁਖੇਨ ਵਿਪਸ੍ਸਨਂ ਅਭਿਨਿਵਿਸਿਤ੍ਵਾ ਮਹਾਗਹਨਂ ਛਿਨ੍ਦਿਤੁਂ ਨਿਸਾਨਸਿਲਾਯਂ ਫਰਸੁਂ ਨਿਸੇਨ੍ਤੋ ਵਿਯ ਕਿਲੇਸਗਹਨਂ ਛਿਨ੍ਦਿਤੁਂ ਲੋਕਨਾਥੋ ਞਾਣਫਰਸੁਂ ਤੇਜੇਨ੍ਤੋ ਬੁਦ੍ਧਭਾਵਾਯ ਹੇਤੁਸਮ੍ਪਤ੍ਤਿਯਾ ਪਰਿਪਾਕਗਤਤ੍ਤਾ ਸਬ੍ਬਞ੍ਞੁਤਞ੍ਞਾਣਾਧਿਗਮਾਯ ਵਿਪਸ੍ਸਨਾਗਬ੍ਭਂ ਗਣ੍ਹਾਪੇਨ੍ਤੋ ਅਨ੍ਤਰਨ੍ਤਰਾ ਨਾਨਾਸਮਾਪਤ੍ਤਿਯੋ ਸਮਾਪਜ੍ਜਿਤ੍ਵਾ ਅਨੁਪਦਧਮ੍ਮਵਿਪਸ੍ਸਨਾਵਸੇਨ ਅਨੇਕਾਕਾਰਵੋਕਾਰਸਙ੍ਖਾਰੇ ਸਮ੍ਮਸਨ੍ਤੋ ਛਤ੍ਤਿਂਸਕੋਟਿਸਤਸਹਸ੍ਸਮੁਖੇਨ ਯਂ ਞਾਣਂ ਪਵਤ੍ਤੇਸਿ, ਤਂ ‘‘ਮਹਾਵਜਿਰਞਾਣ’’ਨ੍ਤਿ ਵਦਨ੍ਤਿ. ਅਟ੍ਠਕਥਾਯਂ ਪਨ ‘‘ਚਤੁਵੀਸਤਿਕੋਟਿਸਤਸਹਸ੍ਸਸਮਾਪਤ੍ਤਿਸਞ੍ਚਾਰਿਮਹਾਵਜਿਰਞਾਣ’’ਨ੍ਤਿ (ਦੀ. ਨਿ. ਅਟ੍ਠ. ੩.੧੪੧) ਆਗਤਂ, ਤਂ ਦੇਵਸਿਕਂ ਵਲ਼ਞ੍ਜਨਕਸਮਾਪਤ੍ਤੀਨਂ ਪੁਰੇਚਰਾਨੁਚਰਞਾਣਂ ਸਨ੍ਧਾਯ ਵੁਤ੍ਤਂ. ਯਂ ਪਨ ਵਕ੍ਖਤਿ ‘‘ਞਾਣਵਜਿਰਮੋਹਜਾਲਪਦਾਲਨ’’ਨ੍ਤਿ, ਤਂ ਸਹ ਵਿਪਸ੍ਸਨਾਯ ਮਗ੍ਗਞਾਣਂ ਵੇਦਿਤਬ੍ਬਂ. ਏਤਂ ਬ੍ਰਹ੍ਮਚਰਿਯਨ੍ਤਿ ਸਾਸਨਬ੍ਰਹ੍ਮਚਰਿਯਂ ਅਧਿਪ੍ਪੇਤਨ੍ਤਿ ਤਂ ਦਸ੍ਸੇਨ੍ਤੋ ‘‘ਬ੍ਰਹ੍ਮੁਨੋ’’ਤਿਆਦਿਮਾਹ.

ਦੇਸਨਾਯਾਤਿ ਕਰਣਤ੍ਥੇ ਇਦਂ ਕਰਣਵਚਨਂ. ਨਿਯੁਤ੍ਤੋਤਿ ਏਤ੍ਥ ਹੇਤੁਅਤ੍ਥੋ ਅਨ੍ਤੋਨੀਤੋਤਿ ਦਸ੍ਸੇਨ੍ਤੋ ‘‘ਨਿਦ੍ਧਾਰੇਤ੍ਵਾ ਯੋਜਿਤੋ’’ਤਿ ਆਹ.

ਦੇਸਨਾਹਾਰਵਿਭਙ੍ਗਵਣ੍ਣਨਾ ਨਿਟ੍ਠਿਤਾ.