੭. ਪਵਾਰਣਾਨਿਦ੍ਦੇਸਵਣ੍ਣਨਾ

੭੩. ਇਦਾਨਿ ਪਵਾਰਣਾਵਿਧਿਂ ਦਸ੍ਸੇਤੁਂ ‘‘ਪਵਾਰਣਾ’’ਤਿ (ਪਾਚਿ. ੨੩੮-੨੩੯; ਪਾਚਿ. ਅਟ੍ਠ. ੨੩੮-੨੩੯; ਕਙ੍ਖਾ. ਅਟ੍ਠ. ਪਠਮਪਵਾਰਣਾਸਿਕ੍ਖਾਪਦਵਣ੍ਣਨਾ) ਪਦਂ ਉਦ੍ਧਟਂ. ਤਤ੍ਥ ਇਰਿਯਾਪਥੇਨਾਤਿ ਠਾਨਗਮਨਸਯਨਨਿਸਜ੍ਜਾਨਂ ਅਞ੍ਞਤਰੇਨ ਇਰਿਯਾਪਥੇਨਾਤਿ ਅਤ੍ਥੋ. ਤਤੋ ਇਰਿਯਾਪਥਤੋ ਅਞ੍ਞੇਨ ਇਰਿਯਾਪਥੇਨ ਅਨਤਿਰਿਤ੍ਤਕਂ ਪਰਿਭੁਞ੍ਜੇਯ੍ਯ ਚੇ, ਪਾਚਿਤ੍ਤਿਯਨ੍ਤਿ ਅਤ੍ਥੋ. ਪਾਚਿਤ੍ਤਿਨਤਿਰਿਤ੍ਤਕਨ੍ਤਿ ਪਾਚਿਤ੍ਤਿ ਅਨਤਿਰਿਤ੍ਤਕਂ.

੭੪. ਇਦਾਨਿ ਯੇਹਿ ਅਙ੍ਗੇਹਿ ਪਵਾਰਣਾ ਹੋਤਿ, ਤਾਨਿ ਅਙ੍ਗਾਨਿ ਦਸ੍ਸੇਤੁਂ ‘‘ਅਸਨ’’ਨ੍ਤਿਆਦਿਮਾਹ. ਤਤ੍ਥ ਅਸਨਨ੍ਤਿ ਏਤੇਨ ਅਵਿਪ੍ਪਕਤਭੋਜਨਤਾ ਵੁਤ੍ਤਾ, ਭੁਞ੍ਜਮਾਨੋ ਚ ਸੋ ਪੁਗ੍ਗਲੋ ਹੋਤੀਤਿ ਅਤ੍ਥੋ. ਭੋਜਨਞ੍ਚੇਵਾਤਿ ਯਂ ਭੁਞ੍ਜਨ੍ਤੋ ਪਵਾਰੇਤਿ, ਤਂ ਓਦਨੋ ਕੁਮ੍ਮਾਸੋ ਸਤ੍ਤੁ ਮਚ੍ਛੋ ਮਂਸਨ੍ਤਿ ਇਮੇਸੁ ਅਞ੍ਞਤਰਂ ਹੋਤੀਤਿ ਅਤ੍ਥੋ. ਅਭਿਹਾਰੋਤਿ ਦਾਯਕੋ ਤਸ੍ਸ ਤਂ ਭਤ੍ਤਂ ਕਾਯੇਨ ਅਭਿਹਰਤੀਤਿ ਅਤ੍ਥੋ, ਵਾਚਾਭਿਹਾਰੋ ਪਨ ਨ ਗਹੇਤਬ੍ਬੋ. ਸਮੀਪਤਾਤਿ ਦਾਯਕੋ ਪਵਾਰਣਪ੍ਪਹੋਨਕਭੋਜਨਂ ਗਹੇਤ੍ਵਾ ਅਡ੍ਢਤੇਯ੍ਯਹਤ੍ਥਪ੍ਪਮਾਣੇ ਓਕਾਸੇ ਹੋਤੀਤਿ ਅਤ੍ਥੋ. ਕਾਯਵਾਚਾਪਟਿਕ੍ਖੇਪੋਤਿ ਹਤ੍ਥਪਾਸੇ ਠਿਤੇਨ ਅਭਿਹਟਂ ਭਿਕ੍ਖਂ ਕਾਯੇਨ ਵਾ ਵਾਚਾਯ ਵਾ ਪਟਿਕ੍ਖਿਪੇਯ੍ਯਾਤਿ ਅਤ੍ਥੋ. ਏਤ੍ਥ ਪਨ ਸਚੇ ਭਿਕ੍ਖੁ ਨਿਸਿਨ੍ਨੋ ਹੋਤਿ, ਆਨਿਸਦਸ੍ਸ ਪਾਰਿਮਨ੍ਤਤੋ ਪਟ੍ਠਾਯ, ਸਚੇ ਠਿਤੋ, ਪਣ੍ਹਿਅਨ੍ਤਤੋ ਪਟ੍ਠਾਯ, ਸਚੇ ਨਿਪਨ੍ਨੋ, ਯੇਨ ਪਸ੍ਸੇਨ ਨਿਪਨ੍ਨੋ, ਤਸ੍ਸ ਪਾਰਿਮਨ੍ਤਤੋ ਪਟ੍ਠਾਯ ਦਾਯਕਸ੍ਸਾਪਿ ਤਥਾਵਿਧਸ੍ਸ ਠਪੇਤ੍ਵਾ ਪਸਾਰਿਤਹਤ੍ਥਂ ਯਂ ਤਸ੍ਸ ਆਸਨ੍ਨਤਰਂ ਅਙ੍ਗਂ, ਤਸ੍ਸ ਵਸੇਨ ਪਰਿਚ੍ਛੇਦੋ ਕਾਤਬ੍ਬੋ. ਪਞ੍ਚ ਅਙ੍ਗਾ ਪਵਾਰਣਾਤਿ ‘‘ਅਸਨਂ ਪਞ੍ਞਾਯਤਿ, ਭੋਜਨਂ ਪਞ੍ਞਾਯਤਿ, ਹਤ੍ਥਪਾਸੇ ਠਿਤੋ ਅਭਿਹਰਤਿ, ਪਟਿਕ੍ਖੇਪੋ ਪਞ੍ਞਾਯਤੀ’’ਤਿ (ਪਾਚਿ. ੨੩੯; ਪਰਿ. ੪੨੮) ਪਾਲ਼ਿਯਂ ਵੁਤ੍ਤੇਹਿ ਇਮੇਹਿ ਪਞ੍ਚਹਿ ਅਙ੍ਗੇਹਿ ਪਵਾਰਣਾ ਹੋਤੀਤਿ ਅਤ੍ਥੋ.

੭੫. ਇਦਾਨਿ ਏਤੇਸੁ ਪਞ੍ਚਸੁ ਭੋਜਨਂ ਦਸ੍ਸੇਤੁਂ ‘‘ਓਦਨੋ’’ਤਿਆਦਿ ਵੁਤ੍ਤਂ. ਇਦਾਨਿ ਓਦਨਾਦਯੋ ਇਮੇਹਿ ਨਿਬ੍ਬਤ੍ਤਾਤਿ ਦਸ੍ਸੇਤੁਂ ‘‘ਸਾਲੀ’’ਤਿਆਦਿਮਾਹ. ਤਤ੍ਥ ਸੇਤਰਤ੍ਤਕਾਲ਼ਭੇਦਾ ਸਬ੍ਬਾਪਿ ਕਙ੍ਗੁਜਾਤਿਯੋ ਕਙ੍ਗੂਤਿ ਗਹੇਤਬ੍ਬਾ. ਕਾਲ਼ਸੇਤਾ ਕੁਦ੍ਰੂਸਵਰਕਾ. ਇਮੇਸਂ ਸਤ੍ਤਨ੍ਨਂ ਧਞ੍ਞਾਨਂ ਓਦਨੋ ਚ ਭੋਜ੍ਜਯਾਗੁ ਚ ਓਦਨੋ ਨਾਮਾਤਿ ਅਤ੍ਥੋ.

੭੬. ਸਾਮਾਕਾਦਿਤਿਣਂ (ਪਾਚਿ. ਅਟ੍ਠ. ੨੩੮-੨੩੯) ਕੁਦ੍ਰੂਸਕੇ ਸਙ੍ਗਹਂ ਗਤਨ੍ਤਿ ਅਤ੍ਥੋ. ਵਰਕਚੋਰਕੋ ਵਰਕੇ ਸਙ੍ਗਹਂ ਗਤੋ, ਸਾਲਿਯਞ੍ਚੇਵ ਨੀਵਾਰੋ ਸਙ੍ਗਹਂ ਗਤੋ ਸੇਤਤ੍ਤਾਤਿ ਵਦਨ੍ਤਿ. ਇਮੇਸਂ ਵੁਤ੍ਤਪ੍ਪਕਾਰਾਨਂ ਸਾਨੁਲੋਮਾਨਂ ਸਤ੍ਤਨ੍ਨਂ ਧਞ੍ਞਾਨਂ ਤਣ੍ਡੁਲੇ ਗਹੇਤ੍ਵਾ ‘‘ਯਾਗੁਂ ਪਚਿਸ੍ਸਾਮਾ’’ਤਿ ਵਾ ‘‘ਭਤ੍ਤਂ ਪਚਿਸ੍ਸਾਮਾ’’ਤਿ ਵਾ ਯਂ ਕਿਞ੍ਚਿ ਸਨ੍ਧਾਯ ਪਚਨ੍ਤਿ, ਸਚੇ ਉਣ੍ਹਂ ਵਾ ਸੀਤਲਂ ਵਾ ਭੁਞ੍ਜਨ੍ਤਾਨਂ ਭੋਜਨਕਾਲੇ ਗਹਿਤਗਹਿਤਟ੍ਠਾਨੇ ਓਧਿ ਪਞ੍ਞਾਯਤਿ, ਅਯਂ ਓਦਨੋ ਨਾਮ, ਪਵਾਰਣਂ ਜਨੇਤਿ. ਯੋਪਿ ਪਾਯਾਸੋ ਵਾ ਅਮ੍ਬਿਲਯਾਗੁ ਵਾ ਉਦ੍ਧਨਤੋ ਓਤਾਰਿਤਮਤ੍ਤਾ ਅਬ੍ਭੁਣ੍ਹਾ ਆਵਿਜ੍ਝਿਤ੍ਵਾ ਪਿਵਿਤੁਂ ਸਕ੍ਕਾ, ਗਹਿਤੋਕਾਸੇਪਿ ਓਧਿਂ ਨ ਦਸ੍ਸੇਤਿ, ਅਯਂ ਪਵਾਰਣਂ ਨ ਜਨੇਤਿ. ਉਸੁਮਾਯ ਪਨ ਵਿਗਤਾਯ ਘਨਭਾਵਂ ਗਚ੍ਛਤਿ, ਓਧਿ ਪਞ੍ਞਾਯਤਿ, ਪੁਨ ਪਵਾਰਣਂ ਜਨੇਤਿ, ਪੁਬ੍ਬੇ ਤਨੁਕਭਾਵੋ ਨ ਰਕ੍ਖਤਿ. ਭਤ੍ਤੇ ਪਨ ਉਦਕਕਞ੍ਜਿਕਖੀਰਾਦੀਨਿ ਆਕਿਰਿਤ੍ਵਾ ‘‘ਯਾਗੁਂ ਗਣ੍ਹਥਾ’’ਤਿ ਵਦਨ੍ਤਿ, ਕਿਞ੍ਚਾਪਿ ਤਨੁਕਾ ਹੋਤਿ, ਪਵਾਰਣਂ ਜਨੇਤਿਯੇਵ ਤਸ੍ਮਿਂ ਯਾਗੁਯਾ ਨਤ੍ਥਿਭਾਵਤੋ. ਸਚੇ ਪਨ ਪਕ੍ਕੁਥਿਤੇਸੁ ਉਦਕਾਦੀਸੁ ਪਕ੍ਖਿਪਿਤ੍ਵਾ ਪਚਿਤ੍ਵਾ ਦੇਨ੍ਤਿ, ਯਾਗੁਸਙ੍ਗਹਮੇਵ ਗਚ੍ਛਤਿ.

੭੭. ਭਟ੍ਠਧਞ੍ਞਮਯੋਤਿ ਸਤ੍ਤਵਿਧਾਨਿਪਿ ਧਞ੍ਞਾਨਿ ਗਹੇਤ੍ਵਾ ਖਰਪਾਕਭਜ੍ਜਿਤਾਨਂ ਤੇਸਂ ਤਣ੍ਡੁਲੇ ਕੋਟ੍ਟੇਤ੍ਵਾ ਕਤਚੁਣ੍ਣਕੁਣ੍ਡਕਾਨਿ ਸਤ੍ਤੁ ਨਾਮ. ਸਮਪਾਕਭਜ੍ਜਿਤਾਨਂ ਪਨ ਆਤਪਸੁਕ੍ਖਾਨਂ ਵਾ ਤਣ੍ਡੁਲਾਨਂ ਚੁਣ੍ਣਕੁਣ੍ਡਕਾਨਿ ਸਤ੍ਤੁਸਙ੍ਖ੍ਯਂ ਨ ਗਚ੍ਛਨ੍ਤਿ. ਯਵਸਮ੍ਭਵੋਤਿ ਅਞ੍ਞੇਹਿ ਪਨ ਮੁਗ੍ਗਾਦੀਹਿ ਕਤਕੁਮ੍ਮਾਸੋ ਨ ਪਵਾਰੇਤੀਤਿ ਅਧਿਪ੍ਪਾਯੋ. ਉਦਕਸਮ੍ਭਵੋਤਿ ਇਮਿਨਾ ਕਕ੍ਕਟਕਸਿਪ੍ਪਿਕਸਮ੍ਬੁਕਾਦਯੋਪਿ ਸਙ੍ਗਹਂ ਗਚ੍ਛਨ੍ਤਿ. ਸਚੇ ਯਾਗੁਪਾਨਕਾਲੇ ਏਕਸ੍ਮਿਂ ਭਾਜਨੇ ਠਪੇਤ੍ਵਾ ਮਚ੍ਛਮਂਸਂ ਵਾ ਖਾਦਨ੍ਤਿ, ਤੇ ਚੇ ਅਖਾਦਨ੍ਤੋ ਅਞ੍ਞਂ ਪਵਾਰਣਪ੍ਪਹੋਨਕਂ ਪਟਿਕ੍ਖਿਪਤਿ, ਨ ਪਵਾਰੇਤਿ. ਖਾਦਿਤੇਪਿ ਸਚੇ ਮੁਖੇ ਅਵਸਿਟ੍ਠਂ ਨਤ੍ਥਿ, ਤਦਾ ਪਟਿਕ੍ਖਿਪਨ੍ਤੋਪਿ ਨ ਪਵਾਰੇਤਿਯੇਵ. ਸਚੇ ਪਤ੍ਤੇ ਅਵਸਿਟ੍ਠਂ ਅਤ੍ਥਿ, ਮੁਖੇ ਨਤ੍ਥਿ, ਤਞ੍ਚੇ ਅਖਾਦਿਤੁਕਾਮੋ ਹੋਤਿ, ਅਞ੍ਞਤ੍ਥ ਵਾ ਗਨ੍ਤ੍ਵਾ ਖਾਦਿਤੁਕਾਮੋ, ਤਸ੍ਮਿਂ ਖਣੇ ਪਟਿਕ੍ਖਿਪਨ੍ਤੋਪਿ ਨ ਪਵਾਰੇਤਿਯੇਵ.

੭੮. ਭੋਜਨਨ੍ਤਿ (ਪਾਚਿ. ਅਟ੍ਠ. ੨੩੮-੨੩੯) ਪਞ੍ਚਸੁ ਭੋਜਨੇਸੁ ਯਂ ਕਿਞ੍ਚਿ ਭੋਜਨਂ. ਕਪ੍ਪਿਯਂ ਵਾ ਅਕਪ੍ਪਿਯਂ ਵਾ ਭੁਞ੍ਜਨ੍ਤੋਤਿ ਸਮ੍ਬਨ੍ਧੋ. ਨਿਸੇਧਯਨ੍ਤਿ ਕਾਯੇਨਾਭਿਹਟਂ ਅਙ੍ਗੁਲਿਚਲਨਾਦਿਨਾ ਵਾ ਭਮੁਕਵਿਕਾਰੇਨ ਵਾ ਕੁਦ੍ਧਭਾਵੇਨ ਓਲੋਕੇਨ ਵਾ ਪਟਿਕ੍ਖਿਪਨ੍ਤੋ ਕਾਯੇਨ ਵਾ ‘‘ਅਲ’’ਨ੍ਤਿ ਵਾ ‘‘ਨ ਗਣ੍ਹਾਮੀ’’ਤਿ ਵਾ ‘‘ਮਾ ਆਕਿਰਾ’’ਤਿ ਵਾ ‘‘ਅਪਗਚ੍ਛਾ’’ਤਿ ਵਾ ਆਦਿਨਾ ਨਯੇਨ ਪਟਿਕ੍ਖਿਪਨ੍ਤੋ ਵਾਚਾਯ ਵਾ ਨਿਸੇਧਯਨ੍ਤੋਤਿ ਅਤ੍ਥੋ. ਕਪ੍ਪਨ੍ਤਿ ਕਪ੍ਪਿਯਭੋਜਨਮੇਵ ਪਟਿਕ੍ਖਿਪਨ੍ਤੋ ਸੋ ਪਵਾਰੇਤਿ, ਅਕਪ੍ਪਿਯਮਂਸਂ ਵਾ ਭੋਜਨਂ ਵਾ ਪਟਿਕ੍ਖਿਪਨ੍ਤੋ ਨ ਪਵਾਰੇਤਿ. ਕਸ੍ਮਾ? ਤਸ੍ਸ ਪਟਿਕ੍ਖਿਪਿਤਬ੍ਬਟ੍ਠਾਨੇ ਠਿਤਤ੍ਤਾ. ਸਚੇ ਕਪ੍ਪਿਯਭੋਜਨਂ ਭੁਞ੍ਜਮਾਨੋ ਅਕਪ੍ਪਿਯਂ ਪਟਿਕ੍ਖਿਪਤਿ, ਨ ਪਵਾਰੇਤਿ. ਕਸ੍ਮਾ? ਤਸ੍ਸ ਪਟਿਕ੍ਖਿਪਿਤਬ੍ਬਤੋ. ਇਦਾਨਿ ਮਿਸ੍ਸਕਨਯਂ ਦਸ੍ਸੇਤੁਂ ‘‘ਤਨ੍ਨਾਮੇਨਾ’’ਤਿਆਦਿ ਵੁਤ੍ਤਂ. ਤਤ੍ਰਾਯਂ ਪਿਣ੍ਡਤ੍ਥੋ – ਤਨ੍ਨਾਮੇਨ ਵਾ ਇਮਨ੍ਤਿ ਵਾ ਅਭਿਹਟਂ ਕਪ੍ਪਿਯਂ ਨਿਸੇਧਯਂ ਪਵਾਰੇਯ੍ਯਾਤਿ. ਕਿਂ ਵੁਤ੍ਤਂ ਹੋਤਿ? ਯੋ ਪਨ ਮਚ੍ਛਮਂਸਮਿਸ੍ਸਂ (ਕਙ੍ਖਾ. ਅਟ੍ਠ. ਪਠਮਪਵਾਰਣਾਸਿਕ੍ਖਾਪਦਵਣ੍ਣਨਾ; ਪਾਚਿ. ਅਟ੍ਠ. ੨੩੮-੨੩੯) ਯਾਗੁਂ ਬ੍ਯਞ੍ਜਨਂ ਵਾ ਆਹਰਿਤ੍ਵਾ ‘‘ਮਚ੍ਛਂ ਗਣ੍ਹਥ, ਮਂਸਂ ਗਣ੍ਹਥਾ’’ਤਿ ਵਦਤਿ, ਤਂ ਪਟਿਕ੍ਖਿਪਤੋ ਪਵਾਰਣਾ ਹੋਤਿ. ਸਚੇ ‘‘ਯਾਗੁਂ ਗਣ੍ਹਥ, ਰਸਬ੍ਯਞ੍ਜਨਂ ਗਣ੍ਹਥਾ’’ਤਿ ਵਦਤਿ, ਤਂ ਪਟਿਕ੍ਖਿਪਤੋ ਪਵਾਰਣਾ ਨ ਹੋਤਿ. ਕਸ੍ਮਾ? ਤਸ੍ਸਾਪਿ ਅਤ੍ਥਿਤਾਯ. ਸਚੇ ‘‘ਇਮਂ ਗਣ੍ਹਥਾ’’ਤਿ ਸਵਤ੍ਥੁਕਂ ਕਤ੍ਵਾ ਦੇਤਿ, ਤਂ ਪਟਿਕ੍ਖਿਪਤੋ ਪਵਾਰਣਾ ਹੋਤਿ. ਭਤ੍ਤਮਿਸ੍ਸਕੇਪਿ ਏਸੇਵ ਨਯੋ. ਸਚੇ ਅਞ੍ਞਸ੍ਸ ਅਭਿਹਟਂ ਪਟਿਕ੍ਖਿਪਤਿ, ਪਵਾਰਣਾ ਨਤ੍ਥਿਯੇਵ.

੭੯-੮੦. ਇਦਾਨਿ ਪਵਾਰਣਂ ਅਜਨੇਨ੍ਤੇ ਦਸ੍ਸੇਤੁਂ ‘‘ਲਾਜਾ’’ਤਿਆਦਿ ਵੁਤ੍ਤਂ. ਏਤ੍ਥ ਲਾਜਾ ਤਂਸਤ੍ਤੁਭਤ੍ਤਾਨੀਤਿ (ਕਙ੍ਖਾ. ਅਟ੍ਠ. ਪਠਮਪਵਾਰਣਾਸਿਕ੍ਖਾਪਦਵਣ੍ਣਨਾ) ਲਾਜਾ ਚ ਲਾਜੇਹਿ ਕਤਸਤ੍ਤੁਭਤ੍ਤਾਨਿ ਚਾਤਿ ਅਤ੍ਥੋ. ਮਚ੍ਛਮਂਸਪੂਵੇਸੁ ਪਨ ਪਵਾਰਣਾ ਹੋਤਿ, ਤਸ੍ਮਾ ‘‘ਸੁਦ੍ਧਖਜ੍ਜਕੋ’’ਤਿ ਵੁਤ੍ਤਂ. ਭਟ੍ਠਪਿਟ੍ਠਨ੍ਤਿ ਪੁਬ੍ਬੇ ਆਮਕਂ ਪਚ੍ਛਾ ਭਜ੍ਜਿਤਬ੍ਬਨ੍ਤਿ ਵੁਤ੍ਤਂ ਹੋਤਿ. ਵੇਲ਼ੁਆਦੀਨਂ ਵੁਤ੍ਤਾਵਸੇਸਾਨਂ ਭਤ੍ਤਨ੍ਤਿ ਸਮ੍ਬਨ੍ਧੋ. ਰਸਯਾਗੁ ਰਸੋ ਪਕ੍ਕਯਾਗੁ. ਮਂਸਾਦੀਹਿ ਅਮਿਸ੍ਸਿਤਾ ਸੁਦ੍ਧਯਾਗੁ. ਪੁਥੁਕਾਮਯਂ ਪਨ ਯਂ ਕਿਞ੍ਚਿ ਪਵਾਰਣਂ ਨ ਜਨੇਤਿ.

੮੧. ਵੁਟ੍ਠਾਯਾਤਿ (ਪਾਚਿ. ਅਟ੍ਠ. ੨੩੮-੨੩੯) ਆਸਨਾ ਉਟ੍ਠਾਯ ਅਤਿਰਿਤ੍ਤਂ ਨ ਕਾਤਬ੍ਬਨ੍ਤਿ ਸਮ੍ਬਨ੍ਧੋ. ਸਚੇ ਪਵਾਰੇਤ੍ਵਾ ਆਸਨਾ ਨ ਵੁਟ੍ਠਾਤਿ ਭਿਕ੍ਖੁ, ਤਸ੍ਸਾਪਿ ਅਤਿਰਿਤ੍ਤਂ ਕਾਤੁਂ ਲਭਤਿ. ਅਭੁਤ੍ਤੇਨ ਚ ਭੋਜਨਨ੍ਤਿ ਯੇਨ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਂ ਭੋਜਨਂ ਅਨ੍ਤਮਸੋ ਕੁਸਗ੍ਗੇਨਾਪਿ ਨ ਭੁਤ੍ਤਂ, ਤੇਨਾਪਿ ਅਤਿਰਿਤ੍ਤਂ ਨ ਕਾਤਬ੍ਬਨ੍ਤਿ ਅਤ੍ਥੋ. ਯੇਨ ਪਨ ਅਰੁਣੁਗ੍ਗਮੇਪਿ ਭੁਤ੍ਤਂ ਹੋਤਿ, ਸੋ ਚੇ ਅਪਵਾਰਿਤੋ ਆਸਨਾ ਵੁਟ੍ਠਿਤੋਪਿ ਮਜ੍ਝਨ੍ਹਿਕਸਮਯੇਪਿ ਪੁਨ ਕਿਞ੍ਚਿ ਅਭੁਤ੍ਵਾਪਿ ਕਾਤੁਂ ਲਭਤਿ. ਯੇਨ ਯਂ ਵਾ ਪੁਰੇ ਕਤਨ੍ਤਿ ਯੇਨ ਯਂ ਵਾ ਪੁਬ੍ਬੇ ਕਤਂ, ਤੇਨ ਤਮ੍ਪਿ ਪਚ੍ਛਾ ਨ ਕਾਤਬ੍ਬਂ. ਅਞ੍ਞੇਨ ਪਨ ਤਂ ਕਾਤੁਂ ਵਟ੍ਟਤੀਤਿ ਵਦਨ੍ਤਿ.

੮੨. ਯਂ ਫਲਂ ਵਾ ਕਨ੍ਦਮੂਲਂ ਵਾ ਪਞ੍ਚਹਿ ਸਮਣਕਪ੍ਪੇਹਿ ਕਤਕਪ੍ਪਿਯਂ ਅਞ੍ਞਮ੍ਪਿ ਕਪ੍ਪਿਯਭੋਜਨਂ ਵਾ ਕਪ੍ਪਿਯਮਂਸਂ ਵਾ, ਇਦਂ ਕਪ੍ਪਿਯਂ ਨਾਮ, ਵੁਤ੍ਤਪ੍ਪਕਾਰਵਿਪਰੀਤਂ ਅਕਪ੍ਪਿਯਂ ਨਾਮ, ਤਸ੍ਮਿਂ ਅਤਿਰਿਤ੍ਤਕਰਣਂ ਨ ਰੁਹਤਿ, ਯਞ੍ਚ ਪਟਿਗ੍ਗਹੇਤ੍ਵਾ ਨ ਗਹਿਤਂ, ਤਸ੍ਮਿਮ੍ਪਿ ਨ ਰੁਹਤਿ, ਤੇਨ ਵੁਤ੍ਤਂ ‘‘ਕਪ੍ਪਿਯਂ ਗਹਿਤਞ੍ਚੇਵਾ’’ਤਿ. ਉਚ੍ਚਾਰਿਤਨ੍ਤਿ ਕਪ੍ਪਿਯਂ ਕਾਰੇਤੁਂ ਆਗਤੇਨ ਭਿਕ੍ਖੁਨਾ ਈਸਕਮ੍ਪਿ ਉਕ੍ਖਿਤ੍ਤਂ ਵਾ ਅਪਨਮਿਤਂ ਵਾਤਿ ਅਤ੍ਥੋ. ਹਤ੍ਥਪਾਸਤੋ ਬਹਿ ਠਿਤਂ ਕਾਤੁਂ ਨ ਵਟ੍ਟਤਿ, ਤੇਨ ਵੁਤ੍ਤਂ ‘‘ਹਤ੍ਥਪਾਸਗ’’ਨ੍ਤਿ. ਅਤਿਰਿਤ੍ਤਂ ਕਰੋਨ੍ਤੇਵਨ੍ਤਿ ਅਤਿਰਿਤ੍ਤਂ ਕਰੋਨ੍ਤੋ ‘‘ਅਲਮੇਤਂ ਸਬ੍ਬ’’ਨ੍ਤਿ ਵਚੀਭੇਦਂ ਕਤ੍ਵਾ ਏਵਂ ਭਾਸਤੂਤਿ ਅਤ੍ਥੋ. ‘‘ਅਲਮੇਤਂ ਸਬ੍ਬ’’ਨ੍ਤਿ ਤਿਕ੍ਖਤ੍ਤੁਂ ਵਤ੍ਤਬ੍ਬਂ, ਅਯਂ ਕਿਰ ਆਚਿਣ੍ਣੋ. ਵਿਨਯਧਰਾ ਕਿਰ ਪਨ ‘‘ਸਕਿਂ ਏਵ ਵਤ੍ਤਬ੍ਬ’’ਨ੍ਤਿ ਵਦਨ੍ਤਿ. ਅਲਮੇਤਂ ਸਬ੍ਬਨ੍ਤਿ ਇਦਮ੍ਪਿ ਵੋ ਅਧਿਕਂ, ਇਤੋ ਅਞ੍ਞਂ ਨ ਲਚ੍ਛਸੀਤਿ ਅਤ੍ਥੋ.

੮੩. ਅਨੁਪਸਮ੍ਪਨ੍ਨਹਤ੍ਥਗਨ੍ਤਿ ਕਪ੍ਪਿਯਂ ਕਰੋਨ੍ਤੇਨ ਪਨ ਅਨੁਪਸਮ੍ਪਨ੍ਨਸ੍ਸ ਹਤ੍ਥੇ ਠਿਤਂਯੇਵ ਨ ਕਾਤਬ੍ਬਂ, ਤਂ ਪਨ ਅਞ੍ਞੇਨ ਭਿਕ੍ਖੁਨਾ ਪਟਿਗ੍ਗਹਾਪੇਤ੍ਵਾ ਤਸ੍ਸ ਹਤ੍ਥੇ ਠਿਤਂ ਅਤਿਰਿਤ੍ਤਂ ਕਤ੍ਵਾ ਅਨੁਪਸਮ੍ਪਨ੍ਨਸ੍ਸ ਦਾਤੁਂ ਵਟ੍ਟਤਿ. ਅਤ੍ਤਨਾ ਆਗਨ੍ਤ੍ਵਾ ਅਞ੍ਞਸ੍ਸ ਹਤ੍ਥੇ ਚ ਪੇਸਯਿਤ੍ਵਾਪਿ ਕਾਰੇਤੁਂ ਲਬ੍ਭਤੇਤਿ ਅਤ੍ਥੋ. ਤਂ ਪਨ ਅਤਿਰਿਤ੍ਤਕਾਰਕਂ ਠਪੇਤ੍ਵਾ ਅਞ੍ਞੋ ਸਬ੍ਬੋ ਪਵਾਰਿਤੋਪਿ ਅਪ੍ਪਵਾਰਿਤੋਪਿ ਭੁਞ੍ਜਿਤੁਂ ਲਭਤੀਤਿ ਅਤ੍ਥੋ. ਸਚੇ ਪਵਾਰਿਤੋ ਪਰਿਭੁਞ੍ਜਤਿ, ਯਥਾ ਅਕਤੇਨ ਮਿਸ੍ਸਂ ਨ ਹੋਤਿ, ਤਥਾ ਮੁਖਞ੍ਚ ਹਤ੍ਥਞ੍ਚ ਸੁਦ੍ਧਂ ਕਤ੍ਵਾ ਭੁਞ੍ਜਿਤਬ੍ਬਂ. ਗਿਲਾਨਸ੍ਸ ਭੁਤ੍ਤਾਵਸੇਸਮ੍ਪਿ ਤਸ੍ਸ ‘‘ਅਜ੍ਜ ਵਾ ਸ੍ਵੇ ਵਾ ਖਾਦਿਸ੍ਸਤੀ’’ਤਿ ਆਹਟਮ੍ਪਿ ਅਨਤਿਰਿਤ੍ਤਕਤਂ ਭੁਞ੍ਜਿਤੁਂ ਵਟ੍ਟਤੀਤਿ. ਪਵਾਰਣਾਵਿਨਿਚ੍ਛਯੋ.

ਪਵਾਰਣਾਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.