੮. ਕਾਲਿਕਨਿਦ੍ਦੇਸਵਣ੍ਣਨਾ

੮੪. ਇਦਾਨਿ ਯੇ ਤੇ ਚਤ੍ਤਾਰੋ ਕਾਲਿਕਾ ਮੁਨਿਨਾ ਵੁਤ੍ਤਾ ‘‘ਯਾਵਕਾਲਿਕਂ ਯਾਮਕਾਲਿਕਂ ਸਤ੍ਤਾਹਕਾਲਿਕਂ ਯਾਵਜੀਵਿਕ’’ਨ੍ਤਿ, ਤੇ ਦਸ੍ਸੇਤੁਂ ‘‘ਕਾਲਿਕਾ ਚਾ’’ਤਿ ਪਦਂ ਉਦ੍ਧਟਂ. ਤਤ੍ਥ (ਪਾਚਿ. ੨੫੪-੨੫੬; ਪਾਚਿ. ਅਟ੍ਠ. ੨੫੩-੨੫੬) ਕਤਮੇ ਤੇ ਕਾਲਿਕਾਤਿ ਚੇ, ਤੇ ਦਸ੍ਸੇਤੁਂ ‘‘ਯਾਵਕਾਲਿਕ’’ਨ੍ਤਿਆਦਿਮਾਹ. ਤੇਸੁ ਅਰੁਣੁਗ੍ਗਮਨਤੋ ਯਾਵ ਠਿਤਮਜ੍ਝਨ੍ਹਿਕਾ ਭੁਞ੍ਜਿਤਬ੍ਬਤੋ ਯਾਵਕਾਲਿਕਂ. ਅਰੁਣੁਗ੍ਗਮਨਤੋ ਯਾਵ ਯਾਮਾਵਸਾਨਾ ਪਿਪਾਸਾਯ ਸਤਿ ਪਿਪਾਸਚ੍ਛੇਦਨਤ੍ਥਂ ਪਾਤਬ੍ਬਤੋ ਯਾਮੋ ਕਾਲੋ ਅਸ੍ਸਾਤਿ ਯਾਮਕਾਲਿਕਂ. ਤੇਨ ਉਪਸਮੇਤਬ੍ਬੇ ਆਬਾਧੇ ਸਤਿ ਯਾਵ ਸਤ੍ਤਾਹਾ ਪਰਿਭੁਞ੍ਜਿਤਬ੍ਬਤੋ ਸਤ੍ਤਾਹਕਾਲਿਕਂ. ਆਬਾਧੇ ਸਤਿ ਯਾਵਜੀਵਂ ਪਰਿਹਰਿਤ੍ਵਾ ਭੁਞ੍ਜਿਤਬ੍ਬਤੋ ਯਾਵਜੀਵਿਕਂ.

੮੫. ਤੇਸੁ ਯਾਵਕਾਲਿਕਂ ਦਸ੍ਸੇਤੁਂ ‘‘ਪਿਟ੍ਠਂ ਮੂਲਂ ਫਲਂ ਖਜ੍ਜ’’ਨ੍ਤਿਆਦਿਮਾਹ. ਏਤ੍ਥ (ਪਾਚਿ. ੨੪੮-੨੫੦; ਪਾਚਿ. ਅਟ੍ਠ. ੨੪੮-੨੪੯) ਪਿਟ੍ਠਖਾਦਨੀਯਂ ਨਾਮ ਸਤ੍ਤਨ੍ਨਂ ਤਾਵ ਧਞ੍ਞਾਨਂ ਧਞ੍ਞਾਨੁਲੋਮਾਨਂ ਅਪਰਣ੍ਣਾਨਞ੍ਚ ਪਿਟ੍ਠਂ ਪਨਸਪਿਟ੍ਠਂ ਲਬੁਜਪਿਟ੍ਠਂ ਅਮ੍ਬਾਟਕਪਿਟ੍ਠਂ ਸਾਲਪਿਟ੍ਠਂ ਧੋਤਕਤਾਲਪਿਟ੍ਠਂ ਖੀਰਵਲ੍ਲਿਪਿਟ੍ਠਞ੍ਚਾਤਿ ਏਵਮਾਦੀਨਿ ਤੇਸੁ ਤੇਸੁ ਜਨਪਦੇਸੁ ਪਕਤਿਆਹਾਰਵਸੇਨ ਮਨੁਸ੍ਸਾਨਂ ਖਾਦਨੀਯਤ੍ਥਞ੍ਚ ਭੋਜਨੀਯਤ੍ਥਞ੍ਚ ਫਰਣਕਾਨਿ ਪਿਟ੍ਠਾਨਿ ਯਾਵਕਾਲਿਕਾਨਿ. ਇਮਿਨਾਵ ਲਕ੍ਖਣੇਨ ਮੂਲਖਾਦਨੀਯਾਦੀਸੁਪਿ ਯਾਵਕਾਲਿਕਲਕ੍ਖਣਂ ਵੇਦਿਤਬ੍ਬਂ, ਅਤਿਵਿਤ੍ਥਾਰਭਯੇਨ ਸਂਖਿਤ੍ਤਂ. ਗੋਰਸੋ ਨਾਮ ਖੀਰਦਧਿਤਕ੍ਕਰਸੋ. ਧਞ੍ਞਭੋਜਨਨ੍ਤਿ ਸਾਨੁਲੋਮਾਨਿ ਸਤ੍ਤਧਞ੍ਞਾਨਿ ਚ ਪਞ੍ਚਵਿਧਭੋਜਨਞ੍ਚਾਤਿ ਅਤ੍ਥੋ. ਯਾਗੁਸੂਪਪ੍ਪਭੁਤਯੋਤਿ ਏਤ੍ਥ ਪਭੁਤਿ-ਸਦ੍ਦੇਨ ਕਨ੍ਦਖਾਦਨੀਯਂ ਮੁਲ਼ਾਲਖਾਦਨੀਯਂ ਮਤ੍ਥਕਖਾਦਨੀਯਂ ਖਨ੍ਧਖਾਦਨੀਯਂ ਤਚਖਾਦਨੀਯਂ ਪਤ੍ਤਖਾਦਨੀਯਂ ਪੁਪ੍ਫਖਾਦਨੀਯਂ ਅਟ੍ਠਿਖਾਦਨੀਯਂ ਨਿਯ੍ਯਾਸਖਾਦਨੀਯਨ੍ਤਿ ਇਮਾਨਿ ਸਙ੍ਗਹਿਤਾਨੀਤਿ ਵੇਦਿਤਬ੍ਬਾਨਿ.

ਤਤ੍ਰਿਦਂ ਮੁਖਮਤ੍ਤਨਿਦਸ੍ਸਨਂ – ਭਿਸਸਙ੍ਖਾਤੋ ਪਦੁਮਪੁਣ੍ਡਰੀਕਕਨ੍ਦੋ ਪਿਣ੍ਡਾਲੁਮਸਾਲੁਕਆਦਯੋ ਵਲ੍ਲਿਕਨ੍ਦੋ ਆਲੁਵਕਨ੍ਦੋ ਤਾਲਕਨ੍ਦੋਤਿ ਏਵਮਾਦਿ ਕਨ੍ਦਖਾਦਨੀਯਂ. ਪਦੁਮਮੁਲ਼ਾਲਾਦਯੋ ਮੁਲ਼ਾਲਖਾਦਨੀਯਂ. ਤਾਲਹਿਨ੍ਤਾਲਕੁਨ੍ਤਾਲਕੇਤਕਨਾਲ਼ਿਕੇਰਪੂਗਰੁਕ੍ਖਖਜ੍ਜੂਰੀਆਦੀਨਂ ਕਲ਼ੀਰਸਙ੍ਖਾਤਾ ਮਤ੍ਥਕਾ ਮਤ੍ਥਕਖਾਦਨੀਯਂ. ਉਚ੍ਛੁਖਨ੍ਧੋ ਨੀਲੁਪ੍ਪਲਰਤ੍ਤੁਪ੍ਪਲਕੁਮੁਦਸੋਗਨ੍ਧਿਕਾਨਂ ਪੁਪ੍ਫਦਣ੍ਡਕਾਨੀਤਿ ਏਵਮਾਦਿ ਖਨ੍ਧਖਾਦਨੀਯਂ. ਤਚਖਾਦਨੀਯਂ ਉਚ੍ਛੁਤਚੋ ਏਵ ਏਕੋ ਯਾਵਕਾਲਿਕੋ, ਸੋਪਿ ਸਰਸੋ. ਮੂਲਕਂ ਖਾਰਕੋ ਚਚ੍ਚੁ ਤਮ੍ਬੁਕੋ ਤਣ੍ਡੁਲੇਯ੍ਯਕੋਤਿ ਏਵਮਾਦਿ ਪਤ੍ਤਖਾਦਨੀਯਂ. ਮੂਲਕਪੁਪ੍ਫਂ ਖਾਰਕਪੁਪ੍ਫਂ ਚਚ੍ਚੁਪੁਪ੍ਫਂ ਤਮ੍ਬੁਕਪੁਪ੍ਫਨ੍ਤਿ ਏਵਮਾਦਿ ਪੁਪ੍ਫਖਾਦਨੀਯਂ, ਅਸੋਕਪੁਪ੍ਫਂ ਪਨ ਯਾਵਜੀਵਿਕਂ. ਲਬੁਜਪਨਸਟ੍ਠਿਆਦਿ ਅਟ੍ਠਿਖਾਦਨੀਯਂ. ਨਿਯ੍ਯਾਸਖਾਦਨੀਯੇ ਯਾਵਕਾਲਿਕਂ ਨਤ੍ਥਿ. ਏਤੇ ਵੁਤ੍ਤਪ੍ਪਕਾਰਾ ਯਾਵਕਾਲਿਕਾ ਹੋਨ੍ਤੀਤਿ ਅਤ੍ਥੋ.

੮੬. ਇਦਾਨਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਅਟ੍ਠ ਪਾਨਾਨਿ ਅਮ੍ਬਪਾਨਂ ਜਮ੍ਬੁਪਾਨਂ ਚੋਚਪਾਨਂ ਮੋਚਪਾਨਂ ਮਧੁਕਪਾਨਂ ਮੁਦ੍ਦਿਕਪਾਨਂ ਸਾਲੂਕਪਾਨਂ ਫਾਰੁਸਕਪਾਨ’’ਨ੍ਤਿ (ਮਹਾਵ. ੩੦੦) ਏਵਂ ਵੁਤ੍ਤਂ ਅਟ੍ਠਵਿਧਂ ਪਾਨਕਂ ਯਾਮਕਾਲਿਕਂ ਨਾਮਾਤਿ ਦਸ੍ਸੇਤੁਂ ‘‘ਮਧੂ’’ਤਿਆਦਿਮਾਹ. ਤਤ੍ਥ (ਮਹਾਵ. ਅਟ੍ਠ. ੩੦੦) ਮਧੁਜਂ ਮੁਦ੍ਦਿਕਜਂ ਸਾਲੂਕਜਂ ਚੋਚਜਂ ਮੋਚਜਂ ਅਮ੍ਬੁਜਂ ਜਮ੍ਬੁਜਞ੍ਚਾਤਿ ਏਵਮਤ੍ਥੋ ਗਹੇਤਬ੍ਬੋ. ਏਤ੍ਥ ਮਧੁਜਂ ਨਾਮ ਮਧੁਕਾਨਂ ਜਾਤਿਰਸੇਨ ਕਤਂ, ਤਂ ਪਨ ਉਦਕਸਮ੍ਭਿਨ੍ਨਮੇਵ ਵਟ੍ਟਤਿ, ਸੁਦ੍ਧਂ ਨ ਵਟ੍ਟਤਿ. ਮੁਦ੍ਦਿਕਪਾਨਂ ਨਾਮ ਮੁਦ੍ਦਿਕਾ ਉਦਕੇ ਮਦ੍ਦਿਤ੍ਵਾ ਪਰਿਸ੍ਸਾਵੇਤ੍ਵਾ ਗਹਿਤਂ. ਸਾਲੂਕਪਾਨਂ ਨਾਮ ਰਤ੍ਤੁਪ੍ਪਲਨੀਲੁਪ੍ਪਲਾਦੀਨਂ ਕਿਞ੍ਜਕ੍ਖਰੇਹਿ ਕਤਂ. ਸੇਸਾਨਿ ਪਾਕਟਾਨੇਵ. ਏਤ੍ਥ ਪਨ ਸਚੇ ਸਯਂ ਏਤਾਨਿ ਯਾਵਕਾਲਿਕਵਤ੍ਥੂਨਿ ਪਟਿਗ੍ਗਹੇਤ੍ਵਾ ਉਦਕੇ ਮਦ੍ਦਿਤ੍ਵਾ ਆਤਪੇ ਆਦਿਚ੍ਚਪਾਕੇਨ ਪਚਿਤ੍ਵਾ ਪਰਿਸ੍ਸਾਵੇਤ੍ਵਾ ਪਾਨਕਂ ਕਰੋਤਿ, ਤਂ ਪੁਰੇਭਤ੍ਤਮੇਵ ਕਪ੍ਪਤਿ. ਸਚੇ ਅਨੁਪਸਮ੍ਪਨ੍ਨੇਨ ਕਤਂ ਲਭਤਿ, ਤਦਹੁਪੁਰੇਭਤ੍ਤਂ ਸਾਮਿਸਮ੍ਪਿ ਵਟ੍ਟਤਿ, ਪਚ੍ਛਾਭਤ੍ਤਂ ਨਿਰਾਮਿਸਪਰਿਭੋਗੇਨ ਯਾਵ ਅਰੁਣੁਗ੍ਗਮਨਾ ਵਟ੍ਟਤਿ. ਇਮਾਨਿ ਅਟ੍ਠ ਪਾਨਾਨਿ ਸੀਤਾਨਿਪਿ ਆਦਿਚ੍ਚਪਾਕਾਨਿਪਿ ਵਟ੍ਟਨ੍ਤਿ, ਅਗ੍ਗਿਪਾਕਾਨਿ ਪਨ ਨ ਵਟ੍ਟਨ੍ਤਿ, ਤਸ੍ਮਾ ‘‘ਨਗ੍ਗਿਸਨ੍ਤਤ੍ਤ’’ਨ੍ਤਿ ਵੁਤ੍ਤਂ.

੮੭. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬਂ ਫਲਰਸਂ ਠਪੇਤ੍ਵਾ ਧਞ੍ਞਫਲਰਸ’’ਨ੍ਤਿ (ਮਹਾਵ. ੩੦੦) ਵੁਤ੍ਤਤ੍ਤਾ ਧਞ੍ਞਫਲਰਸੋ ਪਨ ਨ ਵਟ੍ਟਤਿ, ਤੇਨ ਵੁਤ੍ਤਂ ‘‘ਸਾਨੁਲੋਮਾਨਿ ਧਞ੍ਞਾਨਿ ਠਪੇਤ੍ਵਾ’’ਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬਂ ਪੁਪ੍ਫਰਸਂ ਠਪੇਤ੍ਵਾ ਮਧੁਕਪੁਪ੍ਫਰਸ’’ਨ੍ਤਿ ਵੁਤ੍ਤਤ੍ਤਾ ਮਧੁਕਪੁਪ੍ਫਰਸੋ ਆਦਿਚ੍ਚਪਾਕੋ ਵਾ ਹੋਤੁ ਅਗ੍ਗਿਪਾਕੋ ਵਾ, ਪਚ੍ਛਾਭਤ੍ਤਂ ਨ ਵਟ੍ਟਤਿ, ਤੇਨ ਵੁਤ੍ਤਂ ‘‘ਮਧੁਕਪੁਪ੍ਫਮਞ੍ਞਤ੍ਰਾ’’ਤਿ.

੮੮. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬਂ ਪਤ੍ਤਰਸਂ ਠਪੇਤ੍ਵਾ ਡਾਕਰਸ’’ਨ੍ਤਿ ਵੁਤ੍ਤਤ੍ਤਾ ਉਦਕੇਨ ਪਕ੍ਕਾਨਮ੍ਪਿ ਯਾਵਕਾਲਿਕਪਤ੍ਤਾਨਂ ਰਸੋ ਪੁਰੇਭਤ੍ਤਮੇਵ ਵਟ੍ਟਤਿ, ਸੀਤੋਦਕੇਨ ਮਦ੍ਦਿਤਾਨਂ ਰਸੋ ਯਾਮਕਾਲਿਕਂ. ਤੇਨ ਵੁਤ੍ਤਂ ‘‘ਠਪੇਤ੍ਵਾ ਪਕ੍ਕਡਾਕਜ’’ਨ੍ਤਿ. ਯਾਵਜੀਵਿਕਪਣ੍ਣਸ੍ਸ ਉਦਕੇਨ ਪਕ੍ਕਸ੍ਸ ਰਸੋ ਯਾਵਜੀਵਿਕੋ ਹੋਤਿ.

੮੯. ਇਦਾਨਿ ਸਤ੍ਤਾਹਕਾਲਿਕੇ ਦਸ੍ਸੇਤੁਂ ‘‘ਸਪ੍ਪੀ’’ਤਿਆਦਿਮਾਹ. ਏਤ੍ਥ (ਮਹਾਵ. ੨੬੦) ਪਨ –

‘‘ਸਪ੍ਪਿਨੋਨੀਤਤੇਲਾਨਿ, ਮਧੁਫਾਣਿਤਮੇਵ ਚ;

ਸਤ੍ਤਾਹਕਾਲਿਕਾ ਸਪ੍ਪਿ, ਯੇਸਂ ਮਂਸਮਵਾਰਿਤ’’ਨ੍ਤਿ. –

ਪਾਠੋ ਗਹੇਤਬ੍ਬੋ. ਏਵਂ ਪਨ ਗਹਿਤੇ ਵਸਾ ਤੇਲਗ੍ਗਹਣੇਨ ਗਹਿਤਾਵ ਹੋਤਿ ‘‘ਤੇਲਂ ਨਾਮ ਤਿਲਤੇਲਂ ਸਾਸਪਤੇਲਂ ਮਧੁਕਤੇਲਂ ਏਰਣ੍ਡਤੇਲਂ ਵਸਾਤੇਲ’’ਨ੍ਤਿ (ਪਾਰਾ. ੬੨੩; ਪਾਚਿ. ੨੬੦) ਏਵਂ ਪਾਲ਼ਿਯਂ ਵਿਤ੍ਥਾਰਿਤਤ੍ਤਾ. ਏਵਂ ਪਨ ਅਗ੍ਗਹੇਤ੍ਵਾ ਵਸਾ ਚ ‘‘ਮਧੁਫਾਣਿਤ’’ਨ੍ਤਿ ਪਾਠੇ ਗਹਿਤੇ ਯਾਵਕਾਲਿਕਭੂਤਾ ਵਸਾ ਸਤ੍ਤਾਹਕਾਲਿਕਾਤਿ ਆਪਜ੍ਜੇਯ੍ਯ, ‘‘ਯਾਨਿ ਖੋ ਪਨ ਤਾਨਿ ਗਿਲਾਨਾਨਂ ਭਿਕ੍ਖੂਨਂ ਪਟਿਸਾਯਨੀਯਾਨਿ ਭੇਸਜ੍ਜਾਨਿ, ਸੇਯ੍ਯਥਿਦਂ – ਸਪ੍ਪਿ ਨਵਨੀਤਂ ਤੇਲਂ ਮਧੁ ਫਾਣਿਤ’’ਨ੍ਤਿ (ਪਾਰਾ. ੬੨੨) ਏਵਂ ਪਞ੍ਚੇਵ ਭਗਵਤਾ ਸਤ੍ਤਾਹਕਾਲਿਕਭੇਸਜ੍ਜਾਨਿ ਅਨੁਞ੍ਞਾਤਾਨਿ, ਤਤੋ ਉਤ੍ਤਰਿ ਛਟ੍ਠਸ੍ਸ ਸਤ੍ਤਾਹਕਾਲਿਕਭੇਸਜ੍ਜਸ੍ਸ ਅਤ੍ਥਿਤਾਪਿ ਆਪਜ੍ਜਤਿ, ਭੇਸਜ੍ਜਕ੍ਖਨ੍ਧਕੇਪਿ ਭਗਵਤਾ ‘‘ਅਨੁਜਾਨਾਮਿ, ਭਿਕ੍ਖਵੇ, ਵਸਾਨਿ ਭੇਸਜ੍ਜਾਨਿ ਅਚ੍ਛਵਸਂ ਮਚ੍ਛਵਸਂ ਸੁਸੁਕਾਵਸਂ ਸੂਕਰਵਸਂ ਗਦ੍ਰਭਵਸਂ ਕਾਲੇ ਪਟਿਗ੍ਗਹਿਤਂ ਕਾਲੇ ਨਿਪ੍ਪਕ੍ਕਂ ਕਾਲੇ ਸਂਸਟ੍ਠਂ ਤੇਲਪਰਿਭੋਗੇਨ ਪਰਿਭੁਞ੍ਜਿਤੁ’’ਨ੍ਤਿ (ਮਹਾਵ. ੨੬੨) ਏਵਂ ਸਤ੍ਤਾਹਕਾਲਿਕਵਸੇਨ ਵਸਂ ਅਨਨੁਜਾਨਿਤ੍ਵਾ ਤਤੋ ਨਿਬ੍ਬਤ੍ਤਤੇਲਮੇਵ ਅਨੁਞ੍ਞਾਤਂ, ਤਸ੍ਮਾ ‘‘ਮਧੁਫਾਣਿਤਮੇਵ ਚਾ’’ਤਿ ਪਾਠੇ ਅਗ੍ਗਹਿਤੇ ਪਾਲ਼ਿਯਾ ਅਟ੍ਠਕਥਾਯ ਚ ਵਿਰੁਜ੍ਝਤਿ. ਥੇਰੇਨ ਪਨ ਉਤ੍ਤਰਵਿਹਾਰਵਾਸੀਨਂ ਖੁਦ੍ਦਸਿਕ੍ਖਾਯ ਆਗਤਨਯੇਨ ਵੁਤ੍ਤਂ. ਤੇਸਂ ਪਨ –

‘‘ਸਪ੍ਪਿ ਨਵਨੀਤਂ ਤੇਲਂ, ਮਧੁ ਫਾਣਿਤਪਞ੍ਚਮਂ;

ਅਚ੍ਛਮਚ੍ਛਵਸਾਦਿ ਚ, ਹੋਨ੍ਤਿ ਸਤ੍ਤਾਹਕਾਲਿਕਾ’’ਤਿ. –

ਏਵਮਾਗਤਂ. ਅਮ੍ਹਾਕਂ ਪਨ ਵਿਸੁਂ ਸਤ੍ਤਾਹਕਾਲਿਕੇ ਆਗਤਟ੍ਠਾਨਂ ਨਤ੍ਥੀਤਿ ਵਦਨ੍ਤਿ, ਉਪਪਰਿਕ੍ਖਿਤਬ੍ਬਂ.

ਇਦਾਨਿ ਤੇਸੁ ਸਪ੍ਪਿਂ ਦਸ੍ਸੇਤੁਂ ‘‘ਯੇਸਂ ਮਂਸਪਵਾਰਿਤ’’ਨ੍ਤਿ ਵੁਤ੍ਤਂ. ‘‘ਸਪ੍ਪਿਨਾਮ ਗੋਸਪ੍ਪਿ ਵਾ ਅਜਿਕਾਸਪ੍ਪਿ ਵਾ ਮਹਿਂ ਸਸਪ੍ਪਿ ਵਾ. ਯੇਸਂ ਮਂਸਂ ਕਪ੍ਪਤਿ, ਤੇਸਂ ਸਪ੍ਪਿ, ਨਵਨੀਤਂ ਨਾਮ ਤੇਸਂਯੇਵ ਨਵਨੀਤ’’ਨ੍ਤਿ (ਪਾਰਾ. ੬੨੩; ਪਾਚਿ. ੨੬੦) ਪਾਲ਼ਿਯਂ ਵੁਤ੍ਤਤ੍ਤਾ ਨਵਨੀਤਂ ਪਨ ਗਹਿਤਨ੍ਤਿ ਨ ਵਿਤ੍ਥਾਰਿਤਂ, ਸਪ੍ਪਿ ਪਨ ਪੁਰੇਭਤ੍ਤਂ ਪਟਿਗ੍ਗਹਿਤਂ ਤਦਹੁ ਪੁਰੇਭਤ੍ਤਂ ਸਾਮਿਸਮ੍ਪਿਨਿਰਾਮਿਸਮ੍ਪਿ ਵਟ੍ਟਤਿ. ਪਚ੍ਛਾਭਤ੍ਤਤੋ ਪਟ੍ਠਾਯ ਸਤ੍ਤਾਹਂ ਨਿਰਾਮਿਸਂ ਪਰਿਭੁਞ੍ਜਿਤਬ੍ਬਂ. ਸਤ੍ਤਾਹਾਤਿਕ੍ਕਮੇ ਸਚੇ ਏਕਭਾਜਨੇ ਠਪਿਤਂ, ਏਕਂ ਨਿਸ੍ਸਗ੍ਗਿਯਂ. ਸਚੇ ਬਹੂਸੁ, ਵਤ੍ਥੁਗਣਨਾਯ ਨਿਸ੍ਸਗ੍ਗਿਯਪਾਚਿਤ੍ਤਿਯਾਨਿ. ਪਚ੍ਛਾਭਤ੍ਤਂ ਪਟਿਗ੍ਗਹਿਤਂ ਸਤ੍ਤਾਹਂ ਨਿਰਾਮਿਸਮੇਵ ਵਟ੍ਟਤਿ. ਸਪ੍ਪਿ ਤਾਪੇਨ੍ਤਸ੍ਸ ਸਾਮਂਪਾਕੋ ਨ ਹੋਤਿ, ‘‘ਨਵਨੀਤਂ ਪਨ ਤਾਪੇਨ੍ਤਸ੍ਸ ਹਿ ਸਾਮਂਪਾਕੋ ਨ ਹੋਤਿ, ਸਾਮਂਪਕ੍ਕੇਨ ਪਨ ਤੇਨ ਸਦ੍ਧਿਂ ਆਮਿਸਂ ਨ ਵਟ੍ਟਤੀ’’ਤਿ ਚ ‘‘ਸਚੇ ਅਨੁਪਸਮ੍ਪਨ੍ਨੋ ਪੁਰੇਭਤ੍ਤਂ ਪਟਿਗ੍ਗਹਿਤਨਵਨੀਤੇਨ ਸਪ੍ਪਿਂ ਕਤ੍ਵਾ ਦੇਤਿ, ਪੁਰੇਭਤ੍ਤਂ ਸਾਮਿਸਂ ਵਟ੍ਟਤਿ. ਸਚੇ ਸਯਂ ਕਰੋਤਿ, ਸਤ੍ਤਾਹਂ ਨਿਰਾਮਿਸਮੇਵ ਵਟ੍ਟਤੀ’’ਤਿ ਚ ਸਮਨ੍ਤਪਾਸਾਦਿਕਾਯਂ (ਪਾਰਾ. ਅਟ੍ਠ. ੨.੬੨੨) ਨਵਨੀਤਮ੍ਹਿਯੇਵ ਸਾਮਂਪਾਕਤਾ ਵੁਤ੍ਤਾ, ਨ ਸਪ੍ਪਿਮ੍ਹਿ. ਯਂ ਪਨ ਕਙ੍ਖਾਵਿਤਰਣਿਯਂ ਵੁਤ੍ਤਂ ‘‘ਨਿਬ੍ਬਤ੍ਤਿਤਸਪ੍ਪਿ ਵਾ ਨਵਨੀਤਂ ਵਾ ਪਚਿਤੁਂ ਵਟ੍ਟਤੀ’’ਤਿ, ‘‘ਤਂ ਪਨ ਤਦਹੁ ਪੁਰੇਭਤ੍ਤਮ੍ਪਿ ਸਾਮਿਸਂ ਪਰਿਭੁਞ੍ਜਿਤੁਂ ਨ ਵਟ੍ਟਤੀ’’ਤਿ (ਕਙ੍ਖਾ. ਅਟ੍ਠ. ਭੇਸਜ੍ਜਸਿਕ੍ਖਾਪਦਵਣ੍ਣਨਾ) ਚ, ਤਤ੍ਥ ਯਾਵਕਾਲਿਕਵਤ੍ਥੁਨਾ ਅਸਮ੍ਮਿਸ੍ਸਂ ਸੁਧੋਤਂ ਨਵਨੀਤਂ ਸਨ੍ਧਾਯ ‘‘ਪਚਿਤੁਂ ਵਟ੍ਟਤੀ’’ਤਿ ਵੁਤ੍ਤਂ. ਸਯਂਪਚਿਤਸਤ੍ਤਾਹਕਾਲਿਕੇਨ ਸਦ੍ਧਿਂ ਯਦਿ ਆਮਿਸਂ ਭੁਞ੍ਜਤਿ, ਤਂ ਆਮਿਸਂ ਸਯਂਪਕ੍ਕਸਤ੍ਤਾਹਕਾਲਿਕੇਨ ਮਿਸ੍ਸਿਤਂ ਅਤ੍ਤਨੋ ਯਾਵਕਾਲਿਕਭਾਵਂ ਸਤ੍ਤਾਹਕਾਲਿਕੇਨ ਗਣ੍ਹਾਪੇਤਿ, ਤਥਾ ਚ ਸਤਿ ਯਾਵਕਾਲਿਕਂ ਅਪਕ੍ਕਮ੍ਪਿ ਸਯਂਪਕ੍ਕਭਾਵਂ ਉਪਗਚ੍ਛਤੀਤਿ ‘‘ਸਾਮਿਸਂ ਪਰਿਭੁਞ੍ਜਿਤੁਂ ਨ ਵਟ੍ਟਤੀ’’ਤਿ ਵੁਤ੍ਤਂ. ਯਥਾ ਸਯਂਪਕ੍ਕਸਤ੍ਤਾਹਕਾਲਿਕਵਸਾਤੇਲਂ ਸਯਂਭਜ੍ਜਿਤਸਾਸਪਾਦਿਯਾਵਜੀਵਿਕਵਤ੍ਥੂਨਂ ਤੇਲਞ੍ਚ ਸਾਮਿਸਂ ਤਦਹੁ ਪੁਰੇਭਤ੍ਤਮ੍ਪਿ ਨ ਵਟ੍ਟਤਿ, ਤਥਾ ਨਵਨੀਤਸਪ੍ਪੀਤਿ ਵੇਦਿਤਬ੍ਬਂ. ਵਕ੍ਖਤਿ ਚ ਆਚਰਿਯੋ –

‘‘ਯਾਵਕਾਲਿਕਆਦੀਨਿ, ਸਂਸਟ੍ਠਾਨਿ ਸਹਤ੍ਤਨਾ. ਗਾਹਾਪਯਨ੍ਤਿ ਸਬ੍ਭਾਵ’’ਨ੍ਤਿ ਚ,

‘‘ਤੇਹੇਵ ਭਿਕ੍ਖੁਨਾ ਪਕ੍ਕਂ, ਕਪ੍ਪਤੇ ਯਾਵਜੀਵਿਕਂ;

ਨਿਰਾਮਿਸਞ੍ਚ ਸਤ੍ਤਾਹਂ, ਸਾਮਿਸੇ ਸਾਮਪਾਕਤਾ’’ਤਿ ਚ.

ਯਾ ਪਨ ਸਮਨ੍ਤਪਾਸਾਦਿਕਾਯਂ ਨਵਨੀਤਮ੍ਹਿ ਸਾਮਂਪਾਕਤਾ ਵੁਤ੍ਤਾ, ਸਾ ਤਕ੍ਕਾਦਿਸਮ੍ਮਿਸ੍ਸਂ ਅਧੋਤਨਵਨੀਤਂ ਸਨ੍ਧਾਯ ਵੁਤ੍ਤਾ. ਤਸ੍ਮਾ ਵਿਞ੍ਞੂਨਂ ਸਮਨ੍ਤਪਾਸਾਦਿਕਾਪਿ ਕਙ੍ਖਾਵਿਤਰਣੀਪਿ ਸਮੇਨ੍ਤਿ, ਤਂ ਨਵਨੀਤਂ ਸਨ੍ਧਾਯ ਵੁਤ੍ਤਨ੍ਤਿ ਆਚਰਿਯਾ ਵਦਨ੍ਤਿ. ਇਦਮੇਵ ਯੁਤ੍ਤਂ. ਯਦਿ ਸਪ੍ਪਿਮ੍ਹਿ ਸਾਮਂਪਾਕਤਾ ਹੋਤਿ, ਅਵਸ੍ਸਂਯੇਵ ਸਮਨ੍ਤਪਾਸਾਦਿਕਾਯਂ ਵੁਚ੍ਚੇਯ੍ਯ, ਤਤ੍ਥ ਪਨ ‘‘ਸਪ੍ਪਿ ਤਾਵ ਪੁਰੇਭਤ੍ਤਂ ਪਟਿਗ੍ਗਹਿਤਂ, ਤਦਹੁ ਪੁਰੇਭਤ੍ਤਂ ਸਾਮਿਸਮ੍ਪਿ ਨਿਰਾਮਿਸਮ੍ਪਿ ਪਰਿਭੁਞ੍ਜਿਤੁਂ ਵਟ੍ਟਤੀ’’ਤਿ (ਪਾਰਾ. ਅਟ੍ਠ. ੨.੬੨੨) ਹਿ ਵੁਤ੍ਤਂ, ਨ ਪਚਨਵਿਧਾਨਂ. ਮਨੁਸ੍ਸਸਪ੍ਪਿਨਵਨੀਤਾਨਂ, ਅਞ੍ਞੇਸਮ੍ਪਿ ਹਤ੍ਥਿਅਸ੍ਸਾਦੀਨਂ ਅਕਪ੍ਪਿਯਮਂਸਸਪ੍ਪਿਨਵਨੀਤਾਨਂ ਸਤ੍ਤਾਹਾਤਿਕ੍ਕਮੇ ਦੁਕ੍ਕਟਂ. ਕਿਂ ਪਨ ਤਂ ਪਰਿਭੁਞ੍ਜਿਤੁਂ ਵਟ੍ਟਤੀਤਿ? ਆਮ ਵਟ੍ਟਤਿ. ਕਸ੍ਮਾ? ਪਟਿਕ੍ਖੇਪਾਭਾਵਾ ਚ ਸਬ੍ਬਅਟ੍ਠਕਥਾਸੁ ਅਨੁਞ੍ਞਾਤਤ੍ਤਾ ਚ. ‘‘ਯੇਸਂ ਮਂਸਂ ਕਪ੍ਪਤਿ, ਤੇਸਂ ਸਪ੍ਪਿ, ਨਵਨੀਤ’’ਨ੍ਤਿ (ਪਾਰਾ. ੬੨੩) ਇਦਂ ਪਨ ਨਿਸ੍ਸਗ੍ਗਿਯਵਤ੍ਥੁਂ ਦਸ੍ਸੇਤੁਂ ਵੁਤ੍ਤਂ, ਨ ਅਞ੍ਞੇਸਂ ਵਾਰਣਤ੍ਥਾਯ.

੯੦. ਇਦਾਨਿ ਤੇਲਂ ਦਸ੍ਸੇਤੁਂ ‘‘ਤੇਲਂ ਤਿਲਵਸੇਰਣ੍ਡਮਧੁਸਾਸਪਸਮ੍ਭਵ’’ਨ੍ਤਿਆਦਿਮਾਹ. ਏਤ੍ਥ ਤਿਲਾਦੀਹਿ ਸਮ੍ਭਵਂ ਨਿਬ੍ਬਤ੍ਤਂ ਤੇਲਨ੍ਤਿ ਸਮ੍ਬਨ੍ਧੋ. ਏਤ੍ਥ (ਪਾਰਾ. ਅਟ੍ਠ. ੧.੧੦੦) ਪਨ ਪੁਰੇਭਤ੍ਤਂ ਤਿਲੇ ਪਟਿਗ੍ਗਹੇਤ੍ਵਾ ਕਤਤੇਲਂ ਪੁਰੇਭਤ੍ਤਂ ਸਾਮਿਸਮ੍ਪਿ ਵਟ੍ਟਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਸਵਤ੍ਥੁਕਪ੍ਪਟਿਗ੍ਗਹਿਤਤ੍ਤਾ ਅਨਜ੍ਝੋਹਰਣੀਯਂ. ਪਚ੍ਛਾਭਤ੍ਤਂ ਪਟਿਗ੍ਗਹੇਤ੍ਵਾ ਕਤਤੇਲਂ ਅਨਜ੍ਝੋਹਰਣੀਯਂ, ਸੀਸਮਕ੍ਖਨਾਦੀਸੁ ਉਪਨੇਤਬ੍ਬਂ. ਏਰਣ੍ਡਮਧੁਕਸਾਸਪਟ੍ਠੀਨਿ ਪਟਿਗ੍ਗਹੇਤ੍ਵਾ ਸਚੇ ਤਾਨਿ ਭਜ੍ਜਿਤ੍ਵਾ ਤੇਲਂ ਕਰੋਤਿ, ਤਦਹੁ ਪੁਰੇਭਤ੍ਤਮ੍ਪਿ ਸਾਮਿਸਂ ਨ ਵਟ੍ਟਤਿ, ਸਾਮਂਪਾਕਤਾ ਹੋਤਿ. ਸਚੇ ਅਭਜ੍ਜਿਤ੍ਵਾ ਕਰੋਤਿ, ਤਦਹੁ ਪੁਰੇਭਤ੍ਤਂ ਸਾਮਿਸਮ੍ਪਿ ਵਟ੍ਟਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਨਿਰਾਮਿਸਮੇਵ ਵਟ੍ਟਤਿ, ਪਰਿਭੁਞ੍ਜਿਤਬ੍ਬਵਤ੍ਥੂਨਂ ਯਾਵਜੀਵਿਕਤ੍ਤਾ ਸਵਤ੍ਥੁਕਪ੍ਪਟਿਗ੍ਗਹਣੇ ਦੋਸੋ ਨਤ੍ਥੀਤਿ. ਤੇਲਗ੍ਗਹਣਤ੍ਥਾਯ ਏਰਣ੍ਡਕਟ੍ਠਿਆਦੀਨਿ ਪਟਿਗ੍ਗਹੇਤ੍ਵਾ ਸਤ੍ਤਾਹਂ ਅਤਿਕ੍ਕਾਮਯਤੋ ਦੁਕ੍ਕਟਂ. ਤਥਾ ਪਾਲ਼ਿਯਂ ਅਨਾਗਤਾਨਿ ਅਦਸ੍ਸਿਤਾਨਿ ਕੋਸਮ੍ਬਕਕੁਸੁਮ੍ਭਾਦੀਨਂ ਤੇਲਾਨਿ.

ਇਦਾਨਿ ਮਧੁਵਿਕਤਿਂ ਦਸ੍ਸੇਤੁਂ ‘‘ਖੁਦ੍ਦਾਭਮਰਮਧੁਕਰਿ-ਮਕ੍ਖਿਕਾਹਿ ਕਤ’’ਨ੍ਤਿ ਵੁਤ੍ਤਂ. ਤਤ੍ਥ (ਪਾਰਾ. ਅਟ੍ਠ. ੨.੬੨੩) ਖੁਦ੍ਦਾਤਿ ਖੁਦ੍ਦਮਕ੍ਖਿਕਾ. ਭਮਰਾਤਿ ਮਹਾਭਮਰਮਕ੍ਖਿਕਾ. ਦਣ੍ਡਕੇਸੁ ਮਧੁਕਰਾ ਮਧੁਕਰਿਮਕ੍ਖਿਕਾ ਨਾਮ. ਏਤਾਹਿ ਤੀਹਿ ਮਕ੍ਖਿਕਾਹਿ ਕਤਂ ਮਧੁ ਨਾਮਾਤਿ ਅਤ੍ਥੋ. ‘‘ਮਧੁ ਨਾਮ ਮਕ੍ਖਿਕਾਮਧੂ’’ਤਿ ਪਾਲ਼ਿਯਂ (ਪਾਰਾ. ੬੨੩; ਪਾਚਿ. ੨੬੦) ਵੁਤ੍ਤਤ੍ਤਾ ਅਞ੍ਞੇਹਿ ਤੁਮ੍ਬਟਕਾਦੀਹਿ ਕਤਂ ਸਤ੍ਤਾਹਕਾਲਿਕਂ ਨ ਹੋਤੀਤਿ ਵੇਦਿਤਬ੍ਬਂ.

ਇਦਾਨਿ ਫਾਣਿਤਂ ਦਸ੍ਸੇਤੁਂ ‘‘ਰਸਾਦਿਉਚ੍ਛੁਵਿਕਤਿ, ਪਕ੍ਕਾਪਕ੍ਕਾ ਚ ਫਾਣਿਤ’’ਨ੍ਤਿ ਆਹ. ਪਕ੍ਕਾ ਚ ਅਪਕ੍ਕਾ ਚ ਰਸਾਦਿਉਚ੍ਛੁਵਿਕਤਿ ਫਾਣਿਤਨ੍ਤਿ ਅਤ੍ਥੋ. ਮਧੁਕਪੁਪ੍ਫਫਾਣਿਤਂ ਪੁਰੇਭਤ੍ਤਂ ਸਾਮਿਸਂ ਵਟ੍ਟਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਸਤ੍ਤਾਹਂ ਨਿਰਾਮਿਸਮੇਵ ਵਟ੍ਟਤਿ. ਤਸ੍ਸ ਸਤ੍ਤਾਹਾਤਿਕ੍ਕਮੇ ਦੁਕ੍ਕਟਂ. ਚਿਞ੍ਚਫਾਣਿਤਞ੍ਚ ਅਮ੍ਬਫਾਣਿਤਞ੍ਚ ਯਾਵਕਾਲਿਕਮੇਵ.

੯੧. ਇਦਾਨਿ ਏਤੇਸੁ ਵਸਾਤੇਲਸ੍ਸ ਓਦਿਸ੍ਸ ਅਨੁਞ੍ਞਾਤਤ੍ਤਾ ਤਂ ਵਿਸੁਂ ਉਦ੍ਧਰਿਤ੍ਵਾ ਦਸ੍ਸੇਤੁਂ ‘‘ਸਵਤ੍ਥੁਪਕ੍ਕਾ ਸਾਮਂ ਵਾ’’ਤਿਆਦਿਮਾਹ. ਸਤ੍ਤਵਿਧਞ੍ਹਿ (ਪਾਰਾ. ਅਟ੍ਠ. ੨.੬੨੩) ਓਦਿਸ੍ਸਂ ਨਾਮ ਬ੍ਯਾਧੋਦਿਸ੍ਸਂ ਪੁਗ੍ਗਲੋਦਿਸ੍ਸਂ ਕਾਲੋਦਿਸ੍ਸਂ ਸਮਯੋਦਿਸ੍ਸਂ ਦੇਸੋਦਿਸ੍ਸਂ ਵਸੋਦਿਸ੍ਸਂ ਭੇਸਜ੍ਜੋਦਿਸ੍ਸਨ੍ਤਿ.

ਤਤ੍ਥ ‘‘ਅਨੁਜਾਨਾਮਿ, ਭਿਕ੍ਖਵੇ, ਅਮਨੁਸ੍ਸਿਕਾਬਾਧੇ ਆਮਕਮਂਸਂ ਆਮਕਲੋਹਿਤ’’ਨ੍ਤਿ (ਮਹਾਵ. ੨੬੪) ਵੁਤ੍ਤਂ, ਇਦਂ ਬ੍ਯਾਧੋਦਿਸ੍ਸਂ ਨਾਮ. ਏਤ੍ਥ ਪਨ ਕਾਲੇਪਿ ਵਿਕਾਲੇਪਿ ਕਪ੍ਪਿਯਾਕਪ੍ਪਿਯਮਂਸਲੋਹਿਤਂ ਵਟ੍ਟਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਰੋਮਨ੍ਥਕਸ੍ਸ ਰੋਮਨ੍ਥਨ’’ਨ੍ਤਿ (ਚੂਲ਼ਵ. ੨੭੩) ਏਵਂ ਅਨੁਞ੍ਞਾਤਂ ਪੁਗ੍ਗਲੋਦਿਸ੍ਸਂ ਨਾਮ. ‘‘ਅਨੁਜਾਨਾਮਿ, ਭਿਕ੍ਖਵੇ, ਚਤ੍ਤਾਰਿ ਮਹਾਵਿਕਟਾਨਿ ਦਾਤੁਂ ਗੂਥਂ ਮੁਤ੍ਤਂ ਛਾਰਿਕਂ ਮਤ੍ਤਿਕ’’ਨ੍ਤਿ (ਮਹਾਵ. ੨੬੮) ਏਵਂ ਸਪ੍ਪਦਟ੍ਠਕਾਲੇ ਅਪ੍ਪਟਿਗ੍ਗਹਿਤਕਂ ਅਨੁਞ੍ਞਾਤਂ ਕਾਲੋਦਿਸ੍ਸਂ ਨਾਮ. ਗਣਭੋਜਨਾਦਿ ਸਮਯੋਦਿਸ੍ਸਂ ਨਾਮ. ਗਣਙ੍ਗਣੂਪਾਹਨਾਨਿ ਦੇਸੋਦਿਸ੍ਸਂ ਨਾਮ. ਵਸੋਦਿਸ੍ਸਂ ਨਾਮ ‘‘ਅਨੁਜਾਨਾਮਿ, ਭਿਕ੍ਖਵੇ, ਵਸਾਨਿ ਭੇਸਜ੍ਜਾਨੀ’’ਤਿ (ਮਹਾਵ. ੨੬੨) ਏਵਂ ਵਸਾਨਾਮੇਨ ਅਨੁਞ੍ਞਾਤਂ. ਤਂ ਠਪੇਤ੍ਵਾ ਮਨੁਸ੍ਸਵਸਂ ਸਬ੍ਬੇਸਂ ਕਪ੍ਪਿਯਾਕਪ੍ਪਿਯਵਸਾਨਂ ਤੇਲਂ ਤਂਤਦਤ੍ਥਿਕਾਨਂ ਤੇਲਪਰਿਭੋਗੇਨ ਪਰਿਭੁਞ੍ਜਿਤੁਂ ਵਟ੍ਟਤਿ. ਭੇਸਜ੍ਜੋਦਿਸ੍ਸਂ ਨਾਮ ‘‘ਅਨੁਜਾਨਾਮਿ, ਭਿਕ੍ਖਵੇ, ਤਾਨਿ ਪਞ੍ਚ ਭੇਸਜ੍ਜਾਨੀ’’ਤਿ (ਮਹਾਵ. ੨੬੧) ਏਵਂ ਭੇਸਜ੍ਜਨਾਮੇਨ ਵੁਤ੍ਤਾਨਿ ਸਪ੍ਪਿਆਦੀਨਿ ਪਞ੍ਚ.

ਯਥਾ ਪਨ ਖੀਰਦਧਿਆਦੀਹਿ ਪਕ੍ਕਤੇਲਂ ਪਚ੍ਛਾਭਤ੍ਤਂ ਨ ਵਟ੍ਟਤਿ, ਨ ਏਵਮਿਦਂ. ਇਦਂ ਪਨ ਤੇਲਂ ਸਵਤ੍ਥੁਕਪਕ੍ਕਮ੍ਪਿ ਵਟ੍ਟਤਿ, ਤਂ ਦਸ੍ਸੇਤੁਂ ‘‘ਸਵਤ੍ਥੁਪਕ੍ਕਾ ਸਾਮਂ ਵਾ’’ਤਿ ਵੁਤ੍ਤਂ. ਵਸਂ ਓਲੋਕੇਤ੍ਵਾ ‘‘ਸਵਤ੍ਥੁਪਕ੍ਕਾ’’ਤਿ ਵੁਤ੍ਤਂ. ਸਾਮਂ ਪਕ੍ਕਾ ਵਾਤਿ ਅਤ੍ਥੋ. ਯਥਾ ਸਵਤ੍ਥੁਕਪ੍ਪਟਿਗ੍ਗਹਿਤਤ੍ਤਾ ਸਾਮਂਪਕ੍ਕਤ੍ਤਾ ਦਧਿਆਦੀਹਿ ਪਕ੍ਕਤੇਲਂ ਅਤ੍ਤਨਾ ਕਤਂ ਪੁਰੇਭਤ੍ਤਮ੍ਪਿ ਨ ਵਟ੍ਟਤਿ, ਨ ਏਵਮਿਦਂ. ਇਦਂ ਪਨ ਅਤ੍ਤਨਾ ਸਵਤ੍ਥੁਕਪਕ੍ਕਮ੍ਪਿ ਪੁਰੇਭਤ੍ਤਮ੍ਪਿ ਪਚ੍ਛਾਭਤ੍ਤਮ੍ਪਿ ਵਟ੍ਟਤੀਤਿ ਅਤ੍ਥੋ. ਏਤ੍ਥ ਪਨ ਕਾਰਣੂਪਚਾਰੇਨ ਵਸਾਤੇਲਂ ‘‘ਵਸਾ’’ਤਿ ਵੁਤ੍ਤਂ.

ਕਾਲੇਤਿ ਪੁਰੇਭਤ੍ਤਕਾਲੇ ਪਰੇਹਿ ਵਾ ਅਤ੍ਤਨਾ ਵਾ ਪਕ੍ਕਾਤਿ ਅਤ੍ਥੋ. ਪਚ੍ਛਾਭਤ੍ਤਂ ਪਨ ਪਚਿਤੁਂ ਨ ਵਟ੍ਟਤਿ ‘‘ਕਾਲੇ ਪਟਿਗ੍ਗਹਿਤਂ ਕਾਲੇ ਨਿਪ੍ਪਕ੍ਕਂ ਕਾਲੇ ਸਂਸਟ੍ਠ’’ਨ੍ਤਿ (ਮਹਾਵ. ੨੬੨) ਵੁਤ੍ਤਤ੍ਤਾ. ਤਸ੍ਮਾ ‘‘ਕਾਲੇ’’ਤਿ ਵੁਤ੍ਤਂ. ਯੋ ਪਨ ਵਿਕਾਲੇ ਪਟਿਗ੍ਗਹੇਤ੍ਵਾ ਵਿਕਾਲੇ ਪਚਿਤ੍ਵਾ ਵਿਕਾਲੇ ਪਰਿਸ੍ਸਾਵੇਤ੍ਵਾ ਪਰਿਭੁਞ੍ਜਤਿ, ਸੋ ਤੀਣਿ ਦੁਕ੍ਕਟਾਨਿ ਆਪਜ੍ਜਤਿ.

ਅਮਾਨੁਸਾਤਿ ਏਤ੍ਥ (ਮਹਾਵ. ੨੬੨) ਪਨ ਅਚ੍ਛਵਸਾਦੀਨਂ ਅਨੁਞ੍ਞਾਤਤ੍ਤਾ ਠਪੇਤ੍ਵਾ ਮਨੁਸ੍ਸਵਸਂ ਸਬ੍ਬੇਸਂ ਅਕਪ੍ਪਿਯਮਂਸਾਨਂ ਵਸਾ ਅਨੁਞ੍ਞਾਤਾਤਿ ਵੇਦਿਤਬ੍ਬਾ. ਮਂਸੇਸੁ ਹਿ ਮਨੁਸ੍ਸਹਤ੍ਥਿਮਂਸਾਦੀਨਿ ਦਸ ਮਂਸਾਨਿ ਪਟਿਕ੍ਖਿਤ੍ਤਾਨਿ, ਵਸਾ ਪਨ ਏਕਾ ਮਨੁਸ੍ਸਵਸਾ ਏਵ.

ਅਨੁਪਸਮ੍ਪਨ੍ਨੇਨ (ਪਾਰਾ. ਅਟ੍ਠ. ੨.੬੨੩) ਕਤਨਿਬ੍ਬਟ੍ਟਿਤਵਸਾਤੇਲਂ ਪੁਰੇਭਤ੍ਤਂ ਪਟਿਗ੍ਗਹਿਤਂ ਪੁਰੇਭਤ੍ਤਂ ਸਾਮਿਸਮ੍ਪਿ ਵਟ੍ਟਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਸਤ੍ਤਾਹਂ ਨਿਰਾਮਿਸਮੇਵ ਵਟ੍ਟਤਿ. ਯਂ ਪਨੇਤ੍ਥ ਸੁਖੁਮਰਜਸਦਿਸਂ ਮਂਸਂ ਵਾ ਨ੍ਹਾਰੁ ਵਾ ਅਟ੍ਠਿ ਵਾ ਲੋਹਿਤਂ ਵਾ, ਤਂ ਅਬ੍ਬੋਹਾਰਿਕਂ. ਸਚੇ ਸਯਂ ਕਰੋਤਿ, ਪੁਰੇਭਤ੍ਤਂ ਪਟਿਗ੍ਗਹੇਤ੍ਵਾ ਪਚਿਤ੍ਵਾ ਪਰਿਸ੍ਸਾਵੇਤ੍ਵਾ ਸਤ੍ਤਾਹਂ ਨਿਰਾਮਿਸਮੇਵ ਪਰਿਭੁਞ੍ਜਿਤਬ੍ਬਂ. ਨਿਰਾਮਿਸਪਰਿਭੋਗਞ੍ਹਿ ਸਨ੍ਧਾਯ ਇਦਂ ਵੁਤ੍ਤਂ ‘‘ਕਾਲੇ ਪਟਿਗ੍ਗਹਿਤਂ ਕਾਲੇ ਨਿਪ੍ਪਕ੍ਕਂ ਕਾਲੇ ਸਂਸਟ੍ਠਂ ਤੇਲਪਰਿਭੋਗੇਨ ਪਰਿਭੁਞ੍ਜਿਤੁ’’ਨ੍ਤਿ (ਮਹਾਵ. ੨੬੨). ਅਞ੍ਞੇਸਨ੍ਤਿ ਸਪ੍ਪਿਆਦੀਨਂ. ਵਤ੍ਥੁਨ੍ਤਿ ਯਾਵਕਾਲਿਕਭੂਤਂ ਵਤ੍ਥੁਂ. ਯਾਵਕਾਲਿਕਵਤ੍ਥੂਨਂ ਵਤ੍ਥੁਂ ਨ ਪਚੇਤਿ ਸਮ੍ਬਨ੍ਧੋ.

੯੨. ਇਦਾਨਿ ਯਾਵਜੀਵਿਕਵਿਕਤਿਂ ਦਸ੍ਸੇਤੁਂ ‘‘ਹਲਿਦ੍ਦੀ’’ਤਿਆਦਿ ਵੁਤ੍ਤਂ. ਤਤ੍ਥਾਯਮਨੁਤ੍ਤਾਨਪਦਤ੍ਥੋ (ਮਹਾਵ. ੨੬੩; ਪਾਚਿ. ਅਟ੍ਠ. ੨੪੮-੨੪੯) – ਪਞ੍ਚਮੂਲਾਦਿਕਞ੍ਚਾਪੀਤਿ ਏਤ੍ਥ ਦ੍ਵਿਪਞ੍ਚਮੂਲੇਨ ਸਦ੍ਧਿਂ ਅਞ੍ਞਾਨਿਪਿ ਤਗ੍ਗਤਿਕਾਨਿ ਮੂਲਭੇਸਜ੍ਜਾਨਿ ਗਹਿਤਾਨੀਤਿ ਞਾਤਬ੍ਬਂ.

੯੩-੫. ਬਿਲ਼ਙ੍ਗਾਦੀਨਿ ਫਲਭੇਸਜ੍ਜਾਨਿ. ਤਤ੍ਥ (ਮਹਾਵ. ੨੬੩) ਗੋਟ੍ਠਫਲਨ੍ਤਿ ਮਦਨਫਲਨ੍ਤਿ ਵਦਨ੍ਤਿ. ਕਪ੍ਪਾਸਾਦੀਨਂ ਪਣ੍ਣਨ੍ਤਿ ਸਮ੍ਬਨ੍ਧੋ. ਇਮੇ ਪਨ ਵੁਤ੍ਤਪ੍ਪਕਾਰਾ ਮੂਲਭੇਸਜ੍ਜਫਲਭੇਸਜ੍ਜਪਣ੍ਣਭੇਸਜ੍ਜਵਸੇਨ ਵੁਤ੍ਤਾ ਸਬ੍ਬੇ ਕਪ੍ਪਿਯਾ. ਇਮੇਸਂ ਪੁਪ੍ਫਫਲਪਣ੍ਣਮੂਲਾ ਸਬ੍ਬੇਪਿ ਕਪ੍ਪਿਯਾ ਯਾਵਜੀਵਿਕਾਯੇਵ. ਠਪੇਤ੍ਵਾ ਉਚ੍ਛੁਨਿਯ੍ਯਾਸਂ ਸਬ੍ਬੋ ਚ ਨਿਯ੍ਯਾਸੋ ਸਰਸਞ੍ਚ ਉਚ੍ਛੁਜਂ ਤਚਂ ਠਪੇਤ੍ਵਾ ਸਬ੍ਬੋ ਚ ਤਚੋਤਿ ਸਮ੍ਬਨ੍ਧੋ.

੯੬. ਮਧੁਨਾ (ਪਾਰਾ. ਅਟ੍ਠ. ੨.੬੨੩) ਅਮਕ੍ਖਿਤਂ ਸੁਦ੍ਧਸਿਤ੍ਥਞ੍ਚ. ਮਧੁਮਕ੍ਖਿਤਂ ਪਨ ਸਤ੍ਤਾਹਕਾਲਿਕਮੇਵ. ਯਞ੍ਚ ਕਿਞ੍ਚੀਤਿ ਓਦਨਂ ਮਂਸਂ ਅਟ੍ਠਿਆਦੀਨੀਤਿ ਅਤ੍ਥੋ.

੯੭. ‘‘ਯਾਨਿ ਵਾ ਪਨਞ੍ਞਾਨਿਪਿ ਅਤ੍ਥਿ ਨੇਵ ਖਾਦਨੀਯੇ ਖਾਦਨੀਯਤ੍ਥਂ ਫਰਨ੍ਤਿ, ਨ ਭੋਜਨੀਯੇ ਭੋਜਨੀਯਤ੍ਥਂ ਫਰਨ੍ਤਿ, ਤਾਨਿ ਪਟਿਗ੍ਗਹੇਤ੍ਵਾ ਯਾਵਜੀਵਂ ਪਰਿਹਰਿਤੁਂ, ਸਤਿ ਪਚ੍ਚਯੇ ਪਰਿਭੁਞ੍ਜਿਤੁਂ, ਅਸਤਿ ਪਚ੍ਚਯੇ ਪਰਿਭੁਞ੍ਜਨ੍ਤਸ੍ਸ ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੨੬੩) ਵੁਤ੍ਤਤ੍ਤਾ ‘‘ਆਹਾਰਤ੍ਥਮਸਾਧੇਨ੍ਤਂ, ਸਬ੍ਬਂ ਤਂ ਯਾਵਜੀਵਿਕ’’ਨ੍ਤਿ ਵੁਤ੍ਤਂ.

੯੮. ਸਬ੍ਬਸ੍ਸਾਤਿ ਗਿਲਾਨਸ੍ਸਾਪਿ ਅਗਿਲਾਨਸ੍ਸਪੀਤਿ ਅਤ੍ਥੋ. ਕਾਲਿਕਤ੍ਤਯਨ੍ਤਿ ਯਾਵਕਾਲਿਕਂ ਵਜ੍ਜੇਤ੍ਵਾ ਅਵਸੇਸਂ ਸਤਿ ਪਚ੍ਚਯੇ ਵਿਕਾਲੇ ਕਪ੍ਪਤੀਤਿ ਅਤ੍ਥੋ.

੯੯. ਜਨਯਨ੍ਤੁਭੋਤਿ ਜਨਯਨ੍ਤਿ ਉਭੋ. ਕਿਂ ਵੁਤ੍ਤਂ ਹੋਤਿ? ਯਾਵਕਾਲਿਕਯਾਮਕਾਲਿਕਸਙ੍ਖਾਤਾ ਉਭੋ ਕਾਲਿਕਾ ਅਤ੍ਤਨੋ ਕਾਲਮਤਿਕ੍ਕਮਿਤ੍ਵਾ ਪਰਿਭੁਤ੍ਤਾ ਪਾਚਿਤ੍ਤਿਂ ਜਨਯਨ੍ਤੀਤਿ ਅਤ੍ਥੋ. ਕਿਞ੍ਚ ਭਿਯ੍ਯੋ (ਮਹਾਵ. ੨੭੪; ਮਹਾਵ. ਅਟ੍ਠ. ੨੭੪; ਕਙ੍ਖਾ. ਅਟ੍ਠ. ਸਨ੍ਨਿਧਿਕਾਰਕਸਿਕ੍ਖਾਪਦਵਣ੍ਣਨਾ) – ਉਭੋਪਿ ਪਨੇਤੇ ਅਕਪ੍ਪਿਯਕੁਟਿਯਂ ਵੁਤ੍ਤਾ ਅਨ੍ਤੋਵੁਤ੍ਥਂ ਦੁਕ੍ਕਟਞ੍ਚ, ਪੁਨਦਿਵਸੇ ਪਰਿਭੁਞ੍ਜਤੋ ਸਨ੍ਨਿਧਿਂ ਪਾਚਿਤ੍ਤਿਯਞ੍ਚ ਜਨਯਨ੍ਤੀਤਿ ਅਤ੍ਥੋ.

੧੦੦. ਅਨਾਰੁਲ਼੍ਹੇਤਿ ਪਾਲ਼ਿਯਂ ਅਨਾਗਤੇ ਮਨੁਸ੍ਸਸਪ੍ਪਿਆਦਿਮ੍ਹੀਤਿ ਅਤ੍ਥੋ.

੧੦੧. ਨਿਸ੍ਸਟ੍ਠਲਦ੍ਧਨ੍ਤਿ (ਪਾਰਾ. ੬੨੪) ਵਿਨਯਕਮ੍ਮਂ ਕਤ੍ਵਾ ਪੁਨ ਲਦ੍ਧਨ੍ਤਿ ਅਤ੍ਥੋ. ਵਿਕਪ੍ਪੇਨ੍ਤਸ੍ਸ ਸਤ੍ਤਾਹੇਤਿ ਸਤ੍ਤਾਹਬ੍ਭਨ੍ਤਰੇ ਸਾਮਣੇਰਸ੍ਸ ‘‘ਇਦਂ ਸਪ੍ਪਿਂ ਤੇਲ’’ਨ੍ਤਿਆਦਿਨਾ ਨਯੇਨ ਨਾਮਂ ਗਹੇਤ੍ਵਾ ‘‘ਤੁਯ੍ਹਂ ਵਿਕਪ੍ਪੇਮੀ’’ਤਿ ਵਾ ‘‘ਇਤ੍ਥਨ੍ਨਾਮਸ੍ਸ ਵਿਕਪ੍ਪੇਮੀ’’ਤਿ ਵਾ ਸਮ੍ਮੁਖਾਪਿ ਵਾ ਪਰਮ੍ਮੁਖਾਪਿ ਵਾ ਵਿਕਪ੍ਪੇਨ੍ਤਸ੍ਸ ਅਨਾਪਤ੍ਤੀਤਿ ਸਮ੍ਬਨ੍ਧੋ. ਪਾਲ਼ਿਯਂ ਪਨ ‘‘ਅਨਾਪਤ੍ਤਿ ਅਨ੍ਤੋਸਤ੍ਤਾਹੇ ਅਧਿਟ੍ਠੇਤਿ, ਵਿਸ੍ਸਜ੍ਜੇਤਿ, ਨਸ੍ਸਤਿ, ਵਿਨਸ੍ਸਤਿ, ਡਯ੍ਹਤਿ, ਅਚ੍ਛਿਨ੍ਦਿਤ੍ਵਾ ਗਣ੍ਹਨ੍ਤਿ, ਵਿਸ੍ਸਾਸਂ ਗਣ੍ਹਨ੍ਤੀ’’ਤਿ (ਪਾਰਾ. ੬੨੫) ਏਤ੍ਤਕਮੇਵ ਵੁਤ੍ਤਂ, ‘‘ਵਿਕਪ੍ਪੇਮੀ’’ਤਿ ਇਦਂ ਪਨ ਨਤ੍ਥਿ. ਕਿਞ੍ਚਾਪਿ ਨਤ੍ਥਿ, ਅਥ ਖੋ ‘‘ਅਨਧਿਟ੍ਠਿਤੇ ਅਧਿਟ੍ਠਿਤਸਞ੍ਞੀ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ, ਅਵਿਕਪ੍ਪਿਤੇ ਵਿਕਪ੍ਪਿਤਸਞ੍ਞੀ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿ (ਪਾਰਾ. ੬੨੪) ਆਪਤ੍ਤਿਵਾਰੇ ਆਗਤਤ੍ਤਾ ਥੇਰੇਨ ਦਸ੍ਸਿਤਂ. ਤਂ ਦਸ੍ਸੇਨ੍ਤੇਨਾਪਿ ਸਚੇ ਉਪਸਮ੍ਪਨ੍ਨਸ੍ਸ ਵਿਕਪ੍ਪੇਤਿ, ਅਤ੍ਤਨੋ ਏਵ ਸਨ੍ਤਕਂ ਹੋਤਿ, ਪਟਿਗ੍ਗਹਣਮ੍ਪਿ ਨ ਵਿਜਹਤਿ, ਤਸ੍ਮਾ ਉਪਸਮ੍ਪਨ੍ਨਵਸੇਨ ਅਦਸ੍ਸੇਤ੍ਵਾ ਅਨੁਪਸਮ੍ਪਨ੍ਨਵਸੇਨ ਦਸ੍ਸਿਤਂ. ਤਸ੍ਸ ਹਿ ਵਿਕਪ੍ਪਿਤੇ ਪਟਿਗ੍ਗਹਣਮ੍ਪਿ ਵਿਜਹਤਿ, ਆਪਤ੍ਤਿਪਿ ਨ ਹੋਤੀਤਿ. ਅਧਿਟ੍ਠਤੋਤਿ ਅਬ੍ਭਞ੍ਜਨਾਦੀਨਿ ਅਧਿਟ੍ਠਹਨ੍ਤਸ੍ਸ ਅਨਾਪਤ੍ਤੀਤਿ ਅਤ੍ਥੋ. ਸਚੇ ਪਨ ਸਤ੍ਤਾਹਬ੍ਭਨ੍ਤਰੇ ਨਿਰਪੇਕ੍ਖੋ ਹੁਤ੍ਵਾ ਅਨੁਪਸਮ੍ਪਨ੍ਨਸ੍ਸ ਪਰਿਚ੍ਚਜਤਿ, ਪਰਿਚ੍ਚਤ੍ਤਤ੍ਤਾ ਅਨਾਪਤ੍ਤਿ, ਇਤਰਸ੍ਸ ਚ ਅਪ੍ਪਟਿਗ੍ਗਹਿਤਤ੍ਤਾ ਉਭਿਨ੍ਨਮ੍ਪਿ ਕਾਯਿਕਪਰਿਭੋਗੋ ਵਟ੍ਟਤਿ. ਅਨਿਸ੍ਸਗ੍ਗਿਯਤ੍ਤਾ ਪਨ ਬਾਹਿਰਪਰਿਭੋਗੇਨ ਵਟ੍ਟਤਿ. ‘‘ਤਾਨਿ ਪਟਿਗ੍ਗਹੇਤ੍ਵਾ ਸਤ੍ਤਾਹਪਰਮਂ ਸਨ੍ਨਿਧਿਕਾਰਕਂ ਪਰਿਭੁਞ੍ਜਿਤਬ੍ਬਾਨੀ’’ਤਿ (ਪਾਰਾ. ੬੨੩) ਏਵਂ ਨਿਯਮੇਤ੍ਵਾ ਅਨੁਞ੍ਞਾਤਤ੍ਤਾ ਵੁਤ੍ਤਂ ‘‘ਅਞ੍ਞਸ੍ਸ ਦਦਤੋਪਿ ਚ ਅਨਾਪਤ੍ਤੀ’’ਤਿ.

੧੦੨. ਸਬ੍ਭਾਵਨ੍ਤਿ ਅਤ੍ਤਨੋ ਸਭਾਵਂ. ਯਸ੍ਮਾ ਗਾਹਾਪਯਨ੍ਤਿ, ਤਸ੍ਮਾ ਏਵਮੁਦੀਰਿਤਨ੍ਤਿ ਵੁਤ੍ਤਨ੍ਤਿ ਅਤ੍ਥੋ. ਇਦਾਨਿ ਵਕ੍ਖਮਾਨਂ ਸਨ੍ਧਾਯ ‘‘ਏਵ’’ਨ੍ਤਿ ਵੁਤ੍ਤਂ.

੧੦੩-੫. ਸਤ੍ਤਾਹਂ ਯਾਵਜੀਵਿਕਨ੍ਤਿ (ਮਹਾਵ. ੩੦੫; ਮਹਾਵ. ਅਟ੍ਠ. ਕਙ੍ਖਾ. ਅਟ੍ਠ. ਸਨ੍ਨਿਧਿਕਾਰਕਸਿਕ੍ਖਾਪਦਵਣ੍ਣਨਾ) ਸਤ੍ਤਾਹਕਾਲਿਕਞ੍ਚ ਯਾਵਜੀਵਿਕਞ੍ਚਾਤਿ ਅਤ੍ਥੋ. ਕਿਂ ਵੁਤ੍ਤਂ ਹੋਤਿ? ਸਤ੍ਤਾਹਕਾਲਿਕਯਾਵਜੀਵਿਕਦ੍ਵਯਂ ਸੇਸਕਾਲਿਕਸਮ੍ਮਿਸ੍ਸਂ ਸਮ੍ਭਿਨ੍ਨਰਸਂ ਕਤ੍ਵਾ ਪਰਿਭੁਞ੍ਜਤੋ ਸਨ੍ਨਿਧਿਪਾਚਿਤ੍ਤਿ ਹੋਤੀਤਿ ਉਦੀਰਿਤਨ੍ਤਿ. ਤਦਹੁ ਪਟਿਗ੍ਗਹਿਤਂ ਤਦਹੇਵਾਤਿ ਅਤ੍ਥੋ. ਸੇਸਨ੍ਤਿ ਸਤ੍ਤਾਹਕਾਲਿਕਯਾਵਜੀਵਿਕਦ੍ਵਯਂ. ਇਤਰਨ੍ਤਿ ਯਾਵਜੀਵਿਕਂ. ਪੁਰੇ ਪਟਿਗ੍ਗਹਿਤਂ ਵਾ ਹੋਤੁ, ਤਦਹੁ ਵਾ ਪਟਿਗ੍ਗਹਿਤਂ, ਯਾਵਜੀਵਿਕਂ ਸਤ੍ਤਾਹਕਾਲਿਕੇਨ ਸਤ੍ਤਾਹਂ ਕਪ੍ਪਤੀਤਿ ਵੇਦਿਤਬ੍ਬਂ. ‘‘ਯਾਵਕਾਲਿਕੇਨ, ਭਿਕ੍ਖਵੇ, ਯਾਮਕਾਲਿਕਂ, ਸਤ੍ਤਾਹਕਾਲਿਕਂ, ਯਾਵਜੀਵਿਕਂ ਤਦਹੁ ਪਟਿਗ੍ਗਹਿਤਂ ਕਾਲੇ ਕਪ੍ਪਤਿ, ਨੋ ਵਿਕਾਲੇ. ਯਾਮਕਾਲਿਕੇਨ, ਭਿਕ੍ਖਵੇ, ਸਤ੍ਤਾਹਕਾਲਿਕਂ, ਯਾਵਜੀਵਿਕਂ ਤਦਹੁ ਪਟਿਗ੍ਗਹਿਤਂ ਯਾਮੇ ਕਪ੍ਪਤਿ, ਯਾਮਾਤਿਕ੍ਕਨ੍ਤੇ ਨ ਕਪ੍ਪਤਿ. ਸਤ੍ਤਾਹਕਾਲਿਕੇਨ, ਭਿਕ੍ਖਵੇ, ਯਾਵਜੀਵਿਕਂ ਪਟਿਗ੍ਗਹਿਤਂ ਸਤ੍ਤਾਹਂ ਕਪ੍ਪਤਿ, ਸਤ੍ਤਾਹਾਤਿਕ੍ਕਨ੍ਤੇ ਨ ਕਪ੍ਪਤੀ’’ਤਿ ਹਿ ਭੇਸਜ੍ਜਕ੍ਖਨ੍ਧਕੇ (ਮਹਾਵ. ੩੦੫) ਵੁਤ੍ਤਂ. ਏਤ੍ਥ ਪਨ ‘‘ਤਦਹੁ ਪਟਿਗ੍ਗਹਿਤ’’ਨ੍ਤਿ ਵਿਸੇਸਵਚਨਸ੍ਸ ਨਤ੍ਥਿਤਾਯ ਪੁਰੇ ਪਟਿਗ੍ਗਹਿਤਮ੍ਪਿ ਵਟ੍ਟਤੀਤਿ ਸਿਦ੍ਧਨ੍ਤਿ. ਕਾਲਿਕਵਿਨਿਚ੍ਛਯੋ.

ਕਾਲਿਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.