੪੮. ਸਨ੍ਤੋਸਨਿਦ੍ਦੇਸਵਣ੍ਣਨਾ

੪੫੯. ‘‘ਚਤ੍ਤਾਰਿਮਾਨਿ, ਭਿਕ੍ਖਵੇ, ਅਪ੍ਪਾਨਿ ਚੇਵ ਸੁਲਭਾਨਿ ਚ, ਤਾਨਿ ਚ ਅਨਵਜ੍ਜਾਨਿ. ਕਤਮਾਨਿ ਚਤ੍ਤਾਰਿ? ਪਂਸੁਕੂਲਂ, ਭਿਕ੍ਖਵੇ, ਚੀਵਰਾਨਂ ਅਪ੍ਪਞ੍ਚ ਸੁਲਭਞ੍ਚ, ਤਞ੍ਚ ਅਨਵਜ੍ਜਂ. ਪਿਣ੍ਡਿਯਾਲੋਪੋ, ਭਿਕ੍ਖਵੇ, ਭੋਜਨਾਨਂ ਅਪ੍ਪਞ੍ਚ ਸੁਲਭਞ੍ਚ, ਤਞ੍ਚ ਅਨਵਜ੍ਜਂ. ਰੁਕ੍ਖਮੂਲਂ, ਭਿਕ੍ਖਵੇ, ਸੇਨਾਸਨਾਨਂ ਅਪ੍ਪਞ੍ਚ ਸੁਲਭਞ੍ਚ, ਤਞ੍ਚ ਅਨਵਜ੍ਜਂ. ਪੂਤਿਮੁਤ੍ਤਭੇਸਜ੍ਜਂ, ਭਿਕ੍ਖਵੇ, ਭੇਸਜ੍ਜਾਨਂ ਅਪ੍ਪਞ੍ਚ ਸੁਲਭਞ੍ਚ, ਤਞ੍ਚ ਅਨਵਜ੍ਜਂ. ਇਮਾਨਿ ਖੋ, ਭਿਕ੍ਖਵੇ, ਚਤ੍ਤਾਰਿ ਅਪ੍ਪਾਨਿ ਚੇਵ ਸੁਲਭਾਨਿ ਚ, ਤਾਨਿ ਚ ਅਨਵਜ੍ਜਾਨੀ’’ਤਿ (ਅ. ਨਿ. ੪.੨੭; ਇਤਿਵੁ. ੧੦੧) ਵਚਨਤੋ ‘‘ਅਪ੍ਪੇਨਾ’’ਤਿਆਦਿ ਵੁਤ੍ਤਂ.

ਸਨ੍ਤੁਟ੍ਠੋਤਿ ਏਤ੍ਥ ਯਥਾਲਾਭਯਥਾਬਲਯਥਾਸਾਰੁਪ੍ਪਸਨ੍ਤੋਸਾਨਂ ਵਸੇਨ ਏਕੇਕਸ੍ਮਿਂ ਪਚ੍ਚਯੇ ਤਯੋ ਤਯੋ ਕਤ੍ਵਾ ਚਤੂਸੁ ਪਚ੍ਚਯੇਸੁ ਦ੍ਵਾਦਸ ਸਨ੍ਤੋਸਾ ਹੋਨ੍ਤਿ. ਮਤ੍ਤਞ੍ਞੂਤਿ ਏਤ੍ਥ (ਮ. ਨਿ. ਅਟ੍ਠ. ੧.੪੨੨; ਸਂ. ਨਿ. ਅਟ੍ਠ. ੩.੪.੨੩੯; ਅ. ਨਿ. ਅਟ੍ਠ. ੨.੩.੧੬; ਇਤਿਵੁ. ਅਟ੍ਠ. ੨੮; ਧ. ਸ. ਅਟ੍ਠ. ੧੨੪-੧੩੪) ਚਤ੍ਤਾਰੋ ਮਤ੍ਤਾ ਪਰਿਯੇਸਨਮਤ੍ਤਾ ਪਟਿਗ੍ਗਹਣਮਤ੍ਤਾ ਪਰਿਭੋਗਮਤ੍ਤਾ ਵਿਸ੍ਸਜ੍ਜਨਮਤ੍ਤਾਤਿ. ਇਤਰੀਤਰੇਨ ਯਾਪੇਨ੍ਤੋ ਸੁਭਰੋ ਨਾਮ. ਸਨ੍ਤੋਸਵਿਨਿਚ੍ਛਯੋ.

ਸਨ੍ਤੋਸਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.