੪੧. ਪਕਿਣ੍ਣਕਨਿਦ੍ਦੇਸਵਣ੍ਣਨਾ

੩੩੫-੬. ਸਦ੍ਵਾਰਬਨ੍ਧਨੇ ਠਾਨੇ…ਪੇ… ਸਯਨ੍ਤੋ ਦੁਕ੍ਕਟਂ ਫੁਸੇਤਿ ਏਵਰੂਪੇ ਠਾਨੇ ਦਿਵਾ ਸਯਨ੍ਤੇਨਾਤਿ ਸਮ੍ਬਨ੍ਧੋ. ਸਦ੍ਵਾਰਬਨ੍ਧਨੇ (ਪਾਰਾ. ੭੭; ਪਾਰਾ. ਅਟ੍ਠ. ੧.੭੭) ਪਨ ਠਾਨੇ ਯੇਨ ਕੇਨਚਿ ਪਰਿਕ੍ਖਿਤ੍ਤੇ ਅਬ੍ਭੋਕਾਸੇਪਿ ਰੁਕ੍ਖਮੂਲੇਪਿ ਅਨ੍ਤਮਸੋ ਇਮਿਨਾ ਲਕ੍ਖਣੇਨ ਯੁਤ੍ਤੇ ਆਕਾਸਙ੍ਗਣੇਪਿ ਸਯਨ੍ਤੇਨ ਦ੍ਵਾਰਂ ਬਨ੍ਧਿਤਬ੍ਬਮੇਵ. ਵਿਞ੍ਞੁਮ੍ਹਿ ਪੁਰਿਸੇਤਿ ਭਿਕ੍ਖੁਮ੍ਹਿ ਵਾ ਸਾਮਣੇਰੇ ਵਾ ਅਨ੍ਤਮਸੋ ਉਪਾਸਕਆਰਾਮਿਕੇਸੁਪਿ ਅਞ੍ਞਤਰਸ੍ਮਿਂ ਸਤੀਤਿ ਅਤ੍ਥੋ. ‘‘ਏਸ ਜਗ੍ਗਿਸ੍ਸਤੀ’’ਤਿ ਆਭੋਗੋ ਚਾਪਿ ਕਪ੍ਪਤੀਤਿ ਕੇਵਲਂ ਭਿਕ੍ਖੁਨਿਂ ਵਾ ਮਾਤੁਗਾਮਂ ਵਾ ਆਪੁਚ੍ਛਿਤੁਂ ਨ ਵਟ੍ਟਤਿ. ਸਵਸੇਤਿ ਅਤ੍ਤਨੋ ਵਸੇ, ਅਬਹੁਸਾਧਾਰਣਟ੍ਠਾਨੇਤਿ ਅਤ੍ਥੋ. ਤਂ ਵਿਨਾਕਾਰਨ੍ਤਿ ਤਂ ਪੁਬ੍ਬੇ ਵੁਤ੍ਤਪ੍ਪਕਾਰਂ ਦ੍ਵਾਰਥਕਨਆਭੋਗਕਰਣਸਙ੍ਖਾਤਂ ਆਕਾਰਂ ਵਿਨਾਤਿ ਅਤ੍ਥੋ. ਅਚਿਤ੍ਤਕਾਪਤ੍ਤਿਕਿਰਿਯਾਯਂ ਸਙ੍ਖੇਪੋ.

੩੩੭. ਰਤਨਾਨੀਤਿ ਮੁਤ੍ਤਾਦਿਦਸਵਿਧਰਤਨਾਨਿ. ਧਞ੍ਞਨ੍ਤਿ ਸਤ੍ਤਵਿਧਂ ਧਞ੍ਞਂ.

੩੩੮. ਸਿਤ੍ਥਤੇਲੋਦਤੇਲੇਹੀਤਿ ਏਤ੍ਥ (ਚੂਲ਼ਵ. ੨੪੬; ਚੂਲ਼ਵ. ਅਟ੍ਠ. ੨੪੬) ਪਨ ਯੋ ਮਧੁਸਿਤ੍ਥਕਤੇਲੇਨ ਵਾ ਉਦਕਮਿਸ੍ਸਕਤੇਲੇਨ ਵਾ ਅਞ੍ਞੇਨ ਕੇਨਚਿ ਵਿਕਾਰੇਨ ਵਾ ਕੇਸੇ ਓਸਣ੍ਠੇਤਿ, ਦਨ੍ਤਮਯਾਦੀਸੁ ਯੇਨ ਕੇਨਚਿ ਫਣੇਨ ਵਾ ਕੋਚ੍ਛੇਨ ਵਾ ਹਤ੍ਥੇਨ ਵਾ ਫਣਕਿਚ੍ਚਂ ਕਰੋਨ੍ਤੋ ਅਙ੍ਗੁਲੀਹਿ ਵਾ ਓਸਣ੍ਠੇਤਿ, ਤਸ੍ਸ ਦੁਕ੍ਕਟਂ ਹੋਤੀਤਿ ਅਤ੍ਥੋ.

੩੩੯. ਨੇਕਪਾਵੁਰਣਾਤਿ (ਚੂਲ਼ਵ. ੨੬੪) ਨ ਏਕਪਾਵੁਰਣਾ. ਤੁਵਟ੍ਟਯੁਨ੍ਤਿ ਨਿਪਜ੍ਜੇਯ੍ਯੁਂ. ਕਿਂ ਵੁਤ੍ਤਂ ਹੋਤਿ? ਯਦਿ ਏਕਪਾਵੁਰਣਾ ਵਾ ਏਕਤ੍ਥਰਣਾ ਵਾ ਏਕਮਞ੍ਚੇ ਵਾ ਤੁਵਟ੍ਟੇਯ੍ਯੁਂ, ਨ ਵਟ੍ਟਤਿ, ਦੁਕ੍ਕਟਂ ਹੋਤੀਤਿ ਵੁਤ੍ਤਂ ਹੋਤਿ. ਏਕਮ੍ਹਿ (ਚੂਲ਼ਵ. ਅਟ੍ਠ. ੨੬੪) ਵਾ ਭਾਜਨੇ ਨ ਭੁਞ੍ਜੇਯ੍ਯੁਨ੍ਤਿ ਸਮ੍ਬਨ੍ਧੋ.

੩੪੦. ਚਤੁਰਙ੍ਗੁਲਤੋ (ਚੂਲ਼ਵ. ੨੮੨; ਚੂਲ਼ਵ. ਅਟ੍ਠ. ੨੮੨) ਊਨਂ ਦਨ੍ਤਕਟ੍ਠਂ ਨ ਖਾਦੇਯ੍ਯਾਤਿ ਸਮ੍ਬਨ੍ਧੋ. ਅਧਿਕਟ੍ਠਙ੍ਗੁਲਨ੍ਤਿ ਅਟ੍ਠਙ੍ਗੁਲਤੋ ਅਧਿਕਂ. ਤਥਾਤਿ ਨ ਖਾਦੇਯ੍ਯਾਤਿ ਅਤ੍ਥੋ. ਅਕਲ੍ਲਕੋ (ਚੂਲ਼ਵ. ੨੮੯) ਲਸੁਣਂ ਨ ਖਾਦੇਯ੍ਯ.

੩੪੧. ਹੀਨੇਹਿ (ਪਾਚਿ. ੩੧ ਆਦਯੋ) ਵਾ ਉਕ੍ਕਟ੍ਠੇਹਿ ਵਾ ਜਾਤਿਆਦੀਹਿ ਏਵ ਉਕ੍ਕਟ੍ਠਂ ਵਾ ਹੀਨਂ ਵਾ ‘‘ਚਣ੍ਡਾਲੋਸੀ’’ਤਿਆਦਿਨਾ ਨਯੇਨ ਉਜੁਂ ਵਾ ‘‘ਸਨ੍ਤਿ ਵਾ ਇਧੇਕਚ੍ਚੇ ਚਣ੍ਡਾਲਾ, ਵੇਨਾ, ਨੇਸਾਦਾ’’ਤਿਆਦਿਨਾ ਨਯੇਨ ਅਞ੍ਞਾਪਦੇਸੇਨ ਵਾ ਉਪਸਮ੍ਪਨ੍ਨਂ ਵਾ ਅਨੁਪਸਮ੍ਪਨ੍ਨਂ ਵਾ ਅਕ੍ਕੋਸਾਧਿਪ੍ਪਾਯਂ ਵਿਨਾ ਕੇਵਲਂ ਦਵਾਧਿਪ੍ਪਾਯੇਨ ਵਦੇ, ਦੁਬ੍ਭਾਸਿਤਨ੍ਤਿ ਅਤ੍ਥੋ.

੩੪੨. ਨਖੇ ਵਾ ਕੇਸੇ ਵਾ ਨਾਸਲੋਮੇ (ਚੂਲ਼ਵ. ੨੭੫) ਵਾ ਦੀਘੇ ਨ ਧਾਰਯੇਤਿ ਸਮ੍ਬਨ੍ਧੋ. ‘‘ਅਨੁਜਾਨਾਮਿ, ਭਿਕ੍ਖਵੇ, ਮਂਸਪ੍ਪਮਾਣੇਨ ਨਖੇ ਛਿਨ੍ਦਿਤੁ’’ਨ੍ਤਿ (ਚੂਲ਼ਵ. ੨੭੪) ਚ ‘‘ਅਨੁਜਾਨਾਮਿ, ਭਿਕ੍ਖਵੇ, ਦੁਮਾਸਿਕਂ ਵਾ ਦੁਵਙ੍ਗੁਲਂ ਵਾ’’ਤਿ (ਚੂਲ਼ਵ. ੨੪੬) ਚ ਵੁਤ੍ਤਂ. ਨ ਲਬ੍ਭਂ ਵੀਸਤਿਮਟ੍ਠਨ੍ਤਿ ਏਤ੍ਥ ਏਕਨਖਮ੍ਪਿ ਮਟ੍ਠਂ ਕਾਤੁਂ ਨ ਵਟ੍ਟਤਿ ਏਵ. ‘‘ਨ ਭਿਕ੍ਖਵੇ ਵੀਸਤਿਮਟ੍ਠਂ ਕਾਰਾਪੇਤਬ੍ਬਂ. ਯੋ ਕਾਰਾਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ (ਚੂਲ਼ਵ. ੨੭੪). ਅਨੁਜਾਨਾਮਿ, ਭਿਕ੍ਖਵੇ, ਮਲਮਤ੍ਤਂ ਅਪਕਡ੍ਢਿਤੁ’’ਨ੍ਤਿ (ਚੂਲ਼ਵ. ੨੭੪) ਹਿ ਵੁਤ੍ਤਂ. ਤਸ੍ਮਾ ਨਖਤੋ ਮਲਮਤ੍ਤਂ ਅਪਕਡ੍ਢਿਤੁਂ ਵਟ੍ਟਤਿ. ਸਮ੍ਬਾਧੇ ਲੋਮਹਾਰਣਨ੍ਤਿ ਏਤ੍ਥ ਸਮ੍ਬਾਧੋ ਨਾਮ ਉਭੋ ਉਪਕਚ੍ਛਕਾ ਮੁਤ੍ਤਕਰਣਞ੍ਚ. ‘‘ਅਨੁਜਾਨਾਮਿ, ਭਿਕ੍ਖਵੇ, ਆਬਾਧਪਚ੍ਚਯਾ ਸਮ੍ਬਾਧੇ ਲੋਮਂ ਸਂਹਰਾਪੇਤੁ’’ਨ੍ਤਿ (ਚੂਲ਼ਵ. ੨੭੫) ਹਿ ਵੁਤ੍ਤਂ.

੩੪੩. ਯਥਾਵੁਡ੍ਢਨ੍ਤਿ ਵੁਡ੍ਢਪਟਿਪਾਟਿਯਾ ਲਦ੍ਧਬ੍ਬਂ. ਨ ਬਾਧੇਯ੍ਯਾਤਿ ਨ ਵਾਰੇਯ੍ਯ. ਸਙ੍ਘੁਦ੍ਦਿਟ੍ਠਂਵਾਤਿ ਉਪਾਸਕਾਦੀਹਿ ਯਥਾਵੁਡ੍ਢਂ ‘‘ਅਯ੍ਯਾ ਪਰਿਭੁਞ੍ਜਨ੍ਤੂ’’ਤਿ ਨਿਸ੍ਸਜ੍ਜਿਤ੍ਵਾਵ ਦਿਨ੍ਨਂ ਸੇਨਾਸਨਾਦਿ. ‘‘ਨ ਭਿਕ੍ਖਵੇ ਉਦ੍ਦਿਸ੍ਸਕਤਮ੍ਪਿ ਯਥਾਵੁਡ੍ਢਂ ਪਟਿਬਾਹਿਤਬ੍ਬਂ. ਯੋ ਪਟਿਬਾਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੩੧੩) ਹਿ ਵੁਤ੍ਤਂ. ਅਧੋਤਪਾਦੇਹਿ (ਚੂਲ਼ਵ. ਅਟ੍ਠ. ੩੨੪) ਵਾ ਅਲ੍ਲਪਾਦੇਹਿ ਵਾ ਨਕ੍ਕਮੇਤਿ ਸਮ੍ਬਨ੍ਧੋ. ਸੁਧੋਤਪਾਦਕਂ ਵਾਪੀਤਿ ਧੋਤਪਾਦੇਹੇਵ ਅਕ੍ਕਮਿਤਬ੍ਬਟ੍ਠਾਨਂ. ਤਥੇਵਾਤਿ ਨਕ੍ਕਮੇਯ੍ਯ ਸਉਪਾਹਨੋਤਿ ਅਤ੍ਥੋ. ‘‘ਨ ਭਿਕ੍ਖਵੇ ਅਧੋਤੇਹਿ ਪਾਦੇਹਿ, ਅਲ੍ਲੇਹਿ ਪਾਦੇਹਿ, ਸਉਪਾਹਨੇਨ ਸੇਨਾਸਨਂ ਅਕ੍ਕਮਿਤਬ੍ਬਂ. ਯੋ ਅਕ੍ਕਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੩੨੪), ਹਿ ਵੁਤ੍ਤਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਚ੍ਚਤ੍ਥਰਿਤ੍ਵਾ ਨਿਪਜ੍ਜਿਤੁ’’ਨ੍ਤਿ (ਚੂਲ਼ਵ. ੩੨੪) ਵੁਤ੍ਤਤ੍ਤਾ ਪਰਿਭਣ੍ਡਕਤਂ ਭੂਮਿਂ ਵਾ ਭੂਮਤ੍ਥਰਣਸੇਨਾਸਨਂ ਵਾ ਸਙ੍ਘਿਕਂ ਮਞ੍ਚਪੀਠਂ ਵਾ ਅਤ੍ਤਨੋ ਸਨ੍ਤਕੇਨ ਪਚ੍ਚਤ੍ਥਰਣੇਨ ਪਚ੍ਚਤ੍ਥਰਿਤ੍ਵਾਵ ਨਿਪਜ੍ਜਿਤਬ੍ਬਂ.

੩੪੪. ਸਙ੍ਘਾਟਿਯਾ ਨ ਪਲ੍ਲਤ੍ਥੇਤਿ ਅਧਿਟ੍ਠਿਤਚੀਵਰੇਨ ਵਿਹਾਰੇ ਵਾ ਅਨ੍ਤਰਘਰੇ ਵਾ ਪਲ੍ਲਤ੍ਥਿਕਾ ਨ ਕਾਤਬ੍ਬਾਤਿ ਅਤ੍ਥੋ. ਪਰਿਕਮ੍ਮਕਤਂ (ਚੂਲ਼ਵ. ਅਟ੍ਠ. ੩੨੪) ਭਿਤ੍ਤਿਆਦਿਂ ਨ ਅਪਸ੍ਸਯੇ. ‘‘ਨ ਭਿਕ੍ਖਵੇ ਪਰਿਕਮ੍ਮਕਤਾ ਭਿਤ੍ਤਿ ਅਪਸ੍ਸੇਤਬ੍ਬਾ. ਯੋ ਅਪਸ੍ਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੩੨੪) ਹਿ ਵੁਤ੍ਤਂ. ਤਸ੍ਮਾ ਸੇਤਭਿਤ੍ਤਿ ਵਾ ਚਿਤ੍ਤਕਮ੍ਮਕਤਾ ਵਾ ਭਿਤ੍ਤਿ ਨ ਅਪਸ੍ਸਯਿਤਬ੍ਬਾ. ਨ ਕੇਵਲਂ ਭਿਤ੍ਤਿਯੇਵ, ਪਰਿਕਮ੍ਮਕਤਾ ਦ੍ਵਾਰਕਵਾਟਵਾਤਪਾਨਤ੍ਥਮ੍ਭਾਦਯੋਪਿ ਨ ਅਪਸ੍ਸਯਿਤਬ੍ਬਾ. ਏਤ੍ਥਪਿ ਲੋਮਗਣਨਾਯ ਏਵ ਆਪਤ੍ਤਿਯੋ ਵੇਦਿਤਬ੍ਬਾ. ਸਨ੍ਤੇ ਉਦਕੇ ਨੋ ਨ ਆਚਮੇਤਿ (ਚੂਲ਼ਵ. ੩੭੩; ਚੂਲ਼ਵ. ਅਟ੍ਠ. ੩੭੩) ਨੋ ਨ ਆਚਮੇਤੁਂ, ਉਦਕਸੁਦ੍ਧਿਂ ਅਕਾਤੁਂ ਨ ਵਟ੍ਟਤੀਤਿ ਅਤ੍ਥੋ. ਸਨ੍ਤੇਤਿ ਵਚਨੇਨ ਅਸਨ੍ਤੇ ਅਨਾਪਤ੍ਤੀਤਿ ਦੀਪੇਤਿ.

੩੪੫. ਅਕਪ੍ਪਿਯਸਮਾਦਾਨੇਤਿ ਭਿਕ੍ਖੁਂ ਵਾ ਸਾਮਣੇਰਾਦਿਕੇ ਸੇਸਸਹਧਮ੍ਮਿਕੇ ਵਾ ਅਕਪ੍ਪਿਯੇ ਨਿਯੋਜੇਨ੍ਤਸ੍ਸ ਦੁਕ੍ਕਟਮੇਵ. ‘‘ਨ, ਭਿਕ੍ਖਵੇ, ਪਬ੍ਬਜਿਤੇਨ ਅਕਪ੍ਪਿਯੇ ਸਮਾਦਪੇਤਬ੍ਬਂ. ਯੋ ਸਮਾਦਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੩੦੩) ਹਿ ਵੁਤ੍ਤਂ. ਸਭਾਗਾਯ (ਮਹਾਵ. ਅਟ੍ਠ. ੧੬੯) ਆਪਤ੍ਤਿਯਾ ਦੇਸਨਾਯਾਤਿ ਅਤ੍ਥੋ. ਵਤ੍ਥੁਸਭਾਗਤਾ ਇਧ ਅਧਿਪ੍ਪੇਤਾ, ਨ ਆਪਤ੍ਤਿਸਭਾਗਤਾ. ‘‘ਨ ਭਿਕ੍ਖਵੇ ਸਭਾਗਾ ਆਪਤ੍ਤਿ ਦੇਸੇਤਬ੍ਬਾ. ਯੋ ਦੇਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੧੬੯) ਚ ‘‘ਨ ਭਿਕ੍ਖਵੇ ਸਭਾਗਾ ਆਪਤ੍ਤਿ ਪਟਿਗ੍ਗਹੇਤਬ੍ਬਾ. ਯੋ ਪਟਿਗ੍ਗਣ੍ਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੧੬੯) ਚ ਵੁਤ੍ਤਂ. ਵਤ੍ਥੁਸਭਾਗਂ ਆਪਤ੍ਤਿਂ ਆਵਿ ਕਾਤੁਮ੍ਪਿ ਨ ਵਟ੍ਟਤਿ, ਤੇਨ ਵੁਤ੍ਤਂ ‘‘ਆਵਿਕਮ੍ਮੇ ਚ ਦੁਕ੍ਕਟ’’ਨ੍ਤਿ. ‘‘ਅਹਂ, ਆਵੁਸੋ, ਇਤ੍ਥਨ੍ਨਾਮਂ ਆਪਤ੍ਤਿਂ ਆਪਜ੍ਜਿਂ, ਤਂ ਇਤੋ ਵੁਟ੍ਠਹਿਤ੍ਵਾ ਪਟਿਕਰਿਸ੍ਸਾਮੀ’’ਤਿ ਅਞ੍ਞਸ੍ਸ ਵਚਨਂ ਆਵਿਕਮ੍ਮਂਨਾਮ.

੩੪੬. ਇਤਰਸ੍ਸ ਤੂਤਿ ਅਸੁਦ੍ਧਚਿਤ੍ਤਸ੍ਸ.

੩੪੭. ਪੋਰਿਸਨ੍ਤਿ (ਚੂਲ਼ਵ. ਅਟ੍ਠ. ੨੮੪) ਪੁਰਿਸਪ੍ਪਮਾਣਂ ਅਭਿਰੁਹਿਤੁਂ ਵਟ੍ਟਤੀਤਿ ਅਤ੍ਥੋ. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਤਿ ਕਰਣੀਯੇ ਪੋਰਿਸਂ ਰੁਕ੍ਖਂ ਅਭਿਰੁਹਿਤੁਂ, ਆਪਦਾਸੁ ਯਾਵਦਤ੍ਥ’’ਨ੍ਤਿ (ਚੂਲ਼ਵ. ੨੮੪) ਹਿ ਵੁਤ੍ਤਂ.

੩੪੮. ਪਰਿਸ੍ਸਾਵਨਂ (ਚੂਲ਼ਵ. ੨੫੯; ਚੂਲ਼ਵ. ਅਟ੍ਠ. ੨੫੯) ਵਿਨਾ ਅਡ੍ਢਯੋਜਨਂ ਗਚ੍ਛਨ੍ਤਸ੍ਸ ਦੁਕ੍ਕਟਨ੍ਤਿ ਸਮ੍ਬਨ੍ਧੋ. ‘‘ਅਦ੍ਧਾਨਗਮਨਸਮਯੋ ਨਾਮ ਅਡ੍ਢਯੋਜਨਂ ਗਚ੍ਛਿਸ੍ਸਾਮੀਤਿ ਭੁਞ੍ਜਿਤਬ੍ਬ’’ਨ੍ਤਿ (ਪਾਚਿ. ੨੧੮) ਵੁਤ੍ਤਂ, ਤਸ੍ਮਾ ਅਡ੍ਢਯੋਜਨਮੇਵ ਅਨ੍ਤਿਮਂ ਅਦ੍ਧਾਨਨ੍ਤਿ ਵੇਦਿਤਬ੍ਬਂ. ਭਿਕ੍ਖੁਨਿਯਾ ਚ ਮਾਤੁਗਾਮੇਨ ਚ ਸਂਵਿਧਾਨਸਿਕ੍ਖਾਪਦੇ ‘‘ਏਕਦ੍ਧਾਨਮਗ੍ਗਂ ਪਟਿਪਜ੍ਜੇਯ੍ਯ, ਅਨ੍ਤਮਸੋ ਗਾਮਨ੍ਤਰਮ੍ਪੀ’’ਤਿ (ਪਾਚਿ. ੧੮੨, ੪੧੩) ਏਵਂ ਵਿਸੇਸੇਤ੍ਵਾ ਵੁਤ੍ਤਤ੍ਤਾ ‘‘ਕੁਕ੍ਕੁਟਸਮ੍ਪਾਤੇ ਗਾਮੇ ਗਾਮਨ੍ਤਰੇ ਗਾਮਨ੍ਤਰੇ ਆਪਤ੍ਤਿ ਪਾਚਿਤ੍ਤਿਯਸ੍ਸਾ’’ਤਿ (ਪਾਚਿ. ੧੮੩, ੪੧੪) ਵੁਤ੍ਤਂ, ਨ ਅਦ੍ਧਾਨਲਕ੍ਖਣੇਨ. ਯਦਿ ਗਾਮਨ੍ਤਰਪਰਿਚ੍ਛੇਦੇਨ ਅਦ੍ਧਾਨਂ ਵੁਚ੍ਚਤਿ, ਗਣਭੋਜਨਸਿਕ੍ਖਾਪਦੇਪਿ ‘‘ਅਦ੍ਧਾਨਗਮਨਸਮਯੋ ਨਾਮ ਗਾਮਨ੍ਤਰਮ੍ਪਿ ਗਚ੍ਛਿਸ੍ਸਾਮੀਤਿ ਭੁਞ੍ਜਿਤਬ੍ਬ’’ਨ੍ਤਿ ਵਦੇਯ੍ਯ, ਨ ਚ ਵੁਤ੍ਤਂ. ਤਸ੍ਮਾ ‘‘ਨ ਭਿਕ੍ਖਵੇ ਅਪਰਿਸ੍ਸਾਵਨਕੇਨ ਅਦ੍ਧਾਨੋ ਪਟਿਪਜ੍ਜਿਤਬ੍ਬੋ. ਯੋ ਪਟਿਪਜ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਸਚੇ ਨ ਹੋਤਿ ਪਰਿਸ੍ਸਾਵਨਂ ਵਾ ਧਮ੍ਮਕਰਣੋ ਵਾ, ਸਙ੍ਘਾਟਿਕਣ੍ਣੋਪਿ ਅਧਿਟ੍ਠਾਤਬ੍ਬੋ ਇਮਿਨਾ ਪਰਿਸ੍ਸਾਵੇਤ੍ਵਾ ਪਿਵਿਸ੍ਸਾਮੀ’’ਤਿ ਵੁਤ੍ਤਟ੍ਠਾਨੇਪਿ ਅਡ੍ਢਯੋਜਨਵਸੇਨੇਵ ਅਦ੍ਧਾਨਪਰਿਚ੍ਛੇਦੋ ਵੇਦਿਤਬ੍ਬੋ. ਅਭਯਗਿਰਿਵਾਸੀਨਂ ਪਨ ‘‘ਦ੍ਵਿਗਾਵੁਤਵਸੇਨ ਅਦ੍ਧਾਨਪਰਿਚ੍ਛੇਦੋ’’ਤਿ ਪਾਲ਼ਿਯਂ ਏਵ ਅਤ੍ਥਿ. ਯਾਚਮਾਨਸ੍ਸਾਤਿ ਯਾਚਨ੍ਤਸ੍ਸ. ‘‘ਨ ਚ ਭਿਕ੍ਖਵੇ ਅਦ੍ਧਾਨਪ੍ਪਟਿਪਨ੍ਨੇਨ ਭਿਕ੍ਖੁਨਾ ਪਰਿਸ੍ਸਾਵਨਂ ਯਾਚਿਯਮਾਨੇਨ ਨ ਦਾਤਬ੍ਬਂ. ਯੋ ਨ ਦਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਹਿ ਵੁਤ੍ਤਂ.

੩੪੯. ਅਞ੍ਞਤ੍ਰ ਆਬਾਧਪ੍ਪਚ੍ਚਯਾ ਕਣ੍ਣਨਾਸਾਦਿਕੇ ਸੇਸਙ੍ਗੇ ਦੁਕ੍ਕਟਨ੍ਤਿ ਸਮ੍ਬਨ੍ਧੋ. ਆਬਾਧੇ ਸਤਿ ਅਙ੍ਗੁਲਿਆਦੀਨਿ ਛਿਨ੍ਦਿਤੁਂ ਵਟ੍ਟਤਿ. ਅਙ੍ਗਜਾਤਂ ਵਾ ਬੀਜਾਨਿ ਵਾ ਛਿਨ੍ਦਿਤੁਂ ਨ ਵਟ੍ਟਤਿ ਏਵ. ਅਤ੍ਤਘਾਤਨੇ ਚ ਦੁਕ੍ਕਟਨ੍ਤਿ ਸਮ੍ਬਨ੍ਧੋ. ‘‘ਨ ਚ ਭਿਕ੍ਖਵੇ ਅਤ੍ਤਾਨਂ ਘਾਤੇਤਬ੍ਬਂ. ਯੋ ਘਾਤੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਹਿ ਵੁਤ੍ਤਂ.

੩੫੦. ‘‘ਨ ਚ ਭਿਕ੍ਖਵੇ ਪਟਿਭਾਨਚਿਤ੍ਤਂ ਕਾਰਾਪੇਤਬ੍ਬਂ ਇਤ੍ਥਿਰੂਪਕਂ ਪੁਰਿਸਰੂਪਕਂ. ਯੋ ਕਾਰਾਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਮਾਲਾਕਮ੍ਮਂ ਲਤਾਕਮ੍ਮਂ ਮਕਰਦਨ੍ਤਕਂ ਪਞ੍ਚਪਟਿਕ’’ਨ੍ਤਿ (ਚੂਲ਼ਵ. ੨੯੯) ਵੁਤ੍ਤਤ੍ਤਾ ‘‘ਚਿਤ੍ਤਪੋਤ੍ਥਕਰੂਪਾਨਿ, ਨ ਕਰੇ ਨ ਚ ਕਾਰਯੇ’’ਤਿ ਵੁਤ੍ਤਂ. ਭੁਞ੍ਜਨ੍ਤਨ੍ਤਿ (ਚੂਲ਼ਵ. ਅਟ੍ਠ. ੩੧੬) ਵਿਪ੍ਪਕਤਭੋਜਨਂ. ‘‘ਨ ਭਿਕ੍ਖਵੇ ਵਿਪ੍ਪਕਤਭੋਜਨੋ ਭਿਕ੍ਖੁ ਵੁਟ੍ਠਾਪੇਤਬ੍ਬੋ. ਯੋ ਵੁਟ੍ਠਾਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੩੧੬) ਹਿ ਵੁਤ੍ਤਂ.

੩੫੧. ਯਾਨਾਨੀਤਿ ਵਯ੍ਹਂ ਰਥੋ ਸਕਟਂ ਸਨ੍ਦਮਾਨਿਕਾਦੀਨਿ ਗਿਲਾਨਸ੍ਸ ਅਭਿਰੁਹਿਤੁਂ ਕਪ੍ਪਨ੍ਤਿ, ਸਿਵਿਕੋ ਚ ਕਪ੍ਪਤਿ. ਏਵਂ ਸਬ੍ਬਤ੍ਥ. ‘‘ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨਸ੍ਸ ਯਾਨਂ, ਪੁਰਿਸਯੁਤ੍ਤਂ ਹਤ੍ਥਵਟ੍ਟਕਂ, ਸਿਵਿਕਂ ਪਾਟਙ੍ਕਿ’’ਨ੍ਤਿ (ਮਹਾਵ. ੨੫੩) ਹਿ ਵੁਤ੍ਤਂ.

੩੫੨. ਦਵਨ੍ਤਿ ਕੇਲ਼ਿਂ. ‘‘ਨ ਭਿਕ੍ਖਵੇ ਬੁਦ੍ਧਂ ਵਾ ਧਮ੍ਮਂ ਵਾ ਸਙ੍ਘਂ ਵਾ ਆਰਬ੍ਭ ਦਵੋ ਕਾਤਬ੍ਬੋ. ਯੋ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਚਿ. ੬੨੭) ਹਿ ਵੁਤ੍ਤਂ. ਤਸ੍ਮਾ ‘‘ਕਿਂ ਬੁਦ੍ਧੋ ਸਿਲਕਬੁਦ੍ਧੋ, ਉਦਾਹੁ ਪਟਿਬੁਦ੍ਧੋ’’ਤਿ ਵਾ ‘‘ਕਿਂ ਧਮ੍ਮੋ ਗੋਧਮ੍ਮੋ ਅਜਧਮ੍ਮੋ’’ਤਿ ਵਾ ‘‘ਕਿਂ ਸਙ੍ਘੋ ਅਜਸਙ੍ਘੋ ਮਿਗਸਙ੍ਘੋ’’ਤਿ ਵਾ ਏਵਮਾਦਿਨਾ ਨਯੇਨ ਯੋ ਦਵਂ ਕਰੋਤਿ, ਤਸ੍ਸ ਦੁਕ੍ਕਟਨ੍ਤਿ ਵੇਦਿਤਬ੍ਬਂ. ‘‘ਤੁਮ੍ਹਾਕਂ ਚੀਵਰਂ ਦਸ੍ਸਾਮ, ਪਤ੍ਤਂ ਦਸ੍ਸਾਮਾ’’ਤਿਆਦਿਨਾ ਨਯੇਨ ਸਾਮਣੇਰਂ ਵਾ ਉਪਸਮ੍ਪਨ੍ਨਂ ਵਾ ਅਞ੍ਞਸ੍ਸ ਅਨ੍ਤਮਸੋ ਦੁਸ੍ਸੀਲਸ੍ਸਾਪਿ ਪਰਿਸਭੂਤਂ ਅਤ੍ਤਨੋ ਉਪਟ੍ਠਾਕਕਰਣਤ੍ਥਂ ਉਪਲਾਲ਼ਨੇ ਦੁਕ੍ਕਟਨ੍ਤਿ ਅਤ੍ਥੋ. ‘‘ਨ ਭਿਕ੍ਖਵੇ ਅਞ੍ਞਸ੍ਸ ਪਰਿਸਾ ਅਪਲਾਲ਼ੇਤਬ੍ਬਾ. ਯੋ ਅਪਲਾਲ਼ੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਹਿ ਵੁਤ੍ਤਂ.

੩੫੩. ਕਾਯਂ (ਚੂਲ਼ਵ. ੪੧੧) ਵਾ ਊਰੁਂ ਵਾ ਨਿਮਿਤ੍ਤਂ ਵਾ ਵਿਵਰਿਤ੍ਵਾ ਭਿਕ੍ਖੁਨੀਨਂ ਨ ਦਸ੍ਸਯੇਤਿ ਸਮ੍ਬਨ੍ਧੋ. ਕਦ੍ਦਮੁਦਕਾਦਿਨਾ ਤਾ ਭਿਕ੍ਖੁਨਿਯੋ ਨ ਸਿਞ੍ਚੇਯ੍ਯਾਤਿ ਅਤ੍ਥੋ. ਨ ਕੇਵਲਂ ਕਦ੍ਦਮੁਦਕਾਦਿਕੇਨੇਵ, ਵਿਪ੍ਪਸਨ੍ਨਉਦਕਰਜਨਕਦ੍ਦਮਾਦੀਸੁਪਿ ਯੇਨ ਕੇਨਚਿ ਓਸਿਞ੍ਚਨ੍ਤਸ੍ਸ ਦੁਕ੍ਕਟਮੇਵ.

੩੫੪. ਬਾਲਨ੍ਤਿ ਏਤ੍ਥ ਬਾਲੋ ਨਾਮ ਯੋ ਓਵਾਦਂ ਗਹੇਤ੍ਵਾ ਪਾਤਿਮੋਕ੍ਖੁਦ੍ਦੇਸਕਸ੍ਸ ਆਰੋਚੇਤ੍ਵਾ ਪਾਟਿਪਦੇ ਪਚ੍ਚਾਹਰਿਤਬ੍ਬਨ੍ਤਿ ਨ ਜਾਨਾਤਿ. ਗਿਲਾਨੋ ਨਾਮ ਯੋ ਓਵਾਦਂ ਗਹੇਤ੍ਵਾ ਉਪੋਸਥਗ੍ਗਂ ਗਨ੍ਤ੍ਵਾ ਆਰੋਚੇਤੁਞ੍ਚ ਪਚ੍ਚਾਹਰਿਤੁਞ੍ਚ ਨ ਸਕ੍ਕੋਤਿ. ਗਮਿਯੋ ਨਾਮ ਯੋ ਪਟਿਦੇਸਂ ਗਨ੍ਤੁਕਾਮੋ.

‘‘ਨ ਭਿਕ੍ਖਵੇ ਓਵਾਦੋ ਨ ਗਹੇਤਬ੍ਬੋ. ਯੋ ਨ ਗਣ੍ਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੪੧੪) ਚ ‘‘ਅਨੁਜਾਨਾਮਿ, ਭਿਕ੍ਖਵੇ, ਠਪੇਤ੍ਵਾ ਬਾਲਂ, ਠਪੇਤ੍ਵਾ ਗਿਲਾਨਂ, ਠਪੇਤ੍ਵਾ ਗਮਿਕਂ, ਅਵਸੇਸੇਹਿ ਓਵਾਦਂ ਗਹੇਤੁ’’ਨ੍ਤਿ (ਚੂਲ਼ਵ. ੪੧੪) ਚ ‘‘ਨ ਭਿਕ੍ਖਵੇ ਓਵਾਦੋ ਨ ਪਚ੍ਚਾਹਰਿਤਬ੍ਬੋ. ਯੋ ਨ ਪਚ੍ਚਾਹਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਚਿ. ੪੧੫) ਚ ਵੁਤ੍ਤਤ੍ਤਾ ਭਿਕ੍ਖੁਨੀਹਿ ਤੇਰਸਿਯਂ ਵਾ ਚਾਤੁਦ੍ਦਸਿਯਂ ਵਾ ਆਗਨ੍ਤ੍ਵਾ ‘‘ਅਯਂ ਉਪੋਸਥੋ ਚਾਤੁਦ੍ਦਸੋ’’ਤਿ ਵਾ ‘‘ਪਨ੍ਨਰਸੋ’’ਤਿ ਵਾ ‘‘ਕਦਾ ਅਯ੍ਯ ਉਪੋਸਥੋ’’ਤਿ ਵਾ ਪੁਚ੍ਛਿਤੇ ‘‘ਚਾਤੁਦ੍ਦਸੋ’’ਤਿ ਵਾ ‘‘ਪਨ੍ਨਰਸੋ’’ਤਿ ਵਾ ‘‘ਸ੍ਵੇ ਭਗਿਨਿ ਉਪੋਸਥੋ’’ਤਿ ਵਾ ਆਚਿਕ੍ਖਿਤਬ੍ਬਂ. ਤਾਹਿ ਭਿਕ੍ਖੁਨੀਹਿ ਉਪੋਸਥਦਿਵਸੇ ਆਗਨ੍ਤ੍ਵਾ ‘‘ਭਿਕ੍ਖੁਨਿਸਙ੍ਘੋ ਅਯ੍ਯ ਭਿਕ੍ਖੁਸਙ੍ਘਸ੍ਸ ਪਾਦੇ ਵਨ੍ਦਤਿ, ਓਵਾਦੂਪਸਙ੍ਕਮਨਞ੍ਚ ਯਾਚਤਿ, ਲਭਤੁ ਕਿਰ ਅਯ੍ਯ ਭਿਕ੍ਖੁਨਿਸਙ੍ਘੋ ਓਵਾਦੂਪਸਙ੍ਕਮਨ’’ਨ੍ਤਿ ਏਵਂ ਯਾਚਿਤਬ੍ਬਂ, ਤਂ ਵਚਨਂ ਪਟਿਗ੍ਗਹੇਤ੍ਵਾ ਉਪੋਸਥਗ੍ਗੇ ਪਾਤਿਮੋਕ੍ਖੁਦ੍ਦੇਸਕਸ੍ਸ ‘‘ਭਿਕ੍ਖੁਨਿਸਙ੍ਘੋ, ਭਨ੍ਤੇ, ਭਿਕ੍ਖੁਸਙ੍ਘਸ੍ਸ ਪਾਦੇ ਵਨ੍ਦਤਿ, ਓਵਾਦੂਪਸਙ੍ਕਮਨਞ੍ਚ ਯਾਚਤਿ, ਲਭਤੁ ਕਿਰ, ਭਨ੍ਤੇ, ਭਿਕ੍ਖੁਨਿਸਙ੍ਘੋ ਓਵਾਦੂਪਸਙ੍ਕਮਨ’’ਨ੍ਤਿ ਆਚਿਕ੍ਖਿਤਬ੍ਬਂ. ਪਾਤਿਮੋਕ੍ਖੁਦ੍ਦੇਸਕੇਨਾਪਿ ਸਚੇ ਤਤ੍ਥ ਭਿਕ੍ਖੁਨੋਵਾਦਕੋ ਅਤ੍ਥਿ, ‘‘ਇਤ੍ਥਨ੍ਨਾਮੋ ਭਿਕ੍ਖੁ ਭਿਕ੍ਖੁਨੋਵਾਦਕੋ ਸਮ੍ਮਤੋ, ਤਂ ਭਿਕ੍ਖੁਨਿਸਙ੍ਘੋ ਉਪਸਙ੍ਕਮਤੂ’’ਤਿ ਵਤ੍ਤਬ੍ਬਂ. ਸਚੇ ਨਤ੍ਥਿ, ‘‘ਕੋ ਆਯਸ੍ਮਾ ਉਸ੍ਸਹਤਿ ਭਿਕ੍ਖੁਨਿਯੋ ਓਵਦਿਤੁ’’ਨ੍ਤਿ ਪੁਚ੍ਛਿਤ੍ਵਾ ਸਚੇ ਅਤ੍ਥਿ ਅਟ੍ਠਹਙ੍ਗੇਹਿ ਸਮਨ੍ਨਾਗਤੋ ਭਿਕ੍ਖੁ, ਤਂ ਤਤ੍ਥੇਵ ਸਮ੍ਮਨ੍ਨਿਤ੍ਵਾ ਵੁਤ੍ਤਨਯੇਨੇਵ ਓਵਾਦਪ੍ਪਟਿਗ੍ਗਾਹਕਸ੍ਸ ਆਰੋਚੇਤਬ੍ਬਂ. ਯਦਿ ਨਤ੍ਥਿ ਕੋਚਿ ਭਿਕ੍ਖੁ ਭਿਕ੍ਖੁਨੋਵਾਦਕੋ ਸਮ੍ਮਤੋ, ‘‘ਪਾਸਾਦਿਕੇਨ ਭਿਕ੍ਖੁਨਿਸਙ੍ਘੋ ਸਮ੍ਪਾਦੇਤੂ’’ਤਿ ਵਤ੍ਤਬ੍ਬਂ. ਤੇਨ ਭਿਕ੍ਖੁਨਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਪਾਟਿਪਦੇ ਭਿਕ੍ਖੁਨੀਨਂ ‘‘ਨਤ੍ਥਿ ਕੋਚਿ ਭਿਕ੍ਖੁ ਭਿਕ੍ਖੁਨੋਵਾਦਕੋ ਸਮ੍ਮਤੋ, ਪਾਸਾਦਿਕੇਨ ਭਿਕ੍ਖੁਨਿਸਙ੍ਘੋ ਸਮ੍ਪਾਦੇਤੂ’’ਤਿ ਵਤ੍ਤਬ੍ਬਂ. ਤਾਹਿਪਿ ‘‘ਸਾਧੁ ਅਯ੍ਯਾ’’ਤਿ ਸਮ੍ਪਟਿਚ੍ਛਿਤਬ੍ਬਂ. ਇਮਿਨਾ ਨਯੇਨ ਗਣਪੁਗ੍ਗਲੇਸੁਪਿ ਵਚਨਭੇਦੋ ਵੇਦਿਤਬ੍ਬੋ.

੩੫੫. ਲੋਕਾਯਤਂ (ਚੂਲ਼ਵ. ੨੮੬; ਚੂਲ਼ਵ. ਅਟ੍ਠ. ੨੮੬) ਨਾਮ ਵਿਤਣ੍ਡਸਤ੍ਥਂ. ‘‘ਨ ਭਿਕ੍ਖਵੇ ਆਸਿਤ੍ਤਕੂਪਧਾਨੇ ਭੁਞ੍ਜਿਤਬ੍ਬਂ. ਯੋ ਭੁਞ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੬੪) ਵੁਤ੍ਤਤ੍ਤਾ ‘‘ਪੇਲ਼ਾਯਪਿ ਨ ਭੁਞ੍ਜੇਯ੍ਯਾ’’ਤਿ ਵੁਤ੍ਤਂ.

੩੫੬. ਗਿਹਿਪਾਰੁਤਂ ਨ ਪਾਰੁਪੇਯ੍ਯ, ਗਿਹਿਨਿਵਾਸਨਂ ਨ ਨਿਵਾਸੇਯ੍ਯਾਤਿ ਅਤ੍ਥੋ. ‘‘ਨ ਭਿਕ੍ਖਵੇ ਗਿਹਿਨਿਵਤ੍ਥਂ ਨਿਵਾਸੇਤਬ੍ਬਂ ਹਤ੍ਥਿਸੋਣ੍ਡਕਂ ਮਚ੍ਛਵਾਲ਼ਕਂ ਚਤੁਕਣ੍ਣਕਂ ਤਾਲਵਣ੍ਟਕਂ ਸਤਵਲਿਕਂ. ਯੋ ਨਿਵਾਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੮੦) ਹਿ ਵੁਤ੍ਤਂ. ਪਰਿਮਣ੍ਡਲਤੋ ਅਞ੍ਞਥਾ ਪਾਰੁਪਨਂ, ਸਬ੍ਬਮੇਤਂ ਗਿਹਿਪਾਰੁਤਂ ਨਾਮ. ਤਂ ਪਨ ਨ ਪਾਰੁਪੇਤਬ੍ਬਨ੍ਤਿ ਅਤ੍ਥੋ. ਸਂਵੇਲ੍ਲਿਯਨ੍ਤਿ ਏਤ੍ਥ ਕਚ੍ਛਂ ਬਨ੍ਧਿਤ੍ਵਾ ਨ ਨਿਵਾਸੇਯ੍ਯਾਤਿ ਅਤ੍ਥੋ. ਦਾਯਨ੍ਤਿ (ਚੂਲ਼ਵ. ੨੮੩; ਚੂਲ਼ਵ. ਅਟ੍ਠ. ੨੮੩) ਅਰਞ੍ਞਂ. ਨਾਲਿਮ੍ਪਯੇਯ੍ਯਾਤਿ ਸਮ੍ਬਨ੍ਧੋ.

੩੫੭. ਵਡ੍ਢਿਞ੍ਚ ਨ ਪਯੋਜਯੇ, ਨੋਞਾਤਕੇ ਨਪ੍ਪਵਾਰਿਤੇ ਨ ਯਾਚੇਤਿ ਅਤ੍ਥੋ. ਅਞ੍ਞਸ੍ਸਾਤਿ ਏਤ੍ਥ (ਚੂਲ਼ਵ. ੪੨੦; ਚੂਲ਼ਵ. ਅਟ੍ਠ. ੪੨੦) ‘‘ਤੁਮ੍ਹੇ ਪਰਿਭੁਞ੍ਜਥਾ’’ਤਿ ਨਿਯਮੇਤ੍ਵਾ ਦਿਨ੍ਨਂ ਸਹਧਮ੍ਮਿਕਾਨਮ੍ਪਿ ਦਾਤੁਂ ਨ ਵਟ੍ਟਤਿ. ਅਗ੍ਗਂ ਗਹੇਤ੍ਵਾ ਵਾ ਕਤਿਪਾਹਂ ਭੁਤ੍ਵਾ ਵਾ ਪੁਨ ਦਦੇਯ੍ਯਾਤਿ ਅਤ੍ਥੋ.

੩੫੮. ਉਦ੍ਦਿਸ੍ਸ ਯਾਚਨੇਤਿ ਏਤ੍ਥ (ਪਾਚਿ. ਅਟ੍ਠ. ੬੭੯) ‘‘ਅਮ੍ਹਾਕਂ ਵਿਹਾਰੇ ਇਤ੍ਥਨ੍ਨਾਮੇਨ ਇਦਞ੍ਚਿਦਞ੍ਚ ਕਤ’’ਨ੍ਤਿ ਵਾ ‘‘ਕਰਿਸ੍ਸਨ੍ਤੀ’’ਤਿ ਵਾ ਏਵਂ ਉਦ੍ਦਿਸ੍ਸ ਰਕ੍ਖਂ ਯਾਚਨੇਤਿ ਅਤ੍ਥੋ. ਞਤ੍ਵਾਞਤ੍ਵਾ ਵਾਤਿ ਏਵਂ ‘‘ਅਮ੍ਹੇਹਿ ਯਾਚਿਯਮਾਨਾ ਇਮੇਸਂ ਦਣ੍ਡੇਸ੍ਸਨ੍ਤੀ’’ਤਿ ਤੇਸਂ ਦਣ੍ਡਿਨਂ ਞਤ੍ਵਾ ਵਾ ਅਞਤ੍ਵਾ ਵਾਤਿ ਅਤ੍ਥੋ. ਤੇਹਿ ਪਨ ਦਣ੍ਡਿਤੇ ਸੋ ਦਣ੍ਡੋ ਉਦ੍ਦਿਸ੍ਸ ਯਾਚਨ੍ਤਾਨਂ ਗੀਵਾਵ ਭਣ੍ਡਦੇਯ੍ਯਂ ਹੋਤਿ ਏਵਾਤਿ ਅਤ੍ਥੋ. ‘‘ਇਮਿਨਾ ਚ ਇਮਿਨਾ ਚ ਇਦਞ੍ਚ ਇਦਞ੍ਚ ਕਤਂ, ਏਤ੍ਤਕਂ ਦਣ੍ਡਂ ਗਣ੍ਹਥਾ’’ਤਿ ਸਯਂ ਦਣ੍ਡਾਪਨੇ ਪਨ ਅਸ੍ਸ ਦਣ੍ਡਸ੍ਸ ਅਗ੍ਘਭੇਦੇਨ ਪਾਰਾਜਿਕਥੁਲ੍ਲਚ੍ਚਯਦੁਕ੍ਕਟਾ ਞੇਯ੍ਯਾਤਿ ਅਤ੍ਥੋ.

੩੫੯. ਅਨਤ੍ਥਾਯ ਅਸ੍ਸ ਚੋਰਸ੍ਸ ਭਾਸਿਤੇਤਿ ਸਮ੍ਬਨ੍ਧੋ. ਰਾਜਰਾਜਮਹਾਮਤ੍ਤਾਦੀਹਿ ਤਸ੍ਸ ਚੋਰਸ੍ਸ ਦਣ੍ਡਂ ਗਣ੍ਹਨ੍ਤੇ ਅਸ੍ਸ ਭਿਕ੍ਖੁਸ੍ਸ ਤਤ੍ਤਕਂ ਗੀਵਾਤਿ ਅਤ੍ਥੋ.

੩੬੦. ਵਿਘਾਸਂ (ਪਾਚਿ. ੮੨੫-੮੨੬) ਵਾ ਉਚ੍ਚਾਰਂ ਵਾ ਸਙ੍ਕਾਰਂ ਵਾ ਮੁਤ੍ਤਂ ਵਾ ਪਾਕਾਰਕੁਟ੍ਟਾਨਂ ਬਹਿ ਛਡ੍ਡੇਯ੍ਯ, ਦੁਕ੍ਕਟਨ੍ਤਿ ਅਤ੍ਥੋ. ਵਲ਼ਞ੍ਜੇ ਨਾਵਲੋਕਿਯਾਤਿ ਇਮਿਨਾਵ ਅਵਲ਼ਞ੍ਜਨਕਾਲੇ ਨਾਵਲੋਕੇਤ੍ਵਾ ਛਡ੍ਡੇਤੁਂ ਵਟ੍ਟਤੀਤਿ ਦੀਪੇਤਿ. ਨ ਕੇਵਲਂ ਤਤ੍ਥੇਵ, ਅਥ ਖੋ ਹਰਿਤੇ ਵਾਪਿ ਵੀਹਾਦਿਨਾਲ਼ਿਕੇਰਾਦਿਰੋਪਿਮੇ ਛਡ੍ਡੇਨ੍ਤਸ੍ਸ ਦੁਕ੍ਕਟਮੇਵਾਤਿ ਅਤ੍ਥੋ.

੩੬੧. ‘‘ਉਪਹਾਰਂ ਕਰੋਮਾ’’ਤਿ ਵੁਤ੍ਤੇਤਿ ਪੁਚ੍ਛਿਤੇਤਿ ਅਧਿਪ੍ਪਾਯੋ.

੩੬੨. ਕੀਲ਼ਤ੍ਥਂ (ਪਾਚਿ. ੯੭੯; ਪਾਚਿ. ਅਟ੍ਠ. ੯੭੮) ਕਤਂ ਰਾਜਾਗਾਰਂ ਵਾ ਪੋਕ੍ਖਰਣਿਂ ਵਾ ਉਯ੍ਯਾਨਂ ਵਾ ਚਿਤ੍ਤਾਗਾਰਂ ਵਾ ਆਰਾਮਂ ਵਾ ਦਟ੍ਠੁਂ ਗਚ੍ਛਤੋ ਪਦੇ ਪਦੇ ਦੁਕ੍ਕਟਨ੍ਤਿ ਅਤ੍ਥੋ.

੩੬੩. ਆਸਨੇਨ (ਚੂਲ਼ਵ. ੩੬੪) ਨਵੇ ਨ ਪਟਿਬਾਹੇਯ੍ਯ, ਉਣ੍ਹੇ (ਮਹਾਵ. ੬੭, ੭੮, ੭੯; ਚੂਲ਼ਵ. ੩੭੬, ੩੭੮, ੩੮੦, ੩੮੨) ਚੀਵਰਂ ਨ ਨਿਦਹੇਯ੍ਯ. ਗੁਰੁਨਾਤਿ ਆਚਰਿਯਾਦਿਨਾ ਪਣਾਮਿਤੋ ਖਮਾਪੇਯ੍ਯਾਤਿ ਸਮ੍ਬਨ੍ਧੋ.

੩੬੪. ਆਪਤ੍ਤੀਹਿ ਚ ਸਤ੍ਤਹੀਤਿ (ਵਜਿਰ. ਟੀ. ਪਾਚਿਤ੍ਤਿਯ ੨੬) ਸਤ੍ਤਹਿ ਆਪਤ੍ਤੀਹਿ ਭਿਕ੍ਖੁਂ ਪਰਮ੍ਮੁਖਾ ਅਕ੍ਕੋਸਨੇਨ ਚ ‘‘ਅਸ੍ਸਦ੍ਧੋ ਅਪ੍ਪਸਨ੍ਨੋ ਬੀਜਭੋਜੀ’’ਤਿਆਦਿਨਾ ਅਞ੍ਞੇਨੇਵ ਵਾ ਅਕ੍ਕੋਸਨੇਨ ਚ ਦੁਕ੍ਕਟਨ੍ਤਿ ਅਧਿਪ੍ਪਾਯੋ.

੩੬੫. ਸਦ੍ਧਾਦੇਯ੍ਯਂ (ਮਹਾਵ. ਅਟ੍ਠ. ੩੬੧) ਚੀਵਰਂ ਵਾ ਪਿਣ੍ਡਪਾਤਂ ਵਾਤਿ ਅਤ੍ਥੋ. ‘‘ਨ ਭਿਕ੍ਖਵੇ ਸਦ੍ਧਾਦੇਯ੍ਯਂ ਵਿਨਿਪਾਤੇਤਬ੍ਬਂ. ਯੋ ਵਿਨਿਪਾਤੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੩੬੧) ਹਿ ਵੁਤ੍ਤਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਮਾਤਾਪਿਤੂਨਂ ਦਾਤੁ’’ਨ੍ਤਿ (ਮਹਾਵ. ੩੬੧) ਵੁਤ੍ਤਤ੍ਤਾ ‘‘ਲਬ੍ਭਂ ਪਿਤੂਨ’’ਨ੍ਤਿ ਵੁਤ੍ਤਂ.

੩੬੬. ਵਸ੍ਸਂਵੁਤ੍ਥੋ ਅਞ੍ਞਤ੍ਰਾਤਿ ਸਮ੍ਬਨ੍ਧੋ, ਅਞ੍ਞਸ੍ਮਿਂ ਵਿਹਾਰੇਤਿ ਅਤ੍ਥੋ. ਅਞ੍ਞਤੋਤਿ ਅਞ੍ਞਵਿਹਾਰਤੋ. ‘‘ਨ ਭਿਕ੍ਖਵੇ ਅਞ੍ਞਤ੍ਰ ਵਸ੍ਸਂਵੁਤ੍ਥੇਨ ਅਞ੍ਞਤ੍ਰ ਚੀਵਰਭਾਗੋ ਸਾਦਿਤਬ੍ਬੋ. ਯੋ ਸਾਦਿਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੩੬੪) ਹਿ ਵੁਤ੍ਤਂ. ਤੇਸਨ੍ਤਿ ਤਸ੍ਮਿਂ ਵਿਹਾਰੇ ਤਂ ਚੀਵਰਂ ਭਾਜੇਤ੍ਵਾ ਗਣ੍ਹਿਤੁਂ ਯੁਤ੍ਤਾਨਂ ਭਿਕ੍ਖੂਨਂ ਧੁਰਨਿਕ੍ਖੇਪਤੋ ਹੋਤਿ ਭਣ੍ਡਗ੍ਘੇਨ ਕਾਰਿਯੋਤਿ ਅਤ੍ਥੋ.

੩੬੭. ਸਹ ਅਨ੍ਤਰੇਨ ਉਤ੍ਤਰੋਤਿ ਸਨ੍ਤਰੁਤ੍ਤਰੋ, ਗਾਮਂ ਨ ਪਵਿਸੇਯ੍ਯਾਤਿ ਅਤ੍ਥੋ. ‘‘ਨ ਭਿਕ੍ਖਵੇ ਸਨ੍ਤਰੁਤ੍ਤਰੇਨ ਗਾਮੋ ਪਵਿਸਿਤਬ੍ਬੋ. ਯੋ ਪਵਿਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੩੬੨) ਹਿ ਵੁਤ੍ਤਂ. ਕਲ੍ਲੋ ਵਾਤਿ ਅਗਿਲਾਨੋ. ਸਉਪਾਹਨੋ ਗਾਮਂ ਨ ਪਵਿਸੇਯ੍ਯਾਤਿ ਸਮ੍ਬਨ੍ਧੋ. ‘‘ਨ ਭਿਕ੍ਖਵੇ ਚਾਮਰਿਬੀਜਨੀ ਧਾਰੇਤਬ੍ਬਾ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੬੯), ‘‘ਅਨੁਜਾਨਾਮਿ, ਭਿਕ੍ਖਵੇ, ਤਿਸ੍ਸੋ ਬੀਜਨਿਯੋ ਵਾਕਮਯਂ ਉਸੀਰਮਯਂ ਮੋਰਪਿਞ੍ਛਮਯ’’ਨ੍ਤਿ (ਚੂਲ਼ਵ. ੨੬੯) ਚ ਵੁਤ੍ਤਤ੍ਤਾ ‘‘ਨ ਧਾਰੇਯ੍ਯ ਚਾਮਰੀਮਕਸਬੀਜਨਿ’’ਨ੍ਤਿ ਵੁਤ੍ਤਂ. ਮਕਸਬੀਜਨੀ ਪਨ ਦਨ੍ਤਵਿਸਾਣਦਾਰੁਦਣ੍ਡਕਾਪਿ ਵਟ੍ਟਤਿ.

੩੬੮. ਆਰਾਮਤੋ ਬਹੀਤਿ ਸਮ੍ਬਨ੍ਧੋ. ‘‘ਨ ਭਿਕ੍ਖਵੇ ਛਤ੍ਤਂ ਧਾਰੇਤਬ੍ਬਂ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ, ‘‘ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨਸ੍ਸ ਛਤ੍ਤ’’ਨ੍ਤਿ ਚ ਵੁਤ੍ਤਤ੍ਤਾ ਅਗਿਲਾਨੋ ਆਰਾਮਤੋ ਬਹਿ ਨ ਲਭਤਿ, ਚੀਵਰਗੁਤ੍ਤਿਯਾਦਿਅਤ੍ਥਾਯ ਅਗਿਲਾਨੋਪਿ ਲਭਤੀਤਿ ਅਤ੍ਥੋ.

੩੬੯. ਗਾਹੇਯ੍ਯ ਨੁਭਤੋਕਾਜਨ੍ਤਿ ਨ ਗਾਹੇਯ੍ਯ ਉਭਤੋਕਾਜਂ. ਏਕਨ੍ਤਰਿਕਕਾਜਕਨ੍ਤਿ ਏਕਤੋਕਾਜਞ੍ਚ ਅਨ੍ਤਰਕਾਜਞ੍ਚ. ਸੀਸਭਾਰੋ ਚ ਖਨ੍ਧਭਾਰੋ ਚ ਕਟਿਭਾਰੋ ਚ ਸੀਸਕ੍ਖਨ੍ਧਕਟਿਭਾਰਾ. ‘‘ਨ ਭਿਕ੍ਖਵੇ ਉਭਤੋਕਾਜਂ ਹਰਿਤਬ੍ਬਂ. ਯੋ ਹਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੮੧), ‘‘ਅਨੁਜਾਨਾਮਿ, ਭਿਕ੍ਖਵੇ, ਏਕਤੋਕਾਜਂ ਅਨ੍ਤਰਕਾਜਂ ਸੀਸਭਾਰਂ ਖਨ੍ਧਭਾਰਂ ਕਟਿਭਾਰਂ ਓਲਮ੍ਬਕ’’ਨ੍ਤਿ (ਚੂਲ਼ਵ. ੨੮੧) ਚ ਵੁਤ੍ਤਤ੍ਤਾ ਉਭਤੋਕਾਜਮੇਵ ਨ ਵਟ੍ਟਤਿ, ਸੇਸਾਨਿ ਵਟ੍ਟਨ੍ਤੀਤਿ ਵੇਦਿਤਬ੍ਬਾ.

੩੭੦. ਅਨੋਕਾਸਕਤਨ੍ਤਿ (ਮਹਾਵ. ੧੫੩) ਯੋ ਪਠਮਮੇਵ ‘‘ਕਰੋਹਿ ਮੇ ਆਵੁਸੋ ਓਕਾਸਂ, ਅਹਂ ਤਂ ਵਤ੍ਤੁਕਾਮੋ’’ਤਿ ਏਵਂ ਅਕਤੋਕਾਸਂ ਆਪਤ੍ਤਿਯਾ ਚੋਦੇਯ੍ਯ, ਤਸ੍ਸ ਦੁਕ੍ਕਟਂ ਹੋਤੀਤਿ ਅਤ੍ਥੋ. ਤਥਾਤਿ ਦੁਕ੍ਕਟਮੇਵਾਤਿ ਅਤ੍ਥੋ.

੩੭੧. ਪਕਤਙ੍ਗੁਲੇਨ, ਨ ਸੁਗਤਙ੍ਗੁਲੇਨਾਤਿ ਅਤ੍ਥੋ.

੩੭੨. ਮੂਗਬ੍ਬਤਾਦਿਂ (ਮਹਾਵ. ੨੦੯; ਮਹਾਵ. ਅਟ੍ਠ. ੨੦੯) ਤਿਤ੍ਥਿਯਬ੍ਬਤਂ ਯਦਿ ਗਣ੍ਹੇਯ੍ਯ, ਦੁਕ੍ਕਟਨ੍ਤਿ ਅਤ੍ਥੋ. ਆਦਿ-ਸਦ੍ਦੇਨ ਗੋਵਤਕੁਕ੍ਕੁਰਵਤਾਦਯੋ ਸਙ੍ਗਹਿਤਾ. ਤਥਾਤਿ (ਮਹਾਵ. ੩੦੩; ਮਹਾਵ. ਅਟ੍ਠ. ੩੦੩) ਨ੍ਹਾਪਿਤਪੁਬ੍ਬਕੋ ਖੁਰਭਣ੍ਡਂ ਯਦਿ ਪਰਿਹਰੇਯ੍ਯ, ਦੁਕ੍ਕਟਮੇਵਾਤਿ ਅਤ੍ਥੋ.

੩੭੩. ਯਂ ਕਿਞ੍ਚੀਤਿ (ਕਙ੍ਖਾ. ਅਟ੍ਠ. ਕੁਟਿਕਾਰਸਿਕ੍ਖਾਪਦਵਣ੍ਣਨਾ) ਨ੍ਹਾਪਿਤਤੁਣ੍ਣਕਾਰਕਮ੍ਮਾਦਿ ਯਂ ਕਿਞ੍ਚਿ ਹਤ੍ਥਕਮ੍ਮਨ੍ਤਿ ਅਤ੍ਥੋ. ਤਦਨੁਸਾਰਤੋਤਿ ਹਤ੍ਥਕਮ੍ਮਯਾਚਨਾਨੁਸਾਰਤੋਤਿ ਅਤ੍ਥੋ. ਸਚੇ ਏਵਂ ਯਾਚਤੋ ਹਤ੍ਥਕਮ੍ਮਮੂਲਮੇਵ ਦੇਤਿ, ਤਂ ਅਞ੍ਞਸ੍ਸ ਦਾਪੇਤ੍ਵਾ ਕਾਰੇਤੁਂ ਵਟ੍ਟਤੀਤਿ ਅਤ੍ਥੋ. ਨਿਕ੍ਕਮ੍ਮਂ ਪਨ ਹਤ੍ਥਕਮ੍ਮਵਸੇਨ ਅਯਾਚਿਤ੍ਵਾਪਿ ‘‘ਏਹਿ ਇਮਂ ਕਰੋਹੀ’’ਤਿ ਕਾਰੇਤੁਂ ਕਪ੍ਪਤੀਤਿ ਅਤ੍ਥੋ. ਯਂ ਕਿਞ੍ਚਿਪਰਸਨ੍ਤਕਨ੍ਤਿ ਯਂ ਕਿਞ੍ਚਿ ਦਾਰੁਤਿਣਾਦਿਕਂ ਅਪਰਸਨ੍ਤਕਂ ਅਪਰਿਗ੍ਗਹਿਤਂ ਆਹਰਾਪੇਤੁਂ ਕਪ੍ਪਤੀਤਿ ਅਧਿਪ੍ਪਾਯੋ.

੩੭੪. ਗਿਹੀਨਨ੍ਤਿ ਗਿਹੀਨਂ ਸਨ੍ਤਕਂ. ਗੋਪਕੇਤਿ ਰਕ੍ਖਕੇ. ਯਤ੍ਤਕਂ ਦੇਤਿ, ਤਤ੍ਤਕਂ ਗਹੇਤੁਂ ਕਪ੍ਪਤੀਤਿ ਅਤ੍ਥੋ. ਯਥਾਪਰਿਚ੍ਛੇਦਨ੍ਤਿ ‘‘ਦਿਵਸੇ ਦਿਵਸੇ ਏਤ੍ਤਕਂ ਉਚ੍ਛੁਨਾਲ਼ਿਕੇਰਂ ਅਮ੍ਬਪਕ੍ਕਂ ਤੁਮ੍ਹੇ ਖਾਦਥਾ’’ਤਿ ਪਰਿਚ੍ਛਿਨ੍ਦਿਤ੍ਵਾ ਦਿਨ੍ਨਮੇਵ ਤੇਸੁ ਦੇਨ੍ਤੇਸੁ ਲਬ੍ਭਤੀਤਿ ਅਤ੍ਥੋ.

੩੭੫. ਦ੍ਵਿਹਾਪਜ੍ਜੇਯ੍ਯਾਤਿ ਦ੍ਵੀਹਿ ਆਪਜ੍ਜੇਯ੍ਯ. ਕਤਮੇਹਿ ਦ੍ਵੀਹੀਤਿ ਚੇ, ਤੇ ਦਸ੍ਸੇਤੁਂ ‘‘ਕਾਯਵਾਚਾਹੀ’’ਤਿ ਵੁਤ੍ਤਂ, ‘‘ਦ੍ਵੀਹਾਕਾਰੇਹਿ ਆਪਤ੍ਤਿਂ ਆਪਜ੍ਜਤਿ, ਕਾਯੇਨ ਆਪਜ੍ਜਤਿ, ਵਾਚਾਯ ਆਪਜ੍ਜਤੀ’’ਤਿ (ਪਰਿ. ੩੨੨) ਹਿ ਵੁਤ੍ਤਂ. ਕਾਯਵਾਚਾਹਿ ਆਪਤ੍ਤਿਂ ਆਪਜ੍ਜਨ੍ਤੋ ਚ ਛਹਿ ਆਕਾਰੇਹਿ ਆਪਤ੍ਤਿਂ ਆਪਜ੍ਜਤਿ, ਤਾਨਿ ਦਸ੍ਸੇਤੁਂ ‘‘ਅਲਜ੍ਜਿਞਾਣਕੁਕ੍ਕੁਚ੍ਚਪਕਤਤ੍ਤਾ’’ਤਿਆਦਿਮਾਹ. ਏਤ੍ਥ (ਪਰਿ. ੨੯੫) ਪਨ ਅਕਪ੍ਪਿਯਭਾਵਂ ਜਾਨਨ੍ਤੋ ਏਵ ਵੀਤਿਕ੍ਕਮਂ ਕਰੋਨ੍ਤੋ ਅਲਜ੍ਜਿਤਾਯ ਆਪਜ੍ਜਤਿ ਨਾਮ. ਕਪ੍ਪਿਯਾਕਪ੍ਪਿਯਂ ਅਜਾਨਿਤ੍ਵਾ ਆਪਜ੍ਜਨ੍ਤੋ ਅਞ੍ਞਾਣਤਾਯ. ਕਪ੍ਪਿਯਂ ਨੁ ਖੋ, ਨੋ ਨੁ ਖੋ’’ਤਿ ਸਂਸਯੇ ਉਪ੍ਪਨ੍ਨੇ ਤਮਭਿਵਿਤਰਿਤ੍ਵਾ ਵੀਤਿਕ੍ਕਮਂ ਕਰੋਨ੍ਤੋ ਕੁਕ੍ਕੁਚ੍ਚਪਕਤਤ੍ਤਾ ਆਪਜ੍ਜਤਿ. ਸਹਸੇਯ੍ਯਾਦਿਂ ਆਪਜ੍ਜਨ੍ਤੋ ਸਤਿਪ੍ਲਵਾ, ਸਤਿਸਮ੍ਮੋਸਾਤਿ ਅਤ੍ਥੋ. ਅਚ੍ਛਮਂਸਂ ‘‘ਸੂਕਰਮਂਸ’’ਨ੍ਤਿ ਵਾ ਸੂਕਰਮਂਸਂ ‘‘ਅਚ੍ਛਮਂਸ’’ਨ੍ਤਿ ਵਾ ਖਾਦਨ੍ਤੋ ਅਕਪ੍ਪਿਯੇ ਕਪ੍ਪਿਯਸਞ੍ਞਿਤਾਯ ਚ ਕਪ੍ਪਿਯੇ ਅਕਪ੍ਪਿਯਸਞ੍ਞਿਤਾਯ ਚ ਆਪਜ੍ਜਤੀਤਿ ਵੇਦਿਤਬ੍ਬੋ.

੩੭੬. ਅਲਜ੍ਜਿਤਾਯ ਵਾ ਅਞ੍ਞਾਣਤਾਯ ਵਾ ਆਪਤ੍ਤਿਂ ਕਾਯਵਾਚਾਹਿ ਛਾਦਯੇਤਿ ਅਤ੍ਥੋ. ਏਕੇ ਵਾ ਏਕਸ੍ਮਿਂ ਵਾ. ਲਿਙ੍ਗੇਤਿ ਲਿਙ੍ਗਪਰਿਵਤ੍ਤਨਤੋ. ਏਵਂ ਚਤੁਧਾ ਆਪਤ੍ਤਿਵੁਟ੍ਠਾਨਂ ਹੋਤੀਤਿ ਅਤ੍ਥੋ. ਤਿਣਵਤ੍ਥਾਰਕਸਮਥਅਬ੍ਭਾਨਾਦੀਨਂ ਵਸੇਨ ਸਙ੍ਘੇ ਆਪਤ੍ਤਿ ਵੁਟ੍ਠਾਤੀਤਿ ਵੇਦਿਤਬ੍ਬਂ ਨਿਸ੍ਸਜ੍ਜਨਾਦੀਸੁ ਗਣੇ. ਏਕਸ੍ਸ ਸਨ੍ਤਿਕੇ ਵੁਟ੍ਠਾਨਂ ਪਾਕਟਮੇਵ. ‘‘ਯਾ ਆਪਤ੍ਤਿਯੋ ਭਿਕ੍ਖੂਨਂ ਭਿਕ੍ਖੁਨੀਹਿ ਅਸਾਧਾਰਣਾ, ਤਾਹਿ ਆਪਤ੍ਤੀਹਿ ਅਨਾਪਤ੍ਤੀ’’ਤਿ (ਪਾਰਾ. ੬੯) ਵਚਨਤੋ ਲਿਙ੍ਗਪਰਿਵਤ੍ਤਨੇ ਆਪਤ੍ਤਿਵੁਟ੍ਠਾਨਂ ਞਾਤਬ੍ਬਂ.

੩੭੭. ਪਚ੍ਚਯਦ੍ਵਯੇਤਿ ਚੀਵਰੇ ਚ ਪਿਣ੍ਡਪਾਤੇ ਚ. ਨ ਕੇਵਲਞ੍ਚ ਇਮੇ ਏਵ, ਨਿਮਿਤ੍ਤਕਮ੍ਮਮ੍ਪਿ ਨ ਲਬ੍ਭਤੇਵ, ਗਾਥਾਬਨ੍ਧਸੁਖਤ੍ਥਂ ਪਨ ਨ ਵੁਤ੍ਤਂ. ਤਤ੍ਥ ਨਿਮਿਤ੍ਤਕਮ੍ਮਂ ਨਾਮ ਯਂ ਕਿਞ੍ਚਿ ਪਰੇਸਂ ਪਚ੍ਚਯਦਾਨਸਂਯੋਜਨਕਂ ਕਾਯਵਚੀਕਮ੍ਮਂ. ਖਾਦਨੀਯਂ ਗਹੇਤ੍ਵਾ ਗਚ੍ਛਨ੍ਤੇ ਦਿਸ੍ਵਾ ‘‘ਕਿਂ ਖਾਦਨੀਯਂ ਲਭਿਤ੍ਥਾ’’ਤਿਆਦਿਨਾ ਨਯੇਨ ਤਸ੍ਸ ਪਵਤ੍ਤਿ ਵੇਦਿਤਬ੍ਬਾ. ਪਰਿਕਥਾ ਨਾਮ ਯਥਾ ਯਥਾ ਤਂ ਲਭਤਿ, ਤਥਾ ਤਥਾ ਪਰਿਵਤ੍ਤੇਤ੍ਵਾ ਕਥਨਂ. ‘‘ਏਤਰਹਿ ਭਿਕ੍ਖੂ ਪਿਣ੍ਡਪਾਤੇਨ ਕਿਲਮਨ੍ਤੀ’’ਤਿਆਦਿਨਾ ਨਯੇਨ ਤਸ੍ਸ ਪਵਤ੍ਤਿ ਵੇਦਿਤਬ੍ਬਾ. ਓਭਾਸੋ ਨਾਮ ਪਚ੍ਚਯਪ੍ਪਟਿਸਂਯੁਤ੍ਤਕਥਾ. ਵਿਞ੍ਞਤ੍ਤਿ ਪਨ ਪਾਕਟਾ ਏਵ. ਤਤਿਯੇਤਿ ਸੇਨਾਸਨੇ. ਸੇਨਾਸਨੇ ਪਨ ਨਿਮਿਤ੍ਤੋਭਾਸਪਰਿਕਥਾ ਵਟ੍ਟਨ੍ਤਿ, ਵਿਞ੍ਞਤ੍ਤਿ ਏਵ ਏਕਾ ਨ ਵਟ੍ਟਤਿ. ਤਤ੍ਥ ਨਿਮਿਤ੍ਤਕਮ੍ਮਂ ਨਾਮ ਉਪਾਸਕੇ ਦਿਸ੍ਵਾ ਸੇਨਾਸਨਤ੍ਥਂ ਭੂਮਿਪਰਿਕਮ੍ਮਕਰਣਾਦਿ. ਓਭਾਸੋ ਨਾਮ ‘‘ਉਪਾਸਕਾ, ਤੁਮ੍ਹੇ ਕੁਹਿਂ ਵਸਥਾ’’ਤਿ ‘‘ਪਾਸਾਦੇ, ਭਨ੍ਤੇ’’ਤਿ ਵੁਤ੍ਤੇ ‘‘ਕਿਂ ਭਿਕ੍ਖੂਨਂ ਪਾਸਾਦੋ ਨ ਵਟ੍ਟਤੀ’’ਤਿਆਦਿਕਂ ਵਚਨਂ. ਪਰਿਕਥਾ ਨਾਮ ‘‘ਭਿਕ੍ਖੂਨਂ ਸੇਨਾਸਨਂ ਸਮ੍ਬਾਧ’’ਨ੍ਤਿ ਵਚਨਂ. ਸੇਸੇਤਿ ਗਿਲਾਨਪਚ੍ਚਯੇ.

੩੭੮. ਨ ਰੁਹਤੀਤਿ ਨ ਹੋਤਿ. ਅਚ੍ਚਯੇ ਦਾਨਨ੍ਤਿ ਅਚ੍ਚਯਦਾਨਂ. ਪਞ੍ਚਸੁ ਸਹਧਮ੍ਮਿਕੇਸੁ ਯੇਨ ਕੇਨਚਿ ਕਾਲਂ ਕਰੋਨ੍ਤੇਨ ‘‘ਮਮਚ੍ਚਯੇਨ ਮਯ੍ਹਂ ਪਰਿਕ੍ਖਾਰੋ ਉਪਜ੍ਝਾਯਸ੍ਸ ਹੋਤੁ, ਆਚਰਿਯਸ੍ਸ ਹੋਤੁ, ਅਞ੍ਞਸ੍ਸ ਵਾ ਕਸ੍ਸਚਿ ਹੋਤੂ’’ਤਿ ਵੁਤ੍ਤੇ ਤੇਸਂ ਨ ਹੋਤਿ, ਤਸ੍ਮਾ ਵੁਤ੍ਤਂ ‘‘ਨ ਰੁਹਤੀ’’ਤਿ. ਸਙ੍ਘਸ੍ਸੇਵ ਚ ਤਂ ਹੋਤੀਤਿ ਯਦਿ ਭਿਕ੍ਖੁਸਾਮਣੇਰੇਹਿ ਏਵਂ ਵੁਤ੍ਤਂ, ਤਸ੍ਮਿਂ ਮਤੇਪਿ ਭਿਕ੍ਖੁਸਙ੍ਘਸ੍ਸੇਵ ਹੋਤਿ, ਭਿਕ੍ਖੁਨਿਸਿਕ੍ਖਮਾਨਸਾਮਣੇਰੀਹਿ ਚੇ ਵੁਤ੍ਤਂ, ਤਸ੍ਮਿਂ ਮਤੇ ਭਿਕ੍ਖੁਨਿਸਙ੍ਘਸ੍ਸ ਤਂ ਹੋਤੀਤਿ ਅਤ੍ਥੋ. ਗਿਹੀਨਂ ਪਨ ਰੂਹਤੀਤਿ ਗਿਹੀਨਂ ਪਨ ਅਚ੍ਚਯਦਾਨਂ ਏਵ ਸਬ੍ਬੇਸਂ ਰੁਹਤੀਤਿ ਵੁਤ੍ਤਂ ਹੋਤਿ.

੩੭੯. ਉਪਸ੍ਸਯੇਤਿ ਭਿਕ੍ਖੁਨਿਵਿਹਾਰੇ. ਦਾਯਜ੍ਜੋਤਿ ਤਸ੍ਸ ਪਰਿਕ੍ਖਾਰਸ੍ਸ ਦਾਯਜ੍ਜੋ. ਸੇਸੇਪੀਤਿ ਸਚੇ ਭਿਕ੍ਖੁਨਿਸਿਕ੍ਖਮਾਨਸਾਮਣੇਰਿਯੋ ਭਿਕ੍ਖੁਵਿਹਾਰੇ ਕਾਲਂ ਕਰੋਨ੍ਤਿ, ਤਾਸਂ ਪਰਿਕ੍ਖਾਰਾਨਂ ਭਿਕ੍ਖੁਸਙ੍ਘੋਵ ਦਾਯਜ੍ਜੋਤਿ ਅਤ੍ਥੋ.

੩੮੦. ਪੁਰਿਮਸ੍ਸੇਵਾਤਿ ਏਤ੍ਥ ‘‘ਇਮਂ ਪਰਿਕ੍ਖਾਰਂ ਨੇਤ੍ਵਾ ਅਸੁਕਸ੍ਸ ਦੇਹੀ’’ਤਿ ਦਿਨ੍ਨਂ ਪੁਰਿਮਸ੍ਸੇਵ ਹੋਤੀਤਿ ਅਤ੍ਥੋ. ‘‘ਅਸੁਕਸ੍ਸ ਦਮ੍ਮੀ’’ਤਿ ਦਿਨ੍ਨਂ ਪਨ ਪਚ੍ਛਿਮਸ੍ਸੇਵ ਹੋਤਿ ਪਰਿਚ੍ਚਜਿਤ੍ਵਾ ਦਿਨ੍ਨਤ੍ਤਾ. ਇਮਂ ਵਿਧਿਂ ਞਤ੍ਵਾਵ ਵਿਸ੍ਸਾਸਗ੍ਗਾਹਂ ਵਾ ਗਣ੍ਹੇਯ੍ਯ, ਮਤਕਚੀਵਰਂ ਵਾ ਅਧਿਟ੍ਠੇਤਿ ਸਮ੍ਬਨ੍ਧੋ. ਮਤਕਚੀਵਰਅਧਿਟ੍ਠਾਨਂ ਨਾਮ ਘਣ੍ਟਿਂ ਪਹਰਿਤ੍ਵਾ ਕਾਲਂ ਘੋਸੇਤ੍ਵਾ ਥੋਕਂ ਆਗਮੇਤ੍ਵਾ ਸਚੇ ਭਿਕ੍ਖੂ ਆਗਚ੍ਛਨ੍ਤਿ, ਤੇਹਿ ਸਦ੍ਧਿਂ ਭਾਜੇਤਬ੍ਬਾਨਿ, ਨੋ ਚੇ ਆਗਚ੍ਛਨ੍ਤਿ, ‘‘ਮਯ੍ਹਿਮਾਨਿ ਚੀਵਰਾਨਿ ਪਾਪੁਣਨ੍ਤੀ’’ਤਿ ਅਧਿਟ੍ਠਾਤਬ੍ਬਾਨਿ. ਏਵਂ ਅਧਿਟ੍ਠਿਤੇ ਸਬ੍ਬਾਨਿ ਤਸ੍ਸੇਵ ਹੋਨ੍ਤਿ, ਠਿਤਿਕਾ ਪਨ ਨ ਤਿਟ੍ਠਤਿ. ਸਚੇ ਏਕੇਕਂ ਉਦ੍ਧਰਿਤ੍ਵਾ ‘‘ਅਯਂ ਪਠਮਭਾਗੋ ਮਯ੍ਹਂ ਪਾਪੁਣਾਤਿ, ਅਯਂ ਦੁਤਿਯਭਾਗੋ’’ਤਿ ਏਵਂ ਗਣ੍ਹਾਤਿ, ਗਹਿਤਾਨਿ ਚ ਸੁਗਹਿਤਾਨਿ ਹੋਨ੍ਤਿ, ਠਿਤਿਕਾ ਚ ਤਿਟ੍ਠਤਿ. ਏਵਂ ਪਾਪੇਤ੍ਵਾ ਗਣ੍ਹਨ੍ਤੇਨਾਪਿ ਅਧਿਟ੍ਠਿਤਮੇਵ ਹੋਤਿ.

੩੮੧. ਲੋਹਭਣ੍ਡੇ ਪਹਰਣਿਂ ਠਪੇਤ੍ਵਾ ਸਬ੍ਬਂ ਕਪ੍ਪਤਿ, ਦਾਰੁਭਣ੍ਡੇ ਚ ਦਾਰੁਜਂ ਪਤ੍ਤਞ੍ਚ ਪਾਦੁਕਞ੍ਚ, ਪਲ੍ਲਙ੍ਕਞ੍ਚ ਆਸਨ੍ਦਿਞ੍ਚ ਠਪੇਤ੍ਵਾ ਸਬ੍ਬਂ ਕਪ੍ਪਤਿ, ਮਤ੍ਤਿਕਾਮਯੇ ਕਤਕਞ੍ਚ ਕੁਮ੍ਭਕਾਰਿਕਞ੍ਚ ਠਪੇਤ੍ਵਾ ਸਬ੍ਬਂ ਕਪ੍ਪਤੀਤਿ ਅਤ੍ਥੋ. ‘‘ਅਨੁਜਾਨਾਮਿ, ਭਿਕ੍ਖਵੇ, ਠਪੇਤ੍ਵਾ ਪਹਰਣਿਂ ਸਬ੍ਬਂ ਲੋਹਭਣ੍ਡਂ, ਠਪੇਤ੍ਵਾ ਆਸਨ੍ਦਿਂ ਪਲ੍ਲਙ੍ਕਂ ਦਾਰੁਪਤ੍ਤਂ ਦਾਰੁਪਾਦੁਕਂ ਸਬ੍ਬਂ ਦਾਰੁਭਣ੍ਡਂ, ਠਪੇਤ੍ਵਾ ਕਤਕਞ੍ਚ ਕੁਮ੍ਭਕਾਰਿਕਞ੍ਚ ਸਬ੍ਬਂ ਮਤ੍ਤਿਕਾਭਣ੍ਡ’’ਨ੍ਤਿ (ਚੂਲ਼ਵ. ੨੯੩) ਹਿ ਵੁਤ੍ਤਂ. ਏਤ੍ਥ ਕਤਕਨ੍ਤਿ ਪਦੁਮਕਣ੍ਣਿਕਾਕਾਰੇਨ ਕਤਮਲ੍ਲਕਨ੍ਤਿ ਅਧਿਪ੍ਪੇਤਂ. ਧਨਿਯਸ੍ਸੇਵ ਸਬ੍ਬਮਤ੍ਤਿਕਾਮਯਾ ਕੁਟਿ ਕੁਮ੍ਭਕਾਰਿਕਨ੍ਤਿ. ਪਕਿਣ੍ਣਕਵਿਨਿਚ੍ਛਯੋ.

ਪਕਿਣ੍ਣਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.