੪੨. ਦੇਸਨਾਨਿਦ੍ਦੇਸਵਣ੍ਣਨਾ

੩੮੨. ਭਿਕ੍ਖੁਭਾਵਸ੍ਸ (ਪਾਰਾ. ਅਟ੍ਠ. ੨.੧੯੮) ਯੋ ਚਾਗੋ, ਸਾ ਪਾਰਾਜਿਕਦੇਸਨਾਤਿ ਅਤ੍ਥੋ. ਵੁਤ੍ਤਞ੍ਹੇਤਂ ‘‘ਵਿਸੁਦ੍ਧਾਪੇਕ੍ਖੋਤਿ ਗਿਹਿ ਵਾ ਹੋਤੁਕਾਮੋ ਉਪਾਸਕੋ ਵਾ ਹੋਤੁਕਾਮੋ ਆਰਾਮਿਕੋ ਵਾ ਹੋਤੁਕਾਮੋ ਸਾਮਣੇਰੋ ਵਾ ਹੋਤੁਕਾਮੋ’’ਤਿ (ਪਾਰਾ. ੧੯੮). ਤਸ੍ਮਾ ਗਿਹਿਭਾਵਾਦਿਕਂਯੇਵ ਪਾਰਾਜਿਕਂ ਆਪਨ੍ਨਸ੍ਸ ਵਿਸੁਦ੍ਧਿ ਨਾਮ, ਅਞ੍ਞਤਰਸ੍ਸ ਵਿਸੁਦ੍ਧਿ ਏਵ ਨਤ੍ਥਿ. ‘‘ਛਾਦੇਤਿ ਜਾਨਮਾਪਨ੍ਨਂ, ਪਰਿਵਸੇਯ੍ਯ ਤਾਵਤਾ’’ਤਿਆਦਿਨਾ ਨਯੇਨ ਹੇਟ੍ਠਾ ਵੁਤ੍ਤਵਿਧਿਂ ਸਨ੍ਧਾਯ ‘‘ਯਥਾਵੁਤ੍ਤੇਨ ਵੁਟ੍ਠਾਨ’’ਨ੍ਤਿ ਵੁਤ੍ਤਂ.

੩੮੩. ਇਦਾਨਿ ਵਤ੍ਤਬ੍ਬਤਂ ਸਨ੍ਧਾਯ ‘‘ਏਵ’’ਨ੍ਤਿ ਵੁਤ੍ਤਂ.

੩੮੪. ਪਟਿਦੇਸੇਮੀਤਿ ਆਰੋਚੇਮਿ. ਏਤਾਨਿ ਅਹਂ ਏਤਾਨਾਹਂ.

੩੮੬. (ਕ) ਯਂ ਸਙ੍ਘੋ ਗਿਲਾਨਸ੍ਸ ਤਿਚੀਵਰੇਨ ਵਿਪ੍ਪਵਾਸਸਮ੍ਮੁਤਿਂ ਦੇਤਿ, ਤਂ ਅਞ੍ਞਤ੍ਰਾਤਿ ਅਤ੍ਥੋ.

(ਖ) ਅਕਾਲਚੀਵਰਂ (ਪਾਰਾ. ੫੦੦) ਨਾਮ ‘‘ਅਨਤ੍ਥਤੇ ਕਥਿਨੇ ਏਕਾਦਸਮਾਸੇ ਉਪ੍ਪਨ੍ਨਂ, ਅਤ੍ਥਤੇ ਕਥਿਨੇ ਸਤ੍ਤਮਾਸੇ ਉਪ੍ਪਨ੍ਨਂ, ਕਾਲੇਪਿ ਆਦਿਸ੍ਸ ਦਿਨ੍ਨਂ, ਏਤਂ ਅਕਾਲਚੀਵਰਂ ਨਾਮਾ’’ਤਿ.

(ਗ) ਪੁਰਾਣਚੀਵਰਂ (ਪਾਰਾ. ੫੦੫) ਨਾਮ ‘‘ਸਕਿਂ ਨਿਵਤ੍ਥਮ੍ਪਿ ਸਕਿਂ ਪਾਰੁਤਮ੍ਪੀ’’ਤਿ ਵੁਤ੍ਤਂ. ਅਞ੍ਞਾਤਿਕਾ ਨਾਮ ਮਾਤਿਤੋ ਵਾ ਪਿਤਿਤੋ ਵਾ ਯਾਵ ਸਤ੍ਤਮਾ ਕੁਲਪਰਿਵਟ੍ਟਾ ਅਸਮ੍ਬਨ੍ਧਾ. ਨਿਸੀਦਨਪਚ੍ਚਤ੍ਥਰਣਧੋਵਾਪਨੇ ਦੁਕ੍ਕਟਂ.

(ਘ) ਅਞ੍ਞਤ੍ਰ ਪਾਰਿਵਤ੍ਤਕਾਤਿ (ਪਾਰਾ. ੫੧੨) ਏਤ੍ਥ ਹਰੀਤਕੀਖਣ੍ਡਮ੍ਪਿ ਵਟ੍ਟਤਿ. ਚੀਵਰਂ ਨਾਮ ਇਧ ਵਿਕਪ੍ਪਨੂਪਗਪਚ੍ਛਿਮਤੋ ਪਟ੍ਠਾਯ ਅਧਿਪ੍ਪੇਤਂ.

(ਙ) ਅਞ੍ਞਤ੍ਰ ਸਮਯਾਤਿ (ਪਾਰਾ. ੫੧੯) ਏਤ੍ਥ ‘‘ਅਚ੍ਛਿਨ੍ਨਚੀਵਰੋ ਵਾ ਹੋਤਿ ਭਿਕ੍ਖੁ ਨਟ੍ਠਚੀਵਰੋ ਵਾ’’ਤਿ ਏਵਂ ਵੁਤ੍ਤਂ ਸਮਯਨ੍ਤਿ ਅਤ੍ਥੋ.

(ਚ) ‘‘ਸਨ੍ਤਰੁਤ੍ਤਰਪਰਮਂ ਤੇਨ ਭਿਕ੍ਖੁਨਾ ਤਤੋ ਚੀਵਰਂ ਸਾਦਿਤਬ੍ਬ’’ਨ੍ਤਿ (ਪਾਰਾ. ੫੨੪) ਵੁਤ੍ਤਤ੍ਤਾ ‘‘ਤਤੁਤ੍ਤਰੀ’’ਤਿ ਵੁਤ੍ਤਂ. ਏਤ੍ਥ ਪਨ ‘‘ਸਚੇ ਤੀਣਿ ਨਟ੍ਠਾਨਿ ਹੋਨ੍ਤਿ, ਦ੍ਵੇ ਸਾਦਿਤਬ੍ਬਾਨਿ. ਦ੍ਵੇ ਨਟ੍ਠਾਨਿ, ਏਕਂ ਸਾਦਿਤਬ੍ਬਂ, ਏਕਂ ਨਟ੍ਠਂ, ਨ ਕਿਞ੍ਚਿ ਸਾਦਿਤਬ੍ਬ’’ਨ੍ਤਿ (ਪਾਰਾ. ੫੨੪) ਵੁਤ੍ਤਂ.

(ਛ-ਜ) ‘‘ਕੀਦਿਸੇਨ ਤੇ (ਪਾਰਾ. ੫੨੯), ਭਨ੍ਤੇ, ਚੀਵਰੇਨ ਅਤ੍ਥੋ, ਕੀਦਿਸਂ ਤੇ ਚੀਵਰਂ ਚੇਤਾਪੇਮੀ’’ਤਿ ਏਵਂ ਅਪ੍ਪਵਾਰਿਤੋਤਿ ਅਤ੍ਥੋ. ਵਿਕਪ੍ਪਨ੍ਤਿ ਵਿਸਿਟ੍ਠਕਪ੍ਪਂ ਅਧਿਕਵਿਧਾਨਂ ਆਪਨ੍ਨਂ. ਇਧ ਪੁਰਿਮਂ ਏਕਸ੍ਸ, ਦੁਤਿਯਂ ਬਹੂਨਂ ਵਸੇਨ ਵੁਤ੍ਤਂ, ਏਤ੍ਤਕਂ ਨਾਨਤ੍ਤਂ.

(ਝ) ਅਤਿਰੇਕਤਿਕ੍ਖਤ੍ਤੁਨ੍ਤਿ ਏਤ੍ਥ ਕੇਨਚਿ ਯਂ ਕਿਞ੍ਚਿ ਅਕਪ੍ਪਿਯਵਤ੍ਥੁਂ ਆਨੇਤ੍ਵਾ ‘‘ਇਦਂ ਖੋ ਮੇ, ਭਨ੍ਤੇ, ਆਯਸ੍ਮਨ੍ਤਂ ਉਦ੍ਦਿਸ੍ਸ ਚੀਵਰਚੇਤਾਪਨ੍ਨਂ ਆਭਤਂ, ਪਟਿਗ੍ਗਣ੍ਹਤੁ ਆਯਸ੍ਮਾ ਚੀਵਰਚੇਤਾਪਨ੍ਨ’’ਨ੍ਤਿ ਵੁਤ੍ਤੇ ‘‘ਨ ਖੋ ਮਯਂ, ਆਵੁਸੋ, ਚੀਵਰਚੇਤਾਪਨ੍ਨਂ ਪਟਿਗ੍ਗਣ੍ਹਾਮ, ਚੀਵਰਞ੍ਚ ਖੋ ਮਯਂ ਪਟਿਗ੍ਗਣ੍ਹਾਮ ਕਾਲੇਨ ਕਪ੍ਪਿਯ’’ਨ੍ਤਿ ਵਤ੍ਤਬ੍ਬਂ. ਏਵਂ ਵੁਤ੍ਤੇ ਸਚੇ ਸੋ ‘‘ਅਤ੍ਥਿ ਕੋਚਿ ਕਪ੍ਪਿਯਕਾਰਕੋ’’ਤਿ ਵਦਤਿ, ਚੀਵਰਤ੍ਥਿਕੇਨ ਠਪੇਤ੍ਵਾ ਪਞ੍ਚ ਸਹਧਮ੍ਮਿਕੇ ਯੋ ਕੋਚਿ ਉਦ੍ਦਿਸਿਤਬ੍ਬੋ ‘‘ਏਸੋ ਖੋ, ਆਵੁਸੋ, ਭਿਕ੍ਖੂਨਂ ਵੇਯ੍ਯਾਵਚ੍ਚਕਰੋ’’ਤਿ, ਏਤ੍ਤਕਮੇਵ ਵਤ੍ਤਬ੍ਬਂ. ਏਵਂ ਵੁਤ੍ਤੇ ਸਚੇ ਦਾਯਕੋ ਤਸ੍ਸ ਹਤ੍ਥੇ ਅਕਪ੍ਪਿਯਵਤ੍ਥੁਂ ਦਤ੍ਵਾ ‘‘ਏਸੋ ਅਯ੍ਯਸ੍ਸ ਚੀਵਰਂ ਚੇਤਾਪੇਤ੍ਵਾ ਦਸ੍ਸਤੀ’’ਤਿ ਵਤ੍ਵਾ ਗਚ੍ਛਤਿ, ਤਂ ਉਪਸਙ੍ਕਮਿਤ੍ਵਾ ਦ੍ਵਤ੍ਤਿਕ੍ਖਤ੍ਤੁਂ ਚੋਦੇਤਬ੍ਬੋ ਸਾਰੇਤਬ੍ਬੋ ‘‘ਅਤ੍ਥੋ ਮੇ, ਆਵੁਸੋ, ਚੀਵਰੇਨਾ’’ਤਿ, ਏਤ੍ਤਕਮੇਵ ਵਤ੍ਤਬ੍ਬਂ, ‘‘ਦੇਹਿ ਮੇ ਚੀਵਰ’’ਨ੍ਤਿਆਦਿਨਾ ਨ ਵਤ੍ਤਬ੍ਬਂ. ਏਵਂ ਤਿਕ੍ਖਤ੍ਤੁਂ ਚੋਦਨਾਯ ਤਂ ਚੀਵਰਂ ਲਭਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭਤਿ, ਛਕ੍ਖਤ੍ਤੁਪਰਮਂ ਤੁਣ੍ਹੀਭੂਤੇਨ ਠਾਤਬ੍ਬਂ, ਨ ਆਸਨੇ ਨਿਸੀਦਿਤਬ੍ਬਂ, ਨ ਆਮਿਸਂ ਪਟਿਗ੍ਗਹੇਤਬ੍ਬਂ, ਨ ਧਮ੍ਮੋ ਭਾਸਿਤਬ੍ਬੋ. ‘‘ਕਿਂ ਕਾਰਣਾ ਆਗਤੋਸੀ’’ਤਿ ਵੁਤ੍ਤੇ ‘‘ਜਾਨਾਹਿ, ਆਵੁਸੋ’’ਤਿ ਏਤ੍ਤਕਮੇਵ ਵਤ੍ਤਬ੍ਬਂ. ਸਚੇ ਨਿਸਜ੍ਜਾਦੀਨਿ ਕਰੋਤਿ, ਠਾਨਂ ਭਞ੍ਜਤਿ. ਵਤ੍ਤਭੇਦਦੁਕ੍ਕਟਞ੍ਚ ਆਪਜ੍ਜਤੀਤਿ ਵਦਨ੍ਤਿ. ਏਵਂ ਪਨ ਅਪ੍ਪਟਿਪਜ੍ਜਿਤ੍ਵਾ ਅਤਿਰੇਕਤਿਕ੍ਖਤ੍ਤੁਂ ਚੋਦਨਾਯ ਅਤਿਰੇਕਛਕ੍ਖਤ੍ਤੁਂ ਠਾਨੇਨ ਸਚੇ ਨਿਪ੍ਫਾਦੇਤਿ, ਨਿਸ੍ਸਗ੍ਗਿਯਨ੍ਤਿ ਅਤ੍ਥੋ.

(ਞ) ਸਨ੍ਥਤਂ (ਪਾਰਾ. ੫੪੪) ਨਾਮ ਸਨ੍ਥਰਿਤ੍ਵਾ ਕਤਂ ਹੋਤਿ ਅਵਾਯਿਮਂ. ਏਕਕੋਸਿਯਂਸੁਨਾਪਿ ਚੇ ਮਿਸ੍ਸੇਤ੍ਵਾ ਕਰੋਤਿ, ਨਿਸ੍ਸਗ੍ਗਿਯਂ.

(ਟ) ਸੁਦ੍ਧਕਾਲ਼ਕਾਨਨ੍ਤਿ (ਪਾਰਾ. ੫੪੭-੫੪੯) ਅਞ੍ਞੇਹਿ ਅਮਿਸ੍ਸਿਤਾਨਨ੍ਤਿ ਅਤ੍ਥੋ. ‘‘ਕਾਲ਼ਕਂ ਨਾਮ ਦ੍ਵੇ ਕਾਲ਼ਕਾਨਿ ਜਾਤਿਕਾਲ਼ਕਂ ਵਾ ਰਜਨਕਾਲ਼ਕਂ ਵਾ’’ਤਿ ਵੁਤ੍ਤਂ.

(ਠ) ਅਨਾਦਿਯਿਤ੍ਵਾ…ਪੇ… ਤੁਲਨ੍ਤਿ (ਪਾਰਾ. ੫੫੪) ਏਤ੍ਥ ਪਨ ਯਤ੍ਤਕੇਹਿ ਏਲ਼ਕਲੋਮੇਹਿ ਕਤ੍ਤੁਕਾਮੋ ਹੋਤਿ, ਤੇਸੁ ਦ੍ਵੇ ਕੋਟ੍ਠਾਸਾ ਕਾਲ਼ਕਾਨਂ, ਏਕੋ ਓਦਾਤਾਨਂ, ਏਕੋ ਗੋਚਰਿਯਾਨਂ ਆਦਾਤਬ੍ਬੋਤਿ ਵਿਨਿਚ੍ਛਯੋ. ਏਕਸ੍ਸਾਪਿ ਕਾਲ਼ਕਲੋਮਸ੍ਸ ਅਤਿਰੇਕਭਾਗੇ ਸਤਿ ਨਿਸ੍ਸਗ੍ਗਿਯਮੇਵ.

(ਡ) ਊਨਕਛਬ੍ਬਸ੍ਸਾਨੀਤਿ (ਪਾਰਾ. ੫੬੨) ਛਬ੍ਬਸ੍ਸਤੋ ਓਰਭਾਗੇ.

(ਢ) ਨਿਸੀਦਨਸਨ੍ਥਤਂ (ਪਾਰਾ. ੫੬੭) ਪਨ ਕਾਰਾਪੇਨ੍ਤੇਨ ਪੁਰਾਣਸਨ੍ਥਤਸ੍ਸ ਏਕਪਸ੍ਸਤੋ ਵਟ੍ਟਂ ਵਾ ਚਤੁਰਸ੍ਸਂ ਵਾ ਛਿਨ੍ਦਿਤ੍ਵਾ ਗਹਿਤਟ੍ਠਾਨਂ ਯਥਾ ਵਿਦਤ੍ਥਿਮਤ੍ਤਂ ਹੋਤਿ, ਏਵਂ ਗਹੇਤ੍ਵਾ ਏਕਦੇਸਂ ਵਾ ਸਨ੍ਥਰਿਤਬ੍ਬਂ, ਵਿਜਟੇਤ੍ਵਾ ਵਾ ਸਨ੍ਥਰਿਤਬ੍ਬਂ.

(ਤ) ਨ ਕੇਵਲਂ ਧੋਵਾਪਨੇ (ਪਾਰਾ. ੫੭੮) ਏਵ ਨਿਸ੍ਸਗ੍ਗਿਯਂ, ਰਜਨੇਪਿ ਨਿਸ੍ਸਗ੍ਗਿਯਮੇਵ.

(ਦ) ਰੂਪਿਯਪਟਿਗ੍ਗਹਣਸ੍ਸੇਵ (ਪਾਰਾ. ੫੮੯) ਪਟਿਕ੍ਖਿਤ੍ਤਤ੍ਤਾ ਪਟਿਗ੍ਗਹਿਤਪਰਿਵਤ੍ਤਨੇ ਦੋਸਂ ਅਪਸ੍ਸਨ੍ਤਾ ਕਤਾਕਤਾਦਿਵਸੇਨ ਅਨੇਕਵਿਧਂ ਜਾਤਰੂਪਪਰਿਵਤ੍ਤਨਂ ਕਰੋਨ੍ਤਿ, ਤਂ ਸਨ੍ਧਾਯ ‘‘ਨਾਨਪ੍ਪਕਾਰਕ’’ਨ੍ਤਿ ਵੁਤ੍ਤਂ.

੩੮੭-੯. ਆਪਤ੍ਤਿਂ ਦੇਸੇਤ੍ਵਾ ਪਚ੍ਛਾ ਕਤ੍ਤਬ੍ਬਂ ਦਸ੍ਸੇਤੁਂ ‘‘ਅਥਾ’’ਤਿ ਵੁਤ੍ਤਂ. ਗਿਹਿਂ ਵਦੇਤਿ ਸਚੇ ਤਤ੍ਥ ਆਗਚ੍ਛਤਿ ਆਰਾਮਿਕੋ ਵਾ ਉਪਾਸਕੋ ਵਾ, ਤਂ ਵਦੇਯ੍ਯਾਤਿ ਅਤ੍ਥੋ. ਏਵਂ ਵੁਤ੍ਤੋ ਸੋ ‘‘ਇਮਿਨਾ ਕਿਂ ਆਹਰਾਮੀ’’ਤਿ ਚੇ ਵਦੇਯ੍ਯਾਤਿ ਅਤ੍ਥੋ. ਅਵਤ੍ਵਾਮਨ੍ਤਿ ‘‘ਇਮਂ ਵਾ ਇਮਂ ਵਾ ਆਹਰਾ’’ਤਿ ਅਵਤ੍ਵਾਤਿ ਅਤ੍ਥੋ. ਵਦੇਤਿ ‘‘ਕਪ੍ਪਿਯਂ ਆਚਿਕ੍ਖਿਤਬ੍ਬ’’ਨ੍ਤਿ (ਪਾਰਾ. ੫੮੪, ੫੮੯) ਵਚਨਤੋ ‘‘ਪਬ੍ਬਜਿਤਾਨਂ ਸਪ੍ਪਿ ਵਾ ਤੇਲਂ ਵਾ ਮਧੁ ਵਾ ਫਾਣਿਤਂ ਵਾ ਵਟ੍ਟਤੀ’’ਤਿ ਏਵਂ ਆਚਿਕ੍ਖਿਤਬ੍ਬਂ, ‘‘ਇਮਂ ਨਾਮ ਆਹਰਾ’’ਤਿ ਨ ਵਤ੍ਤਬ੍ਬਮੇਵ. ਦ੍ਵੇਪੇਤੇਤਿ ਦ੍ਵੇਪਿ ਏਤੇ ਰੂਪਿਯਪਟਿਗ੍ਗਾਹਕਞ੍ਚ ਰੂਪਿਯਸਬ੍ਯੋਹਾਰਿਕਞ੍ਚਾਤਿ ਅਤ੍ਥੋ. ਅਞ੍ਞੇਨਾਤਿ ਅਨ੍ਤਮਸੋ ਆਰਾਮਿਕੇਨਾਪਿ ਲਦ੍ਧਭਾਗੋ ਨ ਕਪ੍ਪਤਿ ਏਵ.

੩੯੦. ਅਨ੍ਤਮਸੋ (ਪਾਰਾ. ਅਟ੍ਠ. ੨.੫੮੩-੪) ਤਨ੍ਨਿਬ੍ਬਤ੍ਤਾ ਰੁਕ੍ਖਚ੍ਛਾਯਾਪਿ ਨ ਕਪ੍ਪਤੀਤਿ. ਨਿਸ੍ਸਟ੍ਠਂ ਪਟਿਲਦ੍ਧਮ੍ਪੀਤਿ ਏਤ੍ਥ ਯਥਾ ਰੂਪਿਯਸਂਵੋਹਾਰਂ ਕਤ੍ਵਾ ਲਦ੍ਧਵਤ੍ਥੁਤੋ ਆਭਤਂ ਨ ਕਪ੍ਪਤਿ, ਤਥਾ ਕੋਸਿਯਮਿਸ੍ਸਕਸਨ੍ਥਤਾਦਿਤ੍ਤਯਮ੍ਪਿ ਨ ਕਪ੍ਪਤਿ. ਨ ਕੇਵਲਂ ਤਸ੍ਸੇਵ, ਅਞ੍ਞੇਸਮ੍ਪਿ ਨ ਕਪ੍ਪਤੇਵ ‘‘ਅਞ੍ਞੇਨ ਕਤਂ ਪਟਿਲਭਿਤ੍ਵਾ ਪਰਿਭੁਞ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਰਾ. ੫੪੫, ੫੫੦, ੫੫੫) ਵੁਤ੍ਤਤ੍ਤਾ.

੩੯੧. ਏਵਂ ਨੋ ਚੇ ਲਭੇਥ, ਸੋ ਆਰਾਮਿਕਾਦਿਕੋ ‘‘ਇਮਂ ਛਡ੍ਡੇਹੀ’’ਤਿ ਸਂਸਿਯੋ ਵਤ੍ਤਬ੍ਬੋਤਿ ਅਤ੍ਥੋ. ਏਵਮ੍ਪਿ ਨੋ ਚੇ ਲਭੇਯ੍ਯ, ਸਮ੍ਮਤੋ ਭਿਕ੍ਖੁ ਛਡ੍ਡੇਯ੍ਯਾਤਿ ਅਤ੍ਥੋ.

੩੯੨. ਪਟਿਗ੍ਗਹਿਤਰੂਪਿਯਞ੍ਚ ਪਰਿਵਤ੍ਤਿਤਰੂਪਿਯਞ੍ਚ ਸਨ੍ਧਾਯ ‘‘ਏਤਾਨੀ’’ਤਿ ਵੁਤ੍ਤਂ. ਦੁਤਿਯਪਤ੍ਤੋ ਨਾਮ ‘‘ਊਨਪਞ੍ਚਬਨ੍ਧਨੇਨ ਪਤ੍ਤੇਨ ਅਞ੍ਞਂ ਨਵਂ ਪਤ੍ਤਂ ਚੇਤਾਪੇਯ੍ਯ, ਨਿਸ੍ਸਗ੍ਗਿਯ’’ਨ੍ਤਿ (ਪਾਰਾ. ੬੧੨) ਵੁਤ੍ਤਪਤ੍ਤੋ. ਸੋ ਚ ਏਤਾਨਿ ਚ ਸਙ੍ਘੇ ਨਿਸ੍ਸਟ੍ਠੁਂ ਲਬ੍ਭਰੇਤਿ ਸਮ੍ਬਨ੍ਧੋ. ‘‘ਸਙ੍ਘਮਜ੍ਝੇ ਨਿਸ੍ਸਜ੍ਜਿਤਬ੍ਬਂ, ਭਿਕ੍ਖੁਪਰਿਸਾਯ ਨਿਸ੍ਸਜ੍ਜਿਤਬ੍ਬ’’ਨ੍ਤਿ (ਪਾਰਾ. ੫੮੪, ੫੮੯) ਚ ਵੁਤ੍ਤਤ੍ਤਾ ਨ ਗਣਪੁਗ੍ਗਲਾਨਂ ਨਿਸ੍ਸਜ੍ਜਿਤੁਂ ਵਟ੍ਟਤਿ. ਸੇਸਾਨਿ ਪਨ ਤੀਣਿ ਚੀਵਰਾਦਿਵਤ੍ਥੂਨਿ ‘‘ਨਿਸ੍ਸਜ੍ਜਿਤਬ੍ਬਂ ਸਙ੍ਘਸ੍ਸ ਵਾ ਗਣਸ੍ਸ ਵਾ ਪੁਗ੍ਗਲਸ੍ਸ ਵਾ’’ਤਿ ਵੁਤ੍ਤਤ੍ਤਾ (ਪਾਰਾ. ੪੬੩) ਸਙ੍ਘਾਦੀਨਂ ਨਿਸ੍ਸਜ੍ਜਿਤੁਂ ਵਟ੍ਟਤਿ. ਭਾਸਨ੍ਤਰੇਨਪੀਤਿ ਪਾਲ਼ਿਯਾ ਵਤ੍ਤੁਂ ਅਸਕ੍ਕੋਨ੍ਤੇਨ ਦਮਿਲ਼ਭਾਸਾਦੀਸੁ ਅਞ੍ਞਤਰਾਯਪਿ ਨਿਸ੍ਸਜ੍ਜਿਤੁਂ ਵਟ੍ਟਤੀਤਿ ਅਤ੍ਥੋ.

੩੯੩. (ਕ-ਗ) ਨਾਨਪ੍ਪਕਾਰਕਂ ਨਾਮ ‘‘ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਾ, ‘‘ਅਨ੍ਤਮਸੋ ਚੁਣ੍ਣਪਿਣ੍ਡੋਪਿ ਦਨ੍ਤਕਟ੍ਠਮ੍ਪਿ ਦਸਿਕਸੁਤ੍ਤਮ੍ਪੀ’’ਤਿ (ਪਾਰਾ. ੫੯੫) ਪਾਲ਼ਿਯਂ ਵੁਤ੍ਤਂ. ਚੇਤਾਪਿਤੋਤਿ (ਪਾਰਾ. ੬੧੩) ਯਾਚਿਤ੍ਵਾ ਗਹਿਤੋ.

੩੯੪. ਸਮ੍ਮਨ੍ਨਿਤ੍ਵਾਨ ਪਤ੍ਤਗਾਹਕਂ ਸਙ੍ਘਸ੍ਸ ਪਤ੍ਤਨ੍ਤਨ੍ਤਿ (ਪਾਰਾ. ੬੧੪; ਕਙ੍ਖਾ. ਅਟ੍ਠ. ਊਨਪਞ੍ਚਬਦ੍ਧਨਸਿਕ੍ਖਾਪਦਵਣ੍ਣਨਾ) ਯ ਅਨ੍ਤਿਮਂ ਪਤ੍ਤਂ, ਤਂ ਤਸ੍ਸ ਦਾਪਯੇਤਿ ਅਤ੍ਥੋ.

੩੯੫. (ਖ) ਪਰਿਦਹਿਤਂ ਨਿਸ੍ਸਗ੍ਗਿਯਨ੍ਤਿ ਏਤ੍ਥ (ਪਾਰਾ. ੬੨੬-੬੨੮; ਪਾਰਾ. ਅਟ੍ਠ. ੨.੬੨੮) ਪਨ ਠਤ੍ਵਾ ਵਸ੍ਸਿਕਸਾਟਿਕਾਯ ਪਰਿਯੇਸਨਕ੍ਖੇਤ੍ਤਂ ਕਰਣਕ੍ਖੇਤ੍ਤਂ ਨਿਵਾਸਨਕ੍ਖੇਤ੍ਤਂ ਅਧਿਟ੍ਠਾਨਕ੍ਖੇਤ੍ਤਨ੍ਤਿ ਚਤੁਬ੍ਬਿਧਂ ਖੇਤ੍ਤਞ੍ਚ ਕੁਚ੍ਛਿਸਮਯੋ ਪਿਟ੍ਠਿਸਮਯੋਤਿ ਦੁਵਿਧੋ ਸਮਯੋ ਚ ਵੇਦਿਤਬ੍ਬੋ. ਕਥਂ? ਗਿਮ੍ਹਾਨਮਾਸੇਸੁ ਪਚ੍ਛਿਮਮਾਸਸ੍ਸ ਪੁਰਿਮੋ ਅਡ੍ਢਮਾਸੋ ਪਰਿਯੇਸਨਕ੍ਖੇਤ੍ਤਂ, ਪਚ੍ਛਿਮੋ ਕਰਣਕ੍ਖੇਤ੍ਤਞ੍ਚ ਨਿਵਾਸਨਕ੍ਖੇਤ੍ਤਞ੍ਚ, ਪਰਿਯੇਸਿਤੁਮ੍ਪਿ ਵਟ੍ਟਤਿ, ਅਧਿਟ੍ਠਾਤੁਂ ਪਨ ਨ ਵਟ੍ਟਤਿ. ਵਸ੍ਸਿਕਾ ਪਨ ਚਤ੍ਤਾਰੋ ਮਾਸਾ ਪਰਿਯੇਸਨਾਦੀਨਂ ਚਤੁਨ੍ਨਮ੍ਪਿ ਖੇਤ੍ਤਂ. ਏਤੇ ਏਵ ਪਞ੍ਚ ਮਾਸਾ ਕੁਚ੍ਛਿਸਮਯੋ ਨਾਮ. ਇਤਰੇ ਸਤ੍ਤ ਮਾਸਾ ਪਿਟ੍ਠਿਸਮਯੋ, ਤਤ੍ਥ ਸਤੁਪ੍ਪਾਦਕਰਣਂ ਨ ਵਟ੍ਟਤਿ.

(ਗ) ਅਚ੍ਛਿਨ੍ਨਨ੍ਤਿ ਏਤ੍ਥ ‘‘ਯੋ ਪਨ ਮਮ ਪਤ੍ਤਚੀਵਰਾਦੀਨਿ ਵਹਨ੍ਤੋ ਮਯਾ ਸਦ੍ਧਿਂ ਚਰਿਸ੍ਸਤੀ’’ਤਿ ਸਞ੍ਞਾਯ ਚੀਵਰਂ ਦਤ੍ਵਾ ਪੁਨ ਸਕਸਞ੍ਞਾਯ ਏਵ ਅਤ੍ਤਨੋ ਵੇਯ੍ਯਾਵਚ੍ਚਂ ਅਕਰੋਨ੍ਤਂ ਦਿਸ੍ਵਾ ਅਚ੍ਛਿਨ੍ਦਤਿ, ਸੋ ਇਮਂ ਆਪਤ੍ਤਿਂ ਆਪਜ੍ਜਤਿ. ਕੇਵਲਂ ਪਰਿਚ੍ਚਜਿਤ੍ਵਾ ਦਿਨ੍ਨਂ ਗਹੇਤੁਮੇਵ ਨ ਲਭਤਿ.

(ਘ) ਸੁਤ੍ਤਂ ਵਿਞ੍ਞਾਪੇਤ੍ਵਾਤਿ ਏਤ੍ਥ ਚੀਵਰਕਾਰਸਮਯਾਦੀਸੁ ਚੀਵਰਸਿਬ੍ਬਨਾਦੀਨਮਤ੍ਥਾਯ ਸੁਤ੍ਤਂ ਵਿਞ੍ਞਾਪੇਤ੍ਵਾਤਿ ਅਤ੍ਥੋ. ਅਞ੍ਞਥਾ ਸੁਤ੍ਤਂ ਵਿਞ੍ਞਾਪੇਤੁਮੇਵ ਨ ਵਟ੍ਟਤਿ. ਵਿਞ੍ਞਤ੍ਤਿਯਾ ਏਵ ਲਦ੍ਧਤਨ੍ਤਵਾਯੇਹੀਤਿ ਅਤ੍ਥੋ. ਸੁਤ੍ਤਤਨ੍ਤਵਾਯਾਨਂ ਅਕਪ੍ਪਿਯਭਾਵੇ ਸਤਿ ਦੀਘਤੋ ਵਿਦਤ੍ਥਿਮਤ੍ਤੇ, ਤਿਰਿਯਨ੍ਤਤੋ ਹਤ੍ਥਮਤ੍ਤੇ ਵੀਤੇ ਨਿਸ੍ਸਗ੍ਗਿਯਂ, ਏਕਤੋ ਅਕਪ੍ਪਿਯਪਕ੍ਖੇ ਦੁਕ੍ਕਟਂ.

(ਙ) ਵਿਕਪ੍ਪਂ ਆਪਨ੍ਨਨ੍ਤਿ (ਪਾਰਾ. ੬੪੩) ‘‘ਇਦਂ ਖੋ, ਆਵੁਸੋ, ਚੀਵਰਂ ਮਂ ਉਦ੍ਦਿਸ੍ਸ ਵਿਯ੍ਯਤਿ, ਆਯਤਞ੍ਚ ਕਰੋਥ ਵਿਤ੍ਥਤਞ੍ਚਾ’’ਤਿਆਦਿਨਾ ਅਧਿਕਂ ਵਿਧਾਨਂ ਆਪਨ੍ਨਨ੍ਤਿ ਅਤ੍ਥੋ.

(ਚ) ਅਚ੍ਚੇਕਚੀਵਰਂ (ਪਾਰਾ. ੬੪੯-੬੫੦) ਨਾਮ ਸੇਨਾਯ ਗਨ੍ਤੁਕਾਮਾਦੀਹਿ ਦਿਨ੍ਨਂ.

(ਛ) ਅਤਿਰੇਕਛਾਰਤ੍ਤਨ੍ਤਿ (ਪਾਰਾ. ੬੫੪-੬੫੫) ਛਦਿਵਸਤੋ ਅਤਿਰੇਕਂ. ‘‘ਅਤ੍ਥਤਕਥਿਨਾਨਂ ਵੋ, ਭਿਕ੍ਖਵੇ, ਪਞ੍ਚ ਕਪ੍ਪਿਸ੍ਸਨ੍ਤਿ, ਅਨਾਮਨ੍ਤਚਾਰੋ ਅਸਮਾਦਾਨਚਾਰੋ ਗਣਭੋਜਨਂ ਯਾਵਦਤ੍ਥਚੀਵਰਂ ਯੋ ਚ ਤਤ੍ਥ ਚੀਵਰੁਪ੍ਪਾਦੋ, ਸੋ ਨੇਸਂ ਭਵਿਸ੍ਸਤੀ’’ਤਿ (ਮਹਾਵ. ੩੦੬) ਵੁਤ੍ਤਆਨਿਸਂਸੇਸੁ ਚੀਵਰਮਾਸੇ ਅਸਮਾਦਾਨਚਾਰਂ ਠਪੇਤ੍ਵਾ ਸੇਸਾਨਿਸਂਸਾ ਲਬ੍ਭਨ੍ਤਿ. ਯਦਿ ਅਸਮਾਦਾਨਚਾਰੋ ਲਬ੍ਭੇਯ੍ਯ, ਪਾਵੇਯ੍ਯਕਾ ਭਿਕ੍ਖੂ ਵਸ੍ਸਂਵੁਤ੍ਥਾ ਓਕਪੁਣ੍ਣੇਹਿ ਚੀਵਰੇਹਿ ਨ ਭਗਵਨ੍ਤਂ ਉਪਸਙ੍ਕਮੇਯ੍ਯੁਂ, ਯਸ੍ਮਾ ਤਂ ਨ ਲਭਨ੍ਤਿ, ਤਸ੍ਮਾ ਚੀਵਰਮਾਸੇਪਿ ਤਿਚੀਵਰਂ ਆਦਾਯ ਏਵ ਭਗਵਨ੍ਤਂ ਉਪਸਙ੍ਕਮਿਂਸੁ. ਤਸ੍ਮਾ ਵੇਦਿਤਬ੍ਬਂ ਅਸਮਾਦਾਨਚਾਰਪਰਿਹਾਰਂ ਅਤ੍ਥਤਕਥਿਨਾ ਏਵ ਲਭਨ੍ਤਿ, ਨ ਇਤਰੇਤਿ ਵਦਨ੍ਤਿ.

੩੯੭. (ਖ) ‘‘ਅਹਂ, ਭਨ੍ਤੇ, ਏਕਂ ਪਾਟਿਦੇਸਨੀਯਾਪਤ੍ਤਿਂ, ਦ੍ਵੇ, ਸਮ੍ਬਹੁਲਾ ਪਾਟਿਦੇਸਨੀਯਾਪਤ੍ਤਿਯੋ ਆਪਜ੍ਜਿ’’ਨ੍ਤਿ ਇਮਂ ਪਨ ਯੇਸੁ ਪੋਤ੍ਥਕੇਸੁ ਲਿਖਿਤਂ, ਤਂ ਅਭਯਗਿਰਿਵਾਸੀਨਂ ਖੁਦ੍ਦਸਿਕ੍ਖਾਵਸੇਨ ਦਸ੍ਸਿਤਂ ਕਿਰ. ਤਤ੍ਥ ‘‘ਅਹਂ, ਆਯਸ੍ਮਾ, ਸਮ੍ਬਹੁਲਾ ਪਾਟਿਦੇਸਨੀਯਾ ਆਪਤ੍ਤਿਯੋ ਆਪਨ੍ਨੋ, ਤਾਯੋ ਪਟਿਦੇਸੇਮਿ. ਅਹਂ, ਆਯਸ੍ਮਾ, ਏਕਂ ਪਾਟਿਦੇਸਨੀਯਂ ਆਪਤ੍ਤਿਂ ਆਪਨ੍ਨੋ, ਤਂ ਪਟਿਦੇਸੇਮੀ’’ਤਿ ਹਿ ਵੁਤ੍ਤਂ. ਅਮ੍ਹਾਕਂ ਪਨ ਏਵਂ ਦੇਸਨਾਵਿਧਾਨਂ ਨਤ੍ਥਿ. ‘‘ਗਾਰਯ੍ਹਂ, ਆਵੁਸੋ, ਧਮ੍ਮਂ ਆਪਜ੍ਜਿਂ ਅਸਪ੍ਪਾਯਂ ਪਾਟਿਦੇਸਨੀਯਂ, ਤਂ ਪਟਿਦੇਸੇਮੀ’’ਤਿ (ਪਾਚਿ. ੫੫੩) ਵੁਤ੍ਤਂ. ਸਮਨ੍ਤਪਾਸਾਦਿਕਾਯਂ (ਪਾਚਿ. ੫੫੩) ‘‘ਗਾਰਯ੍ਹਂ ਆਵੁਸੋ’ਤਿਆਦਿ ਪਟਿਦੇਸੇਤਬ੍ਬਾਕਾਰਦਸ੍ਸਨ’’ਨ੍ਤਿ ਵੁਤ੍ਤਂ. ਕਙ੍ਖਾਵਿਤਰਣਿਯਮ੍ਪਿ (ਕਙ੍ਖਾ. ਅਟ੍ਠ. ਪਠਮਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ) ‘‘ਤਸ੍ਸਾ ਦੇਸੇਤਬ੍ਬਾਕਾਰੋ ਗਾਰਯ੍ਹਂ ਆਵੁਸੋ’ਤਿਆਦਿਨਾ ਨਯੇਨ ਸਿਕ੍ਖਾਪਦੇ ਦਸ੍ਸਿਤੋਯੇਵਾ’’ਤਿ ਵੁਤ੍ਤਤ੍ਤਾ ਪਾਠੇ ਆਗਤਨਯੇਨੇਵ ਦੇਸਨਾਵਿਧਾਨਂ ਵੇਦਿਤਬ੍ਬਂ. ਸਚੇ ਦ੍ਵੇ ਹੋਨ੍ਤਿ, ‘‘ਗਾਰਯ੍ਹੇ, ਆਵੁਸੋ, ਦ੍ਵੇ ਧਮ੍ਮੇ ਆਪਜ੍ਜਿਂ ਅਸਪ੍ਪਾਯੇ ਪਾਟਿਦੇਸਨੀਯੇ, ਤੇ ਪਟਿਦੇਸੇਮੀ’’ਤਿ, ‘‘ਪਸ੍ਸਥ, ਭਨ੍ਤੇ, ਤੇ ਧਮ੍ਮੇ’’ਤਿ ਚ ‘‘ਗਾਰਯ੍ਹੇ, ਆਵੁਸੋ, ਸਮ੍ਬਹੁਲੇ ਧਮ੍ਮੇ ਆਪਜ੍ਜਿਂ ਅਸਪ੍ਪਾਯੇ ਪਾਟਿਦੇਸਨੀਯੇ, ਤੇ ਪਟਿਦੇਸੇਮੀ’’ਤਿ, ‘‘ਪਸ੍ਸਥ, ਭਨ੍ਤੇ, ਤੇ ਧਮ੍ਮੇ’’ਤਿ ਚ ਏਵਂ ਯਥਾਨੁਰੂਪਂ ਦੇਸਨਾਵਿਧਾਨਂ ਵੇਦਿਤਬ੍ਬਂ. ਸੇਸਂ ਵੁਤ੍ਤਪ੍ਪਕਾਰਮੇਵਾਤਿ.

੩੯੮. ਅਦੇਸਨਾਗਾਮਿਨਿਯਨ੍ਤਿ (ਪਰਿ. ੪੨੪ ਆਦਯੋ; ਪਰਿ. ਅਟ੍ਠ. ੪੨੫) ਪਾਰਾਜਿਕਞ੍ਚ ਸਙ੍ਘਾਦਿਸੇਸਞ੍ਚ ਨ ਦੇਸਯੇਤਿ ਅਤ੍ਥੋ. ਅਨਾਪਤ੍ਤਿਞ੍ਚਾਤਿ ਅਨਾਪਤ੍ਤਿਂ ਏਵ ‘‘ਆਪਤ੍ਤਿ’’ਨ੍ਤਿ ਨ ਦੇਸਯੇ. ਲਹੁਕਾਪਤ੍ਤਿਮ੍ਪਿ ਪੁਬ੍ਬੇ ਦੇਸਿਤਂ ਪੁਨ ਨ ਦੇਸਯੇਤਿ ਸਮ੍ਬਨ੍ਧੋ, ਨਾਨਾਸਂਵਾਸਨਿਸ੍ਸੀਮਟ੍ਠਿਤਾਨਂ ਸਨ੍ਤਿਕੇ ਨ ਦੇਸਯੇਤਿ ਅਤ੍ਥੋ. ਚਤੁਪਞ੍ਚਹੀਤਿ ਏਤ੍ਥ ਸਮਾਨਵਸ੍ਸਿਕਪਵਾਰਣਾਯਂ ਵਿਯ ਚਤੂਹਿ ਵਾ ਪਞ੍ਚਹਿ ਵਾ ਏਕਤੋ ਹੁਤ੍ਵਾ ਏਕਸ੍ਸ ਸਨ੍ਤਿਕੇ ਨ ਦੇਸਯੇਤਿ ਅਤ੍ਥੋ. ਦ੍ਵਿਨ੍ਨਂ ਵਾ ਤਿਣ੍ਣਂ ਵਾ ਵਟ੍ਟਤਿ. ਕਥਂ ਦੇਸੇਤਬ੍ਬਨ੍ਤਿ ਚੇ? ਏਕਸ੍ਸ ਸਨ੍ਤਿਕੇ ਤੀਹਿਪਿ ਏਕਤੋ ਨਿਸੀਦਿਤ੍ਵਾ ‘‘ਅਹਂ, ਭਨ੍ਤੇ, ਏਕਂ ਪਾਚਿਤ੍ਤਿਯਾਪਤ੍ਤਿਂ ਆਪਜ੍ਜਿਂ, ਤਂ ਤੁਮ੍ਹਮੂਲੇ ਪਟਿਦੇਸੇਮੀ’’ਤਿ ਏਵਂ ਅਤ੍ਤਨਾ ਆਪਨ੍ਨਆਪਤ੍ਤਿਵਸੇਨ ਵੁਤ੍ਤੇ ਤੇਨ ‘‘ਪਸ੍ਸਸਿ, ਆਵੁਸੋ, ਤਂ ਆਪਤ੍ਤਿ’’ਨ੍ਤਿ ਏਵਂ ਤਿਕ੍ਖਤ੍ਤੁਂ ਵੁਤ੍ਤੇ ‘‘ਆਮ, ਭਨ੍ਤੇ, ਪਸ੍ਸਾਮੀ’’ਤਿ ਵਾ ‘‘ਆਮਾਵੁਸੋ ਪਸ੍ਸਾਮੀ’’ਤਿ ਵਾ ਵੁਤ੍ਤੇ ਪੁਨ ਤੇਨ ‘‘ਆਯਤਿਂ ਸਂਵਰੇਯ੍ਯਾਥਾ’’ਤਿ ਵਾ ‘‘ਸਂਵਰੇਯ੍ਯਾਸੀ’’ਤਿ ਵਾ ਵੁਤ੍ਤੇ ‘‘ਸਾਧੁ ਸੁਟ੍ਠੁ ਸਂਵਰਿਸ੍ਸਾਮੀ’’ਤਿ ਵਤ੍ਤਬ੍ਬਂ, ਏਵਂ ਦੇਸੇਤਬ੍ਬਂ. ਮਨਸਾਤਿ ਵਚੀਭੇਦਂ ਅਕਤ੍ਵਾ ਕੇਵਲਂ ਚਿਤ੍ਤੇਨੇਵ ਨ ਦੇਸਯੇਤਿ ਅਤ੍ਥੋ. ਅਪਕਤਤ੍ਤਾਨਨ੍ਤਿ ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨਸ੍ਸ ਵਾ ਉਕ੍ਖਿਤ੍ਤਕਸ੍ਸ ਵਾ ਉਪੋਸਥੋ ਪਵਾਰਣਾ ਵਾ ਠਪਿਤਾ ਹੋਨ੍ਤਿ, ਤਸ੍ਸ ਸਨ੍ਤਿਕੇ ਨ ਦੇਸਯੇਤਿ ਅਤ੍ਥੋ. ਨਾਨੇਕਾਤਿ ਨਾਨਾਪਤ੍ਤਿਯੋ ‘‘ਏਕਾ’’ਤਿ ਵਤ੍ਵਾ ਨ ਦੇਸਯੇਤਿ ਅਤ੍ਥੋ. ਏਕਾ ਪਨ ‘‘ਸਮ੍ਬਹੁਲਾ’’ਤਿ ਦੇਸਿਤਾ ਹੋਤੀਤਿ. ਦੇਸਨਾਵਿਨਿਚ੍ਛਯੋ.

ਦੇਸਨਾਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.