੪੦. ਅਵੇਭਙ੍ਗਿਯਨਿਦ੍ਦੇਸਵਣ੍ਣਨਾ

੩੨੨-੪. ਆਰਾਮਾਰਾਮਵਤ੍ਥੂਨੀਤਿ ਏਤ੍ਥ (ਚੂਲ਼ਵ. ੩੨੧; ਚੂਲ਼ਵ. ਅਟ੍ਠ. ੩੨੧) ਆਰਾਮੋ ਨਾਮ ਪੁਪ੍ਫਾਰਾਮੋ ਵਾ ਫਲਾਰਾਮੋ ਵਾ. ਮਞ੍ਚੋ ਪੀਠਂ ਭਿਸਿ ਬਿਬ੍ਬੋਹਨਾਦਿਸਯਨਾਸਨਂ. ਲੋਹਕੁਮ੍ਭੀਆਦਯੋ ਕਾਲ਼ਲੋਹਤਮ੍ਬਲੋਹਾਦਿਮਯਾ. ਭਾਣਕੋ ਉਦਕਚਾਟਿ. ਪਞ੍ਚੇਤੇ ਅਵਿਭਾਜਿਯਾਤਿ ਭਾਜੇਤ੍ਵਾ ਨ ਗਹੇਤਬ੍ਬਾ, ਗਹਿਤਾਪਿ ਸਙ੍ਘਸਨ੍ਤਕਾ ਏਵਾਤਿ ਅਤ੍ਥੋ. ਏਤ੍ਥ ਪਨ ਆਰਾਮੋ ਆਰਾਮਵਤ੍ਥੂਤਿ ਪਠਮਂ, ਵਿਹਾਰੋ ਵਿਹਾਰਵਤ੍ਥੂਤਿ ਦੁਤਿਯਂ, ਮਞ੍ਚੋ ਪੀਠਂ ਭਿਸਿ ਬਿਬ੍ਬੋਹਨਨ੍ਤਿ ਤਤਿਯਂ, ਲੋਹਕੁਮ੍ਭੀ…ਪੇ… ਨਿਖਾਦਨਨ੍ਤਿ ਚਤੁਤ੍ਥਂ, ਵਲ੍ਲਿ…ਪੇ… ਦਾਰੁਭਣ੍ਡਂ ਮਤ੍ਤਿਕਭਣ੍ਡਨ੍ਤਿ ਪਞ੍ਚਮਨ੍ਤਿ ਏਵਂ ਇਮਾਨਿ ਰਾਸਿਵਸੇਨ ਪਞ੍ਚ ਹੋਨ੍ਤਿ, ਸਰੁਪਵਸੇਨ ਅਨੇਕਾਨਿ ਹੋਨ੍ਤਿ. ਹੋਨ੍ਤਿ ਚੇਤ੍ਥ –

‘‘ਦ੍ਵਿਸਙ੍ਗਹਾਨਿ ਦ੍ਵੇ ਹੋਨ੍ਤਿ, ਤਤਿਯਂ ਚਤੁਸਙ੍ਗਹਂ;

ਚਤੁਤ੍ਥਂ ਨਵਕੋਟ੍ਠਾਸਂ, ਪਞ੍ਚਮਂ ਅਟ੍ਠਭੇਦਨ’’ਨ੍ਤਿ. (ਚੂਲ਼ਵ. ਅਟ੍ਠ. ੩੨੧);

੩੨੫. ‘‘ਪਞ੍ਚਿਮਾਨਿ, ਭਿਕ੍ਖਵੇ, ਅਵਿਸ੍ਸਜ੍ਜਿਯਾਨਿ ਨ ਵਿਸ੍ਸਜ੍ਜੇਤਬ੍ਬਾਨਿ ਸਙ੍ਘੇਨ ਵਾ ਗਣੇਨ ਵਾ ਪੁਗ੍ਗਲੇਨ ਵਾ, ਵਿਸ੍ਸਜ੍ਜਿਤਾਨਿਪਿ ਅਵਿਸ੍ਸਜ੍ਜਿਤਾਨਿ ਹੋਨ੍ਤਿ. ਯੋ ਵਿਸ੍ਸਜ੍ਜੇਯ੍ਯ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ (ਚੂਲ਼ਵ. ੩੨੧) ਵੁਤ੍ਤਤ੍ਤਾ ‘‘ਭਾਜਿਤਾਪਿ ਅਭਾਜਿਤਾ’’ਤਿ ਵੁਤ੍ਤਂ. ਏਤੇਤਿ ਵੁਤ੍ਤਪ੍ਪਕਾਰਾ ਪਞ੍ਚਪਿ ‘‘ਗਰੁਭਣ੍ਡਾਨੀ’’ਤਿ ਚ ‘‘ਅਵਿਸ੍ਸਜ੍ਜਿਯਾਨੀ’’ਤਿ ਚ ਚ-ਸਦ੍ਦੇਨ ‘‘ਅਵੇਭਙ੍ਗਿਯਾਨੀ’’ਤਿ ਚ ਵੁਚ੍ਚਨ੍ਤੀਤਿ ਅਤ੍ਥੋ.

੩੨੬-੮. ਇਦਾਨਿ ਪੁਰਿਮੇਸੁ ਤੀਸੁ ਰਾਸੀਸੁ ਸਬ੍ਬਸ੍ਸ ਗਰੁਭਣ੍ਡਤ੍ਤਾ ਤੇ ਅਨਾਮਸਿਤ੍ਵਾ ਪਚ੍ਛਿਮੇਸੁ ਦ੍ਵੀਸੁ ਰਾਸੀਸੁ ਏਕਚ੍ਚਸ੍ਸ ਅਗਰੁਭਣ੍ਡਸ੍ਸਾਪਿ ਅਤ੍ਥਿਤਾਯ ਤਂ ਦਸ੍ਸੇਤੁਂ ਆਰਭਨ੍ਤੋਪਿ ਤੇਸੁ ਦ੍ਵੀਸੁ ਬਹੁਵਿਸਯਂ ਪਠਮਂ ਦਸ੍ਸੇਤੁਂ ‘‘ਵਲ੍ਲਿਡ੍ਢਬਾਹੁਮਤ੍ਤਾਪੀ’’ਤਿਆਦਿਮਾਹਾਤਿ ਞਾਤਬ੍ਬਂ. ਤਸ੍ਸਾਯਂ ਸਙ੍ਖੇਪੋ (ਚੂਲ਼ਵ. ਅਟ੍ਠ. ੩੨੧) – ਵਲ੍ਲਿ ਅਡ੍ਢਬਾਹੁਮਤ੍ਤਾਪਿ ਵੇਲ਼ੁ ਅਟ੍ਠਙ੍ਗੁਲਾਯਤੋਪਿ ਤਿਣਾਦਿ ਮੁਟ੍ਠਿਮਤ੍ਤਮ੍ਪੀਤਿ ਏਤ੍ਥ ਆਦਿ-ਸਦ੍ਦੇਨ ਮੁਞ੍ਜਪਬ੍ਬਜਂ ਸਙ੍ਗਣ੍ਹਾਤਿ, ਪਣ੍ਣਂ ਏਕਮ੍ਪਿ ਮਤ੍ਤਿਕਾ ਪਾਕਤਾ ਵਾ ਪਞ੍ਚਵਣ੍ਣਾ ਵਾ ਸੁਧਾਕਙ੍ਗੁਟ੍ਠਆਦਿਕਾਤਿ ਆਦਿ-ਸਦ੍ਦੇਨ ਸਜ੍ਜੁਲਸਜਾਤਿਹਿਙ੍ਗੁਲਕਾਦਿ ਵਾ ਤਾਲਪਕ੍ਕਪ੍ਪਮਾਣਾਪਿ ਯੇਹਿ ਕੇਹਿਚਿ ਸਙ੍ਘਸ੍ਸ ਦਿਨ੍ਨਾ ਵਾ ਸਙ੍ਘਿਕੇ ਤਿਣਖੇਤ੍ਤਾਦਿਮ੍ਹਿ ਜਾਤਾ ਵਾ ਰਕ੍ਖਿਤਗੋਪਿਤਭੂਮਿਭਾਗੇ ਉਪ੍ਪਨ੍ਨਾ ਤਤ੍ਥਜਾਤਕਾ ਵਾ ਸਙ੍ਘਿਕਾ ਰਕ੍ਖਿਤਾ ਏਵ ਅਭਾਜਿਯਾਤਿ ਅਤ੍ਥੋ.

ਇਦਾਨਿ ਯੇ ਚੇਤ੍ਥ ਭਾਜਿਤਬ੍ਬਾ, ਤੇ ਦਸ੍ਸੇਤੁਂ ‘‘ਨਿਟ੍ਠਿਤੇ’’ਤਿਆਦਿਮਾਹ, ਸਙ੍ਘਸ੍ਸ ਵਾ ਚੇਤਿਯਸ੍ਸ ਵਾ ਕਮ੍ਮੇ ਨਿਟ੍ਠਿਤੇ ਭਾਜਿਯਾਤਿ ਅਧਿਪ੍ਪਾਯੋ. ਏਤ੍ਥ ਪਨ ਯਂ ਕਿਞ੍ਚਿ ਵਲ੍ਲਿਵੇਲ਼ੁਤਿਣਪਣ੍ਣਮਤ੍ਤਿਕਾਦਿ ਸਙ੍ਘਸ੍ਸ ਦਿਨ੍ਨਂ ਵਾ ਸਙ੍ਘਿਕੇ ਤਿਣਖੇਤ੍ਤਾਦਿਮ੍ਹਿ ਜਾਤਕਂ ਵਾ ਰਕ੍ਖਿਤਗੋਪਿਤਂ ਗਰੁਭਣ੍ਡਂ, ਤਂ ਸਙ੍ਘਕਮ੍ਮੇ ਚ ਚੇਤਿਯਕਮ੍ਮੇ ਚ ਨਿਟ੍ਠਿਤੇ ਅਵਸੇਸਂ ਪੁਗ੍ਗਲਿਕਕਮ੍ਮੇਪਿ ਦਾਤੁਂ ਵਟ੍ਟਤਿ, ਅਗਰੁਭਣ੍ਡਤ੍ਤਾ ਭਾਜਿਤੁਮ੍ਪਿ ਲਬ੍ਭਤਿ. ਸੇਨਾਸਨਤ੍ਥਾਯ ਰਕ੍ਖਿਤਗੋਪਿਤਮੇਵ ਗਰੁਭਣ੍ਡਂ ਹੋਤਿ, ਨ ਇਤਰਂ. ਸੀਹਲ਼ਦੀਪੇ ਤੁਮੂਲਸੋਮਵਿਹਾਰੇ ਸਙ੍ਘਸ੍ਸ ਪਾਕਵਤ੍ਤਮ੍ਪਿ ਤਾਲਪਣ੍ਣਂ ਵਿਕ੍ਕਿਣਿਤ੍ਵਾ ਕਰੀਯਤਿ. ਕਸ੍ਮਾ? ਨ ਹਿ ਤਤ੍ਥ ਪਣ੍ਣੇਨ ਅਤ੍ਥੋ ਅਤ੍ਥਿ, ਸਬ੍ਬੇਪਿ ਇਟ੍ਠਕਚ੍ਛਨ੍ਨਾ ਪਾਸਾਦਾਦਯੋਤਿ. ਏਵਂ ਅਞ੍ਞਤ੍ਥਾਪਿ ਕਰੀਯਤਿ ਏਵਾਤਿ ਵਦਨ੍ਤਿ.

੩੨੯. ਇਦਾਨਿ ਲੋਹਭਣ੍ਡਾਦੀਸੁ ਏਕਨ੍ਤਭਾਜੇਤਬ੍ਬਭਣ੍ਡਂ ਦਸ੍ਸੇਤੁਂ ‘‘ਪਤ੍ਤਾਦੀ’’ਤਿਆਦਿਮਾਹ. ਏਤ੍ਥ (ਚੂਲ਼ਵ. ਅਟ੍ਠ. ੨੨੧) ਪਨ ਆਦਿ-ਸਦ੍ਦੇਨ ਲੋਹਥਾਲਕਤਮ੍ਬ ਕੁਣ੍ਡਿਕਾ ਕਟਚ੍ਛੁ ਸਰਕ ਅਞ੍ਜਨਿ ਅਞ੍ਜਨਿਸਲਾਕਾਕਣ੍ਣਮਲਹਰਣੀਸੂਚਿਸਣ੍ਡਾਸਕਤ੍ਤਰਯਟ੍ਠਿਆਦੀਨਿ ਗਹਿਤਾਨੇਵ. ਤਥਾਤਿ ਭਾਜਿਯਮੇਵਾਤਿ ਅਤ੍ਥੋ. ਵਿਪ੍ਪਕਤਞ੍ਚ ਅਵਿਪ੍ਪਕਤਞ੍ਚ. ਪਾਦਗਣ੍ਹਕਨ੍ਤਿ ਮਗਧਨਾਲ਼ਿਯਾ ਪਞ੍ਚਨਾਲ਼ਿਯਾ ਗਣ੍ਹਨਂ.

੩੩੧-੨. ਅਨੁਞ੍ਞਾਤਵਾਸਿ ਯਂ ਸਕ੍ਕਾ ਸਿਪਾਟਿਕਾਯ ਪਕ੍ਖਿਪਿਤ੍ਵਾ ਪਰਿਹਰਿਤੁਨ੍ਤਿ ਵੁਤ੍ਤਾ. ਤਚ੍ਛਿਤਾਨਿਟ੍ਠਿਤਨ੍ਤਿ ਵਿਪ੍ਪਕਤਂ. ਯਦਿ ਤਚ੍ਛਿਤਂ, ਗਰੁਭਣ੍ਡਮੇਵ. ਦਨ੍ਤਂ ਪਨ ਅਤਚ੍ਛਿਤਞ੍ਚ ਅਨਿਟ੍ਠਿਤਞ੍ਚ ਭਾਜਿਯਮੇਵ. ਅਨਿਟ੍ਠਿਤਂ ਮਞ੍ਚਪਾਦਾਦਿਕਂ ਗਰੁਭਣ੍ਡਂ. ਇਦਾਨਿ ਮਤ੍ਤਿਕਭਣ੍ਡਂ ਦਸ੍ਸੇਤੁਂ ‘‘ਭਿਕ੍ਖੂਪਕਰਣੇ’’ਤਿਆਦਿਮਾਹ. ਪਤ੍ਤਥਾਲਕਕੁਣ੍ਡਿਕਾਦਿਭਿਕ੍ਖੂਪਕਰਣੇ ਚ. ਪਾਦਘਟਕੋਤਿ ਪਾਦਗਣ੍ਹਨਕੋ ਘਟਕੋ ਚ ਮਤ੍ਤਿਕਾਮਯੋ ਭਾਜਿਯੋ ਭਾਜੇਤਬ੍ਬੋਤਿ ਅਤ੍ਥੋ. ਸਙ੍ਖਥਾਲਕਮ੍ਪਿ ਭਾਜਿਯਮੇਵ.

੩੩੩-੪. ਮਿਗਚਮ੍ਮਾਦਿਕਂ ਕਪ੍ਪਿਯਚਮ੍ਮਂ ਭਾਜਿਯਂ, ਸੀਹਚਮ੍ਮਾਦਿਕਂ ਅਕਪ੍ਪਿਯਚਮ੍ਮਂ ਗਰੁਭਣ੍ਡਂ. ਤਂ ਪਨ ਭੂਮਤ੍ਥਰਣਂ ਕਾਤੁਂ ਵਟ੍ਟਤਿ. ਏਲ਼ਚਮ੍ਮਂ ਪਨ ਪਚ੍ਚਤ੍ਥਰਣਗਤਿਕਤ੍ਤਾ ਗਰੁਭਣ੍ਡਂ ਹੋਤਿ. ਇਦਾਨਿ ਇਮਾਨਿ ਪਨ ਪਞ੍ਚ ਚੀਵਰਪਿਣ੍ਡਪਾਤਭੇਸਜ੍ਜਾਨਂ ਅਤ੍ਥਾਯ ਪਰਿਵਤ੍ਤੇਤੁਂ ਨ ਵਟ੍ਟਤਿ, ਗਰੁਭਣ੍ਡੇਨ ਪਨ ਗਰੁਭਣ੍ਡਞ੍ਚ ਥਾਵਰਞ੍ਚ ਥਾਵਰੇਨ ਥਾਵਰਮੇਵ ਪਰਿਵਤ੍ਤੇਤ੍ਵਾ ਪਰਿਭੁਞ੍ਜਿਤਬ੍ਬਾਨੀਤਿ ਦਸ੍ਸੇਤੁਂ ‘‘ਗਰੁਨਾ’’ਤਿਆਦਿਮਾਹ. ਤਤ੍ਥ (ਚੂਲ਼ਵ. ਅਟ੍ਠ. ੩੨੧) ਗਰੁਨਾਤਿ ਗਰੁਭਣ੍ਡੇਨ ਗਰੁਭਣ੍ਡਞ੍ਚ ਥਾਵਰਞ੍ਚ ਪਰਿਵਤ੍ਤੇਯ੍ਯਾਤਿ ਸਮ੍ਬਨ੍ਧੋ. ਥਾਵਰੇਨ ਚ ਥਾਵਰਮੇਵ ਪਰਿਵਤ੍ਤੇਯ੍ਯ, ਨ ਗਰੁਭਣ੍ਡਨ੍ਤਿ ਅਧਿਪ੍ਪਾਯੋ. ਪਞ੍ਚਸੁ ਕੋਟ੍ਠਾਸੇਸੁ ਪਚ੍ਛਿਮਤ੍ਤਯਂ ਗਰੁਭਣ੍ਡਂ, ਪੁਰਿਮਦ੍ਵਯਂ ਥਾਵਰਨ੍ਤਿ ਵੇਦਿਤਬ੍ਬਂ. ਤਥਾ ਕਤ੍ਵਾ ਚ ਭੁਞ੍ਜਤੂਤਿ ਏਵਂ ਪਰਿਵਤ੍ਤੇਤ੍ਵਾ ਤਤੋ ਆਭਤਂ ਕਪ੍ਪਿਯਭਣ੍ਡਂ ਪਰਿਭੁਞ੍ਜਤੂਤਿ ਅਤ੍ਥੋ. ਕਥਂ ਞਾਯਤੀਤਿ ਚੇ? ਵੁਤ੍ਤਞ੍ਹੇਤਂ ਪਰਿਵਾਰੇ-

‘‘ਅਵਿਸ੍ਸਜ੍ਜਿਯਂ ਅਵੇਭਙ੍ਗਿਯਂ, ਪਞ੍ਚ ਵੁਤ੍ਤਾ ਮਹੇਸਿਨਾ;

ਵਿਸ੍ਸਜ੍ਜੇਨ੍ਤਸ੍ਸ ਪਰਿਭੁਞ੍ਜਨ੍ਤਸ੍ਸ ਅਨਾਪਤ੍ਤਿ,

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ’’ਤਿ. (ਪਰਿ. ੪੭੯);

ਏਤ੍ਥ ਪਨ ਗਰੁਭਣ੍ਡੇਨ ਗਰੁਭਣ੍ਡਞ੍ਚ ਥਾਵਰਞ੍ਚ ਥਾਵਰੇਨ ਥਾਵਰਮੇਵ ਪਰਿਵਤ੍ਤਨਵਿਧਿਂ ਸਨ੍ਧਾਯ ‘‘ਵਿਸ੍ਸਜ੍ਜਨ੍ਤਸ੍ਸ ਅਨਾਪਤ੍ਤੀ’’ਤਿ ਵੁਤ੍ਤਂ. ਪੁਨ ਤਤੋ ਨਿਬ੍ਬਤ੍ਤਞ੍ਚ ਚਤੁਪਚ੍ਚਯਂ ਪਰਿਭੁਞ੍ਜਿਤੁਂ ਲਬ੍ਭਤੀਤਿ ਦੀਪੇਤੁਂ ‘‘ਪਰਿਭੁਞ੍ਜਨ੍ਤਸ੍ਸ ਅਨਾਪਤ੍ਤੀ’’ਤਿ ਵੁਤ੍ਤਂ. ਅਯਂ ਇਮਿਸ੍ਸਾ ਗਾਥਾਯ ਅਧਿਪ੍ਪਾਯੋ. ਸੇਸਨ੍ਤਿ (ਚੂਲ਼ਵ. ਅਟ੍ਠ. ੩੨੧) ਆਰਾਮਾਦਿ ਅਭਾਜਿਯਨ੍ਤਿ ਅਤ੍ਥੋ. ਅਵੇਭਙ੍ਗਿਯਵਿਨਿਚ੍ਛਯੋ.

ਅਵੇਭਙ੍ਗਿਯਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.