੩੯. ਵਸ੍ਸੂਪਨਾਯਿਕਨਿਦ੍ਦੇਸਵਣ੍ਣਨਾ

੩੦੯-੩੧੦. ਇਦਾਨਿ ਵਸ੍ਸੂਪਗਮਨਂ ਦਸ੍ਸੇਤੁਂ ‘‘ਪੁਰਿਮਿਕਾ’’ਤਿਆਦਿਮਾਹ. ਤਤ੍ਥ ਪੁਰਿਮਿਕਾ ਪਚ੍ਛਿਮਿਕਾ (ਮਹਾਵ. ੧੮੪; ਮਹਾਵ. ਅਟ੍ਠ. ੧੮੫) ਚੇਤਿ ਦ੍ਵੇ ਵਸ੍ਸੂਪਨਾਯਿਕਾਤਿ ਅਤ੍ਥੋ. ਆਲਯਪਰਿਗ੍ਗਾਹੋ ਵਾ ਵਚੀਭੇਦੋ ਵਾ ਵਸ੍ਸੂਪਨਾਯਿਕਾਤਿ ਪਾਠਸੇਸੋ. ਇਦਾਨਿ ਵਤ੍ਤਬ੍ਬਂ ਸਨ੍ਧਾਯ ‘‘ਏਦਿਸੋ’’ਤਿ ਵੁਤ੍ਤਂ. ‘‘ਇਧ ਵਸ੍ਸਂ ਵਸਿਸ੍ਸਾਮੀ’’ਤਿ ਚਿਤ੍ਤੁਪ੍ਪਾਦੇਤ੍ਥ ਆਲਯੋ (ਮਹਾਵ. ਅਟ੍ਠ. ੨੦੩). ਆਲਯਪਰਿਗ੍ਗਾਹੋ ਪਨ ਵਜੇ ਵਾ ਸਤ੍ਥੇ ਵਾ ਨਾਵਾਯ ਵਾ ਵਸ੍ਸਂ ਉਪਗਨ੍ਤੁਕਾਮਸ੍ਸ ਤਤ੍ਥ ਸੇਨਾਸਨਂ ਅਲਭਨ੍ਤਸ੍ਸ ਲਬ੍ਭਤਿ, ਸਤ੍ਥਾਦੀਸੁ ਪਨ ਵਸ੍ਸਂ ਉਪਗਨ੍ਤੁਂ ਨ ਵਟ੍ਟਤੀਤਿ ਕਤ੍ਵਾ. ਯਦਿ ਸਤ੍ਥਾਦੀਸੁ ਕਵਾਟਬਨ੍ਧਂ ਸੇਨਾਸਨਂ ਲਬ੍ਭਤਿ, ਤਤ੍ਥ ਉਪਗਨ੍ਤਬ੍ਬਂ. ਉਪਗਚ੍ਛਨ੍ਤੇਨ ਚ ‘‘ਇਧ ਵਸ੍ਸਂ ਉਪੇਮੀ’’ਤਿ ਤਿਕ੍ਖਤ੍ਤੁਂ ਵਤ੍ਤਬ੍ਬਂ. ਵਿਹਾਰੇ ਪਨ ਵਚੀਭੇਦੋ ਵਾ ਕਾਤਬ੍ਬੋ. ਸਚੇ ‘‘ਇਧ ਵਸ੍ਸਂ ਵਸਿਸ੍ਸਾਮੀ’’ਤਿ ਆਲਯੋ ਅਤ੍ਥਿ, ਅਸਤਿਯਾ ਪਨ ਵਸ੍ਸਂ ਨ ਉਪੇਤਿ, ਛਿਨ੍ਨਵਸ੍ਸੋ ਨ ਹੋਤਿ, ਪਵਾਰੇਤੁਞ੍ਚ ਲਭਤਿ ਏਵ.

੩੧੧. ਨੋਪੇਤੁਕਾਮੋ ਆਵਾਸਂ, ਤਦਹੂਤਿਕ੍ਕਮੇਯ੍ਯ ਵਾਤਿ ਪਾਠੇ (ਮਹਾਵ. ੧੮੬) ਅਤਿਕ੍ਕਮਨ੍ਤਸ੍ਸ ਆਵਾਸਂ ਤਦਹੁ ਵਸ੍ਸੂਪਨਾਯਿਕਾਤਿਪਿ ਅਤ੍ਥੋ. ਆਵਾਸਂ ਅਤਿਕ੍ਕਮੇਯ੍ਯ ਵਾਤਿ ਸਮ੍ਬਨ੍ਧੋ. ਜਾਨਂ ਵਾਨੁਪਗਚ੍ਛਤੋਤਿ ਏਤ੍ਥ ਵਿਹਾਰੇ ਨਿਸੀਦਿਤ੍ਵਾਪਿ ਅਨੁਪਗਚ੍ਛਤੋ ਦੁਕ੍ਕਟਾਪਤ੍ਤਿ ਹੋਤੀਤਿ ਅਧਿਪ੍ਪਾਯੋ.

੩੧੨. ਛਿਨ੍ਨਵਸ੍ਸੋ (ਵਜਿਰ. ਟੀ. ਮਹਾਵਗ੍ਗ ੨੦੮) ਵਾ ਕੇਨਚਿ ਅਨ੍ਤਰਾਯੇਨ ਪਠਮਂ ਅਨੁਪਗਤੋ (ਮਹਾਵ. ੧੮੫-੧੮੬) ਵਾ ਦੁਤਿਯਂ ਉਪਗਚ੍ਛੇਯ੍ਯਾਤਿ ਸਮ੍ਬਨ੍ਧੋ. ਤੇਮਾਸਨ੍ਤਿ ਪੁਰਿਮਂ ਵਾ ਤੇਮਾਸਂ ਪਚ੍ਛਿਮਂ ਵਾ ਤੇਮਾਸਂ. ‘‘ਨ ਭਿਕ੍ਖਵੇ ਵਸ੍ਸਂ ਉਪਗਨ੍ਤ੍ਵਾ ਪੁਰਿਮਂ ਵਾ ਪਚ੍ਛਿਮਂ ਵਾ ਤੇਮਾਸਂ ਅਵਸਿਤ੍ਵਾ ਚਾਰਿਕਾ ਪਕ੍ਕਮਿਤਬ੍ਬਾ. ਯੋ ਪਕ੍ਕਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੧੮੫) ਹਿ ਵੁਤ੍ਤਂ.

੩੧੩-੫. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਤ੍ਤਨ੍ਨਂ ਸਤ੍ਤਾਹਕਰਣੀਯੇਨ ਅਪ੍ਪਹਿਤੇਪਿ ਗਨ੍ਤੁਂ, ਪਗੇਵ ਪਹਿਤੇ, ‘ਭਿਕ੍ਖੁਸ੍ਸ ਭਿਕ੍ਖੁਨਿਯਾ ਸਿਕ੍ਖਮਾਨਾਯ ਸਾਮਣੇਰਸ੍ਸ ਸਾਮਣੇਰਿਯਾ ਮਾਤੁਯਾ ਚ ਪਿਤੁਸ੍ਸ ਚ, ਗਿਲਾਨਭਤ੍ਤਂ ਵਾ ਪਰਿਯੇਸਿਸ੍ਸਾਮਿ, ਗਿਲਾਨੁਪਟ੍ਠਾਕਭਤ੍ਤਂ ਵਾ ਪਰਿਯੇਸਿਸ੍ਸਾਮਿ, ਗਿਲਾਨਭੇਸਜ੍ਜਂ ਵਾ ਪਰਿਯੇਸਿਸ੍ਸਾਮਿ, ਪੁਚ੍ਛਿਸ੍ਸਾਮਿ ਵਾ ਉਪਟ੍ਠਹਿਸ੍ਸਾਮਿ ਵਾ’ਤਿ ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ’’ਤਿ (ਮਹਾਵ. ੧੯੮) ਵੁਤ੍ਤਤ੍ਤਾ ‘‘ਮਾਤਾਪਿਤੂਨਮਤ੍ਥਾਯ…ਪੇ… ਉਪਟ੍ਠਿਸ੍ਸ’’ਨ੍ਤਿ ਵੁਤ੍ਤਂ. ਤਤ੍ਥਾਯਂ ਸਙ੍ਖੇਪੋ – ‘‘ਮਾਤਾਦੀਨਂ ਗਿਲਾਨਭਤ੍ਤਂ ਵਾ ਤਦੁਪਟ੍ਠਾਕਭਤ੍ਤਂ ਵਾ ਗਿਲਾਨਾਨਂ ਓਸਧਂ ਵਾ ਏਸਿਸ੍ਸਂ ਪਰਿਯੇਸਿਸ੍ਸ’’ਨ੍ਤਿ ਵਾ ‘‘ਤੇ ਗਿਲਾਨੇ ਗਨ੍ਤ੍ਵਾ ਪੁਚ੍ਛਿਸ੍ਸਾਮੀ’’ਤਿ ਵਾ ‘‘ਉਪਟ੍ਠਿਸ੍ਸ’’ਨ੍ਤਿ ਵਾ ਪਹਿਤੇਪਿ ਅਪ੍ਪਹਿਤੇਪਿ ਸਤ੍ਤਾਹਕਿਚ੍ਚੇਨ ਗਨ੍ਤੁਂ ਲਭਤਿ.

ਇਦਾਨਿ ਸਹਧਮ੍ਮਿਕੇ ਏਵ ਸਨ੍ਧਾਯ ‘‘ਅਨਭਿਰਤ’’ਨ੍ਤਿਆਦਿ ਵੁਤ੍ਤਂ. ‘‘ਵਿਸਭਾਗਰੂਪਂ ਦਿਸ੍ਵਾ ਅਨਭਿਰਤਿ, ਤਤੋ ਵੂਪਕਾਸਿਸ੍ਸਂ, ਤਂ ਗਹੇਤ੍ਵਾ ਅਞ੍ਞਤ੍ਥ ਗਮਿਸ੍ਸ’’ਨ੍ਤਿ ਅਧਿਪ੍ਪਾਯੇਨ ਗਨ੍ਤੁਮ੍ਪਿ ਲਬ੍ਭਤੀਤਿ ਅਤ੍ਥੋ. ਕੁਕ੍ਕੁਚ੍ਚਂ ਵਿਨੋਦਨਞ੍ਚ ਦਿਟ੍ਠਿਂ ਵਿਵੇਚਨਞ੍ਚ ਅਹਂ ਵਾ ਕਰੇਯ੍ਯਂ ਅਞ੍ਞੇਹਿ ਵਾ ਕਾਰੇਯ੍ਯਨ੍ਤਿ ਸਮ੍ਬਨ੍ਧੋ. ਪਰਿਵਾਸਮਾਨਤ੍ਤਆਦੀਹਿ ਵੁਟ੍ਠਾਨਂ ਵਾ ਗਰੁਕਾ. ਆਦਿ-ਸਦ੍ਦੇਨ ਸਚੇ ਸਙ੍ਘੇਨ ਕਮ੍ਮਂ ਕਤਂ ਹੋਤਿ, ਤਸ੍ਸ ਪਟਿਪ੍ਪਸ੍ਸਦ੍ਧਿਯਾ ਅਨੁਸ੍ਸਾਵਨਕਰਣਾਦੀਸੁ ਉਸ੍ਸੁਕ੍ਕਂ ਕਰੇਯ੍ਯਨ੍ਤਿ ਗਨ੍ਤੁਂ ਲਬ੍ਭਤੀਤਿ ਅਤ੍ਥੋ. ਸਤ੍ਤਾਹਕਿਚ੍ਚੇਨਾਤਿ ਸਤ੍ਤਾਹਕਰਣੀਯੇਨ.

੩੧੬. ਧਮ੍ਮਸਵਨਤ੍ਥਂ ਨਿਮਨ੍ਤਿਤੋ ਏਵਂ ਵਜੇਤਿ ਅਤ੍ਥੋ. ਗਰੂ ਨਾਮ ਆਚਰਿਯੁਪਜ੍ਝਾਯਾ, ਤੇਹਿ ਭਣ੍ਡਧੋਵਨਕਿਚ੍ਚੇਨ ਪਹਿਤਸ੍ਸ ਗਨ੍ਤੁਂ ਵਟ੍ਟਤੀਤਿ ਅਤ੍ਥੋ.

੩੧੭. ਨ ਭਣ੍ਡਧੋਵਨ…ਪੇ… ਦਸ੍ਸਨੇਤਿ ਏਤ੍ਥ (ਮਹਾਵ. ਅਟ੍ਠ. ੧੯੯) ਏਤੇਸੁਪਿ ਨ ਵਜੇਤਿ ਸਮ੍ਬਨ੍ਧੋ. ਲਬ੍ਭਨ੍ਤਿ ਏਤ੍ਥ ‘‘ਅਜ੍ਜੇਵ ਆਗਮਿਸ੍ਸ’’ਨ੍ਤਿ ਅਦੂਰਗੋ ਯਦਿ ਨ ਪਾਪੁਣੇਯ੍ਯ, ਲਬ੍ਭਨ੍ਤਿ ਸਮ੍ਬਨ੍ਧੋ. ਕਿਂ ਵੁਤ੍ਤਂ ਹੋਤਿ? ‘‘ਅਜ੍ਜੇਵ ਆਗਮਿਸ੍ਸਾਮੀ’’ਤਿ ਸਾਮਨ੍ਤਵਿਹਾਰਂ ਗਨ੍ਤ੍ਵਾ ਪੁਨ ਆਗਚ੍ਛਨ੍ਤਸ੍ਸ ਅਨ੍ਤਰਾਮਗ੍ਗੇ ਸਚੇ ਅਰੁਣੁਟ੍ਠਾਨਂ ਹੋਤਿ, ਵਸ੍ਸਚ੍ਛੇਦੋਪਿ ਨ ਹੋਤਿ, ਰਤ੍ਤਿਚ੍ਛੇਦੇਨ ਦੁਕ੍ਕਟਮ੍ਪਿ ਨਾਪਜ੍ਜਤੀਤਿ ਵੁਤ੍ਤਂ ਹੋਤਿ.

੩੧੮. ਸੇਸਞਾਤਿਹੀਤਿ ਭਾਤੁਭਗਿਨੀਆਦੀਹਿ. ਭਿਕ੍ਖੁਨਿਸ੍ਸਿਤਕੇਨ ਚ ਪਹਿਤੇਤਿ ਸਮ੍ਬਨ੍ਧੋ. ਨਿਦ੍ਦਿਸਿਤ੍ਵਾਤਿ ‘‘ਆਗਚ੍ਛਨ੍ਤੁ ਭਦਨ੍ਤਾ, ਇਚ੍ਛਾਮਿ ਦਾਨਞ੍ਚ ਦਾਤੁਂ ਧਮ੍ਮਞ੍ਚ ਸੋਤੁਂ ਭਿਕ੍ਖੁਞ੍ਚ ਪਸ੍ਸਿਤੁ’’ਨ੍ਤਿਆਦਿਨਾ ਯਂ ਕਿਞ੍ਚਿ ਨਿਦ੍ਦਿਸਿਤ੍ਵਾਵ ਪੇਸਿਤੇ ਗਨ੍ਤੁਂ ਵਟ੍ਟਤਿ. ਕੇਵਲਂ ‘‘ਆਗਚ੍ਛਨ੍ਤੁ ਭਿਕ੍ਖੂ, ਇਚ੍ਛਾਮਿ ਭਿਕ੍ਖੂਨਂ ਆਗਮਨ’’ਨ੍ਤਿ ਏਵਂ ਅਨਿਦ੍ਦਿਸਿਤ੍ਵਾ ਵੁਤ੍ਤੇ ਗਨ੍ਤੁਂ ਨ ਲਬ੍ਭਤੀਤਿ ਅਤ੍ਥੋ.

੩੧੯. ਅਚ੍ਛਰਾਯੇ ਸਤਤ੍ਤਨੋਤਿ ਦਸਵਿਧੇਸੁ ਅਨ੍ਤਰਾਯੇਸੁ ਏਕਸ੍ਮਿਮ੍ਪਿ ਅਨ੍ਤਰਾਯੇ ਅਤ੍ਤਨੋ ਸਤੀਤਿ ਅਤ੍ਥੋ. ਸਙ੍ਘਸਾਮਗ੍ਗਿਯਾ ਵਾ ਵਸ੍ਸਚ੍ਛੇਦੇ ਅਨਾਪਤ੍ਤੀਤਿ ਅਤ੍ਥੋ. ਵੁਤ੍ਤਞ੍ਹੇਤਂ ‘‘ਇਧ ਪਨ, ਭਿਕ੍ਖਵੇ, ਵਸ੍ਸੂਪਗਤੋ ਭਿਕ੍ਖੁ ਪਸ੍ਸਤਿ ਸਮ੍ਬਹੁਲੇ ਭਿਕ੍ਖੂ ਸਙ੍ਘਭੇਦਾਯ ਪਰਕ੍ਕਮਨ੍ਤੇ. ਤਤ੍ਰ ਚੇ ਭਿਕ੍ਖੁਨੋ ਏਵਂ ਹੋਤਿ, ‘ਗਰੁਕੋ ਖੋ ਸਙ੍ਘਭੇਦੋ ਵੁਤ੍ਤੋ ਭਗਵਤਾ. ਮਾ ਮਯਿ ਸਮ੍ਮੁਖੀਭੂਤੇ ਸਙ੍ਘੋ ਭਿਜ੍ਜੀ’ਤਿ ਪਕ੍ਕਮਿਤਬ੍ਬਂ, ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸਾ’’ਤਿ (ਮਹਾਵ. ੨੦੨). ਏਵਂ ਛਿਨ੍ਨਵਸ੍ਸੋ ਨੋ ਪਵਾਰਯੇਤਿ ਅਤ੍ਥੋ.

੩੨੦. ਰੁਕ੍ਖਸ੍ਸ ਸੁਸਿਰੇਤਿ ਏਤ੍ਥ (ਮਹਾਵ. ੨੦੪; ਮਹਾਵ. ਅਟ੍ਠ. ੨੦੩) ਪਨ ਸੁਦ੍ਧੇ ਰੁਕ੍ਖਸੁਸਿਰੇ ਏਵ ਨ ਵਟ੍ਟਤਿ, ਮਹਨ੍ਤਸ੍ਸ ਪਨ ਸੁਸਿਰਸ੍ਸ ਅਨ੍ਤੋ ਪਦਰਚ੍ਛਦਨਂ ਕੁਟਿਕਂ ਕਤ੍ਵਾ ਪਵਿਸਨਦ੍ਵਾਰਂ ਯੋਜੇਤ੍ਵਾ ਉਪਗਨ੍ਤੁਂ ਵਟ੍ਟਤਿ. ਰੁਕ੍ਖਸ੍ਸ ਵਿਟਪੇਤਿ ਏਤ੍ਥਾਪਿ ਸੁਦ੍ਧਵਿਟਪਮਤ੍ਤੇ ਨ ਵਟ੍ਟਤਿ, ਮਹਾਵਿਟਪੇ ਪਨ ਅਟ੍ਟਕਂ ਬਨ੍ਧਿਤ੍ਵਾ ਵੁਤ੍ਤਨਯੇਨ ਕੁਟਿਕਂ ਕਤ੍ਵਾ ਉਪਗਨ੍ਤੁਂ ਵਟ੍ਟਤਿ. ਛਵਕੁਟਿ ਨਾਮ ਪਾਸਾਣਕੁਟਿਕਨ੍ਤਿ ਵਦਨ੍ਤਿ. ਤੀਸੁ ਪਸ੍ਸੇਸੁ ਪਾਸਾਣੇ ਉਸ੍ਸਾਪੇਤ੍ਵਾ ਉਪਰਿ ਪਾਸਾਣੇਨ ਪਟਿਚ੍ਛਨ੍ਨਾ.

੩੨੧. ਨਾਵਾਦੀਸੁ ਪਨ ਉਪਗਤੋ ਪਵਾਰੇਤੁਞ੍ਚ ਲਬ੍ਭਤੀਤਿ ਸਮ੍ਬਨ੍ਧੋ. ਵਸ੍ਸੂਪਨਾਯਿਕਵਿਨਿਚ੍ਛਯੋ.

ਵਸ੍ਸੂਪਨਾਯਿਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.