੩੬. ਭੇਸਜ੍ਜਨਿਦ੍ਦੇਸਵਣ੍ਣਨਾ

੨੭੪-੫. ਸਹਧਮ੍ਮਿਨਂ ਲਬ੍ਭਂ ਭੇਸਜ੍ਜਕਰਣਨ੍ਤਿ ਸਮ੍ਬਨ੍ਧੋ. ਨ ਕੇਵਲਂ ਪਞ੍ਚਨ੍ਨਂ ਸਹਧਮ੍ਮਿਕਾਨਂਯੇਵ ਭਿਕ੍ਖਾਚਰਿਯਵਿਞ੍ਞਤ੍ਤਿਸਕੇਹਿ ਭੇਸਜ੍ਜਕਰਣਂ ਲਬ੍ਭਤਿ, ਅਥ ਖੋ ਅਪਰੇਸਮ੍ਪਿ ਪਞ੍ਚਨ੍ਨਂ ਲਬ੍ਭਤਿ, ਤੇ ਦਸ੍ਸੇਨ੍ਤੋ ‘‘ਪਿਤੂਨ’’ਨ੍ਤਿਆਦਿਮਾਹ. ਪਿਤੂਨਨ੍ਤਿ ਮਾਤਾਪਿਤੂਨਨ੍ਤਿ ਅਤ੍ਥੋ. ਯੇ ਮਾਤਾਪਿਤਰੋ ਜਗ੍ਗਨ੍ਤਿ ਉਪਟ੍ਠਹਨ੍ਤਿ, ਤੇ ਤਦੁਪਟ੍ਠਾਕਾ ਨਾਮ. ਭਿਕ੍ਖੁਂ ਏਵ ਨਿਸ੍ਸਾਯ ਜੀਵਨ੍ਤੋ ਭਿਕ੍ਖੁਨਿਸ੍ਸਿਤਕੋ ਨਾਮ. ਪਬ੍ਬਜ੍ਜਾਪੇਕ੍ਖੋ ‘‘ਭਣ੍ਡੂ’’ਤਿ ਵੁਚ੍ਚਤਿ.

੨੭੬. ਅਪਰੇਸਮ੍ਪਿ ਦਸਨ੍ਨਂ ਕਾਤੁਂ ਵਟ੍ਟਤਿ, ਤੇ ਦਸ੍ਸੇਤੁਂ ‘‘ਮਹਾਚੂਲ਼ਪਿਤਾ’’ਤਿਆਦਿਮਾਹ. ਏਤ੍ਥ (ਪਾਰਾ. ਅਟ੍ਠ. ੨.੧੮੫-੧੮੭) ਪਨ ਮਹਾਪਿਤਾ ਚੂਲ਼ਪਿਤਾ ਮਹਾਮਾਤਾ ਚੂਲ਼ਮਾਤਾ ਮਹਾਭਾਤਾ ਚੂਲ਼ਭਾਤਾ ਮਹਾਭਗਿਨੀ ਚੂਲ਼ਭਗਿਨੀਤਿ ਇਮੇਹਿ ਅਟ੍ਠਹਿ ਆਦਿ-ਸਦ੍ਦੇਨ ਪਿਤੁਭਗਿਨਿਞ੍ਚ ਮਾਤੁਭਾਤਿਕਞ੍ਚ ਗਹੇਤ੍ਵਾ ਦਸ. ਏਤੇਸਂ ਪਨ ਸਕੇਨ ਭੇਸਜ੍ਜੇਨ ਕਾਤਬ੍ਬਂ. ਅਤ੍ਤਨਿਯੇ ਚ ਅਸਤੀਤਿ ਪਾਠਸੇਸੋ.

੨੭੭. ਨ ਕੇਵਲਞ੍ਚ ਏਤੇਸਂ ਦਸਨ੍ਨਂ, ਇਮੇਹਿ ਸਮ੍ਬਨ੍ਧਾਨਂ ਪੁਤ੍ਤਨਤ੍ਤਾਦੀਨਂ ਯਾਵਸਤ੍ਤਮਾ ਕੁਲਪਰਿਵਟ੍ਟਾ ਕਾਤੁਂ ਵਟ੍ਟਤੀਤਿ ਦਸ੍ਸਨਤ੍ਥਂ ‘‘ਕੁਲਦੂਸਨਾ’’ਤਿਆਦਿਮਾਹ. ਅਞ੍ਞੋਪਿ (ਪਾਰਾ. ਅਟ੍ਠ. ੨.੨੮੫-੨੮੭) ਯੋ ਆਗਨ੍ਤੁਕੋ ਵਾ ਚੋਰੋ ਵਾ ਯੁਦ੍ਧਪਰਾਜਿਤੋ ਵਾ ਇਸ੍ਸਰੋ ਞਾਤਕੇਹਿ ਪਰਿਚ੍ਚਤ੍ਤੋ ਵਾ ਗਮਿਯਮਨੁਸ੍ਸੋ ਵਾ ਗਿਲਾਨੋ ਹੁਤ੍ਵਾ ਵਿਹਾਰਂ ਪਵਿਸਤਿ, ਸਬ੍ਬੇਸਮ੍ਪਿ ਅਪਚ੍ਚਾਸੀਸਨ੍ਤੇਨ ਭੇਸਜ੍ਜਂ ਕਾਤਬ੍ਬਂ.

੨੭੮. ਮਾਤਾ (ਪਾਰਾ. ਅਟ੍ਠ. ੨.੧੮੫-੧੮੭) ਪਿਤਾ ਤਦੁਪਟ੍ਠਾਕੋ ਭਿਕ੍ਖੁਨਿਸ੍ਸਿਤਕੋ ਪਣ੍ਡੁਪਲਾਸੋ ਵੇਯ੍ਯਾਵਚ੍ਚਕਰੋਤਿ ਇਮੇਸਂ ਛਨ੍ਨਂ ਅਨਾਮਟ੍ਠਪਿਣ੍ਡਪਾਤੋ ਅਵਾਰਿਤੋਤਿ ਅਤ੍ਥੋ. ਕਿਞ੍ਚ ਭਿਯ੍ਯੋ – ਦਾਮਰਿਕਚੋਰਸ੍ਸ ਚ ਇਸ੍ਸਰਿਯਸ੍ਸ ਚ ਦਾਤੁਮਵਾਰਿਤੋਤਿ ਅਤ੍ਥੋ.

੨੭੯. ਤੇਸਨ੍ਤਿ (ਪਾਰਾ. ਅਟ੍ਠ. ੨.੧੮੫-੧੮੭) ਗਹਟ੍ਠਾਨਂ. ਸਾਸਨੋਗਧਨ੍ਤਿ ਰਤਨਪਰਿਤ੍ਤਆਟਾਨਾਟਿਯਪਰਿਤ੍ਤਾਦਿਪਰਿਤ੍ਤਂ ਭਣਿਤਬ੍ਬਨ੍ਤਿ ਅਤ੍ਥੋ.

੨੮੦. ‘‘ਆਗਨ੍ਤ੍ਵਾ (ਪਾਰਾ. ਅਟ੍ਠ. ੨.੧੮੫-੧੮੭) ਸੀਲਂ ਦੇਤੁ, ਧਮ੍ਮਞ੍ਚ ਪਰਿਤ੍ਤਞ੍ਚ ਭਾਸਤੂ’’ਤਿ ਕੇਨਚਿ ਪੇਸਿਤੋਤਿ ਸਮ੍ਬਨ੍ਧੋ. ਦਾਤੁਂ ਵਤ੍ਤੁਨ੍ਤਿ ਸੀਲਂ ਦਾਤੁਂ, ਧਮ੍ਮਞ੍ਚ ਪਰਿਤ੍ਤਞ੍ਚ ਵਤ੍ਤੁਂ ਲਬ੍ਭਤੀਤਿ ਅਤ੍ਥੋ. ਭੇਸਜ੍ਜਵਿਨਿਚ੍ਛਯੋ.

ਭੇਸਜ੍ਜਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.