੩੭. ਉਗ੍ਗਹਨਿਦ੍ਦੇਸਵਣ੍ਣਨਾ

੨੮੧. ਦਸਭੇਦਮ੍ਪੀਤਿ ਸਚੇ ਕੇਨਚਿ ਹੇਟ੍ਠਾ ਦਸ੍ਸਿਤਂ ਦਸਵਿਧਂ ਰਤਨਂ ਆਨੇਤ੍ਵਾ ‘‘ਇਦਂ ਸਙ੍ਘਸ੍ਸ ਵਾ ਚੇਤਿਯਸ੍ਸ ਵਾ ਨਵਕਮ੍ਮਸ੍ਸ ਵਾ ਅਞ੍ਞਪੁਗ੍ਗਲਸ੍ਸ ਵਾ ਸੁਤ੍ਤਨ੍ਤਿਕਗਣਸ੍ਸ ਵਾ ਦਮ੍ਮੀ’’ਤਿ ਵੁਤ੍ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਨ੍ਤਸ੍ਸ ਦੁਕ੍ਕਟਂ ਹੋਤੀਤਿ ਅਤ੍ਥੋ.

੨੮੨-੩. ਤੇਸੁ ਦਸਵਿਧੇਸੁ ਰਤਨੇਸੂਤਿ ਅਤ੍ਥੋ. ਦ੍ਵੀਸੂਤਿ ਰਜਤਜਾਤਰੂਪੇਸੁ. ਗਣਸਙ੍ਘਪੁਗ੍ਗਲੇ (ਪਾਰਾ. ਅਟ੍ਠ. ੨.੫੩੮-੫੩੯) ਅਨਾਮਸਿਤ੍ਵਾ ‘‘ਇਦਂ ਹਿਰਞ੍ਞਸੁਵਣ੍ਣਂ ਚੇਤਿਯਸ੍ਸ ਦਮ੍ਮਿ, ਨਵਕਮ੍ਮਸ੍ਸ ਦਮ੍ਮੀ’’ਤਿ ਵੁਤ੍ਤੇ ਨ ਪਟਿਕ੍ਖਿਪੇਤਿ ਅਤ੍ਥੋ. ਕਿਂ ਕਾਤਬ੍ਬਨ੍ਤਿ ਚੇ? ਤਂ ਦਸ੍ਸੇਤੁਂ ‘‘ਵਦੇ’’ਤਿਆਦਿ ਵੁਤ੍ਤਂ. ‘‘ਇਮੇ ਏਵਂ ਵਦਨ੍ਤੀ’’ਤਿ ਕਪ੍ਪਿਯਕਾਰਾਨਂ ਆਚਿਕ੍ਖਿਤਬ੍ਬਨ੍ਤਿ ਅਤ੍ਥੋ.

੨੮੪. ਨ ਕੇਵਲਂ ਹਿਰਞ੍ਞਸੁਵਣ੍ਣਾਦਿਕਮੇਵ, ਅਞ੍ਞਮ੍ਪਿ ਖੇਤ੍ਤਵਤ੍ਥਾਦਿਕਂ ਅਕਪ੍ਪਿਯਂ ਨ ਸਮ੍ਪਟਿਚ੍ਛਿਤਬ੍ਬਨ੍ਤਿ ਤਂ ਦਸ੍ਸੇਤੁਂ ‘‘ਖੇਤ੍ਤਂ ਵਤ੍ਥੁ’’ਨ੍ਤਿਆਦਿਮਾਹ. ਦਾਸਪਸੁਆਦਿਕਂ ਦਾਸਪਸ੍ਵਾਦਿਕਂ. ਸਚੇ ਹਿ ਕੋਚਿ ‘‘ਮਯ੍ਹਂ ਸਸ੍ਸਸਮ੍ਪਾਦਕਂ ਮਹਾਤਲ਼ਾਕਂ ਅਤ੍ਥਿ, ਤਂ ਸਙ੍ਘਸ੍ਸ ਦਮ੍ਮੀ’’ਤਿ ਵਦਤਿ, ਤਞ੍ਚੇ ਸਙ੍ਘੋ ਸਮ੍ਪਟਿਚ੍ਛਤਿ. ਪਟਿਗ੍ਗਹਣੇਪਿ ਪਰਿਭੋਗੇਪਿ ਆਪਤ੍ਤਿਯੇਵ. ਏਵਂ ਸੇਸੇਸੁਪਿ.

ਕਪ੍ਪਿਯੇਨ ਕਮੇਨ ਗਣ੍ਹੇਯ੍ਯਾਤਿ ਸਮ੍ਬਨ੍ਧੋ. ‘‘ਖੇਤ੍ਤਂ ਦਮ੍ਮੀ’’ਤਿ ਵੁਤ੍ਤੇ ‘‘ਨ ਵਟ੍ਟਤੀ’’ਤਿ ਪਟਿਕ੍ਖਿਪਿਤ੍ਵਾ ‘‘ਇਤੋ ਚਤ੍ਤਾਰੋ ਪਚ੍ਚਯੇ ਪਰਿਭੁਞ੍ਜਥਾ’’ਤਿ ਵਾ ‘‘ਚਤੁਪਚ੍ਚਯਪਰਿਭੋਗਤ੍ਥਾਯ ਦਮ੍ਮੀ’’ਤਿ ਵਾ ਵਦਤਿ ਚੇ, ਗਹੇਤਬ੍ਬਂ. ਵਤ੍ਥੁਮ੍ਹਿਪਿ ਏਸੇਵ ਨਯੋ. ‘‘ਤਲ਼ਾਕਂ ਦਮ੍ਮੀ’’ਤਿ ਵੁਤ੍ਤੇ ਪਟਿਕ੍ਖਿਪਿਤ੍ਵਾ ‘‘ਚਤ੍ਤਾਰੋ ਪਚ੍ਚਯੇ ਪਰਿਭੁਞ੍ਜਥਾ’’ਤਿ ਵਾ ‘‘ਸਙ੍ਘੋ ਉਦਕਂ ਪਰਿਭੁਞ੍ਜਿਸ੍ਸਤਿ, ਭਣ੍ਡਕਂ ਧੋਵਿਸ੍ਸਤੀ’’ਤਿ ਵਾ ਆਦਿਨਾ ਨਯੇਨ ਵੁਤ੍ਤੇ ਸਮ੍ਪਟਿਚ੍ਛਿਤਬ੍ਬਂ. ‘‘ਦਾਸਂ ਦਮ੍ਮੀ’’ਤਿ ਵੁਤ੍ਤੇ ਪਟਿਕ੍ਖਿਪਿਤ੍ਵਾ ‘‘ਆਰਾਮਿਕਂ, ਵੇਯ੍ਯਾਵਚ੍ਚਕਰਂ, ਕਪ੍ਪਿਯਕਾਰਕਂ ਦਮ੍ਮੀ’’ਤਿ ਵੁਤ੍ਤੇ ਸਮ੍ਪਟਿਚ੍ਛਿਤਬ੍ਬਂ. ‘‘ਗੋਮਹਿਂਸਅਜੇਲ਼ਕਾਦਯੋ ਦਮ੍ਮੀ’’ਤਿ ਵੁਤ੍ਤੇ ਪਟਿਕ੍ਖਿਪਿਤ੍ਵਾ ‘‘ਪਞ੍ਚਗੋਰਸਪਰਿਭੋਗਤ੍ਥਾਯਾ’’ਤਿ ਵੁਤ੍ਤੇ ਸਮ੍ਪਟਿਚ੍ਛਿਤਬ੍ਬਂ. ਏਦਿਸਂ ਗਹਣਂ ਸਨ੍ਧਾਯ ‘‘ਪਟਿਕ੍ਖਿਪਿਤ੍ਵਾ ਗਣ੍ਹੇਯ੍ਯਾ’’ਤਿ ਵੁਤ੍ਤਂ.

੨੮੫-੬. ਨਵਮਾਤਿਕਕੇਦਾਰਤਲ਼ਾਕਕਿਰਿਯਾ (ਪਾਰਾ. ਅਟ੍ਠ. ੨.੨੩੮-੨੩੯) ਚ ਅਨਵੇ ਪੁਬ੍ਬੇ ਕਪ੍ਪਿਯਵੋਹਾਰੇਨ ਪਟਿਕ੍ਖਿਪਿਤ੍ਵਾ ਗਹਿਤਤਲ਼ਾਕੇ ਮਤ੍ਤਿਕੁਦ੍ਧਰਣਞ੍ਚ ਭਿਨ੍ਨਟ੍ਠਾਨੇ ਪਾਲ਼ਿਬਨ੍ਧੋ ਚ ਦੁਬ੍ਬਲਟ੍ਠਾਨੇ ਆਲ਼ਿਯਾ ਥਿਰਕਾਰੋ ਚ ਅਨਵੇ ਕੇਦਾਰੇ ਪੁਰਾਣਭਾਗਤੋ ਅਤਿਰੇਕਭਾਗਗ੍ਗਹਣਞ੍ਚ ਨਵੇ ਕੇਦਾਰੇ ਅਪਰਿਚ੍ਛਿਨ੍ਨਭਾਗੇ ‘‘ਸਸ੍ਸੇ ਦੇਥ ਏਤ੍ਤਕੇ’’ਤਿ ਕਹਾਪਣੁਟ੍ਠਾਪਨਞ੍ਚਾਪੀਤਿ ਇਦਂ ਸਬ੍ਬਂ ਭਿਕ੍ਖੁਸ੍ਸ ਕਾਤੁਂ ਨ ਵਟ੍ਟਤਿ. ਸਚੇ ਕਰੋਤਿ, ਏਵਮਾਦਿਕਂ ਸਬ੍ਬੇਸਮ੍ਪਿ ਅਕਪ੍ਪਿਯਨ੍ਤਿ ਅਤ੍ਥੋ.

੨੮੭-੯. ਇਦਾਨਿ ਤਂਯੇਵ ਅਕਪ੍ਪਿਯਂ ਦਸ੍ਸੇਤੁਂ ‘‘ਅਵਤ੍ਵਾ’’ਤਿਆਦਿ ਵੁਤ੍ਤਂ. ਤਸ੍ਸਤ੍ਥੋ (ਪਾਰਾ. ਅਟ੍ਠ. ੨.੨੩੮-੨੩੯) – ਯੋ ਪਨ ‘‘ਕਸ, ਵਪ੍ਪ’’ ਇਚ੍ਚਾਦਿਕਂ ਅਵਤ੍ਵਾ ‘‘ਏਤ੍ਤਿਕਾਯ ਭੂਮਿਯਾ ਏਤ੍ਤਕੋ ਭਾਗੋ ਦੇਯ੍ਯੋ’’ਤਿ ਭੂਮਿਂ ਵਾ ਪਤਿਟ੍ਠਾਪੇਤਿ, ‘‘ਏਤ੍ਤਕੇ ਭੂਮਿਭਾਗੇ ਸਸ੍ਸਂ ਕਤਂ, ਏਤ੍ਤਕਂ ਗਣ੍ਹਥਾ’’ਤਿ ਕਸ੍ਸਕੇ ਵਦਨ੍ਤੇ ਪਮਾਣਗਣ੍ਹਨਤ੍ਥਂ ਦਣ੍ਡਰਜ੍ਜੁਭਿ ਮਿਨਤਿ, ਖਲੇ ਠਤ੍ਵਾ ਰਕ੍ਖਣਾਦੀਨਿ ਕਰੋਤਿ, ਤਸ੍ਸੇਵ ਅਕਪ੍ਪਿਯਨ੍ਤਿ.

੨੯੦. ਭਣ੍ਡਾਗਾਰਿਕਸੀਸੇਨ ਪਿਤੁਸਨ੍ਤਕਮ੍ਪਿ ਸਚੇ ਪਟਿਸਾਮੇਯ੍ਯ, ਪਾਚਿਤ੍ਤਿਯਨ੍ਤਿ ਅਤ੍ਥੋ.

੨੯੧-੨. ਪਿਤੂਨਨ੍ਤਿ ਮਾਤਾਪਿਤੂਨਂ. ਸਾਟਕਾਦਿਕਪ੍ਪਿਯਂ ਵਤ੍ਥੁਂ. ‘‘ਪਟਿਸਾਮੇਤ੍ਵਾ ਦੇਹੀ’’ਤਿ ਵੁਤ੍ਤੇਤਿ ਸਮ੍ਬਨ੍ਧੋ. ਪਾਤੇਤ੍ਵਾਨ ਗਤੇ ਯਸ੍ਮਾ ਅਜ੍ਝਾਰਾਮਸਿਕ੍ਖਾਪਦਵਸੇਨ (ਪਾਚਿ. ੫੦੫-੫੦੬) ਪਲਿਬੋਧੋ, ਤਸ੍ਮਾ ਗੋਪਿਤੁਂ ਲਬ੍ਭਨ੍ਤਿ ਅਤ੍ਥੋ.

੨੯੩-੪. ਸਕਂ ਵਾਸਿਆਦਿਪਰਿਕ੍ਖਾਰਨ੍ਤਿ ਅਤ੍ਥੋ. ਇਦਂ ਠਾਨਂ ਗੁਤ੍ਤਨ੍ਤਿ ਦਸ੍ਸੇਤਬ੍ਬਂ. ‘‘ਏਤ੍ਥ ਠਪੇਥਾ’’ਤਿ ਪਨ ਨ ਵਤ੍ਤਬ੍ਬਂ.

੨੯੫. ਏਤ੍ਥ ‘‘ਅਞ੍ਞੋ ਕੋਚਿ ਨ ਪਵਿਸਤਿ, ਭਿਕ੍ਖੂਹਿ ਵਾ ਸਾਮਣੇਰੇਹਿ ਵਾ ਗਹਿਤਂ ਭਵਿਸ੍ਸਤੀ’’ਤਿ ਸਙ੍ਕਨ੍ਤੀਤਿ ਅਤ੍ਥੋ. ਵਤ੍ਥੁਮ੍ਹੀਤਿ ਅਲਙ੍ਕਾਰਾਦਿਵਤ੍ਥੁਮ੍ਹੀਤਿ ਅਤ੍ਥੋ. ਤਾਦਿਸੇਤਿ ਯਾਦਿਸੇ ਵਤ੍ਥੁਮ੍ਹਿ ਨਟ੍ਠੇ ਆਸਙ੍ਕਾ ਹੋਤਿ, ਤਾਦਿਸੇ ਵਤ੍ਥੁਮ੍ਹਿ ਨਟ੍ਠੇਤਿ ਸਮ੍ਬਨ੍ਧੋ.

੨੯੬. ਇਦਾਨਿ ਅਸਙ੍ਕਿਤਬ੍ਬਟ੍ਠਾਨਂ ਦਸ੍ਸੇਤੁਂ ‘‘ਵਿਹਾਰਾਵਸਥਸ੍ਸਨ੍ਤੋ’’ਤਿਆਦਿਮਾਹ. ਵਿਹਾਰਸ੍ਸ ਚ ਘਰਸ੍ਸ ਚਾਤਿ ਅਤ੍ਥੋ. ਰਤਨਨ੍ਤਿ ਦਸਵਿਧਂ ਰਤਨਂ. ਰਤ੍ਨਸਮ੍ਮਤਨ੍ਤਿ ਸਾਟਕਵੇਠਨਾਦਿਕਂ. ਗਹੇਤ੍ਵਾਨਾਤਿ ਕਪ੍ਪਿਯਕਾਰਕੇ ਅਸਤਿ ਅਤ੍ਤਨਾਪਿ ਗਹੇਤ੍ਵਾਨ ਨਿਕ੍ਖਿਪੇਯ੍ਯਾਤਿ ਅਤ੍ਥੋ. ਮਗ੍ਗੇਰਞ੍ਞੇਪੀਤਿ ਮਗ੍ਗੇਪਿ ਅਰਞ੍ਞੇਪਿ. ਤਾਦਿਸੇਤਿ ‘‘ਭਿਕ੍ਖੂਹਿ ਗਹਿਤਂ ਭਵਿਸ੍ਸਤੀ’’ਤਿ ਆਸਙ੍ਕਿਤਬ੍ਬਟ੍ਠਾਨੇ. ਪਤਿਰੂਪਂ ਕਰੀਯਤੀਤਿ ਮਗ੍ਗੇ ਵਾ ਅਰਞ੍ਞੇ ਵਾ ਤਾਦਿਸਂ ਭਣ੍ਡਂ ਪਸ੍ਸਿਤ੍ਵਾ ਮਗ੍ਗਾ ਓਕ੍ਕਮ੍ਮ ਨਿਸੀਦਿਤਬ੍ਬਂ, ਸਾਮਿਕੇਸੁ ਆਗਤੇਸੁ ਤਂ ਠਾਨਂ ਆਚਿਕ੍ਖਿਤਬ੍ਬਂ. ਸਚੇ ਸਾਮਿਕੇ ਨ ਪਸ੍ਸਤਿ, ਰਤਨਸਮ੍ਮਤਂ ਪਂਸੁਕੂਲਂ ਗਹੇਤਬ੍ਬਂ. ਰਤਨਞ੍ਚੇ ਹੋਤਿ, ਤੁਣ੍ਹੀਭੂਤੇਨ ਗਨ੍ਤਬ੍ਬਨ੍ਤਿ ਅਤ੍ਥੋ. ਅਯਂ ਮਗ੍ਗਾਰਞ੍ਞਕੇਸੁ ਪਟਿਪਤ੍ਤਿ. ਵਿਹਾਰਾਵਸਥਾਨਂ ਪਨ ਅਨ੍ਤੋ ਤਾਦਿਸਂ ਦਿਸ੍ਵਾ ਭਣ੍ਡਕਂ ਮੁਞ੍ਚਿਤ੍ਵਾ ‘‘ਏਤ੍ਥ ਏਤ੍ਤਕਾ ਕਹਾਪਣਾ’’ਤਿਆਦਿਨਾ ਨਯੇਨ ਰੂਪੇਨ ਵਾ ਲਞ੍ਛਨਾਯ ਵਾ ਪਿਲੋਤਿਕਾਯ ਵਾ ਸਞ੍ਞਾਣਂ ਕਤ੍ਵਾ ਨਿਕ੍ਖਿਪਿਤਬ੍ਬਂ, ਤਤੋ ਪਕ੍ਕਮਨ੍ਤੇਨ ਪਤਿਰੂਪਾਨਂ ਭਿਕ੍ਖੂਨਂ ਆਚਿਕ੍ਖਿਤਬ੍ਬਂ. ਉਗ੍ਗਹਵਿਨਿਚ੍ਛਯੋ.

ਉਗ੍ਗਹਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.