੩੫. ਪਰਿਕ੍ਖਾਰਨਿਦ੍ਦੇਸਵਣ੍ਣਨਾ
੨੫੯-੨੬੦. ਗਿਰਿਕੂਟਨ੍ਤਿ ਮਕਰਦਨ੍ਤਕਂ. ਸਿਬ੍ਬਿਤੁਞ੍ਚ ਛਿਨ੍ਦਿਤੁਞ੍ਚ ਨ ਵਟ੍ਟਤੀਤਿ ਸਬ੍ਬਤ੍ਥ ਯੋਜਨਾ. ਦਣ੍ਡੇਤਿ ਛਤ੍ਤਦਣ੍ਡੇ.
੨੬੧. ਸਿਬ੍ਬਿਤੁਂ ਵਾ ਪਞ੍ਜਰਂ ਵਿਨਨ੍ਧਿਤੁਂ ਵਾ ਥਿਰਤ੍ਥਂ ਛਤ੍ਤੇ ਬਨ੍ਧਿਤੁਂ ਦਣ੍ਡੇ ਲੇਖਾ ਵਟ੍ਟਤੀਤਿ ਸਮ੍ਬਨ੍ਧੋ. ਸਚੇ ਵੁਤ੍ਤਪ੍ਪਕਾਰਂ ਅਕਪ੍ਪਿਯਛਤ੍ਤਂ ਲਭਤਿ, ਘਟਕਮ੍ਪਿ ਵਾਲ਼ਰੂਪਮ੍ਪਿ ਛਿਨ੍ਦਿਤ੍ਵਾ ਧਾਰੇਤਬ੍ਬਂ, ਲੇਖਾਪਿ ਘਂਸੇਤ੍ਵਾ ਅਪਨੇਤਬ੍ਬਾ, ਸੁਤ੍ਤਕੇਨ ਵਾ ਦਣ੍ਡੋ ਵੇਠੇਤਬ੍ਬੋ.
੨੬੨. ਅਨੁਵਾਤਂ ਸਨ੍ਧਾਯ ‘‘ਅਨ੍ਤੇ ਵਾ’’ਤਿ ਵੁਤ੍ਤਂ. ਦ੍ਵਿਨ੍ਨਂ ਪਟ੍ਟਾਨਂ ਸਙ੍ਘਟਿਤਟ੍ਠਾਨਂ ਸਨ੍ਧਾਯ ‘‘ਪਟ੍ਟਮੁਖੇ ਵਾਪੀ’’ਤਿ ਵੁਤ੍ਤਂ. ਵਰਕਸੀਸਾਕਾਰੇਨ ਸਿਬ੍ਬਨਂ ਸਨ੍ਧਾਯ ‘‘ਵੇਣਿਕਾ’’ਤਿ ਚ ਸਤਪਦਾਕਾਰੇਨ ਸਿਬ੍ਬਨਂ ਸਨ੍ਧਾਯ ‘‘ਸਙ੍ਖਲਿਕਾਪਿ ਵਾ’’ਤਿ ਚ ਵੁਤ੍ਤਂ. ਸਤਪਦਿਸਦਿਸਂ ਅਞ੍ਞਂ ਵਾ ਸੂਚਿਵਿਕਾਰਂ ਨ ਕਪ੍ਪਤਿ, ਪਕਤਿਸੂਚਿਕਮ੍ਮਮੇਵ ਵਟ੍ਟਤੀਤਿ ਅਤ੍ਥੋ. ਪਾਲ਼ਿਕਣ੍ਣਿਕਆਦਿਕਂ ਚੀਵਰੇ ਨ ਚ ਕਪ੍ਪਤੀਤਿ ਸਮ੍ਬਨ੍ਧੋ.
੨੬੩-੪. ਚਤੁਕੋਣਾਵ (ਪਾਰਾ. ਅਟ੍ਠ. ੧.੮੫) ਕਪ੍ਪਰੇਤਿ ਸਮ੍ਬਨ੍ਧੋ. ਅਗ੍ਘਿਕਨ੍ਤਿ ਅਗ੍ਘਿਯਂ ਚੇਤਿਯਸਦਿਸਂ. ਏਤ੍ਥਾਤਿ ਗਣ੍ਠਿਪਾਸਕਪਟ੍ਟੇ. ਕੋਣਸੁਤ੍ਤਾ ਚ ਪੀਲ਼ਕਾਤਿ ਨ ਕੇਵਲਂ ਚਤੁਕੋਣਾ ਗਣ੍ਠਿਕਪਾਸਕਪਟ੍ਟਾਵ ਕਪ੍ਪਨ੍ਤਿ, ਅਥ ਖੋ ਦੁਵਿਞ੍ਞੇਯ੍ਯਾ ਕੋਣਸੁਤ੍ਤਪੀਲ਼ਕਾ ਚ ਕਪ੍ਪਰੇਤਿ ਅਤ੍ਥੋ. ਗਨ੍ਧਂ ਤੇਲਂ ਵਾਤਿ ਗਨ੍ਧਂ ਵਾ ਤੇਲਂ ਵਾ.
੨੬੫. ਰਤ੍ਤਨ੍ਤਿ (ਪਾਰਾ. ਅਟ੍ਠ. ੧.੮੫) ਰਜਿਤਂ. ਅਞ੍ਞੇਨ ਵਾਤਿ ਮੁਗ੍ਗਰਾਦਿਨਾ ਵਾ. ਕਤ੍ਵਾਤਿ ਠਪੇਤ੍ਵਾ. ਪਹਾਰੇ ਨ ਚ ਮੁਟ੍ਠਿਨਾਤਿ ਮੁਟ੍ਠਿਨਾ ਨ ਪਹਾਰੇਯ੍ਯਾਤਿ ਅਤ੍ਥੋ.
੨੬੬-੭. ਛਤ੍ਤਵਟ੍ਟਿਯਂ (ਪਾਰਾ. ਅਟ੍ਠ. ੧.੮੫) ਲੇਖਂ ਠਪੇਤ੍ਵਾ ਧਮ੍ਮਕਰਣੇ ਲੇਖਾ ਨ ਵਟ੍ਟਤੀਤਿ ਸਮ੍ਬਨ੍ਧੋ. ਕੁਞ੍ਚਿਕਾਯ ਚ ਪਿਪ੍ਫਲੇ ਚ ਮਣਿਕਾ ਚ ਪੀਲ਼ਕਾ ਚ ਨ ਵਟ੍ਟਤੀਤਿ ਸਮ੍ਬਨ੍ਧੋ. ਤਤ੍ਥ ਮਣਿਕਾਤਿ ਏਕਾ ਏਵ ਵਟ੍ਟਮਣਿਕਾ. ਪੀਲ਼ਕਾ ਮੁਤ੍ਤਰਾਜਿਸਦਿਸਾ ਬਹੂ.
੨੬੮-੯. ਮਾਲਾਦ੍ਯਰਣਿਯਨ੍ਤਿ (ਪਾਰਾ. ਅਟ੍ਠ. ੧.੮੫) ਅਰਣਿਯਂ ਮਾਲਾਦਿ ਵਣ੍ਣਮਟ੍ਠਂ ਨ ਵਟ੍ਟਤੀਤਿ ਸਮ੍ਬਨ੍ਧੋ. ਏਵਂ ਸਬ੍ਬਤ੍ਥ. ਤਿਪੁਸੀਸਮਯੇ ਪਤ੍ਤਮਣ੍ਡਲੇ ਭਿਤ੍ਤਿਕਮ੍ਮਞ੍ਚ ਨ ਵਟ੍ਟਤੀਤਿ ਅਤ੍ਥੋ. ਹਿਤ੍ਵਾਤਿ ਠਪੇਤ੍ਵਾ. ਸੂਚਿਸਣ੍ਡਾਸਕੋ (ਪਾਰਾ. ਅਟ੍ਠ. ੧.੮੫) ਨਾਮ ਸੂਚਿਂ ਡਂਸਾਪੇਤ੍ਵਾ ਘਂਸਿਤੁਂ ਕਤੋ ਦਾਰੁਮਯੋ. ‘‘ਅਨੁਜਾਨਾਮਿ, ਭਿਕ੍ਖਵੇ, ਮਕਰਦਨ੍ਤਕਂ ਛਿਨ੍ਦਿਤੁ’’ਨ੍ਤਿ (ਚੂਲ਼ਵ. ੨੫੩) ਵੁਤ੍ਤਤ੍ਤਾ ਪਤ੍ਤਮਣ੍ਡਲੇ ਮਕਰਦਨ੍ਤਕਂ ਵਟ੍ਟਤਿ, ਅਞ੍ਞਂ ਭਿਤ੍ਤਿਕਮ੍ਮਾਦਿਵਿਕਾਰਮੇਵ ਨ ਵਟ੍ਟਤਿ, ਤਸ੍ਮਾ ਗਿਰਿਕੂਟਂ ਪਤ੍ਤਮਣ੍ਡਲੇ ਠਪੇਤ੍ਵਾ ਅਵਸੇਸੇ ਨ ਵਟ੍ਟਤੀਤਿ ਵੇਦਿਤਬ੍ਬਂ.
੨੭੨. ਸੇਨਾਸਨੇਤਿ (ਪਾਰਾ. ਅਟ੍ਠ. ੧.੮੫) ਪਾਸਾਦਾਦਿਸੇਨਾਸਨੇਤਿ ਅਤ੍ਥੋ.
੨੭੩. ਪੁਮਿਤ੍ਥਿਰੂਪਰਹਿਤਨ੍ਤਿ ਪੁਰਿਸਰੂਪਇਤ੍ਥਿਰੂਪਰਹਿਤਨ੍ਤਿ ਅਤ੍ਥੋ. ਪਰਿਕ੍ਖਾਰਵਿਨਿਚ੍ਛਯੋ.
ਪਰਿਕ੍ਖਾਰਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.