੨੭. ਅਸਂਵਾਸਿਕਨਿਦ੍ਦੇਸਵਣ੍ਣਨਾ

੧੯੮. ਉਕ੍ਖਿਤ੍ਤੋਤਿ ਆਪਤ੍ਤਿਯਾ ਅਦਸ੍ਸਨੇ, ਅਪ੍ਪਟਿਕਮ੍ਮੇ, ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਵਾ ਉਕ੍ਖਿਤ੍ਤਕੋਤਿ ਤਿਵਿਧੋਪਿ ਇਧ ਉਕ੍ਖਿਤ੍ਤੋ ਗਹਿਤੋ. ਅਨੁਪਸਮ੍ਪਨ੍ਨੋਤਿ ਇਮਿਨਾ ਸਿਕ੍ਖਮਾਨਸਾਮਣੇਰਸਾਮਣੇਰੀਸਿਕ੍ਖਾਪਚ੍ਚਕ੍ਖਾਤਕਾ ਗਹਿਤਾਤਿ ਵੇਦਿਤਬ੍ਬਾ. ਛਿਨ੍ਨਮੂਲਕੋ ਨਾਮ ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨਕੋ. ਨਾਨਾਸਂਵਾਸੋਤਿ ਲਦ੍ਧਿਨਾਨਾਸਂਵਾਸਕੋ. ‘‘ਨਾਨਾਸੀਮਾਯ ਠਿਤਚਤੁਤ੍ਥੋ ਕਮ੍ਮਂ ਕਰੇਯ੍ਯ, ਇਦ੍ਧਿਯਾ ਵੇਹਾਸੇ ਠਿਤਚਤੁਤ੍ਥੋ ਕਮ੍ਮਂ ਕਰੇਯ੍ਯ, ਅਕਮ੍ਮਂ ਨ ਚ ਕਰਣੀਯ’’ਨ੍ਤਿ ਹਿ ਵੁਤ੍ਤਤ੍ਤਾ ਇਮੇਪਿ ‘‘ਅਸਂਵਾਸਿਕਾ’’ਤਿ ਵੁਤ੍ਤਾ. ਏਤੇਸੁ ਪਨ ਉਕ੍ਖਿਤ੍ਤਕੇਹਿ ਸਦ੍ਧਿਂ ਉਪੋਸਥਾਦੀਨਿ ਕਰੋਨ੍ਤੋ ਪਾਚਿਤ੍ਤਿਯਂ ਆਪਜ੍ਜਤਿ. ਨਿਸ੍ਸੀਮਟ੍ਠਵੇਹਾਸਟ੍ਠੇਹਿ ਕਰੋਨ੍ਤਸ੍ਸ ਕਮ੍ਮਂ ਕੁਪ੍ਪਤਿ, ਦੁਕ੍ਕਟਞ੍ਚ ਹੋਤਿ, ਇਤਰੇਹਿ ਦੁਕ੍ਕਟਂ. ਅਸਂਵਾਸਿਕਵਿਨਿਚ੍ਛਯੋ.

ਅਸਂਵਾਸਿਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.