੨੬. ਸਮਾਨਾਸਨਿਕਨਿਦ੍ਦੇਸਵਣ੍ਣਨਾ

੧੯੫. ਤਿਣ੍ਣਂ ਵਸ੍ਸਾਨਂ ਅਨ੍ਤਰਂ ਤਿਵਸ੍ਸਨ੍ਤਰਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਤਿਵਸ੍ਸਨ੍ਤਰੇਨ ਸਹ ਨਿਸੀਦਿਤੁ’’ਨ੍ਤਿ (ਚੂਲ਼ਵ. ੩੨੦) ਹਿ ਵੁਤ੍ਤਂ. ਯੋ ਦ੍ਵੀਹਿ ਵਸ੍ਸੇਹਿ (ਚੂਲ਼ਵ. ਅਟ੍ਠ. ੩੨੦) ਵੁਡ੍ਢੋ ਵਾ ਨਵੋ ਵਾ, ਸੋ ਤਿਵਸ੍ਸਨ੍ਤਰੋ ਨਾਮ.

੧੯੬. ਮੁਨੀਤਿ ਬੁਦ੍ਧਮੁਨਿ. ਸਬ੍ਬੇਹੇਵਾਤਿ ਅਨੁਪਸਮ੍ਪਨ੍ਨੇਹਿਪਿ.

੧੯੭. ਅਨ੍ਤਨ੍ਤਿ ਪਚ੍ਛਿਮਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਯਂ ਤਿਣ੍ਣਂ ਪਹੋਤਿ, ਏਤ੍ਤਕਂ ਪਚ੍ਛਿਮਂ ਦੀਘਾਸਨ’’ਨ੍ਤਿ (ਚੂਲ਼ਵ. ੩੨੦) ਵੁਤ੍ਤਤ੍ਤਾ ਯਂ ਤਿਣ੍ਣਂ ਪਹੋਤਿ, ਏਤਂ ਸਂਹਾਰਿਮਂ ਵਾ ਹੋਤੁ ਅਸਂਹਾਰਿਮਂ ਵਾ, ਤਥਾਰੂਪੇਸੁ ਫਲਕਖਣ੍ਡੇਸੁਪਿ ਨਿਸੀਦਿਤੁਂ ਵਟ੍ਟਤਿ. ਦ੍ਵਿਨ੍ਨਨ੍ਤਿ ਦ੍ਵਿਨ੍ਨਂ ਸਮਾਨਾਸਨਿਕਾਨਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਦੁਵਗ੍ਗਸ੍ਸ ਮਞ੍ਚਂ ਦੁਵਗ੍ਗਸ੍ਸ ਪੀਠ’’ਨ੍ਤਿ (ਚੁਲ਼ਵ. ੩੨੦) ਵੁਤ੍ਤਤ੍ਤਾ ਦ੍ਵੇ ਸਮਾਨਾਸਨਿਕਾ ਸਹ ਨਿਸੀਦਿਤੁਂ ਲਭਨ੍ਤਿ. ਅਞ੍ਞੇਹਿ ਅਸਮਾਨਾਸਨਿਕੇਹਿ, ਅਨੁਪਸਮ੍ਪਨ੍ਨਾਦੀਹਿ ਵਾ ਦ੍ਵੇ ਹੁਤ੍ਵਾਪਿ ਨਿਸੀਦਿਤੁਂ ਨ ਲਭਨ੍ਤਿ. ਸਮਾਨਾਸਨਿਕਵਿਨਿਚ੍ਛਯੋ.

ਸਮਾਨਾਸਨਿਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.