੨੫. ਅਕਪ੍ਪਿਯਸਯਨਨਿਦ੍ਦੇਸਵਣ੍ਣਨਾ

੧੮੭-੯. ‘‘ਉਚ੍ਚਕੋ ਆਸਨ੍ਦਿਕੋ ਉਪ੍ਪਨ੍ਨੋ ਹੋਤਿ, ਅਨੁਜਾਨਾਮਿ ਭਿਕ੍ਖਵੇ ਉਚ੍ਚਕਮ੍ਪਿ ਆਸਨ੍ਦਿਕ’’ਨ੍ਤਿ (ਚੂਲ਼ਵ. ੨੯੭) ਵਚਨਤੋ ਮਞ੍ਚਸ੍ਸ ਉਪਡ੍ਢਭਾਗਪ੍ਪਮਾਣੇਨ ਏਕਤੋਭਾਗੇਨ ਦੀਘਮ੍ਪਿ ਸੁਗਤਙ੍ਗੁਲੇਨ ਅਤਿਰੇਕਟ੍ਠਙ੍ਗੁਲਪਾਦਕਂ ਇਧ ਆਸਨ੍ਦੀਤਿ ਅਧਿਪ੍ਪੇਤਂ, ਚਤੁਰਂਸਾਸਨ੍ਦਿਕੋ ਪਨ ਪਮਾਣਾਤਿਕ੍ਕਨ੍ਤਕੋਪਿ ਵਟ੍ਟਤਿ. ਤੂਲੀਤਿ ਪਕਤਿਤੂਲਿਕਾ. ਪਲ੍ਲਙ੍ਕੋਨਾਮ ਆਹਰਿਮੇਹਿ ਵਾਲ਼ੇਹਿ ਕਤੋਤਿ ਵੁਤ੍ਤੋ. ਤਤ੍ਥੇਵ ‘‘ਸੀਹਰੂਪਾਦਿਂ ਦਸ੍ਸੇਤ੍ਵਾ ਕਤੋ ਪਨ ਵਟ੍ਟਤੀ’’ਤਿ ਵਦਨ੍ਤਿ. ਪਟਿਕਨ੍ਤਿ ਸੇਤਤ੍ਥਰਣਂ. ਗੋਨਚਿਤ੍ਤਕਨ੍ਤਿ ਏਤ੍ਥ ਚਤੁਰਙ੍ਗੁਲਾਧਿਕਲੋਮੋ ਕੋਜਵੋ ‘‘ਗੋਨਕੋ’’ਤਿ ਵੁਚ੍ਚਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਕੋਜਵ’’ਨ੍ਤਿ (ਮਹਾਵ. ੩੩੭) ਚੀਵਰਕ੍ਖਨ੍ਧਕੇ ਵੁਤ੍ਤਤ੍ਤਾ ਚਤੁਰਙ੍ਗੁਲਲੋਮਕਂ ਪਕਤਿਕੋਜਵਂ ਵਟ੍ਟਤਿ. ਰਤਨਚਿਤ੍ਤਂ ਚਿਤ੍ਤਕਂ ਨ ਵਟ੍ਟਤਿ. ਪਟਲੀਤਿ ਘਨਪੁਪ੍ਫਰਤ੍ਤਅਤ੍ਥਰਣਂ. ਵਿਕਤੀਤਿ ਸੀਹਬ੍ਯਗ੍ਘਾਦਿਰੂਪਵਿਚਿਤ੍ਤੋ ਉਣ੍ਣਾਮਯਤ੍ਥਰਣਕੋ. ਉਦ੍ਦਲੋਮੀਤਿ ਏਕਤੋਉਗ੍ਗਤਪੁਪ੍ਫਂ. ਏਕਨ੍ਤਲੋਮਿਕਾਤਿ ਉਭਤੋਉਗ੍ਗਤਪੁਪ੍ਫਂ.

ਕੁਤ੍ਤਨ੍ਤਿ ਸੋਲ਼ਸਨ੍ਨਂ ਨਾਟਕਿਤ੍ਥੀਨਂ ਠਤ੍ਵਾ ਨਚ੍ਚਨਯੋਗ੍ਗਂ ਉਣ੍ਣਾਮਯਤ੍ਥਰਣਂ. ਕੋਸੇਯ੍ਯਨ੍ਤਿ ਰਤਨਪਰਿਸਿਬ੍ਬਿਤਂ ਕੋਸੇਯ੍ਯਸੁਤ੍ਤਮਯਂ ਪਚ੍ਚਤ੍ਥਰਣਂ. ਕਟ੍ਟਿਸ੍ਸਨ੍ਤਿ ਰਤਨਪਰਿਸਿਬ੍ਬਿਤਂ ਕੋਸੇਯ੍ਯਕਟ੍ਟਿਸ੍ਸਮਯਂ ਪਚ੍ਚਤ੍ਥਰਣਂ. ਕੋਸੇਯ੍ਯਞ੍ਚ ਕਟ੍ਟਿਸ੍ਸਞ੍ਚ ਰਤਨਪਰਿਸਿਬ੍ਬਿਤਾਨੇਵ ਨ ਵਟ੍ਟਨ੍ਤਿ, ਸੁਦ੍ਧਾਨਿ ਵਟ੍ਟਨ੍ਤਿ. ਹਤ੍ਥਿਅਸ੍ਸਰਥਤ੍ਥਰਾ ਤੇਸਂ ਉਪਰਿ ਅਤ੍ਥਰਣਕਅਤ੍ਥਰਣਾਵ. ਅਜਿਨਪ੍ਪਵੇਣੀਤਿ ਅਜਿਨਚਮ੍ਮੇਹਿ ਮਞ੍ਚਪ੍ਪਮਾਣੇਨ ਸਿਬ੍ਬਿਤ੍ਵਾ ਕਤਾ ਪਵੇਣੀ, ਤੇਨ ਚ ਕਦਲੀਮਿਗਚਮ੍ਮਂ ਸੇਤਵਤ੍ਥਸ੍ਸ ਉਪਰਿ ਪਤ੍ਥਰਿਤ੍ਵਾ ਸਿਬ੍ਬਿਤ੍ਵਾ ਕਤਂ ਪਵਰਪ੍ਪਚ੍ਚਤ੍ਥਰਣਂ ਕਦਲੀਮਿਗਪ੍ਪਵਰਪ੍ਪਚ੍ਚਤ੍ਥਰਣਂ, ਤੇਨ ਚ ਅਤ੍ਥਤਂ ਅਜਿਨਪ੍ਪਵੇਣੀਕਦਲੀਮਿਗਪ੍ਪਵਰਪ੍ਪਚ੍ਚਤ੍ਥਰਣਤ੍ਥਤਂ.

ਸੇਤਵਿਤਾਨਮ੍ਪਿ ਹੇਟ੍ਠਾ ਅਕਪ੍ਪਿਯਪ੍ਪਚ੍ਚਤ੍ਥਰਣੇ ਸਤਿ ਨ ਵਟ੍ਟਤਿ, ਕਪ੍ਪਿਯਪ੍ਪਚ੍ਚਤ੍ਥਰਣੇ ਸਤਿ ਵਟ੍ਟਤਿ, ਰਤ੍ਤਵਿਤਾਨਸ੍ਸ ਹੇਟ੍ਠਾ ਕਪ੍ਪਿਯਪ੍ਪਚ੍ਚਤ੍ਥਰਣੇ ਸਤਿਪਿ ਨ ਵਟ੍ਟਤਿ ਏਵ. ਸੀਸੂਪਧਾਨਂ ਪਾਦੂਪਧਾਨਨ੍ਤਿ ਮਞ੍ਚਸ੍ਸ ਉਭਤੋਲੋਹਿਤਕਂ ਉਪਧਾਨਂ ਨ ਵਟ੍ਟਤਿ. ਯਂ ਪਨ ਏਕਮੇਵ ਉਪਧਾਨਂ ਹੋਤਿ, ਉਭੋਸੁ ਅਨ੍ਤੇਸੁ ਰਤ੍ਤਂ ਵਾ ਪਦੁਮਵਣ੍ਣਂ ਵਾ ਚਿਤ੍ਤਂ ਵਾ, ਸਚੇ ਪਮਾਣਯੁਤ੍ਤਂ, ਵਟ੍ਟਤਿ, ਮਹਾਉਪਧਾਨਂ ਪਨ ਪਟਿਕ੍ਖਿਤ੍ਤਂ.

੧੯੦. ਆਸਨ੍ਦਾਦਿਤ੍ਤਯਾਤਿ ਆਸਨ੍ਦੀ ਤੂਲੀ ਪਲ੍ਲਙ੍ਕੋਤਿ ਇਦਂ ਤਯਂ ਨਾਮਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਠਪੇਤ੍ਵਾ ਤੀਣਿ ਆਸਨ੍ਦਿਂ ਪਲ੍ਲਙ੍ਕਂ ਤੂਲਿਕਂ ਸੇਸਕਂ ਗਿਹਿਵਿਕਟਂ ਅਭਿਨਿਸੀਦਿਤੁਂ, ਨ ਤ੍ਵੇਵ ਅਭਿਨਿਪਜ੍ਜਿਤੁ’’ਨ੍ਤਿ (ਚੂਲ਼ਵ. ੩੧੪) ਹਿ ਵੁਤ੍ਤਂ. ਸੇਸੇ ਗਿਹਿਸਨ੍ਤਕੇ ਨਿਸੀਦਿਤੁਂ ਲਬ੍ਭਤੀਤਿ ਅਤ੍ਥੋ. ਯਦਿ ਧਮ੍ਮਾਸਨੇ ਸਙ੍ਘਿਕਮ੍ਪਿ ਗੋਨਕਾਦਿਂ ਭਿਕ੍ਖੂਹਿ ਅਨਾਣਤ੍ਤਾ ਆਰਾਮਿਕਾਦਯੋ ਸਯਮੇਵ ਪਞ੍ਞਪੇਨ੍ਤਿ ਚੇਵ ਨੀਹਰਨ੍ਤਿ ਚ, ਏਤਂ ਗਿਹਿਵਿਕਟਨੀਹਾਰਂ ਨਾਮ, ਇਮਿਨਾ ਗਿਹਿਵਿਕਟਨੀਹਾਰੇਨ ਵਟ੍ਟਤਿ. ਭਤ੍ਤਗ੍ਗਂ ਨਾਮ ਵਿਹਾਰੇ ਏਵ ਦਾਨਟ੍ਠਾਨਂ.

੧੯੧. ਚਤੁਨ੍ਨਂ ਪਾਦਾਨਂ, ਤੀਸੁ ਪਸ੍ਸੇਸੁ ਅਪਸ੍ਸਯਾਨਞ੍ਚ ਵਸੇਨ ਸਤ੍ਤਙ੍ਗੋ. ਏਕਪਸ੍ਸੇਨ ਯੁਤ੍ਤੋ ਪਞ੍ਚਙ੍ਗੋ. ਇਮੇ ਪਨ ਸਤ੍ਤਙ੍ਗਪਞ੍ਚਙ੍ਗਾ ‘‘ਅਨੁਜਾਨਾਮਿ, ਭਿਕ੍ਖਵੇ, ਉਚ੍ਚਕਮ੍ਪਿ ਸਤ੍ਤਙ੍ਗ’’ਨ੍ਤਿ (ਚੂਲ਼ਵ. ੨੯੪) ਵੁਤ੍ਤਤ੍ਤਾ ਪਮਾਣਾਤਿਕ੍ਕਨ੍ਤਾਪਿ ਵਟ੍ਟਨ੍ਤਿ. ਤੇਨ ਵੁਤ੍ਤਂ ‘‘ਉਚ੍ਚਪਾਦਕਾ’’ਤਿ. ਤੂਲੋਨਦ੍ਧਾ ਮਞ੍ਚਪੀਠਾ ਘਰੇਯੇਵ ਨਿਸੀਦਿਤੁਂ ਕਪ੍ਪਨ੍ਤੀਤਿ ਸਮ੍ਬਨ੍ਧੋ.

੧੯੨. ਚੀਵਰਚ੍ਛਵਿਯੋਤਿ ਛਨ੍ਨਂ ਚੀਵਰਾਨਂ, ਛਨ੍ਨਂ ਅਨੁਲੋਮਚੀਵਰਾਨਞ੍ਚ ਅਞ੍ਞਤਰਚੀਵਰਚ੍ਛਵਿਯੋਤਿ ਅਤ੍ਥੋ. ਸਬ੍ਬਤ੍ਥਾਤਿ ਮਞ੍ਚੇਪਿ ਪੀਠੇਪਿ ਭਤ੍ਤਗ੍ਗੇਪਿ ਅਨ੍ਤਰਘਰੇਪੀਤਿ ਅਤ੍ਥੋ. ਇਮਾਸਂ ਪਨ ਭਿਸੀਨਂ ਪਮਾਣਪਰਿਚ੍ਛੇਦੋਪਿ ਨਤ੍ਥਿ, ਮਞ੍ਚਪੀਠਾਦੀਨਂ ਵਸੇਨ ਅਨੁਰੂਪਂ ਸਲ੍ਲਕ੍ਖੇਤ੍ਵਾ ਪਮਾਣਂ ਕਾਤਬ੍ਬਂ.

੧੯੩. ‘‘ਤੂਲਿਕਾ ਉਪ੍ਪਨ੍ਨਾ ਹੋਤਿ. ਅਨੁਜਾਨਾਮਿ, ਭਿਕ੍ਖਵੇ, ਵਿਜਟੇਤ੍ਵਾ ਬਿਮ੍ਬੋਹਨਂ ਕਾਤੁਂ, ਤੀਣਿ ਤੂਲਾਨਿ ਰੁਕ੍ਖਤੂਲਂ ਲਤਾਤੂਲਂ ਪੋਟਕਿਤੂਲ’’ਨ੍ਤਿ (ਚੂਲ਼ਵ. ੨੯੭) ਵੁਤ੍ਤਤ੍ਤਾ ਤੂਲਤ੍ਤਯਞ੍ਚ (ਚੂਲ਼ਵ. ਅਟ੍ਠ. ੨੯੭; ਕਙ੍ਖਾ. ਅਟ੍ਠ. ਤੂਲੋਨਨ੍ਦਸਿਕ੍ਖਾਪਦਵਣ੍ਣਨਾ) ਬਿਮ੍ਬੋਹਨੇ ਵਟ੍ਟਤਿ. ਇਮੇਹਿ ਤੀਹਿ ਤੂਲੇਹਿ ਸਬ੍ਬੇਸਂ ਰੁਕ੍ਖਲਤਾਤਿਣਾਨਂ ਤੂਲਂ ਅਨੁਞ੍ਞਾਤਨ੍ਤਿ ਵੇਦਿਤਬ੍ਬਂ. ਭਿਸਿਯਂ ਪਨ ਕਿਞ੍ਚਿ ਤੂਲਂ ਨ ਵਟ੍ਟਤਿਯੇਵ. ਭਿਸਿਗਬ੍ਭੋਤਿ ਭਿਸਿਯਾ ਵੁਤ੍ਤਂ ਚੋਲ਼ਾਦਿਪਞ੍ਚਕਂ ਬਿਮ੍ਬੋਹਨੇ ਅਨੁਞ੍ਞਾਤਨ੍ਤਿ ਸਮ੍ਬਨ੍ਧੋ. ਮਿਗਪਕ੍ਖਿਨਨ੍ਤਿ ਸੀਹਾਦੀਨਂ ਸਬ੍ਬਚਤੁਪ੍ਪਦਾਨਂ ਹਂਸਮੋਰਾਦੀਨਂ ਸਬ੍ਬਪਕ੍ਖੀਨਂ ਲੋਮਾਨਿ ਕਪ੍ਪਨ੍ਤਿ. ਮਸੂਰਕੇ ਅਨੁਞ੍ਞਾਤਨ੍ਤਿ ਸਮ੍ਬਨ੍ਧੋ.

੧੯੪. ਇਦਾਨਿ ਭਿਸਿਯਂ ਕਪ੍ਪਿਯਾਕਪ੍ਪਿਯਂ ਦਸ੍ਸੇਤੁਂ ‘‘ਮਨੁਸ੍ਸਲੋਮ’’ਨ੍ਤਿਆਦਿਮਾਹ. ਉਣ੍ਣਾਯਨ੍ਤਿ (ਚੂਲ਼ਵ. ੨੯੭; ਚੂਲ਼ਵ. ਅਟ੍ਠ. ੨੯੭) ਉਣ੍ਣਾਭਿਸਿਯਂ ਮਨੁਸ੍ਸਲੋਮਂ ਨ ਲਬ੍ਭਤੀਤਿ ਅਤ੍ਥੋ. ਉਣ੍ਣਾਭਿਸਿਯਮ੍ਪਿ ਮਨੁਸ੍ਸਲੋਮਂ ਠਪੇਤ੍ਵਾ ਯੇਸਂ ਕੇਸਞ੍ਚਿ ਪਕ੍ਖਿਚਤੁਪ੍ਪਦਾਨਂ ਲੋਮਂ ਵਟ੍ਟਤੀਤਿ ਅਤ੍ਥੋ. ਪਣ੍ਣੇਤਿ ਪਣ੍ਣਭਿਸਿਯਞ੍ਚ ਪੁਪ੍ਫਞ੍ਚ ਸੁਦ੍ਧਂ ਤਮਾਲਪਤ੍ਤਞ੍ਚ ਨ ਲਬ੍ਭਂ, ਅਵਸੇਸਂ ਯਂ ਕਿਞ੍ਚਿ ਪਣ੍ਣਂ ਲਬ੍ਭਤੀਤਿ ਅਤ੍ਥੋ. ਤਮਾਲਪਤ੍ਤਕਮ੍ਪਿ ਅਞ੍ਞੇਹਿ ਮਿਸ੍ਸਂ ਵਟ੍ਟਤੀਤਿ. ਚੋਲ਼ਵਾਕਤਿਣੇਸੁ ਅਕਪ੍ਪਿਯਂ ਨਾਮ ਨਤ੍ਥਿ. ਆਸਨਞ੍ਚੇਵ ਅਪ੍ਪਟਿਵੇਕ੍ਖਿਤਂ ਨ ਲਬ੍ਭਨ੍ਤਿ ਆਸਨਸਾਮਞ੍ਞਤੋ ਪਸਙ੍ਗੇਨ ਵੁਤ੍ਤਂ. ਅਕਪ੍ਪਿਯਸਯਨਵਿਨਿਚ੍ਛਯੋ.

ਅਕਪ੍ਪਿਯਸਯਨਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.