੨੪. ਅਞ੍ਜਨੀਨਿਦ੍ਦੇਸਵਣ੍ਣਨਾ

੧੮੨. ਵਟ੍ਟਾ ਵਾ ਅਟ੍ਠਸੋਲ਼ਸਂਸਾ ਵਾ ਮਟ੍ਠਾ ਪੁਪ੍ਫਲਤਾਦੀਹਿ ਅਚਿਤ੍ਤਕਾ ਅਞ੍ਜਨੀ ਵਟ੍ਟਤੀਤਿ ਅਤ੍ਥੋ. ਤਿਸ੍ਸੋਪਿ ਵਟ੍ਟਨ੍ਤਿ, ਏਕਾਯ ਵਾ ਦ੍ਵੀਸੁ ਵਾ ਕਥਾ ਏਵ ਨਤ੍ਥੀਤਿ ਅਧਿਪ੍ਪਾਯੋ. ਲੇਖਾਤਿ ਵਟ੍ਟਲੇਖਾ. ਬਨ੍ਧਿਤੁਨ੍ਤਿ ਪਿਧਾਨਕਬਨ੍ਧਨਤ੍ਥਂ.

੧੮੩. ਰੂਪਨ੍ਤਿ ਸਕੁਣਰੂਪਾਦਿ. ਯਦਿ ਚ ਏਦਿਸਂ ਅਞ੍ਞੇਹਿ ਕਤਂ ਲਭਤਿ, ਘਂਸਿਤ੍ਵਾ ਵਾ ਛਿਨ੍ਦਿਤ੍ਵਾ ਵਾ ਯਥਾ ਵਾ ਨ ਪਞ੍ਞਾਯਤਿ, ਤਥਾ ਸੁਤ੍ਤੇਨ ਵੇਠੇਤ੍ਵਾ ਵਲ਼ਞ੍ਜੇਤਬ੍ਬਂ.

੧੮੪. ਥਵਿਕਾਤਿ ਅਞ੍ਜਨਿਥਵਿਕਾ. ਅਞ੍ਜਨਿਸਲਾਕਾਪਿ ਲਬ੍ਭਤੀਤਿ ਸਮ੍ਬਨ੍ਧੋ.

੧੮੫-੬. ਅਟ੍ਠੀਤਿ (ਮਹਾਵ. ੨੬੬; ਮਹਾਵ. ਅਟ੍ਠ. ੨੬੪) ਮਨੁਸ੍ਸਟ੍ਠਿਂ ਠਪੇਤ੍ਵਾ ਅਵਸੇਸਟ੍ਠਿ. ਵਿਸਾਣਦਨ੍ਤੇਸੁ ਅਕਪ੍ਪਿਯਂ ਨਾਮ ਨਤ੍ਥਿ. ਆਮਲਕਕਕ੍ਕਾਦੀਹਿ ਕਤਾ ਫਲਮਯਾ. ਤਮ੍ਮਯਾਤਿ ਇਧ ਵੁਤ੍ਤੇਹੇਵ ਨਿਬ੍ਬਤ੍ਤਾ. ਅਞ੍ਜਨੀਵਿਨਿਚ੍ਛਯੋ.

ਅਞ੍ਜਨੀਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.