੧੬. ਵਚ੍ਚਪ੍ਪਸ੍ਸਾਵਟ੍ਠਾਨਿਕਨਿਦ੍ਦੇਸਵਣ੍ਣਨਾ

੧੫੬. ਯਥਾਵੁਡ੍ਢਂ ਨ ਕਰੇਯ੍ਯ ਵਚ੍ਚਨ੍ਤਿ ਸਮ੍ਬਨ੍ਧੋ. ਯਥਾਨੁਪੁਬ੍ਬਿਯਾ ਲਬ੍ਭਤੀਤਿ ਸਮ੍ਬਨ੍ਧੋ. ਇਮੇਸੁ ਪਨ ਤੀਸੁ ਠਾਨੇਸੁ ਯੋ ਯੋ ਪਠਮਂ ਆਗਚ੍ਛਤਿ ਵੁਡ੍ਢੋ ਵਾ ਨਵੋ ਵਾ, ਸੋ ਸੋ ਆਗਤਪਟਿਪਾਟਿਯਾ ਕਾਤੁਞ੍ਚ ਨਹਾਯਿਤੁਞ੍ਚ ਲਬ੍ਭਤੀਤਿ ਅਧਿਪ੍ਪਾਯੋ.

੧੫੭. ਉਬ੍ਭਜਿਤ੍ਵਾਤਿ (ਚੂਲ਼ਵ. ੩੭੩, ੩੭੪) ਨਿਵਾਸਨਂ ਦੂਰਤੋਵ ਉਕ੍ਖਿਪਿਤ੍ਵਾ ਨੋ ਪਵਿਸੇਯ੍ਯ. ਸਹਸਾ ਚ ਨੋ ਪਵਿਸੇਯ੍ਯਾਤਿ ਸਮ੍ਬਨ੍ਧੋ. ‘‘ਬਹਿ ਠਿਤੇਨ ਉਕ੍ਕਾਸਿਤਬ੍ਬ’’ਨ੍ਤਿ ਚ ‘‘ਸਾਧੁਕਂ ਅਤਰਮਾਨੇਨ ਵਚ੍ਚਕੁਟਿ ਪਵਿਸਿਤਬ੍ਬਾ’’ਤਿ ਚ ਵੁਤ੍ਤਤ੍ਤਾ ਉਕ੍ਕਾਸਿਤ੍ਵਾਵ ਅਤਰਮਾਨੋ ਪਵਿਸੇਯ੍ਯਾਤਿ ਅਤ੍ਥੋ. ‘‘ਨ ਉਬ੍ਭਜਿਤ੍ਵਾ ਪਵਿਸਿਤਬ੍ਬਾ, ਵਚ੍ਚਪਾਦੁਕਾਯ ਠਿਤੇਨ ਉਬ੍ਭਜਿਤਬ੍ਬ’’ਨ੍ਤਿ (ਚੂਲ਼ਵ. ੩੭੪) ਵਚਨਤੋ ‘‘ਉਬ੍ਭਜੇਯ੍ਯ ਪਾਦੁਕਾਸ੍ਵੇਵ ਸਣ੍ਠਿਤੋ’’ਤਿ ਵੁਤ੍ਤਂ.

੧੫੮. ਨ ਕਰੇਯ੍ਯ ਉਭਯਂ ਨ ਕਰੇਯ੍ਯੁਭਯਂ.

੧੫੯. ਕੂਪੇਤਿ (ਚੂਲ਼ਵ. ੩੭੪) ਵਚ੍ਚਕੂਪੇ. ਕਟ੍ਠਨ੍ਤਿ ਅਵਲੇਖਨਕਟ੍ਠਂ. ਪਸ੍ਸਾਵਦੋਣਿਯਾ ਖੇਲ਼ਂ ਨ ਕਾਤਬ੍ਬਨ੍ਤਿ ਅਤ੍ਥੋ. ਨਾਵਲੇਖੇਯ੍ਯ ਫਰੁਸੇਨਾਤਿ ਫਾਲਿਤਕਟ੍ਠੇਨ ਵਾ ਖਰੇਨ ਵਾ ਗਣ੍ਠਿਕੇਨ ਵਾ ਕਣ੍ਟਕੇਨ ਵਾ ਸੁਸਿਰੇਨ ਵਾ ਪੂਤਿਨਾ ਵਾ ਨਾਵਲੇਖਿਤਬ੍ਬਨ੍ਤਿ ਅਤ੍ਥੋ. ਉਹਤਞ੍ਚਾਪੀਤਿ ਗੂਥਮਕ੍ਖਿਤਮ੍ਪਿ ਧੋਵਯੇ ਅਤ੍ਤਨਾ ਵਾ ਪਰੇਨ ਵਾ ਕਤਨ੍ਤਿ ਅਧਿਪ੍ਪਾਯੋ.

੧੬੦. ਉਬ੍ਭਜਿਤ੍ਵਾ ਨ ਨਿਕ੍ਖਮੇਤਿ ਏਤ੍ਥ ‘‘ਵਚ੍ਚਪਾਦੁਕਾਯ ਠਿਤੇਨ ਪਟਿਚ੍ਛਾਦੇਤਬ੍ਬ’’ਨ੍ਤਿ (ਚੂਲ਼ਵ. ੩੭੪) ਹਿ ਵੁਤ੍ਤਂ, ਪੁਨ ‘‘ਆਚਮਨਪਾਦੁਕਾਯਂ ਠਿਤੇਨ ਉਬ੍ਭਜਿਤਬ੍ਬ’’ਨ੍ਤਿ (ਚੂਲ਼ਵ. ੩੭੪) ਚ ਵੁਤ੍ਤਂ. ‘‘ਚਪੁ ਚਪੂ’’ਤਿ ਸਦ੍ਦਂ ਕਤ੍ਵਾ ਨਾਚਮੇਯ੍ਯਾਤਿ ਅਤ੍ਥੋ. ਵਚ੍ਚਪ੍ਪਸ੍ਸਾਵਟ੍ਠਾਨਿਕਵਿਨਿਚ੍ਛਯੋ.

ਵਚ੍ਚਪ੍ਪਸ੍ਸਾਵਟ੍ਠਾਨਿਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.