੧੫. ਉਪਜ੍ਝਾਚਰਿਯਵਤ੍ਤਨਿਦ੍ਦੇਸਵਣ੍ਣਨਾ

੧੪੫. ਉਪਜ੍ਝਾਚਰਿਯੇਤਿ ਏਤ੍ਥ (ਮਹਾਵ. ੬੪, ੬੭, ੭੪, ੭੮-੭੯; ਚੂਲ਼ਵ. ੩੭੫, ੩੭੭; ੩੭੯-੩੮੨; ਮਹਾਵ. ਅਟ੍ਠ. ੬੪, ੬੭, ੭੫, ੭੬, ੭੭) ਆਚਰਿਯੋ ਨਾਮ ਨਿਸ੍ਸਯਾਚਰਿਯੋ ਪਬ੍ਬਜ੍ਜਾਚਰਿਯੋ ਉਪਸਮ੍ਪਦਾਚਰਿਯੋ ਧਮ੍ਮਾਚਰਿਯੋਤਿ ਚਤੁਬ੍ਬਿਧੋ. ਏਤੇਸੁ ਹਿ ਨਿਸ੍ਸਯਨ੍ਤੇਵਾਸਿਕੇਨ ਯਾਵ ਆਚਰਿਯਂ ਨਿਸ੍ਸਾਯ ਵਸਤਿ, ਤਾਵ ਸਬ੍ਬਮਾਚਰਿਯਵਤ੍ਤਂ ਕਾਤਬ੍ਬਂ. ਪਬ੍ਬਜ੍ਜਾਉਪਸਮ੍ਪਦਾਧਮ੍ਮਨ੍ਤੇਵਾਸਿਕੇਹਿ ਪਨ ਨਿਸ੍ਸਯਮੁਤ੍ਤਕੇਹਿਪਿ ਆਦਿਤੋ ਪਟ੍ਠਾਯ ਯਾਵ ਚੀਵਰਰਜਨਂ, ਤਾਵ ਵਤ੍ਤਂ ਕਾਤਬ੍ਬਂ. ਅਨਾਪੁਚ੍ਛਿਤ੍ਵਾ ਪਤ੍ਤਦਾਨਾਦਿਮ੍ਹਿ ਪਨ ਏਤੇਸਂ ਅਨਾਪਤ੍ਤਿ. ਏਤੇਸੁ ਚ ਪਬ੍ਬਜ੍ਜਨ੍ਤੇਵਾਸਿਕੋ ਚ ਉਪਸਮ੍ਪਦਨ੍ਤੇਵਾਸਿਕੋ ਚ ਆਚਰਿਯਸ੍ਸ ਯਾਵਜੀਵਂ ਭਾਰੋ, ਨਿਸ੍ਸਯਨ੍ਤੇਵਾਸਿਕੋ ਚ ਧਮ੍ਮਨ੍ਤੇਵਾਸਿਕੋ ਚ ਯਾਵ ਸਮੀਪੇ ਵਸਤਿ, ਤਾਵਦੇਵ. ਸੁਟ੍ਠੁ ਪਿਯਸੀਲੋ ਸੁਪੇਸਲੋ, ਸਿਕ੍ਖਾਕਾਮੋਤਿ ਅਤ੍ਥੋ. ਦਨ੍ਤਕਟ੍ਠਂ ਦੇਨ੍ਤੇਨ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਮਹਨ੍ਤਂ ਮਜ੍ਝਿਮਂ ਖੁਦ੍ਦਕਨ੍ਤਿ ਤੀਣਿ ਦਨ੍ਤਕਟ੍ਠਾਨਿ ਉਪਨੇਤਬ੍ਬਾਨਿ. ਤੇਸੁ ਯਂ ਤੀਣਿ ਦਿਵਸਾਨਿ ਗਣ੍ਹਾਤਿ, ਤਂ ਸਲ੍ਲਕ੍ਖੇਤ੍ਵਾ ਚਤੁਤ੍ਥਦਿਵਸਤੋ ਪਟ੍ਠਾਯ ਤਾਦਿਸਂਯੇਵ ਸਮ੍ਮਾ ਉਭੋਹਿ ਹਤ੍ਥੇਹਿ ਦਾਤਬ੍ਬਂ. ਸਚੇ ਯਂ ਵਾ ਤਂ ਵਾ ਗਣ੍ਹਾਤਿ, ਯਥਾਲਦ੍ਧਂ ਉਪਨੇਤਬ੍ਬਂ. ਤੋਯਨ੍ਤਿ ਸੀਤਞ੍ਚ ਉਣ੍ਹਞ੍ਚ ਉਦਕਂ ਉਪਨੇਤ੍ਵਾ ਯਂ ਤੀਣਿ ਦਿਵਸਾਨਿ ਵਲ਼ਞ੍ਜੇਤਿ, ਚਤੁਤ੍ਥਦਿਵਸਤੋ ਪਟ੍ਠਾਯ ਤਾਦਿਸਂ ਉਪਨੇਤਬ੍ਬਂ. ਸਚੇ ਦ੍ਵੇਪਿ ਵਲ਼ਞ੍ਜੇਤਿ, ਦੁਵਿਧਮ੍ਪਿ ਉਪਨੇਤਬ੍ਬਂ. ਸਚੇ ਯਾਗੁ ਹੋਤਿ, ਭਾਜਨਂ ਧੋਵਿਤ੍ਵਾ ਉਪਨੇਤਬ੍ਬਂ.

੧੪੬. ਪਤ੍ਤੇ ਵਤ੍ਤਂ ਚਰੇਤਿ ‘‘ਯਾਗੁਂ ਪੀਤਸ੍ਸ ਉਦਕਂ ਦਤ੍ਵਾ ਭਾਜਨਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪਰਿਘਂਸਨ੍ਤੇਨ ਧੋਵਿਤ੍ਵਾ ਪਟਿਸਾਮੇਤਬ੍ਬ’’ਨ੍ਤਿ (ਮਹਾਵ. ੬੬, ੭੮; ਚੂਲ਼ਵ. ੩੭੬, ੩੮੦) ਵੁਤ੍ਤਂ ਪਤ੍ਤੇ ਵਤ੍ਤਂ ਚਰੇਤਿ ਅਤ੍ਥੋ. ਗਾਮਪ੍ਪਵੇਸੇ ਵਤ੍ਤਂ ਚਰੇਤਿ ਏਵਂ ਸਬ੍ਬਤ੍ਥ. ‘‘ਸਚੇ ਉਪਜ੍ਝਾਯੋ ਵਾ ਆਚਰਿਯੋ ਵਾ ਗਾਮਂ ਪਵਿਸਿਤੁਕਾਮੋ ਹੋਤਿ, ਨਿਵਾਸਨਂ ਦਾਤਬ੍ਬਂ, ਪਟਿਨਿਵਾਸਨਂ ਪਟਿਗ੍ਗਹੇਤਬ੍ਬਂ, ਕਾਯਬਨ੍ਧਨਂ ਦਾਤਬ੍ਬਂ, ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਦਾਤਬ੍ਬਾ, ਧੋਵਿਤ੍ਵਾ ਪਤ੍ਤੋ ਸੋਦਕੋ ਦਾਤਬ੍ਬੋ’’ਤਿ (ਮਹਾਵ. ੬੬, ੭੮; ਚੂਲ਼ਵ. ੩੭੬, ੩੮੦) ਇਦਂ ਗਾਮਪ੍ਪਵੇਸਨੇ ਵਤ੍ਤਂ ਨਾਮ. ‘‘ਸਚੇ ਉਪਜ੍ਝਾਯੋ ਵਾ ਆਚਰਿਯੋ ਵਾ ਪਚ੍ਛਾਸਮਣਂ ਆਕਙ੍ਖਤਿ, ਤਿਮਣ੍ਡਲਂ ਪਟਿਚ੍ਛਾਦੇਨ੍ਤੇਨ ਪਰਿਮਣ੍ਡਲਂ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਪਾਰੁਪਿਤ੍ਵਾ ਗਣ੍ਠਿਕਂ ਪਟਿਮੁਞ੍ਚਿਤ੍ਵਾ ਧੋਵਿਤ੍ਵਾ ਪਤ੍ਤਂ ਗਹੇਤ੍ਵਾ ਉਪਜ੍ਝਾਯਸ੍ਸ ਵਾ ਆਚਰਿਯਸ੍ਸ ਵਾ ਪਚ੍ਛਾਸਮਣੇਨ ਹੋਤਬ੍ਬ’’ਨ੍ਤਿਆਦਿਨਾ (ਮਹਾਵ. ੬੬, ੭੮; ਚੂਲ਼ਵ. ੩੭੬, ੩੮੦) ਨਯੇਨ ਵੁਤ੍ਤਂ ਗਮਨੇ ਵਤ੍ਤਂ ਨਾਮ. ‘‘ਨਿਵਤ੍ਤਨ੍ਤੇਨ ਪਠਮਤਰਂ ਆਗਨ੍ਤ੍ਵਾ ਆਸਨਂ ਪਞ੍ਞਾਪੇਤਬ੍ਬ’’ਨ੍ਤਿਆਦਿਨਾ (ਮਹਾਵ. ੬੬, ੭੮; ਚੂਲ਼ਵ. ੩੭੬, ੩੮੦) ਨਯੇਨ ਵੁਤ੍ਤਂ ਆਗਮੇ ਵਤ੍ਤਂ ਨਾਮ. ‘‘ਉਪਜ੍ਝਾਯਮ੍ਹਿ ਵੁਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਪਟਿਸਾਮੇਤਬ੍ਬ’’ਨ੍ਤਿ (ਮਹਾਵ. ੬੬, ੭੮; ਚੂਲ਼ਵ. ੩੭੬, ੩੮੦) ਏਵਂ ਵੁਤ੍ਤਂ ਆਸਨਾਦੀਸੁ ਵਤ੍ਤਂ ਨਾਮ. ਉਪਾਹਨਾਯ ਵਤ੍ਤਂ ਨਾਮ ‘‘ਉਪਾਹਨਾ ਪੁਞ੍ਛਿਤਬ੍ਬਾ, ਉਪਾਹਨਾ ਪੁਞ੍ਛਨ੍ਤੇਨ ਪਠਮਂ ਸੁਕ੍ਖੇਨ ਚੋਲ਼ਕੇਨ ਪੁਞ੍ਛਿਤਬ੍ਬਾ, ਪਚ੍ਛਾ ਅਲ੍ਲੇਨਾ’’ਤਿਆਦਿਨਾ (ਚੂਲ਼ਵ. ੩੫੭, ੩੫੯) ਵੁਤ੍ਤਂ. ਚੀਵਰੇ ਵਤ੍ਤਂ ਨਾਮ ‘‘ਸਚੇ ਚੀਵਰਂ ਸਿਨ੍ਨਂ ਹੋਤਿ, ਮੁਹੁਤ੍ਤਂ ਉਣ੍ਹੇ ਓਤਾਪੇਤਬ੍ਬਂ, ਨ ਚ ਉਣ੍ਹੇ ਚੀਵਰਂ ਨਿਦਹਿਤਬ੍ਬ’’ਨ੍ਤਿਆਦਿਨਾ (ਮਹਾਵ. ੬੬, ੭੮; ਚੂਲ਼ਵ. ੩੭੬, ੩੮੦) ਵੁਤ੍ਤਂ.

੧੪੭. ਪਰਿਭੋਜਨੀਯਪਾਨੀਯ-ਵਚ੍ਚਪ੍ਪਸ੍ਸਾਵਠਾਨਿਸੂਤਿ ਏਤ੍ਥ ਸਚੇ ਪਾਨੀਯਂ ਨ ਹੋਤਿ, ਪਾਨੀਯਂ ਉਪਟ੍ਠਾਪੇਤਬ੍ਬਂ. ਸਚੇ ਪਰਿਭੋਜਨੀਯਂ ਨ ਹੋਤਿ, ਪਰਿਭੋਜਨੀਯਂ ਉਪਟ੍ਠਾਪੇਤਬ੍ਬਂ. ਸਚੇ ਵਚ੍ਚਕੁਟਿ ਉਕ੍ਲਾਪਾ ਹੋਤਿ, ਵਚ੍ਚਕੁਟਿ ਸਮ੍ਮਜ੍ਜਿਤਬ੍ਬਾ. ਤਥਾ ਪਸ੍ਸਾਵਟ੍ਠਾਨੇ ਏਵਂ ਵਤ੍ਤਂ ਚਰਿਤਬ੍ਬਨ੍ਤਿ ਅਤ੍ਥੋ. ‘‘ਵਿਹਾਰਂ ਸੋਧੇਨ੍ਤੇਨ ਪਠਮਂ ਪਤ੍ਤਚੀਵਰਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬ’’ਨ੍ਤਿਆਦਿਨਾ ਨਯੇਨ ਵੁਤ੍ਤਂ ਵਿਹਾਰਸੋਧਨੇ ਵਤ੍ਤਂ ਨਾਮ. ‘‘ਭੂਮਤ੍ਥਰਣਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਾਪੇਤਬ੍ਬ’’ਨ੍ਤਿਆਦਿਨਾ (ਮਹਾਵ. ੬੬, ੭੮; ਚੂਲ਼ਵ. ੩੭੬, ੩੮੦) ਵੁਤ੍ਤਂ ਪੁਨ ਪਞ੍ਞਾਪਨੇ ਵਤ੍ਤਂ ਨਾਮ.

੧੪੮. ਇਦਾਨਿ ਵਿਹਾਰਂ ਸੋਧੇਨ੍ਤੇਨ ਏਵਂ ਸੋਧੇਤਬ੍ਬਨ੍ਤਿ ਤਂ ਦਸ੍ਸੇਤੁਂ ‘‘ਨ ਪਪ੍ਫੋਟੇਯ੍ਯਾ’’ਤਿਆਦਿਮਾਹ. ਤਸ੍ਸਤ੍ਥੋ – ਵਿਹਾਰਂ ਸੋਧੇਨ੍ਤੋ ਭਿਕ੍ਖੁ ਭੂਮਤ੍ਥਰਣਾਦਿਸਯਨਾਸਨਂ ਪਟਿਵਾਤੇ ਵਾ ਪਙ੍ਗਣੇ ਵਾ ਪਾਨੀਯਸਾਮਨ੍ਤਾ ਵਾ ਨ ਪਪ੍ਫੋਟੇਯ੍ਯਾਤਿ. ਪਙ੍ਗਣੇਤਿ ਬਹੂਨਂ ਸਨ੍ਨਿਪਾਤੇ ਠਾਨੇ.

੧੪੯. ਨ੍ਹਾਨੇਤਿ ‘‘ਸਚੇ ਉਪਜ੍ਝਾਯੋ ਨਹਾਯਿਤੁਕਾਮੋ ਹੋਤਿ, ਨਹਾਨਂ ਪਟਿਯਾਦੇਤਬ੍ਬਂ. ਸਚੇ ਸੀਤੇਨ ਅਤ੍ਥੋ ਹੋਤਿ, ਸੀਤਂ ਪਟਿਯਾਦੇਤਬ੍ਬ’’ਨ੍ਤਿਆਦਿਨਾ (ਮਹਾਵ. ੬੬; ਚੂਲ਼ਵ. ੩੭੬) ਵੁਤ੍ਤਂ ਨਹਾਨੇ ਵਤ੍ਤਂ ਨਾਮ, ‘‘ਉਪਜ੍ਝਾਯਸ੍ਸ ਗਤ੍ਤਤੋ ਉਦਕਂ ਸਮ੍ਮਜ੍ਜਿਤਬ੍ਬਂ, ਨਿਵਾਸਨਂ ਦਾਤਬ੍ਬ’’ਨ੍ਤਿਆਦਿਨਾ (ਮਹਾਵ. ੬੬; ਚੂਲ਼ਵ. ੩੭੬) ਵੁਤ੍ਤਂ ਨਹਾਤਸ੍ਸ ਕਾਤਬ੍ਬਂ ਨਾਮ. ਰਙ੍ਗਪਾਕੇਤਿ ‘‘ਸਚੇ ਉਪਜ੍ਝਾਯਸ੍ਸ ਆਚਰਿਯਸ੍ਸ ਰਜਨਂ ਪਚਿਤਬ੍ਬਂ ਹੋਤਿ, ਸਦ੍ਧਿਵਿਹਾਰਿਕੇਨ ਅਨ੍ਤੇਵਾਸਿਕੇਨ ਪਚਿਤਬ੍ਬ’’ਨ੍ਤਿ (ਮਹਾਵ. ੬੬, ੭੮; ਚੂਲ਼ਵ. ੩੭੬, ੩੮੦) ਵੁਤ੍ਤਂ. ਧੋਵਨੇਤਿ ‘‘ਸਚੇ ਉਪਜ੍ਝਾਯਸ੍ਸ ਆਚਰਿਯਸ੍ਸ ਚੀਵਰਂ ਧੋਵਿਤਬ੍ਬਂ ਹੋਤਿ, ਸਦ੍ਧਿਵਿਹਾਰਿਕੇਨ ਅਨ੍ਤੇਵਾਸਿਕੇਨ ਧੋਵਿਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬ’’ਨ੍ਤਿ (ਮਹਾਵ. ੬੬, ੭੮; ਚੂਲ਼ਵ. ੩੭੬, ੩੮੦) ਵੁਤ੍ਤਂ. ਸਿਬ੍ਬਨੇਤਿ ‘‘ਸਚੇ ਉਪਜ੍ਝਾਯੇਨ ਆਚਰਿਯੇਨ ਚੀਵਰਂ ਕਾਤਬ੍ਬਂ ਹੋਤਿ, ਸਦ੍ਧਿਵਿਹਾਰਿਕੇਨ ਅਨ੍ਤੇਵਾਸਿਕੇਨ ਕਾਤਬ੍ਬ’’ਨ੍ਤਿ (ਮਹਾਵ. ੬੬, ੭੮; ਚੂਲ਼ਵ. ੩੭੬, ੩੮੦) ਵੁਤ੍ਤਂ. ਚੀਵਰੇ ਥੇਵੇ ਠਿਤੇ ਰਜਨ੍ਤੋ ਨ ਵਜੇ ਨ ਪਕ੍ਕਮੇਯ੍ਯਾਤਿ ਅਤ੍ਥੋ. ‘‘ਚੀਵਰਂ ਰਜਨ੍ਤੇਨ ਸਾਧੁਕਂ ਸਮ੍ਪਰਿਵਤ੍ਤਕਂ ਸਮ੍ਪਰਿਵਤ੍ਤਕਂ ਰਜਿਤਬ੍ਬਂ, ਨ ਚ ਅਚ੍ਛਿਨ੍ਨੇ ਥੇਵੇ ਪਕ੍ਕਮਿਤਬ੍ਬ’’ਨ੍ਤਿ (ਮਹਾਵ. ੬੬, ੭੮; ਚੂਲ਼ਵ. ੩੭੬, ੩੮੦) ਹਿ ਵੁਤ੍ਤਂ.

੧੫੦. ਏਕਚ੍ਚਸ੍ਸਾਤਿ ਆਚਰਿਯੁਪਜ੍ਝਾਯਾਨਂ ਵਿਸਭਾਗਸ੍ਸ ਅਨਤ੍ਥਕਾਮਸ੍ਸ ਵੇਰਿਪੁਗ੍ਗਲਸ੍ਸ. ਅਨਾਪੁਚ੍ਛਾਤਿ ਆਚਰਿਯੁਪਜ੍ਝਾਯਾਨਂ ਅਨਾਰੋਚੇਤ੍ਵਾ. ਕਿਞ੍ਚਨਨ੍ਤਿ ਯਂ ਕਿਞ੍ਚਿ.

੧੫੧-੨. ਤਸ੍ਸਾਤਿ ਏਕਚ੍ਚਸ੍ਸ. ਨਿਨ੍ਨੇਤੁਨ੍ਤਿ ਨੀਹਰਿਤੁਂ. ਕਿਚ੍ਚਯਂ ਪਰਿਕਮ੍ਮਂ ਵਾਤਿ ਵੇਯ੍ਯਾਵਚ੍ਚਂ ਵਾ ਪਿਟ੍ਠਿਪਰਿਕਮ੍ਮਾਦਿਪਰਿਕਮ੍ਮਂ ਵਾ ਅਤ੍ਤਨਾ ਤਸ੍ਸ ਕਾਤੁਂ ਵਾ ਤੇਨ ਅਤ੍ਤਨੋ ਕਾਰਾਪੇਤੁਂ ਵਾਤਿ ਏਵਮਤ੍ਥੋ ਵੇਦਿਤਬ੍ਬੋ.

੧੫੩. ਸਚੇ ਆਚਰਿਯੁਪਜ੍ਝਾਯਾ ਅਞ੍ਞਤ੍ਥ ਗਤਾ ਹੋਨ੍ਤਿ, ਪਰਿਵੇਣਂ ਗਨ੍ਤ੍ਵਾ ਅਪਸ੍ਸਨ੍ਤੇਹਿ ਗਾਮਂ ਪਵਿਸਿਤੁਂ ਵਟ੍ਟਤਿ. ਗਾਮਂ ਪਵਿਸਨ੍ਤੋ ਸਚੇ ਪਸ੍ਸਤਿ, ਆਪੁਚ੍ਛਿਤਬ੍ਬਮੇਵਾਤਿ ਵਦਨ੍ਤਿ. ‘‘ਉਪਜ੍ਝਾਯਂ ਅਨਾਪੁਚ੍ਛਾ ਨ ਦਿਸਾ ਪਕ੍ਕਮਿਤਬ੍ਬਾ’’ਤਿ (ਮਹਾਵ. ੬੬, ਚੂਲ਼ਵ. ੩੭੬) ਹਿ ਵੁਤ੍ਤਂ. ਅਤ੍ਤਨੋ ਕਿਚ੍ਚਯਂ ਨਾਮ ਅਨ੍ਤੋਵਿਹਾਰੇਪਿ ਅਤ੍ਤਨੋ ਪਤ੍ਤਪਚਨਚੀਵਰਕਮ੍ਮਕੇਸਚ੍ਛੇਦਨਾਦਿ.

੧੫੪. ਸਙ੍ਘਾਯਤ੍ਤਕਮ੍ਮਾਨਿ ਨਾਮ ਪਰਿਵਾਸਮਾਨਤ੍ਤਅਬ੍ਭਾਨਤਜ੍ਜਨੀਯਨਿਯਸ੍ਸਪਬ੍ਬਾਜਨੀਯਪਟਿਸਾਰਣੀਯਉਕ੍ਖੇਪਨਾਦਯੋ.

੧੫੫. ਵੁਟ੍ਠਾਨਂ ਨੇਸਮਾਗਮੇਤਿ ‘‘ਸਚੇ ਉਪਜ੍ਝਾਯੋ ਵਾ ਆਚਰਿਯੋ ਵਾ ਗਿਲਾਨੋ ਹੋਤਿ, ਯਾਵਜੀਵਂ ਉਪਟ੍ਠਾਤਬ੍ਬੋ, ਵੁਟ੍ਠਾਨਮਸ੍ਸ ਆਗਮੇਤਬ੍ਬ’’ਨ੍ਤਿ (ਮਹਾਵ. ੬੬; ਚੂਲ਼ਵ. ੩੭੬) ਹਿ ਵੁਤ੍ਤਂ. ਉਪਜ੍ਝਾਚਰਿਯਵਤ੍ਤਵਿਨਿਚ੍ਛਯੋ.

ਉਪਜ੍ਝਾਚਰਿਯਵਤ੍ਤਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.