੧੪. ਭੂਮਿਨਿਦ੍ਦੇਸਵਣ੍ਣਨਾ

੧੩੬. ਇਦਾਨਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਚਤਸ੍ਸੋ ਕਪ੍ਪਿਯਭੂਮਿਯੋ ਉਸ੍ਸਾਵਨਨ੍ਤਿਕਂ ਗੋਨਿਸਾਦਿਕਂ ਗਹਪਤਿਂ ਸਮ੍ਮੁਤਿ’’ਨ੍ਤਿ (ਮਹਾਵ. ੨੯੫) ਏਵਂ ਵੁਤ੍ਤਾ ਚਤਸ੍ਸੋ ਕਪ੍ਪਿਯਭੂਮਿਯੋ ਦਸ੍ਸੇਤੁਂ ‘‘ਸਮ੍ਮੁਤੁਸ੍ਸਾਵਨਨ੍ਤਾ ਚਾ’’ਤਿਆਦਿਮਾਹ. ਯਾਸੂਤਿ ਕਪ੍ਪਿਯਭੂਮੀਸੁ (ਕਙ੍ਖਾ. ਅਟ੍ਠ. ਸਨ੍ਨਿਧਿਕਾਰਕਸਿਕ੍ਖਾਪਦਵਣ੍ਣਨਾ).

੧੩੭. ਇਦਾਨਿ ਯਤ੍ਥ ਕਪ੍ਪਿਯਕੁਟਿ ਇਚ੍ਛਿਤਬ੍ਬਾ, ਤਂ ਦਸ੍ਸੇਤੁਂ ‘‘ਵਾਸਤ੍ਥਾਯਾ’’ਤਿਆਦਿਮਾਹ. ਵਾਸਤ੍ਥਾਯਾਤਿ ਇਮਿਨਾ ਕੋਟ੍ਠਾਗਾਰਭਤ੍ਤਸਾਲਾਚੇਤਿਯਘਰਸਮ੍ਮੁਞ੍ਜਨੀਮਾਲ਼ਕਾਦਿ ਯਂ ਯਂ ਅਞ੍ਞਮ੍ਪਿ ਵਾਸਤ੍ਥਾਯ ਕਰੀਯਤਿ, ਤਤ੍ਥ ਤਤ੍ਥ ਕਪ੍ਪਿਯਕੁਟਿਕਰਣਕਿਚ੍ਚਂ ਨਤ੍ਥੀਤਿ ਦੀਪਿਤਂ ਹੋਤਿ. ਭੋਜਨਸਾਲਾ ਪਨ ਸੇਨਾਸਨਮੇਵ, ਤਸ੍ਮਾ ਤਤ੍ਥ ਕਾਤਬ੍ਬਾ ਏਵਾਤਿ ਵਦਨ੍ਤਿ. ਸਙ੍ਘਿਕੇਵੇਕਸਨ੍ਤਕੇਤਿ ਏਤ੍ਥ ਏਕਸਨ੍ਤਕੋ ਉਪਸਮ੍ਪਨ੍ਨਸਨ੍ਤਕੋਵ ਵੇਦਿਤਬ੍ਬੋ.

੧੩੮. ਇਦਾਨਿ ਕਤ੍ਤਬ੍ਬਾਕਾਰਂ ਦਸ੍ਸੇਤੁਂ ‘‘ਗੇਹੇ’’ਤਿਆਦਿਮਾਹ. ਤਤ੍ਥ ਸਙ੍ਘਸ੍ਸ ਵਾ ਏਕਸ੍ਸ ਵਾ ਗੇਹੇ ਵਿਹਾਰੇ ਕਰਿਯਮਾਨੇ ਏਵਂ ਈਰਯਂ ‘‘ਕਪ੍ਪਿਯਕੁਟਿਂ ਕਰੋਮ, ਕਪ੍ਪਿਯਕੁਟਿਂ ਕਰੋਮਾ’’ਤਿ ਵਾ ‘‘ਕਪ੍ਪਿਯਕੁਟਿ ਕਪ੍ਪਿਯਕੁਟੀ’’ਤਿ ਵਾ ਵਦਨ੍ਤੋ ਪਠਮਿਟ੍ਠਕਤ੍ਥਮ੍ਭਾਦਿਂ ਠਪੇਯ੍ਯ, ਏਵਂ ਕਤਾ ਉਸ੍ਸਾਵਨਨ੍ਤਿਕਾ ਨਾਮ, ਏਵਂ ਉਦਾਹਰਿਤਵਚਨਨ੍ਤਿਕਾਤਿ ਅਤ੍ਥੋ.

੧੩੯. ਯੇਭੁਯ੍ਯੇਨ ਵਾ ਅਪਰਿਕ੍ਖਿਤ੍ਤੋ, ਸਕਲੋਪਿ ਵਾ ਅਪਰਿਕ੍ਖਿਤ੍ਤੋ ਆਰਾਮੋ ‘‘ਗੋਨਿਸਾਦੀ’’ਤਿ ਵੁਚ੍ਚਤੀਤਿ ਸਮ੍ਬਨ੍ਧੋ. ਏਤ੍ਥ ਪਨ ਸੇਨਾਸਨੇਸੁ ਪਰਿਕ੍ਖਿਤ੍ਤੇਸੁਪਿ ਆਰਾਮੇ ਅਪਰਿਕ੍ਖਿਤ੍ਤੇ ਕਪ੍ਪਿਯਕੁਟਿਕਰਣਕਿਚ੍ਚਂ ਨਤ੍ਥਿ. ਸਮ੍ਮੁਤਿਂ ਕਰੋਨ੍ਤੇਹਿ ਕਤਂ ਪਰਿਯੋਸਿਤਂ ‘‘ਇਮਂ ਵਿਹਾਰਂ ਅਡ੍ਢਯੋਗਂ ਪਾਸਾਦਂ ਹਮ੍ਮਿਯਂ ਗੁਹਂ ਤਿਣਕੁਟਿਕਂ ਮਣ੍ਡਪ’’ਨ੍ਤਿ ਤੇਸਂ ਨਾਮਂ ਗਹੇਤ੍ਵਾ ਤਸ੍ਸਾ ਕੁਟਿਯਾ ਹਤ੍ਥਪਾਸੇ ਵਾ ਠਤ੍ਵਾ, ਤਸ੍ਸਾ ਅਨ੍ਤੋ ਵਾ ਪਵਿਸਿਤ੍ਵਾ ਵੁਤ੍ਤਨਯੇਨੇਵ ਞਤ੍ਤਿਦੁਤਿਯਕਮ੍ਮਵਾਚਾਯ ਸਮ੍ਮਨ੍ਨਿਤਬ੍ਬਂ.

੧੪੦. ‘‘ਭਿਕ੍ਖੁਂ ਠਪੇਤ੍ਵਾ ਅਞ੍ਞੇਹੀ’’ਤਿ ਵਚਨਤੋ ਸੇਸਸਹਧਮ੍ਮਿਕੇਹਿਪਿ ਦੇਵਮਨੁਸ੍ਸੇਹਿਪਿ ਅਞ੍ਞੇਹਿ ਕਪ੍ਪਿਯਕੁਟਿਯਾ ਅਤ੍ਥਾਯ ਦਿਨ੍ਨੋ ਵਾ ਤੇਸਂ ਸਨ੍ਤਕੋ ਵਾ ਗੇਹੋ ‘‘ਗਹਪਤੀ’’ਤਿ ਮਤੋ ਞਾਤੋਤਿ ਅਤ੍ਥੋ, ਸਙ੍ਘਸਨ੍ਤਕਞ੍ਚ ਭਿਕ੍ਖੁਸਨ੍ਤਕਞ੍ਚ ਠਪੇਤ੍ਵਾ ਸਬ੍ਬੇਸਂ ਗੇਹੋ ਗਹਪਤੀਤਿ ਅਧਿਪ੍ਪਾਯੋ.

੧੪੧. ਸਪ੍ਪਿਆਦੀਹਿ ਮਿਸ੍ਸਿਤਨ੍ਤਿ ਸਪ੍ਪਿਆਦੀਹਿ ਪਞ੍ਚਹਿ ਚ ਹਲਿਦ੍ਦਿਸਿਙ੍ਗਿਵੇਰਾਦਿਯਾਵਜੀਵਿਕੇਨ ਚਾਤਿ ਅਤ੍ਥੋ. ਵਜੇਯ੍ਯ ਅਨ੍ਤੋਵੁਤ੍ਥਤ੍ਤਨ੍ਤਿ ਏਤ੍ਥ ਯਾਵਕਾਲਿਕਯਾਮਕਾਲਿਕਸਙ੍ਖਾਤਂ ਪੁਰਿਮਕਾਲਿਕਦ੍ਵਯਂ ਸਙ੍ਘਿਕਂ ਵਾ ਭਿਕ੍ਖੁਸ੍ਸ ਵਾ ਭਿਕ੍ਖੁਨਿਯਾ ਵਾ ਸਨ੍ਤਕਂ ਸਯਂ ਕਪ੍ਪਿਯਕੁਟਿਯਾ ਵੁਤ੍ਥਮ੍ਪਿ ਇਤਰੇਹਿ ਅਕਪ੍ਪਿਯਕੁਟਿਯਾ ਵੁਤ੍ਥੇਹਿ ਮਿਸ੍ਸਿਤਂ ਅਨ੍ਤੋਵੁਤ੍ਥਭਾਵਂ ਆਗਚ੍ਛੇਯ੍ਯਾਤਿ ਅਤ੍ਥੋ.

੧੪੨. ਤੇਹੇਵਾਤਿ ਅਕਪ੍ਪਿਯਕੁਟਿਯਂ ਵੁਤ੍ਥਸਪ੍ਪਿਤੇਲਾਦੀਹਿ. ਸਾਮਪਾਕਤਨ੍ਤਿ ਸਾਮਂਪਕ੍ਕਭਾਵਂ ਗਚ੍ਛਤੀਤਿ ਅਤ੍ਥੋ.

੧੪੩-੪. ਇਮਾ ਪਨ ਕਪ੍ਪਿਯਕੁਟਿਯੋ ਯਦਾ ਜਹਿਤਵਤ੍ਥੁਕਾ ਹੋਨ੍ਤਿ, ਤਂ ਦਸ੍ਸੇਤੁਂ ‘‘ਉਸ੍ਸਾਵਨਨ੍ਤਿਕਾ’’ਤਿਆਦਿਮਾਹ. ਸਚੇ ਥਮ੍ਭੇ ਵਾ ਭਿਤ੍ਤਿਪਾਦੇ ਵਾ ਪਰਿਵਤ੍ਤੇਨ੍ਤਿ, ਯੋ ਯੋ ਠਿਤੋ, ਤਤ੍ਥ ਤਤ੍ਥ ਪਤਿਟ੍ਠਾਤਿ, ਏਤੇਨੁਪਾਯੇਨ ਸਬ੍ਬੇਸੁ ਪਰਿਵਤ੍ਤੇਸੁਪਿ ਨ ਵਿਜਹਿਤਵਤ੍ਥੁਕਾਵ ਹੋਤੀਤਿ ਅਤ੍ਥੋ. ਪਰਿਕ੍ਖਿਤ੍ਤੇ ਗੋਨਿਸਾਦਿ ਵਿਜਹਿਤਵਤ੍ਥੁਕਾ. ਸੇਸਾ ਛਦਨਵਿਬ੍ਭਮਾਤਿ ਛਦਨਵਿਨਾਸਾ ਜਹਿਤਵਤ੍ਥੁਕਾ ਹੋਨ੍ਤੀਤਿ ਅਧਿਪ੍ਪਾਯੋ. ਭੂਮਿਵਿਨਿਚ੍ਛਯੋ.

ਭੂਮਿਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.