੧੨. ਪਾਚਿਤ੍ਤਿਯਨਿਦ੍ਦੇਸਵਣ੍ਣਨਾ

੧੨੧. ਇਦਾਨਿ ਪਾਚਿਤ੍ਤਿਯਾਨਿ ਦਸ੍ਸੇਤੁਂ ‘‘ਪਾਚਿਤ੍ਤੀ’’ਤਿ ਮਾਤਿਕਾਪਦਂ ਉਦ੍ਧਰਿਤ੍ਵਾ ‘‘ਮੁਸਾਵਾਦੋਮਸਾਵਾਦੇ, ਪੇਸੁਞ੍ਞਹਰਣੇ’’ਤਿਆਦਿ ਵੁਤ੍ਤਂ. ਤਤ੍ਥ ਮੁਸਾਵਾਦੇ ਚ ਓਮਸਵਾਦੇ ਚ ਪੇਸੁਞ੍ਞਹਰਣੇ ਚ ਪਾਚਿਤ੍ਤਿ ਵੁਤ੍ਤਾਤਿ ਸਮ੍ਬਨ੍ਧੋ. ਏਵਂ ਸੇਸੇਸੁਪਿ. ਏਤ੍ਥ ਪਨ ‘‘ਅਦਿਟ੍ਠਂ, ਅਸੁਤਂ, ਅਮੁਤਂ, ਅਵਿਞ੍ਞਾਤਂ, ਦਿਟ੍ਠਂ, ਸੁਤਂ, ਮੁਤਂ, ਵਿਞ੍ਞਾਤ’’ਨ੍ਤਿ (ਪਾਚਿ. ੩; ਪਾਚਿ. ਅਟ੍ਠ. ੩) ਪੁਬ੍ਬੇਪਿ ‘‘ਮੁਸਾ ਭਣਿਸ੍ਸਾਮੀ’’ਤਿ ਚੇਤੇਤ੍ਵਾ ਵਚਨਕ੍ਖਣੇਵ ‘‘ਮੁਸਾ ਭਣਾਮੀ’’ਤਿ ਜਾਨਿਤ੍ਵਾ ਜਾਨਨ੍ਤਸ੍ਸੇਵ ਮੁਸਾਭਣਨੇ ਪਾਚਿਤ੍ਤਿ ਨਾਮ ਆਪਤ੍ਤਿ ਹੋਤੀਤਿ ਅਤ੍ਥੋ. ਯਸ੍ਸ ਭਣਤਿ, ਸੋ ਤਂ ਨ ਸੁਣਾਤਿ, ਆਪਤ੍ਤਿ ਨ ਹੋਤਿ (ਕਙ੍ਖਾ. ਅਟ੍ਠ. ਮੁਸਾਵਾਦਸਿਕ੍ਖਾਪਦਵਣ੍ਣਨਾ).

‘‘ਓਮਸਵਾਦੋ ਨਾਮ ਦਸਹਿ ਆਕਾਰੇਹਿ ਓਮਸਤਿ ਜਾਤਿਯਾਪਿ ਨਾਮੇਨਪਿ ਗੋਤ੍ਤੇਨਪਿ ਕਮ੍ਮੇਨਪਿ ਸਿਪ੍ਪੇਨਪਿ ਆਬਾਧੇਨਪਿ ਲਿਙ੍ਗੇਨਪਿ ਕਿਲੇਸੇਨਪਿ ਆਪਤ੍ਤਿਯਾਪਿ ਅਕ੍ਕੋਸੇਨਪੀ’’ਤਿ (ਪਾਚਿ. ੧੫) ਏਵਂ ਵੁਤ੍ਤੇਹਿ ਦਸਹਿ ਆਕਾਰੇਹਿ ਉਪਸਮ੍ਪਨ੍ਨਂ ਯੋ ਖੁਂਸੇਤਿ ਵਮ੍ਭੇਤਿ, ਅਯਂ ਓਮਸਤਿ ਨਾਮ, ਤਸ੍ਸ ਪਾਚਿਤ੍ਤੀਤਿ ਅਤ੍ਥੋ. ਪਰਮ੍ਮੁਖਾ ਭਣਨ੍ਤਸ੍ਸ ਦੁਕ੍ਕਟਂ, ਤਥਾ ਪਾਲ਼ਿਯਂ ਅਨਾਗਤੇਹਿ ‘‘ਚੋਰੋ’’ਤਿ ਵਾ ‘‘ਗਣ੍ਠਿਭੇਦਕੋ’’ਤਿ ਵਾ ਆਦੀਹਿ ਭਣਨ੍ਤਸ੍ਸ. ‘‘ਸਨ੍ਤਿ ਇਧੇਕਚ੍ਚੇ ਖਤ੍ਤਿਯਾ ਬ੍ਰਾਹ੍ਮਣਾ ਚਣ੍ਡਾਲਾ’’ਤਿਆਦਿਨਾ ਪਰਿਯਾਯੇਨ ਭਣਨ੍ਤਸ੍ਸ ਚ ਅਨੁਪਸਮ੍ਪਨ੍ਨਂ ਭਣਨ੍ਤਸ੍ਸ ਚ ਸਬ੍ਬਤ੍ਥਪਿ ਦੁਕ੍ਕਟਮੇਵ.

ਪਿਯਕਮ੍ਯਤਾਯ ਵਾ ਭੇਦਾਧਿਪ੍ਪਾਯੇਨ ਵਾ ਉਪਸਮ੍ਪਨ੍ਨਂ ਜਾਤਿਆਦੀਹਿ ਓਮਸਨ੍ਤਸ੍ਸ ਉਪਸਮ੍ਪਨ੍ਨਸ੍ਸ ਵਚਨਂ ਸੁਤ੍ਵਾ ਤਸ੍ਸ ਉਪਸਂਹਰਣਂ ਪੇਸੁਞ੍ਞਹਰਣਂ ਨਾਮ. ਏਤ੍ਥਾਪਿ ਪਰਿਯਾਯਵਚਨੇਨ ਚ ਅਨੁਪਸਮ੍ਪਨ੍ਨਸ੍ਸ ਉਪਸਂਹਰਣੇਨ ਚ ਦੁਕ੍ਕਟਮੇਵ.

ਪਦਸੋਧਮ੍ਮੋਤਿ ਏਤ੍ਥ ‘‘ਧਮ੍ਮੋ ਨਾਮ ਬੁਦ੍ਧਭਾਸਿਤੋ ਸਾਵਕਭਾਸਿਤੋ ਇਸਿਭਾਸਿਤੋ ਦੇਵਤਾਭਾਸਿਤੋ ਅਤ੍ਥੂਪਸਂਹਿਤੋ ਧਮ੍ਮੂਪਸਂਹਿਤੋ’’ਤਿ (ਪਾਚਿ. ੪੬) ਏਵਂ ਵੁਤ੍ਤਂ ਸਙ੍ਗੀਤਿਤ੍ਤਯਮਾਰੁਲ਼੍ਹਂ ਤਿਪਿਟਕਧਮ੍ਮਂ ਪਦਅਨੁਪਦਅਨ੍ਵਕ੍ਖਰਅਨੁਬ੍ਯਞ੍ਜਨਵਸੇਨ ਭਿਕ੍ਖੁਞ੍ਚ ਭਿਕ੍ਖੁਨਿਞ੍ਚ ਠਪੇਤ੍ਵਾ ਅਨੁਪਸਮ੍ਪਨ੍ਨਂ ਏਕਤੋ ਵਾਚੇਨ੍ਤਸ੍ਸ ਪਾਚਿਤ੍ਤਿ ਹੋਤੀਤਿ ਅਤ੍ਥੋ.

ਸਾਗਾਰੇਤਿ ਯਂ ਪਨ ਸਬ੍ਬਨ੍ਤਿਮੇਨ ਪਰਿਯਾਯੇਨ ਦਿਯਡ੍ਢਹਤ੍ਥੁਬ੍ਬੇਧੇਨ ਪਾਕਾਰਾਦਿਨਾ ਪਰਿਕ੍ਖਿਤ੍ਤਤ੍ਤਾ ਸਬ੍ਬਪਰਿਚ੍ਛਿਨ੍ਨਞ੍ਚ ਯੇਨ ਕੇਨਚਿ ਵਿਤਾਨਾਦਿਨਾ ਅਨ੍ਤਮਸੋ ਵਤ੍ਥੇਨਪਿ ਛਨ੍ਨਤ੍ਤਾ ਸਬ੍ਬਚ੍ਛਨ੍ਨਞ੍ਚ ਸੇਨਾਸਨਂ, ਤਥਾਰੂਪੇ ਸੇਨਾਸਨੇ ਏਕੂਪਚਾਰਟ੍ਠਾਨੇ ਅਨੁਪਸਮ੍ਪਨ੍ਨੇਨ ਸਹ ਵਸਨ੍ਤਸ੍ਸ ਚਤੁਤ੍ਥਦਿਵਸਤੋ ਪਟ੍ਠਾਯ ਨਿਪਜ੍ਜਨਗਣਨਾਯ ਚ ਅਨੁਪਸਮ੍ਪਨ੍ਨਗਣਨਾਯ ਚ ਦੇਵਸਿਕਂ ਪਾਚਿਤ੍ਤਿ ਹੋਤੀਤਿ ਅਤ੍ਥੋ.

ਉਜ੍ਝਾਪਨਕਖਿਯ੍ਯਨੇਤਿ ਏਤ੍ਥ ਯੋ ਉਪਸਮ੍ਪਨ੍ਨਂ ਸਙ੍ਘੇਨ ਸਮ੍ਮਤਂ ਸੇਨਾਸਨਪਞ੍ਞਾਪਕਂ ਵਾ ਭਤ੍ਤੁਦ੍ਦੇਸਕਂ ਵਾ ਯਾਗੁਭਾਜਕਂ ਵਾ ਫਲਭਾਜਕਂ ਵਾ ਖਜ੍ਜਭਾਜਕਂ ਵਾ ਅਪ੍ਪਮਤ੍ਤਕਵਿਸ੍ਸਜ੍ਜਕਂ ਵਾ ਮਙ੍ਕੁਕਤ੍ਤੁਕਾਮੋ ਛਨ੍ਦੇਨ ‘‘ਇਤ੍ਥਨ੍ਨਾਮੋ ਸੇਨਾਸਨਂ ਪਞ੍ਞਾਪੇਤਿ, ਭਤ੍ਤਾਨਿ ਚ ਉਦ੍ਦਿਸਤੀ’’ਤਿ ਵਾ ਵਦਨ੍ਤੋ ਅਞ੍ਞਂ ਉਪਸਮ੍ਪਨ੍ਨਂ ਉਜ੍ਝਾਪੇਤਿ ਤੇਨ ਅਵਜਾਨਾਪੇਤਿ, ਯੋ ਪਨ ਤਥੇਵ ਵਦਨ੍ਤੋ ਉਪਸਮ੍ਪਨ੍ਨਸ੍ਸ ਸਨ੍ਤਿਕੇ ਤਸ੍ਸ ਅਯਸਂ ਪਕਾਸੇਨ੍ਤੋ ਖੀਯਤਿ, ਤਸ੍ਮਿਂ ਉਜ੍ਝਾਪਨਕੇ ਚ ਖੀਯਨਕੇ ਚ ਪਾਚਿਤ੍ਤਿਦ੍ਵਯਨ੍ਤਿ ਵੇਦਿਤਬ੍ਬਂ.

੧੨੨. ਤਲਸਤ੍ਤਿਅਨਾਦਰ-ਕੁਕ੍ਕੁਚ੍ਚੁਪ੍ਪਾਦਨੇਸੁ ਚਾਤਿ ਏਤ੍ਥ ਯੋ ਭਿਕ੍ਖੁ ਉਪਸਮ੍ਪਨ੍ਨਸ੍ਸ ਪਹਰਣਾਕਾਰਂ ਦਸ੍ਸੇਨ੍ਤੋ ਕਾਯਂ ਵਾ ਕਾਯਪ੍ਪਟਿਬਦ੍ਧਂ ਵਾ ਉਚ੍ਚਾਰੇਤਿ, ਤਸ੍ਸ ਪਾਚਿਤ੍ਤਿਯਂ. ਸਚੇ ਵਿਰਦ੍ਧੋ ਪਹਾਰਂ ਦੇਤਿ, ਅਪ੍ਪਹਰਿਤੁਕਾਮਤਾਯ ਦੁਕ੍ਕਟਂ, ਤਥਾ ਅਨੁਪਸਮ੍ਪਨ੍ਨੇਸੁਪਿ ਦੁਕ੍ਕਟਮੇਵ.

ਉਪਸਮ੍ਪਨ੍ਨੇਨ ਪਞ੍ਞਤ੍ਤੇਨ ਵੁਚ੍ਚਮਾਨੋ ਤਂ ਅਸਿਕ੍ਖਿਤੁਕਾਮਤਾਯ ਵਾ ਤਸ੍ਸ ਵਚਨਂ ਅਸੋਤੁਕਾਮਤਾਯ ਵਾ ਯੋ ਅਨਾਦਰਿਯਂ ਕਰੋਤਿ, ਤਸ੍ਸ ਅਨਾਦਰਕਰਣੇ ਪਾਚਿਤ੍ਤਿਯਨ੍ਤਿ ਅਤ੍ਥੋ. ਅਪਞ੍ਞਤ੍ਤੇਨ ਵੁਚ੍ਚਮਾਨਸ੍ਸ ਚ ਅਨੁਪਸਮ੍ਪਨ੍ਨੇਨ ਪਞ੍ਞਤ੍ਤੇਨ ਵਾ ਅਪਞ੍ਞਤ੍ਤੇਨ ਵਾ ਵੁਚ੍ਚਮਾਨਸ੍ਸ ਦੁਕ੍ਕਟਂ.

ਉਪਸਮ੍ਪਨ੍ਨਸ੍ਸ ‘‘ਊਨਵੀਸਤਿਵਸ੍ਸੋ ਮਞ੍ਞੇ ਤ੍ਵਂ ਉਪਸਮ੍ਪਨ੍ਨੋ, ਵਿਕਾਲੇ ਮਞ੍ਞੇ ਤਯਾ ਭੁਤ੍ਤ’’ਨ੍ਤਿਆਦਿਨਾ ਨਯੇਨ ਸਞ੍ਚਿਚ੍ਚ ਕੁਕ੍ਕੁਚ੍ਚਂ ਉਪ੍ਪਾਦੇਨ੍ਤਸ੍ਸ ਪਾਚਿਤ੍ਤਿਯਂ. ਅਨੁਪਸਮ੍ਪਨ੍ਨਸ੍ਸ ਉਪ੍ਪਾਦਨੇ ਦੁਕ੍ਕਟਂ.

ਗਾਮਪ੍ਪਵੇਸਨਾਪੁਚ੍ਛਾਤਿ ਏਤ੍ਥ ਪਨ ਮਜ੍ਝਨ੍ਹਿਕਾਤਿਕ੍ਕਮਨਤੋ ਪਟ੍ਠਾਯ ਯਾਵ ਅਰੁਣੁਗ੍ਗਮਨਾ ਵਿਕਾਲੋ ਨਾਮ, ਏਤ੍ਥਨ੍ਤਰੇ ਸਚੇ ਸਮ੍ਬਹੁਲਾ ਕੇਨਚਿ ਕਮ੍ਮੇਨ ਗਾਮਂ ਪਵਿਸਨ੍ਤਿ, ‘‘ਵਿਕਾਲੇ ਗਾਮਪ੍ਪਵੇਸਨਂ ਆਪੁਚ੍ਛਾਮਾ’’ਤਿ ਸਬ੍ਬੇਹਿਪਿ ਅਞ੍ਞਮਞ੍ਞਂ ਆਪੁਚ੍ਛਿਤਬ੍ਬਂ. ਸਚੇ ਅਨਾਪੁਚ੍ਛਾ ਪਰਿਕ੍ਖਿਤ੍ਤਸ੍ਸ ਪਰਿਕ੍ਖੇਪਂ, ਅਪਰਿਕ੍ਖਿਤ੍ਤਸ੍ਸ ਉਪਚਾਰਂ ਅਤਿਕ੍ਕਮਨ੍ਤਿ, ਪਠਮਪਾਦੇ ਦੁਕ੍ਕਟਂ, ਦੁਤਿਯਪਾਦੁਦ੍ਧਾਰੇ ਪਾਚਿਤ੍ਤਿਯਂ. ਆਪਦਾਸੁ ਅਨਾਪਤ੍ਤਿ.

ਭੋਜਨੇ ਚ ਪਰਮ੍ਪਰਾਤਿ ਪਰਮ੍ਪਰਭੋਜਨੇ ਚ ਪਾਚਿਤ੍ਤਿਯਨ੍ਤਿ ਅਤ੍ਥੋ. ਏਤ੍ਥ ਪਨ ਪਞ੍ਚਸੁ ਭੋਜਨੇਸੁ ਅਞ੍ਞਤਰਂ ਨਾਮਂ ਗਹੇਤ੍ਵਾ ‘‘ਓਦਨੇਨ ਵਾ ਸਤ੍ਤੁਨਾ ਵਾ ਕੁਮ੍ਮਾਸੇਨ ਵਾ ਮਂਸੇਨ ਵਾ ਮਚ੍ਛੇਨ ਵਾ ਨਿਮਨ੍ਤੇਮੀ’’ਤਿਆਦਿਨਾ ਨਯੇਨ, ਯੇਨ ਕੇਨਚਿ ਵੇਵਚਨੇਨ ਵਾ ਅਕਪ੍ਪਿਯਨਿਮਨ੍ਤਨਾਯ ਨਿਮਨ੍ਤਿਤਸ੍ਸ ਯੇਨ ਯੇਨ ਪਠਮਂ ਨਿਮਨ੍ਤਿਤੋ, ਤਸ੍ਸ ਤਸ੍ਸ ਭੋਜਨਂ ਠਪੇਤ੍ਵਾ ਉਪ੍ਪਟਿਪਾਟਿਯਾ, ਅਵਿਕਪ੍ਪੇਤ੍ਵਾ ਵਾ ਪਠਮਨਿਮਨ੍ਤਨਂ ਪਰਸ੍ਸ ਪਰਸ੍ਸ ਕੁਲਸ੍ਸ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਂ ਪਰਿਭੁਞ੍ਜਨ੍ਤਸ੍ਸ ਪਰਮ੍ਪਰਭੋਜਨੇ ਪਾਚਿਤ੍ਤਿ ਹੋਤਿ. ਗਿਲਾਨਚੀਵਰਦਾਨਚੀਵਰਕਾਲਸਮਯੇਸੁ ਅਨਾਪਤ੍ਤਿ, ਤਥਾ ਪਞ੍ਚ ਭੋਜਨਾਨਿ ਠਪੇਤ੍ਵਾ ਸਬ੍ਬਤ੍ਥ.

੧੨੩. ਅਨੁਦ੍ਧਰਿਤ੍ਵਾ ਗਮਨੇ ਸੇਯ੍ਯਨ੍ਤਿ ਏਤ੍ਥ ਦਸਵਿਧਾ ਸੇਯ੍ਯਾ ਭਿਸਿ ਚਿਮਿਲਿਕਾ ਉਤ੍ਤਰਤ੍ਥਰਣਂ ਭੂਮਤ੍ਥਰਣਂ ਤਟ੍ਟਿਕਾ ਚਮ੍ਮਖਣ੍ਡੋ ਨਿਸੀਦਨਂ ਪਚ੍ਚਤ੍ਥਰਣਂ ਤਿਣਸਨ੍ਥਾਰੋ ਪਣ੍ਣਸਨ੍ਥਾਰੋਤਿ. ਏਤੇਸੁ ਯਂ ਕਿਞ੍ਚਿ ਸਙ੍ਘਿਕੇ ਵਿਹਾਰੇ ਗੁਤ੍ਤਸੇਨਾਸਨੇ ਅਤ੍ਤਨੋ ਵਸ੍ਸਗ੍ਗੇਨ ਗਹਿਤਂ ਅਤ੍ਤਨਾ ਵਾ ਸਨ੍ਥਰਿਤ੍ਵਾ, ਅਨੁਪਸਮ੍ਪਨ੍ਨੇਨ ਵਾ ਸਨ੍ਥਰਾਪੇਤ੍ਵਾ ਤਂ ਦਿਵਸਂ ਗਮਿਕਵਸੇਨ ਪਕ੍ਕਮਨ੍ਤੋ ਨੇਵ ਸਯਂ ਉਦ੍ਧਰੇਯ੍ਯ ਨ ਅਞ੍ਞਂ ਉਦ੍ਧਰਾਪੇਯ੍ਯ, ਯਥਾ ਉਪਚਿਕਾਦੀਹਿ ਨ ਖਜ੍ਜੇਯ੍ਯ, ਏਵਂ ਨ ਠਪੇਯ੍ਯ, ਅਞ੍ਞੇਨ ਵਾ ਨ ਉਦ੍ਧਰਾਪੇਯ੍ਯ, ਪਤਿਰੂਪਂ ਭਿਕ੍ਖੁਂ ਵਾ ਸਾਮਣੇਰਂ ਵਾ ਆਰਾਮਿਕਮੇਵ ਵਾ ਅਨਾਪੁਚ੍ਛਾ ਵਾ ਗਚ੍ਛੇਯ੍ਯ, ਤਸ੍ਸ ਪਰਿਕ੍ਖਿਤ੍ਤਸ੍ਸ ਵਿਹਾਰਸ੍ਸ ਪਰਿਕ੍ਖੇਪਂ, ਅਪਰਿਕ੍ਖਿਤ੍ਤਸ੍ਸ ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਨ੍ਤਸ੍ਸ ਪਾਚਿਤ੍ਤਿਯਂ. ਮਣ੍ਡਪਰੁਕ੍ਖਮੂਲਾਦਿਅਗੁਤ੍ਤਸੇਨਾਸਨੇ ਸਨ੍ਥਰਿਤ੍ਵਾ ਗਚ੍ਛਨ੍ਤਸ੍ਸ ਦੁਕ੍ਕਟਂ, ਤਥਾ ਮਞ੍ਚਪੀਠਭਿਸਿਕੋਚ੍ਛਕੇਸੁ, ਗੁਤ੍ਤਸੇਨਾਸਨੇਪਿ ਦੁਕ੍ਕਟਮੇਵ.

ਸੇਨਾਸਨਾਨਿ ਵਾਤਿ ਏਤ੍ਥ ਅਨੁਦ੍ਧਰਿਤ੍ਵਾ ਗਮਨੇਤਿ ਸਮ੍ਬਨ੍ਧੋ. ਏਤ੍ਥ ਪਨ ਮਞ੍ਚੋ ਪੀਠਂ ਭਿਸਿ ਕੋਚ੍ਛਕਨ੍ਤਿ ਚਤੁਬ੍ਬਿਧਮ੍ਪਿ ਸੇਨਾਸਨਂ ਵਸ੍ਸਾਨਹੇਮਨ੍ਤਾਨਂ ਅਟ੍ਠਸੁ ਮਾਸੇਸੁ ਅਜ੍ਝੋਕਾਸੇ ਵਾ ਓਵਸ੍ਸਕਮਣ੍ਡਪੇ ਵਾ ਰੁਕ੍ਖਮੂਲੇ ਵਾ ਸਯਂ ਸਨ੍ਥਰਿਤ੍ਵਾ ਵਾ ਅਨੁਪਸਮ੍ਪਨ੍ਨੇਨ ਸਨ੍ਥਰਾਪੇਤ੍ਵਾ ਵਾ ਤਂ ਅਨੁਦ੍ਧਰਿਤ੍ਵਾ ਵਾ ਅਨੁਦ੍ਧਰਾਪੇਤ੍ਵਾ ਵਾ ਤਸ੍ਸ ਸੇਨਾਸਨਸ੍ਸ ਦ੍ਵਿਨ੍ਨਂ ਲੇਡ੍ਡੁਪਾਤਾਨਂ ਅਤਿਕ੍ਕਮਨੇ ਪਾਚਿਤ੍ਤਿਯਂ. ਸਮ੍ਮੁਞ੍ਜਨੀਯਾਦਿ ਸੇਸਪਰਿਕ੍ਖਾਰੇਸੁ ਦੁਕ੍ਕਟਂ.

ਇਤ੍ਥਿਯਾਦ੍ਧਾਨਗਮਨੇਤਿ ਏਤ੍ਥ ਮਾਤੁਗਾਮੇਨ ‘‘ਗਚ੍ਛਾਮ ਭਗਿਨਿ, ਗਚ੍ਛਾਮ ਅਯ੍ਯਾ’’ਤਿ ਏਵਂ ਸਂਵਿਦਹਿਤ੍ਵਾ ‘‘ਅਜ੍ਜ ਵਾ ਸ੍ਵੇ ਵਾ ਪਰਸੁਵੇ ਵਾ’’ਤਿ ਨਿਯਮਿਤਕਾਲਂ ਵਿਸਙ੍ਕੇਤਂ ਅਕਤ੍ਵਾ ਦ੍ਵਾਰਵਿਸਙ੍ਕੇਤਂ ਮਗ੍ਗਵਿਸਙ੍ਕੇਤਂ ਕਤ੍ਵਾਪਿ ਗਚ੍ਛਤੋ ਗਾਮਨ੍ਤਰੇ ਗਾਮਨ੍ਤਰੇ ਪਾਚਿਤ੍ਤਿਯਂ. ਅਗਾਮਕੇ ਅਰਞ੍ਞੇ ਅਦ੍ਧਯੋਜਨੇ ਅਦ੍ਧਯੋਜਨੇ ਆਪਤ੍ਤਿ.

ਏਕੇਕਾਯ ਨਿਸੀਦਨੇਤਿ ਏਤ੍ਥ ਏਕੋ ਏਕਾਯ ਇਤ੍ਥਿਯਾ ਨਿਸੀਦਨੇਤਿ ਅਤ੍ਥੋ.

੧੨੪. ਭਿਂਸਾਪਨੇਤਿ ਏਤ੍ਥ ਉਪਸਮ੍ਪਨ੍ਨੋ ਉਪਸਮ੍ਪਨ੍ਨਂ ਭਿਂਸਾਪੇਤੁਕਾਮੋ ਚੋਰਕਨ੍ਤਾਰਵਾਲ਼ਕਨ੍ਤਾਰਾਦੀਨਿ ਆਚਿਕ੍ਖਤਿ, ਭਯਾਨਕਂ ਵਾ ਰੂਪਸਦ੍ਦਾਦਿਂ ਦਸ੍ਸੇਤਿ, ਸੋ ਭਾਯਤੁ ਵਾ ਮਾ ਵਾ, ਤਸ੍ਸ ਪਯੋਗੇ ਪਯੋਗੇ ਪਾਚਿਤ੍ਤਿਯਂ. ਅਨੁਪਸਮ੍ਪਨ੍ਨੇ ਦੁਕ੍ਕਟਂ.

ਆਕੋਟਨੇਤਿ ਪਹਾਰਦਾਨੇ. ਉਪਸਮ੍ਪਨ੍ਨੋ ਉਪਸਮ੍ਪਨ੍ਨਸ੍ਸ ਅਨਤ੍ਤਮਨੋ ਹੁਤ੍ਵਾ ਸਚੇ ਉਪ੍ਪਲਪਤ੍ਤੇਨਪਿ ਪਹਾਰਂ ਦੇਤਿ, ਪਾਚਿਤ੍ਤਿਯਂ. ਅਨੁਪਸਮ੍ਪਨ੍ਨਸ੍ਸ ਗਹਟ੍ਠਸ੍ਸ ਵਾ ਪਬ੍ਬਜਿਤਸ੍ਸ ਵਾ ਇਤ੍ਥਿਯਾ ਵਾ ਪੁਰਿਸਸ੍ਸ ਵਾ ਅਨ੍ਤਮਸੋ ਤਿਰਚ੍ਛਾਨਗਤਸ੍ਸਾਪਿ ਪਹਾਰਂ ਦੇਤਿ, ਦੁਕ੍ਕਟਮੇਵ.

ਅਨਾਚਾਰਂ ਆਚਰਿਤ੍ਵਾ ਸਙ੍ਘਮਜ੍ਝੇ ਆਪਤ੍ਤਿਯਾ ਵਾ ਵਤ੍ਥੁਨਾ ਵਾ ਅਨੁਯੁਞ੍ਜਿਯਮਾਨੋ ਤਂ ਅਕਥੇਤੁਕਾਮੋ ‘‘ਕੋ ਆਪਨ੍ਨੋ, ਕਿਂ ਆਪਨ੍ਨੋ, ਕਿਸ੍ਮਿਂ ਆਪਨ੍ਨੋ’’ਤਿਆਦਿਨਾ ਨਯੇਨ ਅਞ੍ਞੇਹਿ ਵਚਨੇਹਿ ਤਂ ਵਚਨਂ ਪਟਿਚ੍ਛਾਦੇਨ੍ਤੋ ਸੋ ਅਞ੍ਞਂ ਵਦਤਿ, ਅਯਂ ਅਞ੍ਞਵਾਦਕੋ, ਤਸ੍ਮਿਂ ਅਞ੍ਞਵਾਦਕੇ ਚ ਕਞ੍ਚਿ ਵੀਤਿਕ੍ਕਮਂ ਦਿਸ੍ਵਾ ‘‘ਆਵੁਸੋ, ਇਦਂ ਨਾਮ ਤਯਾ ਕਤ’’ਨ੍ਤਿ ਵੁਤ੍ਤੇ ਤਂ ਨ ਕਥੇਤੁਕਾਮੋ ਤੁਣ੍ਹੀਭੂਤੋਵ ਸਙ੍ਘਂ ਵਿਹੇਸਤੀਤਿ ਸਙ੍ਘਵਿਹੇਸਕੋ, ਤਸ੍ਮਿਂ ਵਿਹੇਸਕੇ ਚ ਪਾਚਿਤ੍ਤਿ ਹੋਤੀਤਿ ਅਤ੍ਥੋ. ਇਧ ਪਨ ਞਤ੍ਤਿਦੁਤਿਯੇਨ ਕਮ੍ਮੇਨ ਅਞ੍ਞਵਾਦਕੇ ਚ ਵਿਹੇਸਕੇ ਚ ਆਰੋਪਿਤੇ ਪੁਨ ਅਞ੍ਞਂ ਭਣਨ੍ਤਸ੍ਸ, ਵਿਹੇਸਨ੍ਤਸ੍ਸ ਪਾਚਿਤ੍ਤਿ. ਅਨਾਰੋਪਿਤੇ ਦੁਕ੍ਕਟਨ੍ਤਿ ਵੇਦਿਤਬ੍ਬਂ.

ਦੁਟ੍ਠੁਲ੍ਲਪਕਾਸਛਾਦੇਤਿ ਏਤ੍ਥ ਕਿਞ੍ਚਾਪਿ ‘‘ਦੁਟ੍ਠੁਲ੍ਲਾ ਨਾਮ ਆਪਤ੍ਤਿ ਚਤ੍ਤਾਰਿ ਚ ਪਾਰਾਜਿਕਾਨਿ ਤੇਰਸ ਚ ਸਙ੍ਘਾਦਿਸੇਸਾ’’ਤਿ (ਪਾਚਿ. ੩੯੯) ਵੁਤ੍ਤਾ, ਤਥਾਪਿ ਇਧ ਸਙ੍ਘਾਦਿਸੇਸਾਵ ਅਧਿਪ੍ਪੇਤਾ. ਤਸ੍ਮਾ ਸਙ੍ਘਸਮ੍ਮੁਤਿਂ ਵਿਨਾ ਭਿਕ੍ਖੁਸ੍ਸ ਦੁਟ੍ਠੁਲ੍ਲਂ ਆਪਤ੍ਤਿਂ ‘‘ਅਯਂ ਅਸੁਚਿਂ ਮੋਚੇਤ੍ਵਾ ਸਙ੍ਘਾਦਿਸੇਸਂ ਆਪਨ੍ਨੋ’’ਤਿਆਦਿਨਾ ਨਯੇਨ ਵਤ੍ਥੁਨਾ ਸਦ੍ਧਿਂ ਆਪਤ੍ਤਿਂ ਘਟੇਤ੍ਵਾ ਭਿਕ੍ਖੁਞ੍ਚ ਭਿਕ੍ਖੁਨਿਞ੍ਚ ਠਪੇਤ੍ਵਾ ਯਸ੍ਸ ਕਸ੍ਸਚਿ ਅਨੁਪਸਮ੍ਪਨ੍ਨਸ੍ਸ ਆਰੋਚੇਨ੍ਤਸ੍ਸ ਪਾਚਿਤ੍ਤਿਯਂ. ਥੁਲ੍ਲਚ੍ਚਯਾਦਿਅਦੁਟ੍ਠੁਲ੍ਲਾਰੋਚਨੇ ਦੁਕ੍ਕਟਂ. ਦੁਟ੍ਠੁਲ੍ਲਚ੍ਛਾਦਨੇਪਿ ਸਙ੍ਘਾਦਿਸੇਸੋਵ ਅਧਿਪ੍ਪੇਤੋ. ਯੋ ਪਨ ਭਿਕ੍ਖੁ ਭਿਕ੍ਖੁਸ੍ਸ ਦੁਟ੍ਠੁਲ੍ਲਂ ਆਪਤ੍ਤਿਂ ਸਯਂ ਵਾ ਜਾਨਿਤ੍ਵਾ ਅਞ੍ਞੇਸਂ ਵਾ ਸੁਤ੍ਵਾ ‘‘ਇਮਂ ਜਾਨਿਤ੍ਵਾ ਚੋਦੇਸ੍ਸਨ੍ਤਿ ਸਾਰੇਸ੍ਸਨ੍ਤਿ ਮਙ੍ਕੁਂ ਕਰਿਸ੍ਸਨ੍ਤਿ, ਨਾਰੋਚਿਸ੍ਸਾਮੀ’’ਤਿ ਧੁਰਂ ਨਿਕ੍ਖਿਪਤਿ, ਤਸ੍ਸ ਪਾਚਿਤ੍ਤਿਯਂ. ਧੁਰਂ ਨਿਕ੍ਖਿਪਿਤ੍ਵਾ ਪਚ੍ਛਾ ਆਰੋਚਿਤੇਪਿ ਨ ਰਕ੍ਖਤਿ ਏਵ.

ਹਾਸੋਦਕੇਤਿ ਅਙ੍ਗੁਲਿਪਤੋਦਕੇਨ ਹਾਸੋ ਚ ਉਦਕੇ ਹਾਸੋ ਚਾਤਿ ਏਵਮਤ੍ਥੋ ਵੇਦਿਤਬ੍ਬੋ. ਉਪਸਮ੍ਪਨ੍ਨੋ ਉਪਸਮ੍ਪਨ੍ਨਂ ਹਸਾਧਿਪ੍ਪਾਯੋ ਕਾਯੇਨ ਕਾਯਂ ਆਮਸਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ, ਕੋ ਪਨ ਵਾਦੋ ਉਪਕਚ੍ਛਕਾਦੀਸੁ ਘਟ੍ਟਨੇ. ਅਨੁਪਸਮ੍ਪਨ੍ਨੇ ਦੁਕ੍ਕਟਂ, ਤਥਾ ਭਿਕ੍ਖੁਸ੍ਸ ਕਾਯਪ੍ਪਟਿਬਦ੍ਧਾਮਸਨੇ ਚ ਨਿਸ੍ਸਗ੍ਗਿਯੇਨ ਕਾਯਪ੍ਪਟਿਬਦ੍ਧਾਮਸਨੇ ਚ. ਏਤ੍ਥ ਭਿਕ੍ਖੁਨੀਪਿ ਅਨੁਪਸਮ੍ਪਨ੍ਨਟ੍ਠਾਨੇ ਠਿਤਾ. ਉਦਕੇ ਹਸਨਧਮ੍ਮੋ ਨਾਮ ਉਪਰਿਗੋਪ੍ਫਕੇ ਉਦਕੇ ਕੀਲ਼ਾਧਿਪ੍ਪਾਯਸ੍ਸ ਨਿਮ੍ਮੁਜ੍ਜਨਉਮ੍ਮੁਜ੍ਜਨਪ੍ਲਵਨਾਦਿਕਂ. ਇਧ ਹਾਸੋ ਨਾਮ ਕੀਲ਼ਾ ਵੁਚ੍ਚਤਿ.

ਨਿਚ੍ਛੁਭਨੇ ਵਿਹਾਰਾਤਿ ਸਙ੍ਘਿਕਾ ਵਿਹਾਰਾ ਨਿਕ੍ਕਡ੍ਢਨੇਤਿ ਅਤ੍ਥੋ. ਏਤ੍ਥ ਪਨ ਯੋ ਕੁਦ੍ਧੋ ਹੁਤ੍ਵਾ ਉਪਸਮ੍ਪਨ੍ਨਂ ਹਤ੍ਥਾਦੀਸੁ ਗਹੇਤ੍ਵਾ ਵਾ ‘‘ਨਿਕ੍ਖਮਾ’’ਤਿ ਵਤ੍ਵਾ ਵਾ ਯਤ੍ਤਕਾਨਿ ਦ੍ਵਾਰਾਨਿ ਏਕੇਨ ਪਯੋਗੇਨ ਅਤਿਕ੍ਕਾਮੇਤਿ, ਤਤ੍ਥ ਦ੍ਵਾਰਗਣਨਾਯ ਆਪਤ੍ਤਿਂ ਅਗ੍ਗਹੇਤ੍ਵਾ ਪਯੋਗਸ੍ਸ ਏਕਤ੍ਤਾ ਏਕਾ ਏਵ ਗਹੇਤਬ੍ਬਾ. ਸਚੇ ਨਾਨਾਪਯੋਗੇਹਿ ਅਤਿਕ੍ਕਾਮੇਤਿ, ਤਤ੍ਥ ਦ੍ਵਾਰਗਣਨਾਯ ਗਹੇਤਬ੍ਬਂ. ਤਸ੍ਸ ਪਰਿਕ੍ਖਾਰਨਿਕ੍ਕਡ੍ਢਨੇ ਦੁਕ੍ਕਟਂ, ਤਥਾ ਅਨੁਪਸਮ੍ਪਨ੍ਨੇ, ਤਸ੍ਸ ਪਰਿਕ੍ਖਾਰਨਿਕ੍ਕਡ੍ਢਨੇ ਚ. ਅਲਜ੍ਜਿਆਦੀਸੁ ਪਨ ਅਨਾਪਤ੍ਤਿ.

ਅਨੁਪਖਜ੍ਜ ਸਯਨੇਤਿ ਸਙ੍ਘਿਕੇ ਵਿਹਾਰੇ ‘‘ਵੁਡ੍ਢੋ’’ਤਿ ਵਾ ‘‘ਗਿਲਾਨੋ’’ਤਿ ਵਾ ‘‘ਸਙ੍ਘੇਨ ਦਿਨ੍ਨੋ’’ਤਿ ਵਾ ਜਾਨਿਤ੍ਵਾ ਮਞ੍ਚਸ੍ਸ ਵਾ ਪੀਠਸ੍ਸ ਵਾ ਪਵਿਸਨ੍ਤਸ੍ਸ ਵਾ ਨਿਕ੍ਖਮਨ੍ਤਸ੍ਸ ਵਾ ਉਪਚਾਰੇ ਸੇਯ੍ਯਂ ਸਨ੍ਥਰਿਤ੍ਵਾ ਵਾ ਸਨ੍ਥਰਾਪੇਤ੍ਵਾ ਵਾ ‘‘ਯਸ੍ਸ ਸਮ੍ਬਾਧੋ ਭਵਿਸ੍ਸਤਿ, ਸੋ ਪਕ੍ਕਮਿਸ੍ਸਤੀ’’ਤਿ ਅਧਿਪ੍ਪਾਯੇਨ ਅਭਿਨਿਸੀਦਨ੍ਤਸ੍ਸ ਚ ਅਭਿਨਿਪਜ੍ਜਨ੍ਤਸ੍ਸ ਚ ਪਯੋਗਗਣਨਾਯ ਪਾਚਿਤ੍ਤਿਯਂ ਵੇਦਿਤਬ੍ਬਂ. ਪਾਚਿਤ੍ਤਿਯਵਿਨਿਚ੍ਛਯੋ.

ਪਾਚਿਤ੍ਤਿਯਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.