੧੧. ਨਿਸ੍ਸਗ੍ਗਿਯਨਿਦ੍ਦੇਸਵਣ੍ਣਨਾ

੧੧੬-੭. ਇਦਾਨਿ ਅਚ੍ਚੋਲ਼ਾਰਿਕਾਨਂ ਵਸੇਨ ਦਸ੍ਸੇਤੁਂ ‘‘ਅਰੂਪਿਯ’’ਨ੍ਤਿਆਦਿ ਆਰਦ੍ਧਂ. ਅਞ੍ਞਥਾਪਿ ਯੁਤ੍ਤਿ ਪਰਿਯੇਸਿਤਬ੍ਬਾ. ਤਤ੍ਥਾਯਂ ਸਙ੍ਖੇਪਤ੍ਥੋ (ਪਾਰਾ. ੫੯੧; ਪਾਰਾ. ਅਟ੍ਠ. ੨.੫੮੯; ਕਙ੍ਖਾ. ਅਟ੍ਠ. ਜਾਤਰੁਪਸਿਕ੍ਖਾਪਦਵਣ੍ਣਨਾ) – ਯੋ ਰੂਪਿਯੇਨ ਅਰੂਪਿਯਞ੍ਚ ਪਰਿਵਤ੍ਤੇਯ੍ਯ, ਯੋ ਚ ਇਤਰੇਨ ਚ ਅਰੂਪਿਯੇਨ ਰੂਪਿਯਂ ਪਰਿਵਤ੍ਤੇਯ੍ਯ, ਤਸ੍ਸ ਨਿਸ੍ਸਗ੍ਗਿਯਂ ਹੋਤੀਤਿ.

ਇਦਾਨਿ ਰੂਪਿਯਞ੍ਚ ਅਰੂਪਿਯਞ੍ਚ ਦਸ੍ਸੇਤੁਂ ‘‘ਇਧ ਰੂਪਿਯ’’ਨ੍ਤਿਆਦਿ ਆਰਦ੍ਧਂ. ਏਤ੍ਥ (ਪਾਰਾ. ੫੮੯; ਕਙ੍ਖਾ. ਅਟ੍ਠ. ਜਾਤਰੁਪਸਿਕ੍ਖਾਪਦਵਣ੍ਣਨਾ) ਸਜ੍ਝੁ ਸਿਙ੍ਗੀਤਿ ਸਜ੍ਝੂਤਿ ਰਜਤਂ. ਸਿਙ੍ਗੀਤਿ ਸੁਵਣ੍ਣਂ. ਤਮ੍ਬਲੋਹਾਦੀਹਿ ਵਾ ਦਾਰੂਹਿ ਵਾ ਪਣ੍ਣੇਹਿ ਵਾ ਲਾਖਾਯ ਵਾ ਰੂਪਂ ਸਮੁਟ੍ਠਾਪੇਤ੍ਵਾ ਵਾ ਅਸਮੁਟ੍ਠਾਪੇਤ੍ਵਾ ਵਾ ਕਤਂ ਚਮ੍ਮਬੀਜਮਯਮ੍ਪਿਯਂ ਯਂ ਦੇਸੇ ਵੋਹਾਰਂ ਗਚ੍ਛਤਿ, ਇਦਂ ਵੋਹਾਰੂਪਗਮਾਸਕਂ ਨਾਮ. ਇਦਮਿਧ ਰੂਪਿਯਨ੍ਤਿ ਅਧਿਪ੍ਪੇਤਂ. ਵਤ੍ਥਾਦਿ ਚ ਮੁਤ੍ਤਾਦਿ ਚ ਵਤ੍ਥਮੁਤ੍ਤਾਦਿ. ਇਤਰਨ੍ਤਿ ਅਰੂਪਿਯਂ ਕਪ੍ਪਿਯਵਤ੍ਥੁਞ੍ਚ ਦੁਕ੍ਕਟਵਤ੍ਥੁਞ੍ਚ. ਕਿਂ ਵੁਤ੍ਤਂ ਹੋਤਿ? ਵਤ੍ਥਂ ਸੁਤ੍ਤਂ ਫਾਲੋ ਪਟਕੋ ਕਪ੍ਪਾਸੋ ਅਨੇਕਪ੍ਪਕਾਰਂ ਅਪਰਣ੍ਣਂ ਸਪ੍ਪਿ ਨਵਨੀਤਂ ਤੇਲਂ ਮਧੁ ਫਾਣਿਤਾਦਿਭੇਸਜ੍ਜਞ੍ਚਾਤਿ ਇਦਂ ਕਪ੍ਪਿਯਵਤ੍ਥੁ ਨਾਮ. ਮੁਤ੍ਤਾ ਮਣਿ ਵੇਲ਼ੁਰਿਯੋ ਸਙ੍ਖੋਸਿਲਾ ਪਵਾਲ਼ਂ ਲੋਹਿਤਙ੍ਗੋ ਮਸਾਰਗਲ੍ਲਂ ਸਤ੍ਤ ਧਞ੍ਞਾਨਿ ਦਾਸੀ ਦਾਸੋ ਖੇਤ੍ਤਂ ਵਤ੍ਥੁ ਪੁਪ੍ਫਾਰਾਮਫਲਾਰਾਮਾਦਯੋਤਿ ਇਦਂ ਦੁਕ੍ਕਟਵਤ੍ਥੁ ਨਾਮ, ਤਦੁਭਯਂ ਅਰੂਪਿਯਂ ਨਾਮਾਤਿ ਵੁਤ੍ਤਂ ਹੋਤਿ.

੧੧੮. ਏਤ੍ਤਾਵਤਾ ਰੂਪਿਯਸਂਵੋਹਾਰਂ ਦਸ੍ਸੇਤ੍ਵਾ ਇਦਾਨਿ ਕਯਵਿਕ੍ਕਯਂ ਦਸ੍ਸੇਤੁਂ ‘‘ਇਮਂ ਗਹੇਤ੍ਵਾ’’ਤਿਆਦਿਮਾਹ. ਤਤ੍ਥ ਇਮਨ੍ਤਿ ਤਣ੍ਡੁਲਾਦਿਕਂ ਕਪ੍ਪਿਯਭਣ੍ਡਂ ਗਹੇਤ੍ਵਾ ਵਾ ਓਦਨਾਦਿਂ ਭੁਤ੍ਵਾ ਵਾ ‘‘ਇਮਂ ਵਤ੍ਥਾਦਿਕਂ ਕਪ੍ਪਿਯਭਣ੍ਡਂ ਦੇਹਿ, ਇਮਂ ਰਜਨਪਚਨਾਦਿਕਂ ਕਰ, ਰਜਨਕਟ੍ਠਾਦਿਮਾ ਨਯ, ਇਮਂ ਵਾ ਤਵ ਦੇਮਿ, ਤ੍ਵਂ ਪਨ ਇਮਞ੍ਚ ਇਮਞ੍ਚ ਆਹਰ, ਕਰ, ਦੇਹੀ’’ਤਿ ਏਵਂ ਕਯਵਿਕ੍ਕਯੇ ਸਮਾਪਨ੍ਨੇ ਨਿਸ੍ਸਗ੍ਗੀਤਿ ਸਮ੍ਬਨ੍ਧੋ.

੧੧੯. ਇਦਾਨਿ ਪਰਿਣਾਮਵਸੇਨ ਆਪਤ੍ਤਿਭੇਦਂ ਦਸ੍ਸੇਤੁਂ ‘‘ਅਤ੍ਤਨੋ’’ਤਿਆਦਿ ਆਰਦ੍ਧਂ. ਤਤ੍ਰਾਯਂ ਪਿਣ੍ਡਤ੍ਥੋ (ਪਾਰਾ. ੬੫੯; ਪਾਰਾ. ਅਟ੍ਠ. ੨.੬੫੮; ਕਙ੍ਖਾ. ਅਟ੍ਠ. ਪਰਿਣਤਸਿਕ੍ਖਾਪਦਵਣ੍ਣਨਾ) – ਸਙ੍ਘਸ੍ਸ ਵਾ ਅਞ੍ਞਸ੍ਸ ਵਾ ਨਤਂ ਪਰਿਣਤਂ ਲਾਭਂ ਲਭਿਤਬ੍ਬਂ ਚੀਵਰਾਦਿਪਚ੍ਚਯਂ ਅਤ੍ਤਨੋ ਵਾ ਅਞ੍ਞਸ੍ਸ ਵਾ ਪਰਿਣਾਮੇਯ੍ਯ, ਨਿਸ੍ਸਗ੍ਗਿਯਆਦੀਨਿ ਹੋਨ੍ਤੀਤਿ. ਕਥਂ? ਯੋ ਪਨ ਮਾਤੁਸਨ੍ਤਕਮ੍ਪਿ ਸਙ੍ਘਸ੍ਸ ਪਰਿਣਤਂ ਅਤ੍ਤਨੋ ਪਰਿਣਾਮੇਤਿ, ਨਿਸ੍ਸਗ੍ਗਿਯਂ. ਅਞ੍ਞਸ੍ਸ ਪੁਗ੍ਗਲਸ੍ਸ ਪਰਿਣਾਮੇਤਿ, ਸੁਦ੍ਧਿਕਪਾਚਿਤ੍ਤਿਯਂ. ਅਞ੍ਞਸ੍ਸ ਸਙ੍ਘਸ੍ਸ ਵਾ ਚੇਤਿਯਸ੍ਸ ਵਾ ਪਰਿਣਾਮੇਤਿ, ਦੁਕ੍ਕਟਂ. ਯੋ ਪਨ ਅਞ੍ਞਪੁਗ੍ਗਲਸ੍ਸ ਵਾ ਚੇਤਿਯਸ੍ਸ ਵਾ ਪਰਿਣਤਂ ਅਤ੍ਤਨੋ ਵਾ ਅਞ੍ਞਪੁਗ੍ਗਲਸ੍ਸ ਵਾ ਸਙ੍ਘਸ੍ਸ ਵਾ ਅਞ੍ਞਚੇਤਿਯਸ੍ਸ ਵਾ ਪਰਿਣਾਮੇਤਿ, ਤਸ੍ਸਾਪਿ ਦੁਕ੍ਕਟਮੇਵਾਤਿ.

੧੨੦. ਯੋ ਪਨ ਨਿਸ੍ਸਗ੍ਗਿਂ ਨਿਸ੍ਸਜ੍ਜਿਤਬ੍ਬਂ ਅਨਿਸ੍ਸਜ੍ਜਿਤ੍ਵਾ ਵਿਨਯਕਮ੍ਮਂ ਅਕਤ੍ਵਾ ਪਰਿਭੁਞ੍ਜੇਯ੍ਯ, ਤਸ੍ਸ ਦੁਕ੍ਕਟਂ. ਯੋ ਵਾ ਪਰੇਨ ਵਿਨਯਕਮ੍ਮਤ੍ਥਾਯ ਨਿਸ੍ਸਟ੍ਠਂ ਸਕਸਞ੍ਞਾਯ ਨ ਦਦੇਯ੍ਯ, ਤਸ੍ਸਾਪਿ ਦੁਕ੍ਕਟਂ. ਅਞ੍ਞਥੇਤਰਨ੍ਤਿ ਏਤ੍ਥ ਅਞ੍ਞਥਾਤਿ ਥੇਯ੍ਯਸਞ੍ਞਾਯ ਸਚੇ ਨ ਦਦੇਯ੍ਯ, ਇਤਰਂ ਤਸ੍ਸ ਅਗ੍ਘਵਸੇਨ ਪਾਰਾਜਿਕਞ੍ਚ ਥੁਲ੍ਲਚ੍ਚਯਞ੍ਚ ਦੁਕ੍ਕਟਞ੍ਚ ਹੋਤੀਤਿ ਅਤ੍ਥੋ. ਨਿਸ੍ਸਗ੍ਗਿਯਵਿਨਿਚ੍ਛਯੋ.

ਨਿਸ੍ਸਗ੍ਗਿਯਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.