੧੦. ਅਕਪ੍ਪਿਯਮਂਸਨਿਦ੍ਦੇਸਵਣ੍ਣਨਾ

੧੧੩. ਇਦਾਨਿ ਮਂਸੇਸੁ ਪਟਿਪਜ੍ਜਿਤਬ੍ਬਾਕਾਰਂ ਦਸ੍ਸੇਤੁਂ ‘‘ਮਂਸੇਸੁ ਚ ਅਕਪ੍ਪਿਯ’’ਨ੍ਤਿ ਉਦ੍ਧਟਂ. ਅਕਪ੍ਪਿਯਮਂਸਮ੍ਹਿ ਦਸ੍ਸਿਤੇ ਕਪ੍ਪਿਯਮਂਸਂ ਦਸ੍ਸਿਤਮੇਵ ਹੋਤਿ ਪਾਰਿਸੇਸਨਯੇਨ. ਉਰਗਸ੍ਸ ਚਾਤਿ ਏਤ੍ਥ ਸਬ੍ਬੋਪਿ ਉਰਗੋ ਨ ਕਪ੍ਪਤਿ.

੧੧੪. ਏਤ੍ਤਾਵਤਾ ਜਾਤਿਵਸੇਨ ਦਸਵਿਧਮ੍ਪਿ ਅਕਪ੍ਪਿਯਮਂਸਂ ਦਸ੍ਸੇਤ੍ਵਾ ਇਦਾਨਿ ਕਪ੍ਪਿਯਮਂਸੇਸੁਪਿ ਅਕਪ੍ਪਿਯਵਿਧਿਂ ਦਸ੍ਸੇਤੁਂ ‘‘ਉਦ੍ਦਿਸ੍ਸਕਤਮਂਸਞ੍ਚ, ਯਞ੍ਚ ਅਪ੍ਪਟਿਵੇਕ੍ਖਿਤ’’ਨ੍ਤਿ ਵੁਤ੍ਤਂ. ਤਤ੍ਥ ਪਞ੍ਚਸੁ ਸਹਧਮ੍ਮਿਕੇਸੁ ਯਸ੍ਸ ਕਸ੍ਸਚਿ ਯਂ ਕਿਞ੍ਚਿ ਉਦ੍ਦਿਸ੍ਸ ਕਤਂ ਉਦ੍ਦਿਸ੍ਸਕਤਂ ਨਾਮ, ਤਂ ਪਨ ਜਾਨਿਤ੍ਵਾ ਪਰਿਭੁਞ੍ਜਿਤੁਂ ਸਬ੍ਬੇਸਮ੍ਪਿ ਨ ਵਟ੍ਟਤਿ, ਅਜਾਨਨ੍ਤਾਨਂ ਅਨਾਪਤ੍ਤਿ. ਮਚ੍ਛੇਸੁਪਿ ਏਸੇਵ ਨਯੋ. ਅਪ੍ਪਟਿਵੇਕ੍ਖਿਤਨ੍ਤਿ ਅਨੁਪਪਰਿਕ੍ਖਿਤਂ, ਅਨਾਪੁਚ੍ਛਿਤਨ੍ਤਿ ਅਤ੍ਥੋ. ‘‘ਨ ਭਿਕ੍ਖਵੇ ਅਪ੍ਪਟਿਵੇਕ੍ਖਿਤ੍ਵਾ ਮਂਸਂ ਪਰਿਭੁਞ੍ਜਿਤਬ੍ਬਂ, ਯੋ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੨੮੧) ਵੁਤ੍ਤਂ. ਮਚ੍ਛੇਸੁ ਪਨ ਆਪੁਚ੍ਛਨਕਿਚ੍ਚਂ ਨਤ੍ਥਿ ਅਕਪ੍ਪਿਯਮਚ੍ਛਾਨਂ ਨਤ੍ਥਿਤਾਯਾਤਿ ਵਦਨ੍ਤਿ. ਇਦਾਨਿ ਏਤੇਸੁ ਆਪਤ੍ਤਿਭੇਦਂ ਦਸ੍ਸੇਤੁਂ ‘‘ਥੁਲ੍ਲਚ੍ਚਯ’’ਨ੍ਤਿਆਦਿਮਾਹ. ਤਂ ਸਬ੍ਬਂ (ਕਙ੍ਖਾ. ਅਟ੍ਠ. ਸਨ੍ਨਿਧਿਕਾਰਕਸਿਕ੍ਖਾਪਦਵਣ੍ਣਨਾ) ਉਤ੍ਤਾਨਮੇਵ.

੧੧੫. ਇਦਾਨਿ ਨ ਕੇਵਲਂ ਇਮੇਸਂ ਮਨੁਸ੍ਸਾਦੀਨਂ ਮਂਸਮੇਵ ਅਕਪ੍ਪਿਯਂ, ਅਟ੍ਠਿਆਦੀਨਿਪਿ ਅਕਪ੍ਪਿਯਾਨੀਤਿ ਦਸ੍ਸੇਤੁਂ ‘‘ਅਟ੍ਠੀਪੀ’’ਤਿਆਦਿ ਵੁਤ੍ਤਂ. ਤਤ੍ਥ (ਮਹਾਵ. ਅਟ੍ਠ ੨੮੧) ਲੋਮਮ੍ਪੇਸਨ੍ਤਿ ਲੋਮਮ੍ਪਿ ਏਸਂ ਅਕਪ੍ਪਿਯਮਂਸਵਤ੍ਥੂਨਨ੍ਤਿ ਅਤ੍ਥੋ. ਸਚਿਤ੍ਤਕਂ ਵਾਤਿ ਏਤੇਸੁ ਪਨ ਉਦ੍ਦਿਸ੍ਸਕਤਮੇਵ ਸਚਿਤ੍ਤਕਂ, ਸੇਸਾ ਅਚਿਤ੍ਤਕਾਤਿ. ਅਕਪ੍ਪਿਯਮਂਸਵਿਨਿਚ੍ਛਯੋ.

ਅਕਪ੍ਪਿਯਮਂਸਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.