੪. ਪਹਾਰਸਿਕ੍ਖਾਪਦਵਣ੍ਣਨਾ

ਪਹਾਰਂ ਦਦੇਯ੍ਯਾਤਿ ਅਨ੍ਤਮਸੋ ਉਪ੍ਪਲਪਤ੍ਤਂ ਉਪਾਦਾਯ ਕਾਯਕਾਯਪ੍ਪਟਿਬਦ੍ਧਨਿਸ੍ਸਗ੍ਗਿਯਾਨਂ ਅਞ੍ਞਤਰੇਨ ਪਹਾਰਂ ਦਦੇਯ੍ਯ. ਏਵਂ ਪਨ ਪਹਾਰੇ ਦਿਨ੍ਨੇ ਹਤ੍ਥੋ ਵਾ ਭਿਜ੍ਜਤੁ, ਪਾਦੋ ਵਾ ਸੀਸਂ ਵਾ, ਮਰਤੁ ਵਾ, ਪਾਚਿਤ੍ਤਿਯਮੇਵ. ਤੇਨਾਹ ‘‘ਪਹਰਿਤੁਕਾਮਤਾਯਾ’’ਤਿਆਦਿ.

ਅਨੁਪਸਮ੍ਪਨ੍ਨੇਤਿ ਗਹਟ੍ਠੇ ਵਾ ਪਬ੍ਬਜਿਤੇ ਵਾ ਇਤ੍ਥਿਯਾ ਵਾ ਪੁਰਿਸੇ ਵਾ ਅਨ੍ਤਮਸੋ ਤਿਰਚ੍ਛਾਨਗਤੇਪਿ. ਸਚੇ ਪਨ ਰਤ੍ਤਚਿਤ੍ਤੋ ਇਤ੍ਥਿਂ ਪਹਰਤਿ, ਸਙ੍ਘਾਦਿਸੇਸੋ. ਕੇਨਚਿ ਵਿਹੇਠਿਯਮਾਨਸ੍ਸਾਤਿ ਮਨੁਸ੍ਸੇਨ ਵਾ ਤਿਰਚ੍ਛਾਨਗਤੇਨ ਵਾ ਵਿਹੇਠਿਯਮਾਨਸ੍ਸ. ਮੋਕ੍ਖਾਧਿਪ੍ਪਾਯਸ੍ਸਾਤਿ ਤਤੋ ਅਤ੍ਤਨੋ ਮੋਕ੍ਖਂ ਪਤ੍ਥਯਮਾਨਸ੍ਸ. ਸਚੇਪਿ ਅਨ੍ਤਰਾਮਗ੍ਗੇ (ਪਾਚਿ. ਅਟ੍ਠ. ੪੫੩) ਚੋਰਂ ਵਾ ਪਚ੍ਚਤ੍ਥਿਕਂ ਵਾ ਵਿਹੇਠੇਤੁਕਾਮਂ ਦਿਸ੍ਵਾ ‘‘ਉਪਾਸਕ, ਏਤ੍ਥੇਵ ਤਿਟ੍ਠ, ਮਾ ਆਗਮਿਤ੍ਥਾ’’ਤਿ ਵਤ੍ਵਾ ਵਚਨਂ ਅਨਾਦਿਯਿਤ੍ਵਾ ਆਗਚ੍ਛਨ੍ਤਂ ‘‘ਗਚ੍ਛ ਰੇ’’ਤਿ ਮੁਗ੍ਗਰੇਨ ਵਾ ਸਤ੍ਥਕੇਨ ਵਾ ਪਹਰਿਤ੍ਵਾ ਯਾਤਿ, ਸੋ ਚੇ ਤੇਨ ਪਹਾਰੇਨ ਮਰਤਿ, ਅਨਾਪਤ੍ਤਿਯੇਵ. ਵਾਲ਼ਮਿਗੇਸੁਪਿ ਏਸੇਵ ਨਯੋ.

ਪਹਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.