੯. ਵਿਕਪ੍ਪਨਸਿਕ੍ਖਾਪਦਵਣ੍ਣਨਾ

ਸਮ੍ਮੁਖੇਨ ਵਿਕਪ੍ਪਨਾ ਸਮ੍ਮੁਖਵਿਕਪ੍ਪਨਾ. ਪਰਮ੍ਮੁਖੇਨ ਵਿਕਪ੍ਪਨਾ ਪਰਮ੍ਮੁਖਵਿਕਪ੍ਪਨਾ. ਸਨ੍ਨਿਹਿਤਾਸਨ੍ਨਿਹਿਤਭਾਵਨ੍ਤਿ ਆਸਨ੍ਨਦੂਰਭਾਵਂ. ਆਸਨ੍ਨਦੂਰਭਾਵੋ ਚ ਅਧਿਟ੍ਠਾਨੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

ਮਿਤ੍ਤੋਤਿ ਦਲ਼੍ਹਮਿਤ੍ਤੋ. ਸਨ੍ਦਿਟ੍ਠੋਤਿ ਦਿਟ੍ਠਮਤ੍ਤੋ ਨਾਤਿਦਲ਼੍ਹਮਿਤ੍ਤੋ. ਅਕਤਪਚ੍ਚੁਦ੍ਧਾਰਨ੍ਤਿ ‘‘ਮਯ੍ਹਂ ਸਨ੍ਤਕਂ ਪਰਿਭੁਞ੍ਜ ਵਾ ਵਿਸ੍ਸਜ੍ਜੇਹਿ ਵਾ’’ਤਿਆਦਿਨਾ ਅਕਤਪਚ੍ਚੁਦ੍ਧਾਰਂ. ਯੇਨ ਵਿਨਯਕਮ੍ਮਂ ਕਤਨ੍ਤਿ ਯੇਨ ਸਦ੍ਧਿਂ ਵਿਨਯਕਮ੍ਮਂ ਕਤਂ.

ਪਰਿਭੋਗੇਨ ਕਾਯਕਮ੍ਮਂ, ਅਪਚ੍ਚੁਦ੍ਧਾਰਾਪਨੇਨ ਵਚੀਕਮ੍ਮਨ੍ਤਿ ਆਹ ‘‘ਸਮੁਟ੍ਠਾਨਾਦੀਨਿ ਪਠਮਕਥਿਨਸਦਿਸਾਨੇਵਾ’’ਤਿ. ਕਿਰਿਯਾਕਿਰਿਯਨ੍ਤਿ ਏਤ੍ਥ ਪਰਿਭੁਞ੍ਜਨਂ ਕਿਰਿਯਂ. ਅਪਚ੍ਚੁਦ੍ਧਾਰਾਪਨਂ ਅਕਿਰਿਯਂ.

ਵਿਕਪ੍ਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.