੬. ਸੁਰਾਪਾਨਵਗ੍ਗੋ

੧. ਸੁਰਾਪਾਨਸਿਕ੍ਖਾਪਦਵਣ੍ਣਨਾ

ਪਿਟ੍ਠਾਦੀਹਿ ਕਤਂ ਮਜ੍ਜਂ ਸੁਰਾਤਿ ਪਿਟ੍ਠਪੂਵਓਦਨਕਿਣ੍ਣਸਮ੍ਭਾਰੇਹਿ ਕਤਂ ਮਜ੍ਜਂ ਸੁਰਾਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ਪਿਟ੍ਠਸੁਰਾ, ਪੂਵਸੁਰਾ, ਓਦਨਸੁਰਾ, ਕਿਣ੍ਣਪਕ੍ਖਿਤ੍ਤਾ, ਸਮ੍ਭਾਰਸਂਯੁਤ੍ਤਾਤਿ (ਪਾਚਿ. ੩੨੮) ਇਮਾਨਿ ਪਞ੍ਚ ਸੁਰਾ ਨਾਮਾਤਿ. ਤਤ੍ਥ ਪਿਟ੍ਠਂ ਭਾਜਨੇ ਪਕ੍ਖਿਪਿਤ੍ਵਾ ਤਜ੍ਜਂ ਉਦਕਂ ਦਤ੍ਵਾ ਮਦ੍ਦਿਤ੍ਵਾ ਕਤਾ ਪਿਟ੍ਠਸੁਰਾ (ਸਾਰਤ੍ਥ. ਟੀ. ਪਾਚਿਤ੍ਤਿਯ ੩.੩੨੬-੩੨੮). ਏਵਂ ਸੇਸਾਸੁਪਿ. ਕਿਣ੍ਣਾਤਿ ਪਨ ਤਸ੍ਸਾ ਸੁਰਾਯ ਬੀਜਂ ਵੁਚ੍ਚਤਿ. ਯੇ ‘‘ਸੁਰਾਮੋਦਕਾ’’ਤਿਪਿ ਵੁਚ੍ਚਨ੍ਤਿ, ਤੇ ਪਕ੍ਖਿਪਿਤ੍ਵਾ ਕਤਾ ਕਿਣ੍ਣਪਕ੍ਖਿਤ੍ਤਾ. ਹਰੀਤਕਿਸਾਸਪਾਦਿਨਾਨਾਸਮ੍ਭਾਰੇਹਿ ਸਂਯੋਜਿਤਾ ਸਮ੍ਭਾਰਸਂਯੁਤ੍ਤਾ.

ਪੁਪ੍ਫਾਦੀਹਿ ਕਤੋ ਆਸਵੋ ਮੇਰਯਨ੍ਤਿ ਪੁਪ੍ਫਫਲਮਧੁਗੁਲ਼ਸਮ੍ਭਾਰੇਹਿ ਕਤੋ ਚਿਰਪਰਿਵਾਸਿਤੋ ਮੇਰਯਨ੍ਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ਪੁਪ੍ਫਾਸਵੋ, ਫਲਾਸਵੋ, ਮਧ੍ਵਾਸਵੋ, ਗੁਲ਼ਾਸਵੋ, ਸਮ੍ਭਾਰਸਂਯੁਤ੍ਤੋਤਿ ਪਞ੍ਚਮੇਰਯਂ ਨਾਮਾਤਿ. ਤਤ੍ਥ ਮਧੁਕਤਾਲਨਾਲ਼ਿਕੇਰਾਦਿ ਪੁਪ੍ਫਰਸੋ ਚਿਰਪਰਿਵਾਸਿਤੋ ਪੁਪ੍ਫਾਸਵੋ. ਪਨਸਾਦਿਫਲਰਸੋ ਫਲਾਸਵੋ. ਮੁਦ੍ਦਿਕਾਰਸੋ ਮਧ੍ਵਾਸਵੋ. ਸਮਨ੍ਤਪਾਸਾਦਿਕਾਯਂ ਪਨ ‘‘ਫਲਾਸਵੋ ਨਾਮ ਮੁਦ੍ਦਿਕਾਫਲਾਦੀਨਿ ਮਦ੍ਦਿਤ੍ਵਾ ਤੇਸਂ ਰਸੇਨ ਕਤੋ. ਮਧ੍ਵਾਸਵੋ ਨਾਮ ਮੁਦ੍ਦਿਕਾਨਂ ਜਾਤਿਰਸੇਨ ਕਤੋ, ਮਕ੍ਖਿਕਾਮਧੁਨਾਪਿ ਕਰੀਯਤੀਤਿ ਵਦਨ੍ਤੀ’’ਤਿ (ਪਾਚਿ. ਅਟ੍ਠ. ੩੨੮) ਵੁਤ੍ਤਂ. ਉਚ੍ਛੁਰਸੋ ਗੁਲ਼ਾਸਵੋ. ਹਰੀਤਕਾਮਲਕਕਟੁਕਭਣ੍ਡਾਦਿਨਾਨਾਸਮ੍ਭਾਰਾਨਂ ਰਸੋ ਚਿਰਪਰਿਵਾਸਿਤੋ ਸਮ੍ਭਾਰਸਂਯੁਤ੍ਤੋ. ਏਤ੍ਥ ਚ ਸੁਰਾਯ, ਮੇਰਯਸ੍ਸ ਚ ਸਮਾਨੇਪਿ ਸਮ੍ਭਾਰਸਂਯੋਗੇ ਮਦ੍ਦਿਤ੍ਵਾ ਕਤਾ ਸੁਰਾ, ਚਿਰਪਰਿਵਾਸਿਤਮਤ੍ਤੇਨ ਮੇਰਯਨ੍ਤਿ ਏਵਮਿਮੇਸਂ ਨਾਨਾਕਰਣਂ ਦਟ੍ਠਬ੍ਬਂ. ਬੀਜਤੋ ਪਟ੍ਠਾਯਾਤਿ ਸਮ੍ਭਾਰੇ ਪਟਿਯਾਦੇਤ੍ਵਾ ਚਾਟਿਯਂ ਪਕ੍ਖਿਤ੍ਤਕਾਲਤੋ ਚੇਵ ਤਾਲਨਾਲ਼ਿਕੇਰਾਦੀਨਂ ਪੁਪ੍ਫਰਸਸ੍ਸ ਅਭਿਨਵਕਾਲਤੋ ਚ ਪਟ੍ਠਾਯ.

ਲੋਣਸੋਵੀਰਕਂ ਵਾ ਸੁਤ੍ਤਂ ਵਾਤਿ ਇਮੇ ਦ੍ਵੇ ਅਨੇਕੇਹਿ ਭੇਸਜ੍ਜੇਹਿ ਅਭਿਸਙ੍ਖਤਾ ਆਸਵਵਿਸੇਸਾ. ਵਾਸਗ੍ਗਾਹਾਪਨਤ੍ਥਨ੍ਤਿ ਸੁਗਨ੍ਧਭਾਵਗਾਹਾਪਨਤ੍ਥਂ. ਵਤ੍ਥੁਂ ਅਜਾਨਨਤਾਯ ਚੇਤ੍ਥ ਅਚਿਤ੍ਤਕਤਾ ਵੇਦਿਤਬ੍ਬਾ. ਅਕੁਸਲੇਨੇਵ ਪਾਤਬ੍ਬਤਾਯ ਲੋਕਵਜ੍ਜਂ. ਯਂ ਪਨੇਤ੍ਥ ਵਤ੍ਤਬ੍ਬਂ ਸਿਯਾ, ਤਂ ਸਬ੍ਬਂ ਪਠਮਪਾਰਾਜਿਕਵਣ੍ਣਨਾਯ ਵੁਤ੍ਤਨਯਮੇਵ.

ਸੁਰਾਪਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਅਙ੍ਗੁਲਿਪਤੋਦਕਸਿਕ੍ਖਾਪਦਵਣ੍ਣਨਾ

ਹਸਾਧਿਪ੍ਪਾਯਸ੍ਸਾਤਿ ਖਿਡ੍ਡਾਧਿਪ੍ਪਾਯਸ੍ਸ, ਇਮਿਨਾ ਕਾਯਸਂਸਗ੍ਗਾਧਿਪ੍ਪਾਯਂ ਪਟਿਕ੍ਖਿਪਤਿ.

ਏਤ੍ਥ ਚ ਭਿਕ੍ਖੁਨਿਮ੍ਪਿ ਹਸਾਧਿਪ੍ਪਾਯੇਨ ਫੁਸਤੋ ਭਿਕ੍ਖੁਸ੍ਸ ਦੁਕ੍ਕਟਂ. ਤਥਾ ਭਿਕ੍ਖੁਮ੍ਪਿ ਫੁਸਨ੍ਤਿਯਾ ਭਿਕ੍ਖੁਨਿਯਾਤਿ ਆਹ ‘‘ਇਧ ਪਨ ਭਿਕ੍ਖੁਨੀਪਿ ਭਿਕ੍ਖੁਸ੍ਸ, ਭਿਕ੍ਖੁ ਚ ਭਿਕ੍ਖੁਨਿਯਾ ਅਨੁਪਸਮ੍ਪਨ੍ਨੋ ਏਵਾ’’ਤਿ. ਕਾਯਪ੍ਪਟਿਬਦ੍ਧਾਦੀਸੁ ਸਬ੍ਬਤ੍ਥਾਤਿ ‘‘ਕਾਯੇਨ ਕਾਯਪ੍ਪਟਿਬਦ੍ਧੇ, ਕਾਯਪ੍ਪਟਿਬਦ੍ਧੇਨ ਕਾਯੇ, ਕਾਯਪ੍ਪਟਿਬਦ੍ਧੇਨ ਕਾਯਪ੍ਪਟਿਬਦ੍ਧੇ, ਨਿਸ੍ਸਗ੍ਗਿਯੇਨ ਕਾਯੇ, ਨਿਸ੍ਸਗ੍ਗਿਯੇਨ ਕਾਯਪ੍ਪਟਿਬਦ੍ਧੇ, ਨਿਸ੍ਸਗ੍ਗਿਯੇਨ ਨਿਸ੍ਸਗ੍ਗਿਯੇ’’ਤਿ (ਪਾਚਿ. ੩੩੨) ਸਬ੍ਬਤ੍ਥ. ਸਤਿ ਕਰਣੀਯੇ ਆਮਸਤੋਤਿ ਸਤਿ ਕਰਣੀਯੇ ਪੁਰਿਸਂ ਆਮਸਤੋ ਅਨਾਪਤ੍ਤਿ. ਇਤ੍ਥੀ ਪਨ ਸਤਿ ਕਰਣੀਯੇਪਿ ਆਮਸਿਤੁਂ ਨ ਵਟ੍ਟਤਿ.

ਅਙ੍ਗੁਲਿਪਤੋਦਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਹਸਧਮ੍ਮਸਿਕ੍ਖਾਪਦਵਣ੍ਣਨਾ

ਉਪਰਿਗੋਪ੍ਫਕੇਤਿ ਗੋਪ੍ਫਕਾਨਂ ਉਪਰਿਭਾਗਪ੍ਪਮਾਣੇ. ਹਸਾਧਿਪ੍ਪਾਯੋਤਿ ਕੀਲ਼ਾਧਿਪ੍ਪਾਯੋ. ਯੇਨ ਯੇਨ ਅਙ੍ਗੇਨਾਤਿ ਹਤ੍ਥਪਾਦਾਦੀਸੁ ਯੇਨ ਯੇਨ ਅਙ੍ਗੇਨ. ਤਥਾ ਨਾਵਾਯ ਕੀਲ਼ਤੋਤਿ ਫਿਯਾਰਿਤ੍ਤਾਦੀਹਿ ਨਾਵਂ ਪਾਜੇਨ੍ਤਸ੍ਸ ਵਾ ਤੀਰੇ ਉਸ੍ਸਾਰੇਨ੍ਤਸ੍ਸ ਵਾ ਦੁਕ੍ਕਟਨ੍ਤਿ ਅਤ੍ਥੋ.

ਹਸਧਮ੍ਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਅਨਾਦਰਿਯਸਿਕ੍ਖਾਪਦਵਣ੍ਣਨਾ

ਦੁਵਿਧਞ੍ਹੇਤ੍ਥ ਅਨਾਦਰਿਯਂ ਪੁਗ੍ਗਲਾਨਾਦਰਿਯਞ੍ਚ ਧਮ੍ਮਾਨਾਦਰਿਯਞ੍ਚਾਤਿ ਆਹ ‘‘ਪੁਗ੍ਗਲਸ੍ਸ ਵਾ’’ਤਿਆਦਿ. ਤਤ੍ਥ ਯੋ ਭਿਕ੍ਖੁ ਉਪਸਮ੍ਪਨ੍ਨੇਨ ਪਞ੍ਞਤ੍ਤੇਨ ਵੁਚ੍ਚਮਾਨੋ ‘‘ਅਯਂ ਉਕ੍ਖਿਤ੍ਤਕੋ ਵਾ ਵਮ੍ਭਿਤੋ ਵਾ ਗਰਹਿਤੋ ਵਾ, ਇਮਸ੍ਸ ਵਚਨਂ ਅਕਤਂ ਭਵਿਸ੍ਸਤੀ’’ਤਿ (ਪਾਚਿ. ੩੪੨) ਅਨਾਦਰਿਯਂ ਕਰੋਤਿ, ਅਯਂ ਪੁਗ੍ਗਲੇ ਅਨਾਦਰਿਯਂ ਕਰੋਤਿ ਨਾਮ. ਯੋ ਪਨ ਪਞ੍ਞਤ੍ਤੇਨ ਵੁਚ੍ਚਮਾਨੋ ‘‘ਕਥਾਯਂ ਨਸ੍ਸੇਯ੍ਯ ਵਾ ਵਿਨਸ੍ਸੇਯ੍ਯ ਵਾ ਅਨ੍ਤਰਧਾਯੇਯ੍ਯ ਵਾ’’ਤਿ, ਤਂ ਵਾ ਨਸਿਕ੍ਖਿਤੁਕਾਮੋ ਅਨਾਦਰਿਯਂ ਕਰੋਤਿ, ਅਯਂ ਧਮ੍ਮੇ ਅਨਾਦਰਿਯਂ ਕਰੋਤਿ ਨਾਮ. ਤੇਨਾਹ ‘‘ਤਸ੍ਮਾ’’ਤਿਆਦਿ.

ਇਦਂ ਨ ਸਲ੍ਲੇਖਾਯ ਸਂਵਤ੍ਤਤੀਤਿ ਸਮ੍ਮਾ ਕਿਲੇਸੇ ਲਿਖਤੀਤਿ ਸਲ੍ਲੇਖੋ, ਅਪ੍ਪਿਚ੍ਛਤਾ, ਤਦਤ੍ਥਂ ਨਯਿਦਂ ਸਂਵਤ੍ਤਤਿ. ਆਦਿਸਦ੍ਦੇਨ ‘‘ਇਦਂ ਨ ਧੁਤਤ੍ਥਾਯ ਸਂਵਤ੍ਤਤਿ, ਨ ਪਾਸਾਦਿਕਤਾਯ, ਨ ਅਪਚਯਾਯ, ਨ ਵੀਰਿਯਾਰਮ੍ਭਾਯ ਸਂਵਤ੍ਤਤੀ’’ਤਿ (ਪਾਚਿ. ੩੪੩) ਇਦਂ ਸਙ੍ਗਣ੍ਹਾਤਿ. ਅਪਞ੍ਞਤ੍ਤੇਨਾਤਿ ਸੁਤ੍ਤੇ ਵਾ ਅਭਿਧਮ੍ਮੇ ਵਾ ਆਗਤੇਨ. ਪਵੇਣਿਆਗਤਨ੍ਤਿ ਸਙ੍ਗੀਤਿਕਾਲਤੋ ਪਟ੍ਠਾਯ ਮਹਾਕਸ੍ਸਪਾਦਿਆਚਰਿਯਪਰਮ੍ਪਰਾਯ ਆਗਤਂ. ਸਚੇ ਪਨ ਯਸ੍ਮਾ ਉਚ੍ਛੁਰਸੋ ਸਤ੍ਤਾਹਕਾਲਿਕੋ, ਤਸ੍ਸ ਕਸਟੋ ਯਾਵਜੀਵਿਕੋ, ਦ੍ਵਿਨ੍ਨਂਯੇਵ ਸਮਵਾਯੋ ਉਚ੍ਛੁਯਟ੍ਠਿ, ਤਸ੍ਮਾ ਵਿਕਾਲੇ ਉਚ੍ਛੁਯਟ੍ਠਿਂ ਖਾਦਿਤੁਂ ਵਟ੍ਟਤਿ ਗੁਲ਼ਹਰੀਤਕਂ ਵਿਯਾਤਿ ਏਵਮਾਦਿਕਂ ਗਾਰਯ੍ਹਾਚਰਿਯੁਗ੍ਗਹਂ ਗਹੇਤ੍ਵਾ ‘‘ਏਵਂ ਅਮ੍ਹਾਕਂ ਆਚਰਿਯਾਨਂ ਉਗ੍ਗਹੋ ਪਰਿਪੁਚ੍ਛਾ’’ਤਿ ਭਣਤਿ, ਆਪਤ੍ਤਿਯੇਵ.

ਅਨਾਦਰਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਭਿਂਸਾਪਨਸਿਕ੍ਖਾਪਦਵਣ੍ਣਨਾ

ਰੂਪਾਦੀਨੀਤਿ ਭਯਾਨਕਾਨਿ ਰੂਪਸਦ੍ਦਗਨ੍ਧਰਸਫੋਟ੍ਠਬ੍ਬਾਨਿ. ਭਯਾਨਕਕਥਨ੍ਤਿ ਚੋਰਕਨ੍ਤਾਰਵਾਲ਼ਕਨ੍ਤਾਰਪਿਸਾਚਕਨ੍ਤਾਰਪ੍ਪਟਿਸਂਯੁਤ੍ਤਕਥਂ.

ਭਿਂਸਾਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਜੋਤਿਸਿਕ੍ਖਾਪਦਵਣ੍ਣਨਾ

ਅਗਿਲਾਨੋਤਿ ਯਸ੍ਸ ਵਿਨਾ ਅਗ੍ਗਿਨਾ ਫਾਸੁ ਹੋਤਿ, ਸੋ ਇਧ ਅਗਿਲਾਨੋ ਨਾਮ. ਜੋਤਿਨ੍ਤਿ ਅਗ੍ਗਿਂ.

ਭਗ੍ਗੇਸੂਤਿ ਏਵਂਨਾਮਕੇ ਜਨਪਦੇ. ਭਗ੍ਗਾਨਾਮ ਜਾਨਪਦਿਨੋ ਰਾਜਕੁਮਾਰਾ, ਤੇਸਂ ਨਿਵਾਸੋ ਏਕੋਪਿ ਜਨਪਦੋ ਰੁਲ਼੍ਹਿਸਦ੍ਦੇਨ ‘‘ਭਗ੍ਗਾ’’ਤਿ ਵੁਚ੍ਚਤਿ. ਤੇਨ ਵੁਤ੍ਤਂ ‘‘ਭਗ੍ਗੇਸੂਤਿ ਏਵਂਨਾਮਕੇ ਜਨਪਦੇ’’ਤਿ. ਤਥਾ ਪਤਿਲਾਤਂ ਉਕ੍ਖਿਪਨ੍ਤਸ੍ਸਾਤਿ ਡਯ੍ਹਮਾਨਂ ਅਲਾਤਂ ਪਤਿਤਂ ਉਕ੍ਖਿਪਨ੍ਤਸ੍ਸ ਤਥਾ ਦੁਕ੍ਕਟਨ੍ਤਿ ਅਤ੍ਥੋ. ਤਞ੍ਚਾਤਿ ਦੁਕ੍ਕਟਂ ਪਰਾਮਸਤਿ. ਅਵਿਜ੍ਝਾਤਨ੍ਤਿ ਅਨਿਬ੍ਬੁਤਾਲਾਤਂ. ਪਦੀਪਜੋਤਿਕਜਨ੍ਤਾਘਰੇਤਿ ਪਦੀਪੁਜ੍ਜਲਨਪਤ੍ਤਪਚਨਸੇਦਕਮ੍ਮਾਦੀਸੁ ਜੋਤਿਕਰਣੇ ਅਗ੍ਗਿਸਾਲਾਯਞ੍ਚ ਸਮਾਦਹਨ੍ਤਸ੍ਸ ਅਨਾਪਤ੍ਤੀਤਿ ਅਤ੍ਥੋ. ਤਥਾਰੂਪਪ੍ਪਚ੍ਚਯੇਤਿ ਠਪੇਤ੍ਵਾ ਪਦੀਪਾਦੀਨਿ ਅਞ੍ਞਸ੍ਮਿਮ੍ਪਿ ਤਥਾਰੂਪਪਚ੍ਚਯੇ. ਆਪਦਾਸੂਤਿ ਦੁਟ੍ਠਵਾਲ਼ਮਿਗਅਮਨੁਸ੍ਸੇਹਿ ਉਪਦ੍ਦਵੇਸੁ.

ਜੋਤਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਨਹਾਨਸਿਕ੍ਖਾਪਦਵਣ੍ਣਨਾ

‘‘ਦਿਯਡ੍ਢੋ ਮਾਸੋ ਸੇਸੋ ਗਿਮ੍ਹਾਨ’’ਨ੍ਤਿ ‘‘ਵਸ੍ਸਾਨਸ੍ਸ ਪਠਮੋ ਮਾਸੋ’’ਇਚ੍ਚੇਤੇ ਅਡ੍ਢਤੇਯ੍ਯਮਾਸਾ ਉਣ੍ਹਸਮਯੋ, ਪਰਿਲ਼ਾਹਸਮਯੋਤਿ ਗਿਮ੍ਹਾਨਂ ਸੇਸੋ ਦਿਯਡ੍ਢੋ ਮਾਸੋ ਉਣ੍ਹਸਮਯੋ, ਵਸ੍ਸਾਨਸ੍ਸ ਪਠਮੋ ਮਾਸੋ ਪਰਿਲ਼ਾਹਸਮਯੋਤਿ ਏਵਂ ਏਤੇ ਅਡ੍ਢਤੇਯ੍ਯਮਾਸਾ ਕਮੇਨ ਉਣ੍ਹਸਮਯੋ, ਪਰਿਲ਼ਾਹਸਮਯੋ ਨਾਮ ਹੋਤੀਤਿ ਅਤ੍ਥੋ ਤੇਨੇਵ ਪਦਭਾਜਨਿਯਂ ‘‘ਉਣ੍ਹਸਮਯੋ ਨਾਮ ਦਿਯਡ੍ਢੋ ਮਾਸੋ ਸੇਸੋ ਗਿਮ੍ਹਾਨ’’ਨ੍ਤਿ, ‘‘ਪਰਿਲ਼ਾਹਸਮਯੋ ਨਾਮ ਵਸ੍ਸਾਨਸ੍ਸ ਪਠਮੋ ਮਾਸੋ’’ਤਿ ਵੁਤ੍ਤਂ. ਯਦਾ ਵਿਨਾ ਨਹਾਨੇਨ ਨ ਫਾਸੁ ਹੋਤਿ, ਅਯਂ ਗਿਲਾਨਸਮਯੋ. ਪਦਭਾਜਨਿਯਂ (ਪਾਚਿ. ੩੬੪) ਪਨ ਗਿਲਾਨੇ ਨਿਚ੍ਛਿਤੇ ਗਿਲਾਨਕਾਲੋ ਨਿਚ੍ਛਿਤੋਵ ਹੋਤੀਤਿ ‘‘ਯਸ੍ਸ ਵਿਨਾ ਨਹਾਨੇਨ ਨ ਫਾਸੁ ਹੋਤਿ, ‘ਗਿਲਾਨਸਮਯੋ’ਤਿ ਨਹਾਯਿਤਬ੍ਬ’’ਨ੍ਤਿ ਵੁਤ੍ਤਂ. ਪਰਿਵੇਣਸਮ੍ਮਜ੍ਜਨਮਤ੍ਤਮ੍ਪੀਤਿ ਅਨ੍ਤਮਸੋ ਪਰਿਵੇਣਸਮ੍ਮਜ੍ਜਨਮਤ੍ਤਮ੍ਪਿ.

ਵਾਲੁਕਂ ਉਕ੍ਕਿਰਿਤ੍ਵਾਤਿ ਸੁਕ੍ਖਾਯ ਨਦਿਯਾ ਵਾਲਿਕਂ ਉਤ੍ਤਿਰਿਤ੍ਵਾ. ਆਵਾਟੇਸੁਪੀਤਿ ਪਿ-ਸਦ੍ਦੇਨ ਨਦਿਯਂ ਵਤ੍ਤਬ੍ਬਮੇਵ ਨਤ੍ਥੀਤਿ ਦਸ੍ਸੇਤਿ. ਆਪਦਾਸੂਤਿ ਭਮਰਾਦੀਹਿ ਅਨੁਬਨ੍ਧੇਸੁ.

ਨਹਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਦੁਬ੍ਬਣ੍ਣਕਰਣਸਿਕ੍ਖਾਪਦਵਣ੍ਣਨਾ

ਲਾਭਸਦ੍ਦੋਯਂ ਕਮ੍ਮਸਾਧਨੋ ‘‘ਕੋ ਭਵਤਾ ਲਾਭੋ ਲਦ੍ਧੋ’’ਤਿਆਦੀਸੁ ਵਿਯ, ਸੋ ਚੇਤ੍ਥ ਅਤੀਤਕਾਲਿਕੋਤਿ ਆਹ ‘‘ਅਲਬ੍ਭੀਤਿ ਲਭੋ’’ਤਿ, ਲਦ੍ਧਨ੍ਤਿ ਅਤ੍ਥੋ. ‘‘ਲਭੋ ਏਵ ਲਾਭੋ’’ਤਿ ਇਮਿਨਾ ਸਕਤ੍ਥੇ ਣਪਚ੍ਚਯੋਤਿ ਦਸ੍ਸੇਤਿ. ਕਿਂ ਅਲਬ੍ਭੀਤਿ ਕਿਂ ਲਦ੍ਧਂ. ਨਵਨ੍ਤਿ ਅਭਿਨਵਂ. ਏਤ੍ਤਾਵਤਾ ਚ ਨਵਞ੍ਚ ਤਂ ਚੀਵਰਞ੍ਚਾਤਿ ਨਵਚੀਵਰਂ, ਨਵਚੀਵਰਂ ਲਾਭੋ ਏਤੇਨਾਤਿ ਨਵਚੀਵਰਲਾਭੋਤਿ ਏਵਮੇਤ੍ਥ ਸਮਾਸੋ ਦਟ੍ਠਬ੍ਬੋਤਿ. ਯਦਿ ਏਵਂ ਕਥਂ ‘‘ਨਵਂ ਚੀਵਰਲਾਭੇਨਾ’’ਤਿ ਵੁਤ੍ਤਨ੍ਤਿ ਆਹ ‘‘ਇਤਿ ਨਵਚੀਵਰਲਾਭੇਨਾ’’ਤਿਆਦਿ. ਏਤ੍ਥ ਚ ‘‘ਵਿਕਪ੍ਪਨੁਪਗਂ ਪਚ੍ਛਿਮ’’ਨ੍ਤਿ ਨ ਵੁਤ੍ਤਤ੍ਤਾ ਚੀਵਰਨ੍ਤਿ ਯਂ ਨਿਵਾਸੇਤੁਂ ਵਾ ਪਾਰੁਪਿਤੁਂ ਵਾ ਸਕ੍ਕਾ ਹੋਤਿ, ਤਦੇਵ ਵੇਦਿਤਬ੍ਬਨ੍ਤਿ ਆਹ ‘‘ਨਿਵਾਸਨਪਾਰੁਪਨੁਪਗਂ ਚੀਵਰ’’ਨ੍ਤਿ. ‘‘ਦੁਬ੍ਬਣ੍ਣਕਰਣਂ ਆਦਾਤਬ੍ਬ’’ਨ੍ਤਿ ਏਤਂ ਕਪ੍ਪਬਿਨ੍ਦੁਂ ਸਨ੍ਧਾਯ ਵੁਤ੍ਤਂ, ਨ ਨੀਲਾਦੀਹਿ ਸਕਲਚੀਵਰਂ ਦੁਬ੍ਬਣ੍ਣਕਰਣਂ, ਤਞ੍ਚ ਪਨ ਕਪ੍ਪਂ ਆਦਿਯਨ੍ਤੇਨ ਚੀਵਰਂ ਰਜਿਤ੍ਵਾ ਚਤੂਸੁ ਵਾ ਕੋਣੇਸੁ, ਤੀਸੁ ਵਾ ਦ੍ਵੀਸੁ ਵਾ ਏਕਸ੍ਮਿਂ ਵਾ ਕੋਣੇ ਮੋਰਸ੍ਸ ਅਕ੍ਖਿਮਣ੍ਡਲਮਤ੍ਤਂ ਵਾ ਮਙ੍ਗੁਲਪਿਟ੍ਠਿਮਤ੍ਤਂ ਵਾ ਆਦਾਤਬ੍ਬਨ੍ਤਿ ਆਹ ‘‘ਤਸ੍ਸਾ’’ਤਿਆਦਿ. ਕਂਸਨੀਲੇਨਾਤਿ ਚਮ੍ਮਕਾਰਨੀਲੇਨ. ਮਹਾਪਚ੍ਚਰਿਯਂ ਪਨ ‘‘ਅਯੋਮਲਂ ਲੋਹਮਲਂ, ਏਤਂ ਕਂਸਨੀਲਂ ਨਾਮਾ’’ਤਿ (ਪਾਚਿ. ਅਟ੍ਠ. ੩੬੮) ਵੁਤ੍ਤਂ. ਪਤ੍ਤਨੀਲੇਨਾਤਿ ਯੇਨ ਕੇਨਚਿ ਨੀਲਵਣ੍ਣੇਨ ਪਣ੍ਣਰਸੇਨ. ਕਪ੍ਪਬਿਨ੍ਦੁਂ ਆਦਿਯਿਤ੍ਵਾਤਿ ਵਟ੍ਟਂ ਏਕਂ ਕਪ੍ਪਬਿਨ੍ਦੁਂ ਆਦਿਯਿਤ੍ਵਾ.

ਪਾਲ਼ਿਕਪ੍ਪਕਣ੍ਣਿਕਕਪ੍ਪਾਦਯੋ ਪਨ ਸਬ੍ਬਟ੍ਠਕਥਾਸੁ ਪਟਿਸਿਦ੍ਧਾ. ਅਗ੍ਗਲ਼ਾਦੀਨਿ ਕਪ੍ਪਕਤਚੀਵਰੇ ਪਨ ਪਚ੍ਛਾ ਆਰੋਪੇਤ੍ਵਾ ਕਪ੍ਪਕਰਣਕਿਚ੍ਚਂ ਨਤ੍ਥੀਤਿ ਆਹ ‘‘ਪਚ੍ਛਾ ਆਰੋਪਿਤੇਸੂ’’ਤਿਆਦਿ. ਅਗ੍ਗਲ਼ਅਨੁਵਾਤਪਰਿਭਣ੍ਡੇਸੂਤਿ ਉਦ੍ਧਰਿਤ੍ਵਾ ਅਲ੍ਲਿਯਾਪਨਕਖਣ੍ਡਪਿਟ੍ਠਿਅਨੁਵਾਤਕੁਚ੍ਛਿਅਨੁਵਾਤੇਸੁ. ਕਿਰਿਯਾਕਿਰਿਯਨ੍ਤਿ ਨਿਵਾਸਨਪਾਰੁਪਨਤੋ, ਕਪ੍ਪਸ੍ਸ ਅਨਾਦਾਨਤੋ ਕਿਰਿਯਾਕਿਰਿਯਂ.

ਦੁਬ੍ਬਣ੍ਣਕਰਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਵਿਕਪ੍ਪਨਸਿਕ੍ਖਾਪਦਵਣ੍ਣਨਾ

ਸਮ੍ਮੁਖੇਨ ਵਿਕਪ੍ਪਨਾ ਸਮ੍ਮੁਖਵਿਕਪ੍ਪਨਾ. ਪਰਮ੍ਮੁਖੇਨ ਵਿਕਪ੍ਪਨਾ ਪਰਮ੍ਮੁਖਵਿਕਪ੍ਪਨਾ. ਸਨ੍ਨਿਹਿਤਾਸਨ੍ਨਿਹਿਤਭਾਵਨ੍ਤਿ ਆਸਨ੍ਨਦੂਰਭਾਵਂ. ਆਸਨ੍ਨਦੂਰਭਾਵੋ ਚ ਅਧਿਟ੍ਠਾਨੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

ਮਿਤ੍ਤੋਤਿ ਦਲ਼੍ਹਮਿਤ੍ਤੋ. ਸਨ੍ਦਿਟ੍ਠੋਤਿ ਦਿਟ੍ਠਮਤ੍ਤੋ ਨਾਤਿਦਲ਼੍ਹਮਿਤ੍ਤੋ. ਅਕਤਪਚ੍ਚੁਦ੍ਧਾਰਨ੍ਤਿ ‘‘ਮਯ੍ਹਂ ਸਨ੍ਤਕਂ ਪਰਿਭੁਞ੍ਜ ਵਾ ਵਿਸ੍ਸਜ੍ਜੇਹਿ ਵਾ’’ਤਿਆਦਿਨਾ ਅਕਤਪਚ੍ਚੁਦ੍ਧਾਰਂ. ਯੇਨ ਵਿਨਯਕਮ੍ਮਂ ਕਤਨ੍ਤਿ ਯੇਨ ਸਦ੍ਧਿਂ ਵਿਨਯਕਮ੍ਮਂ ਕਤਂ.

ਪਰਿਭੋਗੇਨ ਕਾਯਕਮ੍ਮਂ, ਅਪਚ੍ਚੁਦ੍ਧਾਰਾਪਨੇਨ ਵਚੀਕਮ੍ਮਨ੍ਤਿ ਆਹ ‘‘ਸਮੁਟ੍ਠਾਨਾਦੀਨਿ ਪਠਮਕਥਿਨਸਦਿਸਾਨੇਵਾ’’ਤਿ. ਕਿਰਿਯਾਕਿਰਿਯਨ੍ਤਿ ਏਤ੍ਥ ਪਰਿਭੁਞ੍ਜਨਂ ਕਿਰਿਯਂ. ਅਪਚ੍ਚੁਦ੍ਧਾਰਾਪਨਂ ਅਕਿਰਿਯਂ.

ਵਿਕਪ੍ਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਅਪਨਿਧਾਨਸਿਕ੍ਖਾਪਦਵਣ੍ਣਨਾ

ਅਧਿਟ੍ਠਾਨੁਪਗਨ੍ਤਿ ਅਧਿਟ੍ਠਾਨਯੋਗ੍ਗਂ ਅਯੋਪਤ੍ਤਞ੍ਚੇਵ ਮਤ੍ਤਿਕਾਪਤ੍ਤਞ੍ਚ. ਸੂਕਰਨ੍ਤਕਂ ਨਾਮ ਕੁਞ੍ਚਿਕਾਕੋਸੋ ਵਿਯ ਅਨ੍ਤੋ ਸੁਸਿਰਂ ਕਤ੍ਵਾ ਕੋਟ੍ਟਿਤਂ.

ਅਞ੍ਞਂ ਪਰਿਕ੍ਖਾਰਨ੍ਤਿ ਪਾਲ਼ਿਯਾ ਅਨਾਗਤਪਤ੍ਤਤ੍ਥਵਿਕਾਦਿਂ. ਧਮ੍ਮਕਥਂ ਕਤ੍ਵਾਤਿ ‘‘ਸਮਣੇਨ ਨਾਮ ਅਨਿਹਿਤਪਰਿਕ੍ਖਾਰੇਨ ਭਵਿਤੁਂ ਨ ਵਟ੍ਟਤੀ’’ਤਿ ਏਵਂ ‘‘ਧਮ੍ਮਕਥਂ ਕਥੇਤ੍ਵਾ ਦਸ੍ਸਾਮੀ’’ਤਿ ਨਿਕ੍ਖਿਪਤੋ ਅਨਾਪਤ੍ਤਿ.

ਅਪਨਿਧਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਸੁਰਾਪਾਨਵਗ੍ਗੋ ਛਟ੍ਠੋ.