੭. ਨਹਾਨਸਿਕ੍ਖਾਪਦਵਣ੍ਣਨਾ

‘‘ਦਿਯਡ੍ਢੋ ਮਾਸੋ ਸੇਸੋ ਗਿਮ੍ਹਾਨ’’ਨ੍ਤਿ ‘‘ਵਸ੍ਸਾਨਸ੍ਸ ਪਠਮੋ ਮਾਸੋ’’ਇਚ੍ਚੇਤੇ ਅਡ੍ਢਤੇਯ੍ਯਮਾਸਾ ਉਣ੍ਹਸਮਯੋ, ਪਰਿਲ਼ਾਹਸਮਯੋਤਿ ਗਿਮ੍ਹਾਨਂ ਸੇਸੋ ਦਿਯਡ੍ਢੋ ਮਾਸੋ ਉਣ੍ਹਸਮਯੋ, ਵਸ੍ਸਾਨਸ੍ਸ ਪਠਮੋ ਮਾਸੋ ਪਰਿਲ਼ਾਹਸਮਯੋਤਿ ਏਵਂ ਏਤੇ ਅਡ੍ਢਤੇਯ੍ਯਮਾਸਾ ਕਮੇਨ ਉਣ੍ਹਸਮਯੋ, ਪਰਿਲ਼ਾਹਸਮਯੋ ਨਾਮ ਹੋਤੀਤਿ ਅਤ੍ਥੋ ਤੇਨੇਵ ਪਦਭਾਜਨਿਯਂ ‘‘ਉਣ੍ਹਸਮਯੋ ਨਾਮ ਦਿਯਡ੍ਢੋ ਮਾਸੋ ਸੇਸੋ ਗਿਮ੍ਹਾਨ’’ਨ੍ਤਿ, ‘‘ਪਰਿਲ਼ਾਹਸਮਯੋ ਨਾਮ ਵਸ੍ਸਾਨਸ੍ਸ ਪਠਮੋ ਮਾਸੋ’’ਤਿ ਵੁਤ੍ਤਂ. ਯਦਾ ਵਿਨਾ ਨਹਾਨੇਨ ਨ ਫਾਸੁ ਹੋਤਿ, ਅਯਂ ਗਿਲਾਨਸਮਯੋ. ਪਦਭਾਜਨਿਯਂ (ਪਾਚਿ. ੩੬੪) ਪਨ ਗਿਲਾਨੇ ਨਿਚ੍ਛਿਤੇ ਗਿਲਾਨਕਾਲੋ ਨਿਚ੍ਛਿਤੋਵ ਹੋਤੀਤਿ ‘‘ਯਸ੍ਸ ਵਿਨਾ ਨਹਾਨੇਨ ਨ ਫਾਸੁ ਹੋਤਿ, ‘ਗਿਲਾਨਸਮਯੋ’ਤਿ ਨਹਾਯਿਤਬ੍ਬ’’ਨ੍ਤਿ ਵੁਤ੍ਤਂ. ਪਰਿਵੇਣਸਮ੍ਮਜ੍ਜਨਮਤ੍ਤਮ੍ਪੀਤਿ ਅਨ੍ਤਮਸੋ ਪਰਿਵੇਣਸਮ੍ਮਜ੍ਜਨਮਤ੍ਤਮ੍ਪਿ.

ਵਾਲੁਕਂ ਉਕ੍ਕਿਰਿਤ੍ਵਾਤਿ ਸੁਕ੍ਖਾਯ ਨਦਿਯਾ ਵਾਲਿਕਂ ਉਤ੍ਤਿਰਿਤ੍ਵਾ. ਆਵਾਟੇਸੁਪੀਤਿ ਪਿ-ਸਦ੍ਦੇਨ ਨਦਿਯਂ ਵਤ੍ਤਬ੍ਬਮੇਵ ਨਤ੍ਥੀਤਿ ਦਸ੍ਸੇਤਿ. ਆਪਦਾਸੂਤਿ ਭਮਰਾਦੀਹਿ ਅਨੁਬਨ੍ਧੇਸੁ.

ਨਹਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.