੩. ਸਭੋਜਨਸਿਕ੍ਖਾਪਦਵਣ੍ਣਨਾ

‘‘ਸਭੋਜਨੇ’’ਤਿ ਬਾਹਿਰਤ੍ਥਸਮਾਸੋਯਂ, ਉਭਸਦ੍ਦੇ ਉਕਾਰਸ੍ਸ ਚ ਲੋਪੋਤਿ ਆਹ ‘‘ਸਹ ਉਭੋਹਿ ਜਨੇਹੀ’’ਤਿਆਦਿ. ਤਤ੍ਥ ਉਭੋਹਿ ਜਨੇਹੀਤਿ ਜਾਯਾ ਚ ਪਤਿ ਚਾਤਿ ਉਭੋਹਿ ਜਨੇਹਿ. ਭੁਞ੍ਜਿਤਬ੍ਬਨ੍ਤਿ ਵਾ ਭੋਜਨਂ, ਇਤ੍ਥੀ ਚ ਪੁਰਿਸੋ ਚ, ਤੇਨ ਸਹ ਵਤ੍ਤਤੀਤਿ ਸਭੋਜਨਨ੍ਤਿ ਆਹ ‘‘ਅਥ ਵਾ’’ਤਿਆਦਿ. ਰਾਗਪਰਿਯੁਟ੍ਠਿਤਸ੍ਸਾਤਿ ਮੇਥੁਨਾਧਿਪ੍ਪਾਯਸ੍ਸ. ਸਯਨਿਘਰਨ੍ਤਿ ਸਯਨੀਯਘਰਂ, ਵਾਸਗੇਹਨ੍ਤਿ ਅਤ੍ਥੋ. ਮਹਲ੍ਲਕਸ੍ਸਾਤਿ ਮਹਲ੍ਲਕਸ੍ਸ ਸਯਨਿਘਰਸ੍ਸ. ਪਿਟ੍ਠਸਙ੍ਘਾਟਤੋਤਿ ਦ੍ਵਾਰਬਾਹਤੋ ਖੁਦ੍ਦਕਸ੍ਸ ਵਾਤਿ ਯਥਾ ਤਥਾ ਵਾ ਕਤਸ੍ਸ ਖੁਦ੍ਦਕਸ੍ਸ ਸਯਨਿਘਰਸ੍ਸ. ਵੇਮਜ੍ਝਂ ਅਤਿਕ੍ਕਮਿਤ੍ਵਾ ਨਿਸੀਦੇਯ੍ਯਾਤਿ ਪਿਟ੍ਠਿਵਂਸਂ ਅਤਿਕ੍ਕਮਿਤ੍ਵਾ ਨਿਸੀਦੇਯ੍ਯ. ਖੁਦ੍ਦਕਂ (ਸਾਰਤ੍ਥ. ਟੀ. ਪਾਚਿਤ੍ਤਿਯ ੩.੨੮੦) ਨਾਮ ਸਯਨਿਘਰਂ ਵਿਤ੍ਥਾਰਤੋ ਪਞ੍ਚਹਤ੍ਥਪ੍ਪਮਾਣਂ ਹੋਤਿ, ਤਸ੍ਸ ਚ ਮਜ੍ਝਿਮਟ੍ਠਾਨਂ ਪਿਟ੍ਠਸਙ੍ਘਾਟਤੋ ਅਡ੍ਢਤੇਯ੍ਯਹਤ੍ਥਪ੍ਪਮਾਣਮੇਵ ਹੋਤਿ, ਤਸ੍ਮਾ ਤਾਦਿਸੇ ਸਯਨਿਘਰੇ ਪਿਟ੍ਠਸਙ੍ਘਾਟਤੋ ਹਤ੍ਥਪਾਸਂ ਵਿਜਹਿਤ੍ਵਾ ਨਿਸਿਨ੍ਨੋ ਪਿਟ੍ਠਿਵਂਸਂ ਅਤਿਕ੍ਕਮਿਤ੍ਵਾ ਨਿਸਿਨ੍ਨੋ ਨਾਮ ਹੋਤਿ. ਏਵਂ ਨਿਸਿਨ੍ਨੋ ਚ ਵੇਮਜ੍ਝਂ ਅਤਿਕ੍ਕਮਿਤ੍ਵਾ ਨਿਸਿਨ੍ਨੋ ਨਾਮ ਹੋਤਿ. ਤੇਨ ਵੁਤ੍ਤਂ ਪਾਲ਼ਿਯਂ ‘‘ਪਿਟ੍ਠਿਵਂਸਂ ਅਤਿਕ੍ਕਮਿਤ੍ਵਾ ਨਿਸੀਦਤੀ’’ਤਿ (ਪਾਚਿ. ੨੮੧). ਸਚਿਤ੍ਤਕਞ੍ਚੇਤ੍ਥ ਅਨੁਪਵਿਸਿਤ੍ਵਾ ਨਿਸੀਦਨਚਿਤ੍ਤੇਨ ਦਟ੍ਠਬ੍ਬਂ.

ਸਭੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.