੫. ਅਚੇਲਕਵਗ੍ਗੋ

੧. ਅਚੇਲਕਸਿਕ੍ਖਾਪਦਵਣ੍ਣਨਾ

ਅਚੇਲਕਸ੍ਸਾਤਿ ਯਸ੍ਸ ਕਸ੍ਸਚਿ ਪਬ੍ਬਜ੍ਜਾਸਮਾਪਨ੍ਨਸ੍ਸ ਨਗ੍ਗਸ੍ਸ. ਪਰਿਬ੍ਬਾਜਕਸ੍ਸਾਤਿ ਠਪੇਤ੍ਵਾ ਭਿਕ੍ਖੁਞ੍ਚ ਸਾਮਣੇਰਞ੍ਚ ਅਵਸੇਸਸ੍ਸ ਯਸ੍ਸ ਕਸ੍ਸਚਿ ਪਬ੍ਬਜ੍ਜਾਸਮਾਪਨ੍ਨਸ੍ਸ. ਪਰਿਬ੍ਬਾਜਿਕਾਯਾਤਿ ਠਪੇਤ੍ਵਾ ਭਿਕ੍ਖੁਨਿਂ, ਸਿਕ੍ਖਮਾਨਂ, ਸਾਮਣੇਰਿਞ੍ਚ ਅਵਸੇਸਾਯ ਯਾਯ ਕਾਯਚਿ ਪਬ੍ਬਜ੍ਜਾਸਮਾਪਨ੍ਨਾਯ. ਏਤੇ ਚ ਸਬ੍ਬੇ ਅਞ੍ਞਤਿਤ੍ਥਿਯਾ ਵੇਦਿਤਬ੍ਬਾ. ਤੇਨਾਹ ‘‘ਏਤੇਸਂ ਅਚੇਲਕਾਦੀਨਂ ਅਞ੍ਞਤਿਤ੍ਥਿਯਾਨ’’ਨ੍ਤਿ.

ਤੇਸਨ੍ਤਿ ਅਞ੍ਞਤਿਤ੍ਥਿਯਾਨਂ. ਭਾਜਨਂ ਨਿਕ੍ਖਿਪਿਤ੍ਵਾਤਿ ਆਮਿਸਭਰਿਤਂ ਭਾਜਨਂ ਨਿਕ੍ਖਿਪਿਤ੍ਵਾ. ਬਾਹਿਰਾਲੇਪਨ੍ਤਿ ਤੇਲਾਦਿਂ.

ਅਚੇਲਕਾਦਯੋ ਯਸ੍ਮਾ, ਤਿਤ੍ਥਿਯਾਵ ਮਤਾ ਇਧ;

ਤਸ੍ਮਾ ਤਿਤ੍ਥਿਯਨਾਮੇਨ, ਤਿਕਚ੍ਛੇਦੋ ਕਤੋ ਤਯੋ.

ਅਤਿਤ੍ਥਿਯਸ੍ਸ ਨਗ੍ਗਸ੍ਸ, ਤਥਾ ਤਿਤ੍ਥਿਯਲਿਙ੍ਗਿਨੋ;

ਗਹਟ੍ਠਸ੍ਸਾਪਿ ਭਿਕ੍ਖੁਸ੍ਸ, ਕਪ੍ਪਤੀਤਿ ਵਿਨਿਚ੍ਛਯੋ.

ਅਤਿਤ੍ਥਿਯਸ੍ਸ ਚਿਤ੍ਤੇਨ, ਤਿਤ੍ਥਿਯਸ੍ਸ ਚ ਲਿਙ੍ਗਿਨੋ;

ਸੋਤਾਪਨ੍ਨਾਦਿਨੋ ਦਾਤੁਂ, ਕਪ੍ਪਤੀਤੀਧ ਨੋ ਮਤਿ.

ਅਚੇਲਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਉਯ੍ਯੋਜਨਸਿਕ੍ਖਾਪਦਵਣ੍ਣਨਾ

ਗਾਮਂ ਵਾ ਨਿਗਮਂ ਵਾਤਿ ਏਤ੍ਥ ਨਗਰਮ੍ਪਿ ਗਾਮਗ੍ਗਹਣੇਨੇਵ ਗਹਿਤਨ੍ਤਿ ਦਟ੍ਠਬ੍ਬਂ. ਪਵਿਸਿਸ੍ਸਾਮਾਤਿ ਏਤ੍ਥ ਗਹੇਤ੍ਵਾ ‘‘ਗਨ੍ਤ੍ਵਾ’’ਤਿ ਪਾਠਸੇਸੋ, ਅਸਮਨ੍ਨਾਹਾਰੋ ਵਾ ਤਸ੍ਸਾ ਇਤ੍ਥਿਯਾ ਤਸ੍ਮਿਂ ਗਾਮੇ ਸਨ੍ਨਿਹਿਤਭਾਵਂ ਅਜਾਨਨ੍ਤੋ ਵਾ ‘‘ਏਹਾਵੁਸੋ, ਗਾਮਂ ਵਾ ਨਿਗਮਂ ਵਾ ਪਿਣ੍ਡਾਯ ਪਵਿਸਿਸ੍ਸਾਮਾ’’ਤਿ ਭਿਕ੍ਖੁਂ ਗਹੇਤ੍ਵਾ ਗਨ੍ਤ੍ਵਾਤਿ ਅਤ੍ਥੋ. ਯਂ ਕਿਞ੍ਚਿ ਆਮਿਸਨ੍ਤਿ ਯਾਗੁਆਦਿਕਂ ਯਂ ਕਿਞ੍ਚਿ ਆਮਿਸਂ. ਉਯ੍ਯੋਜੇਯ੍ਯਾਤਿ ਅਤ੍ਤਨੋ ਕੀਲ਼ਾਨੁਰੂਪਂ ਇਤ੍ਥਿਂ ਦਿਸ੍ਵਾ ਉਯ੍ਯੋਜੇਯ੍ਯ ਪਹਿਣੇਯ੍ਯ. ਤੇਨਾਹ ‘‘ਮਾਤੁਗਾਮੇਨ ਸਦ੍ਧਿ’’ਨ੍ਤਿਆਦਿ. ਆਦਿਸਦ੍ਦੇਨ ਵੁਤ੍ਤਾਵਸੇਸਂ ਕਾਯਵਚੀਦ੍ਵਾਰਵੀਤਿਕ੍ਕਮਂ ਸਙ੍ਗਣ੍ਹਾਤਿ. ‘‘ਗਚ੍ਛਾ’’ਤਿਆਦੀਨਿ ਵਤ੍ਵਾਤਿ ‘‘ਗਚ੍ਛਾਵੁਸੋ, ਨ ਮੇ ਤਯਾ ਸਦ੍ਧਿਂ ਕਥਾ ਵਾ ਨਿਸਜ੍ਜਾ ਵਾ ਫਾਸੁ ਹੋਤਿ, ਏਕਕਸ੍ਸ ਮੇ ਕਥਾ ਵਾ ਨਿਸਜ੍ਜਾ ਵਾ ਫਾਸੁ ਹੋਤੀ’’ਤਿ (ਪਾਚਿ. ੨੭੫) ਵਤ੍ਵਾ. ਏਤਂ ਅਨਾਚਾਰਮੇਵਾਤਿ ਏਤਂ ਯਥਾਵੁਤ੍ਤਂ ਹਸਨਾਦਿਅਨਾਚਾਰਮੇਵ. ਨ ਅਞ੍ਞਂ ਪਤਿਰੂਪਂ ਕਾਰਣਨ੍ਤਿ ਠਪੇਤ੍ਵਾ ਵੁਤ੍ਤਪ੍ਪਕਾਰਂ ਅਨਾਚਾਰਂ ਉਭਿਨ੍ਨਂ ਏਕਤੋ ਨ ਯਾਪਨਾਦਿਂ ਅਞ੍ਞਂ ਪਤਿਰੂਪਕਾਰਣਂ ਪਚ੍ਚਯਂ ਕਰਿਤ੍ਵਾ ਨ ਹੋਤੀਤਿ ਅਤ੍ਥੋ. ਅਸ੍ਸਾਤਿ ਉਯ੍ਯੋਜਕਸ੍ਸ. ਸੋਤਿ ਯੋ ਉਯ੍ਯੋਜਿਤੋ, ਸੋ.

ਅਨੁਪਸਮ੍ਪਨ੍ਨੇਤਿ ਸਾਮਣੇਰੇ. ਸੋਵ ਇਧ ਅਨੁਪਸਮ੍ਪਨ੍ਨੋਤਿ ਅਧਿਪ੍ਪੇਤੋਤਿ ਵਦਨ੍ਤਿ. ਉਭਿਨ੍ਨਮ੍ਪੀਤਿ ਉਪਸਮ੍ਪਨ੍ਨਸ੍ਸ ਵਾ ਅਨੁਪਸਮ੍ਪਨ੍ਨਸ੍ਸ ਵਾਤਿ ਦ੍ਵਿਨ੍ਨਮ੍ਪਿ. ਕਲਿਸਾਸਨਾਰੋਪਨੇਤਿ (ਪਾਚਿ. ਅਟ੍ਠ. ੨੭੭) ਕਲੀਤਿ ਕੋਧੋ, ਤਸ੍ਸ ਸਾਸਨਂ ਆਣਂ ਕਲਿਸਾਸਨਂ, ਤਸ੍ਸਾਰੋਪਨੇਤਿ ਅਤ੍ਥੋ, ‘‘ਅਪ੍ਪੇਵ ਨਾਮ ਇਮਿਨਾਪਿ ਉਬ੍ਬਾਲ਼੍ਹੋ ਪਕ੍ਕਮੇਯ੍ਯਾ’’ਤਿ ਕੋਧਵਸੇਨ ਠਾਨਨਿਸਜ੍ਜਾਦੀਸੁ ਦੋਸਂ ਦਸ੍ਸੇਤ੍ਵਾ ‘‘ਪਸ੍ਸਥ ਭੋ ਇਮਸ੍ਸ ਠਾਨਂ ਨਿਸਜ੍ਜਂ ਆਲੋਕਿਤਂ ਵਿਲੋਕਿਤਂ, ਖਾਣੁ ਵਿਯ ਤਿਟ੍ਠਤਿ, ਸੁਨਖੋ ਵਿਯ ਨਿਸੀਦਤਿ, ਮਕ੍ਕਟੋ ਵਿਯ ਇਤੋ ਚਿਤੋ ਚ ਵਿਲੋਕੇਤੀ’’ਤਿ ਏਵਂ ਅਮਨਾਪਵਚਨਸ੍ਸ ਭਣਨੇਤਿ ਵੁਤ੍ਤਂ ਹੋਤਿ. ਸੁਦ੍ਧਚਿਤ੍ਤੇਨ ਪਨੇਵਂ ਭਣਨੇ ਦੋਸੋ ਨਤ੍ਥਿ. ਏਵਮਾਦੀਹੀਤਿ ਏਤ੍ਥ ਆਦਿਸਦ੍ਦੇਨ ‘‘ਮਹਗ੍ਘਂ ਭਣ੍ਡਂ ਪਸ੍ਸਿਤ੍ਵਾ ਲੋਭਧਮ੍ਮਂ ਉਪ੍ਪਾਦੇਸ੍ਸਤੀ’’ਤਿ ਉਯ੍ਯੋਜੇਤਿ, ‘‘ਮਾਤੁਗਾਮਂ ਪਸ੍ਸਿਤ੍ਵਾ ਅਨਭਿਰਤਿਂ ਉਪ੍ਪਾਦੇਸ੍ਸਤੀ’’ਤਿ ਉਯ੍ਯੋਜੇਤਿ, ‘‘ਗਿਲਾਨਸ੍ਸ ਵਾ ਓਹਿਯ੍ਯਕਸ੍ਸ ਵਾ ਵਿਹਾਰਪਾਲਸ੍ਸ ਵਾ ਯਾਗੁਂ ਵਾ ਭਤ੍ਤਂ ਵਾ ਖਾਦਨੀਯਂ ਵਾ ਨੀਹਰਾ’’ਤਿ ਉਯ੍ਯੋਜੇਤਿ, ‘‘ਨ ਅਨਾਚਾਰਂ ਆਚਰਿਤੁਕਾਮੋ ਸਤਿ ਕਰਣੀਯੇ ਉਯ੍ਯੋਜੇਤੀ’’ਤਿ (ਪਾਚਿ. ੨੭੮) ਏਤੇਸਂ ਗਹਣਂ.

ਉਯ੍ਯੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਸਭੋਜਨਸਿਕ੍ਖਾਪਦਵਣ੍ਣਨਾ

‘‘ਸਭੋਜਨੇ’’ਤਿ ਬਾਹਿਰਤ੍ਥਸਮਾਸੋਯਂ, ਉਭਸਦ੍ਦੇ ਉਕਾਰਸ੍ਸ ਚ ਲੋਪੋਤਿ ਆਹ ‘‘ਸਹ ਉਭੋਹਿ ਜਨੇਹੀ’’ਤਿਆਦਿ. ਤਤ੍ਥ ਉਭੋਹਿ ਜਨੇਹੀਤਿ ਜਾਯਾ ਚ ਪਤਿ ਚਾਤਿ ਉਭੋਹਿ ਜਨੇਹਿ. ਭੁਞ੍ਜਿਤਬ੍ਬਨ੍ਤਿ ਵਾ ਭੋਜਨਂ, ਇਤ੍ਥੀ ਚ ਪੁਰਿਸੋ ਚ, ਤੇਨ ਸਹ ਵਤ੍ਤਤੀਤਿ ਸਭੋਜਨਨ੍ਤਿ ਆਹ ‘‘ਅਥ ਵਾ’’ਤਿਆਦਿ. ਰਾਗਪਰਿਯੁਟ੍ਠਿਤਸ੍ਸਾਤਿ ਮੇਥੁਨਾਧਿਪ੍ਪਾਯਸ੍ਸ. ਸਯਨਿਘਰਨ੍ਤਿ ਸਯਨੀਯਘਰਂ, ਵਾਸਗੇਹਨ੍ਤਿ ਅਤ੍ਥੋ. ਮਹਲ੍ਲਕਸ੍ਸਾਤਿ ਮਹਲ੍ਲਕਸ੍ਸ ਸਯਨਿਘਰਸ੍ਸ. ਪਿਟ੍ਠਸਙ੍ਘਾਟਤੋਤਿ ਦ੍ਵਾਰਬਾਹਤੋ ਖੁਦ੍ਦਕਸ੍ਸ ਵਾਤਿ ਯਥਾ ਤਥਾ ਵਾ ਕਤਸ੍ਸ ਖੁਦ੍ਦਕਸ੍ਸ ਸਯਨਿਘਰਸ੍ਸ. ਵੇਮਜ੍ਝਂ ਅਤਿਕ੍ਕਮਿਤ੍ਵਾ ਨਿਸੀਦੇਯ੍ਯਾਤਿ ਪਿਟ੍ਠਿਵਂਸਂ ਅਤਿਕ੍ਕਮਿਤ੍ਵਾ ਨਿਸੀਦੇਯ੍ਯ. ਖੁਦ੍ਦਕਂ (ਸਾਰਤ੍ਥ. ਟੀ. ਪਾਚਿਤ੍ਤਿਯ ੩.੨੮੦) ਨਾਮ ਸਯਨਿਘਰਂ ਵਿਤ੍ਥਾਰਤੋ ਪਞ੍ਚਹਤ੍ਥਪ੍ਪਮਾਣਂ ਹੋਤਿ, ਤਸ੍ਸ ਚ ਮਜ੍ਝਿਮਟ੍ਠਾਨਂ ਪਿਟ੍ਠਸਙ੍ਘਾਟਤੋ ਅਡ੍ਢਤੇਯ੍ਯਹਤ੍ਥਪ੍ਪਮਾਣਮੇਵ ਹੋਤਿ, ਤਸ੍ਮਾ ਤਾਦਿਸੇ ਸਯਨਿਘਰੇ ਪਿਟ੍ਠਸਙ੍ਘਾਟਤੋ ਹਤ੍ਥਪਾਸਂ ਵਿਜਹਿਤ੍ਵਾ ਨਿਸਿਨ੍ਨੋ ਪਿਟ੍ਠਿਵਂਸਂ ਅਤਿਕ੍ਕਮਿਤ੍ਵਾ ਨਿਸਿਨ੍ਨੋ ਨਾਮ ਹੋਤਿ. ਏਵਂ ਨਿਸਿਨ੍ਨੋ ਚ ਵੇਮਜ੍ਝਂ ਅਤਿਕ੍ਕਮਿਤ੍ਵਾ ਨਿਸਿਨ੍ਨੋ ਨਾਮ ਹੋਤਿ. ਤੇਨ ਵੁਤ੍ਤਂ ਪਾਲ਼ਿਯਂ ‘‘ਪਿਟ੍ਠਿਵਂਸਂ ਅਤਿਕ੍ਕਮਿਤ੍ਵਾ ਨਿਸੀਦਤੀ’’ਤਿ (ਪਾਚਿ. ੨੮੧). ਸਚਿਤ੍ਤਕਞ੍ਚੇਤ੍ਥ ਅਨੁਪਵਿਸਿਤ੍ਵਾ ਨਿਸੀਦਨਚਿਤ੍ਤੇਨ ਦਟ੍ਠਬ੍ਬਂ.

ਸਭੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪-੫. ਰਹੋਪਟਿਚ੍ਛਨ੍ਨਰਹੋਨਿਸਜ੍ਜਸਿਕ੍ਖਾਪਦਵਣ੍ਣਨਾ

ਚਤੁਤ੍ਥਪਞ੍ਚਮਸਿਕ੍ਖਾਪਦੇ ਯਂ ਵਤ੍ਤਬ੍ਬਂ ਸਿਯਾ, ਤਂ ਸਬ੍ਬਂ ਅਨਿਯਤਦ੍ਵਯੇ ਵੁਤ੍ਤਮੇਵਾਤਿ ਆਹ ‘‘ਸੇਸੋ ਕਥਾਨਯੋ ਅਨਿਯਤਦ੍ਵਯੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ’’ਤਿ.

ਰਹੋਪਟਿਚ੍ਛਨ੍ਨਰਹੋਨਿਸਜ੍ਜਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਚਾਰਿਤ੍ਤਸਿਕ੍ਖਾਪਦਵਣ੍ਣਨਾ

ਅਨ੍ਤੋਉਪਚਾਰਸੀਮਾਯ ਦਸ੍ਸਨੂਪਚਾਰੇ ਭਿਕ੍ਖੁਂ ਦਿਸ੍ਵਾਤਿ ਯਤ੍ਥ ਠਿਤਸ੍ਸ ਕੁਲਾਨਿ ਪਯਿਰੁਪਾਸਨਚਿਤ੍ਤਂ ਉਪ੍ਪਨ੍ਨਂ, ਤਤੋ ਪਟ੍ਠਾਯ ਗਚ੍ਛਨ੍ਤੋ ਅਨ੍ਤੋਉਪਚਾਰਸੀਮਾਯ ਦਸ੍ਸਨੂਪਚਾਰੇ ਭਿਕ੍ਖੁਂ ਪਸ੍ਸੇ ਵਾ ਅਭਿਮੁਖੇ ਵਾ ਦਿਸ੍ਵਾ. ਪਕਤਿਵਚਨੇਨਾਤਿ ਯਂ ਦ੍ਵਾਦਸਹਤ੍ਥਬ੍ਭਨ੍ਤਰੇ ਠਿਤੇਨ ਸੋਤੁਂ ਸਕ੍ਕਾ, ਤਾਦਿਸੇਨ ਵਚਨੇਨ, ਇਤੋ ਚਿਤੋ ਚ ਪਰਿਯੇਸਿਤ੍ਵਾ ਆਰੋਚਨਕਿਚ੍ਚਂ ਪਨ ਨਤ੍ਥਿ. ਯੋ ਹਿ ਏਵਂ ਪਰਿਯੇਸਿਤਬ੍ਬੋ, ਸੋ ਅਸਨ੍ਤੋਯੇਵ. ਤੇਨਾਹ ‘‘ਤਾਦਿਸ’’ਨ੍ਤਿਆਦਿ. ਅਨਾਪੁਚ੍ਛਿਤ੍ਵਾਤਿ ਅਨਾਰੋਚੇਤ੍ਵਾ.

ਅਨ੍ਤਰਾਰਾਮਭਿਕ੍ਖੁਨੁਪਸ੍ਸਯਤਿਤ੍ਥਿਯਸੇਯ੍ਯਪਟਿਕ੍ਕਮਨਭਤ੍ਤਿਯਘਰਾਨੀਤਿ ਏਤ੍ਥ ਅਨ੍ਤਰਾਰਾਮਨ੍ਤਿ ਅਨ੍ਤੋਗਾਮੇ ਵਿਹਾਰੋ. ਪਟਿਕ੍ਕਮਨਨ੍ਤਿ ਆਸਨਸਾਲਾ. ਭਤ੍ਤਿਯਘਰਨ੍ਤਿ ਨਿਮਨ੍ਤਿਤਘਰਂ ਵਾ ਸਲਾਕਭਤ੍ਤਾਦਿਦਾਯਕਾਨਂ ਵਾ ਘਰਂ. ਆਪਦਾਸੂਤਿ ਜੀਵਿਤਬ੍ਰਹ੍ਮਚਰਿਯਨ੍ਤਰਾਯੇਸੁ. ਕਿਰਿਯਾਕਿਰਿਯਨ੍ਤਿ ਏਤ੍ਥ ਕੁਲੇਸੁ ਚਾਰਿਤ੍ਤਾਪਜ੍ਜਨਂ ਕਿਰਿਯਂ, ਅਨਾਪੁਚ੍ਛਨਂ ਅਕਿਰਿਯਨ੍ਤਿ ਵੇਦਿਤਬ੍ਬਂ.

ਚਾਰਿਤ੍ਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਮਹਾਨਾਮਸਿਕ੍ਖਾਪਦਵਣ੍ਣਨਾ

ਸਬ੍ਬਞ੍ਚੇਤਂ ਵਤ੍ਥੁਵਸੇਨ ਵੁਤ੍ਤਨ੍ਤਿ ‘‘ਅਗਿਲਾਨੇਨ ਭਿਕ੍ਖੁਨਾ ਚਤੁਮਾਸਪਚ੍ਚਯਪਵਾਰਣਾ ਸਾਦਿਤਬ੍ਬਾ ਅਞ੍ਞਤ੍ਰ ਪੁਨਪਵਾਰਣਾਯ ਅਞ੍ਞਤ੍ਰ ਨਿਚ੍ਚਪਵਾਰਣਾਯਾ’’ਤਿ (ਪਾਚਿ. ੩੦੬) ਏਤਂ ਸਬ੍ਬਂ ਸਿਕ੍ਖਾਪਦਨਿਦਾਨਸਙ੍ਖਾਤਸ੍ਸ ਵਤ੍ਥੁਨੋ ਵਸੇਨ ਵੁਤ੍ਤਂ. ਤਤ੍ਥ ਹਿ ਮਹਾਨਾਮੇਨ ਸਕ੍ਕੇਨ ‘‘ਇਚ੍ਛਾਮਹਂ, ਭਨ੍ਤੇ, ਸਙ੍ਘਂ ਚਤੁਮਾਸਂ ਭੇਸਜ੍ਜੇਨ ਪਵਾਰੇਤੁ’’ਨ੍ਤਿਆਦਿਨਾ (ਪਾਚਿ. ੩੦੩) ਉਸ੍ਸਨ੍ਨੁਸ੍ਸਨ੍ਨੇਨ ਚ ਭੇਸਜ੍ਜੇਨ ਚਤੁਮਾਸਂ ਪੁਨ ਨਿਚ੍ਚਂ ਪਵਾਰਣਾ ਕਤਾ, ਤਸ੍ਮਾ ਭਗਵਤਾ ਤਸ੍ਸ ਵਸੇਨ ਏਵਂ ਵੁਤ੍ਤਨ੍ਤਿ ਵੁਤ੍ਤਂ ਹੋਤਿ. ਅਞ੍ਞਤ੍ਰ ਪੁਨਪਵਾਰਣਾਯਾਤਿ ਯਦਿ ਪੁਨਪਵਾਰਣਾ ਅਤ੍ਥਿ, ਤਂ ਠਪੇਤ੍ਵਾ. ਅਞ੍ਞਤ੍ਰ ਨਿਚ੍ਚਪਵਾਰਣਾਯਾਤਿ ਏਤ੍ਥਾਪਿ ਏਸੇਵ ਨਯੋ. ਯਦਿ ਪਨ ਤਾਪਿ ਅਤ੍ਥਿ, ਸਾਦਿਤਬ੍ਬਾਵਾਤਿ ਅਧਿਪ੍ਪਾਯੋ. ਤੇਨਾਹ ‘‘ਅਯਂ ਪਨੇਤ੍ਥ ਅਤ੍ਥੋ’’ਤਿਆਦਿ. ਤਤ੍ਥਾਤਿ ਤਿਸ੍ਸਂ ਪਵਾਰਣਾਯਂ. ਭੇਸਜ੍ਜੇਹਿ ਵਾ ਪਰਿਚ੍ਛੇਦੋ ਕਤੋ ਹੋਤੀਤਿ ‘‘ਸਪ੍ਪਿ ਤੇਲ’’ਨ੍ਤਿ ਏਵਮਾਦਿਨਾ ਨਾਮਵਸੇਨ ਵਾ ‘‘ਪਤ੍ਥੇਨ ਨਾਲ਼ਿਯਾ ਆਲ਼੍ਹਕੇਨਾ’’ਤਿਆਦਿਨਾ ਪਰਿਮਾਣਵਸੇਨ ਵਾ ‘‘ਏਤ੍ਤਕਾਨਿ ਵਾ ਭੇਸਜ੍ਜਾਨਿ ਵਿਞ੍ਞਾਪੇਤਬ੍ਬਾਨੀ’’ਤਿ ਭੇਸਜ੍ਜੇਹਿ ਪਰਿਚ੍ਛੇਦੋ ਕਤੋ ਹੋਤਿ. ਨਭੇਸਜ੍ਜਕਰਣੀਯੇਤਿ ਮਿਸ੍ਸਕਭਤ੍ਤੇਨਾਪਿ ਚੇ ਯਾਪੇਤੁਂ ਸਕ੍ਕੋਤਿ, ਨਭੇਸਜ੍ਜਕਰਣੀਯਂ ਨਾਮ ਹੋਤਿ. ਅਞ੍ਞਂ ਭੇਸਜ੍ਜਨ੍ਤਿ ਸਪ੍ਪਿਨਾ ਪਵਾਰਿਤੋ ਤੇਲਂ, ਆਲ਼੍ਹਕੇਨ ਪਵਾਰਿਤੋ ਦੋਣਂ.

ਯਥਾਭੂਤਂ ਆਚਿਕ੍ਖਿਤ੍ਵਾਤਿ ‘‘ਇਮੇਹਿ ਤਯਾ ਭੇਸਜ੍ਜੇਹਿ ਪਵਾਰਿਤਮ੍ਹਾ, ਅਮ੍ਹਾਕਞ੍ਚ ਇਮਿਨਾ ਚ ਇਮਿਨਾ ਚ ਭੇਸਜ੍ਜੇਨ ਅਤ੍ਥੋ, ਯਾਸੁ ਤਯਾ ਰਤ੍ਤੀਸੁ ਪਵਾਰਿਤਮ੍ਹਾ, ਤਾ ਰਤ੍ਤਿਯੋ ਵੀਤਿਵਤ੍ਤਾ, ਅਮ੍ਹਾਕਞ੍ਚ ਭੇਸਜ੍ਜੇਨ ਅਤ੍ਥੋ’’ਤਿ ਯਥਾਭੂਤਂ ਆਰੋਚੇਤ੍ਵਾ. ਏਵਞ੍ਚ ਵਿਞ੍ਞਾਪੇਤੁਂ ਗਿਲਾਨੋਵ ਲਭਤਿ, ਨ ਇਤਰੋ.

ਮਹਾਨਾਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਉਯ੍ਯੁਤ੍ਤਸੇਨਾਸਿਕ੍ਖਾਪਦਵਣ੍ਣਨਾ

ਚਤੁਰਙ੍ਗਿਨਿਨ੍ਤਿ ਹਤ੍ਥਿਅਸ੍ਸਰਥਪਤ੍ਤੀਤਿ ਚਤ੍ਤਾਰਿ ਅਙ੍ਗਾਨਿ ਏਤਿਸ੍ਸਾਤਿ ਚਤੁਰਙ੍ਗਿਨੀ, ਤਂ ਚਤੁਰਙ੍ਗਿਨਿਂ. ‘‘ਦ੍ਵਾਦਸਪੁਰਿਸੋ ਹਤ੍ਥੀ, ਤਿਪੁਰਿਸੋ ਅਸ੍ਸੋ, ਚਤੁਪੁਰਿਸੋ ਰਥੋ, ਚਤ੍ਤਾਰੋ ਪੁਰਿਸਾ ਸਰਹਤ੍ਥਾ ਪਤ੍ਤੀ’’ਤਿ (ਪਾਚਿ. ੩੧੪) ਅਯਂ ਪਚ੍ਛਿਮਕੋਟਿਯਾ ਚਤੁਰਙ੍ਗਸਮਨ੍ਨਾਗਤਾ ਸੇਨਾ ਨਾਮ, ਈਦਿਸਂ ਸੇਨਨ੍ਤਿ ਅਤ੍ਥੋ. ਤਂ ਪਨ ਵਿਜਹਿਤ੍ਵਾਤਿ ਕੇਨਚਿ ਅਨ੍ਤਰਿਤਾ ਵਾ ਨਿਨ੍ਨਂ ਓਰੁਲ਼੍ਹਾ ਵਾ ਨ ਦਿਸ੍ਸਤਿ, ਇਧ ਠਤ੍ਵਾਨ ਸਕ੍ਕਾ ਦਟ੍ਠੁਨ੍ਤਿ ਤਂ ਦਸ੍ਸਨੂਪਚਾਰਂ ਵਿਜਹਿਤ੍ਵਾ ਅਞ੍ਞਂ ਠਾਨਂ ਗਨ੍ਤ੍ਵਾ.

ਸੇਨਾਦਸ੍ਸਨਵਤ੍ਥੁਸ੍ਮਿਨ੍ਤਿ ਸੇਨਂ ਦਸ੍ਸਨਾਯ ਗਮਨਵਤ੍ਥੁਸ੍ਮਿਂ. ਅਯਮੇਵ ਵਾ ਪਾਠੋ. ਹਤ੍ਥਿਆਦੀਸੁ ਏਕਮੇਕਨ੍ਤਿ ਹਤ੍ਥਿਆਦੀਸੁ ਚਤੂਸੁ ਅਙ੍ਗੇਸੁ ਏਕਮੇਕਂ, ਅਨ੍ਤਮਸੋ ਏਕਪੁਰਿਸਾਰੁਲ਼੍ਹਹਤ੍ਥਿਮ੍ਪਿ ਏਕਮ੍ਪਿ ਸਰਹਤ੍ਥਂ ਪੁਰਿਸਨ੍ਤਿ ਅਤ੍ਥੋ. ਅਨੁਯ੍ਯੁਤ੍ਤਾ ਨਾਮ ਰਾਜਾ ਉਯ੍ਯਾਨਂ ਵਾ ਨਦਿਂ ਵਾ ਗਚ੍ਛਤਿ, ਏਵਂ ਅਨੁਯ੍ਯੁਤ੍ਤਾ ਹੋਤਿ. ਤਥਾਰੂਪਪ੍ਪਚ੍ਚਯੇਤਿ ‘‘ਮਾਤੁਲੋ ਸੇਨਾਯ ਗਿਲਾਨੋ ਹੋਤੀ’’ਤਿਆਦਿਕੇ (ਪਾਚਿ. ੩੧੨) ਅਨੁਰੂਪਕਾਰਣੇ ਸਤਿ. ਆਪਦਾਸੂਤਿ ਜੀਵਿਤਬ੍ਰਹ੍ਮਚਰਿਯਨ੍ਤਰਾਯੇਸੁ ‘‘ਏਤ੍ਥ ਗਤੋ ਮੁਚ੍ਚਿਸ੍ਸਾਮੀ’’ਤਿ ਗਚ੍ਛਤੋ ਅਨਾਪਤ੍ਤਿ.

ਉਯ੍ਯੁਤ੍ਤਸੇਨਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਸੇਨਾਵਾਸਸਿਕ੍ਖਾਪਦਵਣ੍ਣਨਾ

ਪਟਿਸੇਨਾਰੁਦ੍ਧਾਯਾਤਿ ਯਥਾ ਸਞ੍ਚਾਰੋ ਛਿਜ੍ਜਤਿ, ਏਵਂ ਪਟਿਸੇਨਾਯ ਰੁਦ੍ਧਾਯ ਸੇਨਾਯ. ਕੇਨਚਿ ਪਲਿਬੁਦ੍ਧਸ੍ਸਾਤਿ ਵੇਰਿਕੇਨ ਵਾ ਇਸ੍ਸਰੇਨ ਵਾ ਕੇਨਚਿ ਰੁਦ੍ਧਸ੍ਸ.

ਸੇਨਾਵਾਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਉਯ੍ਯੋਧਿਕਸਿਕ੍ਖਾਪਦਵਣ੍ਣਨਾ

ਸਮ੍ਪਹਾਰਟ੍ਠਾਨਸ੍ਸਾਤਿ ਯੁਦ੍ਧਭੂਮਿਯਾ. ਬਲਸ੍ਸ ਅਗ੍ਗਂ ਜਾਨਨ੍ਤੀਤਿ ‘‘ਏਤ੍ਤਕਾ ਹਤ੍ਥੀ, ਏਤ੍ਤਕਾ ਅਸ੍ਸਾ, ਏਤ੍ਤਕਾ ਰਥਾ, ਏਤ੍ਤਕਾ ਪਤ੍ਤੀ’’ਤਿ (ਪਾਚਿ. ੩੨੪) ਬਲਸ੍ਸ ਕੋਟ੍ਠਾਸਂ ਜਾਨਨ੍ਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਵਿਹਾਰਗ੍ਗੇਨਾ’’ਤਿਆਦੀਸੁ (ਚੂਲ਼ਵ. ੩੧੮) ਵਿਯ ਕੋਟ੍ਠਾਸਤ੍ਥੋ ਹੇਤ੍ਥ ਅਗ੍ਗਸਦ੍ਦੋ. ਤੇਨਾਹ ‘‘ਬਲਗਣਨਟ੍ਠਾਨਨ੍ਤਿ ਅਤ੍ਥੋ’’ਤਿ. ਸੇਨਾਯ ਵਿਯੂਹਨ੍ਤਿ ‘‘ਇਤੋ ਹਤ੍ਥੀ ਹੋਨ੍ਤੁ, ਇਤੋ ਅਸ੍ਸਾ ਹੋਨ੍ਤੁ, ਇਤੋ ਰਥਾ ਹੋਨ੍ਤੁ, ਇਤੋ ਪਤ੍ਤੀ ਹੋਨ੍ਤੂ’’ਤਿ (ਪਾਚਿ. ੩੨੪) ਸੇਨਾਯ ਠਪਨਂ, ਰਾਸਿਂ ਕਤ੍ਵਾ ਠਪਨਨ੍ਤਿ ਅਤ੍ਥੋ. ਤੇਨਾਹ ‘‘ਸੇਨਾਸਨ੍ਨਿਵੇਸਸ੍ਸੇਤਂ ਨਾਮ’’ਨ੍ਤਿ. ਦ੍ਵਾਦਸਪੁਰਿਸੋ ਹਤ੍ਥੀਤਿ ਚਤ੍ਤਾਰੋ ਆਰੋਹਕਾ, ਏਕੇਕਪਾਦਰਕ੍ਖਕਾ ਦ੍ਵੇ ਦ੍ਵੇਤਿ ਏਵਂ ਦ੍ਵਾਦਸਪੁਰਿਸੋ ਹਤ੍ਥੀ. ਤਿਪੁਰਿਸੋ ਅਸ੍ਸੋਤਿ ਏਕੋ ਆਰੋਹਕੋ, ਦ੍ਵੇ ਪਾਦਰਕ੍ਖਕਾਤਿ ਏਵਂ ਤਿਪੁਰਿਸੋ ਅਸ੍ਸੋ. ਚਤੁਪੁਰਿਸੋ ਰਥੋਤਿ ਏਕੋ ਸਾਰਥਿ, ਏਕੋ ਯੋਧੋ, ਦ੍ਵੇ ਆਣਿਰਕ੍ਖਕਾਤਿ ਏਵਂ ਚਤੁਪੁਰਿਸੋ ਰਥੋਤਿ.

ਉਯ੍ਯੋਧਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਅਚੇਲਕਵਗ੍ਗੋ ਪਞ੍ਚਮੋ.