੪. ਭੋਜਨਵਗ੍ਗੋ

੧. ਆਵਸਥਸਿਕ੍ਖਾਪਦਵਣ੍ਣਨਾ

‘‘ਅਗਿਲਾਨੋ’’ਤਿ ਏਤ੍ਥ ਅਨ੍ਤਮਸੋ ਦ੍ਵਿਗਾਵੁਤਂ ਗਨ੍ਤੁਂ ਸਮਤ੍ਥੋ ਅਧਿਪ੍ਪੇਤੋਤਿ ਆਹ ‘‘ਅਦ੍ਧਯੋਜਨਮ੍ਪਿ ਗਨ੍ਤੁਂ ਸਮਤ੍ਥੇਨਾ’’ਤਿ. ਆਵਸਥਪਿਣ੍ਡੋਤਿ ਆਵਸਥੇ ਪਿਣ੍ਡੋ, ਸਾਲਾਦੀਸੁ ਅਨੋਦਿਸ੍ਸ ਯਾਵਦਤ੍ਥਂ ਪਞ੍ਞਤ੍ਤਂ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਂ ਭੋਜਨਨ੍ਤਿ ਅਤ੍ਥੋ. ਤੇਨਾਹ ‘‘ਇਮੇਸਂ ਵਾ’’ਤਿਆਦਿ. ਤਤ੍ਥ ਇਮੇਸਂ ਵਾਤਿ ਇਮੇਸਂ ਪਾਸਣ੍ਡਾਨਂ ਵਾ. ਏਤ੍ਤਕਾਨਂ ਵਾਤਿ ਇਮਸ੍ਮਿਂ ਪਾਸਣ੍ਡੇ ਏਤ੍ਤਕਾਨਂ ਪਾਸਣ੍ਡਾਨਂ ਵਾ. ਪਾਸਣ੍ਡਨ੍ਤਿ ਛਨ੍ਨਵੁਤਿਵਿਧਂ ਸਮਣਪਰਿਬ੍ਬਾਜਕਾਦਿਂ. ਤੇ ਹਿ ਤਣ੍ਹਾਪਾਸਞ੍ਚੇਵ ਦਿਟ੍ਠਿਪਾਸਞ੍ਚ ਡੇਨ੍ਤਿ ਓਡ੍ਡੇਨ੍ਤੀਤਿ ਪਾਸਣ੍ਡਾਤਿ ਵੁਚ੍ਚਨ੍ਤਿ. ਅਨੋਦਿਸ੍ਸਾਤਿ ਅਨੁਦ੍ਦਿਸਿਤ੍ਵਾ, ਅਪਰਿਚ੍ਛਿਨ੍ਦਿਤ੍ਵਾਤਿ ਅਤ੍ਥੋ. ਸਾਲਾਦੀਸੁ ਯਤ੍ਥ ਕਤ੍ਥਚੀਤਿ ਸਾਲਾਰੁਕ੍ਖਮੂਲਅਬ੍ਭੋਕਾਸਾਦੀਸੁ ਯਤ੍ਥ ਕਤ੍ਥਚਿ ਠਾਨੇਸੁ. ਏਕਦਿਵਸਮੇਵ ਭੁਞ੍ਜਿਤਬ੍ਬੋਤਿ ਏਕਦਿਵਸਂ ਸਕਿਂਯੇਵ ਭੁਞ੍ਜਿਤਬ੍ਬੋ, ਏਕਸ੍ਮਿਂ ਦਿਵਸੇ ਪੁਨਪ੍ਪੁਨਂ ਭੁਞ੍ਜਿਤੁਂ ਨ ਵਟ੍ਟਤਿ. ਦੁਤਿਯਦਿਵਸਤੋ ਪਟ੍ਠਾਯਾਤਿ ਭੁਤ੍ਤਦਿਵਸਸ੍ਸ ਦੁਤਿਯਦਿਵਸਤੋ ਪਟ੍ਠਾਯ. ਅਜ੍ਝੋਹਾਰੇ ਅਜ੍ਝੋਹਾਰੇ ਪਾਚਿਤ੍ਤਿਯਨ੍ਤਿ ਆਲੋਪੇ ਆਲੋਪੇ ਕਬਲ਼ੇ ਕਬਲ਼ੇ ਪਾਚਿਤ੍ਤਿਯਂ. ਨਾਨਾਕੁਲੇਹਿ (ਪਾਚਿ. ਅਟ੍ਠ. ੨੦੬) ਪਨ ਨਾਨਾਟ੍ਠਾਨੇਸੁ ਪਞ੍ਞਤ੍ਤਂ, ਏਕਸ੍ਮਿਂ ਠਾਨੇ ਏਕਦਿਵਸਂ ਭੁਞ੍ਜਿਤ੍ਵਾ ਦੁਤਿਯਦਿਵਸੇ ਅਞ੍ਞਤ੍ਥ ਭੁਞ੍ਜਿਤੁਂ ਵਟ੍ਟਤਿ, ਪਟਿਪਾਟਿਂ ਪਨ ਖੇਪੇਤ੍ਵਾ ਪੁਨ ਆਦਿਤੋ ਪਟ੍ਠਾਯ ਭੁਞ੍ਜਿਤੁਂ ਨ ਵਟ੍ਟਤਿ. ਏਕਪੂਗਨਾਨਾਪੂਗਏਕਗਾਮਨਾਨਾਗਾਮੇਸੁਪਿ ਏਸੇਵ ਨਯੋ. ਯੋਪਿ ਏਕਕੁਲਸ੍ਸ ਵਾ ਨਾਨਾਕੁਲਾਨਂ ਵਾ ਏਕਤੋ ਪਞ੍ਞਤ੍ਤੋ ਤਣ੍ਡੁਲਾਦੀਨਂ ਅਭਾਵੇਨ ਅਨ੍ਤਰਨ੍ਤਰਾ ਛਿਜ੍ਜਤਿ, ਸੋਪਿ ਨ ਭੁਞ੍ਜਿਤਬ੍ਬੋ. ਸਚੇ ਪਨ ‘‘ਨ ਸਕ੍ਕੋਮ ਦਾਤੁ’’ਨ੍ਤਿ ਉਪਚ੍ਛਿਨ੍ਦਿਤ੍ਵਾ ਪੁਨ ਕਲ੍ਯਾਣਚਿਤ੍ਤੇ ਉਪ੍ਪਨ੍ਨੇ ਦਾਤੁਂ ਆਰਭਨ੍ਤਿ, ਏਤਂ ਪੁਨ ਏਕਦਿਵਸਂ ਭੁਞ੍ਜਿਤੁਂ ਵਟ੍ਟਤਿ.

ਤਿਕਪਾਚਿਤ੍ਤਿਯਨ੍ਤਿ ਅਗਿਲਾਨੇ ਅਗਿਲਾਨਸਞ੍ਞਿਵੇਮਤਿਕਗਿਲਾਨਸਞ੍ਞੀਨਂ ਵਸੇਨ ਤੀਣਿ ਪਾਚਿਤ੍ਤਿਯਾਨਿ. ਗਿਲਾਨਸ੍ਸ ਗਿਲਾਨਸਞ੍ਞਿਨੋਤਿ ਗਿਲਾਨਸ੍ਸ ਪਨ ‘‘ਗਿਲਾਨੋ ਅਹ’’ਨ੍ਤਿ ਸਞ੍ਞਿਨੋ ਅਨੁਵਸਿਤ੍ਵਾ ਭੁਞ੍ਜਨ੍ਤਸ੍ਸ ਅਨਾਪਤ੍ਤਿ. ਸਕਿਂ ਭੁਞ੍ਜਤੀਤਿ ਏਕਦਿਵਸਂ ਭੁਞ੍ਜਤਿ. ‘‘ਗਚ੍ਛਨ੍ਤੋ ਵਾ’’ਤਿ ਇਦਂ ਅਦ੍ਧਯੋਜਨਵਸੇਨ ਗਹੇਤਬ੍ਬਂ, ਤਥਾ ‘‘ਪਚ੍ਚਾਗਚ੍ਛਨ੍ਤੋ’’ਤਿ (ਸਾਰਤ੍ਥ. ਟੀ. ਪਾਚਿਤ੍ਤਿਯ ੩.੨੦੮) ਇਦਮ੍ਪੀਤਿ ਵਦਨ੍ਤਿ. ਕੇਨਚਿ ਉਪਦ੍ਦਵੇਨਾਤਿ ਨਦਿਪੂਰਚੋਰਭਯਾਦਿਨਾ ਕੇਨਚਿ ਉਪਦ੍ਦਵੇਨ. ਅਞ੍ਞਨ੍ਤਿ ਯਾਗੁਖਜ੍ਜਕਫਲਾਫਲਾਦਿਭੇਦਂ ਯਂ ਕਿਞ੍ਚਿ ਅਞ੍ਞਂ. ਅਨੁਵਸਿਤ੍ਵਾਤਿ ਪੁਨ ਵਸਿਤ੍ਵਾ.

ਆਵਸਥਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਗਣਭੋਜਨਸਿਕ੍ਖਾਪਦਵਣ੍ਣਨਾ

ਗਣਭੋਜਨੇਤਿ ਗਣੇਨ ਲਦ੍ਧਤ੍ਤਾ ਗਣਸ੍ਸ ਸਨ੍ਤਕੇ ਭੋਜਨੇ. ਤੇਨਾਹ ‘‘ਗਣਸ੍ਸ ਭੋਜਨੇ’’ਤਿ. ਨਨੁ ਚੇਤ੍ਥ ‘‘ਗਣਸ੍ਸ ਭੋਜਨੇ’’ਤਿ ਵੁਚ੍ਚਤਿ, ਸੋ ਚ ਖੋ ਗਣੋ ‘‘ਕਤ੍ਥਚਿ ਦ੍ਵੀਹਿ, ਕਤ੍ਥਚਿ ਤੀਹੀ’’ਤਿਆਦਿਨਾ ਅਨੇਕਧਾ ਅਧਿਪ੍ਪੇਤੋ, ਇਧ ਕਤਿਹੀਤਿ ਆਹ ‘‘ਇਧ ਚਾ’’ਤਿਆਦਿ. ਤਂ ਪਨੇਤਂ ਗਣਭੋਜਨਂ ਦ੍ਵੀਹਿ ਪਕਾਰੇਹਿ ਪਸਵਤਿ ਨਿਮਨ੍ਤਨਤੋ ਵਾ ਵਿਞ੍ਞਤ੍ਤਿਤੋ ਵਾਤਿ ਆਹ ‘‘ਤੇਸਂ ਨਿਮਨ੍ਤਨਤੋ ਵਾ’’ਤਿਆਦਿ. ਤਤ੍ਥ ਨਿਮਨ੍ਤਨਤੋ ਵਾਤਿ ਅਕਪ੍ਪਿਯਨਿਮਨ੍ਤਨਤੋ ਵਾ. ਓਦਨਾਦੀਨਂ ਪਞ੍ਚਨ੍ਨਨ੍ਤਿ ਓਦਨਸਤ੍ਤੁਕੁਮ੍ਮਾਸਮਚ੍ਛਮਂਸਾਨਂ ਪਞ੍ਚਨ੍ਨਂ.

‘‘ਓਦਨੇਨ ਨਿਮਨ੍ਤੇਮਿ, ਓਦਨਂ ਮੇ ਗਣ੍ਹਥਾ’’ਤਿਆਦਿਨਾ ਨਯੇਨ ਯੇਨ ਕੇਨਚਿ ਵੇਵਚਨੇਨ ਵਾ ਭਾਸਨ੍ਤਰੇਨ ਵਾ ਪਞ੍ਚਨ੍ਨਂ ਭੋਜਨਾਨਂ ਨਾਮਂ ਗਹੇਤ੍ਵਾ ਨਿਮਨ੍ਤੇਤੀਤਿ ਸਮ੍ਬਨ੍ਧੋ. ਚਤ੍ਤਾਰੋਤਿ ਏਕਟ੍ਠਾਨੇ ਵਾ ਨਾਨਾਟ੍ਠਾਨੇਸੁ ਵਾ ਠਿਤੇ ਚਤ੍ਤਾਰੋ ਭਿਕ੍ਖੂ. ਲਕ੍ਖਣਵਚਨਞ੍ਚੇਤਂ, ਤਸ੍ਮਾ ਚਤ੍ਤਾਰੋ ਵਾ ਤਤੋ ਵਾ ਅਧਿਕੇ ਭਿਕ੍ਖੂਤਿ ਅਤ੍ਥੋ. ਵੇਵਚਨੇਨ ਵਾਤਿ ਭਤ੍ਤਅਨ੍ਨਾਦਿਪਰਿਯਾਯਸਦ੍ਦੇਨ ਵਾ. ਭਾਸਨ੍ਤਰੇਨ ਵਾਤਿ ਅਨ੍ਧਦਮਿਲ਼ਾਦਿਭਾਸਨ੍ਤਰੇਨ ਵਾ. ਪਞ੍ਚਨ੍ਨਂ ਭੋਜਨਾਨਂ ਨਾਮਂ ਗਹੇਤ੍ਵਾਤਿ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਸ੍ਸ ਨਾਮਂ ਗਹੇਤ੍ਵਾ. ਓਦਨੇਨ ਨਿਮਨ੍ਤੇਮੀਤਿ ਤੁਮ੍ਹੇ ਭਨ੍ਤੇ ਓਦਨੇਨ ਨਿਮਨ੍ਤੇਮਿ. ਆਦਿਸਦ੍ਦੇਨ ‘‘ਆਕਙ੍ਖਥ ਓਲੋਕੇਥ ਅਧਿਵਾਸੇਥ ਪਟਿਮਾਨੇਥ, ਸਤ੍ਤੁਨਾ ਨਿਮਨ੍ਤੇਮਿ, ਸਤ੍ਤੁਂ ਮੇ ਗਣ੍ਹਥ ਆਕਙ੍ਖਥ ਓਲੋਕੇਥ ਅਧਿਵਾਸੇਥ ਪਟਿਮਾਨੇਥਾ’’ਤਿਆਦੀਨਂ (ਪਾਚਿ. ਅਟ੍ਠ. ੨੧੭-੨੧੮) ਗਹਣਂ. ਏਕਤੋ ਵਾਤਿ ਏਕਤ੍ਥ ਠਿਤੇ ਵਾ ਨਿਸਿਨ੍ਨੇ ਵਾ ਭਿਕ੍ਖੂ ਦਿਸ੍ਵਾ ‘‘ਤੁਮ੍ਹੇ, ਭਨ੍ਤੇ, ਓਦਨੇਨ ਨਿਮਨ੍ਤੇਮੀ’’ਤਿਆਦਿਨਾ ਏਵਂ ਏਕਤੋ ਨਿਮਨ੍ਤਿਤਾ. ਨਾਨਾਤੋ ਵਾ ਨਿਮਨ੍ਤਿਤਾਤਿ ਚਤ੍ਤਾਰਿ ਪਰਿਵੇਣਾਨਿ ਵਾ ਵਿਹਾਰੇ ਵਾ ਗਨ੍ਤ੍ਵਾ ਨਾਨਾਤੋ ਵਾ ਨਿਮਨ੍ਤਿਤਾ. ਏਕਟ੍ਠਾਨੇ ਠਿਤੇਸੁਯੇਵ ਵਾ ਏਕੋ ਪੁਤ੍ਤੇਨ, ਏਕੋ ਪਿਤਰਾਤਿ ਏਵਮ੍ਪਿ ਨਿਮਨ੍ਤਿਤਾ ਨਾਨਾਤੋਯੇਵ ਨਿਮਨ੍ਤਿਤਾ ਨਾਮ ਹੋਨ੍ਤਿ. ਏਕਤੋ ਗਣ੍ਹਨ੍ਤਿਤਿ ਅਞ੍ਞਮਞ੍ਞਸ੍ਸ ਦ੍ਵਾਦਸਹਤ੍ਥੂਪਚਾਰੇ ਠਿਤਾ ਗਣ੍ਹਨ੍ਤਿ.

ਕਸ੍ਮਾ ਪਨ ਨਾਨਾਤੋ ਭੁਤ੍ਤੇਪਿ ਗਣਭੋਜਨਂ ਹੋਤੀਤਿ ਆਹ ‘‘ਪਟਿਗ੍ਗਹਣਮੇਵ ਹੇਤ੍ਥ ਪਮਾਣ’’ਨ੍ਤਿ. ਯਦਿ ਏਵਂ ਅਥ ਕਸ੍ਮਾ ਪਾਲ਼ਿਯਂ ‘‘ਗਣਭੋਜਨਂ ਨਾਮ ਯਤ੍ਥ ਚਤ੍ਤਾਰੋ ਭਿਕ੍ਖੂ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰੇਨ ਭੋਜਨੇਨ ਨਿਮਨ੍ਤਿਤਾ ਭੁਞ੍ਜਨ੍ਤਿ, ਏਤਂ ਗਣਭੋਜਨਂ ਨਾਮਾ’’ਤਿ (ਪਾਚਿ. ੨੧੮) ਵੁਤ੍ਤਂ? ਤਂ ਪਟਿਗ੍ਗਹਣਨਿਯਮਨਤ੍ਥਮੇਵ. ਨ ਹਿ ਅਪ੍ਪਟਿਗ੍ਗਹਿਤਕਂ ਭਿਕ੍ਖੂ ਭੁਞ੍ਜਨ੍ਤੀਤਿ ‘‘ਭੁਞ੍ਜਨ੍ਤੀ’’ਤਿ ਪਦਂ ਪਟਿਗ੍ਗਹਣਨਿਯਮਵਚਨਂ ਹੋਤਿ. ਏਕਤੋ ਵਾ ਨਾਨਾਤੋ ਵਾ ਵਿਞ੍ਞਾਪੇਤ੍ਵਾਤਿ ਚਤ੍ਤਾਰੋ ਭਿਕ੍ਖੂ ਏਕਤੋ ਠਿਤਾ ਵਾ ਨਿਸਿਨ੍ਨਾ ਵਾ ਉਪਾਸਕਂ ਦਿਸ੍ਵਾ ‘‘ਅਮ੍ਹਾਕਂ ਚਤੁਨ੍ਨਮ੍ਪਿ ਭਤ੍ਤਂ ਦੇਹੀ’’ਤਿ ਵਾ ਪਾਟੇਕ੍ਕਂ ਪਵਿਸਿਤ੍ਵਾ ‘‘ਮਯ੍ਹਂ ਭਤ੍ਤਂ ਦੇਹਿ, ਮਯ੍ਹਂ ਭਤ੍ਤਂ ਦੇਹੀ’’ਤਿ ਵਾ ਏਕਤੋ ਵਾ ਨਾਨਾਤੋ ਵਾ ਵਿਞ੍ਞਾਪੇਤ੍ਵਾ. ਤਸ੍ਸ ਦੁਵਿਧਸ੍ਸਾਪੀਤਿ ਯਞ੍ਚ ਨਿਮਨ੍ਤਨਤੋ ਲਦ੍ਧਂ ਗਣਭੋਜਨਂ, ਯਞ੍ਚ ਵਿਞ੍ਞਤ੍ਤਿਤੋ ਲਦ੍ਧਂ, ਤਸ੍ਸ ਦੁਵਿਧਸ੍ਸਾਪਿ ਗਣਭੋਜਨਸ੍ਸ. ਏਵਂ ਪਟਿਗ੍ਗਹਣੇਤਿ ਏਕਤੋ ਪਟਿਗ੍ਗਹਣੇ.

ਪਾਦਾਨਮ੍ਪਿ ਫਲਿਤਤ੍ਤਾਤਿ (ਪਾਚਿ. ਅਟ੍ਠ. ੨੧੭-੨੧੮) ਅਨ੍ਤਮਸੋ ਪਾਦਾਨਮ੍ਪਿ ਯਥਾ ਮਹਾਚਮ੍ਮਸ੍ਸ ਪਰਤੋ ਮਂਸਂ ਦਿਸ੍ਸਤਿ, ਏਵਂ ਫਲਿਤਤ੍ਤਾ. ਨ ਸਕ੍ਕਾ ਪਿਣ੍ਡਾਯ ਚਰਿਤੁਨ੍ਤਿ ਵਾਲਿਕਾਯ ਵਾ ਸਕ੍ਖਰਾਯ ਵਾ ਫੁਟ੍ਠਮਤ੍ਤੇ ਦੁਕ੍ਖੁਪ੍ਪਤ੍ਤਿਤੋ ਅਨ੍ਤੋਗਾਮੇ ਪਿਣ੍ਡਾਯ ਚਰਿਤੁਂ ਨ ਸਕ੍ਕੋਤਿ. ਚੀਵਰੇ ਕਰਿਯਮਾਨੇਤਿ ਸਾਟਕਞ੍ਚ ਸੁਤ੍ਤਞ੍ਚ ਲਭਿਤ੍ਵਾ ਚੀਵਰੇ ਕਰਿਯਮਾਨੇ. ਯਂ ਕਿਞ੍ਚਿ ਚੀਵਰੇ ਕਤ੍ਤਬ੍ਬਕਮ੍ਮਨ੍ਤਿ ਚੀਵਰਵਿਚਾਰਣਛਿਨ੍ਦਨਮੋਘਸੁਤ੍ਤਾਰੋਪਨਾਦਿ ਯਂ ਕਿਞ੍ਚਿ ਚੀਵਰੇ ਕਤ੍ਤਬ੍ਬਂ ਕਮ੍ਮਂ, ਅਨ੍ਤਮਸੋ ਸੂਚਿਵੇਧਨਮ੍ਪੀਤਿ ਅਧਿਪ੍ਪਾਯੋ. ‘‘ਅਦ੍ਧਯੋਜਨਮ੍ਪੀ’’ਤਿਆਦਿ ਅਵਕਂਸਤੋ ਵੁਤ੍ਤਂ. ਯੋ ਪਨ ਦੂਰਂ ਗਨ੍ਤੁਕਾਮੋ, ਤਤ੍ਥ ਵਤ੍ਤਬ੍ਬਮੇਵ ਨਤ੍ਥਿ, ਗਚ੍ਛਨ੍ਤੋ ਅਦ੍ਧਯੋਜਨਬ੍ਭਨ੍ਤਰੇ ਗਾਵੁਤੇਪਿ ਭੁਞ੍ਜਿਤੁਂ ਲਭਤਿ, ਗਤੋ ਪਨ ਏਕਦਿਵਸਂ. ਯਦਾ ਨਾਵਂ ਅਭਿਰੁਹਿਤੁਕਾਮੋ ਵਾ ਹੋਤਿ ਆਰੁਲ਼੍ਹੋ ਵਾ ਓਰੁਲ਼੍ਹੋ ਵਾ, ਅਯਂ ਨਾਵਾਭਿਰੁਹਨਸਮਯੋ ਨਾਮਾਤਿ ਆਹ ‘‘ਨਾਵਾਭਿਰੁਹਨਸਮਯੇਪਿ ਏਸੇਵ ਨਯੋ’’ਤਿ. ਅਯਂ ਪਨ ਵਿਸੇਸੋ – ਅਭਿਰੁਲ਼੍ਹੇਨ ਇਚ੍ਛਿਤਟ੍ਠਾਨਂ ਗਨ੍ਤ੍ਵਾਪਿ ਯਾਵ ਨ ਓਰੋਹਤਿ, ਤਾਵ ਭੁਞ੍ਜਿਤਬ੍ਬਂ. ਚਤ੍ਤਾਰੋ ਭਿਕ੍ਖੂਤਿ ਅਨ੍ਤਿਮਪਰਿਚ੍ਛੇਦੋ. ਯਤ੍ਥ ਪਨ ਸਤਂ ਵਾ ਸਹਸ੍ਸਂ ਵਾ ਸਨ੍ਨਿਪਤਿਤਂ, ਤਤ੍ਥ ਵਤ੍ਤਬ੍ਬਮੇਵ ਨਤ੍ਥਿ. ਤਸ੍ਮਾ ਤਾਦਿਸੇ ਕਾਲੇ ‘‘ਮਹਾਸਮਯੋ’’ਤਿ ਅਧਿਟ੍ਠਹਿਤ੍ਵਾ ਭੁਞ੍ਜਿਤਬ੍ਬਂ. ਯੋ ਕੋਚਿ ਪਬ੍ਬਜਿਤੋਤਿ ਸਹਧਮ੍ਮਿਕੇਸੁ ਵਾ ਤਿਤ੍ਥਿਯੇਸੁ ਵਾ ਅਞ੍ਞਤਰੋ.

ਯੇ ਚ ਦ੍ਵੇ ਤਯੋ ਏਕਤੋ ਗਣ੍ਹਨ੍ਤੀਤਿ ਯੇਪਿ ਅਕਪ੍ਪਿਯਨਿਮਨ੍ਤਨਂ ਸਾਦਿਯਿਤ੍ਵਾ ਦ੍ਵੇ ਵਾ ਤਯੋ ਵਾ ਏਕਤੋ ਗਣ੍ਹਨ੍ਤਿ, ਤੇਸਮ੍ਪਿ ਅਨਾਪਤ੍ਤਿ. ਪਣੀਤਭੋਜਨਸੂਪੋਦਨਵਿਞ੍ਞਤ੍ਤੀਹਿ ਪਨ ਆਪਤ੍ਤਿਯੇਵਾਤਿ ਵਦਨ੍ਤਿ, ਉਪਪਰਿਕ੍ਖਿਤਬ੍ਬਂ. ਨਿਚ੍ਚਭਤ੍ਤਾਦੀਸੂਤਿ ਨਿਚ੍ਚਭਤ੍ਤੇ ਸਲਾਕਭਤ੍ਤੇ ਪਕ੍ਖਿਕੇ ਉਪੋਸਥਿਕੇ ਪਾਟਿਪਦਿਕੇ. ਤਤ੍ਥ ਨਿਚ੍ਚਭਤ੍ਤਨ੍ਤਿ ਧੁਵਭਤ੍ਤਂ ਵੁਚ੍ਚਤਿ. ‘‘ਨਿਚ੍ਚਭਤ੍ਤਂ ਗਣ੍ਹਥਾ’’ਤਿ ਵਦਨ੍ਤਿ, ਬਹੂਨਮ੍ਪਿ ਏਕਤੋ ਗਣ੍ਹਿਤੁਂ ਵਟ੍ਟਤਿ. ਸਲਾਕਭਤ੍ਤਾਦੀਸੁਪਿ ਏਸੇਵ ਨਯੋ.

ਗਣਭੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਪਰਮ੍ਪਰਭੋਜਨਸਿਕ੍ਖਾਪਦਵਣ੍ਣਨਾ

ਗਣਭੋਜਨੇ ਵੁਤ੍ਤਨਯੇਨੇਵਾਤਿ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ‘‘ਤੁਮ੍ਹੇ, ਭਨ੍ਤੇ, ਓਦਨੇਨ ਨਿਮਨ੍ਤੇਮਿ, ਓਦਨਂ ਮੇ ਗਣ੍ਹਥਾ’’ਤਿਆਦਿਨਾ (ਪਾਚਿ. ਅਟ੍ਠ. ੨੧੭-੨੧੮) ਨਯੇਨ ਯੇਨ ਕੇਨਚਿ ਵੇਵਚਨੇਨ ਵਾ ਭਾਸਨ੍ਤਰੇਨ ਵਾ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਸ੍ਸ ਨਾਮਂ ਗਹੇਤ੍ਵਾ ਨਿਮਨ੍ਤੇਤੀਤਿ ਵੁਤ੍ਤੇਨੇਵ ਨਯੇਨ. ਨਿਮਨ੍ਤਿਤਸ੍ਸਾਤਿ ਅਕਪ੍ਪਿਯਨਿਮਨ੍ਤਨੇਨ ਨਿਮਨ੍ਤਿਤਸ੍ਸ. ਅਵਿਕਪ੍ਪੇਤ੍ਵਾਤਿ ਸਮ੍ਮੁਖਾਸਮ੍ਮੁਖਵਸੇਨ ਅਵਿਕਪ੍ਪੇਤ੍ਵਾ, ਅਪਰਿਚ੍ਚਜਿਤ੍ਵਾਤਿ ਅਤ੍ਥੋ. ਅਯਞ੍ਹਿ ਭਤ੍ਤਵਿਕਪ੍ਪਨਾ ਨਾਮ ਸਮ੍ਮੁਖਾਪਰਮ੍ਮੁਖਾਪਿ ਵਟ੍ਟਤਿ. ਤੇਨਾਹ ‘‘ਯੋ ਭਿਕ੍ਖੁ ਪਞ੍ਚਸੁ ਸਹਧਮ੍ਮਿਕੇਸੂ’’ਤਿਆਦਿ.

ਅਞ੍ਞਤ੍ਰ ਨਿਮਨ੍ਤਨਭੋਜਨਵਤ੍ਥੁਸ੍ਮਿਨ੍ਤਿ ਅਞ੍ਞਤ੍ਰ ਪਠਮਂ ਨਿਮਨ੍ਤਿਤਾ ਹੁਤ੍ਵਾ ਅਞ੍ਞਸ੍ਮਿਂ ਨਿਮਨ੍ਤਨੇ ਭੁਞ੍ਜਨਵਤ੍ਥੁਸ੍ਮਿਂ. ਯਦਿ ਤਿਵਿਧਾ ਅਨੁਪਞ੍ਞਤ੍ਤਿ, ਅਥ ਕਸ੍ਮਾ ਪਰਿਵਾਰੇ ‘‘ਚਤਸ੍ਸੋ ਅਨੁਪਞ੍ਞਤ੍ਤਿਯੋ’’ਤਿ ਵੁਤ੍ਤਨ੍ਤਿ ਆਹ ‘‘ਪਰਿਵਾਰੇ ਪਨਾ’’ਤਿਆਦਿ. ਵਿਕਪ੍ਪਨਮ੍ਪਿ ਗਹੇਤ੍ਵਾਤਿ ਵਿਕਪ੍ਪਨਾਨੁਜਾਨਨਮ੍ਪਿ ਅਨੁਪਞ੍ਞਤ੍ਤਿਸਮਾਨਨ੍ਤਿ ਅਨੁਪਞ੍ਞਤ੍ਤਿਭਾਵੇਨ ਗਹੇਤ੍ਵਾ. ਏਕਸਂਸਟ੍ਠਾਨੀਤਿ ਏਕਸ੍ਮਿਂ ਮਿਸ੍ਸਿਤਾਨਿ. ਇਦਂ ਵੁਤ੍ਤਂ ਹੋਤਿ (ਪਾਚਿ. ਅਟ੍ਠ. ੨੨੯) – ਦ੍ਵੇ ਤੀਣਿ ਕੁਲਾਨਿ ਨਿਮਨ੍ਤੇਤ੍ਵਾ ਏਕਸ੍ਮਿਂ ਠਾਨੇ ਨਿਸੀਦਾਪੇਤ੍ਵਾ ਇਤੋ ਚਿਤੋ ਚ ਆਹਰਿਤ੍ਵਾ ਭਤ੍ਤਂ ਆਕਿਰਨ੍ਤਿ, ਸੂਪਬ੍ਯਞ੍ਜਨਂ ਆਕਿਰਨ੍ਤਿ, ਏਕਮਿਸ੍ਸਕਂ ਹੋਤਿ, ਏਤ੍ਥ ਅਨਾਪਤ੍ਤੀਤਿ. ਸਚੇ ਪਨ ਮੂਲਨਿਮਨ੍ਤਨਂ ਹੇਟ੍ਠਾ ਹੋਤਿ, ਪਚ੍ਛਿਮਂ ਪਚ੍ਛਿਮਂ ਉਪਰਿ, ਤਂ ਉਪਰਿਤੋ ਪਟ੍ਠਾਯ ਭੁਞ੍ਜਨ੍ਤਸ੍ਸ ਆਪਤ੍ਤਿ. ਹਤ੍ਥਂ ਪਨ ਅਨ੍ਤੋ ਪਵੇਸੇਤ੍ਵਾ ਪਠਮਨਿਮਨ੍ਤਨਤੋ ਏਕਮ੍ਪਿ ਕਬਲ਼ਂ ਉਦ੍ਧਰਿਤ੍ਵਾ ਭੁਤ੍ਤਕਾਲਤੋ ਪਟ੍ਠਾਯ ਯਥਾ ਤਥਾ ਵਾ ਭੁਞ੍ਜਨ੍ਤਸ੍ਸ ਅਨਾਪਤ੍ਤਿ. ਦ੍ਵੇ ਤੀਣਿ ਨਿਮਨ੍ਤਨਾਨਿ ਏਕਤੋ ਵਾ ਕਤ੍ਵਾ ਭੁਞ੍ਜਤੀਤਿ ਦ੍ਵੇ ਤੀਣਿ ਨਿਮਨ੍ਤਨਾਨਿ ਏਕਤੋ ਪਕ੍ਖਿਪਿਤ੍ਵਾ ਮਿਸ੍ਸੇਤ੍ਵਾ ਏਕਂ ਕਤ੍ਵਾ ਭੁਞ੍ਜਤੀਤਿ ਅਤ੍ਥੋ. ‘‘ਸਕਲੇਨ ਗਾਮੇਨ ਵਾ’’ਤਿਆਦੀਸੁ ਸਕਲੇਨ ਗਾਮੇਨ ਏਕਤੋ ਹੁਤ੍ਵਾ ਨਿਮਨ੍ਤਿਤਸ੍ਸੇਵ ਯਤ੍ਥ ਕਤ੍ਥਚਿ ਭੁਞ੍ਜਤੋ ਅਨਾਪਤ੍ਤਿ. ਪੂਗੇਪਿ ਏਸੇਵ ਨਯੋ. ਨਿਮਨ੍ਤਿਯਮਾਨੋ ਵਾ ‘‘ਭਿਕ੍ਖਂ ਗਹੇਸ੍ਸਾਮੀ’’ਤਿ ਵਦਤੀਤਿ ‘‘ਭਤ੍ਤਂ ਗਣ੍ਹਾ’’ਤਿ ਨਿਮਨ੍ਤਿਯਮਾਨੋ ‘‘ਨ ਮਯ੍ਹਂ ਤਵ ਭਤ੍ਤੇਨ ਅਤ੍ਥੋ, ਭਿਕ੍ਖਂ ਗਹੇਸ੍ਸਾਮੀ’’ਤਿ ਭਣਤਿ. ਕਿਰਿਯਾਕਿਰਿਯਨ੍ਤਿ ਏਤ੍ਥ ਭੋਜਨਂ ਕਿਰਿਯਂ, ਅਵਿਕਪ੍ਪਨਂ ਅਕਿਰਿਯਂ.

ਪਰਮ੍ਪਰਭੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਕਾਣਮਾਤਾਸਿਕ੍ਖਾਪਦਵਣ੍ਣਨਾ

ਪਹੇਣਕਤ੍ਥਾਯਾਤਿ ਪਣ੍ਣਾਕਾਰਤ੍ਥਾਯ. ਪਾਥੇਯ੍ਯਤ੍ਥਾਯਾਤਿ ਮਗ੍ਗਂ ਗਚ੍ਛਨ੍ਤਾਨਂ ਅਨ੍ਤਰਾਮਗ੍ਗਤ੍ਥਾਯ. ਸਤ੍ਤੂਤਿ ਬਦ੍ਧਸਤ੍ਤੁ, ਅਬਦ੍ਧਸਤ੍ਤੁ ਚ. ਦ੍ਵਤ੍ਤਿਪਤ੍ਤਪੂਰੇ ਪਟਿਗ੍ਗਹੇਤ੍ਵਾਤਿ ਮੁਖਵਟ੍ਟਿਯਾ ਹੇਟ੍ਠਿਮਲੇਖਾਯ ਸਮਂ ਪੂਰੇ ਦ੍ਵਤ੍ਤਿਪਤ੍ਤਪੂਰੇ ਗਹੇਤ੍ਵਾਤਿ ਅਤ੍ਥੋ. ਇਮਸ੍ਸ ਚਤ੍ਥਸ੍ਸ ਹੇਟ੍ਠਾ ਵੁਤ੍ਤਨਯੇਨੇਵ ਪਾਕਟਤ੍ਤਾ ਤਤ੍ਥ ਕਤ੍ਤਬ੍ਬਪ੍ਪਕਾਰਮੇਵ ਦਸ੍ਸੇਤੁਂ ‘‘ਏਤ੍ਥਾ’’ਤਿਆਦਿਮਾਹ. ਸੇਸਨ੍ਤਿ ਤਤੋ ਏਕਪਤ੍ਤਤੋ ਅਞ੍ਞਂ ਪਤ੍ਤਂ. ਸਚੇ ਤਯੋ ਪਤ੍ਤਪੂਰਾ ਗਹਿਤਾ ਦ੍ਵੇ, ਸਚੇ ਦ੍ਵੇ ਗਹਿਤਾ, ਏਕਨ੍ਤਿ ਵੁਤ੍ਤਂ ਹੋਤਿ.

ਗਮਨੇ ਵਾ ਪਟਿਪ੍ਪਸ੍ਸਦ੍ਧੇਤਿ ਅਨ੍ਤਰਾਮਗ੍ਗੇ ਉਪਦ੍ਦਵਂ ਦਿਸ੍ਵਾ, ਅਨਤ੍ਥਿਕਤਾਯ ਵਾ ‘‘ਮਯਂ ਇਦਾਨਿ ਨ ਪੇਸਿਸ੍ਸਾਮ ਨ ਗਮਿਸ੍ਸਾਮਾ’’ਤਿ ਏਵਂ ਗਮਨੇ ਉਪਚ੍ਛਿਨ੍ਨੇ ਦੇਨ੍ਤਾਨਨ੍ਤਿ ਅਤ੍ਥੋ.

ਕਾਣਮਾਤਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਪਠਮਪਵਾਰਣਾਸਿਕ੍ਖਾਪਦਵਣ੍ਣਨਾ

ਭੁਤ੍ਤਵਾਤਿ ਕਤਭਤ੍ਤਕਿਚ੍ਚੋ. ਸਾਸਪਮਤ੍ਤਮ੍ਪਿ ਅਜ੍ਝੋਹਰਿਤਨ੍ਤਿ ਏਵਂ ਪਰਿਤ੍ਤਮ੍ਪਿ ਭੋਜਨਂ ਸਙ੍ਖਾਦਿਤ੍ਵਾ ਵਾ ਅਸਙ੍ਖਾਦਿਤ੍ਵਾ ਵਾ ਗਿਲਿਤਂ. ਪਵਾਰਿਤੋਤਿ ਪਟਿਕ੍ਖੇਪਿਤੋ. ਯੋ ਹਿ ਭੁਞ੍ਜਨ੍ਤੋ ਪਰਿਵੇਸਕੇਨ ਉਪਨੀਤਂ ਭੋਜਨਂ ਅਨਿਚ੍ਛਨ੍ਤੋ ਪਟਿਕ੍ਖਿਪਤਿ, ਸੋ ਤੇਨ ਪਵਾਰਿਤੋ ਪਟਿਕ੍ਖਿਪਿਤੋ ਨਾਮ ਹੋਤਿ. ਬ੍ਯਞ੍ਜਨਂ ਪਨ ਅਨਾਦਿਯਿਤ੍ਵਾ ਅਤ੍ਥਮਤ੍ਤਮੇਵ ਦਸ੍ਸੇਤੁਂ ‘‘ਕਤਪ੍ਪਵਾਰਣੋ ਕਤਪ੍ਪਟਿਕ੍ਖੇਪੋਤਿ ਅਤ੍ਥੋ’’ਤਿ ਵੁਤ੍ਤਂ. ਸੋਪਿ ਚ ਪਟਿਕ੍ਖੇਪੋ ਯਸ੍ਮਾ ਨ ਪਟਿਕ੍ਖੇਪਮਤ੍ਤੇਨ, ਅਥ ਖੋ ਪਞ੍ਚਙ੍ਗਵਸੇਨ. ਤੇਨਸ੍ਸ ਪਦਭਾਜਨੇ ‘‘ਅਸਨਂ ਪਞ੍ਞਾਯਤੀ’’ਤਿਆਦਿ (ਪਾਚਿ. ੨੩੯) ਵੁਤ੍ਤਂ.

ਭੋਜਨਂ ਪਞ੍ਞਾਯਤੀਤਿ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਂ ਪਤ੍ਤਾਦੀਸੁ ਦਿਸ੍ਸਤਿ. ਤੇਨਾਹ ‘‘ਪਵਾਰਣਪ੍ਪਹੋਨਕਂ ਚੇ ਭੋਜਨ’’ਨ੍ਤਿਆਦਿ. ਸਾਲੀਤਿ (ਪਾਚਿ. ਅਟ੍ਠ. ੨੩੮-੨੩੯) ਅਨ੍ਤਮਸੋ ਨੀਵਾਰਂ ਉਪਾਦਾਯ ਸਬ੍ਬਾਪਿ ਸਾਲਿਜਾਤਿ. ਵੀਹੀਤਿ ਸਬ੍ਬਾਪਿ ਵੀਹਿਜਾਤਿ. ਯਵਗੋਧੁਮੇਸੁ ਭੇਦੋ ਨਤ੍ਥਿ. ਕਙ੍ਗੂਤਿ ਸੇਤਰਤ੍ਤਕਾਲ਼ਭੇਦਾ ਸਬ੍ਬਾਪਿ ਕਙ੍ਗੁਜਾਤਿ. ਵਰਕੋਤਿ ਅਨ੍ਤਮਸੋ ਵਰਕਚੋਰਕਂ ਉਪਾਦਾਯ ਸਬ੍ਬਾਪਿ ਸੇਤਵਣ੍ਣਾ ਵਰਕਜਾਤਿ. ਕੁਦ੍ਰੂਸਕੋਤਿ ਕਾਲ਼ਕੋਦ੍ਰਵੋ ਚੇਵ ਸਾਮਾਕਾਦਿਭੇਦਾ ਚ ਸਬ੍ਬਾਪਿ ਤਿਣਧਞ੍ਞਜਾਤਿ.

ਨੀਵਾਰਵਰਕਚੋਰਕਾ ਚੇਤ੍ਥ ‘‘ਧਞ੍ਞਾਨੁਲੋਮਾ’’ਤਿ ਵਦਨ੍ਤਿ. ਯਾਗੁਨ੍ਤਿ ਅਮ੍ਬਿਲਯਾਗੁਖੀਰਯਾਗੁਆਦਿਭੇਦਂ ਯਂ ਕਿਞ੍ਚਿ ਯਾਗੁਂ. ਇਮਿਨਾਵ ਪਾਯਾਸਸ੍ਸਾਪਿ ਗਹਿਤਤ੍ਤਾ ‘‘ਅਮ੍ਬਿਲਪਾਯਾਸਾਦੀਸੁ ਅਞ੍ਞਤਰਂ ਪਚਾਮਾਤਿ ਵਾ’’ਤਿ ਨ ਵੁਤ੍ਤਂ. ਪਵਾਰਣਂ ਜਨੇਤੀਤਿ ਅਨਤਿਰਿਤ੍ਤਭੋਜਨਾਪਤ੍ਤਿਨਿਬਨ੍ਧਨਂ ਪਟਿਕ੍ਖੇਪਂ ਸਾਧੇਤਿ. ਸਚੇ ਪਨ ਓਧਿ ਨ ਪਞ੍ਞਾਯਤਿ, ਯਾਗੁਸਙ੍ਗਹਂ ਗਚ੍ਛਤਿ, ਪਵਾਰਣਂ ਨ ਜਨੇਤਿ. ਪੁਨ ਪਵਾਰਣਂ ਜਨੇਤਿ ਘਨਭਾਵਗਮਨਤੋ ਪਟ੍ਠਾਯ ਭੋਜਨਸਙ੍ਗਹਿਤਤ੍ਤਾਤਿ ਅਧਿਪ੍ਪਾਯੋ.

ਉਦਕਕਞ੍ਜਿਕਖੀਰਾਦੀਨਿ ਆਕਿਰਿਤ੍ਵਾਤਿ ਉਦਕਞ੍ਚੇਵ ਕਞ੍ਜਿਕਞ੍ਚ ਖੀਰਾਦੀਨਿ ਚ ਆਕਿਰਿਤ੍ਵਾ ਤੇਹਿ ਸਦ੍ਧਿਂ ਅਮਦ੍ਦਿਤ੍ਵਾ ਭਤ੍ਤਮਿਸ੍ਸਕੇ ਕਤ੍ਵਾ. ਤੇਨਾਹ ‘‘ਯਾਗੁਂ ਗਣ੍ਹਥਾ’’ਤਿਆਦਿ. ਸਚੇ ਪਨ ਭਤ੍ਤੇ ਉਦਕਕਞ੍ਜਿਕਖੀਰਾਦੀਨਿ ਆਕਿਰਿਤ੍ਵਾ ਮਦ੍ਦਿਤ੍ਵਾ ‘‘ਯਾਗੁਂ ਗਣ੍ਹਥਾ’’ਤਿ ਦੇਨ੍ਤਿ, ਪਵਾਰਣਾ ਨ ਹੋਤਿ. ਯਾਗੁਯਾਪੀਤਿ ਏਵਂ ਯਾਗੁਸਙ੍ਗਹਂ ਗਤਾਯ ਵਾ ਅਞ੍ਞਾਯ ਵਾ ਯਾਗੁਯਾਪਿ. ਸੁਦ੍ਧਰਸਕੋ, ਪਨ ਰਸਕਯਾਗੁ ਵਾ ਨ ਜਨੇਤਿ.

ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਵਸੇਨ ਵਿਪ੍ਪਕਤਭੋਜਨਭਾਵਸ੍ਸ ਉਪਚ੍ਛਿਨ੍ਨਤ੍ਤਾ ‘‘ਦ੍ਵੇਪਿ ਖਾਦਿਤਾਨਿ ਹੋਨ੍ਤਿ…ਪੇ… ਨ ਪਵਾਰੇਤੀ’’ਤਿ ਵੁਤ੍ਤਂ. ਅਕਪ੍ਪਿਯਮਂਸਂ (ਪਾਚਿ. ਅਟ੍ਠ. ੨੩੮-੨੩੯), ਅਕਪ੍ਪਿਯਭੋਜਨਞ੍ਚ ਬੁਦ੍ਧਪਟਿਕੁਟ੍ਠਂ ਪਟਿਕ੍ਖਿਪਤੋ ਪਵਾਰਣਾਯ ਅਵਤ੍ਥੁਤਾਯ ਨ ਪਵਾਰਣਾ ਹੋਤੀਤਿ ਆਹ ‘‘ਯੋ ਪਨਾ’’ਤਿਆਦਿ. ਯਞ੍ਹਿ ਭਿਕ੍ਖੁਨੋ ਖਾਦਿਤੁਂ ਵਟ੍ਟਤਿ, ਤਂ ਏਵ ਪਟਿਕ੍ਖਿਪਤੋ ਪਵਾਰਣਾ ਹੋਤਿ. ਇਦਂ ਪਨ ਜਾਨਨ੍ਤੋ ਅਕਪ੍ਪਿਯਤ੍ਤਾ ਪਟਿਕ੍ਖਿਪਤਿ. ਅਜਾਨਨ੍ਤੋਪਿ ਪਟਿਕ੍ਖਿਪਿਤਬ੍ਬਟ੍ਠਾਨੇ ਠਿਤਮੇਵ ਪਟਿਕ੍ਖਿਪਤਿ ਨਾਮ, ਤਸ੍ਮਾ ਨ ਪਵਾਰੇਤਿ. ਸਚੇ ਪਨ ਅਕਪ੍ਪਿਯਮਂਸਂ ਖਾਦਨ੍ਤੋ ਕਪ੍ਪਿਯਮਂਸਂ ਵਾ ਭੋਜਨਂ ਵਾ ਪਟਿਕ੍ਖਿਪਤਿ, ਪਵਾਰੇਤਿ. ਕਸ੍ਮਾ? ਵਤ੍ਥੁਤਾਯ. ਯਞ੍ਹਿ ਤੇਨ ਪਟਿਕ੍ਖਿਤ੍ਤਂ, ਤਂ ਪਵਾਰਣਾਯ ਵਤ੍ਥੁ. ਯਂ ਪਨ ਖਾਦਤਿ, ਤਂ ਕਿਞ੍ਚਾਪਿ ਪਟਿਕ੍ਖਿਪਿਤਬ੍ਬਟ੍ਠਾਨੇ ਠਿਤਂ, ਖਾਦਿਯਮਾਨਂ ਪਨ ਮਂਸਭਾਵਂ ਨ ਜਹਤਿ, ਤਸ੍ਮਾ ਪਵਾਰੇਤਿ. ਕੋ ਪਨ ਵਾਦੋ ਕਪ੍ਪਿਯਮਂਸਂ ਖਾਦਤੋ ਕਪ੍ਪਿਯਮਂਸਭੋਜਨਪ੍ਪਟਿਕ੍ਖੇਪੇ. ਏਸ ਨਯੋ ਅਕਪ੍ਪਿਯਭੋਜਨਂ ਖਾਦਤੋ ਕਪ੍ਪਿਯਭੋਜਨਪ੍ਪਟਿਕ੍ਖੇਪੇ.

ਭੋਜਨੇ ਸਤੀਤਿ ਪਞ੍ਚਸੁ ਭੋਜਨੇਸੁ ਏਕਸ੍ਮਿਮ੍ਪਿ ਭੋਜਨੇ ਸਤਿ. ਅਞ੍ਞਂ ਵੁਤ੍ਤਲਕ੍ਖਣਂ ਭੋਜਨਨ੍ਤਿ ਪਤ੍ਤਾਦਿਗਤਤੋ ਅਞ੍ਞਂ ਵੁਤ੍ਤਲਕ੍ਖਣਂ ਪਞ੍ਚਸੁ ਭੋਜਨੇਸੁ ਏਕਮ੍ਪਿ ਭੋਜਨਂ. ‘‘ਨਿਰਪੇਕ੍ਖੋ ਹੋਤੀ’’ਤਿ ਏਤਸ੍ਸੇਵ ਵਿਵਰਣਂ ‘‘ਯਂ ਪਤ੍ਤਾਦੀਸੂ’’ਤਿਆਦਿ. ਨ ਕੇਵਲਂ ਨਿਰਪੇਕ੍ਖੋ ਵਾਤਿ ਆਹ ‘‘ਅਞ੍ਞਤ੍ਰ ਵਾ’’ਤਿਆਦਿ. ਸੋ ਪਟਿਕ੍ਖਿਪਨ੍ਤੋਪਿ ਨ ਪਵਾਰੇਤੀਤਿ ਤਸ੍ਮਿਂ ਚੇ ਅਨ੍ਤਰੇ ਅਞ੍ਞਂ ਭੋਜਨਂ ਅਭਿਹਟਂ, ਤਂ ਸੋ ਪਟਿਕ੍ਖਿਪਨ੍ਤੋਪਿ ਨ ਪਵਾਰੇਤਿ. ਕਸ੍ਮਾ? ਵਿਪ੍ਪਕਤਭੋਜਨਭਾਵਸ੍ਸ ਉਪਚ੍ਛਿਨ੍ਨਤ੍ਤਾ.

‘‘ਉਪਨਾਮੇਤੀ’’ਤਿ (ਪਾਚਿ. ਅਟ੍ਠ. ੨੩੮-੨੩੯) ਇਮਿਨਾ ਕਾਯਾਭਿਹਾਰਂ ਦਸ੍ਸੇਤਿ. ਹਤ੍ਥੇ ਵਾ ਆਧਾਰਕੇ ਵਾਤਿ ਏਤ੍ਥ ਵਾ-ਸਦ੍ਦੋ ਅਵੁਤ੍ਤਵਿਕਪ੍ਪਤ੍ਥੋ, ਤੇਨ ‘‘ਊਰੂਸੁ ਵਾ’’ਤਿ ਵਿਕਪ੍ਪੇਤਿ. ਦੂਰੇ ਨਿਸਿਨ੍ਨਸ੍ਸ ਦਹਰਭਿਕ੍ਖੁਸ੍ਸ ਪਤ੍ਤਂ ਪੇਸੇਤ੍ਵਾ ‘‘ਇਤੋ ਓਦਨਂ ਗਣ੍ਹਾਹੀ’’ਤਿ ਵਦਤਿ, ਗਣ੍ਹਿਤ੍ਵਾ ਪਨ ਗਤੋ ਤੁਣ੍ਹੀ ਤਿਟ੍ਠਤਿ, ਤਮ੍ਪਿ ਪਟਿਕ੍ਖਿਪਤੋ ਏਸੇਵ ਨਯੋ. ਕਸ੍ਮਾ? ਭਿਕ੍ਖੁਸ੍ਸ ਦੂਰਭਾਵਤੋ, ਦੂਤਸ੍ਸ ਚ ਅਨਭਿਹਰਣਤੋ. ਸਚੇ ਪਨ ਗਹੇਤ੍ਵਾ ਆਗਤੋ ਭਿਕ੍ਖੁ ‘‘ਇਮਂ ਭਤ੍ਤਂ ਗਣ੍ਹਾ’’ਤਿ ਵਦਤਿ, ਤਂ ਪਟਿਕ੍ਖਿਪਤੋ ਪਵਾਰਣਾ ਹੋਤਿ. ਏਵਂ ਵੁਤ੍ਤੇਪੀਤਿ ‘‘ਭਤ੍ਤਂ ਗਣ੍ਹਾ’’ਤਿ ਵੁਤ੍ਤੇਪਿ.

ਭਤ੍ਤਪਚ੍ਛਿਂ ਗਹੇਤ੍ਵਾ ਪਰਿਵਿਸਨ੍ਤਸ੍ਸਾਤਿ ਏਕੇਨ ਹਤ੍ਥੇਨ ਭਤ੍ਤਪਚ੍ਛਿਂ ਗਹੇਤ੍ਵਾ ਏਕੇਨ ਹਤ੍ਥੇਨ ਕਟਚ੍ਛੁਂ ਗਹੇਤ੍ਵਾ ਪਰਿਵਿਸਨ੍ਤਸ੍ਸ. ਅਞ੍ਞੋ ‘‘ਅਹਂ ਧਾਰੇਸ੍ਸਾਮੀ’’ਤਿ ਗਹਿਤਮਤ੍ਤਕਮੇਵ ਕਰੋਤੀਤਿ ਅਞ੍ਞੋ ਆਗਨ੍ਤ੍ਵਾ ‘‘ਅਹਂ ਪਚ੍ਛਿਂ ਧਾਰੇਸ੍ਸਾਮਿ, ਤ੍ਵਂ ਓਦਨਂ ਦੇਹੀ’’ਤਿ ਵਤ੍ਵਾ ਗਹਿਤਮਤ੍ਤਕਮੇਵ ਕਰੋਤਿ. ਅਭਿਹਟਾਵ ਹੋਤੀਤਿ ਪਰਿਵੇਸਕੇਨੇਵ ਅਭਿਹਟਾਵ ਹੋਤਿ. ਇਦਾਨਿ ਅਸਤਿ ਤਸ੍ਸ ਦਾਤੁਕਾਮਾਭਿਹਾਰੇ ਗਹਣਸਮਯੇਪਿ ਪਟਿਕ੍ਖਿਪਤੋ ਨ ਹੋਤੀਤਿ ਦਸ੍ਸੇਤੁਂ ‘‘ਸਚੇ ਪਨਾ’’ਤਿਆਦਿ ਵੁਤ੍ਤਂ. ਉਦ੍ਧਟੇਤਿ ਉਦ੍ਧਟੇ ਭਤ੍ਤੇ. ਕਟਚ੍ਛੁਅਭਿਹਾਰੋਯੇਵ ਹਿ ਤਸ੍ਸ ਅਭਿਹਾਰੋਤਿ ਅਧਿਪ੍ਪਾਯੋ. ਅਨਨ੍ਤਰਸ੍ਸ ਦਿਯ੍ਯਮਾਨੇਤਿ ਅਨਨ੍ਤਰਸ੍ਸ ਭਿਕ੍ਖੁਨੋ ਭਤ੍ਤੇ ਦਿਯ੍ਯਮਾਨੇ. ਕਾਯਵਿਕਾਰੇਨਾਤਿ ‘‘ਅਙ੍ਗੁਲਿਂ ਵਾ ਹਤ੍ਥਂ ਵਾ ਮਚ੍ਛਿਕਬੀਜਨਿਂ ਵਾ ਚੀਵਰਕਣ੍ਣਂ ਵਾ ਚਾਲੇਤਿ, ਭਮੁਕਾਯ ਵਾ ਆਕਾਰਂ ਕਰੋਤਿ, ਕੁਦ੍ਧੋ ਵਾ ਓਲੋਕੇਤੀ’’ਤਿ (ਪਾਚਿ. ਅਟ੍ਠ. ੨੩੮-੨੩੯) ਏਵਂ ਵੁਤ੍ਤੇਨ ਅਙ੍ਗੁਲਿਚਲਨਾਦਿਨਾ ਕਾਯਵਿਕਾਰੇਨ. ‘‘ਅਲਂ ਮਾ ਦੇਹੀ’’ਤਿਆਦਿਨਾ ਵਚੀਵਿਕਾਰੇਨਾਤਿ ‘‘ਅਲ’’ਨ੍ਤਿ ਵਾ ‘‘ਨ ਗਣ੍ਹਾਮੀ’’ਤਿ ਵਾ ‘‘ਮਾ ਆਕਿਰਾ’’ਤਿ ਵਾ ‘‘ਅਪਗਚ੍ਛਾ’’ਤਿ ਵਾ ਏਵਂ ਯੇਨ ਕੇਨਚਿ ਵਚੀਵਿਕਾਰੇਨ.

ਅਭਿਹਟੇ ਪਨ ਭਤ੍ਤੇ ਪਵਾਰਣਾਯ ਭੀਤੋ ਹਤ੍ਥੇ ਅਪਨੇਤ੍ਵਾ ਪੁਨਪ੍ਪੁਨਂ ਪਤ੍ਤੇ ਓਦਨਂ ਆਕਿਰਨ੍ਤਂ ‘‘ਆਕਿਰ ਆਕਿਰ, ਕੋਟ੍ਟੇਤ੍ਵਾ ਪੂਰੇਹੀ’’ਤਿ ਵਦਤੋ ਪਵਾਰਣਾ ਨ ਹੋਤਿ. ਏਸ ਨਯੋ ਭਤ੍ਤਂ ਅਭਿਹਰਨ੍ਤਂ ਭਿਕ੍ਖੁਂ ਸਲ੍ਲਕ੍ਖੇਤ੍ਵਾ ‘‘ਕਿਂ, ਆਵੁਸੋ, ਇਤੋਪਿ ਕਿਞ੍ਚਿ ਗਣ੍ਹਿਸ੍ਸਸਿ, ਦਮ੍ਮਿ ਤੇ ਕਿਞ੍ਚੀ’’ਤਿ ਵਦਤੋਪਿ.

‘‘ਰਸਂ ਪਟਿਗ੍ਗਣ੍ਹਥਾ’’ਤਿ ਅਪ੍ਪਵਾਰਣਾਜਨਕਸ੍ਸ ਨਾਮਂ ਗਹੇਤ੍ਵਾ ਵੁਤ੍ਤਤ੍ਤਾ ‘‘ਤਂ ਸੁਤ੍ਵਾ ਪਟਿਕ੍ਖਿਪਤੋ ਪਵਾਰਣਾ ਨਤ੍ਥੀ’’ਤਿ ਵੁਤ੍ਤਂ. ਮਂਸਰਸਨ੍ਤਿ ਏਤ੍ਥ ਪਨ ਨ ਕੇਵਲਂ ਮਂਸਸ੍ਸ ਰਸਂ ‘‘ਮਂਸਰਸ’’ਮਿਚ੍ਚੇਵ ਵਿਞ੍ਞਾਯਤਿ, ਅਥ ਖੋ ਮਂਸਞ੍ਚ ਰਸਞ੍ਚ ਮਂਸਰਸਨ੍ਤਿ ਏਵਂ ਪਵਾਰਣਾਜਨਕਨਾਮਵਸੇਨਾਪਿ. ਤਸ੍ਮਾ ਤਂ ਪਟਿਕ੍ਖਿਪਤੋ ਪਵਾਰਣਾਵ ਹੋਤੀਤਿ ਆਹ ‘‘ਮਂਸਰਸਨ੍ਤਿ ਵੁਤ੍ਤੇ ਪਨ ਪਟਿਕ੍ਖਿਪਤੋ ਪਵਾਰਣਾ ਹੋਤੀ’’ਤਿ. ਪਰਤੋ ਮਚ੍ਛਮਂਸਂ ਬ੍ਯਞ੍ਜਨਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਯਸ੍ਮਿਂ ਇਰਿਯਾਪਥੇ ਪਵਾਰੇਤਿ, ਤਂ ਅਵਿਕੋਪੇਨ੍ਤੇਨੇਵ ਭੁਞ੍ਜਿਤਬ੍ਬਨ੍ਤਿ ਯੋ ਗਚ੍ਛਨ੍ਤੋ (ਪਾਚਿ. ਅਟ੍ਠ. ੨੩੮-੨੩੯) ਪਵਾਰੇਤਿ, ਤੇਨ ਗਚ੍ਛਨ੍ਤੇਨੇਵ ਭੁਞ੍ਜਿਤਬ੍ਬਂ. ਕਦ੍ਦਮਂ ਵਾ ਉਦਕਂ ਵਾ ਪਤ੍ਵਾ ਠਿਤੇਨ ਅਤਿਰਿਤ੍ਤਂ ਕਾਰੇਤਬ੍ਬਂ. ਸਚੇ ਅਨ੍ਤਰਾ ਨਦੀ ਪੂਰਾ ਹੋਤਿ, ਨਦਿਤੀਰੇ ਗੁਮ੍ਬਂ ਅਨੁਪਰਿਯਾਯਨ੍ਤੇਨ ਭੁਞ੍ਜਿਤਬ੍ਬਂ. ਅਥ ਨਾਵਾ ਵਾ ਸੇਤੁ ਵਾ ਅਤ੍ਥਿ, ਤਂ ਅਭਿਰੁਹਿਤ੍ਵਾਪਿ ਚਙ੍ਕਮਨ੍ਤੇਨੇਵ ਭੁਞ੍ਜਿਤਬ੍ਬਂ, ਗਮਨਂ ਨ ਉਪਚ੍ਛਿਨ੍ਦਿਤਬ੍ਬਂ. ਏਸ ਨਯੋ ਇਤਰਇਰਿਯਾਪਥੇਸੁਪਿ. ਤਂ ਤਂ ਇਰਿਯਾਪਥਂ ਕੋਪੇਨ੍ਤੇਨ ਅਤਿਰਿਤ੍ਤਂ ਕਾਰੇਤਬ੍ਬਂ. ਯੋ ਉਕ੍ਕੁਟਿਕੋਵ ਨਿਸੀਦਿਤ੍ਵਾ ਪਵਾਰੇਤਿ, ਤੇਨ ਉਕ੍ਕੁਟਿਕੇਨੇਵ ਭੁਞ੍ਜਿਤਬ੍ਬਂ. ਤਸ੍ਸ ਪਨ ਹੇਟ੍ਠਾ ਪਲਾਲਪੀਠਂ ਵਾ ਕਿਞ੍ਚਿ ਵਾ ਨਿਸੀਦਨਂ ਦਾਤਬ੍ਬਂ. ਪੀਠਕੇ ਨਿਸੀਦਿਤ੍ਵਾ ਪਵਾਰਿਤੇਨ ਪਨ ਆਸਨਂ ਅਚਾਲੇਤ੍ਵਾਵ ਚਤਸ੍ਸੋ ਦਿਸਾ ਪਰਿਵਤ੍ਤਨ੍ਤੇਨ ਭੁਞ੍ਜਿਤੁਂ ਲਬ੍ਭਤਿ. ਮਞ੍ਚੇ ਨਿਸੀਦਿਤ੍ਵਾ ਪਵਾਰਿਤੇਨ ਇਤੋ ਵਾ ਏਤ੍ਤੋ ਵਾ ਸਂਸਰਿਤੁਂ ਨ ਲਬ੍ਭਤਿ. ਸਚੇ ਪਨ ਸਹ ਮਞ੍ਚੇਨ ਉਕ੍ਖਿਪਿਤ੍ਵਾ ਅਞ੍ਞਤ੍ਰ ਨੇਨ੍ਤਿ, ਵਟ੍ਟਤਿ. ਨਿਪਜ੍ਜਿਤ੍ਵਾ ਪਵਾਰਿਤੇਨਾਪਿ ਨਿਪਨ੍ਨੇਨੇਵ ਭੁਞ੍ਜਿਤਬ੍ਬਂ. ਪਰਿਵਤ੍ਤਨ੍ਤੇਨ ਯੇਨ ਪਸ੍ਸੇਨ ਨਿਪਨ੍ਨੋ, ਤਸ੍ਸ ਠਾਨਂ ਨਾਤਿਕ੍ਕਮੇਤਬ੍ਬਂ.

ਅਲਮੇਤਂ ਸਬ੍ਬਨ੍ਤਿ ਏਤਂ ਸਬ੍ਬਂ ਅਲਂ ਪਰਿਯਤ੍ਤਂ, ਇਦਮ੍ਪਿ ਤੇ ਅਧਿਕਂ, ਇਤੋ ਅਞ੍ਞਂ ਨ ਲਚ੍ਛਸੀਤਿ ਅਧਿਪ੍ਪਾਯੋ. ਯੋ ਅਤਿਰਿਤ੍ਤਂ ਕਰੋਤੀਤਿ ਯੋ ‘‘ਅਲਮੇਤਂ ਸਬ੍ਬ’’ਨ੍ਤਿ ਅਤਿਰਿਤ੍ਤਂ ਕਰੋਤਿ. ਪਟਿਪਕ੍ਖਨਯੇਨਾਤਿ ‘‘ਕਪ੍ਪਿਯਕਤਂ, ਪਟਿਗ੍ਗਹਿਤਕਤਂ, ਉਚ੍ਚਾਰਿਤਕਤਂ, ਹਤ੍ਥਪਾਸੇ ਕਤਂ, ਭੁਤ੍ਤਾਵਿਨਾ ਕਤਂ, ਭੁਤ੍ਤਾਵਿਨਾ ਪਵਾਰਿਤੇਨ ਆਸਨਾ ਅਵੁਟ੍ਠਿਤੇਨ ਕਤਂ ‘ਅਲਮੇਤਂ ਸਬ੍ਬ’ਨ੍ਤਿ ਵੁਤ੍ਤ’’ਨ੍ਤਿ (ਪਾਚਿ. ੨੩੯) ਇਮੇਹਿ ਸਤ੍ਤਹਿ ਵਿਨਯਕਮ੍ਮਾਕਾਰੇਹਿ ਯਂ ਅਤਿਰਿਤ੍ਤਂ ਕਪ੍ਪਿਯਂ ਕਤਂ, ਯਞ੍ਚ ਗਿਲਾਨਾਤਿਰਿਤ੍ਤਂ, ਤਦੁਭਯਮ੍ਪਿ ਅਤਿਰਿਤ੍ਤਨ੍ਤਿ ਏਵਂ ਤਸ੍ਸੇਵ ਪਟਿਪਕ੍ਖਨਯੇਨ. ਏਤ੍ਥ ਚ ‘‘ਅਲਮੇਤਂ ਸਬ੍ਬ’’ਨ੍ਤਿ ਤਿਕ੍ਖਤ੍ਤੁਂ ਵਤ੍ਤਬ੍ਬਂ, ਅਯਂ ਕਿਰ ਆਚਿਣ੍ਣੋ. ਵਿਨਯਧਰਾ ਪਨ ‘‘ਸਕਿਂ ਏਵ ਵਤ੍ਤਬ੍ਬ’’ਨ੍ਤਿ ਵਦਨ੍ਤਿ.

ਕਸ੍ਮਾ ਤਂ ਸੋ ਪੁਨ ਕਾਤੁਂ ਨ ਲਭਤੀਤਿ ਆਹ ‘‘ਯਞ੍ਹੀ’’ਤਿਆਦਿ. ਤਤ੍ਥ ਯਞ੍ਹਿ ਅਕਤਨ੍ਤਿ ਯੇਨ ਪਠਮਂ ਕਪ੍ਪਿਯਂ ਕਤਂ, ਤੇਨ ਯਂ ਅਕਤਂ, ਤਂ ਕਾਤਬ੍ਬਂ. ਪਠਮਭਾਜਨੇ ਪਨ ਕਾਤੁਂ ਨ ਲਬ੍ਭਤਿ. ਯੇਨ ਚ ਅਕਤਨ੍ਤਿ ਅਞ੍ਞੇਨ ਭਿਕ੍ਖੁਨਾ ਯੇਨ ਪਠਮਂ ਨ ਕਤਂ, ਤੇਨ ਚ ਕਾਤਬ੍ਬਨ੍ਤਿ ਅਤ੍ਥੋ. ਵੁਤ੍ਤਨ੍ਤਿ ਸੀਹਲ਼ਟ੍ਠਕਥਾਸੁ ਵੁਤ੍ਤਂ. ਅਞ੍ਞਸ੍ਮਿਂ ਪਨ ਭਾਜਨੇਤਿ ਯਸ੍ਮਿਂ ਪਨ ਭਾਜਨੇ ਪਠਮਂ ਕਤਂ, ਤਤੋ ਅਞ੍ਞਸ੍ਮਿਂ ਪਤ੍ਤੇ ਵਾ ਕੁਣ੍ਡੇ ਵਾ ਪਚ੍ਛਿਯਂ ਵਾ ਯਤ੍ਥ ਕਤ੍ਥਚਿ ਪੁਰਤੋ ਠਪੇਤ੍ਵਾ ਓਨਾਮਿਤਭਾਜਨੇ.

ਅਞ੍ਞਤ੍ਰ ਭੁਞ੍ਜਨਵਤ੍ਥੁਸ੍ਮਿਨ੍ਤਿ ਭੁਤ੍ਤਾਵਿਨਾ ਪਵਾਰਿਤੇਨ ਹੁਤ੍ਵਾ ਅਞ੍ਞਤ੍ਰ ਭੁਞ੍ਜਨਵਤ੍ਥੁਸ੍ਮਿਂ. ਤਿਕਪਾਚਿਤ੍ਤਿਯਨ੍ਤਿ ਅਨਤਿਰਿਤ੍ਤੇ ਅਨਤਿਰਿਤ੍ਤਸਞ੍ਞਿਵੇਮਤਿਕਅਤਿਰਿਤ੍ਤਸਞ੍ਞੀਨਂ ਵਸੇਨ ਤੀਣਿ ਪਾਚਿਤ੍ਤਿਯਾਨਿ. ਅਜ੍ਝੋਹਰਤੋ ਚ ਦੁਕ੍ਕਟਨ੍ਤਿ ਅਜ੍ਝੋਹਰਤੋ ਅਜ੍ਝੋਹਾਰੇ ਅਜ੍ਝੋਹਾਰੇ ਦੁਕ੍ਕਟਂ. ਸਚੇ ਪਨ ਆਮਿਸਸਂਸਟ੍ਠਾਨਿ ਹੋਨ੍ਤਿ, ਆਹਾਰਤ੍ਥਾਯਪਿ ਅਨਾਹਾਰਤ੍ਥਾਯਪਿ ਪਟਿਗ੍ਗਹੇਤ੍ਵਾ ਅਜ੍ਝੋਹਰਨ੍ਤਸ੍ਸ ਪਾਚਿਤ੍ਤਿਯਮੇਵ. ਤੇਸਂ ਅਨੁਞ੍ਞਾਤਪਰਿਭੋਗਵਸੇਨਾਤਿ ਯਾਮਕਾਲਿਕਾਦੀਨਂ ਅਨੁਞ੍ਞਾਤਪਰਿਭੋਗਵਸੇਨ, ਯਾਮਕਾਲਿਕਂ ਪਿਪਾਸਾਯ ਸਤਿ ਪਿਪਾਸਚ੍ਛੇਦਨਤ੍ਥਂ, ਸਤ੍ਤਾਹਕਾਲਿਕਂ ਯਾਵਜੀਵਿਕਞ੍ਚ ਤੇਨ ਤੇਨ ਉਪਸਮੇਤਬ੍ਬਕੇ ਆਬਾਧੇ ਸਤਿ ਤਸ੍ਸ ਉਪਸਮਨਤ੍ਥਨ੍ਤਿ ਵੁਤ੍ਤਂ ਹੋਤਿ. ਇਦਮ੍ਪਿ ਅਜ੍ਝੋਹਰਣਤੋ ਕਾਯਕਮ੍ਮਂ, ਵਾਚਾਯ ‘‘ਅਤਿਰਿਤ੍ਤਂ ਕਰੋਥ ਭਨ੍ਤੇ’’ਤਿ ਅਕਾਰਾਪਨੇਨ ਵਚੀਕਮ੍ਮਨ੍ਤਿ ਆਹ ‘‘ਸਮੁਟ੍ਠਾਨਾਦੀਨਿ ਪਠਮਕਥਿਨਸਦਿਸਾਨੇਵਾ’’ਤਿ. ਕਿਰਿਯਾਕਿਰਿਯਨ੍ਤਿ ਏਤ੍ਥ ਪਟਿਕ੍ਖਿਪਿਤ੍ਵਾ ਭੁਞ੍ਜਨਂ ਕਿਰਿਯਂ. ਅਤਿਰਿਤ੍ਤਸ੍ਸ ਅਕਰਣਂ ਅਕਿਰਿਯਨ੍ਤਿ ਵੇਦਿਤਬ੍ਬਂ.

ਪਠਮਪਵਾਰਣਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਦੁਤਿਯਪਵਾਰਣਾਸਿਕ੍ਖਾਪਦਵਣ੍ਣਨਾ

ਸੁਤ੍ਵਾ ਵਾਤਿ ਅਞ੍ਞੇਨ ਵਾ ਤੇਨੇਵ ਵਾ ਆਰੋਚਿਤਂ ਸੁਤ੍ਵਾ. ‘‘ਭੁਤ੍ਤਸ੍ਮਿਂ ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੨੪੩) ਵੁਤ੍ਤਤ੍ਤਾ ਭੋਜਨਪਰਿਯੋਸਾਨੇ ਪਾਚਿਤ੍ਤਿਯ’’ਨ੍ਤਿ ਵੁਤ੍ਤਂ.

ਦੁਤਿਯਪਵਾਰਣਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਵਿਕਾਲਭੋਜਨਸਿਕ੍ਖਾਪਦਵਣ੍ਣਨਾ

ਵਿਕਾਲੇਤਿ ਏਤ੍ਥ ਅਰੁਣੁਗ੍ਗਮਨਤੋ ਪਟ੍ਠਾਯ ਯਾਵ ਮਜ੍ਝਨ੍ਹਿਕੋ, ਅਯਂ ਬੁਦ੍ਧਾਦੀਨਂ ਅਰਿਯਾਨਂ ਆਚਿਣ੍ਣਸਮਾਚਿਣ੍ਣੋ ਭੋਜਨਸ੍ਸ ਕਾਲੋ ਨਾਮ. ਤਦਞ੍ਞੋ ਵਿਕਾਲੋ ‘‘ਵਿਗਤੋ ਕਾਲੋ’’ਤਿ ਕਤ੍ਵਾ. ਤੇਨਾਹ ‘‘ਵਿਗਤੇ ਕਾਲੇ’’ਤਿਆਦਿ. ਠਿਤਮਜ੍ਝਨ੍ਹਿਕੋਪਿ (ਪਾਚਿ. ਅਟ੍ਠ. ੨੪੮-੨੪੯) ਕਾਲਸਙ੍ਗਹਂ ਗਚ੍ਛਤਿ. ਤਤੋ ਪਟ੍ਠਾਯ ਪਨ ਖਾਦਿਤੁਂ ਵਾ ਭੁਞ੍ਜਿਤੁਂ ਵਾ ਨ ਸਕ੍ਕਾ. ਸਹਸਾ ਪਿਵਿਤੁਂ ਸਕ੍ਕਾ ਭਵੇਯ੍ਯ, ਕੁਕ੍ਕੁਚ੍ਚਕੇਨ ਪਨ ਨ ਕਾਤਬ੍ਬਂ. ਕਾਲਪਰਿਚ੍ਛੇਦਜਾਨਨਤ੍ਥਞ੍ਚ ਕਾਲਤ੍ਥਮ੍ਭੋ ਯੋਜੇਤਬ੍ਬੋ. ਕਾਲਬ੍ਭਨ੍ਤਰੇਵ ਭਤ੍ਤਕਿਚ੍ਚਂ ਕਾਤਬ੍ਬਂ. ‘‘ਯਂ ਕਿਞ੍ਚਿ…ਪੇ… ਖਾਦਨੀਯਂ ਵਾ’’ਤਿ ਇਮਿਨਾ ਯਂ ਤਾਵ ਸਕ੍ਖਲਿਮੋਦਕਾਦਿ ਪੁਬ੍ਬਣ੍ਣਾਪਰਣ੍ਣਮਯਂ, ਤਤ੍ਥ ਵਤ੍ਤਬ੍ਬਮੇਵ ਨਤ੍ਥੀਤਿ ਦਸ੍ਸੇਤਿ. ਭੋਜਨੀਯਂ ਨਾਮ ਪਞ੍ਚ ਭੋਜਨਾਨਿ.

ਸਤਿ ਪਚ੍ਚਯੇਤਿ ਪਿਪਾਸਾਦਿਕਾਰਣੇ ਵਿਜ੍ਜਮਾਨੇ. ਰੋਮਟ੍ਠਕਸ੍ਸਾਤਿ ਰੋਮਟ੍ਠਕਸ੍ਸ ਭਿਕ੍ਖੁਨੋ ਅਜ੍ਝੋਹਰਿਤ੍ਵਾ ਉਗ੍ਗਿਰਿਤ੍ਵਾ ਮੁਖੇਵ ਠਪਿਤੋ ਬਹਿ ਮੁਖਦ੍ਵਾਰਾ ਵਿਨਿਗ੍ਗਤੋ ਭੋਜਨਸ੍ਸ ਮਗ੍ਗਾ ਬਹਿ ਨਿਗ੍ਗਤੋ ‘‘ਰੋਮਟ੍ਠੋ’’ਤਿ ਪਵੁਚ੍ਚਤਿ. ਇਧ ਪਨ ਅਜ੍ਝੋਹਰਿਤ੍ਵਾ ਉਗ੍ਗਿਰਿਤ੍ਵਾ ਮੁਖੇਵ ਠਪਿਤੋਤਿ ਅਧਿਪ੍ਪੇਤੋ. ਤੇਨਾਹ ‘‘ਨ ਚ, ਭਿਕ੍ਖਵੇ’’ਤਿਆਦਿ. ਠਪੇਤ੍ਵਾ ਰੋਮਟ੍ਠਕਂ ਸੇਸਾਨਂ ਆਗਤਂ ਉਗ੍ਗਾਰਂ ਮੁਖੇ ਸਨ੍ਧਾਰੇਤ੍ਵਾ ਗਿਲਨ੍ਤਾਨਂ ਆਪਤ੍ਤਿ. ਸਚੇ ਪਨ ਅਸਨ੍ਧਾਰੇਨ੍ਤਮੇਵ ਪਰਗਲਂ ਗਚ੍ਛਤਿ, ਵਟ੍ਟਤਿ.

ਵਿਕਾਲਭੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਸਨ੍ਨਿਧਿਕਾਰਕਸਿਕ੍ਖਾਪਦਵਣ੍ਣਨਾ

‘‘ਕਾਰੋ ਕਰਣਂ ਕਿਰਿਯਾਤਿ ਅਤ੍ਥਤੋ ਏਕ’’ਨ੍ਤਿ ਏਤੇਨ ਕਾਰਸਦ੍ਦਸ੍ਸ ਭਾਵਤ੍ਥਤਂ ਦਸ੍ਸੇਤਿ. ਸਮ੍ਮਾ ਨਿਧਾਨਂ ਠਪਨਂ ਸਨ੍ਨਿਧਿ. ‘‘ਪਟਿਗ੍ਗਹੇਤ੍ਵਾ ਏਕਰਤ੍ਤਂ ਵੀਤਿਨਾਮਿਤਸ੍ਸੇਤਂ ਨਾਮ’’ਨ੍ਤਿ ਇਮਿਨਾ ਪਟਿਗ੍ਗਹੇਤ੍ਵਾ ਏਕਰਤ੍ਤਂ ਵੀਤਿਨਾਮਿਤੇ ਇਮਸ੍ਸ ਦੁਦ੍ਧੋਤਭਾਵਂ ਦਸ੍ਸੇਤਿ. ਕਿਞ੍ਚਾਪਿ ਯਾਮਕਾਲਿਕਂ ਖਾਦਨੀਯਂ, ਭੋਜਨੀਯਂ ਵਾ ਨ ਹੋਤਿ, ‘‘ਅਨਾਪਤ੍ਤਿ ਯਾਮਕਾਲਿਕਂ ਯਾਮੇ ਨਿਦਹਿਤ੍ਵਾ ਭੁਞ੍ਜਤੀ’’ਤਿਆਦਿ ਵਚਨਤੋ ਪਨ ਤਤ੍ਥਾਪਿ ਯਾਮਾਤਿਕ੍ਕਮੇ ਸਨ੍ਨਿਧਿਪਚ੍ਚਯਾ ਪਾਚਿਤ੍ਤਿਯੇਨ ਭਵਿਤਬ੍ਬਨ੍ਤਿ ‘‘ਯਂ ਕਿਞ੍ਚਿ ਯਾਵਕਾਲਿਕਂ ਵਾ ਯਾਮਕਾਲਿਕਂ ਵਾ’’ਤਿ ਵੁਤ੍ਤਂ. ਇਦਾਨਿ ਦੁਦ੍ਧੋਤਭਾਵਮੇਵ ਵਿਭਾਵੇਤੁਂ ‘‘ਯਂ ਅਙ੍ਗੁਲਿਯਾ’’ਤਿਆਦਿ ਵੁਤ੍ਤਂ. ਤਤ੍ਥ ਯਂ ਅਙ੍ਗੁਲਿਯਾ ਘਂਸਨ੍ਤਸ੍ਸ ਲੇਖਾ ਪਞ੍ਞਾਯਤੀਤਿ ਯਂ ਪਤ੍ਤਂ ਧੋਤਂ ਅਙ੍ਗੁਲਿਯਾ ਘਂਸਨ੍ਤਸ੍ਸ ਪਤ੍ਤੇ ਅਙ੍ਗੁਲਿਲੇਖਾ ਪਞ੍ਞਾਯਤਿ, ਸੋ ਪਤ੍ਤੋ ਦੁਦ੍ਧੋਤੋ ਹੋਤੀਤਿ ਅਤ੍ਥੋ. ਤੇਲਵਣ੍ਣਪਤ੍ਤੇ ਪਨ ਅਙ੍ਗੁਲਿਲੇਖਾ ਪਞ੍ਞਾਯਤਿ, ਸਾ ਅਬ੍ਬੋਹਾਰਿਕਾ. ਸ੍ਨੇਹੋਤਿ ਤੇਲਂ. ਸਨ੍ਦਿਸ੍ਸਤੀਤਿ ਯਾਗੁਯਾ ਉਪਰਿ ਸਨ੍ਦਿਸ੍ਸਤਿ. ਤਾਦਿਸੇ ਪਤ੍ਤੇਪੀਤਿ ਪਟਿਗ੍ਗਹਣਂ ਅਵਿਸ੍ਸਜ੍ਜਿਤ੍ਵਾ ਸਯਂ ਵਾ ਅਞ੍ਞੇਨ ਵਾ ਭੋਜਨਂ ਨੀਹਰਿਤ੍ਵਾ ਨ ਸਮ੍ਮਾ ਧੋਤੇ ਪਤ੍ਤੇਪਿ. ਪੁਨਦਿਵਸੇ ਭੁਞ੍ਜਨ੍ਤਸ੍ਸ ਪਾਚਿਤ੍ਤਿਯਨ੍ਤਿ ਪਤ੍ਤੇ ਲਗ੍ਗਂ ਅਵਿਜਹਿਤਪ੍ਪਟਿਗ੍ਗਹਣਂ ਹੋਤੀਤਿ ਦੁਤਿਯਦਿਵਸੇ ਭੁਞ੍ਜਨ੍ਤਸ੍ਸ ਪਾਚਿਤ੍ਤਿਯਂ. ਪਰਿਚ੍ਚਤ੍ਤੇ ਪਨ ਪਤ੍ਤੇ ਪੁਨਦਿਵਸੇ ਭੁਞ੍ਜਨ੍ਤਸ੍ਸ ਅਨਾਪਤ੍ਤਿ.

ਯਂ ਪਨਾਤਿ ਯਂ ਭੋਜਨਂ ਪਨ. ਅਪਰਿਚ੍ਚਤ੍ਤਮੇਵ ਹੀਤਿ ਅਨਪੇਕ੍ਖਵਿਸ੍ਸਜ੍ਜਨੇਨ ਵਾ ਅਨੁਪਸਮ੍ਪਨ੍ਨਸ੍ਸ ਨਿਰਪੇਕ੍ਖਦਾਨੇਨ ਵਾ ਅਪਰਿਚ੍ਚਤ੍ਤਮੇਵ. ਕਪ੍ਪਿਯ ਭੋਜਨਨ੍ਤਿ ਅਨ੍ਤਮਸੋ ਏਕਸਿਤ੍ਥਮਤ੍ਤਮ੍ਪਿ ਕਪ੍ਪਿਯਭੋਜਨਂ. ਅਕਪ੍ਪਿਯੇਸੂਤਿ ਅਕਪ੍ਪਿਯਮਂਸੇਸੁ. ਸੇਸੇਸੂਤਿ ਮਨੁਸ੍ਸਮਂਸਤੋ ਅਵਸੇਸੇਸੁ ਹਤ੍ਥਿਅਸ੍ਸਸੁਨਖਅਹਿਸੀਹਬ੍ਯਗ੍ਘਦੀਪਿਅਚ੍ਛਤਰਚ੍ਛਮਂਸੇਸੁ ਚੇਵ ਅਪ੍ਪਟਿਵੇਕ੍ਖਿਤੇ ਉਦ੍ਦਿਸ੍ਸਕਤਮਂਸੇ ਚ. ਪਾਲ਼ਿਯਂ ‘‘ਸਤ੍ਤਾਹਕਾਲਿਕਂ ਯਾਵਜੀਵਿਕਂ ਆਹਾਰਤ੍ਥਾਯ ਪਟਿਗ੍ਗਣ੍ਹਾਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿਆਦਿਨਾ (ਪਾਚਿ. ੨੫੫) ਸਨ੍ਨਿਹਿਤੇਸੁ ਸਤ੍ਤਾਹਕਾਲਿਕਯਾਵਜੀਵਿਕੇਸੁ ਪੁਰੇਭਤ੍ਤਮ੍ਪਿ ਆਹਾਰਤ੍ਥਾਯ ਅਜ੍ਝੋਹਰਣੇਪਿ ਦੁਕ੍ਕਟਸ੍ਸ ਵੁਤ੍ਤਤ੍ਤਾ ਯਾਮਕਾਲਿਕੇਪਿ ਆਹਾਰਤ੍ਥਾਯ ਅਜ੍ਝੋਹਰਣੇਪਿ ਵਿਸੁਂ ਦੁਕ੍ਕਟੇਨਾਪਿ ਭਵਿਤਬ੍ਬਨ੍ਤਿ ਆਹ ‘‘ਆਹਾਰਤ੍ਥਾਯ ਅਜ੍ਝੋਹਰਤੋ ਦੁਕ੍ਕਟੇਨ ਸਦ੍ਧਿਂ ਪਾਚਿਤ੍ਤਿਯ’’ਨ੍ਤਿ. ਸਬ੍ਬਵਿਕਪ੍ਪੇਸੂਤਿ ‘‘ਕਪ੍ਪਿਯਭੋਜਨਂ ਭੁਞ੍ਜਨ੍ਤਸ੍ਸਾ’’ਤਿਆਦਿਨਾ ਵੁਤ੍ਤੇਸੁ ਸਬ੍ਬੇਸੁ ਵਿਕਪ੍ਪੇਸੁ ਅਪਰਮ੍ਪਿ ਪਾਚਿਤ੍ਤਿਯਂ ਵਡ੍ਢਤਿ. ਇਦਂ ਵੁਤ੍ਤਂ ਹੋਤਿ (ਪਾਚਿ. ਅਟ੍ਠ. ੨੫੩) – ਕਪ੍ਪਿਯਭੋਜਨੇ ਦ੍ਵੇ ਪਾਚਿਤ੍ਤਿਯਾਨਿ, ਮਨੁਸ੍ਸਮਂਸੇ ਥੁਲ੍ਲਚ੍ਚਯੇਨ ਸਦ੍ਧਿਂ ਦ੍ਵੇ ਪਾਚਿਤ੍ਤਿਯਾਨਿ, ਅਵਸੇਸੇਸੁ ਪਨ ਅਕਪ੍ਪਿਯਮਂਸੇਸੁ ਦੁਕ੍ਕਟੇਨ ਸਦ੍ਧਿਂ ਦ੍ਵੇ ਪਾਚਿਤ੍ਤਿਯਾਨਿ. ਯਾਮਕਾਲਿਕਂ ਸਤਿ ਪਚ੍ਚਯੇ ਸਾਮਿਸੇਨ ਮੁਖੇਨ ਅਜ੍ਝੋਹਰਤੋ ਦ੍ਵੇ ਪਾਚਿਤ੍ਤਿਯਾਨਿ, ਨਿਰਾਮਿਸੇਨ ਏਕਮੇਵ. ਆਹਾਰਤ੍ਥਾਯ ਅਜ੍ਝੋਹਰਤੋ ਵਿਕਪ੍ਪਦ੍ਵਯੇਪਿ ਦੁਕ੍ਕਟੇਨ ਸਦ੍ਧਿਨ੍ਤਿ.

ਅਵਸੇਸੇਸੂਤਿ ਯਾਮਕਾਲਿਕਾਦਿਤੋ ਅਵਸੇਸੇਸੁ. ਪਾਚਿਤ੍ਤਿਯਂ ਵਡ੍ਢਤਿਯੇਵਾਤਿ ਅਪਰਮ੍ਪਿ ਪਾਚਿਤ੍ਤਿਯਂ ਵਡ੍ਢਤਿਯੇਵ. ਇਦਂ ਵੁਤ੍ਤਂ ਹੋਤਿ – ਸਚੇ ਵਿਕਾਲੇ ਅਜ੍ਝੋਹਰਤਿ, ਪਕਤਿਭੋਜਨੇ ਸਨ੍ਨਿਧਿਪਚ੍ਚਯਾ ਚ ਵਿਕਾਲਭੋਜਨਪਚ੍ਚਯਾ ਚ ਦ੍ਵੇ ਪਾਚਿਤ੍ਤਿਯਾਨਿ, ਅਕਪ੍ਪਿਯਮਂਸੇਸੁ ਮਨੁਸ੍ਸਮਂਸੇ ਥੁਲ੍ਲਚ੍ਚਯੇਨ ਸਦ੍ਧਿਂ ਦ੍ਵੇ ਪਾਚਿਤ੍ਤਿਯਾਨਿ, ਅਵਸੇਸੇਸੁ ਦੁਕ੍ਕਟੇਨ ਸਦ੍ਧਿਂ ਦ੍ਵੇਤਿ.

ਬੇਲਟ੍ਠਸੀਸੋ ਨਾਮ ਜਟਿਲਸਹਸ੍ਸਸ੍ਸ ਅਬ੍ਭਨ੍ਤਰੇ ਏਕੋ ਮਹਾਥੇਰੋ. ਤਿਕਪਾਚਿਤ੍ਤਿਯਨ੍ਤਿ ਸਨ੍ਨਿਧਿਕਾਰਕੇ ਸਨ੍ਨਿਧਿਕਾਰਕਸਞ੍ਞਿਵੇਮਤਿਕਅਸਨ੍ਨਿਧਿਕਾਰਕਸਞ੍ਞੀਨਂ ਵਸੇਨ ਤੀਣਿ ਪਾਚਿਤ੍ਤਿਯਾਨਿ. ਸਂਸਟ੍ਠਾਨੀਤਿ ਸਂਸਟ੍ਠਰਸਾਨਿ. ਸਮ੍ਭਿਨ੍ਨਰਸਂ ਸਨ੍ਧਾਯੇਵ ਹਿ ‘‘ਤਦਹੁਪਟਿਗ੍ਗਹਿਤਂ ਕਾਲੇ ਕਪ੍ਪਤੀ’’ਤਿਆਦਿ ਵੁਤ੍ਤਂ. ਤੇਨਾਹ ‘‘ਤਸ੍ਮਾ’’ਤਿਆਦਿ. ਏਤ੍ਥ ਚ ਅਸਮ੍ਭਿਨ੍ਨਰਸਨ੍ਤਿ ਅਮਿਸ੍ਸਿਤਰਸਂ. ਇਦਞ੍ਚ ਸੀਤਲਪਾਯਾਸਾਦਿਨਾ ਸਹ ਲਦ੍ਧਂ ਸਪ੍ਪਿਪਿਣ੍ਡਾਦਿਕਂ ਸਨ੍ਧਾਯ ਵੁਤ੍ਤਂ. ‘‘ਸੁਧੋਤਂ ਵਾ’’ਤਿ ਇਦਂ ਪਨ ਪਿਣ੍ਡਪਾਤੇਨ ਸਦ੍ਧਿਂ ਲਦ੍ਧਂ ਤਕ੍ਕੋਲਜਾਤਿਫਲਾਦਿਂ, ਯਾਗੁਆਦੀਸੁ ਪਕ੍ਖਿਪਿਤ੍ਵਾ ਦਿਨ੍ਨਸਿਙ੍ਗੀਵੇਰਾਦਿਕਞ੍ਚ ਸਨ੍ਧਾਯ ਵੁਤ੍ਤਂ.

ਤੇਨਾਤਿ ਸਤ੍ਤਾਹਕਾਲਿਕੇਨ. ਤਦਹੁ ਪਟਿਗ੍ਗਹਿਤਂ ਅਸ੍ਸਾਤਿ ਤਦਹੁਪਟਿਗ੍ਗਹਿਤਂ, ਤੇਨ ਤਦਹੁਪਟਿਗ੍ਗਹਿਤੇਨ. ਏਸ ਨਯੋ ‘‘ਦ੍ਵੀਹਪਟਿਗ੍ਗਹਿਤੇਨਾ’’ਤਿਆਦੀਸੁਪਿ. ਤਸ੍ਮਾਤਿ ਯਸ੍ਮਾ ਪੁਰੇਭਤ੍ਤਂ ਪਟਿਗ੍ਗਹਿਤਮ੍ਪਿ ਵਟ੍ਟਤਿ, ਤਸ੍ਮਾ. ਪਟਿਗ੍ਗਹਿਤਂ ਸਤ੍ਤਾਹਂ ਕਪ੍ਪਤੀਤਿ ਵੁਤ੍ਤਨ੍ਤਿ ‘‘ਸਤ੍ਤਾਹਕਾਲਿਕੇਨ, ਭਿਕ੍ਖਵੇ, ਯਾਵਜੀਵਿਕਂ ਪਟਿਗ੍ਗਹਿਤਂ ਸਤ੍ਤਾਹਂ ਕਪ੍ਪਤਿ, ਸਤ੍ਤਾਹਾਤਿਕ੍ਕਨ੍ਤੇ ਨ ਕਪ੍ਪਤੀ’’ਤਿ (ਮਹਾਵ. ੩੦੫) ਭੇਸਜ੍ਜਕ੍ਖਨ੍ਧਕੇ ਵੁਤ੍ਤਂ. ਕਿਞ੍ਚਾਪਿ ਮੁਖੇ ਏਕਰਤ੍ਤਂ ਨ ਵੁਤ੍ਤਂ, ਤਥਾਪਿ ਮੁਖੇ ਪਕ੍ਖਿਤ੍ਤਮੇਵ ਯਸ੍ਮਾ ਸਨ੍ਨਿਧਿ ਨਾਮ ਹੋਤਿ, ਤਸ੍ਮਾ ‘‘ਮੁਖਸਨ੍ਨਿਧੀ’’ਤਿ ਵੁਤ੍ਤਂ.

ਚਤਸ੍ਸੋ ਕਪ੍ਪਿਯਭੂਮਿਯੋਤਿ ਉਸ੍ਸਾਵਨਨ੍ਤਿਕਾ, ਗੋਨਿਸਾਦਿਕਾ, ਗਹਪਤਿ, ਸਮ੍ਮੁਤੀਤਿ ਚਤਸ੍ਸੋ ਕਪ੍ਪਿਯਕੁਟਿਯੋ. ਤਤ੍ਥ ਉਸ੍ਸਾਵਨਨ੍ਤਿਕਾ (ਮਹਾਵ. ਅਟ੍ਠ. ੨੯੫) ਨਾਮ ਗੇਹੇ ਕਰਿਯਮਾਨੇ ਸਮ੍ਪਰਿਵਾਰੇਤ੍ਵਾ ਠਿਤੇਹਿ ‘‘ਕਪ੍ਪਿਯਕੁਟਿਂ ਕਰੋਮ, ਕਪ੍ਪਿਯਕੁਟਿਂ ਕਰੋਮਾ’’ਤਿ ਵਾ ‘‘ਕਪ੍ਪਿਯਕੁਟਿ ਕਪ੍ਪਿਯਕੁਟੀ’’ਤਿ ਵਾ ਵਦਨ੍ਤੇਹਿ ਠਪਿਤਪਠਮਿਟ੍ਠਕਥਮ੍ਭਾਦਿਕਾ ਸਙ੍ਘਸ੍ਸ ਵਾ ਏਕਸ੍ਸ ਭਿਕ੍ਖੁਨੋ ਵਾ ਕੁਟਿ. ਯੋ ਪਨ ਆਰਾਮੋ ਯੇਭੁਯ੍ਯੇਨ ਵਾ ਅਪਰਿਕ੍ਖਿਤ੍ਤੋ ਹੋਤਿ, ਸਕਲੋਪਿ ਵਾ, ਸੋ ‘‘ਗੋਨਿਸਾਦੀ’’ਤਿ ਵੁਚ੍ਚਤਿ. ਗਹਪਤੀਤਿ ਯਾ ਠਪੇਤ੍ਵਾ ਭਿਕ੍ਖੁਂ ਸੇਸੇਹਿ ‘‘ਕਪ੍ਪਿਯਕੁਟਿਂ ਦੇਮਾ’’ਤਿ ਦਿਨ੍ਨਾ, ਤੇਸਂ ਵਾ ਸਨ੍ਤਕਾ. ਸਮ੍ਮੁਤਿ ਨਾਮ ਕਮ੍ਮਵਾਚਾਯ ਸਾਵੇਤ੍ਵਾ ਕਤਾ. ਕਥਂ ਪਨੇਤਾਸਂ ਵਿਨਿਚ੍ਛਯੋ ਜਾਨਿਤਬ੍ਬੋਤਿ ਆਹ ‘‘ਤਾਸਂ ਵਿਨਿਚ੍ਛਯੋ ਸਮਨ੍ਤਪਾਸਾਦਿਕਾਯਂ ਵੁਤ੍ਤੋ’’ਤਿ.

ਸਨ੍ਨਿਧਿਕਾਰਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਪਣੀਤਭੋਜਨਸਿਕ੍ਖਾਪਦਵਣ੍ਣਨਾ

‘‘ਪਣੀਤਭੋਜਨਾਨੀ’’ਤਿ ਇਦਂ ਮਜ੍ਝੇ ਪਦਲੋਪਂ ਕਤ੍ਵਾ ਨਿਦ੍ਦਿਟ੍ਠਨ੍ਤਿ ਆਹ ‘‘ਪਣੀਤਸਂਸਟ੍ਠਾਨੀ’’ਤਿਆਦਿ. ਸਬ੍ਬੋਪਿ ‘‘ਓਦਕੋ’’ਤਿ ਵੁਤ੍ਤਲਕ੍ਖਣੋ ਮਚ੍ਛੋਤਿ ‘‘ਮਚ੍ਛੋ ਨਾਮ ਓਦਕੋ ਵੁਚ੍ਚਤੀ’’ਤਿ (ਪਾਚਿ. ੨੬੦) ਏਵਂ ਵਿਭਙ੍ਗੇ ਵੁਤ੍ਤਲਕ੍ਖਣੋ, ਸਬ੍ਬੋਪਿ ਮਚ੍ਛੋ ਏਵ. ਯੋ ਕੋਚਿ ਉਦਕੇ ਜਾਤੋ ਮਚ੍ਛੋ ਨਾਮਾਤਿ ਵੁਤ੍ਤਂ ਹੋਤਿ. ਮਹਾਨਾਮਸਿਕ੍ਖਾਪਦੇਨਾਤਿ –

‘‘ਅਗਿਲਾਨੇਨ ਭਿਕ੍ਖੁਨਾ ਚਤੁਮਾਸਪਚ੍ਚਯਪਵਾਰਣਾ ਸਾਦਿਤਬ੍ਬਾ ਅਞ੍ਞਤ੍ਰ ਪੁਨਪਵਾਰਣਾਯ ਅਞ੍ਞਤ੍ਰ ਨਿਚ੍ਚਪਵਾਰਣਾਯ. ਤਤੋ ਚੇ ਉਤ੍ਤਰਿ ਸਾਦਿਯੇਯ੍ਯ, ਪਾਚਿਤ੍ਤਿਯ’’ਨ੍ਤਿ –

ਇਮਿਨਾ ਸਿਕ੍ਖਾਪਦੇਨ (ਪਾਚਿ. ੩੦੬). ਏਤ੍ਥ ਹਿ ਸਙ੍ਘਵਸੇਨ ਗਿਲਾਨਪਚ੍ਚਯਪਵਾਰਣਾਯ ਪਵਾਰਿਤਟ੍ਠਾਨੇ ਸਚੇ ਤਤ੍ਥ ਰਤ੍ਤੀਹਿ ਵਾ ਭੇਸਜ੍ਜੇਹਿ ਵਾ ਪਰਿਚ੍ਛੇਦੋ ਕਤੋ ਹੋਤਿ ‘‘ਏਤ੍ਤਿਕਾਯੇਵ ਰਤ੍ਤਿਯੋ, ਏਤ੍ਤਕਾਨਿ ਵਾ ਭੇਸਜ੍ਜਾਨਿ ਵਿਞ੍ਞਾਪੇਤਬ੍ਬਾਨੀ’’ਤਿ, ਤਤੋ ਰਤ੍ਤਿਪਰਿਯਨ੍ਤਤੋ ਵਾ ਭੇਸਜ੍ਜਪਰਿਯਨ੍ਤਤੋ ਵਾ ਉਤ੍ਤਰਿ ਨਭੇਸਜ੍ਜਕਰਣੀਯੇਨ ਵਾ ਭੇਸਜ੍ਜਂ, ਅਞ੍ਞਭੇਸਜ੍ਜਕਰਣੀਯੇਨ ਵਾ ਅਞ੍ਞਂ ਭੇਸਜ੍ਜਂ ਵਿਞ੍ਞਾਪੇਨ੍ਤਸ੍ਸ ਪਾਚਿਤ੍ਤਿਯਂ ਵੁਤ੍ਤਂ. ਤਸ੍ਮਾ ਅਗਿਲਾਨੋ ਗਿਲਾਨਸਞ੍ਞੀਪਿ ਹੁਤ੍ਵਾ ਪਞ੍ਚ ਭੇਸਜ੍ਜਾਨਿ ਵਿਞ੍ਞਾਪੇਨ੍ਤੋ ਨਭੇਸਜ੍ਜਕਰਣੀਯੇਨ ਭੇਸਜ੍ਜਂ ਵਿਞ੍ਞਾਪੇਨ੍ਤੋ ਨਾਮ ਹੋਤੀਤਿ ‘‘ਮਹਾਨਾਮਸਿਕ੍ਖਾਪਦੇਨ ਕਾਰੇਤਬ੍ਬੋ’’ਤਿ ਵੁਤ੍ਤਂ.

ਯੋ ਪਨ ਨਭੇਸਜ੍ਜਤ੍ਥਾਯ ਵਿਞ੍ਞਾਪੇਤਿ, ਅਥ ਖੋ ਕੇਵਲਂ ਅਤ੍ਤਨੋ ਭੁਞ੍ਜਨਤ੍ਥਾਯ, ਸੋ ਸੂਪੋਦਨਵਿਞ੍ਞਤ੍ਤਿਯਾਯੇਵ ਕਾਰੇਤਬ੍ਬੋ. ਵੁਤ੍ਤਞ੍ਹੇਤਂ ਸਮਨ੍ਤਪਾਸਾਦਿਕਾਯਂ ‘‘ਸੁਦ੍ਧਾਨਿ ਸਪ੍ਪਿਆਦੀਨਿ ਵਿਞ੍ਞਾਪੇਤ੍ਵਾ ਭੁਞ੍ਜਨ੍ਤੋ ਪਾਚਿਤ੍ਤਿਯਂ ਨਾਪਜ੍ਜਤਿ, ਸੇਖਿਯੇਸੁ ਸੂਪੋਦਨਵਿਞ੍ਞਤ੍ਤਿਦੁਕ੍ਕਟਂ ਆਪਜ੍ਜਤੀ’’ਤਿ (ਪਾਚਿ. ਅਟ੍ਠ. ੨੫੯). ਸੂਪੋਦਨਵਿਞ੍ਞਤ੍ਤਿਯਾ ਕਾਰੇਤਬ੍ਬੋਤਿ ‘‘ਨ ਸੂਪਂ ਵਾ ਓਦਨਂ ਵਾ ਅਗਿਲਾਨੋ’’ਤਿਆਦਿਨਾ (ਪਾਚਿ. ੬੧੩) ਸਿਕ੍ਖਾਪਦੇਨ ਕਾਰੇਤਬ੍ਬੋ, ਦੁਕ੍ਕਟੇਨ ਕਾਰੇਤਬ੍ਬੋਤਿ ਵੁਤ੍ਤਂ ਹੋਤਿ. ਇਮਿਨਾਤਿ ਇਮਿਨਾ ਪਣੀਤਭੋਜਨਸਿਕ੍ਖਾਪਦੇਨ.

‘‘ਸਪ੍ਪਿਭਤ੍ਤਂ ਦੇਹੀ’’ਤਿ ਵੁਤ੍ਤੇ ਕਿਂ ਹੋਤੀਤਿ ਆਹ ‘‘ਸਪ੍ਪਿਭਤ੍ਤਂ ‘ਦੇਹੀ’ਤਿ ਵੁਤ੍ਤੇ ਪਨਾ’’ਤਿਆਦਿ. ਸੂਪੋਦਨਵਿਞ੍ਞਤ੍ਤਿਯਾ ਦੁਕ੍ਕਟਮੇਵ ਹੋਤੀਤਿ ਸਮ੍ਬਨ੍ਧੋ. ਕਸ੍ਮਾਤਿ ਆਹ ‘‘ਯਸ੍ਮਾ’’ਤਿਆਦਿ. ਅਥ ਯਥਾ ‘‘ਪਣੀਤਭੋਜਨਾਨੀ’’ਤਿ, ਏਵਂ ‘‘ਸਪ੍ਪਿਭਤ੍ਤ’’ਨ੍ਤਿ ਇਦਮ੍ਪਿ ਕਸ੍ਮਾ ਨ ਵਿਞ੍ਞਾਯਤੀਤਿ ਚੇ? ਅਨੇਕਨ੍ਤਿਕਤ੍ਤਾ. ਤਥਾ ਹਿ ‘‘ਪਣੀਤਭੋਜਨਾਨੀ’’ਤਿ ਵੁਤ੍ਤੇ ‘‘ਪਣੀਤਸਂਸਟ੍ਠਾਨਿ ਭੋਜਨਾਨਿ ਪਣੀਤਭੋਜਨਾਨੀ’’ਤਿ ਅਯਮਤ੍ਥੋ ਏਕਨ੍ਤਤੋ ਪਞ੍ਞਾਯਤਿ, ‘‘ਸਪ੍ਪਿਭਤ੍ਤ’’ਨ੍ਤਿ ਵੁਤ੍ਤੇ ਪਨ ‘‘ਸਪ੍ਪਿਮਯਂ ਭਤ੍ਤਂ ਸਪ੍ਪਿਭਤ੍ਤ’’ਨ੍ਤਿਪਿ ਵਿਞ੍ਞਾਯਮਾਨਤ੍ਤਾ ‘ਸਪ੍ਪਿਸਂਸਟ੍ਠਂ ਭਤ੍ਤਂ ਸਪ੍ਪਿਭਤ੍ਤ’’ਨ੍ਤਿ ਅਯਮਤ੍ਥੋ ਨ ਏਕਨ੍ਤਤੋ ਪਞ੍ਞਾਯਤਿ. ਏਸ ਨਯੋ ‘‘ਨਵਨੀਤਭਤ੍ਤਂ ਦੇਹੀ’’ਤਿਆਦੀਸੁਪਿ.

ਪੁਰਿਮਨਯੇਨੇਵਾਤਿ ‘‘ਭਤ੍ਤਂ ਦਤ੍ਵਾ ਸਪ੍ਪਿਂ ਕਤ੍ਵਾ ਭੁਞ੍ਜਾ’’ਤਿ ਪੁਰਿਮੇਨੇਵ ਨਯੇਨ. ਸਚੇ ਪਨ ‘‘ਸਪ੍ਪਿਨਾ’’ਤਿ ਵੁਤ੍ਤੇ ਕੇਵਲਂ ਸੇਸੇਸੁ ਨਵਨੀਤਾਦੀਸੁ ਅਞ੍ਞਤਰੇਨ ਦੇਤਿ, ਵਿਸਙ੍ਕੇਤਮੇਵ ਹੋਤਿ. ਅਨਾਪਤ੍ਤੀਤਿ ਵਿਸਙ੍ਕੇਤਤ੍ਤਾ ਸਬ੍ਬਾਹਿਯੇਵ ਆਪਤ੍ਤੀਹਿ ਅਨਾਪਤ੍ਤਿ. ‘‘ਕਿਞ੍ਚਾਪਿ ਅਨਾਪਤ੍ਤਿ, ਅਤ੍ਤਨੋ ਪਨ ਪਯੋਗੇਨ ਨਿਬ੍ਬਤ੍ਤਤ੍ਤਾ ਨ ਭੁਞ੍ਜਿਤਬ੍ਬ’’ਨ੍ਤਿ ਵਦਨ੍ਤਿ. ਕਪ੍ਪਿਯਸਪ੍ਪਿਨਾਤਿ ਕਪ੍ਪਿਯਮਂਸਸਪ੍ਪਿਨਾ. ਏਸ ਨਯੋ ਅਕਪ੍ਪਿਯਸਪ੍ਪਿਨਾਤਿ ਏਤ੍ਥਾਪਿ. ਕਪ੍ਪਿਯਾਕਪ੍ਪਿਯਤਾ ਹਿ ਮਂਸਾਨਂਯੇਵ, ਨ ਸਪ੍ਪਿਆਦੀਨਂ. ਠਪੇਤ੍ਵਾ ਏਕਂ ਮਨੁਸ੍ਸਵਸਾਤੇਲਂ ਸਬ੍ਬੇਸਂ ਖੀਰਦਧਿਸਪ੍ਪਿਨਵਨੀਤਵਸਾਤੇਲੇਸੁ ਅਕਪ੍ਪਿਯਂ ਨਾਮ ਨਤ੍ਥਿ.

ਪਰਿਭੋਗੇਪਿ ਦੁਕ੍ਕਟਮੇਵ ਇਧ ਅਨਧਿਪ੍ਪੇਤਤ੍ਤਾਤਿ ਅਧਿਪ੍ਪਾਯੋ. ਸਚੇ ਅਸਤਿ ਅਕਪ੍ਪਿਯਸਪ੍ਪਿਮ੍ਹਿ ਪੁਰਿਮਨਯੇਨੇਵ ਅਕਪ੍ਪਿਯਨਵਨੀਤਾਦੀਨਿ ਦੇਤਿ ‘‘ਸਪ੍ਪਿਂ ਕਤ੍ਵਾ ਭੁਞ੍ਜਾ’’ਤਿ, ਅਕਪ੍ਪਿਯਸਪ੍ਪਿਨਾਵ ਦਿਨ੍ਨਂ ਹੋਤਿ. ਯਥਾ ਚ ‘‘ਕਪ੍ਪਿਯਸਪ੍ਪਿਨਾ ਦੇਹੀ’’ਤਿ ਵੁਤ੍ਤੇ ਅਕਪ੍ਪਿਯਸਪ੍ਪਿਨਾ ਦੇਤਿ, ਵਿਸਙ੍ਕੇਤਂ, ਏਵਂ ‘‘‘ਅਕਪ੍ਪਿਯਸਪ੍ਪਿਨਾ’ਤਿ ਵੁਤ੍ਤੇ ਕਪ੍ਪਿਯਸਪ੍ਪਿਨਾ ਦੇਤੀ’’ਤਿ ਏਤ੍ਥਾਪਿ ਪਟਿਪਾਟਿਯਾ ਏਕਮੇਕਂ ਵਿਤ੍ਥਾਰੇਤ੍ਵਾ ਵੁਚ੍ਚਮਾਨੇਪਿ ਅਯਮੇਵਤ੍ਥੋ ਵਤ੍ਤਬ੍ਬੋ ਸਿਯਾ, ਸੋ ਚ ਸਙ੍ਖੇਪੇਨਪਿ ਸਕ੍ਕਾ ਵਿਞ੍ਞਾਤੁਨ੍ਤਿ ਵਿਤ੍ਥਾਰਨਯਂ ਹਿਤ੍ਵਾ ਇਮਿਨਾਵ ਨਯੇਨ ਸਬ੍ਬਪਦੇਸੁ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਵੁਤ੍ਤਂ. ਅਯਞ੍ਹੇਤ੍ਥ ਸਙ੍ਖੇਪਤ੍ਥੋ – ਯੇਨ ਯੇਨ ਵਿਞ੍ਞਤ੍ਤਿ ਹੋਤਿ, ਤਸ੍ਮਿਂ ਵਾ ਤਸ੍ਸ ਮੂਲੇ ਵਾ ਲਦ੍ਧੇ ਤਂ ਤਂ ਲਦ੍ਧਮੇਵ ਹੋਤਿ. ਸਚੇ ਪਨ ਅਞ੍ਞਂ ਪਾਲ਼ਿਯਾ ਆਗਤਂ ਵਾ ਅਨਾਗਤਂ ਵਾ ਦੇਤਿ, ਵਿਸਙ੍ਕੇਤਨ੍ਤਿ. ਨਾਨਾਟ੍ਠਾਨੇ ਵਾਤਿ ਤਸ੍ਮਿਂਯੇਵ ਘਰੇ ਸਪ੍ਪਿਂ, ਇਤਰਸ੍ਮਿਂ ਨਵਨੀਤਨ੍ਤਿਆਦਿਨਾ ਨਾਨਾਟ੍ਠਾਨੇ ਵਾ.

ਪਣੀਤਭੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਦਨ੍ਤਪੋਨਸਿਕ੍ਖਾਪਦਵਣ੍ਣਨਾ

ਕਾਯੇਨਾਤਿ ਹਤ੍ਥਾਦੀਸੁ ਯੇਨ ਕੇਨਚਿ ਸਰੀਰਾਵਯਵੇਨ, ਅਨ੍ਤਮਸੋ ਪਾਦਙ੍ਗੁਲਿਯਾਪਿ ਗਣ੍ਹਨ੍ਤੋ ਕਾਯੇਨ ਗਣ੍ਹਾਤਿ ਨਾਮਾਤਿ ਵੇਦਿਤਬ੍ਬੋ. ਦਾਨੇਪਿ ਏਸੇਵ ਨਯੋ. ਕਾਯਪ੍ਪਟਿਬਦ੍ਧੇਨਾਤਿ ਪਤ੍ਤਾਦੀਸੁ ਯੇਨ ਕੇਨਚਿ ਸਰੀਰਸਮ੍ਬਦ੍ਧੇਨ ਉਪਕਰਣੇਨ. ਦਾਨੇਪਿ ਏਸੇਵ ਨਯੋ. ਕਟਚ੍ਛੁਆਦੀਸੁ ਯੇਨ ਕੇਨਚਿ ਉਪਕਰਣੇਨ ਦਿਨ੍ਨਂ ਕਾਯਪ੍ਪਟਿਬਦ੍ਧੇਨ ਦਿਨ੍ਨਂਯੇਵ ਹੋਤਿ. ਅਞ੍ਞਤਰੇਨਾਤਿ ਕਾਯੇਨ ਵਾ ਕਾਯਪ੍ਪਟਿਬਦ੍ਧੇਨ ਵਾ ਨਿਸ੍ਸਗ੍ਗਿਯੇਨ ਵਾਤਿ ਅਤ੍ਥੋ. ਤਤ੍ਥ ਨਿਸ੍ਸਗ੍ਗਿਯੇਨਾਤਿ (ਪਾਚਿ. ਅਟ੍ਠ. ੨੬੫) ਕਾਯਤੋ ਚ ਕਾਯਪ੍ਪਟਿਬਦ੍ਧਤੋ ਚ ਮੋਚੇਤ੍ਵਾ ਹਤ੍ਥਪਾਸੇ ਠਿਤਸ੍ਸ ਕਾਯੇ ਵਾ ਕਾਯਪ੍ਪਟਿਬਦ੍ਧੇ ਵਾ ਪਾਤਿਯਮਾਨਞ੍ਹਿ ਨਿਸ੍ਸਗ੍ਗਿਯੇਨ ਪਯੋਗੇਨ ਦਿਨ੍ਨਂ ਨਾਮ ਹੋਤਿ. ਤਸ੍ਸਾਤਿ ਪਟਿਗ੍ਗਹਿਤਕਸ੍ਸ. ਵੁਤ੍ਤਵਿਪਲ੍ਲਾਸਵਸੇਨਾਤਿ ਵੁਤ੍ਤਸ੍ਸ ਪਟਿਪਕ੍ਖਵਸੇਨ. ਇਦਂ ਵੁਤ੍ਤਂ ਹੋਤਿ – ਯਂ ਕਾਯਕਾਯਪ੍ਪਟਿਬਦ੍ਧਨਿਸ੍ਸਗ੍ਗਿਯਾਨਂ ਅਞ੍ਞਤਰੇਨ ਦਿਯ੍ਯਮਾਨੇ ਕਾਯੇਨ ਵਾ ਕਾਯਪ੍ਪਟਿਬਦ੍ਧੇਨ ਵਾ ਗਣ੍ਹਾਤਿ, ਏਤਂ ਪਟਿਗ੍ਗਹਿਤਂ ਨਾਮਾਤਿ.

ਸਂਹਾਰਿਮੇਨਾਤਿ ਥਾਮਮਜ੍ਝਿਮੇਨ ਪੁਰਿਸੇਨ ਸਂਹਾਰਿਮੇਨ, ਇਮਿਨਾ ਅਸਂਹਾਰਿਮੇ ਫਲਕੇ ਵਾ ਪਾਸਾਣੇ ਵਾ ਪਟਿਗ੍ਗਹਣਂ ਨ ਰੁਹਤੀਤਿ ਦਸ੍ਸੇਤਿ. ਧਾਰੇਤੁਂ ਸਮਤ੍ਥੇਨਾਤਿ ਸਨ੍ਧਾਰੇਤੁਂ ਯੋਗ੍ਗੇਨ, ਇਮਿਨਾ ਸੁਖੁਮੇਸੁ ਤਿਨ੍ਤਿਣਿਕਾਦਿਪਣ੍ਣੇਸੁ ਪਟਿਗ੍ਗਹਣਂ ਨ ਰੁਹਤੀਤਿ ਦਸ੍ਸੇਤਿ. ਅਤਤ੍ਥਜਾਤਕਰੁਕ੍ਖਪਣ੍ਣੇਨਾਤਿ ਜਾਤਟ੍ਠਾਨਤੋ ਚੁਤੇਨ ਪਦੁਮਿਨਿਪਣ੍ਣਾਦਿਨਾ, ਇਮਿਨਾ ਪਨ ਮਹਨ੍ਤੇਪਿ ਤਤ੍ਥਜਾਤਕੇ ਪਦੁਮਿਨਿਪਣ੍ਣੇ ਵਾ ਕਿਂਸੁਕਪਣ੍ਣਾਦਿਮ੍ਹਿ ਵਾ ਪਟਿਗ੍ਗਹੇਤੁਂ ਨ ਵਟ੍ਟਤਿ. ਨ ਹਿ ਤਂ ਕਾਯਪ੍ਪਟਿਬਦ੍ਧਸਙ੍ਖਂ ਗਚ੍ਛਤੀਤਿ ਦਸ੍ਸੇਤਿ. ਯਥਾ ਚ ਤਤ੍ਥਜਾਤਕੇ, ਏਵਂ ਖਾਣੁਕੇ ਬਨ੍ਧਿਤ੍ਵਾ ਠਪਿਤਮਞ੍ਚਾਦਿਮ੍ਹਿਪਿ. ਨਨੁ ਪਟਿਬਦ੍ਧਪ੍ਪਟਿਬਦ੍ਧੇਨਾਪਿ ਪਤ੍ਤਾਧਾਰਾਦਿਨਾ ਪਟਿਗ੍ਗਣ੍ਹਨ੍ਤਸ੍ਸ ਪਟਿਗ੍ਗਹਣਂ ਰੁਹਤਿ, ਅਥ ਕਸ੍ਮਾ ਕਾਯਕਾਯਪ੍ਪਟਿਬਦ੍ਧੇਹਿਯੇਵ ਪਟਿਗ੍ਗਹਣਂ ਇਧ ਵੁਤ੍ਤਂ, ਨ ਪਟਿਬਦ੍ਧਪ੍ਪਟਿਬਦ੍ਧੇਨਾਪੀਤਿ ਆਹ ‘‘ਪਟਿਬਦ੍ਧਪ੍ਪਟਿਬਦ੍ਧਂ ਨਾਮ ਇਧ ਨਤ੍ਥੀ’’ਤਿ. ਕੇਚਿ ਪਨ ‘‘ਆਧਾਰਕੇਨ ਪਟਿਗ੍ਗਹਣਂ ਕਾਯਪ੍ਪਟਿਬਦ੍ਧਪ੍ਪਟਿਬਦ੍ਧੇਨ ਪਟਿਗ੍ਗਹਣਂ ਨਾਮ ਹੋਤਿ, ਤਸ੍ਮਾ ਨ ਵਟ੍ਟਤੀ’’ਤਿ ਵਦਨ੍ਤਿ, ਤਂ ਵਚਨਮਤ੍ਤਮੇਵ. ਅਤ੍ਥਤੋ ਪਨ ਸਬ੍ਬਮ੍ਪਿ ਤਂ ਕਾਯਪ੍ਪਟਿਬਦ੍ਧਮੇਵ ਹੋਤੀਤਿ ਦਸ੍ਸੇਤਿ.

ਅਕਲ੍ਲਕੋਤਿ ਗਿਲਾਨੋ. ਮੁਖੇਨ ਪਟਿਗ੍ਗਣ੍ਹਾਤੀਤਿ ਸਹਤ੍ਥੇਨ ਗਹੇਤ੍ਵਾ ਪਰਿਭੁਞ੍ਜਿਤੁਂ ਅਸਕ੍ਕੋਨ੍ਤੋ ਮੁਖੇਨ ਪਟਿਗ੍ਗਣ੍ਹਾਤਿ. ਅਭਿਹਟਭਾਜਨਤੋ ਪਤਿਤਰਜਮ੍ਪਿ ਵਟ੍ਟਤਿ ਅਭਿਹਟਤ੍ਤਾਤਿ ਅਧਿਪ੍ਪਾਹੋ.

ਤਸ੍ਮਿਂ ਠਤ੍ਵਾਤਿ ਤਾਦਿਸੇ ਹਤ੍ਥਪਾਸੇ ਠਤ੍ਵਾ. ਯਨ੍ਤਿ ਯਂ ਭਾਰਂ. ਮਜ੍ਝਿਮੋ ਪੁਰਿਸੋਤਿ ਥਾਮਮਜ੍ਝਿਮਪੁਰਿਸੋ. ਵਿਨਯੇ ਪਞ੍ਞਤ੍ਤਂ ਦੁਕ੍ਕਟਂ ਵਿਨਯਦੁਕ੍ਕਟਂ. ਤਂ ਅਨੁਪਸਮ੍ਪਨ੍ਨਸ੍ਸ ਦਤ੍ਵਾਤਿ ਪਿਣ੍ਡਾਯ ਚਰਿਤ੍ਵਾ ਵਿਹਾਰਂ ਵਾ ਆਸਨਸਾਲਂ ਵਾ ਗਨ੍ਤ੍ਵਾ ਤਂ ਭਿਕ੍ਖਂ ਅਨੁਪਸਮ੍ਪਨ੍ਨਸ੍ਸ ਦਤ੍ਵਾ, ਇਦਞ੍ਚ ਪੁਬ੍ਬਾਭੋਗਸ੍ਸ ਅਨੁਰੂਪਵਸੇਨ ਵੁਤ੍ਤਂ. ਯਸ੍ਮਾ ਪਨ ਤਂ ‘‘ਅਨੁਪਸਮ੍ਪਨ੍ਨਸ੍ਸ ਦਸ੍ਸਾਮੀ’’ਤਿ ਚਿਤ੍ਤੁਪ੍ਪਾਦਮਤ੍ਤੇਨ ਤਂਸਨ੍ਤਕਂ ਨਾਮ ਨ ਹੋਤਿ, ਤਸ੍ਮਾ ਵਿਨਾਪਿ ਤਸ੍ਸ ਦਾਨਾਦਿਂ ਪਟਿਗ੍ਗਹੇਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ.

ਅਸ੍ਸੁਖੇਲ਼ਸਿਙ੍ਘਾਣਿਕਾਦੀਸੂਤਿ ਏਤ੍ਥ ਅਸ੍ਸੁ ਨਾਮ ਅਕ੍ਖਿਜਲਂ. ਖੇਲ਼ੋ ਨਾਮ ਲਾਲਾ. ਸਿਙ੍ਘਾਣਿਕਾਤਿ ਅਨ੍ਤੋਸੀਸਤੋ ਪੂਤਿਸੇਮ੍ਹਭਾਵਂ ਆਪਨ੍ਨਂ ਮਤ੍ਥਲੁਙ੍ਗਂ ਗਲਿਤ੍ਵਾ ਤਾਲੁਮਤ੍ਥਕਵਿਵਰੇਨ ਓਤਰਿਤ੍ਵਾ ਨਾਸਾਪੁਟੇ ਪੂਰੇਤ੍ਵਾ ਠਿਤਂ ਵੁਚ੍ਚਤਿ, ਆਦਿਸਦ੍ਦੇਨ ਮੁਤ੍ਤਕਰੀਸਸੇਮ੍ਹਦਨ੍ਤਮਲਅਕ੍ਖਿਗੂਥਕਣ੍ਣਗੂਥਕਾਨਂ, ਸਰੀਰੇ ਉਟ੍ਠਿਤਲੋਣਸ੍ਸ ਚ ਗਹਣਂ. ਠਾਨਤੋਤਿ ਅਕ੍ਖਿਕੂਪਾਦਿਤੋ. ਅਨ੍ਤਰਾ ਚੇ ਗਣ੍ਹਾਤਿ, ਕਿਂ ਹੋਤੀਤਿ ਆਹ ‘‘ਉਗ੍ਗਹਿਤਕਂ ਨਾਮ ਹੋਤੀ’’ਤਿ, ਦੁਟ੍ਠੁ ਗਹਿਤਕਂ ਨਾਮ ਹੋਤੀਤਿ ਅਤ੍ਥੋ. ਫਲਿਨਿਨ੍ਤਿ ਫਲਵਨ੍ਤਂ. ਤਤ੍ਥਜਾਤਕਫਲਿਨਿਸਾਖਾਯ ਵਾਤਿ ਤਸ੍ਮਿਂ ਰੁਕ੍ਖੇ ਜਾਤਾਯ ਫਲਿਨਿਸਾਖਾਯ ਵਾ. ਦੁਰੁਪਚਿਣ੍ਣਦੁਕ੍ਕਟਨ੍ਤਿ ‘‘ਨ ਕਤ੍ਤਬ੍ਬ’’ਨ੍ਤਿ ਵਾਰਿਤਸ੍ਸ ਕਤਤ੍ਤਾ ਦੁਟ੍ਠੁ ਆਚਿਣ੍ਣਂ ਚਰਿਤਨ੍ਤਿ ਦੁਰੁਪਚਿਣ੍ਣਂ, ਤਸ੍ਮਿਂ ਦੁਕ੍ਕਟਂ ਦੁਰੁਪਚਿਣ੍ਣਦੁਕ੍ਕਟਞ੍ਚ ਆਪਜ੍ਜਤੀਤਿ ਅਤ੍ਥੋ.

ਆਹਰੀਯਤੀਤਿ ਆਹਾਰੋ, ਅਜ੍ਝੋਹਰਿਤਬ੍ਬਂ ਯਂ ਕਿਞ੍ਚਿ, ਇਧ ਪਨ ਚਤ੍ਤਾਰਿ ਕਾਲਿਕਾਨਿ ਅਧਿਪ੍ਪੇਤਾਨੀਤਿ ਆਹ ‘‘ਯਂ ਕਿਞ੍ਚੀ’’ਤਿਆਦਿ. ਤਤ੍ਥ ਅਰੁਣੁਗ੍ਗਮਨਤੋ ਯਾਵ ਠਿਤਮਜ੍ਝਨ੍ਹਿਕਾ ਭੁਞ੍ਜਿਤਬ੍ਬਤੋ ਯਾਵ ਕਾਲੋ ਅਸ੍ਸਾਤਿ ਯਾਵਕਾਲਿਕਂ. ਅਰੁਣੁਗ੍ਗਮਨਤੋ ਯਾਵ ਯਾਮਾਵਸਾਨਾ ਪਿਪਾਸਾਯ ਸਤਿ ਪਿਪਾਸਚ੍ਛੇਦਨਤ੍ਥਂ ਪਾਤਬ੍ਬਤੋ ਯਾਮੋ ਕਾਲੋ ਅਸ੍ਸਾਤਿ ਯਾਮਕਾਲਿਕਂ. ਯਾਵ ਸਤ੍ਤਾਹਂ ਨਿਦਹਿਤ੍ਵਾ ਪਰਿਭੁਞ੍ਜਿਤਬ੍ਬਤੋ ਸਤ੍ਤਾਹਂ ਕਾਲੋ ਅਸ੍ਸਾਤਿ ਸਤ੍ਤਾਹਕਾਲਿਕਂ. ਯਾਵਜੀਵਮ੍ਪਿ ਪਰਿਹਰਿਤ੍ਵਾ ਪਰਿਭੁਞ੍ਜਿਤਬ੍ਬਤੋ ਯਾਵ ਜੀਵਂ ਏਤਸ੍ਸਾਤਿ ਯਾਵਜੀਵਿਕਂ. ਤੇਨਾਹ ‘‘ਤਤ੍ਥਾ’’ਤਿਆਦਿ.

ਵਨਮੂਲਪਤ੍ਤਪੁਪ੍ਫਫਲਾਦੀਤਿ ਏਤ੍ਥ ਤਾਵ ਮੂਲਂ ਨਾਮ ਮੂਲਕਖਾਰਕਚਚ੍ਚੁਤਮ੍ਬਕਾਦੀਨਂ ਤੇਸੁ ਤੇਸੁ ਜਨਪਦੇਸੁ ਪਕਤਿਆਹਾਰਵਸੇਨ ਮਨੁਸ੍ਸਾਨਂ ਖਾਦਨੀਯਤ੍ਥਞ੍ਚੇਵ ਭੋਜਨੀਯਤ੍ਥਞ੍ਚ ਫਰਣਕਂ ਸੂਪੇਯ੍ਯਪਣ੍ਣਮੂਲਂ. ਪਤ੍ਤਂ ਨਾਮ ਮੂਲਕਖਾਰਕਚਚ੍ਚੁਤਮ੍ਬਕਾਦੀਨਂ ਤਾਦਿਸਂਯੇਵ ਪਤ੍ਤਂ. ਪੁਪ੍ਫਂ ਨਾਮ ਮੂਲਕਖਾਰਕਾਦੀਨਂ ਤਾਦਿਸਂਯੇਵ ਪੁਪ੍ਫਂ. ਫਲਂ ਨਾਮ ਪਨਸਲਬੁਜਾਦੀਨਂ ਤੇਸੁ ਤੇਸੁ ਜਨਪਦੇਸੁ ਪਕਤਿਆਹਾਰਵਸੇਨ ਮਨੁਸ੍ਸਾਨਂ ਖਾਦਨੀਯਤ੍ਥਞ੍ਚੇਵ ਭੋਜਨੀਯਤ੍ਥਞ੍ਚ ਫਰਣਕਂ ਫਲਂ. ਆਦਿਸਦ੍ਦੇਨ ਕਨ੍ਦਮੂਲਾਦੀਨਂ ਗਹਣਂ.

ਅਮ੍ਬਪਾਨਨ੍ਤਿ (ਮਹਾਵ. ਅਟ੍ਠ. ੩੦੦) ਆਮੇਹਿ ਵਾ ਪਕ੍ਕੇਹਿ ਵਾ ਅਮ੍ਬੇਹਿ ਕਤਪਾਨਂ. ਤਤ੍ਥ ਆਮੇਹਿ ਕਰੋਨ੍ਤੇਨ ਅਮ੍ਬਤਰੁਣਾਦੀਨਿ ਭਿਨ੍ਦਿਤ੍ਵਾ ਉਦਕੇ ਪਕ੍ਖਿਪਿਤ੍ਵਾ ਆਤਪੇ ਆਦਿਚ੍ਚਪਾਕੇਨ ਪਚਿਤ੍ਵਾ ਪਰਿਸ੍ਸਾਵੇਤ੍ਵਾ ਤਦਹੁਪਟਿਗ੍ਗਹਿਤੇਹਿ ਮਧੁਸਕ੍ਕਰਕਪ੍ਪੂਰਾਦੀਹਿ ਯੋਜੇਤ੍ਵਾ ਕਾਤਬ੍ਬਂ. ਏਵਂ ਕਤਂ ਪੁਰੇਭਤ੍ਤਮੇਵ ਕਪ੍ਪਤਿ. ਅਨੁਪਸਮ੍ਪਨ੍ਨੇਨ ਕਤਂ ਲਭਿਤ੍ਵਾ ਪਨ ਪੁਰੇਭਤ੍ਤਂ ਪਟਿਗ੍ਗਹਿਤਂ ਪੁਰੇਭਤ੍ਤਂ ਸਾਮਿਸਪਰਿਭੋਗੇਨਾਪਿ ਵਟ੍ਟਤਿ, ਪਚ੍ਛਾਭਤ੍ਤਂ ਨਿਰਾਮਿਸਪਰਿਭੋਗੇਨ ਯਾਵ ਅਰੁਣੁਗ੍ਗਮਨਾ ਵਟ੍ਟਤਿ. ਏਸ ਨਯੋ ਸਬ੍ਬਪਾਨੇਸੁ.

ਤੇਸੁ ਪਨ ਜਮ੍ਬੁਪਾਨਨ੍ਤਿ ਜਮ੍ਬੁਫਲੇਹਿ ਕਤਪਾਨਂ. ਚੋਚਪਾਨਨ੍ਤਿ ਅਟ੍ਠਿਕੇਹਿ ਕਦਲਿਫਲੇਹਿ ਕਤਪਾਨਂ. ਮੋਚਪਾਨਨ੍ਤਿ ਅਨਟ੍ਠਿਕੇਹਿ ਕਦਲਿਫਲੇਹਿ ਕਤਪਾਨਂ. ਮਧੁਕਪਾਨਨ੍ਤਿ ਮਧੁਕਾਨਂ ਜਾਤਿਰਸੇਨ ਕਤਪਾਨਂ. ਤਂ ਪਨ ਉਦਕਸਮ੍ਭਿਨ੍ਨਂ ਵਟ੍ਟਤਿ, ਸੁਦ੍ਧਂ ਨ ਵਟ੍ਟਤਿ. ਮੁਦ੍ਦਿਕਾਪਾਨਨ੍ਤਿ ਮੁਦ੍ਦਿਕਾ ਉਦਕੇ ਮਦ੍ਦਿਤ੍ਵਾ ਅਮ੍ਬਪਾਨਂ ਵਿਯ ਕਤਪਾਨਂ. ਸਾਲੂਕਪਾਨਨ੍ਤਿ ਰਤ੍ਤੁਪ੍ਪਲਨੀਲੁਪ੍ਪਲਾਦੀਨਂ ਸਾਲੂਕੇ ਮਦ੍ਦਿਤ੍ਵਾ ਕਤਪਾਨਂ. ਫਾਰੁਸਕਪਾਨਨ੍ਤਿ ਫਾਰੁਸਕੇਹਿ ਅਮ੍ਬਪਾਨਂ ਵਿਯ ਕਤਪਾਨਂ. ਇਮਿਨਾਵ ਨਯੇਨ ਵੇਤ੍ਤਪਾਨਾਦੀਨਿ ਵੇਦਿਤਬ੍ਬਾਨਿ. ਏਤਾਨਿ ਚ ਪਨ ਸਬ੍ਬਾਨਿ ਪਾਨਾਨਿ ਅਗ੍ਗਿਪਾਕਾਨਿ ਨ ਵਟ੍ਟਨ੍ਤਿ. ਤੇਨਾਹ ‘‘ਸੀਤੋਦਕੇਨਾ’’ਤਿਆਦਿ. ਅਵਸੇਸੇਸੁਪਿ ਅਨੁਞ੍ਞਾਤਫਲਪਤ੍ਤਪੁਪ੍ਫਰਸੇਸੂਤਿ ਧਞ੍ਞਫਲਪਕ੍ਕਸਾਕਮਧੁਕਪੁਪ੍ਫਰਸਤੋ ਅਵਸੇਸੇਸੁ ‘‘ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬਂ ਫਲਰਸਂ ਠਪੇਤ੍ਵਾ ਧਞ੍ਞਫਲਰਸ’’ਨ੍ਤਿਆਦਿਨਾ (ਮਹਾਵ. ੩੦੦) ਅਨੁਞ੍ਞਾਤਕੇਸੁ ਫਲਪਤ੍ਤਪੁਪ੍ਫਰਸੇਸੁਪਿ.

ਖਾਦਨੀਯਤ੍ਥਨ੍ਤਿ ਖਾਦਨੀਯੇਨ ਕਤ੍ਤਬ੍ਬਕਿਚ੍ਚਂ. ਨੇਵ ਫਰਤੀਤਿ ਨ ਨਿਪ੍ਫਾਦੇਤਿ. ਅਨਾਹਾਰੇਪਿ ਉਦਕੇ ਆਹਾਰਸਞ੍ਞਾਯਾਤਿ ‘‘ਆਹਾਰਂ ਆਹਰੇਯ੍ਯਾ’’ਤਿ ਪਦਸ੍ਸ ਪਦਭਾਜਨੇ (ਪਾਚਿ. ੨੬੫) ਵੁਤ੍ਤਮਤ੍ਥਂ ਸਮ੍ਮਾ ਅਸਲ੍ਲਕ੍ਖੇਤ੍ਵਾ ‘‘ਆਹਰੀਯਤੀਤਿ ਆਹਾਰੋ’’ਤਿ ਅਨਾਹਾਰੇਪਿ ਉਦਕੇ ਆਹਾਰਸਞ੍ਞਾਯ ਕੁਕ੍ਕੁਚ੍ਚਾਯਨ੍ਤਾਨਂ. ਦਨ੍ਤਪੋਨੇ ਚ ‘‘ਮੁਖਦ੍ਵਾਰਂ ਆਹਟਂ ਇਦ’’ਨ੍ਤਿ ਸਞ੍ਞਾਯਾਤਿ ਮੁਖਦ੍ਵਾਰਂ ਅਨਾਹਟਮ੍ਪਿ ਦਨ੍ਤਪੋਨਂ ‘‘ਮੁਖਦ੍ਵਾਰਂ ਆਹਟਂ ਇਦਂ ਦਨ੍ਤਪੋਨ’’ਨ੍ਤਿ ਵਿਪਲ੍ਲਤ੍ਥਸਞ੍ਞਾਯ ਕੁਕ੍ਕੁਚ੍ਚਾਯਨ੍ਤਾਨਂ. ਯਥਾਸੁਖਂ ਪਾਤੁਨ੍ਤਿ ਪਟਿਗ੍ਗਹੇਤ੍ਵਾ ਵਾ ਅਪ੍ਪਟਿਗ੍ਗਹੇਤ੍ਵਾ ਵਾ ਯਥਾਕਾਮਂ ਪਾਤੁਂ. ਦਨ੍ਤਪੋਨਪਰਿਭੋਗੇਨਾਤਿ ਦਨ੍ਤਕਟ੍ਠਪਰਿਭੋਗੇਨ, ਦਨ੍ਤਧੋਵਨਾਦਿਨਾਤਿ ਅਤ੍ਥੋ, ਇਮਿਨਾ ਤਸ੍ਸ ਪਨ ਰਸਂ ਗਿਲਿਤੁਂ ਨ ਵਟ੍ਟਤੀਤਿ ਦਸ੍ਸੇਤਿ.

ਚਤ੍ਤਾਰਿ ਮਹਾਵਿਕਟਾਨੀਤਿ ਗੂਥਂ, ਮੁਤ੍ਤਂ, ਛਾਰਿਕਾ, ਮਤ੍ਤਿਕਾ (ਮਹਾਵ. ੨੬੮) ਚ ‘‘ਆਸਯਾਦਿਵਸੇਨ ਵਿਰੂਪਾਨਿ ਜਾਤਾਨੀ’’ਤਿ ਕਤ੍ਵਾ ਵਿਕਟਾਨੀਤਿ ਵਾ ਅਪਕਤਿਭੋਜਨਤ੍ਤਾ ਵਿਕਟਾਨਿ ‘‘ਵਿਰੂਪਾਨਿ ਜਾਤਾਨੀ’’ਤਿ ਵਾ ਅਤ੍ਥੋ. ਸਤਿ ਪਚ੍ਚਯੇਤਿ ਕਾਰਣੇ ਸਤਿ, ਸਪ੍ਪਦਟ੍ਠੇਤਿ ਅਤ੍ਥੋ. ਧੂਮਾਦਿਅਬ੍ਬੋਹਾਰਿਕਾਭਾਵੋਤਿ ਧੂਮਪੁਪ੍ਫਗਨ੍ਧਦਨ੍ਤਖਯਾਦਿਅਬ੍ਬੋਹਾਰਿਕਾਭਾਵੋ.

ਦਨ੍ਤਪੋਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਭੋਜਨਵਗ੍ਗੋ ਚਤੁਤ੍ਥੋ.