੯. ਦੁਟ੍ਠੁਲ੍ਲਾਰੋਚਨਸਿਕ੍ਖਾਪਦਵਣ੍ਣਨਾ

ਦ੍ਵਿਨ੍ਨਂ ‘ਆਪਤ੍ਤਿਕ੍ਖਨ੍ਧਾਨਨ੍ਤਿ ਪਾਰਾਜਿਕਸਙ੍ਘਾਦਿਸੇਸਸਙ੍ਖਾਤਾਨਂ ਦ੍ਵਿਨ੍ਨਂ ਆਪਤ੍ਤਿਕ੍ਖਨ੍ਧਾਨਂ. ਆਯਤਿਂ ਸਂਵਰਤ੍ਥਾਯਾਤਿ ‘‘ਏਵਮੇਸ ਪਰੇਸੁ ਹਿਰੋਤ੍ਤਪ੍ਪੇਨਾਪਿ ਆਯਤਿਂ ਸਂਵਰਂ ਆਪਜ੍ਜਿਸ੍ਸਤੀ’’ਤਿ ਆਯਤਿਂ ਸਂਵਰਤ੍ਥਾਯ. ਆਪਤ੍ਤੀਨਞ੍ਚ ਕੁਲਾਨਞ੍ਚ ਪਰਿਯਨ੍ਤਂ ਕਤ੍ਵਾ ਵਾ ਅਕਤ੍ਵਾ ਵਾਤਿ ‘‘ਏਤ੍ਤਕਾ ਆਪਤ੍ਤਿਯੋ ਆਰੋਚੇਤਬ੍ਬਾ, ਏਤ੍ਤਕੇਸੁ ਕੁਲੇਸੁ ਆਰੋਚੇਤਬ੍ਬਾ’’ਤਿ ਏਵਂ ਆਪਤ੍ਤੀਨਞ੍ਚ ਕੁਲਾਨਞ੍ਚ ਪਰਿਯਨ੍ਤਂ ਕਤ੍ਵਾ ਵਾ ਅਕਤ੍ਵਾ ਵਾ.

ਅਦੁਟ੍ਠੁਲ੍ਲਾਯਾਤਿ ਪਾਰਾਜਿਕਸਙ੍ਘਾਦਿਸੇਸਂ ਠਪੇਤ੍ਵਾ ਅਵਸੇਸਪਞ੍ਚਾਪਤ੍ਤਿਕ੍ਖਨ੍ਧਸਙ੍ਖਾਤਾਯ ਅਦੁਟ੍ਠੁਲ੍ਲਾਯ ਆਪਤ੍ਤਿਯਾ. ਅਵਸੇਸੇ ਛ ਆਪਤ੍ਤਿਕ੍ਖਨ੍ਧੇਤਿ ਸਙ੍ਘਾਦਿਸੇਸਵਜ੍ਜਿਤੇ ਸੇਸੇ ਛ ਆਪਤ੍ਤਿਕ੍ਖਨ੍ਧੇ. ਪੁਰਿਮਪਞ੍ਚਸਿਕ੍ਖਾਪਦਵੀਤਿਕ੍ਕਮਸਙ੍ਖਾਤਂ ਦੁਟ੍ਠੁਲ੍ਲਨ੍ਤਿ ਪਾਣਾਤਿਪਾਤਵੇਰਮਣਿਆਦਿਕਸ੍ਸ ਆਦਿਤੋ ਪਞ੍ਚਸਿਕ੍ਖਾਪਦਸ੍ਸ ਵੀਤਿਕ੍ਕਮਸਙ੍ਖਾਤਂ ਦੁਟ੍ਠੁਲ੍ਲਂ. ਇਤਰਂ ਅਦੁਟ੍ਠੁਲ੍ਲਂ ਵਾ ਅਜ੍ਝਾਚਾਰਨ੍ਤਿ ਤਤੋ ਅਞ੍ਞਂ ਵਿਕਾਲਭੋਜਨਾਦਿਕਪਞ੍ਚਕਂ, ਸੁਕ੍ਕਵਿਸਟ੍ਠਿਕਾਯਸਂਸਗ੍ਗਦੁਟ੍ਠੁਲ੍ਲਅਤ੍ਤਕਾਮਞ੍ਚੇਤਿ ਅਦੁਟ੍ਠੁਲ੍ਲਂ ਵਾ ਅਜ੍ਝਾਚਾਰਂ. ਵਤ੍ਥੁਮਤ੍ਤਨ੍ਤਿ ‘‘ਅਯਂ ਸੁਕ੍ਕਵਿਸ੍ਸਟ੍ਠਿਂ ਆਪਨ੍ਨੋ, ਦੁਟ੍ਠੁਲ੍ਲਂ, ਅਤ੍ਤਕਾਮਂ, ਕਾਯਸਂਸਗ੍ਗਂ ਆਪਨ੍ਨੋ’’ਤਿ ਏਵਂ ਵਤ੍ਥੁਮਤ੍ਤਂ ਵਾ ਆਰੋਚੇਨ੍ਤਸ੍ਸ. ਆਪਤ੍ਤਿਮਤ੍ਤਨ੍ਤਿ ‘‘ਅਯਂ ਪਾਰਾਜਿਕਂ ਆਪਨ੍ਨੋ, ਸਙ੍ਘਾਦਿਸੇਸਂ, ਥੁਲ੍ਲਚ੍ਚਯਂ, ਪਾਚਿਤ੍ਤਿਯਂ, ਪਾਟਿਦੇਸਨੀਯਂ, ਦੁਕ੍ਕਟਂ, ਦੁਬ੍ਭਾਸਿਤਂ ਆਪਨ੍ਨੋ’’ਤਿ ਏਵਂ ਆਪਤ੍ਤਿਮਤ੍ਤਂ ਵਾ ਆਰੋਚੇਨ੍ਤਸ੍ਸ. ਵੁਤ੍ਤਲਕ੍ਖਣਸ੍ਸਾਤਿ ‘‘ਪਾਰਾਜਿਕਂ ਅਨਜ੍ਝਾਪਨ੍ਨਸ੍ਸਾ’’ਤਿ ਕਙ੍ਖਾ. ਅਟ੍ਠ. ਦੁਟ੍ਠੁਲ੍ਲਾਰੋਚਨਸਿਕ੍ਖਾਪਦਵਣ੍ਣਨਾ) ਏਵਂ ਵੁਤ੍ਤਲਕ੍ਖਣਸ੍ਸ. ਸਵਤ੍ਥੁਕੋਤਿ ਵਤ੍ਥੁਨਾ ਸਹ ਘਟਿਤੋ.

ਦੁਟ੍ਠੁਲ੍ਲਾਰੋਚਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.