੬. ਏਲ਼ਕਲੋਮਸਿਕ੍ਖਾਪਦਵਣ੍ਣਨਾ

ਅਦ੍ਧਾਨਮਗ੍ਗਪ੍ਪਟਿਪਨ੍ਨਸ੍ਸਾਤਿ ਅਦ੍ਧਾਨਮੇਵ ਮਗ੍ਗੋ ਅਦ੍ਧਾਨਮਗ੍ਗੋ, ਤਂ ਪਟਿਪਨ੍ਨਸ੍ਸਾਤਿ ਅਤ੍ਥੋ. ਤੇਨਾਹ ‘‘ਅਦ੍ਧਾਨਸਙ੍ਖਾਤ’’ਨ੍ਤਿਆਦਿ. ਅਦ੍ਧਾਨਸਦ੍ਦੇਨ ਵਿਸੇਸਿਤਤ੍ਤਾ ਪਨ ‘‘ਦੀਘਮਗ੍ਗ’’ਨ੍ਤਿ ਵੁਤ੍ਤਂ. ਅਦ੍ਧਾਨਗਮਨਸਮਯਸ੍ਸ ਵਿਭਙ੍ਗੇ ‘‘ਅਦ੍ਧਯੋਜਨਂ ਗਚ੍ਛਿਸ੍ਸਾਮੀਤਿ ਭੁਞ੍ਜਿਤਬ੍ਬ’’ਨ੍ਤਿਆਦਿਵਚਨਤੋ (ਪਾਚਿ. ੨੧੮) ਅਦ੍ਧਯੋਜਨਮ੍ਪਿ ਅਦ੍ਧਾਨਮਗ੍ਗੋ ਹੋਤਿ. ਏਲ਼ਕਲੋਮਾਨਿ ਚੇਤਾਨਿ ਅਦ੍ਧਾਨਮਗ੍ਗਤੋ ਅਞ੍ਞਤ੍ਥ ਉਪ੍ਪਨ੍ਨਾਨਿ ਪਟਿਗ੍ਗਹੇਤੁਂ ਨ ਵਟ੍ਟਨ੍ਤਿ, ਯਤੋ ‘‘ਅਦ੍ਧਾਨਮਗ੍ਗਪ੍ਪਟਿਪਨ੍ਨਸ੍ਸਾ’’ਤਿਆਦਿਕਂ ਵੁਤ੍ਤਨ੍ਤਿ ਅਨੁਯੋਗਂ ਸਨ੍ਧਾਯਾਹ ‘‘ਸਬ੍ਬਞ੍ਚੇਤ’’ਨ੍ਤਿਆਦਿ. ਤਤ੍ਥ ਸਬ੍ਬਞ੍ਚੇਤਨ੍ਤਿ ‘‘ਭਿਕ੍ਖੁਨੋ ਪਨੇਵ ਅਦ੍ਧਾਨਮਗ੍ਗਪ੍ਪਟਿਪਨ੍ਨਸ੍ਸ ਏਲ਼ਕਲੋਮਾਨਿ ਉਪ੍ਪਜ੍ਜੇਯ੍ਯੁ’’ਨ੍ਤਿਆਦਿਕਂ ਏਤਂ ਸਬ੍ਬਂ. ਵਤ੍ਥੁਮਤ੍ਤਦੀਪਨਮੇਵਾਤਿ ‘‘ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਕੋਸਲੇਸੁ ਜਨਪਦੇ ਸਾਵਤ੍ਥਿਂ ਗਚ੍ਛਨ੍ਤਸ੍ਸ ਅਨ੍ਤਰਾਮਗ੍ਗੇ ਏਲ਼ਕਲੋਮਾਨਿ ਉਪ੍ਪਜ੍ਜਿਂਸੂ’’ਤਿਆਦਿਕਸ੍ਸ (ਪਾਰਾ. ੫੭੧) ਵਤ੍ਥੁਮਤ੍ਤਸ੍ਸ ਦੀਪਨਮੇਵ. ਯਤ੍ਥ ਕਤ੍ਥਚੀਤਿ ਅਦ੍ਧਾਨਤੋ ਅਞ੍ਞਤ੍ਥਾਪਿ ਯਤ੍ਥ ਕਤ੍ਥਚਿ ਠਾਨੇਸੁ. ਸਹਤ੍ਥਾਤਿ ਕਰਣਤ੍ਥੇ ਨਿਸ੍ਸਕ੍ਕਵਚਨਨ੍ਤਿ ਆਹ ‘‘ਸਹਤ੍ਥੇਨਾ’’ਤਿ. ਲਕ੍ਖਣਵਚਨਞ੍ਚੇਤਂ, ਤਸ੍ਮਾ ਯੇਨ ਕੇਨਚਿ ਸਰੀਰਾਵਯਵੇਨਾਤਿ ਅਤ੍ਥੋ ਦਟ੍ਠਬ੍ਬੋ. ਤੇਨਾਹ ‘‘ਅਤ੍ਤਨਾ ਹਰਿਤਬ੍ਬਾਨੀਤਿ ਅਤ੍ਥੋ’’ਤਿ. ਅਸਨ੍ਤੇ ਹਾਰਕੇਤਿ ਏਤ੍ਥ ਪਦਾਨਂ ਅਨ੍ਤੋਗਧਾਵਧਾਰਣਤੋ ਅਵਧਾਰਣਤ੍ਥੋ ਲਬ੍ਭਤੀਤਿ ਆਹ ‘‘ਅਸਨ੍ਤੇਯੇਵਾ’’ਤਿਆਦਿ.

ਏਤ੍ਥ ਚ ‘‘ਇਮਾਨਿ ਮੇ, ਭਨ੍ਤੇ, ਏਲ਼ਕਲੋਮਾਨਿ ਤਿਯੋਜਨਂ ਅਤਿਕ੍ਕਾਮਿਤਾਨਿ ਨਿਸ੍ਸਗ੍ਗਿਯਾਨੀ’’ਤਿਆਦਿਨਾ (ਪਾਰਾ. ੫੭੩) ਨਿਸ੍ਸਜ੍ਜਨਵਿਧਾਨਂ ਵੇਦਿਤਬ੍ਬਂ. ਤਿਕਪਾਚਿਤ੍ਤਿਯਨ੍ਤਿ ਅਤਿਰੇਕਤਿਯੋਜਨੇ ਅਤਿਰੇਕਤਿਯੋਜਨਸਞ੍ਞਿਵੇਮਤਿਕਊਨਕਸਞ੍ਞੀਨਂ ਵਸੇਨ ਤੀਣਿ ਪਾਚਿਤ੍ਤਿਯਾਨਿ. ਵਾਸਾਧਿਪ੍ਪਾਯੇਨ ਗਨ੍ਤ੍ਵਾ ਤਤੋ ਪਰਂ ਹਰਣੇਤਿ ਯਤ੍ਥ ਗਤੋ, ਤਤ੍ਥ ਉਦ੍ਦੇਸਪਰਿਪੁਚ੍ਛਾਦੀਨਂ ਵਾ ਪਚ੍ਚਯਾਦੀਨਂ ਵਾ ਅਲਾਭੇਨ ਤਤੋ ਪਰਂ ਅਞ੍ਞਤ੍ਥ ਹਰਣੇ, ਤਤੋਪਿ ਅਞ੍ਞਤ੍ਥਾਤਿ ਏਵਂ ਯੋਜਨਸਤਮ੍ਪਿ ਹਰਣੇ ਅਨਾਪਤ੍ਤਿ. ਅਚ੍ਛਿਨ੍ਨਂ ਵਾ ਨਿਸ੍ਸਟ੍ਠਂ ਵਾਤਿ ਚੋਰੇਹਿ ਅਚ੍ਛਿਨ੍ਨਂ ਵਾ ਵਿਨਯਕਮ੍ਮਕਤਂ ਵਾ. ਕਤਭਣ੍ਡਨ੍ਤਿ ਕਤਂ ਭਣ੍ਡਂ ਕਮ੍ਬਲਕੋਜਵਸਨ੍ਥਤਾਦਿ ਯਂ ਕਿਞ੍ਚਿ ਅਨ੍ਤਮਸੋ ਸੁਤ੍ਤਕੇਨ ਬਦ੍ਧਮਤ੍ਤਮ੍ਪਿ. ਤੇਨਾਹ ‘‘ਅਨ੍ਤਮਸੋ’’ਤਿਆਦਿ. ਯੋ ਪਨ ਤਨੁਕਪਤ੍ਤਤ੍ਥਵਿਕਨ੍ਤਰੇ (ਪਾਰਾ. ਅਟ੍ਠ. ੨.੫੭੫) ਵਾ ਆਯੋਗਅਂਸਬਦ੍ਧਕਕਾਯਬਨ੍ਧਨਾਦੀਨਂ ਅਨ੍ਤਰੇਸੁ ਵਾ ਪਿਪ੍ਫਲਿਕਾਦੀਨਂ ਮਲਰਕ੍ਖਣਤ੍ਥਂ ਸਿਪਾਟਿਕਾਯਂ ਵਾ ਅਨ੍ਤਮਸੋ ਵਾਤਾਬਾਧਿਕੋ ਕਣ੍ਣਚ੍ਛਿਦ੍ਦੇਪਿ ਲੋਮਾਨਿ ਪਕ੍ਖਿਪਿਤ੍ਵਾ ਗਚ੍ਛਤਿ, ਆਪਤ੍ਤਿਯੇਵ. ਸੁਤ੍ਤਕੇਨ ਪਨ ਬਨ੍ਧਿਤ੍ਵਾ ਪਕ੍ਖਿਤ੍ਤਂ ਕਤਭਣ੍ਡਟ੍ਠਾਨੇ ਤਿਟ੍ਠਤਿ, ਵੇਣਿਂ ਕਤ੍ਵਾ ਹਰਤਿ, ਇਦਂ ਨਿਧਾਨਮੁਖਂ ਨਾਮ, ਆਪਤ੍ਤਿਯੇਵ.

ਪਠਮਪ੍ਪਟਿਲਾਭੋਤਿ ਅਤ੍ਤਨੋ ਅਤ੍ਥਾਯ ਏਲ਼ਕਲੋਮਾਨਂ ਪਠਮੁਪ੍ਪਤ੍ਤਿ. ਏਤੇਨ ਅਚ੍ਛਿਨ੍ਨਨਿਸ੍ਸਟ੍ਠਪ੍ਪਟਿਲਦ੍ਧਾਨਂ ਪਟਿਕ੍ਖੇਪੋ. ਅਞ੍ਞਸ੍ਸ ਅਜਾਨਨ੍ਤਸ੍ਸ ਯਾਨੇ ਪਕ੍ਖਿਪਿਤ੍ਵਾਤਿ (ਪਾਰਾ. ਅਟ੍ਠ. ੨.੫੭੨) ਗਚ੍ਛਨ੍ਤੇ ਰਥਾਦਿਕੇ ਵਾ ਹਤ੍ਥਿਪਿਟ੍ਠਿਆਦੀਸੁ ਵਾ ਸਾਮਿਕਸ੍ਸ ਅਜਾਨਨ੍ਤਸ੍ਸੇਵ ‘‘ਹਰਿਸ੍ਸਤੀ’’ਤਿ ਪਕ੍ਖਿਪਿਤ੍ਵਾ. ਅਗਚ੍ਛਨ੍ਤੇਪਿ ਏਸੇਵ ਨਯੋ. ਸਚੇ ਪਨ ਅਗਚ੍ਛਨ੍ਤੇ ਰਥਾਦਿਮ੍ਹਿ ਵਾ ਹਤ੍ਥਿਪਿਟ੍ਠਿਆਦੀਸੁ ਵਾ ਠਪੇਤ੍ਵਾ ਆਰੋਹਿਤ੍ਵਾ ਸਾਰੇਤਿ, ਹੇਟ੍ਠਾ ਵਾ ਗਚ੍ਛਨ੍ਤੋ ਚੋਦੇਤਿ, ਪਕ੍ਕੋਸਨ੍ਤੋ ਵਾ ਅਨੁਬਨ੍ਧਾਪੇਤਿ, ‘‘ਅਞ੍ਞਂ ਹਰਾਪੇਤੀ’’ਤਿ (ਪਾਰਾ. ੫੭੫) ਵਚਨਤੋ ਅਨਾਪਤ੍ਤਿ. ਏਤ੍ਥ ਚ ‘‘ਅਜਾਨਨ੍ਤਸ੍ਸ ਯਾਨੇ’’ਤਿ ਇਮਿਨਾ ਜਾਨਨ੍ਤਸ੍ਸ ਚੇ ਯਾਨੇ ਪਕ੍ਖਿਪਤਿ, ਅਞ੍ਞਂ ਹਰਾਪੇਤਿ ਨਾਮਾਤਿ ਦਸ੍ਸੇਤਿ. ਅਹਰਣਪਚ੍ਚਾਹਰਣਨ੍ਤਿ ਹਰਣਪਚ੍ਚਾਹਰਣਾਨਮਭਾਵੋ.

ਏਲ਼ਕਲੋਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.