ਨਿਸ੍ਸਗ੍ਗਿਯਕਣ੍ਡਂ

੧. ਚੀਵਰਵਗ੍ਗੋ

੧. ਕਥਿਨਸਿਕ੍ਖਾਪਦਵਣ੍ਣਨਾ

ਨਿਟ੍ਠਿਤਚੀਵਰਸ੍ਮਿਨ੍ਤਿ (ਪਾਰਾ. ਅਟ੍ਠ. ੨.੪੬੨-੪੬੩) ਨਿਟ੍ਠਿਤਞ੍ਚ ਤਂ ਚੀਵਰਞ੍ਚਾਤਿ ਨਿਟ੍ਠਿਤਚੀਵਰਂ, ਨਿਟ੍ਠਿਤੇ ਆਨਿਸਂਸਮੂਲਕੇ ਚੀਵਰੇ, ਪਚ੍ਚਾਸਾਚੀਵਰੇ ਚਾਤਿ ਅਤ੍ਥੋ. ਯਸ੍ਮਾ ਪਨ ਤਂ ਚੀਵਰਂ ਕਰਣੇਨਪਿ ਨਿਟ੍ਠਿਤਂ ਹੋਤਿ ਨਾਸਨਾਦੀਹਿਪਿ, ਤਸ੍ਮਾ ‘‘ਸੂਚਿਕਮ੍ਮਪਰਿਯੋਸਾਨੇਨ ਵਾ’’ਤਿਆਦਿ ਵੁਤ੍ਤਂ. ਤਤ੍ਥ ਯਂ ਕਿਞ੍ਚਿ ਸੂਚਿਯਾ ਕਤ੍ਤਬ੍ਬਂ ਪਾਸਕਪਟ੍ਟਗਣ੍ਠਿਕਪਟ੍ਟਪਰਿਯੋਸਾਨਕਮ੍ਮਂ, ਤਂ ਸੂਚਿਕਮ੍ਮਪਰਿਯੋਸਾਨਂ ਨਾਮ, ਤੇਨ. ਨਟ੍ਠਨ੍ਤਿ ਚੋਰਾਦੀਹਿ ਹਟਂ. ਏਤਮ੍ਪਿ ਹਿ ਕਰਣਪਲਿਬੋਧਸ੍ਸ ਨਿਟ੍ਠਿਤਤ੍ਤਾ ‘‘ਨਿਟ੍ਠਿਤ’’ਨ੍ਤਿ ਵੁਚ੍ਚਤਿ. ਵਿਨਟ੍ਠਨ੍ਤਿ ਉਪਚਿਕਾਦੀਹਿ ਖਾਦਿਤਂ. ਦਡ੍ਢਨ੍ਤਿ ਅਗ੍ਗਿਨਾ ਦਡ੍ਢਂ. ਚੀਵਰਾਸਾ ਵਾ ਉਪਚ੍ਛਿਨ੍ਨਾਤਿ ‘‘ਅਸੁਕਸ੍ਮਿਂ ਨਾਮ ਕੁਲੇ ਚੀਵਰਂ ਲਭਿਸ੍ਸਾਮੀ’’ਤਿ ਯਾ ਚੀਵਰਾਸਾ ਉਪ੍ਪਨ੍ਨਾ ਹੋਤਿ, ਸਾ ਉਪਚ੍ਛਿਨ੍ਨਾ. ਏਤੇਸਮ੍ਪਿ ਕਰਣਪਲਿਬੋਧਸ੍ਸੇਵ ਨਿਟ੍ਠਿਤਤ੍ਤਾ ਨਿਟ੍ਠਿਤਭਾਵੋ ਵੇਦਿਤਬ੍ਬੋ. ਤੇਨਾਹ ‘‘ਇਮੇਸੁ ਵਾ’’ਤਿਆਦਿ. ਏਤੇਨ ਚੀਵਰਪਲਿਬੋਧਾਭਾਵੋ ਵੁਤ੍ਤੋ. ਤੇਨਾਹ ‘‘ਚੀਵਰਸ੍ਸ ਕਰਣਪਲਿਬੋਧੇ ਉਪਚ੍ਛਿਨ੍ਨੇਤਿ ਅਤ੍ਥੋ’’ਤਿ. ਕਥਮੇਤਂ ਵਿਞ੍ਞਾਯਤੀਤਿ ਆਹ ‘‘ਅਤ੍ਥਤਕਥਿਨਸ੍ਸ ਹੀ’’ਤਿਆਦਿ. ਪਞ੍ਚਾਨਿਸਂਸੇ ਅਞ੍ਞਤ੍ਥ ਗਨ੍ਤੁਂ ਅਦਤ੍ਵਾ ਸਙ੍ਗਣ੍ਹਨਟ੍ਠੇਨ ਕਥਿਨਂ, ਥਿਰਨ੍ਤਿ ਅਤ੍ਥੋ, ਅਤ੍ਥਤਂ ਕਥਿਨਂ ਯੇਨ ਸੋ ਅਤ੍ਥਤਕਥਿਨੋ, ਤਸ੍ਸ ਅਤ੍ਥਤਕਥਿਨਸ੍ਸ. ਹੀਤਿ ਕਾਰਣਤ੍ਥੇ ਨਿਪਾਤੋ. ਤਾਵ ਕਥਿਨਾਨਿਸਂਸਂ ਲਭਤੀਤਿ ਏਤ੍ਥ ਯੋ ਅਤ੍ਥਤਕਥਿਨੋ ਭਿਕ੍ਖੂਤਿ ਅਜ੍ਝਾਹਰਿਤਬ੍ਬਂ, ਤਾਵ ਸੋ ਅਤ੍ਥਤਕਥਿਨੋ ਭਿਕ੍ਖੂਤਿ ਵੇਦਿਤਬ੍ਬੋ, ਅਨਾਮਨ੍ਤਚਾਰਾਦਿਕਂ ਕਥਿਨਾਨਿਸਂਸਂ ਲਭਤੀਤਿ ਅਤ੍ਥੋ. ‘‘ਅਤ੍ਥਤਕਥਿਨਸ੍ਸ ਭਿਕ੍ਖੁਨੋ’’ਤਿ ਇਦਂ ਵਾ ‘‘ਅਤ੍ਥਤਕਥਿਨੋ ਭਿਕ੍ਖੂ’’ਤਿ ਵਿਭਤ੍ਤਿਵਿਪਰਿਣਾਮਂ ਕਤ੍ਵਾ ਯੋਜੇਤਬ੍ਬਂ. ਇਦਂ ਵੁਤ੍ਤਂ ਹੋਤਿ – ਚੀਵਰਪਲਿਬੋਧੋ ਆਵਾਸਪਲਿਬੋਧੋਤਿ ਦ੍ਵੇ ਪਲਿਬੋਧਾ. ਤੇਸੁ ਏਕਪਲਿਬੋਧੇਪਿ ਸਤਿ ਯਸ੍ਮਾ ਅਨਾਮਨ੍ਤਚਾਰਾਦਿਕਂ ਆਨਿਸਂਸਂ ਲਭਤਿ, ਨਾਸਤਿ. ਕਸ੍ਮਾ? ‘‘ਨਿਟ੍ਠਿਤਚੀਵਰਸ੍ਮਿ’’ਨ੍ਤਿ ਏਤਸ੍ਸ ਚੀਵਰਸ੍ਸ ਕਰਣਪਲਿਬੋਧੇ ਉਪਚ੍ਛਿਨ੍ਨੇਤਿ ਅਯਮਤ੍ਥੋ ਵਿਞ੍ਞਾਯਤੀਤਿ. ਸਙ੍ਘਸ੍ਸਾਤਿ ਸਙ੍ਘੇਨ. ਕਤ੍ਤਰਿ ਚੇਤਂ ਸਾਮਿਵਚਨਂ. ਉਬ੍ਭਤੇਤਿ ਅਟ੍ਠਨ੍ਨਂ ਮਾਤਿਕਾਨਮਞ੍ਞਤਰੇਨ, ਅਨ੍ਤਰੁਬ੍ਭਾਰੇਨ ਵਾ ਉਦ੍ਧਟੇ.

ਤਤ੍ਰਾਤਿ ਤਸ੍ਮਿਂ ਕਥਿਨੇ. ਉਬ੍ਭਾਰੋ ਉਦ੍ਧਰਣਂ. ਪੁਰਿਮਵਸ੍ਸਂਵੁਟ੍ਠੇ ਤਿਂਸਮਤ੍ਤੇ ਪਾਵੇਯ੍ਯਕੇ ਭਿਕ੍ਖੂ ਉਦ੍ਦਿਸ੍ਸ ‘‘ਅਨੁਜਾਨਾਮਿ, ਭਿਕ੍ਖਵੇ, ਵਸ੍ਸਂਵੁਟ੍ਠਾਨਂ ਭਿਕ੍ਖੂਨਂ ਕਥਿਨਂ ਅਤ੍ਥਰਿਤੁ’’ਨ੍ਤਿ ਕਥਿਨਕ੍ਖਨ੍ਧਕੇ (ਮਹਾਵ. ੩੦੬) ਭਗਵਤਾ ਕਥਿਨਸ੍ਸ ਅਨੁਞ੍ਞਾਤਤ੍ਤਾ ‘‘ਅਯਞ੍ਹਿ ਕਥਿਨਤ੍ਥਾਰੋ ਨਾਮ…ਪੇ… ਅਨੁਞ੍ਞਾਤੋ’’ਤਿ ਵੁਤ੍ਤਂ. ਤਤ੍ਥ ਪੁਰਿਮਵਸ੍ਸਂਵੁਟ੍ਠਾਨਨ੍ਤਿ ਵਸ੍ਸਚ੍ਛੇਦਂ ਅਕਤ੍ਵਾ ਪੁਰਿਮਵਸ੍ਸਂਵੁਟ੍ਠਾਨਨ੍ਤਿ ਅਤ੍ਥੋ. ਏਤੇਨ ਵੁਟ੍ਠਵਸ੍ਸਵਸੇਨ ਤਾਵ ਪੁਰਿਮਿਕਾਯ ਵਸ੍ਸਂ ਉਪਗਤਾਯੇਵ ਕਥਿਨਤ੍ਥਾਰਂ ਲਭਨ੍ਤਿ, ਨ ਪਚ੍ਛਿਮਿਕਾਯ ਉਪਗਤਾਤਿ ਦਸ੍ਸੇਤਿ. ਵੁਟ੍ਠਵਸ੍ਸਵਸੇਨ ਤਾਵ ਏਵਂ ਹੋਤੁ, ਗਣਨਵਸੇਨ ਤਂ ਕਿਤ੍ਤਕਾ ਲਭਨ੍ਤੀਤਿ ਆਹ ‘‘ਸੋ’’ਤਿਆਦਿ. ਸੋਤਿ ਕਥਿਨਤ੍ਥਾਰੋ. ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨਾਤਿ ਗਣਨਵਸੇਨ ਪਚ੍ਛਿਮਕੋਟਿਯਾ. ਪਞ੍ਚਨ੍ਨਂ ਜਨਾਨਂ ਵਟ੍ਟਤੀਤਿ ਪਚ੍ਛਿਮਕੋਟਿਯਾ ਚਤ੍ਤਾਰੋ ਕਥਿਨਦੁਸ੍ਸਸ੍ਸ ਦਾਯਕਾ, ਏਕੋ ਪਟਿਗ੍ਗਾਹਕੋਤਿ ਪਞ੍ਚਨ੍ਨਂ ਜਨਾਨਂ ਵਟ੍ਟਤਿ. ਕੇਚਿ ਪਨ ‘‘ਪਞ੍ਚਵਗ੍ਗਕਰਣੀਯਤ੍ਤਾ ‘ਪਞ੍ਚਨ੍ਨਂ ਜਨਾਨਂ ਵਟ੍ਟਤੀ’ਤਿ ਵੁਤ੍ਤ’’ਨ੍ਤਿ ਵਦਨ੍ਤਿ, ਤਂ ਤੇਸਂ ਮਤਿਮਤ੍ਤਂ ‘‘ਤਤ੍ਰ, ਭਿਕ੍ਖਵੇ, ਯ੍ਵਾਯਂ ਚਤੁਵਗ੍ਗੋ ਭਿਕ੍ਖੁਸਙ੍ਘੋ ਠਪੇਤ੍ਵਾ ਤੀਣਿ ਕਮ੍ਮਾਨਿ ਉਪਸਮ੍ਪਦਂ ਪਵਾਰਣਂ ਅਬ੍ਭਾਨ’’ਨ੍ਤਿ ਚਮ੍ਪੇਯ੍ਯਕ੍ਖਨ੍ਧਕੇ (ਮਹਾਵ. ੩੮੮) ਵੁਤ੍ਤਤ੍ਤਾ. ਤਸ੍ਮਾਤਿ ਯਸ੍ਮਾ ਵੁਟ੍ਠਵਸ੍ਸਵਸੇਨ ਪੁਰਿਮਵਸ੍ਸਂਵੁਟ੍ਠਾਨਂ ਅਨਞ੍ਞਾਤੋ, ਯਸ੍ਮਾ ਚ ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਪਞ੍ਚਨ੍ਨਂ ਜਨਾਨਂ ਵਟ੍ਟਤਿ, ਤਸ੍ਮਾ. ਯਤ੍ਥਾਤਿ ਯਸ੍ਮਿਂ ਵਿਹਾਰੇ. ਆਨਿਸਂਸੇਤਿ ਅਨਾਮਨ੍ਤਚਾਰਾਦਿਕੇ ਕਥਿਨਾਨਿਸਂਸੇ. ਅਥ ਪਨ ਚਤ੍ਤਾਰੋ ਭਿਕ੍ਖੂ ਵਸ੍ਸਂ ਉਪਗਤਾ, ਏਕੋ ਪਰਿਪੁਣ੍ਣਵਸ੍ਸੋ ਸਾਮਣੇਰੋ ਸਚੇ ਪਚ੍ਛਿਮਿਕਾਯ ਉਪਸਮ੍ਪਜ੍ਜਤਿ, ਗਣਪੂਰਕੋ ਚੇਵ ਹੋਤਿ, ਆਨਿਸਂਸਞ੍ਚ ਲਭਤਿ. ਤਯੋ ਭਿਕ੍ਖੂ, ਦ੍ਵੇ ਸਾਮਣੇਰਾ, ਦ੍ਵੇ ਭਿਕ੍ਖੂ, ਤਯੋ ਸਾਮਣੇਰਾ, ਏਕੋ ਭਿਕ੍ਖੁ, ਚਤ੍ਤਾਰੋ ਸਾਮਣੇਰਾਤਿ ਏਤ੍ਥਾਪਿ ਏਸੇਵ ਨਯੋ.

ਖਨ੍ਧਕੇ ਵੁਤ੍ਤਾਯ ਞਤ੍ਤਿਦੁਤਿਯਕਮ੍ਮਵਾਚਾਯਾਤਿ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਇਦਂ ਸਙ੍ਘਸ੍ਸ ਕਥਿਨਦੁਸ੍ਸਂ ਉਪ੍ਪਨ੍ਨਂ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਮਂ ਕਥਿਨਦੁਸ੍ਸਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਦੇਯ੍ਯ ਕਥਿਨਂ ਅਤ੍ਥਰਿਤੁਂ, ਏਸਾ ਞਤ੍ਤਿ. ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਇਦਂ ਸਙ੍ਘਸ੍ਸ ਕਥਿਨਦੁਸ੍ਸਂ ਉਪ੍ਪਨ੍ਨਂ, ਸਙ੍ਘੋ ਇਮਂ ਕਥਿਨਦੁਸ੍ਸਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦੇਤਿ ਕਥਿਨਂ ਅਤ੍ਥਰਿਤੁਂ. ਯਸ੍ਸਾਯਸ੍ਮਤੋ ਖਮਤਿ ਇਮਸ੍ਸ ਕਥਿਨਦੁਸ੍ਸਸ੍ਸ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਾਨਂ ਕਥਿਨਂ ਅਤ੍ਥਰਿਤੁਂ, ਸੋ ਤੁਣ੍ਹਸ੍ਸ. ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ. ਦਿਨ੍ਨਂ ਇਦਂ ਸਙ੍ਘੇਨ ਕਥਿਨਦੁਸ੍ਸਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਕਥਿਨਂ ਅਤ੍ਥਰਿਤੁਂ, ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ (ਮਹਾਵ. ੩੦੭) –

ਏਵਂ ਕਥਿਨਕ੍ਖਨ੍ਧਕੇ ਵੁਤ੍ਤਾਯ ਞਤ੍ਤਿਦੁਤਿਯਕਮ੍ਮਵਾਚਾਯ. ਕਥਿਨਤ੍ਥਾਰਾਰਹਸ੍ਸਾਤਿ ਕਥਿਨਂ ਅਤ੍ਥਰਿਤੁਂ ਭਬ੍ਬਸ੍ਸ. ਸੋ ਚ ਖੋ ਪੁਬ੍ਬਕਰਣਜਾਨਨਾਦੀਹਿ ਅਟ੍ਠਹਿ ਅਙ੍ਗੇਹਿ ਸਮਨ੍ਨਾਗਤੋਤਿ ਵੇਦਿਤਬ੍ਬੋ. ਵੁਤ੍ਤਞ੍ਹੇਤਂ ਵਿਨਯਵਿਨਿਚ੍ਛਯੇ ‘‘ਅਟ੍ਠਧਮ੍ਮਕੋਵਿਦੋ ਭਿਕ੍ਖੁ, ਕਥਿਨਤ੍ਥਾਰਮਰਹਤੀ’’ਤਿ. ਪਰਿਵਾਰੇਪਿ (ਪਰਿ. ੪੦੯) ਵੁਤ੍ਤਂ –

‘‘ਅਟ੍ਠਹਙ੍ਗੇਹਿ ਸਮਨ੍ਨਾਗਤੋ ਪੁਗ੍ਗਲੋ ਭਬ੍ਬੋ ਕਥਿਨਂ ਅਤ੍ਥਰਿਤੁਂ. ਕਤਮੇਹਿ ਅਟ੍ਠਹਙ੍ਗੇਹਿ ਸਮਨ੍ਨਾਗਤੋ ਪੁਗ੍ਗਲੋ ਭਬ੍ਬੋ ਕਥਿਨਂ ਅਤ੍ਥਰਿਤੁਂ? ਪੁਬ੍ਬਕਰਣਂ ਜਾਨਾਤਿ, ਪਚ੍ਚੁਦ੍ਧਾਰਂ ਜਾਨਾਤਿ, ਅਧਿਟ੍ਠਾਨਂ ਜਾਨਾਤਿ, ਅਤ੍ਥਾਰਂ ਜਾਨਾਤਿ, ਮਾਤਿਕਂ ਜਾਨਾਤਿ, ਪਲਿਬੋਧਂ ਜਾਨਾਤਿ, ਉਦ੍ਧਾਰਂ ਜਾਨਾਤਿ, ਆਨਿਸਂਸਂ ਜਾਨਾਤਿ, ਇਮੇਹਿ ਅਟ੍ਠਹਙ੍ਗੇਹਿ ਸਮਨ੍ਨਾਗਤੋ ਪੁਗ੍ਗਲੋ ਭਬ੍ਬੋ ਕਥਿਨਂ ਅਤ੍ਥਰਿਤੁ’’ਨ੍ਤਿ.

ਏਤ੍ਥ ਚ ਪੁਬ੍ਬਕਰਣਂ ਨਾਮ ਧੋਵਨਵਿਚਾਰਣਚ੍ਛੇਦਨਬਨ੍ਧਨਸਿਬ੍ਬਨਰਜਨਕਪ੍ਪਕਰਣਂ. ਪਚ੍ਚੁਦ੍ਧਾਰੋ ਨਾਮ ਪੁਰਾਣਸਙ੍ਘਾਟਿਆਦੀਨਂ ਪਚ੍ਚੁਦ੍ਧਰਣਂ. ਅਧਿਟ੍ਠਾਨਂ ਨਾਮ ਕਥਿਨਚੀਵਰਾਧਿਟ੍ਠਾਨਂ. ਅਤ੍ਥਾਰੋ ਨਾਮ ਕਥਿਨਤ੍ਥਾਰੋ. ਮਾਤਿਕਾ ਨਾਮ ਅਟ੍ਠ ਮਾਤਿਕਾ. ਪਲਿਬੋਧੋ ਨਾਮ ਆਵਾਸਪਲਿਬੋਧੋ ਚੀਵਰਪਲਿਬੋਧੋਤਿ ਦ੍ਵੇ ਪਲਿਬੋਧਾ. ਉਦ੍ਧਾਰੋ ਨਾਮ ਪਕ੍ਕਮਨਨ੍ਤਿਕਾਦਯੋ. ਆਨਿਸਂਸੋ ਨਾਮ ਪਞ੍ਚਾਨਿਸਂਸਾ.

ਯਂ ਪਨ ਸਮਨ੍ਤਪਾਸਾਦਿਕਾਯਂ (ਮਹਾਵ. ਅਟ੍ਠ. ੩੦੬) ਵੁਤ੍ਤਂ ‘‘ਕਥਿਨਂ ਪਨ ਕੇਨ ਅਤ੍ਥਰਿਤਬ੍ਬਂ? ਯਸ੍ਸ ਸਙ੍ਘੋ ਕਥਿਨਚੀਵਰਂ ਦੇਤਿ, ਸਙ੍ਘੇਨ ਪਨ ਕਸ੍ਸ ਦਾਤਬ੍ਬਂ? ਯੋ ਜਿਣ੍ਣਚੀਵਰੋ ਹੋਤਿ, ਸਚੇ ਬਹੂ ਜਿਣ੍ਣਚੀਵਰਾ ਹੋਨ੍ਤਿ, ਵੁਡ੍ਢਸ੍ਸ ਦਾਤਬ੍ਬਂ. ਵੁਡ੍ਢੇਸੁਪਿ ਯੋ ਮਹਾਪਰਿਸੋ ਤਦਹੇਵ ਚੀਵਰਂ ਕਤ੍ਵਾ ਅਤ੍ਥਰਿਤੁਂ ਸਕ੍ਕੋਤਿ, ਤਸ੍ਸ ਦਾਤਬ੍ਬਂ. ਸਚੇ ਵੁਡ੍ਢੋ ਨ ਸਕ੍ਕੋਤਿ, ਨਵਕਤਰੋ ਸਕ੍ਕੋਤਿ, ਤਸ੍ਸ ਦਾਤਬ੍ਬਂ. ਅਪਿਚ ਸਙ੍ਘੇਨ ਮਹਾਥੇਰਸ੍ਸ ਸਙ੍ਗਹਂ ਕਾਤੁਂ ਵਟ੍ਟਤਿ, ਤਸ੍ਮਾ ‘ਤੁਮ੍ਹੇ, ਭਨ੍ਤੇ, ਗਣ੍ਹਥ, ਮਯਂ ਕਤ੍ਵਾ ਦਸ੍ਸਾਮਾ’ਤਿ ਵਤ੍ਤਬ੍ਬ’’ਨ੍ਤਿ, ਤਮ੍ਪਿ ਕਥਿਨਤ੍ਥਾਰਾਰਹਂਯੇਵ ਗਹੇਤ੍ਵਾਵ ਦਾਤਬ੍ਬਂ. ਦੇਨ੍ਤੇਨ ਪਨ ਤੀਸੁ ਚੀਵਰੇਸੁ ਯਂ ਯਂ ਜਿਣ੍ਣਂ ਹੋਤਿ, ਤਂ ਤਦਤ੍ਥਾਯ ਦਾਤਬ੍ਬਂ. ਪਕਤਿਯਾ ਦੁਪਟ੍ਟਚੀਵਰਸ੍ਸ ਦੁਪਟ੍ਟਤ੍ਥਾਯੇਵ ਦਾਤਬ੍ਬਂ. ਸਚੇਪਿਸ੍ਸ ਏਕਪਟ੍ਟਚੀਵਰਂ ਘਨਂ ਹੋਤਿ, ਕਥਿਨਸਾਟਕੋ ਚ ਪੇਲਵੋ, ਸਾਰੁਪ੍ਪਤ੍ਥਾਯ ਦੁਪਟ੍ਟਪ੍ਪਹੋਨਕਮੇਵ ਦਾਤਬ੍ਬਂ. ‘‘ਅਹਂ ਅਲਭਨ੍ਤੋ ਏਕਪਟ੍ਟਂ ਪਾਰੁਪਾਮੀ’’ਤਿ ਵਦਨ੍ਤਸ੍ਸਾਪਿ ਦੁਪਟ੍ਟਂ ਦਾਤੁਂ ਵਟ੍ਟਤਿ. ਯੋ ਪਨ ਲੋਭਪਕਤਿਕੋ ਹੋਤਿ, ਤਸ੍ਸ ਨ ਦਾਤਬ੍ਬਂ. ਤੇਨਾਪਿ ਕਥਿਨਂ ਅਤ੍ਥਰਿਤ੍ਵਾ ਪਚ੍ਛਾ ਸਿਬ੍ਬੇਤ੍ਵਾ ‘‘ਦ੍ਵੇ ਚੀਵਰਾਨਿ ਕਰਿਸ੍ਸਾਮੀ’’ਤਿ ਨ ਗਹੇਤਬ੍ਬਂ.

ਤੇਨਾਤਿ ਕਥਿਨਤ੍ਥਾਰਕੇਨ ਭਿਕ੍ਖੁਨਾ. ਤਦਹੇਵਾਤਿ ਤਸ੍ਮਿਂਯੇਵ ਦਿਵਸੇ. ਪਞ੍ਚ ਵਾ ਅਤਿਰੇਕਾਨਿ ਵਾ ਖਣ੍ਡਾਨਿ ਛਿਨ੍ਦਿਤ੍ਵਾਤਿ ਯਥਾ ਪਞ੍ਚਖਣ੍ਡਿਕਾਦੀਨਂ ਸਙ੍ਘਾਟਿਆਦੀਨਂ ਤਿਣ੍ਣਂ ਚੀਵਰਾਨਂ ਅਞ੍ਞਤਰਪ੍ਪਹੋਨਕਾਨਿ ਮਹਾਮਣ੍ਡਲਅਡ੍ਢਮਣ੍ਡਲਾਦਿਵਸੇਨ ਪਞ੍ਚ ਖਣ੍ਡਾਨਿ ਵਾ ਅਤਿਰੇਕਾਨਿ ਵਾ ਸਤ੍ਤਾਦਿਖਣ੍ਡਾਨਿ ਹੋਨ੍ਤਿ, ਏਵਂ ਛਿਨ੍ਦਿਤ੍ਵਾ. ਤਸ੍ਮਿਞ੍ਚ ਕਥਿਨਚੀਵਰੇ ਕਰਿਯਮਾਨੇ ‘‘ਅਹਂ ਥੇਰੋ’’ਤਿ ਵਾ ‘‘ਬਹੁਸ੍ਸੁਤੋ’’ਤਿ ਵਾ ਏਕੇਨਾਪਿ ਅਕਾਤੁਂ ਨ ਲਬ੍ਭਤਿ. ਅਨਾਦਰਿਯੇਨ ਅਕਰੋਨ੍ਤਸ੍ਸ ਦੁਕ੍ਕਟਂ. ਤਸ੍ਮਾ ਸਬ੍ਬੇਹੇਵ ਸਨ੍ਨਿਪਤਿਤ੍ਵਾ ਧੋਵਨਛੇਦਨਸਿਬ੍ਬਨਰਜਨਾਨਿ ਨਿਟ੍ਠਾਪੇਤਬ੍ਬਾਨਿ. ਤੇਨਾਹ ‘‘ਸੇਸਭਿਕ੍ਖੂਹਿਪਿ ਤਸ੍ਸ ਸਹਾਯੇਹਿ ਭਵਿਤਬ੍ਬ’’ਨ੍ਤਿ. ਕਤਚੀਵਰਮੇਵਾਤਿ ਨਿਟ੍ਠਿਤਪਰਿਕਮ੍ਮਮੇਵ ਕਥਿਨਦੁਸ੍ਸਂ. ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਅਨ੍ਤਰਵਾਸਕੋਪਿ ਛਿਨ੍ਦਿਤ੍ਵਾਵ ਕਾਤਬ੍ਬੋ ਅਞ੍ਞਥਾ ਅਤ੍ਥਾਰਵਿਪਤ੍ਤਿਤੋ. ਯਥਾਹ –

‘‘ਕਥਞ੍ਚ ਪਨ, ਭਿਕ੍ਖਵੇ, ਅਨਤ੍ਥਤਂ ਹੋਤਿ ਕਥਿਨਂ? ਨ ਉਲ੍ਲਿਖਿਤਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ…ਪੇ… ਨ ਅਞ੍ਞਤ੍ਰ ਪਞ੍ਚਕੇਨ ਵਾ ਅਤਿਰੇਕਪਞ੍ਚਕੇਨ ਵਾ ਤਦਹੇਵ ਸਞ੍ਛਿਨ੍ਨੇਨਾ’’ਤਿ (ਮਹਾਵ. ੩੦੮).

ਤੇਨੇਵਾਹ ‘‘ਅਚ੍ਛਿਨ੍ਨਾਸਿਬ੍ਬਿਤਂ ਪਨ ਨ ਵਟ੍ਟਤੀ’’ਤਿ. ਤੇਨ ਭਿਕ੍ਖੁਨਾਤਿ ਅਤ੍ਥਾਰਕੇਨ ਭਿਕ੍ਖੁਨਾ. ਅਤ੍ਥਰਿਤਬ੍ਬਨ੍ਤਿ ਅਤ੍ਥਰਣਂ ਕਾਤਬ੍ਬਂ. ਤਞ੍ਚ ਖੋ ਤਥਾਵਚੀਭੇਦਕਰਣਮੇਵਾਤਿ ਦਟ੍ਠਬ੍ਬਂ. ਯਥਾਹ –

‘‘ਸਚੇ ਸਙ੍ਘਾਟਿਯਾ ਕਥਿਨਂ ਅਤ੍ਥਰਿਤੁਕਾਮੋ ਹੋਤਿ, ਪੋਰਾਣਿਕਾ ਸਙ੍ਘਾਟਿ ਪਚ੍ਚੁਦ੍ਧਰਿਤਬ੍ਬਾ, ਨਵਾ ਸਙ੍ਘਾਟਿ ਅਧਿਟ੍ਠਾਤਬ੍ਬਾ, ‘ਇਮਾਯ ਸਙ੍ਘਾਟਿਯਾ ਕਥਿਨਂ ਅਤ੍ਥਰਾਮੀ’ਤਿ ਵਾਚਾ ਭਿਨ੍ਦਿਤਬ੍ਬਾ’’ਤਿ (ਪਰਿ. ੪੧੩) –

ਵਿਤ੍ਥਾਰੋ. ‘‘ਭਨ੍ਤੇ, ਆਵੁਸੋ’’ਤਿ ਚ ‘‘ਅਨੁਮੋਦਥ, ਅਨੁਮੋਦਾਹੀ’’ਤਿ ਚ ਵਚਨਭੇਦਂ ਸਨ੍ਧਾਯ ‘‘ਥੇਰਾਨਞ੍ਚਾ’’ਤਿਆਦਿ ਵੁਤ੍ਤਂ.

ਏਵਂ ਅਤ੍ਥਾਰਕੇਨ ਪਟਿਪਜ੍ਜਿਤਬ੍ਬਵਿਧਿਂ ਦਸ੍ਸੇਤ੍ਵਾ ਇਦਾਨਿ ਅਨੁਮੋਦਕੇਹਿ ਪਟਿਪਜ੍ਜਿਤਬ੍ਬਵਿਧਿਂ ਦਸ੍ਸੇਤੁਂ ‘‘ਤੇਹਿਪੀ’’ਤਿਆਦਿ ਵੁਤ੍ਤਂ. ‘‘ਅਨੁਮੋਦਾਮਾ’’ਤਿ ਅਤ੍ਤਨਾਵ ਅਤ੍ਤਨਿ ਗਾਰਵਵਸੇਨ ਵੁਤ੍ਤਂ. ਕਿਞ੍ਚਾਪਿ ਏਵਂ ਵੁਤ੍ਤਂ, ਤਥਾਪਿ ਏਕਕੇਨ ‘‘ਅਨੁਮੋਦਾਮਾ’’ਤਿ ਵਤ੍ਤੁਂ ਨ ਵਟ੍ਟਤਿ, ‘‘ਅਨੁਮੋਦਾਮਿ’’ਚ੍ਚੇਵ ਵਤ੍ਤਬ੍ਬਨ੍ਤਿ ਵਦਨ੍ਤਿ, ਵੀਮਂਸਿਤ੍ਵਾ ਗਹੇਤਬ੍ਬਂ. ਇਦਾਨਿ ਕਥਿਨਾਨਿਸਂਸੇ ਦਸ੍ਸੇਤੁਂ ਭੂਮਿਂ ਵਿਚਾਰਯਨ੍ਤੋ ‘‘ਪੁਰਿਮਵਸ੍ਸਂਵੁਟ੍ਠੇਸੁਪੀ’’ਤਿਆਦਿਮਾਹ. ਤਤ੍ਥ ਤੇਸਂਯੇਵਾਤਿ ਅਤ੍ਥਾਰਕਅਨੁਮੋਦਕਾਨਂਯੇਵ. ਵੁਤ੍ਤਞ੍ਹੇਤਂ ਪਰਿਵਾਰੇ ‘‘ਦ੍ਵਿਨ੍ਨਂ ਪੁਗ੍ਗਲਾਨਂ ਅਤ੍ਥਤਂ ਹੋਤਿ ਕਥਿਨਂ ਅਤ੍ਥਾਰਕਸ੍ਸ ਚ ਅਨੁਮੋਦਕਸ੍ਸ ਚਾ’’ਤਿ (ਪਰਿ. ੪੦੩). ਤੇਤਿ ਅਤ੍ਥਾਰਕਅਨੁਮੋਦਕਾ. ਤਤੋ ਪਟ੍ਠਾਯਾਤਿ ਅਤ੍ਥਾਰਾਨੁਮੋਦਨਤੋ ਪਟ੍ਠਾਯ. ਯਾਵ ਕਥਿਨਸ੍ਸੁਬ੍ਭਾਰਾਤਿ ਨ ਕੇਵਲਂ ਚੀਵਰਮਾਸੇਯੇਵ, ਅਥ ਖੋ ਅਟ੍ਠਨ੍ਨਂ ਮਾਤਿਕਾਨਂ ਅਞ੍ਞਤਰੇਨ ਵਾ ਅਨ੍ਤਰੁਬ੍ਭਾਰੇਨ ਵਾ ਯਾਵ ਕਥਿਨਸ੍ਸੁਬ੍ਭਾਰਾ ਪਞ੍ਚਾਨਿਸਂਸੇ ਲਭਨ੍ਤਿ, ਉਦ੍ਧਟੇ ਪਨ ਨ ਲਭਨ੍ਤੀਤਿ ਅਤ੍ਥੋ.

ਇਦਾਨਿ ਤੇ ਪਞ੍ਚਾਨਿਸਂਸੇ ਸਰੂਪਤੋ ਦਸ੍ਸੇਤੁਂ ‘‘ਅਨਾਮਨ੍ਤਚਾਰੋ’’ਤਿਆਦਿਮਾਹ. ਤਤ੍ਥ ਅਨਾਮਨ੍ਤਚਾਰੋ ਨਾਮ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰੇਨ ਨਿਮਨ੍ਤਿਤਸ੍ਸ ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ ਕੁਲੇਸੁ ਚਾਰਿਤ੍ਤਾਪਜ੍ਜਨਂ. ਅਸਮਾਦਾਨਚਾਰੋ ਨਾਮ ਨਾਮੇਨਾਧਿਟ੍ਠਿਤਸ੍ਸ ਚੀਵਰਸ੍ਸ ਅਸਮਾਦਾਨਚਰਣਂ, ਨਾਮੇਨਾਧਿਟ੍ਠਿਤਾਨਂ ਤਿਣ੍ਣਂ ਚੀਵਰਾਨਮਞ੍ਞਤਰਂ ਚੀਵਰਂ ਯਤ੍ਥ ਕਤ੍ਥਚਿ ਨਿਕ੍ਖਿਪਿਤ੍ਵਾ ਅਞ੍ਞਤ੍ਥ ਅਰੁਣੁਟ੍ਠਾਪਨਨ੍ਤਿ ਅਤ੍ਥੋ, ਚੀਵਰਵਿਪ੍ਪਵਾਸੋਤਿ ਵੁਤ੍ਤਂ ਹੋਤਿ. ਯਾਵਦਤ੍ਥਚੀਵਰਨ੍ਤਿ ਯਾਵਤਾ ਚੀਵਰੇਨ ਅਤ੍ਥੋ ਹੋਤਿ, ਤਾਵਤਕਂ ਅਨਧਿਟ੍ਠਿਤਂ ਅਵਿਕਪ੍ਪਿਤਂ ਚੀਵਰਧਾਰਣਂ, ਦਸਾਹਮਤਿਕ੍ਕਮਿਤ੍ਵਾ ਚੀਵਰਸ੍ਸ ਠਪਨਨ੍ਤਿ ਅਤ੍ਥੋ. ਗਣਸ੍ਸ ਭੋਜਨਂ ਗਣਭੋਜਨਂ. ਗਣੋਤਿ ਚੇਤ੍ਥ ਚਤ੍ਤਾਰੋ ਵਾ ਤਤੁਤ੍ਤਰਿ ਵਾ ਭਿਕ੍ਖੂ. ਤੇਸਂ ਵਿਞ੍ਞਤ੍ਤਿਤੋ ਵਾ ਨਿਮਨ੍ਤਨਤੋ ਵਾ ਲਦ੍ਧਸ੍ਸ ਓਦਨਾਦੀਨਂ ਪਞ੍ਚਨ੍ਨਂ ਅਞ੍ਞਤਰਭੋਜਨਸ੍ਸ ਸਹ ਗਹਣਨ੍ਤਿ ਅਤ੍ਥੋ. ਯੋ ਚ ਤਤ੍ਥ ਚੀਵਰੁਪ੍ਪਾਦੋਤਿ ਤਤ੍ਥ ਕਥਿਨਤ੍ਥਤਸੀਮਾਯ ਮਤਕਚੀਵਰਂ ਵਾ ਹੋਤੁ, ਸਙ੍ਘਂ ਉਦ੍ਦਿਸ੍ਸ ਦਿਨ੍ਨਂ ਵਾ ਸਙ੍ਘਿਕੇਨ ਤਤ੍ਰੁਪ੍ਪਾਦੇਨ ਆਭਤਂ ਵਾ ਯੇਨ ਕੇਨਚਿ ਆਕਾਰੇਨ ਯਂ ਸਙ੍ਘਿਕਂ ਚੀਵਰਂ ਉਪ੍ਪਜ੍ਜਤਿ, ਤਂ ਤੇਸਂ ਭਵਿਸ੍ਸਤੀਤਿ ਅਤ੍ਥੋ. ਤੇਨਾਹ ‘‘ਤਸ੍ਮਿਂ ਆਵਾਸੇ ਸਙ੍ਘਸ੍ਸ ਉਪ੍ਪਨ੍ਨਚੀਵਰਞ੍ਚਾ’’ਤਿ.

‘‘ਯਂ ਪਨ ਤਤ੍ਥ ਸਙ੍ਘਸ੍ਸ ਉਪ੍ਪਨ੍ਨਂ ਪਤ੍ਤਾਦਿ ਵਾ ਅਞ੍ਞਂ ਭਣ੍ਡਂ ਵਾ, ਤਂ ਸਬ੍ਬੇਸਂ ਪਾਪੁਣਾਤਿ. ਯਂ ਪਨ ਤਤ੍ਰੁਪ੍ਪਾਦੇਨ ਤਣ੍ਡੁਲਾਦਿਨਾ ਵਤ੍ਥਂ ਚੇਤਾਪਿਤਂ, ਅਤ੍ਥਤਕਥਿਨਾਨਮੇਵ ਤਾਨਿ ਵਤ੍ਥਾਨਿ ਪਾਪੁਣਨ੍ਤਿ. ਵਤ੍ਥੇਹਿ ਪਨ ਤਣ੍ਡੁਲਾਦੀਸੁ ਚੇਤਾਪਿਤੇਸੁ ਸਬ੍ਬੇਸਂ ਤਾਨਿ ਪਾਪੁਣਨ੍ਤੀ’’ਤਿ ਗਣ੍ਠਿਪਦੇ ਵੁਤ੍ਤਂ, ਤਮ੍ਪਿ ਚੇਤਾਪਿਤਕਾਲਤੋ ਪਟ੍ਠਾਯ ਚੀਵਰੁਪ੍ਪਾਦੋ ਨ ਹੋਤੀਤਿ ਸੁਵੁਤ੍ਤਨ੍ਤਿ ਦਟ੍ਠਬ੍ਬਂ. ਅਨਤ੍ਥਤਕਥਿਨਾ ਪਨ ਇਮੇਸੁ ਪਞ੍ਚਸੁ ਆਨਿਸਂਸੇਸੁ ਚੀਵਰਮਾਸੇ ਅਸਮਾਦਾਨਚਾਰਂ ਠਪੇਤ੍ਵਾ ਸੇਸਾਨਿਸਂਸੇ ਲਭਨ੍ਤਿ. ਯਦਿ ਅਸਮਾਦਾਨਚਾਰੋਪਿ ਲਬ੍ਭੇਯ੍ਯ, ਪਾਵੇਯ੍ਯਕਾ ਭਿਕ੍ਖੂ ਵਸ੍ਸਂਵੁਟ੍ਠਾ ਓਕਪੁਣ੍ਣੇਹਿ ਚੀਵਰੇਹਿ ਨ ਭਗਵਨ੍ਤਂ ਉਪਸਙ੍ਕਮੇਯ੍ਯੁਂ. ਯਸ੍ਮਾ ਤਂ ਨ ਲਬ੍ਭਤਿ, ਤਸ੍ਮਾ ਚੀਵਰਮਾਸੇਪਿ ਚੀਵਰਂ ਸਮਾਦਾਯ ਏਵ ਭਗਵਨ੍ਤਂ ਉਪਸਙ੍ਕਮਿਂਸੁ.

ਏਵਂ ਕਥਿਨਤ੍ਥਾਰਂ ਦਸ੍ਸੇਤ੍ਵਾ ਇਦਾਨਿ ਉਬ੍ਭਾਰਂ ਦਸ੍ਸੇਨ੍ਤੋ ‘‘ਤਂ ਪਨੇਤਂ ਕਥਿਨ’’ਨ੍ਤਿਆਦਿਮਾਹ. ਤਤ੍ਥ ਮਾਤਿਕਾਤਿ ਮਾਤਰੋ, ਜਨੇਤ੍ਤਿਯੋਤਿ ਅਤ੍ਥੋ. ਕਥਿਨੁਬ੍ਭਾਰਞ੍ਹਿ ਏਤਾ ਅਟ੍ਠ ਜਨੇਨ੍ਤਿ. ਤਾਸੁ ਪਕ੍ਕਮਨਂ ਅਨ੍ਤੋ ਏਤਿਸ੍ਸਾਤਿ ਪਕ੍ਕਮਨਨ੍ਤਿਕਾ. ਏਵਂ ਸੇਸਾਪਿ ਵੇਦਿਤਬ੍ਬਾ. ਤਤ੍ਥ ਯੋ ਭਿਕ੍ਖੁ ਅਤ੍ਥਤਕਥਿਨੋ ਕਥਿਨਚੀਵਰਂ ਆਦਾਯ ਤਸ੍ਮਿਂ ਆਵਾਸੇ ਨਿਰਪੇਕ੍ਖੋ ‘‘ਨ ਪਚ੍ਚੇਸ੍ਸ’’ਨ੍ਤਿ ਪਕ੍ਕਮਤਿ, ਤਸ੍ਸੇਵਂ ਪਕ੍ਕਮਤੋ ਕਥਿਨੁਦ੍ਧਾਰੋ ਅਤਿਕ੍ਕਨ੍ਤਮਤ੍ਤਾਯ ਸੀਮਾਯ ਹੋਤੀਤਿ ਪਕ੍ਕਮਨਨ੍ਤਿਕੋ ਕਥਿਨੁਦ੍ਧਾਰੋਤਿ ਵੇਦਿਤਬ੍ਬੋ.

ਯੋ ਪਨ ਆਨਿਸਂਸਚੀਵਰਂ ਆਦਾਯ ਪਕ੍ਕਮਤਿ, ਤਸ੍ਸ ਬਹਿਸੀਮਾਗਤਸ੍ਸ ਏਵਂ ਹੋਤਿ ‘‘ਇਧੇਵਿਮਂ ਕਰਿਸ੍ਸਾਮਿ, ਨ ਪੁਨ ਤਂ ਵਿਹਾਰਂ ਗਚ੍ਛਿਸ੍ਸਾਮੀ’’ਤਿ ਤਸ੍ਮਿਂ ਆਵਾਸੇ ਨਿਰਪੇਕ੍ਖੋ ਹੁਤ੍ਵਾ ਤਂ ਚੀਵਰਂ ਕਾਰੇਤਿ, ਤਸ੍ਸ ਭਿਕ੍ਖੁਨੋ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਯਦਿ ਪਨ ਆਨਿਸਂਸਮੂਲਚੀਵਰਂ ਆਦਾਯ ਬਹਿਸੀਮਾਗਤੋ ‘‘ਨੇਵਿਮਂ ਚੀਵਰਂ ਕਰਿਸ੍ਸਾਮਿ, ਨ ਚ ਤਂ ਆਵਾਸਂ ਗਚ੍ਛਿਸ੍ਸਾਮੀ’’ਤਿ ਸਨ੍ਨਿਟ੍ਠਾਨਂ ਕਰੋਤਿ, ਤਦਾ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ.

ਤਦੇਵ ਆਨਿਸਂਸਚੀਵਰਂ ਲਦ੍ਧਾ ਤਂ ਆਦਾਯ ਬਹਿਸੀਮਂ ਗਨ੍ਤ੍ਵਾ ‘‘ਇਧੇਵਿਮਂ ਚੀਵਰਂ ਕਰਿਸ੍ਸਾਮਿ, ਨ ਗਚ੍ਛਿਸ੍ਸਾਮੀ’’ਤਿ ਕਰੋਨ੍ਤਸ੍ਸ ਸਚੇ ਤਂ ਚੀਵਰਂ ਨਸ੍ਸਤਿ ਵਿਨਸ੍ਸਤਿ ਡਯ੍ਹਤਿ, ਨਾਸਨਨ੍ਤਿਕੋ ਕਥਿਨੁਦ੍ਧਾਰੋ ਹੋਤਿ.

ਸਚੇ ਪਨ ਆਨਿਸਂਸਚੀਵਰਂ ਲਦ੍ਧਾ ਤਸ੍ਮਿਂ ਵਿਹਾਰੇ ਸਾਪੇਕ੍ਖੋਵ ਬਹਿਸੀਮਾਗਤੋ ‘‘ਵਿਹਾਰੇ ਭਿਕ੍ਖੂਹਿ ਅਨ੍ਤਰੁਬ੍ਭਾਰਂ ਕਤ’’ਨ੍ਤਿ ਸੁਣਾਤਿ, ਤਸ੍ਸ ਸਵਨਨ੍ਤਿਕੋ ਕਥਿਨੁਦ੍ਧਾਰੋ ਹੋਤਿ.

ਆਸਾਯ ਅਵਚ੍ਛੇਦੋ ਏਤਿਸ੍ਸਾਤਿ ਆਸਾਵਚ੍ਛੇਦਿਕਾ. ਯੋ ਪਨ ਯੇਨ ਕੇਨਚਿ ‘‘ਤੁਯ੍ਹਂ ਚੀਵਰਂ ਦਸ੍ਸਾਮੀ’’ਤਿ ਵੁਤ੍ਤੋ ਤਸ੍ਮਿਂ ਚੀਵਰੇ ਆਸਾਯ ਵਿਹਾਰੇ ਅਪੇਕ੍ਖਂ ਪਹਾਯ ਬਹਿਸੀਮਾਗਤੋ ਪੁਨ ਤੇਨ ‘‘ਨ ਸਕ੍ਕੋਮਿ ਦਾਤੁ’’ਨ੍ਤਿ ਵੁਤ੍ਤੇ ਆਸਂ ਛਿਨ੍ਦਤਿ, ਤਸ੍ਸ ਆਸਾਵਚ੍ਛੇਦਿਕੋ ਕਥਿਨੁਦ੍ਧਾਰੋ ਹੋਤਿ.

ਯੋ ਪਨ ਵਸ੍ਸਂਵੁਟ੍ਠਵਿਹਾਰਤੋ ਅਞ੍ਞਂ ਵਿਹਾਰਂ ਸਾਪੇਕ੍ਖੋਵ ਗਨ੍ਤ੍ਵਾ ਆਗਚ੍ਛਨ੍ਤੋ ਅਨ੍ਤਰਾਮਗ੍ਗੇਯੇਵ ਕਥਿਨੁਦ੍ਧਾਰਂ ਵੀਤਿਨਾਮੇਤਿ, ਤਸ੍ਸ ਸੀਮਾਤਿਕ੍ਕਮਨਨ੍ਤਿਕੋ ਕਥਿਨੁਦ੍ਧਾਰੋ.

ਸਹ ਉਬ੍ਭਾਰੇਨਾਤਿ ਸਹੁਬ੍ਭਾਰਾ. ਆਨਿਸਂਸਚੀਵਰਂ ਆਦਾਯ ਸਾਪੇਕ੍ਖੋਵ ਬਹਿ ਗਨ੍ਤ੍ਵਾ ਕਥਿਨੁਦ੍ਧਾਰਂ ਸਮ੍ਭੁਣਨ੍ਤਸ੍ਸ ਕਥਿਨੁਦ੍ਧਾਰੋ ਸਹੁਬ੍ਭਾਰੋਤਿ ਵੇਦਿਤਬ੍ਬੋ.

‘‘ਏਤਸ੍ਮਿਂ ਪਨ ਪਕ੍ਕਮਨਨ੍ਤਿਕੇ ਕਥਿਨੁਦ੍ਧਾਰੇ ਪਠਮਂ ਚੀਵਰਪਲਿਬੋਧੋ ਛਿਜ੍ਜਤੀ’’ਤਿਆਦਿਨਾ ਚੀਵਰਪਲਿਬੋਧੁਪਚ੍ਛੇਦਾਦਿਕਸ੍ਸ ਵਿਨਿਚ੍ਛਯਸ੍ਸ ਵਿਤ੍ਥਾਰਤੋ ਸਮਨ੍ਤਪਾਸਾਦਿਕਾਯਂ (ਮਹਾਵ. ਅਟ੍ਠ. ੩੧੧) ਵੁਤ੍ਤਤ੍ਤਾ ੮ ‘‘ਤਤ੍ਥ ਵਿਤ੍ਥਾਰਵਿਨਿਚ੍ਛਯੋ’’ਤਿਆਦਿਮਾਹ. ਅਤ੍ਥਾਰੁਬ੍ਭਾਰਾਨਂਯੇਵ ਵਾ ਵਿਤ੍ਥਾਰਵਿਨਿਚ੍ਛਯਸ੍ਸ ਤਤ੍ਥਾਗਤਤ੍ਤਾ ਏਵਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਸੇਸਪਲਿਬੋਧਾਭਾਵਨ੍ਤਿ ਅਵਸੇਸਸ੍ਸ ਪਲਿਬੋਧਸ੍ਸ ਅਭਾਵਂ, ਆਵਾਸਪਲਿਬੋਧਾਭਾਵਨ੍ਤਿ ਅਤ੍ਥੋ.

ਅਸ੍ਸਾਤਿ ਕਾਲਸ੍ਸ. ਦਸਾਹਪਰਮਨ੍ਤਿ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਨ੍ਤਿ ਆਹ ‘‘ਤਂ ਦਸਾਹਪਰਮਂ ਕਾਲ’’ਨ੍ਤਿ. ਅਤਿਰੇਕਨ੍ਤਿ ਅਧਿਕਂ, ਸੋ ਚ ਅਧਿਕਭਾਵੋ ਅਧਿਟ੍ਠਿਤਵਿਕਪ੍ਪਿਤਚੀਵਰਤੋਤਿ ਆਹ ‘‘ਅਧਿਟ੍ਠਿਤਵਿਕਪ੍ਪਿਤੇਸੂ’’ਤਿਆਦਿ. ਖੋਮਨ੍ਤਿ (ਪਾਰਾ. ਅਟ੍ਠ. ੨.੬੩੬-੬੩੮) ਖੋਮਸੁਤ੍ਤੇਹਿ ਵਾਯਿਤਂ ਖੋਮਪਟ੍ਟਚੀਵਰਂ. ਤਥਾ ਸੇਸਾਨਿ. ਕਮ੍ਬਲਂ ਨਾਮ ਮਨੁਸ੍ਸਲੋਮਵਾਲ਼ਲੋਮੇ ਠਪੇਤ੍ਵਾ ਸੇਸਲੋਮੇਹਿ ਵਾਯਿਤ੍ਵਾ ਕਤਵਤ੍ਥਂ. ਸਾਣਂ ਨਾਮ ਸਾਣਵਾਕੇਹਿ ਕਤਵਤ੍ਥਂ. ਭਙ੍ਗਂ ਨਾਮ ਖੋਮਸੁਤ੍ਤਾਦੀਹਿ ਪਞ੍ਚਹਿ ਮਿਸ੍ਸੇਤ੍ਵਾ ਕਤਵਤ੍ਥਂ. ‘‘ਪਾਟੇਕ੍ਕਂ ਵਾਕਮਯਮੇਵਾ’’ਤਿਪਿ ਵਦਨ੍ਤਿ. ਤਦਨੁਲੋਮਾਨਂ ਵਾਤਿ ਦੁਕੂਲਂ ਪਤ੍ਤੁਣ੍ਣਂ ਸੋਮਾਰਪਟ੍ਟਂ ਚੀਨਪਟ੍ਟਂ ਇਦ੍ਧਿਜਂ ਦੇਵਦਿਨ੍ਨਨ੍ਤਿ ਤੇਸਂ ਖੋਮਾਦੀਨਂਯੇਵ ਅਨੁਲੋਮਾਨਂ ਛਨ੍ਨਂ ਚੀਵਰਾਨਂ ਵਾ, ਤਤ੍ਥ ਦੁਕੂਲਂ ਸਾਣਸ੍ਸ ਅਨੁਲੋਮਂ ਵਾਕਮਯਤ੍ਤਾ. ਪਤ੍ਤੁਣ੍ਣਦੇਸੇ ਪਾਣਕੇਹਿ ਸਞ੍ਜਾਤਵਤ੍ਥਂ ਪਤ੍ਤੁਣ੍ਣਂ. ਸੋਮਾਰਦੇਸੇ ਜਾਤਂ ਵਤ੍ਥਂ ਸੋਮਾਰਪਟ੍ਟਂ. ਤਥਾ ਚੀਨਪਟ੍ਟਂ. ਇਮਾਨਿ ਤੀਣਿਪਿ ਕੋਸੇਯ੍ਯਸ੍ਸ ਅਨੁਲੋਮਾਨਿ ਪਾਣਕੇਹਿ ਕਤਸੁਤ੍ਤਮਯਤ੍ਤਾ. ਇਦ੍ਧਿਜਂ ਏਹਿਭਿਕ੍ਖੂਨਂ ਪੁਞ੍ਞਿਦ੍ਧਿਯਾ ਨਿਬ੍ਬਤ੍ਤਚੀਵਰਂ. ਤਂ ਪਨ ਖੋਮਾਦੀਨਮਞ੍ਞਤਰਂ ਹੋਤੀਤਿ ਤੇਸਂਯੇਵ ਅਨੁਲੋਮਂ. ਦੇਵੇਹਿ ਦਿਨ੍ਨਂ ਚੀਵਰਂ ਦੇਵਦਿਨ੍ਨਂ, ਤਂ ਕਪ੍ਪਰੁਕ੍ਖੇ ਨਿਬ੍ਬਤ੍ਤਂ ਜਾਲਿਨਿਯਾ ਦੇਵਕਞ੍ਞਾਯ ਅਨੁਰੁਦ੍ਧਤ੍ਥੇਰਸ੍ਸ ਦਿਨ੍ਨਵਤ੍ਥਸਦਿਸਂ, ਤਮ੍ਪਿ ਖੋਮਾਦੀਨਂਯੇਵ ਅਨੁਲੋਮਂ ਹੋਤਿ ਤੇਸੁ ਅਞ੍ਞਤਰਭਾਵਤੋ.

ਦੀਘਤੋ ਵਡ੍ਢਕਿਹਤ੍ਥਪ੍ਪਮਾਣਂ, ਵਿਤ੍ਥਾਰਤੋ ਤਤੋ ਉਪਡ੍ਢਪ੍ਪਮਾਣਂ ਵਿਕਪ੍ਪਨੁਪਗਂ ਪਚ੍ਛਿਮਂ. ਅਟ੍ਠਙ੍ਗੁਲਂ ਸੁਗਤਙ੍ਗੁਲੇਨਾਤਿ ਏਤ੍ਥ ਸੁਗਤਙ੍ਗੁਲਂ ਨਾਮ ਇਦਾਨਿ ਮਜ੍ਝਿਮਸ੍ਸ ਪੁਰਿਮਸ੍ਸ ਤੀਣਿ ਅਙ੍ਗੁਲਾਨਿ, ਤੇਨ ਸੁਗਤਙ੍ਗੁਲੇਨ ਅਟ੍ਠਙ੍ਗੁਲਂ ਵਡ੍ਢਕਿਹਤ੍ਥਪ੍ਪਮਾਣਨ੍ਤਿ ਅਤ੍ਥੋ. ਚਤੁਰਙ੍ਗੁਲਵਿਤ੍ਥਤਨ੍ਤਿ ਏਤ੍ਥਾਪਿ ਯਥਾਵੁਤ੍ਤਾਨੁਸਾਰੇਨੇਵ ਅਤ੍ਥੋ ਵੇਦਿਤਬ੍ਬੋ. ਯੇਸਂ ਪਨ ਅਧਿਟ੍ਠਾਨਵਿਕਪ੍ਪਨਾਨਂ ਅਭਾਵਤੋ ਅਧਿਟ੍ਠਿਤਵਿਕਪ੍ਪਿਤੇਸੁ ਅਪਰਿਯਾਪਨ੍ਨਤ੍ਤਾ ਇਦਂ ਅਤਿਰੇਕਚੀਵਰਂ ਨਾਮ ਹੋਤਿ.

ਤਂ ਅਧਿਟ੍ਠਾਨਵਿਕਪ੍ਪਨਂ ਕੇਨਾਕਾਰੇਨ ਜਾਨਿਤਬ੍ਬਨ੍ਤਿ ਅਨੁਯੋਗਂ ਸਨ੍ਧਾਯ ਤਂ ਦਸ੍ਸੇਤੁਂ ‘‘ਯਂ ਪਨ ਵੁਤ੍ਤ’’ਨ੍ਤਿਆਦਿ ਆਰਦ੍ਧਂ. ਤਤ੍ਥ ਯਂ ਪਨ ਵੁਤ੍ਤਨ੍ਤਿ ਅਤਿਰੇਕਚੀਵਰਂ ਦਸ੍ਸੇਤੁਂ ‘‘ਅਧਿਟ੍ਠਿਤਵਿਕਪ੍ਪਿਤੇਸੁ ਅਪਰਿਯਾਪਨ੍ਨਤ੍ਤਾ’’ਤਿ ਅਮ੍ਹੇਹਿ ਯਂ ਵੁਤ੍ਤਨ੍ਤਿ ਅਤ੍ਥੋ. ਤਿਚੀਵਰਂ ਅਧਿਟ੍ਠਾਤੁਨ੍ਤਿ ਨਾਮਂ ਵਤ੍ਵਾ ਅਧਿਟ੍ਠਾਤੁਂ. ਨ ਵਿਕਪ੍ਪੇਤੁਨ੍ਤਿ ਸਙ੍ਘਾਟਿਆਦਿਨਾਮੇਨ ਵਿਕਪ੍ਪੇਤੁਂ ਨ ਅਨੁਜਾਨਾਮੀਤਿ ਅਤ੍ਥੋ. ‘‘ਇਮਂ ਚੀਵਰਂ ਵਿਕਪ੍ਪੇਮੀ’’ਤਿ ਪਨ ਵਿਕਪ੍ਪੇਤੁਂ ਵਟ੍ਟਤਿਯੇਵ. ਸਾਮਞ੍ਞਵਚਨਂ ਪਨ ਤਿਚੀਵਰਸ੍ਸ ਕਣ੍ਡੁਪਟਿਚ੍ਛਾਦਿਵਸ੍ਸਿਕਸਾਟਿਕਾਨਂ ਵਿਯ ਕਾਲਵਸੇਨ ਵਿਸੇਸਾਭਾਵਾ ਚਸ੍ਸ ਵਿਕਪ੍ਪੇਤਬ੍ਬਤਾਤਿ ਦਸ੍ਸਨਤ੍ਥਂ, ਨ ਪਨ ਸਬ੍ਬਥਾ ਵਿਕਪ੍ਪਨਪਟਿਸੇਧਨਤ੍ਥਨ੍ਤਿ ਦਟ੍ਠਬ੍ਬਂ. ਤਥਾ ਹਿ ਪੁਰਾਣਚੀਵਰਂ ਪਚ੍ਚੁਦ੍ਧਰਿਤ੍ਵਾ ਨਵਸ੍ਸ ਅਧਿਟ੍ਠਾਨਵਚਨਤੋ, ‘‘ਅਨਾਪਤ੍ਤਿ ਅਧਿਟ੍ਠੇਤਿ ਵਿਕਪ੍ਪੇਤੀ’’ਤਿਆਦਿਵਚਨਤੋ (ਪਾਰਾ. ੪੬੯) ਚ ਤਿਚੀਵਰਸ੍ਸਪਿ ਵਿਕਪ੍ਪਨਾਯ ਓਕਾਸੋ ਦਿਨ੍ਨੋ. ਏਸ ਨਯੋ ਸਬ੍ਬਤ੍ਥ. ਤਿਚੀਵਰਾਦੀਨਿ ਹਿ ਅਧਿਟ੍ਠਹਨ੍ਤੇਨ ‘‘ਇਮਂ ਸਙ੍ਘਾਟਿਂ ਅਧਿਟ੍ਠਾਮੀ’’ਤਿਆਦਿਨਾ ਤਂ ਤਂ ਨਾਮਂ ਵਤ੍ਵਾ ਅਧਿਟ੍ਠਾਤਬ੍ਬਂ. ਵਿਕਪ੍ਪੇਨ੍ਤੇਨ ਪਨ ‘‘ਇਮਂ ਸਙ੍ਘਾਟਿ’’ਨ੍ਤਿਆਦਿਨਾ ਤਸ੍ਸ ਤਸ੍ਸ ਚੀਵਰਸ੍ਸ ਨਾਮਂ ਅਗ੍ਗਹੇਤ੍ਵਾ ‘‘ਇਮਂ ਚੀਵਰਂ ਤੁਯ੍ਹਂ ਵਿਕਪ੍ਪੇਮੀ’’ਤਿ ਵਿਕਪ੍ਪੇਤਬ੍ਬਂ. ਤਿਚੀਵਰਂ ਵਾ ਹੋਤੁ, ਅਞ੍ਞਂ ਵਾ, ਯਦਿ ਤਂ ਤਂ ਨਾਮਂ ਗਹੇਤ੍ਵਾ ਵਿਕਪ੍ਪੇਤਿ, ਅਵਿਕਪ੍ਪਿਤਂ ਹੋਤਿ, ਅਤਿਰੇਕਚੀਵਰਟ੍ਠਾਨੇਯੇਵ ਤਿਟ੍ਠਤਿ. ਤਤੋ ਪਰਂ ਵਿਕਪ੍ਪੇਤੁਨ੍ਤਿ ਚਤੁਮਾਸਤੋ ਪਰਂ ‘‘ਇਮਂ ਚੀਵਰਂ ਵਿਕਪ੍ਪੇਮੀ’’ਤਿ ਵਿਕਪ੍ਪੇਤੁਂ. ਇਦਞ੍ਚ ਪਰਿਭੁਞ੍ਜਿਤੁਂ ਅਨੁਞ੍ਞਾਤਂ. ਕੇਚਿ ਪਨ (ਸਾਰਤ੍ਥ. ਟੀ. ੨.੪੬੯) ‘‘ਤਤੋ ਪਰਂ ਵਿਕਪ੍ਪੇਤ੍ਵਾ ਯਾਵ ਆਗਾਮਿਸਂਵਚ੍ਛਰੇ ਵਸ੍ਸਾਨਂ ਚਤੁਮਾਸਂ, ਤਾਵ ਠਪੇਤੁਂ ਅਨੁਞ੍ਞਾਤ’’ਨ੍ਤਿ ਵਦਨ੍ਤਿ. ਤਤੋ ਪਰਨ੍ਤਿ ਆਬਾਧਤੋ ਪਰਂ. ‘‘ਇਮਾਸਞ੍ਚ ਪਨ ਵਸ੍ਸਿਕਸਾਟਿਕਕਣ੍ਡੁਪਟਿਚ੍ਛਾਦੀਨਂ ਤਤੋ ਪਰਂ ਵਿਕਪ੍ਪੇਤ੍ਵਾ ਪਰਿਭੋਗਸ੍ਸ ਅਨੁਞ੍ਞਾਤਤ੍ਤਾ ਤਥਾਵਿਕਪ੍ਪਿਤਂ ਅਞ੍ਞਨਾਮੇਨ ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਿਤਬ੍ਬ’’ਨ੍ਤਿ ਗਣ੍ਠਿਪਦੇਸੁ ਵੁਤ੍ਤਂ. ਅਧਿਟ੍ਠਾਤਬ੍ਬਵਿਕਪ੍ਪੇਤਬ੍ਬਤਾ ਜਾਨਿਤਬ੍ਬਾਤਿ ਅਧਿਟ੍ਠਾਤਬ੍ਬਂ ਵਿਕਪ੍ਪੇਤਬ੍ਬਨ੍ਤਿ ਏਵਂ ਅਧਿਟ੍ਠਾਨਵਿਕਪ੍ਪਨਾ ਜਾਨਿਤਬ੍ਬਾਤਿ ਅਤ੍ਥੋ.

ਪਞ੍ਚਪਰਿਮਾਣਂ ਅਸ੍ਸਾਤਿ ਪਞ੍ਚਕਂ, ਮੁਟ੍ਠਿਸ੍ਸ ਮੁਟ੍ਠਿਹਤ੍ਥਸ੍ਸ ਸਮ੍ਬਨ੍ਧਂ ਪਞ੍ਚਕਂ ਮੁਟ੍ਠਿਪਞ੍ਚਕਂ. ਏਸ ਨ ਯੋ ਮੁਟ੍ਠਿਤ੍ਤਿਕਨ੍ਤਿ ਏਤ੍ਥਾਪਿ. ਪਾਰੁਪਨੇਨਪਿ ਸਕ੍ਕਾ ਨਾਭਿਂ ਪਟਿਚ੍ਛਾਦੇਤੁਨ੍ਤਿ ਆਹ ‘‘ਦ੍ਵਿਹਤ੍ਥੋਪਿ ਵਟ੍ਟਤੀ’’ਤਿ. ਨ ਕੇਵਲਂ ਅਡ੍ਢਤੇਯ੍ਯੋਵ ਵਟ੍ਟਤਿ, ਅਥ ਖੋ ਦ੍ਵਿਹਤ੍ਥੋਪਿ ਵਟ੍ਟਤੀਤਿ ਪਿ-ਸਦ੍ਦਸ੍ਸ ਅਤ੍ਥੋ ਦਟ੍ਠਬ੍ਬੋ. ਅਤਿਰੇਕਞ੍ਚਾਤਿ ਸੁਗਤਚੀਵਰਪ੍ਪਮਾਣਮ੍ਪਿ ਤਤੋ ਅਧਿਕਮ੍ਪਿ. ਪਚ੍ਚੁਦ੍ਧਰਾਮੀਤਿ ਠਪੇਮਿ, ਪਰਿਚ੍ਚਜਾਮੀਤਿ ਵਾ ਅਤ੍ਥੋ. ‘‘ਇਮਂ ਚੀਵਰਂ ਸਙ੍ਘਾਟਿਂ ਅਧਿਟ੍ਠਾਮੀ’’ਤਿ (ਸਾਰਤ੍ਥ. ਟੀ. ੨.੪੬੯) ਏਵਮ੍ਪਿ ਵਤ੍ਤੁਂ ਵਟ੍ਟਤਿ. ਕਾਯਵਿਕਾਰਂ ਕਰੋਨ੍ਤੇਨਾਤਿ ਹਤ੍ਥਾਦਿਨਾ ਚੀਵਰਂ ਪਰਾਮਸਨ੍ਤੇਨ, ਚਾਲੇਨ੍ਤੇਨ ਵਾ. ਇਦਞ੍ਹਿ ਅਧਿਟ੍ਠਾਨਂ ਯੇਨ ਕੇਨਚਿ ਸਰੀਰਾਵਯਵੇਨ ਅਫੁਸਨ੍ਤਸ੍ਸ ਨ ਵਟ੍ਟਤਿ. ਦੁਵਿਧਨ੍ਤਿ ਸਮ੍ਮੁਖਾਪਰਮ੍ਮੁਖਭੇਦੇਨ ਦੁਵਿਧਂ. ਵਾਚਾ ਭਿਨ੍ਦਿਤਬ੍ਬਾਤਿ ਵਚਨਂ ਨਿਚ੍ਛਾਰੇਤਬ੍ਬਂ. ਅਨ੍ਤੋਗਬ੍ਭਾਦੀਸੂਤਿ ਅਨ੍ਤੋਗਬ੍ਭਉਪਰਿਪਾਸਾਦੇਸੁ. ਸਾਮਨ੍ਤਵਿਹਾਰੇਤਿ ਯਤ੍ਥ ਤਦਹੇਵ ਗਨ੍ਤ੍ਵਾ ਨਿਵਤ੍ਤੇਤੁਂ ਸਕ੍ਕਾ, ਏਵਰੂਪੇ ਸਮੀਪਵਿਹਾਰੇ. ਇਦਞ੍ਚ ਦੇਸਨਾਸੀਸਮਤ੍ਤਂ, ਤਸ੍ਮਾ ਦੂਰੇ ਠਿਤਮ੍ਪਿ ਅਧਿਟ੍ਠਾਤਬ੍ਬਨ੍ਤਿ ਵਦਨ੍ਤਿ. ‘‘ਠਪਿਤਟ੍ਠਾਨਂ ਸਲ੍ਲਕ੍ਖੇਤ੍ਵਾ’’ਤਿ ਇਮਿਨਾ ਚੀਵਰਸਂਲਕ੍ਖਣਂ ਵੁਤ੍ਤਂ. ਨ ਹਿ ਠਪਿਤਟ੍ਠਾਨਮਤ੍ਤਸਲ੍ਲਕ੍ਖਣੇਨ ਕਿਞ੍ਚਿ ਪਯੋਜਨਂ ਅਤ੍ਥਿ.

ਅਧਿਟ੍ਠਹਿਤ੍ਵਾ ਠਪਿਤਵਤ੍ਥੇਹੀਤਿ ਪਚ੍ਚਤ੍ਥਰਣਮੁਖਪੁਞ੍ਛਨਚੋਲ਼ਪਰਿਕ੍ਖਾਰਚੋਲ਼ਵਸੇਨ ਅਧਿਟ੍ਠਹਿਤ੍ਵਾ ਠਪਿਤਵਤ੍ਥੇਹਿ. ਅਧਿਟ੍ਠਾਨਤੋ ਪੁਬ੍ਬੇ ਸਙ੍ਘਾਟਿਆਦਿਵੋਹਾਰਸ੍ਸ ਅਭਾਵਤੋ ‘‘ਇਮਂ ਪਚ੍ਚੁਦ੍ਧਰਾਮੀ’’ਤਿ ਪਚ੍ਚਤ੍ਥਰਣਾਦੀਨਂ ਵਿਸੁਂ ਪਚ੍ਚੁਦ੍ਧਰਣਵਿਧਿਂ ਦਸ੍ਸੇਤਿ. ਪਚ੍ਚਤ੍ਥਰਣਾਦਿਨਾਮੇਨ ਪਨ ਅਧਿਟ੍ਠਾਤਬ੍ਬਤ੍ਤਾ ‘‘ਇਮਂ ਪਚ੍ਚਤ੍ਥਰਣਂ ਪਚ੍ਚੁਦ੍ਧਰਾਮੀ’’ਤਿਆਦਿਨਾ ਵੁਤ੍ਤੇਪਿ ਨੇਵਤ੍ਥਿ ਦੋਸੋ. ਪੁਨ ਅਧਿਟ੍ਠਾਤਬ੍ਬਾਨੀਤਿ ਸਙ੍ਘਾਟਿਆਦਿਨਾਮੇਨ ਅਧਿਟ੍ਠਾਤਬ੍ਬਾਨਿ. ਪਰਿਕ੍ਖਾਰਚੋਲ਼ਕਸ੍ਸ ਪਨ ਪਰਿਕ੍ਖਾਰਚੋਲ਼ਵਸੇਨ ਅਧਿਟ੍ਠਹਿਤ੍ਵਾ ਠਪਿਤਵਤ੍ਥੇਹਿਪਿ ਸਙ੍ਘਾਟਿਆਦਿਮ੍ਹਿ ਕਤੇ ਪਚ੍ਚੁਦ੍ਧਰਿਤ੍ਵਾ ਪੁਨ ਅਧਿਟ੍ਠਾਤਬ੍ਬਨ੍ਤਿ ਨਤ੍ਥਿ. ਪੁਬ੍ਬੇ ਕਤਾਧਿਟ੍ਠਾਨਮੇਵ ਅਧਿਟ੍ਠਾਨਂ. ਅਧਿਟ੍ਠਿਤੇਨ ਪਨ ਤੇਨ ਸਦ੍ਧਿਂ ਮਹਨ੍ਤਤਰਮੇਵ ਦੁਤਿਯਂ ਪਟ੍ਟਂ ਵਾ ਖਣ੍ਡਂ ਵਾ ਸਂਸਿਬ੍ਬਨ੍ਤੇਨ ਅਧਿਟ੍ਠਾਤਬ੍ਬਂ, ਸਮੇ ਵਾ ਖੁਦ੍ਦਕੇ ਵਾ ਅਧਿਟ੍ਠਾਨਕਿਚ੍ਚਂ ਨਤ੍ਥਿ. ਸੁਖਪਰਿਭੋਗਤ੍ਥਨ੍ਤਿ ਵਿਪ੍ਪਵਾਸਦੋਸਾਭਾਵਤੋ ਯਤ੍ਥ ਕਤ੍ਥਚਿ ਠਪੇਤ੍ਵਾ ਧਮ੍ਮਸ੍ਸਵਨਾਦਿਨਾ ਕਿਚ੍ਚੇਨ ਅਞ੍ਞਤ੍ਥ ਅਰੁਣਂ ਉਟ੍ਠਾਪੇਤ੍ਵਾ ਆਗਨ੍ਤ੍ਵਾ ਨਿਸ੍ਸਜ੍ਜਨਂ ਵਿਨਾਵ ਪਰਿਭੁਞ੍ਜਿਤੁਂ ਸਕ੍ਕੁਣੇਯ੍ਯਤਾਯ ਸੁਖਪਰਿਭੋਗਤ੍ਥਂ. ਪਰਿਕ੍ਖਾਰਚੋਲ਼ਂ ਅਧਿਟ੍ਠਾਤੁਨ੍ਤਿ ਪਰਿਕ੍ਖਾਰਚੋਲ਼ਂ ਕਤ੍ਵਾ ਅਧਿਟ੍ਠਾਤੁਂ.

ਅਨਤਿਰਿਤ੍ਤਪਮਾਣਾਤਿ ‘‘ਦੀਘਸੋ ਛ ਵਿਦਤ੍ਥਿਯੋ ਸੁਗਤਵਿਦਤ੍ਥਿਯਾ, ਤਿਰਿਯਂ ਅਡ੍ਢਤੇਯ੍ਯਾ’’ਤਿ (ਪਾਚਿ. ੫੪੩) ਵੁਤ੍ਤਪ੍ਪਮਾਣਤੋ ਅਨਧਿਕਪਮਾਣਾ. ਪਚ੍ਚੁਦ੍ਧਰਿਤ੍ਵਾ ਵਿਕਪ੍ਪੇਤਬ੍ਬਾਤਿ ਵਸ੍ਸਿਕਸਾਟਿਕਭਾਵਤੋ ਅਪਨੇਤ੍ਵਾ ਵਿਕਪ੍ਪੇਤਬ੍ਬਾ, ਹੇਮਨ੍ਤਸ੍ਸ ਪਠਮਦਿਵਸਤੋ ਪਟ੍ਠਾਯ ਅਨ੍ਤੋਦਸਾਹੇ ਵਸ੍ਸਿਕਸਾਟਿਕਾਵਸ੍ਸਿਕਸਾਟਿਕਭਾਵਤੋ ਅਪਨੇਤ੍ਵਾ ‘‘ਇਮਂ ਚੀਵਰਂ ਤੁਯ੍ਹਂ ਵਿਕਪ੍ਪੇਮੀ’’ਤਿਆਦਿਨਾ ਨਯੇਨ ਵਿਕਪ੍ਪੇਤਬ੍ਬਾਤਿ ਵੁਤ੍ਤਂ ਹੋਤਿ. ਅਞ੍ਞਥਾ ਹਿ ‘‘ਵਸ੍ਸਿਕਸਾਟਿਕਾ ਵਸ੍ਸਾਨਮਾਸਾਤਿਕ੍ਕਮੇਨਾਪਿ, ਕਣ੍ਡੁਪਟਿਚ੍ਛਾਦਿ ਆਬਾਧਵੂਪਸਮੇਨਾਪਿ ਅਧਿਟ੍ਠਾਨਂ ਵਿਜਹਤੀ’’ਤਿ (ਕਙ੍ਖਾ. ਅਟ੍ਠ. ਕਥਿਨਸਿਕ੍ਖਾਪਦਵਣ੍ਣਨਾ) ਵਕ੍ਖਮਾਨਤ੍ਤਾ ਵਸ੍ਸਾਨਮਾਸਤੋ ਪਰਂ ਅਸਤਿ ਅਧਿਟ੍ਠਾਨੇ ਕਿਂ ਪਚ੍ਚੁਦ੍ਧਰੇਯ੍ਯਾਤਿ ‘‘ਪਚ੍ਚੁਦ੍ਧਰਿਤ੍ਵਾ’’ਤਿ ਵਚਨਮੇਵ ਨੋਪਪਜ੍ਜੇਯ੍ਯ.

ਕੇਚਿ ਪਨ (ਸਾਰਤ੍ਥ. ਟੀ. ੨.੪੬੯) ‘‘ਯਥਾ ਕਥਿਨਮਾਸਬ੍ਭਨ੍ਤਰੇ ਉਪ੍ਪਨ੍ਨਚੀਵਰਂ ਕਥਿਨਮਾਸਾਤਿਕ੍ਕਮੇ ਨਿਸ੍ਸਗ੍ਗਿਯਂ ਹੋਤਿ, ਏਵਮਯਂ ਵਸ੍ਸਿਕਸਾਟਿਕਾਪਿ ਵਸ੍ਸਾਨਮਾਸਾਤਿਕ੍ਕਮੇ ਨਿਸ੍ਸਗ੍ਗਿਯਾ ਹੋਤਿ. ਤਸ੍ਮਾ ਕਤ੍ਤਿਕਪੁਣ੍ਣਮਦਿਵਸੇ ਪਚ੍ਚੁਦ੍ਧਰਿਤ੍ਵਾ ਤਤੋ ਪਰਂ ਹੇਮਨ੍ਤਸ੍ਸ ਪਠਮਦਿਵਸੇ ਵਿਕਪ੍ਪੇਤਬ੍ਬਾਤਿ ਏਵਮਤ੍ਥੋ ਗਹੇਤਬ੍ਬੋ, ਪਚ੍ਚੁਦ੍ਧਰਿਤ੍ਵਾ ਤਤੋ ਪਰਂ ਵਿਕਪ੍ਪੇਤਬ੍ਬਾਤਿ ਪਦਯੋਜਨਾ ਵੇਦਿਤਬ੍ਬਾ’’ਤਿ ਚ ਵਦਨ੍ਤਿ, ਤਂ ਨ ਯੁਤ੍ਤਂ. ਕਥਿਨਮਾਸੇ ਉਪ੍ਪਨ੍ਨਞ੍ਹਿ ਚੀਵਰਂ ਅਤਿਰੇਕਚੀਵਰਟ੍ਠਾਨੇ ਠਿਤਤ੍ਤਾ ਅਵਸਾਨਦਿਵਸੇ ਅਨਧਿਟ੍ਠਿਤਂ ਕਥਿਨਮਾਸਾਤਿਕ੍ਕਮੇ ਨਿਸ੍ਸਗ੍ਗਿਯਂ ਹੋਤਿ. ਅਯਂ ਪਨ ਵਸ੍ਸਿਕਸਾਟਿਕਾ ਅਧਿਟ੍ਠਹਿਤ੍ਵਾ ਠਪਿਤਤ੍ਤਾ ਨ ਤੇਨ ਸਦਿਸਾਤਿ ਵਸ੍ਸਾਨਾਤਿਕ੍ਕਮੇ ਕਥਂ ਨਿਸ੍ਸਗ੍ਗਿਯਂ ਹੋਤਿ ਅਨਧਿਟ੍ਠਿਤਅਵਿਕਪ੍ਪਿਤਮੇਵ ਹਿ ਤਂ ਕਾਲਾਤਿਕ੍ਕਮੇ ਨਿਸ੍ਸਗ੍ਗਿਯਂ ਹੋਤਿ, ਤਸ੍ਮਾ ਹੇਮਨ੍ਤੇਪਿ ਵਸ੍ਸਿਕਸਾਟਿਕਾ ਦਸਾਹਪਰਿਹਾਰਂ ਲਭਤਿ. ਏਵਂ ਕਣ੍ਡੁਪਟਿਚ੍ਛਾਦਿਪਿ ਅਧਿਟ੍ਠਾਨਵਿਜਹਨਤੋ ਪਰਂ ਦਸਾਹਪਰਿਹਾਰਂ ਲਭਤਿ. ਦਸਾਹਂ ਪਨ ਅਨਤਿਕ੍ਕਾਮੇਤ੍ਵਾ ਵਿਕਪ੍ਪੇਤਬ੍ਬਾ. ਨਹਾਨਤ੍ਥਾਯ ਅਨੁਞ੍ਞਾਤਤ੍ਤਾ ਵਣ੍ਣਭੇਦਮਤ੍ਤਰਤ੍ਤਾਪਿ ਚੇਸਾ ਵਟ੍ਟਤੀਤਿ ਵੁਤ੍ਤਂ. ‘‘ਦ੍ਵੇ ਪਨ ਨ ਵਟ੍ਟਨ੍ਤੀ’’ਤਿ ਦ੍ਵਿਨ੍ਨਂ ਅਧਿਟ੍ਠਾਨਾਭਾਵਤੋ ਵੁਤ੍ਤਂ. ‘‘ਸਚੇ ਵਸ੍ਸਾਨੇ ਅਪਰਾ ਵਸ੍ਸਿਕਸਾਟਿਕਾ ਉਪ੍ਪਨ੍ਨਾ ਹੋਤਿ, ਪੁਰਿਮਵਸ੍ਸਿਕਸਾਟਿਕਂ ਪਚ੍ਚੁਦ੍ਧਰਿਤ੍ਵਾ, ਵਿਕਪ੍ਪੇਤ੍ਵਾ ਚ ਅਧਿਟ੍ਠਾਤਬ੍ਬਾ’’ਤਿ ਵਦਨ੍ਤਿ.

ਪਮਾਣਯੁਤ੍ਤਨ੍ਤਿ ‘‘ਦੀਘਸੋ ਸੁਗਤਵਿਦਤ੍ਥਿਯਾ ਦ੍ਵੇ ਵਿਦਤ੍ਥਿਯੋ, ਵਿਤ੍ਥਾਰਤੋ ਦਿਯਡ੍ਢਂ ਦਸਾ ਵਿਦਤ੍ਥੀ’’ਤਿ (ਪਾਚਿ. ੫੩੧ ਆਦਯੋ) ਇਮਿਨਾ ਪਮਾਣੇਨ ਯੁਤ੍ਤਂ. ਪਮਾਣਿਕਾਤਿ ‘‘ਸੁਗਤਵਿਦਤ੍ਥਿਯਾ ਦੀਘਸੋ ਚਤਸ੍ਸੋ ਵਿਦਤ੍ਥਿਯੋ, ਤਿਰਿਯਂ ਦ੍ਵੇ ਵਿਦਤ੍ਥਿਯੋ’’ਤਿ ਏਵਂ ਵੁਤ੍ਤਪ੍ਪਮਾਣਯੁਤ੍ਤਾ. ਪਚ੍ਚੁਦ੍ਧਰਿਤ੍ਵਾ ਵਿਕਪ੍ਪੇਤਬ੍ਬਾਤਿ ਏਤ੍ਥ ਯਂ ਵਤ੍ਤਬ੍ਬਂ, ਤਂ ਹੇਟ੍ਠਾ ਵੁਤ੍ਤਮੇਵ. ਯਸ੍ਮਾ ਭਿਕ੍ਖੂਨਂ ਤਿਚੀਵਰੇ ਪਰਿਪੁਣ੍ਣੇ, ਅਤ੍ਥੇ ਚ ਸਤਿ ਪਰਿਸ੍ਸਾਵਨਾਦੀਹਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਪਰਿਕ੍ਖਾਰਚੋਲ਼ਕ’’ਨ੍ਤਿ (ਮਹਾਵ. ੩੫੭) ਬਹੂਨਂ ਪਤ੍ਤਤ੍ਥਵਿਕਪਰਿਸ੍ਸਾਵਨਾਦੀਨਂ ਸਙ੍ਗਹਵਸੇਨ ਪਰਿਕ੍ਖਾਰਚੋਲ਼ਾਧਿਟ੍ਠਾਨਮਨੁਞ੍ਞਾਤਂ, ਤਸ੍ਮਾ ‘‘ਪਰਿਕ੍ਖਾਰਚੋਲ਼ੇ ਗਣਨਾ ਨਤ੍ਥੀ’’ਤਿਆਦਿ ਵੁਤ੍ਤਂ. ਭਗਵਤਾ ਹਿ ਯਂ ਯਂ ਭਿਕ੍ਖੂ ਲਭਨ੍ਤਿ, ਤਂ ਤਂ ਇਮਿਨਾ ਵਿਧਾਨੇਨ ਅਧਿਟ੍ਠਹਿਤ੍ਵਾ ਪੁਨ ‘‘ਯੇਨ ਯੇਨ ਪਰਿਸ੍ਸਾਵਨਾਦਿਨਾ ਅਤ੍ਥੋ ਹੋਤਿ, ਤਂ ਤਂ ਕਤ੍ਵਾ ਗਣ੍ਹਨ੍ਤੂ’’ਤਿ ਅਨੁਕਮ੍ਪਾਯ ਅਨੁਞ੍ਞਾਤਂ. ਤੇਨੇਵਾਹ ‘‘ਥਵਿਕਾਪੀ’’ਤਿਆਦਿ. ਆਦਿਸਦ੍ਦੇਨ ‘‘ਏਤਾਨਿ ਚੀਵਰਾਨਿ ਪਰਿਕ੍ਖਾਰਚੋਲ਼ਾਨਿ ਅਧਿਟ੍ਠਾਮੀ’’ਤਿ ਅਸਮ੍ਮੁਖਾਧਿਟ੍ਠਾਨਂ ਸਙ੍ਗਣ੍ਹਾਤਿ. ‘‘ਸੇਨਾਸਨਪਰਿਕ੍ਖਾਰਤ੍ਥਾਯ ਦਿਨ੍ਨਪਚ੍ਚਤ੍ਥਰਣੇ ਚਾ’’ਤਿ ਇਮਿਨਾ ਅਤ੍ਤਨੋ ਸਨ੍ਤਕਂ ਪਟਿਕ੍ਖਿਪਤਿ. ਕੇਚਿ ਪਨ (ਸਾਰਤ੍ਥ. ਟੀ. ੨.੪੬੯) ‘‘ਅਨਿਵਾਸੇਤ੍ਵਾ, ਅਪਾਰੁਪਿਤ੍ਵਾ ਚ ਕੇਵਲਂ ਪਞ੍ਚਪੀਠੇਸੁਯੇਵ ਅਤ੍ਥਰਿਤ੍ਵਾ ਪਰਿਭੁਞ੍ਜਿਯਮਾਨਂ ਪਚ੍ਚਤ੍ਥਰਣਂ ਅਤ੍ਤਨੋ ਸਨ੍ਤਕਮ੍ਪਿ ਅਨਧਿਟ੍ਠਿਤਂ ਵਟ੍ਟਤੀ’’ਤਿ ਵਦਨ੍ਤਿ, ਤਂ ਅਯੁਤ੍ਤਂ ਸੇਨਾਸਨਪਰਿਕ੍ਖਾਰਤ੍ਥਾਯ ਦਿਨ੍ਨ’’ਨ੍ਤਿ ਪਚ੍ਚਤ੍ਥਰਣਸ੍ਸ ਵਿਸੇਸਿਤਤ੍ਤਾ. ਭਿਸਿਬਿਬ੍ਬੋਹਨਪਾਵਾਰਕੋਜਵਾਨਮ੍ਪਿ ਸੇਨਾਸਨਪਰਿਕ੍ਖਾਰਤੋਯੇਵ ਅਧਿਟ੍ਠਾਨਕਿਚ੍ਚਂ ਨਤ੍ਥੀਤਿ ਵੇਦਿਤਬ੍ਬਂ.

ਅਧਿਟ੍ਠਿਤਞ੍ਚ ਪਨੇਤਂ ਚੀਵਰਂ ਪਰਿਭੁਞ੍ਜਤੋ ਕਥਂ ਅਧਿਟ੍ਠਾਨਂ ਵਿਜਹਤੀਤਿ ਆਹ ‘‘ਸਬ੍ਬਞ੍ਚ ਪਨੇਤ’’ਨ੍ਤਿਆਦਿ. ਤਤ੍ਥ ਅਚ੍ਛਿਨ੍ਦਿਤ੍ਵਾ ਗਹਣੇਨਾਤਿ ਚੋਰਾਦੀਹਿ ਅਚ੍ਛਿਨ੍ਦਿਤ੍ਵਾ ਗਹਣੇਨ. ਹੀਨਾਯਾਵਤ੍ਤਨੇਨਾਤਿ ਗਿਹਿਭਾਵਾਯ ਆਵਤ੍ਤਨੇਨ, ਵਿਬ੍ਭਮੇਨਾਤਿ ਅਤ੍ਥੋ, ‘‘ਸੀਲਵਨ੍ਤੋਵ ਹੁਤ੍ਵਾ ਗਿਹੀ ਭਵਿਸ੍ਸਾਮੀ’’ਤਿ ਸੇਤਵਤ੍ਥਨਿਵਾਸਨੇਨਾਤਿ ਵੁਤ੍ਤਂ ਹੋਤਿ. ‘‘ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨਸ੍ਸ ਸੇਤਵਤ੍ਥਨਿਵਾਸੋ ਵਾ ਕਾਸਾਯਚਜਨਂ ਵਾ ਹੀਨਾਯਾਵਤ੍ਤਨ’’ਨ੍ਤਿ ਕੇਚਿ. ‘‘‘ਹੀਨਾਯਾਵਤ੍ਤਨੇਨਾ’ਤਿ ਇਮਿਨਾ ਭਿਕ੍ਖੁਨਿਯਾ ਏਵ ਅਧਿਟ੍ਠਾਨਵਿਜਹਨਂ ਗਹਿਤਂ ਹੋਤਿ. ਸਾ ਹਿ ਯਦਾ ਵਿਬ੍ਭਮਤਿ, ਤਦਾ ਅਸ੍ਸਮਣੀ ਹੋਤਿ. ਭਿਕ੍ਖੁ ਪਨ ਵਿਬ੍ਭਮਨ੍ਤੋਪਿ ਯਾਵ ਸਿਕ੍ਖਂ ਨ ਪਚ੍ਚਕ੍ਖਾਤਿ, ਤਾਵ ਭਿਕ੍ਖੁਯੇਵਾਤਿ ਅਧਿਟ੍ਠਾਨਂ ਨ ਵਿਜਹਤੀ’’ਤਿ ਅਪਰੇ. ਸਿਕ੍ਖਾਪਚ੍ਚਕ੍ਖਾਨੇਨਾਤਿ ਲਿਙ੍ਗੇ ਠਿਤਸ੍ਸੇਵ ਸਿਕ੍ਖਾਯ ਪਚ੍ਚਕ੍ਖਾਨੇਨ. ਯੋ ਹਿ ਭਿਕ੍ਖੁਲਿਙ੍ਗੇ ਠਿਤੋਵ ਸਿਕ੍ਖਂ ਪਚ੍ਚਕ੍ਖਾਤਿ, ਤਸ੍ਸ ਕਾਯਲਗ੍ਗਮ੍ਪਿ ਚੀਵਰਂ ਅਧਿਟ੍ਠਾਨਂ ਵਿਜਹਤੀਤਿ. ਕਾਲਙ੍ਕਿਰਿਯਾਯਾਤਿ ਮਰਣੇਨ. ਲਿਙ੍ਗਪਰਿਵਤ੍ਤਨੇਨਾਤਿ ਪੁਰਿਸਲਿਙ੍ਗਸ੍ਸ, ਇਤ੍ਥਿਲਿਙ੍ਗਸ੍ਸ ਵਾ ਪਰਿਵਤ੍ਤਨੇਨ, ਪੁਰਿਸਸ੍ਸ ਇਤ੍ਥਿਲਿਙ੍ਗਪਾਤੁਭਾਵੇਨ, ਇਤ੍ਥਿਯਾ ਵਾ ਪੁਰਿਸਲਿਙ੍ਗਪਾਤੁਭਾਵੇਨਾਤਿ ਵੁਤ੍ਤਂ ਹੋਤਿ.

ਕਨਿਟ੍ਠਙ੍ਗੁਲਿਨਖਪਿਟ੍ਠਿਪ੍ਪਮਾਣੇਨਾਤਿ ਹੇਟ੍ਠਿਮਪਰਿਚ੍ਛੇਦਂ ਦਸ੍ਸੇਤਿ. ਓਰਤੋਤਿ ਅਬ੍ਭਨ੍ਤਰਤੋ. ਯੋ ਪਨ ਦੁਬ੍ਬਲਟ੍ਠਾਨੇ ਪਠਮਂ ਅਗ੍ਗਲ਼ਂ ਦਤ੍ਵਾ ਪਚ੍ਛਾ ਦੁਬ੍ਬਲਟ੍ਠਾਨਂ ਛਿਨ੍ਦਿਤ੍ਵਾ ਅਪਨੇਤਿ, ਅਧਿਟ੍ਠਾਨਂ ਨ ਭਿਜ੍ਜਤਿ. ਮਣ੍ਡਲਪਰਿਵਤ੍ਤਨੇਪਿ ਏਸੇਵ ਨਯੋ. ਦੁਪਟ੍ਟਸ੍ਸ ਪਨ ਏਕਸ੍ਮਿਂ ਪਟਲੇ ਛਿਦ੍ਦੇ ਵਾ ਜਾਤੇ, ਗਲਿਤੇ ਵਾ ਅਧਿਟ੍ਠਾਨਂ ਨ ਭਿਜ੍ਜਤਿ. ਖੁਦ੍ਦਕਂ ਚੀਵਰਂ ਮਹਨ੍ਤਂ ਕਰੋਤਿ, ਮਹਨ੍ਤਂ ਵਾ ਖੁਦ੍ਦਕਂ ਕਰੋਤਿ, ਅਧਿਟ੍ਠਾਨਂ ਨ ਭਿਜ੍ਜਤਿ. ਉਭੋ ਕੋਟਿਯੋ ਮਜ੍ਝੇ ਕਰੋਨ੍ਤੋ ਸਚੇ ਪਨ ਪਠਮਂ ਛਿਨ੍ਦਿਤ੍ਵਾ ਪਚ੍ਛਾ ਘਟੇਤਿ, ਅਧਿਟ੍ਠਾਨਂ ਭਿਜ੍ਜਤਿ. ਅਥ ਘਟੇਤ੍ਵਾ ਛਿਨ੍ਦਤਿ, ਨ ਭਿਜ੍ਜਤਿ. ਰਜਕੇਹਿ ਧੋਵਾਪੇਤ੍ਵਾ ਸੇਤਂ ਕਰੋਨ੍ਤਸ੍ਸਾਪਿ ਅਧਿਟ੍ਠਾਨਂ ਅਧਿਟ੍ਠਾਨਮੇਵ. ਵਸ੍ਸਾਨਮਾਸਾਤਿਕ੍ਕਮੇਨਾਪੀਤਿ ਏਤ੍ਥ ਪਿ-ਸਦ੍ਦੋ ਸਮ੍ਪਿਣ੍ਡਨਤ੍ਥੋ. ਤੇਨ ਨ ਕੇਵਲਂ ਪੁਬ੍ਬੇ ਵੁਤ੍ਤੇਨ ਦਾਨਾਦਿਨਾ ਅਟ੍ਠਵਿਧੇਨੇਵ ਕਾਰਣੇਨ ਵਸ੍ਸਿਕਸਾਟਿਕਾ ਅਧਿਟ੍ਠਾਨਂ ਵਿਜਹਤਿ, ਅਥ ਖੋ ਵਸ੍ਸਾਨਮਾਸਾਤਿਕ੍ਕਮੇਨਪੀਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਏਸ ਨਯੋ ਆਬਾਧਵੂਪਸਮੇਨਾਪੀਤਿ ਏਤ੍ਥਾਪਿ. ਵਿਕਪ੍ਪਨਸਿਕ੍ਖਾਪਦੇਤਿ (ਪਾਚਿ. ੩੭੨ ਆਦਯੋ) ਪਾਚਿਤ੍ਤਿਯੇ ਸੁਰਾਪਾਨਵਗ੍ਗਸ੍ਸ ਨਵਮਸਿਕ੍ਖਾਪਦੇ.

ਤਂ ਅਤਿਕ੍ਕਾਮਯਤੋਤਿ ਏਤ੍ਥ ਤਨ੍ਤਿ ਚੀਵਰਂ, ਕਾਲਂ ਵਾ ਪਰਾਮਸਤੀਤਿ ਆਹ ‘‘ਤਂ ਯਥਾਵੁਤ੍ਤਜਾਤਿਪ੍ਪਮਾਣ’’ਨ੍ਤਿਆਦਿ. ਅਸ੍ਸਾਤਿ ਭਿਕ੍ਖੁਸ੍ਸ. ਤਸ੍ਸ ਯੋ ਅਰੁਣੋਤਿ ਤਸ੍ਸ ਚੀਵਰੁਪ੍ਪਾਦਦਿਵਸਸ੍ਸ ਯੋ ਅਤਿਕ੍ਕਨ੍ਤੋ ਅਰੁਣੋ. ਚੀਵਰੁਪ੍ਪਾਦਦਿਵਸੇਨ ਸਦ੍ਧਿਨ੍ਤਿ ਚੀਵਰੁਪ੍ਪਾਦਦਿਵਸਸ੍ਸ ਅਰੁਣੇਨ ਸਦ੍ਧਿਂ. ਦਿਵਸਸਦ੍ਦੇਨ ਚੇਤ੍ਥ ਤਂਦਿਵਸਨਿਸ੍ਸਿਤੋ ਅਰੁਣੋ ਵੁਤ੍ਤੋ. ਇਦਾਨਿ ਯਸ੍ਸ ਚ ਨਿਸ੍ਸਜ੍ਜਿਤਬ੍ਬਂ, ਯਥਾ ਚ ਨਿਸ੍ਸਜ੍ਜਿਤਬ੍ਬਂ, ਤਂ ਦਸ੍ਸੇਤੁਂ ‘‘ਤਂ ਗਹੇਤ੍ਵਾ’’ਤਿਆਦਿ ਵੁਤ੍ਤਂ. ਤਤ੍ਰਾਯਂ ਨਯੋਤਿ ਤਸ੍ਮਿਂ ਨਿਸ੍ਸਜ੍ਜਨੇ ਅਯਂ ਵਿਧਿ. ਅਞ੍ਞਥਾਪੀਤਿ ਭਾਸਨ੍ਤਰੇਨਾਪਿ, ਯਾਯ ਕਾਯਚਿ ਭਾਸਾਯਪੀਤਿ ਅਤ੍ਥੋ. ਪਟਿਬਲੇਨਾਤਿ ਵਤ੍ਤੁਂ ਸਮਤ੍ਥੇਨ. ਆਯਤਿਂ ਸਂਵਰੇਯ੍ਯਾਸੀਤਿ ਉਪਰਿ ਸਂਵਰਮਾਪਜ੍ਜੇਯ੍ਯਾਸਿ, ਸਂਵੁਤਕਾਯਵਚੀਦ੍ਵਾਰੋ ਭਵੇਯ੍ਯਾਸੀਤਿ ਅਤ੍ਥੋ. ਇਮਾਨਿ ਚ ‘‘ਪਸ੍ਸਸੀ’’ਤਿਆਦੀਨਿ ਯਥਾਕ੍ਕਮਂ ਪਟਿਗ੍ਗਾਹਕਦੇਸਕੇਹਿ ਵਤ੍ਤਬ੍ਬਵਚਨਾਨਿ. ਤਥਾ ਹਿ ‘‘ਪਸ੍ਸਸੀ’’ਤਿ ਪਟਿਗ੍ਗਾਹਕੇਨ ਵਤ੍ਤਬ੍ਬਵਚਨਂ, ‘‘ਆਮ ਪਸ੍ਸਾਮੀ’’ਤਿ ਤਦਨੁਦੇਸਕੇਨ ਵਤ੍ਤਬ੍ਬਵਚਨਂ. ‘‘ਆਯਤਿਂ ਸਂਵਰੇਯ੍ਯਾਸੀ’’ਤਿ ਤਦਨੁਪ੍ਪਟਿਗ੍ਗਾਹਕੇਨ ਵਤ੍ਤਬ੍ਬਵਚਨਂ, ‘‘ਸਾਧੁ ਸੁਟ੍ਠੁ ਸਂਵਰਿਸ੍ਸਾਮੀ’’ਤਿ ਤਦਨੁਦੇਸਕੇਨ ਵਤ੍ਤਬ੍ਬਵਚਨਂ. ਇਮਿਨਾ ਚ ਅਤ੍ਤਨੋ ਆਯਤਿਂ ਸਂਵਰੇ ਪਤਿਟ੍ਠਿਤਭਾਵਂ ਦਸ੍ਸੇਤਿ. ਦ੍ਵੀਸੁ, ਪਨ ਸਮ੍ਬਹੁਲਾਸੁ ਵਾਤਿ ਦ੍ਵੀਸੁ ਵਾ ਸਮ੍ਬਹੁਲਾਸੁ ਵਾ ਆਪਤ੍ਤੀਸੁ ਪੁਰਿਮਨਯੇਨੇਵ ਵਚਨਭੇਦੋ ਕਾਤਬ੍ਬੋ. ਞਤ੍ਤਿਯਂ ਆਪਤ੍ਤਿਂ ਸਰਤਿ ਵਿਵਰਤੀਤਿ ਏਤ੍ਥ ‘‘ਦ੍ਵੇ ਆਪਤ੍ਤਿਯੋ’’ਤਿ ਵਾ ‘‘ਸਮ੍ਬਹੁਲਾ ਆਪਤ੍ਤਿਯੋ’’ਤਿ ਵਾ ਵਚਨਭੇਦੋ ਕਾਤਬ੍ਬੋ. ਦ੍ਵੀਸੁ, ਬਹੂਸੁ ਵਾ ਵਚਨਭੇਦੋ ਕਾਤਬ੍ਬੋਤਿ ‘‘ਸਙ੍ਘੋ ਇਮਾਨਿ ਚੀਵਰਾਨੀ’’ਤਿ ਵਤ੍ਥੁਵਸੇਨ ਵਚਨਭੇਦੋ ਕਾਤਬ੍ਬੋ.

ਏਵਂ ਸਙ੍ਘਸ੍ਸ ਨਿਸ੍ਸਜ੍ਜਨਵਿਧਿਂ ਦਸ੍ਸੇਤ੍ਵਾ ਗਣਸ੍ਸ ਨਿਸ੍ਸਜ੍ਜਨਵਿਧਿਂ ਦਸ੍ਸੇਤੁਂ ‘‘ਗਣਸ੍ਸ ਪਨ ਨਿਸ੍ਸਜ੍ਜਨ੍ਤੇਨਾ’’ਤਿਆਦਿਮਾਹ. ਤਤ੍ਥ ਸੇਸਂ ਪੁਰਿਮਸਦਿਸਮੇਵਾਤਿ ਨਿਸ੍ਸਜ੍ਜਨਾਪਤ੍ਤਿਪ੍ਪਟਿਗ੍ਗਹਣਨਿਸ੍ਸਟ੍ਠਚੀਵਰਦਾਨੇਸੁ ‘‘ਆਯਸ੍ਮਨ੍ਤਾਨ’’ਨ੍ਤਿਆਦਿਨਾ ਵੁਤ੍ਤਵਚਨਭੇਦਂ ਵਿਨਾ ਅਵਸੇਸਂ ਸਙ੍ਘਸ੍ਸ ਨਿਸ੍ਸਜ੍ਜਨਾਦੀਸੁ ਵੁਤ੍ਤਸਦਿਸਮੇਵਾਤਿ ਅਤ੍ਥੋ.

ਇਦਾਨਿ ਪੁਗ੍ਗਲਸ੍ਸ ਨਿਸ੍ਸਜ੍ਜਨਵਿਧਿਂ ਦਸ੍ਸੇਤੁਂ ‘‘ਪੁਗ੍ਗਲਸ੍ਸ ਪਨਾ’’ਤਿਆਦਿ ਵੁਤ੍ਤਂ. ਤਤ੍ਥ ਦ੍ਵੀਸੁ, ਤੀਸੁ ਵਾਤਿ ਦ੍ਵੀਸੁ, ਤੀਸੁ ਵਾ ਆਪਤ੍ਤੀਸੁ ਚੇਵ ਦਾਤਬ੍ਬਚੀਵਰੇਸੁ ਚ. ਯਥਾ ਚ ਗਣਸ੍ਸ ਨਿਸ੍ਸਜ੍ਜਨੇ, ਏਵਂ ਦ੍ਵਿਨ੍ਨਂ ਨਿਸ੍ਸਜ੍ਜਨੇਪਿ ਪਾਲ਼ਿ ਵੇਦਿਤਬ੍ਬਾ. ਯਦਿ ਹਿ ਵਿਸੇਸੋ ਭਵੇਯ੍ਯ, ਯਥੇਵ ‘‘ਅਨੁਜਾਨਾਮਿ, ਭਿਕ੍ਖਵੇ, ਤਿਣ੍ਣਂ ਪਾਰਿਸੁਦ੍ਧਿਉਪੋਸਥਂ ਕਾਤੁਂ, ਏਵਞ੍ਚ ਪਨ, ਭਿਕ੍ਖਵੇ, ਕਾਤਬ੍ਬੋ – ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਤੇ ਭਿਕ੍ਖੂ ਞਾਪੇਤਬ੍ਬਾ’’ਤਿਆਦਿਨਾ (ਮਹਾਵ. ੧੬੮) ਨਯੇਨ ਤਿਣ੍ਣਂ ਪਾਰਿਸੁਦ੍ਧਿਉਪੋਸਥਂ ਵਤ੍ਵਾ ‘‘ਅਨੁਜਾਨਾਮਿ, ਭਿਕ੍ਖਵੇ, ਦ੍ਵਿਨ੍ਨਂ ਪਾਰਿਸੁਦ੍ਧਿਉਪੋਸਥਂ ਕਾਤੁਂ, ਏਵਞ੍ਚ ਪਨ, ਭਿਕ੍ਖਵੇ, ਕਤ੍ਤਬ੍ਬੋ – ਥੇਰੇਨ ਭਿਕ੍ਖੁਨਾ ਏਕਂਸਂ ਉਤ੍ਤਰਾਸਙ੍ਗ’’ਨ੍ਤਿਆਦਿਨਾ ਨਯੇਨ ਵਿਸੁਂਯੇਵ ਦ੍ਵਿਨ੍ਨਂ ਪਾਰਿਸੁਦ੍ਧਿਉਪੋਸਥੋ ਵੁਤ੍ਤੋ, ਏਵਂ ਇਧਾਪਿ ਵਿਸੁਂ ਪਾਲ਼ਿਂ ਵਦੇਯ੍ਯ. ਯਸ੍ਮਾ ਪਨ ਨਤ੍ਥਿ, ਤਸ੍ਮਾ ਅਵਤ੍ਵਾਵ ਗਤੋਤਿ ਗਣਸ੍ਸ ਵੁਤ੍ਤਾ ਪਾਲ਼ਿਯੇਵੇਤ੍ਥ ਪਾਲ਼ਿ. ਆਪਤ੍ਤਿਪ੍ਪਟਿਗ੍ਗਹਣੇ ਪਨ ਅਯਂ ਵਿਸੇਸੋ – ਯਥਾ ਗਣਸ੍ਸ ਨਿਸ੍ਸਜ੍ਜਿਤ੍ਵਾ ਆਪਤ੍ਤਿਯਾ ਦੇਸਿਯਮਾਨਾਯ ਆਪਤ੍ਤਿਪ੍ਪਟਿਗ੍ਗਾਹਕੋ ਭਿਕ੍ਖੁ ਞਤ੍ਤਿਂ ਠਪੇਤਿ, ਏਵਂ ਅਟ੍ਠਪੇਤ੍ਵਾ ਦ੍ਵੀਸੁ ਅਞ੍ਞਤਰੇਨ ਯਥਾ ਏਕਪੁਗ੍ਗਲੋ ਪਟਿਗ੍ਗਣ੍ਹਾਤਿ, ਏਵਂ ਆਪਤ੍ਤਿ ਪਟਿਗ੍ਗਹੇਤਬ੍ਬਾ. ਦ੍ਵਿਨ੍ਨਞ੍ਹਿ ਞਤ੍ਤਿਟ੍ਠਪਨਂ ਨਾਮ ਨਤ੍ਥਿ. ਯਦਿ ਸਿਯਾ, ਦ੍ਵਿਨ੍ਨਂ ਪਾਰਿਸੁਦ੍ਧਿਉਪੋਸਥਂ ਵਿਸੁਂ ਨ ਵਦੇਯ੍ਯ. ਨਿਸ੍ਸਟ੍ਠਚੀਵਰਦਾਨੇਪਿ ਯਥਾ ‘‘ਇਮਂ ਚੀਵਰਂ ਆਯਸ੍ਮਤੋ ਦਮ੍ਮੀ’’ਤਿ ਏਕੋ ਵਦਤਿ, ਏਵਂ ‘‘ਮਯਂ ਇਮਂ ਚੀਵਰਂ ਆਯਸ੍ਮਤੋ ਦੇਮਾ’’ਤਿ ਵਤ੍ਤੁਂ ਵਟ੍ਟਤਿ. ਇਤੋ ਗਰੁਕਤਰਾਨਿਪਿ ਹਿ ਞਤ੍ਤਿਦੁਤਿਯਕਮ੍ਮਾਨਿ ਅਪਲੋਕੇਤ੍ਵਾ ਕਾਤਬ੍ਬਾਨੀਤਿ ਵੁਤ੍ਤਾਨਿ ਅਤ੍ਥਿ, ਤੇਸਂ ਏਤਂ ਅਨੁਲੋਮਂ. ਤੇਨੇਵਾਹ ‘‘ਦ੍ਵਿਨ੍ਨਂ ਪਨਾ’’ਤਿਆਦਿ. ਨਿਸ੍ਸਟ੍ਠਚੀਵਰਂ ਪਨ ਦਾਤਬ੍ਬਮੇਵ, ਅਦਾਤੁਂ ਨ ਲਬ੍ਭਤਿ. ਵਿਨਯਕਮ੍ਮਮਤ੍ਤਮੇਵ ਹੇਤਂ. ਨ ਤਂ ਤੇਨ ਸਙ੍ਘਸ੍ਸ ਵਾ ਗਣਸ੍ਸ ਵਾ ਪੁਗ੍ਗਲਸ੍ਸ ਵਾ ਦਿਨ੍ਨਮੇਵ ਹੋਤਿ. ਤੇਨਾਹ ‘‘ਨਿਸ੍ਸਟ੍ਠਵਤ੍ਥੁ’’ਨ੍ਤਿਆਦਿ.

ਅਨਿਸ੍ਸਜ੍ਜਿਤ੍ਵਾ ਪਰਿਭੁਞ੍ਜਨ੍ਤਸ੍ਸ ਦੁਕ੍ਕਟਨ੍ਤਿ ਸਕਿਂ ਨਿਵਤ੍ਥਂ ਵਾ ਸਕਿਂ ਪਾਰੁਤਂ ਵਾ ਕਾਯਤੋ ਅਮੋਚੇਤ੍ਵਾ ਦਿਵਸਮ੍ਪਿ ਚਰਤਿ, ਏਕਮੇਵ ਦੁਕ੍ਕਟਂ. ਮੋਚੇਤ੍ਵਾ ਨਿਵਾਸੇਤਿ ਵਾ ਪਾਰੁਪਤਿ ਵਾ, ਪਯੋਗੇ ਪਯੋਗੇ ਦੁਕ੍ਕਟਂ. ਦੁਨ੍ਨਿਵਤ੍ਥਂ ਵਾ ਦੁਪ੍ਪਾਰੁਤਂ ਵਾ ਸਣ੍ਠਾਪੇਨ੍ਤਸ੍ਸ ਅਨਾਪਤ੍ਤਿ. ਅਞ੍ਞਸ੍ਸ ਤਂ ਪਰਿਭੁਞ੍ਜਤੋਪਿ ਅਨਾਪਤ੍ਤਿ. ‘‘ਅਞ੍ਞੇਨ ਕਤਂ ਪਟਿਲਭਿਤ੍ਵਾ ਪਰਿਭੁਞ੍ਜਤੀ’’ਤਿਆਦਿਵਚਨਞ੍ਚੇਤ੍ਥ (ਪਾਰਾ. ੫੭੦) ਸਾਧਕਂ. ਦਸਾਹਂ ਅਨਤਿਕ੍ਕਨ੍ਤੇਪਿ ਅਤਿਕ੍ਕਨ੍ਤਸਞ੍ਞਿਨੋ, ਵੇਮਤਿਕਸ੍ਸ ਚ ਦੁਕ੍ਕਟਨ੍ਤਿ ਏਤ੍ਥਾਪਿ ‘‘ਪਰਿਭੁਞ੍ਜਨ੍ਤਸ੍ਸਾ’’ਤਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਅਤਿਕ੍ਕਨ੍ਤੇ ਅਨਤਿਕ੍ਕਨ੍ਤਸਞ੍ਞਿਨੋਪੀਤਿ ਦਸਾਹਂ ਅਤਿਕ੍ਕਨ੍ਤੇ ਚੀਵਰੇ ‘‘ਅਨਤਿਕ੍ਕਨ੍ਤਂ ਇਦ’’ਨ੍ਤਿ ਏਵਂ ਸਞ੍ਞਿਨੋ, ਦਸਾਹੇ ਵਾ ਅਤਿਕ੍ਕਨ੍ਤੇ ‘‘ਅਨਤਿਕ੍ਕਨ੍ਤੋ ਦਸਾਹੋ’’ਤਿ ਏਵਂ ਸਞ੍ਞਿਨੋ.

ਇਦਾਨਿ ‘‘ਅਨਧਿਟ੍ਠਿਤੇ ਅਧਿਟ੍ਠਿਤਸਞ੍ਞਿਨੋ ਨਿਸ੍ਸਗ੍ਗਿਯ’’ਨ੍ਤਿਆਦਿਆਪਤ੍ਤਿਵਾਰਂ ਸਙ੍ਗਹੇਤ੍ਵਾ ਦਸ੍ਸੇਨ੍ਤੋ ‘‘ਤਥਾ’’ਤਿਆਦਿਮਾਹ. ਤਥਾਤਿ ਯਥਾ ਦਸਾਹਂ ਅਤਿਕ੍ਕਨ੍ਤੇ ਸਞ੍ਞਾਭੇਦੇਨ ਤਿਕਪਾਚਿਤ੍ਤਿਯਂ, ਤਥਾ ਅਨਧਿਟ੍ਠਿਤਾਦੀਸੁ ਸਤ੍ਤਸੁ ਵਿਕਪ੍ਪੇਸੁ ਅਧਿਟ੍ਠਿਤਾਦਿਸਞ੍ਞਾਭੇਦਤੋਤਿ ਅਤ੍ਥੋ. ਤਤ੍ਥ ਅਵਿਸ੍ਸਜ੍ਜਿਤੇ ਵਿਸ੍ਸਜ੍ਜਿਤਸਞ੍ਞਿਨੋਤਿ ਕਸ੍ਸਚਿ ਅਦਿਨ੍ਨੇ ਅਪਰਿਚ੍ਚਤ੍ਤੇ ‘‘ਦਿਨ੍ਨਂ ਪਰਿਚ੍ਚਤ੍ਤਂ ਮਯਾ’’ਤਿ ਏਵਂ ਸਞ੍ਞਿਨੋ. ਅਨਟ੍ਠੇ ਨਟ੍ਠਸਞ੍ਞਿਨੋਤਿ ਅਤ੍ਤਨੋ ਚੀਵਰੇਨ ਸਦ੍ਧਿਂ ਬਹੂਨਿ ਅਞ੍ਞੇਸਂ ਚੀਵਰਾਨਿ ਏਕਤੋ ਠਪਿਤਾਨਿ, ਤਾਨਿ ਚੇ ਚੋਰਾ ਹਰਨ੍ਤਿ, ਤਤ੍ਰੇਸ ਅਤ੍ਤਨੋ ਚੀਵਰੇ ਅਨਟ੍ਠੇ ਨਟ੍ਠਸਞ੍ਞੀ ਹੋਤਿ, ਤਸ੍ਸ ਨਟ੍ਠਸਞ੍ਞਿਨੋ. ਏਸ ਨਯੋ ਅਵਿਨਟ੍ਠਾਦੀਸੁਪਿ. ਅਵਿਲੁਤ੍ਤੇਤਿ ਏਤ੍ਥ ਪਨ ਗਬ੍ਭਂ ਭਿਨ੍ਦਿਤ੍ਵਾ ਪਸਯ੍ਹਾਵਹਾਰਵਸੇਨ ਅਵਿਲੁਤ੍ਤੇਤਿ ਵੇਦਿਤਬ੍ਬਂ.

ਵਿਸ੍ਸਜ੍ਜਿਤੇਤਿ (ਪਾਰਾ. ਅਟ੍ਠ. ੨.੪੬੯) ਅਞ੍ਞਸ੍ਸ ਦਿਨ੍ਨੇ. ਕਥਂ ਪਨ ਦਿਨ੍ਨਂ ਹੋਤਿ, ਕਥਂ ਗਹਿਤਂ? ‘‘ਇਮਂ ਤੁਯ੍ਹਂ ਦੇਮਿ, ਦਦਾਮਿ, ਦਜ੍ਜਾਮਿ, ਓਣੋਜੇਮਿ, ਪਰਿਚ੍ਚਜਾਮਿ, ਵਿਸ੍ਸਜ੍ਜਾਮਿ, ਨਿਸ੍ਸਜ੍ਜਾਮੀ’’ਤਿ ਵਾ ਵਦਤਿ, ‘‘ਇਤ੍ਥਨ੍ਨਾਮਸ੍ਸ ਦੇਮਿ…ਪੇ… ਨਿਸ੍ਸਜ੍ਜਾਮੀ’’ਤਿ ਵਾ ਵਦਤਿ, ਸਮ੍ਮੁਖਾਪਿ ਪਰਮ੍ਮੁਖਾਪਿ ਦਿਨ੍ਨਂਯੇਵ ਹੋਤਿ. ‘‘ਤੁਯ੍ਹਂ ਗਣ੍ਹਾਹੀ’’ਤਿ ਵੁਤ੍ਤੇ ‘‘ਮਯ੍ਹਂ ਗਣ੍ਹਾਮੀ’’ਤਿ ਵਦਤਿ, ਸੁਦਿਨ੍ਨਂ, ਸੁਗ੍ਗਹਿਤਞ੍ਚ. ‘‘ਤਵ ਸਨ੍ਤਕਂ ਕਰੋਹਿ, ਤਵ ਸਨ੍ਤਕਂ ਹੋਤੁ, ਤਵ ਸਨ੍ਤਕਂ ਕਰਿਸ੍ਸਸੀ’’ਤਿ ਵੁਤ੍ਤੇ ‘‘ਮਮ ਸਨ੍ਤਕਂ ਕਰੋਮਿ, ਮਮ ਸਨ੍ਤਕਂ ਹੋਤੁ, ਮਮ ਸਨ੍ਤਕਂ ਕਰਿਸ੍ਸਾਮੀ’’ਤਿ ਵਦਤਿ, ਦੁਦ੍ਦਿਨ੍ਨਂ, ਦੁਗ੍ਗਹਿਤਞ੍ਚ. ਨੇਵ ਦਾਤਾ ਦਾਤੁਂ ਜਾਨਾਤਿ, ਨ ਇਤਰੋ ਗਹੇਤੁਂ. ਸਚੇ ਪਨ ‘‘ਤਵ ਸਨ੍ਤਕਂ ਕਰੋਹੀ’’ਤਿ ਵੁਤ੍ਤੇ ‘‘ਸਾਧੁ, ਭਨ੍ਤੇ, ਮਯ੍ਹਂ ਗਣ੍ਹਾਮੀ’’ਤਿ ਗਣ੍ਹਾਤਿ, ਸੁਗ੍ਗਹਿਤਂ, ਸਚੇ ਪਨ ਏਕੋ ‘‘ਗਣ੍ਹਾਹੀ’’ਤਿ ਵਦਤਿ, ਇਤਰੋ ‘‘ਨ ਗਣ੍ਹਾਮੀ’’ਤਿ ਵਦਤਿ, ਪੁਨ ਸੋ ‘‘ਦਿਨ੍ਨਂ ਮਯਾ ਤੁਯ੍ਹਂ, ਗਣ੍ਹਾਹੀ’’ਤਿ ਵਦਤਿ, ਇਤਰੋਪਿ ‘‘ਨ ਮਯ੍ਹਂ ਇਮਿਨਾ ਅਤ੍ਥੋ’’ਤਿ ਵਦਤਿ. ਤਤੋ ਪੁਰਿਮੋਪਿ ‘‘ਮਯਾ ਦਿਨ੍ਨ’’ਨ੍ਤਿ ਦਸਾਹਂ ਅਤਿਕ੍ਕਾਮੇਤਿ, ਪਚ੍ਛਿਮੋਪਿ ‘‘ਮਯਾ ਪਟਿਕ੍ਖਿਤ੍ਤ’’ਨ੍ਤਿ, ਕਸ੍ਸਾਪਤ੍ਤੀਤਿ? ਨ ਕਸ੍ਸਚਿ. ਯਸ੍ਸ ਪਨ ਰੁਚ੍ਚਤਿ, ਤੇਨ ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਿਤਬ੍ਬਂ. ਯੋ ਪਨ ਅਧਿਟ੍ਠਾਨੇ ਵੇਮਤਿਕੋ, ਤੇਨ ਕਿਂ ਕਾਤਬ੍ਬਂ? ਵੇਮਤਿਕਭਾਵਂ ਆਰੋਚੇਤ੍ਵਾ ‘‘ਸਚੇ ਅਨਧਿਟ੍ਠਿਤਂ ਭਵਿਸ੍ਸਤਿ, ਏਵਂ ਮੇ ਕਪ੍ਪਿਯਂ ਹੋਤੀ’’ਤਿ ਵਤ੍ਵਾ ਵੁਤ੍ਤਨਯੇਨੇਵ ਨਿਸ੍ਸਜ੍ਜਿਤਬ੍ਬਂ. ਨ ਹਿ ਏਵਂ ਜਾਨਾਪੇਤ੍ਵਾ ਵਿਨਯਕਮ੍ਮਂ ਕਰੋਨ੍ਤਸ੍ਸ ਮੁਸਾਵਾਦੋ ਹੋਤਿ.

ਯਥਾ ਚ ਇਦਂ, ਏਵਂ ਇਤੋ ਪਰਾਨਿਪੀਤਿ ਯਥਾ ਇਦਂ ਅਤਿਰੇਕਚੀਵਰਧਾਰਣਸਿਕ੍ਖਾਪਦਂ ਆਚਾਰਵਿਪਤ੍ਤਿ, ਏਵਂ ਇਤੋ ਪਰਾਨਿਪਿ ਸਿਕ੍ਖਾਪਦਾਨਿ ਆਚਾਰਵਿਪਤ੍ਤਿਯੇਵਾਤਿ ਅਤ੍ਥੋ. ਤੇਨਾਹ ‘‘ਉਭਤੋਪਾਤਿਮੋਕ੍ਖੇਸੂ’’ਤਿਆਦਿ. ਆਜੀਵਵਿਪਤ੍ਤਿਪਚ੍ਚਯਾ ਪਨ ਠਪੇਤ੍ਵਾ ਦੁਬ੍ਭਾਸਿਤਂ ਛ ਆਪਤ੍ਤਿਕ੍ਖਨ੍ਧਾ ਪਞ੍ਞਤ੍ਤਾਤਿ –

‘‘ਆਜੀਵਹੇਤੁ ਆਜੀਵਕਾਰਣਾ ਪਾਪਿਚ੍ਛੋ ਇਚ੍ਛਾਪਕਤੋ ਅਸਨ੍ਤਂ ਅਭੂਤਂ ਉਤ੍ਤਰਿਮਨੁਸ੍ਸਧਮ੍ਮਂ ਉਲ੍ਲਪਤਿ, ਆਪਤ੍ਤਿ ਪਾਰਾਜਿਕਸ੍ਸ. ਆਜੀਵਹੇਤੁ ਆਜੀਵਕਾਰਣਾ ਸਞ੍ਚਰਿਤ੍ਤਂ ਸਮਾਪਜ੍ਜਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ. ਆਜੀਵਹੇਤੁ ਆਜੀਵਕਾਰਣਾ ‘ਯੋ ਤੇ ਵਿਹਾਰੇ ਵਸਤਿ, ਸੋ ਭਿਕ੍ਖੁ ਅਰਹਾ’ਤਿ ਭਣਤਿ, ਪਟਿਵਿਜਾਨਨ੍ਤਸ੍ਸ ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਆਜੀਵਹੇਤੁ ਆਜੀਵਕਾਰਣਾ ਭਿਕ੍ਖੁ ਪਣੀਤਭੋਜਨਾਨਿ ਅਗਿਲਾਨੋ ਅਤ੍ਤਨੋ ਅਤ੍ਥਾਯ ਵਿਞ੍ਞਾਪੇਤ੍ਵਾ ਭੁਞ੍ਜਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਆਜੀਵਹੇਤੁ ਆਜੀਵਕਾਰਣਾ ਭਿਕ੍ਖੁਨੀ ਪਣੀਤਭੋਜਨਾਨਿ ਅਗਿਲਾਨਾ ਅਤ੍ਤਨੋ ਅਤ੍ਥਾਯ ਵਿਞ੍ਞਾਪੇਤ੍ਵਾ ਭੁਞ੍ਜਤਿ, ਆਪਤ੍ਤਿ ਪਾਟਿਦੇਸਨੀਯਸ੍ਸ. ਆਜੀਵਹੇਤੁ ਆਜੀਵਕਾਰਣਾ ਭਿਕ੍ਖੁ ਸੂਪਂ ਵਾ ਓਦਨਂ ਵਾ ਅਗਿਲਾਨੋ ਅਤ੍ਤਨੋ ਅਤ੍ਥਾਯ ਵਿਞ੍ਞਾਪੇਤ੍ਵਾ ਭੁਞ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਰਿ. ੨੮੭) –

ਏਵਂ ਪਾਰਾਜਿਕਾਦਿਵਸੇਨ ਠਪੇਤ੍ਵਾ ਦੁਬ੍ਭਾਸਿਤਂ ਆਜੀਵਵਿਪਤ੍ਤਿਪਚ੍ਚਯਾ ਛ ਆਪਤ੍ਤਿਕ੍ਖਨ੍ਧਾ ਪਞ੍ਞਤ੍ਤਾ. ਦਿਟ੍ਠਿਵਿਪਤ੍ਤਿਪਚ੍ਚਯਾ ਪਾਚਿਤ੍ਤਿਯਦੁਕ੍ਕਟਵਸੇਨ ਦ੍ਵੇ ਆਪਤ੍ਤਿਕ੍ਖਨ੍ਧਾ ਪਞ੍ਞਤ੍ਤਾਤਿ ਸਮਨੁਭਾਸਨਾਯ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਜ੍ਜਨੇ ਞਤ੍ਤਿਯਾ ਦੁਕ੍ਕਟਂ, ਕਮ੍ਮਵਾਚਾਪਰਿਯੋਸਾਨੇ ਪਾਚਿਤ੍ਤਿਯਨ੍ਤਿ ਏਵਂ ਦਿਟ੍ਠਿਵਿਪਤ੍ਤਿਪਚ੍ਚਯਾ ਪਾਚਿਤ੍ਤਿਯਦੁਕ੍ਕਟਵਸੇਨ ਦ੍ਵੇ ਆਪਤ੍ਤਿਕ੍ਖਨ੍ਧਾ ਪਞ੍ਞਤ੍ਤਾ. ਏਤ੍ਥਾਤਿ ਵਿਪਤ੍ਤਿਕਥਾਸੁ.

ਗਣਨੁਪਗਤਾਤਿ ਦਿਵਸਗਣਨਂ ਉਪਗਤਭਾਵੋ. ਅਞ੍ਞੇਹਿ ‘‘ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦੇਮਾ’’ਤਿ ਪਰਹਤ੍ਥੇ ਦਿਨ੍ਨਮ੍ਪਿ ‘‘ਨ ਤਾਵ ਤਂ ਗਣਨੁਪਗਂ, ਯਾਵ ਨ ਹਤ੍ਥਂ ਗਚ੍ਛਤੀ’’ਤਿ (ਮਹਾਵ. ੨੫੯) ਚਮ੍ਮਕ੍ਖਨ੍ਧਕੇ ਵੁਤ੍ਤਤ੍ਤਾ ਯਾਵ ਆਹਰਿਤ੍ਵਾ ਵਾ ਨ ਦਿਨ੍ਨਂ, ‘‘ਤੁਮ੍ਹਾਕਂ, ਭਨ੍ਤੇ, ਚੀਵਰਂ ਉਪ੍ਪਨ੍ਨ’’ਨ੍ਤਿ ਪਹਿਣਿਤ੍ਵਾ ਵਾ ਅਨਾਰੋਚਿਤਂ, ਤਾਵ ਦਿਵਸਗਣਨਂ ਨ ਉਪੇਤਿ, ਅਨਧਿਟ੍ਠਿਤਂ ਵਟ੍ਟਤਿ. ਯਦਾ ਪਨ ਆਨੇਤ੍ਵਾ ਦਿਨ੍ਨਂ ਹੋਤਿ, ‘‘ਉਪ੍ਪਨ੍ਨ’’ਨ੍ਤਿ ਵਾ ਸੁਤਂ, ਤਤੋ ਪਟ੍ਠਾਯ ਗਣਨੁਪਗਂ ਹੋਤਿ, ਅਨ੍ਤੋਦਸਾਹੇ ਅਧਿਟ੍ਠਾਤਬ੍ਬਂ. ਕਥਿਨਸਞ੍ਞਿਤਂ ਸਮੁਟ੍ਠਾਨਮਸ੍ਸਾਤਿ ਕਥਿਨਸਮੁਟ੍ਠਾਨਂ, ਤਤਿਯਛਟ੍ਠਸਮੁਟ੍ਠਾਨਵਸੇਨ ਦ੍ਵਿਸਮੁਟ੍ਠਾਨਨ੍ਤਿ ਅਤ੍ਥੋ. ਕਾਯਵਾਚਾਹਿ ਕਤ੍ਤਬ੍ਬਅਧਿਟ੍ਠਾਨਵਿਕਪ੍ਪਨਾਨਂ ਅਕਰਣੇਨ ਕਾਯਵਾਚਤੋ, ਚਿਤ੍ਤੇ ਪਨ ਸਤਿ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤੀਤਿ ਵੁਤ੍ਤਂ ਹੋਤਿ. ਅਨਧਿਟ੍ਠਾਨਾਵਿਕਪ੍ਪਨਵਸੇਨ ਆਪਜ੍ਜਨਤੋ ਅਕਿਰਿਯਂ. ਅਜਾਨਨ੍ਤੋਪਿ ਆਪਜ੍ਜਤੀਤਿ ਨੋਸਞ੍ਞਾਵਿਮੋਕ੍ਖਂ. ਕਾਯਦ੍ਵਾਰੇ ਚ ਵਚੀਦ੍ਵਾਰੇ ਚ ਕਤ੍ਤਬ੍ਬਾਕਰਣਤੋ ਕਾਯਕਮ੍ਮਂ ਵਚੀਕਮ੍ਮਂ.

ਕਥਿਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਉਦੋਸਿਤਸਿਕ੍ਖਾਪਦਵਣ੍ਣਨਾ

ਭਿਕ੍ਖੁਨਾਤਿ ਭਿਕ੍ਖੁਸ੍ਸਾਤਿ ਅਤ੍ਥੋ, ਸਾਮਿਅਤ੍ਥੇ ਚੇਤਂ ਕਰਣਵਚਨਂ. ਤੇਨਾਹ ‘‘ਪੁਰਿਮਸਿਕ੍ਖਾਪਦੇ ਵਿਯਾ’’ਤਿਆਦਿ. ਅਥ ਕਸ੍ਮਾ ਕਰਣਵਸੇਨੇਵ ਕਰਣਵਚਨਸ੍ਸ ਅਤ੍ਥਂ ਅਗ੍ਗਹੇਤ੍ਵਾ ਸਾਮਿਵਸੇਨ ਅਤ੍ਥੋ ਵੇਦਿਤਬ੍ਬੋਤਿ ਆਹ ‘‘ਕਰਣਵਸੇਨ ਹੀ’’ਤਿਆਦਿ. ਹੀਤਿ ਕਾਰਣਤ੍ਥੇ ਨਿਪਾਤੋ. ਛਿਨ੍ਨਪਲਿਬੋਧੋਤਿ ਛਿਨ੍ਨਚੀਵਰਾਵਾਸਪਲਿਬੋਧੋ. ਏਕਾਵ ਰਤ੍ਤਿ ਏਕਰਤ੍ਤਂ, ਸਮਾਸਨ੍ਤਗਤਸ੍ਸ ਅਤ੍ਥਂ. ਤਿਣ੍ਣਂ ਚੀਵਰਾਨਂ ਸਮਾਹਾਰੋਤਿ ਤਿਚੀਵਰਂ. ਤੇਨ ਤਿਚੀਵਰੇਨ, ਤੀਹਿ ਚੀਵਰੇਹੀਤਿ ਅਤ੍ਥੋ. ਏਕੇਨ ਵਿਪ੍ਪਵੁਤ੍ਥੋਪਿ (ਪਾਰਾ. ਅਟ੍ਠ. ੨.੪੭੫-੪੭੬) ਹਿ ਤਿਚੀਵਰੇਨ ਵਿਪ੍ਪਵੁਤ੍ਥੋ ਨਾਮ ਹੋਤਿ ਪਟਿਸਿਦ੍ਧਪਰਿਯਾਪਨ੍ਨੇਨ ਵਿਪ੍ਪਵੁਤ੍ਥਤ੍ਤਾ, ਅਵਯਵੇਪਿ ਵਾ ਸਮੁਦਾਯਵੋਹਾਰਤੋ. ਤੇਨਾਹ ‘‘ਤਿਚੀਵਰਾਧਿਟ੍ਠਾਨਨਯੇਨਾ’’ਤਿਆਦਿ.

ਇਦਾਨਿ ਵਿਪ੍ਪਵਾਸਲਕ੍ਖਣਵਵਤ੍ਥਾਪਨਤ੍ਥਂ ‘‘ਗਾਮੋ ਏਕੂਪਚਾਰੋ’’ਤਿਆਦਿਮਾਹ. ਤਤ੍ਥ ਨਿਵੇਸਨਨ੍ਤਿ ਉਦੋਸਿਤਾਦੀਨਂ ਵਸੇਨ ਅਕਤਾਯ ਪਤਿਸ੍ਸਯਵਿਕਤਿਯਾ ਅਧਿਵਚਨਂ. ਉਦੋਸਿਤੋਤਿ (ਪਾਰਾ. ਅਟ੍ਠ. ੨.੪੮੨-੪੮੭) ਯਾਨਾਦੀਨਂ ਭਣ੍ਡਾਨਂ ਸਾਲਾ. ਯੋ ‘‘ਉਦਵਸਿਤੋ’’ਤਿਪਿ ਵੁਚ੍ਚਤਿ. ਅਟ੍ਟੋਤਿ ਪਟਿਰਾਜਾਦਿਪਟਿਬਾਹਨਤ੍ਥਂ ਇਟ੍ਠਕਾਹਿ ਕਤੋ ਬਹਲਭਿਤ੍ਤਿਕੋ ਚਤੁਪਞ੍ਚਭੂਮਿਕੋ ਪਤਿਸ੍ਸਯਵਿਸੇਸੋ. ‘‘ਅਟ੍ਟੋਤਿ ਬਹਲਭਿਤ੍ਤਿਕਗੇਹਂ, ਯਸ੍ਸ ਗੋਪਾਨਸਿਯੋ ਅਗ੍ਗਹੇਤ੍ਵਾ ਇਟ੍ਠਕਾਹਿ ਏਵ ਛਦਨਂ ਹੋਤੀ’’ਤਿ ਅਪਰੇ. ‘‘ਅਟ੍ਟਾਕਾਰੇਨ ਕਰੀਯਤੀ’’ਤਿਪਿ ਵਦਨ੍ਤਿ. ਮਾਲ਼ੋਤਿ ਏਕਕੂਟਸਙ੍ਗਹਿਤੋ ਚਤੁਰਸ੍ਸਪਾਸਾਦੋ, ਏਕਕੂਟਸਙ੍ਗਹਿਤੋ ਵਾ ਅਨੇਕਕੋਣਵਨ੍ਤੋ ਪਤਿਸ੍ਸਯਵਿਸੇਸੋ. ‘‘ਮਾਲ਼ੋਤਿ ਵਟ੍ਟਾਕਾਰੇਨ ਕਤਸੇਨਾਸਨ’’ਨ੍ਤਿ ਅਪਰੇ. ਪਾਸਾਦੋਤਿ ਦੀਘਪਾਸਾਦੋ, ਅਡ੍ਢਯੋਗਾਦਿਭੇਦੋ ਅਟ੍ਟਮਾਲ਼ਹਮ੍ਮਿਯਵਜ੍ਜਿਤੋ ਸਬ੍ਬੋ ਵਾ ਪਾਸਾਦੋ. ਹਮ੍ਮਿਯਨ੍ਤਿ ਮੁਣ੍ਡਚ੍ਛਦਨਪਾਸਾਦੋ. ‘‘ਚਨ੍ਦਿਯਙ੍ਗਣਯੁਤ੍ਤ’’ਨ੍ਤਿ ਅਪਰੇ. ਨਾਵਾਤਿ ਥਲਟ੍ਠਉਦਕਟ੍ਠਵਸੇਨ ਦ੍ਵਿਧਾ ਨਾਵਾ. ਸਤ੍ਥੋਤਿ ਜਙ੍ਘਸਤ੍ਥੋ, ਸਕਟਸਤ੍ਥੋ ਵਾ. ਧਞ੍ਞਕਰਣਨ੍ਤਿ (ਪਾਰਾ. ਅਟ੍ਠ. ੨.੪੯੧-੪੯੪) ਖਲਂ ਵੁਚ੍ਚਤਿ. ਆਰਾਮੋਤਿ ਪੁਪ੍ਫਾਰਾਮੋ, ਫਲਾਰਾਮੋ ਵਾ. ਵਿਹਾਰੋਤਿ ਸਪਰਿਕ੍ਖਿਤ੍ਤੋ ਵਾ ਅਪਰਿਕ੍ਖਿਤ੍ਤੋ ਵਾ ਸਕਲੋ ਆਵਾਸੋ. ‘‘ਗੇਹਮ੍ਪੀ’’ਤਿ ਕੇਚਿ. ਨਿਵੇਸਨਾਦੀਨਿ ਚੇਤ੍ਥ ਗਾਮਤੋ ਬਹਿ ਨਿਵਿਟ੍ਠਾਨਿ ਗਹਿਤਾਨਿ. ਅਨ੍ਤੋਗਾਮੇ ਠਿਤਾਨਂ ਪਨ ਗਾਮਗ੍ਗਹਣੇਨੇਵ ਗਹਿਤਤ੍ਤਾ ਗਾਮਪਰਿਹਾਰੋਯੇਵਾਤਿ. ‘‘ਨਿਵੇਸਨਾਦਯੋ ਹਮ੍ਮਿਯਪਰਿਯੋਸਾਨਾ ਗਾਮਪਰਿਕ੍ਖੇਪਤੋ ਬਹਿ ਨਿਵਿਟ੍ਠਾ’’ਤਿ ਅਪਰੇ. ਹਤ੍ਥਪਾਸਾਤਿਕ੍ਕਮੇਤਿ ਏਤ੍ਥ ਹਤ੍ਥਪਾਸੋ ਨਾਮ ਅਡ੍ਢਤੇਯ੍ਯਰਤਨਪ੍ਪਮਾਣੋ ਪਦੇਸੋ, ਤਸ੍ਸ ਅਤਿਕ੍ਕਮੋ ਹਤ੍ਥਪਾਸਾਤਿਕ੍ਕਮੋ, ਤਸ੍ਮਿਂ ਹਤ੍ਥਪਾਸਾਤਿਕ੍ਕਮੇ. ਹਤ੍ਥਪਾਸਬ੍ਭਨ੍ਤਰੇ ਪਨ ਵਤ੍ਥੁਂ ਵਟ੍ਟਤਿ. ਤਂ ਪਮਾਣਂ ਅਤਿਕ੍ਕਮਿਤ੍ਵਾ ਸਚੇਪਿ ਇਦ੍ਧਿਮਾ ਭਿਕ੍ਖੁ ਆਕਾਸੇ ਅਰੁਣਂ ਉਟ੍ਠਾਪੇਤਿ, ਨਿਸ੍ਸਗ੍ਗਿਯਮੇਵ ਹੋਤਿ.

ਅਯਂ ਪਨੇਤ੍ਥ ਵਿਨਿਚ੍ਛਯੋ – ਸਚੇ (ਪਾਰਾ. ਅਟ੍ਠ. ੨.੪੭੭-੪੭੮) ਗਾਮੋ ਏਕਸ੍ਸ ਰਞ੍ਞੋ ਵਾ ਭੋਜਕਸ੍ਸ ਵਾ ਵਸੇਨ ਏਕਕੁਲਸ੍ਸ ਹੋਤਿ, ਪਾਕਾਰਾਦਿਨਾ ਪਰਿਕ੍ਖਿਤ੍ਤਤ੍ਤਾ ਏਕੂਪਚਾਰੋ ਚ, ਏਵਰੂਪੇ ਗਾਮੇ ਚੀਵਰਂ ਨਿਕ੍ਖਿਪਿਤ੍ਵਾ ਤਸ੍ਮਿਂ ਗਾਮਬ੍ਭਨ੍ਤਰੇ ਯਥਾਰੁਚਿਤਟ੍ਠਾਨੇ ਵਸਿਤਬ੍ਬਂ, ਸਚੇ ਅਪਰਿਕ੍ਖਿਤ੍ਤੋ, ਯਸ੍ਮਿਂ ਘਰੇ ਚੀਵਰਂ ਨਿਕ੍ਖਿਤ੍ਤਂ ਹੋਤਿ, ਤਸ੍ਮਿਂ ਘਰੇ ਵਸਿਤਬ੍ਬਂ, ਤਸ੍ਸ ਘਰਸ੍ਸ ਸਮਨ੍ਤਤੋ ਹਤ੍ਥਪਾਸਾ ਵਾ ਨ ਵਿਜਹਿਤਬ੍ਬਂ.

ਸਚੇ ਗਾਮੋ ਵੇਸਾਲਿਕੁਸਿਨਾਰਾਦਯੋ ਵਿਯ ਨਾਨਾਰਾਜੂਨਂ ਵਾ ਭੋਜਕਾਨਂ ਵਾ ਹੋਤਿ, ਵੁਤ੍ਤਪ੍ਪਕਾਰੇਨ ਪਰਿਕ੍ਖਿਤ੍ਤੋ ਚ, ਏਵਰੂਪੇ ਗਾਮੇ ਯਸ੍ਮਿਂ ਘਰੇ ਚੀਵਰਂ ਨਿਕ੍ਖਿਤ੍ਤਂ ਹੋਤਿ, ਤਸ੍ਮਿਂ ਘਰੇ ਵਾ ਵਤ੍ਥਬ੍ਬਂ, ਤਸ੍ਸ ਘਰਸ੍ਸ ਹਤ੍ਥਪਾਸਾ ਵਾ ਨ ਵਿਜਹਿਤਬ੍ਬਂ. ਯਸ੍ਸਾ ਵੀਥਿਯਾ ਘਰਂ ਹੋਤਿ, ਤਸ੍ਸਾ ਵੀਥਿਯਾ ਤਸ੍ਸ ਘਰਸ੍ਸ ਸਮ੍ਮੁਖਾਟ੍ਠਾਨੇ ਸਭਾਯਂ ਵਾ ਘਰਦ੍ਵਾਰੇ ਵਾ ਵਤ੍ਥਬ੍ਬਂ, ਤੇਸਂ ਸਭਾਦ੍ਵਾਰਾਨਂ ਹਤ੍ਥਪਾਸਾ ਵਾ ਨ ਵਿਜਹਿਤਬ੍ਬਂ.

ਸਚੇ ਸੋ ਗਾਮੋ ਅਪਰਿਕ੍ਖਿਤ੍ਤੋ, ਯਸ੍ਮਿਂ ਘਰੇ ਚੀਵਰਂ ਨਿਕ੍ਖਿਤ੍ਤਂ, ਤਤ੍ਥ ਵਾ ਤਸ੍ਸ ਹਤ੍ਥਪਾਸੇ ਵਾ ਵਤ੍ਥਬ੍ਬਂ. ਨਿਵੇਸਨੇ ਪਨ ਸਚੇ ਏਕਕੁਲਸ੍ਸ ਨਿਵੇਸਨਂ ਹੋਤਿ, ਪਰਿਕ੍ਖਿਤ੍ਤਞ੍ਚ, ਅਨ੍ਤੋਨਿਵੇਸਨੇ ਚੀਵਰਂ ਨਿਕ੍ਖਿਪਿਤ੍ਵਾ ਅਨ੍ਤੋਨਿਵੇਸਨੇ ਵਤ੍ਥਬ੍ਬਂ. ਅਪਰਿਕ੍ਖਿਤ੍ਤਂ ਚੇ ਹੋਤਿ, ਯਸ੍ਮਿਂ ਗਬ੍ਭੇ ਚੀਵਰਂ ਨਿਕ੍ਖਿਤ੍ਤਂ, ਤਸ੍ਮਿਂ ਵਤ੍ਥਬ੍ਬਂ, ਤਸ੍ਸ ਗਬ੍ਭਸ੍ਸ ਹਤ੍ਥਪਾਸਾ ਵਾ ਨ ਵਿਜਹਿਤਬ੍ਬਂ.

ਸਚੇ ਨਾਨਾਕੁਲਸ੍ਸ ਨਿਵੇਸਨਂ ਹੋਤਿ, ਪਰਿਕ੍ਖਿਤ੍ਤਞ੍ਚ, ਯਸ੍ਮਿਂ ਗਬ੍ਭੇ ਚੀਵਰਂ ਨਿਕ੍ਖਿਤ੍ਤਂ, ਤਸ੍ਮਿਂ ਗਬ੍ਭੇ ਵਤ੍ਥਬ੍ਬਂ, ਸਬ੍ਬੇਸਂ ਸਾਧਾਰਣਦ੍ਵਾਰਮੂਲੇ ਵਾ ਤੇਸਂ ਗਬ੍ਭਦ੍ਵਾਰਮੂਲਾਨਂ ਹਤ੍ਥਪਾਸਾ ਵਾ ਨ ਵਿਜਹਿਤਬ੍ਬਂ. ਅਪਰਿਕ੍ਖਿਤ੍ਤਂ ਚੇ, ਯਸ੍ਮਿਂ ਗਬ੍ਭੇ ਚੀਵਰਂ ਨਿਕ੍ਖਿਤ੍ਤਂ, ਤਸ੍ਮਿਂ ਗਬ੍ਭੇ ਵਤ੍ਥਬ੍ਬਂ, ਤਸ੍ਸ ਗਬ੍ਭਸ੍ਸ ਹਤ੍ਥਪਾਸਾ ਵਾ ਨ ਵਿਜਹਿਤਬ੍ਬਂ. ਏਸ ਨਯੋ ਉਦੋਸਿਤਾਦੀਸੁਪਿ.

ਸਤ੍ਥੋ ਪਨ ਜਙ੍ਘਸਤ੍ਥੋ ਵਾ ਹੋਤੁ, ਸਕਟਸਤ੍ਥੋ ਵਾ. ਸਚੇ ਏਕਕੁਲਸ੍ਸ ਸਤ੍ਥੋ ਹੋਤਿ, ਸਤ੍ਥੇ ਚੀਵਰਂ ਨਿਕ੍ਖਿਪਿਤ੍ਵਾ ਪੁਰਤੋ ਵਾ ਪਚ੍ਛਤੋ ਵਾ ਸਤ੍ਤਬ੍ਭਨ੍ਤਰਾ ਨ ਵਿਜਹਿਤਬ੍ਬਾ, ਪਸ੍ਸਤੋ ਅਬ੍ਭਨ੍ਤਰਂ ਨ ਵਿਜਹਿਤਬ੍ਬਂ. ਸਚੇ (ਪਾਰਾ. ਅਟ੍ਠ. ੨.੪੮੯) ਸਤ੍ਥੋ ਗਚ੍ਛਨ੍ਤੋ ਗਾਮਂ ਵਾ ਨਦਿਂ ਵਾ ਪਰਿਯਾਦਿਯਿਤ੍ਵਾ ਤਿਟ੍ਠਤਿ, ਅਨ੍ਤੋਪਵਿਟ੍ਠੇਨ ਸਦ੍ਧਿਂ ਏਕਾਬਦ੍ਧੋ ਹੁਤ੍ਵਾ ਓਰਞ੍ਚ ਪਾਰਞ੍ਚ ਫਰਿਤ੍ਵਾ ਠਿਤੋ ਹੋਤਿ, ਸਤ੍ਥਪਰਿਹਾਰੋਵ ਲਬ੍ਭਤਿ. ਅਥ ਗਾਮੇ ਵਾ ਨਦਿਯਾ ਵਾ ਪਰਿਯਾਪਨ੍ਨੋ ਹੋਤਿ ਅਨ੍ਤੋਪਵਿਟ੍ਠੋ, ਗਾਮਪਰਿਹਾਰੋ ਚੇਵ ਨਦਿਪਰਿਹਾਰੋ ਚ ਲਬ੍ਭਤਿ. ਸਚੇ ਵਿਹਾਰਸੀਮਂ ਅਤਿਕ੍ਕਮਿਤ੍ਵਾ ਤਿਟ੍ਠਤਿ, ਅਨ੍ਤੋਸੀਮਾਯ ਚ ਚੀਵਰਂ ਹੋਤਿ, ਵਿਹਾਰਂ ਗਨ੍ਤ੍ਵਾ ਵਸਿਤਬ੍ਬਂ. ਸਚੇ ਬਹਿਸੀਮਾਯ ਚੀਵਰਂ ਹੋਤਿ, ਸਤ੍ਥਸਮੀਪੇਯੇਵ ਵਸਿਤਬ੍ਬਂ. ਸਚੇ ਗਚ੍ਛਨ੍ਤੋ ਸਕਟੇ ਵਾ ਭਗ੍ਗੇ, ਗੋਣੇ ਵਾ ਨਟ੍ਠੇ ਅਨ੍ਤਰਾ ਛਿਜ੍ਜਤਿ, ਯਸ੍ਮਿਂ ਕੋਟ੍ਠਾਸੇ ਚੀਵਰਂ ਨਿਕ੍ਖਿਤ੍ਤਂ, ਤਤ੍ਥ ਵਸਿਤਬ੍ਬਂ.

ਖੇਤ੍ਤੇਪਿ (ਪਾਰਾ. ਅਟ੍ਠ. ੨.੪੯੦) ਸਚੇ ਏਕਕੁਲਸ੍ਸ ਖੇਤ੍ਤਂ ਹੋਤਿ, ਪਰਿਕ੍ਖਿਤ੍ਤਞ੍ਚ, ਅਨ੍ਤੋਖੇਤ੍ਤੇ ਚੀਵਰਂ ਨਿਕ੍ਖਿਪਿਤ੍ਵਾ ਅਨ੍ਤੋਖੇਤ੍ਤੇ ਵਤ੍ਥਬ੍ਬਂ. ਸਚੇ ਅਪਰਿਕ੍ਖਿਤ੍ਤਂ, ਹਤ੍ਥਪਾਸਾ ਚੀਵਰਂ ਨ ਵਿਜਹਿਤਬ੍ਬਂ. ਸਚੇ ਨਾਨਾਕੁਲਸ੍ਸ ਖੇਤ੍ਤਂ ਹੋਤਿ, ਪਰਿਕ੍ਖਿਤ੍ਤਞ੍ਚ, ਅਨ੍ਤੋਖੇਤ੍ਤੇ ਚੀਵਰਂ ਨਿਕ੍ਖਿਪਿਤ੍ਵਾ ਖੇਤ੍ਤਦ੍ਵਾਰਮੂਲੇ ਵਾ ਵਤ੍ਥਬ੍ਬਂ, ਤਸ੍ਸ ਹਤ੍ਥਪਾਸਾ ਵਾ ਨ ਵਿਜਹਿਤਬ੍ਬਂ. ਸਚੇ ਅਪਰਿਕ੍ਖਿਤ੍ਤਂ, ਚੀਵਰਂ ਹਤ੍ਥਪਾਸਾ ਨ ਵਿਜਹਿਤਬ੍ਬਂ. ਏਸ ਨਯੋ ਧਞ੍ਞਕਰਣਾਰਾਮੇਸੁ ਦ੍ਵੀਸੁਪਿ. ਵਿਹਾਰੇ ਪਨ ਨਿਵੇਸਨੇ ਵੁਤ੍ਤਸਦਿਸੋਵ ਵਿਨਿਚ੍ਛਯੋ.

ਰੁਕ੍ਖਮੂਲੇ ਪਨ ਯਂ ਮਜ੍ਝਨ੍ਹਿਕੇ ਕਾਲੇ ਸਮਨ੍ਤਾ ਛਾਯਾ ਫਰਤਿ, ਤਸ੍ਮਿਂ ਠਾਨੇ ਅਵਿਰਲ਼ੇ ਪਦੇਸੇ ਤਸ੍ਸ ਛਾਯਾਯ ਫੁਟ੍ਠੋਕਾਸਸ੍ਸ ਅਨ੍ਤੋਯੇਵ ਨਿਕ੍ਖਿਪਿਤਬ੍ਬਂ. ਸਚੇ ਵਿਰਲ਼ਸਾਖਸ੍ਸ ਰੁਕ੍ਖਸ੍ਸ ਆਤਪੇਨ ਫੁਟ੍ਠੋਕਾਸੇ ਠਪੇਤਿ, ਅਰੁਣੁਗ੍ਗਮਨੇ ਚ ਸੋ ਭਿਕ੍ਖੁ ਤਸ੍ਸ ਹਤ੍ਥਪਾਸੇ ਨ ਹੋਤਿ, ਅਞ੍ਞਸ੍ਮਿਂ ਠਾਨੇ ਤਸ੍ਸ ਛਾਯਾਯਪਿ ਹੋਤਿ, ਨਿਸ੍ਸਗ੍ਗਿਯਂ ਹੋਤਿ. ਸਚੇ ਨਾਨਾਕੁਲਸ੍ਸ ਰੁਕ੍ਖੋ ਹੋਤਿ, ਚੀਵਰਸ੍ਸ ਹਤ੍ਥਪਾਸਾ ਨ ਵਿਜਹਿਤਬ੍ਬਂ.

ਅਜ੍ਝੋਕਾਸੇ ਪਨ ਵਿਞ੍ਝਾਟਵਿਆਦੀਸੁ ਅਰਞ੍ਞੇਸੁਪਿ ਸਮੁਦ੍ਦਮਜ੍ਝੇ ਮਚ੍ਛਬਨ੍ਧਾਨਂ ਅਗਮਨਪਥਦੀਪਕੇਸੁਪਿ ਚੀਵਰਂ ਠਪੇਤ੍ਵਾ ਤਤੋ ਸਮਨ੍ਤਾ ਸਤ੍ਤਬ੍ਭਨ੍ਤਰੇ ਪਦੇਸੇ ਯਤ੍ਥ ਕਤ੍ਥਚਿ ਵਸਿਤਬ੍ਬਂ, ਇਤੋ ਅਞ੍ਞਤ੍ਥ ਵਸਨ੍ਤੋ ਵਿਪ੍ਪਵੁਤ੍ਥੋ ਨਾਮ ਹੋਤੀਤਿ ਦਟ੍ਠਬ੍ਬਂ.

ਇਮਸ੍ਸ ਪਨ ਵਿਤ੍ਥਾਰਸ੍ਸ ਇਧ ਅਵੁਤ੍ਤਤ੍ਤਾ, ਸਮਨ੍ਤਪਾਸਾਦਿਕਾਯਞ੍ਚ ਵੁਤ੍ਤਤ੍ਤਾ ‘‘ਅਯਮੇਤ੍ਥ ਸਙ੍ਖੇਪੋ’’ਤਿਆਦਿ ਵੁਤ੍ਤਂ. ਏਤ੍ਥਾਤਿ ‘‘ਤਿਚੀਵਰੇਨ ਵਿਪ੍ਪਵਸੇਯ੍ਯਾ’’ਤਿ ਏਤਸ੍ਮਿਂ ਪਦੇ. ਸਙ੍ਖੇਪੋਤਿ ਸਙ੍ਖੇਪਵਣ੍ਣਨਾ. ਏਤ੍ਥ ਪਨ ਪਾਲ਼ਿਯਂ (ਪਾਰਾ. ੪੭੭) ‘‘ਗਾਮੋ ਏਕੂਪਚਾਰੋ ਨਾਨੂਪਚਾਰੋ’’ਤਿਆਦਿਨਾ ਅਵਿਸੇਸੇਨ ਮਾਤਿਕਂ ਨਿਕ੍ਖਿਪਿਤ੍ਵਾਪਿ ਗਾਮਨਿਵੇਸਨਉਦੋਸਿਤਖੇਤ੍ਤਧਞ੍ਞਕਰਣਆਰਾਮਵਿਹਾਰਾਨਂ ਏਕੂਪਚਾਰਨਾਨੂਪਚਾਰਤਾ ‘‘ਗਾਮੋ ਏਕੂਪਚਾਰੋ ਨਾਮ ਏਕਕੁਲਸ੍ਸ ਗਾਮੋ ਹੋਤਿ ਪਰਿਕ੍ਖਿਤ੍ਤੋ ਚ ਅਪਰਿਕ੍ਖਿਤ੍ਤੋ ਚਾ’’ਤਿਆਦਿਨਾ (ਪਾਰਾ. ੪੭੮) ਪਰਿਕ੍ਖਿਤ੍ਤਾਪਰਿਕ੍ਖਿਤ੍ਤਵਸੇਨ ਵਿਭਤ੍ਤਾ. ਅਟ੍ਟਮਾਲ਼ਪਾਸਾਦਹਮ੍ਮਿਯਨਾਵਾਸਤ੍ਥਰੁਕ੍ਖਮੂਲਅਜ੍ਝੋਕਾਸਾਨਂ ਪਨ ਏਵਂ ਅਵਤ੍ਵਾ ‘‘ਏਕਕੁਲਸ੍ਸ ਅਟ੍ਟੋ ਹੋਤਿ, ਨਾਨਾਕੁਲਸ੍ਸ ਅਟ੍ਟੋ ਹੋਤੀ’’ਤਿਆਦਿਨਾ (ਪਾਰਾ. ੪੮੪) ਨਯੇਨ ਏਕਕੁਲਨਾਨਾਕੁਲਵਸੇਨ ਚ ਅਨ੍ਤੇ ‘‘ਅਜ੍ਝੋਕਾਸੋ ਏਕੂਪਚਾਰੋ ਨਾਮ ਅਗਾਮਕੇ ਅਰਞ੍ਞੇ ਸਮਨ੍ਤਾ ਸਤ੍ਤਬ੍ਭਨ੍ਤਰਾ ਏਕੂਪਚਾਰੋ, ਤਤੋ ਪਰਂ ਨਾਨੂਪਚਾਰੋਤਿ (ਪਾਰਾ. ੪੯੪) ਚ ਏਵਂ ਏਕੂਪਚਾਰਨਾਨੂਪਚਾਰਤਾ ਵਿਭਤ੍ਤਾ. ਤਸ੍ਮਾ ਗਾਮਾਦੀਸੁ ਪਰਿਕ੍ਖਿਤ੍ਤਂ ਏਕੂਪਚਾਰਂ, ਅਪਰਿਕ੍ਖਿਤ੍ਤਂ ਨਾਨੂਪਚਾਰਨ੍ਤਿ ਚ, ਅਟ੍ਟਾਦਿਸੁ ਯਂ ਏਕਕੁਲਸ੍ਸ, ਤਂ ਏਕੂਪਚਾਰਂ, ਯਂ ਨਾਨਾਕੁਲਸ੍ਸ, ਤਂ ਨਾਨੂਪਚਾਰਨ੍ਤਿ ਚ ਗਹੇਤਬ੍ਬਂ. ਅਜ੍ਝੋਕਾਸੇ ਵੁਤ੍ਤਨਯੇਨ ਗਹੇਤਬ੍ਬਂ. ਉਪਚਾਰੋਤਿ ਹਿ ‘‘ਗਾਮੋ ਏਕੂਪਚਾਰੋ ਨਾਨੂਪਚਾਰੋ’’ਤਿਆਦੀਸੁ ਦ੍ਵਾਰਂ, ‘‘ਅਜ੍ਝੋਕਾਸੋ ਏਕੂਪਚਾਰੋ’’ਤਿ ਏਤ੍ਥ ਸਮਨ੍ਤਾ ਸਤ੍ਤਬ੍ਭਨ੍ਤਰਸਙ੍ਖਾਤਂ ਪਮਾਣਨ੍ਤਿ ਅਪਰੇ.

ਅਞ੍ਞਤ੍ਰ ਭਿਕ੍ਖੁਸਮ੍ਮੁਤਿਯਾਤਿ ਭਿਕ੍ਖੁਨੋ ਸਙ੍ਘੇਨ ਦਿਨ੍ਨਾ ਸਮ੍ਮੁਤਿ ਭਿਕ੍ਖੁਸਮ੍ਮੁਤਿ, ਤਂ ਵਿਨਾਤਿ ਅਤ੍ਥੋ. ਤੇਨਾਹ ‘‘ਯਂ ਸਙ੍ਘੋ’’ਤਿਆਦਿ. ਅਵਿਪ੍ਪਵਾਸਸਮ੍ਮੁਤਿਂ ਦੇਤੀਤਿ ਅਵਿਪ੍ਪਵਾਸਾ ਸਮ੍ਮੁਤਿ, ਅਵਿਪ੍ਪਵਾਸਾਯ ਵਾ ਸਮ੍ਮੁਤਿ ਅਵਿਪ੍ਪਵਾਸਸਮ੍ਮੁਤਿ, ਤਂ ਞਤ੍ਤਿਦੁਤਿਯੇਨ ਕਮ੍ਮੇਨ ਦੇਤੀਤਿ ਅਤ੍ਥੋ.

ਸਨ੍ਤਰੁਤ੍ਤਰੇਨਾਤਿ ‘‘ਅਨ੍ਤਰ’’ਨ੍ਤਿ ਅਨ੍ਤਰਵਾਸਕੋ ਵੁਚ੍ਚਤਿ, ‘‘ਉਤ੍ਤਰ’’ਨ੍ਤਿ ਉਤ੍ਤਰਾਸਙ੍ਗੋ, ਸਹ ਅਨ੍ਤਰੇਨ ਉਤ੍ਤਰਂ ਸਨ੍ਤਰੁਤ੍ਤਰਂ, ਤੇਨ ਸਨ੍ਤਰੁਤ੍ਤਰੇਨ, ਸਹ ਅਨ੍ਤਰਵਾਸਕੇਨ ਉਤ੍ਤਰਾਸਙ੍ਗੇਨਾਤਿ ਅਤ੍ਥੋ. ਅਨ੍ਤੋਅਰੁਣੇ ਪਚ੍ਚੁਦ੍ਧਟੇਤਿ ਨਿਵਤ੍ਤਿਤ੍ਵਾ ਸਮ੍ਪਾਪੁਣਿਤੁਮਸਕ੍ਕੋਨ੍ਤੇਨ ਤਤ੍ਥੇਵ ਠਤ੍ਵਾ ਅਨ੍ਤੋ ਅਰੁਣੇ ਪਚ੍ਚੁਦ੍ਧਟੇ. ਪਚ੍ਚਾਗਨ੍ਤਬ੍ਬਨ੍ਤਿ ਯਥਾ ਰੋਗੋ ਨ ਕੁਪ੍ਪਤਿ, ਤਥਾ ਪੁਨ ਚੀਵਰਸ੍ਸ ਠਪਿਤਟ੍ਠਾਨਂ ਆਗਨ੍ਤਬ੍ਬਂ. ਯਤੋ ਪਟ੍ਠਾਯ ਹਿ ਸਤ੍ਥਂ ਵਾ ਪਰਿਯੇਸਤਿ, ‘‘ਗਚ੍ਛਾਮੀ’’ਤਿ ਆਭੋਗਂ ਵਾ ਕਰੋਤਿ, ਤਤੋ ਪਟ੍ਠਾਯ ਵਟ੍ਟਤਿ. ‘‘ਨ ਦਾਨਿ ਗਮਿਸ੍ਸਾਮੀ’’ਤਿ ਏਵਂ ਪਨ ਧੁਰਨਿਕ੍ਖੇਪਂ ਕਰੋਨ੍ਤੇਨ ਪਚ੍ਚੁਦ੍ਧਰਿਤਬ੍ਬਂ ‘‘ਅਤਿਰੇਕਚੀਵਰਟ੍ਠਾਨੇ ਠਸ੍ਸਤੀ’’ਤਿ. ਤੇਨਾਹ ‘‘ਤਤ੍ਥੇਵ ਵਾ ਠਿਤੇਨ ਪਚ੍ਚੁਦ੍ਧਰਿਤਬ੍ਬ’’ਨ੍ਤਿ. ਸੋਤਿ ਯਸ੍ਸ ਸਮ੍ਮੁਤਿ ਦਿਨ੍ਨਾ, ਸੋ ਰੋਗੋ. ਲਦ੍ਧਕਪ੍ਪਿਯਮੇਵ ਪੁਨ ਸਮ੍ਮੁਤਿਦਾਨਕਿਚ੍ਚਂ ਨਤ੍ਥੀਤਿ ਅਧਿਪ੍ਪਾਯੋ.

ਅਧਿਟ੍ਠਿਤਚੀਵਰਤਾਤਿ ਤਿਚੀਵਰਾਧਿਟ੍ਠਾਨਨਯੇਨ ਅਧਿਟ੍ਠਿਤਚੀਵਰਤਾ. ਵਿਪ੍ਪਵਾਸੋ ਨਾਮ ਯਦਿ ਬਦ੍ਧਸੀਮਾਯਂ ਚੀਵਰਂ ਹੋਤਿ, ਤਤੋ ਬਹਿ ਅਰੁਣੁਟ੍ਠਾਪਨਂ. ਅਥ ਅਬਦ੍ਧਸੀਮਾਯਂ, ਯਥਾਵੁਤ੍ਤਗਾਮਾਦੀਨਂ ਬਹਿ ਹਤ੍ਥਪਾਸਾਤਿਕ੍ਕਮੇ ਅਰੁਣੁਟ੍ਠਾਪਨਂ. ਬਦ੍ਧਸੀਮਾਯਂ ਪਨ ਯਤ੍ਥ ਕਤ੍ਥਚਿ ਚੀਵਰਂ ਠਪੇਤ੍ਵਾ ਅਨ੍ਤੋਸੀਮਾਯਮੇਵ ਯਤ੍ਥ ਕਤ੍ਥਚਿ ਵਸਿਤੁਂ ਵਟ੍ਟਤਿ. ਇਧ ਅਪਚ੍ਚੁਦ੍ਧਰਣਂ ਅਕਿਰਿਯਾਤਿ ਸਮ੍ਬਨ੍ਧੋ.

ਉਦੋਸਿਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਅਕਾਲਚੀਵਰਸਿਕ੍ਖਾਪਦਵਣ੍ਣਨਾ

ਪੁਰਿਮਸਿਕ੍ਖਾਪਦੇ ਵਿਯ ਏਤ੍ਥਾਪਿ ਭਿਕ੍ਖੁਨਾਤਿ ਸਾਮਿਅਤ੍ਥੇ ਕਰਣਵਚਨਨ੍ਤਿ ਆਹ ‘‘ਨਿਟ੍ਠਿਤਚੀਵਰਸ੍ਮਿਂ ਭਿਕ੍ਖੁਨਾ’’ਤਿਆਦਿ. ‘‘ਅਕਾਲਚੀਵਰਂ ਨਾਮ ਅਨਤ੍ਥਤੇ ਕਥਿਨੇ ਏਕਾਦਸਮਾਸੇ ਉਪ੍ਪਨ੍ਨਂ, ਅਤ੍ਥਤੇ ਕਥਿਨੇ ਸਤ੍ਤਮਾਸੇ ਉਪ੍ਪਨ੍ਨਂ, ਕਾਲੇਪਿ ਆਦਿਸ੍ਸ ਦਿਨ੍ਨਂ, ਏਤਂ ਅਕਾਲਚੀਵਰਂ ਨਾਮਾ’’ਤਿ (ਪਾਰਾ. ੫੦੦) ਪਦਭਾਜਨਿਯਂ ਵੁਤ੍ਤਤ੍ਤਾ ‘‘ਯ੍ਵਾਯਂ ਅਨਤ੍ਥਤੇ ਕਥਿਨੇ’’ਤਿਆਦਿਮਾਹ. ਯ੍ਵਾਯਂ ਚੀਵਰਕਾਲੋ ਵੁਤ੍ਤੋਤਿ ਸਮ੍ਬਨ੍ਧੋ. ਵਸ੍ਸਾਨਸ੍ਸਾਤਿ ਵਸ੍ਸਾਨਸਙ੍ਖਾਤਸ੍ਸ ਉਤੁਨੋ. ਪਚ੍ਛਿਮੋ ਮਾਸੋ ਨਾਮ ਚੀਵਰਮਾਸੋ. ਤਸ੍ਮਿਞ੍ਹਿ ਅਨਤ੍ਥਤੇਪਿ ਕਥਿਨੇ ਉਪ੍ਪਨ੍ਨਂ ਚੀਵਰਂ ਅਨਧਿਟ੍ਠਿਤਂ, ਅਵਿਕਪ੍ਪਿਤਂ ਠਪੇਤੁਂ ਵਟ੍ਟਤਿ. ਪਞ੍ਚ ਮਾਸਾਤਿ ਪਚ੍ਛਿਮਕਤ੍ਤਿਕਮਾਸੋ, ਹੇਮਨ੍ਤਿਕਾ ਚਤ੍ਤਾਰੋ ਚਾਤਿ ਪਞ੍ਚ ਮਾਸਾ. ਅਞ੍ਞਦਾਤਿ ਅਨਤ੍ਥਤੇ ਕਥਿਨੇ ਏਕਾਦਸਮਾਸੇ, ਅਤ੍ਥਤੇ ਕਥਿਨੇ ਸਤ੍ਤਮਾਸੇ. ਕਾਲੇਪੀਤਿ ‘‘ਅਨਤ੍ਥਤੇ ਕਥਿਨੇ ਚੀਵਰਮਾਸੋ, ਅਤ੍ਥਤੇ ਕਥਿਨੇ ਪਞ੍ਚ ਮਾਸਾ’’ਤਿ ਯਥਾਵੁਤ੍ਤਚੀਵਰਕਾਲੇਪਿ. ‘‘ਆਦਿਨਾ ਨਯੇਨਾ’’ਤਿ ਇਮਿਨਾ ‘‘ਦਦਾਮਿ ਦਜ੍ਜਾਮੀ’’ਤਿਆਦੀਨਂ (ਪਾਰਾ. ਅਟ੍ਠ. ੨.੪੬੯) ਸਙ੍ਗਹੋ. ਕਿਞ੍ਚਾਪਿ ਚੇਤਾਨਿ ਸਬ੍ਬਾਨਿ ‘‘ਅਕਾਲਚੀਵਰ’’ਨ੍ਤਿ ਵੁਤ੍ਤਾਨਿ, ਤਥਾਪਿ ਪਿਟ੍ਠਿਸਮਯੇਯੇਵ ਉਪ੍ਪਨ੍ਨਾਨਿ ‘‘ਅਕਾਲਚੀਵਰ’’ਨ੍ਤਿ ਇਧਾਧਿਪ੍ਪੇਤਾਨਿ.

‘‘ਕਾਲੇ ਸਙ੍ਘਸ੍ਸ ਇਦਂ ਅਕਾਲਚੀਵਰ’’ਨ੍ਤਿ ਦਿਨ੍ਨਂ ਪਨ ਅਕਾਲਚੀਵਰਸਾਮਞ੍ਞਤੋ ਅਤ੍ਥੁਦ੍ਧਾਰਵਸੇਨ ਵੁਤ੍ਤਂ. ਯਥਾ ਪਿਟ੍ਠਿਸਮਯੇ ਉਪ੍ਪਨ੍ਨਂ ਚੀਵਰਂ ਵੁਟ੍ਠਵਸ੍ਸੇਹਿ, ਸੇਸੇਹਿ ਚ ਸਮ੍ਮੁਖੀਭੂਤੇਹਿ ਭਾਜੇਤੁਂ ਲਬ੍ਭਤੀਤਿ ਅਕਾਲਚੀਵਰਂ ਨਾਮ ਜਾਤਂ, ਤਥੇਵਿਦਮ੍ਪੀਤਿ ਤਦਿਦਂ ਅਕਾਲਚੀਵਰਸਾਮਞ੍ਞਂ. ਯਦਿ ਏਵਂ ‘‘ਪੁਗ੍ਗਲਸ੍ਸ ਵਾ ਇਦਂ ਤੁਯ੍ਹਂ ‘ਦਮ੍ਮੀ’ਤਿਆਦਿਨਾ ਨਯੇਨ ਦਿਨ੍ਨ’’ਨ੍ਤਿ ਕਸ੍ਮਾ ਵੁਤ੍ਤਂ, ਨ ਹਿ ਪੁਗ੍ਗਲਸ੍ਸ ਆਦਿਸ੍ਸ ਦਿਨ੍ਨਂ ਕੇਨਚਿ ਭਾਜਨੀਯਂ ਹੋਤੀਤਿ? ਨਾਯਂ ਵਿਰੋਧੋ, ਆਦਿਸ੍ਸ ਦਾਨਸਾਮਞ੍ਞਤੋ ਲਬ੍ਭਮਾਨਮਤ੍ਥਂ ਦਸ੍ਸੇਤੁਂ ਤਥਾ ਵੁਤ੍ਤਨ੍ਤਿ. ਅਤ੍ਤਨੋ ਵਾ ਧਨੇਨਾਤਿ ਅਤ੍ਤਨੋ ਕਪ੍ਪਾਸਸੁਤ੍ਤਾਦਿਨਾ ਧਨੇਨ. ਇਮਸ੍ਸ ‘‘ਉਪ੍ਪਜ੍ਜੇਯ੍ਯਾ’’ਤਿ ਇਮਿਨਾ ਸਮ੍ਬਨ੍ਧੋ ਵੇਦਿਤਬ੍ਬੋ. ‘‘ਸੀਮਾਯ ਦੇਤੀ’’ਤਿਆਦਿ ਪੁਗ੍ਗਲਾਧਿਟ੍ਠਾਨਨਯੇਨ ਵੁਤ੍ਤਂ. ਏਤ੍ਥ ਪਨ ਸੀਮਾਯ ਦਾਨਂ ਏਕਾ ਮਾਤਿਕਾ, ਕਤਿਕਾਯ ਦਾਨਂ ਦੁਤਿਯਾ…ਪੇ… ਪੁਗ੍ਗਲਸ੍ਸ ਦਾਨਂ ਅਟ੍ਠਮਾ.

‘‘ਪਰਿਕ੍ਖੇਪਾਰਹਟ੍ਠਾਨੇਨਾ’’ਤਿ ਇਮਿਨਾ ਅਪਰਿਕ੍ਖਿਤ੍ਤਸ੍ਸ ਵਿਹਾਰਸ੍ਸ ਧੁਵਸਨ੍ਨਿਪਾਤਟ੍ਠਾਨਾਦਿਤੋ ਪਠਮਲੇਡ੍ਡੁਪਾਤਸ੍ਸ ਅਨ੍ਤੋ ਉਪਚਾਰਸੀਮਾਤਿ ਦਸ੍ਸੇਤਿ. ਇਦਾਨਿ ਦੁਤਿਯਲੇਡ੍ਡੁਪਾਤਸ੍ਸਪਿ ਅਨ੍ਤੋ ਉਪਚਾਰਸੀਮਾਯੇਵਾਤਿ ਦਸ੍ਸੇਤੁਂ ‘‘ਅਪਿਚਾ’’ਤਿਆਦਿ ਆਰਦ੍ਧਂ. ਧੁਵਸਨ੍ਨਿਪਾਤਟ੍ਠਾਨਮ੍ਪਿ ਸੀਮਾਪਰਿਯਨ੍ਤਗਤਮੇਵ ਵੇਦਿਤਬ੍ਬਂ. ਆਵਾਸੇ ਵਡ੍ਢਨ੍ਤੇ ਵਡ੍ਢਤੀਤਿ ਸਚੇ ਉਪਚਾਰਤੋ ਅਬਹਿਭੂਤੋ ਹੁਤ੍ਵਾ ਆਵਾਸੋ ਵਡ੍ਢਤੀਤਿ ਅਧਿਪ੍ਪਾਯੋ. ਮਹਾਪਚ੍ਚਰਿਯਂ ਪਨ ‘‘ਭਿਕ੍ਖੂਸੁਪਿ ਵਡ੍ਢਨ੍ਤੇਸੁ ਵਡ੍ਢਤੀ’’ਤਿ ਵੁਤ੍ਤਂ. ‘‘ਸਚੇ ਵਿਹਾਰੇ ਸਨ੍ਨਿਪਤਿਤਭਿਕ੍ਖੂਹਿ ਸਦ੍ਧਿਂ ਏਕਾਬਦ੍ਧਾ ਹੁਤ੍ਵਾ ਯੋਜਨਸਤਮ੍ਪਿ ਪੂਰੇਤ੍ਵਾ ਨਿਸੀਦਨ੍ਤਿ, ਯੋਜਨਸਤਮ੍ਪਿ ਉਪਚਾਰਸੀਮਾਵ ਹੋਤਿ, ਸਬ੍ਬੇਸਂ ਲਾਭੋ ਪਾਪੁਣਾਤੀ’’ਤਿ (ਮਹਾਵ. ਅਟ੍ਠ. ੩੭੯) ਸਮਨ੍ਤਪਾਸਾਦਿਕਾਯਂ ਵੁਤ੍ਤਂ. ਭਿਕ੍ਖੁਨੀਨਂ ਆਰਾਮਪਵੇਸਨਸੇਨਾਸਨਾਪੁਚ੍ਛਨਾਨੀਤਿ ਆਗਨ੍ਤੁਕਗਮਿਕਾਨਂ ਭਿਕ੍ਖੁਨੀਨਂ ਆਰਾਮਪਵੇਸਨਾਪੁਚ੍ਛਨਂ, ਸੇਨਾਸਨਾਪੁਚ੍ਛਨਞ੍ਚਾਤਿ ਅਤ੍ਥੋ. ਤਥਾ ਹਿ ਆਗਨ੍ਤੁਕਾਯ ਭਿਕ੍ਖੁਨਿਯਾ ਆਰਾਮਪਵੇਸਨਂ ਆਪੁਚ੍ਛਿਤਬ੍ਬਂ, ਗਮਿਕਾਯ ਸਙ੍ਘਿਕਂ ਦਸਵਿਧਂ ਸੇਨਾਸਨਂ. ਏਤ੍ਥ ਚ ਕਿਞ੍ਚਾਪਿ ‘‘ਭਿਕ੍ਖੁਨੀਨ’’ਨ੍ਤਿ ਵੁਤ੍ਤਂ, ਗਮਿਕਸ੍ਸ ਪਨ ਭਿਕ੍ਖੁਸ੍ਸਾਪਿ ਇਮਿਸ੍ਸਾਯੇਵ ਸੀਮਾਯ ਵਸੇਨ ਸੇਨਾਸਨਾਪੁਚ੍ਛਨਂ ਵੇਦਿਤਬ੍ਬਂ.

ਪਰਿਵਾਸਮਾਨਤ੍ਤਾਰੋਚਨਨ੍ਤਿ ਪਾਰਿਵਾਸਿਕਮਾਨਤ੍ਤਚਾਰੀਨਂ ਪਰਿਵਾਸਾਰੋਚਨਂ, ਮਾਨਤ੍ਤਾਰੋਚਨਞ੍ਚ. ਵਸ੍ਸਚ੍ਛੇਦਨਿਸ੍ਸਯਸੇਨਾਸਨਗ੍ਗਾਹਾਦਿਵਿਧਾਨਨ੍ਤਿ ਵਸ੍ਸਚ੍ਛੇਦਵਿਧਾਨਂ, ਨਿਸ੍ਸਯਗ੍ਗਾਹਵਿਧਾਨਂ, ਸੇਨਾਸਨਗ੍ਗਾਹਵਿਧਾਨਨ੍ਤਿ ਅਤ੍ਥੋ. ਆਦਿਸਦ੍ਦੇਨ ਨਿਸ੍ਸਯਪਟਿਪ੍ਪਸ੍ਸਦ੍ਧਿ, ਲਾਭਗ੍ਗਾਹੋ ਆਗਨ੍ਤੁਕਵਤ੍ਤਂ ਪੂਰੇਤ੍ਵਾ ਆਰਾਮਪਵੇਸਨਨ੍ਤਿ ਏਵਮਾਦਿਕਂ ਸਙ੍ਗਣ੍ਹਾਤਿ. ਇਮਿਸ੍ਸਾਵ ਸੀਮਾਯ ਵਸੇਨਾਤਿ ਉਪਚਾਰਸੀਮਾਯੇਵਾਤਿ ਯਥਾਸਮ੍ਭਵਂ ਅਨ੍ਤੋ, ਬਹਿ ਚ ਇਮਸ੍ਸ ਸਬ੍ਬਸ੍ਸ ਲਬ੍ਭਨਤੋ ਵੁਤ੍ਤਂ.

ਲਾਭਤ੍ਥਾਯ ਠਪਿਤਾ ਸੀਮਾ ਲਾਭਸੀਮਾ (ਮਹਾਵ. ੩੭੯), ਸਾ ਚ ਖੋ ਨੇਵ ਸਮ੍ਮਾਸਮ੍ਬੁਦ੍ਧੇਨ ਅਨੁਞ੍ਞਾਤਾ, ਨ ਧਮ੍ਮਸਙ੍ਗਾਹਕਤ੍ਥੇਰੇਹਿ ਠਪਿਤਾ, ਅਪਿਚ ਖੋ ਲਾਭਦਾਯਕੇਹਿ. ਤੇਨਾਹ ‘‘ਯਂ ਰਾਜਰਾਜਮਹਾਮਤ੍ਤਾਦਯੋ’’ਤਿਆਦਿ. ਸਮਨ੍ਤਾਤਿ ਵਿਹਾਰਸ੍ਸ ਸਮਨ੍ਤਾ. ਯਨ੍ਤਿ ਸੁਙ੍ਕਸਸ੍ਸਾਦਿ. ‘‘ਸੀਮਂ ਠਪੇਨ੍ਤੀ’’ਤਿ ਪਾਠਸੇਸੋ. ਏਕਸ੍ਸ ਰਞ੍ਞੋ ਆਣਾਪਵਤ੍ਤਿਟ੍ਠਾਨਨ੍ਤਿ ਚੋਲ਼ਭੋਗੋ ਕੇਰਲ਼ਭੋਗੋਤਿ ਏਵਂ ਏਕੇਕਸ੍ਸ ਰਞ੍ਞੋ ਆਣਾਪਵਤ੍ਤਿਟ੍ਠਾਨਂ. ਦ੍ਵਿਧਾ ਆਪੋ ਗਤੋ ਏਤ੍ਥਾਤਿ ਦੀਪੋ, ਓਘੇਨ ਅਨਜ੍ਝੋਤ੍ਥਤੋ ਭੂਮਿਭਾਗੋ, ਸੋਵ ਸੀਮਾ ਦੀਪਸੀਮਾ. ਤੇਨਾਹ ਸਮੁਦ੍ਦਨ੍ਤੇਨਾ’’ਤਿਆਦਿ. ਚਕ੍ਕਵਾਲ਼ਸੀਮਾ ਚਕ੍ਕਵਾਲ਼ਪਬ੍ਬਤੇਨੇਵ ਪਰਿਚ੍ਛਿਨ੍ਨਾਤਿ ਆਹ ‘‘ਏਕਚਕ੍ਕਵਾਲ਼ਪਬ੍ਬਤਪਰਿਕ੍ਖੇਪਬ੍ਭਨ੍ਤਰਂ ਚਕ੍ਕਵਾਲ਼ਸੀਮਾ’’ਤਿ.

ਸੇਸਾਤਿ ਖਣ੍ਡਸੀਮਾਦਯੋ. ਖਣ੍ਡਸੀਮਾਯ ਦੇਮਾਤਿ ਦਿਨ੍ਨਨ੍ਤਿ ਖਣ੍ਡਸੀਮਾਯ ਕੇਨਚਿ ਕਮ੍ਮੇਨ ਸਨ੍ਨਿਪਤਿਤਂ ਸਙ੍ਘਂ ਦਿਸ੍ਵਾ ‘‘ਖਣ੍ਡਸੀਮਾਯਂ ਸਙ੍ਘਸ੍ਸ ਦੇਮਾ’’ਤਿ ਦਿਨ੍ਨਂ. ਖਣ੍ਡਸੀਮਾਯ ਠਿਤੇ ਰੁਕ੍ਖੇ ਵਾ ਪਬ੍ਬਤੇ ਵਾ ਠਿਤੋਪਿ ਹੇਟ੍ਠਾ ਵਾ ਪਥਵਿਵੇਮਜ੍ਝਗਤੋਪਿ ਖਣ੍ਡਸੀਮਾਯੇਵ ਠਿਤੋਤਿ ਵੇਦਿਤਬ੍ਬੋ. ਸਮਾਨਸਂਵਾਸਸੀਮਾਯ ਦਿਨ੍ਨਨ੍ਤਿ ‘‘ਸਮਾਨਸਂਵਾਸਸੀਮਾਯ ਦਮ੍ਮੀ’’ਤਿ ਦਿਨ੍ਨਂ. ਏਸ ਨਯੋ ਸੇਸੇਸੁਪਿ. ਖਣ੍ਡਸੀਮਾ ਸੀਮਨ੍ਤਰਿਕਟ੍ਠਾਨਂ ਨ ਪਾਪੁਣਾਤਿ ਤਤ੍ਥ ਸਮਾਨਸਂਵਾਸਸੀਮਾਯ ਅਭਾਵਤੋਤਿ ਅਧਿਪ੍ਪਾਯੋ. ਸਮਾਨਸਂਵਾਸਅਵਿਪ੍ਪਵਾਸਸੀਮਾਸੁ ਦਿਨ੍ਨਸ੍ਸ ਇਦਂ ਨਾਨਾਤ੍ਤਂ – ‘‘ਅਵਿਪ੍ਪਵਾਸਸੀਮਾਯ ਦਮ੍ਮੀ’’ਤਿ ਦਿਨ੍ਨਂ ਗਾਮਟ੍ਠਾਨਂ ਨ ਪਾਪੁਣਾਤਿ. ਕਸ੍ਮਾ? ‘‘ਠਪੇਤ੍ਵਾ ਗਾਮਞ੍ਚ ਗਾਮੂਪਚਾਰਞ੍ਚਾ’’ਤਿ (ਮਹਾਵ. ੧੪੪) ਵੁਤ੍ਤਤ੍ਤਾ. ‘‘ਸਮਾਨਸਂਵਾਸਸੀਮਾਯ ਦਮ੍ਮੀ’’ਤਿ ਦਿਨ੍ਨਂ ਪਨ ਗਾਮੇ ਠਿਤਾਨਮ੍ਪਿ ਪਾਪੁਣਾਤੀਤਿ. ਅਬ੍ਭਨ੍ਤਰਸੀਮਾਉਦਕੁਕ੍ਖੇਪਸੀਮਾਸੁ ਦਿਨ੍ਨਨ੍ਤਿ ਤਤ੍ਥ ਉਪੋਸਥਾਦਿਅਤ੍ਥਾਯ ਸਨ੍ਨਿਪਤਿਤੇ ਦਿਸ੍ਵਾ ‘‘ਇਮਿਸ੍ਸਾ ਅਬ੍ਭਨ੍ਤਰਸੀਮਾਯ ਦੇਮਾ’’ਤਿਆਦਿਨਾ ਦਿਨ੍ਨਂ. ਜਨਪਦਰਟ੍ਠਰਜ੍ਜਦੀਪਚਕ੍ਕਵਾਲ਼ਸੀਮਾਸੁਪਿ ਗਾਮਸੀਮਾਦੀਸੁ ਵੁਤ੍ਤਸਦਿਸੋਵ ਵਿਨਿਚ੍ਛਯੋਤਿ ਆਹ ‘‘ਜਨਪਦਸੀਮਾਦੀਸੂ’’ਤਿਆਦਿ. ਏਕੋਪਿ ਗਨ੍ਤ੍ਵਾ ਸਬ੍ਬੇਸਂ ਸਙ੍ਗਣ੍ਹਿਤੁਂ ਲਭਤੀਤਿ ਏਕੋਪਿ ਗਨ੍ਤ੍ਵਾ ਇਧ ਵਸ੍ਸਗ੍ਗੇਨ ਭਾਜੇਤ੍ਵਾ ਗਹੇਤ੍ਵਾ ਆਗਨ੍ਤੁਂ ਲਭਤੀਤਿ ਅਤ੍ਥੋ. ਏਕੋਤਿ ਸਭਾਗੋ ਏਕੋ ਭਿਕ੍ਖੁ, ਅਯਮ੍ਪਿ ਭਾਗਮੇਵ ਗਹੇਤੁਂ ਲਭਤਿ. ਤੇਨਾਹ ‘‘ਸਭਾਗਾਨਂ ਭਾਗਂ ਗਣ੍ਹਾਤੀ’’ਤਿ.

ਏਵਂ ਤਾਵ ਯੋ ਸੀਮਂ ਪਰਾਮਸਿਤ੍ਵਾ ਦੇਤਿ, ਤਸ੍ਸ ਦਾਨੇ ਵਿਨਿਚ੍ਛਯਂ ਵਤ੍ਵਾ ਇਦਾਨਿ ਯੋ ‘‘ਅਸੁਕਸੀਮਾਯਾ’’ਤਿ ਵਤ੍ਤੁਂ ਨ ਜਾਨਾਤਿ, ਕੇਵਲਂ ‘‘ਸੀਮਾ’’ਤਿ ਵਚਨਮਤ੍ਤਮੇਵ ਜਾਨਨ੍ਤੋ ਵਿਹਾਰਂ ਆਗਨ੍ਤ੍ਵਾ ‘‘ਸੀਮਾਯ ਦਮ੍ਮੀ’’ਤਿ ਵਾ ‘‘ਸੀਮਟ੍ਠਕਸਙ੍ਘਸ੍ਸ ਦਮ੍ਮੀ’’ਤਿ ਵਾ ਭਣਤਿ, ਤਤ੍ਥ ਵਿਨਿਚ੍ਛਯਂ ਦਸ੍ਸੇਤੁਂ ‘‘ਯੋ ਪਨ ਵਿਹਾਰਂ ਪਵਿਸਿਤ੍ਵਾ’’ਤਿਆਦਿਮਾਹ. ਕਤਰਨ੍ਤਿ ਕਤਰਸੀਮਂ. ਅਹਮੇਤਂ ਭੇਦਂ ਨ ਜਾਨਾਮੀਤਿ ਅਹਂ ‘‘ਅਸੁਕਾ ਸੀਮਾ’’ਤਿ ਏਤਂ ਵਿਭਾਗਂ ਨ ਜਾਨਾਮਿ. ਉਪਚਾਰਸੀਮਟ੍ਠੇਹਿ ਭਾਜੇਤਬ੍ਬਂ ਲਾਭਸ੍ਸ ਉਪਚਾਰਸੀਮਾਯ ਪਰਿਚ੍ਛਿਨ੍ਨਤ੍ਤਾਤਿ ਅਧਿਪ੍ਪਾਯੋ. ਸਾਤਿ ਸਮਾਨਲਾਭਕਤਿਕਾ.

ਯਤ੍ਥ ਮਯ੍ਹਂ ਧੁਵਕਾਰਾ ਕਰੀਯਨ੍ਤੀਤਿ (ਮਹਾਵ. ਅਟ੍ਠ. ੩੭੯) ਏਤ੍ਥ ਯਸ੍ਮਿਂ ਵਿਹਾਰੇ ਤਸ੍ਸ ਚੀਵਰਦਾਯਕਸ੍ਸ ਸਨ੍ਤਕਂ ਸਙ੍ਘਸ੍ਸ ਪਾਕਵਤ੍ਤਂ ਵਾ ਵਤ੍ਤਤਿ. ਯਸ੍ਮਿਂ ਵਿਹਾਰੇ ਭਿਕ੍ਖੂ ਅਤ੍ਤਨੋ ਭਾਰਂ ਕਤ੍ਵਾ ਸਦਾ ਗੇਹੇ ਭੋਜੇਤਿ, ਯਤ੍ਥ ਵਾ ਅਨੇਨ ਆਵਾਸੋ ਵਾ ਕਾਰਿਤੋ, ਸਲਾਕਭਤ੍ਤਾਦੀਨਿ ਵਾ ਨਿਬਦ੍ਧਾਨਿ, ਇਮੇ ਧੁਵਕਾਰਾ ਨਾਮ. ਯੇਨ ਪਨ ਸਕਲੋਪਿ ਵਿਹਾਰੋ ਪਤਿਟ੍ਠਾਪਿਤੋ, ਤਤ੍ਥ ਵਤ੍ਤਬ੍ਬਮੇਵ ਨਤ੍ਥਿ. ਤੇਨਾਹ ‘‘ਯਤ੍ਥ ਤਸ੍ਸ ਪਾਕਵਤ੍ਤਂ ਵਾ ਵਤ੍ਤਤੀ’’ਤਿਆਦਿ. ਤਤ੍ਥ ਪਾਕਵਤ੍ਤਨ੍ਤਿ ਦਾਨਵਤ੍ਤਂ. ਵਤ੍ਤਤੀਤਿ ਪਵਤ੍ਤਤਿ. ਯਤੋਤਿ ਯਸ੍ਮਾ ਵਿਹਾਰਾ. ਯਤ੍ਥਾਤਿ ਯਸ੍ਮਿਂ ਵਿਹਾਰੇ. ਸਬ੍ਬਤ੍ਥਾਤਿ ਸਬ੍ਬੇਸੁ ਵਿਹਾਰੇਸੁ. ਮਾਤਿਕਂ ਆਰੋਪੇਤ੍ਵਾਤਿ ਏਕਸ੍ਮਿਂ ਵਿਹਾਰੇ ਭਿਕ੍ਖੂ ਬਹੁਤਰਾ, ਏਕਸ੍ਮਿਂ ਥੋਕਤਰਾ, ਏਕਞ੍ਚ ਵਤ੍ਥਂ, ਧੁਵਕਾਰਟ੍ਠਾਨਞ੍ਚ ਬਹੁਕਂ, ਕਤ੍ਥ ਦੇਮਾਤਿ ਪੁਚ੍ਛਿਤ੍ਵਾ, ਯਦਿ ਪਨ ਮਞ੍ਚੋ ਵਾ ਪੀਠਂ ਵਾ ਏਕਮੇਵ ਹੋਤਿ, ਤਂ ਪੁਚ੍ਛਿਤ੍ਵਾ ਯਸ੍ਸ ਵਾ ਵਿਹਾਰਸ੍ਸ, ਏਕਵਿਹਾਰੇਪਿ ਵਾ ਯਸ੍ਸ ਸੇਨਾਸਨਸ੍ਸ ਸੋ ਵਿਚਾਰੇਤਿ, ਤਤ੍ਥ ਦਾਤਬ੍ਬਂ. ਸਚੇਪਿ ‘‘ਅਸੁਕਭਿਕ੍ਖੁ ਗਣ੍ਹਤੂ’’ਤਿ ਵਦਤਿ, ਵਟ੍ਟਤਿ. ਅਥ ‘‘ਮਯ੍ਹਂ ਧੁਵਕਾਰੇ ਦੇਥਾ’’ਤਿ ਵਤ੍ਵਾ ਅਵਿਚਾਰੇਤ੍ਵਾਵ ਗਚ੍ਛਤਿ, ਸਙ੍ਘਸ੍ਸਪਿ ਵਿਚਾਰੇਤੁਂ ਵਟ੍ਟਤਿ. ਏਵਂ ਪਨ ਵਿਚਾਰੇਤਬ੍ਬਂ – ‘‘ਸਙ੍ਘਤ੍ਥੇਰਸ੍ਸ ਵਸਨਟ੍ਠਾਨੇ ਦੇਥਾ’’ਤਿ ਵਤ੍ਤਬ੍ਬਂ. ਸਚੇ ਤਤ੍ਥ ਸੇਨਾਸਨਂ ਪਰਿਪੁਣ੍ਣਂ ਹੋਤਿ, ਯਤ੍ਥ ਨਪ੍ਪਹੋਤਿ, ਤਤ੍ਥ ਦਾਤਬ੍ਬਂ. ਸਚੇ ਏਕੋ ਭਿਕ੍ਖੁ ‘‘ਮਯ੍ਹਂ ਵਸਨਟ੍ਠਾਨੇ ਸੇਨਾਸਨਪਰਿਭੋਗਭਣ੍ਡਂ ਨਤ੍ਥੀ’’ਤਿ ਵਦਤਿ, ਤਤ੍ਥ ਦਾਤਬ੍ਬਂ.

ਸਙ੍ਘਸ੍ਸ ਦਮ੍ਮੀਤਿ ਦਿਨ੍ਨਨ੍ਤਿ ‘‘ਇਮਾਨਿ ਚੀਵਰਾਨਿ ਸਙ੍ਘਸ੍ਸ ਦਮ੍ਮੀ’’ਤਿ ਏਵਂ ਦਿਨ੍ਨਂ. ਤਤੋ ਬਹਿਦ੍ਧਾਪੀਤਿ ਉਪਚਾਰਸੀਮਾਤੋ ਬਹਿਦ੍ਧਾਪਿ. ਤੇਹਿ ਸਦ੍ਧਿਨ੍ਤਿ ਉਪਚਾਰਸੀਮਾਗਤੇਹਿ ਸਦ੍ਧਿਂ. ਏਕਾਬਦ੍ਧਾਨਞ੍ਚ ਪਾਪੁਣਾਤਿ ਪਰਿਸਾਵਸੇਨ ਵਡ੍ਢਿਤਾ ਸੀਮਾ ਹੋਤੀਤਿ ਕਤ੍ਵਾਤਿ ਅਧਿਪ੍ਪਾਯੋ. ਤਸ੍ਮਾਤਿ ਯਸ੍ਮਾ ਉਪਚਾਰਸੀਮਾਗਤਾਨਂ ਪਾਪੁਣਾਤਿ, ਯਸ੍ਮਾ ਚ ਤਤੋ ਬਹਿਦ੍ਧਾਪਿ ਉਪਚਾਰਸੀਮੋਕ੍ਕਨ੍ਤੇਹਿ ਏਕਾਬਦ੍ਧਾਨਂ ਪਾਪੁਣਾਤਿ, ਤਸ੍ਮਾ. ਤੇਸਨ੍ਤਿ ਉਪਚਾਰਸੀਮਾਗਤਾਨਂ, ਤਤੋ ਬਹਿਦ੍ਧਾ ਤੇਹਿ ਸਦ੍ਧਿਂ ਏਕਾਬਦ੍ਧਾਨਞ੍ਚ. ਗਾਹਤੇ ਸਤੀਤਿ ਅਨ੍ਤੇਵਾਸਿਕਾਦਿਕੇ ਗਣ੍ਹਨ੍ਤੇ ਸਤਿ. ਅਸਮ੍ਪਤ੍ਤਾਨਮ੍ਪੀਤਿ ਉਪਚਾਰਸੀਮਾਯਂ ਠਿਤੇਹਿ ਘਣ੍ਟਿਂ ਪਹਰਿਤ੍ਵਾ ਕਾਲਂ ਘੋਸੇਤ੍ਵਾ ਲਾਭਭਾਜਨਟ੍ਠਾਨਂ ਅਸਮ੍ਪਤ੍ਤਾਨਮ੍ਪਿ ਉਪਚਾਰਸੀਮਾਯ ਪਵਿਟ੍ਠਾਨਂ, ਤੇਹਿ ਵਾ ਸਦ੍ਧਿਂ ਏਕਾਬਦ੍ਧਾਨਂ ਹੁਤ੍ਵਾ ਅਤ੍ਤਨੋ ਵਿਹਾਰਦ੍ਵਾਰੇ ਵਾ ਅਨ੍ਤੋਵਿਹਾਰੇਯੇਵ ਵਾ ਠਿਤਾਨਞ੍ਚਾਤਿ ਅਤ੍ਥੋ. ਭਾਗੋ ਦਾਤਬ੍ਬੋਤਿ ਸਙ੍ਘਨਵਕਸ੍ਸ ਦਿਨ੍ਨੇਪੀਤਿ ਅਧਿਪ੍ਪਾਯੋ. ਦੁਤਿਯਭਾਗੇ ਪਨ ਥੇਰਾਸਨਂ ਆਰੁਲ਼੍ਹੇ ਆਗਤਾਨਂ ਪਠਮਭਾਗੋ ਨ ਪਾਪੁਣਾਤਿ. ਦੁਤਿਯਭਾਗਤੋ ਵਸ੍ਸਗ੍ਗੇਨ ਦਾਤਬ੍ਬਂ.

ਸਚੇ ਪਨ ‘‘ਬਹਿਉਪਚਾਰਸੀਮਾਯਂ ਠਿਤਾਨਂ ਦੇਥਾ’’ਤਿ ਵਦਨ੍ਤਿ, ਨ ਦਾਤਬ੍ਬਂ. ਯਦਿ ਪਨ ਵਿਹਾਰੋ ਮਹਾ ਹੋਤਿ, ਥੇਰਾਸਨਤੋ ਪਟ੍ਠਾਯ ਵਤ੍ਥੇਸੁ ਦੀਯਮਾਨੇਸੁ ਅਲਸਜਾਤਿਕਾ ਮਹਾਥੇਰਾ ਪਚ੍ਛਾ ਆਗਚ੍ਛਨ੍ਤਿ, ‘‘ਭਨ੍ਤੇ, ਵੀਸਤਿਵਸ੍ਸਾਨਂ ਦੀਯਤਿ, ਤੁਮ੍ਹਾਕਂ ਠਿਤਿਕਾ ਅਤਿਕ੍ਕਨ੍ਤਾ’’ਤਿ ਨ ਵਤ੍ਤਬ੍ਬਾ. ਠਿਤਿਕਂ ਠਪੇਤ੍ਵਾ ਤੇਸਂ ਦਤ੍ਵਾ ਪਚ੍ਛਾ ਠਿਤਿਕਾਯ ਦਾਤਬ੍ਬਂ.

‘‘ਅਸੁਕਵਿਹਾਰੇ ਕਿਰ ਬਹੁਚੀਵਰਂ ਉਪ੍ਪਨ੍ਨ’’ਨ੍ਤਿ ਸੁਤ੍ਵਾ ਯੋਜਨਨ੍ਤਰਿਕਵਿਹਾਰਤੋਪਿ ਭਿਕ੍ਖੂ ਆਗਚ੍ਛਨ੍ਤਿ, ਸਮ੍ਪਤ੍ਤਸਮ੍ਪਤ੍ਤਾਨਂ ਠਿਤਟ੍ਠਾਨਤੋ ਪਟ੍ਠਾਯ ਦਾਤਬ੍ਬਂ, ਅਯਮੇਤ੍ਥ ਸਙ੍ਖੇਪੋ. ਵਿਤ੍ਥਾਰੋ ਪਨ ਸਮਨ੍ਤਪਾਸਾਦਿਕਾਯ ਚੀਵਰਕ੍ਖਨ੍ਧਕਵਣ੍ਣਨਾਯਂ (ਮਹਾਵ. ਅਟ੍ਠ. ੩੭੯) ਵੁਤ੍ਤਨਯੇਨ ਵੇਦਿਤਬ੍ਬੋ.

ਏਵਂ ਵਿਹਾਰਂ ਪਵਿਸਿਤ੍ਵਾ ‘‘ਇਮਾਨਿ ਚੀਵਰਾਨਿ ਸਙ੍ਘਸ੍ਸ ਦਮ੍ਮੀ’’ਤਿ ਦਿਨ੍ਨੇਸੁ ਵਿਨਿਚ੍ਛਯਂ ਵਤ੍ਵਾ ਇਦਾਨਿ ਬਹਿਉਪਚਾਰਸੀਮਾਯਂ ਭਿਕ੍ਖੁਂ ਦਿਸ੍ਵਾ ‘‘ਸਙ੍ਘਸ੍ਸ ਦਮ੍ਮੀ’’ਤਿ ਦਿਨ੍ਨੇਸੁ ਵਿਨਿਚ੍ਛਯਂ ਦਸ੍ਸੇਤੁਂ ‘‘ਯਂ ਪਨਾ’’ਤਿਆਦਿ ਵੁਤ੍ਤਂ. ਏਕਾਬਦ੍ਧਪਰਿਸਾਯ ਪਾਪੁਣਾਤੀਤਿ ਸਚੇ ਯੋਜਨਂ ਫਰਿਤ੍ਵਾ ਪਰਿਸਾ ਠਿਤਾ ਹੋਤਿ, ਏਕਾਬਦ੍ਧਾ ਚੇ, ਸਬ੍ਬੇਸਂ ਪਾਪੁਣਾਤੀਤਿ ਅਤ੍ਥੋ. ਏਕਾਬਦ੍ਧਤਾ ਚੇਤ੍ਥ ਦ੍ਵਾਦਸਹਤ੍ਥਬ੍ਭਨ੍ਤਰਤੋ ਪਰਿਚ੍ਛਿਨ੍ਦਿਤਬ੍ਬਾ. ਤੇਨਾਹ ‘‘ਯੇ ਪਨਾ’’ਤਿਆਦਿ.

ਉਭਤੋਸਙ੍ਘਸ੍ਸ ਦਿਨ੍ਨਨ੍ਤਿ (ਮਹਾਵ. ਅਟ੍ਠ. ੩੭੯) ‘‘ਉਭਤੋਸਙ੍ਘਸ੍ਸ ਦਮ੍ਮੀ’’ਤਿ ਦਿਨ੍ਨਂ. ‘‘ਦ੍ਵੇਧਾਸਙ੍ਘਸ੍ਸ ਦਮ੍ਮਿ, ਦ੍ਵਿਨ੍ਨਂ ਸਙ੍ਘਾਨਂ ਦਮ੍ਮਿ, ਭਿਕ੍ਖੁਸਙ੍ਘਸ੍ਸ ਚ ਭਿਕ੍ਖੁਨਿਸਙ੍ਘਸ੍ਸ ਚ ਦਮ੍ਮੀ’’ਤਿ ਵੁਤ੍ਤੇਪਿ ਉਭਤੋਸਙ੍ਘਸ੍ਸ ਦਿਨ੍ਨਮੇਵ ਹੋਤਿ. ਉਪਡ੍ਢਂ ਭਿਕ੍ਖੂਨਂ, ਉਪਡ੍ਢਂ ਭਿਕ੍ਖੁਨੀਨਂ ਦਾਤਬ੍ਬਨ੍ਤਿ ਦ੍ਵੇ ਭਾਗੇ ਸਮੇ ਕਤ੍ਵਾ ਏਕੋ ਭਾਗੋ ਭਿਕ੍ਖੂਨਂ, ਏਕੋ ਭਾਗੋ ਭਿਕ੍ਖੁਨੀਨਂ ਦਾਤਬ੍ਬੋ. ਗਹੇਤੁਂ ਲਭਤਿ ਉਭਤੋਸਙ੍ਘਗ੍ਗਹਣੇਨ ਗਹਿਤਤ੍ਤਾਤਿ ਅਧਿਪ੍ਪਾਯੋ. ਚੇਤਿਯਸ੍ਸਾਤਿ ਥੂਪਾਦਿਨੋ. ਤਞ੍ਹਿ ਧਾਤਾਯਤਨਾਦਿਭਾਵੇਨ ਚਿਤਤ੍ਤਾ, ਲੋਕਸ੍ਸ ਚਿਤ੍ਤੀਕਾਰਟ੍ਠਾਨਤਾਯ ਚ ‘‘ਚੇਤਿਯ’’ਨ੍ਤਿ ਵੁਚ੍ਚਤਿ. ਨ ਕੋਚਿ ਵਿਸੇਸੋਤਿ ਆਹ ‘‘ਇਧ ਪਨ ਚੇਤਿਯਸ੍ਸਾ’’ਤਿਆਦਿ.

‘‘ਉਭਤੋਸਙ੍ਘਸ੍ਸ ਚ ਤੁਯ੍ਹਞ੍ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇ ਪਨ ਦ੍ਵਾਵੀਸਤਿਕੋਟ੍ਠਾਸੇ ਕਤ੍ਵਾ ਦਸ ਭਿਕ੍ਖੂਨਂ, ਦਸ ਭਿਕ੍ਖੁਨੀਨਂ, ਏਕੋ ਪੁਗ੍ਗਲਸ੍ਸ, ਏਕੋ ਚੇਤਿਯਸ੍ਸ ਦਾਤਬ੍ਬੋ. ਤਤ੍ਥ ਪੁਗ੍ਗਲੋ ਸਙ੍ਘਤੋਪਿ ਅਤ੍ਤਨੋ ਵਸ੍ਸਗ੍ਗੇਨ ਪੁਨ ਗਹੇਤੁਂ ਲਭਤਿ, ਚੇਤਿਯਸ੍ਸ ਏਕੋਯੇਵ. ਅਯਂ ਪਨ ਵਾਰੋ ਯਥਾਵੁਤ੍ਤੇਨੇਵ ਨਯੇਨ ਞਾਯਤੀਤਿ ਕਤ੍ਵਾ ਇਧ ਨ ਵੁਤ੍ਤੋ. ਸਮਨ੍ਤਪਾਸਾਦਿਕਾਯਂ (ਮਹਾਵ. ਅਟ੍ਠ. ੩੭੯) ਪਨ ਵੁਤ੍ਤੋਯੇਵ.

ਨ ਮਜ੍ਝੇ ਭਿਨ੍ਦਿਤ੍ਵਾ ਦਾਤਬ੍ਬਂ ‘‘ਭਿਕ੍ਖੁਨੀਨ’’ਨ੍ਤਿ ਪੁਗ੍ਗਲਿਕਵਸੇਨ ਵੁਤ੍ਤਤ੍ਤਾ. ਪੁਗ੍ਗਲੋ ਵਿਸੁਂ ਨ ਲਭਤੀਤਿ ਪੁਬ੍ਬੇ ਵਿਯ ਵਿਸੁਂ ਪੁਗ੍ਗਲਿਕਕੋਟ੍ਠਾਸਂ ਨ ਲਭਤਿ. ਪਾਪੁਣਨਟ੍ਠਾਨਤੋ ਏਕਮੇਵ ਲਭਤੀਤਿ ਅਤ੍ਤਨੋ ਵਸ੍ਸਗ੍ਗੇਨ ਪਤ੍ਤਬ੍ਬਟ੍ਠਾਨਤੋ ਏਕਮੇਵ ਕੋਟ੍ਠਾਸਂ ਲਭਤਿ. ਕਸ੍ਮਾ? ਭਿਕ੍ਖੁਸਙ੍ਘਗ੍ਗਹਣੇਨ ਗਹਿਤਤ੍ਤਾ. ‘‘ਭਿਕ੍ਖੁਸਙ੍ਘਸ੍ਸ ਚ ਭਿਕ੍ਖੁਨੀਨਞ੍ਚ ਤੁਯ੍ਹਞ੍ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇਪਿ ਚੇਤਿਯਸ੍ਸ ਏਕਪੁਗ੍ਗਲਪਟਿਵੀਸੋ ਲਬ੍ਭਤਿ, ਪੁਗ੍ਗਲਸ੍ਸ ਵਿਸੁਂ ਨ ਲਬ੍ਭਤਿ. ਤਸ੍ਮਾ ਏਕਂ ਚੇਤਿਯਸ੍ਸ ਦਤ੍ਵਾ ਅਵਸੇਸਂ ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਗਣੇਤ੍ਵਾ ਭਾਜੇਤਬ੍ਬਂ. ਤੇਨਾਹ ‘‘ਚੇਤਿਯਸ੍ਸ ਚਾਤਿ ਵੁਤ੍ਤੇ ਪਨਾ’’ਤਿਆਦਿ.

ਤੇਹਿ ਸਦ੍ਧਿਂ ਪੁਗ੍ਗਲਚੇਤਿਯਪਰਾਮਸਨਂ ਅਨਨ੍ਤਰਨਯਸਦਿਸਮੇਵਾਤਿ ਤੇਹਿ ਭਿਕ੍ਖੂਹਿ ਭਿਕ੍ਖੁਨੀਹਿ ਸਦ੍ਧਿਂ ਪੁਗ੍ਗਲਸ੍ਸ ਚ ਚੇਤਿਯਸ੍ਸ ਚ ਗਹਣਂ ਅਨਨ੍ਤਰਨਯਸਦਿਸਮੇਵਾਤਿ ਅਤ੍ਥੋ. ‘‘ਭਿਕ੍ਖੂਨਞ੍ਚ ਭਿਕ੍ਖੁਨੀਨਞ੍ਚ ਤੁਯ੍ਹਞ੍ਚ, ਭਿਕ੍ਖੂਨਞ੍ਚ ਭਿਕ੍ਖੁਨੀਨਞ੍ਚ ਚੇਤਿਯਸ੍ਸ ਚ, ਭਿਕ੍ਖੂਨਞ੍ਚ ਭਿਕ੍ਖੁਨੀਨਞ੍ਚ ਤੁਯ੍ਹਞ੍ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇਪਿ ਚੇਤਿਯਸ੍ਸ ਏਕਪਟਿਵੀਸੋ ਲਬ੍ਭਤਿ, ਪੁਗ੍ਗਲਸ੍ਸ ਵਿਸੁਂ ਨਤ੍ਥਿ, ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਗਣੇਤ੍ਵਾਵ ਭਾਜੇਤਬ੍ਬਨ੍ਤਿ ਵੁਤ੍ਤਂ ਹੋਤਿ. ਪੁਗ੍ਗਲਸ੍ਸ ਵਿਸੁਂ ਨ ਲਬ੍ਭਤੀਤਿ ਪੁਗ੍ਗਲਸ੍ਸ ਵਿਸੁਂ ਪਟਿਵੀਸੋ ਨ ਲਬ੍ਭਤਿ, ਵਸ੍ਸਗ੍ਗੇਨ ਏਕੋਵ ਲਬ੍ਭਤੀਤਿ ਅਤ੍ਥੋ. ‘‘ਭਿਕ੍ਖੁਸਙ੍ਘਸ੍ਸ ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇ ਪਨ ਚੇਤਿਯਸ੍ਸ ਵਿਸੁਂ ਪਟਿਵੀਸੋ ਲਬ੍ਭਤੀਤਿ ਆਹ ‘‘ਚੇਤਿਯਸ੍ਸ ਪਨ ਲਬ੍ਭਤੀ’’ਤਿ. ‘‘ਭਿਕ੍ਖੁਸਙ੍ਘਸ੍ਸ ਚ ਤੁਯ੍ਹਞ੍ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇਪਿ ਚੇਤਿਯਸ੍ਸੇਵ ਵਿਸੁਂ ਲਬ੍ਭਤਿ, ਨ ਪੁਗ੍ਗਲਸ੍ਸ. ਚੇਤਿਯਸ੍ਸ ਪਨ ਲਬ੍ਭਤਿਯੇਵਾਤਿ ‘‘ਭਿਕ੍ਖੂਨਞ੍ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇ ਪਨ ਚੇਤਿਯਸ੍ਸ ਵਿਸੁਂ ਪਟਿਵੀਸੋ ਲਬ੍ਭਤੀਤਿ ਅਤ੍ਥੋ. ‘‘ਭਿਕ੍ਖੂਨਞ੍ਚ ਤੁਯ੍ਹਞ੍ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇਪਿ ਚੇਤਿਯਸ੍ਸੇਵ ਵਿਸੁਂ ਲਬ੍ਭਤਿ, ਨ ਪੁਗ੍ਗਲਸ੍ਸ. ਭਿਕ੍ਖੁਨਿਸਙ੍ਘਂ ਆਦਿਂ ਕਤ੍ਵਾਪਿ ਏਵਮੇਵ ਯੋਜੇਤਬ੍ਬਂ.

ਏਤ੍ਥਾਹ – ਯਂ ਪਨੇਤਰਹਿ (ਮਹਾਵ. ਅਟ੍ਠ. ੩੭੯) ਪਣ੍ਡਿਤਮਨੁਸ੍ਸਾ ਸਧਾਤੁਕਂ ਪਟਿਮਂ ਵਾ ਚੇਤਿਯਂ ਵਾ ਠਪੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਉਭਤੋਸਙ੍ਘਸ੍ਸ ਦਾਨਂ ਦੇਨ੍ਤਿ, ਪਟਿਮਾਯ ਵਾ ਚੇਤਿਯਸ੍ਸ ਵਾ ਪੁਰਤੋ ਆਧਾਰਕੇ ਪਤ੍ਤਂ ਠਪੇਤ੍ਵਾ ਦਕ੍ਖਿਣੋਦਕਂ ਦਤ੍ਵਾ ‘‘ਬੁਦ੍ਧਾਨਂ ਦੇਮਾ’’ਤਿ, ਤਤ੍ਥ ਯਂ ਪਠਮਂ ਖਾਦਨੀਯਂ ਭੋਜਨੀਯਂ ਦੇਨ੍ਤਿ, ਵਿਹਾਰਂ ਵਾ ਆਹਰਿਤ੍ਵਾ ‘‘ਇਦਂ ਚੇਤਿਯਸ੍ਸ ਦੇਮਾ’’ਤਿ ਪਿਣ੍ਡਪਾਤਞ੍ਚ ਮਾਲਾਗਨ੍ਧਾਦੀਨਿ ਚ ਦੇਨ੍ਤਿ, ਤਤ੍ਥ ਕਥਂ ਪਟਿਪਜ੍ਜਿਤਬ੍ਬਨ੍ਤਿ? ਵੁਚ੍ਚਤੇ – ਮਾਲਾਗਨ੍ਧਾਦੀਨਿ ਤਾਵ ਚੇਤਿਯੇ ਆਰੋਪੇਤਬ੍ਬਾਨਿ, ਵਤ੍ਥੇਹਿ ਪਟਾਕਾ, ਤੇਲੇਨ ਪਦੀਪਾ ਕਾਤਬ੍ਬਾ, ਪਿਣ੍ਡਪਾਤਮਧੁਫਾਣਿਤਾਦੀਨਿ ਪਨ ਯੋ ਨਿਬਦ੍ਧਚੇਤਿਯਜਗ੍ਗਕੋ ਹੋਤਿ ਪਬ੍ਬਜਿਤੋ ਵਾ ਗਹਟ੍ਠੋ ਵਾ, ਤਸ੍ਸ ਦਾਤਬ੍ਬਾਨਿ. ਨਿਬਦ੍ਧਜਗ੍ਗਕੇ ਅਸਤਿ ਆਹਟਭਤ੍ਤਂ ਠਪੇਤ੍ਵਾ ਵਤ੍ਤਂ ਕਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ. ਉਪਕਟ੍ਠੇ ਕਾਲੇ ਭੁਞ੍ਜਿਤ੍ਵਾ ਪਚ੍ਛਾਪਿ ਵਤ੍ਤਂ ਕਾਤੁਂ ਵਟ੍ਟਤਿਯੇਵ.

ਮਾਲਾਗਨ੍ਧਾਦੀਸੁ ਚ ਯਂ ਕਿਞ੍ਚਿ ‘‘ਇਦਂ ਹਰਿਤ੍ਵਾ ਚੇਤਿਯਪੂਜਂ ਕਰੋਥਾ’’ਤਿ ਵੁਤ੍ਤੇ ਦੂਰਮ੍ਪਿ ਹਰਿਤ੍ਵਾ ਪੂਜੇਤਬ੍ਬਂ. ‘‘ਭਿਕ੍ਖੁਸਙ੍ਘਸ੍ਸ ਹਰਾ’’ਤਿ ਵੁਤ੍ਤੇਪਿ ਹਰਿਤਬ੍ਬਂ. ਸਚੇ ਪਨ ‘‘ਅਹਂ ਪਿਣ੍ਡਾਯ ਚਰਾਮਿ, ਆਸਨਸਾਲਾਯਂ ਭਿਕ੍ਖੂ ਅਤ੍ਥਿ, ਤੇ ਹਰਿਸ੍ਸਨ੍ਤੀ’’ਤਿ ਵੁਤ੍ਤੇ ‘‘ਭਨ੍ਤੇ, ਤੁਯ੍ਹਂਯੇਵ ਦਮ੍ਮੀ’’ਤਿ ਵਦਤਿ, ਭੁਞ੍ਜਿਤੁਂ ਵਟ੍ਟਤਿ. ਅਥ ਪਨ ‘‘ਭਿਕ੍ਖੁਸਙ੍ਘਸ੍ਸ ਦਸ੍ਸਾਮੀ’’ਤਿ ਹਰਨ੍ਤਸ੍ਸ ਗਚ੍ਛਤੋ ਅਨ੍ਤਰਾਵ ਕਾਲੋ ਉਪਕਟ੍ਠੋ ਹੋਤਿ, ਅਤ੍ਤਨੋ ਪਾਪੇਤ੍ਵਾ ਭੁਞ੍ਜਿਤੁਂ ਵਟ੍ਟਤਿ.

ਵਸ੍ਸਂਵੁਟ੍ਠਸਙ੍ਘਸ੍ਸ ਦਮ੍ਮੀਤਿ ਵਦਤੀਤਿ (ਮਹਾਵ. ਅਟ੍ਠ. ੩੭੯) ‘‘ਵਸ੍ਸਂਵੁਟ੍ਠਸਙ੍ਘਸ੍ਸ ਇਮਾਨਿ ਚੀਵਰਾਨਿ ਦਮ੍ਮੀ’’ਤਿ ਵਦਤਿ. ਤੇਸਂ ਬਹਿਸੀਮਟ੍ਠਾਨਮ੍ਪਿ ਪਾਪੁਣਾਤੀਤਿ ਅਤ੍ਥਤੇ ਕਥਿਨੇ ਬਹਿਸੀਮਟ੍ਠਾਨਮ੍ਪਿ ਯਾਵ ਕਥਿਨਸ੍ਸ ਉਬ੍ਭਾਰਾ ਪਾਪੁਣਾਤਿ, ਤਸ੍ਮਾ ਦਿਸਾਪਕ੍ਕਨ੍ਤਸ੍ਸਾਪਿ ਸਤਿ ਪਟਿਗ੍ਗਾਹਕੇ ਦਾਤਬ੍ਬਂ. ਅਨਤ੍ਥਤੇ ਪਨ ਕਥਿਨੇ ਅਨ੍ਤੋਹੇਮਨ੍ਤੇ, ਏਵਞ੍ਚ ਪਨ ਵਤ੍ਵਾ ਦਿਨ੍ਨਂ ਪਚ੍ਛਿਮਵਸ੍ਸਂਵੁਟ੍ਠਾਨਮ੍ਪਿ ਪਾਪੁਣਾਤਿ. ਯਤ੍ਥ ਕਤ੍ਥਚੀਤਿ ਯੇਸੁ ਕੇਸੁਚਿ ਵਿਹਾਰੇਸੁ. ਏਵਂ ਵਦਤੀਤਿ ‘‘ਵਸ੍ਸਂਵੁਟ੍ਠਸਙ੍ਘਸ੍ਸ ਦਮ੍ਮੀ’’ਤਿ ਵਦਤਿ. ਤਤ੍ਰ ਸਮ੍ਮੁਖੀਭੂਤਾਨਂ ਸਬ੍ਬੇਸਂ ਪਾਪੁਣਾਤਿ ਪਿਟ੍ਠਿਸਮਯੇ ਉਪ੍ਪਨ੍ਨਤ੍ਤਾ. ਸਚੇ ਪਨ ‘‘ਵਸ੍ਸਂ ਵਸਨ੍ਤਾਨਂ ਦਮ੍ਮੀ’’ਤਿ ਵਦਤਿ, ਅਨ੍ਤੋਵਸ੍ਸੇਯੇਵ ਵਸ੍ਸਂ ਵਸਨ੍ਤਾਵ ਲਭਨ੍ਤਿ, ਛਿਨ੍ਨਵਸ੍ਸਾ ਨ ਲਭਨ੍ਤਿ. ਚੀਵਰਮਾਸੇ ਪਨ ‘‘ਵਸ੍ਸਂ ਵਸਨ੍ਤਾਨਂ ਦਮ੍ਮੀ’’ਤਿ ਵੁਤ੍ਤੇ ਪਚ੍ਛਿਮਿਕਾਯ ਵਸ੍ਸੂਪਗਤਾਨਂਯੇਵ ਪਾਪੁਣਾਤਿ, ਪੁਰਿਮਿਕਾਯ ਵਸ੍ਸੂਪਗਤਾਨਞ੍ਚ ਛਿਨ੍ਨਵਸ੍ਸਾਨਞ੍ਚ ਨ ਪਾਪੁਣਾਤਿ.

ਚੀਵਰਮਾਸਤੋ ਪਟ੍ਠਾਯ ਯਾਵ ਹੇਮਨ੍ਤਸ੍ਸ ਪਚ੍ਛਿਮੋ ਦਿਵਸੋ, ਤਾਵ ‘‘ਵਸ੍ਸਾਵਾਸਿਕਂ ਦੇਮਾ’’ਤਿ ਵੁਤ੍ਤੇ ਕਥਿਨਂ ਅਤ੍ਥਤਂ ਵਾ ਹੋਤੁ, ਅਨਤ੍ਥਤਂ ਵਾ, ਅਤੀਤਵਸ੍ਸਂਵੁਟ੍ਠਾਨਂਯੇਵ ਪਾਪੁਣਾਤਿ. ਗਿਮ੍ਹਾਨਂ ਪਠਮਦਿਵਸਤੋ ਪਟ੍ਠਾਯ ਵੁਤ੍ਤੇ ਪਨ ਮਾਤਿਕਾ ਆਰੋਪੇਤਬ੍ਬਾ ‘‘ਅਤੀਤਵਸ੍ਸਾਵਾਸਸ੍ਸ ਪਞ੍ਚ ਮਾਸਾ ਅਤਿਕ੍ਕਨ੍ਤਾ, ਅਨਾਗਤੋ ਚਤੁਮਾਸਚ੍ਚਯੇਨ ਭਵਿਸ੍ਸਤਿ, ਕਤਰਵਸ੍ਸਾਵਾਸਸ੍ਸ ਦੇਸੀ’’ਤਿ. ਸਚੇ ‘‘ਅਤੀਤਵਸ੍ਸਂਵੁਟ੍ਠਾਨਂ ਦਮ੍ਮੀ’’ਤਿ ਵਦਤਿ, ਤਂਅਨ੍ਤੋਵਸ੍ਸਂਵੁਟ੍ਠਾਨਮੇਵ ਪਾਪੁਣਾਤਿ, ਦਿਸਾ ਪਕ੍ਕਨ੍ਤਾਨਮ੍ਪਿ ਸਭਾਗਾ ਗਣ੍ਹਿਤੁਂ ਲਭਨ੍ਤਿ.

ਸਚੇ ‘‘ਅਨਾਗਤੇ ਵਸ੍ਸਾਵਾਸਿਕਂ ਦਮ੍ਮੀ’’ਤਿ ਵਦਤਿ, ਤਂ ਠਪੇਤ੍ਵਾ ਵਸ੍ਸੂਪਨਾਯਿਕਦਿਵਸੇ ਗਹੇਤਬ੍ਬਂ. ਅਥ ‘‘ਅਗੁਤ੍ਤੋ ਵਿਹਾਰੋ, ਚੋਰਭਯਂ ਅਤ੍ਥਿ, ਨ ਸਕ੍ਕਾ ਠਪੇਤੁਂ, ਗਣ੍ਹਿਤ੍ਵਾ ਵਾ ਆਹਿਣ੍ਡਿਤੁ’’ਨ੍ਤਿ ਵੁਤ੍ਤੇ ‘‘ਸਮ੍ਪਤ੍ਤਾਨਂ ਦਮ੍ਮੀ’’ਤਿ ਵਦਤਿ, ਭਾਜੇਤ੍ਵਾ ਗਹੇਤਬ੍ਬਂ. ਸਚੇ ਵਦਤਿ ‘‘ਇਤੋ ਮੇ, ਭਨ੍ਤੇ, ਤਤਿਯੇ ਵਸ੍ਸੇ ਵਸ੍ਸਾਵਾਸਿਕਂ ਨ ਦਿਨ੍ਨਂ, ਤਂ ਦਮ੍ਮੀ’’ਤਿ, ਤਸ੍ਮਿਂ ਅਨ੍ਤੋਵਸ੍ਸੇ ਵੁਟ੍ਠਭਿਕ੍ਖੂਨਂ ਪਾਪੁਣਾਤਿ. ਸਚੇ ਤੇ ਦਿਸਾ ਪਕ੍ਕਨ੍ਤਾ, ਅਞ੍ਞੋ ਵਿਸ੍ਸਾਸਿਕੋ ਗਣ੍ਹਾਤਿ, ਦਾਤਬ੍ਬਂ. ਅਥ ਏਕੋਯੇਵ ਅਵਸਿਟ੍ਠੋ, ਸੇਸਾ ਕਾਲਙ੍ਕਤਾ, ਸਬ੍ਬਂ ਏਕਸ੍ਸੇਵ ਪਾਪੁਣਾਤਿ. ਸਚੇ ਏਕੋਪਿ ਨਤ੍ਥਿ, ਸਙ੍ਘਿਕਂ ਹੋਤਿ, ਸਮ੍ਮੁਖੀਭੂਤੇਹਿ ਭਾਜਿਤਬ੍ਬਂ.

ਯੇਹਿ ਨਿਮਨ੍ਤਿਤੇਹਿ ਯਾਗੁ ਪੀਤਾਤਿ (ਮਹਾਵ. ਅਟ੍ਠ. ੩੭੯) ਨਿਮਨ੍ਤਿਤੇਹਿ ਯੇਹਿ ਭਿਕ੍ਖੂਹਿ ਯਾਗੁ ਪੀਤਾ, ਯੇਹਿ ਪਨ ਭਿਕ੍ਖਾਚਾਰਵਤ੍ਤੇਨ ਘਰਦ੍ਵਾਰੇਨ ਗਚ੍ਛਨ੍ਤੇਹਿ ਵਾ ਘਰਂ ਪਵਿਟ੍ਠੇਹਿ ਵਾ ਯਾਗੁ ਲਦ੍ਧਾ, ਯੇਸਂ ਵਾ ਆਸਨਸਾਲਤੋ ਪਤ੍ਤਂ ਆਹਰਿਤ੍ਵਾ ਮਨੁਸ੍ਸੇਹਿ ਨੀਤਾ, ਯੇਸਂ ਵਾ ਥੇਰੇਹਿ ਪੇਸਿਤਾ, ਤੇਸਂ ਨ ਪਾਪੁਣਾਤਿ. ਸਚੇ ਪਨ ਨਿਮਨ੍ਤਿਤਭਿਕ੍ਖੂਹਿ ਸਦ੍ਧਿਂ ਅਞ੍ਞੇਪਿ ਬਹੂ ਆਗਨ੍ਤ੍ਵਾ ਅਨ੍ਤੋਗੇਹਞ੍ਚ ਬਹਿਗੇਹਞ੍ਚ ਪੂਰੇਤ੍ਵਾ ਨਿਸਿਨ੍ਨਾ, ਦਾਯਕੋ ਚ ਏਵਂ ਵਦਤਿ ‘‘ਨਿਮਨ੍ਤਿਤਾ ਵਾ ਹੋਨ੍ਤੁ, ਅਨਿਮਨ੍ਤਿਤਾ ਵਾ, ਯੇਸਂ ਮਯਾ ਯਾਗੁ ਦਿਨ੍ਨਾ, ਸਬ੍ਬੇਸਂ ਇਮਾਨਿ ਵਤ੍ਥਾਨਿ ਹੋਨ੍ਤੂ’’ਤਿ, ਸਬ੍ਬੇਸਂ ਪਾਪੁਣਾਤਿ. ਯੇਹਿ ਪਨ ਥੇਰਾਨਂ ਹਤ੍ਥਤੋ ਯਾਗੁ ਲਦ੍ਧਾ, ਤੇਸਂ ਨ ਪਾਪੁਣਾਤਿ. ਅਥ ਸੋ ‘‘ਯੇਹਿ ਮਯ੍ਹਂ ਯਾਗੁ ਪੀਤਾ, ਸਬ੍ਬੇਸਂ ਹੋਤੂ’’ਤਿ ਵਦਤਿ, ਸਬ੍ਬੇਸਂ ਪਾਪੁਣਾਤਿ. ਭਤ੍ਤਖਜ੍ਜਕਾਦੀਹੀਤਿ ਏਤ੍ਥ ਆਦਿਸਦ੍ਦੇਨਪਿ ਚੀਵਰਸੇਨਾਸਨਭੇਸਜ੍ਜਾਨਂ ਗਹਣਂ.

ਪੁਗ੍ਗਲਸ੍ਸਾਤਿ (ਮਹਾਵ. ਅਟ੍ਠ. ੩੭੯) ਸਮ੍ਮੁਖਾਸਮ੍ਮੁਖਭੂਤਸ੍ਸ ਪੁਗ੍ਗਲਸ੍ਸ. ਤੇਨਾਹ ‘‘ਇਦਂ ਚੀਵਰ’’ਨ੍ਤਿਆਦਿ. ਸਚੇ ਪਨ ‘‘ਇਦਂ ਤੁਮ੍ਹਾਕਞ੍ਚੇਵ ਤੁਮ੍ਹਾਕਂ ਅਨ੍ਤੇਵਾਸਿਕਾਨਞ੍ਚ ਦਮ੍ਮੀ’’ਤਿ ਏਵਂ ਵਦਤਿ, ਥੇਰਸ੍ਸ ਚ ਅਨ੍ਤੇਵਾਸਿਕਾਨਞ੍ਚ ਪਾਪੁਣਾਤਿ. ਉਦ੍ਦੇਸਂ ਗਹੇਤੁਂ ਆਗਤੋ, ਗਹੇਤ੍ਵਾ ਗਚ੍ਛਨ੍ਤੋ ਚ ਅਤ੍ਥਿ, ਤਸ੍ਸਾਪਿ ਪਾਪੁਣਾਤਿ. ਤੁਮ੍ਹੇਹਿ ਸਦ੍ਧਿਂ ਨਿਬਦ੍ਧਚਾਰਿਕਭਿਕ੍ਖੂਨਂ ਦਮ੍ਮੀ’’ਤਿ ਵੁਤ੍ਤੇ ਉਦ੍ਦੇਸਨ੍ਤੇਵਾਸਿਕਾਨਂ ਵਤ੍ਤਂ ਕਤ੍ਵਾ ਉਦ੍ਦੇਸਪਰਿਪੁਚ੍ਛਾਦੀਨਿ ਗਹੇਤ੍ਵਾ ਵਿਚਰਨ੍ਤਾਨਂ ਸਬ੍ਬੇਸਂ ਪਾਪੁਣਾਤਿ. ਏਤ੍ਥਾਤਿ ਅਟ੍ਠਸੁ ਮਾਤਿਕਾਸੁ. ਯਦਿ ਪਨ ਅਯਮੇਤ੍ਥ ਸਙ੍ਖੇਪਕਥਾ, ਵਿਤ੍ਥਾਰੋ ਪਨ ਕਥਂ ਞਾਤਬ੍ਬੋਤਿ ਆਹ ‘‘ਸਮਨ੍ਤਪਾਸਾਦਿਕਾਯਂ ਵੁਤ੍ਤੋ’’ਤਿ. ਸਮਨ੍ਤਪਾਸਾਦਿਕਾਯਂ ਚੀਵਰਕ੍ਖਨ੍ਧਕਵਣ੍ਣਨਾਯਂ (ਮਹਾਵ. ਅਟ੍ਠ. ੩੭੯) ਵੁਤ੍ਤੋਤਿ ਅਤ੍ਥੋ.

‘‘ਞਾਤਕੇਹਿ ਵਾ ਮੇ ਚੀਵਰਤ੍ਥਾਯ ਪੇਸਿਤਂ, ਮਿਤ੍ਤੇਹਿ ਵਾ ਪੇਸਿਤਂ, ਤੇ ਆਭਤੇ ਚੀਵਰੇ ਦਸ੍ਸਨ੍ਤੀ’’ਤਿ ਏਵਂ ਞਾਤਿਤੋ ਵਾ ਮਿਤ੍ਤਤੋ ਵਾ ਪਚ੍ਚਾਸਾ ਹੋਤੀਤਿ ਵੇਦਿਤਬ੍ਬਂ. ਕਪ੍ਪਿਯਭਣ੍ਡੇਨਾਤਿ ਕਪ੍ਪਾਸਸੁਤ੍ਤਾਦਿਨਾ ਅਤ੍ਤਨੋ ਧਨੇਨ. ਸਣ੍ਹਨ੍ਤਿ ਸੁਖੁਮਂ. ਅਞ੍ਞਂ ਪਚ੍ਚਾਸਾਚੀਵਰਂ ਲਭਿਤ੍ਵਾ ਏਵ ਕਾਲਬ੍ਭਨ੍ਤਰੇ ਕਾਰੇਤਬ੍ਬਨ੍ਤਿ ਅਞ੍ਞਂ ਮੂਲਚੀਵਰਸਦਿਸਂ ਪਚ੍ਚਾਸਾਚੀਵਰਂ ਲਭਿਤ੍ਵਾਯੇਵ ਮਾਸਬ੍ਭਨ੍ਤਰੇ ਕਾਰੇਤਬ੍ਬਂ. ਤਞ੍ਚ ਖੋ ਸਤਿਯਾਯੇਵ ਪਚ੍ਚਾਸਾਯ, ਅਸਤਿਯਾ ਪਨ ਪਚ੍ਚਾਸਾਯ ਮੂਲਚੀਵਰਂ ਦਸਾਹਂ ਚੇ ਸਮ੍ਪਤ੍ਤਂ, ਤਦਹੇਵ ਅਧਿਟ੍ਠਾਤਬ੍ਬਂ. ਤੇਨਾਹ ‘‘ਸਚੇ ਨ ਲਭਤੀ’’ਤਿਆਦਿ. ਪਚ੍ਚਾਸਾਚੀਵਰਮ੍ਪਿ ਪਰਿਕ੍ਖਾਰਚੋਲ਼ਂ ਅਧਿਟ੍ਠਾਤਬ੍ਬਨ੍ਤਿ ਪਠਮਤਰਂ ਉਪ੍ਪਨ੍ਨਂ ਥੂਲਪਚ੍ਚਾਸਾਚੀਵਰਮ੍ਪਿ ਸਨ੍ਧਾਯ ਵੁਤ੍ਤਂ. ਪਿ-ਸਦ੍ਦੇਨ ਨ ਕੇਵਲਂ ਮੂਲਚੀਵਰਮੇਵਾਤਿ ਦਸ੍ਸੇਤਿ.

ਅਕਾਲਚੀਵਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਪੁਰਾਣਚੀਵਰਸਿਕ੍ਖਾਪਦਵਣ੍ਣਨਾ

‘‘ਅਮ੍ਹਾਕਮੇਵ ਞਾਤੀ’’ਤਿ ਞਾਯਤੀਤਿ ਞਾਤਿ, ਸਾਵ ਞਾਤਿਕਾ, ਨ ਞਾਤਿਕਾ ਅਞ੍ਞਾਤਿਕਾ, ਤਾਯ ਅਞ੍ਞਾਤਿਕਾਯ. ਤੇਨਾਹ ‘‘ਨ ਞਾਤਿਕਾਯਾ’’ਤਿ. ਮਾਤਿਤੋ ਵਾ ਪਿਤਿਤੋ ਵਾਤਿ ਮਾਤਿਪਕ੍ਖਤੋ ਵਾ ਪਿਤਿਪਕ੍ਖਤੋ ਵਾ. ਯਾਵ ਸਤ੍ਤਮਂ ਯੁਗਨ੍ਤਿ (ਪਾਰਾ. ਅਟ੍ਠ. ੨.੫੦੩-੫੦੫) ਯਾਵ ਸਤ੍ਤਮਸ੍ਸ ਪੁਰਿਸਸ੍ਸ, ਸਤ੍ਤਮਾਯ ਵਾ ਇਤ੍ਥਿਯਾ ਆਯੁਪ੍ਪਮਾਣਂ, ਯਾਵ ਪਿਤਾਮਹਯੁਗਂ ਪਿਤਾਮਹਿਯੁਗਂ ਮਾਤਾਮਹਯੁਗਂ ਮਾਤਾਮਹਿਯੁਗਨ੍ਤਿ ਵੁਤ੍ਤਂ ਹੋਤਿ. ਅਥ ਵਾ ਯਾਵ ਸਤ੍ਤਮਂ ਯੁਗਨ੍ਤਿ ਯਾਵ ਸਤ੍ਤਮਦ੍ਵਨ੍ਦਨ੍ਤਿ ਅਤ੍ਥੋ. ਯੁਗਸਦ੍ਦੋ ਚੇਤ੍ਥ ਏਕਸੇਸਨਯੇਨ ਦਟ੍ਠਬ੍ਬੋ ‘‘ਯੁਗੋ ਚ ਯੁਗੋ ਚ ਯੁਗਾ’’ਤਿ. ਏਵਞ੍ਹਿ ਤਤ੍ਥ ਤਤ੍ਥ ਦ੍ਵਨ੍ਦਂ ਗਹਿਤਂ ਹੋਤਿ. ਕੇਨਚਿ ਆਕਾਰੇਨ ਅਸਮ੍ਬਦ੍ਧਾਯਾਤਿ ਭਾਤੁਭਗਿਨਿਭਾਗਿਨੇਯ੍ਯਪੁਤ੍ਤਪਪੁਤ੍ਤਾਦੀਸੁ ਯੇਨ ਕੇਨਚਿ ਆਕਾਰੇਨ ਅਸਮ੍ਬਦ੍ਧਾਯ. ਪਿਤਾ, ਪਿਤੁਪਿਤਾ, ਤਸ੍ਸ ਪਿਤਾ, ਤਸ੍ਸਾਪਿ ਪਿਤਾਤਿ ਏਵਂ ਯਾਵ ਸਤ੍ਤਮਾ ਯੁਗਾ, ਪਿਤਾ, ਪਿਤੁਮਾਤਾ, ਤਸ੍ਸਾ ਪਿਤਾ ਚ ਮਾਤਾ ਚ ਭਾਤਾ ਚ ਭਗਿਨੀ ਚ, ਪੁਤ੍ਤਾ ਚ, ਧੀਤਰੋ ਚਾਤਿ ਏਵਮ੍ਪਿ ਉਦ੍ਧਞ੍ਚ ਅਧੋ ਚ ਯਾਵ ਸਤ੍ਤਮਾ ਯੁਗਾ, ਪਿਤਾ, ਪਿਤੁਭਾਤਾ, ਪਿਤੁਭਗਿਨੀ, ਪਿਤੁਪੁਤ੍ਤਾ, ਪਿਤੁਧੀਤਰੋ, ਤੇਸਮ੍ਪਿ ਪੁਤ੍ਤਧੀਤੁਪਰਮ੍ਪਰਾਤਿ ਏਵਮ੍ਪਿ ਯਾਵ ਸਤ੍ਤਮਾ ਯੁਗਾ, ਮਾਤਾ, ਮਾਤੁਮਾਤਾ, ਤਸ੍ਸਾ ਮਾਤਾ, ਤਸ੍ਸਾਪਿ ਮਾਤਾਤਿ ਏਵਂ ਯਾਵ ਸਤ੍ਤਮਾ ਯੁਗਾ, ਮਾਤਾ, ਮਾਤੁਪਿਤਾ, ਤਸ੍ਸ ਪਿਤਾ ਚ ਮਾਤਾ ਚ ਭਾਤਾ ਚ ਭਗਿਨੀ ਚ ਪੁਤ੍ਤਾ ਚ ਧੀਤਰੋ ਚਾਤਿ ਏਵਮ੍ਪਿ ਉਦ੍ਧਞ੍ਚ ਅਧੋ ਚ ਯਾਵ ਸਤ੍ਤਮਾ ਯੁਗਾ, ਮਾਤਾ, ਮਾਤੁਭਾਤਾ, ਮਾਤੁਭਗਿਨੀ, ਮਾਤੁਪੁਤ੍ਤਾ, ਮਾਤੁਧੀਤਰੋ, ਤੇਸਮ੍ਪਿ ਪੁਤ੍ਤਧੀਤੁਪਰਮ੍ਪਰਾਤਿ ਏਵਮ੍ਪਿ ਯਾਵ ਸਤ੍ਤਮਾ ਯੁਗਾ, ਤਾਵ ਨੇਵ ਮਾਤੁਸਮ੍ਬਨ੍ਧੇਨ, ਨ ਪਿਤੁਸਮ੍ਬਨ੍ਧੇਨ ਯਾ ਸਮ੍ਬਦ੍ਧਾ, ਸਾ ‘‘ਅਞ੍ਞਾਤਿਕਾ ਨਾਮਾ’’ਤਿ ਵੁਤ੍ਤਂ ਹੋਤਿ.

ਸਾਕਿਯਾਨਿਯੋ ਵਿਯਾਤਿ ਪਞ੍ਚਸਤਮਤ੍ਤਾ ਸਾਕਿਯਾਨਿਯੋ ਵਿਯ. ਨਿਦਸ੍ਸਨਮਤ੍ਤਞ੍ਚੇਤਂ, ਤਸ੍ਮਾ ਭਿਕ੍ਖੁਭਾਵੇ ਠਤ੍ਵਾ ਪਰਿਵਤ੍ਤਲਿਙ੍ਗਾ ਭਿਕ੍ਖੁਨਿਯੋਪਿ ਇਧ ਸੁਦ੍ਧਭਿਕ੍ਖੁਸਙ੍ਘੇ ‘‘ਉਪਸਮ੍ਪਨ੍ਨਾ’’ ਇਚ੍ਚੇਵ ਵੇਦਿਤਬ੍ਬਾ. ਉਭਤੋਸਙ੍ਘੇ ਵਾਤਿ ਭਿਕ੍ਖੁਨਿਸਙ੍ਘੇ ਞਤ੍ਤਿਚਤੁਤ੍ਥੇਨ, ਭਿਕ੍ਖੁਸਙ੍ਘੇ ਞਤ੍ਤਿਚਤੁਤ੍ਥੇਨਾਤਿ ਏਵਂ ਉਭਤੋਸਙ੍ਘੇ ਵਾ. ਪੁਰਾਣਚੀਵਰਨ੍ਤਿ ਏਤ੍ਥ ਚੀਵਰਨ੍ਤਿ ਨਿਵਾਸਨਪਾਰੁਪਨੁਪਗਮੇਵ ਅਧਿਪ੍ਪੇਤਨ੍ਤਿ ਆਹ ‘‘ਰਜਿਤ੍ਵਾ’’ਤਿਆਦਿ. ਕਪ੍ਪਂ ਕਤ੍ਵਾਤਿ ਕਪ੍ਪਬਿਨ੍ਦੁਂ ਦਤ੍ਵਾ. ‘‘ਇਮਿਨਾ ਅਦਿਨ੍ਨਕਪ੍ਪਂ ਪਾਚਿਤ੍ਤਿਯਵਤ੍ਥੁ ਨ ਹੋਤੀਤਿ ਦਸ੍ਸੇਤੀ’’ਤਿ (ਸਾਰਤ੍ਥ. ਟੀ. ੨.੫੦੫) ਵਦਨ੍ਤਿ. ਪਰਿਭੋਗਸੀਸੇਨਾਤਿ ਕਾਯੇਨ ਫੁਸਿਤ੍ਵਾ ਪਰਿਭੋਗਸੀਸੇਨ. ਅਂਸੇਤਿ ਜਤ੍ਤੁਮ੍ਹਿ. ਮਤ੍ਥਕੇਤਿ ਸੀਸਮਤ੍ਥਕੇ. ਸਚੇ ਪਨ ਪਚ੍ਚਤ੍ਥਰਣਸ੍ਸ ਹੇਟ੍ਠਾ ਕਤ੍ਵਾ ਨਿਪਜ੍ਜਤਿ, ਹਤ੍ਥੇਹਿ ਵਾ ਉਕ੍ਖਿਪਿਤ੍ਵਾ ਆਕਾਸੇ ਵਿਤਾਨਂ ਕਤ੍ਵਾ ਸੀਸੇਨ ਅਸਮ੍ਫੁਸਨ੍ਤੋ ਗਚ੍ਛਤਿ, ਅਯਂ ਪਰਿਭੋਗੋ ਨਾਮ ਨ ਹੋਤਿ.

ਕਾਯਵਿਕਾਰਂ ਵਾ ਕਰੋਤੀਤਿ ਯਥਾ ਸਾ ‘‘ਧੋਵਾਪੇਤੁਕਾਮੋ ਅਯ’’ਨ੍ਤਿ ਜਾਨਾਤਿ, ਏਵਂ ਕਾਯਵਿਕਾਰਂ ਕਰੋਤਿ. ‘‘ਅਨ੍ਤੋਦ੍ਵਾਦਸਹਤ੍ਥੇ ਓਕਾਸੇ ਠਤ੍ਵਾ ਉਪਰਿ ਵਾ ਖਿਪਤੀ’’ਤਿ ਇਮਿਨਾ ਉਪਚਾਰਂ ਮੁਞ੍ਚਿਤ੍ਵਾ ਓਰਤੋ ਖਿਪਨ੍ਤਸ੍ਸ ਅਨਾਪਤ੍ਤੀਤਿ ਦਸ੍ਸੇਤਿ. ਅਞ੍ਞਸ੍ਸ ਵਾ ਹਤ੍ਥੇ ਪੇਸੇਤੀਤਿ ਅਨ੍ਤੋਦ੍ਵਾਦਸਹਤ੍ਥੇ ਓਕਾਸੇ ਠਤ੍ਵਾ ਸਿਕ੍ਖਮਾਨਸਾਮਣੇਰਸਾਮਣੇਰਿਉਪਾਸਕਇਤ੍ਥਿਯਾਦੀਸੁ ਯਸ੍ਸ ਕਸ੍ਸਚਿ ਅਞ੍ਞਸ੍ਸ ਹਤ੍ਥੇ ਵਾ ਪੇਸੇਤਿ. ਸੋਤਿ ਉਪਾਸਕੋ ਚ ਸਾਮਣੇਰੋ ਚ. ਉਪਸਮ੍ਪਜ੍ਜਿਤ੍ਵਾ ਧੋਵਤੀਤਿ ਏਤ੍ਥ ਉਪਾਸਕੋ ਲਿਙ੍ਗੇ ਪਰਿਵਤ੍ਤੇ ਭਿਕ੍ਖੁਨੀਸੁ ਪਬ੍ਬਜਿਤ੍ਵਾ ਉਪਸਮ੍ਪਜ੍ਜਿਤ੍ਵਾ ਧੋਵਤਿ, ਸਾਮਣੇਰੋ ਲਿਙ੍ਗੇ ਪਰਿਵਤ੍ਤੇ ਭਿਕ੍ਖੁਨੀਸੁ ਉਪਸਮ੍ਪਜ੍ਜਿਤ੍ਵਾ ਧੋਵਤੀਤਿ ਯਥਾਯੋਗਂ ਅਤ੍ਥੋ ਗਹੇਤਬ੍ਬੋ. ਸਚੇ ਪਨ ਭਿਕ੍ਖੁਨਿਯਾ ਹਤ੍ਥੇ ਦਿਨ੍ਨਂ ਹੋਤਿ, ਸਚੇ ਲਿਙ੍ਗੇ ਪਰਿਵਤ੍ਤੇ ਧੋਵਤਿ, ਵਟ੍ਟਤਿ.

ਏਤ੍ਥ ਚ ਏਕਸ੍ਸ ਤਿਕ੍ਖਤ੍ਤੁਂ ਨਿਸ੍ਸਜ੍ਜਨਾਭਾਵਤੋ ਤੀਣਿਪਿ ਕਾਰੇਨ੍ਤਸ੍ਸ ਏਕੇਨ ਨਿਸ੍ਸਗ੍ਗਿਯਂ, ਦ੍ਵੀਹਿ ਦ੍ਵੇ ਦੁਕ੍ਕਟਾਨਿ. ਦ੍ਵੇ ਕਾਰੇਨ੍ਤਸ੍ਸ ਏਕੇਨ ਨਿਸ੍ਸਗ੍ਗਿਯਂ, ਦੁਤਿਯੇਨ ਦੁਕ੍ਕਟਂ. ਤੇਨਾਹ ‘‘ਧੋਵਨਾਦੀਨਿ ਤੀਣੀ’’ਤਿਆਦਿ. ‘‘ਏਕੇਨ ਵਤ੍ਥੁਨਾ’’ਤਿ ਪਠਮਂ ਕਤ੍ਵਾ ਨਿਟ੍ਠਾਪਿਤਂ ਸਨ੍ਧਾਯ ਵੁਤ੍ਤਂ. ਸਚੇ ਪਨ ‘‘ਇਮਂ ਚੀਵਰਂ ਰਜਿਤ੍ਵਾ ਧੋਵਿਤ੍ਵਾ ਆਨੇਹੀ’’ਤਿ ਵੁਤ੍ਤੇ ਸਾ ਭਿਕ੍ਖੁਨੀ ਪਠਮਂ ਧੋਵਿਤ੍ਵਾ ਪਚ੍ਛਾ ਰਜਤਿ, ਨਿਸ੍ਸਗ੍ਗਿਯੇਨ ਦੁਕ੍ਕਟਮੇਵ, ਏਵਂ ਸਬ੍ਬੇਸੁ ਵਿਪਰੀਤਵਚਨੇਸੁ ਨਯੋ ਨੇਤਬ੍ਬੋ. ਸਚੇ ਪਨ ‘‘ਧੋਵਿਤ੍ਵਾ ਆਨੇਹੀ’’ਤਿ ਵੁਤ੍ਤਾ ਧੋਵਤਿ ਚੇਵ ਰਜਤਿ ਚ, ਧੋਵਾਪਨਪਚ੍ਚਯਾ ਏਵ ਆਪਤ੍ਤਿ, ਰਜਨੇ ਅਨਾਪਤ੍ਤਿ. ਏਵਂ ਸਬ੍ਬਤ੍ਥ. ਤੇਨਾਹ ‘‘ਸਚੇ ਪਨ‘ਧੋਵਾ’ਤਿ ਵੁਤ੍ਤਾ’’ਤਿਆਦਿ. ਭਿਕ੍ਖੂਨਂ ਵਸੇਨ ਏਕਤੋ ਉਪਸਮ੍ਪਨ੍ਨਾਯ ਧੋਵਾਪੇਨ੍ਤਸ੍ਸ ਯਥਾਵਤ੍ਥੁਕਮੇਵਾਤਿ ਆਹ ‘‘ਭਿਕ੍ਖੁਨਿਸਙ੍ਘਵਸੇਨਾ’’ਤਿਆਦਿ.

ਅਞ੍ਞਸ੍ਸ ਵਾ ਸਨ੍ਤਕਨ੍ਤਿ ਅਞ੍ਞਸ੍ਸ ਸਨ੍ਤਕਂ ਪੁਰਾਣਚੀਵਰਂ ਧੋਵਾਪੇਨ੍ਤਸ੍ਸਾਤਿ ਅਤ੍ਥੋ. ਨਿਸੀਦਨਪਚ੍ਚਤ੍ਥਰਣਨ੍ਤਿ ਅਞ੍ਞਸ੍ਸ ਵਾ ਅਤ੍ਤਨੋ ਵਾ ਸਨ੍ਤਕਂ ਨਿਸੀਦਨਞ੍ਚੇਵ ਪਚ੍ਚਤ੍ਥਰਣਞ੍ਚ. ਨਿਵਾਸਨਪਾਰੁਪਨੁਪਗਸ੍ਸੇਵ ਚ ਇਧ ‘‘ਪੁਰਾਣਚੀਵਰ’’ਨ੍ਤਿ ਅਧਿਪ੍ਪੇਤਤ੍ਤਾ ਅਤ੍ਤਨੋ ਸਨ੍ਤਕਮ੍ਪਿ ਨਿਸੀਦਨਪਚ੍ਚਤ੍ਥਰਣਂ ਧੋਵਾਪੇਨ੍ਤਸ੍ਸ ਦੁਕ੍ਕਟਮੇਵ ਹੋਤਿ, ਨ ਨਿਸ੍ਸਗ੍ਗਿਯਂ. ਅਵੁਤ੍ਤਾ ਵਾ ਧੋਵਤੀਤਿ ਉਦ੍ਦੇਸਾਯ ਵਾ ਓਵਾਦਾਯ ਵਾ ਆਗਤਾ ਕਿਲਿਟ੍ਠਚੀਵਰਂ ਦਿਸ੍ਵਾ ਠਪਿਤਟ੍ਠਾਨਤੋ ਵਾ ਗਹੇਤ੍ਵਾ, ‘‘ਦੇਥ ਅਯ੍ਯ, ਧੋਵਿਸ੍ਸਾਮੀ’’ਤਿ ਆਹਰਾਪੇਤ੍ਵਾ ਵਾ ਧੋਵਤਿ ਚੇਵ ਰਜਤਿ ਚ ਆਕੋਟੇਤਿ ਚ, ਅਯਂ ਅਵੁਤ੍ਤਾ ਧੋਵਤਿ ਨਾਮ. ਯਾਪਿ ‘‘ਇਮਂ ਚੀਵਰਂ ਧੋਵਾ’’ਤਿ ਦਹਰਂ ਵਾ ਸਾਮਣੇਰਂ ਵਾ ਆਣਾਪੇਨ੍ਤਸ੍ਸ ਭਿਕ੍ਖੁਨੋ ਵਚਨਂ ਸੁਤ੍ਵਾ ‘‘ਆਹਰਥਯ੍ਯ, ਅਹਂ ਧੋਵਿਸ੍ਸਾਮੀ’’ਤਿ ਧੋਵਤਿ, ਤਾਵਕਾਲਿਕਂ ਵਾ ਗਹੇਤ੍ਵਾ ਧੋਵਿਤ੍ਵਾ ਰਜਿਤ੍ਵਾ ਦੇਤਿ, ਅਯਮ੍ਪਿ ਅਵੁਤ੍ਤਾ ਧੋਵਤਿ ਨਾਮ.

ਅਞ੍ਞਂ ਵਾ ਪਰਿਕ੍ਖਾਰਨ੍ਤਿ ਉਪਾਹਨਤ੍ਥਵਿਕਪਤ੍ਤਤ੍ਥਵਿਕਅਂਸਬਦ੍ਧਕਕਾਯਬਨ੍ਧਨਮਞ੍ਚਪੀਠਤਟ੍ਟਿਕਾਦਿਂ ਯਂ ਕਿਞ੍ਚਿ. ‘‘ਉਪਚਾਰੇ ਠਤ੍ਵਾ’’ਤਿ ਵਚਨਤੋ ਪੇਸਿਤ੍ਵਾ ਧੋਵਨੇਪਿ ਅਨਾਪਤ੍ਤਿ. ਉਪਚਾਰੇਤਿ ਅਨ੍ਤੋਦ੍ਵਾਦਸਹਤ੍ਥੇ ਓਕਾਸੇ.

ਪੁਰਾਣਚੀਵਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਚੀਵਰਪ੍ਪਟਿਗ੍ਗਹਣਸਿਕ੍ਖਾਪਦਵਣ੍ਣਨਾ

ਛਨ੍ਨਨ੍ਤਿ ਖੋਮਾਦੀਨਂ ਛਨ੍ਨਂ ਚੀਵਰਾਨਂ ਮਜ੍ਝੇ. ਉਪਚਾਰਂ ਮੁਞ੍ਚਿਤ੍ਵਾਤਿ ਦ੍ਵਾਦਸਹਤ੍ਥੂਪਚਾਰਂ ਮੁਞ੍ਚਿਤ੍ਵਾ. ਪਿ-ਸਦ੍ਦੇਨ ਧਮ੍ਮਕਥਂ ਕਥੇਨ੍ਤਸ੍ਸ ਚਤਸ੍ਸੋ ਪਰਿਸਾ ਚੀਵਰਾਨਿ ਚ ਨਾਨਾਵਿਰਾਗਵਤ੍ਥਾਨਿ ਚ ਆਹਰਿਤ੍ਵਾ ਪਾਦਮੂਲੇ ਠਪੇਨ੍ਤਿ, ਉਪਚਾਰੇ ਵਾ ਠਤ੍ਵਾ ਉਪਰਿ ਖਿਪਨ੍ਤਿ, ‘‘ਸਚੇ ਸਾਦਿਯਤਿ, ਪਟਿਗ੍ਗਹਿਤਮੇਵਾ’’ਤਿ ਏਤ੍ਥ ਵਤ੍ਤਬ੍ਬਮੇਵ ਨਤ੍ਥੀਤਿ ਦਸ੍ਸੇਤਿ. ਖਿਪਤੂਤਿ ਦਿਵਾ ਵਾ ਰਤ੍ਤਿਭਾਗੇ ਵਾ ਖਿਪਤੁ. ਪਟਿਗ੍ਗਹਿਤਮੇਵ ਹੋਤੀਤਿ ਕਿਞ੍ਚਾਪਿ ‘‘ਇਦਂ ਭਿਕ੍ਖੁਨਿਯਾ, ਇਦਂ ਅਞ੍ਞੇਸ’’ਨ੍ਤਿ ਞਾਤੁਂ ਨ ਸਕ੍ਕਾ, ਤਥਾਪਿ ਅਚਿਤ੍ਤਕਭਾਵੇਨ ਗਹਿਤਮੇਵ ਹੋਤਿ. ਯਸ੍ਸ ਕਸ੍ਸਚਿ ਪਨ ਅਨੁਪਸਮ੍ਪਨ੍ਨਸ੍ਸਾਤਿ ਸਿਕ੍ਖਮਾਨਸਾਮਣੇਰਸਾਮਣੇਰਿਉਪਾਸਕਉਪਾਸਿਕਾਦੀਸੁ ਯਸ੍ਸ ਕਸ੍ਸਚਿ ਅਨੁਪਸਮ੍ਪਨ੍ਨਸ੍ਸ. ਠਪਿਤਨ੍ਤਿ ਭਿਕ੍ਖੁਨਿਯਾ ਠਪਿਤਂ. ਪਂਸੁਕੂਲਂ ਅਧਿਟ੍ਠਹਿਤ੍ਵਾਤਿ ‘‘ਅਸ੍ਸਾਮਿਕਂ ਇਦ’’ਨ੍ਤਿ ਸਞ੍ਞਂ ਉਪ੍ਪਾਦੇਤ੍ਵਾ. ਅਸ੍ਸਾਮਿਕਞ੍ਹਿ ‘‘ਪਂਸੁਕੂਲ’’ਨ੍ਤਿ ਵੁਚ੍ਚਤਿ. ਇਮਿਨਾ ‘‘ਅਮ੍ਹਾਕਮਤ੍ਥਾਯ ਠਪਿਤ’’ਨ੍ਤਿਆਦਿਕਾਯ ਸਞ੍ਞਾਯ ਗਹੇਤੁਂ ਨ ਵਟ੍ਟਤੀਤਿ ਦਸ੍ਸੇਤਿ. ਅਞ੍ਞਤ੍ਰ ਪਾਰਿਵਤ੍ਤਕਾਤਿ ਪਰਿਵਤ੍ਤੇਤਬ੍ਬਂ ਪਰਿਵਤ੍ਤਂ, ਪਰਿਵਤ੍ਤਮੇਵ ਪਾਰਿਵਤ੍ਤਕਂ, ਪਰਿਵਤ੍ਤੇਤ੍ਵਾ ਦਿਯ੍ਯਮਾਨਂ, ਤਂ ਵਿਨਾਤਿ ਅਤ੍ਥੋ. ਤੇਨਾਹ ‘‘ਯਂ ਅਨ੍ਤਮਸੋ ਹਰੀਟਕਕ੍ਖਣ੍ਡਮ੍ਪੀ’’ਤਿਆਦਿ. ਆਭੋਗਂ ਕਤ੍ਵਾਤਿ ਚਿਤ੍ਤੇਨ ਸਮਨ੍ਨਾਹਰਿਤ੍ਵਾ. ਸਚੇ ਭਿਕ੍ਖੁਨੀ ਵਸ੍ਸਾਵਾਸਿਕਮ੍ਪਿ ਦੇਤਿ, ਤਮ੍ਪਿ ਯਥਾਵੁਤ੍ਤਵਿਧਾਨਂ ਅਕਤ੍ਵਾ ਗਹੇਤੁਂ ਨ ਵਟ੍ਟਤੀਤਿ ਵੇਦਿਤਬ੍ਬਂ.

ਪਟਿਲਾਭੇਨਾਤਿ ਗਹਣੇਨ. ਤਿਕਪਾਚਿਤ੍ਤਿਯਨ੍ਤਿ ਤੀਣਿ ਪਰਿਮਾਣਾਨਿ ਅਸ੍ਸਾਤਿ ਤਿਕਂ,ਤਿਕਞ੍ਚ ਤਂ ਪਾਚਿਤ੍ਤਿਯਞ੍ਚਾਤਿ ਤਿਕਪਾਚਿਤ੍ਤਿਯਂ, ਅਞ੍ਞਾਤਿਕਾਯ ਞਾਤਿਕਸਞ੍ਞਿਵੇਮਤਿਕਅਞ੍ਞਾਤਿਕਸਞ੍ਞੀਨਂ ਵਸੇਨ ਤੀਣਿ ਪਾਚਿਤ੍ਤਿਯਾਨੀਤਿ ਅਤ੍ਥੋ. ਏਕਤੋਉਪਸਮ੍ਪਨ੍ਨਾਯਾਤਿ ਭਿਕ੍ਖੁਨੀਨਂ ਸਨ੍ਤਿਕੇ ਉਪਸਮ੍ਪਨ੍ਨਾਯ. ਤਾਯ ਹਿ ਹਤ੍ਥਤੋ ਅਞ੍ਞਤ੍ਰ ਪਾਰਿਵਤ੍ਤਕਾ ਚੀਵਰਂ ਪਟਿਗ੍ਗਣ੍ਹਨ੍ਤਸ੍ਸ ਦੁਕ੍ਕਟਂ, ਭਿਕ੍ਖੂਨਂ ਸਨ੍ਤਿਕੇ ਉਪਸਮ੍ਪਨ੍ਨਾਯ ਪਨ ਪਾਚਿਤ੍ਤਿਯਮੇਵ. ‘‘ਪਤ੍ਤਤ੍ਥਵਿਕਾਦਿਮ੍ਹਿ ਚ ਅਨਧਿਟ੍ਠਾਤਬ੍ਬਪਰਿਕ੍ਖਾਰੇ’’ਤਿ ਇਮਿਨਾ ਭਿਸਿਚ੍ਛਵਿਮ੍ਪਿ ਸਙ੍ਗਣ੍ਹਾਤਿ. ਸਾ ਹਿ ਮਹਨ੍ਤਾਪਿ ਸੇਨਾਸਨਸਙ੍ਗਹਿਤਤ੍ਤਾ ਚੀਵਰਸਙ੍ਖਂ ਨ ਗਚ੍ਛਤੀਤਿ ਨੇਵ ਅਧਿਟ੍ਠਾਨੁਪਗਾ, ਨ ਵਿਕਪ੍ਪਨੁਪਗਾ ਚ. ਵੁਤ੍ਤਞ੍ਹਿ ਸਮਨ੍ਤਪਾਸਾਦਿਕਾਯਂ ‘‘ਸਚੇਪਿ ਮਞ੍ਚਪ੍ਪਮਾਣਾ ਭਿਸਿਚ੍ਛਵਿ ਹੋਤਿ, ਵਟ੍ਟਤਿਯੇਵਾ’’ਤਿ (ਪਾਰਾ. ਅਟ੍ਠ. ੨.੫੧੪). ‘‘ਹਤ੍ਥਤੋ ਚੀਵਰਂ ਪਟਿਗ੍ਗਣ੍ਹਾਤੀ’’ਤਿ ਵਚਨਤੋ ਪਨ ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਪੇਸਿਤਗ੍ਗਹਣੇਪਿ ਅਨਾਪਤ੍ਤਿ. ਪਟਿਗ੍ਗਹਣਤੋ, ਪਰਿਵਤ੍ਤਨਾਕਰਣਤੋ ਚ ਕਿਰਿਯਾਕਿਰਿਯਂ.

ਚੀਵਰਪ੍ਪਟਿਗ੍ਗਹਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਅਞ੍ਞਾਤਕਵਿਞ੍ਞਤ੍ਤਿਸਿਕ੍ਖਾਪਦਵਣ੍ਣਨਾ

ਗੇਹਸ੍ਸ ਪਤਿ ਜੇਟ੍ਠੋਤਿ ਗਹਪਤਿ, ਤਂ ਗਹਪਤਿਂ, ਇਧ ਪਨ ਅਪਬ੍ਬਜਿਤੋ ਯੋ ਕੋਚਿ ਮਨੁਸ੍ਸੋ ਅਧਿਪ੍ਪੇਤੋ. ਤੇਨਾਹ ‘‘ਭਿਕ੍ਖੂਸੁ ਅਪਬ੍ਬਜਿਤਮਨੁਸ੍ਸ’’ਨ੍ਤਿ. ਏਸੇਵ ਨਯੋ ਗਹਪਤਾਨਿਨ੍ਤਿ ਏਤ੍ਥਾਪਿ. ‘‘ਵਿਞ੍ਞਾਪੇਯ੍ਯਾ’’ਤਿ ਇਦਂ ਸੁਦ੍ਧਕਤ੍ਤੁਅਤ੍ਥੇ ਚ ਹੇਤੁਕਤ੍ਤੁਅਤ੍ਥੇ ਚ ਵਤ੍ਤਤੀਤਿ ਆਹ ‘‘ਯਾਚੇਯ੍ਯ ਵਾ ਯਾਚਾਪੇਯ੍ਯ ਵਾ’’ਤਿ. ਯਾਚਾਪਨਞ੍ਚੇਤ੍ਥ ਅਤ੍ਤਨੋ ਅਤ੍ਥਾਯੇਵਾਤਿ ਦਟ੍ਠਬ੍ਬਂ. ਏਵਞ੍ਚ ਪਨ ਕਤ੍ਵਾ ‘‘ਅਨਾਣਤ੍ਤਿਕ’’ਨ੍ਤਿ ਇਦਂ ਸਮਤ੍ਥਿਤਂ ਹੋਤਿ. ਅਞ੍ਞਤ੍ਰ ਸਮਯਾਤਿ ਸਮੇਤਿ ਏਤ੍ਥ, ਏਤੇਨ ਵਾ ਸਂਗਚ੍ਛਤਿ ਸਤ੍ਤੋ, ਸਭਾਵਧਮ੍ਮੋ ਵਾ ਸਹਜਾਤਾਦੀਹਿ, ਉਪ੍ਪਾਦਾਦੀਹਿ ਵਾਤਿ ਸਮਯੋ, ਕਾਲੋ, ਧਮ੍ਮਪ੍ਪਵਤ੍ਤਿਮਤ੍ਤਤਾਯ ਅਤ੍ਥਤੋ ਅਭੂਤੋਪਿ ਹਿ ਕਾਲੋ ਧਮ੍ਮਪ੍ਪਵਤ੍ਤਿਯਾ ਅਧਿਕਰਣਂ, ਕਰਣਂ ਵਿਯ ਚ ਕਪ੍ਪਨਾਮਤ੍ਤਸਿਦ੍ਧੇਨ ਰੂਪੇਨ ਵੋਹਰੀਯਤਿ, ਤਂ ਸਮਯਂ ਠਪੇਤ੍ਵਾਤਿ ਅਤ੍ਥੋ. ਤੇਨਾਹ ‘‘ਯੋ ਅਚ੍ਛਿਨ੍ਨਚੀਵਰੋ ਵਾ ਹੋਤੀ’’ਤਿਆਦਿ. ਤਤ੍ਥ ਰਾਜਾਦੀਸੁ ਯੇਹਿ ਕੇਹਿਚਿ ਅਚ੍ਛਿਨ੍ਨਂ ਚੀਵਰਂ ਏਤਸ੍ਸਾਤਿ ਅਚ੍ਛਿਨ੍ਨਚੀਵਰੋ. ਯਥਾਹ ‘‘ਅਚ੍ਛਿਨ੍ਨਚੀਵਰੋ ਨਾਮ ਭਿਕ੍ਖੁਸ੍ਸ ਚੀਵਰਂ ਅਚ੍ਛਿਨ੍ਨਂ ਹੋਤਿ, ਰਾਜੂਹਿ ਵਾ ਚੋਰੇਹਿ ਵਾ ਧੁਤ੍ਤੇਹਿ ਵਾ ਯੇਹਿ ਕੇਹਿਚਿ ਵਾ ਅਚ੍ਛਿਨ੍ਨਂ ਹੋਤੀ’’ਤਿ. ਅਗ੍ਗਿਆਦੀਸੁ ਯੇਨ ਕੇਨਚਿ ਨਟ੍ਠਂ ਚੀਵਰਮੇਤਸ੍ਸਾਤਿ ਨਟ੍ਠਚੀਵਰੋ. ਯਥਾਹ ‘‘ਨਟ੍ਠਚੀਵਰੋ ਨਾਮ ਭਿਕ੍ਖੁਸ੍ਸ ਚੀਵਰਂ ਅਗ੍ਗਿਨਾ ਵਾ ਦਡ੍ਢਂ ਹੋਤਿ, ਉਦਕੇਨ ਵਾ ਵੂਲ਼੍ਹਂ ਹੋਤਿ, ਉਨ੍ਦੂਰੇਹਿ ਵਾ ਉਪਚਿਕਾਹਿ ਵਾ ਖਾਯਿਤਂ ਹੋਤਿ, ਪਰਿਭੋਗਜਿਣ੍ਣਂ ਵਾ ਹੋਤੀ’’ਤਿ (ਪਾਰਾ. ੫੧੯). ਸਮਯਾਤਿ ਅਞ੍ਞਤ੍ਰਸਦ੍ਦਾਪੇਕ੍ਖਾਯ ਉਪਯੋਗਤ੍ਥੇ ਨਿਸ੍ਸਕ੍ਕਵਚਨਨ੍ਤਿ ਆਹ ‘‘ਤਂ ਸਮਯ’’ਨ੍ਤਿ. ਅਞ੍ਞਸ੍ਮਿਨ੍ਤਿ ਅਞ੍ਞਸ੍ਮਿਂ ਸਮਯੇ.

ਤਿਕਪਾਚਿਤ੍ਤਿਯਨ੍ਤਿ ਅਞ੍ਞਾਤਕੇ ਅਞ੍ਞਾਤਕਸਞ੍ਞਿਵੇਮਤਿਕਞ੍ਞਾਤਕਸਞ੍ਞੀਨਂ ਵਸੇਨ ਤੀਣਿ ਪਾਚਿਤ੍ਤਿਯਾਨਿ. ਸਮਯੇਤਿ ਯਥਾਵੁਤ੍ਤੇ ਅਚ੍ਛਿਨ੍ਨਚੀਵਰਕਾਲੇ ਚ ਨਟ੍ਠਚੀਵਰਕਾਲੇ ਚ. ਞਾਤਕਪ੍ਪਵਾਰਿਤੇ ਵਾ ਵਿਞ੍ਞਾਪੇਨ੍ਤਸ੍ਸਾਤਿ ਞਾਤਕੇ, ਪਵਾਰਿਤੇ ਚ ‘‘ਤੁਮ੍ਹਾਕਂ ਸਨ੍ਥਤਂ ਦੇਥਾ’’ਤਿ ਯਾਚਨ੍ਤਸ੍ਸ. ਏਤ੍ਥ (ਪਾਰਾ. ਅਟ੍ਠ. ੨.੫੨੧) ਚ ਸਙ੍ਘਵਸੇਨ ਪਵਾਰਿਤੇ ਪਮਾਣਮੇਵ ਯਾਚਿਤੁਂ ਵਟ੍ਟਤਿ, ਪੁਗ੍ਗਲਿਕਵਸੇਨ ਪਵਾਰਿਤੇ ਪਨ ਯਂ ਯਂ ਪਵਾਰੇਨ੍ਤਿ, ਤਂ ਤਮੇਵ ਵਿਞ੍ਞਾਪੇਤਬ੍ਬਂ. ਯੋ ਹਿ ਚਤੂਹਿ ਪਚ੍ਚਯੇਹਿ ਪਵਾਰੇਤ੍ਵਾ ਸਯਮੇਵ ਸਲ੍ਲਕ੍ਖੇਤ੍ਵਾ ਕਾਲਾਨੁਕਾਲਂ ਚੀਵਰਾਦੀਨਿ ਦਿਵਸੇ ਦਿਵਸੇ ਯਾਗੁਭਤ੍ਤਾਦੀਨਿ ਦੇਤਿ, ਏਵਂ ਯੇਨ ਯੇਨ ਅਤ੍ਥੋ, ਤਂ ਤਂ ਦੇਤਿ, ਤਸ੍ਸ ਵਿਞ੍ਞਾਪਨਕਿਚ੍ਚਂ ਨਤ੍ਥਿ. ਯੋ ਪਨ ਪਵਾਰੇਤ੍ਵਾ ਬਾਲਤਾਯ ਵਾ ਸਤਿਸਮ੍ਮੋਸੇਨ ਵਾ ਨ ਦੇਤਿ, ਸੋ ਵਿਞ੍ਞਾਪੇਤਬ੍ਬੋ. ਯੋ ‘‘ਮਯ੍ਹਂ ਗੇਹਂ ਪਵਾਰੇਮੀ’’ਤਿ ਵਦਤਿ, ਤਸ੍ਸ ਗੇਹਂ ਗਨ੍ਤ੍ਵਾ ਯਥਾਸੁਖਂ ਨਿਸੀਦਿਤਬ੍ਬਂ ਨਿਪਜ੍ਜਿਤਬ੍ਬਂ, ਨ ਕਿਞ੍ਚਿ ਗਹੇਤਬ੍ਬਂ. ਯੋ ਪਨ ‘‘ਯਂ ਮਯ੍ਹਂ ਗੇਹੇ ਅਤ੍ਥਿ, ਤਂ ਪਵਾਰੇਮੀ’’ਤਿ ਵਦਤਿ, ਯਂ ਤਤ੍ਥ ਕਪ੍ਪਿਯਂ, ਤਂ ਵਿਞ੍ਞਾਪੇਤਬ੍ਬਂ. ਗੇਹੇ ਪਨ ਨਿਸੀਦਿਤੁਂ ਵਾ ਨਿਪਜ੍ਜਿਤੁਂ ਵਾ ਨ ਲਬ੍ਭਤਿ. ਤਸ੍ਸੇਵਤ੍ਥਾਯਾਤਿ ‘‘ਅਞ੍ਞਸ੍ਸਾ’’ਤਿ ਲਦ੍ਧਵੋਹਾਰਸ੍ਸ ਤਸ੍ਸੇਵ ਬੁਦ੍ਧਰਕ੍ਖਿਤਸ੍ਸ ਵਾ ਧਮ੍ਮਰਕ੍ਖਿਤਸ੍ਸ ਵਾ ਅਤ੍ਥਾਯ. ਅਤ੍ਤਨੋ ਧਨੇਨ ਗਣ੍ਹਨ੍ਤਸ੍ਸਾਤਿ ਅਤ੍ਤਨੋ ਕਪ੍ਪਿਯਭਣ੍ਡੇਨ ਕਪ੍ਪਿਯਵੋਹਾਰੇਨੇਵ ਗਣ੍ਹਨ੍ਤਸ੍ਸ ਚੇਤਾਪੇਨ੍ਤਸ੍ਸ, ਪਰਿਵਤ੍ਤਾਪੇਨ੍ਤਸ੍ਸਾਤਿ ਅਤ੍ਥੋ.

ਅਞ੍ਞਾਤਕਵਿਞ੍ਞਤ੍ਤਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਤਤੁਤ੍ਤਰਿਸਿਕ੍ਖਾਪਦਵਣ੍ਣਨਾ

ਤਂ-ਸਦ੍ਦੋ ਚੇਤ੍ਥ ਪਕਤਤ੍ਥਵਚਨੋ. ਚੇਤਿ ਨਿਪਾਤਮਤ੍ਤਂ. ਚੇਤਿ ਵਾ ਯਦੀਤਿ ਅਤ੍ਥੋ, ਤਸ੍ਸ ‘‘ਪਵਾਰੇਯ੍ਯਾ’’ਤਿ ਇਮਿਨਾ ਸਮ੍ਬਨ੍ਧੋ ਵੇਦਿਤਬ੍ਬੋ. ਪਵਾਰੇਯ੍ਯ ਚੇਤਿ ਯਦਿ ਪਵਾਰੇਯ੍ਯਾਤਿ ਅਤ੍ਥੋ. ‘‘ਅਭੀਤਿ ਉਪਸਗ੍ਗੋ’’ਤਿ (ਸਾਰਤ੍ਥ. ਟੀ. ੨.੫੨੩-੫੨੪) ਇਮਿਨਾ ਤਸ੍ਸ ਅਤ੍ਥਵਿਸੇਸਾਭਾਵਂ ਦਸ੍ਸੇਤਿ. ਤੇਨਾਹ ‘‘ਹਰਿਤੁਨ੍ਤਿ ਅਤ੍ਥੋ’’ਤਿ. ਪਵਾਰਸਦ੍ਦਸ੍ਸ ਇਚ੍ਛਾਯਂ ਵਤ੍ਤਮਾਨਤ੍ਤਾ ‘‘ਇਚ੍ਛਾਪੇਯ੍ਯਾ’’ਤਿ ਵੁਤ੍ਤਂ. ਇਚ੍ਛਂ ਉਪ੍ਪਾਦੇਯ੍ਯਾਤਿ ਪਚ੍ਚਯੇ ਇਚ੍ਛਂ ਉਪ੍ਪਾਦੇਯ੍ਯ. ਉਪਨਿਮਨ੍ਤਨਾਯੇਤਂ ਅਧਿਵਚਨਂ. ਤੇਨਾਹ ‘‘ਯਾਵਤ੍ਤਕ’’ਨ੍ਤਿਆਦਿ. ਨੇਕ੍ਖਮ੍ਮਨ੍ਤਿ ਪਬ੍ਬਜ੍ਜਂ. ਦਟ੍ਠੂਤਿ ਦਟ੍ਠੁਂ. ਛਨ੍ਦਾਨੁਰਕ੍ਖਣਤ੍ਥਞ੍ਹੇਤ੍ਥ ਅਨੁਨਾਸਿਕਲੋਪੋ. ਖੇਮਤੋਤਿ ਨਿਬ੍ਭਯਤੋ. ਕਾਯੇਨ ਵਾ ਵਾਚਾਯ ਵਾ ਅਭਿਹਰਿਤ੍ਵਾ ਨਿਮਨ੍ਤੇਯ੍ਯਾਤਿ ਸਮ੍ਬਨ੍ਧੋ. ਯਥਾ ਚ ਕਾਯੇਨ ਅਭਿਹਰੇਯ੍ਯ, ਵਾਚਾਯ ਚ, ਤਂ ਵਿਧਿਂ ਦਸ੍ਸੇਤੁਂ ‘‘ਉਪਨੇਤ੍ਵਾ’’ਤਿਆਦਿ ਵੁਤ੍ਤਂ ਸਅਨ੍ਤਰਨ੍ਤਿ ਅਨ੍ਤਰਵਾਸਕਸਹਿਤਂ. ਉਤ੍ਤਰਨ੍ਤਿ ਉਤ੍ਤਰਾਸਙ੍ਗਂ. ਪਰਮਨ੍ਤਿ ਅਵਸਾਨਂ. ਅਸ੍ਸ ਚੀਵਰਸ੍ਸਾਤਿ ਅਸ੍ਸ ਸਮੁਦਾਯਭੂਤਸ੍ਸ ਹਰਿਤਬ੍ਬਸ੍ਸ ਚੀਵਰਸ੍ਸ. ਤਗ੍ਗੁਣਸਂਵਿਞ੍ਞਾਣੋ ਹਿ ਅਯਂ ਬਾਹਿਰਤ੍ਥਸਮਾਸੋ ਯਥਾ ‘‘ਲਮ੍ਬਕਣ੍ਣੋ’’ਤਿ ਦਟ੍ਠਬ੍ਬਂ. ਤੇਨਾਹ ‘‘ਨਿਵਾਸਨੇਨਾ’’ਤਿਆਦਿ. ਉਕ੍ਕਟ੍ਠਪਰਿਚ੍ਛੇਦੇਨ ਹਿ ਸਬ੍ਬੇ ਤਂਪਰਮਂਯੇਵ ਗਹੇਤੁਂ ਲਭਨ੍ਤਿ.

ਯਸ੍ਮਾ ਅਚ੍ਛਿਨ੍ਨਸਬ੍ਬਚੀਵਰੇਨ ਤਿਚੀਵਰਮਤ੍ਤਕੇਨੇਵ ਭਿਕ੍ਖੁਨਾ ਏਵਂ ਪਟਿਪਜ੍ਜਿਤਬ੍ਬਂ, ਅਞ੍ਞੇਨ ਪਨ ਅਞ੍ਞਥਾਪਿ, ਤਸ੍ਮਾ ਤਂ ਵਿਭਾਗਂ ਦਸ੍ਸੇਤੁਂ ‘‘ਤਤ੍ਰਾਯਂ ਵਿਨਿਚ੍ਛਯੋ’’ਤਿਆਦਿ ਵੁਤ੍ਤਂ. ਅਧਿਟ੍ਠਿਤਚੀਵਰਸ੍ਸਾਤਿ ਤਿਚੀਵਰਾਧਿਟ੍ਠਾਨਨਯੇਨ ਵਾ ਪਰਿਕ੍ਖਾਰਚੋਲ਼ਵਸੇਨ ਵਾ ਯੇਨ ਕੇਨਚਿ ਅਧਿਟ੍ਠਿਤਚੀਵਰਸ੍ਸ, ਇਦਞ੍ਚ ਯੇਭੁਯ੍ਯੇਨ ਅਧਿਟ੍ਠਹਿਤ੍ਵਾ ਚੀਵਰਂ ਪਰਿਭੁਞ੍ਜਤੋ ਵੁਤ੍ਤਂ, ਨ ਪਨ ਅਨਧਿਟ੍ਠਿਤਚੀਵਰਸ੍ਸ ਚੀਵਰੇ ਅਚ੍ਛਿਨ੍ਨੇ ਅਯਂ ਵਿਧਿ ਨ ਸਮ੍ਭਵਤੀਤਿ. ਯਸ੍ਸ ਵਾ ਤਿਚੀਵਰਤੋ ਅਧਿਕਮ੍ਪਿ ਚੀਵਰਂ ਅਞ੍ਞਤ੍ਥ ਅਤ੍ਥਿ, ਤਤ੍ਥ ਨਤ੍ਥਿ, ਤੇਨਾਪਿ ਤਦਾ ਤਤ੍ਥ ਅਭਾਵਤੋ ਦ੍ਵੇ ਸਾਦਿਤੁਂ ਵਟ੍ਟਤਿ. ਪਕਤਿਯਾਵ ਸਨ੍ਤਰੁਤ੍ਤਰੇਨ ਚਰਤੀਤਿ (ਸਾਰਤ੍ਥ. ਟੀ. ੨.੫੨੩-੫੨੪) ਅਤ੍ਥਤਕਥਿਨਤ੍ਤਾ ਵਾ ਸਾਸਙ੍ਕਸਿਕ੍ਖਾਪਦਵਸੇਨ ਵਾ ਅਵਿਪ੍ਪਵਾਸਸਮ੍ਮੁਤਿਵਸੇਨ ਵਾ ਤਤਿਯਸ੍ਸ ਅਲਾਭੇਨ ਵਾ ਚਰਤਿ. ‘‘ਦ੍ਵੇ ਨਟ੍ਠਾਨੀ’’ਤਿ ਅਧਿਕਾਰਤ੍ਤਾ ਵੁਤ੍ਤਂ ‘‘ਦ੍ਵੇ ਸਾਦਿਤਬ੍ਬਾਨੀ’’ਤਿ. ਏਕਂ ਸਾਦਿਯਨ੍ਤੇਨੇਵ ਸਮੋ ਭਵਿਸ੍ਸਤੀਤਿ ਤਿਣ੍ਣਂ ਚੀਵਰਾਨਂ ਦ੍ਵੀਸੁ ਨਟ੍ਠੇਨ ਏਕਂ ਸਾਦਿਯਨ੍ਤੇਨ ਸਮੋ ਭਵਿਸ੍ਸਤਿ ਉਭਿਨ੍ਨਮ੍ਪਿ ਸਨ੍ਤਰੁਤ੍ਤਰਪਰਮਤਾਯ ਅਵਟ੍ਠਾਨਤੋ. ਯਸ੍ਸ ਏਕਂਯੇਵ ਹੋਤਿ ਅਞ੍ਞੇਨ ਕੇਨਚਿ ਕਾਰਣੇਨ ਵਿਨਟ੍ਠਸੇਸਚੀਵਰਤ੍ਤਾ.

ਪਞ੍ਚਸੁ ਨਟ੍ਠੇਸੂਤਿ ਤਿਚੀਵਰਂ ਉਦਕਸਾਟਿਕਾ ਸਂਕਚ੍ਚਿਕਾਤਿ ਇਮੇਸੁ ਪਞ੍ਚਸੁ ਚੀਵਰੇਸੁ ਨਟ੍ਠੇਸੁ. ‘‘ਏਕਸ੍ਮਿਂ ਵਾ ਨਟ੍ਠੇ’’ਤਿ ਵਚਨਵਿਪਰਿਣਾਮਂ ਕਤ੍ਵਾ ਯੋਜੇਤਬ੍ਬਂ. ਤਤੋ ਉਤ੍ਤਰੀਤਿ ਸਨ੍ਤਰੁਤ੍ਤਰਪਰਮਤੋ ਉਤ੍ਤਰਿ.

ਸੇਸਕਂ ਆਹਰਿਸ੍ਸਾਮੀਤਿ ਦ੍ਵੇ ਚੀਵਰਾਨਿ ਕਤ੍ਵਾ ‘‘ਸੇਸਕਂ ਪੁਨ ਆਹਰਿਸ੍ਸਾਮੀ’’ਤਿ ਅਤ੍ਥੋ. ਸੇਸਕਂ ਤੁਯ੍ਹਂਯੇਵ ਹੋਤੂਤਿ ਵੁਤ੍ਤਸ੍ਸਾਤਿ ਦਾਨਸਮਯੇ ਏਵਂ ਵੁਤ੍ਤਸ੍ਸ. ਸਚੇ ਪਨ ‘‘ਸੇਸਕਂ ਆਹਰਿਸ੍ਸਾਮੀ’’ਤਿ ਵਤ੍ਵਾ ਗਹੇਤ੍ਵਾ ਗਮਨਸਮਯੇਪਿ ‘‘ਸੇਸਕਂ ਤੁਯ੍ਹਂਯੇਵ ਹੋਤੂ’’ਤਿ ਵਦਨ੍ਤਿ, ਲਦ੍ਧਕਪ੍ਪਿਯਮੇਵ. ਨ ਅਚ੍ਛਿਨ੍ਨਨਟ੍ਠਕਾਰਣਾ ਦਿਨ੍ਨਨ੍ਤਿ ਬਾਹੁਸਚ੍ਚਾਦਿਗੁਣਵਸੇਨ ਦਿਨ੍ਨਂ. ਵੁਤ੍ਤਨਯੇਨਾਤਿ ‘‘ਞਾਤਕਪ੍ਪਵਾਰਿਤੇ ਵਾ ਵਿਞ੍ਞਾਪੇਨ੍ਤਸ੍ਸ, ਸਮਯੇ ਚ ਅਞ੍ਞਸ੍ਸ ਵਾ ਞਾਤਕਪ੍ਪਵਾਰਿਤੇ ਤਸ੍ਸੇਵਤ੍ਥਾਯ ਵਿਞ੍ਞਾਪੇਨ੍ਤਸ੍ਸ’’ਤਿ ਵੁਤ੍ਤਨਯੇਨ.

ਤਤੁਤ੍ਤਰਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਪਠਮਉਪਕ੍ਖਟਸਿਕ੍ਖਾਪਦਵਣ੍ਣਨਾ

ਭਿਕ੍ਖੁਂ ਪਨੇਵ ਉਦ੍ਦਿਸ੍ਸਾਤਿ ਏਤ੍ਥ ਪਨਾਤਿ ਨਿਪਾਤਮਤ੍ਤਂ, ਤਥਾ ਏਵ-ਸਦ੍ਦੋਪਿ. ਤੇਨਾਹ ‘‘ਇਤ੍ਥਨ੍ਨਾਮਸ੍ਸਾ’’ਤਿਆਦਿ. ਅਪਦਿਸਿਤ੍ਵਾਤਿ ਕਥੇਤ੍ਵਾ, ਆਰਬ੍ਭਾਤਿ ਵਾ ਅਤ੍ਥੋ. ਅਞ੍ਞਾਤਕਸ੍ਸ ਗਹਪਤਿਸ੍ਸਾਤਿ ਅਞ੍ਞਾਤਕਗਹਪਤਿਨਾਤਿ ਅਤ੍ਥੋ. ਕਰਣਤ੍ਥੇ ਹਿ ਇਦਂ ਸਾਮਿਵਚਨਂ. ਅਟ੍ਠਕਥਾਯਂ ਪਨ ਇਦਂ ਸੁਵਿਞ੍ਞੇਯ੍ਯਨ੍ਤਿ ਨ ਵਿਚਾਰਿਤਂ. ਚੀਵਰਂ ਚੇਤਾਪੇਨ੍ਤਿ ਪਰਿਵਤ੍ਤੇਨ੍ਤਿ ਏਤੇਨਾਤਿ ਚੀਵਰਚੇਤਾਪਨ੍ਨਂ (ਸਾਰਤ੍ਥ. ਟੀ. ੨.੫੨੮-੫੨੯), ਚੀਵਰਮੂਲਂ, ਨ-ਕਾਰੋ ਪਨੇਤ੍ਥ ਆਗਮੋ, ‘‘ਚੀਵਰਚੇਤਾਪਨ’’ਨ੍ਤਿਪਿ ਪਠਨ੍ਤਿ. ਤਂ ਪਨ ਯਸ੍ਮਾ ਹਿਰਞ੍ਞਾਦੀਸੁ ਅਞ੍ਞਤਰਂ ਹੋਤਿ, ਤਸ੍ਮਾ ‘‘ਹਿਰਞ੍ਞਾਦਿਕ’’ਨ੍ਤਿ ਵੁਤ੍ਤਂ. ਤਤ੍ਥ ਹਿਰਞ੍ਞਨ੍ਤਿ ਕਹਾਪਣੋ ਵੁਚ੍ਚਤਿ. ਆਦਿਸਦ੍ਦੇਨ ਸੁਵਣ੍ਣਾਦੀਨਂ ਗਹਣਂ. ਉਪਕ੍ਖਟਨ੍ਤਿ ਉਪਟ੍ਠਾਪਿਤਂ. ਤਂ ਉਪਕ੍ਖਰਣਂ ਤੇਸਂ ਤਥਾ ਸਜ੍ਜਿਤਨ੍ਤਿ ਆਹ ‘‘ਉਪਕ੍ਖਟਂ ਹੋਤੀਤਿ ਸਜ੍ਜਿਤਂ ਹੋਤੀ’’ਤਿ. ਸਂਹਰਿਤ੍ਵਾ ਠਪਿਤਨ੍ਤਿ ਰਾਸਿਂ ਕਤ੍ਵਾ ਠਪਿਤਂ. ਪਰਿਵਤ੍ਤਨਞ੍ਚ ਅਕਤਸ੍ਸ ਕਾਰਾਪਨਂ, ਕਤਸ੍ਸ ਕਿਣਨਨ੍ਤਿ ਆਹ ‘‘ਕਾਰੇਤ੍ਵਾ ਵਾ ਕਿਣਿਤ੍ਵਾ ਵਾਤਿ ਅਤ੍ਥੋ’’ਤਿ. ਅਚ੍ਛਾਦੇਸ੍ਸਾਮੀਤਿ ਪਾਰੁਪੇਸ੍ਸਾਮੀਤਿ ਵੁਤ੍ਤਂ ਹੋਤਿ. ਤੇਨਾਹ ‘‘ਵੋਹਾਰਵਚਨਮੇਤ’’ਨ੍ਤਿ. ਵੋਹਾਰਵਚਨਨ੍ਤਿ ਚ ਉਪਚਾਰਵਚਨਨ੍ਤਿ ਅਤ੍ਥੋ.

‘‘ਤਤ੍ਰ ਚੇ ਸੋ ਭਿਕ੍ਖੂ’’ਤਿਆਦੀਸੁ ਕੋ ਪਦਸਮ੍ਬਨ੍ਧੋਤਿ ਆਹ ‘‘ਯਤ੍ਰ ਸੋ ਗਹਪਤਿ ਵਾ’’ਤਿਆਦਿ. ਪੁਬ੍ਬੇ ਅਪ੍ਪਵਾਰਿਤੋਤਿ ‘‘ਦਸ੍ਸਾਮਿ, ਕੀਦਿਸੇਨ ਤੇ, ਭਨ੍ਤੇ, ਚੀਵਰੇਨ ਅਤ੍ਥੋ, ਕੀਦਿਸਂ ਤੇ ਚੀਵਰਂ ਚੇਤਾਪੇਮੀ’’ਤਿ ਪੁਬ੍ਬੇ ਅਵੁਤ੍ਤੋ. ਉਪਸਙ੍ਕਮਿਤ੍ਵਾਤਿ ਗਨ੍ਤ੍ਵਾ. ਪਦਭਾਜਨੇ ਪਚੁਰਵੋਹਾਰਵਸੇਨ ‘‘ਘਰਂ ਗਨ੍ਤ੍ਵਾ’’ਤਿ (ਪਾਰਾ. ੫੨੯) ਵੁਤ੍ਤਂ. ਏਤ੍ਥ ਚ ਪਚੁਰਵੋਹਾਰਵਸੇਨਾਤਿ ਯੇਭੁਯ੍ਯਵੋਹਾਰਵਸੇਨ. ਯੇਭੁਯ੍ਯੇਨ ਹਿ ਘਰਸਾਮਿਕਂ ਦਟ੍ਠੁਕਾਮਾ ਤਸ੍ਸ ਘਰਂ ਗਚ੍ਛਨ੍ਤੀਤਿ ਤਥੇਵ ਬਹੁਲਵੋਹਾਰੋ. ਵਿਕਪ੍ਪਨ੍ਤਿ ਵਿਸਿਟ੍ਠੋ ਕਪ੍ਪੋ ਵਿਕਪ੍ਪੋ, ਵਿ-ਸਦ੍ਦੋ ਚੇਤ੍ਥ ਵਿਸਿਟ੍ਠਤ੍ਥੋ. ਤੇਨਾਹ ‘‘ਵਿਸਿਟ੍ਠਕਪ੍ਪ’’ਨ੍ਤਿ. ਇਮਿਨਾ ਵਚਨਤ੍ਥਮਾਹ. ‘‘ਅਧਿਕਵਿਧਾਨ’’ਨ੍ਤਿ ਇਮਿਨਾ ਪਨ ਅਧਿਪ੍ਪਾਯਤ੍ਥਂ. ਯਥਾ ਪਨ ਤਮਾਪਜ੍ਜਤੀਤਿ ਯੇਨਾਕਾਰੇਨ ਤਂ ਵਿਕਪ੍ਪਂ ਆਪਜ੍ਜਤਿ. ਤਂ ਦਸ੍ਸੇਤੁਨ੍ਤਿ ਤਂ ਆਕਾਰਂ ਦਸ੍ਸੇਤੁਂ.

‘‘ਸਾਧੂ’’ਤਿ ਅਯਂ ਸਦ੍ਦੋ ਸਮ੍ਪਟਿਚ੍ਛਨਸਮ੍ਪਹਂਸਨਸੁਨ੍ਦਰਾਯਾਚਨਾਦੀਸੁ ਦਿਸ੍ਸਤਿ. ਤਥਾ ਹੇਸ ‘‘ਸਾਧੁ, ਭਨ੍ਤੇਤਿ ਖੋ ਸੋ ਭਿਕ੍ਖੁ ਭਗਵਤੋ ਭਾਸਿਤਂ ਅਭਿਨਨ੍ਦਿਤ੍ਵਾ ਅਨੁਮੋਦਿਤ੍ਵਾ’’ਤਿਆਦੀਸੁ (ਮ. ਨਿ. ੩.੮੬) ਸਮ੍ਪਟਿਚ੍ਛਨੇ ਦਿਸ੍ਸਤਿ, ‘‘ਸਾਧੁ ਸਾਧੁ ਸਾਰਿਪੁਤ੍ਤਾ’’ਤਿਆਦੀਸੁ (ਦੀ. ਨਿ. ੩.੩੪੯; ਮ. ਨਿ. ੧.੩੪੦) ਸਮ੍ਪਹਂਸਨੇ.

‘‘ਸਾਧੁ ਧਮ੍ਮਰੁਚਿ ਰਾਜਾ, ਸਾਧੁ ਪਞ੍ਞਾਣਵਾ ਨਰੋ;

ਸਾਧੁ ਮਿਤ੍ਤਾਨਮਦ੍ਦੁਬ੍ਭੋ, ਪਾਪਸ੍ਸਾਕਰਣਂ ਸੁਖ’’ਨ੍ਤਿਆਦੀਸੁ. (ਜਾ. ੨.੧੮.੧੦੧) –

ਸੁਨ੍ਦਰੇ, ‘‘ਸਾਧੁ ਮੇ, ਭਨ੍ਤੇ ਭਗਵਾ, ਸਂਖਿਤ੍ਤੇਨ ਧਮ੍ਮਂ ਦੇਸੇਤੂ’’ਤਿਆਦੀਸੁ (ਸਂ. ਨਿ. ੩.੬੪-੬੮) ਆਯਾਚਨੇ, ਇਧਾਪਿ ਆਯਾਚਨੇਯੇਵ ਦਟ੍ਠਬ੍ਬੋਤਿ (ਦੀ. ਨਿ. ਅਟ੍ਠ. ੧.੧੮੯; ਮ. ਨਿ. ਅਟ੍ਠ. ੧.੧ ਮੂਲਪਰਿਯਾਯਸੁਤ੍ਤਵਣ੍ਣਨਾ; ਸੁ. ਨਿ. ਅਟ੍ਠ. ੧.੧੧੫ ਅਗ੍ਗਿਕਭਾਰਦ੍ਵਾਜਸੁਤ੍ਤਵਣ੍ਣਨਾ; ਬੁ. ਵਂ. ਅਟ੍ਠ. ੧.੪੯) ਆਹ ‘‘ਸਾਧੂਤਿਆਯਾਚਨੇ ਨਿਪਾਤੋ’’ਤਿ. ਤਤ੍ਥ ਆਯਾਚਨੇਤਿ ਅਭਿਮੁਖਂ ਯਾਚਨੇ, ਅਭਿਪਤ੍ਥਨਾਯਨ੍ਤਿ ਅਤ੍ਥੋ. ਪਰਿਵਿਤਕ੍ਕੇ ਨਿਪਾਤੋਤਿ ਸਮ੍ਬਨ੍ਧੋ. ਆਲਪਤੀਤਿ ਆਮਨ੍ਤੇਤਿ. ਆਯਤਾਦੀਸੂਤਿ ਏਤ੍ਥ ਆਦਿਸਦ੍ਦੇਨ ਵਿਤ੍ਥਤਅਪ੍ਪਿਤਸਣ੍ਹਾਨਂ ਗਹਣਂ. ਯਸ੍ਮਾ ਪਨ ਨ ਇਮਸ੍ਸ ਆਪਜ੍ਜਨਮਤ੍ਤੇਨੇਵ ਆਪਤ੍ਤਿ ਸੀਸਂ ਏਤਿ, ਤਸ੍ਮਾ ‘‘ਤਸ੍ਸ ਵਚਨੇਨਾ’’ਤਿਆਦਿ ਵੁਤ੍ਤਂ. ਪਯੋਗੇਤਿ ਸੁਤ੍ਤਪਰਿਯੇਸਨਾਦਿਪਯੋਗੇ.

ਮਹਗ੍ਘਂ ਚੇਤਾਪੇਤੁਕਾਮਂ ਅਪ੍ਪਗ੍ਘਨ੍ਤਿ ਵੀਸਤਿਅਗ੍ਘਨਕਂ ਚੀਵਰਂ ਚੇਤਾਪੇਤੁਕਾਮਂ ‘‘ਅਲਂ ਮਯ੍ਹਂ ਤੇਨ, ਦਸਅਗ੍ਘਨਕਂ ਵਾ ਅਟ੍ਠਗ੍ਘਨਕਂ ਵਾ ਦੇਹੀ’’ਤਿ ਵਦਨ੍ਤਸ੍ਸਾਤਿ ਅਤ੍ਥੋ. ਏਵਰੂਪਨ੍ਤਿ ਏਵਂ ਸਮਭਾਗਂ, ਇਮਿਨਾ ਸਮਕਨ੍ਤਿ ਵੁਤ੍ਤਂ ਹੋਤਿ. ਤਞ੍ਚ ਖੋ ਅਗ੍ਘਵਸੇਨੇਵ, ਨ ਪਮਾਣਵਸੇਨ. ਅਗ੍ਘਵਡ੍ਢਨਕਞ੍ਹਿ ਇਦਂ ਸਿਕ੍ਖਾਪਦਂ.

ਪਠਮਉਪਕ੍ਖਟਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਦੁਤਿਯਉਪਕ੍ਖਟਸਿਕ੍ਖਾਪਦਵਣ੍ਣਨਾ

ਕਸ੍ਮਾ ਇਮਿਨਾ ਨਯੇਨ ਅਤ੍ਥੋ ਵੇਦਿਤਬ੍ਬੋਤਿ ਆਹ ‘‘ਇਦਞ੍ਹੀ’’ਤਿਆਦਿ. ਹੀਤਿ ਕਾਰਣਤ੍ਥੇ ਨਿਪਾਤੋ. ਨ ਕੋਚਿ ਵਿਸੇਸੋਤਿ ਆਹ ‘‘ਕੇਵਲ’’ਨ੍ਤਿਆਦਿ.

ਦੁਤਿਯਉਪਕ੍ਖਟਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਰਾਜਸਿਕ੍ਖਾਪਦਵਣ੍ਣਨਾ

ਰਾਜਤੋ ਭੋਗ੍ਗਨ੍ਤਿ ਰਾਜਤੋ ਲਦ੍ਧਭੋਗ੍ਗਂ. ਰਾਜਭੋਗ੍ਗੋਤਿ ਰਾਜਾਮਤ੍ਤੋ. ਰਾਜਤੋ ਭੋਗੋਤਿ ਰਞ੍ਞਾ ਦਿਨ੍ਨਂ ਇਸ੍ਸਰਿਯਂ. ਇਮਿਨਾਤਿਆਦੀਤਿ ‘‘ਇਮਿਨਾ ਚੀਵਰਚੇਤਾਪਨ੍ਨੇਨ ਚੀਵਰਂ ਚੇਤਾਪੇਤ੍ਵਾ ਇਤ੍ਥਨ੍ਨਾਮਂ ਭਿਕ੍ਖੁਂ ਚੀਵਰੇਨ ਅਚ੍ਛਾਦੇਹੀ’’ਤਿ ਇਦਂ. ਆਗਮਨਸੁਦ੍ਧਿਨ੍ਤਿ ਮੂਲਸੁਦ੍ਧਿਂ. ਯਦਿ ਹਿ ਇਮਿਨਾ ਕਪ੍ਪਿਯਨੀਹਾਰੇਨ ਅਪੇਸੇਤ੍ਵਾ ‘‘ਇਦਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦੇਹੀ’’ਤਿ ਪੇਸੇਯ੍ਯ, ਸੋਪਿ ਦੂਤੋ ਤਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ਏਵਂ ਵਦੇਯ੍ਯ ‘‘ਇਦਂ ਖੋ, ਭਨ੍ਤੇ, ਆਯਸ੍ਮਨ੍ਤਂ ਉਦ੍ਦਿਸ੍ਸ ਚੀਵਰਚੇਤਾਪਨ੍ਨਂ ਆਭਤਂ, ਪਟਿਗ੍ਗਣ੍ਹਾਤੁ ਆਯਸ੍ਮਾ ਚੀਵਰਚੇਤਾਪਨ੍ਨ’’ਨ੍ਤਿ (ਪਾਰਾ. ੫੩੮), ਤਦਾ ਪਟਿਕ੍ਖਿਪਿਤ੍ਵਾਪਿ ਕਪ੍ਪਿਯਕਾਰਕਂ ਪੁਟ੍ਠੇਨ ਤਂ ਨਿਦ੍ਦਿਸਿਤੁਂ ਨ ਵਟ੍ਟਤਿ. ਤੇਨਾਹ ‘‘ਸਚੇ ਹੀ’’ਤਿਆਦਿ. ਅਕਪ੍ਪਿਯਵਤ੍ਥੁਂ ਆਰਬ੍ਭਾਤਿ ਹਿਰਞ੍ਞਾਦਿਂ ਆਰਬ੍ਭ. ਈਦਿਸੇਨ ਦੂਤਵਚਨੇਨਾਤਿ ‘‘ਪਟਿਗ੍ਗਣ੍ਹਾਤੁ ਆਯਸ੍ਮਾ ਚੀਵਰਚੇਤਾਪਨ੍ਨ’’ਨ੍ਤਿ ਏਵਰੂਪੇਨ ਦੂਤਵਚਨੇਨ. ਤਸ੍ਮਾਤਿ ਯਸ੍ਮਾ ਸਮ੍ਪਟਿਚ੍ਛਿਤੁਂ ਅਕਪ੍ਪਿਯਂ ਹੋਤਿ, ਤਸ੍ਮਾ. ਸੁਵਣ੍ਣਨ੍ਤਿ ਜਾਤਰੂਪਂ. ਰਜਤਨ੍ਤਿ ਰੂਪਿਯਂ. ਕਹਾਪਣੇਨਾਤਿ ਸੁਵਣ੍ਣਮਯੋ ਵਾ ਰੂਪਿਯਮਯੋ ਵਾ ਪਾਕਤਿਕੋ ਵਾ ਕਹਾਪਣੋ. ਮਾਸਕੋਤਿ ਲੋਹਮਾਸਕੋ ਵਾ ਹੋਤੁ, ਦਾਰੁਮਾਸਕੋ ਵਾ ਹੋਤੁ, ਜਤੁਮਾਸਕੋ ਵਾ ਹੋਤੁ, ਯੋ ਯੋ ਯਤ੍ਥ ਯਤ੍ਥ ਜਨਪਦੇ ਯਦਾ ਯਦਾ ਵੋਹਾਰਂ ਗਚ੍ਛਤਿ, ਅਨ੍ਤਮਸੋ ਅਟ੍ਠਿਮਯੋਪਿ ਚਮ੍ਮਮਯੋਪਿ ਰੁਕ੍ਖਫਲਬੀਜਮਯੋਪਿ ਸਮੁਟ੍ਠਾਪਿਤਰੂਪੋਪਿ ਅਸਮੁਟ੍ਠਾਪਿਤਰੂਪੋਪਿ ਸਬ੍ਬੋ ਇਧ ਮਾਸਕੋਤਿ ਵੇਦਿਤਬ੍ਬੋ. ਏਤ੍ਥ ਚ ਯਂ ਵਤ੍ਤਬ੍ਬਂ, ਤਂ ਰੂਪਿਯਸਿਕ੍ਖਾਪਦੇ ਵਕ੍ਖਾਮ.

ਮੁਤ੍ਤਾਤਿ ਹਤ੍ਥਿਕੁਮ੍ਭਜਾਦਿਕਾ ਅਟ੍ਠਵਿਧਾ ਮੁਤ੍ਤਾ. ਤਥਾ ਹਿ ਹਤ੍ਥਿਕੁਮ੍ਭਂ ਵਰਾਹਦਾਠਂ, ਭੁਜਙ੍ਗਸੀਸਂ, ਵਲਾਹਕਂ, ਵੇਲ਼ੁ, ਮਚ੍ਛਸਿਰੋ, ਸਙ੍ਖੋ, ਸਿਪ੍ਪੀਤਿ ਅਟ੍ਠ ਮੁਤ੍ਤਾਯੋਨਿਯੋ. ਤਤ੍ਥ ਯਾ ਮਚ੍ਛਸਙ੍ਖਸਿਪ੍ਪਿਜਾਤਾ, ਸਾ ਸਾਮੁਦ੍ਦਿਕਾ, ਭੁਜਙ੍ਗਜਾਪਿ ਕਾਚਿ ਸਾਮੁਦ੍ਦਿਕਾ ਹੋਤਿ. ਇਤਰਾ ਅਸਾਮੁਦ੍ਦਿਕਾ. ਯਸ੍ਮਾ ਪਨ ਬਹੁਲਂ ਸਾਮੁਦ੍ਦਿਕਾਵ ਮੁਤ੍ਤਾ ਲੋਕੇ ਦਿਸ੍ਸਨ੍ਤਿ, ਤਤ੍ਥਾਪਿ ਸਿਪ੍ਪਿਜਾਵ, ਇਤਰਾ ਕਦਾਚਿ. ਤਸ੍ਮਾ ਸਮ੍ਮੋਹਵਿਨੋਦਨਿਯਂ ‘‘ਮੁਤ੍ਤਾਤਿ ਸਾਮੁਦ੍ਦਿਕਮੁਤ੍ਤਾ’’ਤਿ (ਵਿਭ. ਅਟ੍ਠ. ੧੭੨) ਵੁਤ੍ਤਂ. ਮਣੀਤਿ ਠਪੇਤ੍ਵਾ ਵੇਲ਼ੁਰਿਯਾਦਿਕੇ ਅਨ੍ਤਮਸੋ ਜਾਤਿਫਲਿਕਂ ਉਪਾਦਾਯ ਸਬ੍ਬੋਪਿ ਨੀਲਪੀਤਾਦਿਵਣ੍ਣਭੇਦੋ ਮਣੀਤਿ ਵੇਦਿਤਬ੍ਬੋ, ਪਚਿਤ੍ਵਾ ਕਤੋ ਪਨ ਕਾਚਮਣਿਯੇਵੇਕੋ ਪਤ੍ਤਾਦਿਭਣ੍ਡਮੂਲਤ੍ਥਂ ਸਮ੍ਪਟਿਚ੍ਛਿਤੁਂ ਵਟ੍ਟਤਿ. ਵੇਲ਼ੁਰਿਯੋ ਨਾਮ ਵਂਸਵਣ੍ਣਮਣਿ. ਸਙ੍ਖੋਤਿ ਧਮਨਸਙ੍ਖੋ ਧੋਤਵਿਦ੍ਧੋ ਰਤਨਮਿਸ੍ਸੋ, ਪਾਨੀਯਸਙ੍ਖੋ ਪਨ ਰਤਨਾਮਿਸ੍ਸਕਤੋ, ਸੋ ਚ ਅਞ੍ਜਨਾਦਿਭੇਸਜ੍ਜਤ੍ਥਾਯ, ਭਣ੍ਡਮੂਲਤ੍ਥਾਯ ਚ ਸਮ੍ਪਟਿਚ੍ਛਿਤੁਂ ਵਟ੍ਟਤਿ. ਸਿਲਾਤਿ ਧੋਤਵਿਦ੍ਧਾ ਰਤਨਸਂਯੁਤ੍ਤਾ ਮੁਗ੍ਗਵਣ੍ਣਾ ਸਿਲਾ. ਰਤਨੇਨ ਪਨ ਅਮਿਸ੍ਸਾ ਸਤ੍ਥਕਨਿਸਾਨਾਦਿਅਤ੍ਥਾਯ ਪਟਿਗ੍ਗਣ੍ਹਿਤੁਂ ਵਟ੍ਟਤਿ. ਏਤ੍ਥ ਚ ‘‘ਰਤਨਸਂਯੁਤ੍ਤਾਤਿ ਸੁਵਣ੍ਣੇਨ ਸਦ੍ਧਿਂ ਯੋਜੇਤ੍ਵਾ ਪਚਿਤ੍ਵਾ ਕਤਾ’’ਤਿ ਵਦਨ੍ਤਿ. ਪਵਾਲ਼ਨ੍ਤਿ ਧੋਤਮ੍ਪਿ ਅਧੋਤਮ੍ਪਿ ਸਬ੍ਬਂ ਪਵਾਲ਼ਂ. ਲੋਹਿਤਙ੍ਕੋਤਿ ਰਤ੍ਤਮਣਿ. ਮਸਾਰਗਲ੍ਲਨ੍ਤਿ ਕਬਰਮਣਿ. ਯਂ ‘‘ਮਰਕਤ’’ਨ੍ਤਿਪਿ ਵੁਚ੍ਚਤਿ.

ਸਤ੍ਤ ਧਞ੍ਞਾਨੀਤਿ ਸਾਨੁਲੋਮਾਨਿ ਸਾਲਿਆਦੀਨਿ ਸਤ੍ਤ ਧਞ੍ਞਾਨਿ. ਨੀਵਾਰਾਦਿਉਪਧਞ੍ਞਸ੍ਸ ਪਨ ਸਾਲਿਆਦਿਮੂਲਧਞ੍ਞਨ੍ਤੋਗਧਤ੍ਤਾ ‘‘ਸਤ੍ਤ ਧਞ੍ਞਾਨੀ’’ਤਿ ਵੁਤ੍ਤਂ. ਦਾਸਿਦਾਸਖੇਤ੍ਤਵਤ੍ਥੁਪੁਪ੍ਫਾਰਾਮਫਲਾਰਾਮਾਦਯੋਤਿ ਏਤ੍ਥ ਦਾਸੀ ਨਾਮ ਅਨ੍ਤੋਜਾਤਧਨਕ੍ਕੀਤਕਰਮਰਾਨੀਤਪ੍ਪਭੇਦਾ. ਤਥਾ ਦਾਸੋ. ਖੇਤ੍ਤਂ ਨਾਮ ਯਸ੍ਮਿਂ ਪੁਬ੍ਬਣ੍ਣਂ ਰੁਹਤਿ. ਵਤ੍ਥੁ ਨਾਮ ਯਸ੍ਮਿਂ ਅਪਰਣ੍ਣਂ ਰੁਹਤਿ. ਯਤ੍ਥ ਵਾ ਉਭਯਮ੍ਪਿ ਰੁਹਤਿ, ਤਂ ਖੇਤ੍ਤਂ. ਤਦਤ੍ਥਾਯ ਅਕਤਭੂਮਿਭਾਗੋ ਵਤ੍ਥੁ. ਖੇਤ੍ਤਵਤ੍ਥੁਸੀਸੇਨ ਚੇਤ੍ਥ ਵਾਪਿਤਲ਼ਾਕਾਦੀਨਿਪਿ ਸਙ੍ਗਹਿਤਾਨੇਵ. ਵਸ੍ਸਿਕਾਦੀਨਂ ਪੁਪ੍ਫਨਕੋ ਪੁਪ੍ਫਾਰਾਮੋ. ਅਮ੍ਬਫਲਾਦੀਨਂ ਫਲਨਕੋ ਫਲਾਰਾਮੋ. ਨ ਕੇਵਲਞ੍ਚ ਅਤ੍ਤਨੋਯੇਵਤ੍ਥਾਯ ਸਮ੍ਪਟਿਚ੍ਛਿਤੁਂ ਨ ਵਟ੍ਟਤਿ, ਸਚੇਪਿ ਕੋਚਿ ਜਾਤਰੂਪਰਜਤਂ ਆਨੇਤ੍ਵਾ ‘‘ਇਦਂ ਸਙ੍ਘਸ੍ਸ ਦਮ੍ਮਿ, ਆਰਾਮਂ ਵਾ ਕਰੋਥ, ਚੇਤਿਯਂ ਵਾ ਭੋਜਨਸਾਲਾਦੀਨਂ ਵਾ ਅਞ੍ਞਤਰ’’ਨ੍ਤਿ ਵਦਤਿ, ਇਦਮ੍ਪਿ ਸਮ੍ਪਟਿਚ੍ਛਿਤੁਂ ਨ ਵਟ੍ਟਤਿ. ‘‘ਯਸ੍ਸ ਕਸ੍ਸਚਿ ਹਿ ਅਞ੍ਞਸ੍ਸ ਅਤ੍ਥਾਯ ਸਮ੍ਪਟਿਚ੍ਛਨ੍ਤਸ੍ਸ ਦੁਕ੍ਕਟਂ ਹੋਤੀ’’ਤਿ (ਪਾਰਾ. ਅਟ੍ਠ. ੨.੫੩੮-੫੩੯) ਮਹਾਪਚ੍ਚਰਿਯਂ ਵੁਤ੍ਤਂ. ਤੇਨਾਹ ‘‘ਚੇਤਿਯਸਙ੍ਘਗਣਪੁਗ੍ਗਲਾਨਂ ਵਾ ਅਤ੍ਥਾਯ ਸਮ੍ਪਟਿਚ੍ਛਿਤੁਂ ਨ ਵਟ੍ਟਨ੍ਤੀ’’ਤਿ.

ਸਚੇ ਪਨ ਸਙ੍ਘਂ ਵਾ ਗਣਂ ਵਾ ਪੁਗ੍ਗਲਂ ਵਾ ਅਨਾਮਸਿਤ੍ਵਾ ‘‘ਇਦਂ ਹਿਰਞ੍ਞਸੁਵਣ੍ਣਂ ਚੇਤਿਯਸ੍ਸ ਦੇਮ, ਵਿਹਾਰਸ੍ਸ ਦੇਮ, ਨਵਕਮ੍ਮਸ੍ਸ ਦੇਮਾ’’ਤਿ ਵਦਨ੍ਤਿ, ਪਟਿਕ੍ਖਿਪਿਤੁਂ ਨ ਵਟ੍ਟਤਿ. ‘‘ਇਮੇ ਇਦਂ ਭਣਨ੍ਤੀ’’ਤਿ ਕਪ੍ਪਿਯਕਾਰਕਾਨਂ ਆਚਿਕ੍ਖਿਤਬ੍ਬਂ. ‘‘ਚੇਤਿਯਾਦੀਨਂ ਅਤ੍ਥਾਯ ਤੁਮ੍ਹੇ ਗਹੇਤ੍ਵਾ ਠਪੇਥਾ’’ਤਿ ਵੁਤ੍ਤੇ ਪਨ ‘‘ਅਮ੍ਹਾਕਂ ਗਹੇਤੁਂ ਨ ਵਟ੍ਟਤੀ’’ਤਿ ਪਟਿਕ੍ਖਿਪਿਤਬ੍ਬਂ.

ਵੇਯ੍ਯਾਵਚ੍ਚਕਰੋਤਿ ਕਿਚ੍ਚਕਰੋ. ਇਧ ਪਨ ਸਬ੍ਬੋ ਕਿਚ੍ਚਕਰੋਵ ‘‘ਵੇਯ੍ਯਾਵਚ੍ਚਕਰੋ’’ਤਿ ਅਧਿਪ੍ਪੇਤੋਤਿ ਆਹ ‘‘ਕਪ੍ਪਿਯਕਾਰਕੋ’’ਤਿ. ਏਸੋ ਖੋਤਿ ‘‘ਅਸੁਕਵੀਥਿਯਂ ਅਸੁਕਘਰੇ ਅਸੁਕਨਾਮੋ’’ਤਿ ਪਰਮ੍ਮੁਖਂ ਵਦਤਿ. ਇਤਰਮ੍ਪੀਤਿ ਪਰਮ੍ਮੁਖਾਨਿਦ੍ਦਿਟ੍ਠਮ੍ਪਿ. ‘‘ਅਤ੍ਥੋ ਮੇ, ਆਵੁਸੋ, ਚੀਵਰੇਨਾ’’ਤਿ ਏਤਂ ਚੋਦਨਾਲਕ੍ਖਣਨਿਦਸ੍ਸਨਨ੍ਤਿ ਸਮ੍ਬਨ੍ਧੋ. ਤਤ੍ਥ ਚੋਦਨਾਲਕ੍ਖਣਨਿਦਸ੍ਸਨਨ੍ਤਿ ਵਾਚਾਯ ਚੋਦਨਾਲਕ੍ਖਣਨਿਦਸ੍ਸਨਂ. ਤੇਨਾਹ ‘‘ਸਚੇ ਹੀ’’ਤਿਆਦਿ. ਇਦਂ ਵਾ ਵਚਨਂ ਵਤ੍ਤਬ੍ਬਨ੍ਤਿ ਸਮ੍ਬਨ੍ਧੋ. ਏਤਸ੍ਸ ਵਾ ਅਤ੍ਥੋ ਯਾਯ ਕਾਯਚਿ ਭਾਸਾਯ ਵਤ੍ਤਬ੍ਬੋਤਿ ਸਮ੍ਬਨ੍ਧੋ. ‘‘ਦੇਹਿ ਮੇ ਚੀਵਰਂ, ਆਹਰ ਮੇ ਚੀਵਰਂ, ਪਰਿਵਤ੍ਤੇਹਿ ਮੇ ਚੀਵਰਂ, ਚੇਤਾਪੇਹਿ ਮੇ ਚੀਵਰ’’ਨ੍ਤਿ ਏਤਾਨਿ ਪਨ ਵਚਨਾਨਿ ਏਤੇਸਂ ਵਾ ਅਤ੍ਥੋ ਯਾਯ ਕਾਯਚਿ ਭਾਸਾਯ ਨ ਵਤ੍ਤਬ੍ਬੋ. ਤੇਨਾਹ ‘‘ਦੇਹਿ ਮੇ’’ਤਿਆਦਿ. ਸਾਧੇਯ੍ਯਾਤਿ ਨਿਪ੍ਫਾਦੇਯ੍ਯ. ਇਚ੍ਚੇਤਂ ਕੁਸਲਨ੍ਤਿ ਏਵਂ ਯਾਵਤਤਿਯਂ ਚੋਦਨੇਨ ਤਸ੍ਸ ਚੀਵਰਸ੍ਸ ਯਦੇਤਂ ਅਭਿਨਿਪ੍ਫਾਦਨਂ, ਏਤਂ ਕੁਸਲਂ ਸਾਧੁ ਸੁਟ੍ਠੂਤਿ ਅਤ੍ਥੋ. ਤੇਨਾਹ ‘‘ਏਤਂ ਸੁਨ੍ਦਰ’’ਨ੍ਤਿ.

ਛਕ੍ਖਤ੍ਤੁਂ ਪਰਮੋ ਪਰਿਚ੍ਛੇਦੋ ਅਸ੍ਸਾਤਿ ਛਕ੍ਖਤ੍ਤੁਪਰਮਂ. ਇਦਞ੍ਹਿ ‘‘ਠਾਤਬ੍ਬ’’ਨ੍ਤਿ ਇਮਿਸ੍ਸਾ ਕਿਰਿਯਾਯ ਵਿਸੇਸਨਂ, ਛਕ੍ਖਤ੍ਤੁਪਰਮਂ ਠਾਨਂ ਕਾਤਬ੍ਬਨ੍ਤਿ ਅਤ੍ਥੋ. ਤੇਨਾਹ ‘‘ਭਾਵਨਪੁਂਸਕਵਚਨਮੇਤ’’ਨ੍ਤਿ, ਏਤਂ ਭਾਵੇ ਠਾਤਬ੍ਬਨ੍ਤਿ ਵੁਤ੍ਤਧਾਤ੍ਵਤ੍ਥਮਤ੍ਤੇ ਸਾਧੇਤਬ੍ਬੇ ਨਪੁਂਸਕਲਿਙ੍ਗਵਚਨਨ੍ਤਿ ਅਤ੍ਥੋ. ਨ ਨਿਸੀਦਿਤਬ੍ਬਨ੍ਤਿ ‘‘ਇਧ, ਭਨ੍ਤੇ, ਨਿਸੀਦਥਾ’’ਤਿ ਵੁਤ੍ਤੇਪਿ ਨ ਨਿਸੀਦਿਤਬ੍ਬਂ. ਨ ਆਮਿਸਂ ਪਟਿਗ੍ਗਹੇਤਬ੍ਬਨ੍ਤਿ ਯਾਗੁਖਜ੍ਜਕਾਦਿਭੇਦਂ ਕਿਞ੍ਚਿ ਆਮਿਸਂ ‘‘ਗਣ੍ਹਥ, ਭਨ੍ਤੇ’’ਤਿ ਯਾਚਿਯਮਾਨੇਨਾਪਿ ਨ ਗਣ੍ਹਿਤਬ੍ਬਂ. ਨ ਧਮ੍ਮੋ ਭਾਸਿਤਬ੍ਬੋਤਿ (ਪਾਰਾ. ਅਟ੍ਠ. ੨.੫੩੮-੫੩੯) ‘‘ਮਙ੍ਗਲਂ ਵਾ ਅਨੁਮੋਦਨਂ ਵਾ ਭਾਸਥਾ’’ਤਿ ਯਾਚਿਯਮਾਨੇਨਾਪਿ ਨ ਕਿਞ੍ਚਿ ਭਾਸਿਤਬ੍ਬਂ. ਠਾਨਂ ਭਞ੍ਜਤੀਤਿ ਠਿਤਿਂ ਵਿਨਾਸੇਤਿ. ਠਤ੍ਵਾ ਚੀਵਰਂ ਗਹੇਤੁਂ ਆਗਤੇਨ ਹਿ ਤਂ ਉਦ੍ਦਿਸ੍ਸ ਤੁਣ੍ਹੀਭੂਤੇਨ ਠਾਤਬ੍ਬਮੇਵ, ਨ ਨਿਸਜ੍ਜਾਦਿਕਂ ਕਾਤਬ੍ਬਂ. ਇਮਿਨਾ ਪਨ ਤਂ ਕਤਨ੍ਤਿ ਠਾਨਂ ਵਿਨਾਸਿਤਂ ਹੋਤਿ. ਤੇਨਾਹ ‘‘ਆਗਤਕਾਰਣਂ ਵਿਨਾਸੇਤੀ’’ਤਿ. ‘‘ਆਗਤਕਾਰਣਂ ਨਾਮ ਠਾਨਮੇਵ, ਤਸ੍ਮਾ ‘ਨ ਕਾਤਬ੍ਬ’ਨ੍ਤਿ ਵਾਰਿਤਸ੍ਸ ਕਤਤ੍ਤਾ ਨਿਸਜ੍ਜਾਦੀਸੁ ਕਤੇਸੁ ਛਸੁ ਠਾਨੇਸੁ ਏਕਂ ਠਾਨਂ ਭਞ੍ਜਤੀ’’ਤਿ (ਸਾਰਤ੍ਥ. ਟੀ. ੨.੫੩੭-੫੩੯) ਅਯਮੇਤ੍ਥ ਅਧਿਪ੍ਪਾਯੋ. ਛਕ੍ਖਤ੍ਤੁਪਰਮਂ ਤੁਣ੍ਹੀਭੂਤੇਨ ਉਦ੍ਦਿਸ੍ਸ ਠਾਤਬ੍ਬਂ. ‘‘ਨ ਅਞ੍ਞਂ ਕਿਞ੍ਚਿ ਕਾਤਬ੍ਬ’’ਨ੍ਤਿ ਹਿ ਇਦਂ ਠਾਨਲਕ੍ਖਣਂ. ਤੇਨੇਵਾਹ ‘‘ਇਦ’’ਨ੍ਤਿਆਦਿ. ਤਤ੍ਥ ਇਦਨ੍ਤਿ ‘‘ਚਤੁਕ੍ਖਤ੍ਤੁਂ ਪਞ੍ਚਕ੍ਖਤ੍ਤੁਂ, ਛਕ੍ਖਤ੍ਤੁਪਰਮਂ ਤੁਣ੍ਹੀਭੂਤੇਨ ਉਦ੍ਦਿਸ੍ਸ ਠਾਤਬ੍ਬ’’ਨ੍ਤਿ ਵਚਨਂ. ਏਤ੍ਥ ਚ ‘‘ਨਿਸੀਦਨਾਦਿਮ੍ਹਿ ਕਤੇ ਪੁਨ ਚੀਵਰਂ ਗਹੇਤੁਂ ਨ ਲਭਤੀ’’ਤਿ ਕੇਚਿ. ‘‘ਦ੍ਵੇ ਠਾਨਾਨਿ ਪਰਿਹਾਯਨ੍ਤੀ’’ਤਿ ਅਞ੍ਞੇ. ‘‘ਏਕਂ ਠਾਨਂ ਪਰਿਹਾਯਤੀ’’ਤਿ ਅਪਰੇ. ਉਭਯਂ ਕਰੋਤੀਤਿ ਚੋਦੇਤਿਪਿ ਤਿਟ੍ਠਤਿਪਿ.

‘‘ਤਤ੍ਰ ਤਤ੍ਰ ਠਾਨੇ ਤਿਟ੍ਠਤੀ’’ਤਿ ਇਦਂ ਚੋਦਕਸ੍ਸ ਠਿਤਟ੍ਠਿਤਟ੍ਠਾਨਤੋ ਅਪਕ੍ਕਮ੍ਮ ਤਤ੍ਰ ਤਤ੍ਰ ਚੀਵਰਂ ਉਦ੍ਦਿਸ੍ਸ ਠਾਨਂਯੇਵ ਸਨ੍ਧਾਯ ਵੁਤ੍ਤਂ. ਏਤ੍ਥਾਤਿ ਏਤੇਸੁ ਦ੍ਵੀਸੁ ਚੋਦਨਾਟ੍ਠਾਨੇਸੁ.

ਕਿਂ ਪਨ ਸਬ੍ਬਕਪ੍ਪਿਯਕਾਰਕੇਸੁ (ਪਾਰਾ. ਅਟ੍ਠ. ੨.੫੩੮-੫੩੯; ਵਿ. ਸਙ੍ਗ. ਅਟ੍ਠ. ੬੫) ਏਵਂ ਪਟਿਪਜ੍ਜਿਤਬ੍ਬਨ੍ਤਿ? ਨ ਪਟਿਪਜ੍ਜਿਤਬ੍ਬਂ. ਅਯਞ੍ਹਿ ਕਪ੍ਪਿਯਕਾਰਕੋ ਨਾਮ ਸਙ੍ਖੇਪਤੋ ਦੁਵਿਧੋ ਨਿਦ੍ਦਿਟ੍ਠੋ ਚ ਅਨਿਦ੍ਦਿਟ੍ਠੋ ਚ. ਤਤ੍ਥ ਚ ਨਿਦ੍ਦਿਟ੍ਠੋ ਦੁਵਿਧੋ ਭਿਕ੍ਖੁਨਾ ਨਿਦ੍ਦਿਟ੍ਠੋ, ਦੂਤੇਨ ਨਿਦ੍ਦਿਟ੍ਠੋਤਿ. ਅਨਿਦ੍ਦਿਟ੍ਠੋਪਿ ਦੁਵਿਧੋ ਮੁਖਵੇਵਟਿਕਕਪ੍ਪਿਯਕਾਰਕੋ, ਪਰਮ੍ਮੁਖਕਪ੍ਪਿਯਕਾਰਕੋਤਿ. ਤੇਸੁ ਭਿਕ੍ਖੁਨਾ ਨਿਦ੍ਦਿਟ੍ਠੋ ਸਮ੍ਮੁਖਾਸਮ੍ਮੁਖਵਸੇਨ ਚਤੁਬ੍ਬਿਧੋ ਹੋਤਿ, ਤਥਾ ਦੂਤੇਨ ਨਿਦ੍ਦਿਟ੍ਠੋਪਿ.

ਕਥਂ? ਇਧੇਕਚ੍ਚੋ ਭਿਕ੍ਖੁਸ੍ਸ ਚੀਵਰਤ੍ਥਾਯ ਦੂਤੇਨ ਅਕਪ੍ਪਿਯਵਤ੍ਥੁਂ ਪਹਿਣਤਿ, ਦੂਤੋ ਚ ਤਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ‘‘ਇਦਂ, ਭਨ੍ਤੇ, ਇਤ੍ਥਨ੍ਨਾਮੇਨ ਤੁਮ੍ਹਾਕਂ ਚੀਵਰਤ੍ਥਾਯ ਪਹਿਤਂ, ਗਣ੍ਹਥ ਨ’’ਨ੍ਤਿ ਵਦਤਿ. ਭਿਕ੍ਖੁ ‘‘ਇਦਂ ਨ ਕਪ੍ਪਤੀ’’ਤਿ ਪਟਿਕ੍ਖਿਪਤਿ. ਦੂਤੋ ‘‘ਅਤ੍ਥਿ ਪਨ ਤੇ, ਭਨ੍ਤੇ, ਵੇਯ੍ਯਾਵਚ੍ਚਕਰੋ’’ਤਿ ਪੁਚ੍ਛਤਿ, ਪੁਞ੍ਞਤ੍ਥਿਕੇਹਿ ਚ ਉਪਾਸਕੇਹਿ ‘‘ਭਿਕ੍ਖੂਨਂ ਵੇਯ੍ਯਾਵਚ੍ਚਂ ਕਰੋਥਾ’’ਤਿ ਆਣਤ੍ਤਾ ਵਾ ਭਿਕ੍ਖੂਨਂ ਵਾ ਸਨ੍ਦਿਟ੍ਠਾ ਸਮ੍ਭਤ੍ਤਾ ਕੇਚਿ ਵੇਯ੍ਯਾਵਚ੍ਚਕਰਾ ਹੋਨ੍ਤਿ, ਤੇਸਂ ਅਞ੍ਞਤਰੋ ਤਸ੍ਮਿਂ ਖਣੇ ਭਿਕ੍ਖੁਸ੍ਸ ਸਨ੍ਤਿਕੇ ਨਿਸਿਨ੍ਨੋ ਹੋਤਿ, ਭਿਕ੍ਖੁ ਤਂ ਨਿਦ੍ਦਿਸਤਿ ‘‘ਅਯਂ ਭਿਕ੍ਖੂਨਂ ਵੇਯ੍ਯਾਵਚ੍ਚਕਰੋ’’ਤਿ. ਦੂਤੋ ਤਸ੍ਸ ਹਤ੍ਥੇ ਅਕਪ੍ਪਿਯਵਤ੍ਥੁਂ ਦਤ੍ਵਾ ‘‘ਥੇਰਸ੍ਸ ਚੀਵਰਂ ਕਿਣਿਤ੍ਵਾ ਦੇਹੀ’’ਤਿ ਗਚ੍ਛਤਿ, ਅਯਂ ਭਿਕ੍ਖੁਨਾ ਸਮ੍ਮੁਖਾਨਿਦ੍ਦਿਟ੍ਠੋ.

ਨੋ ਚੇ ਭਿਕ੍ਖੁਸ੍ਸ (ਪਾਰਾ. ਅਟ੍ਠ. ੨.੫੩੭; ਵਿ. ਸਙ੍ਗ. ਅਟ੍ਠ. ੬੫) ਸਨ੍ਤਿਕੇ ਨਿਸਿਨ੍ਨੋ ਹੋਤਿ, ਅਪਿਚ ਖੋ ਭਿਕ੍ਖੁ ਨਿਦ੍ਦਿਸਤਿ ‘‘ਅਸੁਕਸ੍ਮਿਂ ਨਾਮ ਗਾਮੇ ਇਤ੍ਥਨ੍ਨਾਮੋ ਭਿਕ੍ਖੂਨਂ ਵੇਯ੍ਯਾਵਚ੍ਚਕਰੋ’’ਤਿ. ਸੋ ਗਨ੍ਤ੍ਵਾ ਤਸ੍ਸ ਹਤ੍ਥੇ ਅਕਪ੍ਪਿਯਵਤ੍ਥੁਂ ਦਤ੍ਵਾ ‘‘ਥੇਰਸ੍ਸ ਚੀਵਰਂ ਕਿਣਿਤ੍ਵਾ ਦਦੇਯ੍ਯਾਸੀ’’ਤਿ ਆਗਨ੍ਤ੍ਵਾ ਭਿਕ੍ਖੁਸ੍ਸ ਆਰੋਚੇਤ੍ਵਾ ਗਚ੍ਛਤਿ, ਅਯਮੇਕੋ ਭਿਕ੍ਖੁਨਾ ਅਸਮ੍ਮੁਖਾਨਿਦ੍ਦਿਟ੍ਠੋ.

ਨ ਹੇਵ ਖੋ ਸੋ ਦੂਤੋ ਅਤ੍ਤਨਾ ਆਗਨ੍ਤ੍ਵਾ ਆਰੋਚੇਤਿ, ਅਪਿਚ ਖੋ ਅਞ੍ਞਂ ਪਹਿਣਤਿ ‘‘ਦਿਨ੍ਨਂ ਮਯਾ, ਭਨ੍ਤੇ, ਤਸ੍ਸ ਹਤ੍ਥੇ ਚੀਵਰਚੇਤਾਪਨ੍ਨਂ, ਚੀਵਰਂ ਗਣ੍ਹੇਯ੍ਯਾਥਾ’’ਤਿ, ਅਯਂ ਦੁਤਿਯੋ ਭਿਕ੍ਖੁਨਾ ਅਸਮ੍ਮੁਖਾਨਿਦ੍ਦਿਟ੍ਠੋ.

ਨ ਹੇਵ ਖੋ ਅਞ੍ਞਂ ਪਹਿਣਤਿ, ਅਪਿਚ ਖੋ ਗਚ੍ਛਨ੍ਤੋਵ ਭਿਕ੍ਖੁਂ ਵਦਤਿ ‘‘ਅਹਂ ਤਸ੍ਸ ਹਤ੍ਥੇ ਚੀਵਰਚੇਤਾਪਨ੍ਨਂ ਦਸ੍ਸਾਮਿ, ਤੁਮ੍ਹੇ ਚੀਵਰਂ ਗਣ੍ਹੇਯ੍ਯਾਥਾ’’ਤਿ, ਅਯਂ ਤਤਿਯੋ ਭਿਕ੍ਖੁਨਾ ਅਸਮ੍ਮੁਖਾਨਿਦ੍ਦਿਟ੍ਠੋਤਿ ਏਵਂ ਏਕੋ ਸਮ੍ਮੁਖਾਨਿਦ੍ਦਿਟ੍ਠੋ ਤਯੋ ਅਸਮ੍ਮੁਖਾਨਿਦ੍ਦਿਟ੍ਠਾਤਿ ਇਮੇ ਚਤ੍ਤਾਰੋ ਭਿਕ੍ਖੁਨਾ ਨਿਦ੍ਦਿਟ੍ਠਵੇਯ੍ਯਾਵਚ੍ਚਕਰਾ ਨਾਮ. ਏਤੇਸੁ ਇਮਸ੍ਮਿਂ ਰਾਜਸਿਕ੍ਖਾਪਦੇ ਵੁਤ੍ਤਨਯੇਨੇਵ ਪਟਿਪਜ੍ਜਿਤਬ੍ਬਂ.

ਅਪਰੋ ਭਿਕ੍ਖੁ ਪੁਰਿਮਨਯੇਨੇਵ ਦੂਤੇਨ ਪੁਚ੍ਛਿਤੋ ਨਤ੍ਥਿਤਾਯ ਵਾ ਅਵਿਚਾਰੇਤੁਕਾਮਤਾਯ ਵਾ ‘‘ਨਤ੍ਥਮ੍ਹਾਕਂ ਕਪ੍ਪਿਯਕਾਰਕੋ’’ਤਿ ਵਦਤਿ, ਤਸ੍ਮਿਞ੍ਚ ਖਣੇ ਕੋਚਿ ਮਨੁਸ੍ਸੋ ਆਗਚ੍ਛਤਿ, ਦੂਤੋ ਤਸ੍ਸ ਹਤ੍ਥੇ ਅਕਪ੍ਪਿਯਵਤ੍ਥੁਂ ਦਤ੍ਵਾ ‘‘ਇਮਸ੍ਸ ਹਤ੍ਥਤੋ ਚੀਵਰਂ ਗਣ੍ਹੇਯ੍ਯਾਥਾ’’ਤਿ ਵਤ੍ਵਾ ਗਚ੍ਛਤਿ, ਅਯਂ ਦੂਤੇਨ ਸਮ੍ਮੁਖਾਨਿਦ੍ਦਿਟ੍ਠੋ.

ਅਪਰੋ ਦੂਤੋ ਗਾਮਂ ਪਵਿਸਿਤ੍ਵਾ ਅਤ੍ਤਨਾ ਅਭਿਰੁਚਿਤਸ੍ਸ ਕਸ੍ਸਚਿ ਹਤ੍ਥੇ ਅਕਪ੍ਪਿਯਵਤ੍ਥੁਂ ਦਤ੍ਵਾ ਪੁਰਿਮਨਯੇਨੇਵ ਆਗਨ੍ਤ੍ਵਾ ਵਾ ਆਰੋਚੇਤਿ, ਅਞ੍ਞਂ ਵਾ ਪਹਿਣਤਿ, ‘‘ਅਹਂ ਅਸੁਕਸ੍ਸ ਨਾਮ ਹਤ੍ਥੇ ਚੀਵਰਚੇਤਾਪਨ੍ਨਂ ਦਸ੍ਸਾਮਿ, ਤੁਮ੍ਹੇ ਚੀਵਰਂ ਗਣ੍ਹੇਯ੍ਯਾਥਾ’’ਤਿ ਵਤ੍ਵਾ ਵਾ ਗਚ੍ਛਤਿ, ਅਯਂ ਤਤਿਯੋ ਦੂਤੇਨ ਅਸਮ੍ਮੁਖਾਨਿਦ੍ਦਿਟ੍ਠੋਤਿ ਏਵਂ ਏਕੋ ਸਮ੍ਮੁਖਾਨਿਦ੍ਦਿਟ੍ਠੋ, ਤਯੋ ਅਸਮ੍ਮੁਖਾਨਿਦ੍ਦਿਟ੍ਠਾਤਿ ਇਮੇ ਚਤ੍ਤਾਰੋ ਦੂਤੇਨ ਨਿਦ੍ਦਿਟ੍ਠਵੇਯ੍ਯਾਵਚ੍ਚਕਰਾ ਨਾਮ. ਏਤੇਸੁ ਮੇਣ੍ਡਕਸਿਕ੍ਖਾਪਦੇ ਵੁਤ੍ਤਨਯੇਨੇਵ ਪਟਿਪਜ੍ਜਿਤਬ੍ਬਂ.

ਵੁਤ੍ਤਞ੍ਹੇਤਂ –

‘‘ਸਨ੍ਤਿ, ਭਿਕ੍ਖਵੇ, ਮਨੁਸ੍ਸਾ ਸਦ੍ਧਾ ਪਸਨ੍ਨਾ, ਤੇ ਕਪ੍ਪਿਯਕਾਰਕਾਨਂ ਹਤ੍ਥੇ ਹਿਰਞ੍ਞਂ ਉਪਨਿਕ੍ਖਿਪਨ੍ਤਿ ‘ਇਮਿਨਾ ਅਯ੍ਯਸ੍ਸ ਯਂ ਕਪ੍ਪਿਯਂ, ਤਂ ਦੇਥਾ’ਤਿ. ਅਨੁਜਾਨਾਮਿ, ਭਿਕ੍ਖਵੇ, ਯਂ ਤਤੋ ਕਪ੍ਪਿਯਂ, ਤਂ ਸਾਦਿਤੁਂ, ਨ ਤ੍ਵੇਵਾਹਂ, ਭਿਕ੍ਖਵੇ, ਕੇਨਚਿ ਪਰਿਯਾਯੇਨ ਜਾਤਰੂਪਰਜਤਂ ਸਾਦਿਤਬ੍ਬਂ ਪਰਿਯੇਸਿਤਬ੍ਬਨ੍ਤਿ ਵਦਾਮੀ’’ਤਿ (ਮਹਾਵ. ੨੯੯).

ਏਤ੍ਥ ਚ ਚੋਦਨਾਯ ਪਰਿਮਾਣਂ ਨਤ੍ਥਿ. ਮੂਲਂ ਅਸਾਦਿਯਨ੍ਤੇਨ ਸਹਸ੍ਸਕ੍ਖਤ੍ਤੁਮ੍ਪਿ ਚੋਦਨਾਯ ਵਾ ਠਾਨੇਨ ਵਾ ਕਪ੍ਪਿਯਭਣ੍ਡਂ ਸਾਦਿਤੁਂ ਵਟ੍ਟਤਿ. ਨੋ ਚੇ ਦੇਤਿ, ਅਞ੍ਞਂ ਕਪ੍ਪਿਯਕਾਰਕਂ ਠਪੇਤ੍ਵਾਪਿ ਆਹਰਾਪੇਤਬ੍ਬਂ. ਸਚੇ ਇਚ੍ਛਤਿ, ਮੂਲਸਾਮਿਕਾਨਮ੍ਪਿ ਕਥੇਤਬ੍ਬਂ. ਨੋ ਚੇ ਇਚ੍ਛਤਿ, ਨ ਕਥੇਤਬ੍ਬਂ.

ਅਪਰੋ ਭਿਕ੍ਖੁ ਪੁਰਿਮਨਯੇਨੇਵ ਦੂਤੇਨ ਪੁਚ੍ਛਿਤੋ ‘‘ਨਤ੍ਥਮ੍ਹਾਕਂ ਕਪ੍ਪਿਯਕਾਰਕੋ’’ਤਿ ਵਦਤਿ, ਤਦਞ੍ਞੋ ਸਮੀਪੇ ਠਿਤੋ ਸੁਤ੍ਵਾ ‘‘ਆਹਰ, ਭੋ, ਅਹਂ ਅਯ੍ਯਸ੍ਸ ਚੀਵਰਂ ਚੇਤਾਪੇਤ੍ਵਾ ਦਸ੍ਸਾਮੀ’’ਤਿ ਵਦਤਿ. ਦੂਤੋ ‘‘ਹਨ੍ਦ, ਭੋ, ਦਦੇਯ੍ਯਾਸੀ’’ਤਿ ਤਸ੍ਸ ਹਤ੍ਥੇ ਦਤ੍ਵਾ ਭਿਕ੍ਖੁਸ੍ਸ ਅਨਾਰੋਚੇਤ੍ਵਾਵ ਗਚ੍ਛਤਿ, ਅਯਂ ਮੁਖਵੇਵਟਿਕਕਪ੍ਪਿਯਕਾਰਕੋ.

ਅਪਰੋ (ਪਾਰਾ. ਅਟ੍ਠ. ੨.੫੩੮-੫੩੯; ਵਿ. ਸਙ੍ਗ. ਅਟ੍ਠ. ੬੫) ਭਿਕ੍ਖੁਨੋ ਉਪਟ੍ਠਾਕਸ੍ਸ ਵਾ ਅਞ੍ਞਸ੍ਸ ਵਾ ਹਤ੍ਥੇ ਅਕਪ੍ਪਿਯਵਤ੍ਥੁਂ ਦਤ੍ਵਾ ‘‘ਥੇਰਸ੍ਸ ਚੀਵਰਂ ਦਦੇਯ੍ਯਾਸੀ’’ਤਿ ਏਤ੍ਤੋਵ ਪਕ੍ਕਮਤਿ, ਅਯਂ ਪਰਮ੍ਮੁਖਕਪ੍ਪਿਯਕਾਰਕੋਤਿ ਇਮੇ ਦ੍ਵੇ ਅਨਿਦ੍ਦਿਟ੍ਠਕਪ੍ਪਿਯਕਾਰਕਾ ਨਾਮ. ਏਤੇਸੁ ਅਞ੍ਞਾਤਕਅਪ੍ਪਵਾਰਿਤੇਸੁ ਵਿਯ ਪਟਿਪਜ੍ਜਿਤਬ੍ਬਂ.

ਸਚੇ ਸਯਮੇਵ ਚੀਵਰਂ ਆਨੇਤ੍ਵਾ ਦੇਨ੍ਤਿ, ਗਹੇਤਬ੍ਬਂ. ਨੋ ਚੇ, ਨ ਕਿਞ੍ਚਿ ਵਤ੍ਤਬ੍ਬਾ. ਤੇਨਾਹ ‘‘ਸਚੇ’’ਤਿਆਦਿ. ਕਪ੍ਪਿਯਕਾਰਕੇਤਿ ਸਮ੍ਮੁਖਾਸਮ੍ਮੁਖਵਸੇਨ ਚਤ੍ਤਾਰੋ ਕਪ੍ਪਿਯਕਾਰਕੇਤਿ ਅਤ੍ਥੋ. ‘‘ਦਾਯਕੋ ਸਯਮੇਵਾ’’ਤਿ ਇਮਿਨਾ ਭਿਕ੍ਖੁਂ ਪਟਿਕ੍ਖਿਪਤਿ, ਨ ਦੂਤਂ. ਤਸ੍ਮਾ ਦੂਤੇਨ ਨਿਦ੍ਦਿਟ੍ਠੋਪਿ ਯਥਾਰੁਚਿ ਚੋਦੇਤੁਂ ਵਟ੍ਟਤਿ. ਮੁਖਂ ਵਿਵਰਿਤ੍ਵਾ ਸਯਮੇਵ ਕਪ੍ਪਿਯਕਾਰਕਤ੍ਤਂ ਉਪਗਤੋਤਿ ਮੁਖਵੇਵਟਿਕਕਪ੍ਪਿਯਕਾਰਕੋ. ਏਵਨ੍ਤਿ ‘‘ਏਸੋ ਖੋ’’ਤਿਆਦਿਨਾ ਯਥਾਵੁਤ੍ਤੇਨ ਆਕਾਰੇਨ. ਦਸ੍ਸਿਤਾ ਹੋਨ੍ਤਿ ਸਙ੍ਖੇਪਤੋਤਿ ਅਧਿਪ੍ਪਾਯੋ.

ਵੁਤ੍ਤਚੋਦਨਾਟ੍ਠਾਨਪਰਿਮਾਣਤੋਤਿ ਵੁਤ੍ਤਚੋਦਨਾਪਰਿਮਾਣਤੋ ਚ ਵੁਤ੍ਤਟ੍ਠਾਨਪਰਿਮਾਣਤੋ ਚ. ਸਨ੍ਤਿਕਨ੍ਤਿ ਸਮੀਪਂ. ਤਤ੍ਥਾਤਿ ਏਤ੍ਥ ਕਥਮਯਮਤ੍ਥੋ ਲਬ੍ਭਤੀਤਿ ਆਹ ‘‘ਸਮੀਪਤ੍ਥੇ ਹਿ ਇਦਂ ਭੁਮ੍ਮਵਚਨ’’ਨ੍ਤਿ. ਇਦਂ ਵੁਤ੍ਤਂ ਹੋਤਿ – ‘‘ਗਙ੍ਗਾਯਂ ਗੋਯੂਥਾਨਿ ਚਰਨ੍ਤਿ, ਕੂਪੇ ਗਗ੍ਗਕੂਲ’’ਨ੍ਤਿਆਦੀਸੁ ਵਿਯ ਯਸ੍ਮਾ ਸਮੀਪਾਧਾਰੇ ਇਦਂ ਸਤ੍ਤਮੀਵਿਭਤ੍ਤਿਵਚਨਂ, ਤਸ੍ਮਾ ਅਯਮਤ੍ਥੋ ਲਬ੍ਭਤੀਤਿ. ਏਵਂ ਅਕਰੋਨ੍ਤੋਤਿ ਸਾਮਂ ਵਾ ਅਗਚ੍ਛਨ੍ਤੋ, ਦੂਤਂ ਵਾ ਅਪਾਹੇਨ੍ਤੋ.

ਅਜ੍ਜਣ੍ਹੋ, ਭਨ੍ਤੇ, ਆਗਮੇਹੀਤਿ, ਭਨ੍ਤੇ, ਅਜ੍ਜ ਏਕਦਿਵਸਂ ਅਮ੍ਹਾਕਂ ਤਿਟ੍ਠ, ਅਧਿਵਾਸੇਹੀਤਿ ਅਤ੍ਥੋ. ਤਿਕਪਾਚਿਤ੍ਤਿਯਨ੍ਤਿ ਅਤਿਰੇਕੇਸੁ ਚੋਦਨਾਟ੍ਠਾਨੇਸੁ ਅਤਿਰੇਕਸਞ੍ਞਿਵੇਮਤਿਕਊਨਕਸਞ੍ਞੀਨਂ ਵਸੇਨ ਤੀਣਿ ਪਾਚਿਤ੍ਤਿਯਾਨਿ. ਤਿਕ੍ਖਤ੍ਤੁਂ ਚੋਦਨਾਯ ਛਕ੍ਖਤ੍ਤੁਂ ਠਾਨੇਨ, ਊਨਕਤਿਕ੍ਖਤ੍ਤੁਂ ਚੋਦਨਾਯ ਊਨਕਚ੍ਛਕ੍ਖਤ੍ਤੁਂ ਠਾਨੇਨ ਲਦ੍ਧੇਪਿ ਅਨਾਪਤ੍ਤਿ. ਅਪ੍ਪਿਤਤਾਤਿ ਪਤਿਟ੍ਠਾਪਿਤਤਾ, ‘‘ਸਞ੍ਞਤ੍ਤੋ ਸੋ ਮਯਾ’’ਤਿਆਦਿਨਾ (ਪਾਰਾ. ੫੩੮) ਕਥਿਤਤਾਤਿ ਵੁਤ੍ਤਂ ਹੋਤਿ.

ਰਾਜਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਚੀਵਰਵਗ੍ਗੋ ਪਠਮੋ.