੮. ਦੁਟ੍ਠਦੋਸਸਿਕ੍ਖਾਪਦਵਣ੍ਣਨਾ

ਦੂਸੀਯਤੀਤਿ ਦੁਟ੍ਠੋ, ਦੂਸੇਤਿ ਪਰਂ ਵਿਨਾਸੇਤੀਤਿ ਦੋਸੋ. ਤੇਨਾਹ ‘‘ਦੂਸਿਤੋ ਚੇਵਾ’’ਤਿਆਦਿ. ਇਦਾਨਿ ‘‘ਦੂਸਿਤੋ ਚੇਵ ਦੂਸਕੋ ਚਾ’’ਤਿ ਇਮਿਨਾ ਸਙ੍ਖੇਪੇਨ ਵੁਤ੍ਤਮੇਵਤ੍ਥਂ ਵਿਤ੍ਥਾਰੇਤ੍ਵਾ ਦਸ੍ਸੇਤੁਂ ‘‘ਉਪ੍ਪਨ੍ਨੇ ਹਿ ਦੋਸੇ’’ਤਿਆਦਿਮਾਹ. ਪਕਤਿਭਾਵਂ ਜਹਾਪਿਤੋਤਿ (ਸਾਰਤ੍ਥ. ਟੀ. ੨.੩੮੫-੩੮੬) ਸੋਮ੍ਮਭਾਵਂ ਜਹਾਪਿਤੋਤਿ ਅਤ੍ਥੋ, ਵਿਕਾਰਮਾਪਾਦਿਤੋਤਿ ਵੁਤ੍ਤਂ ਹੋਤਿ. ਆਕਾਰਨਾਨਾਤ੍ਤੇਨਾਤਿ ਦੂਸਿਤਾਕਾਰਸ੍ਸ ਚੇਵ ਦੂਸਕਾਕਾਰਸ੍ਸ ਚਾਤਿ ਇਮੇਸਂ ਦ੍ਵਿਨ੍ਨਂ ਆਕਾਰਾਨਂ ਨਾਨਾਭਾਵੇਨ. ਨਪ੍ਪਤਿਤੋਤਿ ਪੀਤਿਸੁਖਾਦੀਹਿ ਨ ਅਭਿਗਤੋ ਅਨੁਪਗਤੋ, ਨ ਉਪਗਤੋਤਿ ਅਤ੍ਥੋ. ਯੋ ਚ ਪੀਤਿਸੁਖਾਦੀਹਿ ਅਨੁਪਗਤੋ, ਸੋ ਤੇਹਿ ਵਜ੍ਜਿਤੋ ਨਾਮ ਹੋਤੀਤਿ ਆਹ ‘‘ਪੀਤਿਸੁਖਾਦੀਹਿ ਵਿਵਜ੍ਜਿਤੋ’’ਤਿ. ਯੋ ਚ ਤੇਹਿ ਵਜ੍ਜਿਤੋ, ਨ ਸੋ ਤੇਹਿ ਅਭਿਸਟੋ ਨਾਮ ਹੋਤੀਤਿ ਆਹ ‘‘ਨ ਅਭਿਸਟੋ’’ਤਿ, ਪੀਤਿਸੁਖਾਦੀਹਿ ਨ ਪਤ੍ਥਟੋਤਿ ਅਤ੍ਥੋ. ਨਾਸ੍ਸ ਮੂਲਨ੍ਤਿ ਅਮੂਲਕਂ. ਤਂ ਪਨ ਅਮੂਲਕਤ੍ਤਂ ਯਸ੍ਮਾ ਚੋਦਕਵਸੇਨ ਅਧਿਪ੍ਪੇਤਂ, ਨ ਚੁਦਿਤਕਵਸੇਨ, ਤਸ੍ਮਾ ਤਦਤ੍ਥਂ ਦਸ੍ਸੇਤੁਂ ‘‘ਯਂ ਚੋਦਕੇਨਾ’’ਤਿਆਦਿ ਵੁਤ੍ਤਂ. ਤਤ੍ਥ ਯਨ੍ਤਿ ਪਾਰਾਜਿਕਂ. ਏਤਨ੍ਤਿ ਚੁਦਿਤਕਸ੍ਸ ਆਪਨ੍ਨਾਨਾਪਨ੍ਨਤ੍ਤਂ. ਇਧਾਤਿ ਇਮਸ੍ਮਿਂ ਸਿਕ੍ਖਾਪਦੇ.

ਇਦਾਨਿ ਅਤ੍ਤਨਾ ਵੁਤ੍ਤਮੇਵ ਦਿਟ੍ਠਾਦਿਂ ਵਿਵਰਿਤੁਂ ‘‘ਏਤ੍ਥ ਚਾ’’ਤਿਆਦਿ ਵੁਤ੍ਤਂ. ਤਥੇਵਾਤਿ ‘‘ਪਸਾਦਸੋਤੇਨ ਵਾ ਦਿਬ੍ਬਸੋਤੇਨ ਵਾ’’ਤਿ ਇਮਮਤ੍ਥਂ ਅਤਿਦਿਸਤਿ. ਪਰਿਸਙ੍ਕਿਤਂ (ਪਾਰਾ. ਅਟ੍ਠ. ੨.੩੮੫-੩੮੬) ਪਨ ਤਿਵਿਧਂ ਦਿਟ੍ਠਪਰਿਸਙ੍ਕਿਤਂ, ਸੁਤਪਰਿਸਙ੍ਕਿਤਂ, ਮੁਤਪਰਿਸਙ੍ਕਿਤਨ੍ਤਿ. ਤਤ੍ਥ ਭਿਕ੍ਖੁਞ੍ਚ ਮਾਤੁਗਾਮਞ੍ਚ ਤਥਾਰੂਪੇ ਠਾਨੇ ਦਿਸ੍ਵਾ ‘‘ਅਦ੍ਧਾ ਇਮੇਹਿ ਕਤ’’ਨ੍ਤਿ ਵਾ ‘‘ਕਰਿਸ੍ਸਨ੍ਤੀ’’ਤਿ ਵਾ ਪਰਿਸਙ੍ਕਿਤਂ, ਇਦਂ ਦਿਟ੍ਠਪਰਿਸਙ੍ਕਿਤਂ ਨਾਮ. ਅਨ੍ਧਕਾਰੇ ਵਾ ਪਟਿਚ੍ਛਨ੍ਨੋਕਾਸੇ ਵਾ ਭਿਕ੍ਖੁਸ੍ਸ ਚ ਮਾਤੁਗਾਮਸ੍ਸ ਚ ਵਚਨਂ ਸੁਤ੍ਵਾ ਦੁਤਿਯਸ੍ਸ ਅਤ੍ਥਿਭਾਵਂ ਅਜਾਨਤੋ ਪੁਬ੍ਬੇ ਵੁਤ੍ਤਨਯੇਨ ਪਰਿਸਙ੍ਕਿਤਂ, ਇਦਂ ਸੁਤਪਰਿਸਙ੍ਕਿਤਂ ਨਾਮ. ਧੁਤ੍ਤੇਹਿ ਇਤ੍ਥੀਹਿ ਸਦ੍ਧਿਂ ਪਚ੍ਚਨ੍ਤਵਿਹਾਰੇ ਮਣ੍ਡਪੇ ਵਾ ਸਾਲਾਦੀਸੁ ਵਾ ਪੁਪ੍ਫਗਨ੍ਧਮਂਸਸੁਰਾਦੀਨਿ ਅਨੁਭਵਿਤ੍ਵਾ ਗਤਟ੍ਠਾਨਂ ਦਿਸ੍ਵਾ ‘‘ਕੇਨ ਨੁ ਖੋ ਇਦਂ ਕਤ’’ਨ੍ਤਿ ਵੀਮਂਸਨ੍ਤੇਨ ਤਤ੍ਰ ਕੇਨਚਿ ਭਿਕ੍ਖੁਨਾ ਗਨ੍ਧਾਦੀਹਿ ਪੂਜਾ ਕਤਾ ਹੋਤਿ, ਭੇਸਜ੍ਜਤ੍ਥਾਯ ਅਰਿਟ੍ਠਂ ਵਾ ਪੀਤਂ, ਸੋ ਤਸ੍ਸ ਗਨ੍ਧਂ ਘਾਯਿਤ੍ਵਾ ‘‘ਅਯਂ ਸੋ ਭਵਿਸ੍ਸਤੀ’’ਤਿ ਪਰਿਸਙ੍ਕਿਤਂ, ਇਦਂ ਮੁਤਪਰਿਸਙ੍ਕਿਤਂ ਨਾਮ. ਏਵਂ ਤਿਵਿਧਸ੍ਸ ਪਰਿਸਙ੍ਕਿਤਸ੍ਸ ਅਭਾਵੋ ਅਪਰਿਸਙ੍ਕਿਤਂ. ਤੇਨਾਹ ‘‘ਦਿਟ੍ਠਸੁਤਮੁਤਵਸੇਨ ਚੇਤਸਾ ਅਪਰਿਸਙ੍ਕਿਤ’’ਨ੍ਤਿ. ਤਞ੍ਚ ਪਨੇਤਂ ਦਿਟ੍ਠਾਦਿਕਂ ਨ ਕੇਵਲਂ ਅਤ੍ਤਨੋ ਵਾਤਿ ਆਹ ‘‘ਅਤ੍ਤਨੋ ਵਾ ਪਰਸ੍ਸ ਵਾ’’ਤਿ. ਯਸ੍ਮਾ ‘‘ਤ੍ਵਂ ਪਣ੍ਡਕੋ’’ਤਿਆਦਿਵਚਨੇਨਾਪਿ ਚੋਦਯਤੋ ਆਪਤ੍ਤਿਯੇਵ, ਤਸ੍ਮਾ ‘‘ਭਿਕ੍ਖੁਨੋ ਅਨੁਰੂਪੇਸੁ ਏਕੂਨਵੀਸਤਿਯਾ ਅਞ੍ਞਤਰੇਨਾ’’ਤਿ ਵੁਤ੍ਤਂ. ਯਦਿ ਏਵਂ ਅਥ ਕਸ੍ਮਾ ਪਦਭਾਜਨੇ ‘‘ਪਾਰਾਜਿਕੇਨ ਧਮ੍ਮੇਨਾਤਿ ਚਤੁਨ੍ਨਂ ਅਞ੍ਞਤਰੇਨਾ’’ਤਿ (ਪਾਰਾ. ੩੮੬) ਵੁਤ੍ਤਨ੍ਤਿ ਆਹ ‘‘ਪਦਭਾਜਨੇ ਪਨਾ’’ਤਿਆਦਿ. ਉਪਸਗ੍ਗਨਿਪਾਤਾਨਂ ਵਾਚਕਸਦ੍ਦਸਨ੍ਨਿਟ੍ਠਾਨੇ ਤਦਤ੍ਥਜੋਤਨਭਾਵੇਨ ਪਵਤ੍ਤਨਤੋ ‘‘ਧਂਸੇਯ੍ਯਾ’’ਤਿ ਵੁਤ੍ਤਂ. ਧਂਸਨਞ੍ਚੇਤ੍ਥ ਅਭਿਭਵਨਂ. ਤੇਨਾਹ ‘‘ਅਭਿਭਵੇਯ੍ਯਾ’’ਤਿ. ‘‘ਤ੍ਵਂ ਮੇਥੁਨਂ ਧਮ੍ਮਂ ਪਟਿਸੇਵੀ’’ਤਿਆਦਿਨਾ ਨਯੇਨ ਪਵਤ੍ਤਾਤਿ ‘‘ਤ੍ਵਂ ਮੇਥੁਨਂ ਧਮ੍ਮਂ ਪਟਿਸੇਵਿ, ਅਦਿਨ੍ਨਂ ਆਦਿਯਿ, ਮਨੁਸ੍ਸਂ ਘਾਤਯਿਤ੍ਥ, ਅਭੂਤਂ ਆਰੋਚਯਿਤ੍ਥਾ’’ਤਿ ਏਵਂ ਪਵਤ੍ਤਾ. ਏਤ੍ਥ ਚ ‘‘ਅਸ੍ਸਮਣੋਸੀ’ਤਿ ਅਵਨ੍ਦਨਕਾਰਣਸ੍ਸ ਅਵੁਤ੍ਤਤ੍ਤਾ ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨੋ ਨ ਵਨ੍ਦਿਤਬ੍ਬੋ’’ਤਿ ਵਦਨ੍ਤਿ, ਤਂ ਨ ਗਹੇਤਬ੍ਬਂ ਅਵਨ੍ਦਿਯੇਸੁ ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨਸ੍ਸ ਅਵੁਤ੍ਤਤ੍ਤਾ, ‘‘ਪਚ੍ਛਾ ਉਪਸਮ੍ਪਨ੍ਨੇਨ ਪੁਰੇ ਉਪਸਮ੍ਪਨ੍ਨੋ ਵਨ੍ਦਿਯੋ’’ਤਿ (ਪਰਿ. ੪੬੮) ਵੁਤ੍ਤਤ੍ਤਾ ਚ. ਇਦਂ ਪਨ ਅਤ੍ਤਨਾ ਵਤ੍ਤਬ੍ਬਂ ਦਸ੍ਸੇਤੁਂ ਵੁਤ੍ਤਂ.

ਸਮੀਪੇਤਿ ਦ੍ਵਾਦਸਹਤ੍ਥਪਮਾਣੇ ਪਦੇਸੇ. ਸਿਕ੍ਖਾਪਚ੍ਚਕ੍ਖਾਨਮੇਵ ਹਿ ਹਤ੍ਥਮੁਦ੍ਦਾਯ ਸੀਸਂ ਨ ਏਤਿ, ਇਦਂ ਪਨ ਅਨੁਦ੍ਧਂਸਨਂ, ਅਭੂਤਰੋਚਨਞ੍ਚ ਏਤਿਯੇਵ. ਤੇਨਾਹ ‘‘ਹਤ੍ਥਮੁਦ੍ਦਾਯ ਏਵ ਵਾ’’ਤਿ. ਬ੍ਰਹ੍ਮਚਰਿਯਾਤਿ ਬ੍ਰਹ੍ਮਂ ਸੇਟ੍ਠਂ ਪਸਤ੍ਥਂ ਚਰਿਯਨ੍ਤਿ ਬ੍ਰਹ੍ਮਚਰਿਯਂ, ਬ੍ਰਹ੍ਮੂਨਂ ਵਾ ਸੇਟ੍ਠਾਨਂ ਬੁਦ੍ਧਪਚ੍ਚੇਕਬੁਦ੍ਧਅਰਿਯਸਾਵਕਾਨਂ, ਬ੍ਰਹ੍ਮਾਨਞ੍ਚ ਚਰਿਯਨ੍ਤਿ ਬ੍ਰਹ੍ਮਚਰਿਯਂ, ਤਮ੍ਹਾ ਬ੍ਰਹ੍ਮਚਰਿਯਾ. ਤੇਨਾਹ ‘‘ਸੇਟ੍ਠਚਰਿਯਾ’’ਤਿ. ਸਾਧੁ ਵਤਸ੍ਸ ਏਕਨ੍ਤੇਨ ਭਦ੍ਦਕਂ ਭਵੇਯ੍ਯ. ‘‘ਤਜ੍ਜਨੀਯਕਮ੍ਮਾਦਿਸਤ੍ਤਵਿਧਮ੍ਪਿ ਕਮ੍ਮਂ ਕਰਿਸ੍ਸਾਮਾ’’ਤਿ ਆਪਤ੍ਤਿਯਾ ਚੋਦੇਨ੍ਤਸ੍ਸ ਅਧਿਪ੍ਪਾਯੋ ਕਮ੍ਮਾਧਿਪ੍ਪਾਯੋ. ‘‘ਆਪਤ੍ਤਿਤੋ ਵੁਟ੍ਠਾਪੇਸ੍ਸਾਮਾ’’ਤਿ ਅਧਿਪ੍ਪਾਯੋ ਵੁਟ੍ਠਾਨਾਧਿਪ੍ਪਾਯੋ. ਅਨੁਵਿਜ੍ਜਨਾਧਿਪ੍ਪਾਯੋਤਿ ਵੀਮਂਸਨਾਧਿਪ੍ਪਾਯੋ, ਉਪਪਰਿਕ੍ਖਾਧਿਪ੍ਪਾਯੋ. ਅਨੁਵਿਜ੍ਜਕੇਨਾਤਿ ਸਙ੍ਘਮਜ੍ਝੇ ਓਤਿਣ੍ਣਂ ਅਧਿਕਰਣਂ ਵਿਨਿਚ੍ਛਿਨਿਤੁਂ ਨਿਸਿਨ੍ਨੇਨ ਵਿਨਯਧਰੇਨ. ਕਿਂ ਤੇ ਦਿਟ੍ਠਨ੍ਤਿ ਤਯਾ ਕਿਂ ਦਿਟ੍ਠਂ, ਪਠਮਂ ਪਾਰਾਜਿਕਂ ਅਜ੍ਝਾਪਜ੍ਜਨ੍ਤੋ ਦਿਟ੍ਠੋ, ਦੁਤਿਯਂ ਤਤਿਯਂ ਚਤੁਤ੍ਥਂ ਪਾਰਾਜਿਕਂ ਆਪਜ੍ਜਨ੍ਤੋ ਦਿਟ੍ਠੋਤਿ ਵੁਤ੍ਤਂ ਹੋਤਿ. ਆਦਿਸਦ੍ਦੇਨ ‘‘ਕਿਨ੍ਤਿ ਤੇ ਦਿਟ੍ਠਂ, ਕਦਾ ਤੇ ਦਿਟ੍ਠਂ, ਕਤ੍ਥ ਤੇ ਦਿਟ੍ਠ’’ਨ੍ਤਿ ਇਮਂ ਨਯਂ ਸਙ੍ਗਣ੍ਹਾਤਿ.

ਸਮਨਤ੍ਥਾਯ ਪਵਤ੍ਤਮਾਨੇਹਿ ਸਮਥੇਹਿ ਅਧਿਕਾਤਬ੍ਬਨ੍ਤਿ ਅਧਿਕਰਣਂ. ਯਥਾ ਹਿ ਸਮਨਵਸੇਨ ਸਮਥਾਨਂ ਵਿਵਾਦਾਦੀਸੁ ਅਧਿਕਤਭਾਵੋ, ਏਵਂ ਵਿਵਾਦਾਦੀਨਂ ਤੇਹਿ ਅਧਿਕਤ੍ਤਬ੍ਬਤਾਤਿ. ਤੇਨਾਹ ‘‘ਸਮਥੇਹਿ ਅਧਿਕਰਣੀਯਭਾਵੇਨਾ’’ਤਿਆਦਿ. ਇਮਿਨਾ ਹਿ ਅਧਿਕਰਣਸਦ੍ਦਸ੍ਸ ਕਮ੍ਮਸਾਧਨਤਾ ਵੁਤ੍ਤਾ. ਅਧਿਕਰਣਨ੍ਤਿ ਵਿਵਾਦਾਧਿਕਰਣਂ ਅਨੁਵਾਦਾਧਿਕਰਣਂ ਆਪਤ੍ਤਾਧਿਕਰਣਂ ਕਿਚ੍ਚਾਧਿਕਰਣਨ੍ਤਿ ਚਤੁਬ੍ਬਿਧਂ ਅਧਿਕਰਣਂ. ਵਿਵਾਦਾਦੀਨਿ ਅਧਿਕਰਣਾਨਿ ਸਮੇਨ੍ਤਿ ਵੂਪਸਮੇਨ੍ਤੀਤਿ ਸਮਥਾ, ਸਮ੍ਮੁਖਾਵਿਨਯਾਦਯੋ. ਅਥ ਵਾ ਅਧਿਕਰੀਯਨ੍ਤਿ ਏਤ੍ਥਾਤਿ ਅਧਿਕਰਣਂ. ਕੇ ਅਧਿਕਰੀਯਨ੍ਤਿ? ਸਮਥਾ. ਕਥਂ ਅਧਿਕਰੀਯਨ੍ਤਿ? ਸਮਨਵਸੇਨ. ਅਧਿਕਰਣਂ ਸਮੇਨ੍ਤਿ ਵੂਪਸਮੇਨ੍ਤੀਤਿਪਿ ਸਮਥਾਤਿ ਏਵਮ੍ਪੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਆਪਤ੍ਤਾਧਿਕਰਣਂ ਠਪੇਤ੍ਵਾ ਸੇਸਾਧਿਕਰਣੇਹਿ ਚੋਦਨਾਯ ਅਭਾਵਤੋ ‘‘ਇਦਂ ਪਨ ਪਾਰਾਜਿਕਸਙ੍ਖਾਤਂ ਆਪਤ੍ਤਾਧਿਕਰਣਮੇਵ ਅਧਿਪ੍ਪੇਤ’’ਨ੍ਤਿ ਵੁਤ੍ਤਂ. ਆਪਤ੍ਤਿਯੇਵ ਅਧਿਕਰਣਂ ਆਪਤ੍ਤਾਧਿਕਰਣਂ. ਅਨੁਦ੍ਧਂਸਿਤਕ੍ਖਣੇਯੇਵ ਸਙ੍ਘਾਦਿਸੇਸੋ, ਸੋ ਚੇ ਤਙ੍ਖਣੇਯੇਵ ਜਾਨਾਤੀਤਿ ਅਧਿਪ੍ਪਾਯੋ.

ਮੇਤ੍ਤਿਯਭੂਮਜਕੇਤਿ ਮੇਤ੍ਤਿਯਞ੍ਚ ਭੂਮਜਕਞ੍ਚ. ਛਬ੍ਬਗ੍ਗਿਯਾਨਂ ਅਗ੍ਗਪੁਰਿਸਾ ਏਤੇ. ਸੁਦ੍ਧਂ ਵਾਤਿ ਪਾਰਾਜਿਕਮਨਾਪਨ੍ਨਂ ਵਾ. ‘‘ਸਚੇ ਸੋ ਤਙ੍ਖਣੇਯੇਵ ਜਾਨਾਤੀ’’ਤਿ ਇਮਿਨਾ ਆਵਜ੍ਜਨਸਮਯਮਾਹ. ਤਙ੍ਖਣੇਯੇਵ ਜਾਨਨਂ ਨਾਮ ਦੁਕ੍ਕਰਂ, ਸਮਯੇਨ ਆਵਜ੍ਜਿਤ੍ਵਾ ਞਾਤੇ ਪਨ ਞਾਤਮੇਵ ਹੋਤਿ. ਪਚ੍ਛਾ ਚੇ ਜਾਨਾਤਿ, ਸੀਸਂ ਨ ਏਤਿ. ਸਿਕ੍ਖਾਪਚ੍ਚਕ੍ਖਾਨਅਭੂਤਾਰੋਚਨਦੁਟ੍ਠੁਲ੍ਲਵਾਚਾਅਤ੍ਤਕਾਮਦੁਟ੍ਠਦੋਸਭੂਤਾਰੋਚਨਸਿਕ੍ਖਾਪਦਾਨੀਤਿ ਸਬ੍ਬਾਨੇਵ ਹਿ ਇਮਾਨਿ ਏਕਪਰਿਚ੍ਛੇਦਾਨਿ. ਯਸ੍ਮਾ ਪਨ ਪਰਮ੍ਮੁਖਾ ਸਤ੍ਤਹਿਪਿ ਆਪਤ੍ਤਿਕ੍ਖਨ੍ਧੇਹਿ ਵਦਤੋ ਦੁਕ੍ਕਟਮੇਵ, ਤਸ੍ਮਾ ‘‘ਪਰਮ੍ਮੁਖਾ ਚੋਦੇਨ੍ਤਸ੍ਸ ਪਨ ਸੀਸਂ ਨ ਏਤੀ’’ਤਿ ਵੁਤ੍ਤਂ. ਵੁਤ੍ਤਨਯਾਪਤ੍ਤਿਯੋਤਿ ‘‘ਵਾਚਾਯ ਵਾਚਾਯਾ’’ਤਿਆਦਿਨਾ ਵੁਤ੍ਤਨਯਾ ਸਙ੍ਘਾਦਿਸੇਸਦੁਕ੍ਕਟਾਪਤ੍ਤਿਯੋ. ਤਥੇਵਾਤਿ ਵਾਚਾਯ ਵਾਚਾਯੇਵ. ਵਦਨ੍ਤਸ੍ਸਾਤਿ ਸਤ੍ਤਹਿਪਿ ਆਪਤ੍ਤਿਕ੍ਖਨ੍ਧੇਹਿ ਉਪਸਮ੍ਪਨ੍ਨਂ ਸਮ੍ਮੁਖਾ ਵਦਨ੍ਤਸ੍ਸ. ਵੁਤ੍ਤਨਯੇਨੇਵਾਤਿ ਵਾਚਾਯ ਵਾਚਾਯੇਵ. ਓਕਾਸਂ ਕਾਰੇਤ੍ਵਾ ਉਪਸਮ੍ਪਨ੍ਨਂ ਸਮ੍ਮੁਖਾ ਵਦਨ੍ਤਸ੍ਸ ਵਾਚਾਯ ਵਾਚਾਯ ਪਾਚਿਤ੍ਤਿਯਨ੍ਤਿ ਆਹ ‘‘ਓਕਾਸਂ ਕਾਰੇਤ੍ਵਾ ਵਦਨ੍ਤਸ੍ਸ ਪਾਚਿਤ੍ਤਿਯਮੇਵਾ’’ਤਿ. ਏਵਸਦ੍ਦੇਨ ਦੁਕ੍ਕਟਂ ਨਿਵਤ੍ਤੀਯਤਿ. ਅਸਮ੍ਮੁਖਾ ਸਤ੍ਤਹਿਪਿ ਆਪਤ੍ਤਿਕ੍ਖਨ੍ਧੇਹਿ ਵਦਨ੍ਤਸ੍ਸ ਦੁਕ੍ਕਟਂ. ਸਤ੍ਤਵਿਧਮ੍ਪਿ ਕਮ੍ਮਨ੍ਤਿ ਤਜ੍ਜਨੀਯਂ, ਨਿਯਸਂ, ਪਬ੍ਬਾਜਨੀਯਂ, ਪਟਿਸਾਰਣੀਯਂ, ਤਿਵਿਧਞ੍ਚ ਉਕ੍ਖੇਪਨੀਯਨ੍ਤਿ ਸਤ੍ਤਵਿਧਮ੍ਪਿ ਕਮ੍ਮਂ.

ਉਪੋਸਥਂ ਵਾ ਪਵਾਰਣਂ ਵਾ ਠਪੇਨ੍ਤਸ੍ਸ ਚ ਓਕਾਸਕਮ੍ਮਂ ਨਤ੍ਥੀਤਿ ਏਤ੍ਥ ਉਪੋਸਥਤੋ ਪੁਰੇ ਵਾ ਪਚ੍ਛਾ ਵਾ ਠਪਿਤੋਪਿ ਅਟ੍ਠਪਿਤੋ ਹੋਤਿ. ਖੇਤ੍ਤੇ ਠਪਿਤੋ ਪਨ ਠਪਿਤੋ ਹੋਤਿ, ਤਸ੍ਮਾ ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਅਜ੍ਜੁਪੋਸਥੋ ਪਨ੍ਨਰਸੋ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਉਪੋਸਥਂ ਕਰੇਯ੍ਯਾ’’ਤਿ ਏਤ੍ਥ ਯਾਵ ਰੇ-ਕਾਰਂ ਭਣਤਿ, ਤਾਵ ਠਪੇਤਬ੍ਬੋ, ਇਦਂ ਖੇਤ੍ਤਂ. ਯ੍ਯ-ਕਾਰੇ ਪਨ ਵੁਤ੍ਤੇ ਠਪੇਨ੍ਤੇਨ ਪਚ੍ਛਾ ਠਪਿਤੋ ਨਾਮ ਹੋਤਿ. ‘‘ਸੁਣਾਤੁ ਮੇ’’ਤਿ ਅਨਾਰਦ੍ਧੇ ਠਪੇਨ੍ਤੇਨ ਪੁਰੇ ਠਪਿਤੋ ਹੋਤਿ. ਪਵਾਰਣਾਟ੍ਠਪਨਂ ਪਨ ਸਬ੍ਬਸਙ੍ਗਾਹਿਕਂ, ਪੁਗ੍ਗਲਿਕਞ੍ਚਾਤਿ ਦੁਵਿਧਂ. ਤਤ੍ਥ ਸਬ੍ਬਸਙ੍ਗਾਹਿਕੇ ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ…ਪੇ… ਸਙ੍ਘੋ ਤੇਵਾਚਿਕਂ ਪਵਾਰੇਯ੍ਯਾ’’ਤਿ ਸੁ-ਕਾਰਤੋ ਯਾਵ ਰੇ-ਕਾਰੋ, ਤਾਵ ਅਪਰਿਯੋਸਿਤਾਵ ਹੋਤਿ ਪਵਾਰਣਾ, ਏਤ੍ਥਨ੍ਤਰੇ ਏਕਪਦੇਪਿ ਠਪੇਨ੍ਤੇਨ ਠਪਿਤਾ ਹੋਤਿ ਪਵਾਰਣਾ. ਯ੍ਯ-ਕਾਰੇ ਪਨ ਪਤ੍ਤੇ ਪਰਿਯੋਸਿਤਾਵ ਹੋਤਿ, ਤਸ੍ਮਾ ਤਤੋ ਪਟ੍ਠਾਯ ਠਪੇਨ੍ਤੇਨ ਅਟ੍ਠਪਿਤਾ ਹੋਤਿ. ਪੁਗ੍ਗਲਿਕਟ੍ਠਪਨੇ ਪਨ ‘‘ਸਙ੍ਘਂ, ਭਨ੍ਤੇ, ਪਵਾਰੇਮਿ…ਪੇ… ਤਤਿਯਮ੍ਪਿ ਭਨ੍ਤੇ ਸਙ੍ਘਂ ਪਵਾਰੇਮਿ ਦਿਟ੍ਠੇਨ ਵਾ…ਪੇ… ਪਸ੍ਸਨ੍ਤੋ ਪਟੀ’’ਤਿ (ਮਹਾਵ. ੨੧੦) ਸਂ-ਕਾਰਤੋ ਯਾਵ ਅਯਂ ਸਬ੍ਬਪਚ੍ਛਿਮੋ ਟਿ-ਕਾਰੋ, ਤਾਵ ਅਪਰਿਯੋਸਿਤਾਵ ਹੋਤਿ ਪਵਾਰਣਾ, ਏਤ੍ਥਨ੍ਤਰੇ ਏਕਪਦੇਪਿ ਠਪੇਨ੍ਤੇਨ ਠਪਿਤਾ ਹੋਤਿ ਪਵਾਰਣਾ. ‘‘ਕਰਿਸ੍ਸਾਮੀ’’ਤਿ ਵੁਤ੍ਤੇ ਪਨ ਪਰਿਯੋਸਿਤਾ ਹੋਤਿ, ਤਸ੍ਮਾ ‘‘ਕਰਿਸ੍ਸਾਮੀ’’ਤਿ ਏਤਸ੍ਮਿਂ ਪਦੇ ਸਮ੍ਪਤ੍ਤੇ ਠਪਿਤਾਪਿ ਅਟ੍ਠਪਿਤਾ ਹੋਤਿ. ਏਸੇਵ ਨਯੋ ਦ੍ਵੇਵਾਚਿਕਏਕਵਾਚਿਕਸਮਾਨਵਸ੍ਸਿਕਾਸੁ. ਏਤਾਸੁਪਿ ਹਿ ਟਿ-ਕਾਰਾਵਸਾਨਂਯੇਵ ਠਪਨਕ੍ਖੇਤ੍ਤਨ੍ਤਿ. ਤੇਨਾਹ ‘‘ਠਪਨਕ੍ਖੇਤ੍ਤਂ ਪਨ ਜਾਨਿਤਬ੍ਬ’’ਨ੍ਤਿ. ਓਸਟੇ ਵਤ੍ਥੁਸ੍ਮਿਨ੍ਤਿ ਚੋਦਕੇਨ ਅਤ੍ਤਨਾ ਵਤ੍ਤਬ੍ਬੇ ਸਙ੍ਘਮਜ੍ਝੇ ਉਦਾਹਟੇ. ਇਦਞ੍ਚ ਇਦਞ੍ਚ ਕਰੋਤੀਤਿ ਪਾਣਾਤਿਪਾਤਂ, ਅਦਿਨ੍ਨਾਦਾਨਞ੍ਚ ਕਰੋਤਿ, ਜਾਤਰੂਪਰਜਤਞ੍ਚ ਪਟਿਗ੍ਗਣ੍ਹਾਤਿ. ਅਸੁਕੋ ਚ ਅਸੁਕੋ ਚ ਅਸ੍ਸਮਣੋ, ਅਨੁਪਾਸਕੋਤਿ ਅਕ੍ਕੋਸਾਧਿਪ੍ਪਾਯੇਨ ਪਰਮ੍ਮੁਖਾ ਵਦਨ੍ਤਸ੍ਸ ਦੁਕ੍ਕਟਂ, ਸਮ੍ਮੁਖਾ ਵਦਨ੍ਤਸ੍ਸ ਪਨ ਪਾਚਿਤ੍ਤਿਯਮੇਵ. ਤੇਨਾਹ ‘‘ਸਚੇ ਪਨ ਓਦਿਸ੍ਸ ਨਿਯਮੇਤ੍ਵਾ’’ਤਿਆਦਿ. ਸਙ੍ਖ੍ਯੁਪਗਮਨਨ੍ਤਿ ਵੋਹਾਰੂਪਗਮਨਂ.

ਦੁਟ੍ਠਦੋਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.