੭. ਵਿਹਾਰਕਾਰਸਿਕ੍ਖਾਪਦਵਣ੍ਣਨਾ

ਮਹਨ੍ਤਂ ਲਾਤਿ ਗਣ੍ਹਾਤੀਤਿ ਮਹਲ੍ਲਕੋ, ਤਂ ਮਹਲ੍ਲਕਂ. ਯੋ ਚ ਯਂ ਗਣ੍ਹਾਤਿ, ਸੋ ਤਸ੍ਸ ਅਤ੍ਥੀਤਿ ਆਹ ‘‘ਮਹਨ੍ਤਭਾਵੋ ਏਤਸ੍ਸ ਅਤ੍ਥੀਤਿ ਮਹਲ੍ਲਕੋ’’ਤਿ. ਸੋ ਚ ਮਹਨ੍ਤਭਾਵੋ ਕੇਨ, ਕੁਤੋ ਚਾਤਿ ਆਹ ‘‘ਸਸਾਮਿਕਭਾਵੇਨਾ’’ਤਿਆਦਿ. ਨ ਕੇਵਲਂ ਸਸਾਮਿਕਭਾਵੇਨੇਵਾਤਿ ਆਹ ‘‘ਯਸ੍ਮਾ ਵਾ’’ਤਿਆਦਿ. ਯਦਿ ਏਵਂ ਅਥ ਕਸ੍ਮਾ ‘‘ਮਹਲ੍ਲਕੋ ਨਾਮ ਵਿਹਾਰੋ ਸਸਾਮਿਕੋ ਵੁਚ੍ਚਤੀ’’ਤਿ (ਪਾਰਾ. ੩੬੭) ਏਤ੍ਤਕਮੇਵ ਪਦਭਾਜਨੇ ਵੁਤ੍ਤਨ੍ਤਿ ਆਹ ‘‘ਯਸ੍ਮਾ ਪਨਾ’’ਤਿਆਦਿ. ਵਿਹਰਨ੍ਤਿ ਏਤ੍ਥਾਤਿ ਵਿਹਾਰੋ, ਆਵਾਸੋ. ਮਾਤਿਕਾਯਂ ਭਿਕ੍ਖੂ ਵਾ ਅਨਭਿਨੇਯ੍ਯਾਤਿ ਏਤ੍ਥ ਵਾ-ਸਦ੍ਦੋ ‘‘ਅਯਂ ਵਾ ਸੋ ਮਹਾਨਾਗੋ’’ਤਿਆਦੀਸੁ ਵਿਯ ਅਵਧਾਰਣਤ੍ਥੋ.

ਕੋਸਮ੍ਬਿਯਨ੍ਤਿ (ਸਾਰਤ੍ਥ. ਟੀ. ੨.੩੬੫) ਏਵਂਨਾਮਕੇ ਨਗਰੇ. ਤਸ੍ਸ ਕਿਰ ਨਗਰਸ੍ਸ ਆਰਾਮਪੋਕ੍ਖਰਣਿਆਦੀਸੁ ਤੇਸੁ ਤੇਸੁ ਠਾਨੇਸੁ ਕੋਸਮ੍ਬਰੁਕ੍ਖਾਵ ਉਸ੍ਸਨ੍ਨਾ ਅਹੇਸੁਂ, ਤਸ੍ਮਾ ਤਂ ‘‘ਕੋਸਮ੍ਬੀ’’ਤਿ ਸਙ੍ਖਂ ਗਚ੍ਛਤਿ. ‘‘ਕੁਸੁਮ੍ਬਸ੍ਸ ਨਾਮ ਇਸਿਨੋ ਅਸ੍ਸਮਤੋ ਅਵਿਦੂਰੇ ਮਾਪਿਤਤ੍ਤਾ’’ਤਿ ਏਕੇ. ਛਨ੍ਨਤ੍ਥੇਰਂ ਆਰਬ੍ਭਾਤਿ ਯੋ ਅਭਿਨਿਕ੍ਖਮਨਕਾਲੇ ਸਦ੍ਧਿਂ ਨਿਕ੍ਖਨ੍ਤੋ, ਯਸ੍ਸ ਚ ਸਤ੍ਥਾਰਾ ਪਰਿਨਿਬ੍ਬਾਨਕਾਲੇ ਬ੍ਰਹ੍ਮਦਣ੍ਡੋ (ਚੂਲ਼ਵ. ੪੪੫) ਆਣਤ੍ਤੋ, ਤਂ ਛਨ੍ਨਤ੍ਥੇਰਂ ਆਰਬ੍ਭ. ਚੇਤਿਯਰੁਕ੍ਖਨ੍ਤਿ ਚਿਤ੍ਤੀਕਤਟ੍ਠੇਨ ਚੇਤਿਯਂ, ਪੂਜਾਰਹਾਨਂ ਦੇਵਟ੍ਠਾਨਾਨਮੇਤਂ ਅਧਿਵਚਨਂ, ‘‘ਚੇਤਿਯ’’ਨ੍ਤਿ ਸਮ੍ਮਤਂ ਰੁਕ੍ਖਂ ਚੇਤਿਯਰੁਕ੍ਖਂ. ਵਤ੍ਥੁਨੋ ਅਦੇਸਨਾਯ ਆਪਜ੍ਜਨਤੋ ‘‘ਅਕਿਰਿਯਮਤ੍ਤਤੋ ਸਮੁਟ੍ਠਾਨਭਾਵੋ’’ਤਿ ਵੁਤ੍ਤਂ. ਮਤ੍ਤ-ਸਦ੍ਦੇਨ ਕਿਰਿਯਤੋ ਸਮੁਟ੍ਠਾਨਤਂ ਪਟਿਕ੍ਖਿਪਤਿ. ਕੇਚਿ ਪਨ ‘‘ਵਤ੍ਥੁਅਦੇਸਨਾਯ, ਕੁਟਿਕਰਣੇਨ ਚ ਸਮੁਟ੍ਠਾਨਤੋ ਕਿਰਿਯਾਕਿਰਿਯਤੋ ਸਮੁਟ੍ਠਾਤੀ’’ਤਿ ਵਦਨ੍ਤਿ. ਪਮਾਣਨਿਯਮਾਭਾਵੋਵ ਵਿਸੇਸੋ.

ਵਿਹਾਰਕਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.