੨. ਕਾਯਸਂਸਗ੍ਗਸਿਕ੍ਖਾਪਦਵਣ੍ਣਨਾ

‘‘ਓਤਿਣ੍ਣੋ’’ਤਿ (ਸਾਰਤ੍ਥ. ਟੀ. ੨.੨੭੦) ਇਦਂ ਕਮ੍ਮਸਾਧਨਂ, ਕਤ੍ਤੁਸਾਧਨਂ ਵਾ ਹੋਤੀਤਿ ਤਦੁਭਯਵਸੇਨ ਅਤ੍ਥਂ ਦਸ੍ਸੇਨ੍ਤੋ ‘‘ਯਕ੍ਖਾਦੀਹਿ ਵਿਯ ਸਤ੍ਤਾ’’ਤਿਆਦਿਮਾਹ. ਅਸਮਪੇਕ੍ਖਿਤ੍ਵਾਤਿ ਯਥਾਸਭਾਵਂ ਅਨੁਪਪਰਿਕ੍ਖਿਤ੍ਵਾ, ਯਥਾ ਤੇ ਰਤਿਜਨਕਾ ਰੂਪਾਦਯੋ ਵਿਸਯਾ ਅਨਿਚ੍ਚਦੁਕ੍ਖਾਸੁਭਾਨਤ੍ਤਾਕਾਰੇਨ ਅਵਟ੍ਠਿਤਾ, ਤਥਾ ਅਪਸ੍ਸਿਤ੍ਵਾਤਿ ਵੁਤ੍ਤਂ ਹੋਤਿ. ਪਰਿਣਤੇਨਾਤਿ ਪਰਿਵਤ੍ਤੇਨ. ਤੇਨਾਹ ‘‘ਯਥਾ ਪਰਿਵਤ੍ਤਮਾਨ’’ਨ੍ਤਿਆਦਿ. ਵੁਤ੍ਤਰਾਗਵਸੇਨਾਤਿ ਕਾਯਸਂਸਗ੍ਗਰਾਗਵਸੇਨ. ਤਦਹੁਜਾਤਾਯਪੀਤਿ ਤਸ੍ਮਿਂ ਅਹਨਿ ਜਾਤਂ ਜਨਨਂ ਏਤਿਸ੍ਸਾਤਿ ਤਦਹੁਜਾਤਾ, ਤਸ੍ਮਿਂ ਅਹਨਿ ਜਾਤਾਤਿ ਵਾ ਤਦਹੁਜਾਤਾ, ਤਾਯ, ਤਂ ਦਿਵਸਂ ਜਾਤਾਯਪੀਤਿ ਅਤ੍ਥੋ, ਜਾਤਮਤ੍ਤਾਯ ਅਲ੍ਲਮਂਸਪੇਸਿਵਣ੍ਣਾਯਪੀਤਿ ਵੁਤ੍ਤਂ ਹੋਤਿ.

ਅਸ੍ਸਾਤਿ ‘‘ਕਾਯਸਂਸਗ੍ਗਂ ਸਮਾਪਜ੍ਜੇਯ੍ਯਾ’’ਤਿ ਪਦਸ੍ਸ. ਇਦਾਨਿ ਹਤ੍ਥਾਦੀਨਂ ਵਿਭਾਗਦਸ੍ਸਨਤ੍ਥਂ ‘‘ਤਤ੍ਥ ਹਤ੍ਥੋ ਨਾਮ ਕਪ੍ਪਰਤੋ ਪਟ੍ਠਾਯਾ’’ਤਿਆਦਿਮਾਹ. ਕਪ੍ਪਰਤੋ ਪਟ੍ਠਾਯਾਤਿ ਦੁਤਿਯਮਹਾਸਨ੍ਧਿਂ ਉਪਾਦਾਯ. ਅਞ੍ਞਤ੍ਥ ਪਨ ਮਣਿਬਨ੍ਧਤੋ ਪਟ੍ਠਾਯ ਯਾਵ ਅਗ੍ਗਨਖਾ ਹਤ੍ਥੋ. ਵਿਨਨ੍ਧਿਤ੍ਵਾ ਵਾ ਅਵਿਨਨ੍ਧਿਤ੍ਵਾ ਵਾ ਕਤਕੇਸਕਲਾਪਸ੍ਸੇਤਂ ਅਧਿਵਚਨਨ੍ਤਿ ਸਮ੍ਬਨ੍ਧੋ. ਤਤ੍ਥ ਵਿਨਨ੍ਧਿਤ੍ਵਾਤਿ ਤੀਹਿ ਕੇਸਵਟ੍ਟੀਹਿ ਗਨ੍ਥਿਤ੍ਵਾ. ਸੁਵਣ੍ਣਚੀਰਕਨ੍ਤਿ ਸੁਵਣ੍ਣਪਾਲ਼ਿਂ. ਹਤ੍ਥਞ੍ਚ ਵੇਣਿਞ੍ਚ ਠਪੇਤ੍ਵਾ ਅਵਸੇਸਸਰੀਰਂ ਅਙ੍ਗਨ੍ਤਿ ਆਹ ‘‘ਅਵਸੇਸਸ੍ਸ ਸਰੀਰਸ੍ਸਾ’’ਤਿਆਦਿ.

ਯੋ ਹਿ ਸੇਵਨਾਧਿਪ੍ਪਾਯੋਪਿ ਨਿਚ੍ਚਲੇਨ ਕਾਯੇਨ ਕੇਵਲਂ ਫਸ੍ਸਂ ਪਟਿਵਿਜਾਨਾਤਿ ਸਾਦਿਯਤਿ ਅਨੁਭੋਤਿ, ਤਸ੍ਸ ਚਿਤ੍ਤੁਪ੍ਪਾਦਮਤ੍ਤੇ ਆਪਤ੍ਤਿਯਾ ਅਭਾਵਤੋ ਅਨਾਪਤ੍ਤੀਤਿ ਆਹ ‘‘ਕਾਯੇਨ ਅਵਾਯਮਿਤ੍ਵਾ’’ਤਿਆਦਿ. ਮੋਕ੍ਖਾਧਿਪ੍ਪਾਯੇਨਾਤਿ ਇਤ੍ਥਿਤੋ ਮੁਚ੍ਚਿਤੁਕਾਮਤਾਧਿਪ੍ਪਾਯੇਨ. ਅਸਞ੍ਚਿਚ੍ਚਾਤਿ ‘‘ਇਮਿਨਾ ਉਪਾਯੇਨ ਇਮਂ ਫੁਸਿਸ੍ਸਾਮੀ’’ਤਿ ਅਚੇਤੇਤ੍ਵਾ. ਏਵਞ੍ਹਿ ਅਚੇਤੇਤ੍ਵਾ ਪਤ੍ਤਪ੍ਪਟਿਗ੍ਗਹਣਾਦੀਸੁ ਮਾਤੁਗਾਮਸ੍ਸ ਅਙ੍ਗੇ ਫੁਟ੍ਠੇਪਿ ਅਨਾਪਤ੍ਤਿ. ਅਸਤਿਯਾਤਿ ਅਞ੍ਞਵਿਹਿਤੋ ਹੋਤਿ, ‘‘ਮਾਤੁਗਾਮਂ ਫੁਸਿਸ੍ਸਾਮੀ’’ਤਿ ਸਤਿ ਨਤ੍ਥਿ, ਏਵਂ ਅਸਤਿਯਾ ਹਤ੍ਥਪਾਦਪਸਾਰਣਾਦਿਕਾਲੇ ਫੁਸਨ੍ਤਸ੍ਸ ਅਨਾਪਤ੍ਤਿ. ਅਜਾਨਨ੍ਤਸ੍ਸਾਤਿ ਦਾਰਕਵੇਸੇਨ ਠਿਤਂ ਦਾਰਿਕਂ ‘‘ਇਤ੍ਥੀ’’ਤਿ ਅਜਾਨਨ੍ਤੋ ਕੇਨਚਿਦੇਵ ਕਰਣੀਯੇਨ ਫੁਸਤਿ, ਏਵਂ ‘‘ਇਤ੍ਥੀ’’ਤਿ ਅਜਾਨਨ੍ਤਸ੍ਸ ਫੁਸਤੋ ਅਨਾਪਤ੍ਤਿ. ਅਸਾਦਿਯਨ੍ਤਸ੍ਸਾਤਿ ਕਾਯਸਂਸਗ੍ਗਂ ਅਸਾਦਿਯਨ੍ਤਸ੍ਸ ਬਾਹਾਪਰਮ੍ਪਰਾਯ ਨੀਤਭਿਕ੍ਖੁਸ੍ਸ ਵਿਯ ਅਨਾਪਤ੍ਤਿ. ਇਧ ਪਨ ਉਦਾਯਿਤ੍ਥੇਰੋ ਆਦਿਕਮ੍ਮਿਕੋ. ਤਸ੍ਸ ਅਨਾਪਤ੍ਤਿ ਆਦਿਕਮ੍ਮਿਕਸ੍ਸਾਤਿ.

ਕਾਯਸਂਸਗ੍ਗਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.