੬. ਆਰਾਮਵਗ੍ਗੋ

੧-੨. ਆਰਾਮਪਵਿਸਨਾਦਿਸਿਕ੍ਖਾਪਦਵਣ੍ਣਨਾ

ਸੀਸਾਨੁਲੋਕਿਕਾਯਾਤਿ ਸੀਸਂ ਅਨੁਲੋਕੇਨ੍ਤਿਯਾ. ਯਤ੍ਥ ਵਾ ਭਿਕ੍ਖੁਨਿਯੋ ਸਨ੍ਨਿਪਤਿਤਾਤਿ ਯਤ੍ਥ ਭਿਕ੍ਖੁਨਿਯੋ ਪਠਮਤਰਂ ਸਜ੍ਝਾਯਨਚੇਤਿਯਵਨ੍ਦਨਾਦਿਅਤ੍ਥਂ ਸਨ੍ਨਿਪਤਿਤਾ. ਆਪਦਾਸੂਤਿ ਕੇਨਚਿ ਉਪਦ੍ਦੁਤਾ ਹੋਤਿ, ਏਵਰੂਪਾਸੁ ਆਪਦਾਸੁ ਪਵਿਸਿਤੁਂ ਵਟ੍ਟਤਿ.

ਦੁਤਿਯਂ ਉਤ੍ਤਾਨਤ੍ਥਮੇਵ.

ਆਰਾਮਪਵਿਸਨਾਦਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩-੪. ਗਣਪਰਿਭਾਸਨਾਦਿਸਿਕ੍ਖਾਪਦਵਣ੍ਣਨਾ

ਸੇਸਨ੍ਤਿ ‘‘ਅਤ੍ਥਧਮ੍ਮਅਨੁਸਾਸਨਿਪੁਰੇਕ੍ਖਾਰਾਯਾ’’ਤਿਆਦਿਕਂ ਅਵਸੇਸਂ. ਤਤ੍ਥ ਅਨੁਸਾਸਨਿਪੁਰੇਕ੍ਖਾਰਾਯਾਤਿ ‘‘ਇਦਾਨਿਪਿ ਤ੍ਵਂ ਬਾਲਾ ਅਬ੍ਯਤ੍ਤਾ’’ਤਿਆਦਿਨਾ (ਪਾਚਿ. ਅਟ੍ਠ. ੧੦੩੬) ਨਯੇਨ ਅਨੁਸਾਸਨਿਪਕ੍ਖੇ ਠਤ੍ਵਾ ਵਦਨ੍ਤਿਯਾ ਅਨਾਪਤ੍ਤਿ.

ਚਤੁਤ੍ਥਂ ਉਤ੍ਤਾਨਤ੍ਥਮੇਵ.

ਗਣਪਰਿਭਾਸਨਾਦਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਕੁਲਮਚ੍ਛਰਿਨੀਸਿਕ੍ਖਾਪਦਵਣ੍ਣਨਾ

ਕੁਲੇ ਮਚ੍ਛਰੋ ਕੁਲਮਚ੍ਛਰੋਤਿ ਪੁਰਿਮਸ੍ਮਿਂ ਪਕ੍ਖੇ ਸਕਤ੍ਥੇ ਇਨੀਪਚ੍ਚਯੋ, ਤਂ ਕੁਲਂ ਅਸ੍ਸਦ੍ਧਂ ਅਪ੍ਪਸਨ੍ਨਨ੍ਤਿ ਕੁਲਸ੍ਸ ਅਗੁਣਂ, ਅਯਸਂ ਵਾ ਭਾਸਨ੍ਤਿਯਾਤਿ ਅਤ੍ਥੋ. ਭਿਕ੍ਖੁਨੀਨਂ ਅਵਣ੍ਣਂ ਭਾਸਨ੍ਤਿਯਾਤਿ ‘‘ਭਿਕ੍ਖੁਨਿਯੋ ਦੁਸ੍ਸੀਲਾ ਪਾਪਧਮ੍ਮਾ’’ਤਿ (ਪਾਚਿ. ਅਟ੍ਠ. ੧੦੪੩) ਭਿਕ੍ਖੁਨੀਨਂ ਅਗੁਣਂ, ਅਯਸਂ ਵਾ ਭਾਸਨ੍ਤਿਯਾ.

ਸਨ੍ਤਂਯੇਵ ਆਦੀਨਵਨ੍ਤਿ ਕੁਲਸ੍ਸ ਵਾ ਭਿਕ੍ਖੁਨੀਨਂ ਵਾ ਸਨ੍ਤਂਯੇਵ ਅਗੁਣਂ.

ਕੁਲਮਚ੍ਛਰਿਨੀਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬-੮. ਅਭਿਕ੍ਖੁਕਾਵਾਸਾਦਿਸਿਕ੍ਖਾਪਦਵਣ੍ਣਨਾ

ਸਮਨ੍ਤਪਾਸਾਦਿਕਾਯਂ ਵੁਤ੍ਤੋਤਿ ਸਮਨ੍ਤਪਾਸਾਦਿਕਾਯ ਓਵਾਦਵਗ੍ਗਸ੍ਸ ਪਠਮਸਿਕ੍ਖਾਪਦੇ (ਪਾਚਿ. ਅਟ੍ਠ. ੧੪੪) ਵੁਤ੍ਤੋ.

ਸਤ੍ਤਮਟ੍ਠਮਾਨਿ ਉਤ੍ਤਾਨਤ੍ਥਾਨੇਵ.

ਅਭਿਕ੍ਖੁਕਾਵਾਸਾਦਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯-੧੦. ਓਵਾਦੂਪਸਙ੍ਕਮਨਾਦਿਸਿਕ੍ਖਾਪਦਵਣ੍ਣਨਾ

ਉਪੋਸਥਸ੍ਸ ਪੁਚ੍ਛਨਂ ਉਪੋਸਥਪੁਚ੍ਛਾ, ਸਾਵਕਪਚ੍ਚਯਂ, ਰਸ੍ਸਤ੍ਤਞ੍ਚ ਕਤ੍ਵਾ ‘‘ਉਪੋਸਥਪੁਚ੍ਛਕ’’ਨ੍ਤਿ ਵੁਤ੍ਤਾਤਿ ਆਹ ‘‘ਉਪੋਸਥਪੁਚ੍ਛਨ’’ਨ੍ਤਿ. ਓਵਾਦਤ੍ਥਾਯਾਤਿ ਓਵਾਦਯਾਚਨਤ੍ਥਾਯ.

ਦਸਮਂ ਉਤ੍ਤਾਨਤ੍ਥਮੇਵ.

ਓਵਾਦੂਪਸਙ੍ਕਮਨਾਦਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਆਰਾਮਵਗ੍ਗੋ ਛਟ੍ਠੋ.