੫. ਚਿਤ੍ਤਾਗਾਰਵਗ੍ਗੋ
੧. ਰਾਜਾਗਾਰਸਿਕ੍ਖਾਪਦਵਣ੍ਣਨਾ
ਕੀਲ਼ਨਚਿਤ੍ਤਸਾਲਨ੍ਤਿ ਨ ਰਞ੍ਞੋਵ ਕੀਲ਼ਨਚਿਤ੍ਤਸਾਲਂ, ਅਥ ਖੋ ਯੇਸਂ ਕੇਸਞ੍ਚਿ ਮਨੁਸ੍ਸਾਨਂ ਕੀਲ਼ਨਤ੍ਥਂ ਯਤ੍ਥ ਕਤ੍ਥਚਿ ਕਤਸਾਲਂ. ਏਸ ਨਯੋ ‘‘ਕੀਲ਼ਨਉਪਵਨ’’ਨ੍ਤਿਆਦੀਸੁਪਿ. ਯਥਾਹ ‘‘ਰਾਜਾਗਾਰਂ ਨਾਮ ਯਤ੍ਥ ਕਤ੍ਥਚਿ ਰਞ੍ਞੋ ਕੀਲ਼ਿਤੁਂ ਰਮਿਤੁਂ ਕਤਂ ਹੋਤੀ’’ਤਿਆਦਿਕੋ (ਪਾਚਿ. ੯੭੯) ਵਿਤ੍ਥਾਰੋ. ਤਤ੍ਥ ਕੀਲ਼ਨਉਪਵਨਨ੍ਤਿ ਕੀਲ਼ਨਤ੍ਥਂ ਅਨ੍ਤੋਨਗਰੇ ਕਤਂ ਆਰਾਮਂ. ਕੀਲ਼ਨੁਯ੍ਯਾਨਨ੍ਤਿ ਤਥੇਵ ਬਹਿਨਗਰੇ ਕਤਂ ਉਯ੍ਯਾਨਂ.
ਰਾਜਾਗਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਆਸਨ੍ਦਿਪਰਿਭੁਞ੍ਜਨਸਿਕ੍ਖਾਪਦਵਣ੍ਣਨਾ
ਅਤਿਕ੍ਕਨ੍ਤਪ੍ਪਮਾਣਾਤਿ ਅਟ੍ਠਙ੍ਗੁਲਤੋ ਅਤਿਕ੍ਕਨ੍ਤਪ੍ਪਮਾਣਪਾਦਕਾ. ਵੁਤ੍ਤੋਤਿ ਪਦਭਾਜਨਿਯਂ ਵੁਤ੍ਤੋ. ‘‘ਅਕਪ੍ਪਿਯਰੂਪਾਕੁਲੋ ਅਕਪ੍ਪਿਯਮਞ੍ਚੋ ਪਲ੍ਲਙ੍ਕੋ’’ਤਿ (ਸਾਰਤ੍ਥ. ਟੀ. ਮਹਾਵਗ੍ਗ ੩.੨੫੪) ਸਾਰਸਮਾਸਾਚਰਿਯੋ.
ਆਸਨ੍ਦਿਪਰਿਭੁਞ੍ਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਸੁਤ੍ਤਕਨ੍ਤਨਸਿਕ੍ਖਾਪਦਵਣ੍ਣਨਾ
ਉਜ੍ਜਵੁਜ੍ਜਵੇਤਿ ਉਗ੍ਗਿਰਿਤ੍ਵਾ ਉਗ੍ਗਿਰਿਤ੍ਵਾ ਵੇਠਨੇ. ਕਨ੍ਤਿਤਸੁਤ੍ਤਂ ਕਨ੍ਤਨ੍ਤਿਯਾਤਿ ਦਸਿਕਸੁਤ੍ਤਾਦਿਂ ਸਙ੍ਘਾਟੇਤ੍ਵਾ ਕਨ੍ਤਨ੍ਤਿਯਾ, ਦੁਕ੍ਕਨ੍ਤਿਤਂ ਵਾ ਪਟਿਕਨ੍ਤਨ੍ਤਿਯਾ.
ਸੁਤ੍ਤਕਨ੍ਤਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪. ਗਿਹਿਵੇਯ੍ਯਾਵਚ੍ਚਸਿਕ੍ਖਾਪਦਵਣ੍ਣਨਾ
ਅਤ੍ਤਨੋ ਵੇਯ੍ਯਾਵਚ੍ਚਕਰਸ੍ਸ ਚਾਤਿ ਸਚੇਪਿ ਮਾਤਾਪਿਤਰੋ ਆਗਚ੍ਛਨ੍ਤਿ, ਯਂ ਕਿਞ੍ਚਿ ਬੀਜਨਿਂ ਵਾ ਸਮ੍ਮੁਞ੍ਜਨਿਦਣ੍ਡਕਂ ਵਾ ਕਾਰਾਪੇਤ੍ਵਾ ਵੇਯ੍ਯਾਵਚ੍ਚਕਰਟ੍ਠਾਨੇ ਠਪੇਤ੍ਵਾ ਯਂ ਕਿਞ੍ਚਿ ਵਾ ਪਚਿਤੁਂ ਵਟ੍ਟਤਿ.
ਗਿਹਿਵੇਯ੍ਯਾਵਚ੍ਚਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫-੬. ਅਧਿਕਰਣਾਦਿਸਿਕ੍ਖਾਪਦਵਣ੍ਣਨਾ
ਅਨਨ੍ਤਰਾਯਿਕਿਨੀਤਿ ਦਸਵਿਧੇਸੁ ਅਨ੍ਤਰਾਯੇਸੁ ਏਕੇਨਾਪਿ ਅਨਨ੍ਤਰਾਯਿਕਿਨੀ. ਧੁਰਂ ਨਿਕ੍ਖਿਪਿਤ੍ਵਾ ਪਚ੍ਛਾ ਵਿਨਿਚ੍ਛਿਨਨ੍ਤੀ ਆਪਤ੍ਤਿਂ ਆਪਜ੍ਜਿਤ੍ਵਾਵ ਵਿਨਿਚ੍ਛਿਨਾਤਿ.
ਛਟ੍ਠਂ ਉਤ੍ਤਾਨਤ੍ਥਮੇਵ.
ਅਧਿਕਰਣਾਦਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੭. ਆਵਸਥਚੀਵਰਸਿਕ੍ਖਾਪਦਵਣ੍ਣਨਾ
ਆਪਦਾਸੂਤਿ ਮਹਗ੍ਘਚੀਵਰਂ ਸਰੀਰਤੋ ਮੋਚੇਤ੍ਵਾ ਸੁਪ੍ਪਟਿਸਾਮਿਤਮ੍ਪਿ ਚੋਰਾ ਹਰਨ੍ਤਿ, ਏਵਰੂਪਾਸੁ ਆਪਦਾਸੁ ਅਨਿਸ੍ਸਜ੍ਜਿਤ੍ਵਾ ਨਿਵਾਸੇਨ੍ਤਿਯਾ ਅਨਾਪਤ੍ਤਿ.
ਆਵਸਥਚੀਵਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੮. ਆਵਸਥਵਿਹਾਰਸਿਕ੍ਖਾਪਦਵਣ੍ਣਨਾ
ਕਵਾਟਬਦ੍ਧਵਿਹਾਰਨ੍ਤਿ ਦ੍ਵਾਰਬਦ੍ਧਵਿਹਾਰਂ. ਗਿਲਾਨਾਯਾਤਿ ਵਚੀਭੇਦਂ ਕਾਤੁਂ ਅਸਮਤ੍ਥਾਯ. ਆਪਦਾਸੂਤਿ ਰਟ੍ਠੇ ਭਿਜ੍ਜਨ੍ਤੇ ਆਵਾਸੇ ਛਡ੍ਡੇਤ੍ਵਾ ਗਚ੍ਛਨ੍ਤਿ, ਏਵਰੂਪਾਸੁ ਆਪਦਾਸੁ.
ਆਵਸਥਵਿਹਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੯. ਤਿਰਚ੍ਛਾਨਵਿਜ੍ਜਾਪਰਿਯਾਪੁਣਨਸਿਕ੍ਖਾਪਦਵਣ੍ਣਨਾ
ਹਤ੍ਥਿਆਦੀਸੁਪਿ (ਸਾਰਤ੍ਥ. ਟੀ. ਪਾਚਿਤ੍ਤਿਯ ੩.੧੦੧੫) ਸਿਪ੍ਪਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ, ਤਥਾ ਆਥਬ੍ਬਣਾਦੀਸੁ ਮਨ੍ਤਸਦ੍ਦੋ. ਤਤ੍ਥ ਥਰੂਤਿ ਖਗ੍ਗਮੁਟ੍ਠਿ. ਆਥਬ੍ਬਣਮਨ੍ਤੋ ਨਾਮ ਆਥਬ੍ਬਣਵੇਦਵਿਹਿਤੋ ਪਰੂਪਘਾਤਕਰੋ ਮਨ੍ਤੋ. ਖਿਲਨਮਨ੍ਤੋ ਨਾਮ ਦਾਰੁਸਾਰਖਿਲਂ ਮਨ੍ਤੇਤ੍ਵਾ ਪਥਵਿਯਂ ਪਵੇਸੇਤ੍ਵਾ ਮਾਰਣਮਨ੍ਤੋ. ਅਗਦਪ੍ਪਯੋਗੋ ਨਾਮ ਵਿਸਯੋਜਨਂ.
ਤਿਰਚ੍ਛਾਨਵਿਜ੍ਜਾਪਰਿਯਾਪੁਣਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੦. ਤਿਰਚ੍ਛਾਨਵਿਜ੍ਜਾਵਾਚਨਸਿਕ੍ਖਾਪਦਵਣ੍ਣਨਾ
ਲੇਖੇਤਿ ਲਿਖਸਿਪ੍ਪੇ. ਧਾਰਣਾਯ ਵਾਤਿ ਧਾਰਣਸਤ੍ਥੇ, ਯਸ੍ਮਿਂ ਵੁਤ੍ਤਨਯੇਨ ਪਟਿਪਜ੍ਜਨ੍ਤਾ ਬਹੂਨਿਪਿ ਗਨ੍ਥਾਨਿ ਧਾਰੇਨ੍ਤਿ. ਨਾਗਮਣ੍ਡਲਾਦਿਕੇਤਿ ਏਤ੍ਥ ਨਾਗਮਣ੍ਡਲਂ ਨਾਮ ਸਪ੍ਪਾਨਂ ਪਵੇਸਨਿਵਾਰਣਤ੍ਥਂ ਮਣ੍ਡਲਬਦ੍ਧਮਨ੍ਤੋ.
ਤਿਰਚ੍ਛਾਨਵਿਜ੍ਜਾਵਾਚਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਚਿਤ੍ਤਾਗਾਰਵਗ੍ਗੋ ਪਞ੍ਚਮੋ.